رواية قاع الشياطين الفصل الثاني والثمانون 82 - بقلم اسماء ديمير

الجزء الثاني ،، البارت السادس

#قاع_الشياطين

#بقلم_اسماء_ديمير

خرب هيف مو نومتها بكاروك شجابها معقوله نقلتها اني مادري بنفسي درت داشوفها لاتوكع ، انصدمت بحظنه ايد هالكبر بطول هيف نطيت من مكاني يمامااااا …

رفع راسه هااا ولج شبيج فززتيني ..

رفعت ايدي حيل بعدتها عني ، ضربته على جتفة ، وووجع شجابك هنااا ..

الصاله حاره شبيج ماكو كهرباء ..

ادري تجي هنااا شو كوم يله ..

صوتج البنيه نايمة ..

تكوم عدي لا ادفرك والله ..

شو ادفري دكسر رجلج ..

نام انت هنا ، اني كايمة ، نطيته دفعه داكوم ، جلب بية بيده ، وجع ولج ضلي اني اكوم ، حتى بالنومه لاحكتني ميصير الواحد يرتاح بهل بيت ، جيب عدي سوي عدي ودي عدي اي ، بس مال يرتاح عدي شوي لااا .. كام ينكت بديه وبملابسه ضايج فوكاها ..

نترت ترتاح باي مكان مو الا يمي ، جر الغطا من عليه حيل ينتر بي وشال مخده البصفي شمرها على الغطى وشمر نفسه ينخمد ..

حجيت شو هنااا ..

فكي حلكج بحرف بعد ومااطلع عدي اذا ماربطتج بالبلكونه ..

سكتت ، وسم يالمريض ، فاسد ، السرسري ،

ضليت على كعدتي ماكدرت انام ، نوب الغطا اخذه ، شلون اذا حصت وطلعت رجلية ، قلق حتى نومتي مال الوجع ، ضليت كاعده ماغمضت عيوني ماكو هو شوي و بلش نفسه يثكل نام بسابع نومه ..

مال هسه اهطره بشغله واموته واخلص منه بس اني ماعندي الجرأءه ، بعدين اذا ضربته على راسه وصحه مامات غير يكوملي يفعسني فعس والله ..

لحد ماصبح صبح اني كاعدة ، الفجر كلش يله غفيت من التعب والسهر ، كعدت تقريب ال١١ الظهر ..

راسي يوجعني ، هيف كاعده بكاروكها ماطلعت صوت ، خانسة تلعب باللعبة ،

  بس هو ماكو استغربت عدم وجوده يوميه صوته طالع هو وهيف، سويت ريوك الي والها ، هو هم ماكو ..

كل يوم اكعد على صوتهم وركع مالتهم ، اليوم البيت هدوء من دونة ..

توقع يجي على الغدة ، حتى على الغده ماكوو ، زين منو يسوي غده ،صفنت خرب شلون حيره هاي ..

كلت اسلك بوتيتا واكلي طماطه واسوي شوربة لهيف ، قابل صعبه سهلات ..

بالساعتين ونص يله كملتهن بدون مبالغه والله ،وخاصه هيف ماخلتني اشتغل براحتي لل٣ ونص كملتهم ، صبيتهم واكلت ..

طماطه مالحه والبوتيتا فاهيه .. خبطت من الاثنين واكلت ..

هيف وكلتها وكعدتها بالصاله تلعب ، ضل بالي يمه الصراحه ، نوب كهرباء ماكو يعني تلفزيون ماكو ، وين ولى هذاا خاف صار بي شي نوب اني وبنتي محد يدري عنهاا حتى لو نموت …

فتحت البلكونه وطلعت ، يااربي لو اعيط منا لباجر محد يسمعنا صخام صخمك يااعدي وين وليت ، ضليت كاعده بالبلكونه اراقب ، عمارات والسكنه مالتها كلش هادئين ماكو صوت ، لا اطفال لا ضوضاء ..

تحسهم اغلبهم موظفين ، واطفالهم مدارس ، هيف ضاجت وملت ، نوب كامت ادور عليه بابا ما بابا ، وتاشر على باب شقة ، وتاشر ويناااا ، بابا ويناااا ،

حاولت الهيا والعبها ، شوي ومعدتي اذتني مااكدرت اشيلها ذبيتها ، للمغرب وهذا ماكوو ..

هنا لزمت كلبي وين ولى خرب اي والله خاف لكاه بيبر ، زين ليش مااجه لهنا ، اذا لكاه ، خاف اندعم ومات ، يمااا واحنه منو النه نموت اني وبنتي هنا بالشقه محد يعرف بينا ..

سمعت صوت مفاتيح ، شلت هيف وطفرت مرعوبة ، انفتحت باب شقه ودخل ..

نترت وووين جنت ..

فتح عينه شبيج .

شنو شبيه ، ماكلت هذول لوحدهن صار ماصار،من. يسولهم غده .. وين جنت ..

هذا الهامج منو يسويلج غده شبيها اديج مكسرة ..

عدي صدك وين جنت من صبح ماكو ماكلت يضل بالكم .

ابتسم ذب المفاتيح ضل بالج عليه ..

صفنت بوجهه مخنزره ضايجه ..

طلعت افتر ضايج شعندي بكعده البيت يم النسوان ..

هااا كتلي ضايج لعد اني شكول صار هنا اسابيع محبوسه ..

وين تردين عيوني افرج هااا متعوده على السهرات وفرات المطاعم باليل انتي عاذرج ، بس اني مااعندي هالطبع رجال عندي غيرة ، شايفتني بلا غيرة ..

صار علينا شي مافكرت واحنه لوحدنا ..

ماعليكم شي ، كلت خاف وجودي يضايقج فاطلع منا وهيج صبح وارجع المغرب ..

رفعت تك حاجب ممقتنعه .. شال هيف ماشتاقيتلي بابا ..

تلعب بوجهه وتضحك ..

جتفت اديه مزعوجه ، اندار عليه ونزلت عيونه على بطني ابتسم .

دنجت اني هم على بطني اشوف على شنو ..

حجه مو كانو طالع عندج بطن ..

شفطت بطني ليجوه .

حجه اشفطي اشفطي هم ما تختفي ام كرش ..

ترى توه اكلنا ..

شاكلتو ..

بتيتا وطماطه ..

وبس حضلين طول عمرج عايشه على هذني ، سوي اكل بابا اكل دسم دصير بيج شحمه لحمه ، بس عضام ..

توه تكول ام كرش اصفى على راي .

كرشج هذا مال حمل شجابه على سمن ..

خنست من تذكرت الحمل صفنت بالارض ساكته ،لزمت بطني ، كعد ينزع بحذائه ، شافني سكتت..  حجه شبيج ..

بلعت ريك .. مابدلت رايك عدي مااحكمت عقلك شوي والله هداك .

على شنوو على ان اقتل طفل ماله ذنب برعونه ابوو ..

عدي انت كلتها رعونه ، والله الا نندم ندم باجر عكبه اذا اجه للدنيا ..

وداعت هيف عندي مااندم ، راح تحبي وراح ويصير عند هيف اخ او اخت تخاويها للعمر كله , انتي مادايمه الها يراد الها سند وعزوه ، واني رايد طفل ، طفل يغسل حقد الكلوب ميرال ، وربي مااعبد مااشيل عليج وعلى هيف ذره غل او حقد ..

انتو هنا يمي صار اسابيع انزرعتو بكلبي اكثر من قبل تخيلي يصير طفل يجمعنه ثلاثتنا شلون راح تصير الحياة ،

تخيلي بس تجي ابنيه صغيرة تشبه هيف وهيف جبيره تشيلها وتلعبها وانت تصيرين ام لاثنين ، لو يصير ولد وتربي وتكبري ويسندج انتي واخته والله يعوضج خير علية ..

قاطعته هذا تفكير ممكن افكر بي لو جان ابن حلال ، لو جان جاي بأرادتي مو طفل استغفرالله ياربي مااكدرت اكمل ، الحجي يوجع الكلب .

حجه ماله ذنب اني المذنب ، تردين تحملي الذنب هو بعده نطفة ، خافي الله ميرال اعرفج مؤمنه وتصلين وتصومين ، وين خوفج من الله ..

تعرف الله انته وتحجي بي ،

هسه شتردين تسقطي يعني ..

والحل ..

بكيفج ، تردين تقتلي وبعد كم سنه تندمين لو وكعتي بضيج تعضين اصابعج لو مخلفه اخ لهيف جان اطمنت عليها .. مااجبرج بعد اني بكيفج ..

درت وجهي عنه حايرة ، والله الهم اكل كلبي وسكن بمعدتي يصير عندي الم بالمعده يكتل كتل ، لزمتها افرك بيها توجعني ، راح هو يسوي لنفسه اكل ..

لكه اكو بالطاورات اكل ، كعد يحميهم وعين عليه وعين على الطباخ ..

درت وجهي وحاجيته مو تكول مااجبرج ..

حجه اي بس بالمعقول  ..

رجعني لادهوك اتمم حملي هناك صحتي مو شي انت تعرف ..

اولدي للطفل  بسلامه والله محمد وياج ..

حجيت بنتر معصبية .. شقصدك اولده انطيكياه يعني تاخذه .

شسوين بي لعد ، نفس مااخذتج ارجعج ، بعدين ترجعين حامل شيكولون عليج هااا مو ذاك اليوم حجيتيها ، ياكلون وجهج ..

طفل ليش انطي الك اصلا ..

شعبالج اني بيبر وعوفلج ابني لااا ميراال رفع اصبعه اني عددي خلفتي تضل عندي وانتي وين ماتردين ترحين روحي مالزمج ..

انزله والله عدددددي ..

نزلي لازمج اني ، وانتي والله لان ضاربج بعزيز كلبج بهيف ،عقاب لان قتلتي نفس مالها ذنب ..

تريد تربطني بالطفل موو حتى اضل طول العمر جوه ايدك ..

مالي هيج نيه ، دومج ظالمتني الله يسامحج ، شوف حتى الاكل انسدت نفسي ماريده ..

طفى جوه طاوات وطلع للبلكونه ..

اني ضليت بمكاني ماكمت ، اكلني القهر حسبي الله عليك ، مرت ايام ، باليل ينام يمنه بالغرفة مرتين لزمته ينام على الفراش بصفي حتى نومه اليل انحرمت منها بسببه ،

ادفره و اكوم انام بالارض من يصحى ويلكاني هيج يكعدني يكلي كومي فوك على الجربايه اني انام بالارض ،

والصبح مالكاه طالع يرجع المغرب لو باليل ، الكهرباء ماتصلحت ماعرف ليش ، برغم اشوف الشقق الباقية بالعمارات البصفنه عدهم الا احنه ماكو ، كلت خاف هذا ماجاي يدفع الفاتوره المولد وقطعوها عنه ..

بس هو عنده الماده قابل فقير مايدفع ، سوالي واهس نوب بطني جبيره ؟؟؟ لا صغيره ..

صح عندي كرش صغير من حمل هيف ، واني اصلا ضعيفة بس عندي كرش صغير ، حملي بهيف مابين الا بشهر الخامس ..

سالفه الحمل ما كررناها وماجبنه طاري مره الثانيه هو اصلا مغلس عليه لابسني ، ياخذ هيف يطلعها بالحديقه جوه شوي مايكلي تعاي ويانه ،

لو يكلي مامشتهيه شي تتنسين على شي اجيبه مارد عليه يقهرني ،

القاهرني بالزايد اني هذا طفل حينكال عليه ابن حرام طول عمره راح يتعير ، وباجر عكبه يحملني مسؤليه ويلومني شنو ماكان بنت لو ولد ..

اني حبلت واني الولدت اني حتحمل المسؤليه والملامه .. فكرت اخلي يعقد عليه هالزمال ، بس تعال شلون اتقبل اني يتسمى زوجي هذا ..

الفكره لوحدها تلعب نفس وتكرهني بنفسي ، ياارب رحمتك من ادخل الحمام شكد ابجي يااررب من يمك كون اوكع فد يوم وينزل لحاله ، ويموت ،

ينزل عليه قطرات دم ماعرف شنو والم بعدتي حاد خاصه من اكل اكوم اموت ، حتى الادويه تركتها نوب بطني انفخت ..شعري بي تساقط ..

الحمل اذا احسب اله تقريبا شهر ونص …

دك باب الحمام عليه حجه ميرال شبيج .. مسحت دموعي وكمت البس بملابسي .. خلصت وطلعت هو على وكفته حجه شبيج متوجعه دواج دتاخذي ، معدتج تعبانه ترى ..

ماحاجيته ، علاقتي بي للاسوء ، هو صاير مايحجي مو مثل قبل يستفزني ، لو يضغط علية ، ماجان يشرب جكاير ..

هسه يسلت بهل جكاير بالبلكونه ، حتى لحيته طولانه .. ماجان هامني وضعه ابد ماركز بي ، كارهه وجوده ، بس هيف متعوده عليه وتفتقده ، لحد مااجه عليه فد يوم حجه حنغير مكان كعدتنا ،

شنوو ليش ..

مامليتي ، اعرفج تحبين الطبيعه حاخذج هناك ، حتى تتغير نفستج على الاقل ..

رجعني لادهوك عدي بروح بحر ..

صفن بوجهي مالنتي ياميرال ، شنو من كلب شايلة ،

مامرتاحه وياك مو بيدي ..

ضل يباوعلي ، بوجه خيبه امل ، شسوي وياج بعد ماتكليلي ، الله يشلع من كلبي مثل مازرعج .. 

دمعت عدي كلشي صار قاطعني يصيح من ايدي افتهمتتتتتت ، صار شكد عندي ماعرفتيني ماعرفتي طبعي انتي تتلاوين ويااي وهاي النتيجه شوفي بنتج شكد تحبني ومعتني بيها لان مسالمه بس انتي اااااخ انتي العناد كبر راس بس يمييي ..

شبيك شكتلك تخبلت علي ..

لادوسين بطني وتحجين شكتلك ، دافكر بيج وبنفسيتج واريد اخذج لمكان تحبي وترتاحين بي وتكليلي ارجع لادهوك ..

شكوو ضاله يمك ، شستفاديت انت حتى ممرتاح شوف وجهك ..

مارتاح اذا مايصير الي اريده ..

شتريد بعد ، كعدت لامه معدتي منهارة نترت بي موجوعة .. كلشي صار بعد الي تريده ماصار ؟؟؟

البيت الجديد بريف ، كعد كبالي مبتسم ، بي دجاج تحبين دجاج انتي ، وعدهم بلابل هم ، وحديقه مزروعه ورد ، صفنت بوجهه ..

دمعت عيوني حاولت احاجي بالسياسه وبهدوء ، والحمل عدي ؟؟؟

يخلص مايطول ..

وين اولده ..

مرتب كلشي لاتخافين ..

بأسم منو يسجل ،

سكت ..

احجي ..

هز جتفه خليها لوكتها ..

لوكتها شنوو اريد اعرف وين تودي لبعدها ..

رفع حواجبه مستغرب ، ماتردي تردين اخذه يعني ؟؟؟!

بجيت خايفه .. كمل حجي هو اشوفله صرفه اذا ماتردي ، اخلي عد احد يربي منا لوكتها اكو ميت الف حل ، المهم انتي مرتاحه ..

شلون ارتاح واني منطيتك طفل حملت بي ولدته ..

مو ماتردي ..

منو كال مااريده ..

افعالج ، سكتت دموعي هالكبر الوحده من القهر بسببه .. حجه مااعرف هالطفل شلون حيعيش هو باولها هيج مظلوم واهله مايردو ، اذا امه وابو مارايدي وحايرين وين يودو شلون حيتربى مسكين والله  ..

ماترهم عدي ..

شنوو ..

مال تعقد عليه واكول ابني ابن شرعي هم ماترهم .

سكت ثواني صفن بوجهي ، تغيرت ملامحه ورخت رجع جسمه ليورة جر نفس  ،

حجيت حتنكلب عليه كارثه تعرف لو لاااا ، بنتي تنخطف بعدها اني الحكها واختفي وراها ارجع الهم وياي طفل وعلى والله ابني هذا وهو طفل شرعي ، من زوجي عدي ؟؟؟ ، مصيبه كااارثه والله ..

منو همه الي  ترجعيلهم ..

خوالي ، اختي ،ناس التعرفني ..

منو سال عليج باسوء ايامج ، هاااا ، ترى اختج يجي يوم تزوج وحتى متاخذ رأيج ، وخوالج ذاك اليوم عرفتيهم وكفاتهم وياج بمقابل ترى ، قابل صارفين عليج من جيبهم لو مفضلين عليج ..

وخايفه عليهم وعلى رأيهم ، اصلا لاتفكرين ترجعين لهناك فكري تشتغلين وتربين جهالج بيت خاص بيج بعيد عنهم  ..

انتي بعد قومي بنفسج شوف ودشوفين زين ،بنتج تريد ام قويه تشتغل وتربيها وتفتح بيت الها ، بعد ماكو اعتماد على احد ماعندج حجه ، كلشي تكدرين تسوين ..

شلون ..

اساعدج ..

وتعوفنه  بحالنه عادي ؟؟

اعوفكم والله اول وتالي لازم اتصافه ويه بيبر ، مااكدر اضل منهزم منه ومبهذلكم وياي لازم نتواجه ونصفي الي صار حتى تركد الماي ..

بيبر شيخلصني منه ..

ماله حق يفك حلكه ويااج انتي طليقته ماله شي عندج غير بس هيف ، وهيف هاي كبالج كلشي مابيها اصلا حظانه الج من حقج ..

والطفل ..

الج هم ، اخذيهم وربيهم ، ودرسيهم وعلميهم وشغلي فلوس ابوج والزمي المحلات كلشي تكدرين لوحدج انتي قوية بس تردين دفعه ،

صفنت بوجهه ، افكر ..

ابتسم وجهه مرتاح ..

حجيت خايفة ..عقد شيخ ؟؟

رخت ملامحه وجر نفس طويل ، بكيفج المهم طفل يسجل باسم امه …

شلون امشي بمعاملاته وهاي اذا العقد عقد شيخ ..

اول شي عقد شيخ وبعدها نصدقه بالمحكمه عادي يصير ،
سكتت .. حجه بس اني اريد مهر ليش تكولين ..

باوعتله عافسه وجهي ..

اي شعبالج لعد وتجين من الباب مااقبل من شباك ابد اني ابن عايله وشريف ، ماقبل بالمزاغل ..

عوجت حلكي حيكلبها عليه ابن شريفه هذا ..

رد يكمل اهلي مايقبلون بهل سوالف ، تجيبين اهلج وتجون مثل الناس تطلبوني ، كام لحيله اي عيني اذا جديه تجين من الباب …

راح يلم الغراض ..

صاح كومي لمي الغراض الي تحتاجيهم ورانه درب طويل ..

كمت لحيلي ، بين ندمانه وبين مابيدي فير هالدرب وهل حل ، خايفة من الجاي ، والله ميته خوف شراح يخلصني كلها هسه تلومني ،

راح يكولون كله منها وتخطيطها محد يصدك صتر وياي واني مجبورة ، الله يشهد مجبورة ياناس ، المخوفني بيبر سكووته هدوءه ، ماعرف عدي المشيطن وسوالفه خلته مايندلنا لحد هسه ..

شلون يندلنا واحنه كل فتره بمكان مانطلع ولا ندخل لمكان ، محد يعرفنا حتى جوارين ،

اذا بيها صالح يارب تممها واذا لا من يمك لا تخليها اتم يارب العالمين .. طلعت الجنط ولميت ملابسي وملابس هيف والعابها ، اخذنه الضروريات وعفنه البقيه ..

حجه عود هناك نشتري الي نحتاجه ،

طفى الاضوية وقفل كلشي وطلعنه ، بنزلتنا من الدرج الحارس مال العمارة حجاه لعدي ..

احول المولده على الشقه هسه استاذ ..

اندار عليه عدي متوتر ، باوعت عليه عاقده حواجبي ..

حك راسه .. هاا لا لا عوفها …

مشى كبالنه واني وراه شايله هيف .. مشيت بسرعه وصلت بصفه .. شكد حركاتك لئيمه خليتنا بهل حر لييش ..

انييييييي ..

لا ابوياااا فعلا ماتصيرلك جاره انته ..

ضحك فتح باب سيارة وصعد الجنط ، صعدت اني ليورة ، صاح ست الحسن مااشتغل سايق ترى ..

درت وجهي عنه ارتب بملابس هيف واعدل بشعرها ..

صبرج يااروح صبرج ..

صعد وشغل السيارة ، مشينه هواي ، تقريبا ساعتين ونص واكثر ، هيف نامت ورجعت كعدت  واحنه بعدنا ..

حاجيته وين رايحين ..

لبيت بالزراعي ..

بيا منطقه يعني. ..

الج صافي ميرال لاتعبين نفسج بالاسئله ..

جنت خايفه ماانكر بس ماضل شي اخاف منه ، هو ضل شي ماصار وياي ، مرينا على اراضي صحراوية تقريبا ، ارض قاحلة ،  التفت عليه مبتسم ..

هاي الابتسامات مالته تخوفني .. غمزلي بعينه تدرين اذا اكتلج وادفنج هنا محد يلكاج ..

وجهي خرط والله ، حتى احس هبطه صارت بمعدتي درت وجهي بسرعه على الجامه .. اشوف صحراء تصفر ، ولا بشر ولا حيوان كلشي ماكو ..

باوعت عليه بسرعه هو طكها ضحكه ، ويكول يااااا غير اموت وراج اشاقه شبيج ، رجع يضحك يمعوده وجهج اصفر ترى اشاقة ..

درت وجهي عنه ادردم لعنت الله عليك شلون شقى مخربط مثلك ..

لازمه كلبي منه ، شراح اشوف ويه هذا بعد ، دخت وتعبت من الدرب ، حتى تقيات ، شلون جمر والله جمر ، نار ومستعره بمعدتي ، توجع مووت الزم وافرك بيها من حركه المعده  وكفنا السيارة مرتين نزلت رديت على راسي بالشارع ، نطاني بطل ماي هاج غسلي ..

كاعده على طرف شارع ، اخذته اغسل ..

معدتج شكد ضعيفه انتي ..

ماي بارد غسلت وجهي ومضمضت بي ..

حجه لازم اشوفلج علاج لهل السالفه ، مو زين تضلين هيج ، مارديت عليه جنت ميته من الالم ، دموعي تجري بسكوت مابيه احجي ، لحد ما وصلنه المنطقة الزراعية ..

نزلنه من الشارع العام لشارع فرعي ترابي ، استمرينا بالمشي تقريب ربع ساعه ودخلنه قريه ، وين جايبني هذا ، بيا هيمه ، نهايه المحافظه عبالك ، نوب قريه ياامه محمد ، لا دكتور لا صيدليه لا سوك لاصخام عزا بعينه ماافكر اذا صار بينه شي ..

دخلنه لنص القرية وكف كبال بيت ، نزل هو يفتح الباب ..

البيت ماملبوخ من برة ، فتح الباب ورجع صعد يدخل السيارة ، دخلنه ..

حديقه جبيره والبيت قديم   ، بي زرع هواي حتى سنادين معلكه بالحياطين ..

نزلنا نزل هو يفتح البيت .. الطرمه مغسوله عبالك واحد غاسلها بعدها مرطبة ، فتح الباب ودخل ..

دخلت وراه ، البيت عبالك مبني بالتسعينات من ديكور مالته ، بوفيات قديمه ، كاونتر بالمطبخ قديم ، دخلت للصاله. بيها معرض صاج قديم ..

البيت منظف ، بس باين عليه مال جيل الطيبين ، حتى عطره للبيت عطر بخور هذا ابو العود ..

التفتت عليه خايفه بيت منو هذا ..

نزل الجنط بالارض ابتسم بيت جدي ..

صدك تحجي ..

اي والله انولدت هنا اني اشر على غرفه بالركن ، همست ساعه سودة اي والله ..

نزلت هيف للارض ..

ورحت اشوف الغرف .. دخلت بيها جرابي حديد اكوو و كنتور خشب ابو ثلاث بوب ، واكو درج يطلع للسطح ،

شوي واندكت الباب صاح صوت طفولي عموووو ..

صاح هو تعااي اميرة ..

دخلت اميرة عدها كصايب اثنين ولابسه ثوب كشمير بي شرايط ، باوعت عليه ابتسمت اسنانها الاماميه مكسرة ..

بلعت ريك ، حجت امي تكول اجيب غده لان نزلتو جديد .. بنت تحجي وتثاثي
..
عفست وجهي ممفتهمه شنووو ..

ثردون غدااا ..

منو انتو ..

جوارينكم ..

وين ساكنين ..

اشرت هناااك ..

همست الها عدكم موبايل ..

سكتت .

اشرت الها جهاز يخابر وتصيحون الوو عدكم ..

اي عد ابووي يخابر بي عمي ثلطان يكله ثيب وياج علف للهوايش ..

ابتسمت ، كعدت كبالها طلع هو ينكت بملابسه وينج اميره ..

حجت هااا ..

جيبي للاكل وحسبو حسابكم العشى هم …

تردون لبن ..

اي جيبي واذا عدكم حليب هم .. .. صاحت .. اي وراحت تركض ..

مو عيب تخليهم يسون النا اكل ،

هاي عادات العرب والناس الي عدهم اصول ، بعدين ثلاجه ماعدنا ، وين اخلي المسواك ، كم يوم اجيب وحده ، هم يطبخون واني حدفع ماكو شي بلاش ، هم ماترهم اني  اضل اطبخ ..

سكتت ، فرش الارض هو حصيرة كلي ماتساعديني ..

بطني توجعني ..

هز راسه… دلال عمي دلال ..

هيف وياه تجر بطرف الحصير تساعده ..

الحلو هنا فتح النا الباب ، ماسدها علينه اكدر اطلع للحديقة وافتر ، جابو الغده يااايمه شلون غدا ..

والله مو اقلد ولا اعيب ، شكله يجنن بس من تقربت عليه وشميت ريحه يمااا ، شحم شحم ، نوب خالين قطعه ليه ماعرف شحم فوك التمن .. مسوين تمن فوكاه حشوه برياني فوكاهن شحم. مدري ليه ..

من شفتها كبل هعت ، خليت ايدي على حلكي وركضت للسنك ، ماكو زواع حشه القارئ بس تهوع بطني فارغه ..

معدتي صدك اذتني والله كعدت ابجي بسببها هو شافني هيج حجه هسه اروح اشوفلج علاج الها ماطو زين تضلين هيج .. عاف الاكل على الميز وركب سيارة وراح ..

طلعت اني وراه حاولت افتح باب البرة مسدود ، والحايط عالي ، اكو سنادين بصف الحايط صعدت عليهن هم ماكدرت اوصل ..

نزلت اني اصلا صحتي مساعدني ، رجعت لازمه بطني كعدت بصف الحايط ابجي حركه حركه ناار ومستعره كلشي مماكله بس اشرب ماي ..

هيف تاكل بسكت لو تشرب عصاير وشايله اكلها وتفتر بالبيت ، اكو قنفات عليهن دوشك .. عبالك توه مخيط ..

مددت علية ، نوب حارة ماكو كهرباء ، من الالم غفيت مادري بنفسي وعفت هيف لوحدها ، ماحسيت غير عليه فوكي راسي يكعدني ..

فتحت عيوني ..

حجه شبيج هااا لزم وجهي .. هااج اشربي الدوه هذا شوفي ..

لزمته رفع راسي يعدلني ،  فتح بطل ماي نطانيها ، شربت درت وجهي ادور هيف لان صينيه الاكل الجابوها العالم ، تارسه الارض التمن صاير فراش هيف كاعده فوكاه ، فتحت عيوني يااااا هيف ..

واكف فوك راسي حجه ،ماسمعتي لعد من كلبت صينيه من فوك الميز ..

هزيت راسي لاااا ، تعبانه حيل ..

جبت الج عصاير طبيعيه اشربيها من كثر الادويه معدتج تدمرت ، راح يجيب العصير واني عيني على هيف كاعده بالاكل وتاكل ياايمه على هالحاله نوب مابيه المرض اكلني والله ..

شربت العصير ورجعت مددت نمت بمكاني ، ماعرف كم يوم مر ، بس تمرضت بوقتها ، اسمع صوته هو وهيف بره بالحديقه مابيه اكوم ..

جو حار يلعب النفس ، والحشرات تاكل اكل ، هاي البنت اميرة تجي تجيب الاكل وتروح ، رفعت راسي شفته واكف ولازم صونده الماي وينظف بالطرمه  والبنت اميرة لازمه الماسحه وتمسح وياة خطية ..

نوب جر المبردة يغسل بيها ويغسل باليف مالتها ، رجعت خليت راسي ، دنجت هدومي مغيرة ..

مابيه حتى افكر .. اخذت كم يوم وصحيت ، لزمت بطني شكد حتعب بعد ، هاي اولها وهيج الله الي يستر من نهايتها ، عبالك غضب الله حل بطني مو حمل ..

ياارب يسقط درتاح متت من الالم من التفكير ، كلهن التمن علية ، هو كل شوي يجي يحاجيني يشوف شلوني ويرد يرجع لو يحير بهيف لو بالبيت ..

ورة كم يوم ، طلعت بالطرمه شوي العصر ، سمعت صوت كتاكيت صار عندي فضول اشوف شنو هذول ، دجاجه وحده وراها خمس كتاكيت صغار توه يمشون ،

واكو قفص بلابل بي اثنين واحد اصفر والاخ اخظر ..

هو اجه لحاله من شافني كعدت على صبه بالطرمه صافنه ..

وكف فوك راسي خال اديه بجيوبة ، دنجت راسي مارفعتعا عليه ، بس رجليه امبينه لابس نعال ،

حجه ،، راح ادز على الشيخ يجي المغرب يعقد النا ..

رفعت نظري علية .. سكتت ،

رفع جتفة ،، افضل حل هذا عندج غيرة ..

درت وجهي عنه ضايجه هيف تلعب بالبايسكل كبالي ،  ماكلها البك ماعرف الحرمس اديها بيها نقط حمر ..

وحتى اني بيها يعض باليل بس اني اتحمل سوده عليه هيه شلون ..

همست منو الشهود ..

شيخ الجامع ، اكو هنا ابو اسواق يعرفني هم ادز عليه ..

و بعدها عدي ..  باوعت عليه ..

سكت شوي وحجه كومي بالسلامه وبعدها الي تردي يصير ..

شنو اليضمن الي ..

وداعت بحر ، اني انسان عقلاني ميرال شكد حتضلين هنا عندي ، شكد احبسج يعني ، شخص اجبره على العيشه وياي وكارهني هم مااريدها شلي بيها ، كومي بالسلامه وخلي اضمن اكو طفل يعوضني راح بعدها روحي وين ماتردين ، واساعدج هم تكونين نفسج وتكومين على رجليج حتى لو بعيد عناا ..

هزيت راسي وسكتت ، للمغرب جاب الشيخ دخلهم للصاله واني بالمطبخ ، عقد الشيخ وياه شهود وكمل وطلع ، ماطول العقد دقايق ،

فهم العالم الي اجو البنت ارمله واني هم ارمل وكلت ننجمع بالحلال ، والعالم ايدو ويحجون باارك الله بيك ابني ، عفيه عليك يجعها بميزان حسناتك ..

ابو المحل يكله اي شي تحتاجه اني موجود اعتبرني بمكان ابوك ، سلمو وطلعو ..

دخل هو وياه ورقه نطاها الي ، بس تصير فرصه انصدقها ،اذا مالحكت صدقيها انتي انطي نسخه منها لاي محامي وياها مستمسكات ويصدقها الج بالمحكمه ..

نزلت راسي اقراها ..

عقد قران ..

صفطتها بدون ماا اكمل قراتها  ، هذا زواج الثاني الي ، الي اعرفه اسوء واظلم من الاول ..

جريت نفس وعفته ومشيت ، الكهرباء بهل بيت سيئه سيئه بمعنى الكلمه ..

اول ايام شبهه فاقده ماجنت واعيه ، بس من صحيت البك مايخليك تنام ، نوب حاره بس اكو وطني ماكو مولد ،

حجه قرية مابيها مولد ، كم يوم اوصي على مولد بيت يجيبو النا ،

تعبت عدي مابيه ابقى هناا تعبت حيل ..

مابقى شي قرب كلشي يخلص ..

درت وجهي عنه اهفي لهيف بقطعه كارتون ، واتفأف ضايجه كاره روحي ،  كام هو لحيله صعد للسطح ، فتح الباب ، نزل نوب دخل للغرفة شوي وطلع  شايل جرابي الحديد صعدهن اثنين ،

رجع نزل ماعرف شياخذ مره جراجف مره مخاد ، راح ينخمد فوك هذا شنوو .

اجه عليه يشيل هيف حجيت وين ..

انام فوك السطح ماينفع انام هنا نومتيش ماتكليلي ..

كول لروحك شكلت لنفسك من جبتنا هناا بهل الحر والبك ..
شدراني هيج ، منا لباجر اشوفلي حل .. كومي يله ..  صعد الدرج واني وراه ..

صعدت لكيت مسوي ناموسبه فوك جرابي ، جرابي وفوكهن جراجف مثبتهم بحبال الهدوم ..

خوش فكره والله نوب جاب سطل ماي وكام يرش على جراجف دخلت جوه الجرجف نومت هيف على جربايه صدك اجانا هوى بارد حتى البك اختفه ..

دخل هو .. حجيت ووووين ..

انخدم وين يعني …

ماشوفهن جربايتين بس شيكفن ..

ترى انتي وبنتج زايده عليجن جربايه واني جربايه ، بعدين شلون تردين انام بنص الحر والبك شو انتي بلا ذمه وظمير ..

ضليت اباوعله ضايجع ماراضيه ..همست خليت ذمه وظمير الك ، خليت هيف بنصنه ، نامت هيه من شافت ماكو شي يعضها بعد ، جنت ملبستها فالينه وبجامه ، بس هم كصار لازم شي طويل يحميها من الحشرات ،

خليت راسي ، ماكدرت انام ، لزمت بطني ، شكد الحمل هسه معقوله حدخل شهرين ماتوقع اقل ، حتى ماحاسبه ، شلون احسب شذكرني اصلا ،

جريت نفس ، صدك نومه السطح حلوة ، هوى بارد منعش بس صوت حشرات مزعج بشكل ..

ماكدرت انام ، ميت الف فكرة بالي  ..

فزيت على صوت .. حجه كاعده ..

توقعت نايم بس جان كاعد ، مايتحرك ثابت بمكانة ، شتريد ..

رفع راسه حجه هسه اني رجلج تصدكين ..

شنو تغير يعني ..

سكت شوي رمش بعيونه صافن على هيف ، صح حقج ماتغير عندج شي بس اني تغير ، تغير هواي ..

سكتت اباوع علية ماريد افتح مواضيع وياة اكره الحجي وياة ، دوم يغثني وياذيني ، ضليت ساكته ماريده يكمل دانخمد ..

باوعلي .. جان لازم يصير هيج من سنوات ، وهيف جان لازم تكون بنتي مو بنت ذاك ..

همست .. اله اسم صاحبك بيبر ..

علا صوته وترد ،، جاااان صاحبي ، واسمه فرات ، اسمه الحقيقي فرات ، نفس الاسم الي انسجن بي لان كتل عمه ، نفس الاسم الي هجج بي امه لان تزوجت ،

قاطعته نعسانه كاافي ..

نتر هذا شاطرة بي تتهربين ، تفتحين جرح وتكولين شعلي ، والله انتي تشبهي لفرات ، خنوسية وبيج اذى اعرفج ، بس ماتبينون ، فجأءه اطلعون اسوء مابيكم ، وتخربون الاول وتالي ..

قاطعته اريده يسكت ، مااذينه احد ..

ابتسم ، تحجين بصيغه الجمع ..

دمعت عيوني ، شتريد عدي ، ناوي تغثني ولا يهمك انغثيت ، الغصه وكفت هناا اشرت على صدري كااافي ..

عدل نومته سند جسمه على ايدة ، عرفت ماناوي يعدي اليلة ، باين هاجت علية المواجع ويريد يطلع حركته بية . 

بيش اذيتج ، كوليلي ..

رفعت حواجبي ، هم اله عين والله يسأل ماجاوبته ..

احجي …

نعسانه اريد انام ..

ليش مفضلته علية ..

منو انت وتقارن نفسك بي ..

بعدج تحبي موو ..

ماحجيت ..

بعد كل الي سواه ادافعين عنه وتحجين باسمه ..

ماانكر عيشني اميرة ، صح شغله غلط وجذب علية ، بس حبني ..

اني هم ..

هزيت راسي … حبيت نفسك اكثر ، بيبر لو بس جان اله ايد بسالفه اهلي والله مايفرقني عنه حتى الموت ..

وشغلة الاعوج ..

جان ناوي يعوف كلشي ، بس جان محتاج وقت ، وقت يرتب وضعه .

ضحك .. ليش هو بكيفه يعوف ، اذا هو عاف هم ميعوفوا ، مادام دخل ايده معناها انجر منها وطمس وياهم ، كعده وياه الجماعه كعده وحده احسبي صار اخو كحب… ، اللعب وياهم مو سهل ، وشغله مو على المزاج ، فرات دخل بيها للعمق ، واله حصه ، مايكدر يعوفها لو شما سوه ..

وانت نفس الشي .. نطيته ظهري انام ماريد احجي بعد .

اني غير ، ماكو شي باسمي ، ولادخلت احد من عايلتي بهل شغل ، دخلت خفيف. وطلعت خفيف ، بس طامه عند الي دافعين عنه ، غرك نفسه وغرك رجل خالته وخالته واخوو ، شفتي نتيجه بالاخر ..

مارديت ، رفعت ايدي امسح دمعتي الي طفرت من عيوني ، شكد زعلانه وحاقده على بيبر ، بس شكد انقهر من يحجي علية لو يذمه ، يمكن لان ابو هيف وماريد هيف تتيتم .. ماعرف اله شي بعد بكلبي وهيج انقهر ..

بوكت ضيك اول ماافكر بي وبنفس الوقت اخاف منه ومن العيشه وياه ، اريد استند وامن باحد بس ماكو احد كفو ، حسبت ربي عليهم ،يكفيني شرهم واذيتهم ..

، ثاني يوم اجت اميرة ، جايبه الاكل ، فدوه لعينها شكد تنحب ، هيج تحسها فرحه والوجهه يضحك ونظيفة وعقلها جبير جنها مره صغيرة.  عود من تشوف ماعون لو طاسه على سنك تغسلها ماتخليها ،خاصه من جنت مريضه شفتها بعيني غسلت مواعين الاكل على السنك واخذتهم لبيتهم..

ملابسها كلش حلوه وتعجبني ، فستان كلوش وياه شرايط بيض ينشدن ، وشعرها دومه ظفاير اثنين .

حجيت وياها منين الج هذول الملابس ..

ردت تضحك وتفر بالثوب متباهيه .. امي خياطه .

هااا حلوو تخيط لهيف وانطيها تعب ايدها ..

تردين منهم ..

هزيت راسي اي ، بس اني ماعندي قماش ، عند امج قماش ..

اثيب الج القماش عدنا هووواي.

جيبي دشوف واختار ، ردت هثه .. رديت اي ..  طكتها ركضه لباب البيت ..

، التفتت واخترعت بنفس الوقت .. اسم الله الرحمن شبيك خرعتني طلع صوت ، كح شي  ..

ماحجه ، واكف وساند نفسه على الحايط ، راحت وجابتهم واجت هو على وكفته ..

خالتهم بعلاكه جبيرة ، كعدت بالارض وفرشتهم تشوفني ، يمااا متت على هالبنيه اكثر من القماش ..

شلون دلاله ، تكلي ثوووفي ، هذا اثمه كشمير امي تكول ، اكو ثيني واكو ايطالي ياهو تردين ..

لزمتهم باردات ، نقشتهم حلوه قماش ساده وبي ورد .. واحد اصفر والورد الي بي وردي ، والقطعه ثانيه ورديها وبيها فراشات سمائيه .. وطلعت البقيه من العلاكه ..

اختاريت اثنين ، كتلها وحده تخيطها لهيف بجامه وقميص طول باليل تلبسهم ، اخاف عليها من الحشرات ،وهذا تخيطه مثل مالتج بس على كدي ضحكت ..

ابتسمت مثل ماليتي ..

اي ليش مايصير ..

لا يثير .. والبنتج تردين ..

التفتت على هيف ، سويلها من هاي القطعه كم واحد .. كعدت تحسب بهيف بايدها اشبار ، ضحكت على حركتها ، وهيف تدفع بيها ماترضعه .. اندارت علي ..

ثوو اوكفي دشوفج ..وكفت لحيلي حجبت كولي لامج البس ميديم ..

اي انتي بكد اختي رويدا ..

خوش شومت تخلصهم ..

مادري اكوللها ويله ..

تردين الفلوس هسه ..

اكول لامي شكد ويله ..

ماشي ..

راحت هيه ، ثاني يوم اجتي ، تكلي امي تكول يكلفنها ٤٠ ، ابتسمت اني ، تدللين ..

روحي لعدي تلكي بالحديقة اخذي منه ٥٠ ،

لاا بس ٤٠ امي كالت …

الج ١٠ ، روحي اخذي منه ٥٠ كوليله ميرال تكول خلي يطيج ٥٠ ..

ضحكت وراحت تركض .. باوعت الها اشوف ينطيها لو لااا ، كالت اله ونطاها رجعت لمكاني ،

هو دخل يباوع بوجهي ماحاجيته ، اخذ عود المشفة و دخل للحمام ، شوي وطلع بطرك البرموده ،  يفتر  بلا حياء عابت لوجهك ..

دخلت هيف اسبحها من اجينا لحد هسه وهي تعلب بالطرمة بالطين وتشلع بالزرع لو تركض وره الدجاجه وفروخها ،

شعرها متروس وصخ كعدت بالحمام بالساعه افتح بي وهي تعيط ماترضى ، غسلت الها ولفتها حيل طلعتها جديدة ، ولفيتها بالمنشفة وطلعت ..

بطلعتي لكيت عدي واكف ويمه بنيه ، جبيرة مو صغيرة .. ماعرف دتكتب ، مدنجه بيدها ورقة ماعرف دفتر ، دنجت تكتب …

صاحت هيف توخر المنشفة على صوتها هو التفت شافني واكفه وشايله هيف ، حجه واشر الها علية  ..

وهي  ابتسمت اله  ،واجت باتجاهي ، شايله بيدها دفتر ماعرف بعد شنو ،  هو طلع للطرمة وهي شو عينك عينك دارت الركبه عليه لحد ماوصلت ليمي وهيه دايرة وجها عليه ، لحد ما طخت بيه يله انتبهت اني واكفه داباوع عليها ، نزلت نظري على ايدها بيدها دفتر وشريط قياس ..

حجت هااا جيت اخذ قياسج ..

رفعت تك حاجب هو منو انتي ..

اني .. ضحكت اني رويدا .. عرفتها اخت اميرة الي شبهتني بيها غددددي ..

حجيت منو رويدا ؟؟؟!

اخت اميرة ..

منو اميرة ؟؟!

صفنت بوجهي ، بلعت ريك هاي الي تجيب الكم الغدا والعشى صبح ومسا ..

ليش هو منو يجيب النا اكل ..

فتحت عيونها مخترعة ، حجت انتي مو رايده قطع قماش وتردين نخيطهم الج هاي اميرة مافهمتنا زين وامي دزتني ..

حجيت اني رايده قطع قماش ..

سكتت شوي حجت اااي والله ..

ابتسمت هااا اذكرت دتعاي جريتها من ردنها حيل تعااي ادخل دنسولف ، خليت هيف على القنفه وطلعت الها ملابس هي على وكفتها ، عدي شافني من جريتها ودخلتها للغرفه ثواني ماطول واجه وكف باب الغرفه ..

رفعت راسي شفته واكف دنجت البس الهيف وهيه التفتت عليه تبتسم ، كل شوي عيني تنرفع عليها ، طالعه الكذله من جوه شال الاحمر وتفر بيها ..

حلوة البنيه سمره والخدود منفوخه تجنن سبحان الله ، من هذني البنات الخشنات .. ليش اميرة الجنية تكول بكدي والله تطبكني ثلاثة …

خلصت لبس لهيف وكفت تقيسني بشريط القياس .. هو واكف يمسح بلحيته بجف ايدة ..

مقاس جتف ٣٨ .. محيط الصدر ٩٠ .. حجه متاكده محيط الصدر ٩٠ ..

نزلت راسها

اي والله ٩٠ ..

خاف غلطانه شو مبين اكبر ..

ضحكت مو لان لابسه شي عريض مبين اكبر ..

حجه من غير مايبتسم بوجها اقصد لاسوين دشداشه ضيكه هيه ترضع ، سويها نفهه اكثر من ال٩٠ ..

اي اكيد امي تخلي اربع اصابع فوك القياس الاصلي .. امي واكفه ورافعه ادية بملل ،

اصلا بطلت ارضع من فترة ، صدري يبس من القهر مالته ،

حجت الخصر ٧٣ ..  الورك ٩٧ … ليش متاكلين ليش،هيج ضعيفه ..

مااشتهي ..

ليش الاكل الي اندزه مايعجبج ..

حاجاها عدي خلصتي ..

شوي بعد بس ردن بقى .. قاسته طول ٦٠ والعرض ٣٣..
كملت  دنجت تكتبهم بالدفتر ،  نطت كفاها لعدي  ، مادنج ولا دار وجهه ابو عين صلفة نوب نزل عيونه يشوف زين ،

عوجت حلقي قرفانة ، باوعلي يأشر بيده هالكبررر على حجمه ، صخااام بوجهك اي والله رفعتها من جتفي شووو داكفي داشوف شنو كتبتي ، خاف غلطتي بالقياس ..

لا وين غير شغلي هذا ..

جريت دفتر والقلم واني كتبت الها ونطيتها دفتر ، هاهيه ..

حجت هيج سبوع واجيبهم الج ..

ليش تعبين نفسج دزيهن بيد اميرة ..

لا يمعوده اريد اطلع محصورة من البيت هم اجي يمج باين لوحدج نتسلى سوه ..

همست اي هلا بيج ..

طلعت من يمي ، والله مابالغ فاتت من يم عدي و طخته بوركها هو اندار عليها رافع حاجبه ..

اني اشوف مو عمية فاهمه عليهم ، كبر شهل اخلاق عوووذة بس ماحجيت الله يجفيني شرهم ماعرف شلون ناس. .

حجه شفتيهااا تحرشت بيه واني ابن بيوت مدافعتي عني هااا ، ماعندج غيرة علية ، تتحرش بيه وانتي ساكته شنو من مره انتي ..

ساعه تكلي جسمك حلو رياضي ، ساعه تكلي لحيتك مطلعتك تخبل ، ساعه تنطيني كفاهاا .. ساعه اطخني بطي…. بقت بس مالزمت ذاك وفضتها ..

باوعت عليه بطرف عيني ، كل هذا كالته البنيه وسوته ..

لعد ماشوفين عمية ..

لا خليت النظر الك ، وانت اكلت كفاها اكل بعيونك شفتك بعيني ، حرام عليك تباوع بهيج نظره لبنات العالم ..

يابنات عيني هاي كارثة توديج للشط وترجعج عطشانه ، اجت ساعه زمن خفت على شرفي منها ، وانتي صار مكابلج شهرين ، بالجذب ماابتسمتي بوجهي ، عبالك كاتل ابوها لو بايك ورثها ..

وانت الصادك اجيت تبوك ورثي ذاك اليوم ..

ردت احافظ علية لا تلغين لغوة زايده ميرال ، اذا عاجبج يضل بيد العمال يبوكون بي طبج مرض  ..

ماحاجيتة ،

ثاني ، يوم مو على بعضة ، الاكل يوصل لباب ويطلع هو ياخذة ، كل مره اميرة ادخلة للبيت ، اليوم لاا مجرد ماندكت الباب طلع بسرعة ، اخذه ودخل وجهه مخربط ..

حسيت اكو ان بالموضوع بس المشكلة اني مو فضولية ولا غيورة ، حتى لو يلعب بذيله شاطي باطي مااهتم اصلا افرح اخلص منه ، بس شغلات داشوفها واحسها مااكدر اغلس عليها ،

عافني وراح كعد بالحديقه لازم جهاز والجكارة ، وكل شوي يرفع راسه يشوف اني جاي اسوي ،

المغرب ، بدل وكشخ وتعطر ، استغربت وين يولي هذا …

عيوني عليه هو يرتب بنفسة ، اندار عليه لكاني اراقب بي …

حجه هو يعدل بياخه قميصه حطلع جوز اتاخر ..

وين دنيا المغرب …

رايح للجامع ..

صفنت ، شسوي بالجامع .

شيسوون بالجامع رايح اصلي العشى ..

الدنيا المغرب  ،  بعد للعشى ..

ميخالف اروح مشي بيها اجر وعافية ..

وربي ولاصدكته بس سكتت شكوله قابل انت جذاب هم ينبح علية شيسكته بعد ..

رجع رش عطر للمره الثالثة وطلع يغني انا وياج يام شامه ، عدكم سطح وعدنا سطح  ، لا وصلت صلاتك يالجذاب توصل للسكف وترجع تلزك بوجهك الضال ..

ضليت اني وهيف كاعدين بالطرمه على صوت الحشرات. بس الجو حلو بارد ومنعش ، دقايق واجت اميرة حشة مو اميرة دكت الباب  دب دب دب ،ركع عبالها طرشان احنه .. صحت منو ..

ردت اني ..

عرفتها من صوتها بس،حبيت اشاقيها منو انتي ..

اميرة ..

اميرة منوو ..

اميرة ديانا ..

ضحكت … هجم بيتها للتنفخ الباب مقفول عيني اميرة ديانا ..

اطفر ..

شنوو ..

اطفر من فوك الباب ..

تكدرين ..

ماردت بس اسمع تشلبه وتشخط بالباب ، كمت لحيلي صخام هاي يمكن صعدت ، كمت ركضت للباب دحاجيها بعدني توه وصلت وطلعلي راسها ابو ضفاير من غوك عطت عيطه خرعتني ..

يمااااا ..

ضحكت شلونج ام هيف ..

هلا عيوني شجابج ولج دنيا ليل ..

احنه نسير على جواىين شوكت منريد ..

عبرت تك رجل .. خفت لاتنشلخ .. حجيت دنزلي يحظي لاتوكعين .

دصيحيلي رويدا امي اصيحيها ..

يارويدا ..

اختي شبيج خاله ليش احسج مطفية ..

هااا ولج ماكو هناا .

يااا غير كالت لامي اروح يم ام هيف تضوج لوحدها من رجلها يطلع وامي كالت العا ماكو طلعه اذا ماتغسلين المواعين العشا ، بس الجذابه غسلت نص وبقت مواعين التعلولع عليه ياااابه بالقران مااغسلهن صيحيها تغسلهن ..

هي تحجي واني صفنت ، رويدااا وين يمييي ..

رفعت راسي على هاي الجنية الي مشلبه فوك الباب وفاركه رجليها وطالعه بجامه من جوه ثوب ، حجيت اكول اميرة ..

هااا ..

رويدا راحت ويه عدي ..

يااااا وووين …

مااعرف بس هو توه يطلع وتلكته بالباب واخذها وراح ووين مادري صحت عليهم مااندارو عليه عبالي وصلها الكم يعني مارجعت للبيت ..

وكفت البنيه صاافنه هاااا لااا ..

دروحي كولي لابوج خاف اختج انخطفت ليش مارجعت لهساا عزاااا خاف صار بيها شي ،

هااااا فكت حلكها مخترعة ، وطفرت من فوك الباب للارض وبس اسمع ربده بالارض وصاحت تبجي ..

عزاا العزااج ميرال ولج هااا شبيج اميرة ..

طخت تكسرت خاله ام هيف ..

سوده عليه يعمري دكومي بيج تكومين ..

جن انكسرت رجلي خاله الحكيني ..

ياايمه شسوياج لج الباب مسدوده ..

طفري من الحايط يااخاله ..

لج شطفر هو اني بيه حيل اصعد الحايد اطفر ..

لتد اروح زحف لبيتنا ..

انقهرت عليها والله ، كلش اذتني من سمعتها تبجي نوب كالت اروح زحف كعدت ابجي يم الباب عليها ، ولج رحتي لو بعدج ..

مالها صوت ..

اميرة حبيبتي وينج ..

هم ماكوو ، صخام شلون حظ بااربي ، زين اني ليش حجيت هيج على رويداا ،ليش حركت عليها والله حركتي ابد مو حلوة وحرام علية خطيه ، بس هيه وين ليش تجذب ، وتذبها براسي على ان اني يوم ام هيف ، حجيت الحق اني مموجوده يمي ..

زين ليش ذبيتعا براس عدي وحركت عليه ، ياااا واذا هدو علينا ..

بلعت ريك ليش تصرفت هيج والله سالفه واكفة ، بس ردت اضرب عصفورين بحجر هم اذي عدي وهاي هم تتادب ، بس ياادب هذول عرب غير يموتها خطيتها بركبتي ..

يتبع ..................

بنات ترى صايمة الله يشهد والعيد قرب ، مابيه اكتب اكثر من بارت هنه اصلا مابقى غير كم بارت واختمها .. مع هذا دانزل الكم البارت من وكت  .. جوز البارت الثاني يوم الثلاثاء الجاي مو السبت ..

البارت بلا تعديل اي خطا املائي او خطا بالاحداث نبهوني عليهن فدوه ،

احبجن 💜💜