للتواصل انستا zahraaahmedn99
اريد اشوف تفاعل حلو يسر الخاطر ويعوض تعبي، تعليقاتكم بين الفقرات وتصويتكم شمعاتي يسويلي واهس للكتابه.
شاركوا القصه حتى تكبر عائلتنه ونستمتع وي الهَيْصَم مع بعض.
_________
وكيفَ أُخفيكِ والأشعارُ تفضَحُني ولوعةُ الحبِّ، والأشواقُ، والصُّور؟
هَيْصَم
( الكاتبة زهراء احمد )
بقى الخوف ياكل بگلبي حسيت نفسي مثل المصاب بالشلل رجليه متگدر تحملني اكثر، وگعت على الكاع، اصوات الخطوات اقتربت وريحه جگاير وصلتني دقايق او يمكن ثواني ماعرف بالضبط صارت انفاسه تلفح بوجهي، جسمي رجف لدرجة حسيت اعظامي يتضاربون مع بعض، عرفته مو هَيْصَم لكن منو هذا اللي يتجرء ويدخل بيته بهاي الطريقة الأجراميه، عرفت معنى كلامه وشكد هو صح هم، لعد شگد جنت ظالمته اني، بلعت ريگي وهذا الشخص بقى بمكانه حسيته يباوعلي على رغم اني ما اشوف شي بسبب الكهرباء شجعت نفسي وحجيت بصوت متوتر: انت منو وشنو تريد من عندي؟
التزم الصمت ومحجه شي، فجأة خطر على بالي اللي خطفني جحظت عيوني واني اتخيل راح يحاول ايسويها مرة ثانية وخاصتاً الوضع يسمح كون محد موجود غيري،
اهنا حاولت اقوي نفسي اكثر ولو اللي اني بيه يعدم الطاقة بالكامل مع ذلك قويت نفسي ورجعت ليوره بس أيدة لزمتني من أيدي وسحبتني من عدها رجعني لنفس المكان انفاسه اللي ممزوجة بريحة جگاير تضرب بوجهي اتسارعت نبضات گلبي بالتزامن مع أيدة اللي مررها على وجنتي بهدوء صعوداً ونزولاً، الواضح جان لابس كفوف لأن حسيت بيهم، ثبت اصبعين الأبهام والسبابه تحت فكي ورفع راسي من عدهم اني ما اشوف شي غير النار الضاهره من جگارته بس هو امبين يشوفني بوضوح اشلون ماعرف،
سمعت الباب انضرب هو كام من مكانه وصارت الخطوات تبتعد دقايق واشتغلت الكهرباء، اني بقيت نفس مكاني واتنفس بسرعة لو مو الباب هسه اني شنو صار بيه؟
اذاً صدگ حياتي مهدده بالخطر وعلى رغم حمايته اليه لكن بقوا يحلاقوني زين اريد احد يشرحلي السبب مو والله راح انجن، كمت من مكاني وحاولت ادور على الموبايل اتذكرت إني مخليته بجيب البنطلون طلعته وحاولت اتصل بيه شفتها الساعة عشرة يعني صار اكثر من اربع ساعات هو مختفي، اتصلت بيه اكثر من مره موبايله مغلق لو خارج نطاق التغطيه بقيت اكل بنفسي معقولة صار بيه شي؟ اتصوب لو قتلوه، يا الله نخر عقلي التفكير واني وحدي بمنطقة غريبة وبيت مهجور من منو اطلب المساعدة واني اصلاً ماعرف احد، قويت نفسي ببعض الكلمات وبقيت اقرأ الأدعيه والأيات القرآنيه الحافظتها خطرت على بالي احد الأحاديث من الأئمة عليهم السلام اللي يقرأ خمس مرات آية الكرسي يكون بحفظ رب العالمين قريتها وقريت القلاقل الأربعة ( التوحيد ، الفلق ، الناس ، الكافرون) كملتهم ورجعت اقرأ التوحيد بقيت اكرر بيها وليلتها جفاني النوم ورجعت همات اتصلت بيه مع ذلك ميرد بجيت بحرگة گلب يعني شنو السبب ليش يصير ويايه هيج خلصت عمري كافيه الناس خيري شري ذنبي الوحيد مو محجبه معقولة رب العالمين ديعاقبني لهذا السبب؟
لا مستحيل هو ارحم من انو يعذب وحدة يتيمه وحيدة وما عندها احد يساعدها، رجعت گعدت على القنفه وعقلي يفكر بيه وين هو هسه وشنو يسوي، يارب تحفظة وتبعد عنه كل شر، بقيت ادعيله داخلي حماني وخلاني بيته غلطته الوحيده هو اللي صار البارحه مع ذلك اتحمل عناء نقلي لهذا المكان و خطورة الوضع اللي تحمله، مجان مجبر يسوي ويايه هيج بهذا اليوم حسيت بقيمته واهميته بحياتي لو واحد غيره مسوه اللي سواه، صحيح واجب الجندي حماية المواطن لكن مو واجبه ابداً ايضحي بحياته ويخاطر علمودي، كبر بعيني حيل وتغيرت نظرتي اله، بقيت للصبح بدون نوم والأفكار مفارقتني، شفتها الساعة سته وبعده مجاوب على مكالماتي اتأكدت وحساس قوي داخلي صار وياه شي لأن هو كلي ساعتين ويرجع، خلص اليوم واني على نفس الوضع أكلت بس نص لفه وشربت بطل مي حتى اسند نفسي والا شهيتي نعدمت بعد الصار، رجعت مشاعر الخوف سرت بداخلي من غابت الشمس،
عقلي يعيشني بأجواء البارحة فكره عابره اخذتني وهدت حيلي بالكامل ممكن يرجع نفس الشخص مرة ثانية اليوم واللي مگدر يسويه امس يسوي اليوم، ياربي شنو الحل التفكير راح يخبلني، ثواني، دقايق ، ساعات، مرن سنين عليه وصارت الساعة عشرة وبعده ماكو اي خبر عن هَيْصَم، نزلت دموعي والفكرة الوحيدة اللي احتلت عقلي هو انقتل لأن ما معقولة يعوفني وحدي كل هذا الوقت ويعرف اني ماعرف شي عن هاي المنطقة،
ومن بين افكاري ودموعي سمعت صوت القفل انفتح گلبي صار برجليه دخل بطوله الفارع اني شفته كدامي واگف على طوله، سالم مابيه شي، مشاعر جياشه داعبت گلبي و رجليه اخذتني غصب عني ركضت ورتميت بحضنه مثل طفله صغيرة غاب عنها ابوها ورجعوا التقوا مرة ثانية، شديت على حضنه اكثر وخليت راسي بصدره حسيت على ايدة من خلاها على شعري والأيد الثانية قربها من وجهي ومسح دموعي مجانت اكو كلمات بداخلي اگدر اعبر بيها عن سعادتي والراحه والطمأنينه اللي حسيتهم بهاي اللحظة، الأمان واني بين احضانه شعور لايعبر عنه الكلام، ابتعدت ومسحت دموعي رفعت راسي والتقت اعيونه مع بعضها، وقبل ما انطق اي كلمه گال.
هَيْصَم: اعتذر على تركج وحيدة بأول يوم الج بهذا المكان لكن عمل ضروري منعني ارجع.
فيروز: مع ذلك متخسر شي لو اتصلت وكتلي، مفكرت شنو ممكن يصير بيه بمنطقة غريبة وبيت مهجور يمكن انقتل او حتى انخطف بدون علم أحد لهاي الدرجه متهتم بيه انت؟!
رفع حاجبه اليه وگال وهو يمشي بأتجاة القنفه.
هَيْصَم: مو كأن عتابج غريب نوعاً ما.
فيروز: من اللي صار ويايه طبعاً والا ليش حتى اطالب بوجودك يمي؟
هَيْصَم: اهدأي وسولفيلي شنو صار وياج؟
فيروز: البارحه بالليل، بلعت ريگي واني اتذكر الأحداث مجرد رجوعهم لمخيلتي يصيبني بقشعريرة قاطعني من گال.
هَيْصَم: لَّباءَة انطقي مراح اسحب من عندج الكلام احجي شنو صار وياج بغيابي؟
فيروز: فتحت عيوني و الكهرباء طافيه صار صوت كمت من مكاني حتى اشوف شنو الموضوع لكن من اقترب من عندي خفت حيل ومگدرت اوگف وكعت على الكاع فجأة اقترب من عندي و انفاسه ضربت بوجهي سوه حركات غريبة وعلى رغم ماكو اضويه بالبيت مع ذلك ماعرف اشلون جان يشوفني بوضوح.
هَيْصَم: لتصفنين كملي.
فيروز: صار صوت بالباب اعتقد من الهوه او اي شي ثاني تركني وطلع بعدها اشتغلت الأضويه وتصلت بيك اكثر من مره وجهازك مغلق.
هَيْصَم: يعني اتجرأ يدخل لبيتي ويعتدي على ضيفتي بكل وقاحه هذا الحقير محتاج درس من الهَيْصَم حتى ميفكر يعيد فعلته، عهد عليه اخليه يكره جنس حواء بالكامل ويقاطعهن.
فيروز: وهسه شنو انسوي خايفه حيل لينعاد الموضوع وانخطف مره ثانيه.
هَيْصَم: راح نبقى اهنا كم يوم حتى يهدئ الوضع ببغداد و نرجع.
اقتربت من عنده وگعدت على نفس القنفه تفصلنه مسافه قليله باوعتله وحجيت لأن عقلي راح ينفجر لازم اعرف المضموم عني شنو وليش اني وصلت لهذا الوضع الغريب: احجيلي السبب، ليش حياتي مهدده بالخطر او أبويه اله ايد بالموضوع؟
رفع طرف شفته بأبتسامه وگال.
هَيْصَم: معجبج كونان غيرتي لشارلوك هولمز؟
فيروز: لتستهزء وجاوبني لأن التفكير راح يموتني من صدگ.
هَيْصَم: التفكير افضل من الصدمه خايف عليج اني.
فيروز: موافقة حتى لو اموت بعد ما اسمع مو مشكلة عادي، بس احجيلي ليش اني اهنا وشنو السبب اللي يخليك تنقذني.
هَيْصَم: ابتدت من ثلاث اشهر بيوم مشمس الساعة ثنتين اجاني رجال للمركز جان يلهث وكأنَ جان يركض، انطيته كاست مي شربها بسرعة، عطشان وتعبان ملامح الكبر واضحه على وجناته المتجعدة، كعد على الكرسي حجالي اللي بداخله ودموعه تنزل، 15 سنه خدمه هاي اول مره اشوف الشجاعه بعيون شخص الموت يطرق ابوابه اعترف بكل شي يعرفه مترك شي وهو جان واثق جداً بعد هذا الكلام ايامه تكون معدودة لكن هو اختار وطنه مسمح للأرهاب والمجرمين يستغلون الشباب، مافكر بمصيره وضحه بحياته وانتِ جنتي امانتة لَّباءَة،
و محبيت ايصير بيج نفس الشي كون المعلومات اللي يمتلكها يبحثون عنها وانتِ الوحيدة الموجودة بالعائلة وبأعتقادهم كونج الوريثه الشرعية ممكن ياخذوهن من عندج، لحسن الحظ مو نيتهم قتل لأن احد اعضائهم المهمين واقع بغرامج لكن تعتبر هاي النقطة سوء حظ همات، لأن هو معمي على عينه لدرجة مستعد يقتل او ينقتل لخاطر يحصل عليج، فأحتمال جبير يستخدموج وسيلة تهديد حتى يضغطون عليه، لهذا انتِ بحماية الهَيْصَم لخاطر ذيج الشيبات والعيون اللي تحاوطها التجاعيد وذلك الجسم اللي انحنى بسبب التعب، محبيت افرط بيج علموده.
نزلت دمعه من عيني تبعتها الثانية والثالثة كلامه عادني لذلك اليوم وشلون جان مرمي على الكاع و الشمس تضرب جسمه، بجيت من اعماقي وصوت شهگاتي عله خليت راسي بين أدية وتهسترت حيل شلون تحمل من لفو على رگبته الحبل والله جان انسان بريئ وبعمره مأذه نمله خلص عمره يساعد الناس ومات بدون ذنب ليش هيج ماعندي حظ بالدنيا اول شي ماما وبعدين بابا منو الشخص اللي راح يتركني همات؟
حسيت ايد نحطت على كتفي فزيت ورفعت راسي اله باوعلي بنظرة غريبه بعدين اخذ نفس وگال.
هَيْصَم: صدگتي كلامي؟
سألته بتفاجئ: ليش جنت تكذب؟
هَيْصَم: شگد تنطيني من عشره على ابداعي؟
فيروز: شنو قصدك مفهمت؟
كام من مكانه وكمل كلامه.
هَيْصَم: شنو رأيج اترك العمل بالسلك العسكري واصير كاتب؟ الواضح اني مؤلف جيد للقصص وهذا العمل مبيه خطورة صحيح؟
فيروز: لتلعب بأعصابي هَيْصَم بهاي الطريقة، اني مو طفله حتى تضحك عليها بهيج اشياء.
هَيْصَم: بشنو ضحكت عليج؟!
فيروز: مجانت نبرتك ادل على انك اتألف كلمات ولنظراتك همات فشنو الداعي حتى تغير اقوالك؟
هَيْصَم: اذا انت مقتنعه بكلماتي فهاي مشكلتج حليها لدخليني بتحقيقاتج لَّباءَة.
فيروز: ليش اختارك انت مو شخص ثاني شلون عرف راح اتكون أمين وتلقي القبض على المتهمين وتساعدة، ليش أبوية وثق بيك هَيْصَم؟!
هَيْصَم: مجانت تربطني بيه علاقه حب حتى اسأله ليش ختاريتني من كل الضباط اعذريني والله.
فيروز: لتحجي ويايه برودة دم دا اسأل جد أني، بالأضافة شلون عرف معلومات عن المجرمين وهو من الشغل للبيت و العكس وحتى مجان عنده اصدقاء هوايه ولا من الناس اللي يطلعون للگهوة جاوب على اسألتي لتخليني بنص المتاهه وتسكت.
هَيْصَم: مو واجبي اجاوب، اللي ردتي تعرفيه كتلج بيه اما الباقي اشياء تخص المركز مو من حقي انطيج اي معلومه بالأضافه لتنسين على رغم حمياتي الج دخلوا للبيت اللي انتِ بيه ومخافوا من شي هذا يعني يگدرون يخطفوج بأي لحظه وتحت التعذيب راح تحجين كل المعلومات اللي انطيتها الج وقتها دماء ابوج وشغلي يروح على الفاضي وشنو مجان السبب مستحيل اسمح يصير هيج شي، انطيت هوايه شهداء علمود هاي العملية، وصار سنين اجمع ادله واستعد بكل قوتي وعناصري الأكفاء حتى القي القبض عليهم متلبسين تردين لخاطر فضولج اضحي بكل هذا؟!
فيروز: مگتلك انطيني اسرار الدوله، كل اللي ردت اعرفه ابويه شنو وصله لهاي العمليه ليش حتى رجال فقير يدخل بقضيه تخص الدوله والشرطه من وين جاب معلومات بسببها صرت يتيمه بدون مأوى؟!
هَيْصَم: اهدأي لتعصبين مو زين.
فيروز: هذا اللي الله گدرك عليه اهدأي؟!
ما اريد اهدئ اريد اعرف الحقيقه كامله من عندك واليوم لازم تجاوب على كل اسألتي.
هَيْصَم: ما اگدر افهمي موقفي ولتصرين عليه.
فيروز: مطلوب الكم، يعني هو شخص مجرم اتعامل وياهم وبعدين ندم وحب يكفر عن اخطاءة لذلك اجه وكلك صح؟
لو شنووو فهمني من وين جاب هيج معلومات خطيره؟!
هَيْصَم: طلعت مخيلتج الواسعه مو مخيلتي ليش متألفين كتب؟!
فيروز: اني ممعصبني غير برودة الأعصاب اللي عندك مد شوف شلون گلبي محترگ ليش تعاملني بهاي الطريقة وكأني قاتله واحد من عائلتك؟
هَيْصَم: اللي عرفتيه هو الشي الوحيد الأگدر احجي الج اكثر من هيج لو تشنقين نفسج مراح تاخذين من عندي حرف واحد، شلون، ليش، شنو السبب، هاي الأسئلة الها جواب لكن مو بالوقت الحالي فقط شي واحد اگدر اكلج بيه جان طلب من ابوج ويكون اهنا حققت امنيته الأخيرة.
فيروز: احجي لتوترني أكثر شنو اللي عافه اليه؟
هَيْصَم: عندج خاله، الأخت الوحيدة الأمج الله يرحمها وصاني ادور عنها، جنت حاب اتركها مفاجأة حتى اعرف مكانها وين بس شفت الوضع هسه مناسب لهيج موضوع حتى يخف حزنج بمعرفه وحدة تحمل ريحه الوالدة موجودة وتكدرين تشوفيها، وها لتسأليني ليش معرفتيها سابقاً لأن هم مراح اجاوب.
فيروز: انت منو هَيْصَم؟
هَيْصَم: النقيب هَيْصَم المسؤول عن حماية ابناء بلدي وانتِ وحدة من عدهم، احد الجنود اللي يخلي روحه على راحة ايدة ويدخل للمعركه، ميفكر بأم دموعها هي عزائها الوحيد عليه ولا اخت تشك ثوبها من تسمع بخبر وفاته، ماعندي احد أو يمكن اني تخليت عن الجميع واللي برفقتي الأن هم اصدقاء الأسد وقبيلته، وعلى قمة الجبل اقف وانظر لأعدائي واني اتوعد للأنتقام من عدهم واحد واحد واهدي انتصاري لأبناء هذا الوطن، هدفي هو توصيلهم لحبل الأعدام وفقط بهاي الحاله احقق مرادي بالأنتقام.
فيروز: واني ليش دخلت ضمن هذا المخطط؟
هَيْصَم: قدرج هيج كتب ومن يقرر رب الكائنات اني وانتِ ماعدنه رأي.
: تركني وحدي وصعد فوگ رجعت ابجي مرة ثانية شوكت يخلص هذا الكابوس وترجع حياتي الطبيعية.
لائِث: الو سيدي.
هَيْصَم: شنو صار لائِث؟
لائِث: طلعت من العناية لكن دكتورك يزعجنه هوايه بأسئلته احجي وياه.
هَيْصَم: تمام انطي الموبايل.
أرفد: شنو هذا هَيْصَم ليش اتسوي هيج انتَ؟!
هَيْصَم: سوي اللي لازم تسويه هَيْصَم ما لازم يطلع من المستشفى قبل ميمر اسبوع فاهم؟
أرفد: اني اشوف الجميع ماعدا هذا هَيْصَم ليش ما اشوفه؟!
هَيْصَم: أرفد تعرف اني اثق بيك صح؟
أرفد: ومنو مطيح حظ أرفد غير هاي الثقه، مرات اتمنى اني مو دكتور حتى ما ادخل بخططك الغريبه.
هَيْصَم: ميحتاج تتمنى الأمنيات لاتتحقق، بالعادة احنه نخطط ونفذ وغيرنه يوگع بيها هذا قانون الإِسود.
أرفد: صحيح اللي موجود بأسمك منو هذا؟
هَيْصَم: شخص موثوق مستعد ينطي دمه لخاطري.
أرفد: هوايه اشخاص يردون يضحون علمودك شنو الموضوع؟!
هَيْصَم: من تصير مكان الهَيْصَم تعرف الجواب.
أرفد: خليني بقلوب الناس ما اريد اكون بمكان شخص ثاني غير نفسي.
هَيْصَم: لائِث.
لائِث: سيدي.
هَيْصَم: حليتوا الموضوع؟
لائِث: اللي هجموا على البيت خمس اشخاص تم اعتقالهم جميعاً وهسه همَ بالتحقيق بتهمه الأعتداء على النقيب هَيْصَم، كل الأدلة تثبت جريمتهم لذلك صعب يطلعون قبل مترجع عافيتك.
هَيْصَم: و البيت؟
لائِث: بحثنه البارحه ملگينه شي مهم.
هَيْصَم: المعلومات اللي يمتلكهم وين لعد؟
لائِث: ممكن تركهم بحساب بالبنك؟
هَيْصَم: وبهاي الحاله لازم اكو دليل يوصلنه الهم خليني ارجع واشوف شنو لازم نسوي.
لائِث: تعرف منو صار مدير مؤقت حتى تتعافى؟
هَيْصَم: منو؟
لائِث: حبيبك.
هَيْصَم: خلي يستمتع بيها مصيرها اليه محد يگدر ياخذ مكان الأسد ومع الوقت يتأكد بنفسه.
لائِث: وانت شنو سويت؟
هَيْصَم: اللي اجيت علمودة.
لائِث: وهي؟
هَيْصَم: البارحه لّهيم زارها بالبيت وهي خايفة لدرجة مراح تفكر تهرب من عندي.
لائِث: اتمنى اشوفه وجه لوجه.
هَيْصَم: شنو تريد تسويله؟
لائِث: ابوس جبينه ساعدنه بدون ميعرف.
هَيْصَم: هو ميشكل خطر عليها ميريد ايضرها لذلك اجه وشافها خلسه.
لائِث: شلون سمحت بهذا الشي؟!
هَيْصَم: لتتغابه انت تعرف اني وين جنت لتسوي نفسك غشيم.
لائِث: الأفضل تمنعه يجي للبيت احسن متتراقب هاي المره من صدگ وتنگلب لعبتنه ضدنه.
هَيْصَم: مو من السهوله يگدرون يفكون الشيفره وبدون أذني الهوه ميمر من عدها ما بالك ب لّهيم.
لائِث: انتبه لنفسك سيدي واحنه بأنتظار طلتك البهيه تنور المركز.
هَيْصَم: مجرد اسبوع وكل واحد يرجع لمكانه المناسب خليك متحمل عزيزي.
لائِث: ما احبه مو بأيدي.
هَيْصَم: اتخيل اشلون يسلمني المنصب من ارجع هذا المشهد خليه يكون دافع قوي للأنتظار.
لائِث: تعرف شنو اول أمر النه؟
هَيْصَم: فكك الفريق، وغيره.
لائِث: خله عاصم رئيس الفريق الجديد حتى يبدون بالعملية على اساس احنه مگدرنه انقدم شي لهذا الوقت لذلك عملنه مجاب نتيجة، بعد كل هاي السنين يتخلون عن جنود فدائين مثلنه وكل هذا التعب يروح هباءً منثورا.
هَيْصَم: على حزنك الحالي محضرلهم مفاجأة اتخليهم ميعرفون يفرقون بين السجود والركوع وهذا وعد من عندي.
لائِث: حسيت نفسي مرتك على هذا قلقك هَيْصَومي تره اني حيل مشتاق ياويلك تتأخر فاهم.
هَيْصَم: ملت زايد هيج الحماس يسوي بالأنسان؟!
لائِث: ليش شنو بيه ومعجبت حضرتك؟!
هَيْصَم: تعرف ما اگدر اتجاوز اخلاقي متسمحلي.
لائِث: ماميتك متسمحلك افهم يروحي.
هَيْصَم: عندما يتحيمر الأنسان هاي العوارض اتحب اهينك حبيبي؟!
لائِث: آخر كلمه ذكرتني بواحد كلش اعزه.
هَيْصَم: اي اعرفك تعزة حيل.
لائِث: يلا حبيبي بوسلي نفسك هوايه ولتنسه العرين بأنتظار مالكه.
هَيْصَم: من انثى لرجل انت الوحيد اللي يگدر يلعب الدورين.
لائِث: اعجبك بجميع حالاتي.
: گاعدة و افكاري اخذتني لأيامي وي بابا اتذكرت آخر أيامه تغير هوايه وصار يصفن بكثره ومن اسأله يطلع حجج، ينام من وقت ويطلع الصبح كلش، معقولة منتبهت على التغيير، جان يتعرض للتهديد لو اكو سر اكبر من هذا؟
مستحيل بما انو الموضوع يخص بابا مراح اسكت لازم ابحث عن أجوبه لأسئلتي بأي وسيله، صحاني من تفكيري صوته رفعت راسي شفته ينزل على الدرج وهو يگول.
هَيْصَم: شنو رأيج أنظف البيت بما انو راح نبقى اهنا كم يوم ميصير نعيش وسط هاي القذارة اشغال نفسج بعمل ما ينطي للمخ راحه بعدها تگدرين تفكرين بطريقة افضل.
فيروز: تركتني بمكان ما اگدر ارجع من عنده وتريد من عندي ما افكر واريح مخي؟!
هَيْصَم: متركتج على الحدود السوريه هي كم كلمه حتى ارضي فضولج واني كتلج سابقاً وعقدنه اتفاق انتِ متگدرين تسمعين شي بخصوص انقاذي الج شنو سببه، مع ذلك اصريتي ودگيتي رجل هذا الفضول الزايد عن حده ينقلب ضده، هاي قاعدة وانتِ مقبلتي تقتنعين بيها.
فيروز: لو اني مأصريت عليك مجنت حجيت شي صحيح؟
هَيْصَم: اني انسان مليان اسرار ماكو مشكله اذا انضاف سر الى الأسرار البقيه.
فيروز: انت قررت تحجيلي من وحدك، صح؟
هَيْصَم: برأيج اني من الأشخاص اللي تحكمني الظروف لو اني اللي احكمها؟
رفعت حاجبي: وضح.
هَيْصَم: قوانين هاي اللعبه اني اللي اتحكم بيها، كل شي يصير او حيصير ماممكن ميكون اليه أيد بيه سواء بشكل ضاهر ام خفي وضحت الفكرة؟
فيروز: السبب؟
هَيْصَم: احتفظ بالأجابه لنفسي وهسه يلا كومي ويايه عندي رغبه انظف البيت.
فيروز: مراح انظف سوي اللي يعجبك البيت بيتك وانت نظفه مثل متحب اذا ناسي حابه اذكرك حضرتك منعتني ادخل بشي ميخصني واني مجرد ضيفه.
هَيْصَم: بما انو ذكرتيني انتِ ضيفتي الواضح اني مو كريم ابداً خليت ضيفتي تجوع شنو حابه تاكلين؟
كمت من مكاني بعصبيه وصرت مقابيله رفع حاجبه وباوعلي بترقب يريد يعرف شنو اسوي خليت عيني بعينه وحجيت بغضب بسبب اسلوبه أو يمكن بسبب السر اليخص بابا الله يرحمه وميقبل يحجيلي عنه هوايه اسباب، من التراكمات نفجرت بوجهه واني بداخلي عكس الرأي تماماً: منحط ،حقير ،سافل، انسان عديم مشاعر وغير محترم ماعندك ذرة انسانية وقليل اصل اكرررهك.
ختمت كلامي وبقيت منتظره ردت فعله الغريب بالموضوع بقى يتمعن بعيوني ثواني ومحسيت اله وساحبني من ايدي طلعني من البيت واني منطقت ولا كلمه الخوف سره بداخلي بالتزامن مع الصور اللي رسمها عقلي اليه ترك ايدي صرت مقابيله وخلفي الباب تماماً يحجي ويايه بعصبيه ونبرة غضب.
هَيْصَم: خلص، اني بعد ما اگدر اتحمل اعنادج واسلوبج الغير محترم اتعامليني وكأني اصغر اطفالج، من هذا اليوم وهاي الدقيقة اني رفعت ايدي عنج ما ألي علاقه بأي شي يصير وياج تگدرين تطلعين من هذا البيت وتبتعدين عن انسان حقير ومنحط مثلي وشخص عديم الأنسانيه وغير محترم، ممجبرة تخلصين وقتج وي انسان مثلي.
حجيت بنفس نبرته: لتفكر تصرفك هذا يخليني اخاف وارتعد من حضرتك بالعكس تماماً اتربيت على القوة والمواجهه بالأضافة اني مطلبت من عندك تخليني يمك لتبرر تصرفاتك وتحملني نتائج قراراتك وقبل متفكر تطردني من البيت رجعني من وين مجبتني اذا انت ماعندك غيره ومتخاف شنو يصير بيه وخاصه بهيج وقت من الليل اني انسانه اخاف على نفسي.
: لزمني من ايدي وسحبني اله بقوة ضربت بصدره عطرة دخل لأنفي رفع راسي بأدية ويحجي بغضب وعيونه حمر من العصبيه.
هَيْصَم: اذا عدتي هاي الكلمه مرة ثانيه ثقي اسوي شي وياج اثبتلج شلون يكون الهَيْصَم بلا غيره، على رغم معرفتج بالحقيقه وصار عندج علم ليش انتِ اهنا هسه بالأضافة الى مخاطرتي بجيتج لهذا المكان وتركت كل اعمالي ببغداد بس حتى احافظ على سلامتج بشنو قابلتيني؟
سبيتي گلت مو مشكله بعدها مصدومه وحبت تعبر عن غضبها سامحها بعدها صغيره ومتفهم لتخلي عقلك وياها لكن توصل وياج تتهميني انسان عديم غيره اهنا واگفه، لو جنت ماعندي غيره محافظت عليج من واحد مجرم، مخاطرت بحياتي حتى انقذج تعرفين لو جنت بلا غيره صدگ شنو اسوي؟
الزمج من ايدج و اخذج الهم مقابل كم مليون مو أكثر يسوون بيج العمايل محد يگدر ينقذج غيري لأن اني الهَيْصَم، صنعت لنفسي قوة ومكانه حتى محد يگدر يقترب من عندي بسهوله لذلك انتِ بأمان او ابوج جان يعرف شنو منتظرة لهذا السبب خلاني انتبه عليج ودور عن اقاربج ولأن الوضع ميسمح تأخير او تهاون خليتج يمي وبعد كل هذا اطلع انسان عديم غيره مو هيج ست لَّباءَة؟!
فيروز: لتاخذني بصوتك العالي و لتفكر هذا الأسلوب يخليني ارتعد من عندك واقدم اعتذارات بكل الاحوال اني مجنت اعرف عن اتفاقيتك وياه، هاي اذا جانت اصلاً اكو اتفاقية بينكم، بعدك غامض نفس ما انت وهوايه اسرار محاوطتك بقائي وياك فقط لأن ما اريد اخاطر بحياتي مو اكثر وان طال الزمن لابد يجي يوم ينكشف الغطاء واعرف شنو ضام عني أكثر حضرة النقيب هَيْصَم افندي.
هَيْصَم: سوي اللي يطلع بأيدج، مراح تعرفين غير اللي اريدج تعرفيه تعيشين مثل ما اني اريد حتى نلقي القبض على المتهم ومو لخاطرج كل هذا ولكن لأن قدمت وعد لأبوج ومستحيل اخلف بيه.
فيروز: ليش اختارك انت هذا الشي اللي ميدخل لمخي.
هَيْصَم: اقرأي قبل النوم سورة ( الحديد، الحشر، الجمعة، الأعلى، الصف) بنية تشوفيه واذا حلمتي بيه اسأليه هذا السؤال.
فيروز: تستهزء حضرتك؟
هَيْصَم: ماعندي مزاج حتى استهزء جربيها متخسرين شي.
تركته ودخلت للبيت تبعني وهو يحجي بصوت عالي بهدف يسمعني.
هَيْصَم: سبحان الله اشخاص بدون احساس ينطردون ويرجعون مرة ثانية امرهم غريب.
فيروز: اتحمل عواقب افعالك هَيْصَم افندي.
هَيْصَم: احترمي لَّباءَة مو اصغر اطفالج اني.
فيروز: لتخليني القبك ألقاب ما انزل الله بها من سلطان.
هَيْصَم: مثل هَيْاصَم ، هَيْصَوم ، هَصَمصَم؟
فيروز: مجنت نايم؟!
هَيْصَم: لو نومي ثگيل لهاي الدرجة مشفتيني وصلت للي اني عليه اليوم.
خليت اديه على خصري: حضرتك اذا جنت گاعد ليش مجاوبتني؟
هَيْصَم: حتى اشوف شنو ممكن تسوين اذا مگعدت.
فيروز: شنو اسوي غير ابقى اصيح اسمك حتى تفتح
عيونك.
اتقرب من عندي حيل وصار ميفصلنه غير سانتيمات يحجي بهمس.
هَيْصَم: مثلاً يعجبج شي بوجهي وتقررين تسوين شيء ما.
: ابتعدت عنه صاير كلش سخيف بتصرفاته ويايه وغيرت الموضوع: شنو رأيك انظف؟
هَيْصَم: مو محبيتي الفكره شنو غير رأيج؟!
فيروز: لأن ماكو شي مفيد نسويه خلال اليوم خلي نقضي وقت بالتنظيف افضل.
هَيْصَم: هسه الساعه 12 الصبح اي وقت هذا اللي تقضيه بالتنظيف؟!
فيروز: جانت فكرتك مو فكرتي.
هَيْصَم: روحي نامي باجر الصبح ان شاء الله نطلع نشتري الأحتياجات الناقصه للبيت بالأضافة لشويه ملابس كون راح نبقى اهنا واحنه مأخذنه شي ويانه من انتقلنه لهذا البيت.
فيروز: روح وحدك ما أروح اني.
هَيْصَم: متخافين يصير بيج نفس البارحه وهاي المره تنخطفين من صدگ.
فيروز: تخوفني حضرتك!!
هَيْصَم: ممكن.
فيروز: شنو الفايدة؟
هَيْصَم: لأن تضهر شجاعتج الحقيقية بوقتها، ما احب لَّباءَتي تكون ضعيفه ابداً اريدج تواجيهن الأعداء ببساله مثل الهَيْصَم حتى اكون مطمأن من اترك لبوتي بالعرين.
فيروز: مو كأن ملت زايد نقيب هَيْصَم.
هَيْصَم: اميل على الجانب الماخذ گلبي وين المشكله؟!
فيروز: سيادتك وقعت في حبي؟!
هَيْصَم: بأحلامج مو هَيْصَم اللي يلين گلبه ويحب.
فيروز: افضل اني ما اريدك تحبني.
هَيْصَم: تقلديني لَّباءَة!!
فيروز: اسوي اللي يعجبني حضرة النقيب.
هَيْصَم: بلا نقاش ميجيب نتيجه راح اطلع اشتري شي تاكليه انتِ مماكله شي اليوم.
فيروز: ميحتاج مو جوعانه لتعب نفسك.
هَيْصَم: مو لخاطرج اني هم جوعان حابه تجين لو اروح وحدي؟
ماعرف شنو اجاوبه من شافني منطيت ردة فعل اخذ نفس ودار وجهه حتى يطلع بسرعة رجعت بذاكرتي البارحه ركضت يمه صرت بصفه باوعت بوجهه صارت عيني بعينه شبه ابتسامة انرسمت على شفته طلعنه سوه وصعدنه السيارة.
هَيْصَم: اي ست شنو حابه تاكلين؟
فيروز: اي شي مو مهم هاي اذا لگيت مطعم مفتح هسه.
هَيْصَم: اكو مطعم يفتح اربع وعشرين ساعة.
فيروز: تعرفه؟
هَيْصَم: احد اصدقاء الماضي جنت اكُل يمه مرات.
فيروز: ما اريد انزل خلينه ناكل بالبيت افضل.
هَيْصَم: لهاي الدرجه خايفه؟
فيروز: مو خوف وانما مو حابه ادخل مطعم.
هَيْصَم: لخاطرج ناكل بالبيت مو مشكله.
فيروز: لتكذب انت مردت اصلا ندخل مطعم لكن حجيت هيج حتى متحرجني.
هَيْصَم: تعجبيني من تصيرين ذكيه.
فيروز: اني ذكيه من يوم يومي بس انت متقدر مواهبي.
هَيْصَم: نعيش ونقدرها احنه بيها.
توقف كدام مطعم صغير نزل من عنده وقفل الأبواب جاب اكل ورجعنه للبيت اكلنه مع بعض غسلنه ورجعنه للقنفه الشي الوحيد النظيف بالطابق الأول سكتنه اثنينه لكن هو قاطع هذا الصمت من گال.
هَيْصَم: اصعدي نامي الغرفه اللي على جهة اليسار نظيفه اخذي راحتج اني موجود.
قصده ميحتاج اخاف بوجودة و الصراحه هذا شعوري بقربه ماعرف شنو السبب على رغم الساني وياه يكول العكس، كمت من مكاني وصعدت للغرفه اتذكرت السور القرآنيه اللي كلي بيهم توضيت وقريتهم، الغرفة جان بيها جرباية وحدة مال نفرين صايرة بالنص، وكنتور بنهاية الغرفة على جهة اليمين، خليت راسي على المخدة ونمت، ما اگدر اوصف المكان لأن ممبين بيه شي مميز بس شفت احد يقترب من عندي لابس بنطلون اسود وقميص نيلي ركزت بوجهه من صار ميفصلنه شي، أبوية، حضنته حيل واني اعبر عن اشتياقي بهذا الحضن مگدرت اسأل او املي عيني بشوفته بعد مفزيت على صوت غريب فتحت عيوني شفت خيال يعكسه القمر من الشباك رجفت اطرافي وبقيت اصيح بصوت عالي: هَيْصَمممم..
يتبع.
تفاعلكم اللي يسوي واهس وتعليقاتكم بين الفقرات وتصويتكم للبارت يحلوين
هذا حسابي على الأنستا ممكن انطيكم تغشوشات اهناك وحتى اجاوب على اسألتكم بخصوص القصص.
تابعنا وما يفوتك جديد
اختر المنصة اللي تناسبك وتوصلك الفصول أول بأول.
التعليقات (0)
جاري تحميل التعليقات...
لا توجد تعليقات بعد
كن أول من يشارك برأيه!