للتواصل انستا zahraaahmedn99
علقوا بين الفقرات+ صوتوا للبارت+ تابعوا حسابي عيناي انتوا.
شاركوا القصه مع اصدقائكم حتى نستمتع وي الهَيْصَم مع بعض.
هَيْصَم
(الكاتبة زهراء احمد)
_______
وأذا التقت عين الخليل خَليلها
وسط الحشود فليس للنطق ثمن
تكفي تعابير الوجوه كأنها
أنهار شوقٌ فاض من كثر الشجن
هَيْصَم
فيروز: هَيْصَم!!
هَيْصَم: لَّباءَة.
فيروز: شنو تسوي اهنا؟
هَيْصَم: اخطب بنت المدير وبما انو انت موظفه اهنا اريدج واسطه اليه شنو رأيج؟
فيروز: تستهزء حضرتك؟
هَيْصَم: ليش حتى استهزء على بالج اني راح ابقى عزابي طول عمري يعني؟
نرفزني كلامه حجيت بعصبيه بدون ما انتبه منو موجود يمي،
فيروز: ومنو گلك اني خطابه روح وخطبها انت ولتنسى تخبرها انك واحد مستفز واناني هم ومتستاهل الحُب.
هَيْصَم: غرتي لَّباءَة؟
فيروز: وعلى شنو اغار عيني؟
يمي موظفين اثنين شاب وبنيه انتبهت عليهم صافنين علينه ابتسم بطرف شفته وگال.
هَيْصَم: انتبهوا على عملكم، وانت ست اتفضلي ويايه سيارتج قاطعه طريقي ما اگدر اطلع.
فيروز: سيارتي؟
هَيْصَم: لتثوليها گومي.
فيروز: نهضت وتبعته قبل منطلع تذكرت إني لازم اطلب أذن من المدير ما اطلع بكيفي لكن وقفني وهو يگول.
هَيْصَم: ميحتاج ترحين اخذت أذن اني.
فيروز: مقرر نطلع؟
هَيْصَم: والا ليش اجيت.
فيروز: وهذا اللي اريد اعرفه ليش اجيت؟!
صعدنه بالسياره وگال.
هَيْصَم: معقوله معرفتي ليش اجيت؟
فيروز: لتجاوبني بسؤال هَيْصَم.
هَيْصَم: جابني الشوق لَّباءَة.
كلمه وحده من بين شفايفه خربطت وضعي بالكامل هو اصلاً تخربط من شفته واگف امامي بطلته واجه يكملها هسه عليه،
حاولت ابين نفسي ممهتمه عكس داخلي اللي يرگص طرباً باوعت بعيونه وگلت.
فيروز: ليش الهَيْصَم يعرف يشتاق؟!
هَيْصَم: مو مثل بعض الناس عدهم رقمي وميتصلون ويسألون.
فيروز: هسه صار الذنب عليه ولا كأن انت انطيتني خطبه الوداع الطويله العريضه وحتى وصيه وصيت للحظه فكرت راح اتموت الله لايقدر وبعد ما اشوفك مره ثانيه.
هَيْصَم: هيج غالي بگلبج اني؟
فيروز: اني اخاف على كل العراقيين مو بس انتَ سيد افندي.
هَيْصَم: گلبج وسيع ما شاء الله وبعدين عندج علم هي نفس المعنى افندي تعني سيد باللغه التركيه والعكس وي سيد.
فيروز: ومع هذا راح ابقى اسميك سيد افندي عاجبني وبكيفي عندك اعتراض؟
هَيْصَم: هذا يقدموه بالمحكمه ويسمى طعن بالحكم.
فيروز: هَيْصَم لتستفزني وگول ليش انت اهنا شنو صاير؟
هَيْصَم: ليش متصدگيني من گلت مشتاق؟
فيروز: الهَيْصَم يشتاق هاي عجيبه ثامنه معقوله وقعت في شباك الحُب حضرتك؟
هَيْصَم: مو شرط احبج حتى اشتاقلج لَّباءَة والدليل انت مشتاقيتيلي.
فيروز: منو گال؟
هَيْصَم: اذاً اعترفي لتخليها بگلبج يگولون كتم الأسرار يقلل العمر واني اخاف عليج لَّبوتي.
فيروز: صرت تحجي بضمير الملكيه منتبه؟
هَيْصَم: خلي نتفق اتفاق وهو سميني مثل متردين اسميج مثل ما أريد ويكون سر بيناتنا.
فيروز: اسمك عاجبني ميحتاج اغيره.
هَيْصَم: واني احب اسميج لَّباءَة.
فيروز: المهم كلي شلونك؟
هَيْصَم: صرت زين من شفتج.
فيروز: شهرين كاملين شنو ذكرك بيه فجأة؟
هَيْصَم: 65 يوم وسبع ساعات.
فيروز: من گد مفرحان بغيابي عديت الأيام يوم يوم؟
هَيْصَم: حتى تعرفين مدا وفاء الهَيْصَم للَّباءَته.
فيروز: لتضحك عليه بهاي الأمور و بالنهايه تگلي لتتعلقين بيه لَّباءَة.
هَيْصَم: طلع هذا الأسم حلو أكثر من تگوليه.
فيروز: ممكن تترك هذا الموضوع وتحجيلي ليش انت اهنا؟
هَيْصَم: ثالث مره سألتي وثالث مره راح اجاوب جابني الشوق مشتاق اني لَّباءَة.
فيروز: ألمنو؟!
هَيْصَم: للگبور.
فيروز: هه متضحك.
هَيْصَم: وحق ربج العالي وسماءه اذا اشمرج من السياره على هذا سؤوالج محد يلومني يعني شنو مضيع بالنجف حتى اترك شغلي واجي برأيج؟!
فيروز: صدگ والله اجيت علمودي.
هَيْصَم: اللهم اغفرلي الواضح راح ارتكب جريمة.
فيروز: اي لأن كلامك مو منطقي انت گلت متحبني وماممكن تحبني ليش حتى تشتاق؟!
هَيْصَم: وانت ليش كل المشاعر رابطتها بالحب؟؟
اني احب لائِث لازم اتزوجه يعني؟!
فيروز: استغفر الله شنو هذا الكلام.
هَيْصَم: تركت عملي وشغلي كله وره ضهري واجيت علمودج وانت تقابليني بأسئلة تسد النفس عندج علم طلعت من صلاة الصبح حتى اگدر اوصل من وقت مظاهرات و الدنيا عالگه مع هذا عاندت الوضع وظروفي واجيت لهنا،
شنو جابني هذا سؤالج وجوابي هو الأشتياق الأيام اللي خلصتيها يمي مگدرت اعبرها وعقلي امخليني بذلك الوقت دائماً من اكل واشرب ماكو شي غيرج لَّباءَة مخيم على تفكيري حتى من اطلع مداهمه ابقى صافن بالناس وكل دقيقه اگول راح المحها وامتع عيني بشوفتها بس يرجعني صوت لائِث بكل مره للواقع اللي انتِ مموجوده بيه،
من اليوم اللي طلعتي بيه من البيت رجلي مسحگت ذيج العتبه بوفاة والدي مسويتها اللي سويته بفراقج لَّباءَة.
فيروز: هذا اعترف لو شنو؟!
شنو اسمي كلامك هذا هَيْصَم؟؟
هَيْصَم: جروح گلبي هوايه لدرجه ما أعرف اذا هذا حُب لو لا بس اللي اعرفه اريد اشوفج بكل صباح واكحل عيني بعيونج انتِ راحة گلبي بعد اسنين تعب طويله، الخير القحط أيامي يادعاء أمي بصلاة الليل ودموعها الله عوضني بيج لَّباءَة الهَيْصَم مغلطت من سميتج هذا الأسم لأن من صدگ احسج لَّبوتي.
فيروز: مجاوبت على سؤالي انت تحبني هَيْصَم؟
هَيْصَم: اذا گتلج لا راح تنجرحين واني ما اريد اجرحج بس ما اگدر اگول غيرها مو بأيدي ماممكن احب بس انتِ مسيطره على عقلي وتفكيري بالكامل شنو الحل برأيج؟؟
فيروز: بس مع هذا انت متحب يعني كلامك ما أله معنى.
هَيْصَم: هذا اللي گدرج الله عليه؟!
فيروز: شنو تريد تسمع مثلاً احبك؟؟
گلتها شنو يصير بعدين؟!!
نتزوج؟
لو نعيش علاقه حُب؟!
شنو تريد من عندي هَيْصَم ليش تضيعني وتضيع نفسك بهذا الكلام و المشاعر المخربطه؟؟!!
هَيْصَم: كلامي وياج مشاعر مخربطه؟!
فيروز: لتزعل من عندي بس هذا الواقع رسيني على بر وگول شنو تريد من عندي؟
هَيْصَم: انسي كل اللي حجيته صوجي ردت اشاركج بلي احس بيه.
فيروز: طلعت اني غلطانه؟!
هَيْصَم: خلي نغير الموضوع تعكر مزاجي.
فيروز: نزلني اريد ارجع لشغلي.
هَيْصَم: طلبتلج اجازة ميحتاج.
فيروز: معناها ارجع للبيت ماكو داعي نبقى سوه وانت تأخرت على عملك هم.
هَيْصَم: ليش ترجعيني لأسلوبي القديم وتخليني انجبر اسوي شي ما اريد اسويه؟؟
فيروز: شنو تسوي مثلاً؟!
هَيْصَم: مو صعبه اخذج هسه وأرجعج لبغداد واحبسج مثل مسويت اول مره خليني عاقل لَّباءَة لتطلعين خبالاتي من صباح الله.
فيروز: والله اني اللي راح يطلعن اخبالاتي بسببك يا اخي فهمني شنو الموضوع لتخلي عقلي يرسم اشياء من وحده.
هَيْصَم: خلي ناكل بالأول ميت جوع.
فيروز: وليش تطلع من البيت بدون أكل؟
هَيْصَم: هذا السؤال اوجه الج ايضاً ست ليش ممتريگه؟
فيروز: وشعرفك ممتريگه؟!
هَيْصَم: كم مره حجيت لتنطين سرج بسرعة بس وليفيد يدخل من اليمين يطلع من الشمال.
فيروز: واني گلت الف مره انت مختلف عن الأخرين بس ميفيد بعمرك مراح تفهمني.
هَيْصَم: ومنو گال ما افهم بس اني احب هاي الطريقه اللي تتبعيها بالأعتراف.
فيروز: اي اعتراف؟؟
لتصدگ نفسك هَيْصَم لتتوقع من عندي شي ابداً لا حُب ولا غيره.
هَيْصَم: ومنو گال متوقع من عندج حُب؟؟
فيروز: استغفر الله وتاليها وياك اليوم!!
هَيْصَم: استغفري التوبه تنفع المؤمن.
فيروز: جديات والله هَيْصَم ليش اجيت ولتگلي اشتاقيت الله عليك.
هَيْصَم: انتِ مُصره تكذبيني واني مُصر على كلمتي جابني الأشتياق لَّباءَة گلبي.
فيروز: ههه.
هَيْصَم: شنو هل ضحكه الأستهزائية؟؟
فيروز: اضحك على حضي المصخم عندك مشكله؟!
هَيْصَم: وشنو بي حضج المعاجبج ميكفي خلا الهَيْصَم يجي بنفسه علمود يشوفج لو مو بعينج اني؟؟
فيروز: كتلك سابقاً انت جبير حتى تكفيك عيني سيد افندي.
هَيْصَم: اذاً خليني بگلبج اطردي كل الموجودين وخلي بس الهَيْصَم لأن ما احب المكان اللي اكون بيه يشاركني بيه احد ثاني.
فيروز: راح تخليني اشمر نفسي من الجامه.
هَيْصَم: وصيري شهيدة الحُب.
فيروز: ثق او لا تثق اني متأكدة اكو مصيبه جبيرة منتظرتني وره جيتك المفاجأة والا ماكو اشتياق يطلع هيج فجأة بدون مقدمات.
هَيْصَم: حتى لو مصايب مو مصيبه انت بحمايتي الموت ميگدر يتقربلج واني عايش معقولة اسمح تنظرين لَّباءَة؟
فيروز: ريحني وگول شنو الموضوع؟
هَيْصَم: مو وقتها خلينه نوكلج اول مره بعدين نسولف.
فيروز: وصلنه للمطعم نزل هو اشتره ورجع تريگنه بالسياره ورجع كمل طريقه،
وين ماخذني؟
هَيْصَم: لَّباءَة شنو فلمج اليوم؟!
فيروز: فلمي انتَ يا اخي لا ارحمك ولا اخلي رحمة الله تنزل عليك شايف اشلون متوترة والف فكره براسي ليش متجاوبني حتى ارتاح؟!
هَيْصَم: كم مره گلت لتگولين اخي اني مو اخوج اذا عدتي هاي الكلمه مره ثانيه اشمرج من الجامه من صدگ وما اخليها بس تهديد.
ضرب عندي مود الأعناد بقيت اكرر هاي الكلمه.
فيروز: اخي اخويه الغالي حبيب اختك،
صار يمشي بالسياره سريع خفت نسوي حادث بقيت اصيح بيه وهو ولاكأن يسمعني آخير شي باوعلي ورفع حاجبه وگال.
هَيْصَم: تعيديها؟
من الخوف لا اموت واني بعدني صغيره حجيت بسرعة.
فيروز: لا.
هَيْصَم: منو اني لعد؟
فيروز: هَيْصَم.
هَيْصَم: تعجبيني من تصيرين عاقله.
فيروز: غير انت واحد خبل هسه تموتني بدون متحس.
هَيْصَم: شنو گلتي؟؟
فيروز: مگلت شي.
هَيْصَم: بس اني وصلتني كلمة خبل.
فيروز: اذنك بيها مشكله اني شنو دخلي؟!
هَيْصَم: راح اعديها بمزاجي هاي المره خليني اشوفج تتجاوزين وخيل الحمزة اعاقبج.
فيروز: انت ماعندك غير العقوبات؟!
هَيْصَم: لا احب اعاقبج هوايه جديدة عندي ولو تعرفين شنو هي العقوبات اللي يرسمها عقلي من اشوفج جان شمرتي نفسج هسه من الجامه.
فيروز: سيادة النقيب شو صاير انت فد مره شنو الموضوع؟
هَيْصَم: بسببج تغير الهَيْصَم.
درت وجهي للجامه وحجيت بصوت ناصي حتى ميسمع،
فيروز: كل هذا وتگول ما احبج والعباس انت واگع للنخاع بس تكابر.
هَيْصَم: سمعت لَّبوة.
فيروز: خنزير اني مو لَّبوة.
هَيْصَم: لتغلطين على نفسج ما اقبل.
فيروز: على اساس لَّباءَة شنو؟!
هَيْصَم: احد اسماء اللبوه.
فيروز: وهاي مو حيوان لو اني غلطانه؟!
هَيْصَم: هسه اني حيوان بنظرج؟!
فيروز: وين الربط؟
هَيْصَم: اسمي همات من اسماء الأسد.
دام صمت ثواني قطعه من گال.
هَيْصَم: ليش بقيتي لابسه الحجاب؟
فيروز: ليش متريدني البسه؟
هَيْصَم: بالعكس طالعه حلوه.
فيروز: هذا غزل سيد متدين.
هَيْصَم: واني احب اتغزل بيج ماعندج خبر؟
فيروز: بس اني ما احب هاي التصرفات هَيْصَم.
هَيْصَم: يكفي اني احبها حبج الها مو مهم.
فيروز: شنو تريد من عندي؟!
هَيْصَم: اريدج انتِ لَّباءَة.
فيروز: وشنو تسوي بيه؟!
هَيْصَم: بيكيسي احارب بيج.
فيروز: تره متضحك.
هَيْصَم: يول اگلها اريدج تگلي شنو تسوي بيه،
أريد اخذج للمعرض ک أجمل لوحه فنيه شافتها عيوني بشرط تبقين بغرفه خاصه والوحيد أني اللي اتمتع بهذا الجمال.
فيروز: اذا تبقى تحجي بهاي الطريقة نزلني.
هَيْصَم: ليش عصبتي صايره حساسه كُلش شنو الموضوع؟!
فيروز: موضوعي انت بعد مگلتلي لتحبيني لَّباءَة اني شخص مستحيل اشاركج الحب واللي بيناتنا ماممكن يجي يوم يكمل واذا جانت عندك مشكله تفتح صفحه جديدة ماعرف شنو اللي صار وياك وشنو راح يصير بس خليني بعيده عن كل هذا لتعذب گلبي وترجع تتركني بنهايه الطريق مسويت شي حتى استاهل هاي المعامله هَيْصَم،
وقف السيارة والتفتلي ورفع حاجبه يباوعلي بطريقة وكأن يريد يطلع اعيونه من مكانهم صرخت بيه لدرجه فز بس حاول ميبين،
لتباوعلي بهاي الطريقة وبعدين تخليني اني الغلطانه هذا كلامك وتحذيراتك انتَ لتلومني على ردة فعلي.
جاوبني برودة دم ولا كأن صار ساعه اصيح بوجهه.
هَيْصَم: مو گتلج العبي رياضه وضعفي شو سمنانه و صاير وجهج يشبه الصمون الكهربائي مال عض.
فيروز: مره دجاجه ومره صمون شنو رأيك تفتح بيه مطعم؟
هَيْصَم: لا اسويج لفه واكلج اني بعدين وين شايفه واحد يفتح مطعم بدجاجه وصمونه؟!
فيروز: بالله العظيم راح انجلط يا اخي شنو هاي برودة الدم اللي عندك ما گاعد افهم؟!
صفن بوجهي بعدين اقترب من عندي وبحركه وحده سحبني وصرت قريبه من عنده حيل لدرجه سمعت دگات گلبه السريعه والغير منتظمه تنفسه العالي وأيدة اللي لامست وجهي اجيت ادفعه بس مگدرت يحجي بهمس وانفاسه تضرب شفايفي.
هَيْصَم: منو گال اني عديم مشاعر؟
ومنو يگول انتِ ما ألج مكان بگلبي؟
انتِ مهمه لدرجه اريد اخليج يمي دائماً وما افارقج ابد واعيش وياج اجمل الأيام بس گلبي حقير متعود انو ميحب من سنين طويله ما اگدر اجبره بعد كل هذا العمر يحب من جديد.
فيروز: حبيت من قبل؟
هَيْصَم: وهذا اللي مانعني احب هسه.
فيروز: بما انو طرقنه مسدودة اذاً ماكو داعي نبقى بهذا الوضع خلي كل واحد بيناتنا يكمل طريقه بعيد عن الثاني لا اني اعذبك ولا انت هم.
هَيْصَم: وتگدرين تبتعدين عني لَّباءَة لهاي الدرجه اهون عليج؟
فيروز: لتحجي بطريقة تحسسني بيها اني غلطانه انت تعرف واني هم أنو ما اگدر اسوي شي لتخليني بمكان صعب ارجع من عنده، سويتلي معروف من نقذتني واني متأكده كل كلامك ويايه بآخر ليله حتى متخوفني مو أكثر اعرف حياتي بخطر ومتأكدة من هذا الموضوع بس هذا مينطيك الحق ابداً تستغل وضعي الصالحك،
عقد حاجبه وكأن مسمع من عندي غير هاي الكلمه.
هَيْصَم: خطر شنو صاير شي ماعرف بيه لَّباءَة؟
فيروز: ليش انت متدري؟
هَيْصَم: لتعصبيني بشنو لازم ادري؟
فيروز: من اجيت لسه اكو سيارة تمشي وراي وين ما اروح.
هَيْصَم: صدگ والله وليش اني آخر من يعلم طرطور وانا ماعرف؟!
فيروز: عبالي تدري شنو عرفني ماعندك علم.
هَيْصَم: ومن وين يجيني خبر وانت بالنجف واني بغداد اذا من كثر عملي شهرين كاملين مطلعت خارج المحافظه.
فيروز: لعد منو هذا وشنو يريد من عندي؟!
هَيْصَم: لحظة،
لائِث: سيدي طلعت الشغله امبيته.
هَيْصَم: انتظر دقيقه لائِث،
باوعلي وگال قبل مينزل من السياره.
هَيْصَم: انزلي وشوفي شنو يصير سوالف الأكشن عوفيها وياويلج المحج تخطين خطوة خارج هذا المكان،
اي كمل اسمع.
لائِث: يردون يخلون القضيه براسها برأيك ليش حتى تنفتح مره ثانيه بعد مسديتها انت؟!
هَيْصَم: يردون يوگعوني اني اعرف بس والله ميگدرون طايحين الحظ شغلتهم دائماً المكر والخداع صار ست شهر على أستشهادة وهسه يلا تذكروا واللي يموتك التحقيقات اللي مسويها وكأن يعنيلهم مو هم اول ممات محد فكر يحضر جنازته ويشارك بالتشيع و الجميع يعرف ماعنده احد بهاي المحافظه بس بنته،
استشرفوا براسي الساقطين بس والله وما يكون اسمي هَيْصَم اذا معلمتهم درس يخليهم يحسبون الف مره قبل ميحاولون يندگون بيه مره ثانيه ملگوا غيرها وحاربوني بيها بس والخلقك اذا ما اتوبهم ما اطلع ابن ابوي.
لائِث: عندك خطه؟
هَيْصَم: خليني بالأول اقنع خالتها بالموضوع والباقي الله كريم.
لائِث: وهي شلون تقنعها؟
هَيْصَم: ميحتاج تقتنع لازم تجي هذا الشي مو بكيفها.
لائِث: النساء ميمشن بهاي الطريقة عزيزي.
هَيْصَم: تدري اني گوه متحمل هذا الوضع الطايح حظه لتزيدها عليه وتخليني اطفر عليك من الموبايل.
لائِث: صاير شمبانزي ماعرفتك.
هَيْصَم: وخر مني لا ابتلي بيك لائِث.
لائِث: ليش هو اني يمك؟!
هَيْصَم: انت واحد فارغ واني عندي شغل اذا صار شي اتصل بيه.
لائِث: اكو خبر هم.
هَيْصَم: يابو فاضل ويخليك تنطق.
لائِث: اليوم المضاهرات عالگه وصار رمي حي على المتضاهرين واجه أمر حضر تجوال.
هَيْصَم: حضر تجوال لأبوي حتى ميطلع من گبره هي كلها بالشارع بلد تايهه والخالق ماكو نظام ابد ولا قانون يعني ناس طالعه اطالب بحقوقها يرجع بنعش لأمه ليش.
لائِث: تنطي أمر نطلع؟
هَيْصَم: لسه مأجه أمر اليه اذا وصلني أمر انطيكم خبر.
فيروز: شنو صاير؟
هَيْصَم: متعبتي من هذا السؤال بربج؟؟
فيروز: وضعك ميطمأن يجبرني اسأل.
هَيْصَم: ليش شنو شايفه بيه حتى ميطمأن وضعي اصرخ بنص الشارع لو نازع ملابسي وامشي بين الناس؟!
فيروز: ليش تروح لهذا الجواب دائماً؟؟
هَيْصَم: لأن اسألتج غريبه ومو منطقيه.
فيروز: هسه شنو حجيت حتى تجاوبني بهاي الطريقة؟؟
هَيْصَم: انت شايفه الوضع اللي احنه بيه مع هذا تسألين برأيج شلون لازم اجاوبج؟؟
فيروز: هَيْصَم جاوبني شنو الموضوع ريح گلبي لخاطر الأيام اللي عشناها سوه.
هَيْصَم: اهنا لامستي قلبي حلفتيني بأغلى ذكريات عندي لَّباءَة وعليه مراح اجاوبج.
فيروز: تضحك عليه؟؟
هَيْصَم: لتستعجلين من نوصل للبيت راح اشرح الموضوع بالتفصيل كدام خالتج.
فيروز: لهاي الدرجه خطر الوضع؟؟
هَيْصَم: ايجوز اخطب ليش عقلج دائماً يروح للمشاكل!!
فيروز: عندك اهل اكيد مراح تخطبني انتَ، هاي مو عاداتنه بعدين اني من اليوم اللي شفتك بيه مشفت غير المشاكل برأيك ليش عقلي يروح بعيد.
هَيْصَم: اذا خطبتج تقبلين؟؟
فيروز: شنو هذا السؤال هَيْصَم صاير لعقلك شي لو حلمان بيه البارحه؟!
هَيْصَم: صرت احلم بيج حتى بالواقع اتخيلج بكل مكان لَّباءَة انطيني حل قبل ما اتخبل.
فيروز: تستاهل قابل بس اني.
هَيْصَم: وتگولين ما احبك ومثگله بوجهي من الصبح لسه وطلعت ممفارق مخيلتج والله انتن البنات فد عدكم سوالف.
فيروز: يالله اني بس اريد افهم ليش افقد التحكم بالساني من اشوفه وابقى احجي كل شي يخطر على بالي؟!
هَيْصَم: لتهمسين وي نفسج اللي يشوفج يحس انت مجنونه.
فيروز: ليش انت خليت عندي عقل؟؟
هَيْصَم: كل هذا مسوي اني؟!
فيروز: شنو رأيك نسد كل المواضيع راسي ديأذيني.
هَيْصَم: اخذج للدكتور لَّباءَة تحسين بشي؟؟
فيروز: لا بس تعبت البارحه منمت من وقت لهذا السبب مبيه شي.
هَيْصَم: كم مره نبهتج لتسهرين؟
فيروز: الشغله غصب يعني قابل اني اريد اسهر مثلاً؟
هَيْصَم: تفكرين بيه حقج.
مجاوبته يحاول يستفزني بأي طريقه لذلك سكتت وخليت راسي على الجامه صدگ تعبانه وراسي حيل يأذيني صار ايام ما انام عدل بسببه مثل ميگول بس لو يموت نفسه مستحيل اعترف بمشاعري.
ضَرْضَم: اي بشر شنو صار؟
هَمْهَام: لسه مرجعوا خبر.
هَمَّاس: ولد الناس لعبه بأيدهم شو ميستحون شنو الفلم؟!
هَمْهَام: شنو رأيكم نسوي مداهمه على البيت وناخذها غصب؟
ضَرْضَم: افكار الهنود عيفها على صفحه الله يخليك،
وانت بشنو صافن ولا كأن گاعد يمنه؟
هَمَّاس: لاااائِث.
لائِث: احترگت صفحة لائِث شتريد؟؟
هَمَّاس: وي منو مندمج بالموبايل؟؟
لائِث: احجي وي امي اكو مشكله؟!
ضَرْضَم: ومن شوكت تحجي وي امك مراسله لو هاي مو أمك؟؟
لائِث: قررت اراسلها اريد اعيش اللحظة شتريد من عندي؟!
هَمَّاس: والعباس امبين زعلت عليه لو مجاوبته مو هيج گول حتى ننطيك طرق ثانيه للزحف.
لائِث: احسن اطلع من يمكم اذا ابقى مگابل هاي الوجوه تصير عندي حموضه بالمعدة.
هَمَّاس: اشرب خل وتروح.
لائِث: دكتور ما شاء الله.
هَمَّاس: قابل مثلك مخلص وقتي احجي وي بنات العالم اذا تحبها اخطبها واحنه بضهرك لتضحك على النسوان بعدين تطلع بعرضك خويي.
لائِث: تفيض شرف سبحان الله.
هَمْهَام: كافي يولد لازم نطلع أجه أمر مداهمه على احد البيوت يگولون عدهم اسلحه واحد مشتكي.
لائِث: هَيْصَم عنده علم؟
ضَرْضَم: اتصلت بيه وخبرته.
لائِث: اي عفيه حتى متوگع براسي ک العادة.
ضَرْضَم: هو يحبك شنسوي احنه.
لائِث: اي صيروا مثلي وخلي يحبكم.
هَمَّاس: ليش حبيبي شنو المميز بيك حتى نقلده؟!
لائِث: يكفي عندي كاريزما وشخصيه شگاگيه وحس فكاهي و البنات يركضن ورايه منو بيهن عندك؟!
هَمَّاس: اني انسان شريف ما ادور بنات.
لائِث: تفيض دين اشهد.
هَمْهَام: تصحيح انت تركض وراهن مو العكس.
لائِث: والعباس وحده راسلتني قبل اسبوع گلتلي شفت صورتك ونعجبت بيها گلتلها اختي اني رجال ما ادور هاي السوالف على ساعه رجلي والگبر اتگلي ما اريد شي بس اسمع صوتك وهاي هي.
هَمَّاس: وشنو جاوبتها؟
لائِث: دزيتلها محاضرة الصافي ولجن عيببب.
هَمْهَام: اطلعون لو شلون؟
لائِث: انتم ليش كلكم عدكم حالات ولادة دائماً مستعجلين؟!
ضَرْضَم: غير انت بشهرك حبيبي ومن خوفنه عليك لازم نستعجل.
لائِث: ومنو گلك اجيب طبيعي ايجوز قيصريه لأن الدكتورة گالت معسر.
هَمَّاس: طيح الله حظك على هيج سالفه.
لائِث: بس ولكم محتار شنو اسميه؟
هَمْهَام: من يصير نفكر بأسم ليش مستعجل بعدين مو لازم تسأل زوجك يحلو؟
لائِث: خلي يولي ايعع هو منو واخذ رأيه اني احبل واجيب وهو يجي يسمي بكيفه وين صايره.
ظافر: كلهم بالسيارات ليش انتم اهنا؟؟
ضَرْضَم: مو صاحبنه معسر.
ظافر: شنو هاي؟
هَمَّاس: الولد شريف لتخلون عقله يخرب من لائِث.
لائِث: انجب ساقط گدامك.
هَمَّاس: تفيض شرف انتَ.
هَمْهَام: يلا امشوا خلصوني.
حوري: شنو هذا الكلام محمد؟!
محمد: هاي شبيج ليش عصبتي هيج اهلج مراح يقبلون الا بهاي الطريقة صدگيني.
حوري: مستحيل ما ممكن اسويها كل شي الا هاي والله يموتوني اذا عرفوا.
محمد: محد يگدر ياخذج غيري اذا وافقتي حوري افهمي اخوانج حادين اسنانهم عليه حتى هَيْصَم طلبت من عنده يحجي وي أرفد ومع هذا مقبل حجيت وي والدج والرفض سيد الموقف شنو اگدر اسوي بعد اكثر من هيج؟!
حوري: ننتظر وين المشكله بس حلك مو منطقي ابداً.
محمد: الواضح انت متحبيني و لهذا السبب رافضه الفكره لتعلقيني بيج أكثر حوري گولي الصراحه ترديني لو لا؟
حوري: طبعاً اريدك شنو هذا السؤال؟؟
محمد: اذاً ليش متوافقين؟!
حوري: صعب محمد ليش متفهم موقفي؟؟
محمد: مو اصعب من اللي راح يصير اذا مقبلتي بعرضي.
حوري: جرب اخطب من جديد بعد زواجه من ريفان ممكن يغير رأيه.
محمد: هاي آخر مره بعدها كل واحد بطريق ذليت نفسي لأهلج وانت مُصره تبقين وياهم ضدي خلي يفيدوج وانسي محمد منو.
حوري: ليش تحجي هيج هسه شنو تريد و مسويت علمودك؟!
محمد: و برأيج اني شنو اريد غير ننجمع سوه و بالحلال بس اهلج قاطعين رزقي كلهم مستعمتعين بس اني رافضين سعادتي اخوانج يكرهوني ومستحيل يقبلون بيه برضاتهم حوريه.
حوري: وشنو لازم اسوي والله تعبت.
محمد: فكري بلي گلته ومعليج بالباقي.
وصلنه للبيت وقف السياره ردت انزل وقفني من گال.
هَيْصَم: تجين ويايه لبغداد.
فيروز: ليش؟
هَيْصَم: بعدين افهمج.
فيروز: مستحيل خالتي مراح تقبل.
هَيْصَم: اني اقنعها مو مشكله.
فيروز: هَيْصَم والله بديت اخاف گول شنو الموضوع؟
هَيْصَم: تثقين بيه لَّباءَة؟
فيروز: ليش تحجي هيج شنو صاير خوفتني.
هَيْصَم: تخافين واني موجود؟!
الهوه ميطخج بدون أذني مستحيل اسمح يصير بيج شي انتِ الأمان لگلب الهَيْصَم معقوله اتركج بدون حمايه؟!
فيروز: ميصير شي مو زين مو؟
هَيْصَم: وعد من عندي ميصير شي بس خليج واثقه ومطمأنه والباقي عليه انطيني ثقتج لَّباءَة.
فيروز: عندي الثقه الكامله بيك هَيْصَم حتى لو ما اريد اثق عقلي يجبرني أأمن بيك مثل اول مره.
هَيْصَم: أمنتي بيه وحاولتي تهربين اكثر من مره لو ممأمنه شنو سويتي؟!
فيروز: اي صح حاولت اهرب بس مع هذا جنت واثقه بيك.
هَيْصَم: ابقي على هاي الثقه وان شاء الله اكون گدها،
انزلي هسه وبعدين اني اجي احجي وي خالتج بالموضوع.
فيروز: ليش متنزل ويايه؟
هَيْصَم: لأن راح تنزرع فكره بعقل خالتج ومتقبل تخليج تجين وياي.
فيروز: وضحت الفكره انتبه على نفسك ودز رساله قبل متجي.
هَيْصَم: ميحتاج ساعه واكون يمكم الموضوع ميتحمل تأخير.
فيروز: راح احاول ابقى هادئه واسيطر على عقلي اللي راح يطلع من مكانه بسبب التفكير.
هَيْصَم: لتعبين نفسج ان شاء الله كل شي ينحل وتصير ذكريات نسولف بيها.
فيروز: من وين تجيب برودة الأعصاب؟!
هَيْصَم: من تعيشين بنص الموت راح تتأكدين ماكو شي بالدنيا يستحق الأهتمام الزايد، كل شي اله نهايه ايمانج بهاي القاعدة يسهل هوايه أمور صعبه.
فيروز: ليش متصير دكتور نفسي؟
هَيْصَم: انطيج دروس بدون ما ادرس طب نفسي اعجبج اني.
فيروز: تعجبني بكل حالاتك هَيْصَم.
هَيْصَم: غزل هذا لَّباءَة؟
فيروز: لا مجرد شي خطر على بالي وخرج سهواً.
اجيت انزل وقفتني جملته.
هَيْصَم: انتبهي على روحي.
التفتت اله صارت عيني بعينه حجيت بسرعة،
فيروز: شنو گلت؟
انتبه على نفسه وغير كلماته.
هَيْصَم: انتبهي على روحج.
ابتسم بوجهي بادلته ونزلت گلبي يخفق بعنف مو حب وانما خوف حاسه شي سيء راح يصير اكو مصيبه منتظرتني من مات والدي لحد الأن مرتاحيت من المشاكل مره خطف ومره تهديد وبعدين والدي اللي طلع بالجيش أو مقتله بصورة غريبه وخالتي اللي ماعرف من عدها شي وهسه هَيْصَم وجيته المفاجأة ومطلبه الغريب،
دخلت للبيت رحت للغرفه بسرعة غيرت ملابسي اجيت اطلع فتحت الباب صارت بوجهي خالتي عاقده حاجبها وتباوعلي بنظرة شك.
إيفاء: صاير شي بنتي؟
ابتسمت بوجهه حتى اطمأنها وگلت.
فيروز: لا شنو ممكن يصير مثلاً؟!
إيفاء: ماعرف بس مو من عوايدج تدخلين للغرفه بدون متسلمين عليه خفت صاير وياج شي.
فيروز: اسفه بس والله من التعب منتبهت.
إيفاء: اني گلتلج اتركي هذا الشغل نگدر نأمن نفسنه بالراتب بس انت راسج والف سيف.
فيروز: مو من الشغل بس راسي يأذيني البارحه منمت من وقت.
إيفاء: مو أگلج اتركي الموبايل متسمعين من عندي يا أمي السهر مضر ويخلي سواد جوه اعيونج الحلوه.
فيروز: راح انام اشويه هسه و تدللين مره ثانيه اسمع كلامج،
طلعت واني خليت راسي على المخده بسرعة غفيت من التعب فزيت بعد فتره واني اسمع صوته معناها اجه نهضت من مكاني وطلعت رحت قريب من الأستقبال سمعت كلامه اللي خلاني انصدم وافقد توازني وگعت على الأرض ودموعي بدت تنزل وحده تبعتها الثانيه معقوله هيج يصير بيه بالنهايه؟؟
يتبع.
شاركونه القصه شمعاتي وسوولي واهس بتفاعلكم الحلو.
حسابي الأنستا.
تابعنا وما يفوتك جديد
اختر المنصة اللي تناسبك وتوصلك الفصول أول بأول.
التعليقات (0)
جاري تحميل التعليقات...
لا توجد تعليقات بعد
كن أول من يشارك برأيه!