رواية قاع الشياطين الفصل الثالث والسبعون 73 - بقلم اسماء ديمير

...............☆البارت السادس والستون ☆............

#قاع_الشياطين(البصر والبصيره)

#بقلم_أسماء_ديمير

و

اكفه  ماتحركت وسلاح بيدي اريد ارفعه مابيه جمدت اديه و ثكل جسمي ..

من تقرب عليه فزيت لحيلي وجهته عله كبل بنص جسمه خليته ا….

وجهت السلاح باتجاهه ناويه اضرب اي ارمي ليش اخاف ..

وكف صافن بوجهي ، وجه بلا ملامح ..ماحسيت بخوفه ابد ولا ارتباك وكانو منتظرني انفذ ..

اديه رجفت لااراديا برغم السلاح موجه عليه ..

حجه برود اسحبي القسام ..

بلعت ريك ، كرر اسحبي اقسام و تاكدي اكو طلق و يله ترفعي ..
رمشت بعيوني دموعي وكعت ويه رمشه ، نزلت السلاح اديه مو ثابته ؛ تقدم عليه بسرعه لزمني عطت مخترعه ، سحب القسام بسرعه و خلاه بصدره و عاط اضربي ..

ارمي يله ، جمدت بمكاني ابجي مفزوعه ، خله اصبعه فوك اصبعي يريد يضغط على ناد عاط بوجهي يلللله ارميي ..

بجيت خايفه و اديه ترجف ، صاح ارمي يله  على الاقل اموت على ايدج انتي ، حتى موتي تصير اهون علي ، ماكدرت اوكف من الخوف و خرعه ، صاح بيه جبااانه يله ..

صرخت وخرر و خرعني حيووان اني مو مجرمه مثلكم ابتعد عني ..
حاولت اسحب نفسي ابجي نوب هو جلب بيه ، عطت ولك وخرر الله ياخذك و خرر ماريد مااريد ، ماريد الوث اديه اني مو مثلكم والله اني مو مثلكم ..

دفعني وكعني ليوره ضل السلاح بيده رفعه عليه لعد اني اكتلج مال يضل واحد بينه صعبه انتي نقطه ضعفي طول عمري انا ماعندي نقطه ضعف ..

اي واحد بينه لازم يفارق لو انتي لو اني ، غمضت عيوني حيل ابجي .. رجعت جسمي ليوره سندته على الفراش ..

حرامات بيك ذاك الحب ودلال .. حرامات بيك دموع عيني..

حرامات بيك الصبر ، حبيتك واحترمتك وصنتك ..

شلون هنت عليك تنام وتاكل وتباوع بوجهي وانته ظالمني شلون كدرت ، ظالمني و ضاحك عليه ..

شلون نفسك تتقبل تكتل ناس و تزوج بنتهم فوكاها ..

صوت رجليه تقدمت .. بجيت لاتوصلني ، والله ماااسامحك ولا ابريك الذمه طول عمري مسلمتك بيد الله الي ياخذ حقي وحق اهلي وحق اختي .. حق ناسي واحبابي كلهم بركبته ..

لزم وجهي بديه نترت بي وووخر ..

صوت شهكه مالته سكتتني .. 

ماعرفت اهلج ..

 قسم بالله ماعرف اهلج ، ماجنت اعرف هالناس تخصج يابياض روحي.. . 

دفعته اوخره عني كاره ريحته وتنفسه ، ضغط باديه حيل على جسمي حاظني  حجه بنبره ندم  :- اسمعيني .. انطيني مجال لا تسمعين من طرف واحد ، ماراح اجذب عليج وداعتج ، انتي حتكتشفين الصادق بينه من نبره صوته ..

دنجت راسي اشهك ، جسمي منهار واطرافي انشلت ، كمل كلامه اسمعيني بس ، والله نويت انعدل بس محد نطاني مجال ، يوميه اكول اليوم انهي كلشي وامشي زين ..

لحد ماا عواد اجه بيوم وضل يلح ويصر اكو رجال راح يروح يجيب بضاعته من المطار وهل بضاعه هي مصوغات ذهب ومجوهرات ويردد صيده سهله نوكفه بالدرب وناخذهم منه ..

بالاول اني ترددت بس من اصر وضل يهدد يروح بحده خفت لا يسولنه كارثه لو يكتل الرجال ..

بحثنه وعرفنه موعد الطيارة و شوكت يروح يجيبه .. راح وياه بشار و ستار .. 

جنه متوقعين السالفه هينه لان شارع فارغ هو لوحده مجرد مايكسرون عليه بسيارتهم ، يخاف ويوكف و ياخذون البضاعه وخلص ..

بس الفاجئهم السايق الي هو ابوج ماوكف ونوب وياه مره ..واكو شخص هم ثالث .. سيارتهم داست بانزين وعواد اصر ان ياخذ الي يريده .. ماخاف ولا تريث ولا تراجع عن الموضوع ..

انكلبت بيهم السيارة هذا الي اعرفه ماتوو عاشو ماعرف .. بس الي يريده عواد حصله ..

ورجعو ثاني يوم يله افتهمنه الرجال ومرته توفوو ورجال الثالث دخل بغيبوبه .. تركت السالفه اني من يومها الله يشهد علي وحرمت هاي الشغلات ..

بس عواد من شاف بضائعه وحجمها نوب لاف على بيتكم  حسب ان الي بالبيت اكيد بكد الاخذه من السياره .. جنه نسمي بيت الصايغ ..

ضل يلح اسابيع جنت رافض لان اني كلت بس هالمره وخلص كافي الصار ،  حلفت بعد مادخل بهيج شغلات… بعدين وصلني خبر عواد ديراقب بالبيت وراي ويسال على كم شخص عايش بي عرفت مراح يعوف البيت الا يفرغه على ايده ..

خفت يروح لثروت و يتصرفون بكيفهم ويجفتون على البيت بدون اذني وتخطيطي ،وهم تصير بيها ضحايا وجثث ، 

اتفقت وياه اخر مره اخر مره نسطو على احد ، اخذ الموضوع كم يوم وراحو ودزيت وياه عدي حتى اضمن مايصير شي ولا عواد يجن وهم يستخدم سلاحه ..

وداعتج عندي ماعرفتج انتي منوو ولا اهلج منوو.. الا بعد ماتزوجتج .

جنت مكلف عدي يسال عنج بس ماجابلي خبرج كله .. جان يحجي الي اطراف كلام ، واني هم ماهمني اصلج وفصلج حبيتج وخلص ..

شفت بيج باب الحياه نظيفه ، شدراني اني وين سحبتج …

مد ايده لزم شعري يتوسل ميررررال وداعت اغلى ماعندي ماجنت اعرف اهلج ..

حتى من عرفت ، ماكدرت انام اليل ، خفت بيوم تعرفين وحياتنه تنهدم ..
همست مقاطعته .. انهدمت من زمان ..بس اني غبيه ضليت ابني بيها على حساب صحتي و كرامتي ..

مسح وجه يبجي و يتوسل :- ميرال .. ميرال شوفي ، اني احبج تعرفين اخذج ونسافر والله هالمره منرجع للعراق وعد شكلتي هااا ..

ماحاجيته ..

ميرال رجلج مضنوك وكلها التمت عليه ، كلها تامرت عليه لا من توصل يمج تهدين ايدي الله يخليج ..

درت وجهي ساكته حتى دموعي جفت ، خلص دمي و النار الي بصدري ماا خلصت ..

كام من يمي يجر نفس كوه ، اني خنست احس انشليت حتى عقلي بطل يشتغل  ..

همس كتلو الفرس العنيده البارحه .. مكسرين رجليها وكاتليها يردون يحركون كلبي بيها ..

مانطقت ..

عدي هم تبره مني و صف ويه ابو طارق وثروت عليه تدرين … كلها تغيرت عليه ..

غمضت عيوني اجاهله …

عافني ومشه اسمع صوت قفله الباب ، ساعدت نفسي وصعدت على الفراش ارجف ..

دثرت نفسي بالغطى ، ماعرف شكد مر وقت بس سمعت صوته بالغرفه ، وريحه جكاير قويه ، كملت نومتي برود ، احس بي كل شوي يرفع الغطى عن وجهي ويقرب وجه من صدري لو خشمي ..

ماتحركت كاره حتى ريحه عطره ، الالم بصدري يذبح .. خفت لاموت بفراشي ، ماشوف جزائهم ..

دك جهازه واسمع يحجي ويه شخص يكله هاا سلمان .. اي ادري ..

لا تحجي ولا تنطق وحتى رساىل تمسحهم وراك  . ممنوع سالفه بيني وبينك بس …

تجاهلت اتصاله ، عرفت سالفه تخزين ..

كعدت بعدها هو ماكوو ، ساعه تقريب ال١١ الظهر .. كمت لحيلي مصخنه نااار نار جسمي موجر ..

غيرت ملابسي ريحتهم كلها رطوبه ..توه افتح الباب طلعت بوجهي غزل حجت هاااا بشري عاد ترة ملينه ..

همست بسليماانيه عند صديقه البضاعه ..

شهكت هاااا متاكده ..

هزيت راسي اي ..

وشنو اسمه ..

شنو الي يضمن الي اطلع مناا اني …

جرتني ومشت بسرعه لام زياد دخلنه لغرفتها حجت غزل ام زيااد عرفنه ووين تكون بلسيمانيه ..

ام زياد فزت ؛، حجت صدك تحجين وين بالضبط عند منو ..

حقي ام زياد بالاول حقي …

سكتت شوي وردت طلبج شنوو ..

سياره تجي تاخذني اني وابن اختي  وسياره هي  مال ابن خالتي ..

هاي شنو ماتثقين بينه ..

رفعت وجهي :- للحق ينكال  لااا ، ماعندي ثقه باي شخص بهل بيت اانطيج تردي وتنطيني الاريده .. ابن خالتي يجي ياخذني مناا مو انتو تودوني  .. 

شوكت تقرين عيوني حظرتج وتنطقين ..

البالج شوكت تنفذي ام زياد ..

حجت  بحماس :- هسه اكدر اليووم ..

هزيت راسي خوش ، عند واحد اسمه سلمان عايش بين ديالى وسليمانيه .. 

ضحكت بهدوء عفيه عليج بطله امج وابوج هسه يله ارتاحو بكبرهم …

ابتسمت بهدوء تعبانه ، مستهزءه بكلامها همست اريد جهاز اريد اخابر ابن خالتي ..

حجت تدللني عيوني انتي ولج غزل جهازج .،
تقدمت عليه غزل باستني من وجهي حيل وتضحك ، هااج يكلبي ..

خلت الجهاز بيدي .. اخذته وطلعت للحديقه ، كعدت ثواني صافنه ، صورهم كبالي ..

صوت بشار البعيد يحجي ..

لو صوت بحر الي يمشي وراي ، لو صراخ الطفل جوه بالبيت ، اديه كتبت رقمه ، اديه نفذت الي خطط اله عقلي ..

مو يكولون من عاشر قوم اربعين يوما صار منهم  ، صرت جزء من فكرهم الخبيث اني ، عليه وعليهم النار ، 

 دكيت على رقم عدي ..

مره واثنين ومارد ..

دزيت رساله اني ميرال رد عندي شي الك  ..

شوي ورجع دك بس ماحجه .. 

جريت نفس ، شلونك ابو بحر ..

انطقي ميرال الي عندج ..

شنو شعورك من مات ابنك ومرتك بيوم واحد ..

جايه تتشمتين ولج ..هااا ..

استغفرالله ابد ، بس حسيت بشعوري لو لااا نفس حركه الكلب لو لااا .. ماعتقد تحس ، ماتحس انته عدي انته مو انسان اصلا ، 

جريت نفس اعض بشفتي مقهوره :- ماراح تحس بفقدان اللاهل والاحباب مثلي  ،  فوكاها كتالهم كبالك وانته الغشيم ..

تاكل وتضحك وتنام وتعاشر كتال اهلك .. 

حجه وبصوته الرجفه .. شرايده ..

اريد اضوكك الي ضكته اني .. تعرف كتال مرتك وابنك منوو ..

صوته رجف ورد عليه لاتلعبين باعصابي لا اشعل عشيرتج ومحمد ادفعج ثمن غالي ..

-ابنك ومرتك مراح يسامحوك ابد عدي ، لان ماتو مظلومين دمهم بركبتك ..

-عاط باذني حقيييييره حقييييره شرايده ..

-كتال عايلتك نفسه الي كتل عايلتي ..

سكت ما نطق حتى نفسه انكتم ، كملت برود :- عواد كتال ابنك ومرتك ، وام زياد وابو زياد هم الهم ايد هم وصلو خبر طلعتنه لثروت بيد غزل .. اي ثروت نفسه الي انته متعاون وياه هسه  ، كلت اسويلك خدمه شفت شلون اني احسن منك ..

رغم مااذيتوني اني جايه ابري ذمتي ..

صوت البجي مالته طلع ويردد بصوت ناصي يابحر يابابااا ياابحر ياعيون ابووك …

دموعي نزلت قهر على ذكراه لهل طفل البريئ .. همست انته رجعت تراجي الي ذاك اليوم موو ..

سكت ..

انته لو بيبر ..

همس من بين دموعه وصوته الي اختنك .. اني … غمضت عيوني .. الي جنت رايدته اخذته بحجايته هاي وعرفت الصادق بيهم منو ..بس بعديش ياكلبي .. 

-خطيه كل شخص مات بركبتكم كلكم ، ارواحهم راح اطاردكم بالدنيا وبالاخر .. بنومكم وصحوتكم .. مقهوره عليكم اصلا ..

توه اسده ورد انقهري على نفسج نهايتج سوده ويانه انتي ، حاولت اساعدج بس انتي هم مثلنه نفس طينه الي  انخلقنه منها..

ضحكت من بين دموعي نهايتي هالمره اني حكتبها مو انتوو ، اني هالمره راح اتصرف مو انتو ، اني راح اكتب نهايتكم ،  سديت جهاز بوجه .. 

خليت جهاز بحظني ساكته ، ريحه الحديقه وريحه ثيل الي مبلل ..
حتى عيوني خانتني ، نظر شوكت مايعجبه يرجع وشوكت مايرجع يروح ، ديما نستني بعد مادكت عليه وكانو خلص وكتي وياها ..

رفعت جهاز هو اني منو عندي من بعد الله محد ..

اختي الي راحت للشمال بلا مايوجعها كلبها عليه ..

لو خوالي الي مادور على اخباري اصلا ..

محد يهتم لامري ، ان متت وان عشت وحتى ضنه ماعندي انقهر عليه لو يضل بالي عليه من بعدي …

غركت الكل بخيري و بطيبتي ضنين يجازوني خير ..

بشار الي صرت اله اخت وتالي يطلع هو من الناس الي مسؤل عن موت اهلي ..

لو منو بيهم ، هالمره اني حاخذ ماانطي ، حتى لو احترك بالنار مو مهم ..

حشعلها بيهم والله .. حذب بيها الحطب وبانزين شكد ماكدر ، اذا ماخليتهم ناس تصفي ناس ماطلع ميرال ، كيدهم في نحرهم ان شاء الله ..

مسحت الاتصال و الرساله ، غزل اجت تاخذ الجهاز حجت هاا شوكت يجي ياخذج ..

همست باجر الصبح ..

ردت معناهاا لازم اليوم التنفيذ …

هزيت راسي اي .. 

زين .. راحت تركض تكول لام زياد .. اني بطني كطعتني من الالم خاصه صفحتي احس عبالك كليتي تعبانه جوز قله ماي…

كمت من مكاني دخت كعدت بالارض لازمه صفحتي ، دايخه ومتاذيه ، سندت نفسي كوه سحلت روحي ليجوه ..

ام زياد تلكتني حجت اليوم موو ميرال ..

هزيت راسي بدون كلام ..

دكت على ابو زياد وردت اليوم حجي كول لعواد نفس ماتفقنه ، خلص باجر ان شاء الله  هيج وقت احنه بتركيا ..اي استعجل ..

كعدت بصاله ماتحركت خفت لا يغدرون بيه اني هم مددت بصاله ، خاايفه ميرال ..

خايفه منهم ..

لا مو منهم خايفه من المصيري المجهول ، ماخايفه من الموت الله يشهد اصلا الموت الي راحه ..

خايفه لا ماينوخذ حق اهلي وحق عمري وحق صحتي وحق اختي ، خايفه لايعيشون بنعيم بجالي و بجال اهلي …

لازم يدفعون ثمن حتى لو اني اوكع وياهم بنفس النار بس المهم وكعتي تكون بنتيجه مو هيج ..

اني اختار احترك مو هم يحركوني ، عليه وعليهم ..

سالفه ابن خالتي ليش اني زوج اجيب ابن خالتي هنا وتالي ينكتل ، شنو ذنبه ماعندي استعداد اشيل خطيته ابد ..

رجع بيبر المغرب ، من دخل اني يله دخلت للغرفه ، ام زياد حاجته شوكت نسافر بيبر ..

رد بهدوء بكيفج .. 

حجت باجر لازم نطلع كظينه وقت هنا بلا فايده ..

سيارات باجر تنقلكم لمطار بغداد من مطار كبل للتركيا 
هاهيه ..

جرت نفس مرتاحه وحجت:-  صح احنه حق نوكف وياك هسه بشدتك وخاصه ابو ثروت وطارق والحجي زعلانين عليك بس ميخالف شده وتهون بطل انته مينخاف عليك ياخاله  ..

احنه شبيدنه عليك ياامي شوفه عينك عواد مايعتمد عليه وابو زياد مايفتهم بشغلكم زين مو مثلك واني وغزل نسوان .. دومك انته عدال عشر زلم و عقلك يوزن بلد .. ضلتنه هنا مابيها فايده ولازم نطلع امن النه هم يخف الحمل عليك يااعيني قابل تحير بينه لوبمرتك ..

كم جهه لازم تسد و تحامي ، احنه نسافر حتى تامن وتضل بس مرتك يمك ..

حاجاها كلامج عين العقل توصلون بسلامه .. تقدم للغرفه اني تمددت وغطيت حتى وجهي اتهرب من شوفته وصوته …

مثل عادته مانام مدري نام على الكرسي مادري ، اغفه واكعد اغفه واكعد ماعرف شبيه خايفه وقلقه او لان اعرف دينصبون اله المتفجر*** بسيارته وهسه ..

كلبي والله يرجف يرجف ، وكل شوي عركانه ، هسه يحس هسه يعرف هسه يكشفنه ، كل شوي اكول راح يصير الانفجار ، هسه افز على صوت تفجير ، هسه يتكسر الجام من قوه العصف.. نومي جان اكمال للمسرحيه مو اكثر …

غفيت و صوت بابا يحجي ، بس مافتهمته ..

امي تغلط ماعرف عليمن .. ركضت ادور صوتهم وين باي شارع بس ماكو اي بيوت او ملامح للحياه ..

اركض مثل الخبله على صوت بابا يكلي ميرررال هنااا بابا هنااا كبل ..

ركضت بالاتجاه هذا بسرعه مثل مجنونه خايفه فجأءه وكعت على وجهي وهم نفس بركه الطين وخياس ..الي دوم اوكع بي بالحلم ..

بركه كلها طين وماي فتحه بنص شارع ، رفعت وجهي ابجي متقززه من نفسي وملابسي و شخص رفعني من جتفي حيل ..

رفعت وجهي  عليه عرفته ..

هالمره بين وجهه الي ، بيبرر !!!..

ابتسم الي :- اني اغسلج ميخالف حبيبي ..

رديت :- بابا يصيحني ..

-كلنه اهلنه يصيحولنه بالاحلام ميرال ابقي يمي لاتعوفيني …

-ماريدك بعد انته حرمتني من اهلي نكتت ايده حيل وابتعدت اني وطيني و ملابسي المنكعه .. جان مبتسم الابتسامه تلاشت من وجه وبان الزعل ..

مقهور دنج راسه مخذول ، رفع نظره اخر مره عليه رفع إصبعه للسما يحلف ، والله ردت بس حياة نظيفه بس مانطوني مجال كلهم ..

وهاي انتي شفتج اخر فرصه و جلبت بيها وتالي هم نكتي بيه ..

دار ظهره يمشي ، ماهتميت اله اني ركضت باتجاه بابا وامي وعفته هو يمشي بدرب المعاكس الي …

ركضت وركضت لحد مانكطع نفسي كعدت اشهك اريد هوى ..

رفعت نفسي مخترعه اجر النفس كوه ..

لزمت صدري صوت العصافير باين .. بيييش ساااعه هااا بيش ..

كمت من فراشي اركض عثرت بالغطا وكعت على وجهي ..

رفعت جهازز دسته حجت ساعه ناطقه بالسبعه و نص الصبح ..

ركضت بيبررر وينه .. فتحت الباب صوتهم بره صوت ام زياد .. طلعت بسرعه اشهك وووينك ..

وكفت من سمعت صوته هو يحجي ويرد ححول الكم فلوس اليوم ، والشقه حاظره خليتهم ينظفوها ..

وكفت مسحت وجهي ، عركانه حيل وجسمي مصخن ناار جمر ..
صوته حجه ميرال شبيج ؟؟

همست مصخنه ..

هسه اخليهم يحظرولج دوه بس دخلي اسبحي واكلي شي حتى معدتج متتاذه بالادويه ..

حجت ام زياد الريوك تعاي اكلي مصبوب الريوك .. توجهت عليهم .  كعدت… جسمي يرجف والله حتى ريكي يبس لزمت كلاص ماي ارجف ..

خايفه موووت ، شربت ماي وكل شوي يوكع على ملابسي .. استغربت ماساعدني هالمره هوو ، ولا قدم الي العون ..

ذبيت الكلاص على صفحه ، حجت ام زياد هذا صمون يمج مدي ايدج اكلي وجهج اصفر كانو فقر دم ..

بيبر كام لحيله حجه رايح اني .. ذبيت صمونه من ايدي ..

دموعي بطرف عيوني باين عليه اعرف .. حجه تردين شي .. لزم راسي ملت راسي عنه حتى مايلزمني ..

تحرك هو يطلع ، لزمت جرجف الميز حيل اضغط عليه لا سوييها لاسووويها ميرال .. بس اني كمت بسرعه حجيت بيبر ..

همس هااا …

كمت مديت ايدي ارجف .. وينك…

مشيت عليه .. اربع خطوات لزم جف ايدي قربني منه ، حجيت بصوت عالي جيبلي دوه مال الضغط بدربك صدري ديوجعني صار ايام كانو جلطه عندي دترجع ..

هز راسه برود .. مممم ..

حظنته حيل ، همس اله قريب اذنه صار شكد ماحاظني ..

رفع اديه لجسمي حظني يقربني منه ..

همس :-حاقده عليه اعرف .. حقج  اتمنى تسامحيني ، ابريني الذمه ..

شفتي رجفت قربت شفتي من اذنه ، احس ريكي جف ، ونار تلهب من اذاني ، همست ، خالتك واخوك خلو الك متفجرا* بسيارتك التاهو بيبر …

ضعط بجف ايده حيل على خصري هو حاظني ..

-اني ماجذب بيبر ، تعرفني ..

ابتعد عني سااكت ، كانو ماصدكني ، دموعي نزلت ..

ابتعد عني ضليت واكفه جسمي نحلان .. صاح عواد من بره يله بيبررررر يله يمعوود خلي يوصلك بشار حتى يرجع علينه يوصلنه للمطار …

حجت ام زياد احنه نروح ماله داعي ياخذنه بشار ..

رد ابو زياد . لا سياره لازم واحد يرجعها اذا اخذناها احنه منو يرجعها من المطار ..

رد بيبر اطلعو هسه ، ماله داعي رزحه بشار وياكم .. عوفوها بالكراج قريب المطار عود ادز احد يرجعها توكلو يله .. طيارتكم بعد ساعه ..

ام زياد جرتني باستني حيل وطبت على جتفي مانتظرت اودع احد .. 

عواد حجه تكول ابو زياد انته وخالتي  اني وغزل نجي وراكم بس نطمن كلشي تمام و مانسينه شي .  

عفتهم و رجعت دخلت لغرفتي ، اديه عركانه ، 

نطيتهم ظهري و رجعت للغرفه ساكته لزمت المحجر اريد اصعد الدمعه متحجره بعيوني ماترضه تنزل ، احيانا من كميه الالم بداخل الانسان يصعب عليه يختار عليمن يزعل ..

على شنو ينقهر و يتعب .. عددهن هواي يادنيا على شنو ازعل ، كمت ماعرف شنو هالشي ينزل دموعي ..

ينزلن وخلص مقهوره وبس شنو سبب ماعرف حايره ، عددهن يتعب وماينحسب ..

صعدت حايره وبعدها ميرال ؟؟!وشنو هسه  ؟؟!

وين طريقج ؟ ليش هو اكو طريق طول عمرج ماتندلين طريقج ، اني خسرت طريقي من ضاعت مني نانه و تالا ..

او الاصح من ماتو اهلي ، اني انخلقت بلا طريق ..

لو ضاله يم ابو يقين مو ارحم لو كعدت بشارع مو ارحم ؟

فتحت الباب ودخلت ، وكفت افتر بالغرفه ، لو هم لو اني ..

خلي ناس تصفي ناس هسه ، جسمي كزبر حيل وانتي منو يصفيج هااا تعرفين جايج سره بس على ايد منو ؟؟!

كعدت انتظر مصيري حالي حالهم ، معقوله اتحاسب لان كتبت نهايتهم اني على ايدي لو هذا حقي العين بالعين و السن بالسن ، 

مو الله سبحانه وتعالى حلل قتل القاتل ، او دفع الجزيه ، ماريد جزيه اني ، اريد موتهم وسويته هو اخذ الحق ، 

دقايق مو طويله و فززني دوه صوت انفجار قوي ، لدرجه الجام طك و البيت انرج ، غمضت عيوني حيل ، دنجت راسي ابجي منهاره ، انحنيت لزمت ركبي مابيه اوكف بعد ..

خارت قوتي كلها ، كعدت بالارض على ركبي ابجي ، ياريت متت بيوم الاحادث  ياريت خسرت روحي مو بس نظري ..

شفايدتي اني هااا والله مالي فايده ، لزمت راسي ابجي منهاره ، حذرتك سويت الي عليه يافرات ، سويت الي وجهني اله ظميري ، بس اضن انته اختاريت الموت …

انته اختاريت طريقك و ياريت طريقك الصالح ، رفعت شعري باديه اشهك سمعت الباب انفتحت مانداريت ..

جنت اعرف مصيري شنو ، متاكده مليون بالميه ام زياد ماينوثق بيها لازم تنهي كلشي حتى محد يشاركها الورث  ، بس سويت الكدرت عليه كشفت كل الاوراق حتى اذا متت مطمانه محد يضل وراي عايش ومتهني منهم ..

، لان عدي ماراح يرحم عواد وبيبر وام زياد …

ولا بيبر اذا عاش  راح يرحمهم ، صدك شعلتها بيهم بس جنت اني شراره هاي النار .. اني جنت الجدحه وهالمره بارادتي اني علقت نفسي بيهم  …

خطوات وراي ماتحركت ابجي ، غمضت عيوني انتظر مصيري ، ثواني وانلفت على وجهي جيس لاليون .. عطت بصوت مكتوم ورفعت اديه لوجهي ..

اندفعت بقوه للارض على وجهي .. ضليت اهامش اريد افك وجهي من الجيس ماكو ماكدرت ، شخص مصعد ركبه على ظهري و ضاغط عليه وجسمي بقوه  .

جيس صاحب صوت قوي ، شكد نتمنى الموت  بس من يجينه الموت الروح تصير عزيزه …

جنت اعرف نهايتي مكتوله وجنت انتظر واكول عادي بس ذاك اليوم روحي وجسمي رفضو الاستسلام …حاولت اجره دفتحت ماكدرت ، عطت بصرخات مكتومه و ربشت رجليه محاوله ابعد الشخص فوكاي عني ، النفس بلش يقل ، و البخار التنفس ترس وجهي ..

اديه بدت تخدر ما الجيس من انتفس حيل احاول اجر النفس،يدخل بحلكي يخنك الذرات الاوكسجين صالحه ..

اختفه الاوكسجين الصالح وضل الزفير الي جنه سم يدخل للجسم ، اديه خدرت و كفن عن الحركه وكعن بالارض ماكدرت افك راسي لو ابعد جيس ولا كدرت ازيح ااصاعد على ظهري ..

ذاك بابا و ذيج ماما ام شعر القصير ، بابا بعده ابن الثلاثينات ، حلوو حيل حلووين اثنينهم ..

واكفه ماما تضحك و مجتفه اديها لصدرها وبابا بصفحها حاظن جتفها مبتسم ..

رجليه خفيفه ماحس دامشي ، عبالك طايره ، الالم بصدري ليش ، شي ديحرك صدري و جهي عركان ، 

بلعت ريك بصعوبه بلعومي كانو متجرح ..  وراح التنفس ،

#يتبع ...

باجر استراحتي وبعدها بارت طوووووويل ان شاء الله ..

حبيت اشوفكم شي هم .. مناخذ استراحه هذا حقي كوني بشر حالي حالكم .. من اتاخر هم حقي كونياني مو روبوت ..

من امارس حقي ويجي شخص يعتدي عليه بكلامه بس لان دامارس حقي لا هنا عيب لاتكولون الي حريه .. حريتك ماتظمن الك تجاوز على غيرك ..

من اريد استراحه اكول الكم لان احترم كل متابعه .. وحتى من اتاخر اعتذر ...واحب الكل ربي يشهد علي لان ٩٩ بالميه منكم بلسم على كلب وهاي مثال الاغلب كلامهم جميل وطلعت النه وحده صفح ..

اني ترى هم مو قليله السان هم الي وجه ثاني من اعصب وخاصه من شخص يجاوز عليه .. بس جمال الساني هو حبا بيكم والله لان تستحقو ..

كروب الفيس .. ( كتابات اسماء ديمير )

الانستا ..  asmaa_demer

كروب الفيس  ...  كاتبات وقارئات العراق