هَيْصَم الفصل السبعون 70 - بقلم Zahraa

لتنسون التعليق بين الفقرات والتصويت للبارت والمتابعه شمعاتي ❤️

هَيْصَم
(الكاتبة زهراء احمد)
______

العمر عبارة عن لحظات
مثل ماهو بدايات هناك نهايات
على سكة القطار ننتظر مسافر آت
هل هو حبيب ام صديق ام مجرد وجوه عابرات؟
لحظة صمت دعنا نسمع الأصوات
محب اقترب ليعلن الوصل بعد الشتات
وتحويل الحزن لفرح انها الولادات
من كان بالأمس شخص غريب اصبح اليوم زوج وحبيب
واستجاب الدعاء ربي المجيب
ووصل القلب بمن يهواه هو لكل عله طبيب
آن الآوان لنغلق البيبان فهل انتم مستعدون؟
لنهاية الحكايتان؟
بقلمي زهراء احمد..

هَيْصَم: شلون هربت من السجن؟

لّهيم: من يكون الداعم شخص معروف وعنده واسطه تكدر تحتل السجن بالكامل وتصير الآمر الناهي بيه مو فقط تطلع منه، اني ماطفرت من السياج لاا طلعت رافع راسي من الباب مثل ماسوو الهوايه.

هَيْصَم: اذا انت هيج شجاع وكفو ليش ماطلعت خارج العراق حتى ميتم إلقاء القبض عليك؟

لّهيم: وقصتي وياك شلون انهيها؟

هَيْصَم: وشنو ستفاديت من كل اللي صار؟

لّهيم: يكفي حركت كلبك لمدة اربع أشهر وبعدني بأحلام اختك رعب متكدر تخلصها منه.

هَيْصَم: قبل جان موضوعي وياك نص شخصي فمجان مهم شكد تنسجن بس هسه لا الموضوع يخص مرتي واختي ومايكون اسمي هَيْصَم اذا ماخليتك تعفن بالسجن.

لّهيم: مو صعب اطلع منه وداعتك.

هَيْصَم: نشوف قوتي لو قوتك وكلمة منو تصير بالنهاية.

: جنت طالعة وي امي علمود نشتري كم شغلة للعرس لأن مجان غضنفر يريد نتأخر هوايه، واني ما عارضت، اجت يمي مريه ضربتني على جتفي التفتت الها فكرتها تريد من عندي شي كلتلي ابن بنتي ضاع من ايدي اذا تكدرين تجين تشوفيه وياي رجليه يوجعني وماكدر امشي، احنه بالسوك وهوايه ناس، رحت وياها من باب الإنسانية ولأن هي مبين عليها من اهل الله ومره جبيره حيل وين يجي أبالي تكون هي سبب دماري وعذابي؟ دورت عليها بقيت امشي وياها حتى أدركت وصلنا لراس الشارع جان اكو سيارة بيضه واكفه على أطراف الرصيف كلتلي الزمي ايدي وعبريني اروح اكول لهذا الوليد بلكي شافه اني ما ستوعبت الموضوع ولا خطر بعقلي اصلاً هاي خطة علمود انخطف وهي وسيلة حتى ينفذ عمليته القذرة بيه، رحت وياها لازمه ايدها من وصلت للسيارة حاجته واني بقيت منتظرتها حسيت اكو حركه ورايه اول مالتفتت نسحبت من أيدي لداخل السيارة وقفلوا الباب جانو ثنين واحد يسوق والثاني لابس لثام كاعد بصفي ومقيد حركتي، خله مخدر على خشمي ومن صحيت لكيت نفسي بغرفة ظلمة بيها شباك صغير بس الدنيا ليل وماشوف شي، التعذيب جان نفسي اكثر من جسدي، صوت فار بالغرفة وصوت قطرات المي التنزل بتناغم وحده تتبع الثانية مسببتلي نوبة بكاء حادة، اصرخ اصيح ولا كأن جان علاجي الوحيد علمود اسكت هو المخدر، تحرش بيه كذا مره بس مجان يسوي شي غير يفتح شعري ويشم بيه وبعدين يضربني الإبرة، يجي يوميه بالليل والصبح لأن الجو يكون اظلم وماكدر اشوف وجهه عدل ينطيني اكل ويسوي حركته ومن انام ماعرف شنو يصير بعدين، جان عقلي متوقف عن العمل بس اريد اطلع، نسيت الراحة واحس نفسي صرت قذرة بس لأن موجوده هنا، مجنت مربوطه بحبل لا جانت اكو سلسلة رابطها برجلي واكو حمام بالغرفة بس مع هذا مخليني على كرسي ورابط خصري بسلسلة ثانية بيه حتى ماكدر اتحرك، ماعرف شنو سبب هوسه بالسلاسل حتى لبسه بيه سلسلة، آخر يوم كعد مقابيلي وحجه ويايه قبل ميضربني الإبرة لحد الآن كلامه يرن بأذني وكأن سمعته قبل شويه.

لّهيم: حبيتها اربع سنوات، تقدمتلها أكثر من مره، جنت اتمنى تصير مرتي ام بيتي ودائماً اتخيل شلون نعيش سوه، شنو اشتريلها وشنو اجيبلها وشنو نسمي أولادنا، بس جانت حقيرة كلما أقرب منها خطوة تبعد عني ألف، حتى اجه اليوم الخطفتها بيه ردت اخذها يمي ونعيش اني وياها بعشنا الذهبي بعيد عن الدنيا والبيها، عفت اهلي وشغلي وناسي وشهادتي وختاريتها بس هي جانت خاينة وختارت واحد ثاني،

كام من مكانه متقرب مني بعصبية لازم اكتافي ويهز بيه بكل قوته حتى حسيت نفسي دخت من حركته هاي.

:ليش ماحبتني ليششش؟ ليش فضلته عليه وختارته هو؟ ليش مقبلت تكون مرتي؟ جان معشت هاي المعاناة ومانجبرت اسوي عمايل سودة بس علمود احصل عليها، ولا جان انتِ هنا تتعاقبين بسببهم، هي السبب اي هي السبب بلي بيه اني اليوم هي السبب ماكو غيرها، دمرتني وذبحتني وهي تكون السبب بموتي بيوم من الأيام، ماكدر اطلعها من بالي مو بيدي تفهميني مو بيدي أريدها، مستعد اذبح وموت ألف واحد وميرفلي جفن بس علمود تصير من نصيبي، شايفه هاي السلاسل؟ ذني كلهن حبها شلون مقيدني ومحاوطني من كل إتجاه ميخليني اعيش مرتاح، ولو رجع بعدني عنها اذبحها وذبحه وذبح نفسي حتى محد يتهنى بيها لا اني ولا هو وماتعيش وتنزل دمعتها عليه، احبها والله احبها ليش متفهم؟ ليش؟

غمضت عيوني واني تعبانه حيل احس النفس اللي أخذه يوكف بنص الرئة ماكدر ازفره براحة ولا أدخله لريتي بشكل طبيعي، كل شي اظلم بعيني مو لأن الدنيا نص الليل لا بس اللي عشته خلاني اشوف الحياة بدون قيمة، أدركت اني محد يحبني ويريدني لأن صار سبوع كامل ومحد ذكرني بيهم وكال بنيتنا هنا شنو تاكل وشنو تشرب وشلون يخلص يومها وبيا وضع تاخذ عينها نوم ومنو الشخص الخطفها وليش، التفكير تعبني أكثر من تعبي وكرهت الكل، هَيْصَم وغضنفر وخواتي وحتى أمي لأن ولا واحد بيهم سأل عني وذكرني، جان الجو هدوء تام، عالم مظلم، سواد حالك، نفس بطيئ، ونات خفيفة، نفتح الباب بهدوء، جنت واكعه على الأرض والبرودة تسللت الجسمي، تعب، عذاب، حزن، أمل مفقود، عيونه قابلت عيوني، اقترب مني بلهفة شالني من مكاني حاضني لصدره سمعت صوت بعيد وسلاح نسحب ناحيتنا، صوت رصاصة طلعت واني دخلت بعالم اسود ماعرف من اي مسدس ومنو تصوب بيها، مر وقت ماعرف شكد حسيت اكو أيد لازمه أيدي وتضغط عليها بكل قوة فتحت عيوني لكيتهم كلهم واكفين على راسي مادري اذا جانت الصورة حقيقية لو مجرد وهم خلقها عقلي بسبب التعب رجعت غفيت مره ثانية، صار العشته عبارة عن كابوس يلاحقني كل ما تغمض عيني وصوت الرصاصة بأذني يرن، واحد نقتل بس منو ماعرف، غضنفر اللي نقذني من عذابي لو الخاطف مادري كل اللي اعرفه اريد ارتاح بدون عذاب، واخذ نفس بهدوء واحس بالأمان، كعدت من النوم بعد فتره ماعرف شكد لكيته بس هو كاعد يمي حاضن أيدي ودموعه على خده حسيت نفسي سعيدة واكو شي بداخلي نبض بقوة شفته المنقذ الخلصني من العذاب العشته، حضنته بكل ماعندي من قوة وبجيت بصوت عالي بعدين اجتني صفنه فجأة بتعدت عنه وتغيرت نظرتي ناحيته وتذكرت شنو عشت هناك وشنو جان شعوري الهم كلهم، واكو واحد يحجي بعقلي وين جان هسه يلا تذكر عنده زوجة لازم ينقذها بعد ما مر اسبوع كامل وهو مايعرف عني شي، هوايه افكار تضاربت بعقلي خلتني اعتزل الكل وما اتواصل وي بشر، خواتي اللي هن خواتي شكن بشرفي وخلني اني اشك بنفسي هم، هذا الشي خلاني احاول ابتعد عن غضنفر هوايه وقرر انفصل عنه لأن ماعرف إذا اني بعدني محافظة على نفسي لو لا خاصة وهو يضربني مخدر يوميه وشنو يصير ويايه بعدين الله اعلم، فكرت اروح للدكتوره من شفت اصراره على الزواج مني بس اخاف اروح ماكدر اسمع شي داخلي ميريد يستوعبه.

خاتون: الصار كله انتِ ما الج ذنب بيه، اللي خطفج شخص مريض نفسي معالج نفسه وحاول يخلي السبب بغيره وهذا الشي فاقم حالته وخلاه يضن اخوج مذنب بلي صار وياه لكن هذا غلط اخوج ماله ذنب والصار وياج مو ذنب احد بيكم ذنب الخاطف فقط، ميصير تعيشين بحزن بسبب غلط انسان ثاني، اني أعتقد انو هو ممتقرب من عندج لأن هيج اشخاص بكد ميكونون مؤذين يكونون حنينين والدليل هو يجي ويسولف وياج وميأذيج بضرب وغيره، وأن كان كلام خواتج صح لتهتمين لأن حتى وإن صاير شي لا سامح الله جان بعدم معرفتج فإذا الذنب الصار مجنتي مسؤولة عنه ورب العالمين مراح يحاسبج عليه ليش تعيشين بألم وتعذيب ضمير؟ احفظي شغلة الأنسان يعيش مره وحده بالعمر واليوم اللي يخلص مراح ينعاد مره ثانية استغلي وستمتعي بكل لحظة من عنده ولتأذين نفسج وشريكج باوهام مالها صحة ولازم تعرفين الناس مراح ترضى عليج شنو مجان، تصالحي وي نفسج وحبيها بعيوبها وحسناتها وشويه شويه عدلي بالأمور اللي تردين تغيريها لأن انتِ حابه تغيرين مو لأن احد كلج، اما بشنو تهموج وشنو وجهو كلام الج، عندج اذنين بوحده تسمعين ومن الثانية طلعين لتخلين احد يأثر عليج باعتقاده وتفكيرة الغلط ماطول اللي صار مابيه معصية لرب العالمين ومابيه اذية لأحد، وتذكري اذا جان ربنا يغفر كل الذنوب والخطايا ويفتح ويانه صفحة جديدة منو احنه ومنبدي صفحة جديدة وي الناس؟

آمندا: صعبة دكتورة، صعبه حيل ماكدر ابدي من جديد وي اشخاص اذيتهم بكلبي جبيرة.

خاتون: ابدي بنفسج وراح تشوفين التغيير، سامحي مو لخاطر احد بس علمود نفسج وحتى تعيشين براحة أكثر بدون حزن وهم وتفكير، المسامحة هي راحه للقلب والبدن والعقل، اثرها يجي عليج بالأول قبل ميجي للشخص الثاني، قصدي بالمسامحة تعبرين الصار ومتعيشين بيه على طول مو القصد ترجعين علاقتج نفسها وياهم، نصيحتي علمود صلة الرحم خلي التواصل سطحي جداً لان الشك بيج وبشرفج مره ومطبطب عليج بوقت انتِ محتاجة بيه كلمة وحده هذا مابيه خير حتى يكمل وياج الطريق لأن بأي لحظة ممكن يسوي وياج نفس الشي وترجع اذيتج نفسها، من تكونين محتاجة احد تحجين وياه وتسولفين اللي بداخلج عندج سجادة وفضفضي لربج اكو هوايه اشياء إيجابية مثل ربنا كريم يسمعج بدون ملل ولا راح يكول كافي دخت، وحنون ينسيج همج وينطيج الراحه والسعادة والعوض.

آمندا: كلامج ريحني هوايه ماعرف شلون اشكرج.

خاتون: اشكريني بأنو تعيشين صح وبسعادة وي زوجج هذا أفضل شكر تكدرين تقدميلي اياه.

ابتسمت الها وحس سعادة داخليه جبيره صابتني جنت محتاجة هذا الكلام من زمان ورب العالمين ماقصر دزلي انسان متفهم ساعدني اجي لهنا واسمع اللي احتاجه، طلعتله لكيته واكفلي منتظرني ابتسملي واني احس فراشات صارت بمعدتي ماعرف ليش فجأة حبيته أكثر، لزم أيدي بين أديه ورحنه للسيارة اول مصعدت التفتت إله قربت راسي وقبلته بخده بدون مقدمات ردت اعبر عن حبي لأول مره بفعل، بلعت ريكي راجعه لمكاني من شفت نظراته إليه وشلون بقى صافن درت وجهي للجامة شويه وبعدين ماعرف منين اجتني الشجاعة وحجيت وياه قاطعة الصمت.

آمندا: غضنفر عندك شغل هسه؟

غضنفر: العن ابو الشغل لا ابو اهله كلهم، انتِ شغلي ومشغالي وانشغالي كله أأمريني شنو تردين؟

على هذا كلامه والله نسيت شنو اريد اكول بقيت ساكته ومبتسمه بدون اي كلمة بس بعدين شجعت نفسي كايله.

آمندا: اريد اشتري كم شغلة محتاجتهم.

غضنفر: غالية والطلب ارخص من الرخيص تدلل مريتي.

اخذني للمول لازم أيدي بين أديه ويفتر بيه مترك محل مدخلني عليه اشترالي اشياء مجنت ناويه اشتريها اصلاً، جنت مفكره انو الزلم ميحبون يفترون بالسوك وي النسوان بس هسه اشوف العكس وي غضنفر شكرت ربي على هيج شخص اللي احسه صدك نعمة من الله سبحانه إليه، وكفت يم محل يبيع ساعات رجالية تركت أيده ودخلت هو فات ورايه صارت عيني على وحده فضية تجنن رفعت راسي اله سألته.

آمندا: شنو رأيك حلوه؟

غضنفر: تجنن ذوقج ماكو مثله حبيبتي.

آمندا: حبيتها؟

غضنفر: المهم انتِ تحبيها.

آمندا: لا أريد رأيك صدك.

غضنفر: والله حلوه شبيج.

آمندا: تمام راح اخذها.

خذتها، تعشينا ورجعنا للسيارة من وصلنا البيت قبل ما انزل طلعتها رفعتها اله ابتسمت بوجهه كايله.

آمندا: شكراً على كل شي سويته علمودي، وكفتك ويايه باصعب ايامي مستحيل انساها، يمكن ماكدر اقدملك شي اعوضك بيه غير حبي وشكري الك.

غضنفر: واني ماريد منج شي غير تحبيني يا أماني روحي واحلامها.

آمندا: اذا تريد نستعجل بالعرس اني ماعندي مشكلة حدد يوم وتفق وي امي.

تركته ونزلت من وصلت للباب ودخلت للبيت ستوعبت شنو كلت وهاي لأول مره ما اخجل لأن صدك اريد اشاركه الحياة الواقعيه، نفس البيت ونفس الغرفة ويجمعنا سكف واحد، وره يومين صادف الخميس رحت اني وياه للعقد تم كل شي الحمدلله بنفس اليوم لأن هو مقدم وحاجز موعد صار فترة ورحنه حللنه قبل يوم همات، وحددنا زواجنا يوم الجمعة بعد سبوعين وبديت اجهز بسعادة مرات اني وياه نطلع ومرات اني وامي لأن اكو تفاصيل استحي اشتريها وياه امي افضل، حسيت نفسي رجعت للحياة مره ثانية وبديت انتعش وشوف السعادة الحقيقية بعد فتره حزن طويلة ظلمت الدنيا بعيني كلها، وهذا العوض الحقيقي من ربي عز وجل.

هَيْصَم: اكعدي.

فيروز: شنو تريد؟

هَيْصَم: اريدج تحجين كل شي تحسين بيه ناحيتي، بدون تحفظات، خلينا نحل مشكلتنا بهدوء وتفاهم.

فيروز: ماكو شي احجي بيه انسى.

هَيْصَم: فيروز، لَّباءتي، اني رجال شغلي خطر ممكن اطلع ما ارجع بأي لحظة، لتخلين يصير شي بعدين يندمج لأن بقيتي شايله بكلبج عليه ويمي فقط جسد بس الكلب مجروح ومهموم بسببي، لتعذبيني بجفاج خلينه مثل كل مره نفتح كلوبنا لبعض بدون لف ودوران.

فيروز: لتحجي هيج هَيْصَم عمرك طويل يارب، انت تعرف اني ماعندي احد غيرك بهاي الدنيا كلها وهذا كلامك كلش يزعجني وميخليني مرتاحة.

هَيْصَم: بما انو تحبيني لهاي الدرجة خلينا نتفاهم ونحل اللي بينه.

فيروز: ماعندي بكلبي عليك شي صدكني.

هَيْصَم: ميخالف احجي الحسيتي بيه من جبتج يمي لليوم وكلامي عليج شنو جان يسوي بكلبج، أريد اسمع سولفي.

فيروز: لتفتح صفحات قديمة طواها الزمن خلينا باليوم، اني سامحتك ونسيت الصار ثق بالله العظيم.

هَيْصَم: حتى لو سامحتيني اريد اسمعج.

فيروز: ليش مصر؟

هَيْصَم: لأن اعرف انتِ من النوع الكتوم الميحجي لأحد لهذا السبب ماريدج تكبتين، ف احجيلي اسمعج.

فيروز: ما اخفي عليك شكد تأذيت من اجيت بيوم المحكمه مثل موعدتني وحجيت كلام يسم البدن ويايه من رجعت وياك للبيت.

Flash back

جنت واكفه بالباب مالت المحكمة وعمي وابن عمي يمي، واجت سيارته نزل منها جانت وراه سيارتين نزلوا منها جنود أربعة مسلحين أو وياهم شخص خامس نفس البُنيه مالت هَيْصَم بس مو اسمر حيل مثله اجه يمشي بصفه وكفو ثنينهم يم عمو، هَيْصَم يباوعلهم برفعة حاجب وكأن يوحيلهم انتوا لا شيئ يمي وذلك اليمه مخلي أيد بجيبه والثانية يدخن بيها، طلع جكاره ثانية منطيها لهَيْصَم اخذها من أيده مورثها مقربها من شفايفه هذا كله وهو مخلينا واكفين بدون مينطق اي كلمة، دخلنا جوه وهو وياه هذا الرجال اللي ماعرفه منو اذكره مار عليه بس ماعرفه مادري اني فقدت الذاكره بعد الصار ويايه، صاحو اسمنا دخلنا يم القاضي بده يحجي واني بالي مو يمه يم هَيْصَم وشنو راح يسوي معقوله يطلكني وينتهي كل شي بينه لو راح يرجعني وياه للبيت ونعيش مثل قبل؟

من سأله ابتسم كايل.

هَيْصَم: سعادتك، اني مرتي احبها واريدها وماريد اطلكها ولا اني رافع قضية ولا هي، اللي رفعها هو عمها اللي اجه اخذها من بيتي بوقت ماعرف بيه اصلاً، جنت بشغلي ورجعت للبيت نصدمت مرتي ماكو فريت العراق كله عليها ومالكيتها ونصدمت من اجاني بلاغ رافعه عليه قضية، اني وياها بينه علاقة حب صار سنين وبينه بنية وعشرة ومرتي هي وحافظها أكثر من نفسي، عمها داس بيتي واخذها من عندي وهسه يريد يطلكها غصب هذا غير خلاها تشتغل بشركة وهميه اتاجر بمواد غذائية منتهيه الصلاحية بس علمود ياخذ منها فلوس وجبرها توقع تنازل عن ورثها من بيت ابوها وحصتها بالأرض الزراعية اللي اصلاً هي ملك ابوها، والأدلة كلها عندي واني اريد ارجع مرتي ويايه وأريد ارفع دعوة بدخول بيتي واخذها غصب هذا غير تورطه بشغل غير قانوني ويصدر مواد غذائية بطريقة غير شرعية عن طريق الشركة الموظف بيها مرتي، وعنده نص الحصة بيها.

لزم أيدي ماخذني وعمي اخذو الشرطة يحققون وياه والحلو جايب أدله عرفت وقتها خلاني هاي الفترة يمهم بس علمود يرجعني ويعاقبهم يعني عصفورين بحجر، طلعنا من المحكمة والصدمني سلامة وي أبن عمي ساجد طلع متفق وياه علمود اشتغل يمهم حتى يثبت عليه التهمه أكثر ابتسمت وفرحت من اعماقي على معاقبته الهم، ضربه اللي وياه على متنه رايح صاعد بالسيارة الثانية واني و هَيْصَم صعدنا بسيارته، بقى طول الطريق ساكت مخلصها بس يدخن واني ماحجيت شي غمضت عيوني وسرحت بأفكاري حتى وصلنا للبيت، نزلني ونزل ويايه خلاني ادخل قفل الباب وراح، أخذت نفس عميق وفتت جوه لكيته كله تراب طلعت ضوجتي كلها بالتنظيف بس بشكل متقطع وعلى كيفي حتى ما اضغط على نفسي وشغلي براحتي يكون، لليل يلا دخل سمعت صوت رويم اجتني من شافتني ركض شبكتني وبقينا اني وياها نبجي سوه.

رويم: ليش ما اخذتيني وياج بقيت ابجي عليج وبيبي تكول شويه وتجي لاتبجين بس هي تجذب عليه ماجيتي.

فيروز: بس هسه اجيت وما راح اعوفج مره ثانية ياعمري بنيتي.

رويم: احبج اني.

فيروز: واني هم احبج يروح امج انتِ.

حضنتها ورحت احضر العشا وهي يمي لازمه برجلي مخلتني اخذ راحتي بس حابه قربها هذا، هسه يلا حسيت نفسي عايشه واتنفس مثل الناس العاديه، كملت كل شي وخليت الأكل على السفرة، تناسيت اللي صار ماعرف اني فرحتي برجعتي لبيتي خلتني انسى كلامه قبل فتره من أجاني بذلك اليوم ودكيت الباب طلع بعد دقايق من شافني واكفه عقد حاجبه سحبني من أيدي مدخلني للغرفة كايل بحده وتحذير.

هَيْصَم: رجلج لهاي الغرفة ماتعبر لا تنظيف ولا غيره، اسمي طاهر على السانج ماتكوليه، اخذي كل شي الج هنا لأن ماريد اشم عطرج بأي مكان اني متواجد بيه وتذكري وجودج بحياتي مؤقت بس تولدين اخذ ابني وننفصل، وليوهمج عقلج ممكن اسامحج بعد الصار لأن جرحي منج ما طاب ومايجي يوم يطيب.

فتح الباب ودفعني من أيدي، نصدمت من كلامه شكد قاسي، كلبي يكلي حاولي وياه حقه الصار مو هين بس عقلي يكلي دوسي على مشاعرج ولتنطي وجه، اللي ميريد يتفهمج ويتفهم موقفج وينطيج مبررات لخاطر العشرة والحب الجان بينكم ميستاهل تحاولين وياه بعد شنو مجانت النتيجة بعدين.

فيروز: بس اني وياك سويت العكس، حاولت بكل جهد اخليك تسمعني وابررلك الصار وانت بأذنك شمع ساد السمع بقوة وهذا الشي الدمرني حرفياً وخلاني اشوف ماكو فرصة ثانية بعد بعلاقتنا لازم من صدك كل واحد يكمل حياته بالطريقة اللي يشوفها مناسبه لوضعه.

هَيْصَم: سويت كل شي علمود اعلمج درس حتى متعيدين الغلط مره ثانية.

فيروز: ودرسك جان قاسي حيل عليه، خاصة بوضعي النفسي والجسدي الحالي، هذا غير العشته والشفته بيت عمي من صعوبات وتعب واني بعيدة عنكم وقيس شكد تعذبت وانت زدتها عليه.

هَيْصَم: اني سويت كل شي علمود ارجعج إليه، بس جان لازم اعاقبهم كلهم على الصار، جنت مخلي جاسوس ابيتهم ينقلي كل اخبارج أول بأول.

فيروز: ساجد نفسه؟

هَيْصَم: ساجد يحب بنت عمج وعنده علاقة بيها هذا الشي السهل المهمه، هي جانت تسولفله كل شي وهو ذكي يكدر يسحب منها الكلام لهذا السبب ساعدني هوايه.

فيروز: وموضوع لشركة شلون سويته؟

هَيْصَم: هاي الشركة احنه مراقبيها من زمان وعدنا عليها اكثر من شكوى وعمج يعرف بيها بس مغلس لأن يندفعله منها ،ومكدرت اجيب معلومات الا من تشتغلين بيها، فساعدني ساجد، وهدفي جان يتعاقب على الصار أبن عمج خوش وسيلة.

فيروز: وليش هو يكرهه هيج وعادي يعترف عليه؟

هَيْصَم: لأن ميقبل يزوجه بنته.

فيروز: كلامك صعب ينسي هَيْصَم، صعب أكدر أتجاوزة على رغم اني سامحتك بس بداخلي شايله عليك شلون كدرت تجرحني وتهيني بهاي الطريقة.

هَيْصَم: جنت احجي فقط لقلقة لسان لا أكثر ولا أقل والواقع جنت متعطش لعطرج ولوجهج ولعيونج وشعرج، شتاقيتلج لدرجة الشمس شكد تضوي الدنيا؟ على رغم كل هذا النور اني اشوف العالم أسود بمعنى الكلمة، والهوه شكد مالي الكوكب بس ميكدر يدخل للريه، وشوفي شلون ضعت اني بغيبتج، لتلوميني على شنو سويت لأن العشته ما اتمنى لعدوي.

فيروز: آسفه اذا سببتلك تعب وحزن بدون قصد، بس خفت عليك وقتها اعرف جان لازم اثق بيك أكثر واختارك انت لكن حياتك صارت حاجب كدام عيني وماكدرت افكر، نعميت ساعتها وبس هذا اللي طلع ويايه.

هَيْصَم: اني اللي آسف، ضغطت عليج هوايه واذيتج وانتِ تمرين بفترة صعبه جان المفروض اهتم بيج أكثر مما اتعبج، سامحيني على تقصيري وحدة كلامي وعصبيتي.

فيروز: جنت مفكر انو ننفصل صدك؟

هَيْصَم: ههههه، اني جنت ما انام بالليل اذا ما اجي يمج، اشم عطرج وغطيج واتأكد انتِ موجوده يمي وبيتي يلا تغمضلي عين.

فيروز: مجنت تسوي أكثر من هيج؟

هَيْصَم: معليج شغله خاصة بيه.

فيروز: متريد تكلي شي؟

هَيْصَم: احبج.

فيروز: اموت عليك.

هَيْصَم: الحياة ماتسوه شي من دونج هاي آخر اكتشافاتي.

فيروز: العمر ينعاش مره واذا مايخلص يمك ماريده.

هَيْصَم: وياج عرفت نفسي شكد اني انسان ثاني مختلف كلياً عن الموجود بالدوام.

فيروز: ذكرتني ليش كمت تدخن وتركت الحامض حلو؟

هَيْصَم: من رحتي اعتزلت الجميع جان موجود وياي بس غضنفر لأن صارت عندي عملية سريه ونجبرت اختفي عن عيون الكل هاي قبل رجعتج بفتره بسيطة، شافني مهموم واربع وعشرين ساعة عصبي انطاني جكاره أو وحده تبعت وحده حتى صارت متفارقني.

فيروز: الحامض حلو يخليك مميز أكثر.

هَيْصَم: تكدرين تكولين اتركها بسهولة بدون هاي السوالف.

فيروز: اتركها مامتعودة عليك دخن.

هَيْصَم: تدلل لَّباءَة الهَيْصَم أو وردة حياته.

كام من مكانه مطلع الباكيت من جيبه مكسره وشامره بالزبالة (أجلكم الله) التفتلي كايل بأبتسامة.

هَيْصَم: نرجع للحامض حلو.

ضحكت وجانت هاي بداية لتكملة حياتنا السابقة قبل ميصير كل شي وتدمر بسبب الميخافون الله، حجالي بعدين عن لّهيم وعمايله ورتاحيت من سمعت بيه نسجن وأن شاء الله مايطلع بعد على كل هذا الألم السببه للكل.

حوري: محمد.

محمد: عيونه لمحمد.

حوري: ليش هيج سويت؟

محمد: خوفتيني ولج شمسوي؟

حوري: اني مو كتلك ماريد أطفال هسه كلت لو ماكلت؟

محمد: اي كلتي وهسه شنو صار؟

اخذ صفنه بوجهي ضاربني على أيدي كايل بفرحة واضحه بعيونه.

محمد: حامل ولج كولي والله.

ضحكت مأشرتله براسي سحبني لحضنه وشالني طاير بيه فرحان حيل فرحته خلت عيني تدمع نزلني مقبلني بكل مكان من وجهي ماخذ نفس من شعري كايل.

محمد: ولج وحق ربج بعمري مافرحت هيج فرحة حتى من حملتي بأقمار جنت عايش بقلق ورعب عليج خاف يسوون بيج شي بس هسه لا احس كل شي بداخلي كاعد يطير.

حوري: اني ردت افاجئك بالموضوع جنت شاكه بنفسي من يومين واليوم من رحت وي عمتي للمستشفى سويت تحليل وتأكدت.

محمد: الله يحفظج إليه حوريتي.

حوري: بس ها الدراسة ادرس وانت تنفذ وعدك وتهتم بينه كلنه.

محمد: بالعين وجفنها اخليكم، شعندي غيركم احبل اجيب.

حوري: كتلك اليوم؟

محمد: حتى لو كلتي عيدي اريد اسمع منج للمره الألف.

حوري: انت الخطأ الوحيد اللي لو ينعاد الزمن بيه مية مره ارجع أسوي بفخر على رغم الصعوبات العشتها بالفترة السابقة وقطيعة اهلي إليه ابقى اختارك بس ما أعيد غلط السر وانما افتخر بيك واحجي لأمي وسوي بالعلن.

محمد: هو لو مو اخوج جان انتِ مرتي من زمان بس يلا كل تأخيره بيها خيره.

مرات بسبب ظرف صعب تعيشه تتمنى تموت وينقطع عنك الأمل والدنيا تسود بعينك وتعيش بحاله من الحزن والقهر والألم بس بعد فترة تشوف نفس الموضوع اللي خلاك تعيش هيج وضع مؤذي تحول لشي سعيد الشكر وحده لرب العالمين ميكفي على كمية العوض اللي انطاني اياه.

:لابسة الفستان الأبيض، ومكياج سموكي وشعري كتلها تخلي مفتوح كاعده مقابيل المرايه منتظره فارسي يجي وياخذني لعشنا سوه، نسيت أو يمكن تناسيت الحزن ورميته وره ظهري وهسه السعادة محاوطتني من كل مكان والابتسامة متفارقني، اجت امي يمي قبلتني بجبيني مسميه بالرحمن كايله.

كلاثم: يارب سعادة ابديه، ربي يحفظج إله ويحفظه الج ويسعدكم ويتمملكم على الف خير، اليوم سعادتي ما اصوفها، من دون بناتي كلهن انتِ الوحيدة الفرحانه الها من كل كلبي.

آمندا: ربي يخليج النه وميحرمنه منج يا اغلى ام بالدنيا كلها.

اتصل بيه وصل، لبستني البرنص وطلعنا من الصالون حسيت بأيده شلون دافيه من لزمت أيدي ابتسمت واني احس كلبي شغل معزوفه مثل المشغلها بالسيارة سوو حفله خرافيه اصدقائه وأهله حتى وصلنا للقاعة، اكو غشاوه كدام عيوني وما اشوف الكل بس داخلي يدور عليها ردتها تكون موجوده أكثر من خواتي لأول مره من تزوجت هَيْصَم لليوم احسها قريبه مني وبمثابة اختي وأكثر، واني منتظرتها تجي اجت يمي وجه البومه.

آريا: واخيراً اجه اليوم وتزوجتي هسه يلا كلبي رتاح.

اني سعيدة واليوم يومي وماريد اعكر مزاجي التفتت الها كايله بأبتسامه.

آمندا: اليوم اني عروس وبالعادة العرسان هم يختارون منو الناس المعزومه على حفلتهم الخاصة وأعتقد من وزعنا البطايق مجنتي من المعزومين.

آريا: اني اختج ما احتاج بطاقة علمود اجي لو الحب نساج ناسج؟

آمندا: واني ما اعتبرج اختي، آريا بالنسبة إليه ماتت من زمان ومزاجي مرتاح على الآخر ماريده يتعكر من اشوفج لهذا بدون مطرود اطلعي بره حفلتي، هاي طبعاً اذا عندج شويه كرامه وخجل وتستحين على نفسج.

آريا: على اساس عرسج عرس الأميرة ديانه وخابصه نفسج هو بكل الأحوال بعد ساعات قليلة والفرحة مالتكم تنكلب حزن ويرجعج المحروس لبيت امي، ههه يلا اشوفج هناك عزيزتي جاوو.

حركلي كلبي كلامها ودمعت عيني بس صبرت نفسي وسكتت غصب من شفتها اجت يمي كايله.

كلاثم: هاي شبيها؟

آمندا: خليها تولي، فيروز وين ليش لسه هي ماكو؟

كلاثم: والله التهيت ونسيت اخابر اخوج اشوفه وين صار اصبريلي دقايق ورجعلج.

فيروز: هَيْصَمممم وينككك؟

هَيْصَم: هياني شبيج تصرخين؟

فيروز: عندي ألم من الصبح وهسه ديزيد عليه بعد ماكدر اتحمل راح اموت.

هَيْصَم: اسم الله عليج شبيج، لحظة بس اجيب عباتج ونروح للمستشفى، مجهزة ملابس الج وللطفل لو لا؟

فيروز: لا مادري راح اولد بهاي السرعة بعدني بشهر السابع، ستعجل هَيْصَم دا اموت.

جابلي العبايه لبسني أياها لازم أيدي يمشي ويايه على كيف حتى وصلني للسيارة دخلني وراح جاب رويم من جوه ويانه، اني من الألم نسيت حتى نفسي بس من شفتها كامت تصرخ وتبجي خليت العبايه بحلكي حتى أمنع نفسي ما اصرخ.

هَيْصَم: يمه وينج؟

كلاثم: بالقاعه غير عرس اختك، وينك انت وفيروز ليش تأخرتوا؟

هَيْصَم: يمكن صار عدها ولادة راح اخذها للمستشفى مجبنه اي شي لأن الموعد مو نفسه اريد منج تخابرين ريهاف تجي هي و لائِث يجون للبيت مالتي ويجيبون ملابس الها وللطفل وتلحكنا لهناك.

كلاثم: اني هم راح اجي وياها ماعوف فيروزه وحدها.

هَيْصَم: تجين بس وره العرس لتعوفين آمندا وحدها، يلا راح اسده وانتِ تصلي بيها.

كلاثم: الله يسهل يارب ان شاء الله تكوم بالسلامة.

هَيْصَم: رويم بابا كافي تبجين منو يطلك امج لو انتِ؟

فيروز: لتحجي هيج هَيْصَممممم.

هَيْصَم: ليش صرخين عليه شكلت؟

فيروز: يعني هذا حجي، اخخخخخخخ يمةةةةة بعد ماكدر راح اموت.

هَيْصَم: هي من جابتج هم نفس الشي ماعدها كلمة بيها حظ تخليني اسوق مثل الأوادم لازم تسودني بحجيها.

رويم: ماما شبيج؟

هَيْصَم: راح يجي اخوج للدنيا ان شاء الله.

رويم: ماريده ماحبه مخلي ماما تبجي.

هَيْصَم: انتِ هم خليتيها تبجي شنو الفرق؟

رويم: ماخليتها تبجي لتجذب عليه.

هَيْصَم: حرامات بيكم التعب والله العظيم على هاي الأخلاق.

فيروز: تربيتككككك لتحجي عليها.

هَيْصَم: ليش تصرخين عليه؟

فيروز: ولك هَيْصَم كوه متحمله الألم والله هسه اعضك عضه اخليك تكمز بمكانككككك.

هَيْصَم: آخر التطورات انجلبت حبيبتي.

وصلنا للمستشفى احس روحي تطلع وي كل ألم يجيني وترجعلي من يروح، حتى تمت الولادة على خير اني مابقى بيه نفس، احياناً اكو آلام حلوه مثل ألم الولادة شكد يستمر بس بالأخير من تتكحل عين الأم بأبنها تنسى كل الوجع، بس اني ماتكحلت عيني بأبني اخذوه للخدج لأن صار قبل موعده، دعيت من كلب والده طالعه من الموت يطلعلي سالم ومبيه شي ويتربى بوجودي وبوجود أبوه، دخل يمي هو ورويم قبلني بجبيني وهي حضنتني وتبجي وخرها عني كايل.

هَيْصَم: تعبانه ماما ميصير تبقين حاضنتها هيج.

رويم: ليش تعبانه شبيج؟

فيروز: مابيه شي حبيبتي لتخافين.

رويم: وين اخوي؟

هَيْصَم: بالخدج يبقى بعده صغير ميصير تشوفيه هسه.

فيروز: شلونه؟

هَيْصَم: الحمدلله يكولون صحته تمام بس علمود يتأكدون من سلامته لأن اجه قبل الموعد.

فيروز: مستعجل ماعرف على منو طالع.

هَيْصَم: على أبوه حامي ماينتظر.

فيروز: عاد انت الحماوه يمك وتوكف محد يلحكك بيها.

هَيْصَم: شو معاجبج ولج!!

فيروز: لا شلون عاجبني ونص ليش أكدر مانعجب؟

هَيْصَم: اي عبالي كلت اموتج.

فيروز: شنو سميته؟

هَيْصَم: شنو رأيج انتِ؟

فيروز: اريد اعرف انت بشنو مفكر؟

هَيْصَم: نسمي ياسر على اسم والدج.

فيروز: لا أريد اسم حيدر على اسم والدك، اتبارك بيه هذا الأسم اني.

ابتسم بس الحزن واضح على عيونه اني تعمدت هذا الأسم حتى من يكبر كدام عينه يتخيله إبنه المتوفي ويحس بيه عايش بينه، ضربته على ايده خفيف كايله.

فيروز: جنت مقرره هذا آخر طفل بس هسه عاجبني اعيد التجربة شنو رأيك؟

ضحك مجاوبني.

هَيْصَم: بالخدمة ام حيدر.

: ما اجه اخوي لعرسي ولا سلمني لزوجي، حزت بخاطري حيل من اخذني ومايمي بس امي، صح هي بمية رجال بس يبقى وجود الأب لو الأخ بهيج يوم مختلف، خاصة لو جان قوي ويرفع راس اخته أو بنته، اليوم لأول مره احس نفسي يتيمه من صدك من توفى والدي لليوم بجيت ونقهرت حيل وراحت فرحتي كلها، ضغط على أيدي حيل وهو ماخذني للسيارة صعدنا رايحين للفندق، دخلني الغرفة وسد الباب نزعت البرنص وصابتني نوبه مال بواجي، على حظي الجميل عافت فيروز كل الأيام ولدت بيوم عرسي بس شنو اكول قدر الله وما شاء فعل الأمر مو بيدنا، تقرب مني كايل.

غضنفر: ضحكتي شبيها ضايجة وتبجي؟

من كال هيج حسيته انطاني الإشارة الخضرة حتى اعبر عن الموجود بكلبي هسه.

آمندا: مشتاقه لأبويه.

غضنفر: اني ابوج وامج واخوج وصديقج وحبيبج وزوجج، العن ابو الإشتياق، غيري ملابسج هسه اخذج اله تزوريه.

ابتسمت كايله: لا موقصدي اروح بس هيج يعني لأن محد موجود ويايه اليوم.

غضنفر: ليش واني وين رحت؟

آمندا: اقصد يعني من اهلي.

غضنفر: اني كُل اهلج يبعد اهلي انتِ وطوايفهم.

ابتسمت خجلانة من كلامه كدر يغيرلي مودي بدقايق قليلة، هاي التفاصيل الصغيرة حببتني بيه أكثر وصرت اشوفه محور الكون بعيني، مرت هاي الليلة بكل حب، من أجمل لحظات عمري وساعاتها، اكتشفت اللي يحبك يختارك بكل عيوبك واغلاطك ويتقبلك بكل شي سيئ بيك بس اللي ميحبك يتقصد يخليك بالوضع اليزعجك والمتحبه بس حتى يقهرك ويثبتلك انك بيك عيب لكن الواقع لا عقله هو اللي بيه نقص وعيب ومشكلة جبيرة متنحل بدون علاج، متكدر تغير الناس وتفكيرها بس عندك القدرة تغير من نفسك وتصنع إنسان جديد مختلف كلياً بالتفكير عن الشخصية القديمة، اني اليوم تغيرت هوايه عن قبل، صرت اشوف الأقرباء هم الناس الميتصيدون الغلط منك سواء سويته بقصد أو بدون قصد، اللي يصنعولك عذر وتبرير بس علمود يبقون محافظين على التواصل بينكم وتبقى علاقتكم قائمة، القرابة الحقيقية هي مو قرابة الدم وانما قاربة الروح من الروح واتصال القلب بالقلب، أن كانت العلاقة صداقة ام حب، لهذا السبب هوايه من المرات تشوف صديقك المقرب يحن عليك ويسمعك أكثر من الأخ ومرات يصير العكس وتنطعن من هذا الصديق القربته وخليته أقرب من الأخ الك،

بنهاية الرحلة تيقنت إعطاء الثقة التامه للآخرين والتفكير المطلق بأن هم خوش أوادم هو أكبر سبب للأذية بعدين لأن الجرح والألم ميجي الا من الشخص اللي انطيته الثقة التامه بدون متخلي نقطة معينه وهي ممكن تنتهي علاقتكم بأي يوم او من الممكن جداً هذا الإنسان راح يخونك هنا صح تحس بالأذيه لكن مو بنفس المقدار لو جنت متوقع بيه بس الخير وهذا الشي احجي عن تجربة، اختي اللي هي بنت امي وابوي، ربينا وكبرنا سوه، درسنا واكلنا ونمنا وضحكنا مع بعض سنين طويلة، مقدمتلي عذر واحد بسيط وسكتت ومحجت شي ولا شكت ممكن اني اخونها بيوم من الأيام، رمتني بتهمه يعلم الله ورسوله اني بريئة منها واصلاً كل اللي صار جان لا ارداي بلحظة غير متوقعه خلتها تكرهني وتحقد عليه وتتهمني باطل اني وزوجها وعلى رغم نخطبت وجنت على أبواب زواج وهي مستمرة بتجريحي بدون متحسب احساب لمشاعري وشنو ممكن احس، اسامح الكل حتى لّهيم الخطفني وماممكن يجي يوم اسامحها بيه، بسببها كرهت نفسي وشفتني شكد حقيرة على رغم اني مسويت شي مجرد طلعت وهو دخل صرت بعينها الخاينة اللي اريد اخذ منها زوجها،

الأفكار كلها تضاربت بعقلي التفتت شفته نايم بسابع نومه واني بعدني افكر والنوم مزار عيوني، عبر سؤال بدماغي واني صافنه عليه، راح يجي يوم انسى؟ لو تبقى هاي الأفكار تزورني كلما تغمض عيني؟ رميت كل شي ورايه وقررت أحول التفكير بيه، الأنسان اللي وثق بيه وبقى ويايه لآخر لحظة وكان دافع إليه علمود اتعالج واخذ جلسات للصحة النفسية حتى اطلع من الحاله اللي اني بيها، هل ياترى تكفيه كلمة أحبك؟ لو هاي قليلة كلش بالنسبة إله؟ فتح عيونه صارن بعيوني ابتسمت بادلني كايل وبحة النوم مبينه بصوته.

غضنفر: ليش الحلو كاعد؟

آمندا: صافن بيك.

غضنفر: تردين ترسميني؟

آمندا: لا دا فكر ليش انت حلو لهاي الدرجة، رب العالمين هوايه مخلي بيك شكر.

غضنفر: بالعكس انتِ الشكر واني الجاي.

آمندا: واني ماحب الجاي بس مادري ليش من شبهت نفسك بيه حبيته.

غضنفر: طلعتي تعرفين تتغزلين ماعرفتج.

آمندا: اني كلي مواهب بس يحتاج وقت طويل علمود تكتشفني.

غضنفر: ان شاء الله كدامنا هوايه وقت واكتشفج وانمي مواهبج كلها، تدلل علينا اخت هَيْصَم.

آمندا: اذا مادلل عليك ادلل على منو؟

غضنفر: محد، خليها بعقلج دائماً اني وبس، اللي تخافين عليه وتحبيه وعقلج ينشغل بيه ما دوني اعاقبج تره.

آمندا: شنو نوع العقوبة؟

سحبني لحضنه كايل بضحكه.

غضنفر: هيج يعني.

ثاني يوم الصبح نزلنا اني وياه رايحين لعشنا الزوجي، بالباب مال الفندق لكيته واكف من شافنا اتقرب من عدنا سلم عليه واجه حضني مقبلني بجبيني.

هَيْصَم: الف مبروك يارب تنسعدون طول العمر وتكون ايامكم كلها حب، طمأنيت هسه عليج وكلبي ارتاح من خليتج بين ايادي أمينه، جان المفروض اجي البارحه واسلمج لزوجج بس القدر جان عنده رأي ثاني واجه ابني على الدنيا بنفس اليوم، هاي كدامها غضنفر اذا اذيتها لو نزلت دمعة وحده من عينها الفك مثل الجكاره وورث بيك وكول هَيْصَم كال.

غضنفر: لا عمي انا حتى لو فكرت العب بذيلي من اشوفها ابطل.

هَيْصَم: مشاكلكم خلافاتكم بوكسياتكم بقوها داخل الغرفة لا أم تسمع ولا اخت واخ يدخلون، الحياة الزوجية مليانه مسؤوليات بس كلها حلوه وتجنن اذا جنتوا أيد وحده ومع بعض بالحلو والمر، ماكو بيت يخلو من المشاكل، من يجيج للبيت عصبي طنشي ولتهتمين لكلامه لأن كله بسبب ضغوط العمل ومتدرين شنو شاف وشلون جان يومه خلي من يهدأ وياخذ دوش وبعدين اكعدي وسولفي وياه هو من وحده يحجيلج لو شافج متفهمه وتسمعيله وطبطبين على جتفه وتكليله انت سويت الصح بس لو، وتحجين رأيج بدون متخلين عليه لوم لأن هيج ينفرج وحتى الحديث وياج بعد ميحبه ولا يحب رجعته للبيت، وانت كذلك لتعلم على كل حرف يطلع منها بلحظة عصبية، احنه بشر ماكو واحد بينه معصوم، لترجعون لمشاكلكم للأهل بكل شي يصير بحياتكم الا اذا جان الموضوع مابيه مجال ينحل بينكم ولازم يدخل طرف ثالث وياريت يكون الطرف هذا مصلح وانسان حكيم يعرف يحل الخلاف بطريقه عقلانية بعيد عن التعصب، الحياة الزوجية مشاركة، بالأفكار بالعيشه بكل شي، ماكو عيب بينكم سولفوا وتقربوا من بعض، الحديث وحده يكدر يألف بين القلوب، وماتنقصون شي لو كان الكلام ميخلي من الحب والضحك، لأن المشاكل مو ملح الحياة الضحكة هي ملحها وحلاتها، خلي يكون أجمل وقت الوقت اللي تكعدون بيه سوه، الشكوى مو حلوه آمندا ولو اعرفج اني متشتكين لكن التذكير شي حلو، وانت مو نبي دير بالك عليها وخليها بين عيونك لأن بعيد عن كل شي حجيته اذا سمعت غاثها بكلمة وحده محمد موجود وطلكها منك وخليها تجي يمي تعيش معززة مكرمه.

غضنفر: شتحجي انت هَيْصَم؟ هي بالعين وغطاها الرمش.

هَيْصَم: اني اعرفك عدل ونفس الوقت اعرفها هي، هذا الكلام الكم انتوا الثنين يفيدكم بالمستقبل حتى تعيشون مرتاحين وكوني اخوكم الجبير وعايش أكثر منكم ومجرب هاي الحياة حبيت انطيكم من خبرتي، صح المكان والوقت غير مناسب لهيج حديث لكن لازم احجيه لأن مو شرط تصح عندي هيج فرصة مره ثانية.

ماعرف شنو احجي كلامه باعماقي سكن، حنيته وجيته وكل حرف نطق بيه خلاني اصير جبيره بعين نفسي وبعين غضنفر وأن جان ميحجي شي بس حتى يبين إله انو اني عندي ظهر وسند مو وحيدة، طلع من جيبه علبه قدمها إليه فتحتها جايبلي كلاده ذهب بيها حرفي وياها محبس دمعت عيني من شافني قربني لصدره حاضني كايل بحب.

هَيْصَم: دير بالج اشوف دموعج مره ثانية حتى لو جانت دموع فرح، ماريد غير تنسين كل شي عشتيه وتبدين صفحة جديدة مابيها غير الفرح والسعادة والابتسامة على وجهج الحلو، ماشي بنيتي؟

آمندا: ماشي يروح بنيتك.

غضنفر: اكلك شو ماخذك الواهس مخلصها بس تشبك بيها ماتكول رجلها واكف لو مو بعينك!!

هَيْصَم: تره هسه ارجعها وياي، اسكت لا اصير مو خوش.

غضنفر: حتى اسويك وصله مال مسح امسح بيها جامة السيارة.

هَيْصَم: هيج الحجي صار!!

غضنفر: هيج ونص، بعد ما طاح حظي ونلعن ابو خيري حتى ازوجها تريد تاخذها مني والله بطران.

هَيْصَم: روح كمت تجفص بالحجي، عندك اجازة اسبوع واحد بس بعدها تستأنف العمل، وما ارجع أوصيك دير بالك عليها.

غضنفر: كللها هم دير بالها عليه.

هَيْصَم: بدون ماوصيها اعرفها دير بس انت ما متأكد منك وهي عزيزة عندي حيل.

غضنفر: بوسلي ابنك وروح مني بعدني بشهر العسل.

ابتسمت عليهم شلون اصدقاء مقربين من بعض وماكو بينهم تحفظات يحجون ويضحكون ويشاقون وخارج مكان العمل ماكو اي احترام ابد، وهذا الشي من زمان من جان يجيبهم ويجي يمنه مرات نفس طبيعته وي الخمسة كلهم، صعدنا بالسيارة رايحين للبيت مالتنا، المكان اللي بدت بيه قصة حبي على أرض الواقع.

:بعد زواج آمندا اجت خالتي سكنت يمي كلش فرحت بيها، من جانت يمي قبل متروح تكعد يم بناتها ماليتلي البيت، ومن تصلي وتدعي وتكعد نص الليل بصلاة الليل وتقرأ قرآن احس اكو بركة واليوم يكون شكد مريح وحلو، وجودها نعمة ربي يديمها علينه، بس زعلانة عليه واني اعرف السبب، رحت كعدت يمها صارلها شهر يمي ومتقبل تحجي ويايه مثل قبل رسمية كلش، خليت أيدي على ايدها دارت وجهه إليه برفعة حاجب ورجعته للتلفزيون ابتسمت عليها زعلها اثكل من زعل هَيْصَم.

فيروز: هسه غير اعرف ليش متقبلين تحجين ويايه؟

كلاثم: تعتبريني بمقام امج لو لا؟

فيروز: اكيد طبعاً اني اول مره احس بنفسي عندي ام وياج.

كلاثم: لعد ليش كدرتي تعوفيني ست أشهر حتى بدون اتصال ولا كلتي اخاف عليج لو اشتاق لصوتج؟

فيروز: يعني هذا المزعلج؟

كلاثم: لعد شنو مثلاً؟

فيروز: وداعة عيونج يا أمي ياحبيبتي والله العظيم مجان عندي موبايل ولا كدرت اتصل بيج ابد.

كلاثم: ومن اجيتي لهنا ليش متصلتي بيه؟

فيروز: ستحيت اتصل بيج، كلت راح تعاتبيني وتلوميني بسبب الصار.

كلاثم: اني مو هَيْصَم، هو شاف الموضوع يمس رجولته من عفتي ورحتي بدون متحجين شي وياه وتفهميه وتكليله بالتهديد مالتج، اني اختلف عنه لأن أني مره مثلج ولو صار وي زوجي نفس الشي راح اتخذ ذات القرار بدون تفكير بالعواقب لأن احنه هيج مخلوقات، العاطفة تغلب الحكمة عكسهم، اني انطيتج مبرر من اول يوم عرفت بيج رايحة وي عمامج ولعلمج مقبل يحجيلي شي ابد الا من لحيت عليه كلش يلا كال بعدين من طولتي الغيبة عليه بده يجي يمي ويشكي بُعدج شنو مسوي بيه.

فيروز: لو ينعاد الزمن ماسويها.

كلاثم: على رغم الصار كبرتي بعيني حيل، رحتي لبيت متعرفيه ومتدرين شنو يسوون بيج بس علمود سلامته، اعرف غلط واكبر غلط بس هاي اكبر دليل على حبج شكد صادق وحقيقي.

فيروز: اني بهاي الحياة كلها ماعندي غيره، ابو أولادي وزوجي وهو الله يحفظه ممقصر ويايه بشي بالعكس تماماً مسوي واجبه وأكثر شلون ينطيني كلبي أعرضه للخطر وسلمه للموت بأيدي واني باستطاعتي انقذه؟

كلاثم: الله يحفظكم لبعض ولأولادكم.

فيروز: ويحفظج النه يالغالية.

لائِث: هسه شنو؟

هَيْصَم: المهمه ماتمت كلها.

هَمْاس: وشنو نسوي هسه؟

هَيْصَم: اريد اوصل للراس الجبير مالتهم بس ماعرف بيا طريقة.

غضنفر: سهله.

هَيْصَم: سولفها.

غضنفر: نسوي اللي معتادين عليه.

هَيْصَم: عاكف عكس الكل، اذكى واحد بيهم مراح يخلي على نفسه لزمه دارس الوضع كله بحذافيره ولو مو الخيانة والنسوان جان محد كدر يوصله.

غضنفر: كل مجرم يترك ثغره لابد.

ضَرْضَم: وأن ترك هيج شخص صعب واحد يوصله واذا وصلنه يطلع منها مثل الشعره من العجين، احنه نتعامل وي انسان يمول خليه كامله بالمخدرات وغيرها.

غضنفر: لتخاف، هم واحد يسقط بالثاني يعني مو صعب نكدر نوصله.

هَيْصَم: راح أحقق وي عاكف مره ثانية وجبره يحجي اي شي يعرفه عنه علمود نكدر نلقي عليه القبض بأسرع وقت ممكن، كلبي ما يرتاح اذا ماتمت هاي العملية، تعبت سنتين واني ادور عليه ولابد أوصله ما اسمح تنتهي بهذا الشكل.

ميثم: سيدي تعبني حيل وميقبل يحجي.

هَيْصَم: اني راح استلمه، دخلت يمه الوجه صاير احمر على ازرك من الضرب، اول مشافني كال.

عاكف: لو تموتني حرف متاخذ مني.

هَيْصَم: حياتك مو مهمه حياة اولادك هم؟

عاكف: أولادي شنو دخلهم بالموضوع؟

هَيْصَم: زوجتك او أولادك يمسهم الموضوع اكيد، نكدر نخليهم ورقة ضغط على العائلة حتى يعترفون عليك، مستحيل اكو زوجة متدور وره زوجها وتعرف تفاصيل طلعته ودخلته للبيت، وإذا اني اخذتها ورقة ضغط كُن على يقين كل عائلتك تصير بخبر كان لأن أنت تعرف كل إنسان يتعاون وياي تكون حياته مهدده بالخطر فإذا تريد يصير هيج بأهلك فأنت حر.

عاكف: متكدر توصللهم.

هَيْصَم: متأكد؟

عاكف: طبعاً.

فتحت موبايلي مخلي كدامه.

هَيْصَم: هذا مو ابنك تقي وهو راجع من المدرسة واللي بصفه ابن عمه عبوسي مو؟

عاكف: منين جبت هاي المعلومات؟

هَيْصَم: اني مو جاهل هنا، الكدامك عابره عليه هاي السوالف وصايره قديمة حيل.

عاكف: فدوة للقضية حتى ولدي.

هَيْصَم: ماطول هذا كلامك اعتبر أولادك يتحاكمون قبلك فدوة للقضية.

عاكف: بعدهم صغار حيل مالهم علاقة بلي صار كله ليش يتعاقبون بذنب غيرهم وين العدل؟

هَيْصَم: منو كلك اني عادل اسمي هَيْصَم.

عاكف: متكدر.

هَيْصَم: احسب اربع وعشرين ساعة وشوفني أكدر لو لا.

عاكف: اسمه خالد.

هَيْصَم: الحقيقي؟

عاكف: اي، هو ماعنده اسم حركي لأن تواصله قليل جداً مع الناس فقط مع ثنين مقربين.

هَيْصَم: انت ومنو؟

عاكف: واحد صديقة ماعرفه.

هَيْصَم: اكو قرابة بينكم؟

عاكف: ابن عمي.

هَيْصَم: وين عنوانه؟

عاكف: جواريني.

هَيْصَم: احجيلي شنو تعرف عنه؟

عاكف: هو رئيس العصابة وعنده كل المعلومات الخاصة بهذا الشغل.

هَيْصَم: اكو اكبر منه؟

عاكف: الناس الموجوده الباقية متستره عليه بس مقابل مبالغ مالية ينطيها الهم، ذولي اشخاص متكدر تصوللهم لأن اغلبهم خارج العراق وعدهم تواصل وي ناس موجوده داخل البلد، يعني مثل الواسطة.

هَيْصَم: راح نجمع الليلة ابن العم وي أبن العم، لائِث جهز الفريق.

لائِث: تأمر سيدي.

طلعنا رايحين للعنوان اني والجنود البقية، أول منزلنا ضربونا بالرصاص نجرحو ثنين وهو شرد صعدت بالسيارة اني و لائِث وغضنفر وتبعنا بكل قوتي وإصراري القي عليه القبض ماطول رمانا ومطلع بشكل سلمي.

هَيْصَم: اسمي مو هَيْصَم اذا ما العن والديه هل الكلب.

لائِث: صلوا على محمد وآل محمد يولد أول مره يغلط هَيْصَم.

هَيْصَم: اسكت اني لا اشمرك من السيارة.

غضنفر: هَيْصَم اكو سيارة سودة ورانا.

هَيْصَم: ارميها.

لائِث: اوكف انت راح احجي باللاسلكي على جماعتنا يلحكونه.

غضنفر: ياذكي نصير تشريب لمن يجون.

لائِث: طيب خاصة إذا بامية وياها لحم اويلي.

هَيْصَم: بس سكتلي الحامل اليمي لو ادري جايب ضَرْضَم ولا انت.

لائِث: هسه شبيك متوتر على كيفك.

هَيْصَم: لائِثثثثثثث كتلك اسكت.

غضنفر: صاروا قريبين منه كلش، هَيْصَم راح ارمي.

هَيْصَم: منتظر امر الوحي ماترمي!!

طلع مسدسه رامي على التاير مال السيارة وكفها، وصلنا قريب منه دست بنزين وكسرت عليه جانوا لاحكينا الجنود البقية حاوطنا نزل من السيارة مخلي المسدس براسه قبل منتقرب من عنده ضرب نفسه طلقه إلى جهنم وبأس المصير اختار دنياه على آخرته للقير، رجعنا لمكانه رايحين للمركز اطمأنيت على الجرحه مجان وضعهم خطر الحمدلله، كدرت اخذ نفس، بعد شهر كامل صارت المحكمة ونحكم عاكف ولّهيم بالسجن المؤبد بسبب المتاجرة بالمخدرات وتوزيعها على الشباب، نغلق هذا الملف وانتهى تعب سنتين بالنصر والشخص اللي كالوا عليه متكدر توصله صار تحت التراب جان ضعيف لدرجة مكدر يواجهني وختار الجحيم.

: مرت الآيام والإشهر بسرعة وجتمعت العائلة الكريمة هنا، وعزم وياه محمد وحوري، اللمه والصوت اللي يشرح الصدر والضحكة ملت البيت حسيت من صدك بالسعادة الحقيقية بعد فترة طويلة من الانعزال عن الكل.

آمندا: هي شنو تخلني اشتغل واني حامل هسه اصيح لزوجي عليجن بعد عيني ميقبل اتعب نفسي.

فيروز: وشكو بيها واذا حامل احنه همات مثلج جنه ونشتغل.

آمندا: انتن مو مثلي.

كلاثم: ليش يمه حامل بولي العهد وانا مادري؟

آمندا: ابني وابن غضنفر هذا يسوه ولي العهد وعشيرته كلها.

ريهاف: خفي علينا عيني سندريلا.

آريا: عادي مو مشكلة اني اشتغل بمكانها.

كلاثم: اكعدي انتِ لتولدين علينه واحنه مابينه حيل.

آمندا: شكراً عزيزتي لتعبين نفسج، اني اكوم اشتغل شغلي.

فيروز: روحي رتاحي اني اكمل الشغل ماعدنا شي.

آمندا: لا عيني ماكو شي صعب، اني متعودة هناك اشتغل وماريد واحد يسوي عليه منيه ويكعد يعير بيه بعدين.

كلاثم: آمندا يمه.

آمندا: واني احجي الصدك قابل ترديني اجذب؟

كلاثم: السالفة صارت قديمة عيب تحجين بيها هسه.

آمندا: ليش عيب شكو بيها من حقها تشك باختها.

آريا: جنت جاهله، وغبيه وانتِ اختي الأكبر مني سامحيني.

آمندا: عفا الله عما سلف، وخري عني ولتحجين ويايه بأي موضوع مره ثانية، اني وياج على اجنازة مانجتمع.

كلاثم: عفيه ببنيتي اللي تريد تموت امها.

آمندا: اسم الله عليج، اني محجيت شي بس ماريدها وماريد اسمع صوتها ابد، اليوم اجيت لخاطرج ولخاطر هَيْصَم وفيروز وياريت غيركم ميطخني بحرف.

ريهاف: لعد اني شنو مسويتلج ليش هيج ويايه؟

آمندا: أعتقد كلما تكبرين تنسين شنو سويتي بيه من سمعتي كلامها.

ريهاف: وقتها ردت اتأكد بس حتى متصير مشكلة بعدين.

آمندا: شكيتي بيه لتقدمين أعذار تعبانه، ثنينجن شكيتن ومفكرتن شنو ممكن يصير لو الموضوع ينتشر، اني ما مامتحسفه بس على شغله وحده انو الغريب العرفني من يومين احسن من خواتي اللي ربن ويايه عمر، وسفه.

فيروز: تهدي بالله مو زين عليج العصبية وحركة الكلب.

آمندا: اني سكتت هوايه فيروز صار سنة، اسمع واعبر بس إلى متى؟ كافي مليت، من جرحني واذني جان لازم اسكت واعبر وهسه من عتذرن مني المفروض اسامح ونسى، لا مو آمندا التنسى ولا راح اسامح لو جان دخولهن الجنة متوقف على مغفرتي مراح انطيها لآخر نفس بيه، ورجاءً لحد تفتح ويايه موضوع يعكر مزاجي ماطول اني مرتاحة وسعيدة هسه لتضوجوني.

حوري: لتنقهرين ماكو شي يسوه.

آمندا: جنت دائماً احجي عليج شلون سويتي هيج بخوانج وعقابهم قاسي جان بس هسه يلا حسيت بيهم على رغم اكو اختلاف بالصار بينه بس الجرح نفسه.

حوري: اكو أخطاء صعب تنسي والأصعب منه تنغفر.

آمندا: تبقين احسن من خواتي ماطعنتي بشرفي مثلهن.

حوري: تكبرين وتتجاوزين صدكيني.

آمندا: عوفج مني شلونج بالدراسة؟

حوري: والله الحمدلله، خالتي مبتليه بأقمار ومحمد مبتلي بيه.

آمندا: يستاهل بس يريد أطفال.

حوري: والله الصراحة اني اخذني الواهس علمود يصير عدنا هسه طفل ثاني والا كل الظروف ماتسمح حتى انخبص اكثر واني اصلاً مخبوصة.

آمندا: تكبرين وتنسين.

حوري: ههههههه، نكبر ونعقل اكثر ماننسى.

ريهاف: هم يجي يوم تسامحني؟

فيروز: يجي صدكيني بس يحتاج وقت وجهد منج.

ريهاف: اني بذلك الوقت والله جنت تعبانة وآريا من حجت ويايه زاد التعب عندي وفكرت ممكن يصير هيج ليش لا، وهي يبست راسها متريد تسامحني واني ماكدر اعيش وي هذا الذنب.

فيروز: ادعي رب العالمين يلين كلبها ويخليها تسامحج.

ريهاف: ان شاء الله، احنه اصلاً ماعدنا غير الله.

فيروز: والنعم بالله.

هَيْصَم: النسابه كلها هنا نورتوا.

محمد: انا مو نسيبك.

هَيْصَم: ليش ولك غير رجل اختي.

محمد: ياريتها اختك جان ما طاح حظي بخطبتها.

هَيْصَم: لو اختي اتموت وما انطيها الك.

محمد: اياا ظالم ليش؟

هَيْصَم: اني خواتي يتخرجن يلا يتزوجن.

محمد: شكو بيها هسه مو هي مزوجة وتدرس.

هَيْصَم: وتبتلي بالقرايه والدوام والواق ويق.

محمد: هي هاي الحياة.

هَيْصَم: هاي الحياة للطايح الحظ مثلك اني ماعندي هيج، اهم شي للمره دراستها ثم دراستها ثم دراستها والرجل مصيره يجي وأن ما اجه ماينتهي الكوكب.

لائِث: هسه موضة مايتزوجون الا موظفة حتى تساعدهم بالبيت.

هَيْصَم: هذا من يكون مرته هي زلمة البيت فعادي يسوي هيج.

هَمْاس: اني ضد المره تتوظف، يعني اقصد انو اذا الأم جانت تشتغل الأولاد منو يربيهم والأب اربع وعشرين ساعة مشتغل مثلنا.

غضنفر: هذا عقلك يحتاجله إعادة فرمته، شكو بيها تشتغل وتداوم هذا حقها تعيش حياتها على اساس الاولاد يفيدوها بالمستقبل.

هَيْصَم: معليك بالناس اللي تشوفها، الأساس التربية، هسه اني رجال مابقى شي ودخل بالاربعين وشكد شخصية وهيبه بدون غرور يعني بس والله بعدني اخاف من امي اذا صارت عصبية واذا رادت شي اسويه بدون نقاش، طاعة الوالدين هاي مابيها عمر ورتبه وهاي السوالف، انزل على رجلها وبوسها وشوف شلون ربك يفتحها بوجهك من جميع الأبواب.

لائِث: ماعرفتك هيج صاير متدين.

هَيْصَم: انا متدين من يوم يومي بس انت اعمى ماتشوف.

لائِث: اي صح صدكتك، وعلي جان يروح وياي للجامع يصلي جذب.

هَيْصَم: اي غير رايحين نراقب العالم اذا التهي بالصلاة شنو اشوف؟

لائِث: ربك اهم.

هَيْصَم: والمجرم يلزمه ابوك.

لائِث: متكول على نفسك غلطان.

هَيْصَم: مو على اساس عمامتك خمس مترات، مو يكول انت هم جنت تصلي جذب مثلي.

لائِث: هن مرتين رحنه طلعتني كافر.

هَيْصَم: لعد متكول لنفسك خبصتني.

غضنفر: هَيْصَم متوقعتك هيج.

هَيْصَم: شبيه؟

غضنفر: كلش منطي مجال اللائِث.

هَيْصَم: اخوي هذا.

غضنفر: على سيرة اخوك، ليش متخلي زَيَّاف يجي وتشوفه امك.

هَيْصَم: امي تفتح وياه كاميرا وتشوفه احسن ماتلطم على كبره.

غضنفر: هسه احنه مو وياك سوه بنفس المجال مبينه شي وعايشين حياتنا طول بعرض.

هَيْصَم: احنه نختلف، حياتنا عبارة شغل وبس ومن نطلع المكان اسلاحنا ويانه ومحد يكدر يندك بينه وجه لوجه، بس اخوي اذا رجع يريد يطلع ويمشي وهو تعود على حياة الخارج صار سنين، وحتى أمي ابد متفتح ويايه موضوع رجعته، خلي بعيد وسعيد.

محمد: كلامك وزن وقافية، عين العقل.

هَيْصَم: اي كامت كلاواتك.

محمد: ميقبل من امدحه ميستاهل حبي الكبير.

هَيْصَم: مو أني اعرفك ماتحجي شي لله.

محمد: عوفنا من كل هذا اني اليوم وكدام هاي الوجوه الحلوه اريد اخطب ابنك لبنتي شنو تكول؟

هَيْصَم: مانقبل بيه اكبر منه نريد نفس العمر.

محمد: العمر رقم مو مهم واحنه شرايه.

هَيْصَم: مهره سبعين مليون وأريد بيت وحده ومايطبخ ولا ينظف.

محمد: يدلل اجيبله مساعده المهم توافق.

هَيْصَم: زمن صارت النسوان تخطب الزلم، افااا وانا ابن ابوي، ابني ما ياخذ غير الداك كلبه الها.

لائِث: وبنتك؟

هَيْصَم: تدرس وتتخرج ماطول بالرية نفس.

:الحياة هي مراحل، مرحلة صعبة ومرحلة حزينة ومرحلة سعيدة ومرحلة حب ومرحلة راحه، هاي المراحل كلهن جربناها، وهسه احنه نعيش بمرحلة الأمومة، من يكون ابنج صغير رضيع تبوسيه تلعبيه تهتمين بيه وتسمعين صوته وهو يناغي شعور لا يوصف، حلوه الحياة لو نعاشت صح وتقبلنه كل شي بيها من تعب وحزن وغيره، راح الكل لبيته وبقيت اني بيتي من اليمين نايمة رويم ومن اليسار نايم حيدر، واني بنصهم مغمضه عيني ميته تعب بس اريد اغفى وغفيت.

محمد: احبج.

حوري: هههه، شنو المناسبة.

محمد: بدون مناسبة، حبيتج من اول مره صارت بيها عيني عليج وكلت لو يصير الدم للرجاب ماتحلالي غيرج مره.

حوري: وسويتها.

محمد: اكيد مو محمد اللي يكول شي ومينفذه.

حوري: شكد تحبني؟

محمد: ماكدر اوصف شعوري ناحيتج بس كل اللي اكدر اكوله اريد اخليج طول العمر بنص كلبي وحس ميكفيلج.

حوري: لأن سمنت مو؟

محمد: تخبلين بكل حالاتج حوريتي وقوري روحي وسركي كلبي.

قبلته بخده كايله: اني هم احبك فوك ماتتخيل.

غضنفر: مريتي الحلوه شنو تسوي؟

آمندا: تذكر اليوم شنو؟

غضنفر: لا شنو؟

آمندا: اليوم ولادة الحبيب.

غضنفر: مو شهر ربيع الأول هذا.

امندا: هاي شبيك اليوم؟

غضنفر: مسطور سطر من الدوام وعلي أخوج ما عاف منطقة تعتب علينا سوالي جوله سياحية ابغداد.

آمندا: اليوم عيد ميلادك.

غضنفر: هااا، كل عام واني بخير يلا رايح انام بالسته كعديني تصبحين على خير.

سواها صدك وراح تعبي كله شمر الورد من الجربايه ونام، صح ضجت بس تفهمت تعبه قبلته بجبينه وغطيته وطفيت الكلوب نايمة يمه، شويه وحسيت بأيده تسحبني لحضنه كايل بهدوء.

غضنفر: شكرا واحبج.

آمندا: تدلل واني اهم احبك.

غضنفر: عذريني مكدرت احتفل وياج بس كلش تعبان اعوضج بغير يوم ان شاء الله.

آمندا: وجودك بحياتي أجمل عوض من ربي.

غضنفر: مابيه حيل ولج لتحجين هيج وتخلين كلبي يدك سريع وماكدر اسيطر عليه بعد.

آمندا: لا نام، نام اشاقه وياك اني.

غضنفر: احلى شي ب هَيْصَم انتِ اخته، واجمل صدفة هي باليوم الشفتج بيه، واعظم شي صار بحياتي كلها وجودج بحضني هسه واسمج بظهر جنسيتي، مريتي وحبيبتي وام وليدي.

آمندا: احبك.

غضنفر: اعشقج انا، فاق حبي حب العقال.

آمندا: ليش هو اكو عاقل يحب؟

غضنفر: لا والله بس المخابيل مثلنا يدخلون هيج طريق.

آمندا: بس حلو.

غضنفر: ماطول وياج يخبل مو بس حلو.

آمندا: يلا نام حبيبي وراك كعده من الصبح.

غضنفر: نامي ويايه هم لتبقين سهرانه مثل كل يوم.

آمندا: العب بشعري واني اغفى.

غضنفر: تدلل مريتي.

:الحب هو الشي الوحيد اللي يخليك تكمل بكل واهس وتعبر المشاكل بقوة وشجاعة، جنت نايمة حسيت بأيد تحركني فتحت عيوني شفته واكف فوك راسي مأشرلي اكوم بهدوء، كمت واني النعاس مسيطر عليه.

فيروز: شكو؟

هَيْصَم: ترحين للزيارة؟

فيروز: يا زيارة؟

هَيْصَم: الكاظم عليه السلام، الوضع ميسمح نروح لغير أمام.

فيروز: تمام خلي اكعد رويم تروح ويانه.

هَيْصَم: لا عوفيها يم أمي خطية نايمة ناخذها بالمره الجاية ان شاء الله، ستعجلي راح انتظرج بره.

حلوه الطلعات المفاجئة، صح تخليني استجعل ودربي ماندله بس احبها، لبست ملابسي على السريع وطلعت وراه اني من اروح للأئمة مالبس غير الأسود، طلعنا وصلنه للأمام زرنا وكعدنا بالضريح رفعلي ايده مأشرلي لمكان كايل.

هَيْصَم: هنا اول مره شفتج ومن عدها دشيتي مخي من اوسع ابوابه.

فيروز: يعني جنت تبيع عليه ثكل؟

هَيْصَم: لا جنت صدك خايف عليج يصير بيج نفس الصار بأهلي بالبداية.

فيروز: وبعدين؟

هَيْصَم: قررت اجازف واللي يصير خلي يصير.

فيروز: وزوجي صرت.

هَيْصَم: وصرتي ام أولادي ومريتي.

فيروز: شكد حبيتني؟

هَيْصَم: عاندت الموت بيج وهذا اقل شي ممكن اوصف حبي الج بيه.

فيروز: فوق الممكن والمعقول، انت روحك مربوطة بروحي مثل الظفيرة.

هَيْصَم: ذكرتيني بقصيدة تكول:
وحگ عينك
كلهه الكشخت گبالي فده لعينك
ولا واحد اجه مثلك
اباوع بالوجوه وبالي يم شكلك !
أحسك منظفر بالأيسر ويه الروح
بس مو مالت نحلّك
أحب الناس الـ تشبهك
وأحب أهلك
وأحب الناس الـ بحلّك
همّه الناس مو بيهم صفه حلوه ؟
شو انته حلو كلّك!!

فيروز: احبك.

هَيْصَم: روح هَيْصَم انتِ او وردة حياته.

ابتسمت بوجهه وأيده حاضنه أيدي داخل حرام الجوادين وحضرتهم، هيج أجواء روحانيه تبعث الهدوء والطمأنينة لداخل الكلب وتهدي الروح والنفس وتنطي طاقة مو طبيعية حتى تكمل الحياة، هنا انتهت أجمل فترة بصعوبتها والمها، وسعادتها وحزنها، بيتي البسيط وعائلتي الحلوه تودعكم على أمل تجمعنا الحياة مره ثانية بكل خير..

انتهى الكتاب
وغُلقت الأبواب
والجميع يعيش بسعادة وحب بعد تجارب صعاب
مابيننا ايام وساعات ويبعدنا انهار وهضاب
لكن القلب قرب البعيد وتسببت الأسباب
لكل مُحب دعى لنا بالخير وربنا استجاب
شكر كبير من القلب لكم يا اجمل الأحباب

انتهت القصة من يم أبطالنا الحلوين:
بتاريخ 31/12/2023
وبقلمي 17/2/2024
الساعة 4:27

شكراً لوجوكم ويايه طول رحلتي وأن شاء الله يكون لنا موعد قريب بقصة جديدة بإذن العليم لذلك الوقت اتركم بحفظ الرحمن وحمايته..

دمتم سالمين..

حسابي الأنستا لكل شي يخص قصصي..