للتواصل انستا zahraaahmedn99
علقوا بين الفقرات+ صوتوا للبارت+ تابعوا حسابي عيناي انتوا.
شاركوا القصه حتى نستمتع وي الهَيْصَم مع بعض
هَيْصَم
(الكاتبة زهراء احمد)
_______
كلهيب نار موقدة
وشموع ذائبة
وازهار ذابله
ودموع على الخدين سائلة
وقلب كوته حرارة العشق
وعين أذبلها الشوق
وروح اطفئها الفراق
أتت اليه مترنحه في خطواتها
فاقدة الأتزان على حركاتها
وقفت أمام عينيه وسقطت بين احضانه
فيض دماء
أنفاس متباطئة
حان الأجل
ودقت ساعة الموت
وقصته تعيد الحكايه من جديد
فهل النهايه متشابهه؟؟
هَيْصَم.
الخاطره بقلمي
زهراء احمد
اقترب من عندي وبأيدة الأبرة وعلى وجهه ابتسامه خبيثه عرفت انو محيعدي اليوم على خير من صدك وبهاي اللحظة تمنيت رب العالمين يدزلي هَيْصَم ينقذني من هذا الوضع مفقدت الأمل واكو شعور داخلي مطمأن وثقه جبيرة بربي وبهَيْصَم، توقفت كل مشاعري للحظه واني اشوفه صار قريب من عندي حيل مد أيدة للشال اللي لابسته صرخت بيه بغضب وشجاعة غريبه نولدت بداخلي هاي اللحظة.
فيروز: خليك رجال ولتسوي هيج شنو الفائدة اذا حقنتني مخدرات؟
جاوبني بهدوء عكس نار كلبي المستعره.
لّهيم: ليش ما استفاد من تكونين مخدرة أكدر اسوي اشياء هوايه عاشت بمخي من سنين.
فيروز: واحد حقير عديم شرف شنو تريد تسوي بيه؟
لّهيم: لحظه خليني اتذكر شنو جان على بالي من سنين وتخيل اسويه وياج كل ليله تمر عليه؟
اممم.
خله ايده على وجهه بعده لحد الآن لابس الكمامه ومنزعها بس حركته بمعنى ديفكر او يتذكر رفع حاجبه شويه بعدين اقترب من عندي خله أديه على جوانب الكرسي وصار وجهه قريب من عندي حيل يحجي بهمس قريب أذني دب الرعب والأشمئزار بداخلي بكميه لاتوصف.
لّهيم: اشمج وابوسج وحضنج واداعب وجناتج وانت مخدره متكدرين تسوين شي وتكولين لا بس اني وجسمج.
حجيت بعصبيه وحركة كلب من كلامه الحقير.
فيروز: الله ليوفقك بشنو اذيتك حتى تسوي ويايه هيج؟
لّهيم: اذا لمستج راح تنجبرين تقبلين بيه ونزوج وتنسين هَيْصَم ونعيش بسعادة ونخلف بنوته تشبه اعيونج الذوبن كلبي.
فيروز: تحلم غيره يطخني فهمت مستحيل اسمح شخص قذر مثلك يلمسني واذا صار وجبرتني قسماً بذات الله موتك على أيدي حتى لو اعرف ادخل بيك إعدام.
لّهيم: شرسه وهذا الشي يخليني احبج اكثر.
فيروز: واحد عديم اخلاق ماعندك اخت تخاف يصير بيها نفس الشي من طرق باب الناس طُرق بابه رب العالمين باجر يرجعها بعرضك اذا مو اختك امك لو زوجتك وحتى بنتك الله يمهل ولايهمل وتشوف شنو يصير بيك بعدين.
رفع حاجبه مستهزء وكال بنبرة استفزاز.
لّهيم: امي هربت وي صاحبها من زمان وأما اخت اني ماعندي بقت بس زوجتي وانت حتصيرين هي وبالنسبة لبنتي ميحتاج تتعرض لهيج موقف راح ازوجها للشخص اللي يحبها ويخطبها ما اخلي كلبه ينعل مثل كلبي بحبج.
فيروز: على هذا التفكير الحقير شلون تريد رب العالمين يوفقك؟!
عجيب أمركم تتصرفون وكأن ماكو قيامه وعقاب من توكف يم رب العرش ويسألك ليش هيج سويت شنو يكون جوابك؟
لّهيم: اكله احبها وأصلاً اني ناوي اتوب بس تصيرين مرتي اخذج ونسافر خارج العراق وحتى المخدرات اتركها بس انت طاوعيني وقبلي كل شي بأيدج تردين اسوي شي غلط واجبرج تصيرين مرتي بالغصب لو توافقين ونسوي عرس تحلف بيه بغداد كلها؟
فيروز: تحلم وهسه يجي ويطلعني من هذا المكان وأمام عينك ومتكدر تسوي شي.
لّهيم: والله عندج ثقه بيه جبيره وهو لحد الأن مسمعنه من عنده خبر وراح يصيرلج يوم كامل يمي.
فيروز: كلامك ميهز من عندي طرف عندي ثقه بيه جبيرة ومتأكدة راح يطلعني من هذا المكان وتشوف صحة كلامي.
لّهيم: مو مشكله خلي يجي بعد متصيرين مرتي وملكي، خطرت على بالي فكره شنو رأيج اسويله فيديو خلي يشوف حبيبة كلبه بين احضاني وهو ميكدر يسوي شي؟
فيروز: حقير شنو اترجى من واحد بلا غيره مثلك.
لّهيم: لتترجين احسن وهسه يلا اكلي حتى يصير عندج نشاط وتتحملين الأبرة قبل ما اغير رأيي واضربج ابرتين أريدج تعيشين بس اذا انت حابه تموتين فهذا بحثاً آخر.
فيروز: ما أريد سم من عندك خليني بحالي واطلع بره.
لّهيم: مقبلتها من عندج هذا احترامج لزوجج المستقبلي!!
فيروز: انعالي المستقبلي كال زوجي كال، بابا انت عاقل لو مخك شخط فد مره؟
طلعت الابره مأثرة عليك قبل متضربني بيها هذا الإدمان هيج يخبل الناس ويخليهم بهائم ميفقهون شي.
لّهيم: اكلي خليني اشوف شغلي ولو الليل بعده بأوله ونكدر نستمتع بيه على راحتنا بدون ازعاج النقيب.
فيروز: اذا مطيح حظك النقيب اللي تحجي عليه اني معتبه.
لّهيم: حمستيني اشوف شنو يكدر يسوي خاصتا اذا عرف حبيبته ادنست برائتها وصارت ملك لمجرم مطلوب للعداله؟
فيروز: يقتلك وميرفله جفن اصلآ حضر الكفن مالتك تخيل بس واحد ضربني فتح وياه تحقيق وطيح حظه على رغم هذا عمله بس نزل بيه عقوبه ونقله لغير مكان مابالك بمجرم مثلك شنو ممكن يسوي الهَيْصَم؟
لّهيم: شنو يسوي يعلقني فلقه؟
لو يجلدني حتى الموت؟
لو يرجمني لان راح ادنس برائتج واخليج مدمنه متكدرين تعيشين بدون جرعة مخدرات؟
شنو ممكن يسوي الهَيْصَم مالتج الخابصتني بيه؟
يكدر يرجع اللي راح أخذه لو هو اصلآ يقبل يباوع بوجهج بعد اللي راح يصير!!
ثقتج وحبج مراح تجيبلج غير الاذيه اخذيها نصيحه من عندي لتثقين بأحد حتى متنجرحين بعدين.
فيروز: اللي يثق بأسد مو مثل اللي يثق بثعلب اكو فرق جبير.
لّهيم: اتركج من الحيوانات ويلا فتحي حلكج حتى تاكلين هذا الأكل راح يساعدج متفقدين بالكامل وتكدرين تصحين مره ثانيه ابره وحده مراح تسبب إدمان بس راح تحسسج انو انت مثل الطير يحلق بالسماء وها راح اصورلج كل شي يصير حتى اشوفج الإثبات باجر خاف متصدكين بيه.
فيروز: واحد نذل.
لّهيم: اعرف كولي شي جديد.
فيروز: الله يخلص الناس من واحد مجرم مثلك ويريحهم من هاي القذارة اللي ملت البلد.
لّهيم: اني مجرد تاجر صغيرون اكو روس اكبر من عندي يعني حتى لو متت او نسجنت اكو غيري يمول هذا البلد بالسم الأبيض.
فيروز: يجي يوم وجميعكم تتعاقبون هذا وعد رب العرش ورب البيت صادق بكلامه.
لّهيم: لذلك الوقت الله كريم احنه ولد اليوم ليش تفكرين لبعدين خلينه نعيش اللحظه ونستمتع سوه وننسى مشاكلنا.
فيروز: اكبر مشكله بحياتي هي انت رجعني لبيتي وتنحل كل مشاكلي.
لّهيم: تدللين بعد هاي الليله راح اخذج لبيتج ونعيش بيه سوه كل العمر انت بس اسمعي كلمتي وخلينه نبدي بيها والله ما أأذيج ادللج اصلاً.
فيروز: نجس منحط حقير مليتني بقذارتك الله ياخذك ويخلصني من هذا البلاء ويريح العراقين من هيج أشكال قذرة، مد أيده على شالي وفتح الدبوس صرخت بيه وبقيت احرك براسي بس هو ولا كأن متوحش وعاملني بقذاره.
فيروز: وخر عني الله ليوفقك لتلمسني ايدك القذره لتنمد على حجابي ربي يحركك بنار جهنم وخرررر.
لّهيم: هدي اشوي خلي اشوف شلون ينفتح هذا ليش هيج صعب بعدين انت مو جنتي بلا حجاب هسه ستشرفتي براسي شو يم هَيْصَم متسوين هيج وعايشه وياه اصلآ بنفس البيت وهو ميقربج!!
فيروز: لان واحد شريف مو مثلك طايح حظه ومنحط لتقارن نفسك بيه يبقى تاج راسك.
لّهيم: خلي اشوفج شنو أكدر اسوي بيج وهَيْصَم كاعد بمكتبه وميكدر يسوي شي وينقذج.
فيروز: اذا مو هو رب العرش اكيد ميتركني يم وأحد نذل مثلك وميساعدني.
لّهيم: واخيراً انفتح خليني اشم عطرج هاي اول شغله تمنيتها من جنتي بعيدة عني.
خله راسه بركبتي نزلت ادموعي لا يالله كل شي ولايأذيني بهاي الطريقه اموت نفسي والله ولا اتحمل اعيش بكل هاي القذارة مالته، شكد ما انت قوي تبقى اكو اشياء تهزك وتنزل دموعك غصب خاصتا اذا مجنت تكدر تسوي شي بالوضع اللي انت بيه، فوك ما اني ابنيه وبنيتي ضعيفه ضاف الها مقيد حركتي احس بشفايفه القذرة وهو يمررها على ركبتي اتمنيت بهاي اللحظة يدخل ويخلصني من هذا الموقف ونسيت انو الأمنيات لاتحقق ردت اموت بهاي الدقيقه وهمات مصار هيج عشت اسوء لحظات تمر على كل ابنيه مكدرت اكون بيها قويه لكن تضاهرت بالقوة جانت ركبته قريبه عليه نزلت راسي وعضيته بيها عضه خليته يصرخ ويبتعد عني بسرعة صدك ريحت كلبي بيه وبقيت طبع اسناني معلم عليها حجيت بشمئزار بعد مبسقت على الأرض لعبانه نفسي من عنده.
فيروز: لتفكر ابد اسمحلك تقترب من عندي واني ما اسوي شي صحيح رابطني بس حلكي شغال واسناني تحكني اذا متريد اقطع من عندك جزء من راسك لتقترب فاهممم.
لّهيم: شرسه فيروزة وهذا الشي يخبلني عليج ويخلي كل غرائزي تشتغل وعليه قررت أستخدم الأبره واشتغل براحتي بدون ازعاج اسنانج.
فيروز: الله ليوفقك ياحقير وخر عني ولتقترب يارب تشوفها بعرضك وصحتك ربي يبتليك بسرطان بحلكك ويعذبك بيه.
لّهيم: بس بشرط ابوسج بالأول اريد طعم شفايفج اخير شي احس بيه.
فيروز: طايح الحظ سرسري وخررررر عني.
لّهيم: اهدأي بعدنه مسوينه شي ليش كل هاي العصبيه؟!
فيروز: وتكول تحبني هو هذا اسمه حب؟!
شفت هذا الفرق بينك وبينه هو قمر عالي بسمائي مميز ومنفرد اما انت صخره يعثر بيها الناس متجيب غير المشاكل والأذيه.
لّهيم: زعلتيني واني من ازعل اتصرف تصرفات تأذيج واني ما أريد أأذيج فشنو الحل هسه؟
فيروز: عيفني بحالي كافي عاد والله ماعندي طاقه اتحمل أكثر من هيج ليش تعاقبني بهاي الطريقه؟!
لّهيم: هذا تعبير عن حبي ليش تسميه عقاب؟!
فيروز: ألعن ابوك لا ابو حبك ليش متفهم يا أخي اني مطايقه وجهك ولعبانه نفسي من عنده؟!
لّهيم: ليش انت شوكت شفتي وجهي حتى لعبت نفسج من عنده؟
حتى من تركت قبلاتي على عنقج مخليتج تشوفيني.
فيروز: الله يوفقك كافي عاد افهممم وجودي اهنا غلط ليش متستوعب اني عشت عمري كله شريفه مو مثل البنات اللي تعرفهن يبيعن شرفهن علمود كم فلس اني عكس تمامآ ابيع الدنيا واللي بيها علمود شرفي وحتى واحد قذر مثلك ميطخني فاهمممم.
لّهيم: اي واني ممسوي شي غلط بعدين على كل سوالفي المكسره متقربت من بنيه طول حياتي انت اول وآخر وحده ولو تسمعين الكلمه وتقبلين تزوجيني ما اسوي اي شي ومستعد انتظرج طول العمر.
فيروز: لتضربني مخدرات ما أريد اصير مدمنه وتدمر صحتي واعصي ربي.
لّهيم: هسه صحتج بيها مجال بس من شوكت صرتي متدينه هيج؟!
فيروز: من عرفت انو ماكو بالدنيا سند غير رب العرش عرفت محد يفيد غيره.
لّهيم: وهَيْصَم؟
فيروز: هذا اللي رب العرش راح يدزة اليه حتى يطلعني من يم وأحد خبل مثلك.
لّهيم: تعرفين لو واحد غيرج يتجاوز عليه هيج شنو سويت بيه؟
فيروز: مو بعيدة ترتكب بيه جريمه.
لّهيم: لا غلطانه اني ما اقتل بس اخليه يدمن مخدرات وبعد ما أعود جسمه على الكريستال والحبوب امنع احد ينطيه جرع اخليه بغرفه وحده ويصارع الموت بعدين ارحمه لو ارميه يم مستشفى تأهيلي لو انطي جرعه كل يوم.
فيروز: واحد حقير وخبيث هم شنو اترجى من عندك غير هيج انحطاط.
لّهيم: بس الحق يقال المخدرات تنطي شعور ولا اروع ميحتاج اشرحلج عليها انت راح تجربيها بكل الأحوال ومن تصحين شرحيلي احساسج.
جاب الأبرة وتقرب من عندي حيل حسيتها صارت على ركبتي ضغطه وحده وتدخل بالجلد صرخت بيه واني متأمله يبتعد.
فيروز: لا لااا لاااا فدوة الله يوفقك لتسوي هيج لتحقني والله ما اتحمل جسمي ضعيف ومناعتي موزينه مراح اتحمل هيج سم تريد تموتني انت؟
لّهيم: لتخافين مخففه جرعه قليله بما انو هاي اول مره متحسين بشي وعد هسه تنتقلين لغير عالم وشعور حلو تعيشينه صدكيني.
فيروز: اذا على الزواج موافقه والله بس لتحقني حباب.
لّهيم: فات الأوان اعرفج تضحكين عليه بس محزرتي هاي الدروب متمشي على واحد مثلي بايع ومخلص.
حقني بنفس الدقيقه صرخت.
فيروز: ياربي ولك هَيْصَمممممم.
ثواني ماعرف دقائق حسيت نفتحت ايديه ورجليه ونحملت غير هيج ما اذكر ابد شنو صار ويايه بعدين.
هَمْاس: سيدي عرفنه منو الجاسوس اللي يوصل المعلومات الهّيم وهسه هو موجود بغرفه التحقيق ينتظرك.
هَيْصَم: اخذ الرقم اللي يتصل عليه وراقبلي مكانه لازم تعرفه حتى لو جان جوه الأرض فاهمم.
هَمْاس: بأمرك سيدي.
كبر خطواته ويتبعه لائِث اللي صار مثل ظله بهذا اليوم دخل بعصبيه لغرفة التحقيق وراح بسرعة يمه لزمه من ياخة قميصه وزئر بيه بغضب.
هَيْصَم: لّهيممم وووين؟
نعيم: ماعرف سيدي.
هَيْصَم: ضَرْضَممم.
ضَرْضَم: نعم سيدي.
هَيْصَم: جيبلي السوط اريد اعرف شلون ميعرف مكانه وهو على تواصل وياه من الصبح لحد الأن.
نعيم: سيدي بداعة امك لتسوي هيج.
هَيْصَم: وداعة امي اذا مطيحت حظك اليوم وخليتك تعترف مثل الشاطر فلا اسمي هَيْصَم.
نعيم: صحيح اتصل بيه بس ماعرف هو وين والله العظيم.
هَيْصَم: شالك الله ولزكك على اساس اني ماعرف لو تعبر عليه هاي الكلاوات،
مكان لّهيم هاي آخر مره اسأل ماكو والله العظيم اللي يصير عليها يصير على عائلتك افقد كل أخلاقياتي واعذب عائلتك خواتك وامك وزوجتك بنفس الطريقة اللي تتعذب بيها نفس اللي عاشته بالضبط اعيشهم اياه وأمام عينك حتى تشوف العذاب الحقيقي واعلمك شلون تتعاون وي المجرمين وتنسى واجبك وقسمك لهذا البلد.
نعيم: ممتعاون وي احد ضد البلد هو مجرد صديقي.
هَيْصَم: وهي خطيبتي وشوف رابطة منو اقوة.
نعيم: سيدي قسماً بالله ماعرف وين هو ليش متصدكني؟
هَيْصَم: مو مشكله بعد كم ضربه تغرد مثل الشاطر ليش اتعب نفسي بالحجي وياك.
ضَرْضَم ووووينك.
ضَرْضَم: سيدي هذا السوط.
هَيْصَم: اطلعوا بره وخبر هَمْهَام يحضر الدوريه راح نطلع للمكان اللي خاتل بيه هذا السرسري واتصل بالأسعاف ترافقنه في حال صار شي مو زين اخذ كافة الأحتياطات، وهسه آخر مره اعيد كلامي لّهيم وين؟
نعيم: اتصل بيه هسه كدامك واسأله.
هَيْصَم: يعجبني من تشغل مخك وتبدي تسمع الكلمة، ضَرْضَم جيب موبايله خلي نعرف هذا الحقير بأي جحر مختفي ضامله هديه بس رب العباد يعرف بيها شنو، وانت ياويلك تلعب بذيلك والنبي المرسل والقرآن المنزل اطلع ضيم كلبي كله بيك وابليك بجرائم بوجهك لحبل المشنقه.
نعيم: لا والله سيدي ما اسوي شي غلط من ايدك هاي لأيدك هاي.
هَيْصَم: افتح السبيكر خليني اسمع يلاا.
نعيم: الو.
لّهيم: شكو متصل بيه وزاعجني اني شنو وصيتك؟
طلع موبايله وكتبله الحجي اللي لازم يكوله.
هَيْصَم: اريد اشوفك ضروري محتاج فلوس هسه والموضوع ميتأجل والا اعترف عليك للشرطه اخليهم يعتقلوك.
لّهيم: انجب لتهدد تعرف عدل شنو أكدر اسوي بيك بعدين الشرطه اذا تعرف بيك تشتغل لصالحي يعدموك فورا بجريمة خيانة الدوله.
هَيْصَم: الفلوس ضروري اريدهم الديانه واكفتلي بالباب واذا منطيتني اعترف عليك حتى لو انعدم.
لّهيم: اي ماشي دليني بعنوانك هسه ادزلك واحد من الولد يجيبك افلوس وهاي آخر مره تهددني بيها ماكو اطيح حظك وانت تعرف لّهيم منو.
هَيْصَم: ما أريد احد من الولد اريد اشوفك انت عندي موضوع مهم وياك.
لّهيم: لتصير حمار اني بأطراف بغداد وين تشوفني بعدين عندي شغل مهم ما أكدر اطلع بهيج وقت هسه ادز واحد لمكانك ينطيك فلوس وانت اشوفك غير وقت، صدك احجيلي شخبار النقيب؟
هَيْصَم: راح يتخبل الا اشويه ملعون والله كدرت تبهذل احواله ودمر معنوياته.
لّهيم: اي شلون لعد لّهيم اني بعده مشايف شي خلي يصبرلي للصبح ويشوف شنو اسوي بيه اذا مخليته ينجلط فلا اني لّهيم.
هَيْصَم: سده.
هَمْاس: رفعت أيدي بأشارة الأوكي عرفنه مكانه دخل ضَرْضَم خبره وطلعنا بالدوريات حتى نلقي القبض عليه بقينه من ١٢ بالليل نراقب بالموبايلات مالتهم حتى وجه الصبح يلا عرفنه مكانه وطول هاي الفتره الهَيْصَم مرتاح بقى متوتر وكلنه متوترين وياه.
لائِث: عرفت مكانها ليش متهدأ؟!
هَيْصَم: عرفت مكانها مو معناها هي بخير ليش متفهمم؟!
لائِث: اعرف بس خوفك وقلقك ميخليها تصير بخير.
هَيْصَم: تعرف شنو يعني تبقى يوم كامل أبيت واحد مجرم وتاجر مخدرات؟
بلكي انطاها حقنه مخدرات او سوه بيها شي لاسامح الله؟
لائِث: لتحجي هيج ان شاءالله احساسك خطأ خليك متفائل.
هَيْصَم: من وين يجي التفاؤل وهي بعيده عني ماعرف شنو صار بيها بردانه عطشانه جوعانه؟
اعرف عدل هي متأمله اروح وانقذها ولحد الان اني محركت ساكن شوف مدا خيبه الأمل اللي هي بيها هسه على رغم قوتها بس هي خوافه بيا حال وهي وحيدة يم واحد حقير شلون اكدر اطمأن واني ماعرف شنو وضعها يمه؟
لائِث: ميسويلها شي صدكني مو هدفه يموتها وهذا المهم بعدين لتنسى هو يحبها.
هَيْصَم: انت غبي لو شنو فلمك؟!
اكلك هي يم مجرم هسه تاجر مخدرات إرهابي مطلوب للعداله تكلي يحبها!!
العن ابو هيج حب تسمع اااالعن ابووو هيج حب، مختفيه صارلها يوم الله أعلم هي بيا حال هسه وتكلي يحبها ميسوي بيها شي لو هو اصلاً يحبها مجان خطفها، اللي يحب ميأذي ماعرف بأي مدرسه طايح حظها تعلمكم هيج اشياء غبيه.
لائِث: وين اكو مدرسه تعلم على الحب م**** هاي مو مدرسه.
هَيْصَم: اتصلت ضَرْضَم بالأسعاف؟
ضَرْضَم: اي نعم سيادتك.
لائِث: ناوي تقتله؟
هَيْصَم: واذا ناوي اموته ليش اطلب اسعاف شنو تشتغل عندي الرحمه فجأه من اشوف الدم ماليه؟
لائِث: والله ما ادري بتفكيرك يخوي حيرتني.
هَيْصَم: اسكت احسن صوتك مزعج اليه.
لائِث: مثل السمج مأكول مذموم ميغزر بيك معروفي ابد.
هَيْصَم: محد عاتب عليك تجي وياي كتلك ابقى بيتك اصلاً أرتاح من ازعاجك.
لائِث: واذا ما اجيت تعتب عليه اعرفك انا.
هَيْصَم: سكتوا لا ارتكب بيه جريمه وخلي الأسعاف تنقله هو.
لائِث: يولد شفتوا شلون يكرهني هاي عود انا وياه عشرة عمر لو جنت عرف هسه شسويت؟
هَيْصَم: لائِث راسي راح ينفجر اكرمني بسكوتك، هذا شنو عنده يتصل بيه هيج وقت؟
الو.
محمد: مشتاقين حضرة النقيب شلونك؟
هَيْصَم: بنص الخير ومن سمعت صوتك نكلب وضعي.
محمد: اعفاا عليك واني حبيت اطمأن عليك وأسأل هيج تجازيني؟!
هَيْصَم: شنو تريد؟
محمد: راح ادافع عن لّهيم اذا اعتقلته اجتني قضيته قبل نص ساعة يمكن حسوا راح تعتقله.
هَيْصَم: انت من وين تجيب هاي المعلومات؟
محمد: اني اشتغل وياهم لو نسيت؟
هَيْصَم: لتخاف هاي المره اموته ميحتاج ادافع عنه حضرة المحامي.
محمد: يضربه ألم اصلاً اني اشوفهم مجرد افلوس لا أكثر والا ميهني ينسجنون لو ينعدمون حتى، المهم الفلوس اللي اخذها من قضاياهم،
على كل حال متصلت بيك علمود لّهيم وإنما شي ثاني اهم.
هَيْصَم: اسمع غرد.
محمد: الأسود راح يسافر خارج العراق الأسبوع الجاي.
هَيْصَم: واني مو المطار ليش تكلي.
محمد: ميهمك تعرف ليش يريد يسافر؟
هَيْصَم: اذا بحلكك حجي كوله لتجر وتعر بالسالفة ماعندي وقت لتفاهتك الزايدة اليوم.
محمد: يريد يجيب بنات من خارج البلد لو يهرب لخارج البلد وحده من الثنين.
هَيْصَم: وليش تنطيني هيج معلومه مهمه؟!
محمد: سمعتها عن طريق الخطأ وحبيت اشارك بيها النقيب.
هَيْصَم: محمد لتحاول تلعب ويايه تعرف شنو نهاية هاي الشغله صح؟
محمد: ابادلك معلومات مو اكثر فائدة اليه والك.
هَيْصَم: وشنو الفائدة اللي الك؟
محمد: لان من تسجنه راح اجي ادافع عنه واني بهاي الحاله اربح هوايه فلوس تجارة رابحه انت تعتقل واني اطلع بكفاله.
هَيْصَم: الأسود ميدخل سجن وإنما أخذه سفره ذهاب فقط رحله مدفوعة التكاليف على حسابي الخاص واني متأكد راح يستمتع بيها لدرجه ميكدر يرجع بعد للعراق ولهذا العالم مره ثانيه وأعتقد وصلت الفكرة.
محمد: الله يرحمه لعد سؤال قبل ما اسده عرفت مكانها وين؟
هَيْصَم: ليش تريد تفتن حتى يصعد السعر مالتك؟
محمد: لاتظلمني وياك تعرف شكد اعزك وتكدر تلكيها بسرعة.
هَيْصَم: انت شلون عرفت بلي صار على حسب علمي هذا الخبر سري؟
محمد: متعرف النسوان ميضمن سالفه؟
هَيْصَم: لازم أرفد يدخل صار الوضع مينسكت عليه ابداً.
محمد: خلي يدخل احسن تسوي معروف ما انساه الك.
هَيْصَم: تستهزء حضرتك؟
محمد: بالعكس ليش استهزء اني احبها وأريد اتزوجها بأسرع فرصه لكن اخوها صاير عقبه بطريقي ومانع سعادتي.
هَيْصَم: والله لو اعرف بيك صادق جان سعيتلك بكل قوة بس اعرف شخص مثلك ميعرف شنو يعني حب وإنما تريد ادمر حياتها بسبب الماضي وللأسف نجحت وهي السبب.
محمد: الماضي مات وي اهله واحنه ولد اليوم سيادة النقيب.
هَيْصَم: روح ابني كمل شغلك وحاول ما اشوفك لان ارتكب بيك جريمه بس المحك قريب من المركز خليها بعقلك.
محمد: والله هاي مو بأيدي حسب انت وشطارتك بأعتقال المجرمين.
هَيْصَم: اليوم لو يجي الجني الأزرق محد يطلع من السجن هاي رغبة الهَيْصَم ومحد يكدر يعصي أوامري.
هَمْاس: هذا المكان ضَرْضَم وقف السيارة.
هَيْصَم: تعرفون الخطه الأمنيه المتبعه ضَرْضَم اخذ دوريه وروح خلف ألبيت وانت هَمْهَام وهَمْاس طوقوا جميع أنحاء البيت واني ولائِث ندخل نفتش داخل البيت.
لائِث: تدخل وحدك بدون قوات امنيه؟
هَيْصَم: ما أريد احد يشوفها غيري وانت راح تجي وياي.
لائِث: واني ليش مدخلني وياك؟!
هَيْصَم: حتى استمد القوة بطولك البهي.
لائِث: اذا هيج تفضل واني اتبعك.
ضرب مفتاح الباب برصاصه انفتح الباب ودخل هو ولائِث اللي بقى الاخير منتظر بس هو تقدم بثبات وينادي بأسمها.
هَيْصَم: لَّباءَة تسمعيني؟
ليش ماكو صوت؟!
معقوله سوه بيها شي لو اخذها لغير مكان!!
رجليه ميحملني اكثر وينج ولج؟؟
لَّباءَة ليش متجاوبيني اذا تسمعين احجي، لائِث هذا الباب مقفول تعال اضربه رصاصه أيدي متحملني.
لائِث: ليش وجهك صار اصفر بيك شي؟
هَيْصَم: افتح الباب حاس اكو شي مو زين راح يصير لو صاير واترك وجهي على صفحه.
لائِث: ما أريد ننقذها وتوكع أنت.
هَيْصَم: ميصير بيه شي هياني واكف يمك استعجل واضرب الباب خلصني.
ضربت الباب رصاصه وبتعدت عنه ودخل الهَيْصَم : نصدمت من الوضع اللي شافته عيني، الحجاب مرمي على الأرض وهي بوضع لايحسد عليه قميصها مفتوح لنص صدرها ومادة بيضه نازله من حلكها وفاقدة الوعي تماماً، اقتربت من عدها وخليتها بحضني وصرت احجي وياها بحنيه وأيدي امررها على وجناتها بهدوء حتى ما أأذيها، مسحت شفايفها ولميتها بحضني، وكمت احاول اكعد بيها.
هَيْصَم: افتحي عيونج لَّباءَة ولج والله مابيه حيل اخسرج بعد مالكيتج شنو عندي غيرج بس كولي؟
لتعذبين كلبي بهاي النومه افتحي اعيونج وعانديني وصيحي مشتاق لضحكتج ألتردلي العافيه لتسوين بكلب هَيْصَمج هيج يروحه أنت ولج افتحي اعيونج مو عليتي كلبي وشليتي حالي بهاي حالتج، كومي كافي تلعبين باعصابي لتدمرين آخر خليه موجوده بعقلي رجعتيني ذلك الشاب المراهق صاحب العشرين سنه وبعد مغيرتي بيه هوايه صفات وكسرتي قواعدي البنيت بيها سنين تردين هسه تعيفيني وحدي يروح هَيْصَم وكلبه فتحي عيونج.
سديت القميص مالتها ولبستها الشال، عدلت ملابسها وشالتها بين اديه.
طلعنا شايلها وحركته مو متوازنه اللي يمر بيه هسه ميتحمله احد ومتتمنا لعدوك وضع لايحسد عليه ابداً، رحت يمه وحجيت بقلق.
لائِث: شنو بيها؟
هَيْصَم: انطي خبر للاسعاف وشوف هذا الحقير وين راح أريده عايش تسمعني.
لائِث: غير تفهمني شنو صار؟
هَيْصَم: حاقنها مخدرات أثر الابرة مبين بركبتها.
طلع من البيت وصاح بصوت عالي.
هَيْصَم: وين سيااارة الاسعاف ضَرْضَم اني شنو حجيت؟
ضَرْضَم: سيدي صار حادث امامه ونقلهم للمستشفى.
هَيْصَم: طاح حظ هيج وضع زفت تعال سوق بسرعه للمستشفى.
خلاها بحضنه وبقى يداعب وجناتها بحنيه ويسولف وياها بهمس حتى محد يسمعه واني عيني عليهم.
هَيْصَم: يروح هَيْصَم فتحي عيونج كافي تعذبين كلبي يلا ولج اكعدي.
لائِث: سيدي غسل وجهها بمي.
هَيْصَم: اكو يمك بطل؟
لائِث: اي تفضل.
هَيْصَم: ليش صافن بوجهي لتباوع.
لائِث: عيني على الطريق مو يمك قابل بس انت تحب خبصتنه خبص.
هَيْصَم: سمعتك تره كافي تلغي مثل العجايز.
لائِث: التهي بيها عيف لائِث يطبه مرض.
هَيْصَم: وانت ليش غيران؟!
لائِث: نعمت عيني ليش اغار اسم الله؟
هَيْصَم: ضَرْضَم لطلعنه على طريق المظاهرات اسلك طريق ثاني.
لائِث: ليش؟
هَيْصَم: لأن متعرف العندي شنو تسوي اذا فتحت عيونها هسه وتعرف طريق المظاهرات شلون خطر وكله رصاص حي.
ضَرْضَم: لكن سيدي ماكو طريق ثاني انت تعرف بغداد المظاهرات بيها عالكه وماكو محط رجل.
هَيْصَم: اللهم جيرنه من بلائك.
لائِث: خليك مطمأن سيدي ميصير شي ان شاءالله.
هَيْصَم: لّهيم وين ليش مموجود بالبيت؟
ضَرْضَم: وصلت معلومه انو هرب واحد خبره بجيتنه فهرب قبل منوصل.
هَيْصَم: هذا الحب اللي تحجي عليه لائِث؟!
لائِث: ردت اصبرك لا أكثر.
هَيْصَم: قصدك ردت تجلطني.
: فتحت عيوني دايخه حيل واحس نفسي تلعب منتبهت اني وين بس اللي اعرفه لازم انزل من السياره لان مراح اتحمل أكثر حسيت بأيد محاوطتني ضربته على صدرة ماعرف ايدة واشرتله انو اريد اتقيأ سمعت صوته وهو يصيح بواحد بيهم.
هَيْصَم: ضَرْضَم وكف السيارة بسرعة.
: وكف السيارة نزلت حسيت بيه محاوطني حتى ما اوكع الدنيا تفتر بيه ماعرف عقلي يفتر احس اكو شي خطأ بس ماعرف شنو جسمي بيه شي غريب مسيطر عليه ومخليني ما احس بشي حتى ما اذكر اني وين وشنو صار ويايه وليش احنه بالسيارة هسه، تقيأت مادة بيضه وحسيت بأيدة اللي تمشي على ظهري شويه وجابلي مي شربت وغسلت وجهي بس الدوخه مفارقتني ابداً لزم أيدي حتى نرجع للسيارة بس رفضت مختنكه حيل واكو شي على صدري مثل الجبل حمل ثكيل ما أكدر اتحمله بقيت واگفه شويه تنفست بعمق لمحت دراجه سودة صاعد عليها واحد لابس اسود ومخلي خوذة على رأسه طلع المسدس او وجهه على هَيْصَم بهاي اللحظة رجعلي عقلي بالكامل واني اشوف الخطر محاوط الهَيْصَم والموت قريب من عنده..
يتبع..
مساء الخير شمعاتي.
حسابي الأنستا.
تابعنا وما يفوتك جديد
اختر المنصة اللي تناسبك وتوصلك الفصول أول بأول.
التعليقات (0)
جاري تحميل التعليقات...
لا توجد تعليقات بعد
كن أول من يشارك برأيه!