لتنسون التعليق بين الفقرات والتصويت للبارت والمتابعه شمعاتي ❤️
متباركين بولادة الأمام الثالث، السبط المنتجب الطاهر المطهر ابا عبدالله الحسين عليه السلام اعادهُ الله علينا وعليكم بالخير واليمن والبركة والطاعة وجعلنا يارب من الزائرين له في الدنيا الشافع لهم بالآخرة..
هَيْصَم
(الكاتبة زهراء احمد)
______
تُطاردني الأحلام التي لم احققها ، و الأشخاص الذين لا استطيع تجاوزهم، و الأماكن التي لا يُمكنني نسيانها، و الأفكار التي تغلي بعقلي ولا تهدأ.
:شعور غريب ينتابني كلما اذكر الصار، شي مثل السلسلة اللي تحاوط ركبتي وتخنكني بقوة بكل مره تمنعني من النطق لو الحركة وارجع اعيش نفس المعاناة من جديد وكأن اني أكرر المشاهد واعيشها على أرض الواقع، تعب، هلاك، دمار شامل يطغي على حياتي، ماكدر أتجاوز وصعب أنسى، ولا أكدر اتأقلم، والحل بعيد، والعقل جزع من المحاولة، اني مثل الأنسان الداوم على معصية وكلما يقرر التوبة ترجع بيه النفس الإمارة بالسوء توسوسله وتجمل الحرام بعيونه هذا اللي يخلي يعود الكره مرتين وثلاثة وأربعة بدون كلل وملل، ايامي تخلص بدون هدف، مثل رجل مسن مقعد ميكدر يتحرك هو بفراشه ومنتظر الموت اللي راح يجي كملاك منقذ من العذاب اليعيشه، تفهمين معاناتي؟
سكتت من شفت ماكو منها رد التفتت للشباك عيني صارت على الشجرة مالت النبك ابتسمت عايده بذاكرتي ايام الطفولة من جان ابويه ياخذني علمود العب بالحديقة بهيج وقت، دمعت عيني من أدركت الموجود بعقلي هسه مجرد ذكرى ميته مالها اي وجود بالوقت الحالي واللي موجود بدماغي شخص توفى من سنين وصار جسمة عبارة عن تراب.
هَيْصَم: الواضح من وجهج اليوم البارحة نمتي نومه عميقة.
الهام: ماعندي قوة حتى انضرب هيج مره ثانية.
هَيْصَم: اعرف لهذا السبب تعاوني ويانه علمود ترتاحين.
الهام: الاعتراف عليهم مو شي هين ماريد اخسر حياتي.
هَيْصَم: اذا ماخسرتيها وانتِ تحجين عن المجرمين المتعاونه وياهم راح تخسريها بالتعذيب، وحرامات شابة مثلج تموت بسبب الضرب نهاية مؤسفه حيل.
الهام: راح تخف عقوبتي اذا عترفت؟
هَيْصَم: نسويلج خصم دللي.
الهام: لتسهزء بيه اني احجي جديات.
هَيْصَم: جديات بيبيات، انتِ هنا مجبرة تسولفين كل شي تعرفيه بدون ما انطيج خصومات، مداخله مول هذا مركز شرطة يعني تحجين وراسج فوك رجليج وانتِ الممنونة.
الهام: واذا ماحجيت شنو يصير؟
هَيْصَم: غير الضرب اللي راح تتعرضيله علمود الإعتراف راح نحملج كل القضايا وتكونين المسؤولة عنهن كلهم والعقوبة تكون مضاعفة، والقرار بيدج.
الهام: اني المسؤول الأساسي ماعرفه بس اعرف الشخص اللي يوصلي المعلومات واكدر اوصلكم اله.
هَيْصَم: شنو اسمه ومن وين؟
الهام: اسمه عاكف موجود بهاي المنطقة ..... وهذا رقم موبايله.....
هَيْصَم: شنو تعرفين عنه؟
الهام: هو يسلم الكل الأوامر علمود التسليم وهو يوزع الجرعات المحدده هم والفلوس نوصلها اله هاي غير البنات لو هو يدزلنه لو احنه ندزله يعني متاجرة تكدر تكول.
هَيْصَم: كم بنية سلمتي لليوم؟
الهام: هوايه باليوم يمكن ثنين أو أكثر ويمكن ولا وحده حسب الشغل.
هَيْصَم: شلون يصير الشغل؟
الهام: اما خارج البيت او داخله حسب ضروف البنية.
هَيْصَم: كم بنية نجبرت لهذا الشغل؟
الهام: الأغلب تنجبر ماكو وحده تحب تعيش بهيج شغل قذر.
هَيْصَم: منين تجيبوهن؟
الهام: البنات اللي يتركن بيت اهلهن ويشردن لو هم يخطفوها واكو يجيبوهن من غير دول.
هَيْصَم: عاكف شنو دوره هنا؟
الهام: يستلم ويوزع، اغلب شغله هيج.
هَيْصَم: بركات وبركان منو هم؟
الهام: اللي يساعدوه، من يوزع هو مايجي شخصياً يدز واحد منهم اما يوصل أوامر لو بضاعة.
هَيْصَم: رقمه منين حصلتي؟
الهام: لأن عندي علاقة بيه اعرف عنه بعض الأمور الخاصة.
هَيْصَم: مثل شنو؟
الهام: يومية الساعة عشرة بالليل ميطلع من بيته بعد، على رغم كل سوالفه التعبانة بس هو مخلص لزوجته واي وحدة تحاول تتقرب منه يتخلص منها، يساعد الفقراء انسان حباب بس الطريق اللي يمشي بيه اعوج للأسف.
هَيْصَم: اني اموت على المتدين ربع ردن عشقي من الدنيا هيج ناس، كملي.
الهام: شنو اكمل؟
هَيْصَم: شوكت تعرفتي عليه وشلون؟
الهام: وقتها زوجي جان واكع بمشكلة بسبب دين وهو ساعدنا.
هَيْصَم: دين من يانوع؟
الهام: أقمار وخسر بيها.
هَيْصَم: شكد مداين؟
الهام: خمسمية مليون، وهيج مبلغ ماكدر اوفره اله لو ابيع كل شي عندي واشتغل خمسين سنة ليكدام، فنجبر يروح بهيج طريق.
هَيْصَم: شجعتي انتِ.
الهام: اي والا نعيش بالشارع.
هَيْصَم: وانتِ سمعتج العائلية ماتسمح اكيد كلتليه امشي واني بظهرك.
الهام: طبعاً اللي اقترح عليه عاكف هو بركات هذا جان صديقة الجديد المتعرف عليه باللعب وصار مقرب منه حيل، كله اني ادليك على شخص يوفي دينك بس بشرط تشتغل جوه ايده وشنو يكلك تكله اي، اجه اخذ رأي وكتله ماكو مشكلة المهم نخلص من الدين ومتصير علينا فضيحة، بالبداية جان الموضوع بسيط بس يسلم الجرعات للناس ولكم شخص بالشهر بعدين تطور شويه شويه وصار يوصل بنات لأماكن معينه حتى تعمق شويه شويه بالشغل.
هَيْصَم: وانتِ شلون دخلتي؟
الهام: بوقتها جنت راجعه من الدوام الساعة سته الصبح لأن جان عندي خفارة شفت واحد واكف بالباب يحجي وي زوجي اني دخلت وعبرته من كمل مختار حجي وياه دخل ورايه وكلي انو عجبته ويريدني اشتغل وياهم علمود نخلص من الدين بأسرع وقت.
هَيْصَم: شلون يعني عجبتي؟
الهام: رادني اشتغل وياهم بنفس شغل البنات.
هَيْصَم: وزوجج شنو رأيه؟
الهام: زوجي من زمان مدمن كحول وعقله مايشتغل عدل لهذا السبب شنو متكله يسوي بدون اعتراض وميفكر بالعواقب.
هَيْصَم: وافقتي؟
الهام: اكيد لا بس بعد فترة صار اللقاء وياي اني من طلعت من المستشفى اخذوني من الباب بالبداية عبالي تكسي بس بعدين لا عرفتهم هم.
هَيْصَم: شنو صار وقتها؟
الهام: تهددت باولادي ونجبرت ادخل لهيج طريق بس شغلي جان فقط توزيع بحجة ادويه للمرضى يعني ماتعدا الأمر غير شي.
هَيْصَم: يعني تنطين للمريض اللي يجيج مخدرات بحجة علاج مو؟
الهام: اي.
هَيْصَم: هاي المهنه الإنسانية اللي لازم تكونون انتوا جنود بيضاء تساهم بشفاء الناس من آلامها تصيرون السبب بالألم علمود ملذات دنيوية لابد تجي لحظة وتنتهي، عوفي الآخره والعقاب مافكرتي باولادج شنو يكون مصيرهم من امهم وأبوهم يطلعون هيج يشتغلون؟ مخطر بعقلج ولو فكرة بسيطة عن مستقبلهم وشلون تصرفج هذا راح يدمرهم؟
الهام: اني دخلت بهذا الطريق الأظلم علمودهم.
هَيْصَم: غلطانه انتِ بتصرفج هذا خسرتيهم والنهاية صارت سجنج وعقوبتج وهم راح يبقون مشتتين وماعدهم اهل يحتوهم وممكن يرحون دار أيتام، هذا مستاهل كل شي سويتيه؟ واذا نريد نحجي بعقاب الآخرة فهذا يكون بحث آخر أعمق وأوسع ونار خالدة ما منها مفر.
الهام: اعرف بس مجان بيدي شي غير اقبل وقتها.
هَيْصَم: كملي كلامج عن عاكف وشلون طورت علاقتكم.
الهام: مره جان زوجي طالع بالشغل واني وحدي بالبيت او أولادي بالدوام يعني الظهر تقريباً الساعة ثنتين ندك الباب فتحته شفت واحد لابس ملابس عاديه وسيارة واكفه بعيد عنه بمسافة صغيرة جان مخلي بخصرة مسدس مكدرت ما اروح وياهم حتى بدون ما انطي خبر لزوجي انو رايحه، بيومها التقيت بيه بنفس المكان اللي لكيتوني بيه البارحة من عدها بدت علاقتي بيه.
هَيْصَم: خنتي زوجج؟
الهام: اي.
هَيْصَم: وبعدين؟
الهام: استمريت هيج اشتغل بشكل متواصل أخير شي البارحة.
هَيْصَم: ليش ذلك البيت؟
الهام: لأن مهجور ومحد يعرفه ولان اللي عندي علاقه بيهم ناس معروفين ويخافون على سمعتهم.
هَيْصَم: يعني الكل التقيتي بيهم هناك؟
الهام: لا مو شرط.
هَيْصَم: ليش عترفتي على عاكف؟
الهام: لأن قرر يبيعني ويعترف لزوجي عن كل شي سويته بدون علمه وقطع كل علاقاته بيه.
هَيْصَم: السبب؟
الهام: لكه وحده غيري صرت قديمة اني إله.
هَيْصَم: تحبيه؟
الهام: اي للأسف.
هَيْصَم: وهذا عقابج اله؟
الهام: مستحيل اوكع وحدي الكل لازم يشرب نفس الكاس الجانوا السبب بأنو اشربه.
هَيْصَم: اني هنا انفذ طلب واحد لكل متهم فشنو طلبج؟
الهام: ابويه رجال جبير بالعمر وعنده مرض قلب اذا سمع بيه معتقله يموت واني ماريد اخسره بسبب غبائي وذنوبي المقترفتها اذا تكدر ميوصله خبر اكون ممنونة.
هَيْصَم: ماكدر اوعدج يبقى سر بس اسوي اللي أكدر عليه.
الهام: شنو راح يكون حكمي؟
هَيْصَم: ماعرف خليها للقاضي.
أخذت العنوان والمكان مالت عاكف وأخذت الفريق علمود نعتقله، كعد على كرسي المتهمين شغلت الجكاره ماخذ منها نفس وميثم يمي، هو المحقق ميثم صح بس لازم اكون وياه واعرف كل شي يصير بهاي القضية والناس اللي نعتقلهم متلبسين بيها.
عاكف: وصلتلي وصعب تكدر توصله حتى لو عرفت مكانه وبيته واسمه الكامل وبشنو متورط وجان عندك ادله كافية علمود تعتقله مراح تكدر.
هَيْصَم: ماكو شي اسمه مانكدر اذا جان ويانه رب العالمين.
عاكف: مدعوم من ناس اقوياء مستحيل تكدر تلقي عليه القبض وبأمر واحد منه انت تروح بيها وتصير الشهد هَيْصَم.
هَيْصَم: ههههههه، انتوا طغيتوا بالأرض حتى بديتوا تعتقدون الحياة والموت بيدكم مو بيد الله، خليها بعقلك اذا سكت عنكم الرب بس علمود يختبركم وبالعالم الآخر يوقف جميعكم للمسائلة والعقاب بالمحكمة العضمى المابيها واسطة ولا دولة داعمه ولا غيرها، وأن كان صعب الوصول للأكبر منك نوصل للأصغر وبنتهاء الصغير الكبير يصير بدون قوة وطاقة علمود يستمر، النظام السابق شكد طغى بالأرض وشكد أفسد ودمر وقتل وبعدين وينه هو؟ استمر حكمة 35 سنة وبالأخير؟ مات معدوم وتحاكم أمام الناس ومابقى واحد من عائلته واللي بقى ميكدر يدخل للعراق مره ثانية نفس البلد اللي شربوا من دمه، هذا ابسط مثال اما البقية انت أخبر بيهم هارون وغيره ويوسف الثقفي شلون جانوا طغات بالأرض وافسدوا أو وينهم اليوم؟ حياة الدنيا هي مجرد مرحلة مؤقته للاختبار والامتحان ما أن يخلص تنسحب الورقة وتطلع بره وهيج راح يصير بيكم كلكم، راح ينادي المنادي من سبع سماوات وتكونون تراب ماله فايدة ينداس بالرجلين، فاطغوا شكد متكدرون لابد تحين موعد المحكمة الإلاهية بيوم من الأيام وتنتهي قصتكم بشكل مأساوي مضحك للناس.
بعد كلامي مسمحتله يحجي بشي وخليت ميثم يستلم التحقيق وياخذ منه المعلومات، وأن ماوصلنا اليوم للمجرم الأكبر باجر موجود ماطول بالرية نفس ورب يحمي ويحرس ومنطي عمر ماكو شي صعب.
: كاعده بالغرفة عيني على السكف وصافنه عقلي ياخذني ويرجعني بالأفكار بكيفة، عدلت نفسي من فتحت الباب ودخلت كايله.
كلاثم: زوجج يريد يحجي وياج.
آمندا: خطيبي ماما، شوكت صار زوجي؟
كلاثم: كومي بلا كلام زايد مالي خلكج.
آمندا: شبيج وياي اليوم؟
كلاثم: شوفي بالأول وبعدين احجي وياج حركي نفسج شوي ولبسي شي بيه حظ يكول طالعة من جنازة شبيج؟
آمندا: مالي خلك وداعتج.
كلاثم: سوي لنفسج خلك شلون مجان اريدج تطلعين وردة مفتحه كدامج ربع ساعة ستعجلي.
آمندا: والله اعرف سوالفج هاي بس تردين تخلصين مني.
كلاثم: اي احسن ارتاح من ما اكابل وجهج تحركي بدون لغوة يلا.
لبست فستان احمر شتريته بخطوبتي وملحكت استمتع بيه وقتها، يصير بينصل على الجسم وخليت روج احمر غامق وفتحت شعري مشطته سريع ورفعته بقراصه هم حمره، خليت عطر وطلعت من الغرفة خليت الخجل باب الإستقبال وتشاهدت داخله جان كاعد يحجي وي امي من سمع صوت الحركه التفتلي ابتسمت بوجهه كايله.
آمندا: صباح الخير، شلونك غضنفر؟
بقى صافن بوجهي بدون جواب امي بتسمت وغمزتلي رحت كعدت بصفها تحمحم مخلي علبه مستطيله على الميز اللي كدامه كايل ومبين التوتر من صوته.
غضنفر: هاي هديه بسيطة مني لآمندا خالة.
كلاثم: ليش تكلف على نفسك ياعيني هي جيتك وسؤالك وحده أكبر هديه.
غضنفر: لا بالعكس واجبي هذا وأقل هم، اني اجيت علمود اكلكم انو حددت يوم الخميس هو عقد المحكمة اذا آمندا ماعدها مشكلة اكيد.
اجيت احجي سبقتني كايله.
كلاثم: لا يوم شنو هل الحجي بالعكس ماعدها اي اعتراض اللي تشوفه مناسب سويه.
غضنفر: اريد اسمع منها اذا موافقه لو لا، شتكولين؟
التفتتلي وعضت شفتها ونطتني خزرة من النوع اللي تسوي مغص ابتسمت وكلت بهدوء.
إمندا: اللي تشوفه.
أجيت اكوم لزمتني من أيدي مثبتتني يمها اني هسه من شفت نظراته تندمت على الساعة السودة اللي لبست بيها هيج صارت عندي لحظة ادراك متأخرة حيل وامي ماعرف شبيها حابه الموضوع متخليني أفلت بريشي أخذت نفس من كال ناقذني.
غضنفر: اني اترخص منكم اروح لشغلي اذا حتاجيتوا شي بس تصلوا بيه.
كلاثم: كلك وكفات عيوني، روح بحفظ الله وأهل البيت.
من طلع حسيت رجع الدم بوجهي اجتني ضربه منها على رجلي خدرتها كايله بفخر.
كلاثم: اي هيج من البداية وخلي الزلمة يسودن عليج شبيج يحظي اعلم بيج وميفيد.
آمندا: انتِ ليش فرحانة أكثر مني؟
كلاثم: شلون ما افرح واني اشوف بنتي سعيدة ومرتاحة وانيقة؟
آمندا: لبست هيج علمودج تره.
كلاثم: عفية ببنيتي المطيعه العاقله هسه اريد منج تبقين هيج وتصيرين احله بعد وشويه اتصلي بيه، شلونك حبيبي شخبارك اني بس ردت اطمأن عليك واخذيه بالكلام، ربي يحرسك إليه ومن هاي السوالف المفروض ما اعلمج انا انتِ تعرفين هاي الدروب.
آمندا: بيمن اخابره؟
كلاثم: فتهمنه موبايلج ضاع موبايلي عندج وخابري بيه من الصبح لليل رجلج وحلالج محد يكلج لا وهو بعد عيني شلون مؤدب ومحترم قبل ميجي يتصل ب هَيْصَم ويخلي اخوج يتصل بيه وبعدين هو يتصل يكول راح اجيكم، ربي يحفظه لزهرة شبابه ويحفظج وياه وتخلفون درزن جهال.
آمندا: ومنو يربيهم؟
كلاثم: امي، دكومي منا لابارك بيج انتِ مال دعوة.
كمت صاحتني.
كلاثم: تعالي شوفي شنو هذا شجايبلج.
فتحت العلبه شفته موبايل ابتسمت هي ضحكت بصوت عالي كايله.
كلاثم: احلف عليه مجان ناوي يعقد محكمة بس من شافج لابسة احمر نثول.
آمندا: استغفر الله ماما شبيج هاي الأيام؟
كلاثم: ليش اني مجذبه؟ والله نسطر من شافج جان يدعي دعاوي بداخله علمود اكوم وينفرد بيج بس اني اعرف هاي السوالف ماتعبر عليه من اخوج وشيلي ايدج.
آمندا: ليش هَيْصَم شنو مسوي؟
كلاثم: ختلات يابو ختلات فوكاها يكلي مو هسه ازوج كتله عمي عرسوا قبل ميصير عدكم طفل أو وين انطي وجهي من العالم.
آمندا: هههههه، مخليه عينج على الناس انتِ.
كلاثم: اذكر ابوج بأيام شبابنا جان يجي يوكف يم الباب ويشمرلي ورقة أو وردة وياها ويروح، من افتحها الكاها رسالة مال حب، جان حب يجنن وقتها أو مواعيدنا كل شهر مره ابقى منتظرته على جمر شوكت يجي وينطيني ورقة حتى لكفتني امي وطلعتله كلتله متخاف على عرضك تجي وتشمر ورق لبنات الناس بيك خير جيب اهلك وخطبها مو تجي تتغزل من وره البيبان.
آمندا: وشنو سوه؟
كلاثم: نفس الاسبوع جاب اهله واجه وخطبني وماطولنا وربج بارك بزواجنا خلال شهرين كل شي تم ونزفيت لبيته.
آمندا: بعدج تحبيه؟
كلاثم: شلون لعد، اني ما انام بالليل اذا ماخلي صورته جوه راسي وادعي ربي يقرب موتي علمود انجمع بيه هناك يمه وكحل عيني بشوفته بعد كل هاي السنين.
آمندا: عمرج طويل يارب ربي يحفظج النه ويرحم الوالد.
كلاثم: يلا عوفج من كل هاي السوالف وروحي غيري ملابسج حتى نسوي غده عاجبني اطبخ وياج اليوم.
: واكفه يم الشباك مالت المطبخ وصافنة وبالي راح لبعيد.
ابو رضا: ابن عمج يريد يحجي وياج كلمتين انزلي جوه وسمعي اللي يريده وتنفذيه هم.
نزلت بدون حيله ماكدر اسوي شي خاصة بعد ما تأكدت نفسي حامل صار الحمل عليه ثكيل أكثر وكمت اخاف على روح موجوده بداخلي واني ماعرف شنو مصيرها.
ساجد: مرحبا بنت العم.
فيروز: وعليكم السلام.
ساجد: ولو اني ماسلمت بس يلا مو مشكلة تمونين.
فيروز: ياريت تختصر شنو تريد.
ابو رضا: احترمي ابن عمج وهو يحجي وياج ولتحجين كلام زايد.
فيروز: والله خليني اعترف بعمي بالأول يلا اعترف بأبنه.
ابو رضا: ولج شو صاير السانج طويل يريد كص.
فيروز: تقرب مني وشوف وحق الله ادمر احوالكم لا عبالك اني ساكته لحد الآن تره مجرد منتظره الفرصة المناسبة علمود اخلص وأن شاء الله عن قريب ينتهي سجني بهذا البيت.
ساجد: اهدي عمي اني احجي وياها، الفرصة الترديها اني انطيج أياها على طبق من ذهب بس اريد موافقتج بالأول.
ابو رضا: غصباً عليها توافق ورجليها فوك راسها ماعدنا بنية تكول لا.
ساجد: خليني اتفاهم وياها بدون عصبيتك، شوفي خيتي اني موظف بشركة ويردون وحده تعرف حاسبات وعرفت انتِ خريجة دائرة واقتصاد كلت ماكو غيرج وحده تليق بهذا المنصب.
فيروز: ماريد اتعين.
ابو رضا: تتعينين وبدون حرف زايد ما اصرف عليج من جيب ابوج انا.
فيروز: محد عاتب عليك رجعني لزوجي هو يصرف عليه.
ابو رضا: حلم فرعون بالجنة، موعدي وياج نفسه نروح للمحكمة علمود الطلاق.
فيروز: واني ماطول على ذمة رجال مستحيل اقبل اتوظف، ماطلع من شوره ماريد رب العالمين بعدين يدخلني نار جنهم علمود طمعكم.
ابو رضا: مجبورة مو بكيفج والا شايفه الحبل اللي نشر عليه الملابس؟ وحق ربج انزله وكطعه عليج ومايحتاج اشرحلج أكثر عن الاكدر اسويه اذا هو الرائد مالتج ماحجه وياي شي وصار الاريده انتِ تعصين كلامي!!
ساجد: لتهتمين اكو فترة اختبار مدتها عشر ايام بس تنتهي هم يقررون يردوج لو لا، باجر اجي عليج الصبح علمود نروح للدوام سوه وبعدين أبنية ويانه تصير نفس المنطقة تكدرين تشتركين وياها بالخط.
ابو رضا: هاي هي باجر تجهز وتروح للدوام بدون حرف والا تعرف شسوي.
خفت على اللي بطني وطاوعتهم وثاني يوم رحت للدوام مشتغلت عدل وسويت نفسي كل شي ماعرف بس علمود ما استمر بالعمل بس هم كالوا نعلمج بعدج جديدة وعلمود ابن العم اسم الله خلوني وياهم ومر اسبوع حتى وصل ذلك اليوم، خلص الدوام والناس رجعت لبيتها واني الوحيده واكفه بالشارع انتظر الخط يجي يوصلني للبيت لمحت من بعيد سيارة سوده مظلله عرفتها إله، شعور داخلي تولد وقلبي كام يتراقص يمكن خوف ويمكن اشتياق وحب، نزل من السيارة متقدم ناحيتي مشيت بخطوات سريعه مبتعده عنه وماكدر اتحكم بدكات كلبي السريعه، ما انكر خوفي الجبير من عنده بعد سوايتي، فجأة نسحبت أيدي وكف مقابيلي ينظرلي بعيونه السوداويه المسلوب منها الرحمه نزل راسه هامس قريب أذني.
هَيْصَم: الوعود اللي تنكث تتوقعين التوبه بعدها تكون مقبوله؟
رفعتله راسي كايله بتساؤل مليان قلق من القادم.
فيروز: شنو ناوي تسوي بيه؟
طقطق ركبته مبتسم بتوعد، مخلي أديه بجيب البنطلون دفعني من صدري اجيت اوكع على وجهي لزم أيدي ساحبني بقوة ناحية السيارة فتح الباب مدخلني الها وقفله صاعد بالاتجاه الثاني التفتلي و الشخصيه تغيرت 180 درجه مو هو نفس الانسان العرفته من قبل، فتح الجكمجه مطلع باكيت جكاير قربها من شفايفه مورثها اخذ منها نفس وزفره بوجهي جسمي كله يرجف اوصالي ماحس بيها والنفس ماعرف شلون اسحبه، دموعي ماكدر احسبهم، ردت انطق كلمه اشرلي مخلي اصبعه على حلكه بخزرة، وصلنه لمكان مقطوع فتح الباب ونزل واجه فتح بابي منزلني سحل،
الهدوء والرزانه والعقل كلهن اختفن من عنده وهسه اشوف كدامي شخص ثاني مختلف تماماً، اجيت احجي وبرر وسولفله كل شي صار وياي منعني وهو يخلي المسدس على راسي ويكول بأبتسامه مليانه مكر وخباثه.
هَيْصَم: عندج خيارين اما اموتج هسه لو تجين لجحيمي وفي كلا الحالتين انتِ ميته.
فيروز: هَيْصَم خليني احجي العندي لتستعجل فدوه الله يخليك بس اسمعني وبعدين سوي اللي يعجبك موافقة حتى لو تموتني.
هَيْصَم: اريد سبب واحد يمنعني ما اموتج هسه.
فيروز: حامل.
سكت حسيته هدأ شوي وراح مبتعد عني واكف يم السيارة دخل بيها واني رحت صعدت يمه اخذ نفس كايل.
هَيْصَم: ليش تشتغلين؟
فيروز: لان جبروني اشتغل.
هَيْصَم: هذا درس الج علمود تعرفين محد حبج بكدي ولا واحد خاف عليج مثلي.
فيروز: ابو رضا يريد يخلينا نطلك.
هَيْصَم: خلي يسوي اللي يريده وانتِ استمري بالحياة ولا كأن شفتيني ليوم المحكمة.
فيروز: البارحة رحت قدمت شكوى.
هَيْصَم: اعرف كل شي يصير من اول يوم اجيتي بيه لهنا لليوم ماكو داعي للشرح.
فيروز: يعني ماراح تاخذني هسه؟
هَيْصَم: لتسألين اسأله ما الها جواب.
فيروز: هَيْصَم.
هَيْصَم: اششش، اسمي طاهر على السانج الخاين لتنطقيه.
بلعت كل كلامي بعد هاي جملته مكدرت اسوي شي غير انو التزم الصمت وصلني للبيت ونزلت وهو راح، ماعرف شنو يخطط وشنو بعقله وعلى رغم أسلوبه الجاف بس جنت كلش سعيدة واخيراً اجه وراح يخلصني من ذولي الوحوش.
رويم: ماما دا احجي وياج ليش متسمعيني؟
ابتسمت نازله لمستواها حضنتها مقبلة وجنتها.
فيروز: الحلوة شنو تريد من امها؟
رويم: أكل.
فيروز: اصيرلج أكل، شنو تحبين تاكلين؟
رويم: اندومي.
فيروز: لا مو زين غيره.
رويم: ليش مو زين، هَصَّار ياكله.
فيروز: معليج بأكل هَصَّار اكلج انتِ يختلف.
رويم: مثل أكل بابا؟
فيروز: اي يعمري مثل اكل بابا.
رويم: اريد اخابره، خابريه.
فيروز: ميصير تحجين وياه، بالدوام هو هسه.
رويم: ميخالف بنته اني.
فيروز: هسه هو شويه ويجي تعالي نسولف اني وانتِ.
رويم: اريد بيبي.
فيروز: ماما لتعبيني وياج منين اجيبلج بيبي اني، روحي تابعي فلام كارتون واني اجهز الغدة ماشي.
رويم: لا يمج.
فيروز: بعد عندت بنت هَيْصَم على منو طلعين هذا الشبل من ذلك الأسد.
رويم: ياشبل؟
فيروز: ابوي، كومي روحي العبي مالي خلك ابد والله.
رويم: شبيج؟
فيروز: شبيه ياماما مابيه شي بس كومي العبي هناك خليني اخذ نفس شويه وجي يمج.
هي راحت واني تربعت بالكاع مالي خلك فد مره والدنيا طلعت من عيني كلها تذكرت اول يوم اجيت بيه لهنا ومنا اني اصلاً ضايجة صار عندي واهس وكمت ابجي بجيت وكأن اني بمجلس عزاء من كد ما بداخلي هم جبير ماكدر اشرحه ولا اعبر عنه بجميع الطرق الممكنة، خلصت هاي النوبه الحزينه مسحت دموعي وغسلت وجهي ومثل الشاطرة رحت احضر غدة ولا كأن قبل دقيقة جنت الطم، هرمونات راح تجلطني بنهاية الطريق.
حوري: ماتعبت؟
محمد: من حبج لا والله.
حوري: هاي كلاواتك مو عليه يحلو، انت تعرف قصدي لا تستغبي.
محمد: هاي المهنه هيج ماكدر ما اكون اناني مرات وافكر بس بمصلحتي.
حوري: الدفاع عن المجرمين نهايته شي مترضاه لنفسك محمد، دافع عن الناس المظلومه وترك هذا الطريق.
محمد: اني اشتغل بالمركز يعني حتى لو ما اريد المحكمة هي توكلني.
حوري: اشتغل وحدك كمحامي مستقل مو صعبة.
محمد: اني اسمي صار رنان بهذا المجال ماكدر اترك تعب هاي السنين بلحظة.
حوري: بس بلحظة تترك الحياة بكبرها، خلي نكون واقعين شنو تجاوب ربك لو سألك؟
محمد: هذا شغلي.
حوري: مكانك يكون جهنم.
محمد: حوريتي، هوايه أمور انتِ ماتعرفين عنها ابقي غافله احسن لأن اكو أسرار توديج للمصحة النفسية اذا كتشفتيها.
حوري: هيج صعبة؟
محمد: تخليج تكومين من النوم تهزين جتف وترجعين تغفين.
حوري: هاي خالة ساجدة مو حلم.
محمد: هههههه، كومي حضري ملابسي لازم اطلع هَيْصَم تصل بيه.
حوري: صاير هوايه تشتغل وي هَيْصَم شنو الموضوع؟
محمد: اني ماكول لا للفلوس حتى لو اتعامل وي حرامي.
حوري: هاي اول مره اعرف بيك طماع لهاي الدرجة.
محمد: مع الأسف عليج زوجج وعشرة عمر وياي يلا عرفتي بيه طماع؟
حوري: عندك فلوس هوايه بعد على شنو طماع ماعرف شنو سوي بيهن؟ عوف الحرام ميصير تجيب للبيت فلوس حرام متخاف الله بينه انت؟!
محمد: احنه منخلص من هذا الموضوع يوميه فاتحته وبعدين؟
حوري: بعدين اترك هذا الطريق تره صبري نفذ وياك والله العظيم الربع دينار اذا شفته عندك احركه وتعرفني اسويها.
محمد: سويها فلوسي فدوه الج كلي فدوه الج.
حوري: عوفني من سوالفك احجي بشي جدي اني.
محمد: جدي، عمي، خالي، اني ما اترك هذا الشغل لنهاية عمري وعلى راحتج قبلتي أو رفضتي رأيج مو مهم.
عافني وطلع، اني مو ضد ياخذ قضايا ابداً بالعكس ادعيله بشكل مستمر بالتوفيق والرزق بس اتخبل من يكلي راح اساعد مجرم، اني اعرفه يجيب ادله من جوه الكاع بس علمود يربح القضية وأن كانت لواحد قاتل، تعبت واني احاول وياه يترك هذا الطريق بس ميفيد تعبني، من عرفته لليوم هذا شغله ولا يتوب ولا يبطل والحل ماعرف شنو عجز الساني وهو ولا كأن يسمعني نهائياً.
هَيْصَم: شبيك؟
محمد: شغلي شبيه؟
هَيْصَم: وين واحد شامرته الدنيا بدفره وموصلته لنهاية طريقه بيها دافع عنه.
محمد: تعبت هَيْصَم محد يكدر يفهم شغلي ابد ومرتي مخليه عقلها ويايه مليت.
هَيْصَم: ماتفهم طبيعة العمل عوفها براحتها.
محمد: فوكاها حلفت تحرك فلوسي شوف المصيبة.
هَيْصَم: حاله عصبية لتهتم الحجي النسوان اسمع وسكت.
محمد: اني مو مثلك ماكدر اتحمل أعصابي بسرعة تنفجر وتعارك وياها.
هَيْصَم: مستحيل حياتك تستمر هيج، العلاقات تحتاج هوايه من التطنيش باوع بوجهه وابتسم بس كلامها لتخلي يوصل لأذنك بعدين احجي وياها كلام حلو وشوف إذا ما ماتت عليك.
محمد: انت تسوي هاي الطريقه؟
هَيْصَم: اني ما اتعارك اصلاً ماعدنه شي نتعارك عليه.
محمد: الله يسعدك.
هَيْصَم: ويسعدك.
محمد: ليش خابرتني؟
هَيْصَم: اريد اشوف وجهك الحلو.
محمد: هههههه صدكتك يلا احجيلي شنو تريد؟
هَيْصَم: اريد منك تستلم قضية عاكف ومتخلي محامي غيرك يستلمها.
محمد: ليش؟
هَيْصَم: حتى مايطلع من السجن.
محمد: تكدر تخلي واحد غيري يستلمها ليش اني؟
هَيْصَم: لأن علاقتك بيهم قوية يعني محد يشك بيك.
محمد: راح ينزل سوكي بسببك.
هَيْصَم: اني اعوضك لتخاف.
محمد: راح اخابر مرتي وحلفلها فلوسي حلال.
هَيْصَم: النسوان ميصدكن بالشي المايقتنع بيه عقلهن، انت عقلك مفرمت على شي معين وبس هو يشغل دماغك لكن هن عكس يفكرن بالف شغله بالدقيقة ويلكن الحلول لكل مشكلة بسهولة عكسنا.
محمد: يعني تعترف مرتك احسن منك.
هَيْصَم: اكيد طبعاً، اني ماكدر اهتم بأكثر من شغلي، اما هي متحملة مسؤولية البيت ورويم وغير هذا اكو طفل قريب يجي للحياة، وبعيد عن مرتي امي شلون ربت وكبرت وتعبت وهي بدون رجال يكون سند الها.
محمد: ليش وانت وين رحت؟
هَيْصَم: اني من ستشهد ابوي عفتها كلها ورحت قدمت على العسكرية وصرت ماروح الا بالمناسبات، ماطقت البيت وهو ماموجود بيه بس هي لا كعدت وتحملت وربت وكبرت وما شكت بيوم بالعكس من تشوفني مهموم ومكسور تجي تسندني وتقدملي النصيحة والكلمة الحلوه.
محمد: اني اعرف عندك اخ صغير وينه؟
هَيْصَم: هاي السنة تخرج، عايش بالخارج راد يرجع واني منعته ماريده يكون ورقة ضغط عليه وانت تعرف شغلنا شنو.
محمد: يعني ميرجع ابد؟
هَيْصَم: ماعرف المستقبل شنو يصير بيه بس لحد الآن لا ما اعتقد يرجع.
محمد: خير ان شاء الله.
هَيْصَم: ان شاء الله.
غضنفر: هلا بمريتي، وحبيبتي، وكلبي وعمري وجلاويي وجبدي، وضلعي وروحي.
من كلامه خجلت وبمكان ما اجاوبه سديت الخط وغميت نفسي وصارت عندي لحظة ادراك شبيه متصله بيه شنو هاي الخفه هسه شيكول عليه، بعدين تذكرت هاي شبيج غير زوجج وعادي تحجين وياه، بدوامه التفكير صحاني صوت الموبايل وهو يرن شفته هو طبعاً الجهاز مخلي بي رقمة لهذا السبب تصلت بيه واصلا ماعرف ليش تصلت لأن أني ماعندي سالفة وياه هسه من يسألني شنو اجاوبه؟ تحمحمت وجاوبته.
آمندا: الو.
غضنفر: ليش سديتي الخط؟
آمندا: مو لأن.. مخلاني اكمل قاطعني.
غضنفر: اعرف بدون متحجين شي، خجلتي.
آمندا: لا مو هيج.
غضنفر: اي هيج لتناقشيني، المهم خلينا نسولف بلي ردتي يروحي شنو؟
آمندا: مردت شي بس اتصلت بدون سبب.
غضنفر: مشتاقتلي؟
آمندا: اي اقصد لا.
غضنفر: ههههههه، اي اي، احبج واموت عليج وعشقج، النفس اليصعد وينزل انتِ، اويلي شيصبرني ليوم الخميس مابيه اتحمل بعد اريدج يمي بأسرع وقت ممكن.
آمندا: عفية لتحجي هيج والله اخجل.
غضنفر: ابوس اليخجل انا، شنو رأيج نطلع نتعشا سوه؟
آمندا: مادري بكيفك.
غضنفر: نص ساعه واني يمج جهزي نفسج يا شمسي ونهاري وقمري وصحوتي ومنامي.
ابتسمت خجلانه من كلامه وماعرف شنو ارد عليه بس دكات كلبي ماتنعد، سديت الموبايل طالعه من الغرفة اكل لأمي حتى احضر نفسي واطلع وياه، دا احس نفسي كاعد ارجع للحياة مره ثانية والسبب هو، عرف شلون يطلعني من حزني والكآبة الجنت بيها، عرفت انو اني ختاريت صح من قبلت بيه ومرفضته، الحب هذا من يطلعك من الظلمة للنور ويدعمك ويسندك وقت حزنك أو وقت انت متكون طايق حالك بيه، من تكون بحاجة كلمة حلوه وتشوف شخص كامل بكل صفاته حلو يجنن يكون وياك بكل خطوة تخطيها، ينطيك من طاقته أو وقته وبدون متنطق بحرف هو يعرف شنو بيك ويحاول بكل جهد يطلعك من اللي انت بيه وقتها لازم تعرف انو اختيارك صح، لان الحب بعمره مجان بالكلمات بل بالأفعال هي الوحيدة اللي تثبتلك الشخص المقابل يحبك من صدك لو لا مجرد يضحك عليك ويضيع وياك وقت لا أكثر.
رويم: بابا ماما تحجي عليك.
فيروز: ملعونه شوكت اني حجيت؟
هَيْصَم: خليها تحجي بشنو امها ماخذه غيبتي؟
فيروز: ما حاجيه عليك شبيك.
هَيْصَم: بنيتي ماجذب.
فيروز: واني اجذب يعني؟
هَيْصَم: خليني اسمعها شنو تريد انطيني مجال.
فيروز: رويم لتحجين ولا حرف.
هَيْصَم: رويم احجي وأخذج وياي تشوفين هَصَّار.
رويم: تكول هذا الشبل من ذلك الأسد تحجي عليك.
هَيْصَم: هههههههه، امج تكول عليه اسد؟
رويم: اي متدري عيب الأسد حيوان شلون تكول عليك هيج عضها.
هَيْصَم: اعضها وليهمج غالية والطلب رخيص.
فيروز: شوف شلون تذكر السالفة مالت الصبح شكد ملعونه باعت امها علمود تشوف هَصَّار.
هَيْصَم: على هذا كلامج معناها حاجيه عليه شي كدامها غير هذا.
فيروز: والله ماحاجيه عليك اي شي.
هَيْصَم: صدكتج.
فيروز: بكيفك لتصدك.
هَيْصَم: هيج الحجي؟
فيروز: اي هيج طبعاً.
هَيْصَم: اوكي.
ابتسمت واني اخذ رويم علمود انومها خليتها بحضني وبقيت اسولف وياها شويه غفت متعودة على هيج من وهي صغيرة، غفيت بصفها بدون ماحس حسيت على ايده تحركني فتحت عيوني شفته واكف على راسي مأشرلي اكوم وياه غلست مابيه حيل اتحرك من مكاني بس هو منو هَيْصَم بعد اذا ماروح برضاتي ياخذني غصب.
لحظات هادئة مثل آخر لحظات قبل نهاية العمر، يوكف كل شي بلحظة صمت وتبقى بعقلك فكره وحيدة، معقولة اللي ديصير حلم وبعد شويه اصحى منه لو هذا الواقع المرير اللي لازم اعيشة..
اسرار آن الآوان لكشفها، ودمار عم المكان بسبب ظلم وجور أحدهم، وانا الآن أقف على مشارف النهاية لكي اقول جميع الرحلات لابد أن تصل وتهبط بالمكان المطلوب وان طال الطريق..
يتبع..
البارت 4429 كلمة..
تفاعلجن بقى بارت وأحد راوني الحماس شمعاتي..
مسائكم خير وعافية او ورد وسنة حب سعيدة للجميع تنعاد عليكم بألف وعافية.
لأي شي يخص القصة تعالوا يمي انستا..
تابعنا وما يفوتك جديد
اختر المنصة اللي تناسبك وتوصلك الفصول أول بأول.
التعليقات (0)
جاري تحميل التعليقات...
لا توجد تعليقات بعد
كن أول من يشارك برأيه!