للتواصل انستا zahraaahmedn99
اريد اشوف تفاعل حلو يسر الخاطر ويعوض تعبي، تعليقاتكم بين الفقرات وتصويتكم شمعاتي يسويلي واهس للكتابه.
شاركوا القصه وكبروا عائلتنه حتى نستمتع وي الهَيْصَم مع بعض.
______________
و آنة ضايّع بيَّن إيديَك الباردات وبيَّن گَلبي المحتَّرِكَ.
هَيْصَم
(الكاتبة زهراء احمد)
: دخل للغرفه ويحجي سريع.
هَيْصَم: اتحركي لازم نطلع من هذا المكان بسرعة ماكو بعد وقت.
فيروز: ليش شنو صاير؟
هَيْصَم: عرفوا المكان راح يهجمون بأي لحظه لذلك لازم نغير المخبأ حفاظاً على سلامتج.
: فكرت هاي فرصتي حتى اهرب من عنده ومستحيل اضيعها لذلك كمت بسرعة ولبست بنطلون اسود وبدي اسود للركبه حذاء رياضي ابيض وطلعت من الغرفة، صار بوجهي صفن اشويه وبعدين اقترب البدي بيه كلاو خله ايدة عليه ولبسني اياه ماعرف على منو اتصل بَعد عني و جاوبه.
ضَرْضَم: سيدي احنه كدام الباب الخلفي للبيت تگدر تطلع منتظريك.
هَيْصَم: و البقيه؟
ضَرْضَم: الجميع ينفذ بالخطه سيدي.
هَيْصَم: ممكن ما التقي بيكم اليوم لكن اخباركم اول بأول اريد اسمعها وشنو يصير وياكم سلامتكم اهم عندي اريد اشوفكم كلكم من ارجع بدون نقص واضح.
ضَرْضَم: أمرك سيدي.
رجعلي لزم أيدي سحبتها من عنده رجع لزمها بقوة أكبر وگال.
هَيْصَم: اعرف عدل كونان بلش يشتغل بداخلج ويبحث عن طريقه للهرب لكن هذا الشي مستحيل بوجودي لذلك عقلج الذكي اتركيه لأشياء ثانيه مثلاً وين راح اخذج وخلال هاي المهمه شنو تعانين وانتِ يمي.
فيروز: شنو قصدك؟
هَيْصَم: اكره الشرح النظري احب الدروس من تكون عمليه اهنا احس بمتعه اكبر.
فيروز: معقولة انت انسان عاقل؟
هَيْصَم: ماعندي شهادة من الطب النفسي.
فيروز: شنو اتريد من عندي؟
هَيْصَم: انتِ مهمه بالنسبه اليه لدرجه متنوصف و عقلج ليروح للحب لأن موضوعج اعمق من هيج بهوايه.
فيروز: يجي يوم و اخلص من عندك مراح ابقى بهذا السجن طول العمر.
هَيْصَم: تعجبيني من تحلمين احيج على هذا اصرارج وعزيمتج قله من الأشخاص المهددين يكونون بهاي العزيمة و الشجاعه وهسه خلينا نأجل هذا النقاش ونطلع من هذا المكان قبل متصيرين في فعل كانَ.
سحبني من ايدي وصار يمشي بسرعة طلعنه من باب البيت الخلفي لأن هذا بيه بابين اول مفتحه جانت اكو ثلاث سيارات واربع رجال نفس الشوارب والهيئة مالت هَيْصَم لكن بيهم واحد حلو حيل شكله ابيض يعني مميز بينهم مجانوا لابسين زي عسكري ولاسياراتهم عسكريه بس عرفتهم اصدقاءة لأن مبينين على نفس شاكلته ايضاً عضلات وكذا،
اقترب واحد من عدهم ردت استغل الفرصه من يحجي وياه اهرب وفعلاً بديت تنفيذ خطتي من ترك أيدي ونشغل بالسوالف بس ماعرف شلون انتبه عليه واني ارجع بخطوات بطيئة ليورة التفتلي وخزرني ويا الله من يخزر عيونه تجحظ لبره وتصير جبيره نوعاً ما يخوف من صدگ بلعت ريگي واني اشوفه يأشرلي على أيدة حتى ارجع الزمها وكأني طفله وأبوها يعاقبها، محبيت هذا التسلط من عنده لكن رجاله حاوطو المكان يعني المفر من عرينه مستحيل، اتقدمت وگفت قريب من عنده وحضنت أدية سوه، اخذت نفس بتذمر من رجع سحب أيدي وحضنها وي أيدة بادئ الأمر مجان يحب اللمس والتلامس وهسه صار يصنع موقف يلزمني بيه غصب، مشاعر ملخبطه تجتاحني من هذا القرب ومع ذلك مازلت مصره على التماسك وما احبه على رغم اني محبيته لحد الآن وماعندي اي شعور اتجاه ابد.
ركزت وياه وشنو يحجي وي هذا الرجال اعتقد جان اسمه لائِث هيج سمعت ايصيحه طلع مو هو بس يمتلك اسم غريب اصدقاءة همات نفس الشي.
هَيْصَم: التزموا بالخطه وبعد يومين اني ارجع لهنا تمام.
لائِث: ولو الموضوع كلش صعب لكن كون مطمأن ان شاء الله نگدر نسيطر على الوضع.
هَيْصَم: اريد تبقوني على اطلاع بكل شي يصير وياكم لائِث اعتمد عليك.
لائِث: تحت أمرك هَيْصَمنا.
هَيْصَم: احترمني اهنا على الأقل ابني لتذب ميانه.
لائِث: الزم بيهم بأيدك ورجلك متعرف شلون يغدروك ويهربون.
هَيْصَم: منو يگدر يهرب من عرين الأسد لائِث؟!
لائِث: والله اني شايف الأسد اللي ميگدر يتخله هاي المرة مو الفريسه، لتوگع تره الوطن بشاربك سيدي.
هَيْصَم: اترك هذا النقاش الماصخ واتصل بيهم صار ربع ساعة ليش اتأخروا؟
لائِث: خليله ملح و انتبه لتكثر حتى ميرتفع ضغطك حبيب.
هَيْصَم: بطل تفاهه واتصل بيهم يلا.
لائِث: تفاهه لو برتقاله؟
ضحكت على كلامه هذا الرجال والله يحشش حسيت بيه يضغط على أيدي حيل گرصته بأصبعه على باله هاي الحركات اتخليني اخاف من عنده واطيعه ميعرف اني حتى لو اخاف اتظاهر بالشجاعه المهم ميلزم عليه نقطة ضعف، شويه وتقدم من عدنه رجال ثاني طويل ولو هم كلهم اطوال لكن هذا الحلو بيهم يعني شكله نوعاً ما بريئ تشوف بملامحه هدوء وسكينه عكس البقيه نظرتهم شرسه وشكلهم غامض قترب من الهَيْصَم وگال.
هَمَّاس: سيدي اصعد السياره الجماعه وصلوا.
هَيْصَم: انتبهوا على نفسكم اريد اشوفكم كلكم من ارجع.
هَمَّاس: تأمر سيدي.
ضربوله تحيه الكُل حتى اللي واگفين بعيد عنه، اخذنه للسيارة صعدني بالصدر وطلع كلبچه خلاها بأيدي والثانية خلاها بالباب حجيت بيه بعصبية: لتعاملني بهاي الطريقة وكأني مُعتقل، افتح ايدي لتخاف مراح اهرب وانت مكثف مراقبتك عليه.
هَيْصَم: ولي صار قبل اشويه شنو تسميه؟
سد الباب ومسمع جوابي صعد مكان السايق وبقى اللاسلكي مالته يشتغل مسكت ابداً دقائق قليله سمعت صوت اطلاق نار ورانه صحت بيه بعصبيه: اذا انت حياتك متهمك حياتي مهمه معشت كل هذا العذاب حتى اموت بدون هوية من اجل تحقيق أهدافك.
هَيْصَم: اهدأي مراح يصير شي كوني مطمأنه اخذي نفس عميق وشغلي بالج بأشياء حلوة حتى نوصل.
فيروز: انت بوعيك جديات والله دا احجي؟!
يا اخي اطلاق نار على اي دقيقة ممكن يصوبون سيارتنه وبعدها بح نصير ماضي، معقولة لهاي الدرجة انت فاقد الأحساس؟
هَيْصَم: ممكن جداً.
فيروز: غثيث.
هَيْصَم: صفه جيدة لأن بالعادة الأنسان من هيج نوع يضر الأخرين ميضر نفسه.
فيروز: هَيْصَم الله يوفقك لتسوي ويايه هيج اني بشنو أذيتك حتى تعاملني بهاي الطريقة؟!
هَيْصَم: لَّباءَة اسمعي و ركزي ويايه تمام، هاي السيارة مضادة للرصاص بالأضافة الأشخاص اللي يرمون مراح يقتلونا كوني مطمأنه غير هيج لتسألين لأن ماعندي جواب.
فيروز: بس اني ما اتحمل هيج وضع ممجبورة اعيش حرب نفسيه عقليه، بحجه تحمي حياتي راح ادخل مستشفى مجانين.
هَيْصَم: بوقتها اضمن تلقيج العلاج من اشطر الأطباء وشرط ميكون عراقي.
فيروز: ليش شنو ناقصهم العراقيين؟
هَيْصَم: ما اثق بيهم كلهم ماعدا واحد.
فيروز: السبب؟
هَيْصَم: بدون سبب هيج من الله عندج مانع؟
فيروز: ماعندي صيدلية.
هَيْصَم: هه متضحك.
فيروز: هه مردت اضحكك.
هَيْصَم: جوعانه؟
فيروز: ليش هو الوضع الحالي ايخليني احس بجوع؟!
هَيْصَم: اني بنص الهجوم اكُل لذلك عندي هذا الوضع شي طبيعي جدا وعليه سألتج حتى اجيب شي تاكليه.
فيروز: من نوصل ناكُل ممشتهيه هسه.
هَيْصَم: راح انطول مسافه كلش بعيدة متگدرين تتحملين كل هذا الوقت بدون متتغذين.
فيروز: هَيْصَم خليني بالصورة على شنو ناوي حضرتك؟
هَيْصَم: كل خير ان شاء الله.
فيروز: انت من تگول هاي الجمله اقسم على انو ماكو خير منتظرنه.
هَيْصَم: جيد لتتفائلين احسن، متعرفين اشوكت يغدرج الحظ السيء ويخرب كل احلامج فجأة وبدون سابق انذار.
فيروز: حتى لو عندي ذرة أمل من اشوفك كدامي تتبخر.
هَيْصَم: اكو مقوله كلش احبها على رغم اني ما احب اقرأ لكن هي من ضمن بعض المقولات اللي ترسخت بعقلي يكول بيها الكاتب الروسي دوستويفسكي ( لا تسمحوا لمجرد يوم جميل أن يشعركم بأن لديكم حياة سعيدة، حياتكم جحيم وستبقى كذلك).
فيروز: والله صارت جحيم من تعرفت عليك عيشتني بفلم من هوليوود.
هَيْصَم: جميل جداً لأن مستحيل توصليلها بالواقع كوني شاكره اليه على هذا المعروف القدمته لحضرتج ست لَّباءَة.
فيروز: اني متأكدة الطينه اللي نخلقت من عدها ممزوجه بمغثة وشويه ازعاج ونكد، انسان مثلك بعمري مشفت ماعرف من شنو مصنوع.
هَيْصَم: تصحيح اني مخلوق مو مصنوع بالأضافة انتِ دارسة علمي وتعرفين الأنسان بأي طريقة يتكاثر، اللي انخلق من طين هو فقط النبي أدم عليه السلام اما نحنُ جميعاً انخلقنه بالطريقه اللي درستيها بالسادس.
فيروز: انت شلون عرفت اني دارسه علمي تخصصي موجود حتى بالأدبي.
هَيْصَم: تتوقعين اخليج يمي كل هاي المدة بدون ما اعرف شي عنج؟
فيروز: شنو السبب، ليش بحثت بماضيي؟
هَيْصَم: وليش حتى ما ابحث؟
فيروز: لتجاوبني بسؤال.
هَيْصَم: اسألتج غبيه حيل لذلك ماعندي جواب الها.
فيروز: وين الغباء بالموضوع سؤال وجيه بس انت متريد تجاوبني وتريح عقلي من التفكير.
هَيْصَم: وهذا جيد حتى ينشط الدماغ وميبقى عقلج في حالة خمول.
فيروز: مستحيل اوصل وياك لنتيجة افضل شي ما اتجادل وياك.
هَيْصَم: واخيراً راح تخليني اعرف اسوق مثل الأوادم صدگ من كالوا النساء مزعجات.
فيروز: يعني فوگ مخاطفني تسميني مزعجه انت شنو من بشر؟!
هَيْصَم: ناقذج اني ليش متفهمين؟!
فيروز: رجعني لحياتي واني افهم افضل متاخذني لمكان ماعرف شنو هو.
هَيْصَم: بيت مثل اي بيت ثاني مراح اخذج للفضاء.
فيروز: لو تاخذني للجنه بما انو هي مو بيتي مراح احس بالأمان خلي عندك علم.
هَيْصَم: احاسيسنه مجرد كذبه جبيرة الواقع يدمرها كل يوم ومع ذلك نبقى عايشين بهذا الوهم ومنقبل نفيق من عنده على رغم جميع الأدلة تثبت على انو التغيير مستحيل لكن احنه مصرين لازم نغير وننصدم بحياة بائسة جداً ويبقى التغيير موجود بمخيلتنه فقط لا أكثر لذلك لتتوهمين بأمكانيه التغيير، اذا وگع الفاس بالراس لارجعه وماكو مفر، اتقبلي الواقع وبطلي احلام حتى لو انتهت هاي العملية مراح ترجعين لَّباءَة السابقة.
فيروز: ليش انت متشائم لهاي الدرجه؟!
هَيْصَم: الحياة تعلمج وتصقلج بطريقة عجيبه البعض ينولدون بفمهم ملعقه من ذهب ومقدر الهم حياة ورديه والبعض الثاني ينولدون بقدر اسود وغامض و غريب ومؤذي جداً ونكتب على جبينهم العناء والأنتقام.
فيروز: وانت اي واحد من عدهم؟
هَيْصَم: شنو برأيج؟
فيروز: انت اللي تحدد هذا الشي الأنسان منخلق مسير بالحياة احنه النختار طريقنه بالطريقه التعجبنه بالأضافة اكو قسم ثالث انت مذكرته المنتصف وهم اللي يختارون مصيرهم ويختارون طريقهم بأيدهم ويتبعون الأية الكريمه ( فأذا عزمت فتوكل على الله) بمعنى انت تگدر تعيش مثل متحب وممجبور ابداً تتقيد بشيء ما شنو مكان، الحياة حياتك وانت اللي تقرر بأي طريقه لازم تعيش.
هَيْصَم: غلطانه اني غير مسؤول عن حياتي مو اني فقط وانما جميع اللي بالسلك العسكري دمائنه وأرواحنه فداء للوطن لايجوز ابداً التهاون او الغفله، اي شي يصير اكون مسؤول امام الله وامام ابناء بلدي، انتقامي وحقدي مو شخصي ابداً وانما لكل أرمله وثكلى ويتيم لكل شخص سالت دماءة على هاي الأرض بدون ذنب ولكل شاب ادمن المخدرات حتى يربح كم شخص فاسد لكل ابنيه انقتلت بحجه الشرف من قبل ناس همج متعرف شنو دين ودوله، انتقامي لكل ابنيه متگدر اليوم تشتكي على المغتصب ولا على المتحرش، انتقام الهَيْصَم لكل عراقي شنو مكانت طائفته وفصيلته وعرقه اني ابن هذا البلد وانتمائي اله روحي ودمي و جسمي فداء اله لأخر نفس لذلك حياتي وقراراتي مو بيدي.
فيروز: قلة من الأشخاص الوطنين مثلك بعض الأحيان احسد نفسي عدنه هيج ضباط اكفاء يخافون على الوطن ويبحثون عن استقراره وحفظ أمنه.
هَيْصَم: بديتي تحبيني لَّباءَة؟
گال هيج ورفع حاجبه يباوعلي منتظر جوابي ابتسمت بستهزاء وحجيت بكل ثقه: بأحلامك، انت آخر انسان ممكن افكر اسلمه گلبي يوماً ما حتى لو كان عندي فيض مشاعر مراح اخسرها عليك كون واثق.
هَيْصَم: أفضل لتحبيني اني اصلا اريدج متقعين بحب الهَيْصَم لأي سبب كان.
بعد هذا الكلام اثنينه التزمنه الصمت بس بقيت انتبه على حركاته طلع حامض حلو من صندوگ السياره وخلاه بحلگه بقى يسوق فتره طويله واني من التوتر والخوف محسيت بنفسي شلون نمت فزيت على صوته وهو يگعدني.
هَيْصَم: لَّباءَة فتحي عيونج.
فيروز: خير شنو تريد ليش گعدتني من النوم؟
هَيْصَم: انتِ مأكلتي شي لحد الآن وجبتلج شي تاكليه وفتحت ايدج هم يعني تگدرين تستخدميها اجتازينه منطقة الخطر.
فيروز: فكرت وصلنه وين ماخذني انتَ، ليش اتأخرنه بالسياره لهذا الوقت!
هَيْصَم: فقط نص ساعه نمتي، يا وقت تحجين عليه هي مجرد ساعتين بعدنا بأول الرحلة لتنزعجين من بدايتها.
فيروز: راح تهربني خارج البلد صار ساعتين وبعدك اتگول بعد وقت حتى نوصل وين ماخذني هاي آخر مره اسأل والا.
هَيْصَم: شنو تسوين؟
فيروز: والخالق أرمي نفسي من السياره وما اسأل عن حياتي على الأقل اعرف المكان اللي اروح اله بعد الموت.
هَيْصَم: ابواب السياره مقفوله يؤسفني اخبرج انتِ مجبره تكملين الطريق وياي.
فيروز: لازم اكو حل ميصير نبقى هيج مثل توم جيري.
هَيْصَم: عادي نصير مثل عدنان ولينا.
غمز بنهايه جملته الشي اللي نرفزني حيل كميه البرود العندة متوصف: راح تصيبني سكته قلبيه بسببك.
هَيْصَم: اعرف اسوي تنفس اصطناعي انقذج وما اخليج تموتين بدون أذني.
: اخذت نفس عميق وقررت اسكت الحديث وياه يعصبني مو أكثر، شويه وخله علاگه بحضني رفعت راسي اله وگلت بتساؤل: شنو هاي.
هَيْصَم: عبوة حاب افجرج حتى تخلصين من عندي.
فيروز: استغفر الله.
هَيْصَم: عندج هوايه ذنوب عفيه استغفري.
فيروز: لمرة وحدة بس جاوب على سؤالي بدون لف ودوران.
هَيْصَم: سؤالج غبي اني كتلج اول مگعدتي من النوم إني جبتلج اكل شنو الداعي تسألين على العلاگه؟
فيروز: نسيت ليش انت اتخلي عقل عندي؟
هَيْصَم: لهاي الدرجه شاغل مخج وممخليج تركزين بشي!!
فيروز: صح لأن عقلي يتسائل ياترى انت شنو صنفك من البشر؟
هَيْصَم: المستذئبين.
فيروز: افضل شي اكُل الكلام وياك مبيه نتيجه، فتحت العلاگه جان بيها لفتين شاورما وبطلين لبن ومي باوعتله وگلت: وگف السياره بمكان فارغ، التفتلي وعقد حاجبه بتساؤل.
هَيْصَم: ليش؟
فيروز: ما اگدر اكُل وانت تسوق اتمرض وانت تتعذب ويايه هاي اني كتلد.
هَيْصَم: مسافه خمس دقايق ونوصل لمكان مناسب تگدرين وقتها تاكلين براحتج.
صفنت على الطريق مجرد شوارع فارغه مكان اول مره اجي بيه صحراء ماعرف وين احنه هسه لكن رغم عصبيتي من عنده ومحاولاتي للهروب اكو شي داخلي مطمأن اله بشكل عجيب احس بالأمان بوجودة هو شكله يبعث راحه لگلبي هذا الأحساس جان موجود فقط وي بابا وهسه وي هَيْصَم، صحيت من صفنتي من وگف السياره.
هَيْصَم: هسه تگدرين تاكلين.
طلعت لفه وقدمتها اله ابتسم شبه ابتسامة وگال.
هَيْصَم: منو كلج اني جوعان؟
فيروز: طلعت من البيت بدون أكل وما اعتقد اكلت شي طول الطريق لذلك لازم تاكل هسه.
هَيْصَم: ممشتهي شي اكُلي انتِ.
فيروز: اذا مأكلت مراح اكُل.
هَيْصَم: تهددين حضرتج؟
فيروز: من الأصول متقدم شي لضيفك اذا متشاركه بهاي الحاله الضيف يخجل من عندك.
هَيْصَم: انتِ والخجل متنجمعون بالأضافة انت مختطفة من قبلي مو ضيفه.
فيروز: اذاً ايصير اصراري اكبر منو يگول ممخليلي سم مثلاً.
هَيْصَم: لو نيتي القتل متعبت بالتخطيط حتى انقذ حياتج بهاي الطريقة.
فيروز: خصم الكلام اكلي مرتبط بأكلك وانت قرر.
هَيْصَم: ماعرف ليش لكن احساس قوي عندي و شعور غريب ينتابني وصوت يهمس بداخلي يا هَيْصَم لَّباءَة بدت تقع في غرامك.
فيروز: صاير هوايه تحلم وهذا الشي مضر بالعقل ويبعد عن الواقع سيادتك.
هَيْصَم: جعل محد غيرج يگول سيادتك.
فيروز: ملت زايد الف مرة كتلك لتتغزل.
هَيْصَم: ليش هذا غزل؟!
غمز و ابتسم بنفس الوقت، هوايه يخسر غمزات وانتبهت عندة غمازة بخدة اليمين تظهر بوضوح من يبتسم بقيت صافنه عليها فززني من گال.
هَيْصَم: متفقنه هيج لَّباءَة.
فيروز: مفهمت.
هَيْصَم: اللفه اتأخرنه لازم نكمل الطريق.
أكل لفته واني هم كملنه وساق السياره رجعت راسي على الكشن ودخلت بالنوم مرة ثانية، اني هوايه انام وعندي قابليه للنوم بجميع الأوقات فقط احتاج هدوء يمي و بسرعه ادخل لعالم الأحلام.
حوري: اوقات تجنن وايام ولاأروع هيج اتكون الأجواء بالقرب من الناس اللي تحبهم، گلوبهم بيضه وبسطاء الى حد بالتعامل مع الكل، استمتع حيل من اخلص وقت عطلتي يمهم، اهلي كلهم يحبون بيت خالتي ف ماعدهم مشكلة بالأضافة هم ماعدهم رجال هوايه بس ثنين ومموجودين، ابنهم الأكبر هَيْصَم صديق أرفد المقرب صح همَ مو نفس المحافظة جانوا عايشين بس هم مقربين شلون ماعرف، من جنت طفله ويجي زيارة أرفد دائماً جان يضحك وياه ويگله حوري متصير لغيرك، ما اذكر من عنده هوايه تفاصيل شايفته كذا مره مو أكثر حتى ملامحه ناسيتهم اما الأصغر فهو نسخه مصغره من الأكبر مثل متوصفه خواته هذا اني شايفته هوايه وعندي تواصل وياه بس هو غامض و تصرفاته غريبه بعض الأحيان يعني متاخذ من عنده لاحق ولا باطل يگولن خواته صار هيج بعد وفاة والدة ومن تخرج من السادس قدم دراسه خارج العراق وسافر و لهذا اليوم مشفته تقريبا صار سنتين هو ميقبل يرجع حتى بالعطل اما خواته اللي اهنا اصغرهم عمرها 23 واكبرهم 33، صحيت من صفنتي على صوت آمندا.
آمندا: الصفنه مو الج يحلوه.
حوري: لعد لمنو؟
آمندا: ابو صابر منو غيره.
: ضربتها بالمخدة اللي يمي: غبيه تشبهيني بأبو صابر!!
آمندا: ليش شنو ناقصه وانتِ مقابله؟
على الأقل متونس بحياته مو مثلنه محبوسين بالبيت صار اربع اشهر مشايفه شنو شارع وين العدل برأيج.
حوري: لو ميخاف عليكم ميسوي هيج انتِ تعرفيه اكثر من عندي.
آمندا: اللي يخاف يترك ميحتاج يبقى بعمل يعرف شنو نهايته راح يدمر حياته، الخطر محاوطه من كل جهة بس هو مصر ماعرف شنو مستفاد، مخلينه عايشين برعب، يوميه انزل لغرفة امي اسمع صوت بچيها تبقى هيج لصلاة الصبح شنو ذنبها هي حتى تخسر ابنها؟
حوري: لتگولين هيج، ان شاء الله يرجع سالم ومصاير اله شي تفائلوا بالخير تجدوة ليش متشائمة؟!
آمندا: انتِ متعرفيه هو مستعد يرمي نفسه بالنار بس حتى.
حوري: مكملت جملتها بسبب ريهاف اللي دخلت للغرفه وصاحتنه.
ريهاف: انزلوا ويايه الغده صار جاهز.
هاي البنيه كلش هادئه ومتقبل على الخطأ اتحب النظام والقانون لازم يمشي على الكل هي اكثر وحدة عاقله بالتعامل واتخاذ القرارات وخالتي معتمده عليها بكل أمور البيت، نزلنه وصارت بوجهنه آريا مكتفه أديها لصدرها وترمقنه بنظرات غضب.
آريا: اي الفتيات الحسنوات واخيراً شرفتن.
ريهاف: اسكتي و لتسوين مشكلة متنكلب الدنيا اذا محضرت الأكل ويانه.
آمندا: فديت أختي هفهوفه الوردة وانتِ الشوكه اليابسه وخري عن طريقي لا العب بخلقتج لعب، المفروض تحترمين اختج الأكبر بس انتِ تسوين العكس دائماً.
آريا: شنو الغلط بكلامي القانون على الجميع لو انتِ على راسج ريشه!!
آمندا: شفتها بجناحاتج وعجبتني لذلك خليتها حلوة مو؟
آريا: اليوم غسل المواعين عليج والله ما اغسلهم.
ريهاف: خلص انتِ وهي وتعالوا خلو نخلي الأكل على السفرة، وانتِ حوري بلا زحمة ممكن تصيحين امي تلگيها بغرفتها.
حوري: تدللين، رحت يم الغرفة مالتها وطرقت الباب سمعت صوتها تسمحلي بالدخول فتحت الباب وفتت يمها شفتها تمسح بعيونها و مخليه صورة بحضنها رجعتها للمجر اول مشافتني ابتسمت بوجهي وأشرتلي اگعد يمها ونطلقت بكلامها ويايه.
كلاثم: اني وامج خوات من نفس الأم والأب لكن اقدارنه مختلفه بس اكو شبه واحد ابنها وابني اثنينهم ملوعين گلوبنه بعنادهم، صار اكثر من شهرين مسامعه صوته اتصل بيه ويطلع مغلق ميفكر ام وگلبها عليه نار، الله يشهد حتى الليل ما أگدر انامه كل وقتي مشغول بيه، أكل لو لا، بردان لو جوعان، مرتاح لو متعذب، بالي يمه، اللگمه ما اتهنه بيها اذا هو مموجود وهو مامهتم كتلوا ابني بيدهم وحرموني من ضحكته الله ليوفقهم ان شاء الله.
حوري: مفهمت شنو تقصد ومحبيت اسأل عن معنى كلامها لأن شفتها ارتبكت و مسحت ادموعها وكامت وصاحتني حتى اكوم وياها ونطلع نتغدة وبين سوالف وضحك ومناوشات بين آريا و آمندا خلص هذا اليوم.
: فزيت من النوم التفتت ملگيته موجود بالسياره دقات خوف نبضت بداخلي ياترى وين احنه وليش هو مموجود انتبهت لللافته الكدامي "البصرة ترحب بكم". معقولة شنو نسوي بهذا المكان وليش جابني لهنا اجيت افتح باب السيارة بس مقفوله بقيت اباوع بتمعن والقلق موتني واني كل دقيقه فكره تطفر بعقلي، مره اگول تركني وراح ومره اگول راح يدز واحد يقتلني، من كثر التوتر اللي اني بيه حسيت نفسي بردت يمكن ارتفعت حرارتي بقيت اردد آيات قرآنيه وخاصتاً هاي الأيه ( الا بذكر الله تطمأن القلوب) ارتاحيت شويه واخذت نفس بقيت اباوع للطريق شويه وسمعت صوت الباب ينفتح التفتت ناحيته شفته هو وبأيدة بطل مي گعد على الكشن وسد الباب واني عطت بيه بدون مقدمات: اكو شخص عاقل يسوي اللي سويته شلون تعوفني وحدي بمكان غريب وتنزل هااا؟!
التفتلي وكان شكله غريب الحزن مخيم على وجه وعيونه حمر دم الواضح عليه التعب من شفت هيج حالته قررت اسكت وما ازيدها عليه وماعرف شلون طلعت من عندي هاي الكلمات: اسفه مجان قصدي شي بس لأن فتحت عيوني واني وحدي خفت مو أكثر.
حركلي راسه بمعنى مو مشكله انتبهت لنفسي شنو حجيت غميت نفسي بداخلي على هيج غباء شنو الداعي حتى اعتذر هو الغلطان مو أني.
استمر ايسوق والهدوء سيد الموقف فقط اصوات انفاسه واضحه امبين منزعج جداً بس ياترى شنو صار وخلا ينگلب هيج بهاي السرعه؟!
بقيت صافنه على حركه السيارات، اباوعلها و بداخلي اصنع قصه خيالية لكل شخص يمر من يمي، مو الجميع سعداء ولا كل غني مرتاح، كذبه جبيره الفلوس تجلب السعادة كانت حياتي كلش بسيطة بس مجنت اتمنى يومي يخلص، الأبتسامه متفارق وجهي والراحه النفسيه ملازمتني بكل وقت على عكس هسه ماعرف شنو راح يصير ويايه و القدر شنو ضاملي، هم يجي يوم وأرجع بيه لحياتي الطبيعية وتصير هاي المغامرة مجرد ذكرى تمر على بالي بوقت النوم؟
صحيت من صفنتي على توقفه كدام مطعم نزل من عنده وک العادة قفل السيارة وتركني وحدي دقايق ورجع بأيدة علاگه خلاها بالمقعد الخلفي ورجع لمكانه و استمر ايسوق فتره قصيرة او وكف السيارة كدام بيت طابقين، شكله طبيعي مثل باقي البيوت، بقيت صافنه عليه محسيت اله وهو يحجي ويايه.
هَيْصَم: مراح تنامين اهنا صح؟
فيروز: هااا.
هَيْصَم: انزلي وصلنه.
فيروز: شنو هذا المكان؟
هَيْصَم: البيت اللي راح تبقين بيه فتره من الوقت حتى نلگي حل ثاني.
فيروز: وحدي؟
هَيْصَم: خلال هاي اليومين راح اكون متواجد بعدها اشوف شلون نحلها لتفكرين لبعدين عيشي اللحظة لَّباءَة.
نزلت وهو اجه بصفي لزم أيدي وفتح باب البيت اول مفتت شجرة ذابله صارت بوجهي، التراب مالي المكان الواضح هذا المكان مهجور قبل ما اسأل گال هو جمله شرحتلي كل شي.
هَيْصَم: عدم وجود الأهل ماكو طعم للذكريات مو صح لَّباءَة؟
فيروز: ومع ذلك حابه احس بوجودهم حواليه هذا الشي يحسسني بالأمان والراحه.
هَيْصَم: ماكو راحه بمكان تمليه صور اشخاص فقدناهم واحنه بأمس الحاجه الهم، انو تحسين بوجود شخص يحضنج فرق شاسع بين هذا الشخص من يحضنج بالواقع، الذكريات هي مجرد سموم مؤقته تنخر بخلايا الجسم بطريقة بطيئه وتخليج تتعذبين بشكل مأساوي وكلما تفكرين وصلت النهاية تصدمج الحياة انو بعدنا بداية الطريق.
فيروز: اذا رب العالمين قرر احنه شنو بأيدنه نسوي؟
هَيْصَم: وهنا تُسكب العبرات، متعرفين تزعلين لو تشكرين لو تصبرين، الفقدان مشابهه للسرطان ينتشر بجسمج ويخليج بعذاب مستمر ما اله حل ابد.
فيروز: لكن للسرطان علاج ورب العالمين ميترك احد وحدة يسير بدروب الحياة لازم يدز شخص يكون اله سند وينسيه كل حزنه ويغيره لفرح و سعادة.
هَيْصَم: متفائله هوايه.
فيروز: بأصعب الظروف متركني وحدي هو ايضاً مراح يتركك، مخلقنه حتى يعذبنه وهو اقرب الينا من حبل الوريد.
هَيْصَم: ندخل؟
فيروز: البيت بيتك واني ضيفه.
دخلنه جوه، الأثاث كله مغطيه بنايلون اقترب من عنده وسحبه كله انتبهت على أيدة تنزف وهو غير مهتم اقتربت من عنده بسرعة وصحت بيه: هَيْصَمم.
باوعلي برفعة حاجب: ايدك تنزف عندك اسعافات؟
هَيْصَم: موجوده بالجنطه هسه اجيبها وي الأكل.
طلع اشويه ورجع بأيدة الأسعافات والأكل اخذته من عنده وخليته على القنفه على رغم البيت مليان تراب وبيوت عنكبوت وغبره وقذر الى درجة بس مع ذلك لازم اتحمل هذا الوضع حتى اعقم جرحه وابلش انظف حتى لو اني تعبانه على الأقل الصاله تصير نظيفه ونگدر نگعد بيها، سحبت الأسعافات من عنده وهو نزع القميص واني عطت بيه:
سوالف مهند التركي بطلهااا.
هَيْصَم: مراح تعقمين فوگ القميص للضرورة احكام مو هذا معتقدج؟
فيروز: انشوف شنو نهايتها وياك سيد افندي.
هَيْصَم: كل خير ان شاء الله.
اتذكرت الصبح من شفت اكو دم بأيدي من جان لازمني الضاهر أيدة نازفه واني طخيت بيها لذلك تلطخت بس ليش نسيت اكله ولو هو اصلاً مجان الوضع يسمح بعد كل اللي صار، هسه صار جاف على البلاستر ونازف مره ثانيه بس مو حيل هوايه، رفعت راسي صارت عيني بعينه ارتبكت وتوترت من هذا القرب بس حاولت اسيطر على نفسي واقطع هذا التأمل: شلون اگدر افتحه الدم متخثر على الجرح؟
جاوبني وهو يهمس قريب وجهي.
هَيْصَم: مثل مسويت أني من نزفتي.
: جاوبته بنفس النبرة: وانت شنو سويت؟
هَيْصَم: رفعت قميصج وصبيت كل علبه المعقم على الجرح حتى اگدر افتح البلاستر وميتأذة الخياط.
فيروز:تتأذة.
هَيْصَم: فدوة، المهم انتِ بخير لَّباءَة.
نبرته تغيرت و اقترب من عندي اكثر عيونه تعبث بملامحي براحتها مره يناظر عيوني ومره ينزلهم لشفايفي عرفت شنو نيته سحبت العلبه مالت المعقم وفتحتها وهو بعده صافن ماتحرك واني هم حاولت ابقى بنفس الوضعيه حتى ما أشتت انتباهه كبيتها على ايدة وهو عقد حاجبه بألم فتحت البلاستر وغيرته وكمت من مكاني حاولت ارتب المكان گد ما اگدر وصار شويه افضل بعد مشلت النايلون وطلعته بره وشغلت الأضويه سألته و الفضول يقره الف:
البيت الواضح عليه مهجور ليش الكهربائيات تشتغل بشكل جيد؟
هَيْصَم: لأن مرات اجي لهذا المكان لذلك احافظ على الكهربائيات سليمه.
فيروز: تجي لهذا المكان وهو هيج؟!
هَيْصَم: طالع عندي شي مهم ساعتين وارجع انتبهي لنفسج وها الباب راح ينقفل والمدينه غريبه و الناس مو أمينه لتسوين حركات بطوليه واضح.
: تركني وطلع، اني ميته جوع فتحت العلاگه وطلعت لفه گص مشتري اربعه مع بطالة مي اكلت لفه وشربت مي ونمت على القنفه من يرجع اسأله عن ادوات التنظيف حتى انظف المكان هسه تعبانه كلش، دخلت بالنوم بسرعه ومحسيت الا على صوت حركه بالبيت فتحت عيوني الكهرباء مطفيه وما اشوف شي وحتى السماء الليلة بلا قمر، خفت حيل والرعب دب بجسمي واني اسمع هذا الصوت يقترب أكثر..
يتبع..
تفاعلكم اللي يسوي واهس وتعليقاتكم بين الفقرات وتصويتكم للبارت يحلوين
تصبحون على الف خير.
لأي شي يخص القصه تعالوا يمي انستا..
تابعنا وما يفوتك جديد
اختر المنصة اللي تناسبك وتوصلك الفصول أول بأول.
التعليقات (0)
جاري تحميل التعليقات...
لا توجد تعليقات بعد
كن أول من يشارك برأيه!