للتواصل انستا zahraaahmedn99
علقوا بين الفقرات+ صوتوا للبارت+ تابعوا حسابي عيناي انتوا.
شاركوا القصه حتى نستمتع وي الهَيْصَم مع بعض
هَيْصَم
(الكاتبة زهراء احمد)
_______
وَلقَد رأيتٌكَ فِي مَنامِي لَيلةً
فَنسِيتُ مَا قَد كانَ مِن احزانِ
وَحَسِبتُ نَومِي فِي حضورِكَ يَقظَةَ
حَتى أفِقتُ عَلى فُراقٍ ثانٍ
هَيْصَم: اهدأي وسولفيلي وين اخر مكان شفتيها بيه؟
كلاثم: ولك يوم ماعرف خلصنه مسواك واجينه للشارع العام حتى نأجر سيارة نرجع بيها للبيت بس طلعت ناسيه محفظتي يم ابو المخضر ورجعت اجيبها وهي بقت مطولت والله ومن رجعت ملكيتها واني تصلت بيك بسرعه،
سودة عليه كله من ورايه كالت هَيْصَم ميقبل بس اني دكيت رجل ضاعت البنيه من بين أيدي ولك يوم فدوة لكلبك الكيها والله ضميري موتني هسه هي بيا حال والله اعلم شنو وضعها.
هَيْصَم: لتزيديها عليه الله يوفقج ارجعي للبيت وي واحد من الولد وشنو يصير اني انطيج علم وشنو تحتاجين اتصلي بيه ماشي.
كلاثم: وفيروز شنو يصير عليها؟
هَيْصَم: ميصير عليها شي لتخافين راح ادور عليها منطقه منطقه حتى الكيها ورجعها يمج سالمه ان شاء الله.
كلاثم: انتبه على نفسك حبيبي لتخلي بالي عليك انت هم.
هَيْصَم: ان شاءالله،
ضَرْضَم.
ضَرْضَم: سيدي.
هَيْصَم: اخذت رقمها؟
ضَرْضَم: نعم سيدي ونطيته لفريق البحث بس لسه ماكو اي خبر من عدهم.
هَيْصَم: يارب صبرك،
اكيد هو محد عنده فائدة بخطفها غيره يريد يلوي ذراعي ابن الكلب بس والله ميكون اسمي هَيْصَم اذا ما ألقيت عليه القبض وطيحت حظه وانفذ بيه كل العقوبات بس خلي يصير بين أديه أعلمه شلون يكون اللعب وي الأسود.
هَمْاس: شنو نسوي هسه سيادتك؟
هَيْصَم: راح نبحث بكل الأمكان اللي جانوا يلتقون بيها والبيوت المشبوه اللي يجتمعون بيها بالعادة من جوه الأرض لازم اليوم الكيها وترجع للبيت ويايه.
هَمْهَام: تنطي أمر حتى نباشر البحث؟
هَيْصَم: اي اخذ الأمر بالتفتيش جميع الأمكان اللي رحنالها سابقاً واللي اجتي اخباريه بتواجدهم بيها واني راح اشوف اذا جماعتنا عدهم علم بهذا الاختطاف،
آلو سيدي.
ضَيْثَم: نعم هَيْصَم اجيت اتصل بيك بس انت سبقتني شنو صحه هذا الخبر اللي سمعته هسه؟
هَيْصَم: للأسف اي سيادتك وردت اعرف اذا عندك معلومه من الاستخبارات حول هذا الموضوع؟
ضَيْثَم: اتصلت بيهم العمليه غير مخطط الها سابقاً يعني ماعدهم علم راح تنخطف.
هَيْصَم: اني شاك بشخص بس ماعرف من وين لازم ابحث عنه.
ضَيْثَم: لّهيم؟
هَيْصَم: اي نعم سيادتك لان هي ثاني مره تنخطف بيها وحسب المعلومات فهو يريدها من زمان من جان والدها عايش الله يرحمه.
ضَيْثَم: يعني مراقب بيتك ويعرف منو الشخص اللي يدخل ويطلع.
هَيْصَم: اكيد والا شلون عرف بشي اني معرفت بيه الا هسه.
ضَيْثَم: راح اتصل بجماعتنا واعرف وين ممكن يكون هيج وقت وانطيك خبر إذا عرفت شي.
هَيْصَم: بانتظارك سيدي،
شنو تسوي اهنا مو كافي الوضع اللي اني بيه تريد تزيدها عليه؟
لائِث: اسكت ولاحرف رجلي على رجلك والعباس ما اطلع منا يعني بين قوسين لتلح وتعب نفسك.
هَيْصَم: تعال اخذ راجدي.
لائِث: استغفر الله مديري انت بس من نطلع من المركز تدلل.
هَيْصَم: منو خبرك؟
لائِث: الأوادم هوايه.
هَيْصَم: والله مترتاحون الا انجلط.
لائِث: اسم الله عليك شنو عدنه غيرك.
هَيْصَم: وخر عني ما ألي خلك لا ابتلي بيك بنص الشارع هسه.
لائِث: وين اروح يمك اني ما اعيفك.
هَيْصَم: لائِث.
لائِث: عيونه.
هَيْصَم: مو صاحبتك انا.
لائِث: ليش هي تجي يمك يروحي؟!
هَيْصَم: نخطفت لائِث.
لائِث: وشنو راح تسوي هسه؟
هَيْصَم: عقلي متوقف عن العمل بالكامل خايف ليسوي بيها شي ما اضمن سلامتها وهي بعيدة عن عيني وين اروح اذا صار بيها شي وتأذت؟؟
لائِث: قويه هي مثل ابوها ميصير شي بيها لتخاف.
هَيْصَم: عيفك من هاي الكلاوات تضحك بيها على منو؟!
لائِث: ليش تحجي هيج اني متأكد ميصير بيها شي اذا هو يحبها صدك ميأذيها.
هَيْصَم: اكل نعل انت وحبه.
لائِث: هَيْصَم يغلط عليه؟!
هَيْصَم: شنو تريد اكول عاشت ايدك لكيتها ماطول يحبها يعني اضمن سلامتها يم رجال غريب ماعرف شنو وضعها يمه انت مستوعب خطورة الموقف لو لاا.
لائِث: مستوعب بس شنو بأيدنه نسوي؟
هَيْصَم: هذا البلد اللي مبيه قانون ونظام بأيد المزعطه منو اجه وسوه اللي يعجبه ومحد يحاسب ومن تعتقلهم وتريد تنفذ القانون كلها تصير شريفه براسي عرف افلان وعرف علان بس والله وسمائة اذا مطيحت حظ لّهيم وخليته ميعرف ليله من نهاره شاربي مو عليه.
لائِث: خلي نقطه نبحث بيها عنه ميصير نبقى هيج منتظرين.
هَيْصَم: الأسود اكيد يعرف وين مكانه.
لائِث: ومن وين نجيب رقمه؟
هَيْصَم: موجود عندي اتصل بيه من اسبوع راح احاول ان شاءالله يفتح وميطلع متخلص من عنده،
هَمْاس.
هَمْاس: سيدي.
هَيْصَم: راح اتصل بالاسود وانت حددلي المكان مالته.
هَمْاس: حاضر سيدي.
لائِث: ها جاوب؟
هَيْصَم: لا لسه لحظة انفتح الخط.
الأسود: حظك حلو حضرة النقيب اجيت ارمي هذا الخط اليوم بس انت اتصلت وعيب ما اجاوبك بشنو أكدر اساعدك؟
هَيْصَم: مو بالعادة الأسد يطلب مساعدة من الكلاب فهمت اتصالي خطأ بس حبيت انبهك وربك العالي وسمائة اذا منطيتني عنوان لّهيم الصح أو أي معلومه تخص خطف لَّباءَة انزع كل أخلاقيات مهنتي وانفذ بيك حكم إعدام بدون قاضي وانت تعرف الهَيْصَم اذا وعد.
الأسود: ميحتاج تعصب حضرة النقيب لان اني ماعرف اي معلومه عن مكان تواجده صار اسبوع كامل مملتقي بيه بعدين هو ميشاركني بخططه ينفذ وحده بدون ميستشير أحد حتى عنوان بيته ماعرفه.
هَيْصَم: بس اني عندي غير معلومة واللي وصلني انت عندك علم بكل شي يصير هسه.
الأسود: وروح امي ماعرف وبعدين هي مو ميته شلون نخطفت؟!
هَيْصَم: اذا وصلني عكس الكلام اللي كلته حضر كبرك بصف امك لان راح تلحق بيها عن قريب.
الأسود: شو صاير تهدد حضرة النقيب هذا الشي مو ضد القانون لو اني غلطان؟
هَيْصَم: اني القانون واللي أريده هو اللي يصير لتنسى منو الهَيْصَم وشنو سوه بيكم من خمس سنوات وصدكني هاي المره اذا مدفنتك بأيدي ميهدالي بال.
الأسود: الله وياك حضرة النقيب اروح احضر كبري وأوصي على خروف سمين للثواب هم يالله يوصل تعرف ذنوبي هوايه يحتاجلها خرفان مو خروف واحد.
هَيْصَم: ماعنده علم بمكانه.
هَمْاس: الأتصال قصير مكدرت احدد العنوان سيدي.
هَيْصَم: حتى لو تحدد منستفاد شي لّهيم خاطفها بدون علم أحد.
خلصنه مسواك واجينه نأجر سياره حتى نرجع للبيت لكن هي رجعت للسوك مره ثانيه لأن ناسيه المحفظة مالتها بقيت انتظرها حتى ترجع ثواني يمكن او دقيقه وقت قصير كلش الدنيا ضهر وماكو احد بالشارع حتى السيارات قليله وكفت يمي سيارة سودة مضلله درت وجهي لغير مكان بس كلبي يريد يطلع من مكانه عرفت هذا اليوم ميعدي على خير وبهاي السيارة عرفت صحة احساسي خفت حيل ورجليه محملوني منو ممكن يكون وشنو يريد من عندي؟!
حاولت ارجع كم خطوة ليورة بس وقفني نزوله نفس الشخص اللي خطفني اول مره لابس كمامه وكاسكيته وضخم اتقرب من عندي وسحب ايدي لصدره صرخت بيه حتى يعيفني بس ولا كأن وهاي الدقيقه صارت سنه عليه سحبني للسياره وقربني اله أكثر ضربت بيه بس وليفيد دخلني يمه بالصدر وقفل الأبواب حتى ما أكدر اطلع فتح الجكمجه وطلع من عدها علبه مثل شراب الكحه وخلاها على كلينكس سحبني عليه وخلاه على خشمي دخلت بنوم عميق وظلام دامس،
فتحت اعيوني بعد فتره ماعرف شكد بس الدنيا ظلمه ركزت شويه شفتها غرفه بسيطه بيها بس جربايه نفر وميز صغيرون وكنتور بنهايتها هذا اللي صار أمام اعيوني اما اني مربطه أديه ورجليه على كرسي ومخلي لاصق على حلكي وضع مثل الأفلام وكلبي مبطل ضربات عنيفه ابداً على اي لحظه ممكن يدخل والله اعلم شنو ممكن يسويلي،
هدوء اسمع فقط أصوات الكلاب التنبح قريب من هذا البيت الليل عتم على هاي الغرفه وحتى كلوب مموجود بيها بقيت احرك برجلي واضرب على الأرض ردت احد يسمعني ويساعدني بنفس الوقت خفت اذا دخل شنو ممكن يسوي بيه شعور رعب اجتاحني واني اسمع خطوات رجلين اقتربت من الباب فتح القفل ودخل نفس الشخص بلعت ريقي بصعوبه وتشاهدت على نفسي لان ماعرف شنو ضاملي هذا الحيوان لان تصرفه مجان إنساني ابداً وماكو اي مبرر او دافع ينطيه الحق بخطفي بهاي الطريقه الأجراميه ومال عصابات،
اقترب من عندي بس هاي المره نازع الكاسكيته كدرت اشوف جبينه وعيونه بيها كميه براءة عجيبه ولا كأن هو إنسان مجرم مألوفات وكأن شايفتهم من زمان بس ماعرف وين؟
حركت راسي بمعنى اريد احجي وخر عني الاصق وأذاني من شافني صرخت بألم اقترب بسرعه ومرر أيدة على شفايفي مكان الاصق بحركه أراديه ومخططتلها بسقت بوجهه وحجيت بعصبيه.
فيروز: واحد حقير ماعندك لاذمه ولا ضمير ليش تخطفني بشنو أذيتك وشنو تريد من عندي ما اعتقد عندي عداوة وياك حتى تسوي هذا الفعل القذر مثلك،
افتح أديه وخلي ارجع لبيتي ماكو والله العظيم اشتكي عليك واخليك تعفن بالسجن.
رجع مرر أيدة على خدي ويحجي بهمس مستفز.
لّهيم: ومنو يحبسني هَيْصَم مالتج؟
فيروز: تاج راسك لتذكر اسمه على السانك الوسخ يامنحط عديم اخلاق وتربيه.
لّهيم: ربيني على أيدج الحلوة بسرعه اتعلم اني.
عقدت حاجبي وحجيت بتساؤل.
فيروز: شنو تريد من عندي؟
اذا فلوس فأني عايشه على خير رجال غريب واذا بيت روح أخذه اني اسويلك تنازل عليه عندي ما تلكي غير النفس اذا تريد تموتني فأدعيلك شنو تريد أكثر من هيج؟
لّهيم: ممحتاج فلوس واذا البيت اشتريلج عشره غيره واسفرج واطلعج وين متردين بس وافقي تصيرين مرتي وتخلصين العمر وياي وشوفي شلون ادللج ما أريد شي من هاي الدنيا غيرج فيروزتي.
فيروز: كتلك ماعندي شي غير النفس لتتوقع انطيك شي غيره.
لّهيم: شنو السبب ليش شنو ناقصني اني وما اعجبج؟
فيروز: ما احبك وبكلبي شخص ثاني ما أبدله برجال الكره الارضيه كلهم المشكله مو بيك وإنما بكلبي اللي تعلق بيه وميكدر يشوف واحد غيره.
لّهيم: تنسيه مو مشكله مثل مدخلتيه لكلبج اطلعيه وتحبيني المهم ما الج طلعه من هذا المكان الا وانت بأسمي.
فيروز: لتخليني اتخبل عليك افهم يا أخي ما احبك ومستحيل اصير على اسم واحد ثاني غيره ليش ماتفهم؟!
لّهيم: بالعشرة تحبيني مو مشكله.
فيروز: العن ابوك لا ابو عشرتك طايح الحظ الف مره كلت ما احبك كلب لَّباءَة بس لهَيْصَم احجي هندي!!
عقلك الصغير مصنوع من بلاستك ليش ميستوعب كلامي؟!
لّهيم: واني كلت انت متصيرين لغيري حتى لو نجبرت اسوي شي غلط المهم اخذج اليه فاهمه.
فيروز: ايدك القذرة اذا نمدت عليه اكسرها واعلكها بركبتك واشوفك أنثى الأسد شنو تكدر تسوي.
لّهيم: هن شهرين هيج كدر يغيرج بيهن؟
فيروز: مو بالوقت وإنما بالكلب والعشره كدر يسوي هوايه اشياء اهمهن اخذ ثقتي وتفكيري وحبي سيطر على كل خليه بيه لدرجه ما اشوف احد ثاني غيره علم على هذا كلامي واحفظه غير هَيْصَم ما اتقبل اي رجل منو ما كان وعليه رجعني لبيتي قبل ميجي هو ويطيح حظك اهنا وياخذني غصب على خشمك.
لّهيم: يجي واني انطي العنوان اصلآ بس بعد متصيرين مرتي وبأسمي وقتها ميكدر احد ياخذج من عندي لا هَيْصَم ولا غيره وهذا البيت راح يشهد على حبنه.
فيروز: والعباس انت خبل مو عاقل ابد يحتاجلك مصحه هوايه متأثر بالافلام اكله ما أريدك يكلي اسويج مرتي بابا انت عاقل؟!
لّهيم: حبج خبلني وحالتي كلها بسببج ليش مقبلتي اول مخطبتج ليش أصريتي وعاندتي وشوفي اعنادج وراسج اليابس وين وصلنه.
فيروز: انت شوكت خطبتني؟
لّهيم: من جنه بالجامعة خطبتج أكثر من مره وكل مره ترجعيني خايب بس هاي المره ميصير غير اللي اني أريده ومن هذا البيت مطلعين اذا متصيرين مرتي من حق وحقيقه.
فيروز: شوف اني ماعرف على شنو تحجي اصلآ وانت كلك على بعضك اني ماعرفك وما أذكر اكو شخص خطبني غير واحد مدلل وصارتلي مشكله بسببه لحظه بس معقوله انت هو؟!
لّهيم: ماعرف منو تقصدين.
فيروز: لا والله انت نفسك واني أكول اعيونك شايفتها من قبل وصوتك مألوف طلعت انت ذلك الشخص بس اسمك ناسيته ذكرني شنو اسمك؟
لّهيم.
فيروز: لا مو هذا انت هوايه عليك جاسم لو قاسم ولو حتى هاي الأسماء هوايه عليك انت مال اسميك ازباله قذاراه حقاره تناسب وضعك الحالي.
لّهيم: تعجبني شجاعتج هذا الشي اللي يخليني متمسك بيج حيل وما اتخله عنج.
فيروز: سواء تمسكت او لا حلم اصيرلك زوجه واضح؟
لّهيم: نشوف شنو يصير بالأخير.
فيروز: والله اللي اشوفه راح تنسجن ويعذبك الهَيْصَم بطريقه يخليك تنسى بيها اسمك.
لّهيم: اني خاطفج من وين هاي الشجاعه؟!
فيروز: اولآ رب العالمين موجود وتحت حمايته متكدر تسوي شي اليه ثانياً عندي ثقه هَيْصَم راح يجي ويطلعني من هذا المكان وانت متكدر تعترض لان راح يعتقلك.
لّهيم: على بالج اخليج طلعين من عدها سالمه؟!
فيروز: شنو قصدك؟
لّهيم: إذا متصيرين اليه الموت اقربلج اكيد مراح اعيش بعذاب وانت تعيشين حياتج وي الهَيْصَم بسعادة.
فيروز: الروح مياخذها غير اللي انطاها لتعب نفسك متكدر تهددني بهاي السوالف.
لّهيم: لنشوف لشوكت تبقين صابره ومتحمله،
راح اسويلج شي تاكليه اكيد جوعانه.
فيروز: اموت جوع وما اكل شي من عندك.
لّهيم: خلي اسوي ونشوف تاكلين لو لا.
فيروز: خليك رجال ولتهدد.
لّهيم: احبج فيروز.
فيروز: هسه عرفت ليش هَيْصَم ميحب هذا الأسم حقه يلعب النفس خاصتا من تكوله انت.
لّهيم: تتعودين عليه يروحي مو مشكله وتحبيه هم.
فيروز: ثوله اني واحب واحد مثلك ماعندي عقل واختار التراب على الألماس.
لّهيم: ومنو هذا الألماس؟
فيروز: هَيْصَم اللي موتك وحارك كلبك وقاهرك وضاغطك هم.
لّهيم: مو مشكله راح احرص اليوم على انو اسويهن كلهن بيه اعذبه بيج لدرجه اخليه يدخل طوارئ.
فيروز: اموت نفسي وما اسمح يتعذب بسببي.
لّهيم: لتستعجلين على رزقج يحلوه انت هم راح تكرهين حياتج وتتمنين الموت من اللي راح اسويه وياج اليوم.
تركني وطلع وكدرت اتنفس براحه راح اكذب لو كلت مخفت اصلآ احس اعظامي وحده تضرب بالثانيه من الرعب والقلق شنو ممكن يصير ويايه اليوم وي هذا الخبل وهَيْصَم ليش لحد الأن مجأه موبايلي ويايه معقوله مكدر يتبع المكان!!
نزلت راسي حتى اشوفه موجود بجيب البنطلون لو لا رفعته من سمعت صوته لازم بأيده ويحجي بأستفزاز قاتل.
لّهيم: ادورين على هذا؟
فيروز: حقير موبايلي شنو يسوي يمك؟
لّهيم: حلوه رسائلكم غزل وكذا عندج علم هو يحبج وروحه معلكه بيج؟
طلع النقيب مو هين هم يعرف يتغزل فكرت انو نسى الغزل وي حبيبته السابقة بس طلع يعرف يجدد مشاعره ويتخطه ليش اني ما أكدر اتخطه مثله برأيج؟
فيروز: لتدخل بخصوصية غيرك خلي لنفسك احترام اشويه وكافي تتجاوز حدودك.
لّهيم: مرتي انت حتصيرين وين المشكله اذا عرفت بعلاقاتج السابقه؟!
فيروز: احلف عليك انت مو صاحي.
لّهيم: ليش تحلفين اعرف نفسي مو صاحي كولي شي جديد.
فيروز: حقير.
لّهيم: من حلكج اسمعها احبك.
فيروز: لو تموت تحلم فاهمم.
لّهيم: حتى الموت بحلكج عسل انت انسانه تتصنفين كأفضل كائن بالكون.
فيروز: وانت تصنف كأزعج انسان بالكون واحد حقير ماعندك ذرة احساس ولا اخلاق.
لّهيم: هاي الأشياء اعرفها كولي شي جديد.
فيروز: شنو تستفاد من تسوي هيج ويايه؟
لّهيم: شوفه اعيونج هي راحتي المابعدها راحه.
فيروز: أتعجب على الأشخاص اللي يتعلقون بناس متحبهم يا أخي ما عندك كرامه انت؟
لّهيم: اللي يحب مايعرف الكرامه شنو واني قررت اترك كل شي ورايه واركز بحبي الج ومستقبلنه سوه.
فيروز: مستقبلي يم هَيْصَم اما انت بالسجن لتحلم هوايه بالمستقبل لان بي دمارك.
لّهيم: ياريت لو هو يحبج مثل متحبيه جان مضجت.
فيروز: حبي يكفينه احنه الاثنين ميحتاج يحبني هو.
لّهيم: لهاي الدرجه عامي على عينج؟
شنو سوه وصرتي هيج مسحورة بيه؟!
فيروز: لان هو هَيْصَم اسمه اجابه على سؤالك.
لّهيم: اول شخص جان اني بكل شي صار وياج اني اللي وكفت بعزاء والدج واني اللي تكفلت بكل مصاريف الفاتحه اني اللي حرستج كل ليله وانت نايمه بالبيت ومرتاحه ليش حبيتي هو ومحبيتيني؟؟
يحجي بعصبيه ويضرب بالحايط خفت حيل بس حاولت ما أبين هذا الشي حتى ميستغل الفرصه ويستغل وضعي لذلك جاوبته بنفس النبرة.
فيروز: لا غلطان هو جان واكف ويايه بكل ظروفي السيئه ومتركني ابد انطاني من الحب والاحترام مثل الأب تماما مطالبني بشي ومزعجني ابداً ومستغل ضعفي وعلى رغم وجودي يمه اكثر من شهرين وبقائي وياه بدون رابطه شرعيه متجاوز الحد وحتى كلمه مو زينه مسمعني عنده من الأخلاق اللي تغطي عشيرتك وزيادة لهذا السبب اخذ كلبي واحتل كل جزء بيه وهذا الفرق بينكم،
معيرني ابدا ومحسسني أمقدملي شي ومخليني على كفوف الراحه واتصرف بالبيت على انو بيتي على رغم معرفتي بيه قليله جدآ لهذا السبب حبيته واعترف وما أخجل ابداً من مشاعري ناحيته لان هو رجال عكسك تماما تتظاهر بالرجوله.
تركني وطلع بس نظرته مجانت مريحه أبدا اعرف عدل هذا اليوم مستحيل يعدي على خير والله يستر من اللي راح يصير.
هَيْصَم: وخره من يمي ضَرْضَم.
لائِث: هَيْصَم انت مو طفل أو واحد يكلك هيج اتسوي.
هَيْصَم: اترك نصائحك أو وخر عني ما ألي خلك سوالفكم.
لائِث: اضرابك عن الأكل يرجعها؟
هَيْصَم: ليش متحس يا أخي افهم ماعرف عنها شي صار ١٢ ساعه ماعرف ميته لو عايشه قطعوا أعضائها لو انطوها حقنة مخدرات تعرف كميه القلق اللي اني بيه هسه؟
اجاوبك لا متعرف لان لو تعرف محجيت هيج ابداً وتفهمت الوضع اللي اني بيه.
لائِث: ومنو كال ممتفهم هي مرت اخوي بالنهايه بس مع هذا لازم نبقى اقوياء حتى نفكر صح ونعرف مكانها.
هَيْصَم: شنو رأيك تطلع بره وتعيفني وحدي؟
هَمْاس: سيدي سيدي.
هَيْصَم: عرفت شي هَمْاس؟
هَمْاس: اي نعم سيدي وصلت معلومه عن المكان اللي بيه لّهيم هسه.
هَيْصَم: حضر الدوريه راح نطلع فوراً،
هَمْهَامم.
هَمْهَام: نعم سيدي.
هَيْصَم: تعال سوق السياره ما أكدر اسوقها اني.
ضَرْضَم: وضعه مو زين ابداً.
هَمْهَام: الله يساعد كلبه وحبيبته مخطوفه.
هَمْاس: كالكم يحبها؟
ضَرْضَم: امبين بعيونه مو اله يحجي.
هَمْاس: هاي اسمها غيبه لتحجون بأعراض الناس.
هَمْهَام: راح توكع بوحده اربع وعشرين ساعه تاخذ غيبه وكول هَمْهَام كال.
ضَرْضَم: خلونه نطلع قبل متنزل بينه عقوبه.
هَيْصَم: وتالي وياك انت ليش متفهم شنو احجي؟!
لائِث: كلت رجلي على رجلك ما ارجع للبيت حتى نلكيها سوه.
هَيْصَم: انت وحظي ثنينكم عليه،
هَمْاس ألبيت وين؟
هَمْاس: بأطراف بغداد سيدي.
فتح الجكمجه وطلع حامض حلو خلاه بحلكه هاي عادة الهَيْصَم ومحد يعرف شنو السبب لهاي العلاقه الغريبه بين هَيْصَم والحامض حلو،
صاح بيه لائِث اللي ممبين عليهم مدير ومنتسب وكأن اخوان توأم بالتصرفات روحهم وحده وعلاقتهم حديث الكل بالمركز.
لائِث: تصعد عندك الحموضه مماكل شي انت من الصبح.
هَيْصَم: لتدخل معدتي هي مو معدتك.
لائِث: اذا صار بيك شي اني اتأذه.
هَيْصَم: سوالف امي بطلها.
لائِث: غير هي وصتني عليك ياروحي،
على ذكرها اتصلت،
آلو خالتي حبيبتي.
كلاثم: هَيْصَم يمك؟
لائِث: اي وكاعد يسمعج.
كلاثم: شنو صار وياكم بالي كله يمكم.
لائِث: مصار شي بعدنه نبحث عنها.
كلاثم: تعرفونه انتوا منو مو؟
لائِث: لا بس شاكين بواحد.
كلاثم: زين ليش شنو يريد من عدها حتى يخطفها؟!
لائِث: من اشوفه اسأله.
كلاثم: صاير مثله مينحجي وياك كلمه.
لائِث: يعني شنو اجاوبج اذا اني ماعرف شي اصلاً؟
كلاثم: لتخلي بالي يمك اتصل بيه وريح كلبي ودير بالك عليه ليصير بيه شي هو هم.
لائِث: لاحظت برجيلها ولاخذت سيد علي.
ضَرْضَم: شنو هذا لائِث؟
لائِث: مثل يروحي مثل فهمه المقصود بيه.
هَيْصَم: راح اشمرك من السيارة وارتاح من ازعاجك اذا متسكت هذا أخر تحذير.
لائِث: حاضر سكتت بس ما اضمنلك راح ابقى هيج طول الوقت.
هَمْاس: سيدي هذا البيت.
هَيْصَم: لحظه لحد ينزل يمكن يكون كمين.
لائِث: وانت وين رايح اذا شاك بالموضوع؟
هَيْصَم: سكتوا قبل ما ابتلي بيه.
ضَرْضَم: يلا شباب خلي ننزل وياه.
هَيْصَم: شنو كلت وين جايين انتوا؟
ضَرْضَم: شغلي هذا سيادتك لازم أأمن المكان وهَمْهَام وياي.
هَمْاس: اني هم وياك سيدي.
لائِث: واني خراع خضره هم وياكم على الواهس.
هَيْصَم: راح جلطوني عدكم علم؟
لائِث: اسم الله عليك سيدي منو عدنه غيرك؟
ضَرْضَم: سيدي البيت فارغ مبيه احد.
هَيْصَم: شكيت بيه فارغ بس مردت اترك ندم هذا الحقير لعب ويانه لعبه حقيره يريد يستمتع بمنظري واني ادور عليها وما حصل شي مفكر راح يستمر هذا الوضع دائمآ ميعرف انو لكل قصه الها نهايه مثل البدايه تماماً ونهايتهم على أيدي لو مو يطلع وراهم عرف آو واسطه هذا قسمي على قبورهم او وعدي وما اموت إذا ما احققه ورب العرش واكف ويايه هذا انتقام الهَيْصَم واذا ما اشربهم من نفس الكأس اسمي مو اليه.
لائِث: احنه كلنه وياك سيدي.
هَيْصَم: لحد الأن جنه نلعب اما هسه صار وقت الجد خلي نشوف شلون الأسود مايعرف مكانها.
ضَرْضَم: شنو الخطه سيادتك؟
هَيْصَم: ماكو خطه راح نكعد والخبر يوصل يمنه هيج بساطه.
لائِث: هاي بحد ذاتها أعظم خطة سيادتك.
هَيْصَم: احنه تربينه وي الأسود ونعرف شلون نصطاد الفريسه بحذر وتكتيك ستراتيجي صحيح.
هَمْهَام: حمستني سيادتك.
هَيْصَم: هَمْاس عمم الخبر لَّباءَة تم العثور عليها ونغلقت القضيه وراقبلي موبايلات الجميع بالمركز واحد من عدهم هو جاسوس الهّيم.
لائِث: شلون عرفت؟
هَيْصَم: مو عبثاً خلصت عمري بالسلك العسكري واضح جدآ واحد ينطي المعلومات والشخص اللي حصلنه من عنده عنوان هذا البيت يشتغل وياهم هو الجاسوس.
هَمْاس: اعرفه سيدي راح اراقب موبايله فوراً.
هَيْصَم: الجميع راقب موبايلاتهم منعرف منو الشخص الحقيقي ومنريد نخسر فرصتنا.
هَمْاس: حاضر سيدي.
لائِث: من وين تجيب هيج افكار؟!
هَيْصَم: من تحصر شخص بالزاوية لازم يخطأ وهنا يصير دوري بالقاء القبض عليه.
لائِث: صح شلون عرفت البارحه هذا الولد هو اللي يروج مخدرات مو غيره؟
هَيْصَم: شك وصلني للحقيقة،
اخذها قاعده المجرم لازم يترك دليل وكل اللي سويته استغليت الفرصه وخليته يستعجل بتحضير لفات للفريق مالتي من ضمن هاي اللفات جانت لفه محضرها مسبقاً لواحد من الأشخاص اللي يشربون مخدرات خطأ وقدمها وياهن شكد مجان غبي ميقدم على هيج فعل بس لان حصرته بالزاوية خطأ وهذا هو حفوة عملي تعلمنه هذا الشي بالقانون استغلال الثغرات بأنقاذ الناس ونفس الشي بألقاء القبض عليهم.
لائِث: يعجبني دهائك.
هَيْصَم: عشت سنين طويله وي جندي عراقي مخضرم وهذا اللي خلاني انسان ذكي وافكر بحكمه وهسه تشوف شلون راح نعرف مكانها بسهوله ونلقي القبض على الشخص المتعاون وياهم من عدنه.
لائِث: ممكن يكون جاسوس لكن متلبس بالزي؟
هَيْصَم: احتمال وارد ليش لا بكل الأحوال راح نعرف اذا لقينه عليه القبض.
لائِث: اذا هيج تعال لازم تاكل ميصير تبقى جوعان.
هَيْصَم: سوالفي وياك ميعني ابداً اني مرتاح بس اريد اضيع وقت مو اكثر،
ياترى شنو حالها هسه جوعانه لو بردانه؟
اكيد منتظرتني اجي وانقذج من هذا المجرم آو وعد من عندي اجي واطلعج من ذلك المكان بس صبريلي اشويه وخليج قويه مثل معهدتج لَّباءَة الهَيْصَم اخ يكلبي شنو يتحمل أكثر من هيج بعد؟
مكدروا يسوولي شي راحوا عليها لان عديمين شرف وغيره والا شنو شغله وي ابنيه يتيمه ماعدها احد؟!
بحجة الحب كم بريئة دمرت حياتها وتحطمت والله أعلم اذا لَّبوتي راح تكون وحده من عدهم،
يارب ستودعتك رويحتي رجعلي اياها سالمه او وعد من عندي ما أكابر وياها بعد وانسى الماضي وافتح صفحه جديده بس لتخلي يصير بيها شي امتحني بصحتي ومنصبي ومهمتي ولتخلي يمسها سوء احميها اللهي بعينك التي لاتنام وحفظلي اياها انت تشهد انو هاي ساكنه بكلبي وأذيتها هي أذيتي ما اتحمل اشوف صاير وياها شي واني ساكت اذا متريدني ارتكب مجزرة رجعلي اياها سالمه والا وعرشك العالي جميعهم موتهم يصير على أيدي حتى لو اعرف اوصل إعدام المهم اخذ حقها من عدهم.
فيروز: ما أريد كلت لتلح ما اخلي بحلكي شي حرام.
لّهيم: مبايكه والله ليش متصدكين؟!
فيروز: حتى وأن فلوسك حرام مصدرها حرام لو من قتل لو مخدرات شلون تريد اكُل اكل بيه شُبه؟؟
لّهيم: اني مقاتل احد مو مجرم اني فيروز.
فيروز: لتخليني اتقيأ هسه اسمي لتنطقه على السانك القذر تلعب نفسي من عنده.
لّهيم: فيروز فيروزتي فيرو وتقيأي اني اغسلج مو مشكله.
فيروز: انت ماعندك احساس ابد احلف عليك مريض.
لّهيم: صحيح اني مريض بس بحبج عالجيني واكسبي أجر.
فيروز: انت قتلك حلال اجريش اللي اكسبه بيك؟!
لّهيم: تذكرت نكته خليني اضحكج اشويه شايفه هَيْصَم اللي خابصتني بيه يجي وينقذني ويسجنك؟
فز كلبي من ذكر اسمه بسرعه حجيت.
فيروز: شنو بيه؟
جاوبني وبنظرة استهزاء يباوعلي.
لّهيم: قبل ساعه وصلتله معلومه خطأ عن طريق واحد من جماعتي وهو خطيه اخذ فريقه وراح يبحث عنج وميدري ردت العب باعصابه واضوجه شويه لان انت حتى الجني الأزرق ميعرف مكانج وين ما بالج بهَيْصَم؟؟
فيروز: ميدوم الوضع هيج لابد يعرف مكاني ويجي يطلعني منا ومحيطول اني متأكده.
لّهيم: مو مشكله بس بالأول خلينه نستمتع مع بعض شنو رأيج؟
فيروز: شنو قصدك؟
تركني ونهض فتح باب الكنتور وطلع أبرة وعلبه بيها مادة بيضه مله الأبرة من هاي المادة واقترب من عندي واني هنا ماكو عظمة بقت بمكانها من الخوف يريد يحقني مخدرات..
يتبع..
التنزيل بين يوم ويوم شمعاتي.
تصبحون على الف خير.
حسابي الأنستا.
تابعنا وما يفوتك جديد
اختر المنصة اللي تناسبك وتوصلك الفصول أول بأول.
التعليقات (0)
جاري تحميل التعليقات...
لا توجد تعليقات بعد
كن أول من يشارك برأيه!