لتنسون التعليق بين الفقرات والتصويت للبارت والمتابعه شمعاتي ❤️
هَيْصَم
(الكاتبة زهراء احمد)
_____
وَهِـيَ التي مَـالَ الفؤادُ حِيَالَهَا
طَوْعاً و كَرْهاً حَيْثُ دَارَ خَيَالَهَا
هَيْصَم: سولفي كل شي تعرفيه حتى أكدر اساعده غير هيج اعذريني.
الهام: اني ماعرف هوايه تفاصيل بس أكدر انطيك كم اسم ممكن يفيدوك لكن بالمقابل يطلع من السجن.
هَيْصَم: مو مشكلة ننظر بالأمر.
الهام: شنو يثبت بعد متاخذ الأسماء طلعه؟
هَيْصَم: بس ينتهي حديثنه راح اعرفج على وحده تحبيها حيل وشوفي اذا بعدج تردين يطلع لو تغيرين قرارج.
الهام: اعرف عنده عشيقه وهذا مو مهم عندي اهم شي سمعت أولادي بالمدرسة متتأذه وتصير بيهم عقد وهم صغار.
هَيْصَم: صيري مطلقه وقتها ابوهم يكون مخلوع لأن بدون شرف وضمير وامهم هي المحاربه الدافعت عنهم.
الهام: اني بنت عائلة وناس عدهم الموت ولا الطلاق.
هَيْصَم: طلكي وكولي هو اللي طلكني وسافر اني اضمن الج ميطلع قبل عشرين سنة اذا مو مؤبد لأن الجرائم عليه ثكيله حيل، متاجرة بالنساء وترويج مخدرات هذا كله غير غسيل الأموال المتهم بيه وتورطه وي عصابة اتاجر بالأعضاء، زوجج غبي حيل داخل بطريق ميعرف شنو نهايته.
الهام: اذا هيج وضعه ميؤوس من عنده ليش ردتوا تحجون وياي؟
هَيْصَم: لأن انتِ تعرفين الشخصيات اللي يتعامل وياها تكدرين توصلينا الهم.
الهام: صعب ناس خطرة واني ماكدر اجازف.
هَيْصَم: انطيني اسماء وعناوين والباقي يمي.
الهام: اعرف بس ثنين منهم لكن ذولي أخطر شي بكل العصابة هم الايد اليمين للقائد وكل الأسرار يعرفوها عن كل الاعضاء البقية.
هَيْصَم: شلون عرفتيهم؟
الهام: اني فاتحة حساباته كلها يمي فكل شي يسويه ولأي مكان يروح اعرف.
هَيْصَم: محد شك بيج؟
الهام: ميكدر يشك بيه لحم جتافه من خيري.
هَيْصَم: نطيني الأسماء.
الهام: بركان، وبركات، معروفين بهاي الأسماء.
هَيْصَم: فقط هيج؟
الهام: اي بس هيج اعرف عن حياتهم الشخصية.
هَيْصَم: تمام تكدرين تطلعين هسه، المحامي الموجود يكدر يساعدج بقضية الطلاق.
الهام: اعرفه نفسه الشفته البارحة.
هَيْصَم: تمام تكدرين تتفضلين، لائِث.
لائِث: نعم سيدي.
هَيْصَم: طلع زيد يراقبها بسيارة عاديه بدون متحس.
لائِث: امرك.
ندك الباب صحت ادخل، فات عاقد حاجبه.
محمد: شو بسرعة طلعتها.
هَيْصَم: تكدر تسويلي خدمة ثانية؟
محمد: لتكول شاك بيها.
هَيْصَم: اي شلون عرفت؟
محمد: الصراحة اني همات شاك وياك بس انطيني السبب واني احجيلك ليش شكيت.
هَيْصَم: مره مثلها صعب تنخان، غير الثبات الواضح عليها هذا مو قوة هذا معرفة سابقة للموضوع اذا مجانت هي المدبره الأساس لكل شي ديصير.
محمد: يعني هي الكواليس.
هَيْصَم: عفية اريدك تكون وياها خطوة بخطوة حتى تكدر تاخذ موبايلها منها وتجيبه إليه.
محمد: ما أعتقد موبايلها هذا هو البيه أسرار الشغل.
هَيْصَم: كلامك صحيح واضح انو هي حذره بشكل جبير لازم نسوي الخطة ب.
محمد: وهي.
هَيْصَم: الباعته يبيعها.
محمد: وشلون هيج؟
هَيْصَم: رتبلي ورقة طلاق بسرعة.
محمد: توقيعها منين نجيبه؟
هَيْصَم: وقعت على هاي الورقة هي قبل شويه مال تسجيل افادة وعندي احد المنتسبين يقلد التوقيع بالضبط.
محمد: مدبر كل شي.
هَيْصَم: اكيد اني مادخل لمكان اذا ماعرف الطريق بكل افرعه وشلون ادخل ومنين اطلع وشكد يستغرق الموضوع.
محمد: سهله قضية الورقة موجوده عندي بس اكتب اسمها الكامل واسم زوجها.
هَيْصَم: اسمها الكامل موجود واسم زوجها، عندك خمس دقايق كمل كل شي هسه ادز عليه يجي يوقع توقعيها ونروح نحقق وياه ونعرف منه المعلومات كامله.
محمد: سهله لعد اذا هيج انطيني خمس دقايق وتكمل الورقة.
هَيْصَم: رتب بيها على راحتك وكل شي تحتاجه موجود هنا.
محمد: اني وياك من سنتين خلصناها عركات شو بسرعة تغيرت وصرت تريد مساعدتي.
هَيْصَم: هذا واجبك اتجاة الوطن لتضل نافش ريشك يكول دجاجة.
محمد: اني من الوطن اريد بس الفلوس اما الواجب فهو دفاعي عن المظلومين من السجناء وبس.
هَيْصَم: اي مظلوم اللي يوصل الناس للموت بعمر صغير علمود ياخذ جم فلس هذا الظلم متطور ماموجود بس عندك وعند الماعدهم ضمير مثلك.
محمد: الناس نوعين، النوع الأول يسوي كل شي علمود يدخل المجرم للسجن والنوع الثاني يسوي كل شي علمود يطلع المجرم من السجن والنوعين ديسولفون هسه.
هَيْصَم: والنوع الثاني ديساعد النوع الأول.
محمد: لو مجانت اكو فايده إليه مساعدت.
هَيْصَم: كمل شغلك بدون لغوه زايده خلينا نشوف شغلنا يلا.
آمندا: فيروز اريد اكلج شغله بس ماعرف شلون افاتحج بيها.
فيروز: احجي شنو الموضوع لتخجلين مني.
آمندا: اريد اخابر غضنفر بس اني ماعندي موبايل اكدر اخذ موبايلج.
فيروز: الموبايل وصاحبة الموبايل بخدمتج، هذا اللي مخجلج هيج؟
آمندا: مو ما اريد تصير وياج مشكلة بسببي.
فيروز: لا داده مشكلة شنو هَيْصَم ميحجي شي واني اكله لتخافين بعدين هذا زوجج عادي.
آمندا: شكراً.
فيروز: على شنو روحي اخذي الموبايل موجود بالغرفة مابيه رمز اكتبي رقمه وخابري براحتج.
آمندا: لا بس اريده يجي علمود ياخذني لبيتنا.
فيروز: ليش ترحين بعد وقت مصار يومين من اجيتي لهنا وتعودت عليج، وجودج مونسني ومغيرلي جو.
آمندا: امي وحدها ماكدر اعوفها.
فيروز: ليش وحدها؟
آمندا: لأن هن يبقن يومين بس ويرجعن لبيوتهن.
فيروز: يعني خواتج موجودات بالبيت؟
آمندا: اي.
فيروز: اتصلي بيها بالأول وشوفي بعدهن لو لا يلا تخابري حتى ترحين.
آمندا: تردين ابقى؟
فيروز: والله ياريت حابه وجودج يمي.
بتسمت لأن ضاع مني الكلام شكد قهر من يحبك الغريب عنك واخوك من امك وابوك ميريدك، هذا حال الدنيا للأسف، أخذت موبايلها وخابرت امي سلمت عليها وعرفت هن راحن البارحه بالليل غلقت الخط منها وخابرت غضنفر حافظة رقمه اني طول شويه يلا فتح الخط.
غضنفر: منو؟
آمندا: اني آمندا.
غضنفر: ياهلا ومرحبا بكلبي وحبشكلاته أمريني حبيبي شنو محتاجه؟
آمندا: سلامتك.
غضنفر: سلامتي من اسمع صوتج اللي اعشقه واخرب عليه، اخخخخ ولج شمسويه بكلبي انتِ مجنت ادري عندي شي بصدري ينبض الا من شفتج وصرتي كدام عيني يانظرها ونورها.
آمندا: اي شكراً.
غضنفر: شكرا شنو ولج صار ساعة اتغزل بيج واحصل شكراً وين اصرفها هاي؟
آمندا: لعد شنو اكول؟
غضنفر: كولي احبك كولي اموت عليك كولي مشتاقتلك شبيج زوجج انا.
آمندا: احبك.
غضنفر: من عسى كون ما اسمعها من غيرج وينخرس كل واحد يكولها عداج، شوكت استبشر بشوفتج وعيني تتكحل بيج؟
آمندا: اني اتصلت بيك علمود اكلك اذا فرغت تعال اخذني للبيت امي وحدها.
غضنفر: حاضر ودللي مسافة الطريق واني يمج.
آمندا: لا من تكمل شغلك مو هسه.
غضنفر: العن ابو الشغل خلي يطير اهم شي اشوفج، روحي غيري ملابسج قريب على بيتكم انا ربع ساعة وتكليني يمج.
غلقت الخط وتصلت ب هَيْصَم كتله رحت لبست شالي والعباية وسلمت على فيروز وطلعت من اتصل عليه صعدت يمه بالسياره اول مسديت الباب سحبني من أيدي وقبلني بخدي خجلت وبقيت جامدة بمكاني ماعرف شنو اسوي التزمت الصمت وهو هم حتى وصلنا للبيت نزلت بدون كلمة ودخلت وهو راح، يمكن خجل مني ماعرف شنو صار بيه، اول مافتت للصالة لكيتها كاعده وبيدها سبحتها سلمت عليها ورحت لغرفتي دقيقه يمكن مرت ودخلت بدون مدك الباب حتى، حجت وهي تلوم بيه.
كلاثم: ليش هيج سويتي مو عيب كدامج خواتج؟
آمندا: لا مو عيب اللي مايحترمني ما احترمه لو منو ميكون هذا العندي والميعجبه يضرب راسه بستين الف حايط ولا يجينا.
كلاثم: اريد افتهم شبيج وي آريا شو جنتن بكل شي سوه الضحكه والدمعه هسه شنو صار ليش الكلوب بطلت تتوالف؟
آمندا: جنه، هاي انتِ كلتيها، هسه الزمن والوقت والقدر تغير وصرت ما اتشرف تكون اختي حتى بجنازتي من اموت ماريدها تحضر وهاي وصيتي اذا متت اول وحده بيكم.
كلاثم: اسم الله يمه شنو هل الحجي شصاير بينكم فهميني خليني اعرف.
آمندا: بنتج تشك بيه احب زوجها وهاي السالفة من ايام خطوبتها.
كلاثم: استغفر الله شنو هاي منين جبتي هذا الكلام؟
آمندا: والله هذا الصار يا ماما، مره شافتني بره وشافته دخل جوه للإستقبال من وقتها وهي بعقلها اني خنتها، المشكلة مو هنا المشكلة هي تحجي يم زوجها بيه وتكله حلوه وماعرف شنو واذا متت تزوجها.
كلاثم: مستحيل ماصدك هيج تسوي، شلون تتجرأ وبعدين انتِ شلون عرفتي منو كلج؟
آمندا: هي كلتلي فرحانه عود بالإنجاز المسويته مفكرته فخر الها تتهم زوجها وي اختها، لهذا السبب اني ماحبها وما طيقها وبعرسي اذا عزمتيها اسويها عزه والله وكولي كلت، لا هي اختي ولا اني اختها.
عفتها مصدومة ورحت أخذت ملابسي ودخلت للحمام.
هَيْصَم: شفت شلون تبرت منك وقررت تنفصل علمود سمعتها وباعتك بالرخيص؟
مختار: مستحيل متسويها اني وياها عشرة عمر ما ممكن تبيعني.
هَيْصَم: اللي يبيع ضميره توقع من عنده اي شي، القرار يمك اذا تريد تبقى محافظ على هيج إنسانه ورطتك وطلعت منها لو تساعدنا والعقوبة مالتك تقل انت حر، عندك مهلة 24 ساعة وراها ارفع قضيتك للمحكمة علمود تاخذ حكمك.
عفته وطلعت واني مبتسم، افضل طريقة حتى توصل للي تريده هي زراعة الفتنه بين ثنين يثقون ابعض هيج تحصل مبتغاك بسهولة وبأقل خسائر ممكنه، واني طالع اجاني اتصال.
زيد: سيدي راحت لبيت مهجور بأطراف بغداد واكو سيارة سودة وكفت يمه هسه ونزل منها شخصين.
هَيْصَم: ابقى راقبهم من بعيد جايك اني.
زيد: تأمر سيدي.
هَيْصَم: لائِثثث.
لائِث: طلبتني.
هَيْصَم: خمس دقايق اريد الفريق كله جاهز بساع.
لائِث: تأمر سيادتك.
صعدنا رايحين للمكان المطلوب وصلنا بعد فتره نزلنه ورحنه محاوطين البيت، فتحت الباب ودخلت بيت متهالك وقديم حيل ومبين صار سنين مامسكون هذا أفضل مكان غير متوقع لاجتماعات آخر الليل، سمعت صوت غريب تمعنت بيه واني اقترب بخطوات بطيئة اللي بعقلي صح، الإجتماع خاص جداً، انطيت اشاره لجماعتي يدخلون سحبت أقسام ونطيت الباب ضربه قويه برجلي وايدي نفتح، المنظر مقرف لدرجه متكدر تباوعله اذا متلعب نفسك وتتقيأ، ابتسمت بوجههم الخونه، دخلوا جماعتي اخذوهم هم الثنين صعدوهم بالسيارة واني دورت بالبيت على اي شي ممكن يوصلني للراس الجبير بيهم، هذا الشخص اللي ادور عليه من سنتين ومالكيت اي ثغره ودليل ممكن يوصلني إله، لكيت جنطتها فتحتها شفت بيها جهاز تنصت عرفت هي مراقبة.
هَيْصَم: هسه صار اللعب حلو، حيل حلو، هههههه.
خطوات بطيئة وصوت سلسلة غمضت عيني اطرب لهذا الصوت كلبي ينتفض من مكانه اريده يدخل، نفتح الباب دخل شافني كاعد مكتف أديه منتظره انصدم وتفاجئ، هَيْصَم بجلالة قدره جاي لهنا ومنتظر يشوفه شي عظيم بالنسبة إله.
هَيْصَم: شايف شكد الصدف عظيمة واختيار القدر بدون غلطة لدرجة عاد نفس الموقف باختلاف الأماكن.
: ههههههه، جنت متحمس حتى اشوفك هوايه فوك ماتتخيل.
هَيْصَم: غضنفر كال مات بس اني اعرف العار ميموت بسهولة لازم راسه ينداس بالقندرة يلا يكدر يودع الحياة واني مرتاح، ما اسمح ابد تموت بدون عقاب.
: هذا انا كدامك كوم عاقبني، بس بالأول اسمعني شنو سويت وشلون خططت لكل هذا، واضح انت ماتعرف نص الأسرار، اني اللي دزيت عمام فيروز الك كتله انطيك شكد متريد اذا طلكتها منه وجبتها إليه وماريد جهالها اريدها بس هي، يم عبدة المال هذا الشي مو صعب أسهل منه ماكو، وسوه اللي اريده، بيوم المحكمه والقضية اللي نرفعت عليك واول جلسة حضور علمود انفصالكم جنت واكف بعيد من شفتك نزلت من سيارتك ورحت بإتجاهه، بوقتها ردت اموتك بنفس اللحظة ورتاح منك واخذها وانت متكدر تسوي شي بس لا ردت اعذبك بنفس الطريقة.
هَيْصَم: ههههههه، ههههههه، هههههههه، ضحكتني واني مالي خلك، انت مجرد واحد زعطوط حالم هوايه، شايف البسطال اللي لابسة؟ ايدك اذا وصلتله اكطعها مو مرت الهَيْصَم هنا ارتكب جرائم مو وحده وعيونك تشهدلي شنو أكدر اسوي وكدام عيونك من باب المحكمة رجعتها إليه ومحد كدر يفتح حلكة بحرف، هذا انا هَيْصَم ابن حيدر على سن ورمح انت منو؟ مجرد واحد زعطوط تافهه ماعندك شغل وعمل مجرد تتمنى والمثل يكول التمنى ماتهنه، هههههههه.
: يكفي بسببي تعذبت أشهر وبعدك تتعذب لليوم بسبب اختك.
هَيْصَم: ليش خطفتها؟
لّهيم: علمود احرك كلبك لا أكثر.
هَيْصَم: راح اطلعهن من عيونك وحده وحده، كفيت اردان قميصي وكمتله لزمت راسه وضربته بكل قوتي بالحايط، وكع لزمته من شعره ورفعته إليه ضربته بوكس بطنه، ضربت بيه حتى شفيت غليلي منه، كلات ضربات بالحايط دفرات مابقيت عظم صاحي بيه خليت دمه بطوله، بقى جثه مايسمع منه بس الونه، خابرت الإسعاف اجو اخذوه وطلعت صعدت بسيارتي حتى وصلوا واخذوا، احس كلبي مابرد اتمنى ارجع هسه وكسره أكثر بس لا ماريده يموت خلي بالمركز اعيد وياه نفس الضربات واني أعلمه شلون يندك بعائلتي، حركت سيارتي رايح لدوامي.
الهام: مو من حقك تعتقلني حياتي الخاصة مالك دخل بيها سيد هَيْصَم.
هَيْصَم: لا ازعل منج شلون تحجين هيج؟
الهام: خليني اطلع منا ليصير شي ميعجبكم كلكم متعرف اني منو بكلمة وحده اخليك تُقال من منصبك.
هَيْصَم: هههههههههه، اني اليوم هوايه ضحكت الله يديمها يارب كول آمين ميثم.
ميثم: آمين سيدي.
هَيْصَم: هههههههه خليني اكمل ضحكتي، ههههههههه، اعذرني دمعت.
ميثم: على راحتك سيدي.
هَيْصَم: عيدي، عيدي، انتِ بسببج انقال مو؟ ههههههه، ولج بابا اني ماسوي شي غير مدعوم اني هَيْصَم مو حي الله احد من ذولي المزعطه التعرفيهم، اذا ما سامعة بيه خليني اعرفج، قبل ثلاث سنوات اعتقلت اكبر تاجر مخدرات وصلته للمشنقه وتنفذ الحكم بوجودي وشهادتي، هاي غير الأطراف الصغيرة الموجوده كلها شتغلتها وهسه تشوفيهم بالسجن وتعيشين وياهم عشرة عمر أن شاء الله، وهسه بعد متعرفتي عليه اريدج تغردين بكل شي تعرفيه ماكو طلعه منا اذا متحجين كل شي ولعلمج اني معروف عني رقيق مع النساء لأن اشوفهن رقيقات ميصير ينضربن بورده لكن وياج انتِ بالذات لابأس بالضرب المبرح علمود تعترفين ونخلي لونج الأبيض يصير أسود، شنو تكولين؟
الهام: ماعرف شي اني.
هَيْصَم: استلمها ميثم، باجر الصبح من اجي اريدها هي وزوجها كل شي حاجين ماكو تتعاقب انت.
ميثم: تأمر سيدي.
: جنت كاعدة بالغرفة مشغلة الشاشة وتابع مسلسل خليجي واقمار يم خالتي جوه، نفتح الباب ودخل درت وجهي اله شفته ورجعت راسي لمكانه اكمل مشاهدة اجه كعد يمي على الجربايه سحب أيدي مقبلها سحبتها منه رجع سحبها كايل.
محمد: اسف والله بس تعرفين ظروف شغلي انتِ.
حوري: اني ماحجيت شي تره.
محمد: وجهج يحجي مو شرط السانج قاريج اني وحافظج.
حوري: لتهتم ماكو شي مهم عادي معذور.
محمد: هاي كلاواتج بطليها تكولين لتهتم وتعامليني مثل البطريق بالقطب الشمالي.
حوري: شنو تريد اسوي مثلاً؟
محمد: كومي غيري ملابسج نطلع عشا رومانسي بس اني وياج.
حوري: مابيه حيل.
محمد: تكومين لو اكومج؟
حوري: مالي خلك محمد عوف كل شي وروح غير ملابسك علمود ترتاح.
محمد: معليج بيه مرتاح كومي لتشلعين كلبي ياعيني.
حوري: محمد لتلح عليه كتلك ماروح.
عافني وكام فاتح الكنتور مطلع فستان نيلي وشالي اجه شمرهن عليه وكال بتهديد.
محمد: ادخل للحمام اخذ دوش سريع واغير ملابسي إذا طلعت ولكيتج نفس الملابس اغيرلج اني ونزلج من شعرج سحل وتعرفيني مسودن وسويها.
حوري: هو واضح العشا رومانسي من بدايته.
محمد: يجنن وعيونج بس كومي انتِ.
خليته لمن يطلع وكمت غيرت ملابسي وعدلت شالي طلعت صاكه وبقيت منتظرته حتى دخل للغرفة باوعلي وغمز، ابتسمت ودرت وجهي عود بعدني زعلانه، نزلنه جوه كلنه لخالتي وطلعنا تعشينا وشفنه فلم ورجعنا للبيت، الحياة الحلوه تكون هيج، شويه مشكله، شويه حب، شويه رزانه وعقل، تكون مشكلة حتى مايصير ملل بعيد عن هذا أقرب طريق يخلي الرجال يمشي عدل هو الزعل بس ها مو دائماً لازم الزعله تكون بمحلها، والزعل يكون التعامل بالتجاهل ولا كأن موجود ولا اهتم بوجوده اصلاً، هذا الفعل يخلي يموت ويطلب رضاي.
رويم: اريد بابا.
فيروز: بالشغل شويه ويرجع.
رويم: اريده هسه اريد احجي وياه.
فيروز: ماما ياعمري ابوج مو هنا منين اجيبه؟
رويم: اريده يجيبلي حظ يانصيب وياه خابري كليله.
فيروز: منين يجيلبج حظ يانصيب بهل الليل ياعيني؟
رويم: مااا اريد حظ يانصيب.
كعدت تربعت وكامت تبجي بكل قوتها اني متعودة على حركاتها بس تضوج تسوي هيج حتى تكسر كلبي وتجبرني اروح اسوي اللي تريده، بس مع هذا ما اطاوعها حتى ماتدلل زايد ويصير شغلها بالعناد ومتسمع كلامي بنفس الوقت ماخليها تبجي هوايه مو زين عليها.
فيروز: زين شنو رأيج اني وياج هسه نسوي بركانية حتى من يجي بابا نسويها اله مفاجأة؟
ضحكت ماسحه دموعها بكف ايدها كايله بتذكير.
رويم: بس تكليله يشتريلي حظ يانصيب.
فيروز: اكله وداعتج بس خلي يجي ميصير اخابره وهو مشغول، هسه يخاف علينه خطيه، تقبلين بابا يخاف علينا؟
رويم: لا خطيه لتكليله هسه خلي من يرجع.
فيروز: عفية ببنيتي العاقلة، يلا تعالي نسوي كيكة سوه،
لزمت أيدي رحنه للمطبخ نسوي الكيكه لعبت لعب بنفسها بالكوكو حتى خلصنا تشاهدت رحت غيرت ملابسها وخليتهن بالغسالة كعدتها يمي وكمت العب بشعرها وسولفلها قصة حتى غفت على القنفة ماكدر اشيلها خليتها بمكانها وغطيتها وبقت كاعده يمها وصافنه على الحايط مسترجعه بعقلي الصار من قبل.
Flash back
ابو رضا: صارلج ثلاث اشهر ونص يمنه لا تشتغلين ولا تسوين شي وشوفي نفسج شلون سمنتي حركي نفسج علمود تضعفين ماعندج خدم هنا.
فيروز: والله ماكتلك هددني وخليني اجي لهنا وعوف بيتي وزوجي.
كام من مكانه كايل بعصبية.
ابو رضا: اذا امج وابوج ميتين وماعندج احد يربيج اني موجود والعن والديج وربيج من جديد طايحة الحظ قليلة التربية.
فيروز: احترم نفسك ولتغلط على اهلي، تاج راسك التراب اللي جانوا يمشون عليه، انتوا اللي بلا تربية وأخلاق حارمين مره من بنتها وزوجها علمود ملذاتكم متخافون من الله باجر يحاسبكم وتوكفون يمه بيوم الحساب شنو تكولون إله؟ ظلمتوا وهضمتوا بنيه يتيمة عبالكم يغفرلكم لو اني يجي يوم اسامحكم على سوايتكم وياي؟ وحق ربكم العالي وسماه، دعائي عليكم دائم بكل وقت وكل صلاة دعاء وحده فاقده بنتها وميته على ريحتها ياخذ منكم حقوقي كلها ويعاقبكم واحد واحد وكولوا كلت.
ابو رضا: امشي ولي من خلقتي لا بارك الله بيج ولا بوجهج اليطرد النعمة، وخلي ابالج ذلك الرائد ماترجعين اله لو تموتين احفظيها مابقى شي وترحين وياي نقدم عليه بلاغ بالمحكمة حتى يجي يطلكج ورجله فوك راسه وكولي أبو رضا كال واني اعلمج على السانج الطويل هذا.
عفته ورحت للغرفة قفلت الباب عليه وكعدت ابجي، ابجي بحركة كلب، تعبانه حيل وماكو احد يمي اشكيله وين اروح المن انطي وجهي وفوك كل هذا شاكه بنفسي حامل اعراض حمل عندي من اول يوم اجيت بيه لهنا بس ماكدر احجي شي اخاف يسمعون ويجبروني اوكعه، لا مستحيل اموت وماخليهم يلمسون منه شعره ابني هذا مافرط بيه لو اعرف ارتكب جريمة بس علمود احافظ عليه.
حسيت على أيد تتحرك بهدوء على وجهي طفرت من مكاني أخذت نفس من شفته هو، شافني هيج مرتعبه عقد حاجبه كايل.
هَيْصَم: شبيج؟
عدلت كعدتي كايله واني دايره وجهي عنه.
فيروز: جنت غافيه وانت فززتني.
هَيْصَم: جنتي سارحة مو غافيه.
فيروز: ماكو فرق نفس الشي.
هَيْصَم: بشنو جنتي سارحه؟
فيروز: هَيْصَم شنو تريد؟
هَيْصَم: اريد اعرف بشنو جنتي تفكرين.
فيروز: مافكر بشي لتهتم، متعشي؟
هَيْصَم: اذا تكابليني اتعشا واذا متردين ماريد.
فيروز: شنو موضوعك؟
هَيْصَم: ياموضوع؟
فيروز: ليش تريد تفتح صفحة جديدة ويايه فجأة وانت الجنت معارض الفكرة من كتلك؟
هَيْصَم: لأن الشوق قاتل لَّباءَة الهَيْصَم.
فيروز: يعني مو حباً بيه.
هَيْصَم: لَّباءَة اني بدونج بدون هوية ولا رتبة ولا منصب، الهَيْصَم بدونج ضايع اذا تردين تبقيني ضايع بكيفج واذا تحبين خلينا نلكي نفسي سوه.
فيروز: كلامك عميق.
هَيْصَم: والجرح بكلبج أعمق لدرجة عيونج ماشوف بيها نظرة الحب نفسها قبل من جنت احجي شي حلو الج.
فيروز: لأن شفت حبك مجرد كلام، لان ماسمعتني ولاقدرت مشاعري والعشته، انت فكرت بس بجرحك واذيتك ومافكرت اني شلون عشت اربع أشهر بدونك شلون كدرت اتحمل واني اللي ما انام اذا ماشوف طولك كدامي واطمأن عليك بخير يلا تغفالي عين.
هَيْصَم: جان جرحي جبير حيل وردت اعاقبج على الألم الصار بيه، بس اني عاقبت نفسي وياج، اعترف اني بدونج لا شيء ماكدر اتنفس وانتِ بعيدة، الهوه شكد مالي الدنيا واكف يمي ومايدخل للريه، جنت اضحك على اللي يكول خابريني اريد اتنفس ختنكت حتى عشتها صدك اختنكت من ماشفتج كدامي البيت مادخلتله ابد ورحت بعملية حتى جبتج ورجعتي كدام عيني تمشين وتضحكين يلا كدرت اخذ نفس وبالي يرتاح، لتفكرين اني عاقبتج بس انتِ اني عاقبت روحي وياج لَّباءَتي.
فيروز: خليني افكر بكلامك عدل وبعدين اكلك شنو قراري.
تركته ورحت سحبني من أيدي حاضني بكل قوته نزلت دمعتي شكد مشتاقتله وشكد عندي عتب وسوالف وتعب بداخلي اريد اخليه على صدره واني حاضنته هيج وانسى كل الألم العشته.
هَيْصَم: احبج ولج، احبج فوك ماتتخيلين مرتي وام جهالي.
فيروز: هاي شنو؟ شنو هذا التغير المفاجئ؟
هَيْصَم: انتِ مو ردتي نفتح صفحة جديدة وننسى اللي صار؟ وهاي اني كاعد اسوي اللي ترديه وين المشكلة؟
فيروز: المشكلة قبل يومين كتلي ماكدر وهسه جايني تريد القرب اكو غلط بالموضوع.
هَيْصَم: لَّباءَة وين تردين توصلين بكلامج؟
فيروز: للسبب الرئيسي اللي يخليك تغير قرارك فجأة.
هَيْصَم: اذا عرفتي تزعلين.
فيروز: مازعل بس احجيلي لتخليني محتاره وياك وبتفكيرك.
هَيْصَم: سمعتج تحجين وي آمندا بلي صار، عرفت الصار كله فماكو داعي للبُعد بعد.
فيروز: ههه، يعني مو حباً بيه بس تأكدت اني وحده بريئة مو؟
هَيْصَم: فيروزه تعرفيني انتِ عدل او وياي عشرة عمر لازم تعرفين تفكير زوجج شنو ليش بعد هذا الكلام؟
فيروز: شوف حبيب القلب، لو تصير النفس هم ما اتقبلك ولا اريدك، ولو جانت بكلبي ذرة من التفكير اللي تخليني انسى ورجع لحياتنا القديمة هسه اغسل ايدك بصابون وتايت وزاهي، اني محرمة نفسي عليك ومن صدك بس يجي ابني للدنيا بخير وسلامة ننفصل رسمي ماريد اسمي يرتبط بأسمك من اليوم.
عفته ورحت للغرفة ميته قهر، جان ميقبل يسمع مني كلمة وهسه من سمع وقتنع اني جنت مجبورة صار يريد يرجعني، وعلى باله اكله حياك تعال فاتحه احضاني الك، والله يالله لو شنو يصير ماقبل بيك بعد هينه اني اعلمك.
فتح الباب شايل رويم بأيده مخليها بفراشها متقدم ناحيتي كاعد بصفي كمت سحبني من أيدي دفعت ايده وكمت طلعة من الغرفة اجه ورايه.
هَيْصَم: لَّباءَة كافي لعب مو جهال احنه اكعدي خلي نتفاهم مثل الأوادم.
فيروز: اني مو آدميه.
هَيْصَم: اللهم صبرك اللهم صبرك، شلون بيه وي هاي البنيه اليوم.
فيروز: طلكني وانت ترتاح.
هَيْصَم: شلون تريدني ابتلي بيها وهي حامل.
فيروز: شنو تسوي مثلا؟
هَيْصَم: ياعيني شبيج؟ ليش متقبلين نتفاهم ونكعد نسولف مثل العالم والناس الطبيعين؟
فيروز: لان اني مسودنه مو طبيعية علمود اتفاهم وياك عدل.
هَيْصَم: استغفر الله العلي العظيم، أستغفرك ربي واتوب اليك.
فيروز: استغفر، استغفر، هم يلا تنغفر ذنوبك.
هَيْصَم: شبيج وي زوجج حبيبج ليش متكعدين تسولفين وياي؟
فيروز: لأن من ردت اكعد اسولف وياك كتلي ماريد وحده خاينه، لتنسى هَيْصَم شنو سويت بيه وشلون طردتني من الغرفة وعاملتني مثل شخص منبوذ واني مرتك، شفت اسلوبك مقابل أسلوبي وهنا احكم انت منو الاكثر محترم وي الثاني اني لو انت.
هَيْصَم: انتِ محترمه أكثر مني.
فيروز: اي زين عرفت انو اخلاقك صايرة فد مره.
هَيْصَم: تره مصختيها ليش تخليني اسودن عليج صدك او اراويج الأخلاق الزفت على اصولها شلون تصير؟
فيروز: شنو تشوفني أكثر من الشفته؟
هَيْصَم: ترديني اروح اكابل لائِث؟
فيروز: روح منو لازمك؟
هَيْصَم: ماشي اروح بس اريد عشا لأن ميت من الجوع.
فيروز: العشا جاهز غير ملابسك بين ما اصبه.
هَيْصَم: لتعبين نفسج اني اسويه.
فيروز: واجبي هذا.
هَيْصَم: ماريد اتعبج كلت روحي رتاحي.
فيروز: اويلي على اللي يخاف عليه فجأة، هذا قلقك وين جان من جنت ادك ولطم وانت تسمعني ولا كأن وتسمعني كلام يهز البدن؟
هَيْصَم: جنت انيمج بحضني بالليل وانطيج طاقة إيجابية بدون متدرين.
فيروز: روح داده غير ملابسك وطلع الأفلام التركيه من راسك.
دخل للغرفة واني رحت للمطبخ وداخلي متحلف بيه اذا ما اعاقبة على اللي سواه بيه فلا اسمي فيروز هينه.
خليت الأكل على الميز وهو دخل عقد حاجبه كايل.
هَيْصَم: اريد اكعد بالكاع واكل بالغرفة مو هنا.
فيروز: ماكدر اشيل صينية.
هَيْصَم: ماكتلج شيلي اني اشيل بس فتحيلي الباب.
تفاجأت هاي اول مره يسويها وياكل بالغرفة هو ميحب ريحة الأكل تصير بغرفة النوم شنو هذا التغير المفاجئ!! اني مهتميت وين ميريد ياكل ياكل رحت للغرفة الثانية اللي بيها نايمه رويم قبل مافتح الباب ودخل سمعت صوته يصيح يريد مي، من صدك اجيت الطم صايرة اتعصب من اتفه شي وهذا الشي اللي يخليني تلعب نفسي من الحمل الهرمونات التموتني، أخذته ورحت دكيت الباب وفتت عود احترامات وكذا، باوعت ملكيته بس من سمعت صوت القفل درت وجهي شفته واكف مكتف أديه لصدره ومبتسم ابتسمت بوجهه كايله.
فيروز: افتح الباب اريد أطلع.
هَيْصَم: نوو مطلعين اريدج تبقين يمي مشتاقلج.
فيروز: بس اني ما مشتاقتلك.
هَيْصَم: الشوق العندي يكفيني ويكفيج وليهمج.
فيروز: هَيْصَم تخليني اصرخ والله.
هَيْصَم: صرخي هو منو بالبيت غيري وغيرج؟
فيروز: انت شبيك فهمني ليش تسوي هيج؟
هَيْصَم: لأن تعبت صار ست أشهر مفاركج وخلص صبري.
فيروز: الموضوع مو على مزاجك سيد أفندي، لتنسى اني طرف ثاني بالعلاقة وياك ورأيي مهم سواء قبلت او مقبلت.
هَيْصَم: انتِ مشتاقه مثلي لتكابرين.
فيروز: حتى وإن ماريد اسامحك وبدي وياك صفحة جديدة انسى.
هَيْصَم: لتنسين بس كافي بُعد ولج والله بعد ماكدر اتحمل افاركج ولو لحظة صعبة افهميني.
فيروز: اني ثوله ماريد افهمك وافتح الباب اريد اطلع اروح يم بنيتي.
هَيْصَم: وابو بنيتج؟
فيروز: مالي علاقة بيه هو يدبر نفسه.
هَيْصَم: مو هي بكيفج امشي اني.
تقدم ناحيتي حاضني بين أديه، هنا عقلي توقف تماماً وشتغل كلبي مكانه توقفت كل الحواس عن الاستيعاب انو قطعنا هذا الفراق الطويل بالوصل ونتهت المشكلة بس مع هذا ما ارتاح اذا ما اعاقبه ومايبرد كلبي.
هَيْصَم: على شنو دورين؟
فيروز: المفتاح وين؟
هَيْصَم: تعالي نامي ونسي المفتاح ما انطيج اياه للصبح.
فيروز: رويم وحدها بالغرفة ليصير بيها شي خلي اروح يمها.
هَيْصَم: اكو جهاز مخلي يمها اذا بجت تسمعيها تعالي نامي يلا اريد انام نعسان باجر عندي شغل.
فيروز: عزيزي شلون جنت تنام قبل نام هسه ماكو فرق.
هَيْصَم: اذا تردين اكوم اجيبج يمي كوليها بدون لف ودوران وتشلعين كلبي.
فيروز: استغفر الله ربي واتوب إليه.
هَيْصَم: على هذا الإستغفار يومية نتعارك علمود تدخلين الجنة من استغفارج.
فيروز: عفتها الك ياخادم الوطن ماريدها اني.
هَيْصَم: مادخللها اذا مو انتِ بيها.
فيروز: اي صدكتك سيد متدين.
هَيْصَم: اعطفي على العبد المسكين وتعالي يمه وعلي مشتاقلج.
فيروز: شلون يعني اضمك بنص كلبي شسويلك؟
هَيْصَم: شكو بيها ضميني بنص كلبج من الناس كلها، خليني احس بالأمان ولو ليلة وحدة، اكسبي بيه ثواب شبيج؟
فيروز: تحبني؟
هَيْصَم: اووف، ولج كلبي واج نار بحبج مو بس يحبج والسلام.
فيروز: اي جيد حبني استاهل انحب.
هَيْصَم: فيروزي شو صايره فد مره شنو فلمج؟
فيروز: باكستاني حبيبي.
هَيْصَم: تحبيني لَّباءَة؟
فيروز: لا.
هَيْصَم: ايااا ملعونة شوف شلون.
فيروز: هههههههههه، تستاهل ماحبك.
هَيْصَم: تحبيني غصباً عليج، اصلاً كلبج مايكدر يدك لواحد غيري.
فيروز: اي بكيفك هي مو.
هَيْصَم: بكيفي وراسج فوك رجليج.
فيروز: اي يلا افتح الباب اريد اطلع.
هَيْصَم: ولج فيروزي تعالي يمي خليني انام وبعدي عن خبالاتي مابيه حيل اكوم.
فيروز: ما اجي لتلح.
كام من مكانه اجه وكف يمي صارت عيني على الأكل.
فيروز: شيله.
هَيْصَم: منو؟
فيروز: الأكل ياعيني الأكل.
هَيْصَم: اي تعالي نامي واني اشيله معليج.
فيروز: ما انام مو نعسانة عوفني اطلع.
هَيْصَم: اريد اشوف شلون طلعين يلا راويني.
فيروز: تره ضوجتني حيل وتعبتني شنو تريد؟
هَيْصَم: اريدج، مريتي وأريد تنام يمي وين المشكلة؟
فيروز: بس مريتك ماتريد تنام يمك عوفها بحالها خلي تروح.
هَيْصَم: ماعوفها لو يصير بينه جسر ونهر اجيبها يعني اجيبها واني هَيْصَم وكلمتي ماتصير ثنين.
فيروز: راويني بلا شلون تجيبني؟
خله ايده جوه رجليه وايد جوه ضهري وشالني اني ثكيله حيل وهو حاس بهذا الثكل مع هذا بقى معند المسافه كلش قليلة يعني خطوتين بين الباب والجرباية بقيت عاقله اني ماسويت اي حركة مو لأن اخاف منه لا بس اخاف على نفسي اوكع حضنت ركبته بين أديه حتى خلاني على الفراش أجيت اكوم سحبني مقيدني بين أديه ورجليه كاتم نفسي وجابرني ابقى يمه نايمة.
: عيون تراقب المكان، هدوء ماكو اي صوت بس القطرات نفسها اللي توكع على الأرض مسببه صدى مزعج حيل إليه مخليني اتضايق وضوج وصرخ بس ماكو جواب، غمضت عيني اريد انام شويه تعبانة، الخدر يمشي بجسمي، حسيت اكو شي يوكع من حلكي ماعرف شنو، احس بالحركة، اسمع صوت خطوات قريبة مني الشال ينفتح واكو شخص يهمس يم أذني بس ماذكر شنو يحجي، دخلت بعالم اظلم كالعادة، عالم مابيه ضوه ولا صوت مجرد موت بطيئ إليه وماعرف النهاية شنو..
يتبع..
البارت 4282 كلمة..
راح تخلص القصة وماشفت تفاعل يسر تردون محبة اسوي لو شلون 👻👻..
مسائكم عافية وخير وبركة..
لأي شي يخص القصة تعالوا يمي انستا..
تابعنا وما يفوتك جديد
اختر المنصة اللي تناسبك وتوصلك الفصول أول بأول.
التعليقات (0)
جاري تحميل التعليقات...
لا توجد تعليقات بعد
كن أول من يشارك برأيه!