رواية قاع الشياطين الفصل العاشر 10 - بقلم اسماء ديمير

.....................☆البارت التاسع ☆..................

#قاع_الشياطين(البصر والبصيره)

#بقلم_أسماء_ديمير

فكيت عيوني حيل جفلت ..

حجه مو وياج ، انتي تشتغلين ؟؟!

مارفعت راسي احسه صار شثكل ، غمضت عيوني ، تقدمت خطواته رجعت ليوره ضربت بالميز لزمت الميز اسند نفسي عليه ، رفعت راسي باتجاهه بؤبؤ عيوني يفتر بريبه ..

هو وكف بلا حركه ، صوت جره نفس ، حجه شجابج هنا انتي ..

بلعت ريك بلا رد ..

تقدم عليه لزكت بالميز همست بخوف نانه ؟؟

حسيت على نفسه قريب مني حيل صار بوجهي ..

كرر جملته بفحيح مرعب ، شنو كح** انتي ..

نزلت اديه اتلمس ملابسي والله مستوره ، اصلا الجو بي بروده فلابسه هواي ، منين جاب هالحجي ؟ هزيت راسي لااا بخوف ..

رد بنفس نبره :-لعد شجابج هناا ، ماتلفي هنا غير بس العواه* ..

همست بخوف ليش ؟؟

ليش شنوو ..

ليش مايصير ندخل هنا ، هواي اكو غيري هنا ..

فزيت من طخ جتفه بصدري ابتعدت عنه ، حجه اكو خدم واكو كحا* ياهو انتي منهم ..

وجهي خرط درت وجهي ادور على اي احد ، نانه و ين راحت .. همست مرت عواد هنا رفعت حواجبي ..

رد ، مرت عواد هم كحب* بس بعقد وكملها بضحكه بارده ..

سكتت ، احس كلبي يريد ينفجر ...

همس بهدوء ، اذا عدت اليله هاي بسلامه عليج وطلعتي صاغ سليم لا تجين هنا و اطلعي من المزرعه باسرع مايمكن ،

وجهت الج نصيحه   ، والا ترى البزازين الي مثلج ماتخلص هناا ، قرب وجه مني عفست وجهي ، همس تتملخ بززاين ، انفذي بنفسج باباتي ...

دار وجهه و ابتعد وخطواته ابتعدت اديه ترجف اريد اوكف مابيه، تلمست الميز اريد انهزم من المطبخ بسرعه ..

طلعت بسرعه اتلمس الميز والحايط ، وصلت للباب و انهبدت بجسم وعطت يماااا ..

اجاني صوت نانه يطمني  :- اسم الله يماا شبيج اسم الله ..

-لزمتها ارجف نانه منوو هناا منو وراي ؟

حجت بستغراب ، شكوو ..

-اكو شخص وراي ..

-لا يماا ماكوو المطبخ فارغ ..

- توه جان هنا شخص ..

- ياهو هذا شبيج ، خما سوالج شي ، تلمستني ..

رديت بخوف لا لا بس حجه ، حجي مو حلو يكلي انته كحب* شسوين هنا ماتجي هنا غير بس العو**

-هذا منو كلج هيج ياطايح الحظ ، شهل حجي هذا ..

-ماعرف بس والله كلامه ابد مو حلو بس يفشر ..

-شو دشوف وخرت تمشي وكفت بمكاني اني و هيه مشت دخلت للفله ..

-رجعت كالت ماكو فارغه ..

-كتلها رجعيني ، اريد ارجع للملحق ، اخذتني دنرجع ، اصوات ضحكهم واصله ليمي ، و صوتهم عبالي ، الزلم دومهم يحجون بصياح ..

و ضحكتهم فضيحه خاصه من يشاقون ، اسمع يكله الزمه الزمه دنعلمه شلون يتجرء يندك بينه خلي نعس بي واحد حتى يتوب ..

وذاك يعيط الي يوصلني ارمي والله قسم بالله ارمي ، و يركض و يصيح ..

توجهت للملحق اني ونانه ورجعتني ، بس دخلت للملحق تمددت بفراشي منهزمه من الخوف .

منو هذاا ، ليش حجه وياي بهل الطريقه ، شكد.حقير ، شنو شاف بيه يدل على سوء اخلاقي ، صابني القلق ..

صار عندي فضول ، بداخلي شي يكلي اطلعي او ادخلي و اكعدي اسالي ، مو طبعي حشريه ولا حتى فضوليه ولا احب ادخل بالناس ،

بس بعد هالموقف لا ماكدر ، منو هذا وليش اصلا حجه وياي هيج ، يحجي بثقه ولا خايف يمااا حتى ماستحه مني اني وحده غريبه  ..

طلعت من الغرفه صحت تالا وينج ..

ها ..

-تطلعين وياي ..

-وين ..

-للحديقه ..

-بهل اليل تردين نطلع و ثانيا اكو حفله بره شلون تردين تطلعين ..

عضيت شفتي افكر ، رديت ، نوكف وره الحايط ماننشاف ، بس تعاي سولفيلي شسون بالحفله هاا حبابه ...

- شحصل ..

-دمشي عاد بعدين تشرطي علي ، كامت جرتني ، طلعنه بهدوء حجت ذبي الحذاء لا ننفضح بشخطه رجلج ميرال ..

-بارده ولج ..

-دذبي بي صوت ..

-ذبيت البوت قريب الباب ؛ و كملت مشي ، و كفت ودفعتني لا طلعين راسج الزكي بالحايط ..

وكفت جامده ..

و هيه بصفي تلهث ، تكول كاعدين بالحديقه ، ملتمين على ميز ..

-اي ..

-وساري صاير الخدام مالتهم هههه ..

-انجبي تالا عيب عليج والله ، ديشتغل وياخذ حق تعبه ..

-ااي هسه دنشاقه ، واكف وراهم شايل كماشه الفحم ، و همه كاعدين على ميز ياكلون .. باعي هذول توم شكد حلوين ..

-ستار و بشار قصدج ..

-تعرفيهن ؟؟! ياحقيره طلعتي تعرفيهم ..

-نانه حجت بيهم وعرفت ،

-اي و هذا ماعرف منو ، همست الها ، شلون شكلهم ..

-هواي اوصفلج واحد اثنين ..

رفعت اصابعي افرك بيهم ، همست بهدوء ، اوصفيلي بيبير ..

-بيبير منو هذا ..

-كتمت نفسي و سكتت ، حجت مو وياج ..

-همست يكون اني صاحب فله ..

-حجت هااا كولي والله شمدريج ..

-مره حجيت وياه من جنت بالاسطبل مال حصن ..

عدلت وكفتها وندارت عليه :-اي شكالج ..

-ماكال بس سالته تشتغل هنا رد لا املك الفله اني ..

-هله هله ، و بعد ..

-هاهيه اوصفيهم الي ..

-ياهو ال بيبير مالتج ..

ابتسمت مالتي شنو شدراني بس سامعه صوته اني ...

-اكو غير التوم ضابط ..

-شمدريج ضايط .

-لابسه عسكري وكاعد كعده جنه مطهر  ..

- ههههه شبي ..

- مرجي ظهره على الاخر جنه باشا ، الحاصل واحد منهم ضابط و الثاني كاعد بصفه اسمراني بس حليوه ضحكت كذلته واكعه على كصته ،

- اي ..

-اي واكو اثنين مقابيلهم ممبينين ناطينه ظهرهم ..

جريت نفس درجعيني ماستفاديت شي ..

-لزمت جفي و مشتني وياها ، نسال نانه عليهم و نعرف بيبير مالتج ياهو شكلتي ..

رديت خايبه :-ماريد اعرف ..

-ماعندج فضول تعرفينه منوو، و تتخيلين شكله ، اذا عرفته اني منو بيهم اوصفلج شكله ..

حسيت من صدك بفضول وهيه تشجعني بهل حجي و تشوق بيه ، كتلها خاف عيب من نانه .

-لا مالج شغل نسال هيج وعود بس تكول اسمائهم معناها عرفناه و اني صورتهم الج ..

-همست تمام ..

دخلنه للملحق وفزينه على اسامه حجه وين جنتن عطتنه اثنينه ..

دفعته تالا دوووخر كبر جنك جني اليل  شبيك ،

- وين رحتن ..

- ولي شعليك شكو كاعد ليش مانايم ..

- اكول ساري هسه ..

- امشي بول وروح نام لا تشخه علينه باليل يله روح ..

- ابول عليج ترى ..

- مدت ايدها تريد تضربه لزمتها اني ، همست اله روح حبيبي نام ، جنه يم نانه نشوف خما تحتاج شي .

- تصبحين على خير ميرال..

وانته من اهله يعمري ... شفتي للنذل مايكلي تصبحين على خير ..

جاهل ولج عوفي ، ردت لا والله نحس هالتشوفي هالكبره ، شمسوه الهم يضوجون مني مادري ..

-ثاني يوم تالا شمرت حجايه لنانه و سالتها عليهم شنو هاي الحفله منو هذول ..

كالتها ضابط ماعرفه ، بس استاذ بيبرس معروف لان دومه يركب الخيل و استاذ عواد ، اسمراني وطويل و امبين من وجهه عصبي وخبل ، و البارحه جاي صاحب استاذ بيبيرس محامي هم ..

كعدت بصفها تالا تسال ، هذا ابو كذله ..

ردت نانه بستغراب ياهو هذا شدراج  بيهم انتي ..

اجاني صوت ساري فززنه و شدراج و شعرفج بابو كذله انتي ..

-ردت تالا ضايجه وكعدت اتفرج عليهم شنو حرام ، ادري جني دجاجه عميه هنا غير اشوف خلق الله ، غريبه مثلا ..

- رد ابتعدي عن هيج سوالف ، افتهمتي ماناقصين مشاكل احنه ، ناس فوك هذول ، اذا طلع السانج على واحد منهم يدوسج برجله و يمشي ..

- اول شي انتقي الفاضك وياي ، وماكو شي اسمه فوك وجوه ، ماناقصنه احنه شي عنهم ..

همست اي والله قابل عدهم ادين اكثر منه لو عدهم عقلين ،

ضحكت نانه ، حجت تالا ترد ،و ثاني شي داسال بسبب فضول شبيك تخبلت علي ..

سكت هو وامه ردت ، المهندس بيبرس واخو يشابهون بالسمار من تباوعين بوجوهم تعرفينهم اخوه ..

رد ساري ، ابو كذله تكولين علي غريب صاحبهم جاي خطار فلا تتاملين تشوفي هنا هواي ،

رديت اني بهدوء  :- بس فضول مو اكثر واني سالتها شلون اشكالهم شبيك وياها ..

رد كتلج احنه هنا نشتغل حدنه المطبخ و بس ،

سكتنه اثنينه ، بس كدرنه نحصل جم معلومه ، بيبير واخو متشابهين على الاقل ،

وراها بيوم رحت كعدت بالحديقه اخذت وياي موبايل و لوح الي مكتوب عليه باللغه برايل ، كاعده بالارض و مفرشه ،

صوت بنت بالحديقه تحجي ويه طفل وتناغيله ، هو نوب يبجي نوب يسكت ، لحد ماصاحت مره امبين صوتها مال وحده جبيره ..

- دخلي جوه لو لا يتمرض بالزايد مناقص امراض هو  ، مو شوفي يبجي .

ردت عليها البنت ، داشمسه ام زياد مشايف الشمس تفيده فيتامين دال ..

- اكول دخلي جووه دخل ام الفيتامين ، العلاجات مافادته تفيده الشمس ،

درت وجهي اتغاضه عن كلامها وياه البنت ، صوت بنت ثاني صاحت ماااما ..

- ردت ها ..

- صعدي لغرفتي اريدج حبابه ..

ماعرف شنو ردت عليها اذني توجهت على صوت السياره ، و صوت محركها العالي ، توقف المحرك ، فتحت باب سياره ،

دنجت  شغلت الموبايل جنت مفعله عليه برنامج يفيد المكفوفين برنامج ناطق ، خليته قريب اذني اسمع .. جانت وحده من روايات الكاتبه اليف شافاق  اجاني صوت بيبير ..

شلونج يالكناري ..

ابتسمت ، نزلت موبايل من ايدي ، التؤم اطلقو عليه هالاسم ..

- ضحك بهدوء اي كالولي ، واحنه هم انسميهم التؤم الحلاوي ..

- عود ليش ..

-وكف قريب مني ، لان اصلهم من الحله ،

-حبابين ..

- انتي هم حبابه ..

دنجت راسي ، شوي و حجه شغلتج ماناسيها بس لان مشغلون تاخرت بيها ..

لا عادي ، شوي و همست البارحه ..

شنو ..

سكتت ترددت احجي ، خفت اكله على الي انحجالي بالمطبخ بس بالاخر اني ماعرفه منو ، حجيت هيج ابتسمت اضيع سالفه ، فرسك شلونها ..

-زينه ..

-تجرأت و سالت شلون شكلك بيبير ..

-ضحك ..

-سكتت اني ، حجه ليش ، تردين تعرفين ..

-فضول ، بالاخر احب اكون الك صوره بمخيلتي ، رد هو صراحه ماعرف اوصف الج شكلي مو شاطر ..

-اسمر لو ابيض لو حنطاوي لو خمري ..

-حنطاوي ..

-وشعرك ..

-اسود ..

سكتت ثواني خجلانه اسال ، حجيت و عيونك ..

-سوده ..

حسيت بي تقرب وكعد كبالي ، اجاني صوته اكول ليش ماتمدين ايدج و تالمسين وجهي و تكتشفين بنفسج ..

سكتت ابتسمت بهدوء ، ماتضوج ،

همس لا ، اذا يروي فضولج لا ماضوج ..

رفعت اديه ، ليكدام ، هو مد جفوفه لزم اديه ورفعهم لوجهه ، كزبر جسمي من تلامس اطراف اصابعي لحيته ، عنده لحيه خفيفه بس تبزز وجه دافي ..

رفعت اصابعي لخدوده ناعمه ، صافيه ، همست غمض ..

نزل جفن عيونه رفعت اصابعي اتلمس جفنه و حور عيونه ، جره عيونه ادل على انو صاحب عيون كبار ، حواجبه طوويله ، يطلع طول الحاجب بطول اصبعي ، ابتسمت واني اتخيل وجهه نزلت اطراف اصابعي على رموشه ، نوب رفعت اصابعي اتلمس حواجبه الثخينه ..

رفعت اديه لراسه حجه دغدغتيني ضحكت ..

نزلت اديه و ابتعدت حجه ضل خشمي و شفتي ماتحسستيهم ..

هزيت راسي عيونك تكفي ،

شحصلتي من عيوني ..

صاحب عيون كبار ورموش سود و حواجب ثخينه سوده ،

برافوو ، بعد ..

هاهيه ..

- شوي و همس شلون صرتي ضريره ميرال ..

-حادث سير ، من جنت طفله ..

-اي ..

-جنت طفله توه حليت من المدرسه ، مستعجله على طلعه و عبره الشارع ، متحمسه ، مادريت حماسي هذا راح يخسرني عيوني ..

-ابتسمت بزعل ..

-رد احيانا حماستنه الزايده على شغلات ماتسوه ، تخسرنه هواي اشياء غاليه ، حتى سنين عمرنه ..

-فعلا ...

رد حجه واجت الضربه على عيونج ..

هزيت راسي لاا ، اجت براسي ، و قفصي الصدري ، راسي تضرر بنزيف داخلي ، وقفصي الصدري كسر بالاضلع ، الاضلع الها حل بس نزيف بالدماغ ، ماكدرو يسيطرون علي وخافو يسون ثقب بالجمجمه ويادي بيه للموت ، انتظرو ايام عسى ولعل النزيف يتوقف ، وفعلا توقف بعد ما ضرر جزء من خلايا و ضرر الي اورده و شرايين الي تغذي البصر ..

سويت عمليه بسيطه سحبو دم الفاسد بس اغلب دكاتره نصحو مااسوي اي عمليه داخل الجمجمه حاليا لان هواي اورده وشرايين تدمرت وتلفت ، نصحو انو نتوقف عن اي عمليه و ننتظر بصري يرجع لحاله حتى لو بشكل بسيط وبعد مرور سنوات من يتشافه دماغ عود اسافر واسويها ..

بس صار عكس توقعات الاطباء ، هو انو النزف كل فتره يرجع ماتوقف ، و البصر ماعد الي صار اكثر من عشر سنوات ، دمعت عيوني ..

واغلب دكاتره من اشوفهم تحاليلي و اشعه مالتي ينصحون بعدم اجراء اي عمليه و ابقى على هذا الحال افضل ، ناس تكول اكو بالمانيا بروفسور مشهور بهيج عمليات ، و ناس تكول ماكو امل لاتحاولين ..

جريت نفس ، بس الحمدلله على كلشي ،

- والي دعمج شسويتو اله ..

- رجال جبير الي دعمني ، جاي ياخذ حفيدته من المدرسه ، صعد ضغطه و متخربط و دايس بانزين بالغلط و ضربني ..

- وعفتو هيج ..

-قابل شنسويله قضاء و قدر ..

-اقل شي اخسره نظر احبابه مثل ماخسرج نظرج ..

ابتسمت على بشاعه جملته ،  ضحكت لا اراديا ، وخسر نظر احبابه وبعدين رجعلي نظري مثلا ، عمر اذيه المقابل ماجان بيها فائده النه ، فليش الاذيه ..

- تشفي الغليل ..

- منو كال ، مجرب انته ..

سكت ثواني ، بعدين حجه كلامج صح ماتشفي الغليل اتضل ندبه بداخلنه طول العمر ..

صدقت يالسفاح .

ضحك اشاقه وياج ترى ، ابتسمت ، اجاني صوت خلاني التفت ..

بيبيررس ..

صاح هلا عدي تعال توه جنت بالي والله ..

تقرب هالشخص ، حجه وياي بيبر ، هذا عدي محامي صديقي راح احاجي يشوفلج سالفه اوراقكم ..

سكت ، وتقربت دوسات اقدم نطق مو جنت ادك عليك و ينك صدك تحجي هو وكتها هاي ..

عقدت حواجبي واني اميز صوت ..

رد اجل الي بالك عدي دحاجيك اريدك منك خدمه صويحبي ..

سكت بعدين رد شنو ..

هالبنت ماخذين اقاربها اوراقها الرسميه حتى لاتتصرف بفلوسها بالبنك تكدر اطلعها منهم قانونيا ..

سكت بعدين حجه ليش قانونيا دز عواد يجيبهم الك .

- حجه ججج لا خليها قانونيا وعلى ايدك مااريد قال و قيل ..

- ماعندي وكت وليش ادوخ نفسك قاطعه بيبير عدددي تشتغلها لو ادز دانيال  ..

- اني ساكته و اسمع ، الله لايجذبني هذا الي كلي انتي كحب* هو نفسه ..

قاطعتهم حجيت بهدوء اسال ،  البارحه انته الي جنت بالمطبخ؟؟!

رد بهدوء اي اني و حاجيتج هم بس باين انتي من نوع ماتخذين بالحجي بسرعه ..

بلعت ريك وجهي صوفر رد بيبير شحاجيتها شبيك وياها عدي ترى بنت شسمه امم ..

ابتسمت عرفت عود يكله عميه كمت لحيلي اريد ارجع ..

- بيببر حجه ميرال على كلمتي وياج ..

- هزيت راسي مشكور و مشيت بسرعه ..

اسمع طلع صوت ذاك نذل يكله ما عندي شغله وعمله اكعد الملم شغل اوراق وره هيج ناس من كل عقلك بيبير بيا حال احنه ، و اصلا ليش مخليهم هنا عندك بالمزرعه ..

رد ناس فقره نكسب بيهم اجر شبيك انته طاكات خبالاتك صار فتره  ..

رد بنتره ، اعتقني لخاطر ربك و لا تخليها بالك و لزمهم درب و انطيهم جم فلس واطردهم ، اوراق و سوالف ثانونيا ماكوو ما عندي وقت احير بيها وباهلها ..

كملت درب و خفت صوتهم ماسمعت شنو يكله ، كون مرض بيك شكد حقير ...

المغرب راحت نانه للمطبخ ، حجت تجين رديت لا ، اسامه جلب يريد يروح وياها ، مارضت ضل يبجي جلب الا يروح ..

نانه حجت تالا تعاي الزمي داروح ،

همست اخذي وياج نانه ..

لا يمه هاي ام زياد ماترضه اضل بس تحجي وتزمخ بينه نوب اخذه وياي مايخلي لا ثلاجه لا كاونتر مايفتحه ..

طلعت هيه وتالا جرت اسامه من هدومه عتته هو يبجي ، يصيح هديييني ..

وهيه ترد انجلب لا اصلخك بالنعال ، جرته للصاله هو يعيط .

حجيت وياها عوفي طفل لا يصعد ضغطه ،  شبيج ..

تعال حبيبي ، بعدني احجي هو شال نعال وشمره عليها وشرد للغرفه هو ضلت تعيط ..

جريتها دتعااي عوفي ،

نترت شكوو مارحتي ويه نانه داخلص مكم انتو الاثنين يوميه بيت هدوء ..

سكتت ضايجه حجيت مااريد هيه كوه .. تالا اجت يمي ليش ، بيج شي ..

حجيت الها الي صار ، حجت ليش ماكلتي ليش ماحجيتي الي ..

ماعرفه منو ولا شكله شلون راح تعرفين ، ردت دكومي وياي لعد كومي ، دخل يحجي الا اضربه بالنعال منو كح** يا ابن الكح** ..

نترت تاالاا ..

دمشي اكول ، انفتحت باب غرفه و اجانه نعالين ترس علينه ، عطتنه اثنينه ..

صاحت تالا اليوم اخليهن بحلكك يكرم الله ركضت عليه هو ركع الباب حيل ،  بس مالحك خطيه ، دفعت الباب ودخلت عليه  سحلته سوته وصله مسح بنص الغرفه ، دخلت افزع اله ، هو هم مايكعد .

كل شوي ضاربنه بالنعال مايصير والله هيج ، هيه خلت عقلها وياه مرغلته بالارض ، دفعته و سدت الباب عليه هو يصيح تالا بربو* تالا البربو* و يصفك ..

عفناه ورانه تالا اخذتني و مشيت وياها لحكنه نانه ، من دخلنه للمطبخ اجانه صوتها متفاجئه هاا يما شو لحكتني ..

ردت تالا نساعدج ، جرت كرسي و كعدتني تالا ، صوت وسن نطق هاي يوميه جاي وحده لحد مايصير مطبخكم رسمي انشالله ..

نترت تالا عاد نانه تشتغل هنا حالها حالج متفرق عنج بشي فماله داعي التجاوز و تجريح رجاءا ..

فتحت عيوني شعجب ماكالت الها انجبي هههه شهل كلام المؤدب ..

وسن ركعت جدريه حيل على ميز و طلعت عصبيه ، تالي لزكتها تالا بغمه وتحجي كوون كسر بيدج يالثوله نوب الجدريه تسوه خمسين الف ، شوفيها نانه خاف طي* الجدريه انشخط ..

ابتسمت اني درت وجهي .. ،

تالا تقربت من نانه تكللها ناخذ فره على البيت عليج الله ..

- لا امي لا ، ماريد اسمع حجي ..

-تاففت تالا بضوجه ..

-همست الها تعاي نطلع للحديقه ..

-مدت ايدها وجرتني حجت نانه وين ..

-رديت بره مانبتعد...

-مشينه وطلعنه سويه همست الها اخذيني للاسطبل ،

ردت عليه تالا ماترضه نانه ..

-ضحكت عندي واسطه ترى امشي ..

-مشينه باتجاها و صوت الخيل بين ، الشمس حلوه والجو دافي ، وريحه زرع تجنن خاصه الورد  ..

ربع ساعه ورجعنه ماطولنه ، بطريق رجعه اسمع صوت سيارات دخلت للكراج ..

تالا ...

حاظنه ايدي و تمشي وياي ، و كفت السيارات بالكراج مانتبهت عليها ، ميرال همس صوت سيارات مو ..

مادري وين التفتت ورانه لان صدك اكو سيارتين وكفن ..

جريتها وكفنه على صفحه ، حجت و ين ..

لايشوفونه يمعوده و يسمعون نانه حجي ..

-همست شكوو ..

-مادري ، صفنت بيهم نزلو و ياها جنط سود ، وتوم نزلوهن ، و ياهم ابو كذله الوسيم ..

شفت اثنين نزلو من السياره الاخيره ..

حجيت هذول يمكن بيبيرس واخو عواد ..

حجت وين .

نزلو من سياره الاخيره بس صدك يشابهون بس واحد و جهه بي مجال بس ثاني عبالك سفاح وجهه مابي ابد نور الرحمن  ..

ضحكت عود صدك ..

اي والله وجهه محترك اسود ،

حرام تتنمرين ، منو بيهم عده لحيه ..

سكتت والتفتت عليها ، شنوو ..

اباوع لوجها تخربط حجت بتلعثم داسال يعني ..

رفعت تك حاجب ورجعت اسوف منو ابو لحيله ، شفت صدك واحد عنده لحيه و هذا هو الي كلت بي مجال شوفه .

حجيت ليش منو هذا ...

ابتسمت بيبر هذا ..

قصدج بيبيرس ..

اي هو ، خوش ولد ..

ولد بعينج رجال شكبره ..

اي بس خوش انسان ..

صفنت بوجها تعرفي ..

لا ...

ماصدكت كلامها ، خيه احجي اني اختج ..

دارت وجها تتهرب ، حجت بعد شكوو ..

شنو شكو دخلو جوه بعد ... تعرفينهم انتي شلون ميزتيهم اصلا ..

ماعرفهم والله بس بيبير حجيت مره وياه على اوراقنه و نانه هم حجت وياه وعرفته ، و تؤم بالمطبخ تعرفت عليهم ..

و ثالث ابو كذله ..

اعتقد تقصدين عدي ماعرف بس صوته بس هو هذا الي فشر علي اسمه عدي ..

ابين هو ساق* من شكله اصلا ..

جريتها و رجعنه فتت من يم شباك الصاله و شفتهم مجتمعين ، اني عيني عليهم شفتهم واكفين مقابيل بعض و يحجون التفت علي واحد بيهم ابو كذيله ، و اتجهه للشباك بعصبيه و جر البرده حيل و سدها عمه شبيك هي حيوان ...

دخلنه للبيت ، صوت اسامه طالع يبجي ..

فزت ميرال حجت عزز ولج اسامه نسيناه وحده يماا ..

ركضت افتح اله الباب الغرفه  ، فتحتها وكفت اباوع عليه  لان وجهه احمر صاير من البجي تلكاني تفال و يضرب بيه ميت بجي ، يماا من شفت وجه سكتت خفت عليه خطيه ،

يشهك نوب طاك من بجي ، كون يشوفه ساري يشكني نصين ..

ابن الحلال عند ذكره ، اجه و سمع صوت اخو ، وحجه شبيك ..

حظنته ابوس بي اني واكله حباااب اسكت انطيك فلوس والله ، سديت الباب اتوسل مايحجي هو يبجي مايسكت ..

دفع الباب ساري ودخل نترر شبي هذا ..

وذاك نذل رغم ماحاظنته وابوس بي يكله تالا ضربتني و حبستني نوب هو شاف اخوو صاير قطعه من دم و يناشغ فك عيونه ..

اجت ميرال ادخلت حجت ماندري والله ماندري ، دفعني حيل وكعني على ظهري و شاله يسكت بي وراح يغسل وجه بالمغسله ،

وذاك يعدد اله شنو سويت اله نصهم جذب ..

لا بلى اغلبهم صدك بس غير هو ماينجرع ابو شخه ..

صاحبيه والله اكير ايدج نوب اذا مديتيها عليه ، شنو انتي ماتكليلي ، ماعندج عقل غبيه ، شنو سويتي اله وخليتي يوصل لهل مرحله لو صاعد سكر عنده هو طفل ..

سكتت مدمعه ، هو استلمني غلط و رزايل ، ميرال ردت ماندري شبيك نسيناه والله اني السبب ..

هو يرد لا هي هاي حاطه عقلها وياه دائما لو صاير بي شي عبالج اخليج سالمه امرعدج والله ..

تمالخت وياه نوب ، ميرال بينه ، ذكرته بايام قبل لو امي عايشه جان عرفته قيمته ، شلون تتجرء تحجي وياي هيج ولك ..

رد اليوم اسكطع والله  طفر عليه ..

دفعتني ميرال للغرفه وكفت بوجه كاافي ساري شنو القصه ماقبل تضربها ترى ..

ماشوفيها شلون عليها السان فوك غلطها  ..

خلص كتلك اني سبب مالها شغل هيه .. من اجت نانه ماحجو اله الحمدلله ، جان تخبلت على ابنها صغير  ..

ضليت كم يوم بعدها مجنبتهم ، هو من يشوفني يخزرني واني اجر عيوني منه جر مو عاجبني ، اسامه من بعيد يأشرلي و يضوج بيه ..

فرده نعال .  فد يوم ساري مدد يقره عند امتحانات اخر سنه ، ملتهي واني هم عايفته ..

فد يوم حبيت اتحارش بي و راسلته على فيس ..

مارد لان جان ملتهي بالدراسه ، حبيت احاجي بالطف بس مو مباشره لان ماعرف بوجه احجي عدل ..

ميرال ...

اجت نانه تكلي الاستاذ بيبرس دز عليج تعاي ..

كمت وياها اشوفه ، حجت وهيه مرتبكه انتي مسولفه وياه حاجيه شي ، رديت لا بس شوي على سالفه الاوراق ليش شنو وصلج من حجي ،  اني غلطانه بشي ..

- لا يمه بس شنو هالميانه وايكلي دزيلي على ميرال ، اني كتلهم انتن اقاربي واني مثل امجن حاجيه غير هالحجي ..

- لا والله اني هم من انسالت كلتلهم هاي ربتني مثل امي ..

سكتت وجرتني للحديقه وياها ،، وصلنه اسمع صوت نافوره و عصافير ، اقتربنه من اصوات رجاليه ، شوي و ضحت عندي صوت بيبير و ذاك اخلاق سزز ، نانه حجت تفضل استاذ ..

طلع صوته لبيبير شلونج ميرال ..

فركت ايدي زينه ..

- عنوان بيت ابو يقين الي اخذناه من ام ساري غلط ماموجوده هيج عائله ..

سكتت عاقده حواجبي التفتت على نانه حجيت بتسال نانه ؟؟!

- حجت نانه ،  لا والله نفس بيت متاكده يمه ،

حجه المحامي الي اسمه عدي بثقه و بروود تام ، لا شنو رحت بنفسي ومحد يعرف هيج عايله وهيج اسم ..

غمضت عيوني ، عرفت من نبره صوته مو صادق ، بيبير حجه متاكده انتي يسكنون بالدوره ب***

ردت نانه اي والله حتى بمركز الشرطه نطيت العنوان واخذونه اله ممتوهمه اني ..

سكت بيبر شوي ..

كالها هاهيه توكلي ام ساري .. توه امشي حجه لا انتي ابقي داسالج على نوع الاوراق شنو حتى اذا اكدر اطلعلج بدل ضائع .

مشت نانه و تركت ايدي اني اعرف ، اكو انه بالموضوع وذاك جذاب ومايريد يساعدنه يستنكف ...

حجه بيبير بحديه ، رجع اوراقها عدي حتى لو بالقوه ..

نتر بكل برود ، ندخل بمشاكل بسبب وحده عميه ، احنه عايزين شبيك ..

ماكدرت اوكف ، عفتهم و مشيت صاح وراي بيبير ميرال ..

و كفت كازه على سنوني كوه كتمت بجيه ، حجيتها للجمله  كبل  ، ماوزنتها للحجايه اصلا .. بس قهرني ..

التفتت عليه ، يمكن اني عميه اي ، بس مو عميه اخلاق و لا ظمير مثلك ،

حجه بهدوء ، لمي نفسج وارجعي للحفره طلعتي منها ، لا تخليني ارجعع اني ...

صاح بي بيبير هييي شنو سالفه مو بحظرتي هيه ، ماتريد تتوكل بسالفه اني اوكل دانيال يشوفها ..

- حجه بهدوء لخاطرك بس ، باجر اوراقها يمها بس توعدني تطردهم ماتبقيهم ..

عفتهم و مشيت ماكدرت ابقى ، نص درب و بجيت نوب ضيعت درب ، وكفت بمكاني ابجي ..

صوت رجلين تقربت مني ، صوت بيبر خله ايده على جتفي ، تيهتي شنو ، بعدت عنه ، جيبلي الاوراق و بعدها متشوف و جهنه والله ، ممجبوره اتحمل اهانه اني ..

بنت بيت محترم ويجي واحد يتنمر علي و يعيرني بعاهتي ..

حشه ماعندج عاهه الله يشهد ، و خر شعري عن وجهي يهدا بيه ، همس بهدوء ، بنت بس الهيئه ملاك ..

بين ماجنت ابجي من حجه هيج سكتت و صفنت بحجايته ، ..

#يتبع ....

صفحه الفيس بوك ( كتابات اسماء ديمير )

الانستا ... asmaa_demer