رواية قاع الشياطين الفصل الحادي عشر 11 - بقلم اسماء ديمير

.....................☆البارت العاشر ☆..................

#قاع_الشياطين(البصر والبصيره)

#بقلم_أسماء_ديمير

س

كتت رفعت اديه امسح بدموعي ، رد بهدوء الي تردي يصير تدللي و سالفه الطلعه منا ماكو صرتو يمي بعد ..

-على شنو كارهنه هذا ..

-منو عدي؟! لا هذا معقد و نحس هو وعواد نفس الطبع ..

-عواد اخوك  ..

-ابو امير اي  ، تعاي يله مو كتلج يرادلج عصاا ،

همست اي لازمني عصا هسه اوصي نانه عليها ..

لزمني من ايدي و صلني لباب المطبخ ، حجه تردين شي ام عيون الحلوه .

هزيت راسي لاا ..

سكت شوي وحجه باجر اني هنا ترحين وياي للبستان اشوفج الورد و الاشجار وعدنا جم دجاجه هناك ..

سكتت شوي درت وجهي حايره  ..

حجه هو يقنعني ،  الطرف الثاني من البستان يطل على دجله و عدنا زورق هم ..

- صدك ..

-اي تجين حتى اخليهم يحظرون الزورق النه ..

سكتت شوي و حجيت تمام ..

-متفقين يعني العصر ..

-اي اجيب وياي شغلات نتسلى بيها ..

-مثل شنو ..

يعني حبشكلات ابتسمت ، ضحك بهدوء ، زين واني هم اتحظر ..

-شنو تتحظر ؟؟! 

حجه بسرعه يله متفقين خوش .. رديت اي نطيته ظهري و مشيت للمطبخ ، 

دخلت مبتسمه اسمع صوته يحجي بره بس مافهمت شنو يكول ، رجعت شعري وره اذني مرتاحه ..

شي بداخلي مرتاح ، كلمه ذاك ادك بكلبي و مستعر من عدنا ، بس الي مطمني كاعدين بيت بيبر و هالانسان مبين طيب ..

لكيت تالا وحدها ، ماحجيت الها ، حسيت شي خاص بيه ، مشيت للغرفه احظر شي البسه باجر شي مناسب ...

فتحت الكنتور و راحت ايدي على خانه الي بيها فساتين ، كعدت اتملس قماشهم داعرفهم ، طلعت وخليتهم على صفحه ..

رفعت اصابعي وزحت بلوزتي عن ايدي ، دشوف صار شكد ما شايله شعر ايدي بس ماكو خفيف مايطلع بسرعه ..

ابتسمت رفعت اصابعي اشوف شواربي ماكو ، احلى شي اني احس هنه ماكوو و يطلع بالحقيقه هنه سود ومبينات عزااا ..

مشيت بسرعه على تالا ، همست تالاا ..

- هاا .

بلعت ريك اريد احجي ، همست اكول عدي شعر بوجهي ..

ردت بستغراب شنوو ..

جريت نفس شعرر بوجهي اكوو وجهي اوفر شي بي شي محلوو ..

ليش ..

- اسأل

- احد مسمعج شي دروح انعل والديه ..

- لا ولج غير اعرف ، حتى ارتب نفسي ، كل البنات يحتاج الهم ترتيب كل فتره ، مو امي جانت كل شهر بالصالون ،

- هااا هم صدك بس لا مابيج شي جنج العافيه ..

- صدك والله لو تجامليني ..

- لا والله مابيج شي ..

ابتسمت خوش . . ردت شبيج انتي جن اكو شي بالج

لااا ، نطيتها ظهري ورجعت بسرعه للغرفه ، لزمت الايباد افتح كتب صوتيه ، ماعرف ليش هيج سويت بس جان شي بداخلي دفعني ، فتحت لبحث بكوكل صوتي ..

همست كيف تعرف اعجبت بشخص ..

طلع صوت كوكل يأكد عمليه البحث و حجه بصوت عالي ، كييف تعررف اعجبببت بشخص ..

فكيت عيوني و ربدت الايباد بالفراش حيل و طميته بالمخده عززاااا عزاااا .

انفضحت ، صاحت تالا شنوو .

حجيت مرتبكه شنوو شكوو .

- صحتيني ..

ديت اتلعثم ، لااا ...

لزمت كلبي يبووو ، رفعت المخده و شلت الايباد فلك طرك هم بيك بلااا فضحتني ، قربت جهاز ، خليت سماعات و خليتهم باذني .

كعدت اسمع تحليل نفسي و جسدي ، اذا نجي للحقيقي كلشي مافتهمت ..

تكول لازم تشوفين نظرات من يضحك ويباوعلج تكون نظره صادقه ..

بالله هاي شكوللها ..

لو تكول ركزي على نظراته وين يباوع ،

هزيت راسي جزعانه ، هو اني يلوكلي الاعجاب لا والله امداني ، دخل ادبر نفسي هاليومين تجيني الدوره ويله عود افكر بالحب ..

ثاني يوم تحمست اروح للبستان ، حجيت الهم كلت حتى لا هم يفتقدوني ، اسامه بعدني احجي واسمع لبس نعاله يكلي يله ميرال يله ..

ابتسمت ، حظر حذائي هم ،

نانه بنبره صوتها مو عاجبها ، وتكلي يما تعرفي انتي وترحين وياه ..

- رديت خوش انسان تعامله جدا راقي ..

-اخاف عليج يماا ، الرجال ونعم منه وادمي بس و سكتت حايره ..

-رديت تعاي وياي ، اني ضايجه والله اريد اطلع تعاي وياي .

قنعتها كوه : -لمت كليجات وبطل عصير وبعلاكه  اخذتهم اشيلهم ، جرتني و مشت وياي ..

حاظنه جتفها وامشي وياها ..

حسبت الخطوات بعد بستان عنه تقريبا اكثر من ١٢٠ خطوه ..

لحد.ما لفحني هوى بارد واوكسجين عالي و ريحه برتقال ، ابتسمت ، هاا نانه دخلنه بستان ..

-اي يمه و ذاك الاستاذ بيبيرس منطينه ظهره ..

وصلنه قريب و حجيت بيبر ..

هو حجه هااا جن تفاجئ حجه ام ساري هاا شو هنا ..

-رديت اني بابتسامه اجت وياي ..

سكت ، اسامه طلعت يركض و يصيح وووردددد اشلع الج وووؤد ميرال ، زادت ابتسامي شلع حبيبي بس مو هوواي ،

هو مانطق بعدين حجه على كيف .. ليش؟؟! .

عقدت حواجبي  شنووو ...

رد هذا اااا ، يعني ليش تعبتيهم وياج ..

- لا عادي تتونس ويانه ..

- ها خير انشالله هلا بيها ..

-رفعت علاكه جبت كليجه وياي .

-رد بهدوء عاشت ايدج يله تعاي ، دشوفج صار عدنا فرو،خ ..

- عدكم فرو،خ بهل برد ..

-اي بالحواظن افرا، خ ..

مديت ايدي اريد امشي ، مد ايده ولزمها يمشيني باتجاهن ، ايده دافيه حيل عبالك جان خالها بجيوبه ، دافيه و بيها ندى ، 

-حجه ندخل للدواجن ..

-تحب الحيوانات بيبير ..

-صراحه ..

-اي ..

لا بس اني من اشتريت المزرعه جانن موجودات و ردت اتصرف بيهم بس ابو حمد كال اني اداريهن و خليتهن ..

نانه وراي تمشي ، اسمع خطواتها ثكيله ، رد يحجي ويه نانه ام ساري ماريد اتعبج اني موجود اذا تردين توكلي ..

-ردت لا يما ماكو تعب …

جر نفس ضايج ، و ضغطت ايده على ايدي ، تحسسني و كفت عن حركه والتفتت علي باستغراب ، تصرفاته شككتني شبي هذا  ..

دخلت للدواجن و تجيني اصوات الافرا، خ ، مو فر،خ واحد لا افراا ،خ صوتهن قووي ويص وويص ..

-ضحكت انطيني واحد…

-كلهن الج اصلا ..

-صدك والله ..

-والله اخذيهم ، وكفني على صفحه و ترك ايدي وراح شوي و يجي  صوت فرخ بيده يويص ، حجه افتحي ايدج ..

فتحت ايدي متحمسه و فاكه عيوني نتظره ..

خلاه بيدي يماااا فدوه يجنن ، ناعم ناعم ويويص ضايج ، جلبت باديه اثنين حيل حتى لايطفر ، حجه لا لا جعصتي راسه ، على كيف ..

فتحت اديه شوي ، قربته من وجهي امسحه على خدي يروحي .. حجيت اخذه وياي ..

-ضحك خلي ويه اخوانه خطيه ..

-عليك الله ..

-اخذي واخذي امه و اخوانه على الاقل ..

-تمام ..

-واني هم اخذيني ..

-ضحكت وانته شنو ..

-اعتبريني من العايله ديج مالت هم  ..

ابتسمت فهاوه ، رد عليه يله اخلي ابو حمد يخليهم الج بسله و يجيبهن الج بعدين .

اخذنه نفتر ، شوي و كال انتظري هنا هسه اجي نسيت اجيب شغله ..

نانه اخذتني نتمشي ، لزمت اشجار البرتقال ، كالت رفعي ايدج تكدرين تلزمين برتقاله ، مدندله  ..
رفعت ايدي اهامش ماكو شي لزمت ايدي و خلتها على برتقاله كالت جريها ..

جريتها وانكطعت ، حجت ممرتاحه لتصرفات استاذ بيبيرس يمه ..

-بهت وجهي ليش نانه ..

-والله يايمه شافج حلوه و صغيره و اكيد سال وعرف يتيمه خاف مستصغر حيطنه و عبالك يستغلنه ..

-رديت ماحسيت يي هيج نانه احسه انسان صادق ..

-ماعرف والله حقج تعيشين وتنسعدين و تشوفين بس الحذر واجب ..

-اذا تجاوز وياي ابتعد ، نانه خليني فرحانه ، اذا تعده حدوده بعد ماختلط بي ..

-انتي ادره بس كلت انصحج والله هو رجال طيب ماشفت علي شي والله …

دنحجي و حجت بخوف اجه اجه ، سكتنه ، وصل ليمنه حجه هاج هاي البارحه و صيت عليها ،

همست شنو ..

رفع صوت علاكه ورقيه تخرخس ، لزمتها ، عقدت حواجبي ، عرفتها شنو

حجه ،عصاا ، تستفادين منها ..

- ليش تعب نفسك ..

-ماكو تعب ، فتحها ونطاها بيدي لزمتها صار شكد مالازمه عصاا بيدي ، بيها تفاصيل خاصه من جه الزمه كانو بيها شذر او نقشه  ..

-مديتها كبالي شكرا ..

كضينه و كت شوي ورجعنه ، بعدها انتظرت يجيبولي الاوراق ، لان ساري خلص امتحانات و لازم اشوف مدرسه لتالا ، وروحه ورده …

استحيت اداعي بيهن وارد اطب سكتت ، لحد ما فد يوم اجه بشار حجه يالكناري يردون بصاله ..

رديت بشار لو ستار ..

بشار اني تعاي تكدرين تمشين لو اكودج ..

لا اعرف بس دليني ، مشيت و العصا كبالي ، تتحسب الي خطوات ، دخلت الصاله ، صوت طفل يبجي بس بعيد وكانو بالطابق الثاني ، و صوت عالي رجال يصيح و جع سكتي لانعل والدي انتي وياه ..

وجهي خرط وكفت مرتبكه ..

حجه بشار امشي لاتخافين ..

رديت بهدوءصوت طفل يبجي ..

حجه اي هذا امير ابن عواد خطيه مريض ..

شبي ..

-عنده انحراف بالعامود فقري و يتالم بس عواد ماله خلك و يتخبل من يشوفه يبجي هالتشوفي طالعه خبالاته على مرته المسكينه .

-صدك يحجي بدل ميتعاطف ويه طفل ويه زوجته ..

-هو هذا حيوان ضحك مو تحجين اني كلت هيج ..

-ابتسمت لا ماحجي ، شنو تصير منهم انته بشار كرايبهم  .. 

-اني لا امت لهذه العائله الرديئه بصله تبا لهم جميعا ..

-ضحكت انكلبت سيبويه ..

-سيبويه منو ..

-متعرفه شنو ..

-لا وحق الله ،.ماعرفه شيشتغل هذا ابو منو من يااعشيره عمامه من ووين ..

- هههه ، اختصاصه نحو هو اول من بسط النحو ، تعرف هو مو اسمه سيبويه بس لقبه هذا ،ومعناها بالفارسي رائحه تفاح ..  اسمه الحقيقي ، عمرو بن عثمان ، ولد بيران و توفي بايران .. شمخلص دراسه بشار ..

-حجه ديربالج نزله درج جدامج ، اهاا مثغفه انتي يعني ، اني ممخلص يادوب ثاني ابتدائي و بطليييت ..

-ابتسمت وليش بطليييت ..

-جنه نطلع  نبيع جكاير او نلم قواطي ، يعني الحال مايساعد و تركنه المدرسه ..

-اختفت ابتسامتي ، حزنت عليه بداخلي ، يااعيني ، سالته  و هسه شلون وضعكم ..

-لاخير من الله هسه كمنه احنه ننتج جكاير ونبيع .. ضحك ..

-ابتسمت لاصدك شنو تشتغل حاليا ..

-بالعقارات ويه بيبيرس ، نستلم عقار  او قطعه ارض او مقاوله و نشتغلها ..

-بيبير يشتغل بالعقارات يعني ..

-اي مهندس وتعرف علينه من جنه نشتغل عمال ، و مد ايده النه ،و صار وين ماعنده شغله،  يدز علينه لحد ما انجمعنه بمكان واحد ودنيا فرجت علينه ..

-حجه عدي كبالج كملي دربج ..

-ابقى وياي ..

-والله لازم اروح احظر السياره ، عدي ماياكل بشر  ترى ..

ابتسمت بس السانه حشاك طافره منه بذره الاخلاق ..

-ضحك ضحكه قويه همس لايسمعج يزعل ..

عافني وراح واني كملت مشي ، ضربت عصا بايه صغيره صعدتها بهدوء ، وكفت من سمعت صوت اوراق ، 

كحيت بهدوء ، اعلن عن وجودي كلت خاف مايشوف لو اطرش ..

ماكو صوت بس صوت اوراق ..

حجيت العفو كالو جبت اوراقنه ..

ماكو رد هدوء عارم  ، نوب طلع صوت جقه قلم ، انفتح جرار و انسد حيل ..  رفعت ايدي ابعد شعر وره اذني حتى اسمع زين ، ليش مايرد هذا ، وترني نوب  ..

صوت الاوراق و تقليبها اختفه ، رمشت بهدوء انتظر رد او اي صوت ..

صدر صوت طبه رجل ، وكفت جامده ، حجه اني شكتلج ميرال ؟؟!

همست شكلت !!

مو كتلج لاضلين هناا ؟

بهت وجهي ،ليش كارهني ، مضايقيك بشي احنه ..

وراج مشاكل انتي و اني ماحب المشاكل ، ومشاكلج قانونيه فاولها وتاليها راح تنشمر مشاكلج علي وتعاي عدي حلها ، لمي اهلج وطفري منا بابا ماعايز اني ..

-ما عدنا اي مشاكل احنه ناس مسالمين ،

صوت اقدامه تقرب مني ، طرفت عيوني باتجاه  الصوت ، لزمني من جتفي باطراف اصابعه دفعت ايده وابتعدت خايفه ..

-اوراقج كامله اخذيها ..

مديت ايدي باتجاه اخذها ،  وينها .

-دبري نفسج و روحي اخذيها ..

ضغطت على نفسي مشيت دمعتي بطرف عيني ، مديت عصا اتحسس الارض ، طخيت بشي ..

وكفت مديت ايدي اتحسس ، طلع الميز ، مديت ايدي  حنيت جسمي ادور عليهن وين الاوراق حصلت دفعه من وراه لزكت وجهي بالميز ، عطت ااه ..

لزم راسي وثبته على الميز ، اديه على الميز وجهي ملزوك بيه ، حركه غريبه و مريبه بجيت والله اعيط وخرر عني  ..

ضغط حيل على راسي ،  اطلعي مناا ، اذا ماطلعتي راح اضطر اطلعج اني مناا بطريقتي .. 

رديت ايدي ليوره أهامش كوه .. وخر عني ..

ضغط بايده على راسي حيل، ولي منا كلت ، لا تعاندين ، 

بجيت ، وخر بس وخر عني ، مديت ايدي ابعده اجت ايدي على جف ايده ، جمدت بمكاني عطره مو غريب حتى ملمس ايده والله ، كانو اعرفه .. جفلني صوته قريب من اذني . 

رد تولين منا مو ، 

شسويت الك ، بس ابعد الله يخليك ..

جاي تاثرين على بيبرس ، هالحجي مايعجبني ولا يعجب عواد اخو ، 

صوت نانه طلع ، تصيح باسمي ..

مديت ايده ادفع بي ، همس افتهمتي ..

وخر داكلك ناااانه ..

دفعني حيل وخر ، كمت اعدل بروحي ، تلمست ميز بريبه ارجف ، شكد مريض ، و نفستك ضعيفه ، متخاف الله انته ، و بلا اخلاق ؛ ممحترم والله ..

-حجه برود اذا كملتي اطلعي بره ..

-رديت واراقي انطيناهم يله اديه ترجف و احس الحجايه كوه تطلع ..

-تقدم علي ابتعدت عن ميز ، صوت نانه يصيح ميرال و ينج امي ،

-هاج ..

مديت ايدي ، وتجي ضربه على ايدي حيل بالاوراق ، لزمتهم كوه بجيت بسرعه و الله لادفع ثمنها ؛ شنو عبالك حايط نصيص تهين بيه و تتصرف وياي بهل دنائه .

نانه دخلت صاحت ميرال يما مو اصيحج ..

مديت ايدي الها ، مدمعه وجهي نار ،  وينج ..

اتجهت عليه بسرعه ، وحجت شلونك استاذ عدي..

مارد عليها ، جرتني دنطلع اديه ترجف و لازمه الاوراق لصدري حاظنتهم هيه حجت بستغراب شكوو ..

-حجه ام ساري ، ياريت تشوفيلج شغل غير هذا و تطلعين منا اريد اجيب ناس اعرفهم وثقه ..

-ردت ام ساري بسرعه ، ليش يما شايف منه لاسامح الله قصرنه بشي بدر منه شي ..

مارد وكفت نانه مستغربه حجه تفضلي يله ..

جرتني وطلعت اني دم صعد براسي احس راسي يريد ينفجر ..

حجت نانه شكو شصار شبيج شنو حجيتي ..

رديت هالساقط تحرش بيه نانه هو نفسه الي كلي انتي كح** والله ، شفتي شلون ممحترم و قليل ادب نوب يطردنا ..

-ردت داكول لستاذ بيبيرس عليه دنشغل عدنا قابل احنه شبي مجلوب ..

-حجت ايدج ترجف شبيج شسوالج بعد هاا..

-رديت بتعب ماسوه يكفي السانه مثل سم عليه ، تالي وكت واحد يهيني والله يالله ..

-ردت دخلي يولي ..

جنت حاظنه الاوراق حيل ، ماهمني غيرهن ، صار شكد عد ابو يقين هسه يله حصلتهم ..

طلعت عيوني وياه اجن ، كلبي يرجف حتى راسي بطل يفكر ، احس تشوشت ، -دخلت اشوفهم الاوراق ، لزمهن ساري يكلب بيهن ..

خليت راسي بين اديه دخت حتى عيوني بلشت تصل عليه ، غمضت حيل ، الالم فضيع ، حجت تالا شبيج ميرال ..

عيوني وراسي موتني ، لزمت راسي رفعته تشوف ، حجت عيونج حمر كومي غسلي بماي بارد كومي ..

بجيت كبل مقهوره ، حجت شبيييج ...

- راسي داكلج ياذيني ..

- دكومي حق تفرحين حصلنه اوراقنه ..

- حصلناهم بمنيه خيه ..

كومتني و اخذتني للمغسله تغسل وجهي ،

حجه ساري ، كال مو كاملات ترى ميرال هذني .  

رفعت راسي من مغسله شنوو  ، حجت تالا يكول مو كاملات .. همست شنو يعني مشيت عليه شنوو ،

كعدت كباله هو كعد يفرز بيهم و يكلي هاي هويات و ، هاي بطاقه ، و هاي عقد بيتكم ، ورقنه كامله عدا الجوازات لاا ..

-رديت تاكدو خاف ماوجودات ..

-ردت تالا لا والله ماكو متاكده ..

حجيت ساري شوفهن انته حباب خاف وكعن مني بالصاله ؛ لو بالحديقه ..

-راح خطيه يشوفهن ، شوي ورجع كال ماكوو خاف ابو يقين مجلب بيهن لو ضامهن ..

-مادري ، بس شنو فايدتهن عنده ، شلون هسه ..

حجه ساري ، نسال عليهن استاذ عدي ..

ردت نانه لاا خلي يولي هذا نسال ستاذ بيبيرس بالكت يعرف وين ..

اني من بعد ماحصلت الاوراق حبست نفسي بالملحق ، الي ردته حصلت عليه اضافه الى انو ذاك بشر ماريد التقي بي …

التهيت بالكتب صوتيه ، وتطوير الذات ، دراسه تالا سعت بيها نانه وابو عبد ماقصر وياها ، هالرجال دره  ..

سوو النقل الى مدرسه حكومي مقابل مدرسه ساري ، وابو حمد كال حالها حال بناتي اوصلها ،

جانت ماراغبه بدراسه بس تقبلتها من وعدتها بمشروع و بدعم …

تالا ….

يوم مغيم ، وعيون تراقب ، تحركاته ،  لبسه ، شغله ، وحتى نظرات عيونه ، 

طلعت ميرال للحديقه شوي ، مشيت وراها ، شفت عواد ماخذ مرته وابنه ، هو يمشي بسرعه جن خبل ، و مرته لابسه كعب و بيدها طفل و الايد ثانيه جنطه ..

تمشي وتتعثر هو ولا كانو ، حايره بيهن كلهن لوحدها ، عاط بيها يله خررر* تاخرنه شبيج ...

ركضت اجيت اجيت وعثرت كبال سياره و لطشت بيها خطيه ، طفل عاط فزز ..

صاح من داخل السياره و سم سكتي ..

درت وجهي عنهم خبال اي والله ، شلون اب اعوج ،  ركبو بسياره ونطلقو ، ثواني و شفت الي اسمه عدي ..

واكف فوك بالبلكونه ساند اديه على المحجر وعينه علينه يراقب ..

وجه مكلوب ١٨٠ درجه ، ميرال تكول عليه ساقط ، بس الحق ينكال ساقط وسيم ، عده كذله او الاصح خصله كل شوي تنزل على كصته و يرجعها بجف ايده ..

، شوي ودخلو توم ، اشر الهم هو من فوك ، تعالو يله ..

اشر اله دقيقه ، مشو للسياره اثنينهم ، طلعو منها جنط  ، التفتو علينه ابتسمو ، دنجت اني ، حجت ميرال شنو هالصوت ..

صوت شنو ..

- صوت باب

-ابتسمت صوت باب الصاله مال الفله شنو هالسمع عندج ..

ابتسمت ..

-توم دخلو للصاله صار اكثر من مره اشوفهم يدخلون و ياهم جنط ..

-يشتغلون بالعقارت ..

-منو كلج ..

-بشار كال ، و عدهم شركه عقارات ومقاولات ، لازمها بيبيرس واخو عواد  ، والارعن المحامي مالتهم ..

-شغلهم طن فلوس يعني ..

-بالعافيه عليهم ..

ماملتقيه بيبرس اني ..

-ذاك اليوم التقيت بي شوي و مشيت ..

-ليش ..

ماعرف ، لطافته الزايده ترعبني ..

-شمعنه يعني ..

-سكتت ..

-ضحكت تخافين تحبي شنو ..

-ابتسمت يمكن ، الحنيه الي بصوته حلوه ، 

ممممم تخوفين ولج ..

-شخوف ترى بالغه اني مو صغيره واعرف شنو نفسيه البشر ..

درت وجهي على ساري الي واكف ينظف ويه ابو حمد الحديقه و يصفطون بالكراسي ..

دنج يشيل الميز لوحده ، رمشت بهدوء ، تاخر الوقت و ميرال بردت لزمتها و دخلتها جوه ..

نانه مشت تشتغل بالفله ، اني اراقب بساري دخل تعبان يلهث ، شلت الخاولي مشيت اله مديت ايدي اله ، هاك امسح عركك تعبان حيل مو ..

التفت عليه بسرعه استغرب لدرجه صفن بوجهي ، ابتسمت هاك شبيك ..

نزل نظره على الخاولي وركز بي رد ولج خاف حقاره منج ماسحه بي الكاع لو الحمام مو تنطيناه امسح بي ..

اختفت الابتسامه من وجهي ، ليش ماتنعدل وياي ساري ..

-شبيج لج ثوله شخاله بالخاولي ، ترى طافره الدنيا من عيني مابيه حيل مداهرج ، بعده يحجي و شمرت خاولي بوجهه ، مو صوجك يالحيوان صوجي اني زماله محترمتك و كسرت خاطري ..

-هاا ولج مو اكول اني انتي مالج درب عدل دومج عوجه ..

-انجب اكول طاح حظك  .. عفته و مشيت ضايجه ، خليت معكرونه على الطباخ ..

-حجه راح اسوين عشه ..

-اي الي و لميرال واسامه ، رد واني ..

-سم بطنك سوي نفسج ..

-بدينه ، تعنفص موو …

رفعت نظري علي بعده على وكفته ، جريت نفس،، هداء صوتي ، حجيت جاي اسون بره ..

-عدهم عزيمه مدري شنو وكال جهزو كعده ابو حمد ميدر شنو القصه ، من اسأله قليل الكلام ..

-منو يجي ..

-شمدريني بس سمعت اصدقاء استاذ بيبيرس جايين ..

عوجت حلكي ، وكفت اسوي عشه و ميرال يمي ، تسولف ، هو جر كرسي وكعد يمها ..

شباك مفتوح ، اراقب بالحديقه ..

دخل استاذ بيبيرس وراه اخو واستاذ عدي شايل اوراق كعد على ميز قبلهم ، فردش اوراق  وهمه فوكاه يحجون ..

رفع ملف بيده ويلوحلهم بي ، و بيبرس ضحك شال الاوراق و باس الي اسمه عدي من كصته و يضحك وياشره بالاوراق كانو بيهن شي عظيم ، لو بيهن جائزه ..

اخو استاذ بييبرس واكف على صفحه مجتف اديه و ماعاجبه الوضع ابد واكف وخازر عدي …

فجاءه صاح استاذ بيبرس ولك دانيال، حصلناهاا اجت بالايد ، 

اجه واحد يضحك ويركض من جهه الباب الخارجيه ..

ويصيح احلف بالرب ..

و ربه لعيسى جبناها الذيب عدي حصلهاا راح نحلق فوووك الغيم ..

وكف يمهم يشوف الي بيده من ملفات و حظن عدي يضحك فزيت على صيحت هيووو ..

خرعني انداريت عليه شبيك ، 

- وين عينج مو جاي نحجي وياج فار الطباخ ، 

درت وجهي ماي مال معكرونه ترس الطباخ ، طفيت جواها و كفت اشوف ..

كام ساري يشوف و ين عيني ، وكف بصفي و حجه لاتباوعين عيب ..

ماهتميت كملت اشوف ..

ميرال حجت شكوو ..

حجه وياها ، بره الشباب و اختج دتباوع عليهم ..

ابتسمت ميرال وحجت شكو بيها ، نتر شنو شكو بيها مو عيب ..

ردت بهدوء عليه ، شبيك ساري لاتصير عقده ، احنه بشر ، نباوع ، ونسمع ، ونحس الله خلقنه هيج ، لا تجي تريد من عدنا نصير مثل روبوت ..

سكت ضايج ينافخ ، جر البرده حيل و سدها و نتر دفتحيها وشوفي ،

ميرال ردت شبيك ، تغمض عيونها يعني ،  ابتسمت فرحانه لان لصمته على حلكه ، على عيونه طايره على ميرال ماحجي بس اني من اباوع صار عيب عاب لوجهك الحلو الي يلمع خاصه صبح ..

ميرال اشرت الي وتهمس راح ساري مو مداسمعله صوت ..

حجيت اي وله ..

-ضحكت عليج الله صعديني فوك السطح مال ملحق دنسهر فوك ..

-خوش ، وره ماتعشينه لميت الاكل و نظفت ، صدك من سمعنه صوت بره و جمعه شباب وضحك جريتها و صعدنه ..

فرشت دوشك و خليت ماعون الحب و الكرزات و كعدنه ، اني اشوفهم كبالي لان الستاره مال سطح ناصيح حيل بس الاشجار مغطيه علينه ..

همست ميرال وين بيبير وياهم .

انداريت عليها سكتت لثواني ، صفنت بوجها ، اختي ممهتمه بشر طول حياتها ..

و حتى طبيعتها مو فضوليه ، بس هالشخص تحجي بي هواي و تسال عنه بكثره و عن تفاصيله  ، وهذا شي غريب ...

كلبي دك خايفه من الي بالي ، هيه مبتسمه لازمه بيدها حبايه شمس تفلس بيه و منتظره الاجابه ..

درت بوجهي على جهتهم لكيته كاعد بالوسط يضحك و جسمه يهتز من قوه الضحكه و ماد ايده حاظن عدي من جتفه ..

انداريت الها خاله حبايه وتاكل بيها حجت هاا وينه ..

بلعت ريك ، حجت هي وكأنو حست شنو بداخلي ، نطقت بدون تردد :- اعرف الي تفكرين بي تالا .. ابتسمت سكتت شوي وحجت تكمل ، ارجع و اكرر احنه بشر ..

جواز السفر لدخول اكلوبنه الكلمه الطيبه ، وبيبر غركني بلطفه ، جرت نفس ، عيونها لاحت بيهم دمعه ، كملت كلامها بحه وجع والم ..

تدرين ماتوقعت يجي شاب يحجي وياي و يحاول يتقرب مني ، ضنيت اضل طول عمري تحت ضل امي وابويا ، ضنيت حعيش عمري كله عانس بلا زواج بلا اطفال لان يشوفوني غير كفوءه و غير صالحه حتى ادي و اجباتي و مهامي ..

عضت شفتها زعلانه ، بس من اجه هيج شخص و حجه وياي عادي بدون ميحسسني بعجزي ، تغير تفكيري ليش لااا شنو ناقصني و اذا ضريره هذا مو مانع قووي  ..

بحيااتي ماتوقعت ميرال هيج جاي تفكر ..

دموعي نزلت لاول مره من زعلي عليها ، طول عمرها تضحك وتسولف ، ماعرف لاي مرحله واصله ..

مدت ايدها مديت ايدي لزمتها ، حجت تدرين مره لزم جف ايدي ، وايده جانت دافيه مثلج ، لزمني حيل خايف عليه لا اوكع هو اصلا ميعرفني ..

رفعت اصابعها ترجع كذلتها وره ، كملت كلامها ، اخر مره سمعت رجال يحجي عني ، جان ابو يقين ، فوك ماتحرش بيه لااا نوب يريد يشمرني بالشماعيه ..

صدرها ارتفع تتنفس كوه ، وهذا الحقير سافل عدي يكلي كحبه ..

نزلت دموعها و حلكها بلش يرجف ، هذول الزلم صادفتهم ، لاعبالج الحياه بالنسبه لوحده مثلي ، سهله ..

، الحياه المرأه كلها بصوره عامه صعبه و مضطهده عاد بنت ونوب ضريره ..

حياه مو سهله وياي ابد تالا ؛ لاتستخصرين بيه من اسال عن هالبشر الي عاملني بالحسنى ..

رمشت بهدوء ، :- مامستخصره عليج بس استغربت سؤالج عليه المتكرر ..

سكتت عيونها حمر ، اذا ذبت دمعه وحده ميرال عيونها ينصبغن احمر ، صاحبه ملامح طفوليه وناعمه ، حتى اديها واصابعها كل شوي ترفعهم توخر شعرها عن وجها ..

ايد بييضه بياض عراقي مو ناصع لاا على صفار ، واطرافه ورديه مالازمه شي كله اني لو نانه ..

-حجت ماكلتي وينه ..

-رديت حاظن هذا السافل الي تكولين عليه ..

-ضحكت يييع  شهل قرف ..

ضحكت من جذب انداريت اشوفهم ، حجيت بس والله و سيم هذا الي اسمه عدي جنه ممثل ايطالي هو وكذلته نازله على كصته ..

-يمكن حلو شكل بس مو حلو اخلاق للاسف ، بيببر شلونه ..

-خيلتي على بيبير انتي ..

-يععع شهل مصطلح تالا صدك عود منين جبتي هالحجايه ..

-من الفيس ههههه ..

-خربج هالفيس والله ماقبل ترى تادبي ، على كلا سولفيلي  شنو تشوفين ..

ششوف داكلج حبيبج حاظن عدي و اخو ديلعب بيليارد هو و توم ، و اكو شخص واكف يمهم هم ماعرفه منطينه طي** ..

ضحكت لا تحجين بهل طريقه ،توه دنحجي وسمعت صوت شخطه سيارات رفعت راسي اشوف بيببرس و عدي كامو بسرعه على حيليهم .

سيارات دخلن للكراج يدكن هورن ..

ونزل واحد يصيح منو بيكم يابن كح** حرك المستودع ،  تراكضو كلهم مفزوعين  باتجاهه الي ديصيح ،

الي جاي يصيح معصب اتجه مباشرتا على عدي يخنكه يكله كله سببك كتلك لا تدخل بهل سالفه شنو تحط راسك براسي …

#يتبع ....

مصطلح الفر، خ اخلي بينهم فارزه لان الفيس يحاسب على هالكلمه ، يعتبره تنمر او اساءه شفتو بالله 🥴

صفحه الفيس ( كتابات اسماء ديمير)

الانستا .asmaa_demer