للتواصل انستا zahraaahmedn99
علقوا بين الفقرات+ صوتوا للبارت+ تابعوا حسابي عيناي انتوا.
شاركوا القصه مع اصدقائكم حتى نستمتع وي الهَيْصَم مع بعض.
هَيْصَم
(الكاتبة زهراء احمد)
_______
ﭑنتِ ﭑلتي لا تشبهها ﭑمرأةٍ
رغم ﭑنها تمثل ڪُل ﭑلنساء
ﭑنتِ ﭑلسهله ﭑلصعبه ﭑلقريبه ﭑلبعيدهَ .
فيروز: وصلنه للنجف الأشرف الأرض اللي تضم ضريح الأمام علي عليه السلام وقبور اشخاص حبيناهم وعشنه وياهم ايام حلوه متنسي وجانت أكبر امنياتنا نبقى عايشين بين احضانهم طول العمر لكن للقدر رأي آخر وانفرض علينه نفترق بوقت مبكر جداً،
وصلنه للمقبره نزل ونزلت بعده اشتره مي ورد بطلين وبخور انطاني نص واخذ النص الثاني مشينه بين القبور وعيني مبتعدت عن الأسماء على رغم الأمام علي عنده مقوله يأمر بيها الأبتعاد عن قرائتهن لأن يسببن الغباء لكن اللي جذبني للقراءة اغلبهم شباب هذا البلد يقدم اموات للمقبرة بكل يوم وميكتفي،
وصلني لقبر والدي قريت أسمه المرحوم (ياسر حسين) نزلت ادموعي نزلت لمستواه غسلته بمي الورد وشغلت البخور بقيت اعاين على التراب اللي ضمه وجبره يبعدنه،
ليش قبلت بنتك تبقى وحدها ومنو خبرك اني اريد خالتي ما اريدك؟!
ليش تركتني وقبلت اتكون بهذا المكان؟؟
معقوله محنيت لأيامنه ومشتاقيتلي؟
متريد اتشوفني ليش ابتعدت بهاي السهوله جنت تگدر تقدم استقاله من عملك وتبقى يمي من كبرت جنت دائماً اتگلي اتمنى اشوفج عروس و افرح بيج واسلمج بأيدي لرجال ايصونج ويحافظ عليج حتى اذا متت وامج سألتني اجاوبها واني مطمأن بس انت خلفت بوعدك وقررت تتركني قبل متشوفني عروسه والله العظيم مرايدة شي من هاي الدنيا غير يوم واحد انجمع بيه اني وانتَ تحضني وتخليني على رجلك وتقرالي،
دللول فيروز بنتي دللول،
جنت اتگلي الله ما رزقني بولد يحمل اسمي بعد ما اموت بس عوضني بيج عن الف والد ادري بيج راح تبجين عليه وتقريلي الفاتحه انت الوحيده اللي تسويلي العزاء مالتي وتزورين گبري وتسولفين عني لأحفادي،
ما اريد اعيش يوم واحد بدونك ارجع ولتخليني اتحمل كل هذا العذاب وحدي والله ما اگدر، اكذب عليك اني والله مو شجاعه ولا قويه مثل متگول وحدة جبانه اخاف من اي صوت اسمعه حتى لو الهوه يضرب بالباب،
ليش احجي ومتجاوب؟
رد عليه حتى لو بكلمه وحده لتخليني وحدي مثل المجانين،
مراح تحجي واني تعبت بما انو متريد اتجاوبني اسمعني لعد سلملي على ماما هوايه وخبرها اني احبها على رغم مشايفتها بس بالصور وگلها اسفه لأن جنت السبب اللي فرقكم انتبه على نفسك مراح انساك بدعائي وصلاتي.
نهضت ومسحت ادموعي لگيته واگف بعيد عني بس عينه عليه اتقرب من عندي وانطاني بطل مي غسلت وجهي وشربت من عنده ورجعنه للسياره فكرت انو خلص راح نمشي بس فاجأني من قفل الأبواب ورجع مره ثانيه للمقبرة.
وكفت كدام القبر ونزلت لمستواه غسلته بمي الورد والقبر اتفوح من عنده رائحة الورد شهيد سعيد ضحى بحياته من اجل الوطن وصار من شموع هذا البلد استشهد بحرب داعش وكان صديق عزيز عليه، نزلت دموعي عليه واني اشوف شاب بعمر الورود تحت التراب،
هَيْصَم: زوجتك بخير وابنك هم زرتهم الأسبوع الفات وصلتلهم سلامك مثل موصيتني راتبك يوصللهم كل شهر ابنك نجح بالأمتحانات وصار أول متوسط وزوجتك اتقدم واحد لخطبتها بس رفضته أمك على فراش الموت منتظرة تلتقي بيك على أحر من الجمر، اخوك تزوج من شهرين ومنتظر ابنه ينور الدنيا،
وک العادة اللي يكلي بكل هاي الأمور هو ابنك محمد تقي ايگلي ايريد يصير جندي حتى يستشهد ويلتحق بيك لكن امه متقبل وتزعل عليه اذا حجه بهذا الموضوع،
صار فتره طويله مزرتك بهذا المكان لكن تعرف ظروفي وانشغالي بالقضيه رجعت انفتحت من جديد وهاي المره اني استلمتها أو اوعدك راح اخذ انتقامي من كل واحد دمر شباب هذا البلد وزرع بذرة الفساد عن طريق المخدرات مراح يهدالي بال ولا يغمضلي جفن اذا معتقلتهم أو صلتهم لحبل المشنقه.
فيروز: رجع للسياره فتح الباب وصعد حجيت بسرعة وبغضب،
ليش تقفل الباب شنو هاي العادة السيئه معقوله لحد الأن تفكر اهرب من عندك؟!
هَيْصَم: بكل الاحوال راح تهربين شنو الفرق؟
فيروز: مو اني اللي اهرب انت اللي جبتني لهذا المكان سيد افندي.
هَيْصَم: على كل حال قفلت الباب حتى احافظ عليج مو كل المحيطين بهذا المكان أوادم.
فيروز: وليش انت مو واحد من عدهم؟!
هَيْصَم: قصدج اني مو أدمي لَّباءَة؟
فيروز: محجيت هيج لتحرف كلامي.
هَيْصَم: جوعانه؟
فيروز: لا شكراً ما اريد شي.
هَيْصَم: مگتلج اكلي گلت جوعانه اكو فرق بين الثنين لَّباءَة.
فيروز: انت مُصر تحرجني يعني؟!
هَيْصَم: لأن الأوقات اللي تنحرجين بيها تجي دائماً على بالج بدون أذن حتى بجميع اوقاتج تذكريني لَّباءَة الهَيْصَم.
فيروز: مو كأن تحجي بنبرة تملك لو اني غلطانه؟؟
هَيْصَم: واذا اريد اتملكج اكو احد يمنعني وخاصتاً گلبج اعلن استسلامه اليه من زمان؟؟
فيروز: واثق جداً سيد متدين؟!
هَيْصَم: متحبيني لَّباءَة؟
فيروز: لا.
هَيْصَم: متأكدة؟
فيروز: اي.
هَيْصَم: وليش معصبه هيج هو موضوع للنقاش!!
فيروز: هَيْصَممم.
هَيْصَم: صوتج يول زرفتي طبلة اذني.
فيروز: احسن حتى متسمع احد بكل حياتك.
هَيْصَم: افهم من كلامج تردين احتفظ بصوتج قبل ما اصاب بالطرم؟!
فيروز: وين ماخذني هَيْصَم؟!
هَيْصَم: وين تردين؟
اليوم كله اني متفرغ لحضرتج.
فيروز: تضحك عليه حضرتك؟!
هَيْصَم: ليش حتى اضحك عليج احجي جديات اني.
فيروز: ملايگه عليك اللطافه للعلم تره.
هَيْصَم: انت اتموتين على ربي بكل حالاتي لَّباءَتي.
فيروز: ليش دا احس هاي اعترافاتك اليه؟؟
هَيْصَم: كتلج قبل گلب الهَيْصَم ميت من زمان وماكو مكان للحُب بيه.
فيروز: اكون فضوليه اذا سألت عن السبب؟
هَيْصَم: انتِ فضوليه من اول يوم اتعرفت بيه عليج شنو الجديد بالموضوع؟
فيروز: انت تعرف عن حياتي كل شي بس اني لا برأيك هذا عدل؟
هَيْصَم: اعرف فقط المعلومات الواضحه والگالها والدج على سبيل المثال اني ماعرف اذا انتِ مرتبطه مع احد سابقاً او لا؟؟
فيروز: حضرتك اتريد تسرق الساني؟؟
هَيْصَم: جيد مضاع تعبي بيج طول الفتره الماضيه.
فيروز: اعجبك،
مجاوبت على سؤالي هَيْصَم.
هَيْصَم: شنو هو سؤالج؟
فيروز: حبيت من قبل؟
هَيْصَم: اي.
فيروز: منو هي؟
هَيْصَم: امي.
فيروز: تستهزء حضرتك؟!
هَيْصَم: ليش حرام احب امي لو هي مو من النساء؟!
فيروز: مجان قصدي هذا الحُب الفطري اقصد حب من نوع آخر.
هَيْصَم: قصدج حُب الشباب هسه؟
فيروز: وشنو الفرق هو كله حب!!
هَيْصَم: اكو فرق اكيد، شباب اليوم ايحب وحده ورابط فيشه وي عشره غيرها اما حُب الأسد مخلص للبوته ، ميخون وميخدع وميدور علاقات غير شرعيه اني رجل اقدس مشاعر الحُب واعتبرها شي عظيم لذلك مو اي وحدة تگدر تاخذ گلبي واگدر اقدملها وعود وعهود الزواج.
فيروز: فكرتك متزوج.
هَيْصَم: ومنو گال العكس؟!
فيروز: صدگ والله متزوج انت؟؟
هَيْصَم: اي وليش انفعلتي هيج شكو بيها اذا تزوجت يعني برأيج رجال جبير مثلي معقوله ممرتبط لحد الأن؟
فيروز: الصراحه اني ايضاً هيج خمنت بس من سمعتها من عندك اتفاجأت.
هَيْصَم: لتتفاجأين كل شي وارد بهاي الحاله لَّباءَة.
فيروز: عندك اطفال يعني انت اب؟
هَيْصَم: تعالي حتى ناكُل بعدين كملي الحديث.
عرفته ميريد يحجي بالموضوع لذلك سكتت نزلنه كدام المطعم طبعاً اني لابسه حجاب اشترالي على الطريق من أجينه كون منطقه مقدسه ما اگدر اخالف التعاليم الدينيه بهذا المكان و فكرت بنفس الوقت ابقى ملتزمه بيه وما انزعه واكبر سبب خلاني اتخذ هذا القرار هو سكني بهاي المحافظه بالأضافة اني مجانت عندي اي مشكله شخصيه وياه بس ماعرف ليش مجنت البسه أو والدي مفرض عليه هذا الشي،
طلب أكل بعدها رحنه للأمام علي عليه السلام هاي اول امره اجي لهذا المكان بدون والدي الله يرحمه اول مدخلت عصفت بيه الذكريات ورجعتني لأيام من العمر متنسي أحاله،
جنت طفله بوقتها عمري 11 سنه اول مره اجي بيها للزياره جان ايخاف عليه لذلك ميطلعني اهوايه لأماكن بيها ازدحام اول مدخلت للحضرة الطاهره صفنت بالجمال مالتها الشكل بالحقيقه يختلف هوايه عن التلفزيون من اتشوفها على الواقع اتحس بخشوع ورهبه، بهذا المكان امام معصوم بهاي الأرض الطاهره اندفن بقيت الله وخليفته على الأرض،
واني صافنه بهذا الجمال انتبهت على نفسي وبابا مموجود بجيت وخفت وانتابني شعور سيء جداً بقيت ادور عليه بين الوجوه ملگيته أجه رجال اعتقد جان من الموظفين التابعين للعتبه سألني اذا مضيعه أحد گلتلله بابا يمكن جان غباء اثق بشخص غريب واحجي وياه على رغم والدي منبهني ما احجي وما اختلط وي ناس ما اعرفها بس بوقت الخوف تسوي أي شي حتى تطلع من الوضع اللي انت بيه وشنو ممكن يصير اذا خسرت فرصتي الثمينه حتى ألگي أبوية؟؟
اخذني وياه لمكان المفقودين صاحوا بأسمي دقايق وأجه فكرت راح يضربني او ايصيح عليه بس سوه العكس حضني مثل شخص مفارق حبيبه من سنين ورجع القدر جمعهم شفت دموعه وسمعت صوته وهو يشكر الله والأمام علي عليه السلام لأن لگاني،
واليوم رجعت ادور بالوجوه مره ثانيه بس هاي المره اكو فرق لازم اصيح عليه بعالم الأموات وحتى لو جاوبني ما اگدر اسمعه لكل شي بالحياة حكمه وماعرف شنو حكمة ربي من وفاته،
دخلت للضريح لزمت الشباك بأديه مجان ازدحام اهوايه لذلك گدرت اوصل بسهوله نزلت ادموعي واني اتذكر أحد الشيوخ من يحجي بالأمام علي على انو هو ابو الأيتام،
فيروز: يمكن اني كبرت على انو اتسمى يتيمه مع هذا اني اريد اعتبرك والدي واحجي وياك اليوم بهاي الصفه،
بعد سنين طويله خسرت سندي بالحياة والشخص اللي جان عليه كل معتمدي بالدنيا وحياتي صارت عبارة عن ظلام دامس من بعده، ماعرف لمنو اشكي همي واشارك عزائي والقدر ياخذني لمكان ماعرف شنو مستقبلي بيه،
عندي حاجه وحدة واني متأكدة مراح اترجعني خاليه أبنيه تطلب من والدها وحاشاك متنطيني رغبتي وطلبي،
أريد انسان اتعوضني بيه عن كل معاناتي السابقه ايكون اليه كل شي واگدر اكمل حياتي وياه حتى ما اكون حمل على أحد مو لأن اني ضعيفه وما أگدر اعيش وحدي بس انت تعرف اللي اتعيشه النساء بهذا البلد فأذا صار زواج لتخليني اوگع بين أدين شخص ميعرف الله شنو وميحترمني وميقدر وجودي بحياته اريدك انت تختارلي الأنسان المناسب،
صليت الضهر كامله كوني ناويه أقامه اهنا وصليت صلاة الزيارة بعدها طلعت لگيته منتظرني بنفس المكان اللي واعدني بيه ابتسم بوجهي بادلته والأمام جان يعرف اني مدعيت يرزقني شخص غريب وانما هو نفسه اللي احتل كل جزء بفيروز على رغم حاولت اتبع عقلي هوايه وما انجرف خاصتاً بعد معرفتي هو متزوج اتغيرت ملامحي فجأة لوحده حزينه ومطايقه أحد من اتذكرت كلامه عنها على رغم هو محجه شي لكن ماعرف ليش حسيت يحجي بيها بنبرة حب وكأن يعترف بحبها علني من ايگول زوجتي،
اقترب من عندي وگال بعقدة حاجب تخلي نظرته تسحر بشكل خرافي.
هَيْصَم: بيج شي لَّباءَة؟
فيروز: لا بس تعبت شويه.
هَيْصَم: مبقى شي و ترتاحين من نوصل ان شاء الله.
همست وي نفسي بصوت ناصي: وين اكو راحه اذا ما اشوفك بعد؟!
هَيْصَم: گلتي شي؟
فيروز: اي ان شاء الله.
هَيْصَم: يلا خلي نرجع للسياره.
فيروز: رجعنه خليت راسي على الجامه وبقيت اعاين على الشارع والسيارات شلون تمشي وعقلي كله يم هَيْصَم وزوجته خطر على بالي سؤال والفضول اشتغل عندي بس استحيت اسأله لذلك حاولت احجي بطريقه غير مباشرة،
شلون طبيعه عملك هَيْصَم؟
هَيْصَم: مثل أي عمل آخر لكن بيه نسبة خطورة اعلى.
فيروز: توصل للتهديد؟
هَيْصَم: التهديد جزء ميتجزء من عملنه.
فيروز: شلون تتواصل وي عائلتك بهاي الحاله؟
التفتلي وابتسم بوجهي وگال.
هَيْصَم: ادخلي بالعميق من البدايه ليش تلفين ودورين؟
فيروز: شنو قصدك؟
هَيْصَم: اني رجل عزابي، غير متزوج بالوقت الحالي ومداخل بأي علاقة حُب وممفكر ادخل عن قريب لذلك ريحيلي عقلج من التفكير لَّباءَة.
انحرجت حيل شكلي نسيت هو يلگفها وهي طايره لذلك حاولت اغير الموضوع بسرعة،
فيروز: ليش جنت تهددني حتى ابقى يمك بحجه حياتي معرضه للخطر ليش محجيتلي الحقيقه من البدايه؟
هَيْصَم: مراح تصدگين لو احلف بحصان الحمزة.
فيروز: ومنو گلك مراح اصدگ؟
هَيْصَم: انتن النساء تعيشن حالة اكشن بكل مكان تتواجدن بيه على سبيل المثال اذا صعدتي تكسي وحدج تبقين طول الطريق تفكرين شلون تتخلصين من السايق اذا اتحرش بيج لذلك اني اتبعت هاي الطريقه وهي الترهيب بالعادة استخدمها مع المعتقلين اتخليهم يحجون كل شي يعرفوه بعد ما انطيهم الأمان والثقه الكامله.
فيروز: يعني جنت تضحك عليه واني الغبيه صدگت!!
هَيْصَم: وما زلتي تصدگيني وتثقين بكلامي لتغشمين نفسج لَّباءَة.
فيروز: خطر على بالي سؤال هَيْصَم.
هَيْصَم: راح اتفاجئ لو مگلتي هاي الجملة.
فيروز: ليش تحجي هيج؟
هَيْصَم: لأن من اليوم اللي اتعرفت بيه عليج انتِ بس تخطر على بالج اسئلة مو جديدة.
فيروز: المهم جاوبني احنه نعرف الشباب يتحرشون بالبنات بس اني سمعت يگولون اكو بنات تتحرش بالولد خاصه الضباط صحيح هذا الخبر؟
هَيْصَم: احنه رجال مشغولين بالعمل بشكل دائم والشخص اللي عنده وقت لهيج أمور تلگيه انسان تافه بدون نفع سواء بالسلك او غيره اما البنات فأي هوايه دخللي خاص وتغزلن بيه وجبرني اغير الحساب.
فيروز: يعني مجاوبتهن؟
هَيْصَم: ماعندي وقت اغلبهن مراهقات و الحقيقه يكسرن خاطري جان هكرت حساباتهن كلهن واحذفهن حتى ايتوبن ميسونها خاصتاً اكو اشخاص هوايه يستغلون هيج نوع بين قوسين ينضحك عليهن بسرعة للأسف.
فيروز: يگولون بسبب نقص العاطفه هيج يصير.
هَيْصَم: ليش هم شباب اليوم شنو مواضيعهم غير شلابسه وراويني؟!
فيروز: هَيْصَم.
هَيْصَم: شبيج قابل مجذب ادخلي اليوم بأي علاقه مع شاب بالتواصل وشوفي شنو حجيه.
فيروز: داخل بعلاقه انت شعرفك هذا حجيهم؟
هَيْصَم: لأن انتن مواضيع دسمه للشباب لو يحجون بيجن لو عليجن ماكو شي وسط وين ما اروح اسمع نفس الكلام اصلاً لعلمج اكو بعض الشباب وتگدرين تگولين نسبه جبيرة من عدهم يتراهنون من يجيب راس هاي البنيه اسرع واني شفتهم بعيوني لَّباءَة.
فيروز: وشنو سويت؟
هَيْصَم: قدمتلهم نصيحه على طريقة الهَيْصَم.
فيروز: ضربتهم؟
هَيْصَم: مو همجي اني فقط فرمتت موبايلهم.
فيروز: بس؟
هَيْصَم: نسيت ادفنهم اعذريني لَّباءَة.
فيروز: شباب هاي الأيام ماعرف شنو مشكلتهم ليش يضحكون على بنات الناس شنو اللذة بالموضوع؟!
هَيْصَم: كل هذا سبب التربيه وعدم مراقبة الأهل بزمن قبل جانت الأم تحرص على تعليم ابنائها على احسن مايكون حتى اوقات النوم منظمه اما هسه اول ميصير الطفل خلوا بأيدة موبايل شنو يتابع وعلى أي موقع يدخل مو مهم ، منو اصدقاءه شنو يسوي بالمدرسه وي منو يطلع محد يهتم يقدموله أكل وشرب وفلوس اما تربيه فهاي ماتت وي اهلها هذا الوقت صار الشخص المحترم ملفت للنظر، والبنات نفس الشي ايضاً.
فيروز: صحيح المجتمع تغير مو مثل قبل من جان يسولفلي والدي.
هَيْصَم: انتِ متعرفين هوايه عن جيل الثمانين
التربية قبل تختلف عن هسه.
فيروز: بشنو تختلف؟
هَيْصَم: الأب كلمته مسموعه والأم احترامها واجب مجان أحد يگدر يگول لا بس ايضاً منعمم لأن بكل مجتمع الزين والموزين،
سولفيلي انتِ دخلتي بعلاقه على النت؟
فيروز: ايع ما احب هاي السوالف.
هَيْصَم: ايجوز اللي راح تحجين وياه يشرحلج شلون تأدين الفروض الخمسه انتِ وحضج.
فيروز: هه تره متضحك.
هَيْصَم: هه مردت اضحكج.
فيروز: وين حتاخذني هسه؟
هَيْصَم: تردين تزورين مسجد الكوفه؟
فيروز: ما گول لا.
هَيْصَم: الواضح انتِ تعبانه نامي اشويه من نوصل اكعدج.
فيروز: سؤال قبل ما انام.
هَيْصَم: يا الله من اسألتج المتخلص.
فيروز: هو آخر يوم وترتاح من عندي ليش مستكثر عليه كم سؤال؟!
هَيْصَم: اسألي أمري لله.
فيروز: خالتي تعرف راح اجي يمها؟
هَيْصَم: لا.
فيروز: يعني انت مكلتلها؟
هَيْصَم: ردت اسويلها سبرايز.
فيروز: وبلكي متقبلتني ليش تخليني بموقف مينسي هَيْصَم؟!
هَيْصَم: سوالف الهنود بطليها الله يخليج.
فيروز: احجي جديات اني.
هَيْصَم: اگلها خالتج تگلي متريدني يعني شنو تردين ايكون جوابي مثلاً؟!
فيروز: هي مجرد فكرة خطرت على بالي.
هَيْصَم: مره ثانيه خلي افكارج مناسبه للواقع.
فيروز: اللي يسمعك يگول ماكو هيج ناس بالحقيقه.
هَيْصَم: اذا مرادتج اني موجود تبقين عندي معززة مكرمة كتلج سابقاً وارجع اعيدها بيتي مفتوح الج دائماً اعتبريني مثل متردين وبأي وقت تحتاجيني بيه تعاليلي احارب العالم كله علمودج وانتِ تعرفيني گد وعدي.
فيروز: هاي وحدة من سوالف الشباب العب لعب علمودج.
هَيْصَم: ليش اني مثل باقي الشباب؟
فيروز: بشنو تختلف؟!
عرفني على مميزاتك.
هَيْصَم: ميحتاج اسمي يعرف عني.
فيروز: مغرور.
هَيْصَم: عندي ثقه زايدة وين المشكله.
فيروز: يگولون الثقه الزايدة ادمر صاحبها.
هَيْصَم: اللي يگولها شخص ممجرب احساس يكون واثق من نفسه ويگدر يحقق احلامه وطموحاته بدون مساعدة احد.
فيروز: منو الشخص اللي متنسى فضله بحياتك بعيداً عن رب العالمين لأن أكيد مينسي فضله.
هَيْصَم: لائِث صديق الطفوله والشباب أخوي اللي مجابته امي حتى هو مقرب من عدها مثلي واكثر هم.
فيروز: تعرف اني ماعندي صديقات.
هَيْصَم: شعجب!!
فيروز: مره جانت عندي وحدة وخانتني وبعدها قررت ما أصادق احد خليني مكتفيه بنفسي احسن.
هَيْصَم: شلون يعني خانتج؟
فيروز: بأيام الجامعه انعجب بيه طالب واعترفلي بوقتها اني رفضته لأن هو ابن الدكتور مالتنه وشخص متكبر بفلوسه ومنصبه عرفت حياتي محتكون سعيدة وياه بنفس الوقت حجيت لصديقتي، تعرف احنه النساء منعرف نضم شي بگلبنه فتره طويله لازم نحجي حتى لو للحايط، بعد فتره تقريباً شهر او شهرين هيج حدود ما اذكر بالضبط اجاني للنادي ويحجي بنفعال يگلي ليش تضحكين عليه واني انطيتج كل شي ترديه وحتى رصيد ادزلج بعد كل هذا تخونيني وتگليلي اني مخطوبه لأبن عمي أو زواجي بالعطله، هواي كلام نسيته بعد، بقيت صافنه ومصدومه أي فلوس ماخذه من عنده وشوكت راسلته اني،
بعد فتره مو طويله ومثل ميگول المثل حبل الچذب قصير عرفتها صديقتي هي اللي مسويه هيج مخليه صورتي على حساب الأنستا مالتها ومراسلته بأسمي من وقتها قطعت كل علاقتي مع البنات وصرت انسانه منعزله.
هَيْصَم: شلون عرفتيها هيج مسويه؟
فيروز: تعاركت هي وصديقتها والثانيه اعترفتلي، الخيانه تمشي بدمهن مو بأيدهن هاي الشغله.
هَيْصَم: وصلنه ومنمتي.
فيروز: الحديث وياك يخلي الوقت يمشي بدون ما احس.
هَيْصَم: هاي احد ميزاتي الغير مُكتشفه لأحد الأن.
فيروز: نزلنه وزرنه ورجعنه للسياره طبعاً البس عبايه من ادخل للحضرة ميقبلون ادخل بدونها،
ومثل ميگولون الأوقات اللي نقضيها وي شخص انحبه تخلص بسرعة ماعرف شلون وصلنه للنهايه وحان موعد الفراق ماكو هَيْصَم وماكو لَّباءَة النهايه حزينه لقصة حب منكتب الها تبدي اصلاً.
وگف السيارة كدام بيت مثل اي بيت عراقي لعائلة متوسطه باوعلي بطريقه غريبه وگال.
هَيْصَم: أريد هاي اللحظة تتوقف اهنا وما انجبر اتركج، لَّباءَة لتعتبرين كلامي اعتراف لكن شغلات حسيت بيها و حبيت اشاركها وياج،
انتِ اجمل شي صار بحياة الهَيْصَم من عشر سنوات لحد الآن، غيرتي بيه صفات متخيلت يجي يوم تتغير، كسرتي القواعد اللي بقيت ابني بيهن عمر بشهر واحد، بس هذا مو حب واني اعرف عدل انو مستحيل گلبي يدگ لأي بنيه لكن هي احاسيس تضرب بگلبي وما اگدر اضمها اكثر من هيج.
فيروز: وشلون لازم اجاوبك هسه؟
شنو تريد اگول على هذا الكلام؟!
هَيْصَم: ما اريد اسمع شي لكن حاولي متنسين شي من الحجي اللي گلته.
فيروز: انت واحد اناني عندك علم؟
هَيْصَم: اي للأسف.
فيروز: ليش سويت هيج؟!
هَيْصَم: ما اريد اترك ندم ممكن كل شي يصير اني ماعرف شنو مكتوب بحياتي على الأقل لازم تعرفين انتِ مميزة بگلب الهَيْصَم بنفس الوقت مو مشاعر حب وانما تگدرين تعتبريها صداقه اذا متت او صار بيه شي اكيد راح تقرأين الخبر بالقنوات الأخبارية او على النت اقرأيلي الفاتحه.
حجيت بغصه لكن مو من گلبي.
فيروز: شهيد متحتاجها.
هَيْصَم: كلامج صح بس سمعت احد المعممين يگول الشخص الميت يعرف منو يدعيله او يسويله ثواب اريد يوصلني خبر لَّباءَة ذكرت الهَيْصَم ومنسته احلفي اتسويها لترديني لَّباءَة اريد اسمع اسمج حتى لو اني ميت.
فيروز: لتحجي هيج محيصير بيك شي بُعدك عني ميموت هَيْصَم.
هَيْصَم: القضيه اللي مستلمها خطره والتهديدات على فلس كل شي ممكن يصير وبأي لحظه لتعاندين واحلفي خليني اودعج واني مرتاح منتهت هاي القصه بهذا المكان.
فيروز: والله مراح انساك واذا متت قبلي اذكرك بكل صلاة وهسه غير الموضوع ضوجتني.
هَيْصَم: ما عاش اللي يزعل لَّباءَة الهَيْصَم.
فيروز: هذا الأسم غريب شنو يعني؟
هَيْصَم: اذا كتبلنه رب العالمين نلتقي اكلج شنو معناه وعد.
فيروز: راح تكمل حياتك بشكل طبيعي؟
هَيْصَم: مراح اتزوج هذا آخر شي ممكن افكر بيه بهذا الوقت.
فيروز: راح اشترك بنادي رياضي واضعف حتى اذا شفتني يوم من الأيام متگول عليه اشبه دجاجه ام عشرة آلاف.
هَيْصَم: بس مو تصيرين ام ثلاثه آلاف ما احب هيج اني.
فيروز: تستهزء حضرتك؟
هَيْصَم: لا احجي جديات.
فيروز: وعدتني تلگيلي وضيفه هَيْصَم لو نسيت؟
هَيْصَم: اول شي ارتب موضوع الراتب اللي ماعرف ليش لسه مطلع بعدين ادبر وضيفه الج ،طلب ثاني ست؟
فيروز: حتى لو اكو ماكو وقت حتى اطلب.
هَيْصَم: انتبهي على نفسج واي شي يصير وياج خبريني.
فيروز: طلع موبايل من الصندوگ مالت السياره وانطاني اياه وگال.
هَيْصَم: هذا موبايلي الثاني بي رقمي بس وكل الحسابات موجوده بيه تگدرين تستخدميهن اذا تردين.
فيروز: بيه جهاز تعقب؟
هَيْصَم: اي اذا متحبين اگدر الغيه.
فيروز: ماكو داعي.
هَيْصَم: تعالي خلي ننزل.
نزلنه كدام البيت طرق على الباب اكثر من مره سمعت صوتها وهي تجاوب.
إيفاء: جايه منو؟
هَيْصَم: اني خاله.
إيفاء: ومنو انت؟
هَيْصَم: شلون تعرفين اذا مفتحتي الباب؟!
فيروز: ابتسمت عليهم فتحت الباب مرأه جبيرة بالعمر سمره وملامحها حلوه سمينه بس مو حيل و طويله يعني جسمها كلش حلو حسيت بيها مثل نسوان قبل قريت بوجهها مرأه يُعتمد عليها امبينه ام بيت شاطره هيئتها هيج تگول.
إيفاء: منو انتم شنو تردون من عندي بهيج وقت؟
فيروز: صفنت شويه بوجهي وجحظت اعيونها وگالت بنبرة تساؤل.
إيفاء: فيروز؟
نزلت دموعي وحجيت بسرعة.
فيروز: تعرفيني؟
إيفاء: شلون ما اعرفج بنت الغاليه انتِ ابوج جان دائماً يسولفلي عنج من يزورني وحتى راواني صورتج بس رجلي مجان يقبل اجي واشوفكم و موبايل ماعندي حتى اتصل بيكم هو الله يسلمه ابوج يجي كل شهرين ثلاث اشهر يزورني يسلم عليه و يروح ويوديلي افلوس كل شهر بأيد واحد من جماعته بس صدگ هو وين ليش اجيتي وي هذا الرجال؟!
فيروز: البقاء لله خاله.
لطمت على صدرها وصرخت.
إيفاء: عزه اشوكت؟
فيروز: من اربع اشهر.
إيفاء: واني اگول ليش مشفته طول هاي الفتره مو عادته يغيب عني سودة عليه حتى فاتحته ما حضرتها عزه بعيني موفيت حقه جان خوش رجال،
شلون مات بنيتي؟
اجيت اجاوب سبقني.
هَيْصَم: قضاء وقدر صابته جلطه وتوفى ،واهنا گدرت اجمعكم وانتهت مهمتي بقيتوا بأمانة الرحمن راح احاول عن قريب ان شاء الله اخلي واحد من الشباب يوصللكم الراتب التقاعدي مالت المرحوم،
مع السلامه خاله،
لَّباءَة هذا آخر لقاء وفيت بوعدي أو وصلت الأمانه انتبهي على نفسج ومثل مگلت اي شي تحتاجيه اني موجود.
فيروز: راح الهَيْصَم أو بقت عيني عليه الى أن صعد بالسياره وساقها وابتعد عن نظري سحبتني خالتي من أيدي على كيف ودخلتني للبيت اول مفتت صارت مقابيلي الحديقه عاديه مبيها شي مميز دخلنه على جهة اليمين الأستقبال وبالنص الصاله و بالنهايه باب المطبخ على جهة اليسار وعلى جهة اليمين بالنهايه من الصاله غرفتين يعني المطبخ ايصير مقابل الغرف مباشره، تلفزيون يتوسطها على الحايط وقنفه مقابيله مرتب نوعاً ما وحلو،
حضنتني وتشم ريحتي وتبجي وتگول.
إيفاء: اويلي بيج ريحتها نفس شكلج وانتِ صغيرة بس صارت عندج خدود وكبرتي شويه.
فيروز: شايفتني واني صغيره يعني بالحقيقه؟
إيفاء: من جنتي طفله يجيبج ابوج يمي تبقين ساعه ساعتين ويجي ياخذج.
فيروز: شلون جان يعرف زوجج مموجود؟
إيفاء: يجي قبل يوم بالليل جواريني قبل صديقه فجان يعرف من يطلع زوجي من البيت وهو اصلا واحد مو خوش أدمي يخلص وقته كله يم جماعته لا شغله ولا عمله الله ابتلاني بيه وخلصني من مات انسي و سولفيلي منو هذا الرجال اللي جابج امبين عليه هيبه؟
فيروز: اسمه هَيْصَم گال انو والدي موصي اذا مات يوصلني يمج بس هيج اعرف عنه.
إيفاء: مو صاحج لبوه مدري شنو؟
فيروز: اي سماني لَّباءَة.
إيفاء: ليش اشبيه اسمج وميگوله؟
فيروز: ماعرف ستحيت اسأله، ماعرف ليش محجيت الحقيقه واصلاً ماكو داعي احجي شي بكل الاحوال مراح نلتقي مره ثانيه ليش حتى اعيش بوهم.
إيفاء: انتِ اكيد تعبانه تعالي نتعشا ونام وعيفي ملابسج باجر اني ارتبهن وياج فيروزة.
فيروز: على رغم هذا اسمي بس صرت اكرهه مصار كم دقيقه من راح وبديت اشتاقله شيصبرني على غيابه وشلون اتأقلم على هذا الوضع؟
ساعدتها بالعشا خلصنه وغسلت المواعين وكل شي اسويه اتذكره من جان يوگف يمي ويحضر الزلاطه او من يغسل المواعين وميقبل اسوي شي اني وميقبل ياكل مثلي لازم أكله صحي حتى ميسمن ويحافظ على رشاقته ابتسمت وضجت بنفس الوقت بقيت مجرد ذكريات ما ألها فايدة،
اجيت ادخل للغرفه حتى انام صاحتني خالتي.
إيفاء: تعالي نامي بحضني حبيبتي.
فيروز: خاله.
إيفاء: طول عمرج معشتي بحنان الأم سميني ماما او يمه بكيفج بعد انتِ بت بغداد وتبغددي علية مثل متردين.
فيروز: نزلت دموعي وركضت لحضنها صدگ اللي گال الخاله أم الله ليرحم الحرمني من حنيتها و شكرا للقدر اللي جمعني بيها.
هَيْصَم: يوم واحد ارجع الگي هيج صاير لائِث اني شنووو حجيت؟!
لائِث: هسه اني شعليه؟!
هَيْصَم: ليش انت منوو مو احد اعضاء فريقي لو اني غلطان؟!
لائِث: اتصلت بيك يطلع مغلق شنو ذنبي؟!
هَيْصَم: ذنبك انو وصيتك جان لازم تعرف شغلك عدل ومتسوي مثل هيج مصيبه.
لائِث: اللي يسمعك يگول مسوي مكسورة نزلت بيها راس عشيرتي هو كلها القينه القبض على مجرم مطلوب هاي هي.
هَيْصَم: امنزل راس عشيرتك ولا مسوي هيج من اشوكت تطلع تعتقل بدون ما يكون عندي خبر خراع خضره اني؟!!
لائِث: اريد كرفس وريحان كلش احبهن.
هَيْصَم: لااااااائِث.
لائِث: سم بگلب لائِث شسويلك والله حيرتني؟!
هَيْصَم: ليش ماعندي علم؟؟
لائِث: سيادتك عندك نائب هو انطانه أمر مصار شي.
هَيْصَم: ظافررررر.
ظافر: نعم سيدي.
هَيْصَم: ميت انه؟
ظافر: اسم الله عليك سيدي عمرك طويل.
هَيْصَم: ليش ماعندي علم اشلون تنطي أمر بدون علمي؟؟
دخل بسرعة بدون ميطرق على الباب وحجه بخوف واحنه عينه عليه.
ضَرْضَم: مصيبه سيدي صارت والآمر موجود يريدك.
يتبع..
شاركونا القصه شمعاتي وتفعالوا ويايه بالأضافة شكراً لتفاعلكم على البارتات السابقه غالياتي.
حسابي الأنستا.
تابعنا وما يفوتك جديد
اختر المنصة اللي تناسبك وتوصلك الفصول أول بأول.
التعليقات (0)
جاري تحميل التعليقات...
لا توجد تعليقات بعد
كن أول من يشارك برأيه!