للتواصل انستا zahraaahmedn99
علقوا بين الفقرات+ صوتوا للبارت+ تابعوا حسابي عيناي انتوا.
شاركوا القصه مع اصدقائكم حتى نستمتع وي الهَيْصَم مع بعض.
هَيْصَم
(الكاتبة زهراء احمد)
_______
الميت بالحلم تفسيرة عمره طويل
الميت عليك اشلون تفسيرة؟
هَيْصَم: هو اني اعرف من وراكم راح ايطيح حظي اذا منجلطت.
لائِث: هسه نگلك حشاك اسم الله عليك مفتهمنه؟!
هَيْصَم: وخر عني لا ابتلي بيك والخالق.
طلعت من الغرفه ورحت للمكتب مالته حتى نكتشف ملابسات القضيه.
ضَيْثَم: شنو هذا هَيْصَم كم مره حذرت انك تنتبه ولتخلي العيون عليك حتى مينقلوك من المنصب وينزلون رتبتك؟؟
هَيْصَم: البارحه جان عندي عمل خارج المحافظه مگدرت اسيطر على الوضع اعتذر سيادتك.
ضَيْثَم: اعتذارك مراح يسوي شي خلوا عيونهم عليك معتقلين نسيب واحد بالدوله بدون أمر قضائي شلون تحلها هسه؟
هَيْصَم: على اساس المعتقل نبي، سيادتك اعذرني على هاي الكلمه لكن هو واحد سرسري كم مره لگينا ببيوت مشبوها.
ضَيْثَم: عندك أمر؟
هَيْصَم: مو اني اللي انطيت أمر القاء القبض عليه اصلا البارحه مجنت موجود سيدي.
ضَيْثَم: منو تتهم؟
هَيْصَم: استغفر الله جميعهم فريقي وأخوتي معقوله أدمر تعبهم على خطأ واحد؟!
ضَيْثَم: مصيبه مو خطأ هَيْصَم اكو فرق بين الثنين ابني.
هَيْصَم: شنو تقترح سيادتك؟
ضَيْثَم: قدم اعتذار واغلق القضيه بدون دليل متگدر تسوي شي هدفك اهم اترك كل الأمور الثانيه على جنب وركزلي بعمليتك سمعت خبر اكو شحنه تريد تعبر الحدود يوم الجمعه لازم نلقي القبض عليهم واضح كلامي هَيْصَم؟
هَيْصَم: تأمر سيدي.
مهتدي: ها اشوفك اهنا سيادة النقيب المحترم؟!
هَيْصَم: والله زين تعرف شنو محترم!!
مهتدي: اجيت علمود تعتذر گولها وخلصني عندي شغل مهم لازم اخلصه.
هَيْصَم: سندس تنتظرك حقك مستعجل.
مهتدي: احترم نفسك لتتجاوز وي اسيادك.
هَيْصَم: كُلي البنيه العندك علاقه بيها اخ زوجتك يعرف هي تشتغل ابيت للرذيله؟؟
لو انتم عائلة الشرف مبيوع عدكم؟
مهتدي: فاض صبري منك.
هَيْصَم: واني لعبت نفسي وراح اتقيء اتعجب من النساء شلون ينعجبن بهيج نماذج قذرة؟!
مهتدي: اذا منزحت من منصبك ما اكون مهتدي.
ضَيْثَم: خلص احترموا على الأقل وجودي وانت مهتدي اللي تحجي وياه وتهدده نقيب بالجيش عنده اوسمه شرف تسوه حياتك بالكامل لتنسى اني توسطتلك يمه حتى تطلع من السجن فلتتجاوز حلوها وديه وخلي تنتهي المشكله اهنا.
مهتدي: ما اعتقد اكو عقوبه على اللي يزوج بالسر حتى تعتقلوني بدون ذنب وعليه اريد اعتذار من السيد هَيْصَم.
هَيْصَم: شفتني كلبچتك لو منزعك بالشارع ومضحك عليك الجهال؟
الهَيْصَم ميعتذر بدون سبب حلم ميتحقق صدگني.
ضَيْثَم: هَيْصَم ابني شنو حجينه.
هَيْصَم: كلامك على راسي بس ما اعتذر من واحد طايح الحظ مثله بدون سبب.
ضَيْثَم: والحل نبقى هيج؟!
هَيْصَم: لا ليش نصنع سبب ايخليني اعتذر بس ماعرف اذا جان ايناسب حضرته،
دام صمت ثواني ورج صوت الكف المكان الهَيْصَم ضربه، ابتسمت بأنتصار.
هَيْصَم: اعتذر مأذيتك هوايه وهسه اتفضل وقع على اوراق خروجك وكول للي وراك لو اموت مستحيل اعتذر على شي ممسويه واخذ حذرك اذا خليت عقلي وياك اخليك تمشي وتباوع وره.
مهتدي: والله الا ادفعك ثمنها غالي وگول مهتدي گال.
ضَيْثَم: عمله هاي هَيْصَم؟!
على الأقل احترم وجود القائد مالتك.
هَيْصَم: سيادتك اشرفت على تدريبي وجنت وياي من اول يوم صرت بيه بالسلك وعلمتني ما اعتذر وانزل راسي لأحد وبهاي السهوله اتريد اترك تعليماتك متربيت على معصيه مديري سيدي.
ضَيْثَم: افتخر بيك انت اول شخص اعلمه واكون وياه على مدار هاي السنين والطالب الوحيد اللي منسى انتقامه وحربه، وياك اني ولتخاف ميگدر يسوي شي راح احلها.
هَيْصَم: يعني تتوقع من عندي اعتذر من عنده واني ابن والدي؟!
ضَيْثَم: اتوقعت راح تكسر راسه اني اعرف بغضبك بس فاجأتني من سيطرت عليه و اكتفيت بكف واحد بس.
هَيْصَم: لأن عندي عمل مهم لازم اكمله استأذن من عندك سيدي.
ضَيْثَم: تفضل ابني بأنتظار اخبار حلوه.
هَيْصَم: احترامي سيدي.
طلعت من الغرفه صار بوجهي مبتسم وهو يگول.
لائِث: بشر حمامه غراب.
هَيْصَم: چلب راح اهده عليك واخلي يعضك ويعلمك مسوي شي بدون علمي.
لائِث: لدخلني النائب مالتك هو اللي انطه أمر.
هَيْصَم: مو هي سايبه كل واحد يمشي بكيفه بدون مترجعولي.
لائِث: لا والله عندي سنتافي مو سايبه.
هَيْصَم: لائِث.
لائِث: حبيب گلبه.
هَيْصَم: وخر مني.
لائِث: واتركك وحدك مستحيل رجلي على رجلك.
هَيْصَم: شنو صار؟
لائِث: اليوم يتفقون على موعد التسليم.
هَيْصَم: الجمعه راح يكون.
لائِث: عندك خطه؟
هَيْصَم: اكيد حضر الفريق لأجتماع طارئ،
ضَرْضَم انت راح تبقى على المراقبه اما هَمْهَام راح يقود السياره و هَمَّاس راح ينطلق بالدوريه ويلتحق بيكم بعد خمس دقايق من توقيفهم ولائِث راح يكون مسؤول عن تعرض الطريق مالتهم واني موجود وياكم اكيد.
ضَرْضَم: أمرك سيدي راح اكمل كل التعليمات المطلوبه.
هَيْصَم: اعتمادي عليكم وانتكالي على رب العالمين ان شاء الله يكون النصر حليفنه ونگدر نلقي القبض عليهم.
لائِث: نسيت شغله مهمه سيادتك.
هَيْصَم: ولي هي؟
لائِث: المحامي البربري سيادتك شلون نخلص من عنده؟
هَيْصَم: والله منطي اهميه جبيره لواحد مثل هذا، على بالك كل اللي صار غير مدروس بالعكس هو اصلا ساعدنه بدون ميدري، الأنسان الذكي يتغلب على مشاكله بسهوله اما العبقري ميدخل بالمشاكل اصلاً، والغبي هذا دائماً يعيد نفس الخطأ وميتوب وجماعتهم على نفس الشاكله على رغم تم اطلاق سراحهم بس رجعوا لنفس الطريق وسهلوا العمليه علينه وهسه بمكان منعتقل واحد اثنين مشكوك بأمرهم نعتقلهم جميعاً بالجرم المشهود.
فيروز: گعدت من النوم كلي نشاط كل عقلي من اطلع هسه الگي موجود يحضر بالريوگ بالمطبخ هو صح مو دائماً يسويها بس من يكون موجود بالبيت يحضره اذا اني نايمه معروف عليه ما اگعد من وكت ابداً،
استوعبت اني وين هسه صابتني نوبه كآبه كرهت حتى نفسي بيها ،شنو ورطني وحبيت جنت مرتاحه بدون هذا الهم، طلعت من الغرفه كملت الروتين المعتاد ورحت للمطبخ لگيت خالتي تحضر بالريوگ ابتسمت وبسرعه خطرت على بالي امي الله يرحمها لو هي عايشه هسه واعيش وياها نفس الموقف مجان هذا حالي على رغم هي من ريحتها بس خلي نكون واقعين لسه ما اگدر اثق بيها يعني مره البارحه عرفتها ما اگدر اشاركها حتى اسراري واموري الخاصه، بس مع هذا رحت حضنتها بما انو عندي خاله ومن ريحه المرحومه وين المشكله اتقبلها واعيش وياها بسعادة.
إيفاء: حبيبتي صباح الخير.
فيروز: صباح النور شنو حتسوين؟
إيفاء: مخلمه اتحبيها مو؟
فيروز: اكو عراقي ميحبها؟!
خليني اساعدج بالتقطيع.
إيفاء: ميحتاج راح اكمل بس شوفي الجاي اني مهدرته اشويه واكمل ونگعد نتريگ.
فيروز: تمام ، كملت كل شي وگعدنه ناكل واني منطلقه وياها بالحديث،
سولفيلي على حياتج قبل وعن اجدادي وامي هم اريد اتعرف عليهم بابا الله يرحمه مجان يحجيلي شي عنهم.
إيفاء: عندي اخوان اثنين وامج أسارير الله يرحمها عائلتنه تجنن امج اصغر من عندي بسنتين قبل مو مثل هسه ماكو تلفزيون وموبايل قبل النوم من وقت والگعدة هم ماكو نفاق وغدر وماسمعنه واحد قتل امه او طردها بالشارع هسه صارت هاي السالفه عادي يوميه تصير ،ناس عايشه على الفطره كبرت والبنيه اذا كبرت بزمن قبل لازم تزوج بس يصير عمرها 13 يعني من تبلغ، حجزوني لأبن عمي ومطولت تزوجته واحد طايح حظ حشاج مدمن كحول ويلعب اقمار ومخلصها دين من افلان وعلان ماخله على حالي حال صبرت وتحملت الطلاق عيب وميصير البنيه ترجع لهلها اذا تزوجت عقول قبل ومازالت موجوده عند بعض العوائل عقولهم معفنه، والكمل الوضع التعبان مالتي ميصير عندي اطفال الله مارزقني ابد عالجت ودعيت وربج ماكتب ويوم اني گاعدة اطبخ غدة صارت دگه على البيت ايطلبون زوجي عشتوا طلع المرحوم الله لا يرحمه داگ الناقصه وي ابنيه هي قاتليها اهلها ويردون ياخذوه صارت مشاكل وروح وتعال تالي قررت العشيرة يطردوه ولأن اني مرته رحت وياه أجر بيت بأطراف كربلاء وعشت اهنا مدينه حلوه وهادئه وماكو واحد يدخل بحياة الثاني گدرت اعيش بس انقطعت اخبار اهلي عني وهو الله لايرحمه بقى على سوالفه المكسرة جنت اروح لأهلي بالمناسبات لأن طردوه صار يكرهم كلهم عائلتي وعائلته مجان يخليني اروح دائماً واصلاً مشبعهم ادعيه وگدامي هذا الحجي هم ساكنين العماره،
اما امج الله يرحمها جانت أخت وصديقه ابوج انعجب بيها ماعرف شنو يشتغل اهناك وشايفها بوقتها هي تدرس ثالث متوسط عدها حظ اشويه لأن بعد اللي صار وياي قرروا ميزوجونها گرايب صار عرسها وراحت لبغداد وبعد من ذلك الوقت ماگدرت اشوفها هوايه زوجها هم ميقبل تجي ومصيبتي ميقبل اروحلها بعد سنتين صارت حامل واجهضت گالوا رحمها ميتحمل واذا حملت بسرعه مره ثانيه خطر عليها وعلى الجنين هم مهتموا للموضوع لو ربج هيج كاتب بعد شهرين صارت حامل نبهتها الدكتورة وگالتلها تموتين رحمج ميتحمل حمل أو ولادة زوجها الله يشهد مقبل ونصحها وزعل عليها بس راسها والف سيف ومقبلت صارت الولادة ومقبلوا الا عمليه ماتت امج الله يرحمها بسبب النزف انفجر الرحم ومانقذوها.
فيروز: هي تبجي واني همات علمودي خسرت حياتها هسه لو مختاره نفسها ومتخليه عني وبقت عايشه ليش الأمهات رحيمات لهاي الدرجه؟؟
إيفاء: واخواني الله يسلمهم كل واحد شاف حياته محد يسأل ولا يزورني خاصتاً بعد وفاة امي وابوي بقيت وحدي بس ابوج اللي بقى يذكرني يگلي انتِ بقيتي من ريحتها والله يشهد اعتبرني اخته واني هم اخوي اللي مجابته امي بعض الأحيان الغرب أحن علينه من اخوة الدم.
فيروز: حضنتني ونسدت الشهيه وصار صباح عزاء علينه خلصناها بين الذكريات و الدموع اخير شي نهضنه وغسلنه المواعين ونظفنه البيت وگعدنه نسولف ونضحك حسيت نفسي عندي انفصام على التغير اللي صار فجأة من ادموع للضحك.
هَمْهَام: سيدي مشغول؟
هَيْصَم: شنو تريد هَمْهَام؟
هَمْهَام: اخطب.
هَيْصَم: الف مبروك مقدماً بس مفهمت بشنو اگدر اساعدك؟
هَمْهَام: تخطبلي، اريدك تروح وياي سيادتك انت والفريق.
هَيْصَم: متأكد من قرارك؟
هَمْهَام: اعرف انو لائِث خبرك بس اكو شي هم ميعرفوه.
هَيْصَم: عندك علاقه بيها.
هَمْهَام: شلون عرفت؟!
هَيْصَم: متخاطر وتخوض هيج تجربه بدون متكون واثق من مشاعرها اعرفك من سنين وحافظ طباعك كلها.
هَمْهَام: بس اكو مشكله وحده.
هَيْصَم: اللي يحب يضحي وماكو مشكله توگف بطريقة.
هَمْهَام: ما اريد اخليكم بموقف محرج.
هَيْصَم: بعيداً عن الرتب انتم كلكم اصدقائي وأخوتي والأيد اللي متنمد الكم تنمد المنو؟
وهذا رأي الجميع مو فقط اني.
هَمْهَام: عادي اعترفلك؟
هَيْصَم: خلي حبك لزوجتك المستقبليه.
طلع من يمه وصاح بصوت عالي.
لااائِث.
لائِث: استلم شيخلصك اليوم؟
ضَرْضَم: اكلتها وداعتك.
هَمَّاس: بدون گشور هم.
لائِث: انتم اصدقاء لو حقراء؟!
ضَرْضَم: حبيت على نفس الوزن.
لائِث: ظريف.
هَمْهَام: البلبل الفتان متسمع صوته وهو يناديك؟
لائِث: اسمع بس انت ماتعرف شنو يصير وره هذا النداء.
ضَرْضَم: بلاء عظيم.
هَمَّاس: لتعب نفسك العقوبه بأنتظارك.
هَيْصَم: لاااائِث.
ضَرْضَم: ثالث مره تنزل بيك عقوبه والعباس امشي وانقذ نفسك.
لائِث: اقرولي الفاتحه وسولي ثواب يوم الخميس وها اريد سمج غيره اسبكم وارجعه وقبل ما انسى وياه تمن احمر وطرشي.
هَمَّاس: ميت رايح لمطعم؟!
لائِث: وياها بطل لبن اويلي.
هَمْهَام: تمشي لو شلون؟!
لائِث: تعالوا وياي اخوكم انا تره.
ضَرْضَم: وصاك موصانه اذاً تحمل العواقب عزيزي.
لائِث: طلبتي سيادتك.
هَيْصَم: شتاقيت مو بيدي.
لائِث: تشتاقلك الجنه سيدي.
هَيْصَم: اويلي على الأحترام اللي نزل فجأة ماعرفتك.
لائِث: عفاا صديقك انا وماعرفتني هذا وانت رفيج الدرب، الله الك يا لائِث اتبره من عندك بسهوله.
هَيْصَم: انجب من رخصتك.
لائِث: تستأذن قبل متغلط والله انت محترم سيادتك.
هَيْصَم: غصباً عليك.
لائِث: انت صايحني علمود ترزلني تگدر تكتبهم برساله الله على ناس تحب تضيع وقت واني مشغول، انتبهت موبايله الثاني مموجود ،
سيدي موبايلك الثاني وين لعد؟!
هَيْصَم: ضاع.
لائِث: مو اثول لهاي الدرجه.
هَيْصَم: مسمعت؟
لائِث: گلت معقوله يضيع من عندك الموبايل بهاي السهوله وهذا صارله سنتين ومتقبل تغيره تگول احبه ومن هاي السوالف تالي تضيعه؟!
هَيْصَم: وهسه شنو المطلوب؟
لائِث: الحقيقه وين موبايلك؟
هَيْصَم: الك علاقه؟!
لائِث: صديقك اني لو نسيت؟!
هَيْصَم: خارج هذا المكان تگدر تسأل مثل متريد اما داخل المركز تعاملني مديرك واضح؟
لائِث: گول انطيته الها ليش تلف ودور؟
هَيْصَم: كسرته ورميته بالزباله عندك مانع؟!
لائِث: خلصنه قبل اشويه لو جاي من وقت انطيتك.
هَيْصَم: اترك سخافتك وحجيلي شنو صار بموضوع بديعه وكهيل؟
لائِث: ماكو وحده بهيج أسم سيادتك.
هَيْصَم: يعني تكذب؟
لائِث: لخاطر ربك قابل هي نبي كلها على بعضها بائعة هوى.
هَيْصَم: عرفتها متعامله وياهم و لهذا اخذت احتياطاتي وخليت تعقب بموبايلها.
لائِث: ذكرتني من جنه ندخل على حسابات المبتزين قبل والله أيام.
هَيْصَم: اترك حنينك للماضي وتعال ندرس هاي الخطه اريدهم يقتنعون بيها لدرجه يسلمونه الأمانه وهم مغمضين.
لائِث: منو راح يساعدنه بمعرفه خطتهم؟
هَيْصَم: هو نفسه لعد منو.
لائِث: برأيك ليش يسوي هيج شنو فائدته؟!
هَيْصَم: لحد الأن منطانه معلومه خطأ لتنسى هو نفسه اللي خبرنه بمكان لَّباءَة من جانت مخطوفه بالأضافة هو اللي خبرنه بخطة التسليم بما انو مفيد النه مو مهم منو يكون بالوقت الحالي المهم هو نلقي القبض على المتهمين جميعاً.
حوري: خلصت الأيام بسرعه واستلمت النتيجه بمعدل 96 يأهلني ادخل كليه طب اسنان بس اني ما احبها أريد اقدم غير اختصاص، بيت خالتي سوولي حفله فرحت بيها من صدگ بعدها بفتره قصيرة رجعت للبيت وبدت معاناتنه وي أرفد اللي ميقبل يحجي وي أحد وميرجع للبيت اصلاً الا بأوقات قليله حيل لدرجه مصرت أشوفه هوايه بسبب ريفان وعمليتها اللي جانت ومازالت محتله المرتبه الأولى بحياته هي الشخص الوحيد الميقبل على زعله ويكون مبتسم بنص حزنه اذا كانت موجوده، كل حياتي جنت احلم بهيج انسان يحبني ويحتويني ويخاف عليه ويحسب لمشاعري ألف حساب يمكن لهذا السبب قبلت بعلاقتي وي محمد اللي عشت وياه اجمل أيام حرفياً،
اتعلقت بيه خلال فتره قصيرة والسبب هو اسلوبه اللطيف مسمعني كلمه مو زينه ومطلب شي من عندي مثل شباب هاي الأيام يحترمني ويقدر مشاعري والأهم من هذا يحبني بجنون أو وعدني يتزوجني بس يوافقون أهلي لكن أرفد معند ميقبل ونسر على نفس الشاكله وماعرف سبب رفضهم شنو على رغم اني اعرف انو هم واحد يكره الثاني مع ذلك ميحقلهم ابداً يوگفون بطريق سعادتي واحلامي، كل واحد بيهم عاش حياته مثل ميريد اما اني حاكميني بكيفهم أو اصلاً محد ياخذ رأيي موافقه او لا واني اعرف عدل هو توسط يم هَيْصَم حتى يخطبني بس أرفد رفض وهمات حجه وي والدي وجان الرفض سيد الموقف احسهم ميردولي الخير ممعقوله كلها متفقه عليه مو خوش انسان عداوتهم وياه اني شنو دخلني؟!
صحاني من صفنتي صوت ماما.
ناهده: شنو تسوين وحدج بالغرفه تعالي انزلي يمي نحضر عشا اخوج على جيه.
حوري: نزلت وخلص اليوم ک العادة وبدت التحضيرات لعمليه ريفان وبهذا الوقت صارت اشياء غيرت حياتي بالكامل.
لائِث: شنو تلبس؟
هَيْصَم: البسك.
لائِث: مو قياسك انا لعلمك تره.
هَيْصَم: اسألتك غبيه واني مالي خلگ.
لائِث: حنيت مو عليك العباس؟
هَيْصَم: شلون راح تجيك عقوبه اتوبك بيها من هاي السالفه.
لائِث: على اساس اني ماشايفك حتى من نطلع مهمات تخلصها صافن لو من تگعد وحدك يبوو تنسى نفسك كلياً، لمعه عيونك من تذكرها تجاوب على اسئلة عقلك عزيزي اذا تحبها لتخسرها بلكي الخطوبه القادمه الكم.
هَيْصَم: ومنو گال اسوي خطوبه اعقد عليها واصدمكم بالخبر.
لائِث: والله تسويها خبيث اعرفك.
هَيْصَم: لتعيش الدور زايد وامشي الولد منتظرينه.
طلعنه ورحنه للمكان المتفق عليه اليوم خطوبه هَمْهَام السيارات سدن الشارع والده واخوته واصدقاءة همات تقريباً عشر سيارات هيج شي، دخلنه وستقبلونه بأحترام وكما هو متعارف بالقانون العشائري لازم يحجون الكبار بهذا الموضوع لذلك حجه والد هَمْهَام.
عَابِس: الله بالخير عليكم، الرسول صل الله عليه وآله يگول (من اتاكم ترضون دينه وخلقه فزوجوه) واليوم من هذا الباب احنه اجينه نطلب أيد كريمتكم لأبني هَمْهَام للزواج على سنة الله ورسوله واللي تردوه احنه تحت امركم المهم نجمع راسين بالحلال.
حيدر: جيتكم وانتم على عيني وراسي بس البنيه محجوزة لأبن عمها والا وين الگي ناس سمعتهم زينه وينحلف بيهم مثلكم؟!
عَابِس: اذا هيج الحجي بعد ماكو شي نظيفه الله يسعدهم ويفوقهم ويرزق ابنه بنت الحلال.
نطعن وجهه أحمر واعيونه صاروا حمر حيل كسر خاطري اتقربت من الهَيْصَم وهمست بأذنه،
لائِث: احجي جايبيك مزهريه.
هَيْصَم: محجوزة وابوه سكر الموضوع منو اني حتى احجي؟!
لائِث: انقذ الموقف بأي شي الولد راح ينجلط.
هَيْصَم: من اگول راح ايطيح حظي من وراكم تلوموني.
لائِث: ارجعها بعرسك وعلي.
هَيْصَم: وانت شبيك منفعل وكأن انت اللي تخطب مو هو؟!
لائِث: غير اخوي واحس بيه؟!
حيدر: أشربوا الگهوه ميصير ترجعونهن نفسهن.
هَيْصَم: من رخصت عمي والناس الخيره الموجوده بس بالعشائر ميصير تنشرب الگهوه قبل متنطونه اللي جايين علموده، كلنه ناس معروفين وعدنه اعمال واشغال بس لخاطر ابنه تركنه كل شي واجينه نطلب أيد بنتكم مع هذا مقدرتوا هاي الشيبات والشيوخ ورفضتوا ابنه بسهوله،
قبل متنطي جواب اسمعني للأخير، انت رجال جبير وتعرف مصلحة بنتك واني اعرف ابن عمها ماعنده وظيفه ولا شغله يگدر يعيشها بيها باجر عگبه وصار شي تمرضت الله لايقدر او شتهت فد أكله بمطعم او حبت تسافر مثل بنات اليوم تلبس تطلع يگدر يأمن كل هذا لخاطرها؟!
نعرف البنيه تنظلم بزواج الأجبار وبعد متتعب وتمر اسنين لو يتزوج عليها وحده ثانيه لو يطلگها بعد ميصير عدها كومه جهال انت اب وباجر مسؤول امام الله تگدر تتحمل تشوف بنتك بهذا الوضع؟!
اني والله يشهد ورسوله على كل حرف انطقه لو يريد من باجر ازوجه اختي بدون مهر يگبعها وياخذها لأن اعرف هو منو تربيتي وعايش وياي من سنين طويله اگدر اضمنه الك واذا صار شي رگبتي سداده،
قبل متنطوا جواب بالرفض فكر بالموضوع وستشير الأهل واحنه حاضرين لأي شي تطلبوه.
حيدر: والنعم من عدكم وميصير خاطرك الا طيب ان شاء الله نفكر بالموضوع بس گدام هاي الوجوه الطيبه گتلكم انو ابن عمها حاجزها يعني كل شي يصير مستقبلاً مو تگولون انطانه كلمه وتراجع وتصير عيبه عليه.
هَيْصَم: محشوم من العيبه بس انت ابوها وهي اللي راح تعيش وياه عمر برأيك مو لازم ناخذ رأيها ونشوف منو تريد؟!
و القرار الأول والأخير بأيدك من شوكت الصغار يقررون عن اهلهم حتى ابن عمها يحجزها بكيفه وما يكون عندك رأي بنتك اللي ربيتها وكبرتها و بسهوله تزوجها اله وتنطيها على طبق من ذهب، شوف الفرق بين ابن عمها وبين ابنه وانت قرر.
حيدر: اشربوا الگهوه و ميكون خاطركم الا طيب ان شاء الله.
شربوا الگهوه وطلعوا من البيت وكل واحد بيهم توجه لسيارته يكمل عمله بس احنه بقينا محاوطين الهَيْصَم اتقرب من عنده وحضنه كدامنه ورجفت أيده تشرح مدا فرحته اللي ميگدر يعبر عنها بالكلمات.
هَمْهَام: شكراً سيدي الله ميحرمني من عندك.
هَيْصَم: خلص ابني مسويت شي واجبي هذا.
لائِث: صورهم ضَرْضَم المشهد أثر بيه حيل راح ابجي.
هَمْهَام: نجب من رخصتك.
لائِث: احترم نفسك طايح الحظ لو مو اني جان مصار شي ومقبلوا يزوجوها الك.
هَمْهَام: ابوها انت؟!
لائِث: لا عزيزي اني اللي حجيت بأذن هَيْصَم حتى يسولف شعبالكم لعد هو يگدر يسوي شي بدون مياخذ رأيي؟؟
هَيْصَم: شباب بمناسبه هذا اليوم السعيد شنو تردون عقوبته؟؟
هَمَّاس: خلي ياخذ خفاره مالتي اريد ارجع لأهلي صار اسبوعين مشايفهم وامي مريضه اريد اطمأن عليها.
هَيْصَم: اتوكل اني انطيك اجازه يومين وطمني على الوالدة لتنسى.
هَمَّاس: شكراً سيدي.
لائِث: ولكم اليوم خطوبة هَمْهَام الغالي وتردون تمر هيج سلامات؟!
هَيْصَم: اذبحك قربان شتگول؟
لائِث: بس خليني ارگص اول مره وعلي مشتهي حيل افرح صار فتره طويله من حضرت عرس آخير مره.
هَيْصَم: ويمك سعدون الساعدي حتى ترگص ستجن لا تتعاقب.
لائِث: طز بعشرتكم
اني اللي بعتكم.
هَيْصَم: منو طز بعشرته؟!
لائِث: هَمْهَام لعد منو؟؟
هَيْصَم: يلا خلي نرجع للمركز لازم نبدي بتنفيذ الخطة.
فيروز: الأيام تمشي لكن احس حياتي متوقفه مثل ماهي كل ليله تمر عليه بعيد عنه هي عُمر بحاله اصعب شي بالكون من تحب شخص وتتعذب بسببه وهو ميحس بيك،
حاولت اتجاهل الموضوع وهوايه مرات قررت انسى واكمل حياتي لأن من البدايه طرقنه مختلفه واللي صار جان مجرد حادث اعترض حياتي لفتره من الوقت ورجعت الأمور لمسارها الصحيح لكن ما أن يخيم سواد الليل على نور المدينه ارجع أحن وتعصف بيه الذكريات لأحد أيام بقائي وياه،
فيروز: شنو تسوي؟
هَيْصَم: علاج اعشاب علمود جرحج خلي عليه يگولون يطيب بسرعة.
فيروز: عندي مرهم يخفي الأثر ماكو داعي تعب نفسك.
هَيْصَم: انتِ مو مصدر للتعب لَّباءَة.
فيروز: ليش متصيحني بأسمي؟
هَيْصَم: لأن لَّباءَة يليق بيج أكثر.
فيروز: بس اني احبه وأريدك تصيحني بيه افضل من لَّباءَة اسم ممفهوم.
هَيْصَم: تحبيه مع مرور الوقت لازم يكون أسم الشخص مميز مثل صاحبه.
فيروز: اني مميزه بنظرك؟
هَيْصَم: لَّباءَة.
فيروز: نعم.
هَيْصَم: تقبلي فكرة اني شخص ما احب اشرح الأمور ابداً تعرفين اجوبت اسألتج من تصرفاتي.
فيروز: واذا هي حتى تصرفاتك متنحرز؟؟
هَيْصَم: اذاً اتعلمي شلون تقرأين الهَيْصَم.
فيروز: صعب.
هَيْصَم: منو يگول؟
فيروز: انتَ.
هَيْصَم: بكل شخص ثغرة استغليها و ادخلي لحياتي لَّباءَة.
فيروز: تريد ادخل لحياتك؟
هَيْصَم: اني شخص اكره العلاقات بالجنس اللطيف لكن لاضير من انو تكونين صديقه.
فيروز: صديقه؟
هَيْصَم: اول بنيه يصادقها الهَيْصَم هي انتِ.
فيروز: وليش تنطيني هاي الميزة وانت متعرفني الا من اسبوعين؟!
هَيْصَم: شباب اليوم يدخلون بعلاقات على النت و ميعرفون اصلاً الشخص اللي يحجون وياه وانت بقيت وياج اسبوعين وعرفت منو اتكونين اني انسان واقعي جداً واحب الصراحه.
فيروز: ليش احس اعرفك من زمان؟
هَيْصَم: ممكن.
فيروز: تعرفني هَيْصَم؟
هَيْصَم: شنو تحبين تسمعين؟
فيروز: الحقيقه.
هَيْصَم: اي.
فيروز: من شوكت؟
هَيْصَم: من دخلتي لهذا البيت صرت اعرفج لَّباءَة.
فيروز: اجوبتك دبلوماسيه.
هَيْصَم: مو عبثاً خلصت عمري بالسلك العسكري لو تذبحيني متگدرين تاخذين من عندي كلمه.
فيروز: متدرب على هذا الشي؟
هَيْصَم: حسب طبيعه العمل واني هاي شخصيتي من الأساس.
فيروز: برأيك منو افضل الحُب لو الصداقة؟
هَيْصَم: الصداقه اكيد.
فيروز: السبب؟
هَيْصَم: لأن الحُب مؤقت اما الصداقه عُمر.
فيروز: ليش تحجي هيج هوايه اشخاص يحبون و عايشين طول عمرهم بسعادة.
هَيْصَم: ماكو شي يدوم لَّباءَة مثل الصداقه الحقيقيه تسوه مشاعر الحُب كلها.
فيروز: لهذا السبب اختاريتني صديقه؟
هَيْصَم: جاوبي على هذا السؤال.
فيروز: شنو هو؟
باوع بعيوني بتمعن بعدين گال.
هَيْصَم: عيونج ليش حلوات هيج؟
فيروز: لان بيهم انعكاس وجهك.
انتبهنه على نفسنه غيرنه الموضوع وشوية و نهض بعد متصلوا عليه.
رجعت لواقعي واني على الجرباية، خالتي نامت وهي تنام من وقت يوميه وابقى گاعده وحدي بالغرفه تغيرت هوايه اشياء خلال هاي الفتره اهمها كمل راتب بابا التقاعدي وگدرنه نستلمه طبعاً دز واحد خبرنه مأجه هو استكثر عليه اشوف وجهه،
كونت علاقات صداقه وي نساء المنطقه وحده من عدهم اقترحت عليه عمل بالشركه اللي يشتغل بيها ابنها بحاجه لموظفه مگلت لا اني احتاج الشغل الراتب وحده ميكفي للمصاريف والأيجار رحت اني و خالتي وشتريت ملابس مناسبه اليه وشالات هم بالأضافة للأحذية والجنط كملت تجهيز نفسي وقبل اسبوع باشرت بالعمل وظيفتي هي الحسابات،
فتحت الموبايل ومثل كل ليله لازم ابقى اباوع بصوره حتى اگدر أنام صار ادمان بالنسبه اليه خطرت على بالي اسئلة هوايه ، ياترى هسه هو شنو يسوي؟؟
همات مشتاقلي لو بس اني انكوي بهاي النار؟
معقولة يجي يوم وأگدر التقي بيه مره ثانيه وجه لوجه وينتهي هذا العذاب؟
واذا التقينه شنو راح تكون اول كلمه يگولها؟
الگلادة اللي يلبسها وفتحت قميصه بداية صدره والحامض حلو اللي بثغرة، عضلاته ورسمة وجهه وطريقه تحديدة لحواجبه، عيونه اللي اذا نظرلي بيهم انسى منو هي فيروز واتيه بعالمهم الساحر، لو من يگول لَّباءَة ويخليني ذايبة بطريقه نطقه لهذا الأسم، كل هاي الأشياء اتعلقت بيها بذات الوقت شتاقيتلهم حيل،
أريد أرجع التقي بيه حتى لو مره وحده بس تصير عيني بعينه واعبرله عن مدا اشتياقي اله وشنو سوه بيه كل هذا البُعد،
وحده قوية اني و اعترف بهذا الشي لأن مشاعري مبينتها لأحد ابداً وخليتهم داخل صدري وحبستهم على رغم رقمه يمي واگدر اتصل بيه بأي لحظة لكن اكتفيت بأنتظارة هو يبادر اذا جان يحبني حتى لو اشويه گلبه يخلي يجي أليه،
نمت و الموبايل بأيدي گعدت على صوت خالتي تصيح بأسمي.
إيفاء: فيروز ماما يلا حبيبتي راح تتأخرين على شغلج گومي بلا كسل يلا گدامي.
فيروز: صباح الخير.
إيفاء: صباح النور ،غسلي وجهج وتعالي حضرت الريوگ ابو الخط على جية.
فيروز: شگد اكره الخط بس علمودج مجبورة ابقى وياه.
إيفاء: الدنيا مو أمان بعدين انتِ متندلين وحدج ترحين، بعدج جديدة بهذا المكان.
فيروز: غسلت وجهي وكملت روتيني لبست بنطلون ثلجي وقميص اسود للركبة رتبت الشال وخليت عطر ومرطب شفايف ولبست الحذاء وطلعت شافتني مستعجله صاحت عليه مرات احس بيها امي من صدگ.
إيفاء: وين طالعه بدون ريوگ؟!
فيروز: تأخرت حبيبتي راح اكل بالدوام يلا باي واذا صار شي اتصلي بيه طبعاً شتريتلها موبايل وعلمتها عليه وخليت بيه رقمي ورقم هَيْصَم للأحتياط ماعرف ليش سويت هاي الحركه بس تبعت أمر گلبي،
صعدت بالخط عباره عن تكسي ويايه ثنين من الموظفات صبحت عليهم ونطلقنه للعمل خلصت ساعتين تقريباً تعبت حيل وردت اطلع اكل شي لأن ميته جوع بس بعد عندي معامله لازم أكملها واني مندمجه وي الأرقام فززني عطر مو غريب عليه والرئة مالتي حافظته وكأن هو الأوكسجين مالتها رفعت راسي واجت عيني بعينه لابس بنطلون اسود وقميص ابيض ابتسمت لا أرادي واني اشوف فتحت قميصه والساعه الفضية اللي مزينه أيدة والنظارات اللي مخليهم بفتحت القميص حجيت بسرعة وبدون مقدمات،
هَيْصَم..
يتبع.
شاركوا القصه شمعاتي وتفاعلوا وي البارت سوولي واهس للكتابه حبيباتي.
حسابي الأنستا.
تابعنا وما يفوتك جديد
اختر المنصة اللي تناسبك وتوصلك الفصول أول بأول.
التعليقات (0)
جاري تحميل التعليقات...
لا توجد تعليقات بعد
كن أول من يشارك برأيه!