رواية قاع الشياطين الفصل الرابع والثمانون 84 - بقلم اسماء ديمير

#البارت_الثامن

#قاع_الشياطين

#بقلم_اسماء_ديمير

ركضت للغرفه مشيت للصاله اصيح ماكو اثنينهم ماكو …

ركضت لباب البيت اصيح عليها ، الباب مقفوله من برة ، جريتها ماتنفتح ،

دورت الحديقه ماكو ، عرفتها وياه ، اثنينهم ماكو ،  جان اكو سنادين بصف الحايط  بيهن زرع ، صعدت عليهم اشوف ، يادوب طلعن عيوني من الحايط وكفت على طرف اصابعي يادوب لحت الحايط زين ، الشارع فارغ يصفر حتى البيوت بعاد مو بيت بصف بيت ، اذا عطت لو تموتين محد يسمعج .. بس اكو حشه القارى جلاب تفتر بالشارع ..

رجعت نزلت انكطع نفسي وين ولى وين اخذها هااا ، شلون يعوفني هيج نذل مايكول يصير شي وهي لوحدها ..
كعدت بالكاع بالحديقه ، بس لاسواها صدك وعاف البيت واخذها .. رفعت وجهي ابجي لا ياااربي مايسويهاا شسويت اله قابل اني ..

مو معقوله يفرقها عني ، هسه واذا تعاركنا ، يرجعنا لادهوك اذا تعب من عدنا ، وين اخذها وين وداها ..

حسبه توديني وحسبه تجيبني رجعت للبيت ادور مره ثانيه صعدت للسطح وهم ماكو ، للمغرب وهم ماكوو جمد حتى الدم بيه ، ساعه ابجي ساعه اسكت ، تخبلت رسمي كعدت على الدرج خليت راسي على الحايط ، انتظر وانتظر هو ماكوو ، غفيت بمكاني ..

توه غمضت سمعت صوت .. رفعت راسي ، تكرر الصوت .. ويص ويص  ، صوت وصواصه ، كمت لحيلي اروح اشوف شنو هالصوت ..

مديت راسي مرعوبة ، طلع الجلب النذل الحيوان ، شايل بيده علاكه ولازم هيف ، دخل .. دم صعد براسي ، شلون البركان حار جمر .. دخلت هي وبرجلها حذاء ابو وصواصه ويضوي ..

ابتسم بوجهي من شافني مثل الخبلة ، حالتي حاله وارجف .. همس ، جبته الها حتى ليش تشلع كلبج وتضلين تصيحين عليها ماترد تسمعين صوت الحذاء وتعرفيها وين ..

مانطقت ..

جبت الها اثنين اخضر هم ،

نزلت نظري على هيف ، لابسه الحذاء وبيدها لعابه ربانزل ام شعر طويل. . غمضت عيوني دايخه ..

شبيج ..

ليش اخذتها بدون ماتكلي ..

شفتج تعبانه كلت اخفف عنج ..

فتحت عيوني لزمت الحايط دنيا تفتر ، توه اندار وخشمي خر دم ، لزمته ودخت ..

ركض عليه هاااا شبيج يمعوده ..

ناوي تموتني مووو اكتلني ليش تخليني اموت بطئ عدي

شبيج ميرال لزمني يكعدني بالصاله .. خله الجفيه مالته على خشمي يسد الدم .. ليش صايرة اعصاب شمسويلج .

دفعته ومشيت لوحدي لازمه خشمي ..

نتر .. شسويييت هاي فوكاها ..

كعدت على القنفه تاخذها بدون ماتكلي وتعوف البيت فارغ ، تريد تحرك دمي موو ..

مالج خلك شفتج تعبانه ردت اريحج كم ساعه ، بعدين ماعرف قياسها الافضل اخذها واقيس الها ..

ماحاجيته بعد سكتت ..

صدك تحجين هذا الي يسوي زين ويااج ..

دروبك هذني اعرفهن تريد تقهرني وتاذيني ، وين عقلك انته مو تشوف وضعي ، مو تشوف صحتي مو مال هبطات شنو من بشر انت ..

لااا انتي موصاحيه ابد والله ، اخذتها داريحج منها شويه ، والله هذا قصدي ..

جذاااب شكد جذاااب عزه بعينك ..

فك عيونه مايعرف شيحجي وياي ، عافني وطلع بره البيت ،ركع الباب دفرة برجله ،  ضل هو مطنكر يومين كالب وجهه ،

حتى اكل ماياكل ويانه ، كظها يخابر ، اسمع بي يحجي ويه وحده يسالها عن امه وابو والبيت وشلونهم ..

، ويرد مو هسه اجي كتلج اني وضعي غير ، انتي سدي مكاني ودبرليج حجج كوليلهم مسافر عنده شغل اي شي ، ماكدر اجي واشوفهم حاليا الافضل اضل بعيد عن البيت هالفترة ..

ماعرفت منو هاي ، اميرة جابت الملابس وكالت امي اتكول بعد لادز علينه ..

همست الها خجلانه .. ليش ..

عوجت حلكها وصفكت ايد بيد غير من وره رجلج ..

فتحت عيوني شسوه رجلي ..

طلع يلعب دغش ويه رويدا .

هاااا عزااا عيب لج عيب ..

والله ماجذب اني سمعت رويدا تكول لبت عمي احبه وتبجي ، وماترضى تاكل ولا تشرب وامي لزمتها وكتلتها ..

هو شعلي ..

شدراني ..

لعد ليش تتهمي ويه اختج مو عيب حرام اسوين هيج ..

غير انتي كتيلي ..

شهكت عزا شكتلج ولج ماكتلج شي يمااا تجذبين نوب ..

غير كلتي رويدا راحت ويه عدي ..

اي ديوصلها لبيتكم لا يلكفها جلب لو شي بالشارع هذا الاقصده ..

رفعت تك حاجب وتكول مممممم عود صدكت ..

لاصدكين عيني شنو يعني ، يله روحي ..

لا دشوف ..

شتشوفين ..

شعدها بتج منين الها هاي اللعبه ..

اشتراها عدي ..

بس يصرف فلوس هذا رجلج ..

شعليج انتي هااا تردي يموتنه من العوز يعني ..

شبيج عيني لاتخافين مانضربه عين والله يالله وكفت تهز بيدها وقسم بالله السان دلاله سكتت شكول الها .. دخلت تشوف هيف واني وراها وهو كاعد بالحديقه كاعد على الكرسي ..

لعبت وياها بالالعاب وكحه حيل حتى هيف تتعلم منها واني وراها امشي ، كتلها لاتعلمين هيف هيج اسوي للعابه وتكطعها اميرة ..

دنسبحها شبيج خاله ..

تتمرض هيف تضل تلعب كل شوي بالماي بحجه اسبح اللعابه هذا مو لعب مشطن الها بدلن الها مو تسبيح ولعب بالماي …

ماسمعت مني ولزمت هي وهيف طمسنها بالمغسله صحت ببهن يعاندن .. سمعت صوت عدي يصيح ..

طلع ديسمعنا ،  فتح الباب الطرمه كالها يله لج تاخر الوقت امشي لبيتكم ..

دالعااااب شبيكم ..

امشي لجججججج يالعب هسه اهلج يفقدوج يله يله ياشر بيده يله بره ..

اووووو شدعوه اطردوني فلا تستحون انتوو ..

اجيبج بجلاق والله انكلعي لج ..

طلعت تنتر وضايجه وتنكت بيدها وكفت باب البيت وصفكت اديها اثنين وغمتنا .  اني شهكت عزاااا ولج ..

اجه يلزمها من ظفايرها  طكتها ركضه والتراب وراها ، طلع هو وراها وكف مخصر وينتر ، انعل ابوج بنت جلب ممربايه دخل الكطج بالشارع اذا مانعلت والديج ..

ضحكت عفته ودخلت ، ايام وهيف صدمتني بفعله خلتني اوهس ايام واشهر واخاف منها ، كملت الغدا وطلعت اجيبها من الحديقه دنتغدا .. لكيتها لازمه خاشوكه وتحفر بالارض ..

طين مامااا كاافي وكت الغدا ..

لا داحفر ..

شتحفرين كومي دنجت اشيلها من الارض ..

ماتت ادفنها ..

هديتها ..وكفت لحيلي منو باوعت للارض ..

شفت لعابه مملوص راسها عن جسمها ..  جفلت وكفت ماتحركت همست شبيها هيف ماما .

تاشر بديها بطريقه دراميه ماااااتت ، ادفنها ..

بلعت ريك اريد انطق مااكدر دنجت دارفعها من الارض .. صاحت لا ادفنها خطيه ، ولج لزمت كلبي يمااا حموت حنجلط ولج شتدفنين شعرفج اصلا ..

من توم وجيري ..

انعل ابو توم لابو جيري ، شهل سوالف والافعال ناويه تجننييني انتي كومي شلتها بالقوه و خرتها من الحديقه ..

العابه مامااا ..

مو تكولين ماتت خلي تولي ، دخلتها غصب واني عصبيه اصيح وانتر بيها وهيه تبجي ..

عدي من سمع بالسالفه ضل يضحك ، يكول عادي طفله دتمارس طفولتها ، صلح الها راس اللعبه ورجع ركبه بمكانه …

التهت باللعبه مالتها مكيفه عليها ، ساعه تمشط شعرها وساعه تسحل اللعابه من شعرها تمرغل بيهها الارض وساعه تلزمها وتلطخها بالحايط حيل ..

احس بيها بذره عنف هيف ، تخوفني مرات بس اكول طفلة ، تتعلم من تلفزيون ، او اسم الله خاف مثل ابوها !!!!

شيلتني هم فوك همي ، ضليت اراقب بيها والله طبيعيه بس نوبات تصدمني وخايفه لا فد يوم تسويلي مصيبه تجلطني بيها ، شكلها نسخه من بيبر حتى عدي يكول ، يكول تشبه ابوها منعول الولدين ..

بس شخصيتها على تالا عصبيه متمرده وكحه ، يمكن صوجي دللتها او هي وراثه وجينات ماله علاقه بالتربية ودلال ، عدي حيل متعلق بيها اكثر من مره شفته مدد على القنفه وهي تكعد فوك بطنه تلعب ،

تضربه تعضه تاخذ جهاز منه مايحجي وياها يضحك ،لو يشاقيها شقه خشن وهيه تضحك عادي ماضوج ، مره شالها من ملابسها بتك ايد ويفر بيها حيل كلت ملابسها راح تتشكك والبنت تلزك بالحايط ..

عطت بي وجريته ، مارد عليه ، نزلها وجها صاير احمر من الضحك واسنونها امبينه كلها ، نزلت رجليها بالارض ماتعرف تمشي من دوخه تمشي وتتمايل مثل سكرانه .. حتى هي تحبه حيل ..

خلي يطلع ماياخذها تكابل الباب تبجي وتعيط وتصرخ وتضرب بالباب دفرات ، ومن يجي بس تسمع صوت السياره لو المفاتيح تطلع تركض على الباب طلقه تركض ، اخاف لافد يوم يدعمها مايدري من يدخل السيارة ،

جاب مسواك ، واني وكفت اسوي العشه ، فرغ المسواك هو جايب عصاير ، حجه هذا عصاير طبيعيه اخذي منها ، ويه العشى حتى تاخذين دوه ماترجعين على راسج ،

هزيت راسي اي ، كملت العشى وصبيته الهم بالصاله ..

ماكو ميز ناكل عليه ، فرشت بالارض وكعدنا ناكل ، شوي وعفت الاكل احس الكمه وصلت للبلعوم ماتنبلع شربت ماي مارتاحيت ، الاكل ثكيل شنو مااكل احسه واكف مايتحرك وينزل ..

كمت اشرب عصير فتحت الثلاجه لكيت بطل عصير تفاح لون البطل اخضر بس سفن مو عصير ، مكتوب سفن اب بطعم التفاح …

فتحته و شربت منه صكه .. يعععع طعمه يععععع يخنكككك ، يمامااا خنكني حار الغاز مالته طفه عيوني وكف بصدري نوب  ، رجعت كررت شربه دانزله هو والكمه الي غصيت بيها  ، خرب ماينطاق طعمه حاد ياذي الحلك غازه قوي ، لعبت نفسي كلت اشرب ماي واذبه لهذا .. عدي اجه وراي شايل الصينيه حجه .. عاشت ايدج ..

التفتت عليه هااا ، وبيدي البطل .

جان شايل الصينيه شافني نزل عيونه على البطل ورخه وجهه مخترع عزاا العزاااج شربتي منه ..

اي معدتي اذتني ..

شمر الصينيه على سنك ،، يلعن بليسك شربتي منه ..

اي طعمه حاد كلش ..

لايالله جره مني وسد القبع ماشميتي صخام عزا بعينج .. رفع البطل يشوف شكد نقص منه ..

ضرب كصته ، خرب بليسج يالمطفيه اي والله ، جرني تعاي .

شكوو .. جرني للمغسلة ، يغسل بوجهي  ، نوب مد اصبعه هالطول بحلكي لعبها لنفسي ، ويكلي تقيى حاولي تتقيأين ..

دفعته دوخر شكوو شبيك .. حتطلع عيوني ..

وكف ساكت هااا ..

شبيك ،

ملامح وجهه مخربطه ، هااا وجهج اصفر خفت عليج ..

مابيه شي بس معدتي اذتني ، دوخر بالله دفعته ومشيت لعند هيف اغسل الها ، دايخه نوب ، لزمت هيف اريد اغسل الها مابيه حتى اشيلها جريتها للمغسله جر ، دنيا تفتر بيه ، غسلت الها  واخذت اغير ملابسها ،وكتلها تنامين ..

هزت راسها لااا ، رحت صفيت الاكل وظميت الباقي ، دقايق معدتي هاجت عليه ، ابتسمت ، ماعرف شبيه .. التفتت عدي وراي يمشي وملامح وجهه خايف مرتبك ..

ثواني وكعدت على القنفه جسمي راخي احسه مفكك ، همست ابن نعااال عدي ..

لطم على كصته هاااك استلم بلشت ..

رفعت اصبعي ولك هذا بس لا عرك ههههههه ..

خرب بيج ميرال من جرعتين سكرتي لو متقيأتهن مو جان احسن ..

هيج منك عدي اي والله يالسافل كله منك ههههههه سكرانه اني ..

تقرب عليه وجرني يكومني كومي غسلي دصحصحين ..

شصحصح شبيه اني ..

مو شربتي الصخام هذا ادري ماشميتي ماعرفتي ..

ميلت جسمي عليه دايخه دخلني للحمام لزمت قميصه كعدتني على الطبله جريت القميص وطكن الدم وانفتح القميص ، ياااا غير تشيل الشعر الي هنااا ويييع قرف ..

يااقرف ولج اصحي لااسوكج براشدي ..

هههههه ، دحف جسمك ، صخم شهل وصخ ..

ولج لاتسترعنين الحف للنسوان زلم من هو وشعرى احلى ..

منو كلك …

تحبين الاملس ماعرفتج تحبين الناعم ..

ههههه ..

ماشميتي ولج شلون ماعرفتي ،

.. هههه هو شنوو ..

الي بالبطل ..

تذكرت العرك .. خنكتني العبرة بجيت ،استغفرالله كله منك شربتني هالسم …

اني لو انتي شربتي شعلي اني ..

كله منك ليش ادخله للبيت اني مره اصلي واصوم شلت خطيتي …

والله من يوم جبتج لهنا ماشفتج كعدتي على مصلايه بس وكت الحجي اني اصلي ، جرني للبوري مال الحمام  يغسل راسي فتح الماي ونزل راسي يغسله ..

دفعت ايده ، ورفعت راسي والله انت شيطان رجيم الي يشوفك يشوف عباده شو دك وركص يالكافر ، 

اوووو هو انتي صاحيه ماكادر عليج نوب سكرانه دنجي داغسل هالراس اليابس دصحصحين ..

لزمت راسي شبي راسي ..

يابس ..

جذاب .. تلمسته لااا والله مابي شي بس انت احول ماشوف زين سوالف العوج عمت حتى عيونك ..

ضحك استغفرالله ياربي شهل بلوه دنجي ياعيني دنجي ..خليت راسي كعد يفرك بي جوه الماي ..

عدي ..

عيونه ..

وجع شعري كطعته ..

هههههه اسف ..

عدي ..

روحه ..

وجعه بيك وخر عاد خنكتني بالماي ..دفعته اروح ..

ولج لاتوكعين ، ضليت ساعات واني دايخه .. بجيت بجي ماعرف على شنو ماذكر ، كل يطكن عدي ارفع راسي اتعارك وياه ، نمت بالصاله على وجهي من الدوخه ، كعدت الصبح راسي مفتر ، عبالك دايسه عليه تريلة ، رفعت نفسي لكيت عدي نايم  وراسي صاير بحظنه ..

وخرت عنه ، ياايمه لزمت راسي حموت ياربي الم الم حتى بعيوني ..

رجعت راسي لمكانه اااخ راسي ، غمضت عيوني  شوي و تذكرت هيف ووين ..

رجعت رفعت راسي هييف ..

نايمه بصف عدي من ذيج الجهه هو بالنص واني بالجهه الثانيه .. كمت لحيلي اروح اغسل وجهي ، وكفت على المغسله اغسل بوجهي فرشت اسناني لعبانه روحي والله ..

تذكرت البارحه ماذكر كلشي  ، اذكر شغلات بسيطه ، بس اعرف اني شربت هذا السم ، لزمت بطني ينعل بليسك ياعدي ، ضليت طول اليوم عندي الم بمعدتي حتى وصلت بيه تقيات ..

عدي ضل طول اليوم يسولف شسويت بي ، نوب يكلي دعيتيني للرذيه مارضيت ، وهيج فتحتي دكم قميصي واني اكلج عيببب ابدددد مااقبل  .

لو عرضتي نفسج عليه ، ورفعتي ملابسج ، بس اني خفت الله بيج كلت خطية   غير اذا كعدت الصبح لكت نفسها عريانه تكعد ادك وتلطم مثل العاده وعفتج ..

وجهي احسه نار ماخليت عيني بعينه ،

بس صدك تاذيت  ، دوخه والم براس ، ومعدتي تحركني ، عدي نطاني مسكن وسوه غده ونفس الحالة ، معدتي تخربطت كلش ، هيف من كثر الوكاحه واللعب بالماي لزمتها كحه وصخونه ..

حار بينه اثنينه ، اني مابيه اكوم جسمي يوجعني ونفسي تلعب وهيف سوده عليه صخونه وتبجي .

بعدها لزمتني صخونه ايام تقريبا اربعه ايام .. اعتقد فلاونزه  صابتنه ، الم بمعدتي خف بس ماطاب ، كل مااثكل بالاكل او انقهر ارجع اتقيى ، غافيه بالغرفه سمعت عدي يحجي ويه احد ..

من ركزت زين صوت ضحكه مال مره ، وتكله خرب بليسك ياعدي على هالسوالف هاي ..

ماكمت ضليت بمكاني ، ياحيوان شوف سافل شوف استغل مرضنا وكعد يلعب لعب الفاسد ..

ملت راسي دشوف من الباب بلكت تبين ، ماكو بس طرف ملابس مبينه ..

رجعت راسي على المخده و رفعت الغطى اغطي بي جسمي ، دقايق .. انفتحت الباب ودخل رفعت راسي داشوفه ..

وكف يمي حجه كاعده ميرال ..

فتحت عيوني مارديت ..

ابتسم شلونج تحسين نفسج زينه ..

هيف . قاطعني زينه الحمدلله يومين وتحسنت انتي الي جسمج ضعيف وماتتحملين ابد ..

صوت خطوات رجلين تقرب من عدنا .. مابينت عندي الصوره زين بس من تقربت اكثر  بانت اكو وحده وراه ..
رجعت راسي على المخده .. انعل بليسك عدي صدك تحجي وصلت بيك تجيب بنات ليل للبيت ..

سمعت شهكه . ونتر الصوت بنات ليل شنووو عيوني ..

همست وجع شهل صوج الي يلعب نفس طلعها برة ..

لججججج ام السان .. ضحك عدي خرب هي ميرال شبيج هاي اختي ام محمد ..

رفعت راسي هاااا منوو ..

ام محمد اختي الجبيرة ..

صغرت عيوني اركز بيها راسي يوجعني اصلا ماشوفها زين. ، بس واكفه ومخصره حجت هي ،،  هي هاي الصفره الي خبصتني بيهاا ولك جنها بلبل منتف دشوف شضعفها حتنكسر حتى لحمه مابيها شعجبك بيها يااخوي ..

الكلب ومايهوى يام محمد شسوي بعد ..

ماحاجيتها ، حجت هي والله ماتسوى تتعارك وتحارب و تخاطر اكو غيرها دشوف حتى مريضه مابيها صحه ..

نترت بيها من اخوووج كله من اخوووج عين ربي عليه قبل هسه صرت فرد نوب كله من اخوج حسبي الله ..

لاتتحسبين علي اخوي ولج كدامي وتتحسبين عليه ..

اكول اخذ اختك منا وخر مني عدييي ..

هاي عليمن ولج صفره ..

اووو عدي وخرها عاد ..

اندارت عليه ولك ياخوي لو يدرون  بيك ابوك وامك ، الا يتبرون منك ، شنو هذا وضعك شنو هالعيشه مبهذل نفسك على شنو متكلي خلصت النسوان ..

باوعلي مبتسم احبها ام محمد ..

ماتفيدك وكتلك من الاول ماضنيت تعاند وتسوي الي براسك ، المره اذا ماحبتك من اول مره لا تتامل من تاليها  المره ماتنسى ولا تحب غصب اخذها قاعده .. هي تحجي هو عيونه عليه ملامحه رخت ، هز راسه ..

صدك ميرال ..

سكتت ..

الا هي تكلك صدك غير اني اختك وجاي انطيك من الاخير ..

دحاجيج ميرال ..

ضربته على جتفه صار شكد عندك ..

تقريبا ٣ اشهر ونص ..

كالت الك كلمه حلوة فد يوم ..

هز راسه حجه ..  لااا ..

ضحكت بوجهك فد يوم ..

وكف مخصر هز راسه معصب لاااا ..

سوتلك لكمه من كلبها فد يوم ..

همس لاااا اني الي اطبخ ..

كرت عينك يااخوي ، ماسويتها لاهلك تسويها لهاي .. خافت عليك فد يوم ..

نتر لااااا ..

لعد شعاجبك بيها ومجلب رجعها بعد اختك منين ماجبتها وجفينا شرها ، اصلا بلاها اكثر من فايدتها ، ذاك يدور عليها دخل يطلع من المستشفى وشوف شيسوي بيك ..

درت وجهي عليها منووو

نترت بي شوووف حنت حنت ولك .. شفت حننننت ..

همست الها شبي بيبر ..

وشدراج احجي على صخام ..

ابو بنتي شبيج ..

وجع غير هسة الزمها الا افرمها ..

مو تايهتلج ..

عاطت بي .. ماتحاجيها عدي …

باوع عليها فرك وجهه متوتر .. احبها ماتنازل عنها اني من جبتها هنا واعرف عواقب الي راح يصير مع هذا خاطرت ، ماعوفها ،

راح ننداس بالرجلين ولك ليش ماتعقل انت ..

جر نفس ماحجه وياي ، جرها امشي شبيج ماصدكت تصحى ناويه تخليها ترجع تنمام وتفقد . 

ماشوف السانها شطوله ..

مريضه غير بعدين جبتج تساعديني عليها وعلى هيف مو تتعاركين ..

يااخوي ماتوقعت هيج ، جرها واخذها بره الغرفه ..كل شوي تندار عليه وتنتر ..

جنها مجلوبه مثل اخوها والله .. رجعت تمددت وغطيت نفسي ، الاكل يجيبه ليمي هو ، يكلي ترى كلبها طيب والله وفطيرة بس عصبيه تحمليها ..

كم يوم وتروح بس حبت تطمن علينا ..

اختك عرمه ..

ازعل لاتحجين هيج ولا تتصادمين وياها ، ترى صدك عرمه تحطج وادكج والله ، جفي شرها .. بلعت ريك ، هو اخوها شلونه حتى تطلع هيه زينه ..

، ثاني يوم طلعت من الغرفه صوت ضحك هيف ليمي ، من طلعت من الغرفة مديت راسي صاله فارغه ..

رحت للمطبخ هم فارغ ، درت وجهي للحديقه لكيتها ترش بالحديقه وهيف يمها تلعب بالماي اطبس بي ..

طلعت الهن عيوني ادور على عدي ، التفتت على صوتها وهي تكلي ، رجلج بالسوك توه طلع تردين شي ..

ماحاجيتها .. هيف اجت تركض عليه شلتها ..

حجت عوفيها بالارض انتي حبله مو زين عليج الثكل ، باوعتلي دشوفي حالج شصاير بيج غاديه عظام ..

يراد الج تشريب لحم وثريد ماتاكلين ثريد هااا …

ماحجيت ..

شبيج اخرسيتي ..

تعبانه مالي خلك ..

والله انتي من نوع حتى لو تعبانه السانج طويل ..

شرايده ام محمد مني لخاطر الله ..

مارايده شي خيه شعدي وياج قابل ، اسويلج اكل جوعانه شي ،

ماريد ..

بنتج وكلتها توه سبحتها بس لعبت بالطين هسه ارجع اغسل الها ..

ماعندج بيت ام محمد جهال شي ..

عدي بلا ثلاث بنات ولد ..

لعد شعجب تاركتهم وجايه هنا ..

غير اخوي استنجد بيه واكع بضيك قابل اعوفه سوده عليه ..

اكو كرسي خوص على صفحه ، وخرت هيف كعدت عليه وخليت هيف بحظني ، هي كبالي ترش بالسنادين وزرعات ، ردت اسالها على بيبر بس خفت منها ..

باين السانها طويل وكحه .. همست منو هذا الي بالمستشفى الي كلتي عليه ..

اندارت عليه حجت ياهووو ..

انتي البارحه كلتي لعدي خلي يطلع من المستشفى وشوف ، ماذكر بالضبط بس كلتي هيج شي ..

كبل نكرت وحجت .. انيييي مستحيييل غلطانه حبيبه ..

ابتسمت .. تخافين من عدي موو…

انييي خاب من ابوي مااخاف اني ..

بلي هو يكول اني مشي اخواتي على سراط المستقسم فنها تفك.حلكها بدون رأي .. صدك طلع كلامه ..

خلي ينجب غير اني اخته جبيرة ،

حذرج ماتحجي شي على بيبر وياي .. اعرف عاذرتج يله عادي مو مشكله المهم مايعاركج  ..

يابه ومحمد مااخاف شجاج .. غير ابو بنتج بالمستشفى جان بالانعاش صارله اسابيع ، مسوي منخل قبل شهر رامين علية .. اللله شكفله جان مات ، قبل كم يوم طلعو ،،

توه تحجي واني وجهي خرط احس الدم نزل لرجليه .. كلبي يدك حيل ، حظنت هيف لصدري ..حجيت بيبر ..

اي خيه هوو ، وحتى عدي اجه يروح بالرجلين لو ما منهزم ومالكي جان هم كتلوو ..

منوو ..

شدراني بس عدي يكول جنه نشتغل وياهم كلبو علينه يردون يصفونه خاف نجيب سيرتهم خاصه بعد ماصارت بيها محاكم وشكاوي وناس جرت ناس ، عدي وابو بنتج ، وناس انسجنت ، وناس هربت من السجن .

صفنت بالارض وهي تحجي ، حجيت شكد صار للموضوع هذا. ..

من فترة ، هو من زمان بس حمت الحديده قبل شهر ونص تقريبا ..

تذكرت من جنه بالشقة ، جان مو على بعضة ، ايام هو متوتر حتى شكله تغير لحيته طولت ، وتالي غيرنا مكانه وتركنه الشقة ويله ارتاح هو .ماجنت منتبه عليه كلش لان ماهامني وضعه ..

حجت وياي ميرال ..

رفعت راسي هاااا ..

حجت تحبي الاخوي ..

اخوج ماذيني ام محمد ..

مايعرف يحب ادري بس يحبج والله ، جان يسولفلي عنج هواي ، يكول مثل فلكه الكمر تغري حتى شيخ المعمم ، اذا شفتيها ماتنسين شكلها بعد .. بس من شفتج هسه توضحلي اخوي احول ماشافج زين ..

من بين همومي ضحكت هههه استغفرالله ياربي شكول الها هاي ..

والله لازعلين توقعت بيج لحمه ، لو صدك تغرين الواحد وتتموعين وتتغنجين . تالي طلعتي معلوله وصفيرة هو منو بهل وكت يحب الشكره الضعيفة ..ناس ادور سمينه ام شعر الاسود ..

ماتكولين لاخوج هل حجي ..

خيه اخوي انعمى بيج بعد فقدت الامل يغير رأيه ، هو الي يورط نفسه هل ورطه يفيد بي الحجي ، لعد خاطف المره وبتها وشارد وعايف اهله وامه وابوو بالله هذا عنده عقل .ماترتاح الا مااخذج وتزوجج ..

سكتت ماحاجيتها بعد ضلت هي تحجي ، ابتسمت على اخر شي كالته صفرة وضعيفة ، من يومي هيج هاي البنية الجسدية مالتي ، باوعت عليها ، الحجاب ماذابته من راسها .. رغم ما الحديقه مستورة ماكو احد يشرف عليها ..

والثوب هالعرض ماعرف هيه سمينة ، كافه الردن للعكس ، همست رجلج وين ..

الله اخذه ..

الله يرحمه ..

ويرحم موتاج خيه ماجوعانه ..

ابتسمت شجلبتي ام محمد ماجوعانه كتلج ..

حتنكطعين نصين خيه والله هاي وانتي حبلة غير طفل يطلع معوق ..

اسم الله ، معدتي ماتتحمل الاكل الثكيل ..

كال عدي معدتج ضعيفه كلها نسوان اول ماتحبل هيج ، شكد عليج هسه ..

تقريبا ثلاث اشهر ..

باوعت لبطني جن مامبين عليج ثلاثه ..

شدراني بعد اخوج حتى ماوداني اكشف على بطني ..

مايتحرك تحسين بشي ..

هزيت راسي لااا ..

ماتتوحمين ..

لااا ..

وكفت شلون حيطلع هالطفل هذا وانتي هالشكل لاطبيب لامراجعه لا ادوية لامقويات ..

كولي لعدي ..

ليش هو ينحجي وياه بس احجي يسكتني ، حتى جهاز اخذه مني ، ..

سمعنه صوت سيارة وكفت بالباب سكتنه ، فتحها و رجع يدخل السيارة ، دخل هو والسيارة من شافنه ابتسم يااهلا بالوجهه صحيتي ..

نزل من سيارة واجه عليه .. شلونج هسه ..

زينه الحمدلله ..

ابتسم لهيف ، اندار على اخته جبت عشى لاسوين شي ،

جبت لحم ..

اي جبت تلكي بالعلاكه لوحده ..

راحت طلعت الغراض من السيارة تفتح بيهن .. نترت لعد ووشحمممم .

وياهن شبيج ..

كبده ..

وياهم هم ..

اي بعد اختك مرتك يرادلهم رم عظام هالمعصعصه ..

ابتسمت ، اندار عليه ترى هيه طبعها هيج بس طيبه حيل  ..

همست ادري ..نزلت هيف من حظني ركضت وره ام محمد …

ابتسم يباوع بوجهي شلونج ..

هزيت راسي ، زينه دخلت هيه للمطبخ وهيف وراها تصيح مووزه مووزه .. صاح لاخته ام محمد اغسليلها وحده وانطيها ترى ماتفكج بعد ..

همست متردده شصاير ..

اندار عليه مستغرب شنوو ..

شنو الصاير وياكم ، شبي بيبر ليش بالمستشفى ، شكو .

سكت ثواني مركز بوجهي ، كنبص وكعد مقابيلي ، عليمن تسالين بالضبط ، على اخبارة ، لو شنو الوضع الي احنه بي .

اسأل عن الي ديصير بس ..

بيبر ؟؟؟

اذا مات او صارلة شي ، من حقي على الاقل اعرف بنتي تيتمت …

مايهمج يعني ؟؟؟.

سكتت .. درت وجهي اتهرب من نظراته احس نظراته تخترق البشر حاده ..

حجه ،،مابي شي طلع منها سلامات ، جان بينه وبين الموت شعرة ، وضعه جان خطر بس سبحان الله دومه يطلع منها ،

انداريت عليه وانت ..

ابتسم اني عدي ميرال ، اذا صابني شي اجر الكل وياي مااوكع وحدي بعدين اني مو بيبر ، اني ماتحديت احد ولا وكفت بوجهه احد ، اني شغلي من جوه ليجوه ، حتى لزمات ماعندي ولا عدهم اثباتات عليه  ..

سكتت مهمومه ، خبيث خنوسي ، اويلي على ذاك ، نوبات ارحمه وينكسر كلبي علية ، نوبات اكول هو راشد مو صغير هو ضل بهل مكان ، هو عجبه الوضع ماغيره ، ليش ماسوة مثل عدي ، ليش طمس نفسه واهله بهل القاع ..

اجاني صوتة .. جنت احبه ..

باوعت اله ..

رفع حواجبه ، عرفت مازال اله معزه بكلبي بيوم سمعت بي مو زين داخل الانعاش ، شكله ماراح يطلع منها ، صاحبي جان ، وكفاته وياي ماناسيها ، بس الي دمر صحبتنا اخو النكس ، الله لايرحمه ، جان حامي اخوو ويحب اخو لدرجه عرف بسوايته مااسواله شي نوب حماه مني واكف ضدي علموده ، اخو القاتل السكير مدمن المخدرات الي كل مصايبه هسه من وراه وبسببه ،

اشر على صدرة بحركه ، اني اني الوكفت وياه اني الي طلعته بكل مره من قضيه شكل ومن كمين شكل اني الي جنت حاجز بينه وبين القانون والدولة ومغطي علية ، بيش جازاني ، هااا ..

دمعت عيوني ، لاتلوميني بي ابد ، سوايتي ماتجي ذره من طعنته الي ابد ..

الى متى عدي ..

ارجع واكررها .. بيدج كلشي بيدج ..

انداريت عليه .. شعلي اني ..

راح يجي هاليوم وراح تعرفين شلون كلشي  بيدج ..

جر نفس ضايج .. كام لحيله ، عافني ودخل لعند اخته .. ضليت بره بالحديقه لحد المغرب ، دخلت جوه من غربت الدنيا كلش ..

ضلت ام محمد يمنا فترة ايام ، الواحد يحجي الحق ، تنظف وتطبخ وتهتم بهيف وتفر البيت فر ، ، كلبها طيب بس السانها طويل ، اذا وكعت بالسانها ياويلي بس عدي يكدر يسكتها ويخلصني منها ، عود من كل عقلها باليل من اجينه انام بالصاله وكهرباء موجوده شغل التبريد وفرشت الي بصف عدي وفرشت لهيف يمها وتغمزلي وتكلي البنيه لاتنوميها بصفكم خيه البنت لاتشوف شي وتتعلم ماتعرفين لعد انتي ..

فكيت حلكي هااا ، عدي ضحك هم صدك كلامج ولا منتبه اني على هالسالفة البنت جاي تكبر لاتلزمنها بالجرم المشهود ، منا وجاي انام بالغرفة لوحدنا .

رفعت تك حاجب الحمدلله والشكر اي والله شلون اثنين ،

دسوي الكهرباء بالاول يالفالح بعدين احجي بالغرفه وين تنام بالحر ..

التفتت على اخوها مو كتلك جيب مولد شبيك عدي ..

والله مسطور صار فترة ، بس افرغ اجيبها واشدها للبيت ، يراد الها كهربائي وبالساعات شغل ويله تضبط ..

نمت بفراشي وهو مدد بصفي مبتسم ، يباوعلي ، هيه اخذت هيف بصفها ونطتنا ظهرها تنام ..

الوضع ابد ماعاجبني ساكمتني سكم هاي ، انداريت علية ، هو اندار عليه متحمس مدري شبي ، همست اله شوكت تروح اختك ..

بكيفها بعد قابل نطردها ..

مو عدها جهال وبيت ليش عايفتهم ..

هي حره تردين اكوللها ميرال تكول شوكت ترحين لبيتج ..

لااااا شعلي خلي تبقى باقيه على راسي قابل والله يالله ..

نترت بينا ..  لاضلون تتهامسون وياكم مره ارمله صار اسنيين لا تهيجون المواجع علي بهل ليل ..

طكها ضحكه اخوها مو كتلج تزوجي ليش ماقبلتي ..

تجيبي واحد اكصر مني وتردني اقبل وين اخلي جوه ابطي نام عدي احسن الك ..

ضل يضحك عليها هو ، اني غمضت عيوني وعفتهم بينهم ، حسيت على ايده جرت ايدي ولزمها جيت اجرها لزمها حيل فتحت عيوني ..

اشرلي براسه عليها ..

رجعت غمضت ونمت ، شوي و تقدم علية وحظني ، ماحجيت ولاتحركت ، صبح هو طلع عود يجيب المولده بس كون ياخذها من الجملة ..

سوت هي الريوك وتريكنا ولمت الصينية  ، دخلت للحمام اسبح ، لاحظت اكو قطرات دم بملابسي ، خنست شوي بعدين قلقت ، دخيلك ياللهي ، طلعت صافنه ..

صح الم ماكوو بس خفت حيل لزمت بطني ياربي شنو حيموت يعني لو دينزل قابل شمسويه اني ، حتى شغل ماشتغل ، ضليت ساعات كاعده ماتحرك ، خايفه من هالوضع ..

طالعه ريحه الطبخ ، شحم على لحم ، على بصل ، لاعت روحي حشه نعمه الله ، تركب الغده  من العشرة صبح بيها طبع ، وتنظف وتجلف حتى السطح ، اليوم غلست الزوالي بالطرمه ..

من طرمه تصيح علية ، ما يوم شفتيهن كلتي لروحج اجلفهن شهل وصخ ..

مارديت عليها ،  نوب حجت ادري شلون عايشين هناا الزوالي عليهن طن تراب وصخ ، فد يوم كفي دشداشه و افرشيهن بالطرمه على صبه وشره تايت ورشه ماي وجلف اذا فاهيه كلش ماتعرفين تجلفيهن بجلافه ،

بمكناسه و اكنسيها حيل وتطلع تلج ،ماعلمتج امج  ،

لعد بيتكم منو ينظف ويجلف ، لو انتي من امهات المغاسل والشركات التنظيف ..

بيتج اذا ماتنظفي بيدج وعلى مرامج ماترتاحين وتحسين بنصر هيج شعور مريح ، راحه نفسيه هو كبال عينج يلج لج …

لزمت راسي ياايمه شيفضها ويه هاي مادري شيفضها ، وياها هيف شايله مكناسه ودنج تجلف وتكللها اي عفيه بنادره لاصيرين مثل امج جايفه ، تخاف على نقش الحنه يمااا .

حتى بنتي شغلتها منج لله يالظالمه .. منين اتلكاها هسه من هاي ، من الدم الي شفته توة ، كعدت بالمطبخ خايفه ماارضه حتى اكول ، عبالك حيوكع مني ..

رجعت للحمام مره ثانيه والله اكو قطرات دم يكرم الله ، غيرت ملابسي ، طلعت من الحمام وجهي خارط .. اصفريت ..

الطفل عمره فوك ال٣ اشهر غير اذا اجهضته اموت ، شيحمل الم الاسقاط ..

تلكتني هي شايله الزوليه على جتفها مكملة غسلها ، تريد اصعدها فوك .. نترت دوخري يمعوده من دربي ..

وخرت عنها دتصعد درج مابيها .. وكفت باول بايه وفحطت صاحت ياايمه ظهري راح يطك ..

التفتت عليه دعينيني يالفاهيه ام ادين الراخيه تعاي بس انطيني دفعه ..

وخري عني ام محمد الي بيه كافيني ..

عاطت بيه جفلتني تعاااي ولج ..

ركضت عليها وكفت ووراها ادفعها وهي تصعد ، لحد ماصعدت درج كله رجعت كعدت على درج ، اكلني الهم والخوف ، لزمت بطني شماكله اني شمسويه وينزل علي دم ..

حتى عدي صار فتره مامتقرب مني من شافني تمرضت بطل يوصلني ، نزلت هيه وشافتني كاعده حجت شبيج كاعده هنا جنج مجديه ..

رفعت نظري عليها اريد ابجي ، حجت خيرج شبيج ..

ام محمد نزل عليه دم كله منج   ..

هاااا اني،شكوو دميش هذا ولج جرتني تكومني. .

لا لا عوفيني .. لزمت بطني .. لايوكع الطفل كله منج تعاي ساعديني وتعاي دفعيني بس دفعتج حسيت بالم رحت اشوف شنو هذا طلع نازل عليه دم ..

لطمت على صدرها ياااستار استر دميش ولج هوواي لو شوي ، شو دشوف ترفع بملابسي  تريد تشوف .. نكتت اديها دوخري عني وعفيني بهمي لخاطر الله حيموت الطفل ..

اسم الله شجاج ولج تفاولين ، شكد نزل دم هواي وين دم ..

دينزل عليه لحد هسه.  لزمت بطني ابجي ،  دنجت راسي عطت ، يااايمه حمووت ، الم فضييع جني حسقط الحكيني ام محمد ..

عزااا العزززاج يبووووو ، جرتني تاخذني للحمام ..

عطت بيها وووين حموت ام محمد .

يمعزايه خاف ينزل الطفل على الاقل تنزلي بالحمام مو هنا ووتوصخ الكاع ..

جنت ابجي فجأءه وكفت مصدومه ،الله ياخذج ام محمد خايفه على الكاع حيموت. الطفل حسبي الله عليج على اخوج اخوج من حبلت لليوم ماراجع بيه لطبيبه ولاكشفت عليه وانتي اكلج دم دينزل وتكليلي لاينزل هنا خلي بالحمام ..

كعدت بالكاع ابجي ، ياااايمه اموووت احسن الي ، ناس ظلام مايخافون الله ، اخذ حقي منهم اااربي ..

لا تدعين ولج صلفه لا الله يستجاب الدعوة .. شالتني من الارض وين اولي بيج يمصخمه بهل ظهريه حتى سيارات ماكووو..

اخذيني للطبيب لمستشفى لا وربي اضل طول عمري ادعي عليج هاا عدج بنات توكع بيهن ..

شحدج ولج حقيرة بيش طالبتهن تدعين عليهن ، وين اخذج هسه حيرتيني ..

لزمت ايدها مرووتج ام محمد اعتبريني بنتج حمووت من الالم اخذيني للمستشفى حموت يمااااا احس سجاجين بطني ..

نوب مددت بالارض ماارضه اكوم واعيط هيف اجت تركض عليه تصيح اببيييج ابيييج .. خلت راسها على بطني تشوفني ..

هي راحت تركض تصيح موبايلي وووين يبووو الموبايل وووين ..

رفعت راسي امسح بدموعي شوفي بجنطتج ..عطت ولج بسرعه حمووووت والله حموووت ..

راحت تركض انخبصت ضلت تركض وتتعثر ، ولج ماكووو خرب بيك عدي شايل الموبايلات من البيت عليييش نحترك انموت شلون نخابر بيمن نستنجد …

كمت لحيلي ام محمد الحكيلي خييييه ، ماعندي احد غيرج جني موواته اني لزمت الحايط اصرخ عليها طلعت تركض شايله العباا وبيدها جزدان ، دنجت تلبس بجواريب ..

ولج اكفي يمعززايه خلي البس جواريبي .. شمرت الصايله عليه وشالت هيف ولج يله امشي يله ..

خليت الصايه على جتافي ابجي وكوه امشي ، احجي الحق ماجان اكو الم بس جنت مخترعه وخرعتها وياي ، طلعتنا بالنعالات.  سوده عليه هيف بجامه البيت طلعت ويانه ..

وشعر كوشه ، وام محمد لابسه عبا وجوها دشداشه وصخه كلها ماي وتايت من غسل زوالي ولابسه نعال ابو الاصبع والجواريب شلون دخلت نعال ماعرف ..

طلعنه للشارع ماكو احد ، نوب بيت عن بيت بعيد ،  اخذتنا مشي لاقرب بيت ودكت الباب .. انفتحت الباب رجال شايب ، وكفت تحجي وياه وتاشر عليه رجال هز راسه وطلع هو وسيارة وحجه اصعدن بعد عمج بالعجل ..

صعدت وراه وهي تكلي هااا خما اكو شي نزل ولج احجي ..

اني اهمس حموووت بنتي اماانه عدج ام محمد ..

يااااسم الله ماعليج شي خيه شكول عليك يااعدي غير يراجع بيج لطبيبه لمستشفى من شافج مو مال حمل ابد ..

غطيت راسي بالصاية وهز بجسمي ، ماحاجيها ..

حجت استعجل عمي فدوه لعينك حالتها فرد نوب .. نوب كامت ترجف سوده بوجهي حظنتني اطبطب عليه ..

لمن وصلنا للمستشفى قريت ، مستشفى ال***** التعليمي. .

صخام شجابني لهل محافظه اني ، من الله ياخذك عدي ماخذني لاخر العراق ، دخلوني للطوارى كبل لصاله الحوامل وغيرها ، ماخلوها تدخل وياي ضلت هيف عدها نوب ..

ضليت اتكرضم ، جلبت بهاي بنت تسحب دم مني تريد تسوي تحليل الي ، فدوه لعيونج الحلوه اريد موبايلج اخابر زوجي هسه يضل باله ..

ماكالت لااا والله بنت اوادم .. دكيت رقم تالا .. دك دك ماشالته .. ماحافظه هواي ارقام بس تالا و بيبر ..

حجت هااا مارد ..

هززيت راسي لااا .. دكيت بالاربع مرات ماكوورد .. ،، تالي رجعته الها وضليت بمكاني بالسديه ، شوي واجت وحده ثانية عرفتها من الباج مالتها الدكتورة المسؤلة عنهن ، فحصتني دكتورة بالسونر ،

حجت شكد صارلج حامل ..

همست مادري يمكن ثلاث اشهر ..

هممم مشت الجهاز على بطني وهمست تحجي ..

حجيت هااا ..

ردت ثواني ماما اوكفي ..

ضليت مدده وساكته اباوع عليها ، هزت راسها عمره شهر مو ثلاثه هذا ماما ، تقريبا اربع اسابيع مو اكثر ..

رفعت راسي شنو هوو ..

الجنين حبيبتي حسابج غلط توه يله ثلاث اسابيع ..

لزمت بطني لا عفيه تاكدي ثلاثه .. دمعت اريد ابجي ..

ها ماما سلامات حنبلش بجي شكتلج ترى حسابج غلط السونار مايغلط ترى امبين قوي مالاه داعي الحزن مو زين ترى ..

نزلت من السدية وخرت الجهاز عني ، حجت ووين ..

والله عمره اشهر صدكيني ..

قابل اجذب عليج حبيبتي هذا كبالج الجهاز وشوفي شوكت سويتي كشف اخر مره ..

ماسويت .

لعد على اي اساس استندتي عليج ثلاث اشهر ..

سويت فحص دم قبل اشهر وطلعت حامل ..

وين سويتي بيا مركز تعبان هذا ..

سكتت ثواني غمضت عيوني حيل لا يالنكس ياااعدي ، لايسااقط الله لايوفقك ..

حجت شكلتي ..

فتحت عيوني نزلت دموعي ، نوب دخت رجعت مددت ولشتي ترجف ..

شبيج ماما خير اكو شي ، بس حجت هيج بجيت خليت اديه على وجهي ابجي ، وكفت هي والممرضه فوك زك راسي يسالن شبيج ترى الجنين مابي شي ليش البجي احمدي ربج كولي يالله ..

ماسكتت كلبتها بجي عليهم ، حتى المريضات التمن عليه يكولن واذا عمره بس اربع اسابيع اكو غيرج يتمنن الخلفة على الاقل انتي حبله ..

شوفي هاي الكبالج هاي المره الرابعه تسقط الطفل مايثبت بطنها ، ماحاجيتهن. اريد اسكت مااكدر نوب ، ضليت اشهك وابجي ،

الممرضه حجت هذا الرقم الي دكيتي عليه جاي ايدك ..

رفعت راسي ، نطتنيا مسحت وجهي اشهك فتحت الخط صوت ولد ..

حجه الووو منو ..

همست ابجي انت منوو ..

غير انتو داكين تفضلوو ..

هذا مو رقم تالا .. بجيت من تذكرتها ..

منو انتي.  سكت شوي حجه ميرال ..

بجيت .. رد عليه الووو ميرال هاي انتي اني حمد .. مارديت عليه ضليت بس ابجي مهضومه حيل ، مو ويااج ووين انتي كولي ووين شبيج ليش تبجين ..

تالا ووين ..

هناا . انتي وين ..

بمستشفى ال**** التعليمي ..

شوداج ..

بعد وصلت تعالو اخذوني ، مريضه مالي حيل اطلع ولا اتحرك الحكلي فدوه لعينك حمد ..

دنتظري بس مسافه الدرب وجاييج ..

شجيبك حمد الدرب ساعات وين توصلوني اصلا ماتلحكون عليه ، دزلي احد ماتعرف احد يجي ياخذني ماعندي وقت والله ، واكفين الي بالباب ترة

هم منووو ..

سكتت ابجي ..

عدي مووو ولج بيبر مامتحلف اله والله ماراح يعوفه عايش ، بس دخل يكول بالسلامه ويشوف الي يجراله ..

مو وكتها حمد عدكم احد يجي ياخذني ..

اسمعي لاطلعين من المستشفى خير شر ابد ، عدهم ضابط امن بالمستشفى اكيد اشتكي علية ، ولااطلعين بين مااشوفلج احد يتلاحك عليج افتهمتي لاطلعين اذا طلعتي هم نضيعج وين نلكاج هذا نغل ديغير بالمكان كل فترة ماجاي نكدر نوصل الكم .. جلبي بنتج وضلي بالمستشفى ..

اني هم جايج بالدرب ، سد الجهاز ، والتفتت على النسوان الي حواليه كومه ، هنه ودكتورات شفت منظرهن وبجيت من الخوف نماعرف رعب ماعرف عيارة بس الي اعرفه دموعي رخصن بذاك اليوم وارجف اريد بس ابجي ..

هنه شافني هيج وتخبلن يااهو ويااج لج يماا احجي ..

طاكينج احد ضاربج .. رجلج ماذيج .. دحجي ياامي لاتخوفينه .

ذيج تكوللهن جنها مضروبه وبت مرعوبه ماشوفيها بس سمعت طفل عمره بس اسابيع كامت ترجف وتبجي اكيد رجلها معنفها ..

والاخرى تكللها ضيم العيال يمرض خيه موشفتي شصار بنتي منهم باين هاي دمعتها واكلتها سوه ، حتى عظام صدرها باينه  ..

هنه يحجن وكتلهن عمتي يوميه تنومني بلا عشه ، وشغل البيت كله عليه كاسرة ظهري بي وحتى اكل مااكل زين الله يشهد ..

مريضه طول اليوم ورجلي سكير ابو نسوان باب البيت مااشايفته ابد حارمني من اهلي صار اشهر ماشايفتهم  ،

خليت اديه على وجهي ابجي انهاريت  ،نوب عمتي اخذت بنتي مني وتكلي اذا ماطلعتي حبله بولد اخذ البنت واعوفج هنا بالمستشفى واخلي ابني يطلكج ،

نوب مايبين الطفل يله اربع اسابيع شلون ارضيها غير تاخذ بنتي من صدك وتعوفني هنااا ..

لزمت ايد الدكتوره ابجي ابوس ايدج دكتورة اخذيلي بنتي منها لاصدك تاخذها وتعوفني هناا ابوس اديجن ،

دكتوره سحبت اديها تستغفر ياربي شهل جهل شهل الناس ، هسه اشوفلج ممرضه تاخذها منها شنو اسمها هي بالله ..

وجهي خرط هااا  ماراح تنطيها اني متاكده والله هاي عمتي وكحه وكحه تكطعجن ترى ..

وحده منهن كالت جاا شسوين بنتج انتي مريضه خليها عد عمتج تتربى احسن ..

ردتها دكتورة بنتها ترديها تعوفها ، وين عايشين الاطفال من حق امهم لا بيبيتهم ولا ابوهم شلون عقل عدكم انتو الطفل يتربى بحظن امه ..

حجت وحده اني اروح اجيب طفله منها واحاجيها اذا ماقبلت ياابه وعلي لاسحلها سحل ، جاا شنهي ظنيا سايبحه مابيها رحمه بعد ..

الدكتورة نترت .. لاعيوني شهل الكلام وين احنه ، ندز الممرضه اذا مارضت نشوف ضابط الامن ..

اني سمعت بيها ضابط امن هزيت راسي اي اي جيبولي ضابط الامن عفيه داشتكي عليهم وووينه ضابط الامن ..

دخل نشوف بالاول تنطي طفله لو لااا ..

هزيت راسي اي .. بس كولي ام محمد الي جايه وين ميرال وين وتلكيها موجوده بغرفه الانتظار ..

كمت من مكاني والا اكلج اني ادليجن عليها ، طلعنه كلنه من الغرفة ، والله العظيم حتى الي مريضه كامت ويانه تشوف وينها عمتي العرمه الحجيت عليها ..

لازمه كلبي على هيف هسه تخترع من هالعالم ، نوب لاهويه لابطاقه لاصخام عزاا ،

مديت راسي اشوف ، الدكتورة والممرضه وياهن وحده من المرافقات جايه ويه مريضه هم راحت وياهن على الواهس تهف بعباتها ،

ام محمد لمحتها كاعده اول كرسي بالاستعلامات ، الدكتورة حجت ويه موظف الاستعلامات والموظف صاح باسها وكامت ام محمد اتجهت عليهن بسرعه مخترعه وياها هيف شايله جيس حلويات ماعرف جبس بيدها  ..

وكفت الدكتورة تحجي ويه ام محمد والمره ام عبا واكفه مخصره تريد حجه تباوعلها وتهز بجسمها  ..

الممرضه لزمت هيف شالتها .. ام محمد تقدمت تاخذ هيف منها .. الممرضه ابتعدت ، ام العبا جرت ام محمد  بعصبية من عباتها وطلعت راسها ..

نوب خطيه ام محمد حارت بعباتها وتغطي براسها وشعرها  ،  الممرضه ركضت لعدنا تجيب هيف وركضت وراها ام محمد جرت الممرضه من جتفها وكعيها على وجها وهي وهيف ..

دكتورة جلبت بام محمد تحاجيها ، وام عبا دمها حامي نامت على ام محمد تجر براسها عبالك عدها ثار وياها ، دكيت على وجهي صخام صخمني ياااامه علكت كلت جيبن البنت مو كتلن المره ..

المريضه الي اجت ويانه تحجي عاشووو عاشوو شوفي امي طلعت ضيم عمتي كله بعمتج وتضحك جااا ياهو جاي يكدر على امي .. اي يمه ملخيها الله لا يوفق كل عمه بهل دنيا تظلم جنتها ..

ام محمد تسكت لا والله انداري عليهن وهمشي الدكتورة من راسها وام عبا هم ولزكيهن راس براس خلتهن ينسطرن ..

الممرضه شافت الوضع هيج طكتها ركضه علينا وهيف بحظنها تعيط دخلت للقسم وسدت الباب تلهث ..

وام محمد تصرخ يبوووو خطفو البنت يبووو بنص المستشفى خطفو بنتنا يااعالم .. وصارت مليخ ، ام محمد ماهدت ام عبا ، ولكفتها بعضه ، اصراخهن وصل ليمنا صارن فرجه ..

حظنت هيف ورجعت للقسم الحوامل اركض مخترعه ، هيف من شافتني سكتت ، والممرضه والمريضات وراي يركضن ناس تضحك وناس خايفه واني ابجي ..

كلت هسه يجي عدي ……..

يتبع …….

عيدجن مبارك يحلووووات 😅💜
شبيجن عصبيات عليه هااااا ، مسويات حزب عليه انتن وام عبدالله ، ترى ضل بس بارتين خليني اكتبهن زين لو ترى والللللللله اسويها نهاية مفتوحه 🤡😂

ترى هذني بارتين طبكتهن سوه لخاطرجن لان طولت عليجن ..