للتواصل انستا zahraaahmedn99
اريد اشوف تفاعل حلو يسر الخاطر ويعوض تعبي، تعليقاتكم بين الفقرات وتصويتكم شمعاتي يسويلي واهس للكتابه.
لتنسون التعليق بين الفقرات والتصويت ومتابعه حسابي عيناي انتوا..
هَيْصَم
الكاتبة زهراء احمد
__________
وتظن أنك بحاجه شديدة للإختفاء بينما أنت في أمسّ الحاجة لمن يجدك فقط.
: راد يقترب من عندي ويرفع البدي اللي لابسته، بس لحظه هاي مو ملابسي معقولة!!
صرخت بيه بصوت عالي: انت صدگ ماعندك خجل بس اريد افهم شغله وحده لهاي الدرجه الأخلاق معدومة عندك؟!
رفع حاجبه وسوا حركه بيهن عود يگلي كملي وعينه تتفحصني، وطرف شفته مرفوع بأبتسامة، بقى دقيقه هيج يباوعلي بعدين كام من مكانه وفتح احد المجرات بميز المرايه اللي يصير بنهايه الغرفه على جهة اليمين، طلع من عدها مصاصه فتحها وخلاها بثغره صفنت عليه معقولة يكون مريض نفسي تصرفاته غريبه حيل للحظة ظنيته مجرم او قاتل ويريد يموتني.
مدام تفكيري فتره طويله وهو يقطع صفنتي بتقدمه من عندي بخطوات بطيئة دخل أيده بجيب البنطلون وطلع من عنده مكص، جحظت عيوني عليه وصرت احرك كل جسمي بأنتفاض فضيع، بيت غريب، ورجال غريب، و تصرفاته موموزونه حتى العاقل ايخليه يصير مجنون ف معقوله أگدر اثق بيه او اضمن سلامتي بوجودي يمه؟
فيروز: لتدنه من عندي خليك بعيد لتتوقع ابداً إني اقبل تلمسني واضح؟
: ضم أديه مع بعض وره ظهره وصافن بحركاتي و المصاصه بثغره، بعدت نظري عنه واني اتنفس بغضب واحجي بتذمر كمت من مكاني بصعوبه بسبب الألم وصلت للباب وهو منطق ولاحرف ابداً ويترقب خطوتي القادمه بصمت غريب، مهتميت وحاولت افتح الباب خليت ظهري علية وقربت أيدي حتى افتحه بس ياصعوبة الأمر واستحالته، شهگت برعب من شفته محاوطني بأديه الثنين طقطق رگبته ورفع احد أديه حتى يبعد المصاصه اقترب من أذني وهمس بنبرة غريبه.
هَيْصَم: تحبيها؟
جاوبت بسرعه بدون ما افهم شنو قصدة.
فيروز: لا ابداً مستحيل.
هَيْصَم: شنو السبب طعمها حيل طيب!!
فيروز: انت شنو تقصد بكلامك؟
هَيْصَم: المصاصه، ليش انتِ شنو فهمتي من سؤالي؟
فيروز: مفهمت شي لهذا جاوبت بغباء.
هَيْصَم: ارجعي.
فيروز: وين؟
هَيْصَم: للمكان اللي كُمتي من عنده، خليني اداوي جرحج قبل ميلتهب.
فيروز: مراح ارجع الأي مكان رجعني لبيتي، شنو فايدة بقائي بيت غريب مع رجال ماتربطني بيه اي صله؟
هَيْصَم: غريب امرجن معشر النساء دائماً تفكيرجن بالخطف والقتل أو الأغتصاب، ريحيلي مخج الصغير أو لتفكرين ممكن انعجب بيج وسوي شي مو من اخلاقي، وجودج اهنا لسبب وغايه راح تعرفيها بعدين.
فيروز: تفكيرنه بهاي الطريقه لأن انتم اشخاص غير مَوثوقين ابداً.
هَيْصَم: مبيج شي يجذبني كوني مطمأنه قلب الهَيْصَم مو بسهوله يخضع لأحد.
فيروز: اسمك هَيْصَم؟
هَيْصَم: اعرف حلو ميحتاج تمدحيه.
فيروز: لتنغر بس هيج سؤال طبيعي.
هَيْصَم: مغرور وبكيفي عندج مشكلة؟
فيروز: ميخصني بيك رجعني للبيت واعتبر مصار شي ابداً ومراح ارفع عليك دعوه قضائية بتهمة خطفي.
هَيْصَم: اتعافي واني اخذج للمركز وشرطاً قدمي الشكوى كدام المدير، اما رجعه للبيت انسي هذا بيتج ومراح طلعين من عنده غير للمقبره.
فيروز: احجيلي من الأخير، شنو تريد من عندي ليش تسوي ويايه هيج؟!
اني ما اذكر ابداً أذيتك بشي من قبل اصلاً اني مَلامحتك بحياتي كلها!!
هَيْصَم: خط القلم وانتهى الأمر لتسألين هوايه وتعالي جرحج ينزف خليني اعقمه.
: بقيت معنده ومتحركت من مكاني شنو ممكن يسوي اصلاً، سحب الكرسي وگعد مقابيل الجربايه وخله كاحل رجله اليمين على فخذه الأيسر، أيد لازم بيها المُكص و الثانيه لازم بيها مصاصه، يباوعلي بطريقة مستفزة وشبه ابتسامه مرسومه على ثغره حركاته ونظراته موتني، عنده قوة صبر غريبه وتحمل همات، ضابط اعصابه بطريقة عجيبه جان متأكد راح ارجع لمكاني لذلك اتعمد يسوي هيج وصار اللي راده بسبب الألم مگدرت ابقى لفتره طويلة ورجعت للجربايه، گعدت على اطرافها، كام من مكانه ورجع جاب الأسعافات فتحهم والمُكص بأيده بعده، ما أريدة يلمسني بس ماكو حل الأنسان المجبور ايسوي اي شي حتى يحافظ على سلامته وخاصتا اذا كان مع انسان مثل هَيْصَم الكل شي غريب بيه وغير مفهوم حق ام باطل مستحيل تگدر تعرف.
لبس كفوف و صب قنينة الديتول بالكامل على جرحي صرخت بصوت عالي الألم قوي حيل نزلت دموعي وحاولت اكوم رجعني لمكاني ويحجي ويايه حتى يهدأني.
هَيْصَم: الضماد لازك على الجرح و انتِ نازفه صعب انزعه بسهوله راح تتأذين أكثر اذا مسويت هيج.
: حجيت من بين دموعي و الألم.
فيروز: طلعت تگدر تواسي معرفتك!!
هَيْصَم: ومراح تعرفيني ابداً.
فيروز: وعلى أساس مهتمه اعرفك.
هَيْصَم: خلصت لتتحركين هوايه حتى مينفتح جرحج وتتأذين اسمعي الكلمه ولتعانديني بالأخير راح تكونين الخسرانه الوحيده مصيرج يم الهَيْصَم كلما حفظتي هاي الجمله اسرع كلما كان افضل.
فيروز: أريد اعرف ليش تجبرني ابقى يمك؟
هَيْصَم: مو احنا نختار الطريق، الطريق هو اللي يختارنه، اما السبب فهذا موجود بالقدر من تصعدين للرفيق الأعلى اسألي هذا السؤال ليش اختارج تكونين مع
الهَيْصَم من دون النساء البقية.
فيروز: تستهزء حضرتك!!
هَيْصَم: نامي افضل لصحتج اريدج تتعافين بالكامل عن قريب.
فيروز: جاوب على سؤالي شنو تريد من عندي ليش متقبل ارجع لبيتي؟!
هَيْصَم: ليش جنتي البارحه بذلك البيت ومنو الشخص اللي طعنج وشنو السبب؟
: بهتت ملامحي مستحيل احجي شي، منو هو حتى يعرف أسراري، بنفس الوقت هو شعرفه معقولة هو نفسه اللي ساعدني؟
حجيت بسرعة.
فيروز: انت اللي ساعدتني مو؟
هَيْصَم: جيد بديتي تذكرين ارجعي بمخج لقبل ساعه من وصولي وانقاذج منو هو اللي وصلج لهاي الحاله واللي راد قتلج بدم بارد؟
فيروز: ماعرف وحتى لو اعرف مستحيل أكُلك.
هَيْصَم: لعد ابقي ضيفتي، اني رجُل كريم وبيتي مفتوح الج طول العمر.
فيروز: انت منو؟ معقوله اتكون مجرم وتريد تقتلني؟
هَيْصَم: ممكن.
فيروز: اذا هيج ليش نقذتني وجبتني لهذا المكان؟
هَيْصَم: سؤال وجيه.
فيروز: لتستفزني وكول شنو تريد من عندي!!
هَيْصَم: الشخص اللي تتسترين عليه وتدفعين حياتج مقابل حياته ميستاهل كل هذا والدليل المكان اللي انتِ بيه هسه.
: غيرت الموضوع بسرعه ما اريد ادخل وياه بأي نقاش يخص البارحه فسألته.
فيروز: شنو تسوي بالمكص ليش استخدمته بعلاج جرحي؟
هَيْصَم: اشيل بيه الضماد.
فيروز: ليش متستخدم ايدك!!
هَيْصَم: ما المس النساء لكن وياج خربت هاي القاعدة.
فيروز: السبب؟
هَيْصَم: مو كل شي بالحياة اله شرح الأفضل انعيشه.
فيروز: غامض.
هَيْصَم: وضحيني.
فيروز: شلون؟
هَيْصَم: صعب.
فيروز: ليش؟
هَيْصَم: لأن اني الهَيْصَم.
فيروز: ليش سميتني لَّباءَة؟
هَيْصَم: حبيته.
فيروز: رجعنا لنقطة الصفر ومستحيل تشرحلي السبب.
هَيْصَم: ذكائج عجبني.
فيروز: اطراء!!
هَيْصَم: افرحي لأن احاله اطري احد بالعادة.
فيروز: اذاً هاي ثاني قاعده تكسرها ويايه لهاي الدرجه الي تأثير عليك؟!
هَيْصَم: وين تردين توصلين بهذا النقاش؟
فيروز: اعرف ليش جايبني لهنا وشنو علاقتي بيك.
هَيْصَم: تحتاجين عمرج بأكمله ومستحيل تفكين شيفرة الهَيْصَم.
فيروز: ومامهتمه افك الشيفره مالتك كل اللي اريده رجعني لبيتي وننهي كل شي اهنا ولا كأن صار اصلاً.
هَيْصَم: دخلتي عريني وصعب تطلعين من عنده سالمه لذلك صيري مطيعه وسمعي الكلمة حفاظاً على سلامتج.
فيروز: اريد ارجع لشغلي هسه يفصلوني لأن تركته بدون سبب، ميصير هيج تتعامل ويايه واني ما اعرفك اصلا هذا الشي مو من حقك فاهممم.
هَيْصَم: المرة بيت اهلها منو ايكون مسؤول عنها؟
فيروز: شنو هذا السؤال الغريب؟!
هَيْصَم: جواب خاطئ.
اخذت نفس وحجيت بقلة صبر.
فيروز: ابوها منو غيره.
هَيْصَم: اما اذا بيت زوجها؟
فيروز: زوجها يعني منو مثلاً!!
هَيْصَم: هذا جوابي الج.
فيروز: لحظه بس اني مو زوجتك حتى تتعامل ويايه بهذا الشكل اني وحده غريبة وحياتي كلها مشايفتك تضحك على عقلي انت!!
هَيْصَم: الحادث خلاج تفقدين هوايه اشياء من الذاكره لكن مو مشكلة يجي يوم وتذكرين ونعيش بشكل طبيعي سوا.
فيروز: انت متأكد اكو عقل داخل جمجمتك؟
هَيْصَم: اني مشايفه اذا انتِ تشوفيه عرفيني عليه حاب اشكره وجه لوجه.
فيروز: يا الله على هذا الرجال، وتالي وياك انت ليش متفهم!! اني ما اريد ابقى بهذا المكان اكثر من هيج عندي بيت أو وظيفه وحياة كامله بعيده عن أمور العصابه والقتل والأجرام، اللي تريده مستحيل تحصله من عندي لأن انت تتعامل وي الشخص الخطأ.
هَيْصَم: خطأ او صح، حرام ام حلال اني اللي احدد هذا الشي، راح تبقين بهذا المكان للوقت اللي اني اريده، سدي الموضوع وريحي جسمج بالنوم التقي بيج بعد مينتهي شُغلي.
: وخر من يمي وفتح الكنتور أخذ ملابس عسكريه دخل الحمام شوية وطلع خله الرتبه على كتافه ورش عطر كمل و التفتلي صفن بوجهي شويه مثل الأنسان اللي يفكر، لحظات أو وخر عيونه، فتح نفس المجر اللي بيه اسعافات أوليه شفت بأيده ابره اتقدم ناحيتي واني طفرت من مكاني بسرعة ونسيت جرحي حجيت بأنفعال واني خايفه من اللي يريد يسويه.
فيروز: ياويلك، اذا تدنه يمي تشوف شي ميعجبك والله.
: ابتسم شبه ابتسامة و اقترب من عندي اكثر واني ارجع ليوره حتى صرت على الحايط وانعادت حركته قيدني بجسمه ويحجي بهمس قريب وجهي.
هَيْصَم: شنو تسوين مثلاً وانتِ مقيدة بين احضاني هسه؟
فيروز: وخر عني وافتح ايدي وخليني اطلع من هذا السجن، أسمي نفسك رجل دولة وانت حابسني اهنا بدون ذنب برأيك هذا عدل لو هاي حقوق المواطنين اللي ادافعون عنها وتاخذون حق المظلوم وانتم أكبر ظلمة؟!
هَيْصَم: شأتي ام أبيتي انتِ تحت سيطرتي بالكامل حتى النفس ميمر بخشمج بدون أذني، مو مسموح تباوعين لشي ميعجبني أو تحجين مع أحد بدون علمي، انتِ مقيدة بسلاسل الهَيْصَم واللي يدخل لعريني ميطلع منه بسهوله.
جاوبت واني اتحدا بنظراتي.
فيروز: الى متى؟
هَيْصَم: الى ما لا نهاية.
صرخت بيه بصوت عالي بسبب أسلوبه اللي موتني.
فيروز: مو من حقك اتسوي هيج انت منوووو حتى تجبرني على شي ما أريدة بس فهمني؟
هَيْصَم: تعرفين بعدين وهسه لازم تنامين اتأخرت هوايه وأريد اطلع ،اذا عاندتي وقررتي تسوين شي ميعجبني اسوي شي ايخليج تعضين اصابعج ندم.
: خوفني بكلامه بس حاولت أبين نفسي قويه، من ايكون الخطر محاوطك من جميع الأتجاهات والنهاية مو واضحة لازم تصير قوي وتواجه الصعاب واذا مموجوده الشجاعه اصطنعها، خليت عيني بعينه وحجيت بجرأه واني ارفع حاجبي.
فيروز: شنو ممكن تسوي اكثر من اللي سويته؟!
ابتسم بمكر وقرب راسه اكثر وهمس قريب أذني.
هَيْصَم: رجل و إمرأه وحدهم أبيت ويگولون وي كل اثنين ثالثهم الشيطان اعتقد خيالج واسع أو وصلت
الفكره.
ابتسمت بثقه وحجيت بشجاعه مبالغ بيها خلتني اندم بعدين.
فيروز: مستحيل متسويها.
: صار قريب مني حيل وقيدني بين أديه لدرجه حسيت النفس صار صعب واني وياه صرنه شبه شخص واحد ميفصلنه شي ابد، اديه لازمهم بأيد وحده ورافعهم فوك راسي مخليني ما أگدر اتحرك، و رجليه مثبتهم برجليه، انفاسه تضرب بوجهي نزل نظرة لشفايفي ابتسم بطرف شفته وگال.
هَيْصَم: الثقه الزايدة تقتل صاحبها احياناً، هذا القرب مجرد تحذير، لأن ما احب بعض الأشياء ميعني ابداً ما أگدر اسويها لتتحديني وانتِ تعرفين من هاي المعركه الخسران الوحيد هو انتِ لَّباءَة، خليج مطيعه هيج افضل للثنين.
: نزلت دموعي ليش حتى انجبر اعيش تحت رحمته، بهذا العالم كله ماكو غير هيج واحد يحاسبني، من بين افكاري حسيت بنغزة بأيدي رفعت راسي اله وباوعتله بغضب بادلني بنظرة باردة، عيونه بيها ظلام دامس والتمس بيهن حزن عميق، وخر عني وگال.
هَيْصَم: ربع ساعة ويبدي مفعولها روحي نامي على الجربايه حتى متوكعين على الكاع من تغفين، و بالنسبه لأيدج راح افتحها اذا شفتج عاقله و مطيعه وتنفذين الأوامر.
: حجيت بعصبيه واني كارهه هذا الوضع اللي محسسني بيه اني سجينه عنده وبكيفه يأمُر وينهي وعليه الطاعه وملازم اسأل.
فيروز: تحلم مستحيل اكون مطيعه، اني انسانة إليه إحترامي وكرامتي، لتفكر مجرد تفكير أنفذ أوامرك بشكل اعمى حتى لو هددتني بالقتل افضل الموت بشرف على حياة ذليله فاهم.
هَيْصَم: لذلك اختاريتلج اسم لَّباءَة وميليق بيج غيره.
فيروز: لتلعب ب اعصابي بهاي الطريقه اللي تريده سوي وخلصني خليني ارجع لحياتي القديمه ولشغلي بعيد عن هذا الوضع اللي يلعب النفس.
هَيْصَم: راح يبدي مفعول الأبرة بعد دقيقه ارجعي لفراشج يلا بعدين ابرزي عضلاتج بكل الاحوال راح يجمعنا اكثر من نقاش بالأيام الجاية.
فيروز: واحد مستفز حقير اكرهك.
هَيْصَم: اعرف گولي شي جديد.
: بقيت واگفه بمكاني وصابتني نوبة اعناد اريد اشوف شنو يسوي مثلاً، مستمر صمودي لفترة طويلة سرعان مصابتني دوخه قويه واختل توازني لحظة حسيت الوقت اتوقف وهو مخلي أيدة تحت ظهري وساندني حتى ما اوگع على الكاع،عيني سرحت بملامحه شويه، وجهه رجولي حيل ،فكه حاد، وحواجبه مرسومه بطريقة مجذبه ،أسمر أنفه طويل و مناسب جداً وي تصميم وجهه ،عيونه سوادهن وحدتهن و الطريقه اللي ينظر بيها تجذب، مع هذا مجذبني ومحبيته ولا حسيت اتجاهه بأي مشاعر سوا الغضب مو مهم الجمال الخارجي اللي يهمني هو نظافة داخل الشخص وهذا الشي اللي ما التمسته بيه من طريقة كلامه وتصرفاته الكلها غامضه ومامفهوم منها شي.
ابتسم بمكر وقرب راسه من عندي وگال.
هَيْصَم: اعرف إني حلو.
نتبهت لنفسي ومسمحتله يفهم اللي يريده بسرعة حجيت: لتنغر اصلاً اني دايخه ومدا اشوف بصوره واضحه.
هَيْصَم: صحيح.
فيروز: لتستهزء.
هَيْصَم: تصبحين على خير، حاولي هم تحلمين بيه حتى متخافين بوجودج وحدج بالبيت.
فيروز: ليش انت منو حتى ما اخاف بوجودك؟!
هَيْصَم: هَيْصَمج.
: جانت هاي آخر كلمه سمعتها من عنده بعدها شالني ودخلت بنوم عميق محسيت على شي ابداً.
وكفت كدام المركز نزلت والجنود ادولي التحيه دخلت لغرفتي وكعدت على الكرسي والتفتت للشباك اللي صاير وره الميز.
محمد: صباح الخير.
هَيْصَم: ياهلا بالمحامي المو نزيهة.
درت الكرسي وصار مقابيلي.
هَيْصَم: شو منورنا اليوم.
محمد: النور نورك ولو انت اسمر مابيك نور.
هَيْصَم: انت تكفي مانريد نورين سوه هيج يتأذن عيوني.
محمد: ظريف.
هَيْصَم: اعرف عندي حس فكاهه.
محمد: مو موضوعي حس فكاهتك انت تعرف ليش اجيت اهنا اليوم لذلك خليني اكمل شغلي واطلع بسرعة عندي قضيه ثانيه لازم الزمها.
هَيْصَم: ماسمحتلك تكعد.
محمد: اللي بيناتنا اكبر من أذن و سماح سيادة النقيب.
هَيْصَم: على كل حال عملك ميهمني بالأضافة اني نقيب مو قارئ فنجان.
محمد: الأشخاص اللي اعتقلتهم البارحه اجيت حتى ادفع كفالتهم ويطلعون من السجن اليوم وبهاي الساعه.
هَيْصَم: وقع على هاي الأوراق و تگدر بعدها تطلع.
محمد: بهاي السهوله!!
هَيْصَم: ليش شنو الصعب بتوقيع الأوراق؟!
محمد: متوقعت اتكون متساهل لهاي الدرجة.
هَيْصَم: ما اعتقد احد اعمالي اكون عند توقعاتك.
محمد: مو مشكله بما انو انحلت بسرعة.
ابتسمت وصحتله.
هَيْصَم: لائِث.
لائِث: نعم سيدي.
هَيْصَم: اخذ المحامي حتى يشرف على طلعة السجناء من السجن ويتأكد على مدا نزاهة مركزنا.
لائِث: حاضر سيدي.
طلع محمد وي لائِث، رفعت اصابيعي وصرت اعد.
هَيْصَم: واحد، اثنين، ثلاثه.
صرخ بصوت عالي ابتسمت على ردة فعله اتقدم بخطوات سريعه من عندي وحجه بعصبية.
محمد: انت تضحك عليه لو شنو ماكو ولا واحد من المعتقلين البارحه موجود بالزنزانه شنو تسمي تصرفك هذا هااا؟
هَيْصَم: لائِث عزيزي وين السجناء اللي البارحه اعتقلناهم؟
لائِث: انحالوا محكمه سيدي جميعاً.
غمغم بغضب: التحقيق ياخذ وقت ليش بهاي السرعه انحالوا محكمه؟!
هَيْصَم: باص.
محمد: تضحك عليه انت، شنو مفكرني بس اريد افهم!!
هَيْصَم: بشنو ضحكت عليك مجرد محبيت اجاوب على سؤالك اتبعت الطريقة اللي يسووها بعائلتي تربح معقولة ممتابع البرنامج؟
محمد: هَيْصَمممممم.
هَيْصَم: على صوت الهَيْصَم ميعلى صوت قبل متكون بخبر كان اطلع من هذا المكان، وأخذها نصيحه لتلزم قضايه اكبر من عندك من تكون العملية تحت سيطرتي ماكو مخلوق على وجه الكره الأرضيه يگدر ينقذ المجرم من بين اديه.
محمد: ليش منو انت حتى تحجي بهاي الثقه؟!
تهمه وحده عليك ارميك وره الشمس خلي هذا الشي ابالك واذا انت هَيْصَم اني محمد ونشوف بالأخير منو يفوز.
هَيْصَم: خليها قاعده بالغابه الحاكم الأسد اما بهذا المركز ف الهَيْصَم موجود.
محمد: يجي يوم ويظهر الحق وتاخذ جزائك المناسب بذلك الوقت راح اذكرك بتعجرفك وغرورك الزايد عن حده.
هَيْصَم: تعجبني الثقه الزايدة وتحمسك للعمل جميل جداً لكن يؤسفني انو اخبرك اوقاتي السيئة بعيده نوعاً ما فأنت مجبور تنتظر وقت اكبر اذا بقيت بمهنتك اكيد.
محمد: تهددني!!
هَيْصَم: لائِث اني هددت؟
لائِث: استغفر الله سيدي انت محجيت شي اصلا.
محمد: اني النار اللي راح تحرگك بوقتها ميفيد ندم صدگني.
هَيْصَم: واني البارود اللي يخلي نيرانك مستعره ومتهدأ حضر نفسك للخسائر بعمرك مراح تكون ند للهَيْصَم.
محمد: خسرت معركه لكن الحرب مازالت قائمة يجي يوم وانتصر عليك هذا وعد من عندي.
هَيْصَم: راح اعيش بأنتظار اليوم اللي تهزمني بيه.
محمد: بس انتظر وشوف شنو ممكن اسوي.
هَيْصَم: لائِث وصل محامينا للباب مو حلوه بحقنه منحترم الضيف.
محمد: ميحتاج لكن الكفاله أريدها رجعها قبل ما اطلع.
هَيْصَم: لائِث برأيك اني اخذ فلوس مو اليه؟!
لائِث: اشهد مشفت شي سيدي.
هَيْصَم: اعتقد سمعته ماعندي الك شي لذلك ارجوا ان تتفضل عندي شغل مهم واكو مجرمين هوايه منتظرين عقابهم وما أگدر اخليهم ينتظرون أكثر.
طلع من المركز وهو يتنفس بغضب مجان متوقع هَيْصَم سبق تفكيرة واتخذ خطوة سريعه بهاي البساطه، واني اباوع على منظرة واضحك عليه بداخلي، وصلته للباب ورجعت يمه.
هَيْصَم: اخذ هاي الفلوس وانطيها لأحد العوائل المحتاجه.
لائِث: عفواً سيدي ليش مرجعتهم اله هاي مو عادتك.
هَيْصَم: لأن فلوس حرام من ناس سراق مو مالته.
لائِث: مثل متأمر سيادتك.
هَيْصَم: كول لضَرْضَم يجمع الفريق اكو عملية ثانية ولازم تنحل اليوم.
لائِث: حاضر سيدي.
: دخل بكامل قوته لابس جاكيت اسود وبنطلون اسود السلاسل تمليه و بأيدة الشمال سلسله يلعب بيها بالهوه، يصدر اصوات صفير من ثغره بينما يمشي بثقه داخل هذا الممر، مكان مهجور بمنطقه نائية بعيده جداً عن المدينه الجميع يلقون التحيه عليه خوف؟
ام احترام، غير معروف.
لكن نگدر نجزم هو مجرم خطير وتاجر مخدرات عنده هوايه اعمال غير قانونيه ممكن توصله اعدام مع ذلك محد يعرف مكانه او مواعيد عمله.
هَيْصَم: ضَرْضَم انت راح تكون مسؤول عن مراقبه هواتفهم كل خطوه وحتى النفس، كم مرة يدخل للحمام حتى حركه ايدهم اريدها توصلني بالتفصيل اي تقصير تعرفون شنو العواقب.
ضَرْضَم: سيدي لحد الآن ولا واحد بيهم اتصل لكن اني عندي تساؤل جانت عمليتنا سريه جداً شلون عرفوا هُمَ معتقلين يمنه؟
هَيْصَم: احنه نتعامل وي مجرم خطير عداوتنا وي شخص يعرف تحركاتنا بالكامل لذلك لازم ناخذ الحيطه والحذر اي خطأ حتى لو جان صغير ممكن يخسرنا هواية اشياء.
ضَرْضَم: أمرك سيدي رگبتنه لهذا الوطن ودمائنا فداء اله.
هَيْصَم: قبل منبدي بهاي المهمه لازم يكون عدكم علم، اللي نتعامل وياهم قتل الأرواح الهم عادة وسفك الدماء اسهل من شرب المي ممكن تتهددون بعوائلكم امهاتكم او زوجاتكم وحتى ممكن يقتلون اولادكم بدم بارد لذلك اللي ميگدر يضحي لهاي الدرجة يگدر يتنازل عن القضيه واني انقله لمكان ثاني واكون حريص على سلامته، اعتبروا هذا الجنص الأخير بعد اول خطوه ايصير التراجع مستحيل أو اي خيانه راح ينعدم فوراً بدون اي نقاش.
هَمْهَام: فداك احنه سيدي وياك للموت بكل شي تأمر بيه.
هَيْصَم: نسائكم ترمل وامهاتكم تثكل وابنائكم يكونون يتامى، راح تكون نظرة الحزن بعينهم وهم يشوفون الأباء الثانين مع أبنائهم وتكونون حسرة بقلوبهم مدا الحياة، اما نسائكم اذا معاشن حياتهن وقررن يربن اولادكم بوقتها راح تعيش الذل والأهانه حتى تحصل على لقمة عيش محترمه، ممكن يتساومن حتى بشرفهن، وبالنسبه للأم هي اكثر شخص خسران بهاي المعادلة لأن روحك تطلع مره وحده من جسمك بس هي روحها تطلع الف مره بالدقيقة، من يتبدل وجودك وصوت ضحكتك الى صورة ترافق جيبها لا أكثر، اما انتم راح تكونون عناوين اخبار بالقنوات التلفزيونية وسبق صحفي، اسمك راح يبدل ويكون بداله الشهيد أول متوكع على الكاع ويجي عزرائيل كدامك عدها راح تفارق الأهل والأصحاب، افراشك الدافي راح يبدل بكفن ابيض والمخده الناعمه راح تكون حجارة تتخله جوه راسك، وجسمك اللي تحرص على تعطيره وتنظيفه كل يوم راح يكون طعام للديدان ويغطيه التراب بدل الثياب الراقيه، مستعدين لهيج تضحيه؟
جاوبنا بحزم.
لائِث: اول مدخلنه للعسكريه خلينا ارواحنه على كفوفنه والموت هو نهايه الأنسان شنو مجان منصبه ميفرق جندي او عامل لذلك انفضل انموت بشرف ونترك عوائلنه يحميها الرحيم ويتكفل بيها.
هَيْصَم: خلوا ايدكم بأيدي وخلونا نعزم على احد الحُسنيين اما النصر او الشهادة.
هَمَّاس: تحت امرك سيدي.
هَيْصَم: اول خطوة امنوا عوائلكم واذا گدرتوا تسفروهم يكون افضل، طول هاي الفترة مالازم ايكون اكو تواصل بينكم مطلقاً تحت اي ظرف كان، اما الخطوه الثانية هي الوصول لأحد اهم تجار المخدرات بالعصابه، عدو خطر وند اله مكانته، عن طريقة راح نگدر نوصل لجميع المجرمين بالعصابه راح نبدي بالأشخاص اللي عتقلناهم البارحه واحد منهم راح يخطأ ويتصل بيه لذلك راقبوا موبايلاتهم.
ضَرْضَم: ممكن نعرف اسمه سيدي.
هَيْصَم: لّهيم بمعنى الملتهم، ميخاف من احد، أسراره هي غايتي، تحطيمه هو طموحي، والوصول اله وحبسه هدفي.
: يا مرحبا بالموت نفسه، نورت بيتي المتواضع بقدومك.
لّهيم: لتتملق ماحب.
: بشنو أگدر اساعدك؟
لّهيم: وحده تخصني موجوده البارحه بالبيت اريدها يمي بغضون اسبوع غير هذا الكلام راح تشوف الموت بعيونك من صدك.
: حاضر تدلل كم لّهيم عدنا.
لّهيم: منو اللي طعنها؟
: ماعرف، لكن وعد راح احقق بالموضوع وخلي يركع تحت رجلك.
لّهيم: اكره الوعد اريد فعل بدون كلام واضح؟
: تأمر زعيمنا.
لّهيم: اتلذذ من اشوف الخوف يرتعد من عندي متعه غير شكل.
: سيدي احد السيارات منتظره موافقه الشرطه حتى تدخل للمنطقه لكن هم مانعين هذا الشي شنو تأمرنا انسوي؟
لّهيم: خليهم منتظرين ماكو مشكله بكل الاحوال البضاعه يمي من ساعتين، يعجبني العب وياه ماكو انسان يگدر يواجهني بشجاعة مثل ميسوي هو.
هو هَيْصَم واني لّهيم ، هو حاكم الغابه واني الموت بحد ذاته، متحمس جداً حتى اعرف منو اللي ينتصر بهاي المعركه.
هَيْصَم: ومحد راح ينتصر بيها غيري، خلصت ايامي السيئة وحان موعد نهايتهم واحد وره واحد راح اخليكم تلتقون بعزرائيل شخصياً واخليكم تنزفون دم بكثر الجروح اللي انطعنت بيها.
: فتحت عيوني على حركه بالغرفة، ضوه الشباك زعجني حيل هاي شگد نايمه!!
اجت عيني للواگف كدام المرايه وينزع بالقميص صحت بغضب.
فيروز: انت متستحي شنو هاي الحركات الطايح حظها؟!
التفت اليه ورفع حاجبه وگال بغرور.
هَيْصَم: اكره العنف مع الجنس اللطيف لتجبريني أكسر هاي القاعدة.
فيروز: لتتفلسف براسي واترك من عندك القيم و الأخلاق وانتبه على تصرفاتك شلون تنزع قميصك كدامي.
هَيْصَم: اعتقد هاي غرفتي واني حر أسوي اللي يعجبني بدون اعتراض.
فيروز: بس انت مو وحدك بيها، احترم وجودي يا اخي لو رجعني للبيت.
رجع نظرة اليه وهو يمشط بشعره گال بتساؤل خله خلايا جسمي تنتفض خوف.
هَيْصَم: غيري الجمله اذني صار بيها طنين من كد متعيديها وخليها ابالج لا احترم وجودج ولا ارجعج لبيتج، بعدين شنو هذا الحماس الغريب للموت عندج؟
كلت بتساؤل: قصدك؟
هَيْصَم: لتستغبين انتِ اكثر وحده تعرف حجم الخطر اللي انتِ بيه وطلعتج من هذا البيت هو انتحار علني، كوني شاكره لأنقاذي الج وحمايتج بهاي الطريقه.
فيروز: مطلبت من عندك تحميني لتحسسني بالمنيه منقذتني لخاطر عيوني وإنما حتى تعرف شنو اللي وصلني لذلك البيت ومنو المسؤول عن طعني صح؟
هَيْصَم: ذكيه لكن غبيه بنفس الوقت، اني اشم ريحة الدم على بعد الف متر وكل جريمة احضرها اعرف منو القاتل، مو صعب اعرف اللي حاول يقتلج هاي عندي اسهل من شرب المي.
فيروز: اذا هيج انت سباعي وكدها شنو فايدة وجودي بهذا البيت؟ رجعني لبيتي وخلص لتعذب نفسك وتعذبني.
هَيْصَم: بأحلامج ماكو طلعه من هاي الغرفة حتى يقرر الهَيْصَم هذا الشي ما بالج طلعتج من البيت.
: اخذت شهيق واني اكتم غضبي لازم افكر بحل ميصير ابقى وي رجال غريب لفترة طويلة، ما أگدر اضمن شنو ممكن يسوي، وخاصة هو تصرفاته غريبه وغير محزورة.
حجيت واني احاول اغير الموضوع.
فيروز: بما انك مصر على وجودي اهنا افتح ايدي اريد ادخل للحمام لو هاي همات لازم تكون بأذن؟
هَيْصَم: الحمام كدامج تگدرين تتدخلين بالوقت اللي يعجبج اخيوط گلبي.
فيروز: شنو هاي اخيوط گلبي من الصبح لحد هسه تحجي بيها؟
هَيْصَم: احبها مثل اسم لَّباءَة، وبعدين مو ردتي تدخلين للحمام يلا.
فيروز: افتح ايدي أول شي واطلع من الغرفه حتى أخذ راحتي.
هَيْصَم: انتِ عجبج المشهد حابه اعيده گولي لتستحين.
عقدت حاجبي بتساؤل وحجيت.
فيروز: أي مشهد مفهمت؟
: اتقدم ناحيتي بدون مينطق ولا حرف اتقرب من عندي حيل بعدت عنه رجع سحبني من ايدي وشالني لصدره، أيد جوه ظهري والثانية جوه رجليه، حاضني بقوة حتى ما اوگع بقيت اتحرك بشكل هستري واني صرت اعصاب مبقت كلمه سيئة مگلتها بوجهه وهو ولا كأن ياجبل ميهزك ريح حسيته للحظه انسان فاقد للمشاعر تماماً، اخير شي متحملت وصرخت بيه.
فيروز: نزلني اگدررر امشي اني مووو مشلوله.
هَيْصَم: فكرت حبيتي المشاهد التركيه اللي تصير بيناتنا فگلت ما اخليها بنفسج.
فيروز: حقير عديم احساس انسان مثلك واطي مشفت، عايش بغابه يا اخي ليش متقبل تفهم؟!
هَيْصَم: صح هاي غابتي واني الطرزان والحاكم وميصير غير اللي اني اريده.
: دخلني الحمام واني تهسترت اكثر شنو يريد ايسوي هذا المجنون!!
يتبع..
تفاعلكم اللي يسوي واهس وتعليقاتكم بين الفقرات وتصويتكم للبارت يحلوين..
حسابي الأنستا لأي شي يخص القصه.
تابعنا وما يفوتك جديد
اختر المنصة اللي تناسبك وتوصلك الفصول أول بأول.
التعليقات (0)
جاري تحميل التعليقات...
لا توجد تعليقات بعد
كن أول من يشارك برأيه!