رواية قاع الشياطين الفصل الرابع والسبعون 74 - بقلم اسماء ديمير

................☆البارت السابع والستون ☆.............

#قاع_الشياطين(البصر والبصيره)

#بقلم_أسماء_ديمير

رجليه خفيفه ماحس دامشي ، عبالك طايره ، الالم بصدري ليش ، شي ديحرك صدري و جهي عركان ، 

بلعت ريك بصعوبه بلعومي كانو متجرح ..

انسحبت من وره حيل و انخطفت من كبال اهلي الي فكو عيونهم بفزع مدو اديهم  يلزموني ..

عطت مامااااااا انجر الجيس من راسي حيل لدرجه اربد راسي بالارضيه فززني من اللاوعي جنت بي ..

عطت ابتعدت اصراخ ياماااامااا ، 

صوت عواد يفشر و صوت بيبر؟!

بيبر عطت بيبرررر ..

بيبر يصيح هاا يااخوي هاا يابن امي غدرتني موو ، شنو الي،يسووى يخليك تغدر يااخوي  ..

ذاك يرد انته انته بعتني انته فضلت مرتك وعدي عليه اسمع صوت رابد مالتهم و العرك ..

جام تكسر و تطشر بالارض صرخت حيل ياااامي الحكولي ياااناااس .. ديمااااااا ..

صوت قوي و صوت ضرب ، صوت عواد يصيح ..

وكعو فوكي اثنينهم  ، اجت وكعتهم على صفحتي صرخت ..

حاولت ابتعد انجريت من شعري ليوره عواد يكله لخاطرها مووو لهاااي ولك ماتسوه نعال ليييش،..

صاح بي بيبر هدهااا نام فوكه وكعو عليه ..

ضليت بس اصرخ واهامش اريد افك نفسي ، شعري كعطه بيده مايرضه يهده عواد ، اسمع ركبتي اطكطك بيده بلشت تنخلع عطت متوجعه حيل ..

بيبر عته حيل و ضربه على وجه هدهاااا داكلك هدهاااا ولك كااافي نطتكم عمري شبااابي صحتي سمعتي كااافي ضيعتو احلى ايااامي كله لخاطركم .

ليش،شنو يسوه و هيج تغدرون بيه ولكم طلعتكم من الوحل ، من الوحل انتشلتكم .. صوت جيس قريب و جهي عطت خايفه راح يلفو عليه مره ثانيه ..

عطت لاااا وخررو عني و خروووو ..

جيس انلفت و انكتم صوت عواد هو بعده مجلب بشعري حيل جار راسي ليوره عليه ..

عطت وخرروني وولكم الحكولي.. 

بجيت وووخرو ، عواد صوته انكتم بس ضل يرفس رفعت اديه اهامش لان الجيس على وجه عواد ملفوف

همست بخوف بيبر هده بيبرر ..

عواد فلت شعري و بعد ماجان يرفس هدء ، وحركته صارت بطيئه جريت نفسي ابتعدت زحف ليوره .و خرت عنه ، حسيت بي هدء مايتحرك ، همست بيبر هده .

عطت هددددده ولك اتركككه اخوووك ، لزمت رجلين عواد بسرعه اتقدم على بيبر اعيط هدددك راح يموووت عووفه .

وصلت لجتفه رطووبه رطووبه قويه لزمت راسه بس جيس وحركه ماكو ..

عطت وخرر عنه ولك اخوووك حيمووت بيبر ، لزمه حيل اهز بي وووخر ولك ابتعد عنه مااات ..

نطاني دفره و كعت على ظهري عطت ولك مااات وخرررمديتحرك وووخر الله يخليك وووخر كاافي ماات ياماما مااات ..

دكت على وجهي ، مات موو بيبر اخووك ..

ماكو صوت ماحد بيهم طلع صوت حتى بيبر ساكت ..

سكتت اشهك بيبر ؟؟!  وينك ..

مديت ايدي على الارض اهامش ويينك ..

كعدت ولميت نفسي اخوك شبي ، هااا شوفه خاف اغمى عليه تاكد ..

تحركت من مكاني وزخفت مرعوبه اديه تالمس الارض وصلت لحذاء لزمته رفعت اديه لزمت رجل و بنطرون قماش ، حركت رجل ، هاااا عواد عووواد ..

حركتها هزيتها ماكوو ..

بجيت يمااااا ، موته مووو مات ؟؟! 

ليش ؟؟؟

صوت طلع بسكوت ، صوت بجي بخنكه ، 

بلعت ريك ارجف بيبر ، تاكد منه خاف اغمى عليه تاكد ..

صوت البجي على و عاط بيه بسببج ، كله منججحجج انتي سببب ..

هجم عليه و خنكني بجفوك اديه يصيح بوجهي اانتي السببب ، لو ضال على فكري وعقلي ماوصلت لهل مرحله ..

انتي سببب ضليتي تنكين براسي مثاليات ودين و ربانياااات وعقاب الاخره  انتي عليج الوم .

لزم جف اديه اريده ابعده عني ركبتي ماكدر خنكني احس عيوني راح يطلعن ليبره ..

ضليت لازمه اديه احاول ابعده عني هو ضاغت حيل يخنكني يصيح بوجهي انتي شيطاانه دخلتي للبيت دمرتي كل الي بنيته بهل عشرين سنه ..

انتي مثل الافه ، هزني حيل بسببج جان لازم اخلص منج من اول يوم شفتج من اول ما حسيت شي بداخلي اتجاهه جان لازم انهي و اخلص منج انته اخطر عليه من ابو زياد ومرته من عواد من عدي من ابو عزت من ابوثروت من الكل انتي اخطرهم ..

انتي نهشتيني من داخلي دمرتيني من الداخل ..

غمضت عيوني و تركت اديه نزلت اديه لاارض ماكدرت عليه ..

دفعني وبعد عني .. صوت شهكه مالته عاليه ابتعد عنه وزحف على اخو .. همس يبجي :- عواد يااخوي ياا حبيبي ليش هيج سويت بيش قصرت وياك فديتك بروحي ولك .. ما وكفت بعينك شكفاتي الك ..

كلها جانت تطعن بيك وتريد موتك الا اني ، خاطرت بنفسي لخاطرك اسنين واني حاميك من الناس حاميك من اخطائك حتى من نفسك ، اكعد خلص سامحتك والله كوووم عواد كوم يااخوي كووم .. 

شعندي غيرك اني ، كوم حبيبي كوم وكلشي يصلح ..

رجيت ظهري على الجربايه خانسه صوت رمي ، طلقه طلقتين وبعدها صار صوت خرط قوي كانو عشوائي…

انفتحت الباب حيل وصوت بشار حجه بخوف بيبررر الحك الجيش بيبر الحك ..

ماحجه بيبر رد بشار بصوت عالي يصحي :- ولك عدي ويااااهم دكيت على ذياب يكول عدي باعكم للداخليه من سبوع ولك غدر بينه ناقص كوووم يادوب انلحك نطلع ..

مانطق بيبر ..

جرني بشار كومي كوومي ..

بجيت ماطلع ابقى .. نتر بيبر طلعهااا ، سياره ابو حمد تنتظرها وره البيت ..

رد بشار واحنه ؟؟؟!

سكت ثولني ورد برود :- نواجه مصيرنه…

 اذا ماعندك استعداد تواجهه روح بشار الله وياك…

سكت ثواني ورمي مستمر جام تكسر وصوت صراخ العامله المصريه تعيط …جرني بشار حيل وركض بيه .. رددت الجمله طفل ابن تالا وووينه طفل وووين  .

انربدت بالعامله ، شايله الطفل وتصرخ .. جلبت بيها طفل ؟؟؟!
جيبي طفل .. جرني بشار كوه عطت الطفلللللل  ..…

طلعنه من البيت من باب الخلفيه المطبخ ..  فتح الباب وصاح ابو حمدددد ..

اجه رجال يركض ، جرني من ايدي وحجه يله عموو بالعجل .. عطت بشااار ..

مارد عليه كانو رجع للبيت .. عطت بالعامله ، الطفل جيبي طفلل ..

شمرته عليه تبجي ، جريته منها وحظنته همس ياااخاله يعمررري شميت ريحته حيل .. صاح بيه ابو حمد بالعجل عمووو بالعجللل لا يصيبنه رمي …

ركضنه بدرابين يمنه او يسره  .. لحد ماوصلنه السياره ، صعدت بالصدر والعامله ورانه تبجي ، عرفت الجيش والشرطه جافتين على البيت بس الحرس مقاومين ..

يمكن من حسن حظي هذا حتى يصير الي مجال اطلع .. 

تحركت السياره بيه ، اجسام بلا ارواح ، ماتركت بيبر اني وراي ، تركت عمري الضاع و صحتي ..

دنجت ابجي نوب طفل بيدي يصرخ مايسكت و عامله تريد تاخذه مانطيته .. ابجي واضحك على روحي ..

رفعته شميته بيك ريحه امك ، مشت بينه السياره ساعات مستمره ، طفل غفى من البجي نام يشهك بحظني ..

درت وجهي امسح بدموعي الي مو راضيه توكف ، حركه بصدري قويه ، 

حسيت بيد ابو حمد ، طب على رجلي بهدوء يحجي .. امشي على طريق الصبر و هي تهون بنتي ..

سندت راسي بايدي و سكتت ، ياصبر يحجي عنه ، صبر ٥ سنوات ، صبرت خمس سنوات ..

غفيت بمكاني من التعب وسهر اليل المضى ، شلون وصلنه ودخلنه اربيل ماذكر ، بين واعيه وبين فاقده .. و كفنه عند تقاطع .  و صفت السياره بصفنه فاتحين شباك سيارتهم امبين ..

لان صوت الاغنيه عالي ، غلطه ومرت وانتهت ..

دمعت عيوني اي والله غلطه ومرت …

ماتنعاد يابشر توبه ، العامله حجت كيبي الواد ياست هانم .. همست ارد عليها من بين دموعي اذا سمعت صوتج مره ثانيه اشمرج من السياره …

سكتت ماحجت لحدماوصلنه محد نطق .. وصلنه لبيت خالتيي سيروان باربيل …

نزلت وحدي حجه ابو حمد محتاجه شي .. هزيت راسي لااا هاي وديها لبيتها ماعرف بعد بس ماريدها عندي ، او رجعها للمكتب الي جابوها منه ..سديت الباب وتوجهت لبيت خالتي دكيته ..

جنت تحت تاثير الصدمه ، خالتي ماحأجتني بس احتوتني ، هم اصلا طبعهم هادئ حيل وبيتهم سكوووت تام ..

او يمكن اتبعو مبدء سكوت بهيج حاله ، انطويت على نفسي ، قوقعت روحي بلا كلام بس تفكير ينهش بالروح ..

تالا حاجيه الهم كلشي ماضامه عليهم ، اجت هي ثاني يوم ، تبجي تبوس بيه وبابنها .. ضلت للعصر وحجت نروح لدهوك هناك احسن يم خالتي ام ايفان ، ناجر بيت ونكعد محد يندلنه ..

مشيت وياها جان عقلي معطل ، يمكن هي افهم مني واحسن مني ، لو بي ذره عقل ماصار الي صار ، يمكن اني معاقه عقليا هم .. 

رحنه لادهوك ، ضلينه اربع ايام ، اسمع تالا تتهامس ويه خالتي بموضوع بيبر ، بس صميت اذني ..

ماردت اعرف ميت لو حي ، هو مات بكلبي بعد .. سكوتي اصلا هالايام جان عزه عليه و حداد على موته بالنسبه الي …

ابن خالتي رجع من الشمال شفته تضايق او الاصح بيتهم صغير وعنده جهال ونوب احنه  ابن تالا صعبه ..

همست تالا ..

هااا …

دكيلي على خالتي ام سيدار ..

شتردين منها ترى مسافره صار يومين لتركيا علمود جرعه الكيمياوي  مالتها .. 

سكتت .. همست شنو بالج ميرال احجي خيه شاركيني همج ..

رجلها مو محامي ، 

اي شتردين …

اجه وكتها تالاا لازم يصير عدنا بيت خاص حتى لو شقه صغيره كون محد يندلها نعوف دنيا وننهزم اني وياج بيها اني تعبت ترى ، بلشت افقد عقلي هم بحر ديلاحكني هو واهلي …

همست هلوسه ميرال من تعب وسهر ..

جاي انام طول اليوم جاي انام اني تالا ..

نايمه بس مفتحه عيونج ميرال ..

سكتت مدمعه .. حجت شتردين هسه ..

اريد ارتاح راحتي ان انهزم من مصدر تعبي ومرضي …

شلون ..

ماعرف دزيلي على المحامي رجل خالتي ، دشوف شباقي بحلالنه بيت ابويا بااي شي اي شي شنو ضال النه …

همست بخوف انسي ميرال الراح همزين طلعنه سلامات من ذاك الوكر ، انعل ابو الفلوس مادامج بصحه وعافيه خلص ، 

حقنا اخذو موو حسبي الله عليهم ..

الله اخذ حقنه ميرال خسرو ارواحهم الله جازاهم  فضايحهم صارت بكل مكان  ..

جسمي قشعر ماجانت عندي الجراءه اسأل شكوو لو شنو صار بس دمعت بجيت فجأءه مهضومه كلبي يوجعني .. 

خلت اديها على معصمي وهمست كاافي ميرال اني وانتي هناا بنص خوالنه الحمدلله ..

هزيت راسي ما يكفي هذا مايكفي ، خلت راسها على راسي و سكتت حاظنتتي ..

لمن اجه رجال خالتي نطيته توكيل و تالا هم وقعت، قبل ما جنت امن انطي توكيل لاحد.، هسه كلت هو شنو ضل ينخاف عليه ..

خرب بالحياة كلها ، رجل خالتي كال ياخذ الموضوع اقل شي اسبوعين او  ثلاثه ويله اعرف شعدكم ماعدكم ..

جنت محظره نفسي لاي شي ، متوقعه الاسوء ، ليل ماعرفه شنو والله  ساعه ابجي وساعه اضحك ..

بحر ماتركني ، كلامه وضحكه تعودت عليه بس وصلت بي يلزم ايدي ، يجفلني من صفنتي ، بابا دوم ما ايده الي ماعافني ..

افز على صوت  تالا ويامن تحجين .. التفت عليها بحر ديسولف اسمعي ..

تسكت ..  اعرف اني هي ماسمعه ، وهنيالها احسدها …

عيوني مرتين طكت دم من يم المدمع ، رحت لدكتور العيون راجعته قبل كم سنه كال شعيرات دموعيه دقيقه مفجوره من ارتفاع الضغط..

رجعت دايخه سايحه روحي ، نص درب وكعت ماكدرت امشي ، وزني نزل لل٤٩ ، اديه عظام صارت .. شدولي مغذي ورجعت للبيت يومين صاحيه وثالث اوكع ..

اكتشفت تالا صاحبت مسؤليه وعدها قوه تتحمل .. منا ابنها ومسؤليته ومن اني ومرضي ..

كلبها قوي تتحمل صدمه ، رغم ما عرفت صار كله ، حجيت الها او الهلوسه جنت بيها هي الي حجت مو اني ..

هذريت هواي و خربطت المهم .. بس ماسمعتها بجت او شكت ، جان توكف و تاخذ سالفه بمبدء الماضي ، اني لا عيبي اعيش الالم واخلي يستقر بروحي و يحتلني من داخل ..

اني انسانه ضعيفه فعلا ، عكسها هي ..

خجلت استعين بام ساري ، خجلت اطلب العون كلت اجه وكتها نتحمل نفسنا بنفسنا .. تالا تركض هناا وهناا .. 

يوم الثالث هم وكعت عيوني تنكلب و جسمي يخدر فجأءه ، دخلت الخاص ، غبت عن الوعي ايام ، مرضي ماجان سببه عدم الاكل وشرب مرضي اعرف سببه ..

مرض البداخلي هو سببه ، ذاك الي ماعرف مات لو عايش ماريد اعرف .. 

خالتي حجت تطلعين اليوم يماا ، اليوم احسن من ذاك الاسبوع ، سندتني وطلعت اشحط بنفسي ماقدرت اكمل مشي جابن كرسي دفع خلني بي ، واخذني للسياره صعدت ، رجعوني للبيت و هم ؤجعت نمت ..

احس بيهم يمي بس مافتح عيوني عجبني الهروب و الإغماء ، مالكيت بس هل حل حتى ابطل تفكير .. 

همسات تالا تكللها نكللها لااا خاف تاذي نفسها اذا عرفت ..

لازم تعرف حيبين اول وتالا عليها .

هسه هي بشهر الثالث بس ممبين عليها ، حتى هو جنين ضعيف ماتوقع يعيش مو سمعتي دكتوره شكالت ، مانكللها هو راح يسقط مايضل بذاك الوكت نكللها دوره هاي ، راح تتمرض اكثر اذا عرفت ..

والله مادري بعد مسكينه اختج ..

احسن حتى لايربطها شي بعد بذاك المجرم ، ان شاء الله ينحكم اعدام ويلحك اخو العار ..

فتحت عيوني بهدوء ، همست تالااا  ..

فزت هي هااا كاعده ..

مارد خبر رجل خالتي ..

لا والله ..بعده بغداد ديشتغل ..

درت وجهي على مصدر صوتها خليت ايدي على بطني سالتها :-صدك راح يموت هذا هم ؟؟!

حجت شلج بي بذره نكسه هذا مو من ظهر بيبر شسوين بي صحتج متتحمل حمل ميرال دكتوره تكول لو يسقط احسن ..

هزيت راسي اي ..

نطيتها ظهري و غمضت  ، بذره نكسه ؟؟؟!

معقوله مخلوق بعده ماجه للدنيا ولا دبت بي الروح يحمل خطايا وذنوب اهله بس لان اسمهم يجي بعد اسمه .. 

ماجذب واحجي الحق مافرحت بي ، يمكن اجه على تالي وكت او بالوكت الغلط ، ماحسيت بنفسي حامل جان يجي نزف كل شهر شلون حامل ب٣ مادري ..

معقوله وكعاتي بذيج الايام حمل ..رجل خالتي . اندك عليه مايحجي يكول الله كريم .. ان شاء الله خير ..

بيوم تفاجأنه بي جاي هو وخالتي و هبه .. 

كعدنه بالصاله ، وخالتي ام ايفان و يانه  . حجه رجل خالتي ابوج توفه من ست سنوات مو ميرال ..

لزمت صدري رديت اي …

شكد ساحبه من حسابكم ..

جريت نفس مختنكه ، حجيت استبق الاحداث حتى لايكولون انضحك عليها :- حسابنه فارغ موو ، زين بيت بابا بعده لو نباع لو شنوو ..

هي هنا القصه انتي مو تكولين جنت اصرف منه مو ..

همست بزعل :- صرفت بحدود ال٣٠ الف دولار مو اكثر ..

بس حسابكم بالبنك من ست سنوات مانسحب منه فلس واحد بنتي ..

عقدت حواجبي شلون يعني ..

مانسحب منه اي فلس باي شكل من الاشكال بالعكس انظاف اله ..جانت اكو تحوليلات ماليه من محلات صياغه مال ابوج تتحول كل شهر واضافه الى اكو مبلغ انظاف قبل سنه .. ودقيقه  دتاكد سكت شوي وكمل ..  سنه وشهرين انظاف مبلغ يقارب ال ٦٠ الف دولار …

كلها سكتت عم السكوت .. بس صوت نفسهم ظاهر .. همست تاللا شلووون ..

رديت بيتنه بعده لو نباع ..

املاكم محد لاعب بيها بنتي على حطتها من ست سنوات ، غمضت عيوني برجفه ، كمت لحيلي  ، سندت نفسي على التخم ..
كوه وكفت توجهت اطلع من الصاله حجه وراي هسه شسوي بنتي شتردين اتصرف ..

انداريت على اسحب اتعابك عمو ماقصرت اشكرك ..

همست تالا :- ميرال والي اتفقنه عليه خلي يكمله وياهن ..

حجت خالتي ام ايفان شنوو شتفقتن ..

ردت تالاا ناجر او نشتري بيت هنا بس المهم النه هم احنه ثكلنه عليكم ..

لااا يمه شهل حجي كعدتج هناا راده الروح لبيتي ..

ردتها تالا ماقصرتي والله ماعرف شلون اجازيج شلتنه شيل باصعب ايامنه بس احنه هم مانامن نضل هنا بعد لازم نطلع هم اخاف يرجعون علينه لو يدورون ورانه ، امن النه والكم ..

اني ماكدرت احجي من هول الصدمه تالا تولت الكلام وياهم وكعدت تخطط ، اكتشفت اختي كبرت ، عقلت ، وكد المسؤليه . يمكن تالا جانت محتاجه هيج احداث بحياتها حتى توعى وتفكر صح ، جانت تحتاج عاصفه قويه حتى تركد امواج الي بداخلها وتصفه على بر وتمشي على الدرب المستقيم  ..

اما  اني رجعت للغرفه  امدد ..

رجعت للغرفه مهزومه ، حرت وياك يابيبر شنو طيتنك شنوو عقلك وشنو طبيعتك .. حيرتني يابن الناس .. 

نمت انطيت لنفسي مهله انو انام ألمرض مايخليني افكر لازم ارتاح حتى افكر ، وراي هواي شغلات لازم تنكظي ..

ايام ويله سيطرت على نفسي والفضل للمغذيات كل ايد بيها كانونه .. بطن ماعندي دخلت الرابع وبطن ماكوو ..

اسمع طراطيش حجي نوباات من تالاا ، عدها اتصال بابو حمد نفس ماهي تكول  شلون حصلت رقم ابو حمد ماعرف ، مايصعب عليها شي هي ... تريد تعرف اخبار دانيال …

سمعت ورانه القو القبض عليهم ، عدي مسلم اوراق التهريب والسجلات كلها ، فوكها لاكين جثه بالبيت الثاني و معترف الحارس ، ان عواد دفن شي جوه الحجر من نبشو طلعت الجثه …

من عدا جثه عواد الكوها بالبيت الي تركته اني ، 

تكومت القضايا عليهم بيبرس  و بشار و دانيال ، الي خلصه الموت مثل ستار و عواد ..

لو ام زياد ورجلها الي انفجرت بيهم السياره هم توه طالعين من البيت بدون سبب منو ورا كتلتهم وشلون محد يعرف ، بس اني اعرف ،

 ذاك ذاك الواحد ..

هذول كلهم ماتوو وخلصو من عقاب دنيا بس راح يتلكاهم عقاب الاخره اشكد .. 

اسمع بيهم حاليا قايمه محاكمات بيهم ، مااسمع جنت اتابع بنفسي ليش الجذب ..

اخبار على النت انتشرت من عدا بعض القنوات ذاعت الخبر بس بشكل مختصر لان جانت بوقتها طاشه سالفه دا ع ش ، و سقوط المحافظات و قتل س بايكر

لذلك الاعلام ما توجه عليهم زين هم وفضايحهم ..

، اسال ابو حمد ، صعدو لمحاكمات .. استغربت من حجالي ابو حمد اول جلسه جان عدي كاعد ويه محامين والمدعي العام ، الي ضد محامين بيبر وفوكاها شهد عليه ان يهرب مخدارت…

جنت اعرف بي غدار ، بس ماتوقعت يغدر بشكل مباشر وعلني دومه يلعب من جوه الطاوله ، هالمره بين وجهه الحقيقي لبيبر بدون ميخاف .. 

وطلع نفسه ان هو مجرد محامي يشتغل عند بيبر بالعقارات والمطاعم اما شغل الممنوعات تفاجاءه بيها ولمن عرف  واكتشف الموضوع ، خبر عليه ماسكت لان اخلاقه ماتسمح اله سكوت  ..

مثل شعره من العجين طلع النذل ...

جنت اسمع و اكل بروحي ، اكلت بروحي اني ، اني دمرت نفسي محد دمرني ..

احس نهايه حياتي على ايدي ، مرت مده ، كدرت خالتي تساعدنه نلكه بيت ، بعيد عن العين وبمكان هادى ..

اشترينه البيت قريب من خالتي ام ايفان .. بيت زراعي بنص ارياف تحيطه جبال و تلال ، مناطق ريفيه اهدء وامن محد يندلنه حتى خوالنه محد يعرف وين سكنه عدا خالتي ام ايفان جانت تمر كل فتره تشوفنه عايشات ميتات ..

خوالي جانو يتصلون علينه بس ماقبلت احد يوصلنه .. حلفتهم مايدورن علينه يكتفون بالاتصال ، ردت ينكطع خبره و ناس تنسانه ،

وره مادخلت بشهر ال٨ ،يعني بعد خمسه اشهر من ذاك اليوم ، اليوم الاخير سمعت بي اصواتهم ..

 تفاجات باتصال محد يتصل عليه اني ، محد يعرف رقمي بس رجل خالتي المحامي .. انصدمت من سمعت صوت عدي ..

 سكتت اسمع اله ..

شلونج ..

مارديت ..

محاكمه كتال اهلج بتاريخ ٧/٢٠ …. ماراح ياخذ اعدام ترى اذا ماشهدتي محتاج شهادتج ..

ماحجيت ..

رد باعي اسمعيني محامينه مو هينين ميرال ، قضيه المخدرات حملوها كلها لعواد ذبوها براس عواد ، زورو كلشي حتى تواقيع ، هسه ديحاولون حتى قضيه مقتل اهلج وقضيه يوسف هم يحملوها لعواد .. وكتله عواد صارت دفاع عن النفس ،

راح يطلع براءه تدرين  او يدفع كفاله ويطلع ..

شهادتج و شهادتي و دانيال هم راح يعترف عنهم بالمقابل يتخفف الحكم عنه كاافيه انو ياخذ بيبر موبد .. 

اخيرا نطقت ، وانته شلون منو ياخذ حق الناس منك ..

ماسويت شي غلط اني السبب من رجلج واخوو ..

جذااب ..

وداعت بحر مو جذاب جنت دوم احاول اسحبه من ثروت وشغله ويه جماعه وانصحه نشتغل لوحدنا كافي خالين ركبته جواهم بس مااسمع . قاطعته .. شهاده مراح اشهد .. سديته بوجهه ..

اجتني رساله وره ثواني ، معناها راح يطلع بيبر هالشهر بكفاله وحظري نفسج ماراح يعوفج لحالج ..

جريت نفس بخوف ارجف .. 

غيرت رقمي بنفس اليوم  ، منعت حتى خالتي توصلنه كعدت بالبيت مثل سجينه والله ..

سجن انسجنت ، اخاف اتجاوز باب البيت ، جان حمد ابن ابو حمد يسوك النه بس هو يوصل لعند بيتنه ..

تالا نصحتني بي ، واني هم ما كلت لا على الأقل اعرف ابو وامه ، واعرفهم اوفياء . 

عشت برعب خايفه من شنو ماعرف ، حاولت التهي بحملي و بنظري .. حاولت اراجع عليه باربيل ..

حاولت وحاوولت .. 

حاولت اصلح المدمر حاولت اسابق الزمن ..

رحت لدكتور باربيل ..

اخذتني تالا وخالتي ، كلت بالكت مرت سنين على اخر عمليه اكيد اكو شي بيها ترمم ..

ركبت بالسياره هو بالي خليت ايدي على بطني ، الطفل نادرا ما يتحرك نادرا .. احس اصلا مموجود وخذا وهم ..

ماهتميت بي صراحه يمكن لان كارهه ابو ..

لا ماكارهته احبه والله رغم الي سواه احبه .. بس كلبي قسى حيل من ناحيته .. 

نسيته بطلت اخاف عليه .. بطلت اشيل همه ، كل همي حاليا اختي و حياتي وبس .. 

تقربت تالا يمي تهمس محاكمتهم بعد كم اسبوع ..

مارديت ..

حجت لازم نشهد .. تدرين مو ..

التفتت عليها برود شتردين تالااا نروح لهناك موو تحلمين ماوصل لذاك المكان لو اعرف اهلي موجودين بي ..

راح يطلعون ميرال مراح نستفاد شي ، السجن مكانهم ، .

سدي الموضوع ..

ميخالف اسده بس خلي بالج طلعتهم سهله مابقالها شي وراح نرجع لتحت رحمتهم .. يرجع دانيال يسحل ابني مني ورجلج يمكن يكتلج خلاص مو يسحلج بس ..

بلعت ريك ساكته دمعه بطرف عيوني ..

لزمت ايدي ترى حاجاني رجل خالتي و جان رايه ان نشهد و يانه سياره شرطه .. حمايه الشهود يسموها يوم واحد نقدم بي شهادتنه ونشهد بالمحكمه وخلص ..

هزيت راسي لااا …

توجهنه للدكتور و صعدت عنده ، حجيتله مختصر عن حالتي و صعدت على سديه للفحص ..

الفحص الي مليت منه وبزعت روحي ، بس مع هذا عندي امل اريد اشوف الدنيا داعتمد على نفسي ..

حجه انزلي كمت ورجعت كعدت بمكاني ابتسمت ، حجه يسالني تكولين شفتي قبل مو ..

هزيت راسي مبتسمه اي .. 

سكت ثواني ، كملت اني اسولف اله .. اني شفت والله صح مو واضح بس شفت كدرت ادبر نفسي لحظات حتى شوف اكدلك هذا هذا ..اديه ترجف مديت اديه افتح جنطه شووف موبايلي لونه احمر والله اني شفته .  طلعته خليته باتجاهه هاااا شفت لونه احمر ..

سكت ثواني ..

ابتسمت بنفس الوقت كلبي يرجف ، حجه ميرال بنتي ..

هزيت راسي مو كتلك والله شفت ..

بنتي جهازج لونه اسود ..

رخت ملام وجهي ، كلبي انمرد مرده حتى بطني اذتني .. رجعت ظهري على الكرسي بتعب ياست ..

بنتي اسمعي هذا عقلج الباطن والاوعي يصورلج هيج امور هذا دليل على ذكائج وتفكيرج الزايد  بس داكلج ماكو نظر بنتي..

ماكدرت انطق ضليت ابلع بريكي واكتم بالغصه ، اريد احجي ماكدر دنجت راسي ونزلت دموعي غصب خليت اديه على بطنيى..

حجه هاج هاي .. رفعت نظري بقهر .. حجه هاي كراس شوفيها …

هزيت راسي بلااا ..

رد ماشوفيها مووو ..

هزيت راسي اي ..

جر نفس شفتي .. درت وجهي ابجي بهدوء تلمست بطني همست اني حامل تعرف دكتور ويكولون بيه بنت .. معقوله عداله السماء قاسيه وياي لهلدرجه حتى انحرم من شوفه طفلي ..

حشاه لله بنتي بس هذا قدرج ..

بجيت حيل وانفجرت بوجهه ..لاااا مو قدري هم سوو بيه هيج جان عندي امل اسوي العمليه بعد كم سنه بسببهم ، سببو الي نزف و تلفو عيوني بسببهم ..

بنتي عندج خيال قوي استفادي منه ..

جريت جنطتي و كمت اريد اطلع لزمت كرسي ارجف مابيه توكف وكفت ابجي ماكدرت اسيطر على روحي ..

حجه اساعدج .

لزمني يساعدني انداريت عليه اتوسل فدوه دكتور اي امل جايني طفل اريد اشوفه ، حتى لو دقايق ..

مارد عليه بس ضل يستغفر .. دفعت ايده بهدوء خلص مامنهم فايده طلعت منهاره جسمي يرجف ..

نطق جمله اخير ، اكو احتمال زرع عين او قرنيه ، بس لازم اكو متبرع مو هنا لازم بالمانيا و فريق طبي كامل ..

سكتت ماعندي جواب تركته وطلعت ، تلكتني تالا حجت هاا بشري .. ماحجيت مشيت جثه بلا روح هايمه بهل دنيا .. عقل اللاوعي موو .. خيالي واسع .. لو عقلي الباطني ..

جنيت لازم .. فوك ماعميه جنيت .. ادري ليش راح اخلف اني كد المسؤليه مثلا لو ذاك الي كسرني يستحق اخلف اله الي يشيل اسمه ..

لتزمتني من ايدي توجهني ..

رجعت للبيت وسط الحمل و سط ضغط تالا ان نشهد ، الي خوفني رجل خالتي مايدها لازم تشهدون حتى من ياخذ الحكم تكدرين تتطلكين منه .. اما دانيال بعد الحكم نكدر نرفع عليه القضيه بالاحتيال ..

محاميهم مو هينين قتل عواد اجه بحجه دفاع عن النفس ، وبقيه القضايا حملوها اله ، رحت اشهد ..

اي رحت بسبب الضغط ماجنت ناويه لان خايفه من ذاك المكان ، شهادتي طولت ربع ساعه ، حجيت مختصر والي يملي عليه ظميري ..

 بس لان جان عندي تقرير طبي يثبت ان اني غير صالحه للشهاده ومريضه ما طولت هواي وكمت ، كرشي باين و ملامحي ذبلت بس رحت ..

رجل خالتي وياي وابنه ماعافوني ، تالا شهدت  و ابو حمد .. 

وره شهادتي بست ايام ولدت ، ولدت بالبيت ماكدرت اوصل للمستشفى فضطرو يجيبون قابله ، ولدت هيف بنص الاستقبال ..

الوضع جان مرعب اعترف بس حسيت نفسي بشر اول مره .. حسيت بالم حسيت بيه فايده اخيرا ..

ساعه ب١٠ باليل اجت هيف ، سمتها القابله مأنطتنه المجال نسميها ..

حجتها ان اليله هاي ظاهر بيها القمر ساطع ، ولازم تتسمى طفله نسبتا الها .. هيف معناها قمر بالكردي ..

الاسم اشوفه مو ملائم بس بمرور الوقت تعودت عليه ..

تالا اول ما شالتها وشافتها وحجت يييع ..

خالتي ردتها هسسس اخلاق يكك ..

ابتسمت اني وجع لا تعيبين على بتي ..

بتج زركه والله جنها ابوها خطيه ..

خالتي ردت لااا تكبر تتغير ملامحها ترى صغيره ..

والله ياخاله الطفله باين مو حلوه شو كرم من اجه  للدنيا جنه قطعه من الغيم من جماله ، وهاي لونها ازرك..

ردت خالتي بعصبيه ، انجب ولج طفله عمرها يوم شترديها وبعدين اختج ماهتمت باكلها ولا عذائها مو زين الطفله عايشه وخلقته تمام ..

حجت يييي يله لازعلين ميرال ماخليها تعنس اخلي كرم ياخذها والله حتى لو اغصبه عليه شسوي بعد بنت اختي وبتليت بيها ..

دمعت عيوني صدك خاله بتتي بشعه ..

لا والله يايمه جذابه هاي تغار عابت لوجها النذله ، تكبر  وتتغير ..

نوب صار بيه قلق خاف بنت صدك بشعه زين ليش ، اني حلوه يعني وابوها زين .. معقوله ذنوب ابوها طلعت بوجها ؟؟؟! ..

نوبات تالا تساعدني بالطفله مره لكتني رابطه الكماط على ركبتها وخانكتها ..

بس اسمع صراخ تالا عزااا العزززاج ميراا شانقه البنت ..

ركضت مفزوعه يمااا ، اثاري الكماط ملفوف على ركبتها بدون مانتبه ..

من يومها بطلت اكمط اكتفيت بس الفها واشيلها .. اما تشطيف تالا ..

تلبس جفوف و تكعد تشطف و تفشر على منو مادري .. وتهمس زركه بنت الازرك ..

تركت الي صار وره ظهري قررت انسى ، جان بالي نسافر لتركيا سياحه او  للاردن .. بس جوازات جانت هي العائق و رجل خالتي حجه اطول فتره ويله تطلع الجوزات .. مو شغله هينه ابد .  كلت حتى سالفه سفر لعيوني هم ماتفيد بلا جوازات ..

كرست حياتي لثلاث كائنات جميله ولطيفه  .. كرم و هيف .. بحر دوم يمشي وراي كانو يغار ..  

دوم اسأل شلون شكل هيف ترد تالا تخزي ..

اما حمد يرفع معنوياتي  يرد اسم على مسماه ..

صح ماعرف هواي للطفل بس غركتهم بحبي والله ، ماكو شي اسمه طفل يبجي ممنوع هالشي ، لو اعرف اشيله ليل ونهار .. كافي عليه بجي بحر الي ماعرف شلون اسكته ..

خلو الي سبب للحياه ، هدف اكعد اله صبح حتى اتممه هو تربيتهم افضل مايكون ..

اما بقيه النفوس البشريه الي اذتني فتركتهم لربهم هو الي خلقهم هو الي عنده الحق بمعاقبتهم ،

دانيال الي كرهته تالا و سلبت منه ابنه و سمعته بكل مكان صارت بالحضيض ..

لو بشار الي هجرته مرته بعد الي عرفته عنه واخذت اطفالها ومشت لاهلها ..

لو عدي .. عدي الي محد كشف سوء نفسه غيري ، من نبره صوته عرفته انسان مو سوي مايخاف الله و غدار ، عدي رغم ما طلع من قضايا سليم و قانونيا هو ماعنده شي .. بس مع هذا ربي ما قصر وياه ..

ضربه باغلى مايملك هو عايلته وابنه ، العقاب مو دائما الموت او السجن ، احيانا يكون العقاب هو النفس الي بداخلنه هي تعاقب وتنهش وهذه عقابها لا اله علاج ولا دوه ولا منقذ منها ..

تحرر من هالعقاب بس اذا انتحرت .. نبره صوته هو يبجي على ابنه اثبتت الي راح يضل طووول عمره يعاني مراح ينسى هو سبب بكل الي صار لعايلته ..

اما بيبرس او فرات ، جف الود من ناحيته ، عروق كلبي الي انسكت بحبه ، جفت و تلاشت ، ماعندي غير حسبي الله ونعمه الوكيل ..

تالاااا .. 

اجه حمد شايل علاليك مسواك ، كوه يمشي خفت لا ينكسر بالنص من ضعفه ، ساعدته بالعلاليك اضحك شلونك ياوليد.

ابتسم بخجل ، ضربته بجتفي جبت الي عسل لاا ..

هز راسه شلون لعد اهم شي طلباتج انتي .. 

ذب علاليك ولزم كليته متوجع .. بهت وجهي ذبيت علاكه بالمطبخ جبت اله كلاص ماي قدمته اله خايفه  .. توجعك شنوو ..

هز راسه وشرب ماي .. 

ابتسمت ياعيني توجعت هواي ..

اي يعني غير عمليه زرع كليه ..

الحمدلله .. تصدك اني مااطمان كلبي عليك غير من تاكدت ميرال نطتك الفلوس تخيل ضليت الح عليها اشهر ..

عيوني طرفت على شخص وراي لان ميرال ، خرط وجهي ، هي ماحجت ولا فشلتني ، بس فتحت عيونها  سكتت ..

حجه اشكركم معروفكم ماانساه لا اني ولا اهلي باذن الله بس يصير عندي ارده الكم .

رديت بسرعه لا لاااا ..

حجه شنو ..

همست .. اعتبره مهري ..

سكت شوي ورد هااا ..

اقصد سالفه راحت ماله داعي ترده بعد عيب ، سكتت ..

حجه ابنج شلونه ..

بلا جنسيه شسوي ..

تحتاجين شي .

سكتت شوي و همست ما الله يهديك ونز.. حصلت كرصه صحت ااااي ..

صاح اسم الله .. التفتت لان ميرال فوكي شايله مكناسه وتاشر بيها الي كومي نظفييي .. حجيت دوده كرصتني دددوده .. اخذ راحتك حمد عيوني .. اذا ردنه شي نخابرك ..

سلم وطلع مبتسم ، 

بس طلع استلمتني ، وجه ادب سززز ماتبطبين خفه ، بعدنه مافهمنه موضوعج ويه دانيال شنو كاافي تالا لا تكسرين كلبه للولد ولا ادخلينه بمصايب جديده ..   ووووو ماتبطل الا بعد ساعه اقل شي ..

ماتفتهم هي ان اني جاي ابحث عن مصدر الهام بهل حياه ، مصدر للاشياء الايجابيه ماتفتهم هي شسويلها ماتعرف نيتي طيبه وياه كله حب اخوي ..

ماحاجيتها لحد ماتعبت وطلعت للحديقه وياها الاطفال ..

دخلت اسوي اكل للجهال ، وضلت هي يمهم .. كل شوي تكوم لحيلها فازه على صوتهم لا يتاذون ..

اعرف حملها ثكيل اعرف دوم تفكر والاهم منن هذا كله كلبها مريض ومجروح ..

تاذت حيل هي كلنه تاذينه وتعلمنه درس وتقوينه وقست كلوبنه و كرهنه هم ..

الا هي تاذت بس ماكرهت ولا قسه كلبها .. 

رغم سويته بيها رجعتني لحظنها رغم سوايه بيبر وحقارته ما شهدت ضده عافته لظميره ولربه هو يحاسبه .حجت الي سمعته بس ماحجت الي حست بي و تعرفه عنه بالكامل للمحكمه لان تكول ماشفت بعيني والي سمعته حجيته .. 

شايله هم الكل ونست نفسها ، داست على نفسها في سبيل ماتظلم احد ونست هي مظلوم الاكبر بينه ..

دتحاول تحصل الطلاك ، و تحاول تثبت نسب ماركس تقيم دعوه احتيال وتزوير على دانيال  ، دتحاول تلم شتات روحها المبعثره ، دتحاول هواي .. 

نوبات اكول خلي احسن على الاقل عدها شي تفكر بي احسن ماتصفن بالوحده .. خلي تفكر وتعيش لخاطرنه احسن ماتموت قهر بسبب ذكريات الماضي ..

بعد اشهر طوويله من بعد توسلات وتهديدات من بعد مفاوضات ، ب٢٠١٦ بعد سنه من اعتقالهم بشهر ال ٥ بالتحديد…كدرت تحصل الطلاك لان هو انحكم مؤبد ، والقانون شاف من حقها ان تنفصل عنه ..

اما اني ساري قبل يشهد من بعد توسل ان يشهد على زواجي من دانيال بس بطريقه غير شرعيه ، كدرت اثبت طفل ابنه وان هو حتال عليه بعقد زواج مزور  ..

ثبتت نسب كرم .. سميته كرم ، ثبت نسبه لدانيال بس طلاق ماكدرت احصله .. سالفتي صعبه حيل .. اصعب مما تخيلت ..

استقرينه بيتنه الريفي ، قريب على الحدود التركيا ، بيت واسع وحلو وهادئ ، يشبه ميرال بالضبط ..

اهتمت هي بالاطفال اكثر مني ، تولت تربيتهم ورعايتهم جنت ناويه اقنعها نجيب مربيه على الاقل بس رفضت رفض قاطع بشكل صارم هم ..

رفضت اي عامله ، احسها كرهتهم ، تكول منافقين كلها جذابه مستحيل امن باحد بعد .. 

تركتها على راحتها جانت تبذل جهدها بتربيتهم وعنايه بيهم ، كرست حياتها لبنتها وابني والى هوايتها صنع الاشكال من طين بعدماتركت العمل بهذه الهوايه لمده ست سنوات تقريبا ..

لكت السلام داخلي او لااا مادري .. هيئتها وابتسامتها تكول اي ..

بس صفناتها بالحديقه او فزاته والاصوات تتخيلها احيانا تثبت الي لااا اختي بعدها مريضه من داخلها ، ميرال  كلبها ترهف و ارق من ان يقسى وينسى .  المثل ميرال يعيشون بس ماينسون ..

يعيشون على الاطلاله فقط ..

اما اني لكيت تؤم روحي وحتى لو مو هو ،  يصير غصب عنه .  حمد جنه كصبه سعفه .

من يوكف يمي يرجف ،  عبالك لازمتله سيف والله يالله .. مو زين مني انعجبت بي وحبيته ..

ضل يجي بين يوم يوم بحجه تردون شي اسوك الكم خاف محتاجين احد يساعدكم بالحديقه ..

احسه نوبات يبادلني شعور بس غبي مايعرف يعبر ..

نوبات احسه ديحاول يرد الفضل لميرال على مساعدتها اله ..

اني هم ماجذبت خبر لكيتها حجه كل ماردت شي ادك عليه واصخره واكله الي نريدده ، استفاديت منه من كل نواحي بتلبه متطلبات البيت ومتطلباتي العأطفيه ..

كل ما احس نفسي مقهوره محتاجه واحد يطبطب عليه ادك عليه ، خاصه هرمونات الدوره من تبلش ، يكعد يواسيني مايكول لاا شسوي قابل اني خلقت نفسي بنت لو اني سويت عندي هرمونات وعاطفه الله خلقني هيج والله ياربي .. 

بالاخر اني ماكدر اعيش،بدون عاطفه اموت والله .. بالي ارجع ادرس خارجي بس مال الوجع ماقبلوني كالو اقل شي ثلاث سنوات .. يله لازم نصبر ، الصابني كله من ايدي بعد .. 

حمد نصحني ارجع ادرس خارجي هو يساعدني ترددت بالاول ، بس قنعني ان هو رغم مرضه  وكعدته بالبيت درس خارجي و هسه طالب كليه شنو ناقصني ماسوي مثله .. 

جابلي الكتب و كلي اقري بلشي ادرسي ، لكيته حجه هم اجلب بي يمنه .. 

جان ينطيني الاسئله ويكلي باجر اريد اجوبتهم مو تغشين ..

والله الصدك غير جنت اجاوب بدون غش ، درست وتعبت من كلبي ، على سالفه كلبي وره كل ورقه اكتب بها جواب ارسم قلب وبي سهم ليش مادري ..

اعتقد لطلطه او خفه مثل مايكول ساري ..

ام ساري وابنها ساري الجلب  واسامه نسمع عنهم واتابع ساري على الفيس بس ماتواصلت وياهم .. ميرال هم رفضت نوصلهم ..

تكول خليهم بعيدين عنه امن الهم ، ماقصرو ويانه ولا احنه قصرنه لهنا وكافي ، اكو اشخاص بمرحله ماا في حياتنه لازم نقطع علاقتنه بيهم لصالحنه وصالحهم ..

ابو حمد وعايله مانسونه يتصلون ويطمون عنه ، اما خوالي روحه ورجعه الهم ماعدنا فضلنه ان ننعزل عن الكل .. بس جانو دوم يتصلون ويطمون ..

عمي الي بالاردن حاولنه نوصل اله بس حشه القارى عمي طلع مطي كلشي مايفتهم ..

للاسف مجرد ماسمع عن الي صار ويانه اختفه حتى رقمه غيره ، يمكن يخاف او كرهنه من سمع سبب موت اخوو زوج ميرال .. حملنه المسؤليه بلا مايسمع من عدناا ..

وسواها مؤامره عليه وعلى بابا وان احنه النه ايد بالموضوع .. 

احنه هم ماهمنه اصلا مانعرفه بس ردنه عايله تسندنا او نلجى الها ، طاح حظه العار ، بس ابنه لا طلع عنده ابن حلو تابعته على الفيس عنده عضلات ويلعب بنادي لكره القدم .. 

شسوي كلت اعقم عيوني بشوفته خاصه بعد التلوث البصري صارلي بشوفه صوره عمي ابو كرش جنه وحده حامل تسع اشهر ..

... بعد مرور ايام طويله ... 

ميرال … 

صوت بجي هيف كمت بسرعه جريت ممه وفتحتها خليتها بحلكها سكتت ، مديت ايدي لشعرها ، طولان شعرج ياماماا ، شلون لونه هااا  طالع علي لو عليه  ..

ضليت اتلمس بشعرها خلصت الممه وكامت لحيلها عليه تضحك ، وتناغي ، لزمت كصتها وبشرتها ناعمه عمرها هسه فوك السنه ، حتى الكارور بلش يصغر ضحكت ولج وين كايمه هااا وين ..

جلبت بملابسي تريد شيل ، شلتها من خصرها وحظنتها .. مدبدبه تخبل ، من احظنها كانو حاظنه الجنه ..

دك جهاز عبالي حمد يسال عن طلباتنه .. 

جريته فتحت الرساةل ، اجاني صوت وكف كل شعر جسمي ..

اغفرالي الصار وتعاي .. انتظركم بالكوخ الي بالبستان تندلي ، ..

وكيف لي ان اغفر لمن جعلني اشعر من فرط اذيته لي ان الله لايحبني ...

ليعلنك الله عند كل امين يبوح بها المسلمين بعد سوره الفاتحة ..

ولا يقبل منك عملاً حتى لو قبلت حجر الكعبه الف عام لا عفى عنك ولا تقبل منك التوبه .

……….. وهل للباقي حكايه ………….

اعذروني اذا اكو اخطاء املائيه او هفوات في بعض الفقرات لان البارت طويل جدا وحبيت اجاوب عن كل الاسئله الي ادور براسكم ..

وانتهت قصتنه وياكم ، رحلتنه بهل قصه استمرت من شهر ال٣ وهسه شهر ال٦ .. اخذت حيلي والله تعبت حيل بسببها. 

برغم وصلتني من فتره طويله بس ترددت اكتبها لحد ماتشعجت اخيرا ، القصه انختمت في ٢٠١٦ وهذا حدي وحد البطله هنا وتكول كاافي خوفا على حياتهم وعلى هوياتهم واماكنهم  ..

يمكن اسوي جزء ثاني بيها او يمكن لاا ، ماعرف ..

ماحب اضغط عليهم اكثر من هيج ،

كل الموده والحب والتقدير الكم ولمتابعتكم ، ولتفاعلكم  ، وللاخت ام عبدالله …

انتظروني بقصه جديده ،، ان شاء الله تكون مختلفه كالعاده .. اعذروني اذا جرحت احد او ضايقت احد دون قصد  ..

اضغطو متابعه حتى يوصلكم كل جديد 💜

كروب الفيس .. ( كتابات اسماء ديمير )

الانستا ..  asmaa_demer

كروب الفيس  ...  كاتبات وقارئات العراق