رواية قاع الشياطين الفصل الحادي والعشرون 21 - بقلم اسماء ديمير

..................☆البارت الثامن عشر ☆...............

#قاع_الشياطين(البصر والبصيره)

#بقلم_أسماء_ديمير

بهتت ملامح وجهي .. مارديت عليه بس بلعت ريك ..

صاح بيبر من بعيد اصعد عدي يله ، وخر رجله عن قارب وابتعد ، عدلت نفسي خايفه .. حجه بصوت عالي لا اني اتوكل انتظرك بالمكتب اخذو راحتكم ..

ابتعد ومشه ، اني على كعدتي صافنه ، كعد كبالي بيبر و شغل الماطور وتحرك ..

مد ايده يلزم ايدي ، حجه ليش باردات ..

هزيت راسي مادري ، درت وجهي مغثوثه ، بس لو يوخر هذا عنه اني بخير ، نوب ماكدر احجي لبيبر عنه هم يكول دتوزني عليه ..

طخت رجل برجلي بهدوء .  ابتسمت ..

حجه وين شارده ..

- منو كال شارده ..

- لان عيونج مارمشت..

سكتت ، حجه عدي حاجاج شي ..

- شتكول انته ، بعد هو صاحبك ..

- عدي واحد عاقل ومثقف تعبان على نفسه يعني ، ماتطلع منه كلمه مو حلوه ،

- ابتسمت اني شلون يعني مثقف ..

- يعرف يحاور عنده اطلاع على هواي امور ، اني اثق بي لان مجربه ، مسلمه نص الشغل لان عنده قدره يتحكم وياثر على المقابل بالصوره الي تعجبه ..

سكتت  باس ايدي ، حجه شوكت العرس ميرال ..

هزيت راسي مادري بشهر ال١٢  ..

- بدايه ال١١ افضل ..

- لاا لنهايه شهر ال١٢ ، وره سنويه اهلي بشهر  ، 

جر نفس تمام بين ماتجهزين نفسج ..

ابتسمت اي ..

كعد بصفي حظن كتفي ، خليت راسي على جتفه ، كل شوي يرجع شعري وره ظهري ..

وصلنه لنهايه جرف و نزلنه ، رجع لبسني الصندل جنت خجلانه حيل لان لابسه كصير هو كعد جواي ، بس سكتت ..

لزم رجلي ابتسمت نزلت اديه اغطي نفسي واحاول ابعده عني ، رفع نفسه و لزك صدره بيه ، رفع راسي باتجهه ..

حجه رجلج ترى مابقه شي على زواجنه هم ..

رمشت بعيوني مستغربه الوضع حتى دخت ، مد ايده على ظهري ، جسمي كزبر جمدت ، حجه كلشي بداخلج يبين بوجهج  ميرال ..

خوفج ، ارتباكج كلشي ، مثل المرايه شفافه ، ماينظم وراها شي ابد ، الي يتقرب منج يحس بالامان ويحس نفسه هو متحكم بكلشي ..

يحس الدنيا بخير مابيها دغش مابيها نفاق ، ما تخدعين الواحد ، شفافه حيل ..

رمشت بعيوني دايخه نزل اديه جوه ظهري حاولت ابتعد جلب بيه زين ، حجه تعودي علي ميرال ماسوي شي ، داحاجي باسني ، ثبتت مثل الهبله ماتحركت .

هو جان المتحكم ، اصلا كأني لوحه جمدت هو الفنان يرسم ويتفنن بكيفه ، كل الي حسيت بي دوخه وخدرت عيوني شوي وانام ..

فززتني ضحكته من كال هاا وينج بس لاغمى عليج يمعوده ضرب خدودي ..

همست دخت يمه ..

ضحك حظني لصدره حيل ، مو وكهاا بعد وكت الدوخه بالله عليج ..

جرني نطلع من بستان كله ، حجه تجين وياي ..

-وين ..

-للفله لغرفتي ..

-ليش ..

-احنه مو متزوجين ..

-شتريد بيبر ، بس لاعبالك اصعد وياك لغرفتك كبال الناس وعادي بحجه مزوجين لا ماكو هيج حجي ..

-شلون استفرد بيج ..

-توك استفردت بيه و ادري بيك حاسبها ..

ضحك واهتز جسمه ، بكيفج عبالي تتعودين عليه بالاخر كلشي حلال ، حتى لو اخذ** هسه ..

فتحت عيوني حيل ياااا الحجي ثكيل ..

تقرب يمس يم اذني من الاول لازم يصير ثكيل بس جنت مقدر وضعج ..

وصلني للبيت هو توجهه للمكتب …

رجعت مبتسمه و خدارنه بكلماته و لمساته الجديده ، يا نوب شكد عيب مد ايده وره ، خليت اصابعي على حلكي اضحك خجلانه من روحي ..

ليش خليته عود صدك ماتخجلين انتي ميرال .. ماكول نانه خاف تزعل اي هذا سرج ميرال وعيب هم ..

هو هم مو لان جديده عليه لاا بس لان هالانسانه لامست قلبه كبل جسمه ..

دخل هو مبتسم للمكتب ، رفع حواجبه لعدي  شلونك عزوتي ، 

رد عليه عدي هو كاعد بالمكتب هلاا وجهك يضحك ؟! ..

اي الحب هذا ..

-ابتسم مستهزء يومين و وتختفي ، حالها حال الي سبقتها ..

- لا لا هاي غير  .

اختلفت ملامح وجه بانت لمعه مغثه :- اشمعنه ..

- مادري ، بس ارتاح يمها ، اتذكر روحي قبل ١٥ سنه ، ليش مترجع مرتك عدي ..

-مابيه حيل نكد وين رايح وين جاي ماصدكت اخلص منها …

-وابنك ..

-داصرف عليه وانطي نفقه …

-رجعها على الاقل اكو من تتلكاك بالبيت وتدير بالها على امك وابوك ، اخواتك هم نهايتهن الزواج مادايمات الكم ، لو تشوفلك مره ..

سكت مدنج راسه اشر على ميز اوراق المشروع الجديد ..

مد ايه بيبرس يشوفه الاوراق و ملفات .

حجه عدي شرأيك…

ابتسم ، الحجي ابو ثروت شكال ، قدم جسمه ليكدام عدي وحجه بيبرس ، لشوكت نظل نشتغل جوه اديهم …

اندار عليه :-  الامن و التمويل دنحصله منه ، اذا بالك توكف بوجهه فغلطان معناها ناوين نهدم كل الي بينيناه ..

-وليش مااحنه نكون اصحاب تمويل و امن لشغلنه ليش نعتمد عليه دشوف ثروت جاي يسوي لووو لاا ، ثروت ديخرب شغلنه بكل مكان ابسط مثال المطعم الي راح من ادينه ..

سكت بيبرس ورد مو كدهم احنه عدي لا تورطنه ، كلمن لزم جهه ، وكوه فكينه شراكه ، نوب تريد نتعده عليه مايصير .. تريد ناكل الاول وتالي ماترهم  ..

-مراح نطور اذا مانتحده و نغامر ..

اندار علي عدي متحير ..

كام عدي بطوله وابتسم :- تذكرت بداياتنه لو لااا ، ترى بلشنه شغل بتمويل قدره بس ١٠٠دولار  ، تذكر لو لااا ، ..

هسه عدنا خير من الله ، بس نبتعد عن ابو ثروت و عن الحجي ابو عزت  وهنا نطك محد يكدر ياخذ مناقصه لو مشروع من عدناا بعد نصير حالنه من حالهم النه صيت وجاه ..

-عواد شيقنعه ..

-رد مو لازم يقنع هو خلي تزيد الفلوس بيده مراح يسال منين هذني ، يببع ثروت وابو ثروت ..

فرك كصته يفكر ، حجه عدي :-  تكتكها فراات تكتكها اندار عليه بسرعه بيبرس ..

ابتسم عدي ، طفي بيبرس شوي وخلي فرات هو الي يفكر ويخطط ، فرات اشطر من بيبرس بهل سوالف ..

باوع لعدي بريبه عاقد حواجبه ، تقرب عدي ضرب بيبرس على جتفه ..

اشرله نطير بالسماا صديقي بالسمااا ، بعد.منحتاج لاحد بشغلنه بالعكس هم يلجدون النه ، ويطلبون مساعده ..

دار وجهه بيبرس يفكر ، خله اديه بجيوبه ، همس عدي يم اذنه ..

بيبرس ادري العميه هيه الي تخليك تتردد مو عواد ..

اندار عليه بسرعه ضايج نتر عدددي ..

ابتعد عدي و رخت ملامح وجه :-  لاتكذب صديقي ، لو تضم عن الكل الا عني ماتكدر  ، ترى شكد ماحاولت تطمس فرات لازم يطلع بمواقف ، كلنه عدنا جانب بشع بداخلنه و نضطر نخرجه للواقع حتى نحقق الي نريده ،

طلعه لفرات بس هالفتره ، حتى نقوي جذورنه ، ادري بيك تركت ذاك درب بس لازم نستعين بي شوي ، حتى مانصير مكفخه جوه اليسوه والمايسوه ..

- حجه بيبر صافن .. اريد اكون عائله و استقر  ، 

- ضرب على جتفه ، استقر بيبرس استقر منو لازمك ، بس شغلك ماتعوفه ، بيتك وحياتك وحده ، و شغلك وحده لا تخبط بينهم ابد ، لتخليها لهاي بنت تاثر عليك ..

- مماثره عدي لا تجيب سيرتها ..

ابتسم عدي ساكت مركز ببيبرس ، حجه بيبرس بريبه شكوو ..

- شايف نفسك من تباوع عليها لو تصفن بوجها  ..

سكت بيبرس ، حجه عدي بخبث :- نظراتك هاي ماشفتها من ١٥ سنه ، شفتها بس من طلعنه من سجن سوه واشتغلنه يم ابو ثروت وخله جدامنه جنطه بيها ٢٠٠ الف دولار تذكر …

جر نفس بيبرس دار عيونه ، يتلافه عيون عدي ونظراته مترقبته ، تقرب عليه اعرفك صديقي اكثر من نفسك ، احسن ماتخسر بيبرس و تخسر فرات سوه ؛ سيطر عليهم اثنينهم ، واحد خلي لليل واحد خلي للنهار صديقي ..

هاا شكلت ..

سكت بيبرس متحير ، ضرب على جتفه عدي و كله فكر زين ومخمخ المخطط وردلي خبر ..

جر سترته و طلع ، مجرد.ما طلع بره المكتب ، فتحه علبه الخشب ، طلع منها جكاره الكوبي .شعل وحده و صفن على عدي الي مشه يتلفت ..طلع هو .. بس متاكد بيبرس مثله ..

دار وجهه متحير ، صح اكو تردد بداخله بس بالاخر هذا صحبه العمر ويعرف شنو بعقله ، و يعرف نفسه اماره بالسوء وهيج درب يدر ذهب مارح يتركه لازم يمشي بي ..

شغله تمشي بدمهم ، تربو عليها و كبرو عليها ، كلشي بهل دنيا فكره ، و هم مؤمنين بهل فكره ، الشغل الي يجي من عرك جبينهم سواء كان قانوني او لا ، حلال او حرام مو مهم ..

مؤمنين بفكره انو الشغل الي يجي بالتعب حق الهم وحلالهم .. 
 
وكف كبال الشباك يشوف الحديقه و نافوره ، تلمس الجامه اجه باله ذاك اليوم شافها بي ، هيه و فستانها الشتوي ، و شعرها منثور ..

حركتها مبهمه وكل شوي تتعثر ، دخلت بكلبه بدون تفكير ، دخلت بدون ماتستاذن ، رغم ماتشوف بس من وصلت لكلبه اتجهت كبل و دخلت حتى بدون ماتتعثر ، وكانو تندل دربها اله ..

كانو رساله او ملاك من سماء ، يكول كلبك ابيض ونظيف ، رمش بهدوء التفت على الملفات ، اكو عرض جديد بالشغل ، 

ودرب يدر فلوس ، بس صعب ممكن نتورط و تكون نهايتنه عليه ، لو نصعد للسما على كولت عدي لو ننزل للجحيم ..

بس عدي مغامر اني مو مثله ، بالعجله ندامه …

شال الملفات واتجه فتح الخزنه ، اجت عيونه على شغلات قديمه ، رمشت عيونه بتوتر  ، ذب الملفات فوكهم يخفيهم عن نظره ، قفلها ، 

وطلع بره المكتب ، صعد لغرفته ، سمع صوت عواد وهو يصيح ومرته تبجي ، توقف لثواني ، 

كالعاده ماتدخل ، يعرف باخو من شنو ديعاني بس مابيده شي غير بس انو يتحمله و يحمي ، و يجبر ديما تصبر عليه ..

دخل لغرفته ، يغير ملابسه حتى يطلع بين ماغسل و طلع اتجه لكنتوره طلع ملابسه لبس و كف يمشط شعره و يرجعه ليوره ، بطريقه محترفه ..

واكف يخلي عطر وعلى صوت عواد وبجي ديماا غمض عيونه بقله صبر ..

دك جهازه شاله لان بشار ..

ذياب موجود جوه ادخله ..

سكت ثواني  ورد لا هسه اني نازل ..

جر السويج و ساعه و نزل بسرعه ، توه فتح الباب انفتحت باب غرفه عواد و طلعت ديما تركض شارد وتبجي بملابس نومها ..

وعواد وراها شايل الحزام عاط بت الكل* ارجعي هناا ..

توها تنزل من درج وكعت على وجهي تلاكفها بيبرس ..

صاح الله اللله ..

وهيه استمرت تبجي وتصيح وابنها جوه يصرخ مخترع ..

تقدم عود يضربها دفعه بيبرس عنها وصاح بوجه شببببك تخبلت اعقل عاااد اصحه على نفسه ..

وذاك يصيح تخوووني والله تخوووني ، كلهن خاااينات ، ليش تامن بيهن انتنه …

 لزم بيبرس اخو من راسه باذثنين اديه و عاط بوجه كااافي كاافي عووواد ، كااافي مرتك هاااي ام ابنك ، شسوي بنفسك متكلي جااي اسووي ..

عواد دفع بيبرس ، وخر عنه يلهث ، رفع اصبعه ماتعرفهن اسالني عنهن ، اني اسالني عنهن لادير ضهرك الهن ، الي طلعت ادم من جنه مو حواء .. الي كادت ليوسف مو زليخه  ، الي خانت ابووك هو اديه مدمايه من شغل ديعيشها ويوفر طلباتها مو مره ..

عاااد احنه و لك عاااد احنه .. كحااا* هذني يااابه كحاا* ضل يصيح بصوت عالي سمع كل الي بالفله ..

ديحجي و دخل صوت ذيااب عوووواد ياااهي كحب* 

اندارو عليه نوب دخل وشاف اخته بهل حاله مرعبه رفع حواجبه مصدوم ..

هيه دنجت تبجي وتلم بنفسها خجلانه ، خالتهم ام زياد واكفه من شافت ذياب تدخلت بسرعه جرت ديما وتحجي مره ورجال عاادي يما تصير تصييير …

جرت ديما ادخلها للغرفه جرها ذيااب  من ايدها حيل ..

وخلاها وره و صاح مالها كعده هناا بعد ، استصغرتها مووو شفتها مالها احد عوواد تتكوه على مره يالارعن ..

ذاك صاح بنتره لم اختك ذياااب اختك خيانه تمشي بدمهاا يوميه لابسه سيت نوم شكل المن ، صاح وياشر بيده هااا المن لابسه واني مالافي يمهااا المن تتحظر و تتكشخ ..

بجت وتحجي دافع عن نفسها شنوو حرام البس ملابس نوم مريحه خاف الله عووواد ..

عاط بيها مااخاف اني ماخاف من احد ..

اخوها حجه اصعدي لبسي شي دتمشين وياي مالج ضله هناا ،  وحتى طفل شمري عليهم .

هي ردت لا لا عيوني اخذه وياي ..

عواد رد تسوي فضل والله  ، بيبرس تدخل نزل درج و جر ذياب ..

حجه وياه :- مالك شغل بي تدري بي من يشرب يفقد عقله اختك مثل اختي ، لا تخليها تخسر بيتها ..

رد عليه يابيت هذا هاا اخوك مارايدها ، بس خالها عنده ورقه ضماانه بس والله اني اعلمه الا اندمه ..

صعدت ديما لبست وجرت ابنها ونزلت مشت ويه اخوهاا ، قبل لايطلع ذياب صاح لعواد لهنااا وبس ، لازم اخليلك حدد واعلمك حجمك واهانتك لاختي راح اوصلها للوالد هو يتصرف ..

خالتهم ام زياد ركضت وراه ترضي وتحجي وياه بس ماسمع ..

طلعت ديما تمسح بدموعها تلكاها قاسم ، واكف ضايج ..

رفعت نظرها عليه هز راسه باسف على وضعها ..

صعدت سياره اخوها وتشهك  ، حجه ذياب ويه اخته ليش ماحجيتي ليش ماشكيتي من اسلوب هالحيوان وياج ..

سكتت تبجي ..

رد بسيطه والله لاندمه الا ادفعه ثمن ، هاي اهانه النه كلنه مو بس الج لو ما قاسم يكلولي على اسلوبه هذا،  انتي ماتحجين استفحل عليج لان شافج ساكته ..

شغل سياره و شخطها بسرعه معصب .  

دارت وجها ساكته و صوت شهكه واضح ، ابنها بحظنها مثلها ، كلبه يدك بسرعه من خوف ، فد يوم ينجلط طفل بسببه عواد وجنونه ..

فعلا انقلت السالفه لابو ديما ، وبعد ماشاف حال بنته زعل ، زعل ثكيل ، و رجع بيبرس و ام زياد ورجلها ياملمون بالسالفه ..

جابو عواد و اجو لحد بيتهم يرجعوها ، بالاول رفضت من الخوف ، لا عواد يستفرد بيها ويعاقبها لان شكت لاخوها ، بس بعد اصرار وبعد ماقنع ابوها ماكان بيدها حل غير تروح و ترضخ لامر الواقع ..

من يومها فصل بيبرس غرفه نوم عواد عن غرفه ديما وابنها ، وصار كلمن بغرفه ، وكرر عليه جمله ، بطل شك ولو تشوفها بعينك تخونك ممنوع تتصرف وياها بكيفك تجي تكلي اني اتصرف ، هاي وراها اهل صار عليها شي نبتلي …

سكت عواد و رضخ ، لان ابوها لزمهم من ايدهم توجعهم كون هو الي لازم امان الشغل و مامن درب الهم ، 

ميراال …

جهزت لعرسي ، جانت هبه ادزلي شغلات من اربيل هيه مختارتهم ، و نانه تروح تستلمهم ، بس اكو شغلات لا اني رحت بنفسي اختارهم ..

بشار ويانه هو يودي ويجيب ، نوبات تالا تطلع توصفلي ، واني اختار ، كملت بشهر كل احتاجاتي ، 

اما غرفه والاثاث كلهن موجودات عند بيبر جدد ميحتاج نجدد ، قبل العرس بكم يوم ، راحت نانه و تالا يرتبون غراضي بالغرفه ..

دز عليه و سن ، اشوف الغرفه نانه رفضت بحجه مايصير ، ضحكت اعرف ييها تخاف او تحسب النه ، مارحت ..

بس من طلعت بالحديقه لكفني ، حجه من بعيد ليش مااجيتي من دزيت عليج ..

ابتسمت مشغوله ..

وشنو هالشي شاغلج عني بالله ..

تحظيرات لعرسنه ..

تقرب يمي اي بالله بعد ..

شنو ..

تحضيراتج شنو هاي ..

سكتت ، لزم طرف كذلتي يبعدها عن وجهي ، يجر نفس عميق حسيته و وكفت مبتسمه ، طخ بيه متعمد همست بالحديقه احنه ..

شنو يعني ..

عيب من ابو حمد او الولد …

سكت ثواني جر نفس ، وين تردين نسافر شهر عسل ..

البحرين ..

اووو حلوو بس ليش مو تركيا ..

ماعرف بس والدي اخذ امي و سافرو لبحرين يكولون حلوه حيل ..

سهله لبحرين لبحرين ، وبعد ..

هاهيه مد اصابعه يتلمس خدي دنجت رفع حنجي همس دخل نشوف خلقه الله بالشمس شبيج ..

ضحكت ، حجه بؤبؤ عينك كارثه ميرال سبحان الصوره ، رديت عليه عجبك لونه ..

غير عيونج هنه بلواي و الله .. 

رفعت اصابعي اتلمس وجهه ، لحيته خفيفه ، رمشت بهدوء خدوده مزينه ومحدد ، رفعت اديه اتلمس وجه بالكامل ..

همست دتباوع عليه بيبر ..

عندي واهس بيج احسب حتى رموش عيونج …

عضيت شفتي فزيت على صيحه تالا ، ميرااال كملنه ..

ابتعدت عنه جفلانه ، نسيت روحي اني مثل ثوله ، جلب بيدي حجه وين ، رديت لا اروح ، 

خليج تعاي نروح للنهر ..

لا اجلها ..

رفع جف ايدي باسها ، ابتسمت ابتعدت عنه و مشيت ..

ضل واكف على طوله يراقبها لحدمادخلت ، جر نفس ، ردد بداخله شوكت تصير يمي هاي ، توجهه للفله ، اخذ السويج وطلع ، 

ضلت ديما تراقب بتحظيرات العرس ، التهت شوي ويه ام زياد ، اكو شي ممكن ساعدن بي ، هيه وايلاف ..

من ترتيب الحديقه و و قائمه الاكل ، قررت هيه و يلاف يحظرن ويشترن ملابس للعرس ..

اخذهم ستار ، و توجه للكراده ، دتفتر بالمول هيه و ايلاف اخذت فساتين سهره ، و ملابس للاطفال ، توجهت ايلاف لقسم المكياج..

و ديما راحت لمحل الملابس نسائيه و الاطفال تريد تاخذ لابنها بدله ..

مدنجه تختار رباط لابنها و تشوف الالوان ، اجاها صوت قاسم ، 

السلام عليكم شلونج ام امير ، رفعت نظرها متفاجئه التفتت بسرعه وراها خما ايلاف موجوده لو ستار ..

حجت هلاا ، وابتعدت بسرعه ، مشه وراها بسرعه حجه شلونه عواد وياج ..

نترت بهدوء .. قاااسم قاااسم وخرر عني احسن الك  .

وكف بمكانه ماتحرك ،  وهيه مشت بسرعه منهزمه منه ، حجه وراها عواد مرافك رقاصه هسه ماتعرفين ..

وكفت جامده بمكانها ، مرت علاكه الغراض بين اديها .

حجه اسمها غزل ، صار فوك الشهر حتى يبات عدها ، البارحه جان يمهاا اكيد تعرفين موو ..

جرت نفس بغصه ، اندارت عليه بهدوء ترجف ، ترمش حتى ماتبجي حجت بثقه ادري شنو يعني ، شتريد هسه انته …

زاح نظره عنها ، جر نفس بحسره ،  جاي اتحطم من الداخل ديماا ، اتحطم واني اشوف البنت الي احبها مو سعيده و بيد واحد ممقدرها ولايعرف قيمتها ..

نزلت دموعها ، عندي طفل منه قاسم ، .. 

رفع نظره بسرعه عليها ، عواد ممعترف بي ، ماتعرفين الحجي الي يحجي عنج من يسكر من عدا طعن بشرفج ، محد يوكفه عند حده ، عووفي والله اخذج و حتى ابنج احسبه ابني ..

-هزت راسها الحجي سهل قاسم مو مثل الفعل ..

-بس كولي اي والله اني اسعى حتى اوصلج ..

-عبالك عواد سهل لو هين ويخلنه نعيش براحه ، 

-يعوفج بس انتي انطيني مجال ، تخلي يعوفج و يطلكج برادته ..

- بالله عود ممكن يريد يخلص مني ، بس بيبرس شلون ، مستحيل يقبل تخرب علاقته بابويا ، لا تنسه اني مثل ورقه الاتفاق بينهم اذا تلاشيت من حياتهم معناها الاتفاق وشغل كله يتلاشه ..

سكت يجر بنفس ، دنج راسه ..

-مو كتلك الحجي سهل ..

-بس اني احبج ..

-الحب مو كلشي قاسم حبك ممكن ياخذك للهاويه ابتعد عني وعوفني ..

رفع حواجبه ماعوفج اني ، اجاهم صوت ايلاف قااسم هلااوو شلونك ..

مسح وجه ، واختلفت ملامحه اندار عليها مبتسم يااهلا شلونج .

دنجت اشوف الملابس اضيع الحزن الي بعيوني ، احس نفسي بسجن ، بس ماعرف شكد محكوميتي ، انحكم عليه بالسجن اني وابني سوه .

وباسوء سجون ، انسجن بقااع ، لا بي رحمه ولابي ظمير ولا مشاعر …

اختاريت ملابس لامير ، و توجهت اطلع ، صاحت وراي ايلاف ووين ديما انتظري ..

انداريت عليها شفته نطانه ظهره ومشه ، اجت عليه حجت شخذتي ..

قاطين لامير ..

بالعافيه ..

الله يعافيج ..

رجعنه ويه ستار ، الدرب كله افكر بكلام قاسم ، ليش لاا ، ليش ماطلب الطلاك و اخلص من عواد ومعاملته الي ..

شعليه اني بيهم وبتفاقياتهم ، اكول بذياب برغبتي بالطلاك بالكت يوافق ، شنو الي يجبرني اتحمل عواد و خياتنه وضربه الي …

مديت ايدي امسح دمعتي كبل لا توكع ، بعدها بيوم سعيت اراقب عواد و جهازه ، كلت بالكت اله دليل و اقدمه لذياب و يصدكني ..

التهت ام زياد و ايلاف بالتجهيزات ..

عواد الته بالشغل مايرجع الا الفجريات ، يجي ينام الفجر جفي على وجهه ، استغليت نومته الثكيله ..

ودخلت لغرفته ، مدد ونام بحذائه و ملابسه على جربايه بدون ما يغيرهم ..

شفت جهازه على الميز وبصفه السلاح و السويج ..

توجهت كبل لجهازه ، فتحته ودخلت للاتصالات ورسائل ، احس بلعومي جف، اكو رقم مكرر الاتصال بي خلال اليوم الواحد ، مااكو اسم بس رقم .

دخلت على مراسلات بينه وبين هالرقم ..

غمضت عيوني واني اشوف الصور بشششعه ، درت وجهي لعبانه نفسي اريد اتقيئ ..

لزمت حلكي ، درت وجهي اشوف يكرم الله لعباان نفس قررف قررق خلال الحجي ، ماجنت اتوقع عواد ممكن يعرف يحجي هيج او عنده هيج قابليه ، ذبيت جهاز و طلعت بسرعه لازمه دمعتي اريد اتقيى..

وكفت احاول اسديت باب بهدوء ، سديته و التفتت ،  تلكاني بيبرس ديصعد  الدرج فزيت فززه لزمت كلبي بسرعه ..

وكف هو صفن بوجهي ، رجعت ليوره وجهي خرط ، باوع وراي على الباب ، رجع باوع بوجهي ؛ مشه تقدم عليه بهدوء ساكت ..

لميت الروب عليه ، وجتفت اديه لصدري من الخوف ، وكف كبالي مركز بملامحي خله اديه بجوبه ..

حجه ديمااا ؟؟!

جريت نفس متوتره هاا ؟!

صغر عيونه جنتي اسوين بغرفه عواد ..

هزيت راسي ممسويه بس هذا بس جنت شسمه ااا هذا اشوفه ، بلعت ريك ، اشرت جنت اشوفه اشر اله على غرفه عواد ، هو بعده مركز بوجهي ..

تقرب عليه اني رجعت ليوره ..

حجه ديماا ، اني احترمج تدرين لو لاا ، انتي ام اول حفيد بهل عايله ، اعرف عواد ديسيئ معاملتج بس جزء من سبب انتي ، رفعت نظري عليه ..

رمش بهدوء اي نعم انتي ، شمعنه كدر يسكن ويهدء ويه غزل وياج لاا ..

-فكيت عيوني مدمعه ..

-ابتسم بس لاعبالج ماعرف بسالفتج انتي وقاسم هاا ، ويوصل الج كل صغيره وجبيره ..

-هزيت راسي يااسالفه والله ماكوو شي ..

-تقرب وخله اصبعه على كصتي ودفعني باصبعي حيل ،  رجعت ليوره ..

-ابتعدي عن قاسم ، لان الولد ، محترم و شاغول ماريد اخسره والتفتي لبيتج وزوجج و كوني عائله جبيره ، مثلا ارجعي احبلي ، ورجعي عواد لحظنج ..

سكتت مدمعه ، وكف يباوع بوجهي ، درت وجهي امشي ، مشيت بسرعه ، التفتت عليه بعده عينه عليه ، دخلت و سديت الباب ، 

كعدت وره الباب ابجي ، يمااا يمااا عزا بعينكم شنو انتوو ، و قاسم عود يكلي انطيني مجال ..

هذول شياااطين شياطين والله ، عايشين حياتهم و احنه يحكمون علينه نكوون خدم و مفارخ للاطفال بس ، مجرد صفقات و مصاالح ، احنه ولا شي بالنسبه الهم ولا شيي..

لميت نفسي ابجي ، الحجي براسي يدور ، اصواتهم براسي ، صوت قااسم الي يشجعني على تمرد ..

لو صور خيانه عواد و صور صاحبته الرقااصه ، الي بالبس الشفااف ، لو كلام بيبرس ، 

لزمت راسي اسكت الاصوات الي براسي ، بجيت بضعف ..

ضعف اليتيم ، ضعف الضايع بلا ماوى  ، ضعف الي سااكن الغربه ، كلهن اني ، 

ميرال .. 

فتره من الايام و اشرقت الشمس ، و صبح الصبح على عروس المزرعه ، 

فستان بنقشه بسيطه ؛ واردان تور ، بنقشه هادئه وطرحه طويله تسحل وراها ، تصميم هادء بهدوء ملامحها ..

تاج ذهب ناعم يزين شعرها صاحب الون بني فاتح ، و كعب ناصي ، حجت نانه خابرت هبه ،  اجو خوالج ماما يله خفي اديكم ..

حجت ام صالون ، تلبس ذهبها ..

رديت لاا ، تاج والتراجي والحلقه كافي ..

نانه  تقربت من اذني البسي الكلاده يماا ، خوالج عايشين بشمال و يحبون ذهب اذا شافو٠ مالابسه راح يحجون ..

محلو ويه بدله نانه فدوه ..

الكلاده على الاقل ..

الي لبستهم كافي والله ماريد ضمي الباقي  .

زين الحجل ..

سكتت ، دنجت تلبسه الي ، نزلت ايدي الزمها ، همست الله لاينزل مقدارج اني البسه نانه .

-فدوه  لعينج بنتي انتي ، فرحتي بيج ماراح افرحها لساري بجت كبل جن مهضومه ، اني دمعت ، حظنتها حيل كفيتي وفيتي نانه ..

كفيتي وفيتي والله ، اجرج عند الله عالي ..

باستني و حاضنتني حيل ، طلعنه من الصالون تلكانه بشار ، ويهوس و يضحك .. 

(سبع ساعات بالصالون بيبرس لا تلعب بكذلتها )

ردت نانه تضحك هي ساعه ونص ياجذاب ..

وعيون الغزا عيون جنتاا 
وصلو على النبي الصيده صيدتنا ...

نانه وكفت تصفك اله هو يدبج ، ضحكت خجلانه فضحنه بشارع هذا ..

حجه دك رجلها دك لا يتخبل علينه لحكو لحكوو ..

ابتسمت ، مديت ايدي لزمها و فتح الباب يساعدني اصعد السياره عاليه ، صعدت و هو مشه يسوق ..

و صلت للمزرعه ، اصوات عاليه و ضحك وهووسه  ، توه صفت السياره و صدع صوت الديجي والهلاهل ، 

يمكن البعض يضن فرحه مو ، اي فرحه بس فرحه مريبه ، كل عروس تتوتر بعرسها وتخاف الا اني مرعوبه حيل ..

مو من بيبر ولا من ليله عرسي ، مرعوبه شلون اتصرف مثل العروس الطبيعه ..

اضحك لو اسكت اتحرك لو شنو ، صعب جدا تحظر مناسبه و انته مغمض عيونك ، صعب تعتمد على بس اذنك ..

مثل ماصعب بس تعمد على عيونك شي مكمل شي ، وخلقنه الانسان في احسن تقويم ..

الا اني حشاه لله عندي نقص ماكدر افرز بين الزين وشين بملامح الوجوه ، 

نقذني من بين هالافكار لمسه ايد دافيه ، همس باذني ليش ضايعه ..

ابتسمت صدك ضايعه انقذني الله عليك ..

شتردين ، اخلي عرس يخلص بنص ساعه لو اخذج وانهزم ..

ضحكت . تكدر تتهور ..

بعدج متعرفين فرات ..

هاا ..

اقصد بيبرس ..

#يتبع .....

البارت انشر من وكت ..  مفاجأه 💜💜😘

صفحه الفيس ( كتابات اسماء ديمير )

الانستا  asmaa_demer

اكو كروب كلش حلو اسمه (سفره طيبه مع احلى  الشيفات ) .. يمكن يفيدكم برمضان .. اني من الناس حبيت منشوراته ..