رواية قاع الشياطين الفصل الحادي والثمانون 81 - بقلم اسماء ديمير

الجزء الثاني،، البارت الخامس

#قاع_الشياطين

#بقلم_اسماء_ديمير

باوعت عليها تضحك اله وتأشر عليه ، حجه تعاي اخذيها يله ..

تريد تنزل من حظني جلبت بيها عاطت ، عفتها راحت تخطي عليه ، تاخذ الخيارة منه ..

نطاها الها ومطكها بوسه لعبها نفسي بصوتها ، مقرف .. باوعتله قرفانه ..

جوعانه شنو تاكلين ..

مارديت ..

عدنا عصير مشمش ، تحبين العصاير انتي ، وضل من الغده كباب ومقبلات .. واكو مصمون بالفرن حار تردين الف الج لفه ..

ماحاجيته ..

مسوي باميه وتمن اصب الج ..

مارديت ..

حصب غده ، اصبلج ويانه راح يصب ، عيني على هيف وراه تمشي مجلبه بي ، هو كل شوي يرجعها  ليوره يوخرها من يم طباخ ، وترد ترجع عليه ..

كعد على ميز وخله هيف بحظنه ، رفع راسه علية يحاجيني  .. تعاي اكلي ،

جنت تعبانه مابيه حيل حتى احجي ، اكل وخلص وهيه وياه ماعافته اشوف علاقته بيها وخايفه منه ..

ادري ماياذيها لو اله نيه جان اذاها من زمان ، وبعركتنه حار،بيها وعافني ، بس هذا مايمنع ان انسان نذل وعلى ساعه يكلب عليها وياذيها بس حتى يحرك كلب بيببر ..

شال الاكل عيوني عليهم ، حجه حنزل تردين شي ..

ساكته ..

هيف محتاجه حفاظات ووحليب ، اجيلج شي ، مشتهيه اكله مثلا ..

درت وجهي عنه ..

ميرال شوفي نفسج ، بنتج متاذيه ترى لو شوفيها من يجي اليل بس تبجي ، وكل شوي تفز عاجبج تضل هيج للكبر ،

خطيتنا بركبتك ..

اسف ..

رفعت نظري علية قرفانه. منه ..

كتلج تعودي علي ميرال انتي وبنتج الي ،

مو احنه شغله وتاخذنا  الك ، هيه تايهه ، شكد تريد تحبسنا يعني ، شهر شهرين ، سنه سنتين يعني اول وتالي اعوفك ، لو يبقى اخر يوم بعمري ، بس تجيني فرصة ،

  وبيبر عبالك يجوز منك ، بنته هاااي بنته . اشرت على هيف ، اذا اني طليقته على كولتك ونساني وبدلني بااثنين نسوان ، فذيج بنته وبس هالبنت عنده ، يطلعها من عينك والله لاتتعلق بيها ولاتخليها تتعلق بيك يجي يوم وتنعاف بذاك الوكت شوفني وجهه شلون يصير ..

ابتسم ..  بذاك الوكت اني اطلع وجهي الثاني ، انتي تعرفي ، نفس ماضيعته اول مره اضيعه مره الثانية ، بس حاليا هادئ وعايفها هيج هدنه ، لاجل عينج وعين بنتج والله ،

بس قسم بالله ووداعت ابني ، بس احس بي يتقرب علينه او ناوي ياذيني بيكم ، اتصرف ابشع تصرف ممكن تتخيلي ..

عليه وعلى اعدائي ميرال ، مااقبل اطلع خاسر لوحدي ، لو اربح لو كلنا نخسر ،

دمعت ، محد خسران غيري وغير بنتي والله ، اثنينهم عرج ميطكهم واني وكعت بيها .. همست الى متى ، اني وبنتي شنو ذنبنه. ..

بيدج كلشي بيدج ، بس انتي ماتجين لدرب الصلح اعرفج ..

شنو الدرب هذا ..

ماراح ترضين اعرف فخلينا هيج انتي مو مال تتخيرين انتي تنجبرين افضل ..

على شنو عدي قسم بالله مااسكت الك  ..

شسوين تتخبلين مثل ذاك اليوم ، تقدم كعد كبالي ، هاا شسوين ، تكسرين وتعيطين ، بعدها ، ميرال لحد هاي الحظه متعاطف وياج وكلبي مايقبل ياذيج ، اكدر اخليج تجرين عدل وياي ميت الف درب وباب اعرف اجرج الها واخليج اطيعين وتسكتين ،

اقل مابيدي بنتج اخذها منج وافرقج عنها واخليج انتي هنا وبنتج بمكان ثاني هم امن عليها وهم احسن الها بدل امها الخبله ، الي مكضيتها عياط وراح تجننها وهم اخليج تخضعين ، بس ماسويتها ، اليحب مياذي واذا اذيتج فاسف مو قصدي انتي تجبريني. .

.. اعتديت عليه واني مماذيتك ، شنو ستفاديت من سويت هيج ، مو تكول احبج شلون ترضى تتجاوز عليه واني نايمه ومامنه ، اعرف بيك نذل بس ماتوقعت منك توصل بيك لهل انحطاط ..

دنج راسة ، جر نفس ساكت ، اعذريني هذا الشرب مو اني بعد ماسويها ، شرب احاول اكطعه ..

احسه شلون ديضحك عليه حتى نبره الي حجه بيها جذابة ..

رفع نظره عليه هااا مسامحتني ..

ماحجيت ..

لخاطر بنتج خطية ، والله باليل ما جاي تنام اضطر انطيها مهدء ، صايره بيها خوفه تبجي هواي وتفزز خرعتيها ذاك اليوم ..

سكتت ،

جر نفس بجزع ، على راحتج ، كام لحيله وراح لباب الشقه ..

فتحها وكف اندار علينه ، فكري ميرال ، فكرري ، امشي خلي ايدج بيدي محد يوصلج وياذيج ، تعاندين وتسويها تحدي اكسر شوكتج ، باعي على بنتج مرتاحه يمي وتكلي بابا هم ابتسم ، طلع وسد الباب وراه ..

دنجت راسي انفجرت بالبجي ، هيف من يمها بجت ، مسحت وجهي ورحت عليها..

لا يماما تعاي حبيبتي ..  شردت مني تبجي ..

هااا ماما اسفه والله مسحت دموعي ويوكعن غيرهن ، ابجي وهي تبجي ، اسفه يروحي شسوي مو بيدي ..

عافتني وراحت وره الميز تختل ..

كعدت اني قريب منها ابجي ، ليش تكوليله بابا هااا، دارت وجها خايفه مني ، لاتكوليله بابا هيف حبيبتي خلي يولي هذا ..

ماتحاجيني حتى متباوعلي ، احسها خايفه مني ، مو هذا بابا هيف ،

ماتحجي وباي ..

هيف يروح امج لا تحبي خلي يولي ، باوعت عليه مو احاجيج ..

ماترد ..

مسحت وجهي ولميت شعري كمت غسلت وجهي ، الاكل موجود على الميز كعدت اكل سايحه روحي من جوع ميته ..

هي جواي خاتله ، كل شوي اطخها برجلي ، مشتاقه الها الحقيرة تكله بابا ، لبابه تكسر اظلوعه النذل ..

حاجيتها ماردت ..

مديت راسي الها الاعبها .. دددي

ساكته ..

شلت خيارة من ماعون زلاطه .. يروحي هااج همم .. مااخذتها ..نترت مااا ..

نترت بيها لو ذااك الكلب جان اخذتيها من ايده  ، برطمت تبجي ، ااااش كافي اسفه اسفة رفعت راسي وعفتها جوه الميز ،

شوي ومديت راسي هيوفي دييي ،مديت الساني اعيب ..

ماحجت .. رجعت سويت نفس الحركه .. ابتسمت بوجهي .. اااي يالله .. فرجت ..

مديت ايدي تعااي يم ماما مامشتاقتلي هاا ..

ماحجت نطيتها الخيارة ، اخذتها ، تعااي جريتها طلعتها …

ياايمه يارويحتي ليش هيج نافرتني ،

وحيدتي ونظر عيوني ، ومعاناتي بنفس الوقت ، ايدي توجعني ونقطه ضعفي والله ، خشمها الاحمر من زعل يقهرني ،

لميت الاكل وهيه وراي ، كعدت اشوف رجلي ، فتحت ضماد منها ، الجرح شكبره يراد اله خياط اصلا ، شكله يخوف .. هيف واكفه بصفي مدت اصبعها بزت الجرح … اااخ يااايمه ساحت روحي ولج ليش هيج …

بعدتها عني ، وهي تريد تشوفة ، رجعت لفيتها لعبانه نفسي من المنظر ومعدتي اصلا توجعني ..

نفسي تلعب ماعرف من معدتي تاذيني اريد اتقيئ، ركضت للحمام ، الاكل الي اكلته ذبيته ، متت احس نار معدتي ..

من القهر ماعرف من كثر الادويه الي اخذتها تعبت معدتي ماتتحمل اكل ثكيل ، طلعت من الحمام سايحه روحي ، رجع هو شايل علاكه وياه بس فتح الباب راحت هيف للباب بسرعة ، ضحك من شافها ، طلع من جيبه الها نستله ..  هلاا هلااا .

رفع نظره عليه شافني لازمه بطني وجهي متخربط .. ختفت ابتسامته .. حجه شبيج ..

درت وجهي عنه ،

شيوجعج ميرال .. مانطقت وباوعت علية ..

شال علاكتة ودخلها للغرفه الثانية ، شنو بيها هاي ليش اخذها هناك ..

رجعت نوب دخلت للحمام لان معدتي وجعني بزايد  ،..

هيف وراه راحت ادك باب الغرفه تريد يفتحها ، فتحها يكللها هلا بالشيخه هلااا ،

متعلقه بي هواي ، لاحظت هالشي لدرجه من هو موجود تبتعد عني ، شكد احبها ومداريتها بس من تشوفة تعوفني وتركض وراه ..

قبل يادوب تخطي هسه شلون ملكوفه السانها مفلوت و حركاتها سريعه حتى عنودية ، ولا عبالك هيف بنتي ..

يشيلها ويفرها حيل لو يشمرها على تخم حيل .  عطت بي لا تكسرها شبيك ..

كلشي ماعليها مو شوفيها تضحك ..

ظهرها لايطك طفله هاي ، دنجت اشيلها . نتر عوفيها ،

ناوي تعوقها انته ..

مابيها شي دتضحك شنو شايفتني خبل مااعرف الاعب طفل ..

دفع ايدي وشالها مره ثانية ، جتفت اديه معصبه ، باليل تصرخ وتبجي ماتنام الا بالويل ، وبالنهار تركض وره هالمستهتر ..

لو ينطيها جداري وشغلات خطره تلعب بيهم من يطبخ ، مره ناطيها درنفيس من جان يصلح بالنقطه ، شاطت روحي نترت لو بازه عينهاا لو عميانه انت تفيدها ..

ماحاجاني ضل يشتغل ..

عطت بيها .. جيبي  .. اخذته من ايدها حيل وعاطت تبجي مكروصه  ، حجه رجعي الها وخر عنها ..

ماحاجيته ذبيت درنفيس وشلتها ورفستني ماترضه ، ااااش لج ..

عاط بيه فززني اتركيهاااا عاد شبيج ، ثوله انتي شبيج.وياها …

شغلاتك كلها خطر شلون تنطيها هيج شغله ..

عوفي طفلة تلعب ، حارمتها من كلشي الي بكدها يلعب بايسكل و يصعد درج ويشلبه على تخم مايخلي الا انتي رابطتها ، بايسكل ماتخليها تصعده وتلعب ..

واذا وكعت و تعورت ، بيش يفيدني هذني ..

عادي تصير هو هذا الطفل ، يريد يتحرك ،  هيف بهذا العمر وتوه تمشي لان مقيدتها ماتخليها تسوي شي ،  الي بعمرها يركض لان يتحرك ويحرك رجليه واديه ، عوفيها تمارس طفولتها لا اطلعيها فاهيه مثلج ..

دمعت عيوني والله اذا تعورت ..

اي اي بالله شسووين .. وكف عن شغل ودار عليه اي والله كولي دشوف …

ضربت رجلي بالكاع ونترت حقير ..

عفته ومشيت ..

صاح وراي شكلتي .. مارديت علية ..

  كم يوم وصحيت شوية ،دوخه خفت لان بديت اكل زين ،  الم بمعدتي خف هواي ، بس الم عيوني بعده .. وقت عصاري كاعده بالارض اصفط ملابس بالكنتور ، دخل للغرفه وكف بالباب ، سند جتفه على الحايط ، ماعبرتة بس احس بي فوكي ، حجه تطلعين ..

رفعت راسي هااا ..

هيف ضايجه تطلعين للحديقة شوي ، ناخذ فواكه وعصاير نغير جو ، هم تلعب ويه الاطفال ، ماحجيت ..

كال دقايق واخذها واطلع اذا تردين تعاي واذا لا بكيفج مااجبرج ..

دنجت راسي اكمل تسفيط ، حجه .. ميرال ..

رفعت نظري علية ، هز راسة ، هيج ..  جر نفس وطلع ..
ماكذبت خبر لبست وطلعت لكيته محظر الفواكه والعصاير وكلاصات بسلة ، من شافني ابتسم ، شال بايسكل هيف وشالها هيف بايده الثانيه ..

حجه بس شيلي السله انتي وافتحي الباب ..

شلت السله ، باوعت للباب حجه بجيبي المفتاح اخذي ..

تقدمت عليه ، حجه بجيبي اليسرة .. مدي ايدج.   مديت ايدي ، باوعت علية ابتسم حتى سنونه بينت ، حجه جوه بعد .. طلعته ،

جريت ايدي شبي هذا ابو نص عقل ،

فتحت الباب طلعت هم وراي رجعت قفلتها ، نزلنا الدرج ، الي لاحظته طابق الرابع مابي احد حتى اصوات عوائل ماكوو ،

حاجيته اكو احد ساكن هناا شو الطابق هدوء،

رد شقق جديده بعدها ممبيوعة ، حجيت وانت اول واحد ..

نزل درج حجه مامشتريها ، مال صاحبي كعدنا بيها ..

مو عيب نكعد بمكان مو الناا ..

لا مو عيب ..

نزل واني وراه ، جان اكو يم عماره حديقه صايره بالنص والعمارات تحيط بيها ، واكو اطفال ، نزل البايسكل ونزل هيف كعدها عليه وكالها يله  ، ثبت رجليها ويعلمها شلون تستخدمه ..

طفله عمرها اقل من سنتين ويريدها تسوق شبي هذا عقله بي شي ،

مادبرتها ، وكف وراها ويدفع بيها برجله يكلها اي اي عفيه برافووو ساقت هيف الدراجه ..

واني وراهم ، اكو مسطبات خشب موزعات على اطراف الحديقة ،  كعدت عليها وخليت على ميزها السلة ، وعفته هو وياها ، ماكو ناس هواي ، هيج عوائل محدوده نازله من شقق ديلعبون اطفالهم ، اكو مره جبيره ويمها اطفال اضن احفادها ..

هوى بارد حلو ومنعش ، يحرك بشعري وخرته وره اذني ، ماجايبه شال ولا عندي شالات ، حتى حجابي مالتزمت بي بسبب هالكوارث حسبي الله عليهم .

لزمت شعري سامحني يااارب ، صوت عدي حاجاني ميرال ..

التفتت جان واكف ورافع الموبايل ، طكلي صورة ، درت وجهي عنه بضوجه ، شيلي هيف داخذلكم صوره مارديت علية ..

هيف اجت يمي ، حجه .. ميرال طالعين دنغير جو لخاطر الطفلة ، لا تكلبيها كأبة وضيجه خلك ،

همست شسويت ، انته دتطلك صور وهالشي يزعجني ..

هي صورة بيش ماذيتج للذكرى ..

ذكرى السودة قصدك ..

ليش تكولين هيج كعد كبالي على مسطبة ، باوعت عليه عليك الله تحجي صدك ، تكول هاي صوره من جنت خاطفها هي وبنتها ..

ماخاطفج الج الحرية تردين ترحين كولي من باجر اوصلج ، وحتى بنتج باراتها جايه عندي مو بابا هيف .. ضحكت بوجه وتاشر اله على الاطفال …

حجه شوفي بنتج سعيده وياي ، اصلا محتاجه اب بحياتها لوحدج ماراح تكدرين تربيها ،

عدها اب انته منوو ..

اني ابوها ، وراح تتربى على هالاساس ، حجيت وفهمت مااعيد ميرال ، ماعجبج هالحجي كولي والله ارجعج لادهوك ،  واخلص بس البنت تضل يمي والية ،  ماانطيها الا على جثتي وداعت بحر ، دار وجهه معصب ..

راحت هي تلعب ويه الجهال الي كاعده يمهم المره جبيرة ، لزمو شعرها يشوفو ، لعب وصيحت وركضت نامت بالثيل تمرغلت ، وشعر انفل صار كوشه ، و كله حشيش وثيل ، نوب تشيل وتكطع بالثيل وتعبي الباسها ، غطيت وجهي صخااام …

هو شايل جهاز يطك الها صور ويضحك عليها ، من خلصت اندارت على جهال الي لعبت وياها تفلت عليهم ، هاي تاليها مو شبعت دفرت النعمه ..

لعبوها و تونست وبالاخر جازتهم تفال وعفاط ، هو يضحك ويكللهم جاهل ميخالف ، للمغرب شربنا العصير واكلت فواكه ، صارت طينه مددت بالكاع تعبت ماترضى تكوم جرها من ايدها ممطوله معانده ، شالها شيل على ظهره ورجعنه ..

سوه هو العشى واني دخلت غسلت الها ولبستها دارضعها حجه لااا وكليها خلي تاكل ..

جريت العصر ..

كلت تاكل مو عصاير ، وكليهااا اكل هذا عدنا تمن ومرك مال غده وكليها منه ..

تتعشى تمن ومرك ثكيل على معدتها شبيك ..

اي خلي تكبر شنو حليب و عصاير لو لبن ادري عصفور لو بزون  ، شلون تكبر ويقوى عظمها .. وكلتها ماكلت لااا اكلت وياها ، نفسي تلعب بس جبرت روحي ،. واخذتها انومها .. 

حجه وراي تتعشين وياي .. حجيت ماريد ..

على الواهس .. اخذت هيف وسديت الباب .. الباب مابيها مفتاح ولا قفل بس تنسد وخلص شايل مفتاح منها ، خليتها بالفراش وغطيتها ، مارضت تحوص  .

خليت اديه على صدرها امسد عليه انومها ، شوي غفت واني بصفها وكعدت تبجي خايفة ، شلتها بحظني اسكتها مارضت تبجي طلعت صدري ارضعها ، اخذته وسكتت،ماجانت هيج هسه نحسة وياي قبل تهيج على الكل الا وياي هسه حتى وياي تتنحس وتتنعوص ..

لحد ماثكلت نومتها وخرت عنها وكعدت على جربايه ..

اسمع صوت بره ، كمت لحيلي اشوف فتحت الباب على كيف شفته شايل نفس العلاكه الضمها بالغرفة ، خلاها على ميز ورجع للمطبخ ، بلعت ريك جاي يسوي هذا ..

ثواني طلع شايل صينيه بيها فواكه ماعرف بعد شنو ، خلاها وكعد على تخم شغل تلفزيون وحوله على اليوتيوب ، فتح العلاكه .. فكيت عيني حيل داشوف زين ..

هذا مو بطل عرك لو اني غلطانه .. من رفعه ديفتحه عرفته اي والله هو يييع .. سديت الباب حيل قرفانه من سم كون ، نوب الباب ماتنقفل ، ولا بيه حيل ادفع ميز اخلي وراها ..

هذا شلون انام هو ديسكر ولان هاجم عليه مثل ذاك اليوم نذل ، كعدت ماكدرت انام .. ماطول. دقايق وعلا الاغاني ، نوب حسام رسام يمه عظتني مدري شنو عكربة …

كلب على ساجده .. مددت لا خلص باين اليوم مااانام اني ، نوب اذاني مفتحه عشره على عشره مااكدر انام ، خايفه لفيت الغطا حيل علية ،

والله حتى سمعت صوت طك الاصبع ويصيح هلااا ياابه هلااا ، ويردد ويه ساجده ، شكل لامي من اروح انكسرت الشيشه ، سبع ياخيار والحكه ماعرف بعد شيمسلت ..

طكه الاصبع مالته واصله ليمي ، فكيت عيوني يااارب رحمتك وحده من معجزاتك وكع السكف عليه وموته ، يموت سكير حتى كبل لجهنم ، رفعت اديه ادعي علية ماداعيه على بشر بكد مادعيت علية ..

جان اله نصيب من دعواتي نصيب جبير .. ثواني وانفتحت الباب فزيت كمت لحيلي مخترعه هاااا هاا شكووو …

وكف بالباب يطوطح لزم يده الباب وسند جتفه على العتبة .. سمعتي ؟؟

شسمع..

سمعتي محمد الفارس شيكول ..

فهيت بوجهه مخترعه شيكول ..

اذا رايد تروح اخذ روحي ،

رفعت حواجبي هذا شبي .. هالكد احبج اني ، ابتسم مطفي .. ويكول بعد ..تمشي وياك خليها هي عايشة بحبك ، اذا تبعد شلي بيها ، اذا تبعد وتنساني اموت وداعتك اني .. وكف فجاءه صفن بالكاع ، رفع عيونه علية .. بعد شيكول؟؟!!

عقدت حواجبي .. منوو ..

الفارس خرب نسيت دسمعها مره ثانية وطلع من الغرفة ، خبااااال اي والله شجاه هذا استرعن واستخف عليه..

توقعت يرجع ضليت مخترعة وعلى أهبة الاستعداد ،سمعت صوت اصاله مبقاش انا ،

لو ما رجعتش ليا بقلبك ثاني هنا
لو ماحلفتش إن الثانية في بعدي سنة
لو مأمنتش إن الجنة في حضني أنا
مابقاش أنا
لو ما عرفتش إن حنانك سره حناني
و إن الحب بقلبك كان مخلوق ع لشاني
و اٍنك مهما بعدت هترجع تتمناني
مابقاش أنا

كلب على الحزن نوب ، شمرت نفسي على الفراش استر يارب ، يردد وياها ويهبد بالصياح ..

انعل ابو هالعيشة هاي ،

سمعت صوت قوي ، عزااا بس لاشمر نفسه من البلكونه اي يالله الفرج .. كمت لحيلي ، فتحت الباب مديت راسي .. ماكوو ..

تقدمت شوي لكيته كالب تخم على وجهه وشايل الكرسي شكبره مسوي ثقل ويرفع بي .. عفوك ورضاك يارب. .

فقد عقله هذا كلش ، شجاه تخبل ادري شرب هذا لو مخدرات .. عفته ورجعت لو يموت بعد مالي شغل بي ، اليل كله مانمت ولا غفت عيوني مستحيل ..

كل شوي افزز على اقل صوت ، لحد الفجر يله هدء ، يله نمت ، كعدت هيف ونازله من جربايه واني مادري من دكت على الباب تريد تطلع فزيت مخروعه عبالي هوو…

كمت على حيلي فتحت الها الباب طلعت ، مشيت وراها راسي يوجعني نفسي تلعب معدتي اذاني ، قله نوم حتى دايخه ..

لكيته بالصاله لاعب لعب بصاله ، نايم على تخم والكشور مال كرزات تارسه الارض ، والبطل على ميز راحت هيف تركض عليه ..

ركضت شلته بطرف اصابعي وووويع قرفانه ، ركضت شمرته بالزبالة ، نوب لميت وصخ مالته تارس الارض عبيته بعلاكه وشمرته ..

جان اكو علاكه خال بيها سوالفه التعبانه هم شلتها وشمرتها بالزبالة، سويت ريوك تريكنه هو بعده نايم ريحه زفاره اذتني حيل معدتي تدمرت من الادوية مال عيوني جدار مالتها كلش ضعيف مايتحمل دهون او زيت ..

اكلت البيضه وركضت للحمام اتقئ طلعت عيوني من راسي الا شوي ..

هالشعور مزعج لدرجه نزلت دموعي معدتي حيل متملخه ، احسها شلون محتركه بيها جمر ، من القهر اكيد ..

ضليت بالحمام لازمه المغسله ومدنجه ، دايخه ،اندكت الباب ، رفعت راسي ، باوعت بالمرايه ..

وجهي تعبان ، مو ميرال ، حتى ضعفانه ، شعري مو مثل قبل اهتم بي ، يادوب اشده بالقراصه وخلص ..

اندكت الباب مره ثانية ، غسلت وجهي بماي ورحت فتحتها ، لكيته واكف كبالي بطرك البجامه ، دنجت راسي اريد امشي ماريد اشوفه ..

حجه شبيج ..

مارديت مشيت اروح للصاله ..

حجه سمعتج تتقيئين ليش ..

مارديت ..

شوكت اجتج دوره اخر،شي .. وكفت بمكاني ، رفعت راسي كبل ..

همس خاف حامل ..

التفتت عليه بسرعه فاكه عيوني شنووو ..

رفع جتفه ..  اعراضج اعراض وحده حامل ..

عيوني غرغرت دمع ، حامل شنوو؟؟؟

ليش مستغرية ..

لزمت بطني عطت .. حاامل شنووو عددددي ..

رفع ايده ينترر،  حتبلشين عياط وصراخ قسم بالله اخذ الطفله واعوفج هناا بعد ماتشوفين وجهنه ، وضلي على راحتج تخبلي عيطي ملخي دكي الطمي ..

بجيت الله لايوفقك يالنكس حامل شلون ..

سكت يباوعلي ..

بجيت حيل الله لاينطيك ولك تعرف شنو يعني هااا تعرف ، حامل بنغل اني اذا صدك ..

هزيت راسي ابجي رحت للغرفه  ، مو حامل لاا اكيد لاااا ..

مشى وراي يحجي ، صار فتره تتقيئين وعندج دوخه شبيج اعراضج كلها اعراض حمل شنو ماتعرفين ما حبلانه قبل ..

سكتت ابجي كعدت على كرسي ،دنجت راسي ، لازمته باديه منهارة ..

همست اذا صدك معناها هذا ابن حرام بذره اغتصاب ، ماتكلي انت من شنو الله خالقك هااا .. رفعت وجهي ، والله ماشفت بنذالتك وحقارتك بحيااتي ، لوين تريد توصل ..

وكفت عطت بي وووووين تررريد شترييبد اصلا ، شنو الي تريده ، كووولي عاااد كووول شتريد ، دمرتني دمرت بنتي خربت حيااتي واني مماذيتك ، روح للاي اذااك ، للي قتل عايلتك اني شكووو ديتاذيني وتعذبني ، ماكدرت الهم كدرتك علية ، على مره وطفلة ..

ماكو خوف من الله انت مو مسلم شلون تسوي هيج ..

ولك يالنذل ابن حرام ، هذا اسمه ،

واكف لازم راسه وساكت ، هيف واكفه يم رجله لازمته خايفه ، حجه بهدوء خلفيلي طفل وروحي انتي وبنتج …

فتحت عيوني دموعي تجري ،

هز راسه اي ، تردي ابن حرام يصير ابن حرام ، تردي نغل يصير نغل ، ….

بعده يحجي ، كمت لحيلي دامشي ، الكاع افترت بيه هو يروح يمنى ويسرى  وصوره تغوشت عندي وكعت وانرطم راسي بالارض ،

صحيت على الم بيدي ، فتحت عيني صوت هيف ، درت وجهي على مصدر صوتها ، الم تكرر وزاد نوب ركزت زين هيف واكفه يمي وتجر بالكانونه والمغذي ، مابيه ادفعها ولا احاجيها ، تصيح مما مما  .

ونيت ااااخ ،، ملصتها من ايدي عطت ابجي ، انفتحت الباب بسرعه صاح لاااا ..  ولج لااا ..

ركض رفع ايدي ويضغط عليها ، خرب هيف ليش هيج بابا ..

دفعها عني ، ايدي تنكط دم ، هي ترجع تريد تجر الصونده مال مغذي ،  من كل عقله رجع الكانون ودخلها مره الثانيه ، خاف صحيت شوي من الالم ساحت روحي ، حتى ايدي احسها خدرت ..

شد لايدي حيل وثبت الكانونه ، شال هيف طلعها بره ونتر بيها روحي هناك يله روحي جاي اكوول ..

بجت ماترضى رجع عليه جر كلينكس يمسح بالدم ويمسح بيدي ..

حجه شلونج ..

ماحاجيته ..

لزم كصتي ، مامصخنه ، بس نزل ضغطج ، هذا مغذي شوي ويخلص وتتحسنين ، المضمد اخذ دم ، العصر يطلع تحليل دنشوف سبب الدوخه شنو ، لاضوجين نفسج ميرال ،

غمضت عيوني حتى مايحجي بعد ، اريده يسكت كارهه صوته ، طلع هو واخذ هيف وياه ، اني شوي وكمت ، ملصت المغذي ضال بي شوي ، بس اذاني حتى يدي توجعني ،

شلون يااربي ، شلون تفض هاي الكارثه الي حلت علية ..
ارجع لادهوك بس ماينطيني هيف ، شلي برجعه وبنتي مو وياي مو اجيت اموت بلياها ، وشلون اصلا اخليها يمه لو افكر هيج ، تعوذت من الشيطان ..

بس والله تعبت دمر نفسيتي ..

ادري ابوها شلون مالكانه لحد هسه ، حتى لو بعده مافاض سالفة القضايا الي علينه وبعده مطلوب جان كلف ناس ، اني بالله طليقته بس وبنته شلون ،

لزمت بطني يارب معقوله هنا طفل ، نوب ابن حرام ياربي دخيلك ، بجيت يااايمه شايله بذره حرام صخام صخمني ، هذا اذا اجه للدنيا شيصير بي ، على تالي احمل واخلف ابن اغتصاب ..

شلون هيعيش هالطفل ، سواء بنت او ولد ، صفنت شوي ..

انزله اي انزله .. هي دوره مااجتني ..

صفنت يارب اني من حبلت بهيف جانت تجيني لحد شهر الخامس ، واصلا ماحسيت بالحمل ، بساع بساع صارت ، زين دوره شوكت موعدها ..

كعدت احسب باصابعي ، يااارب هونها ياارب من يمك موته ..

زين منو يكول اني حامل اصلا ..

لااا والاعراض هاي شنووو .. لعبان نفس ودوخه وجسمي تعبان ..

ضليت بالغرفه ساعه انام وساعه اكعد ، للمغرب هو دخل شايل هيف نايمه ، خلاها بصفي ، شاف المغذي بعده واني فاصلته ..

حجه ليش بعدج مريضه ميرال التزمي بالعلاج مو زينه صحتج ابد ..

التحليل طلع ؟؟

بلع ريك هو وسكت ..

مو احاجيك طلع ، شنو طلع ..

دار وجهه عني ، ارتاحي هسه بعدين نحجي ..

فضني ..

اندار يباوعلي ، ترى ندمان على صار صدكيني ، بحاله غضب نوب سكران مادري ..

دمعت احجي عاد ..

باعي اعرف كارهتني بس والله ماناوي اذيتج ولا قاصد ، بس تولدين اخذي بنتج وروحي وعد علية هذا ..

بجيت يعني صدك حامل موو ..

كعد على ركبه كبالي ، ااااش ميرال طفله ناايمه ، وانتي مريضه ، اهدأي ، شوفي نتخطى الموضوع سوه ، كلها كم شهر ويجي طفل شنو جان بنت او ولد ، اخذه وبعدها اخذي بنتج وروحي وداعت بحر.  اوصلج بيدي لادهوك ..

درت وجهي عنه ابجي ليش يااارب ليييش ، شسوووؤت اني وبليتني هيج ، شهل الاختبار ..

ميرااال اسف والله اسف بكد حبي لابني والج ، بس صارت بعد ..

بيش اذيتك هاااا بيش طالبني متكلي. 

حقج شنو ماتكولين حقج ..

حاول يحجي حاول يبرر مالكه رد ، محملته كلشي صار وهذا اقل مابيدي ، اذاني واني مااذيته ابد ، كسر بيه ، دمر حياتي كلها ، وعاقبني على افعال وذنوب مالي ايد بيها ،

بعد مااعجز طلع من يمي ، ثلاث ايام حبست نفسي بالغرفه ، حتى لو اشرب مي ازوعه ، نار ومستعره بطني والله الم ملخني ، بدون سبب ، كعدت ابجي بسببه ، هو يجيب الاكل ويخلي ويرجع وره ساعه يلكاه هو هو ..

يعصب ويحجي … ولج بابا مريضه انتي اكلي دتاخذين دواج شوفي وجهج اصفر شايفه عيونج لو لاا ، بنتج صار كم يوم متاكل كومي الها باعي عليها ..

مااحاجي ، كم يوم وكمت من شفت هيف تاذت سوده عليه هم ماتاكل وتبجي هواي ..

صبيت الها شوربة وكعدتها كبالي اوكلها ، هو كاعد على الكرسي بالبلكونه يباوع علينه ، مادرت وجهي علية ،

شوي  جاب الي جهاز كلي حاجي اختج ، باوعت عليه ممصدكه .. همس كلام زايد ماريد ميرال لاتخليني اندم نطيتج تحجين وياها ..

سحبت جهاز منه وومصدكته ، همست الوو ..

عاطت تالا ولج وووينج هااا وينج وين انتو كولي ميرال ت… قاطعتها وين انتي هسه ..

شعليج بيه انتي ووين بنتج وين ، كالها بيبر بس ماصدكته كال انتو عد عدي صدك هالحجي ، ولج عبالي انتي عد بيبر اشتكيت عليه وحلفت جذب فوكاها وشهدت خالتي ورجل خالتي علية ، انتي ووين احجي ..

رفعت عيوني باوعت عليه مدمعه .. اشر براسة .. لاااا ..

بالي يمج تالا كرم وين ..

ولج لاتحركين كلبي ميرال  ، وين رحتي عد منو ارجعي للبيت ..

مااكدر بجيت ..

ليييش ، احجي عد منو انتي …

كرم وين وين دتباتين ..

خرب ولج موتيني منو الي بخطر اني لو انتي دسألج جاوبي ..

مااكدر ..

ليش ، عند عدي موو ولج بيبر كالب دنيااا ، كلبها علينه متخبل يكول اختج راحت اله برجليها ، لو متفقه وياه وسوت هالسوايه ، احجيلي كلامه صدك لو انتي عنده بس هو حتى يضيع سالفه عليه ديحجي هيج عليج..

هو وين ، اباوع لعدي واكف فوك راسي مركز بالحجي ..

حجت بغداد ، كال اذا مارجعت اعرف شلون اطلعها هي وياا من جوه الكاع ..

سكتت شوي ..

حجت تالا .. ميرال اني اعرفج كلش زين فدوه لعينج طمنيني ، بيبر مايحجي ابد بس حمد نوبات يسمع كلام من يمهم ويكلي ، على اساس عدي دازه صوره الج ولبنتج وبيبر يكول انهزمت وياه ..

عقدت حواجبي مستغربه نترت .. لاااا  .. جر جهاز كبل مني عطت بي جيبه دااحجي ..

سده كبل ، قفل الجهاز .. عطت بي شمسوووي هااا شمسوي ..

طلع الخط وكسره .. عطت بي دحااجيك شمسووي صوره شنوو ، اداز صوره لبيبر عززا بعينك ..اي والله عزاااا ، دتحرضه عليه عدي وصلت بيك تحرضه عليه ..

مااحرض بس ماحبيت ينحرم من شوفه هيف مثل مااحرموني شوفه ابني ، شفتي اني احسن منهم ..

دتحرررك كلبه اعرف حركااتك عدي ، ادزله صورتنا لليش تدري هسه هوو عباله منهزمه ويااك ..

اذا عنده ثقه بيج ويعرفج مايتهمج هيج اتهام ، لو اني بمكانه مستحيل اشك بيج ، بس هذا دليل على غباءه وتسرعه بالحكم ، وقله ثقه ..

دازله صوره مرته وبنته وتريده ماايشك ، واحنه صارلنه اسابيع وياك هنا مايعرف احنه وين او جاي انسوي ..

دار ظهره ماارد .. طلع بره الشقه يتهرب وسد الباب ، مارجع الا وره ساعات ، وبيده علاكه مصخمه مثلة ..

لزمت بطني توجعني ، غمضت عيوني بالم ، حجه شبيج .. مارديت ..

دواج اخذي ، لاتتركي معدتج راح تتلف هيج ..

تذكرت دواي تاركته ماشربته صبح ، دخلت للغرفه اشربه ، خفت منه ومن الشرب مالته ، هم راح يحتفل واضل اليل كله مانايمه من وراه ، كل شوي افز ،

طلعت لكيته بالصاله مدد نايم على ظهره وهيف كاعده على بطنه تلعب بقميصه ، هو لازم موبايل جديد ، استغربت كم جهاز عنده لعد. 

ولا مره حضيت بواحد منهم ابد ، شكد حريص وذكي ، عنده دهاء ، لذلك اخاف منه ماعندي ذره ثقه بي ، عاد نوب يسكر ..

العلاكه ماعرف وين خلاها ، حجيت هيف مزعوجه من نومه الجربايه خاف توكع فد يوم جيبلها كاروك ..

رفع راسه علية سكت ثواني متفاجئ من كلامي وياة ، .. ابتسم تدلل هيف وام هيف بس،هاي ..

صفنت بوجهه ، ردت اكله جيب اي دوا ينزل الحمل هم بس خفت ، خفت لايرفض ويعصب ، وخفت هم من الالم ،

همست اي ..

خوش ، نزل هيف من فوك بطنه ، وعدل ملابسه واخذ محفظته وجهاز ، ورفع عيونه  بسسس ، مامشتهيه شي على العشى ، ماتردين فد نوع عصير بالج ..

هزيت راسي لاا  ..

طلع بس انسدت باب الشقة ، اني درت وجهي كبل ركض للغرفة ادور بيها ، هي مابيها اثاث هواي دواشك و شغلات بسيطه وملابسة ، كلبتها كلب ماكوو ، ركضت للثلاجه وهيف وراي .. فتحتها ماكوو ، بكل ثلاجه بحشت هم ماكوو هيف جرت بطل صاص تريد تمصه ..

لااا حار ، شنو جوعانه ، داحاجيها وطفت الكهرباء ، هاي شنو رفعت راسي ..

اول مره تطفه ، اكو وطني واكو مولد مركزي ، ليش طفت.  نطيتها تفاحه وسديت الثلاجه كمت ادور بالصاله ، بميز تلفزيون بالبلكونه مااخليت ماكوو وين ظامه هذا ،  .

درت ظهري وين خلاهن هذا ، بس رفعت نظري شوي شفت اكو علاكه فوك الكاونتر ..

جريت الكرسي و صعدت عليها جريتها والله ثكيلة ..

طفرت من الكرسي ، بس طفرت صار عندي الم حاد بمعدتي بهل طفرة لزمت بطني اااخ ياايمه ، تذكرت الحمل ..

شلون انزله لهل حمل يارب ، معقوله بالثكل سامعه اني هيج ينزل الحمل بس اني مااتحمل اجهاض غير اموت والله ، بعدين اني جبانة ، اخاف ، صفنت شوي ، نزلت نظري على الي بيدي ،

خليتهم على الكاونتر يطكطكن ، بيهن بطلين كبار ووويع وين اوديهن هذني هسه ،

صفنت مو مال اضمهن ، شسوي بيهن اضمهن خاف يلكاهن هم ، افرغهن بزبالة لو بالسنك ماكو غيرها ، نوب مااعرف افتحهم ، طلعتهم من العلاكه وجبت سجين ، بالنص ساعه متعاركه ويه البطل اريد افتحه ماكدرت ، اخر شي كلت اكسره اذا مانفتح ..

او اشمره من البلكونه عزااا واذا وكع على راس احد .. .

كعدت اضرب براس البطل بحافه سجين ، لحد ما نفطر وانفتح ياايمه فتحت سيلفون الي براس وفكيته ، ذبيته بالسنك ورجعت افتح الثاني ، نفس الطريق اضل اضرب براس البطل لحد ما يطك وافتح السلفون الي بي واصلة ،

شلت البطاله الفارغه لفيتهم بعلاكه سوده وشمرتهم بالزبالة ، كعدت بصاله ولا كانو صاير شي ، لحد مارجع ، جايب الها كارور بعده بالكارتونه ..

نزله بالارض وصاح هيووف ..

راحت تركض عليه صيح بابااا ..

طلع الها من العلاكه ، لعبه لونها اخضر اديها طوال ، شكلها لا هو ارنب لا دب ، شكلها غريب مافتهمتها شنو ، لحد ما هو لف ادين العبة على هيف يكللها هذا يحظن شوفي حاظنج ..

صدك طلع عود لعبه وتحظن الشخص تشد اديها حوالين طفل او حول رقبتة حتى يحس اكو احد حاظنه ، مو حبتها هيف لا ماتت عليها نوب نامت و نومتها بصفها وحاظنتها حيل تبوس بيها ..

فرحان هو بيها يباوعلها ويضحك ، راح جاب كتر و درنفيس يشد الكاروك ، حجه مولده العماره طكت ، ماكو مولده اليوم حنظل على الوطني ..

شنو نظل بالظلمه يعني ،

لاا عندي كلوبات شحن بالكاونتر جوه ، ندبر نفسه ، منا لحد مايصلحون المولدة ..

خلة الغراض بالارض ، هي وياه كعدت تشوف شيسوي وتكله الي هااا بابا الي ..

اي الج تنامين بي صرتي جبيرة عيب تنامين بحظن ماما يباوعلي مبتسم ..

وجهي راخي ما بدر مني شي ..

حجه الكبار ينامون على جربايه وجهال. الالعاب بالكاروك هنا ماشي ..

ترد هي وتهز براسها ااايي ..

لونه اخضر ، وبي فراشات وردية ، تخبلت عليهن ، الي فرح كلبي ضحكتها ، تضحك من كلبها وعدها سنون امامية طالعه احسها فرحانه ، اني مااعرف اتصرف هيج ولا اعرف اسايسها ، هو عنده خبره بالاطفال خاصه كان عنده بحر ، يعرف شلون يكسب طفل ويخلي يتعلق بي ..

، تنطي الدرنفيس ، هاااك ..

تقربه من وجهه ، حجه دقيقه دخلي البرغي بمكانة ، لااااا ولج راح ادخلي بعيني ..

من كثر مايحجي وياها السانها منطلق ، تعرف كلمات جديده وحركه كلش ، وهي اصلا وياه وياه وين مايروح وراه ، شافني صافنه عليها. …

حجه حيجيها اخ بعد كم شهر ، يتربون سوه ..

درت عيوني عليه بملل وانزعاج. ، منو كلك اخ ..

اخ اخت مو مهم ، المهم يكون وياها مثل انتي وتالا ويشيل همها وتشيل همه ،

منو كلك يضل ماابقي انزلة ..

جان يشد بالبرغي وكفت اديه ذب درنفيس من ايده ، صفن بوجهي ، تردين تقتلين ابنج ..

ابن حرام هذا ..

ماله ذنب ..

ذنبه بركبتك ..

كتلج نادم ..

وين اصرفها ، من اخذه او اجيبه مايكولون منين هذاا منين جبتي شكول اعتده عليه وحبلت بي ، اذا خلفته شكوله من يكبر انته ابوك اعتده عليه واجيت ، اني اصلا شلون اتقبلا هو ابنك ..

نفس ماتقبلتي هيف اشر عليها ، نسيتي ابوها اله ايد بقتل اهلج ، وهسه مو تقبلتيها لا جزء من روحج بعد ..

شرعيه هااي ، وثانيا مااله ايد بسالفة اهلي هو كال ..

اكيد يجذب قابل يعترف ، يايوم صدك وياج حتى يصدك بهاي ، عواد انتي تعرفي مايخطي خطوه اذا مابيبر موافق ، شلون راح عواد وشباب لحكو اهلج لشارع المطار وكلبوهم بسياره وسرقو الي عدهم وبيبر مايدري واله ايد ..  ابتسم ، تعرفين بس تنكرين وتبررين انتي مثله بالضبط رجع يكمل شد ..

شلون الك كلب يجي طفل وهو اسمه نغ… سكتت ..

رفع عيونه علية بيدج كلشي بيدج ..

انته تسوي كارثه وبعدين تكلي بيدج ، لااا بيدك جيبلي دوه انزله طفل بي عليك الله .. باوعت عليه اتوسل بنظراتي ..

تموتي يعني ..

احسن مايعيش بذله ومهانه وناس تعيره واني مااتقبلة ..

راح تتقبلي والله وراح تحبي ، انتي حنينه وكلبج طيب مستحيل تكرهي ،

درت وجهي عنه امسح بدموعي ، ناس حتاكل وجهي حيكولون انهزمت وياه وخلفت منه ابن حرام ..

منو يحجي اكص السانه والله ..

ضليت ساكته دموعي تنزل ..

ميرال محد عنده شي يمنه ، حتى بيبر ، هو طليقج ، صح ابو بنتج بس بنتج متعرفه ، هو مالازمها فماعنده محنه عليها ولا هيه ، تحبني اكثر منه وتعتبرني ابوها  احنه الي عدنا ثار يمه .. احنه الي عدنا حق ونريد ناخذه ..

اخو قتل عائلتي ، هو اله ايد بقتل اهلج وبهذله اختج وتزويجها من دانيال ، طرد ام ساري ، كلهن اله ايد بيهن من شنو خايفه بعد ، هو لازم يخااف هو الغلطان بحقنة وعنده حساب لازم يسدده ..

اني مو مثلكم ادور ثارات ، اني بحالي اريد اربي بنتي ، شعليه منكم تصافو تحاربو تكاتلو اني شكوو ، كلشي وكع عليه ..

مالج شغل ، سكت دنج راسة ، اعرف غلط دخلتج بالنص ، اعرف غلط اخذت بنتج وسحبتج وراها بس جنت معصب ، الحقد مالي كلبي ردت يضوك لوعه الي ضكتها ، ردت يحس بفقدان الابن والعائله ..

لان شفت السجن والقضايا ماجابت نتيجه وياه ، شفته شلون رتب وضعه وراح يطلع مثل الشعرة من العجين ، ماتالم ماانقهر ماانكسر ، ضل هو هوو ، اني تدمرت اني ماانام من تانيب الظمير ومن مشهد دم ابني وراسه وصدره الي نخرهن الرصاص  ،

سكت دار وجهه عني ، باوعت عليه وجهه انكلب احمر ، ذب الغراض وخر طلع من صاله راح للبلكونه ..

ضلينه طول اليوم واحد يجنب الثاني ، كمل شد الكارور وهيف مددت بي من المغرب ، كاعده ما مغمضه بس مدده عاجبها ، حتى حلوياتها خلتهن بي ،

ورتب الكلوبات الشحن ، واحد بغرفه النوم واحد بالصالة ،سوه هو عشى واني سويته عصير كوكتيل من الفواكه  صبيت الي بكوب ،،خليت اله الباقي ، هو مو على بعضه احسه ضاج من كلامي وياه الظهر ،

حلوه هاي لو تبقي بطنج وتتقبلين طفل مصيرة ينكال عليه ابن حرام لو اكلب وجهي والله يالله ..

لليل شربت دواي ، ورحت انام ، سديت الباب ، ماعرف غفيت ماعرف شوي بس ، وسمعت صوت بالصاله .. فتحت عيوني عوجت حلكي خير يارب شكوو ..

شوي وفتح الباب ، رفعت راسي عليه ..

باوع عليه ساكت ، ضوه الكلوب الشحن خفيف ماشوف ملامحه زين ، بس الهيئه نوب مايحجي بس ماد راسه وساكت ، المنظر مرعب ،،

همست بخوف شكوو ..

كاعده ..

اي شبيك ..

سكت ثواني وفتح الباب اكثر همس الشسمه هذا حك. راسه ..

ابتسمت عرفت يدور عليهن ..

ضليت ساكته اباوع عليه .. اندار علية ، سكت ،

ابتسمت كوه كتمت الضحكه ..

حجه وينهن ..

شنوو ..

تعرفين .. البطاله وين ..

بطاله شنوو ..

ميرال ..

عدي دنيا ليل شتريد ..

البطاله وووين ..

صوتك الطفله نايمه ، بطاله شنوو ..

استغفرالله ، ميرال لاتلعبين بعصابي ..

تذكر الله وتريد البطاله شهل تناقض …

وين وديتيهن ..

شمرتهن .

هاااا …

والله ، انته تشرب منا واوكع اني بيها منااا ، كل مالكه شرب اعرف مصيره الزباله ..

ذبيتيهن يعني ..

اي ..

جنت جافيج شري وانسى وانام بيهن ، هسه تحملي شري ..

ياشر عيوني ، لو مو ذاك اليوم سويت مكسوره وذبيتها براس الشرب ، وقبل كم يوم الغنى وطك الاصبع للفجر ، كل هذا مو شر لعد شر شلون شكله ..

تردين تعرفين شكله ..

تقدم عليه ..

كمت لحيلي يااابه وداعت هيف لاكلبها عياط عليك وخررر منا  ..

شيفيدج العياط بالله  .. طفرتين ولزمني عطت مخترعة من سرعتة ، خله جف ايده على حلكي ضغط علية  ، جنت اشرب كوب وانخمد هسه شينومني هاااا ، شطفي التفكير وهذاا اشر على راسه هااااا ،

هزيت راسي ..

وخر ايده شنوو ..

عدي عليك الله ، والله انت باين عليك خوش انسان ليش اسوي هيج ..

شمسوي ..

شوو دوخر شووي شكو لازم بيده وهد ايدي اذيتني ..

ماوخر .. همست اشرب اسكر شعلي اني ، هسه يله روح دنام فدوه يله روح ..

جاهل كبالج ..

عدي ماناوي تمرر اليله شنوو ..

هد ايدي وخر خطوه ، لا يابه شعندي قابل ، دفعني وخرني عنه وطلع ، لزمت كلبي يااايمه هبطني الجلب ، شفته راح ، رجعت تمددت ولفيت نفسي بالغطى زين ، ابتسمت ياااضحكت عليه وربي السياسه تجيب اكبر شارب ..

منا وهيج اتصرف هيج وياه ، اي ميرال طولي خلك شفتي من دكيتي ناعم شلون طاوعج واجه للدرب ، خليت ايدي جوه راسي مطمانه ماكو شرب وهوسه اليوم ، والله يالله ماصارلي  ساعه نايمه درت ظهري حسيت طخيت بشي ..

خرب هيف مو نومتها بكاروك شجابها معقوله نقلتها اني مادري بتفسي درت داشوفها لاتوكع ، انصدمت بحظنه ايد هالكبر بطول هيف نطيت يمامااااا …

يتبع ......... 

شوفنا التفاعل حبيبات ...💜💜💜💜💜