رواية قاع الشياطين الفصل العشرون 20 - بقلم اسماء ديمير

.................☆البارت السابع عشر ☆............

#قاع_الشياطين(البصر والبصيره)

#بقلم_أسماء_ديمير

ضغطت على جف ايده حيل ضايجه ، ليش شنو اسمك انته ..

اسمي الحقيقي فرات !!!

كزبر جسمي ، صدك تحجي بيبر ..

- اي بيبرس لقب اطلقو عليه ، اصلا ماعترف باسمي الحقيقي فلا تهتمين بي ، 

سكتت ثواني ضايجه ، حجه ليش اذا طلع اسمي فرات تغير بيه شي لو تتغير نظرتج اتجاهي ..

- ماعرف بس تفاجئت ..

-لا تتفاجئين ، اني لمحت الج قبل بس اضن مانتبهتي علي ، خلص لاتهتمين  لان اني ماعترف بهل الاسم مجرد احرف بالهويه ، اسمي الي اعترف بي بيبر الي تنطقه شفايفج انتي ..

خنست لثواني بعدين حجيت ، ليش ماتعرف بي ..

- السالفه طويله عندج استعداد تسمعيها و تروحين علينه العقد ..

سكتت ثواني ، حجه يله حبيبي الشيخ كاعد عيب منه ..

هزيت راسي ساكته ، كمل الشيخ كلامه ، ورددت وراه ، اصوات رجل خالتي ولد خالتي حاظرين ، صوت بيبر المميز بينهم ..

نطقت كلمه موافقه .. بكلب دافي بكلب مطمئن ، صح عندي تسال ، بس متاكده راح يجاوب عليه  ..

العقد كان على مهر يوازي بيت ، اني ماطلبت الله يشهد يمكن هاي فكرته هو ، او يمكن خوالي هم الي طلبو لان بقاليدهم لازم مهر بنت يصير ثكيل ..

تلاشت هالفكر بمجرد نطق اسم الشاهد ..

جان واحد منهم ابن خالتي سيدار و ثاني عدي ..

اختلفت ملامح وجهي ، من فرح لبهتان ، علت الهلاهل وو الصفير وتصفك من طرفين اهله واهلي ، احبابه واحبابي 

رفع جف ايدي وباسه ونطق الف مبروك عروستي ، هلا بيج بحياته لبيبرس  ..

ابتسمت بخوف ودنجت همس يم اذني هو يحظني ، اجاوبج والله على الي براسج اصلا مو مهم لا ضيعين الفرحه علينه ..

هزيت راسي تمام ، كمل العقد وطلعنه بره بالحديقه نكمل الفرحه ، التصفك والغنى و نوب شغلو جوبي و بلشو يركصون ..

كعدت على صفحه جرني بيبر حاظني من خصري ،

هو من زمان اديه جريئه ، بس الحلو بي السانه مؤدب ، ابد ما استغل ضعفي او عدم نظري ..

هالشي دائما يطمني من ناحيته ماحسه قليل ادب او فاسد ..

لا بس جريى اي ويسوي شغله علن ماعنده تختل ، هيج انسان معناها هو رجل ، مو ذكر ويحب الظلمه ..

وعد وفه بوعده .. حب واجه من الباب و طلبني للزواج ..

مالمسني بالحرام ، ما مد ايده وحاول يجرني الي عاطفيا ..

لا جانت لمساته تحسسني انو هو رجل وسند ويخاف عليه و يكلي اني وياج وحابج ، ماطلب منج غير بس العشره الحلوه ، وطلباتي بسيطه تكدرين عليها ..

ماثقلني بطلباته ، هذا شي نادر اعتبره رحمه من ربي ..

ضحكت ، لزم اديه اريدني اركص وياه ،

همست اضحك ، ماعرف اركص لاتحاول وياي اتفشل ترى  ..

جرني حظني ، اني  اعلمج .. كلشي راح اعلمج بهل دنيا ..

خليت راسي على جتفه اتمايل وياه ومجاريه الفرحه وياهم ..

-همست فرات موو ؟؟!

-ضحك اي ..

-هم حلو اسمك ..  المهندس فرات ..

-هممم ..

-ليش ماتحبه ..

سكت ..

- جان راسي مسنود على جتفه ، رفعت راسي بوجه ، مو كلت راح احجيلج ..

تنفس مالته لفح وجهي ، عطر انفاسه جان هيل ،، حجه :- الي خلفتني سمعتني هالاسم ، 

- قصدك امك  ..

- اي اكره الاسم بسببها ، يذكرني بيها وبطريقه نطقها للاسم ..

عقدت حواجبي :- ليش امك مو ميته ؟؟!

- لاعايشه ومزوجه هم ..

- صدك ..

- اي والله ، 

سكتت لثواني خجلانه اساله بعد ، واحنه بمناسبه حلوه مو من حقي اعكر عليه مزاجه بهل المناسبه ، فضلت السكوت ، خفت لا عنده جراح قديمه واجي اني ادوس عليها ..

رجعت راسي على جتفه مره ثانيه ، زين ابو وين ، ام زياد مو خالته ليش ساكنه وياه ..

امه ليش مايحبها ، اجه بالي جوز مات ابو وهي تزوجت وشافت حياتها وشمرتهم على اختها ، بست جتفه بهدوء يااعمري انته فاقد للحنيه باين المسكين  ..

رده فعلها جان كلمه احبج يالحنينه ، تقرب حظني حيل و خله راسه يم اذني يكمل كلامه ..

موضوع تناسيته من سنين لاتفكرين بي ، اسم ماحبه و افضل اسم بيبر ، حتى مو بيبرس ، اسم طلع من بين شفايفج اسم رقيق جميل ..

ماشي اسمي بيبر  وبس .. 

- ابتسمت ، رد و انتي ميرا  ..

- تمام اني هم ميرا ..

كملنه فرحتنه ، باطراف حديث جميل وهادى و بدايه تفاهم ..

بس مو كلها مثل كلبي ، لان الناس مو سواسيه ، بيهم ذرف دموع فرح على فرح ميرال ، و بيهم من ذرف دمع بسبب غيره ، 

وبيهم من ذرف دمع يذكر ليالي عرسه المشؤمه مثل ديما ، الي لاحت بذاكرتها ليله زواجها وضرب عواد الها ..

دارت وجها عن عرسان الي ديركصون و فرحانين وغركانين بعالمهم الخاص ، اجت عيونها على زوجها ..

الي ماخذ ركن وديشرب هو ودانيال و مدري شيسولفون ،

و عين عواد كل شوي تنرفع على هبه بنت خالتها لميرال ..

رمشت بعيونها متعوده على خذلانه الها ، دارت وجها عنه واجت عيونها بعيون قاسم .. 

ابتسم بوجها ، بلعت ريك تتلفت ، ثواني و تقدم عليها شايل ماعون الكيك ، دارت وجها بسرعه تتلافه وجوده ..

قدم الماعون لابنها وحجه وكلي اكيد جاع ..

جرت ماعون منه وهيه تتلفت على الحظور الي كلمن حاير بروحه ..

-همست شكرا ..

-شلونج ديماا ..

-رفعت نظرها بسرعه متفاجئه ، زينه ..

-ابتسم مو زينه لااا عيونج تكول هيج ..

دنجت بسرعه توكل ابنها ، ابتعد كم خطوه عنها وحجه ، مامجبوره تتحملي وتتحملين خياناته اتركي وعيشي حياتج ..

حجت وهيه مدنجه و شفايفها ترجف منو يلفيني يمه اذا تركت عواد ..

روحي لابوج ، اكيد نسه الصار من سنين ، كلنه نغلط وسبحان الميغلط ..

-الكل تسامح قاسم الا ابويا ، سويته اني يعتبرو عار مستحيل يقبلون العار يرجع لبيتهم مره ثانيه ، ابويا خلص شمرني لعواد ماراح يقبل ارجع لبيته شما صار ..

-احجي لاخوج عن اسلوب عواد وياج هو يتصرف ويعدله ..

رفعت راسها مستهزئه ذيااب ؟؟! ذياب صديقه ويعرف طبع عواد تعتقد مايعرف يعني ، ماراح يتغير شي اني مجرد قطعه قديمه وشمروها وانتهت عدهم ..

-راح ضلين تعانين وياه هيج طول العمرج ..

-ليش مهتم انته شدخلك قاسم لا تورط نفسك بيني وبين عواد ..

دار وجه عنها خله اديه بجيوبه ، كمل كلامه ، كلبي ياذيني من اسمعج تبجين بسببه ، انتي تبجين هو عايش حياته ..

-هذا قدري ..

-قوه الشخصيه تغير القدر ديما جربي تتخذين قرار وتتركي ..

-منو يصرف عليه منو يتكفل علاج امير ..

-همس اني ، اني موجود ..

- رفعت نظرها عليه متوتره ، بصفتك شنو ..

-اعتبريني صديق ..

-ضحكت توكل قاسم وروح لدربك لاتوكف يمي يله ، روح يله …

شالت ابنها تريد تمشي بهل الاثناء كانت عيون عواد عليهم و كاز على سنونه يراقب بمرته هيه تحجي وهيه وموظف العدهم بالحسابات ..

مشت تبتعد عن الحظور بين ماوصلا للصاله انجرت من شعرها لداخل صاله كبل ونطها دفعه وكعها على التحفيه كبل عاطت وطفل صرخ مخترع ..

رفعها من الارض من شعرها ، وخنكها بجف ايده ، همس تجسسين علي مووو ادورين ورراي ، تسألين بالموظفين عني موو ..

ولج وصاختي ماتجي ذره من وصاختي ماضيج كحب* 

بجت همست الطفل بالارض عوواد الطفل ..

انعل ابوج لابو الطفل ، لج ساق** تتقربين من الموظفين حتى يفتنون عني يمج لو يجيبولج اخباري ، امحيييج ديمااا امحييييج والله ..

اضيع حتى اثرج ، لا تخليني اكتلج خلاص مبقيج تتنفسين بس لخاطر اخووج ذياب والا انتي حشررره حشررره دفعها حيل ..

وكعت هيه وابنها بالارض يبجون اثنينهم ، دفرها و كمل دربه للحديقه شالت ابنها وركضت لغرفتها تبجي خايفه ..

طلع من صاله مبتسم يعدل بملابسه و لا كانو صاير شي ، و لا كانو توه اذى قاروره ، رفع اديه يصفك و يضحك ..

ويصيح على صوووت عليييي ، تلكاه بشار يهز باديه ، وراه دانيال شايل بطل و يكله كااسك كاااسك استااذنه ..

كملت الحفله ، وكلمن اتجهه لغرفته ، يرتاح ، 

تالااا …

انجمعت الملابس  الوصخه على صفحه حتى تنغسل وكفت اشيل الماشات من راس ميرال ، بيهم اربعه خافت لايتكطع شعرها ..

دخلت للحمام تسبح واني لميت ملابسنه و ذبيتهم بالغساله ، نانه وساري ينظفون بالبيت ، طول اليوم ماراسلته ولا حجيت وياه ..

هو كل شوي يرفع الموبايل يشوف الشاشه ..

ضايج وجهه احمر و كل شوي ضارب اسامه بحجه وخرر عني شكوو واكف جوواي ..

واسامه يدردم شال زباله اسامه وطلعهم بره ..

صاح بي ساري تعااي جيبها اني اذبها ادخل جوه انته..

طلع واخذها منه واتجه للسطله الزباله الخارجيه بصف الاسطبل ..

ركضت شلت الجهاز اشوف شنو داز ..

كووم رسائل ، كاتب ..  وينج ليش مختفيه شنو تركتيني ..

ليش شنو سوويت ..

تعااي لاتتصرفين وياي بحقاره ليش شايفه نفسج عليه ..

امنيه وين وليتي ..

ضحكت ، دزيت اله بصوت خاافت حجيت مررريضه من البارحه شبيك تخبلت عليه هاي لو اموت شسوي من دوني ..

ماكو ثواني ودز صوت ولج متت شبيج متكليلي غير  تنطيني خبر ، ليش تعوفيني هيج مثل المخبل ليييش ..

كتلك مريضه مابيه احجي ..

دز فويز ، خرب بليسج تخبلت والله عبالي زعلتي لو عفتيني لاسوين هيج مره الثانيه ..

شبي صوتك تعبان هذا كله عليه ..

-عليج ومن الدنياا هم شايل هموم بكد الجبال ..

اختفت ابتسامتي ، مديت ايدي اكتب خفت لا يبين صوتي ، كتبت .. اسم الله عليك شبيك ..

-رد تزوجت الي احبها ..

-كعدت على الجربايه خايبه ومقهوره ..

كمل يكتب تزوجت الي تحبه ، اليوم جانت فرحانه حيل ، حتى هو مبين يحبها تدرين ، عاملها مثل الاميره ، وجاب الها اهلها من الشمال بس حتى تفرح و تحس نفسها عدها اهل و عزوه ..

بجيت كبل خليت اديه على حلكي ابجي ..

كتبت بايدين ترجف ايييي ..

رد.، هذا صار اليوم ، تردين تلتفت عليه وتضيع هيج واحد من بين اديها ..

-اتمنالها الخير باين مو نصيبك ..

- اتمنيت الها والله بس مو بكيفي داخلي غير عن الخارج ..

كتبت تعبانه وراسي ياذيني اخذ دواي وانام .. سديته بدون ماعرف رده شنوو ..

دفنت راسي بالمخده ابجي حيل منهاره ، يحبهااا والله يحبهااا يموت عليها زززين ليييش …

لحد ماسمعت صوت ميرال تصيح تالااا وينج خلصت ..

ماكمت عليها غطيت نفسي بالغطا اغلس عليها كررت وصاحت مارديت ، نانه حجت اجييت اني ااجيت يماا ..

دخلتها للغرفه تكللها ، هاي نامت من تعب اختج على كثر ركص الي ركصته ، ردت عليها ميرال بضحكه عوفيها خطيه فرحانه صار هواي مفرحانين هيج..

طلعت نانه ، نشفت شعرها ميرال و لفته و مشت تنام ، تمددت على الجربايه اسمع صوت حوصه مالتها ..

صميت حلكي كوه حتى ماتطلع الشهكه ..

حجت ميرال كاعده موو تالااا ..

مارديت ..

- حجت اعرف بيج كاعده شبيج  ..

رفعت الغطا و انداريت عليها ، جرت نفس هيه سااكته ، حجيت بصوت مبحوح من البجي مابيه ..

-كولي تالا اسمعج ابقه اختج و اريد الج الخير والراحه ..

-حجيت بدون تردد ، ليش حظج هيج انتي ..

-ابتسمت كعدت عدل استندت على مخده ، وشبي حظي ..

رديت بنتر :- كاعد بكلشي ، حظج حلو والناس تحبج ، و كلشي يجي ليمج بدون ماتسعين اله ليش ..

ضلت مبتسمه ، وردت بهدوء : و انتي ليش هيج حظج ؟؟!

رديت بستغراب شنوو؟؟!

- ليش تشوفين ،  وعندج نظر ، ليش عندج مستقبل ، تكدرين تشوفي بعيونج ..

، ليش حظج حلو لدرجه كدرتي تشوفين وجه ماما و بابا قبل موتهم ؟؟!

ليش حظج حلو لدرجه شفتي حلفه مهري بكل تفاصيلها و فرحاي بيها اكثر مني ؟؟!
 

برغم اني صاحبه المهر بس ماشفت شي غير بس سمعت الاصوات ، جانت عباره عن فوضى و اصوات عاليه ، ماشفت منو فرحان الي منة الحاسدني ماشفت اليضحك منو العابس ، ماشفت وجه محبوبي ولمعه وجهه ولمعه الحب بعيونه ...

ماشفت شكلكم انتو الي احبكم وشنو لبسكم ، مااشف مااشفت ماااشفت بس سمعت ..

ليش ؟؟؟!

ليش تشوفين النصف الفارغ من كاس تالاا ؟؟! 

شبي النص مليان قصر وياج بشي ، غيرج يتمنى تالاا ، اتمنى الي عندج تالا اني ، وانتي حاسدتني على حب الناس ..

حب الناس مكتسب ترى ، تكدرين تكسيبن حبهم ، بس اني شلون ويه وضعي و حظي شلون اكسب النظر .

اختفت ابتسامتها وبان الزعل بوجها فجاءه ، حاسدتني تالا على البقاايه الي ضلت الي موو ، حسدتيني على شتات فرح موو ..

رديت مو حسد ، نزلت دموعي مو حسد ..

سكتت ، حجت بعد ثواني ، كلنه عدنا احلام وتالي انشوف احلامنا يملكها شخص غيرنه ، يملكها بدون تعب بدون مايسعه الها حتى ، بس هذا مو معناها حياتنه مو منصفه و عايشين بظلم لاا  .

اما حياتنه احنه ختاريناهاا و مشينه بهل درب و لازم نتحمل اختياراتنه ..

او الله قدره النه ولازم نحمد الله عليها لان بيها حكمه ..

سكتت استمع الها ، هي هم خنست تنتظر مني جواب ماعرف جاي تفكر ماعرف تدرس تنفسي حتى تعرف حالي شلونه هسه وهل كلامها اثر عليه اجابيا ..

ذكائها مرعب و تحسسها بكلشي يخوف ..

- حجت عيوني شلونها ..

-شبيها ..

اني دسالج عنها ..

-مابيها شي ، حتى الون الاحمر اختفه ..

هزت راسها ومددت تنام ، اصبحت كتله هدوء بس بداخلها لا ..

مددت انام اني هم ، ماغار منها والله بس قله عقل هاي ، و كدرتي بس عليها ، عقل مراهقه وداخله بيئه اكبر منها وتحاول تثبت نفسها مراهقه بلا رقابه …

كل همي احب وانحب والفت الانتباه .. ثاني يوم الصبح كعدت كبل ميرال ، لبست و طلعت بسرعه ، لكيت العينتين نايم بعده ..

كعدت نانه و خليت البيض السلك على الطباخ ، فتحت الباب اهوى البيت ..

شفت بشار وستار ينضفون بالحديقه وياهم وسن وابو حمد ، و الحارس وشخص  الي اسمه دانيال يرفعون بالزينه و كوشات ويصعدوهم بسياره ديرجعوها لابو ديكورات ..

شفت المهندس بيبرس طلع وياه اخو ، صعدو سياره وراهم طلع بشار و ستار ..

دخلت من سمعت اصواتهم كعدو ..

ساري اكل لفه و طلع بسرعه ماضل بحجه عندي شغل ..

بس طلع جريت الموبايل وكعدت بالصاله وفتحت شباك شوي اراقبه منه اتجه كبل للبستان ..

غدير صار فتره مالافيه يمناا ، من اخر مره تعاركت وياها ، معقوله عافته ، فتحت جهاز دزيته صباح الخير ..

مارد عليه ..

دزيت اسامه وراه كتله شوفه وين بس مو تروح تكله عليه ترى مانطيك الجكليت الي بالثلاجه والله   ..

-كال صار لبس نعال وركض وراه يشوف وين راح ز يركض ويرفع بجامته كل شوي تنزل من طيز*  ..

شوي ولكيت دازي شلونج اشتاقيتلج ..

-شلونه وضعه لكلبك يالحزين ..

-دز بصمه يضحك يكلي مو حزين اكبر وانساها ..

-شلون لعد تكلي معجب بيج اذا انته تحب ..

-الكلب يحمل اكثر من وحده ..

-هذا تكسي مو كلب ..

-التكسي تصعد وحده و تنزل وحده صح ، الي احبها صعدت تكسي غيري ، وهسه بس انتي صاعده و تدلعين بيها  ..

-ابتسمت ، دزيت خوش ..

-كتب ليش هاملتني صار فتره ..

-رديت لان مريضه ..

-دزيلي صوره الج ..

-ماا ..

-بكيفج على راحتج ..

-ادزلي فديو اليك تكول بي احبج ويله ..

-ضحك ، خووش ودزيلي صوره الج كاامله ..

-لااا نص بس ..

-وجهج ..

-ماعرف انشوف ..

-دقيقه انتظري ، شوي وصلني فديو ، رفعت وجهي اشوف خما احد يمي ...

نانه بالمطبخ و ميرال يمها ، لبست سماعه اشوفه شنو .. 

فتحته لان هو  يتلفت ويضحك يكلي عود احبج ومعجب بيج خووش .. 

ضحكت ، انتبهت عليه نانه حجت ضحكه خير انشالله ، دنجت راسي مخترعه ..

، جنت لابسه تراك ابو سحاب ، فتحته و ذبيته على صفحه خفت لايعرفه ، ضليت بالفالينه داخليه ، رفعت جهاز طيت لنفسي صوره  ولزمت كصيتها صغرتها ماخليت يبين ..

بس طرف خشمي مبين وشفتي و ركبتي وصدري ، فالينه دلعه بس ممبين بيها شي غير بس شامه الي بصدري ..

دزيتها !!

عضيت شفتي انتظر ، شافها بسرعه كتبت اله امسحها عليك الله ..

مارد ..

-دزيت اله شفتها موو امسحها ..

-كتب هاي انتي ..

- لزمت كلبي خايفه .. اي ليش ؟، وجهي خرط ..  كتبت ليش ..

-ولج شكد عمرج انتي ، 

بلعت ريك ارجف ، كبرت نفسي اربع سنوات كتبت عمري ١٨ سنه..

رد يعني بكدي ، 

رديت اي ، رد يالله شكد حلوه تخبلين والله ، ضحكت .. رديت شمدريك حلوه ..

-من شعرج و بشرتج وصوتج ، كلج دوخين ..

-جريت نفس ، فرحانه ، مارديت عليه بس كلبي يرجف ،  كتب تدرسين ..

-رديت لا اهلي ميقبلون ..

-خلي نلتقي امنيه كولي الموعد ومكان واجيج اني ..

-ابتسمت شنو ليش ..

-بس اشوفج وجه بوجه ، والله مااهدج ابد غير اذا الزمج ..

-خليت ايدي على حلكي اكتم ضحكه ، كتب خرب و الله روحي اشتعلت نار شكول عليج راح تخليني ارتكب رذيله وخطيتي بركبتج ..

-هاي شنو اني شعليه ..

-افتحي كامره بروح اعزازج ..

-ابد ..

-نزلي الفالينه ودزيلي صوره زين ..

-بلشنه قله ادب مو يله باي ، سديته كبل وجهي نارر خدودي يردن يطكن ، يماا فلك طرك ياساري شلون ملعب عود ..

ولا مبين عليه والله ، توجهت للمطبخ يم نانه كاعده تعجن تريد تسوي كبه جريش همست ميرال سولينه كاستر تالا ..

رديت سوي بنفسج ..

حجت حظريلي المواد ، نانه رفعت عيونها عليه رافعه تك حاجب ماعاجبها كلامي ..

ابتسمت اني ،  اعلمها نانه غير ، قابل اضل اني جوه اديها طول العمر ..

نترت بيه اااي واذا مو انتي غيرج ، لاتخليها توكف على الطباخ لان البنت صاير بيها شي اصلا ممنوع توصل يم الحراره بسبب عمليتها ..

عوجت حلكي وحجت دوخري اني اسوي عمي وخرري عندج محامي انتي بظهرج منو كدج ..

ابتعدت تضحك ، خليت المواد على الطباخ وكعدت اكلب شوي واجه اسامه ياشرلي ..

مشيت اله شاورني ساري يم غدير وره الاسطبل كاعدين ..

رفعت حواجبي هااا ..

والله ..

رفعت راسي ، شلون وياه لهذا النذل ابو دروب عوجه ، غير يثبت على وحده دافتهم راسي من رجليه ..

حجيت نانه هاي كتاكيت بره راحن اشوفهن واجي عينج على الكاستر ، مانتظرت الرد و ركضت اشوف ساق* جاي يسوي ..

امشي واتلفت ، ابو حمد من بعيد ديشتغل بالبستان ، وكفت قريب الاسطبل وره الاشجار ولمحته هو و غدير وره الاسطبل ، فكيت عيوني ..

شلون نار و استعرت بمعدتي وصعدي على زرومي ، حاظنها و دافن راسه بركبتها وهيه شامره الشال بالاارض و تضحك ..

طفرت دمعه من عيوني ، لزمت صدري يوجعني ، درت ظهري وركضت للبيت ابجي ، وصلت للحديقه مال الملحق مسحت وجهي وجرت نفس ، 

دخلت اتنفس بقوه ..

شفت نانه كاعده بالارض هيه و ميرال يحجون ..

حجيت نانه .. رفعت راسها عليه حجت هاا شبيج شبي وجهج ..

بلعت ريك نانه باعي هذا ساري ..

كامت لحيلها شبي ساري ..

فركت وجهي ، هو بنت ابو حمد وره الاسطبل ديسون شغلات ، دنجت راسي افرك باديه ..

شهكت ياااا شيسوي ..

روحي شوفي بعينج راح يفشلنه يم ابو حمد  ..

شهكت عزااا بعينك ساري هم رجعت ..كامت تركضت جرت الخاشوكه الخشب من الميز و طلعت بسرعه لبست النعال وركضت باتجاهم ..  وراها اسامه و اني هم ركضت ..

ميرال بقت بالبيت ..

هيه تركض مرعوبه ، وصلنه وره الاسطبل لكيناهم متحاظنين ماحسو غير على نانه تعيط بيهم فززتوهم اثنينهم بنت دفعت ساري وركضت منهزمه ..

بس ساري وكع بيها ماحس غير على عته من نانه و تهطره بالخاشوكه ترس على ظهره بنت مالاحتها شردت ..

بس ساري كسرت عليه الخاشوكه اني واكفه مجتفه اديه و اسامه شال حجار ويركض وره غدير و يشمر عليها و هيه تركض ..

ساري دفعه امه يصيح كاافي شبيج جااهل اني جااهل ..

يالحيوان يالبلا تربيه ياساقط ؛ مرمطته تمرمط هو يدفع بيها وهيه تسحل بي  ..

ابتعدت عنه تلهث هو عافها ومشه بسرعه ، صاحت وراه و لحكته تحجي وتغلط .

واني وراهم امشي بسرعه و صلنه للحديقه .. تلكتنه خاله المهندس بيبر وسكتنه كلنه ماحد نطق ..

ساري استغل السالفه و طلع بره المزرعه ونانه دخلت للبيت تلهث وجها احمر ، خاله منهدس دخلت ورانه .

حجت خير خما اكو شي ..

رديت اني نانه وساري بينهم ام وابنها بعد ابتسمت ..

هزت راسها ، هم شباب ماوراهم بس وجع الكلب ..  عكس البنات ،سكتت شوي و حجت ميرال ؟؟

اندارت عليها ميرال ..  نعم ....

حجت خوالج يردون يرحون ..

كامت ميرال لحيلها حجت اي على راحتهم همه هم عدهم اشغال ..

جرت عصاتها و مشت ويه خاله بيبر اني مشيت وراهن ، دخلنه للفله لكيناهم بصاله جاهزين يرحون ..

حظنت خالاتي اودعهم ، حجت خالتي تجين ويانه تالا اختج وراح تزوج انتي ليش ضاله يم ام ساري ..

رديت ، لان مرتاحه يمهم خاله اذا تضايقت ادك عليكم ..

-هزت راسها بيت بيتج والله اشيلج بعيوني ، انتي و الي وياج ، طلعت من جنطتها ورقه كاتبه بيها ارقام ..

خلتها بيدي حجت ارقامنه و عناوينه اذا حبيتن تجن ، او انطونه خبر احنه نجي ناخذكم ..

ابتسمت ممنونه منها ، ابنها سيدار حجه يله نتوكل ، وكفت على صفحه شالو جنطتهم وسلمت عليهم ام زياد و ميرال اجت نانه هم ، ودعانهم وراحو ، وصلوهم للمطار ومن مطار طلعو لاربيل كبل ، 

وراها بفتره بلشت المدارس ، ميرال سعت بالدوام مالتي بدون ماترجعلي ، مشت هيه و بشار يكملون المعامله …

نقلوني لنفس مدرسه غدير تصير مقابل مدرسه ساري ، بقه بس تجهيز مدرسه كالت من يلبش دوام اجهزج من احسنه بس شدي حيلج هالسنه …

سمعت ميرال تحجي عن موعد الزواج من بيبرس ، هو حدده بس هيه تريد بشهر ال ١٢ بس هو مستعجل ..

داومت اول يوم ويه ابو حمد اخذني ويه بناته ، صعدت بالصدر وهنه وره ، ساري وله لوحده للمدرسه ، 

دخلت المدرسه جانت ثانويه اعدادي ومتوسطه بنفس الوقت ، اني مو ناعمه مثل ميرال ، عكسها كانو امي بالخشونه الي يشوفني يكول سادس ..

دخلت نافشه ريشي ، اريد اتعارك بالكت احط غدير وادكها ام الختلات ، مشه اليوم وعده سلامات بلا اصابات ، رجعت توه اطلع من باب المدرسه اشوف غدير كاعده بالصدر تباوعلي مبتسمه لان هي كاعده لكدام واني عود وره ..

رفعت تك حاجب ابوها واكف يشرب حكاير استحيت احجي كباله …

عيبت عليها وصعدت ليوره ، دخلت وسديت الباب ، مدرسه الولد حلت واشوف عيونها على باب مدرستهم ..

وتعدل بذكلتها الطالعه من شال جنها صخله دايخه ..

لو انزع الحجاب مثل ممسويه اني لو انجب واتحجب عدل ، سوالف الحجاب نص ردن مالها داعي حتى مو حلو احسه اوفر ...

، نوب مدت راسها تباوع للجامه الصفح وتعدل بوجها ..

من بعيد بين ساري ، حاط اديه بجيوبه ، نوب وكف بصف الطلاب الي وياه ويضحك ..

مدري شنطوو اخذها ، فكيت عيوني واني اشوفها جكااره بيده ؟؟!

يمااااا ياساااري هذا شبي يارب العباد ، انكلبت اخلاقه للحضيض ، يااربي والله ماجان هيج ، من تعرف على هالصخله شمر اخلاقه بالزباله ..

خاله ايديه على حلكي مصدومه و ذيج تضحك وتباوعله ، رجعت راسي على كشن ومحمد لو اني لو انتي اني الج ضيعتي الولد من ايدي …

واكف يجر بهل جكااره و كانو متعلم عليها ، دخلت بنت ابو حمد اخر وحده و صعد الرجال يسوق ، طلعت بينه السياره واني داايخه من القهر …

مرت ايام على هل حاله ، مره شفتها لغدير طلعت قبل الحله بربع ساعه ، من مشيت وراها شفت واكفه وياه وره حايط المدرسه و تضحك لازمه جف ايده  ، كبر هل سنون اربعه وعشرين ساعه طالعات خفيفه ..

شال شي من جيبه ونطا الها ، لزم خدها يمسد عليها ..

لزمت راسي افرك بي ، زين و امنيه شنو موقعها هااي ..

يضحك علي لوو شنوو ، مو اني الي ينضحك عليه سااري ، والله لاندمك انته وياها …

ماتحملت اكثر ، رجعت ابجي دمي فاير شطت شوطه حتى راسي بلش يصل عليه  ..

وكفت بالشارع انتظر ابو حمد ..

بس وصل صعدت بالصدر ، هيه اجت وراي وكفت عبالها تفتح الباب شافتني وكفت ضايجه ..

حجت ارجعي ليوره ..

همست اكول بربو* انكلعي من يمي لافتن عليج يم ابوج ام المواعده وختلات ، سافل* ..

فكت عيونها مخترعه ، التفتت بسرعه على جهه لبوها خايفه لا سمعنه .. 

رفعت الها تك حاجب ، بلعت ريك عدلت شالها فتحت باب السياره وره وصعدت ساكته ..

اني كاعده بمكاني بس اناافخ اناافخ اريد بس حجه دانفجر والندار عليها املخها ، لاحني ريحه عطره ..

يابووويا كانو جانت حاظنته يماا كلبي راح يوكف  ..

وصلنه للبيت وكف كبال البوابه الخارجيه للمزرعه حجه انزلو يابه وراي مسواك يادوب الحك ..

نزلن بناته ، اني ضليت اخر وحده توه افتن على بنته واكله ، بس ترددت ..

حجه بيج شي يابه ، حجيت لا عمو ، نزلت كبل حتى ماعندي دليل وهم سالفه تلاف عليه ..

دخلن هنه واني وراهن ضايجه مجتفه اديه وامشي ، وصلت للباب تلاكه شخص بوجهي اني اعرفه بالشكل ..

عيونه تلمع لونهم اخظر .. من شافني عقد حواجبه مبتسم ..

درت وجهي اكمل دربي ، التفتت علي لكيته واكف يباوعلي بعده ، حجه انتي مو اخت ميرال ..

وكفت اباوع علي ، حجيت اي ..

-اني دانيال …

-ادري ..

-ضحك زين مادام تدرين شسمج ..

ماحاجيته مشيت كبل حجه وراي ترى اكدر اعرف اسمج مو صعبه .

محجيت كملت دربي حتى مانداريت علي ، 

ميرال .. 

بعد حفله المهر سافر بشغل لمده اسبوع ، اخذت هاي فتره بمعامله تالا ومدرستها ، لمن كملتها تعبت انتهيت ، رجعت والتهت بدراستها شوي ..

على الاقل امن انو تملي وقتها بالدراسه ، مو بس نت و عرك ويه ساري ، دزلي رساله صوته اني بالحديقه تعاي …

طلعت اله وياي اسامه لازمني ..

تلكاني اخذني من اسامه كله يله توكل انته ولي ، اني استلمها ..

-حجه اسامه لاا اني اعرف شلون امشيها ..

-درووح اني وياها دفعه بالشقه ..

-جرني من ايدي وحظن جتفي همست وين ..

-للنهر ..

- لنهر دجله عدنا قارب اخذج بي ..

-يمعود كول غ-رها ..

-والله ليش تخافين ..

-لاا بس لا نوكع ترى ماعرف اسبح ..

-اني وياج ..

جرني نمشي بهدوء ، حجه اجه على بالي اجيب الج كلب صغير ، بس ماعرف تحبي لو لاا ..

-احب الحيوانات بصوره عامه بس ماكدر اعتني بيهم كتاكيت متولي عنايه بيهم اسامه و تالا ..

-يعني مااشتري ..

-اذا انته تعتني بي تمام جيبه ..

ضحك بهدوء ، مشينه دقايق ، حجه ديربالج ، نزلي اكو درجات كبالج ..

تلمستهم بالعصا ، وبلشت انزل ، نزلت وصلت لاخر بايه حجه انزعي الي برجلج .. اوكفي دقيقه ..

كزبر جسمي من حسيته نزل هو ، من لزم رجلي رجعت ليوره حجه اوكفي دنزعج اوكفي ..

ثبتت نزعني الصندل تلمس رجلي باصابعه همست بيبر ..

حجه رجلج ترى ..

بلعت ريك ..

مد ايده على جف ايدي لزمني ، وكف وراي ينبهني ، حجه لا تتحركين اني اصعدج شالني شيل ضحكت جلبت بي بركبه حيل ..

حسيت جسمه مال بيه ..  صحت بيبررر يماا ..

ضحك يمعوده ، نزلني بهدوء ..  حجه ديربالج اكعدي اكعدي ، حسيت شي يتمايل ضحكت رفع فساتي لافخاذي ..

لزمه هو هدات ونفسي انتظم ، نزله بهدوء..

حجيت ، قارب مو ..

همس اي ..  مد ايدج ونزليها تلمسي الماي …

مديت ايدي من القارب سمعت صوت صااح بيبررر ..

سكتت واختفت ضحكتي  ، حجه يااهلا بعدي تعال هناا ..

تقرب صوت و حجه دكيت عليك ..

عايف الجهاز بالبيت ..

خوش خلص ونستك واني انتظرك جوه بالمكتب ..

تعال اصعد ويانه ..

لا سالفتي شغل ..

-احجي كبالها تعرف بسالفه المطعم باربيل ترى تعال ..

سكت مارد عليه .. بيبر حجه دقيقه اجيب بانزين لا يخلص بانزين الماطور ..

نزل وتحرك القارب لزمته حيل اثبت نفسي ، درت وجهي ..

-حجه مبروك ..

-مارديت عليه ..

-اعرفج صاحبه ذووق ، ضحك بستهزاء لو انتي تتاثرين بالبيئه عايشه بيها بسرعه ، و تاثرتي بذوق الخدم ..

انداريت عليه ، نزلت نظري لان عيوني بلشت توجعني كانو شمس بيها ، همست شنو قصتك وياي انته ..

-ماعندي شي وياج منو انتي اصلا ..

جريت نفس ، البصيره مثل البصر هم تجي مرات لازم نغضها عن مساوى الناس ، يعني الاشياء الي نحس بيها ونعرف دواخل البشر احيانا لازم نغلس عليها ؛ بس حتى تمشي الدنيا بلا تعب و جع كلب …

فلا تضن ماعرف الي حواليه شنوو ، بس لمجرد انو مااشوف ، 

تقرب و داس على طرف القارب برجله مال قارب كله باتجاه هو ،  لزمت بديه اثبت نفسي لا اوكع على وجهي ..

-حجه يمكن تعرفين انتي وين ، بس ماتكدرين تتحكمين بشي من الحواليج  ..

مثل القارب الي انتي بي بالضبط تعرفين انتي بقارب بس اذا قررت اغركج انتي وياه ماراح يكون بيدج اي حيله ولا تكدرين تخلصين نفسج .. 

#يتبع ....

صفحه الفيس ( م