رواية قاع الشياطين الفصل الرابع والستون 64 - بقلم اسماء ديمير

.............☆البارت الثامن والخمسون ☆............

#قاع_الشياطين(البصر والبصيره)

#بقلم_أسماء_ديمير

شالني شيل و ارتفت رجليه عن الارضيه .. حسوي تجديد ميرال واكلبج النهار ليل شتكولين ..

ضحكت تمام ..

ضحكتي كانت مؤقته بس يمه يورد كلبي ، دائما بعده اتعب ، من يبطل الكلام بينه او يقل تنخلق ثغرات و تبعد مسافه بينه ..

كل مابعدت المسافه بين شخصين متحابين تنخلق المشاكل ..

كل ماقل الحجي يزيد سوء الفهم ، احجوو شكد ماتكدرون احجي واجهوو شنو يزعلكم شنو يضوجكم شنو غلثكم ..

من شنو خايفين من شنو مقهورين ليش دتتصرفون هيج احجي حتى المقابل يفهم علتكم وهم تفهمون مقابلكم شنو وليش ديتصرف هيج ..

اصرفو حجي وتعبو نفسكم ماراح تخسرون شي بالعكس قله الكلام وتفاهم بين الاحبه يخسركم ، يخسركم عمر ولحظات حلوه ، يخسركم علاقاتكم الطيبه بخسركم الضحكه والفرحه ..

سكوت وتجاهل والاهمال يقتل الود ..

العلاقات اي علاقه سواء اخوه او صداقه او حب او زواج او او .. علاقات بصوره عامه نعمه .. والنعمه اذا انهملت تزول ..

لاتخلون النعم تزول من بين اديكم وانتو تتفرجون تصرفوو واجهوو و قاومو ..

نمت بحظنه نومه طفل بحظن امه شبعان مامن ومرتاح ادي على جتفه الموشوم بوشم ، اعرفه من اثر الحرق و ندب الي عليه ..

وره ساعات من كعدت همست كاعد بيبر ..

رد اي .. صوته مو مال واحد جان نايم ..

شبيك .

دافكر ..

بيش ..

بكلشي ..

عواد مايرجع يسافر ..

باين ماناوي ،

خالتك سكوتها يخوف جانت تعيط وتون وكالبه البيت فجاه سكتت مرعوبه منها اني ..

همست بهدوء جن صافن بشي .. اعرف ، 

ابو حمد رجعه للشعل بيبر ..

ماله رجعه سدي سالفه ..

بداعتي عندك ، ابنه مريض توه سوله عمليه ، و يرادلهم راتب علمود يكدرون يعيشون .. 

سكت ..

بيبر الرجال اني طلب منه و فشل يكلي لاا راد عود يردلي المعروف ماباله اي اذيه الك سواها بطيب خاطر مايعرفون الاذيه هذول ..

رد يصير خير ..

ترجعه يعني هنا ..

لاا مو هنا اشوفله غير شغله يمكن اخلي عدي يشغله عنده بالمكتب ..

متعوده عليهم اني ..

كافي ..

سكتت ايست يرجعهم بعد ، بس المهم رزقهم ماينكطع واشيل خطيتهم ، احجي ظميري ماجان قاسي وياي ، راعاني عطف عليه ، والاهم ماينطي بيه رغم مااني دوم احجي عليه وماراضيه بتصرفاته ..

جانو مخوفيني منه هيج عبث ، ماشفت منه تصرف سيئ وياي بس وياهم وهم يستاهلون ..

احجي الحق غير ، منو صادق بيهم ونظيف ، مابي ذنوب واخطاء ...

ديما الي خانت رجلها وحبلت ، لو عواد الي دربه درب زنا و ذنوب لو غزل لو ام زياد الي ضحت باولادها علمود الفلوس والسلطه ..

لو عدي المنافق الي يريد كلشي يمشي على مزاجه وبمخطط منه واذا ماجيت على كيفه يكرهك عيشتك ..

كلنه مذنبيييين كلنه ... يمكن فعلا هو الضحيه الوحيدم بينه ..

تالااااا .. 

صبح الصبح واسمعه يكح بره بالصاله ..

جن ديتقيئ ، عفست وجهي خرب ، اني هم لعبت نفسي ، صح الالم خف لان مبتعد عني و خلصانه من واجباته حتى حكه خفت حيل ويه العلاج ..

بس لعبان نفس مستمر وديزيد ، لابسه دشداشه ربع ردن كصيره كرشي مامبين توه يله عود شهر و اسبوعين ..

وجهي منفوخ مدري اني سمنانه ، وكفت اباوع على نفسي واديه صاير بيها شعر يراد اشير ، شوو دشوف شواربي تقربت من المرايه سمعته هو يهوع و يتقيى..

بلعت ريك انعل صفتك لعبت نفسي ، نوب توه ماكله عنب وحمضت عليه معدتي  ..

هو كرر الصوت واني ركضت على سله زبل خليت راسي اريد اتقيئ ..

صوته ليمي ، جن هو بالحمام ، ماكدرت اضبط نفسي و رديت على راسي ..

لزمت معدتي تقلصت متت عيوني تريد تبق لكدام ..

رفعت راسي اجر النفس ياايمه ياايابه ..

هو رجع كرر الصوت واني دنجت على الواهس ارد على راسي اشتعلو اهلك يادنيال حمووت ..

اني شكد اتقيى مالي صوت الا ذاك زمال تقيى مالته شعلوه ..

متت كعدت بصف سله الزباله دايخه ولازمه بطني يمه فرغت معدتي وذاك بعده كمت جريت بطل غسلت وجهي و تمضمضت ..

مشيت للثلاجه اشوف علج صخام ..

لكيت بس فواكه و نساتل و عصاير جريت عصير و شربت شوي سديته ..

كعدت شغلت التلفزيون اضيع صوته درت على مسلسل و عليت الصوت ، كعدت على الجربايه بحظني ماعون فواكه مالي نفس للخبز وهالسوالف ..

حبالتي على فواكه و العصاير صارت ، دخل هو بعد ربع ساعه يكح بهدوء وجه احمر طماطيه ..

هو من الله وجه وردي نوب يحك ينكلب طماطيه ، مشه يجر منشفه ، جرها ورجع للحمام دايخ عبالك مريض حتى ماباوعلي ..

دنجت اكل موز وامطك بي ، شوي ورجع سابح و الماي ينكط منه النظيف عوجت حلكي ..
وكف ذب المشفه وجر ملابسه داخليه يلبس اني عين على تلفزيون وعين عليه و اكل موز .

رفع راسه لكاني اباوعله ..

نزل نظره شاف موزه بحلكي ، حجه ماشالها بالعتها كلها ...

عضيتها حيل بقوه و اكلتها بشراسه ،وبلعتها ، رفعته تك حاجب ..

حجه حشه مو نسوان وحوش غددي ..

مارديت عليه عيوني عليه وكلبي متاذي منه كلامه يحجي بدوم ميوزنه ودائما كلامه يوكع على كلبي مثل الجمر ..

كلام الي نحبهم دومه يوجعنه ..

جر ملابسه يدردم نايم جوه بصاله صار فوك الاسبوع ماسالتي ولا شفتي شبيه ميت عدل ابد ..

لاشاكل لاشرب شلون عايش ماكوو احساس ..

اني اباوعله بطرف عيوني و اكل بهدوء .

اندار عليه بلبس قميصه حجه اترسي بطنج اترسيها كله بتعبي وفلوسي ..

نترت بي واجبك والله شكو ماخذتك اذا متصرف عليه اباوع لطولك .

السانج لا اكصه .

والسانك انته وكلامك ؟؟

جان يدكم بالقميص وكف نزل اديه اشر ، وشبي كلامي يابه..

الي يغث ويقهر ويضل يحفر بالكلب ، اني مره حامل داموت وانته منا تقهرني وتكسر بخاطري ..

فتح عيونه شمسويلج انتي هاملتني ولج داحس نفسي حيوان بسببج يكرم الله هم الجلب ماتعاملي هيج مشمور بالحديقه بنص الوصخ ورطوبه وذبان ماتسالين ليش يابه هاا ..

لو جلب هم ادخلو جوه للبيت باليل لو تذكرو بلكمه الا اني ولا عبالك مزوج ليش بيش مقصر وياج ..

ضليت مبرطمه مقهوره اتنفس كوه حجيت كوه و كلامك ..

ياهوو ..

كله ياهو منهم من تعيرني بعلاقتي بيك كبل ، لو تكلي جايفه لو تكلي تستشرفين هاااا ياهو لو مامقدر مرضي ودوس على كلبي واذيتي ياهو منهم ..

رجال تالا اني قابل حايط مدده يمي انتي وشورت يادوب يغطي طي** و اني نايم شسووي هاا ..

نترت حيل .. ما البس شورت بعد هااا ..

هو بس شورت وهاي الدشداشه طالعه نص افخاذج و دلعه ..

البس جفن يعني ..

حتى لوو احنه زلم نباوع على الزمال مو بس ام الجفن .. 

شلون يعني مشكلتك انته بس هاي .

لاا ماعندي مشكله حتى نومه خر* بيها كرهتها ..

بعديش بعد ما جرحتني بالكلام وقهرتني واني حامل وجوز طفل يطلع احول بسبب قهرك ..

حجه مفزوع :- هاي شعليها بالطفل شنو يطلع احول ولج ..

بسببك غير ..

-اكلج انعل اهلج والله شنو يطلع احول ابو عيونه خضر وامه عيونها كبار ماقبل يطلع احول والا قسم برب المسيح ترجعي ماتخلفي ..

اي ابعد بعد تحى ربك ديكلبك قرد بعد ..

وكف مجتف عود صدك اذا انقهرتي طفل يتاثر ..

رفعت صدري ورجعت شعري وره ظهري ونفخت نفسي ..اي …

دار وجه صافن ضايج .. همس محتار ، و شلون هسه ..

رديت عليه ، سهر ماكو دانيال بره البيت ..

اندار عليه وصاح بيه ، وبيش اصبر الحيوان الي بداخلي اني هاا ..

رديت بثقه وكفت لحيلي ، افتحلك ملهي هنا بالغرفه واخليلك نشره حمره و البردان نغير لونهم ، واشغلك هذول الشمعات المعطره هنا و ساجده عبيد للصبح ، هاا شكلت ..

عقد حواجبه لااا ساجده لاا مالي بهذا مود اريد اجنبي ..

اجنبي اوربي غربي روسي ميخالف  .

رفع حاجبه الي يسال  .. تعرفين تركصين مثل ذيجنه موو ..

نتعلم …

و طكين اصبع ..

انجرب ..

تفرين شعر ..

واهز صدر هم اي ..

بلع ريك و تصبين الي مشروب ..

اهااااا انعل والديك ترى دانيال مصختها كلش  ..

لا هاهيه لا صبين نكضيها ركص وطك اصبح شكلتي مو تكولين اااخ وايييخ ماسكت ترى ورب .. 

لا نتحمل وهااا من الاخر اخصمها الك سليببب ماكوو ..

سليب شنو .

مو ادور اجنبني عود كرت عينك يعني نوم ماكوو دكتوره كالت لاا ..

خلي تولي هاي غبيه ..

طفل ينحول دانيال ..

نكت اديه حيل و صااح اولدي فضينه عاد ..

توه شهر يارجال شبيك تحمل ادي شنو انته من طينه ..

شلون لعد ..

غمزت نكضيها مثل ايام قبل الخطوبه ..

ابتسم صدك ..

اي ..

مرت وياه الايام تلزك ، الحلو بي مو متطلب بس بذيج سالفه لا والله يكرع الراس ، من نوع ما يحاسبني ليش ماطابخه لان الطبخ لو امه لو يشتري جاهز ..

غسل الهدوم اني اخليهم بغساله و هي تغسل و تنشف بس اطلعهم اخليهم بالمنشر و بس ..

واكضيها تلفون لو مسلسلات لو اكل ، اما دراستي راحت ونسيتها ، صح تجي بالي صديقاتي و كتبي بس اني بعد وفاه اهلي كرهتها بس التزام واني اكره الالتزم وتحظير شلي بهل السالفه ..

مر على حملي تقريبا اربعه اشهر وبرزت البطن ، الالم خف الحمدلله .. 
حساسيه توقفت مانتشرت بعد ، مادامه بعيد عني اني بخير ، هو صابر اعرفه متحمل كوه ، وخاصه من يجي بره والله ملابسي عاديه بس من سمنت برز جسمي وكلشي كبر بيه ..

هو عيونه عيون النغ* بس يبصبص اكوم يباوع من وره ادنج يباوع من جدام ، هم حقه بس متت مابيه حيل بالكت من اولد تختفي هالحاله وارتاح ..

نوب من يجي اليل يضل يتكلب لو يخلي مخده بين رجليه و يدعي امنا يالعذره انطيني من صبرج ، ويرد تالااا يعيوني كاعده ..

شرايد ..

دانداري علي على شنو مطيتني طي** مطيزتني يعني انتي ..

تعبانه والله التفتت عليه مبتسمه .. ردفدوه لهل وجهه نامي هيج لا دقيقه مد ايده لصدري .. دفعته دووخر بلشنه ..

بس اخلي ايدي هناا داحس نفسي مزوج شبيج خبليني عايش على الخيال على الاقل ..

ضحكت دخليهن يله ، 

ثاني يوم دخل ياخذ السويج .. حجيت وين ..

بيبرس دز عليه ، وكفت حجيت وياه اروح وياك ..

مستعجل وين اخذج ..

لا بربك تاخذني تروح للفله مو ..

اي ..

دقيقه بسالبس جبه مالبس شي ياخرك هسه ثواني .. وكف ماخصر واني ركضت للكنتور جريت جبه ولبستها وطلعت وياه ..

درب كله  يسوق ويوصي ، عين على شارع وعين عليه ..  ديربالج من الدرج  ،ومن المرمر لا زلكين ،.

، لاتاكلين اي شي لا تهيج الحساسيه ، واذا حسيتي بالم دكي عليه حتى ارجععج .للبيت .

تمام ..

لاتاكلين شي من ايد ام زياد ..

عليش المره قابل حتكابلني ملتهيه بمصابها موتت بتها ..

مر على موتت بنتها اشهر مع هذا خلي بالج منها تسم ترى ..

هزيت راسي صار ، 

اندار عليه مبتسم ويركص بحواجبه :- من نرجع تركصيلي وطك اصبع …

هزيتله جتف واني بالسياره خوووش …

واختج مسمومه ماتاخذين بحجيها ..

عوف المسكينه مو يمك ترى …

المهم كسرت خشمها واخذتج غصب عنها ..

هي عافتك بمزاجها والا والله تحش رجلها عليك يطين عيشتك ترى كلبها طيب مابيها اذيه مثل الناس ..

بس عليه طلعت اذيتها و خبثها ..

جوز منها عاد مارضه والله .. 

سكت عاوج حلكه ، من وصلنه هو نزل كبل عليهم ومشه للصاله واني دخلت للمطبخ ..

شفت اكو عاملات جدد حجيت ميرال وين ..

ردو بغرفتها منو حظرتج ..

اني اختها .. عفتهن وصعدت فوك ، شفت باب ام زياد مفتوحه مدده بفراشها ومفتحه عيونها .. وكفت على درج ماكملت شكلها متغير حيل حتى ضعفاانه ..

يمها غزل تشربها شوربه ، وابنها صغير خالته بحجله يمهاا لزمت بطني .. يا هذا شوكت كبر ابنها صلاوات …

ابتسمت هم يجي ابني و هيج بسرعه يفور و يكبر بهالسرعه ..

كملت دربي و صعدت ، وصلت قريب غرفتي القديمه جريت نفس ، شنو هالدنيا قبل فتره جنت ساكنه وياهم ممزوجه ..

سبحان الله الايام والاشهر تركض ركض ..

وكفت كبال غرفه ميرال ودكيت الباب دخلت ..

لكيتهن كاعدات على كراسي بالبلكونه ..

ديما من شافتني ابتسمت حجت اجت اختج يااهلااا ..

هلا بيج بوستها حظنت ميرال كاعده على الكرسي ..

حجت تاخرتي ليش ماصعدتي بسرعه شافت ديما وانتي نازله ويه رجلج من السياره .

شفت ام زياد وكفت اباوع عليها خطيه متغيره هوواي شصاير بيها ..
ردت ميرال فركه الاحباب هيج اتسوي تكسر الظهر ..

رديت الله يعينها مصابها صعب ، ضل بس راسها وراس رجلها ..

ديما كالت لاعدها بعد زياد بس ذاك هج للبصره مايجي ابد ولا يسال ..

حجيت بستغراب حتى من ماتت ايلاف مااجه يعني ..

ماعتقد يدري اصلا حتى لو دره ماتوقع يجرء يجي علاقته بالولد مو شي وحتى ماراضي عن امه وابوو ..

هزيت ايدي شنو من عايله الواحد يوكع بمصيبه حق يلتمون بينهم تتقوى روابطهم مو يتفرقون ..

عوجت حلكها ناس نفسيات ..

همست ميرال بطنج شلونها ..

ابتسمت فرحانه زينه بس مديتحرك بعد ..

دتراجعين مو عليه ..

اي الحمدلله مابقه شي وادخل الرابع ..

الله يكومج بسلامه خما تحسين بالم او تعب ..

شوي وميخالف تهون داشرب مقويات ..

رمشت بعيونها وسكتت ، حجت ديما يوم الالج يارب ..

ابتسمت الله كريم ..

ماراجعتي ميرال على الحمل ..

هزت راسها مابيه شي هو هم بس ماكو هاخيه الي كاتبه ربج يصير اني هم بطلت اطلب خلفه وحمل ، لان اعرف نفسي مو حمل هالمسؤليه ..

حجت ديما يمكن صدك ، العامله نقلت النه الاكل لغرفه ميرال ، شغلات خفيفه ..

عصاير و كعك ، اجت عامله شافت بطني ، وحجت هو انتي حامل ولا ااي  ..

شربت عصير ورديت ااي ..

ولد ولا بت …

رفعت عيوني عليها واكفه فوك راسي ، مادري ..

اهييي لي كده بس ، دانا شايفه انتي حامل بنت والهي ..

رديت خوش يالسونر اشكرج ..

فين المبروكه ..

شنو هاي ..

الحلاوه ياست هانم ..

فتحت حلكي شنوو؟؟

ضحكت ديما ، خلي تجيب بخير وسلامه عود اطلبي الي تردي ..

ردت ميرال ادعيلها تجيب بسلامه هي وطفلها وحلاوتج عليه ..

ضحكت وفرحت ، طب كوويس ربنا يرزوئك بست عيال اولو امين ..

ردينه كلنه ، امين .. وردت اندارت على ميرال و انتي ياست الستات ، بتوم انشالله يفرح البك بيهم ..

ابتسمت ميرال وجها ورد وشمعنه توم ..

على شان يبؤ عيونك التنين ..

اختفت ابتسامتها ، ويه تريد تحجي شخطت سباره بالكراج دنجت راسي اشوف مصدرها نزل الخبل عواد وراه ستار ..

عوجت حلكي حجت ديما عواد موو ..

حجيت اي ..

حجت تلكي سكران و صاير طينه ..

ماعتقد نزل يركض مابي شي ، دنحجي و اسمع صوت طبله تطشرت من كزاز و صوت ستارر لاااا ..

فزينه ثلاثنته وكفنه ياستار ياربي ، لزمت صدري يماا ..

ميرال حجت شكوو ..

شعرفني ، ديما حجت ضلو هنا لا تروحن خاف يمالخون انتي حامل وهاي مشوف وعفيهم ..

ضلينه على وكفتنه واحنه نسمع عواد يتعارك و عدي يضحك ..

همست ميرال منافق هذااا كله منه ، والله هلاك هالبيت على ايديه ..

عواد يصيح والله افتن عليكم والله اوصل الحجي لطارق تجتمعون وراي هااا لان انته اخوي تسويلي فيزه حتى اسافر و ساحه تفضه الك ، مادامكم تخلوني بعيد تحسبون حسابكم اهدم الي تبنو والله ..

مشيت اني اشوف شكوو ..

لزمتني ديما حجت لا ترحين يمعوده ، 

رديت رجلي جوه لا يصبر شي ..

شعلينه بينهم ..

صوت تكسير تكرر و صوت ام زياد طلعت تغلط على بيبر ، طلعنه بسرعه وكفنه نشوف شكوو..

ام زياد لازمه عواد من جتفه وتهد وياه على بيبرس و عدي واكف على صفحه مبتسم ..

ستار لازم عواد من صدره يهدؤ و رجل ميرال كاعد على الكرسي وره المكتب صافن على اخوو مايحجي ..

ردت خالته بغل ، ماكفاااك مااكفاااك الي سويته هااا ، نوب تريد تحوش على كلشي وطلعنه من مولد بلا حمص ..

رد شغل قديم بحححح منا وجاي عقارات وبس ..

عاطت مو على كيييفك موووعلى كيييفك ..

عواد رد ومحمد وداعت ابني هاااا دسويهااا وبطلني من شغل سفريات الا اروح ويه ثروت اشتغل وكول بعدها خسرت اخوويه ، تضحك عليه انته تمشي وره هذا نغل واكف ضدي ويااه ..

-مالكم شي عندي شغلي واني حر بي ويامن اشارك وياامن افض ..

-عاط عواد بي بيبرر ارجع شارك طاارق يااخوي ارجع جوه جنحه لابو ثروت ونرجع حبايب مثل قبل لك دمرناا هذااا دمرناا شوف شلون واكف مبتسم فرحانه على تشتتنه ..

-رد عليه عدي انته عبد وتضل طول عمرك عبد تحب تختل جوه جناح واحد.اكبر منك ماتحب تصير حالك من حاله ماتحب تصير احسن منهم ..

-ولك اني اعرررف نفسي موو كدهم ، ولك فراات تريد تتناطح وياامن ويه طاارق وابوو لو ويه ابو ثرووت نسيت صار قبل كم سنه وشلون دخلولنص بيوتنه ، جايز من ركبتك انته ..

-رد بيبر عليه اهدء انته اذا مااعجبك الي دنسوي انسحب وعيش بالبنان ويوصلك مصرووفك ..

-واعووفك بين ادين عدي موو ، ولك فرات شغيرك جنت تفره فرر ولك محد يوصل لعقلك شجاك مشيت وراه ..

-اريد ارتاح يااخوي تعبت ، اريد اشتغل بالنظيف واريد احول شغلي كله قانوني كافي خاتل نصي بالظلمه ونص بالضوه ..

-مايخلوووك واني من الناس مااراح اقبل شبي ابو ثروت مو امن الشغل النه سنين مااحجه ويحبك من دخل هالنذل خرب كلشي ..

-رد عليه عدي انته جباان وتضل طول عمرك جبان متحب تتحدى احد ، اتحداهم نفس ماعدهم زلم احنه هم عدنا زلم نفس ماا حامين نفسهم احنه هم نكدر نحمي نفسه وزلمه يتقرب علينه ..

-اني جببااان ولك ارجل منك ومنكم كلكم لزمته خالته تجره هو يريد يهد على عدي واذك واكف بطوله مبتسم ويستفزز ..

ردعليه عواد نهايتك طلقه ياعدي واذكركم ما تاخذون منهم بس طلقه ..

رد عليه عدي تخساا والله اخلي رجلي بط***و بط** الي يفك… قبل لايكمل عواد جر السجين مال فواكه الكباله وادفع ستار واهجم على عدي ..

عطت حيل وياي ديما ..

ميرال صاحت شكوو ..

لزمه عدي ياخذ سجين بس ماكدر عليه ، كوم يا عواد ودجها بصدره ، عواد ذب ثكله كله و نام على عدي ، حاولو كلهم يجرو ماكدرو 

 عدي ماكدر يسيطر يدفعه عنه لان هجم عليه فجاه ..
جره ستار و بيبر من فوك عدي الي دمه فاض ، كام محني لازم صدره يداري الدم و ذاك ماسكت رجع ديضربه ..

هم مجتفي كلهم يصيحون بي ، عدي سجين بصف رجله بس مد ايده عليها و هف عواد غفل  ..

عواد رفع ايده يحمي وجه من ضربه وتجي ترس على اصابعه بس انشوف دم تطافر وعياط غزل و ام زياد تصارخ ..

خليت اديه على حلكي اعيط ..

ديما ضلت تطلم وادك على وجها ، شال نوب كرسي واشمر عليهم عدي ..

ماكمنه نشوفهم من التكامش ، احنه نعيط هم بينهم تمالخو عواد رغم دمه ما عاف عدي وعدي هم جلب بيه ودك بوكسات ..

جروهم كوه مفتكه قمصانهم ودمهم ينزف ..

عواد دنج لزم جف ايده يعيط و يصيح و عدي جرو على صغحه دمه وصل من صدره لحد ركبته ..

ام زياد تعيط ودنجت لاارض تعيط كطع اصاابعه كطع اصاابعه يبووو ..

دنج عواد للارض لازم جف ايده يماااا دخيلك يالهي من المنظر وربي المنظر ماينسي ابد .

خليت اديه على حلكي احاول اغض البصر حتقيى .

لزمتني من جتفي حيل ميرال مخترعه وفاكه عيونها حيل تبجي حجت شكوو شكوو جسمها متقلص ..

بجيت ولج عواد تكطعت اصابعها يمااا ..

شهكت متفاجأه ..

لزمت حلكي اريد ازوع ، دنجت اتقيى بالارض ، ميرال فوكي مجلبه بيه حيل جسمها متقلص و تصيح شبيج ولج شصار و تبجي ..

جرتها ديما تبجي وذولاك يصيحون .

شالو عواد هو ودمه واصابعه وركضو بي للمسشتفى ودانيال جر عدي يشوف صدره و ضاغط على صدره  يداري الدم ويوقفه ..
كعدت 

غزل ادك وتعيط كطعو اصاابعه يمااا يبووو كطعو اصابع رجلي يبوو ..

رد بيبرس يركض للصاله شافها بالارض مدده و تعيط ودك وتلطم على وجها ، هفها دفره برجله ،  كلبها على وجها عاط بت نعال وخررري عن دربي رجع جر عدي ياخذه لسياره ..

دفعه عدي  ، ويصيح ، وخررر وخر عني حير باخوك .

امشي لك حيووان ، انته هم اخووي شغلتكم ماتسولف بس صبركم عليه طاح حظكم .. 

شالوهم و طلعو بالسيارات ، دمهم تارس الارض و عافو نسوان تتعايط بالبيت لوحدهن ..

كعدت على الدرج دايخه من الموقف ، ميرال فوكي جامده تبجي و تشهك ديما حاظنه جتفها حجت مابي شي رجلج مابي شي ..

ام زياد ترد وتدعي على بيبر و عدي و تصيح الله لايوفقكم ولا ينصررركم يالجلاب ، ياااسفله والله الا اطلع حقي وحق بتي منكم ..

غزل ترد شفتي بعييينج شفتي للطماع باع حتى اخو لخاطر مصلحته ..

ردت ميرال مناافقين .. عاطت حيل بيهن مناافقاات ، شعدجن ساكنات بهل بيت اذا ماراضين عليه ..

ردت عليها ام زياد بحقد ولج عميه اجيتي على تالي وكت وعلمج على الطمع وكمتي تردين تكوشين على كلشي على تالي وكت تسيطرين على فله واملاكنه عاطت حيل مقهوره ولج ببببيش تعبتي بييييش ضحييتي..

شو على حاظر كله الج محد يحجي وياج وعينك عينك تطردينه هم طلع الج السااان كوواج علينه محد هجم بيتنه غييرج ولج راس البله انتي.. سووسه انتي وعدي نفس نكااسه هدمو بيتنه بعد ماجنه ملتمين ..

رد غزل حتى خالته يسجل املاك باسمها ام زياد لا غيرج وضعهاا تخوف والله الله يعلم شنو تنقله حجي عنه هو يصدك بيها ..

التفتت ام زياد على غزل وشهكت املااااك؟؟! ياااملاك هاي ..

ردت ذيج اي اي املاك بسليمانيه مسجل باسمها شقه ، و من عدا المجوهرات . عواد سال وعرف ..

فكت عيونها و اندارت على ميرال ، ركضت عليها تهجم وتصيح شيطااااانه ولج شيطااانه ..

ميرال بجت وغطت وجها خايفه ..

وكفت مقابيلها توه توصل نطيتها دفعه رجعتها ليوره .. دوووخري كدرتج عليها بيج خير اوكفي بوجه رجلهاا واذا كتب باسمها شي شنو يعني مو مرته لو تردينه ياخذ رايج امه اخته انتي شنوو انتي و ياخذ رايج .

-اي اني امه واني مسؤؤؤله عنه اني ربيته بعد ماشمرتهم امهم بشارع وراحت تزوجت وخلفت اني لميهم من شوارع اني جنت اروح اتوسل وابوس ادين حتى اكدر اواجهم  بالحبوس واوديلهم ملابس انيي ..

اني تعبت اني الاديه تفطرت من خبز و التعب عليهم من كبرو هيج جازززاني بالاخص هوووو هيج يجازيني واني فضلته على ولدي وعلى ابني زياد الوحيد…

ديما جرت ميرال وكعت على درج تبجي منهاره ..

غزل ترد تحجن عليه كحب* وام فلوس وانتن طلعتن اسوء مني من جوه جووه والله اني الشريفه العفيفه مو انتن ..

رديت دكلي خر* انداريت على ميرال شلتها من الارض معدتي احسها صعدت لحلكي ..

الكاع دم .. الدرج كله تقيى ، واني دايخه ولازمه بطني ، و هاي ميرال صارت خركه بين ادينه سحلنها كوه اخذناها للغرفه ..

وعفنه ذيجن بينهم يصيحن و يحجن ، دخلت للحمام اذب جبتي الي راحت انعدمت غسلت وجهي وراسي بماي بارد ..

طلعت انشف بوجهي ميرال واكعه بالارض مكرفصه تشهك وصافنه ..

هزيت ايدي عاد شيفضها وياج انتي ، اسمع منا اطلع منا عليش البجي وزعل ..

ماردت ..

ديما دخلت شايله ابنها وكعدت على جربايه اطب على ظهره ساكته ضايجه ..

صوت غزل ليمنه تعلع ..

مااجو الزلم طولو ، دك دانيال كال راح نتاخر باتي يم اختج ..

حجيت شصار ، رد عواد بالطوارى يحاولون يخيطون اصابعه بالكت ترهم ..

و عدي بغير مستشفى عنده فتحه من جتفه لصدر بالسجين هم خياط ماعرف اخابر واسال ...

تتاخرون يعني ..

مادري بس نامي ارتاحي انتي ، ديربالج على الطفل ..

تمام ..

سديته منها ..

حجت ديما هاا ..

رديت عليها  جن رجلج راح يصيرون عنده ثمن اصابع بدل العشره ..

ابتسمت دارت وجها مشمته .. 

ديما قفلت الباب وفرشت بالارض حجت نام هنا كلنه مامن انام لوحدي ، على ساعه يحركن البيت و يكولن هو احترك ..

مددت تعبانه بالارض على الفراش ميته غمضت عيوني ارتاح معدتي مردتني ، 

ميرال صعدت على الفراش ماتحجي ، دائما تخبصنه بوكت المصايب وراها من نحجي الها الي يصير ، تنصدم وتاخذ فتره سكووت طويله ..

يمكن تحاول تستوعب او ترتب الصور براسها او تفكر بشي اني ماعرفه ..

نمنه كلنه بين اانايمه تعبانه وبين كل شوي افزز على صوت امير ، لو ميرال كل شوي تفز وتكعد على حيلها ..

لحد ماصبح الصبح ، كعدنه على صوت دخله السيارات للبيت ، ديما ركضت تشوف من شباك فتحت برده شوي ..

كمت اني وكفت بصفها اثاوب ..

نزل عواد هو وقميصه اليابس عليه الدم .. ولازمه بيبرس حاظن جتفه ..

ودخله جوه وراهم ستار شايل علاكه بيضه عبالك مال ادويه ..

مانزلنه اسمع صوت بيبر وام زياد تحجي ..

و غزل تبجي بصوت ، وابنها مثلها ابو راس يخبص بصوت عياطه ، 

صوت طبات على الدرج و صعدت رجلين ، تقدم للمر قريب الباب جر اليده مال باب الغرفه ميرال ..

مانفتحت دك الباب ، ديما مشت بسرعه تفتحها .. انداريت على ميرال كعدت عدل على جربايه جن تنتظره ..

فتحت الباب ودخل رجلها وكف صافن بوجهنه من شافنه هنا دار عيونه يدور عليها شافها وره ديما كاعده على جربايه ..

جر نفس حجه مشكورات ماقصرتن .. اشرلي رجلج على جيه اطلع شوفي هسه واكف بالباب ..

جريت ملابسي و الجنطه ونزلت ركض ، وديما نزلت وراي هي وابنها تتختل ، بس وصلت لطابق الارضي قريب المرر صغير ،ركضت كبل لغرفتها ..
طلعت للحديقه شفت سياره دانيال واكف مخصر يحجي ويه ستار ..
سلكت وصعدت للسياره تعبانه مابيه حيل حجي ..

سلم هو وصعد ..

اندار عليه شلونج ..

شتشوف انته ..

ضحك .. ميخالف تصيرر ..

عوجت حلكي ضايجه متعودين على الدم انتو والعركات ، الرجال راحت اصابعه ..

رد عنده ٨ غيرهم يشتغلن بعد …

والشرطه بالمستشفى شنو كالو شنو صار على تقرير ..

انسدت السالفه ، 

بهل بساطه ..

اي ..

فريت اديه دوله  لو جيس حب ناس تدخل للمستشفيات مطبره محد يسال شكو ماكو..

حجيت عدي شلونه ..

طلع قبلنه لبيته ..

مو خوش شغله بيبر وكع بين نارين اخو و صديقه شبيهم واحد يكره الثاني ..

عواد طماع وايده مبذره فوكاها غبي ، عدي عكسه شاطر وذكي و ايده خيره يعرف شلون يشغل الفلوس .. ديكله لبيبر نترك سالفه شراكات و نبطل نطلب موافقه من الكبار ونفرض نفسنه بالشغل فرض غصب عنهم .. لان صرنه مثلهم كلشي عدنا عليش خايفين نشتغل بالعلن ماكو شي مضموم ..

عواد يرد لا احنه مو كدهم خلينه احنه بالظلنه نشتغل وهم بالعلن وهم فايدينه واحنه فايديهم مال نوكف بوجهم ونكول نفس مالكم النه لااا ..

-وهسه شلون ..

رد الراي بعد لبيبرس شوف شنو هو يقرر الشغل يمشي عليه بالاخر اغلب العقارات و المطاعم والنوادي اله نسبته اكبر واحد بيهم ..

ابتسمت وتعاركت ويه ميرال على خلك شقه  ، صدك كبووور وبنات فكر ماشايفات وشافن ..

لو يشوفن بيتنه الي يشتريله ثلاث شقق بارقه منطقه بدهوك جان شكالن ..

رجعنه للبيت و دخلت كبل سبحت ونمت ضل هو كلي هاا حتنامين شنو ..

رديت اي تعبانه ليش .. نكتت الفراش زين اعدله دنام ..

دار وجه لا هيج نامي ..

اي .. مددت باوعت عليه هو يفر براسه و يحك بركبته .. حجيت شنو ممترتاح ..

لا نامي حطلع ويه ستار شوي نفتر ..

رفعت جسمي من الفراش هااا هم رجعنه ..

لا وين شبيج وين اكو سهر بهل نهار بس نفتر بسياره شوي ..

رفعت تك حاجب اله .. مارد عليه بعد جر السويج ونزل ..

عدلت المخده جواي ونمت تعبانه ، مرت فتره هدوء ، احس دانيال يميل لعدي اكثر من بيبرس ..

صح دفع راتب دانيال من جيب رجل ميرال بس طلعات دانيال ويه عدي اكثر مخابراتهم كعداتهم سهراتهم سوه ..

سوالف سهر و طلعات ابد مايجيب سيره بيبرس ..

حتى هو يرغب لعدي اكثر ، سالته مره ليش ، رد بيبرس خنوسي مايحجي فجاءه تبكي فوك راسج لدرجه يصدمج ..

ماتحسي اريحي مو مثل عدي لاا عدي صريح و ينطيها بالكصه مايحب افلان اذا خلص مايحبه ويكولها ويبين هالشي ..

بيبرس لااا يسكت ويسكت و يجفت عليج فجأه يزوعج العافيه .

ضحكت خليت ايدي جوه راسي بس حب ميرال ..

هو مثل اختج هم خنوسيه وبيها خبث يشابهون …

لا والله ماتعرفها طيبه هيه وحنونه ..

هز راسه ممقتنع مممم ..

درت وجهي عنه ،  مرت ايام حملي يوم زين و عشره نايمه و اون من ظهري و مناطقي حساسه بلشت تتغير ، وزني زاد ..

ام دانيال خطيه جانت تاخذني تمشيني وخاصه من دخلت شهر السابع ، رجليه ورمن كمت ابجي منهم ..

المغرب نطلع نمشي على شارع العام فد ساعه ونرجع ، دانيال لاهي بالشغل كل مااكله برد مالحك امي موجوده تاخذج ..

لبست شحاطه و ثوب مال حوامل و طلعت وراي ام دانيال شايله بطل ماي الي ، وبنتها الجنطه و تحجي ويانه…

وكفت قريب ابو عصاير اخذت منه ، وكفنه نشرب شوي ،،

واكفه وامص بالماصوله التفتت شفت مره ، ركزت بيها زين .. لان تطلع نانه واكفه بنص الشارع مخترعه ، نوب شافتني اني وكرشي وانصدمت ..

وكعت العلاكه من اديها ، اسامه دنج يشيل البتيته الوكعت من العلاكه …

وكفت لازمه بطني اباوع بوجها ..

هزت راسها واقدمت عليه باهت وجها ، وكفت كبالي نزلت نظرها على بطني حجت متفاجاءه ، حاامل ؟؟؟

ابتسمت شلونج نانه ..

رفعت نظرها عليه مدمعه شلوني يمااا هذا حالي كبالج بس انتي شنو تزوجتي ؟؟؟!

اي الحمدلله .. 

فكت عيونها مدهوشه هاااا..

حجيت فشلانه .. ليش ساري ماكلج لو ميرال ..

#يتبع ...

باااارت طوووويل ترى وبي احداث واااايد .. والي تعترض امممم 🔪

كروب الفيس .. ( كتابات اسماء ديمير )

الانستا ..  asmaa_demer

كروب الفيس  ...  كاتبات وقارئات العراق