رواية قاع الشياطين الفصل الرابع عشر 14 - بقلم اسماء ديمير

.................☆البارت الثالث عشر ☆................

#قاع_الشياطين(البصر والبصيره)

#بقلم_أسماء_ديمير

قال احدهم لميرال ..

‏دائماً‏ أسمع في الليل
خطى مقتربة
‏وتصيرين منافي
‏تصيرين سجوني
‏حاولي أن تقتليني
‏دفعة واحدة
‏لا تقتليني
‏بالخطى المقتربة ...

حجت تالا بريبه ياريتني مااجيت ليش هو انتي ميرال يجي من وراج غير بس الضيم خيه ..

-بلعت ريك ولج شكوو ...

- امه لا اله الا الله كلها هنا ، اعتقد بيبر مالتج لام اهل بغداد كلها اليوم  ..

وكفت مارضيت اتتحرك ، حجت نانه يله امي شبيج ..

بلعت ريك و جهي خرط ، حسيت على رعشه دبت باديه ، همست تالا هاا جن خفتي شبيج ..

تالا ...

نانه ضربتني بجتفي حجيت امشي شبيج جنج هايشه عشره و بركت بالطين ، 

-ردت بربج هذا هم تشبيه ، ابتسمت جريتها مشت وياي بتردد ..

وكفنه باب الصاله محد انتبه علينه من كثر الصوت و الضوضاء مالتهم ، ناس تتشاقه و تتضارب و عواد كاعد رجل على رجل شايل جكارته بيده و يباوع بتك عين ، و ايلاف بصفه ، بعيد عنهم مرته بحظنها ابنها ..

وخالتهم كاعده على صفحه تحجي ويه رجلها وبيبر ، و توم متكامشين .. هم واحد سمعت اسمه دانيال ، 

و عدي ابو كذله لازم جكاره و يجر بيها حتى وجهه ماينشاف من دخانها …

نانه حجت السلام عليكم ، ، اغلبهم التفتو علينه ، عم الهدوء ، رد بيبر وعليكم السلام ام ساري تفضلي ياهلا ..

حجت عمته خير شكو ليش داز عليهم ..

كام لحيله ، رد هسه تعرفون ، توجه علينه بطوله فارع و كشخته ، بنطرون القماش و القميص ابو الردن الطويل ، كافه للعكس ، مد ايده لزم ميرال من زندها وجرها عليه  من عندي بلا استأذان ، هيه مرتبكه امبين من بؤبؤ عينها الي يفتر بتوتر …

اندار عليهم يحجي ، جمعتكم كعايله ، واصدقاء واحباب لسبب اليوم  ، 

حجه تفضلي ام ساري اكعدي ليش واكفه ، قرب ميرال منه ، مدت ايدها تبعد عنه بس هو جلب بيها و لزكها بي ، حجه جمعتكم حتى اخبركم اني نويت اتزوج ..

كلها صاحت ااااي بالخير التوم طلع صوتهم  بالمباارك دومك عريس انته ،

اخو يضحك و يكله ناوي تكبر العايله شنوو ، احنه ناقصين ، وضجت التبريكات ، والضحك ، حجه صديقه عدي، ماعرفنه منو العروس والا اني شاك بوحده …

ردت عمته عاقده حواجبها تباوع لميرال .. وتزوج منو على الخير ..

حجه بثقه يباوع على ميرال ، اشر عليها ..  ميرال …

التفتت على ميرال اني فاكه حلكي ، هيه جن جفلت نزلت نظري على ايدها ضغطت على العصا بخوف ، متوتره ، عم الهدوء ، هدوء مرعب ومريب ، وكانو ماكو بشر بس صوت النفس ، تفاجأو لدرجه كانو نسو الكلام و نطق كلمه مبروك ، او يمكن عبالهم ديشاقه ، 

اني عيوني على اهله الي صفنو بوجه بلا رد ، عكسه هو احتظن جتفها بثقه و مبتسم يقدمها الهم كعروس المستقبل …

عدي ابتسم مستهزء  نفخ الجكاير دار وجهه عن الكل  ، رمشت بهدوء ، حجت عمته بهدوء ليش هيه ..

رد هو ليش مو هيه شنو الغريب ..

ردت بنت خالته ، ماتفيدك ..

خزرها بعيونه و سكتت ، صاح اخو عواد قطع الصمت والكلام الي يبث الزعل وعدم الرضا ، بالخير حبيبي ، شايف كل الخير ،

بشار طك اصبع اكو عرس قريب هله و نركص ركص للصبح ، 

- حجه دانيال اكو شرب بالعرس ، اذا اكو اسوي الواجب وياك لاسبوع كامل …

- ضحك بيبرس ورد لا عرس محترم هذا روح لاهلك يصبولك احنه ناس مسلمين ..

-فديتك يالتقي بس اذا ماجبت اني اوزع بيره على شرفك ..

ميرال مالها صوت ، احسها مصدومه ، ضغط بيبيرس بجف ايده على ايدها حجه هاا حبيبيي شبيج ..

ردت فعلها بارده ، رمشت بهدوء ضايجه ، اني واكفه بصفهم اتفرج ، جنهم سينما نانه كعدت على صفحه مدنجه مانطقت بس وجها احمر خاله اديها بحظنها تفرك بيهم تريد تنفجر …

الاغلب تفاجئ الاغب باين ماعجبه بس ليش شنو سبب ، نفسها ميرال وجها خرط ، اعرفها معجبه بي بس جوز ماتوقعت بهل سرعه تصير و يطلع انسان صادق وياها ..

اجت خالته باستها بهدوء و حجت الف مبروك بنتي ، هزت راسها ميرال ساكته ..

باركلها ايلاف و ديما و هيه خانسه ، تقدمت عليها همست شبيج يحبج ودليل على انو رايدج صدك ..

سكتت ، باركولو ناس وناس فضلت الجلوس والمشاهده ، كعدنه مقابلهم ، حجه بيبر صرتو جزءمن عايله منا وهيج انشالله .. 

اخو دار وجهه ساكت ، خالته و جها انكلب ، ابو زياد حجه اي شخص يدخل الفله هو من اهلنه ، و هسه صرنه نسايب تقوت الروابط يعني ..

الي عدنا عدكم والي يزعلكم يزعلنا ، مدام بيبر قرر يدخلكم بينه معناها انتو اهل ثقه و ناس تشرف ..

اجت وسن ضيفتنه ، قدمت للكل ، بيبرحجه ويه نانه ، ام ساري ..

التفتت عليه نانه وجها باهت ، ها استاذ ..

رد بسرعه لا بلا استاذ صرنه اهل ، منا وجاي صيحيلي باسمي و شغلج هنا تلغي ..

-ردت لا يمه ليش ..

ابتسم يطمنها اذا قصدج على الراتب ، و شغل فابنج ساري راح اشغله و يانه بمكتب العقار و يستلم راتب يعيشج و يعيشه ، فشغلج هنا افضل تتركي …

سكتت نانه وجها خارط ، ردت ميرال عنها ، هيه تحب تشغل بنفسها ، ساري عنده دراسه ماراح يكدر يوازن بين المدرسه وشغل ويه ابو حمد و المكتب   ..

رد واني اهلي وناسي مايشتغلون عند احد ، ابنها رجال ويشتغل ويصرف عليها ، اريد راحتها هيه مو بعمر شغل وتعب بعد ..

سكتنه وماكدرنه نرد علي ..

هو علنها منا جلب بميرال بيدها مناا ، احس عينه كوويه بشكل ، هيه خنست كانو السانها انبلع ، هو عادي ولا كانو ، علن خطوبته بيها و جلب بيدها كبال الكل ..

كل شوي يندار عليها شبيج حبيبي ، لو يباوع على شفتها لو شعرها بتركيز ،  عمه تادب شبيك ملهووك بعد شوي يمطكها كبالنه ، دخل يسويها وربي اعضه من خشمه .. شهل جرأءه ..

، اني عيوني عليه اباوعله بريبه ، شلون جن شي واخذه اله بدون مقابل ، حق مباح ، لا خطبه لا صخام بوجهه ..

لازمها من ايدها وحاصرها بصفه وهيه ساكته ، اختي واعرفها من تخنس ، هدؤها جاي من خوف و توتر ، ماشفتها ضحكت لو ابتسمت …

حتى من خلو الاكل ، حجه بيبر اني وياها نفس الماعون ، و رفع الشوكه يخلي بحلكه ، تاكل وساكته …

رفعت راسي على هذا الوسيم الي ترس الصاله بدخان جكايره ، عيونه عليهم يراقبهم و جهه مزرك ، نوب شلون حلوو ، خرب بلشته الي طلعت عليه ..

من جنت طفل لعد شلون جان شكلك ، عيونه كتاله فلك اي والله ، بيده محبس و مزين معصمه ساعه راقيه ، و شم باصبعه الصغير دنجت اكل ، رفعت راسي مره ثانيه استرق النظر اله ..

درت وجهي ايلاف صافنه عليه و تلوك بالكمه ، هو مدنج ، انداريت على ميرال ، ساكته كتله من الهدوء ، ذاك لازك بصفها ..

ابتسمت بيبر مو وسيم و جه عادي ، ملامح عربيه حاده ، لحيه خفيفه بس عنده جسم رياضي مميز  ..

لليل كلش نانه حجت نترخص احنه ، كمت اني وياها و هذا بيبرس جلب بميرال حجه اني اجيبها اخذو راحتكم ..

حجت ميرال لا تعبانه اروح وياهم افضل ..

جلب بيدها لا ضلي شوي عندي وياج موضوع ، تقدمت عليه جريتها منه و حجيت عدها دوه لازم تاخذه عن اذنك يعني …

حجه هاا كام لحيله دوه شنو ..

ردت نانه تتهرب ، لعيونها ، لعيونها ، جرتها و مشت بسرعه ، خافت لا نوب هم يلزمها ، عفتهم و لحكتهن عووذ لزززكه خما لزكه ..

الدرب كله ميرال ساكته بس دخلنه ونسدت الباب الملحق و عاطت نانه خرعتنه ، ميررررال ؟؟؟!

ميرال جرت نفس مفزوعه و حجت ، افهمج والله بس افهمج ..

مانطت مجال نانه ، تصيح يااا ولج يريد يتزوجج شهل  حجي،  شنوو خراعه خضره اني ، و هو شنو زواج  على بالج لعب جهاال ، ميحترم هذءاا شافنه نشتغل عده اخذها برخص ولج شمسويه انتي ..

ردت بهدوء ممسويه والله ، حاولت تكعد جريتها للقنفه ..

حجه ساري منصدم زواج شنو منو تزوج ..

امه صفكتت بيدها هااك استلم الي جدامك تريد تتزوج ..

نترت ميراال :- منو كلج  اني مثلج تفاجأت ..

- تفاجئتي موو شتتفاجئين يما وانتي صار ايام واشهر دك سوالف و موعدات وياه ..

انداريت على ميرال مدمعه وترجف ، حجت ماسويت شي غلط و طلب الزواج مني وكلت افكر مانطيت موافقه والله ، كلت اخذ وقت  ..

-حجه ساري منو طلب زواج منج ..

-حجت امه استاذ بيبرس ..

- رفع حواجبه ورد طلبهاااا ؟؟! 

هيه ساكته بس نانه كلبت الدنيا علينه ، ردت يريدج برخص لدرجه خلاج كبال امر الواقع ، عبالك لعبه و حصلها حصرنه كبال الكل ، لا خطبه لا مثل الاوادم يجي يتقدم .

ليش هو شنو يعرف عنه حتى يجي يتقدم الج لو هو عباله قرايه فاتحه لو تكولين اله اقبل بك و بعدها باخذج لغرفته وصرتي مرته موو ..

بجت ميرال كبل ، نانه ماسكتت جانت معصبه حيل و ترجف وتحجي  ، ردت ولج والله مسترخصج ودليل حتى ماكلج اجي واطلبج ، ولا اجه خطبج بنفسه ..

لا اخذنه على عمه عيونه ودز بنت خالته تجي تصيح النه ، و ياخذنه لبيته ، و كعد يعلن لاهله عن رغبه بيج وخلص رايج وووين ؟؟؟! سالج مووافقه لااا؟؟!

ماسواها ..

ميرال تبجي خاله اديها على وجها تبجي و اسامه حاطن رجلها يحجي اااش لا تبجين ..

  ساري وجه احمر، حجه نطلع منا ، نشوفلنه مكانه غيره و خلي يولي انعل ابو لابوو ، ميرال مو بكيفه يزوجج افتهمتي ،

نترت بيهم اني ، عوفوهااا شتردون منها ، بكيفها حياتها وهيه حره ، منو كال تحجونه صح جوز هو مافكر هيج جوز مو قصده ، انداريت عليها رفعتها من ايدها  ، حجيت اسالي باجر ..

همست اني هم مو راضيه بس ماكدرت احجي ، خفت واستحيت ..

رديت اني السالفه مابيها مستحه ، الزمه من ياخته و اكله لك تخطب مثل الخلك لو تنكلع ...

اخذتها للغرفه و همه بره ناار كبره ساري يتهدد خلي يولي ، مارضه تتزوج ميرال ، مو مال زواج كلش مو سالفه  بيبر بس زواج تعب عليها ..

  نانه تحوم و دردم بعصبيه ، حجيها جان مرخصج ودليل حتى ماخطبج عباله و كاله من غير بواب ، لو عباله بس عقد وخلص صرتي اله شنو لعبه وشتراج لو استصغرنه لان كاعدين عنده و نشتغل عنده ..

هي هيج الاصول ، وين العادات وين التقاليد ، اذا رضيتي بي منو يضمن الج حقوقج ، اني ماخاله شي بجيبي بس انتن امانه ، حتى ابرء ذمتي كبال الله سبحانه وتعالى  ..

كلامها منطقي ، بس جوز تفكيرنه غلط جوز مو قصده كلشي وارد ، نمت اني و ضلت ميرال كاعده صافنه مقهوره  …

احس بيها ممرتاحه برغم نطق بالسانه كبال الكل وحجه اريدها ، بس هيه ممرتاحه يمكن حست كلام نانه صح او يمكن يكون استعجل هواي وهيه ممتحظره او مامستعده تدخل حياتهم …

نمت اني ، و ثاني يوم كعدت مالكيتها بمكانها ، من طلعت لكيتها هيه ونانه بالمطبخ يتريكن ويسولفن بهدوء ، ياا باين هدات العاصفه الرعديه يااا شبيها لعد البارحه ذبت علينه حتى حالوب …

نوب نانه تتقرب من ميرال تهمس يم اذنها و تاشر الها مثل مافهمتج يمااا ..

ميرال تهز براسها اي والله حتى اني البارحه مانمت ، هم ماقبل بهل حجي بس جنت اريد وقت افكر حتى الكه العبارات الي تعبر عن الي بداخلي حتى ماندم بعدين ...

ابتسمت عيوني تفتر ادور على ساري ماكوو ..

صبحت عليهن و مشيت ادوره ، الصاله فارغه و الفراش ملموم وخالي على صفحه ، بس اسامه مدد و نايم على ظهره و فالينه صاعده وبطنه طالعه ..

مشيت غطيته ، حجت اسال ،، نانه وين ساري ..

ردت يم ابو حمد بالبستان ..

جريت نفس ، كعدت اتريك يمهن ، شوي و كمت جريت جهازي فتحت الفيس و شلت الحظر عنه وراسلته ..

وينك تعاال سامحتك يله … ابتسمت .. انتظر رده ، هو ماكو ، 

دخلت ميرال حجت حذائي الجوزي و ينه ..

كمت طلعته الها ، كعدت تلبسه ..

لابسه فستان بهاري جوه ركبه و حذاءها فلات ، حجيت اني ، الملج شعرج ؟؟

ردت لاا ، دنجت تلبس نزل شعرها البني فاتح لارض ، وتبعثرت كذلتها الناعمه ، خلصت وكامت ، جرت نفس ، ميرال من بنات صاحبات طول متوسط ، بس ناعمه ، درجه نعومه باينه عظام الي تحيط الرقبه ، 

بمعصم رشيق ، وجهه منحوت ، بس من تبتسم تبين الخدود ، جمالها كانو جمال ايطالي على كولت بابا المرحوم …

 لزمت عصاتها وطلعت تتمشى ، طلعت بره …

فتحت البرده شوي اشوف و ين راحت ، توجهت للفله ، خفت عليها الصراحه ، بيبرس مبين من الاشخاص الغامضين ، الي يفرضون رايهم ، صح ميرال هم مو هينه و ذكيه حيل بس  احيانا الحب ممكن يعمينه..

مثل ماعماني بذيج الفتره بالضبط اخذني الطيش ويه ساري ، الي مو عارف الي تراسله اني ، تجاوب وياي ، يمكن اعتبرني خلوه ، يفرغ بيها طاقته السلبيه ..

او الجانب المظلم الي عند كل بشر ، محد يشوفه مايظهر غير بس بالواقع الافراضي او بالاحلام ،

شوي واجت بنت ابو حمد الي اسمها غدير عود تدرس وياه فرشو بصاله صارو عود شطار وفتحو على الدراسه  ..

لان هيه هم اعدادي ، نانه ماحجت شافتها عادي ..

بس اني لا اخذت الجيس الحب و كعدت مكابلتهم ..

بنت رفعت عيونها عليه مستغربه نظراتي رفعت الها حواجبي وخليت رجل على رجل خازرتها  ..

بلعت ريك هيه متوتره و مستحيه ، دنجت راسها تكلب بالكتاب ، لابسه دشداشه طويله و اردانها اطول ، و شال فوك راسها ..

بس رغم هذا مبينه مو راحه مدري اني كارهتها ..

 اسلس حب واشمر باتجاها و وفوكاها  هيه توخر بكشور الحب على شالها و ثوبها بهدوء بلا رد ولا استنكار من جهتها ..

لحد مانتر بيه ساري و سم انتي شنو ، زباله احنه زباله و شمرين عليه وصخج  ..

درت وجهي و همست بضجر حشاها الزباله على الاقل مدور لباست* داخليه مثلك ..

- حجه شنو شكلتي ..

- رديت عاوجه حلكي اكول ساااري مو حلوه نتعارك و ينفك الساني عليك تضيع هيبه ترى ..

- دار عيونه على غدير الي فاكه حلكها تتسمع دنجت كبل من التفت عليها ، بلع السانه و اشر اليه بسيطه ..

جريت عيوني عنه جرر، نوب كعد اسامه بصفي و هم يسلس و نشمر بالارض و فوكهم ..

اجت نانه مدت راسها وشافت الارض داعيه مزبله ..

حجت بعتب تالاا شنو هاي منو يلمه ياامي ..

رديت :- عود اني االمه والله ..

دكومي هسه كومي اروح ، اشوف اختج شو بطت ..

كمت وراها اجيب مكرافه والمه ، حجيت نانه صدك عود راح ميرال تتزوج .

اندارت عليه و جها باهت و خايفه والله يايمه مادري لو علي مازوجها بس اختج باين تحبه ، 

ابتسمت خطيه نانه هيه شافت بحياتها ..

-ادري يمه وحقها ، بس والله مسؤليه وكلبي يوجعني حملجن يايمه صعب ، جنت اتمنى الراي راي اهلج بس بعد ربج كاتب يرحون لرحمته ، خايفه لا اقرر اني و اشيل خطيتها خايفه عليها من كلشي وضع اختج صعب ومايطمن ..

-قابل تضل بلا زواج اول وتالي تاخذ ..

-صح كلامج بس عبالج زواج سهل لو الخلفه سهله ؛ هم عذاب و شلعان كلب بس اختج باين ممفكره بهل موضوع من هالناحيه …

-كعدت على صفحه نانه ساكته و خاله ايدها على خدها ، اسامه حظن راسها يحجي شبيج …

اني اخذت المكرافه و مشيت الم الحب ، توه ادخل و اشوفلك الساقط ساري ديبوس بنت ..

يكرم الله حاطها ويبوس بيها ، توه اعيط والم البيت عليه كلت لا والله الا اخلي امه تلزمه لزم يد ..

رجعت بسرعه اشرت نانه ، تعاااي ، بس اااش اششش حجت شكو ولج صميت حلكها وجريتها اشر الها على الصاله ، ضربت على خدي يااا تعااي شوفي جبير مالتج جاي يسوي من فسق و فجور ..

وادفعها وادخلها جفت على ساري و على هاي سافله ، نوب ثواني تركته لكيناهم محاظن وبوس فلك طركككم ادب سززيه و تعيط نانه ولك سااااااري  ..

فز فزه كام لحيله صاح شنوو مدنسوي شي دنقره ..

البت تلنلم بروحها عاطت نانه  تقره موو ولك سااري لموتك اليوم ..

جرت المكرافه من ايدي و ركضت عليه تكتله بيها ..
.هو يكمز كل هبده تجي على راسه هو يعيط ..

البنت  تريد تشرد عود اني واكفتلها بأب صاله رديتها ودفعتها على نانه …

صحت نانه هاااي هااي ساقطه هيه جرت ساري ترة ، اندارعليها  نانه وتصلخه بعصبيه  بمكرافه ترس على وجها البت عاطت لازمه وجها وساري يااا ولج يماااا ..

البنت نوب تريد تطلع مانطيتهاا مجال من شالها وجريتها و نانه تولت ساري و اسامه يكلي تالا اجيبلج نعال ..

جيب جيب داكطعه عليها هالادب سزز بلا تربيه  جيب ، النبت وكعت بالارض تبجي ، اسامه ثواني وجابلي بسطال هالكبره مال ساري ..

شلته ورفعته ضحكت و الله العظيم الله وكعج بيدي اليوم ..

رفعت اديها تحجي بخوف لا لا الله عليج شسويت الج اني ..

شسويتي مو رفعته اشر بي دخلي يلعب عليج اليوم ادب سزز ، هجمت عليها ، توليتها هبد ونوب ساري جرني يريد يخلصها مني و امه تولته تكفخ .. 

ميرال …

دخلت المطبخ سمعت صوت طبه مواعين ، حجيت السلام عليكم ..

ردت وسن بضوجه و عليكم ..

حجيت بيبر هنا ..

سكتت .. حجت ،  قصدج استاذ بيبرس اي فوك بغرفته شنو ناويه تصعدين اله ..

رديت اكعد بصاله انتظره ، عفتها ومشيت …

دخلت الصاله ، حاولت الكه اي كرسي او تخم اكعد عليه ..

صوت طبه رجل ، وكفت ساكته انتظر واحد يحجي ..

اجاني صوت خالته ، تردين شي ليش جايه من الصبح ..

حجيت .. صباح الخير …

ردت صباح نور تفضلي تردين شي ..

جريت نفس اي اريد بيبر احجي وياه ..

ردت علي اي نايم فوك ماعنده شغل روحي اصعديله اذا تردين ..

هزيت راسي  لاا انتظره هناا ..

حجت التخم وراج ، درت وجهي وحاولت اوصله مادبرتها ..

جرتني وكفتني قريب منه ، كعدت و خليت اديه بحظني بهدوء انتظر ..

-كعدت بصفي وجرت نفس بملل ..

-حجت مادبرتي كعده على التخم شلون راح ادبرين زواج من منوو من بيبر انوب …

-ابتسمت ، الكعده تخم فد شي مهم يعني .

-ردت اي فد شي مهم ، ودليل مااندليتي وضليتي تهبدين ..

كلبي عصرني ، حجيت وهذا دليل كافي انو اني غير صالحه اكون زوجه ..

-سكتت ، بعدين حجت بملل ماراح اطولين وياه ، 

-ليش …

-ماما وضعج صعب ، و بيبر انسان متطلب ، لا تشوفي ودود و كلبه طيب ضحكت هو باين عليه هيج ، بس بالاخر سكتت ماكملت ..

-بالاخر شنو ..

-شنو تعرفين عن بيببرس حتى تقبلين بي وتوافقين تكونين زوجه اله ..

-بعدني مموافقه ، اما شنو اعرف عنه ، فمايحتاج اعرف الي حواليه شنو ، يكفي اعرف هو شنو بداخله ..

تنفست بقوه ، حجت بكيفج ياامي بالاخر اني ماعندي شي وياج ماعرفج وماشفت منكم كل خير وعايله فقيره بس راي انتو متتوالمون ..

كامت  حجت اصيحه الج ، و مشت وعافتني ، فركت اصابعي ، راسي احسه نمل ..

متوتره حيل ربع ساعه و سمعته نزل ، رجعت شعري وره اذني ، حسيت بيد انمدت على شعري يتلمسه ، حجه يسعد عالصباح …

ابتسمت متوتره ، شلونك ..

-زين بهل شوفه ، صوته مبحوح بحه نوم ، حجيت اني اريد احجي وياك بموضوع ..

-سهله بس نتريك هسه وصيتهم ياخذون النه الريوك بره نتريك سوه ونحجي ..

-لا تريكت  اني ،  احجي الي عندي وامشي ..

مد ايده جر ايدي يلزمها .. كولي ..

جريت ايدي منه وخليتها بحظني البارحه الي سويته ضايقني ، جبتني و خليتني كبالهم ، حسيت نفسي مالي رأي ..

-شلون مالج راي مو سالتج ..

-مانطيتك جواب ..

-ضروري يعني تكولين موافقه ..

-ليش ماكول ، ليش الزواج يصير ويتم بس لان الزوج يراغب بالزواج ، الزواج يتم بموافقه الطرفين و تجهيزات وعادات و تقاليد هاي كلها اصول ..

-ضحك اسف ، اني انسان بلا اصول ..

-حشاك ماكلت هيج …

-لا صدقاً احجي ، ماعرف هيج امور ..

اجانه صوت تدخل بينه ،  فعلا انته عبالك الزواج مثل الصفقات الي تعقدها، حجه بيبر هاا ولك عدي شو مصبح اليوم ..

-ردتك بشغل و كلت امرلك .. 

اني سكتت ، حجه بيبر هاي شنو الشغله ..

- لازم نسافر فد كم يوم نفض الي ورانه ..

-يصير ميخالف ، سكت اني بس استمع ، حاجاني عدي نكول مبروك ست ..

بلعت ريك رد بيبر لا عدها شروط امبين ..

-لا حقها تتشرط  وخاصه هذا اول زواج الها بينما انته هذا الثالث ، رجفت ايدي فكيت عيوني متفاجئه…

كح بيبر حجه عدددي ..

انداريت باتجاه بيبر ، سكتت ..

حجه هاا بس لا ماتعرفين اسف اسف ، يله اني انتظرك بالمكتب ..

نتر بيبر رووح مااجي ، اجلها لباجر ...

#يتبع ...

صفحه الفيس ( كتابات اسماء ديمير )

الانستا .. asmaa_demer

تابعو الاستوريات تبين مستقبل القصه ..

باجر اكو بارت هديه ..

والي يسال ليش النشر بين يوم ويوم .. هذا الاكدر عليه والله اعذروني يروحي❤ .. الامهات والي عدهم بيوت بوحدهم يعرفون الوضع ، ضغط الشغل و تعب الجهال ودراستهم ،و النهار احسه كطمه ..