للتواصل انستا zahraaahmedn99
علقوا بين الفقرات+ صوتوا للبارت+ تابعوا حسابي عيناي انتوا.
شاركوا القصه مع اصدقائكم حتى نستمتع وي الهَيْصَم مع بعض.
هَيْصَم
(الكاتبة زهراء احمد)
_______
كيف السبيل للنسيان، وكل تفاصيل الحياة مملوءة بهم.
نجيب محفوظ
: مجان كلامه صدمه بالنسبه اليه لأن اني اعرف من البدايه راح اتكون هاي نهاية القصه بس حبيت اكذب الواقع والقدر المكتوب واتبع احساسي اللي بدون فايدة،
حاولت ابين طبيعيه قدر الأمكان واسأله بهدوء عكس البركان اللي انفجر داخلي:
هسه؟
هَيْصَم: الصبح.
: حبيت اخلق موضوع وياه اريد هذا الوقت يطول واجمع اكبر قدر ممكن من الذكريات اللي استرجعها واخليها ونيستي كلما اشتاقيتله وحنيت لهاي الأيام:
تشرب چاي؟
هَيْصَم: اذا من ايدج اي.
: ابتسمت ورحت حضرته بقيت اعاين على المي والچاي اشلون يفورن سوه واحس گلبي اللي يفور مو هن،
اخذني عقلي لمكان مختلف وبقيت اصنع بمخيلتي قصص بعيدة عن الواقع تماماً لو جنه اني وياه اصدقاء بالكليه او زملاء عمل، لو مجان شرطي ولجمعتنه قضيه غريبه ياترى شنو يكون مستقبلنه وقتها؟
اكيد ماكو اسرار ولا كل هذا الغموض وعرفت هو منو وليش ميريدني احبه او اتعلق بيه، فجأة خطرت على بالي صورة العروسه اللي شفتها معقولة اتكون زوجته بس شنو صار وخلاه يحتفظ بصورتها بس هي؟
هوايه اسئلة ادور بمخي قطعها الچاي من فار أو وگع على الطباخ صبيته بكوبين ونظفت المكان ورحت للصاله اول يوم دخلتلها جان بيها كرسي واحد اللي گاعد عليه اما هسه بيها قنفه وكرسيين طلعهم من الغرفه الثانيه اللي بيها الشاشه طبعاً البيت بيه غرفتين نوم وغرفه بيها الشاشه وقنفات اثنين وحده من عدهم خلاها بالصاله يعني تگدرون تگولون غرفه گعدة واكو غرفه ثانيه اني اسميها غرفه بس هي شبيها للمنور بيها الغساله ومشراية ملابس والمكناسه والماسحه وباقي هاي الأشياء و الغرفه اللي بيها ادوات الرياضة والمطبخ منتبهت على اجزاء البيت بصوره صحيحه اول مأجيت بس هسه حفظتهم عدل،
انطيته الكوب مالته واخذت كوبي گعدت مقابيله والتزمت الصمت لكن مدام فتره طويله واتذكرت التهديد اللي عليه وحجيت:
انت مو گلت حياتي معرضه للخطر؟
جاوبني وهو يشرب بالچاي بدون ميباوعلي.
هَيْصَم: اي.
فيروز: شنو الأي؟!
هَيْصَم: يم خالتج مراح ايكون عليج خطر مثل اهنا.
فيروز: شنو السبب؟
هَيْصَم: مجرد احتمال.
فيروز: يعني ما اضمن سلامتي اذا بقيت يمها؟
هَيْصَم: على حد علمي خالتج ماعدها عصابه مرأه فقيرة متحب المشاكل.
فيروز: هو خوفك من الفقير تلگي بيه كل البله.
رفع نظره وباوعلي بعقدة حاجب وگال.
هَيْصَم: وين تردين توصلين لَّباءَة؟
فيروز: نزلني يمك على راس الشارع،
ابتسم وبانت غمازته ورجع يكمل الچاي بهدوء عكسي تماماً من اباوعله وهو بهاي الحاله احسده انو ميهتم ويگدر يسيطر على مشاعره وگلبه مو مثلي يمكن السبب انو اني مختلطت بأحد سابقاً ولعشت مشاعر الحب من قبل ولهتميت بشاب بكل حياتي وجان كل همي هو صحة والدي وسلامته واگدر اتعيين بمكان معين حتى اساعدة بمصرف البيت وبين ليلة وضحاها تنگلب حياتي بالكامل وادخل بموضوع ماعرف عليه شي نزاع بين طرفين واني جزء من عنده،
حبيته واكذب على نفسي اذا گلت لا بس شنو اتفيد مشاعري اذا هو مامنطيني اي اهتمام واصلاً ميشوفني انثى كدامه يعتبرني ضيفه لا أكثر.
قاطع افكاري سؤال خطر على بالي فجأة:
و التدريب؟
ايضاً رفع راسه وهاي المره ابتسم بوجهي وهو يگول.
هَيْصَم: يا تدريب؟
فيروز: شنو يعني يا تدريب انت مو گلت راح ادربني في حال صار اي شي ويايه اگدر ادافع عن نفسي اذا انت ماموجود.
هَيْصَم: هوايه متأثرة بمسلسلات الأكشن لَّباءَة قللي منها.
فيروز: هَيْصَم لتلعب بأعصابي واحجي الحقيقه.
هَيْصَم: متزعلين؟
فيروز: ما ازعل.
هَيْصَم: واذا زعلتي؟
فيروز: گلت ما ازعل ليش تلح؟
هَيْصَم: عندج كرش حبيت احفزج بطريقه غير مباشره حتى تلعبين رياضه الموضوع ما اله ربط بالتهديد على حياتج.
: فتحت عيوني على وسعهن وحجيت بصدمه: جنت تضحك عليه حضرتك؟!
هَيْصَم: بالعكس حفزتج اني حتى تضعفين بنفس الوقت ما اجرح مشاعرج اعرف النساء ميحبن احد يگلهن انتن سمينات.
فيروز: بنظرك اني سمينه؟!
هَيْصَم: تشبهين الدجاجه ام عشرة الاف.
فيروز: تشبهني بحيوان سيد افندي؟!
هَيْصَم: اني اسميج لَّباءَة تيمناً باللبوة شو معصبتي وعلى حد علمي اثنينهم حيوانات؟!
فيروز: عصبت وحجيت ورفضت هذا الأسم بس انت متقبل تغيرة.
هَيْصَم: لأن احبه اكثر من اسمج الحقيقي.
فيروو: صدگ اتذكرت وتعليم الرمي؟
هَيْصَم: حبيت اصنع شي تذكريني بيه مستقبلاً و ميكون شي عابر وانما محفور داخل الأعماق.
فيروز: ومنو گلك راح انساك اصلاً؟
هَيْصَم: بما انو هاي آخر ليله الج بهذا المكان راح اسمحلج تتمنين امنية و احاول قدر الأمكان احققها.
فيروز: انت اتحاول تسوي المستحيل لأن الأماني ماممكن تتحقق.
هَيْصَم: ولعيونج كل شي يصير وين المشكله!!
فيروز: تتزوجني؟
غص بالچاي وصار يگح بصوت عالي او وجهه انطعن احمر اختنگ الرجال من هاي الكلمه ماعرف اذا انصدم او شي ثاني گمت من مكاني بسرعة وضربته على ضهره شويه واستعاد عافيته رحت للمطبخ وجبتله گلاص مي شربه ورجعلي اياه حاولت اكتم ضحكتي بس وضعي مستمر هيج وصرت اسوء حال من عندة من رفع نظره اليه وگال برفعة حاجب.
هَيْصَم: والمهر منو يدفعه؟
فيروز: هه جنت اشاقه وياك سيد افندي وانت امبين عليك صدگت شگد تنطيني من عشره على تمثيلي؟
هَيْصَم: مقريت بعيونج انو هذا تمثيل بس راح اسايرج واعتبر نفسي مسمعت شي ومازال عرض الأمنيه قائم.
: هسه المفروض اني من الخجل متلگوني بس حاولت ابين الوضع طبيعي ولا كأن طلبت ايده للزواج قبل دقيقه، سكتت شويه وگلت:
نلعب؟
هَيْصَم: شنو نلعب؟
فيروز: صراحة جرأة.
هَيْصَم: منين اتجيبين هاي الأفكار؟
فيروز: من رحم الملل بعدين هذا آخر يوم اريد اعرف كم شغله عن الهَيْصَم قبل ما اطلع من هذا البيت ومن حياتك بالكامل.
هَيْصَم: اسألي بدون العاب راح اجاوب على اللي اگدر عليه.
فيروز: والدي ليش انقتل بدم بارد بجريمه غامضه؟
هَيْصَم: شوفي خلي نتفق على شغله مهمه قبل متسألين اي سؤال واضح.
فيروز: تمام موافقه شنو هي الشغله؟
هَيْصَم: كونان اللي ابداخلج امنعيه يطلع وبطلي سوالف العم توگو.
فيروز: متابع جيد،
يلا جاوبني ليش انقتل والدي وهو اصلاً شنو ايسوي يم المجرمين؟
هَيْصَم: والدج جان جاسوس يمهم ونكشف وهو ياخذ معلومات مهمه عن خطه تسليم كميه من الممنوعات، واحد من الأشخاص اللي يشتغل وياهم اعترف عليه من ذكاء والدج ضمهن بالبيت واجه للمركز هو يعرف انو مراقب، حجالي كل شي صار وانطاني مكان المعلومات وبعد فتره قصيرة انقتل من قبلهم بمعنى اصح والدج شهيد لَّباءَة.
فيروز: يعني مات من اجل الوطن؟
هَيْصَم: استشهد من اجل الوطن.
: نزلت دموعي ورجعت بيه الذاكره لنفس اليوم سكت ومحجه شي ويايه خلاني اعبر عن حزني براحتي مسحت دموعي بعد فترة وسألته:
واني شنو دخلي بكل هاي القضيه؟
هَيْصَم: الموضوع معقد راح واضحه الج بصوره ابسط وانت حاولي اتفهميه،
والدج الله يرحمه عمله يطلب من عنده عدم الأفصاح بيه اطلاقاً لأقرب الناس لأن بمجال خطر فقط اللي يعرفون بيه هم الأشخاص اللي يكونون على تواصل وياه واني جنت واحد من عدهم ،كون عملنه كان مرتبط ببعضه لذلك فريقي اللي شفتيه باليوم اللي طلعنه بيه من هذا البيت جميعهم عدهم معرفه بيج جان امر من الأعلى نحميج لأن انتِ امانته وندزج لخالتج وهناك تنتهي هاي العملية.
فيروز: طيب شلون عرفت مكاني؟
هَيْصَم: واحد من عدهم اتصل بيه وكلي اثناء هجومنه على البيت.
فيروز: منو هو؟
هَيْصَم: هذا السؤال ما اگدر اجاوب عليه خارج صلاحيتي.
فيروز: أو لّهيم؟
هَيْصَم: شغله مهمه ثانيه خليها ابالج المروجين وتجار المخدرات والقتله ماعدهم علامه على وجهم او والدج خير مثال طول عمره يشتغل بالسلك بشكل سري لكن هو مفصح عن عمله حتى لبنته الوحيده بمعنى ادق ممكن ايكون اي شخص من محيط عملج او دراستج هو لّهيم لأن اصلاً هذا اسمه الحركي مو الحقيقي.
فيروز: وشلون عرفت هو يحبني؟
هَيْصَم: كتلج سابقاً هاي الأسئلة تخص عملنه بالبحث والتحقيق ما اگدر افصح عن اي معلومه.
فيروز: ليش حجيتلي كل هذا؟
هَيْصَم: حتى تعرفين مجانت وفاة والدج بدون معنى بسببه گدرنه نعتقل كم شخص بحوزته كرستال بالأضافة لمعلومات مهمه ثانيه.
فيروز: مكتوب على قبره شهيد؟
اعترفتوا بيه من عناصر الشرطه بعد وفاته؟
هَيْصَم: اي في حال رحنه للنجف راح اخليج تزوريه.
فيروز: لتنطي وعود متگدر تنفذها.
هَيْصَم: بعمري منطيت وعد مگدرت عليه لَّباءَة.
فيروز: شنو قصدك؟
هَيْصَم: خالتج بيتها بالنجف باجر من انروح اخذج تزوريه قبل منروح الها.
فيروز: بقى سؤال عندي ،
ليش انت؟!
هَيْصَم: لأن الله هيج كاتب.
فيروز: عادي اشتغل؟
هَيْصَم: مارسي حياتج الطبيعيه بعيداً عن الهَيْصَم و لتنسين اشتركي بنادي رياضي الصحه اهم.
فيروز: راح ترتاح من عندي ومن ازعاجي وتنسه منو فيروز.
هَيْصَم: منو گال؟!
فيروز: يعني مراح تنساني؟
عينه بعيني شفت بيهم نظرة مختلفه عن اللي معتادة عليها حجه بصوت ناصي بس گدرت اسمعه.
هَيْصَم: لو القرار بأيدي مخليتج بعيدة عن گلبي لَّباءَة الهَيْصَم.
فيروز: انتبه على نفسه وخر عيونه ورجع نظرة للكوب اللي صار عبارة عن قطعه ثلج قطعت هاي اللحظات بسؤال خطر على بالي فجأة،
ليش انخطفت وصار كل هذا؟!
هَيْصَم: لّهيم اللي خطفج ليش وشنو السبب هذا الشي منعرفه.
فيروز: ومنو حاول يقتلني؟
هَيْصَم: حتى المجرمين عدهم اعداء لَّباءَة.
فيروز: صار دورك متريد تعرف عن حياتي شي معين؟
هَيْصَم: لَّباءَة مواليد 1995 شهر سبعه والدتج اتوفت بالولادة ولأن عمل والدج جان خطر ترك كل افراد عائلته وبقى يعتني بيج وحده بمساعدة مرأه جبيره لأن مگدر ياخذ الدورين بسبب عمله، كبرتي وحرص والدج على تعليمج، حياتكم الماديه مجانت اتساعد وهذا بسبب اعتنائه بأحد العوائل المحتاجه ودفع كافه تكاليف حياتهم بشكل شهري،
دخلتي جامعه وفرح بيج حيل وحس انو اوفى بوعدة لزوجته المرحومه اتخرجتي وتوظفتي بعد معاناة بشركه بسيطه على الحسابات واهنا بتدت حياتج واطلاعج على العالم الحقيقي ومعرفه الحياة مو لعبه تخلصيها بالنوم او التلفزيون.
فيروز: من وين جبت كل هاي المعلومات؟
هَيْصَم: بالأونه الأخيرة والدج اشتغل ويايه وشاركني جزء من حياته، العراقي تبقى عنده هاي العادة لازم يسولف بماضيه لأي شخص يعرفه.
فيروز: بس هو يعرف بمنو ايخلي الثقه ومنو لا.
هَيْصَم: صحيح جان مقرب من عندي اكثر واحد بالفريق تواصله ويايه مباشر كثير من المرات.
فيروز: محجه شي عني؟
هَيْصَم: اي جان خايف عليج يصير بيج شي من بعده مراد يتركج وحدج.
فيروز: ليش متخلي خالتي تجي لهنا ونعيش سوه بهذا البيت؟
هَيْصَم: هذا الشي خاص بيكم من ترحين انتِ احجي وياها وسوي اللي يعجبج.
فيروز: اذا هو من ضمن الشرطه ليش قضيته نغلقت ومقبلوا يبحثون على القاتل؟!
هَيْصَم: انتِ قدمتي بلاغ بعد فترة من وفاته و بالعادة بهيج جرائم منظمه صعب معرفه القاتل لذلك تنغلق القضيه حتى وجود أدلة كافيه.
فيروز: جوابك غير مقنع هَيْصَم انتم شرطه وهذا واجبكم البحث عن الأدلة ومعرفه المجرم.
هَيْصَم: لَّباءَة هاي عصابه مرتبطه بهوايه اعضاء ومن هم خارج البلد مو بالسهوله معرفه القاتل.
فيروز: انت وعدتني تعرفه وتفتح القضيه مره ثانيه.
هَيْصَم: لساتني عند وعدي بس المشتبه بيه قتله انتحر اليوم ومگدرنه نعرف اذا هو فعلاً اللي قتله او لا.
فيروز: يعني القيتوا عليه القبض ليش مكتلي؟
هَيْصَم: لأن متأكدنه اذا هو الشخص المطلوب او لا.
فيروز: وشلون عرفت مكانه؟
هَيْصَم: والدج ترك كم معلومه تخص العصابه گدرنه نلقي القبض على واحد من عدهم وهو اللي خبرنه عن القاتل بعد التعذيب بالعادة الأنسان يتملص من العقوبه بهاي الطريقه لذلك متأكدنه اذا هو او لا.
فيروز: رجعت قضيته نسدت مره ثانيه؟
هَيْصَم: بشكل علني اي لكن اني مستمر بالبحث عن كل دليل يخص هاي القضيه بعدني على وعدي ومستحيل اخلف بيه لَّباءَة.
فيروز: واني واثقه بيك.
هَيْصَم: تگدرين متثقين بيه يعني؟!
فيروز: لتنغر لأن ماعندي حل غير هذا.
هَيْصَم: لتكذبين مشاعرج، انتِ واثقه من كل گلبج بدون اجبار لَّباءَة.
فيروز: اترك هذا الموضوع و سولفلي عن خالتي شويه منو هي وليش ماعندي معرفه بيها؟
هَيْصَم: هاي الأسئلة اسأليها من تشوفيها باجر اما منو هي وشلون عرفتها والدج انطانا اسمها الكامل وخبرنه انو هي تسكن بكربلاء وبعد بحث عرفنه هي منتقله لغير مكان بسبب الظروف وسعر الأيجار الغالي مگدرت تبقى بالبيت اللي ساكنه بيه ومن شهرين انتقلت بعد مطردها ابو البيت.
فيروز: وشلون جانت عايشه قبل؟
هَيْصَم: اني كتلج انو والدج المرحوم جان يصرف على عائلة وهاي العائلة هي خالتج حجالي انو زوجها متوفي قبل خمس سنوات وهو متكفل بيها من ذلك الوقت ويمكن من زمان حتى لأن زوجها مجان عنده راتب لذلك مگدر يتخله عن اخت امج الوحيده واعتبرها اخته ايضاً.
فيروز: ليش مجنت اعرفها؟
هَيْصَم: زوجها جان يكره والدج ولسبب غير معروف أو هو مذكرلي شي عن هذا الموضوع لذلك ميقبل تجي وتزوركم على رغم هذا هو مقطع التواصل وياها وبقت مستمرة علاقتهم الأخوية.
فيروز: تعرفها؟
هَيْصَم: لا بس اعرف عنوانها باجر تتعرفين عليها ان شاء الله وهسه عندج سؤال بعد لو اكتفيتي؟
فيروز: لا عقلي ميجمع اسئلة هسه اذا تذكرت اسألك.
هَيْصَم: اذاً گومي نامي باجر عدنه طلعه من الصبح لَّباءَة.
دخلت الغرفة وبدت الأفكار تتضارب بعقلي: صدگ هاي آخر ليله اشوفه بيها؟
بعد ما المح ظله بالبيت وما استمتع بصوته وهو يصيحني لَّباءَة؟
ليش الأحلام متصير حقيقه وشنو السبب اللي يخلي الألم دائماً مصاحب لمشاعر الحُب؟!
قصة حبي من طرف واحد ابتدت وراح تنتهي بنفس الطريقة،
بعمري كله محبيت أو اول مره يدگ گلبي لشخص يطلع بارد وبدون مشاعر وميريد يبني اي علاقه وي النساء، مفكرت ابداً تصير بيناتنا اي علاقه غير شرعيه او علاقه حُب الله ميقبل بيها بالعكس تماماً اتخيلت ايكون زوجي وابو اولادي،
صنعت هوايه مشاهد داخل عقلي من عدها يرجع للبيت بعد الواجب واني احضر العشا يدخل للمطبخ ويجي يحضني ويهمس بأذني كلمات رومانسية وفجأة وبهاي اللحظة تدخل بنتنه،
هو اني بس اللي هيج افكر لو كل البنات اللي يحبن نفس الشي؟
نمت على الجربايه ورجعت سرحت بمخيلتي مره ثانيه، مضت هاي الليله مثل سابقتها من الليالي لكن اكو فرق بسيط وهو بعد ما اگدر اشوفه مره ثانيه،
واني مخليه راسي على المخده خطر على بالي سؤال ليش لازم الرجال يعترفون يعني شلون اذا جانوا خجولين ليش منصير احنه مثل الهنود و النساء هي اللي تخطب؟
ضربت جبيني على هذا التفكير منو عدها الشجاعه تسويها هم زلم وميسووها تالي احنه نسويها؟!
لائِث: يعني مراح تجي باجر؟
هَيْصَم: لا اذا صار اي شي خبرني.
لائِث: تعرف راح اشتاقلك؟
هَيْصَم: احضن المخده قبل متنام وتخيلها انا.
لائِث: صاير تحشش ابن الحلوه.
هَيْصَم: انجب لتحجي على امي.
لائِث: خابرتها؟
هَيْصَم: ممكن يطلعون مراقبين الخط ما اگدر اخاطر هيج.
لائِث: لتجذب عليه انت متتحمل تسمع صوتها وهي تبجي لتكابر هَيْصَم تره اعرفك.
هَيْصَم: اشم بيها ريحته اشوف بيها والدي لذلك ما اتحمل اضوجها واعرف اذا خابرتها تجبرني اروح حتى تشوفني وهذا الشي صعب هسه تعرف خطورة الوضع اللي احنه بيه.
لائِث: تبقى امك أو واجبك متحرگ گلبها.
هَيْصَم: تبجي وتنقهر وتدعي عليه كل شي اتقبل بس اتموت گدام عيني او يهددوني بيها هذا الشي مستحيل اتحمله ماكو مكان خالي بگلب الهَيْصَم للخسارات لائِث.
لائِث: اعرفك گدها وگدود تنحل صدگني وتصير سوالف.
هَيْصَم: ان شاء الله.
لائِث: شنو صار وياك؟
هَيْصَم: تعرف الأمر وبأي صفه اخليها اهنا؟
لائِث: زوجتك، اعرف انك تحبها بس اتكابر على نفسك وتقنع گلبك بغير كلام.
هَيْصَم: اكره هذا الموضوع لتجيب سيرة الحب على السانك مره ثانيه محبيت ومراح احب غيرها هي اللي خانتني وراحت وتركت الهَيْصَم بدون گلب.
لائِث: اطوي الصفحه وأفتح ورقه جديدة انسى هَيْصَم.
هَيْصَم: مستحيل حبيتها بكل قوتي وغدرتني وراحت بس حرصت انو تاخذ گلبي وياها ومتخليه اليه.
لائِث: والعباس حبيتها اشوف بعيونك هاي اللمعه من تحجي بسيرتها او من تترك شغلك وترجع للبيت بس حتى تتطمأن عليها لتجذب عليه واني حافضك عدل.
هَيْصَم: خليفه المحرزي شنو رأيك تروح تنام واتكفيني شرك؟
لائِث: منو هذا؟
هَيْصَم: مستشار علاقات أسريه ولو انت اشعرفك بهيج امور.
لائِث: اي والله اني رجل اعزب حد النعال يا اخي حلمي ارجع للبيت واشوف مريتي واگفتلي بالباب منتظرتني اويلي.
هَيْصَم: هوب هوب لتزحف على الترابي بشرفك بعدين متتزوج منو لازمك؟
لائِث: ميقبلن عبالهن اني ضابط اكو بصمه على گصتي اموت عن قريب بس والله غبيات حتى لو اموت يستفادن بالراتب، أخ هَيْصَم اخوك بالضيم يالتنشد عليه ليش متحن وتزوجني اختك؟
هَيْصَم: تعال اخطبها ودلل وين الگي شخص مثلك شريف نزيهه ورع متقي.
لائِث: غلطان بالعنوان خويه هذا انا ما ملتقي بيه ابد.
هَيْصَم: صير هيج وتعال اخطب.
لائِث: عليك العباس اذا خطبت تقبل؟
هَيْصَم: لائِث شنو فلمك عزيزي؟
لائِث: مصري يبعد اخوك وعادل امام وبوسي هسه گاعد اشوفه.
هَيْصَم: اذاً روح كمل الفلم ومن يصير شي اتصل بيه.
لائِث: انتبه على نفسك مو مثل ذلك اليوم وتخلينه نگمز من القهر.
هَيْصَم: محد گلك صير قرد.
لائِث: مقبوله من عندك يبعد اخوك،
صدگ سمعت بالخبر؟
هَيْصَم: شنو؟
لائِث: هَمْهَام ايريد يخطب.
هَيْصَم: ملعون مخبرني.
لائِث: هو فكر يگلك بس تعرف لازم تسمع من عندي حصري.
هَيْصَم: اذا كتلك اني غير مسؤول خلي ابالك.
لائِث: سوي نفسك متعرف مو جديدة عليك حبيبي.
شو مسألت منو هي؟!
هَيْصَم: ما الي علاقه اذا هو ايريد يحجي براحته.
لائِث: جوارين بيت عمه ايگول حبها من اول نظرة اويلي العشق الممنوع.
هَيْصَم: ليش ممنوع مو جوارين بيت عمه؟!
لائِث: اي صح بس المشكله انو هي اتصير صديقه بنت عمه.
هَيْصَم: اي المشكله وين؟
لائِث: انت ليش متخليني اكل خ**؟!
هَيْصَم: اكل هني مري منو مانعك؟
لائِث: خليني اكمل لا والله اخليها حسره بگلبك وما احجيها.
هَيْصَم: قصدك تبقى حسرة بگلبك ومتخليك اتنام.
لائِث: اي اسمع المهم اتفق وي بنت عمه تجس النبض.
هَيْصَم: بشرني طلع طبيعي ان شاء الله؟
لائِث: وتاليهاااا وياك هَيْصَم خليني اكل نعل.
هَيْصَم: اكل براحتك الف عافيه.
لائِث: اي المهم هي مو طلعت صديقه بنت عمه هي بدورها الأخيرة باگت السانها واخذت من عدها معلومات سودة شواربي وجان تطلع محجوزة لأبن عمها.
هَيْصَم: ناهي عليها؟
لائِث: لا حاجين بيها.
هَيْصَم: وهو شلون يخطب ابنيه حاجين بيها ايريد يخلي اهله بموقف سيء عاقل هذا؟!
لائِث: ميريد يتندم بعدين ايگول على الأقل اسوي اللي عليه واترك الموضوع لرب العالمين.
هَيْصَم: اذا هو ايحبها ويريدها احنه وياه للأخير وميكون خاطره الا طيب.
ريهاف: گاعده يم امي واجتني رساله على الموبايل فتحتها وجانت من رقم غريب.
: ليش مترحمين بحال گلبي الولهان لعيونج رهفي؟
ريهاف: كتبت رسالة ودزيتها اله،
طايح الحظ سود الله وجهك ماعندك غيرة؟
ماعندك خوات تخاف عليهن ليش تحجي هيج وي بنات العالم؟
رجع جاوبني،
: مقبوله من عندج بزونتي.
ريهاف: رجعت كتبتله،
انت ماعندك احترام ومو صوجك صوجي اني اللي احجي وي هيج نماذج سرسريه،
انطيته حضر وغلقت الموبايل ناس حقيرة متعرف شنو اخلاق ميدرون كما تدين تدان بالوقت اللي يحجي بيه وي ابنيه اخته تسوي نفس الشي بس مع ذلك ميتوبون الله ليوفقه حرگ گلبي واحد ادبسز،
بس اللي شاغل بالي وين يعرف اسمي بالأضافة من وين عرف رقمي وراسلني واتساب اني حتى گروبات ما ادخل وماعندي اي حساب غير واتساب وتلي ربي والله مشكله من وين تجي هاي الطاقه اللي عدهم اني اختي احجي وياها دقيقتين وأمل هُم مستعدين يحجون وي عشره بنفس الدقيقه اللهم ماريد شي بس الخلگ اللي عدهم،
نزلت حوري وعيونها حمر الواضح جانت تبجي حاولت ابين الوضع طبيعي وما اخلي احد ينتبه بس مگدرت اصبر اكثر وقررت اسحبها للمطبخ واعرف شنو بيها وضع هاي البنيه معاجبني صار كم يوم وهي مو طبيعية احس اكو شي ولازم اعرفه نهضت من مكاني وصحتها،
حوري حبيبتي تعالي ساعديني نحضر حبشكلات علمود الفلم.
حوري: تمام جايه.
ريهاف: دخلنه للمطبخ وحاولت ابين الوضع طبيعي واخذ من عدها معلومات بطريقه غير مباشرة حتى متحس عليه،
اي شخبار اهلج؟
حوري: الحمد الله كلهم بخير.
ريهاف: شوكت تطلع النتائج انريد نفرح بيج.
حوري: ايگولون الأسبوع الجاي.
ريهاف: اي احسن حتى نسويلج حفله اهنا قبل مترجعين.
حوري: ابتسمت بوجهه أو رجعت كملت كلامها.
ريهاف: تعرفين اني بمثابه اختج الجبيرة ومعزتج مثل معزت آمندا وآريا واخاف عليج مثلهن لذلك اذا عندج مشكله او شي حابه تحجيه اليه اني موجوده دائماً وصدگي سرج ابير ومحد راح يعرف بيه ابداً كوني واثقه.
: خفت اتكون عرفت بشي عن طريق ملامحي حاولت ابين نفسي طبيعيه وابتسم بوجهه.
حوري: ماكو شي بس خايفه من النتائج مو اكثر.
ريهاف: اذا هيج ماكو مشكله كلنه خفنه بالسادس ان شاء الله تنجحين وتصير ذكريات.
: صار وقت النوم وصعدت للغرفه غطيت راسي بالجرجف وسويت نفسي نايمه ما ألي خلگ أحد عرفت شنو هو مصير علاقتنه مع ذلك تبعت مشاعري وكذبت الواقع اني اكثر وحدة تعرف مدا كره أرفد ونسر لمحمد او العكس العداوة اللي بينهم مو طبيعيه اتحسهم مثل الفار والبزون،
الرفض هاي نتيجه متوقعه اصلاً اكثر من متوقعه وماعرف شنو راح يصير بالمستقبل بس گلبي ممطمأن ابداً يارب متدمر حياتي بسبب هذا الحب.
فيروز: فتحت عيوني واني اسمع طرقات خفيفه على الباب كمت من مكاني عدلت ملابسي وباوعت لنفسي بالمرايه وطلعت صار بوجهي لابس اسود حتى وجهه مخيم عليه الحزن اتمنيت ايگول خلص بطلت راح تبقين اهنا بس بالأخير احنه مو بمسلسل تركي واكيد مراح يگول غير هيج.
هَيْصَم: صباح الخير.
فيروز: صفنت بوجهه هاي أول كلمه اسمعها من عنده بأول يوم التقينه بيه وبين صباح ذلك اليوم وصباح هسه الف شغله تغيرت ومثل ميگول المثل الف اعمامه تنگلب وصدگ انگلبن وتغيرت مشاعري وهذا الشي اللي ديموتني على البطيئ،
فززني صوته وهو يگول.
هَيْصَم: رجعنه للصفنه بخير انتِ لَّباءَة؟
فيروز: بخير بس نعسانه شويه.
هَيْصَم: حضري نفسج راح نطلع بعد نص ساعة اذا تردين تتريگين استعجلي حتى منتأخر.
فيروز: لا ممشتهيه اغير ملابسي واطلع،
غيرت ملابسي ورتبت شعري بعد مصليت الصبح وطلعت لگيته منتظرني كدام الباب يمشي قبلي واني تبعته طلعنه من البيت وصعدنه بالسياره نظرتله نظرة وداع ونزلت دمعتي مسحتها بسرعه وحجيت،
تگدر تاخذني لبيتي؟
هَيْصَم: ليش؟
فيروز: اريد اخذ كم شغله اليه و ملابسي همات.
هَيْصَم: عندج جنطة سفر؟
فيروز: بابا عنده،
دام صمت منطقنه بأي حرف مشغل قرآن طول الطريق حتى وصلنه للبيت نزلت وفتحت الباب مجان مقفول دخلت ولفحتني ريحة الذكريات أيام الطفوله ومراهقتي، بهذا المكان حضني وداعب وجناتي، وبهاي الزاوية مسح ادموعي لأن ست نهله ضربتني على ايدي مجنت حافظة الدرس اما المطبخ جنت كلما ارجع من المدرسه اشوفه يحضر بالأكل مجان يعرف يطبخ غير التمن والبيض لذلك يوميه اكلنه تمن واكو مرأه جوارينه تذكرنه يوميه وتجيب النه اكل حتى كبرت اشويه وعلمتني وصرت اني اطبخ وكلما يجي ويشم ريحة الأكل يگول كلمتة المعتادة،
"الله ميحرمني من هاي الريحه ومن الوردة اللي تحضرها اليه".
بس اني نحرمت من ريحته مزعلني يوم ولا ضربني وخلاني بحريتي مات وماتت احلامي وأمالي وياه،
دخلت لغرفته نزلت دموعي اللي موگفت من اول مشفت باب البيت فتحت الكنتور وطلعت ملابسه شميتهم اويلي شگد مشتاقتله ياريت لو الگبر اللي ضمك ايضمني هم وارجع اشوفك من جديد بس الأمنيات مستحيل تتحقق رجعت ابجي بقوة اكبر لدرجه حسيت راسي راح ينفجر،
مسحت دموعي وحاولت اقوي نفسي طلعت الجنطه وخليت كل ملابسي والشغلات اللي احتاجها واخذت كم قطعه من ملابسه اتذكره بيهم بعدين اخذت صورنه اني وياه و صورة لأمي انطاني اياها كلهم مخليتهم بألبوم خليته وسديت الجنطه وطلعت اخذت المفتاح مخليته اني جوه الفرشه بالمطبخ غلقت كل الأبواب وباب البيت همات لگيته مكتف أيدة ومنتظرني يم السيارة اقترب من عندي واخذ الجنطه وخلاها بالصندوگ وصعدنه،
جذبتني القصيدة اللي شغلها وصوته وهو يدندن بيها بهمس شبه مسموع خلاني اغرگ بعالم ثاني ودموعي متوقفت ابد.
يازمن وين الأحبــاب
والله مليت العتــاب
يمته نشتم التــراب..
يمته نشتم التــراب..
ليش النحبهم نصير ابعاد عنهــم ؟
يازمن والله ڪــفر تحرمنه منهم
ملت احجاراتهم من ڪــثر ونهم
ياحسافة عاشو الغربة ابوطنهم
امنية ابخاطري اتدور
بس اقبل هالگبــور
اوگف ودمعي سچـــاب
يمته نشتم التراب
وگف كدام القبر قرأ الأسم المكتوب عليه نزلت ادموعه اللي يكافح حتى محد يشوفها، نزل وصار بمستوى القبر مرر ايدة عليه وگال بصوت مليان حزن..
يتبع.
لتنسون التفاعل ومشاركة القصه كبروا عائلتنه شمعاتي.
تصبحون على الف خير
حسابي الأنستا.
تابعنا وما يفوتك جديد
اختر المنصة اللي تناسبك وتوصلك الفصول أول بأول.
التعليقات (0)
جاري تحميل التعليقات...
لا توجد تعليقات بعد
كن أول من يشارك برأيه!