رواية قاع الشياطين الفصل الخامس والثمانون 85 - بقلم اسماء ديمير

الجزء الثاني_البارت_التاسع

#قاع_الشياطين

#بقلم_اسماء_ديمير

حظنت هيف ورجعت للقسم الحوامل اركض مخترعه ، هيف من شافتني سكتت ، والممرضه والمريضات وراي يركضن ناس تضحك وناس خايفه واني ابجي ..

عفت وراي الهوسة ، جنت خايفه لا يجي عدي ، بس شمدري احنه هناا ، ياااا وابو السيارة الي وصلنا مو جوارينه ، كعدت على السديه معدتي بلشت توجعني ، تقربت علية المريضه حجت وين ترحين هسه ..

رفعت راسي هااا شدراني فدوه الج شوريني شسوي ..

خلت ايدها على خدها جاا شدراني خابري اهلج مو سمعتج تحجين وياهم .

بين مايجون هذا رجلي الخبل يجي لهناا ..

ماعرف بعد شوفي دكتورة بالكت تساعدج ..

ضليت كاعده وهنه يحجن ودكتورة اجت عصبيه نار خفت نوب احاجيها ، اجه وراها موظف الامن ، اشرت عليه بعصبيه هااي ام الطفله وذيج عمتها ، والام ردات الطفله واخذناها تفضل اسالها ..

من وكف يمي شلون واحد اخذ الساني حتى كمت امتمت ..

حجه بنتج ..

همست اي ..

اوراقج وين ..

بالبيت ..

ليش ماجبتيهم ..

والله انخبصت صار عندي الم  قوي ماتحملت ، واجيت بسرعه ..

خابري  رجلج او احد يجيبهم دنتاكد من صحه كلامج .

صحه كلامي شنو قصدك البنت مو الي ، لو شنوو .

خويه من الاخر مسويات دوشه بالمستشفى وذيج بره تتهمنى خطفنه الطفله وانتي هنا تكولين بنتي غير نعرف صدك من الجذب هاي مؤسسه حكوميه ومسؤليه ، فنتاكد وبعدها توكلي بالله ..

هزيت راسي اي .. ماشي ..

عافني وطلع التفتت كبل على الدكتورة ، سويتي زينه وياي عمري ماانساها كمليها للاخر عسى ايدج تلزم حجر الكعبه يااررب فدوه ..

ابتسمت شتردين كولي ..

رجلي والله خبل وعصبي ، غير اذا عرف بالصار يكتلني يموتني ، خلي يجون اهلي ياخذوني ماريد اروح وياه ، دبريني فدوه لعينج ..

عمتج كاعده بالباب ترى .. وموظف الامن هم ..

دبريني حاولي اطلعيني منا على الاقل واني ادبر نفسي ..

مااكدر والله مسؤليه عليه اذا طلعتي ..

كعدت ابجي شهل ورطه الي ورطت نفسي بيها يالله ، الممرضه وكفت تحجي ويه دكتورة تكللها خطيه والله تقهر خلي ناخذها لدار الطبيبات لحد مايجون اهلها ..

مسؤليه ماما شجاج ..

نسويها لله فدوه دكتورة .. والله قهرتني ..

التفتت عليه تتافف ، دقايق واجي انتظري مو تكومين .

لا وين اولي باقيه هناا .. نومت هيف بحظني وضليت ساكته ، بيمن احير بالورطه الورطت روحي بيها لو بهيف لو بالطفل الي عمره توه شهر ..

كله منك ياعدي يالنذل لعبت لعب بيه ،ساعه انقهر على ام محمد وساعه اكول اني شعلي بس ردت العالم تتعاطف وياي وتساعدني ماردت اذيها ليش هو اني بيه اذيه حتى اذي ام محمد ..

رجعت الدكتورة وره ربع ساعة كالت كومي يله للدار ، كمت وياها ركض طلعتني من باب الاطباء واخذتني للدار ، جان عباره عن شقق صغيرة ..

غرف للمبيت و مغاسل وديلابات ، دخلتني للغرفة الخاصه بيها ، مددت على وحده من الاسرة ونومت هيف عليها.  تبهذلت هالبنيه خطيه سوده عليه يايمه ..

نوب بملابس البيت جبتها ، طرف فالينتها كلها وصخ ، جانت تغسل ويه ام محمد زوالي ، انهضمت حيل ..

كعدت ابجي ياايمه سوده بوجهي هاي اني عايشه وهيج ، شغلوج ويكربون عليج لو متت شلون ، نوب مبهذله ..

ضليت اشهك تخبلت ، كل شوي طبيبه داخله تباوعلي باستغراب ، امسح دموعي وينزلن غيرهن ..

، بيهن الي تاخذ الي تريده وتطلع وبيهن تسالني شسوين هناا انتي ومنو انتي وتكعد تحقق ..

وحده دخلت نامت ونطتنا ظهرها ، مرت ساعه ونص واني كل مايمر وقت كل ماكلبي يخرط اكثر والله حتى دخت من الخوف ، جسمي ثلج ، توتر  وقلق وحسبه توديني وحسبه تجيبني ..

هسه يجفت عليه عدي شيخلصني منه ،هالمره مايسامح ولا ينقهر علية هالمره اني جبتها لنفسي نوب اخته نكتلت .

يمااا شيخلصني منها والقران الا صدك تحطني وتكتلني ، هي من هاي وهاي اني ماعاجبتها ، اكلت اظافري اكل من الخوف ، جنت بواحد وكعت باثنين ..

انفتحت الباب وعطت من الخرعه حتى هيف فزت ..

حجت الممرضه الي دخلت ، اسم الله خرعتج شبيج ..

لزمت صدري ، هبطتيني ..

على كيفج ماكو شي محد يكدر يوصلج وانتي هنا ، حظنت هيف لصدري ، حجت دك الرقم الي خابرتي عليه وكال ربع ساعه من ادك اطلعو للاستعلامات ..

منو دك حمد ..

ماعرف اسمه بس نفس الرقم الي دكيت عليه ..

دمعت ، مو خاف رجلي بالاستعلامات اكيد اخته خابرته واجه ..

اخته منوو ..

اقصد عمتي خربطت من الخوف ، شلون اطلع ..

بعد اهلج هم يحلوها ، احنه سوينا الي علينا ، والا ترى هذا مو شغلنا بس حاله انسانيه وماكدرت اغض النظر عنها ،

هزيت راسي ماقصرت الله يجزاج خير ان شاء الله  .

كلت اطلع بس راسي اذا شفت احد امن بي اطلع اذا ماشفت احد ابات هناا لو اعرف اعيش هنا طول العمر ولا عيشه عدي واخته يمااا اذا لزموني بعد هالسوايه والله يملخوني ..

دك جهازها وكالت يله جن اجو اهلج ابتسمت بوجهي فرحانه  الي هيه .. ماتدري اني حسويها على نفسي من الخوف ،حاظنه  هيف حيل وطلعت اسحل بنفسي ماريد اطلع ..

وكفت يم الاستعلامات ومديت راسي مالمحت احد اعرفه ، حجت يله امشي ..

التفتت عليها هااا .

يله تلكيهم كاعدين بالاخر ،

بلعت ريك اي ..

مشيت بهدوء متردده وهي بصفي توه وصلت للاستعلامات اجاني صوت مو غريب علية ..  كنارري ..

التفتت بسرعه على هالصوت .. ابتسم بوجهي بشار ..

شلونج كناري ..

بهت وجهي ، احس دمي هبط فجاءه لرجلية ، تقدم عليه بسرعه وجهه يضحك ..

والله مشتاقين .. هاي شنو باوع لهيف مد اديه ياخذها .. سحبتها لصدري حيل وملت عنه خايفه ..

شبيج ميرال ، مو وكتها ترى انطينياها داشيلها وجهج وضعج ابد مو زين مبين جيبيها ..

مانطيتها اله ضليت متمسكه بيها وجهي اصفر حتى مااكدر احجي من الصدمه .. وكف مخصر نضل هيج يعني ، تردين يدخل عدي ياخذج هااا ..

بلعت ريك ..

يله وياي ميرال سيارات برة تنتظرنا صار هواي ادور عليج ..

دمعت عيوني مابيه حتى اوكف رجليه رخن حيل ،

ميرال الي صار مو مثل ما كالو الج ، الصار غير لاسمعين من طرف واحد ،احنه هم حقنا نبرر وتسمعين الي عدنا .. 

مانطقت ..

يله ميرال مد ايدة الي ..

الممرضه حاجتني ترحين وياه لو تضلين تنتظرين احد ثاني ..

التفتت عليها ، عيوني متروسة دمع ،  ليش اكو احد ثاني حيجي ياخذني ؟؟!! ..

بشار رد ماكو ميرال الا اذا تردين ترحين ويه عدي بكيفج بعد ..

كوه نطقت من الخوف وين تاخذني ..

لمكان احسن منا ، تبهذلتي هواي لازم ترجعين للمكانج الصح ..

ياهو قصدك ..

ابتسم يله ميرال امشي ، تقدم خطوتين مبتسم يطمني ويهز براسه يله يله .. مشيت وياه ومانطيت هيف بقيتها بحظني ، التفتت اخر مره للممرضه تباوعلي مبتسمه بالم اشرت لهيف بااي ..

درت وجهي امشي وبصفي بشار ، ضحك بنتج تشبه بيبر كلش .. دنج عليها يشاقيها هااا بيبر صغير  شتكول انت ..

هيف ماردت مستغربه ..

طلعنه بره المستشفى وعيوني ادور على عدي ، احس بي موجود بس ماشافته عيوني ، اشر بشار ذيج سياراتنا يله ..

اتجهنه عليهن ، وصلت ليمهن سيارات اثنين ، فتح الي بشار الباب ، صعدت ..

كلبي يدك حيل من الخوف لان اعرف وين ذبيت نفسي ، والله لو وحده بمكاني هم تعجز ، شسوي يعني ،،مشيت ويه روج بعد ..

تحركت السياره بعده توه طلعنه من شارع المستشفى كسرت سيارة علينه ، وشحطت السيارة حيل ، لزمت هيف حيل خايفه لا تنركع بالكشت الامامي ..

صوت فتحت باب السياره ونزل بشار بسرعه ، رفعت عيوني سياره عدي ..

عدي نزل منها ، اديه كامت ترجف ، احس الدم هبط بجسمي ، رفعت عيوني اشوف زين ، تلازم هو وبشار ونزل السايق هم ..

خليت هيف بالسيارة دانزل جلبت بيه تبجي .. شلتها ونزلت بسرعه ..

بشار التفت شافني صاح اصعديييي لاتنزلين ..

ضليت واكفه عاط عدي تعاااي .. اصعدي ..

اشرلي ماتحركت ضليت جامده ، هيف شافته ضلت تبجي باباااا .. بابااا ..

باوع عليها وجهه احمر اشرلها تعااي بابا تعاي ..

تريد تنزل من حظني عليه جلبت بيها حيل ، هزيت راسي لااا ، بشار صفن عليها باوع لعدي فاتح عينه مصدوم ..

حجه اصعدي ميرال السيارة لاتنزلين ..

عدي عاط ميراااال وين ، جيبي البنيه وتعااي ، تصير مذابح والله ماترحين .. مد ايده ليوره قميصه ، عطت بسرعه وبشار رجع ليوره يجر سلاحه .. ركضت عليه ..

عدي رووح داكلك رووح . 

مكانج ويااي ميرال اصعدي لاتخافين ميكدر ياخذج على جثتي والله …

هيف خبصتني تبجي بابااا وتمد اديها .. مد ايده ياخذها ، جرني بشار وراه و نتر بي روح عدي لا ودعت ستار اكومك هنااا  مخلي احترام للعشرة بس ، تجاوزت هواي  لدرجه سوالفك ماينسكت عليها …

همس بقله صبر …رافع حواجبه .. اصع عد ددددي داكول ..

هزيت راسي لااا حظنت هيف حيل ..

لزمني من زندي ، بشار دفعه من جتفه ونتر بي عدددي لا لاتكبرها عدي السالفه ماعايزه ..

وكف بوجهه بشار وهمس بعصبيه تخصنييي تخصنييي بعد ..

وكفت بصف السيارة ورديت ارجف .  مااخص احد اني. ..

التفتو علينه اثنينهم ، عدي حجه ، اني هادئ ميرال تعرفيني شوفيني كلش هادئ ، ماريد اسوي كارثه وياج طفلة مااريد اخرعها ،

لااصعدين ميرال ابقي وياي مد ايده يجرني ..

ابتعدت عنه خطوتين ، مااريد ..

لييش شسويت الج ..

نتر بشار تجاوزت الحدود هواي عدي ، وصلت بيك تخطف النسوان .

همس مااخطفت نطيتها حرية الاختيار التفت عليه مووو مو خيرتج مو انتي اختاريتي تبقين وياي ..

عاط بي بشار بااي حق تبقه وياك ولك عجبتك السالفه مستكعدها عندك ، يااول بيبر مايعرف بتفاصيل ماحجيت اله ، عدي خلي نلملم سالفة لا تكبرها ..

دمعت عيوني ساكته … روح عدي .. بشار حجه اصعدي ..

رخت ملامح وجهه ، وجهه انكلب ، مد ايده حيل وجرني ، لاااا .. جلب بي يشار ودفعه ليورة ، وانجريت وياها لان ضل مجلب بيدي عطت خايفه ..

السيارة الثانية ورانه .. نزلو ثلاث شباب منها واتجهو علينه بسرعه .. جلبت بعدي نترت بي روووح عدي تجفه الشر ..

انتي جبتي للشر ، ماله اي حق يمنه يالرعنه ، طليقج هوو بعد مالي شي عندج ولا عندي غير بس هيف وهيه بحظانتج والج من الاساس ..

بشار صاح بي هدهااا عاااد مرته بكيفك واذا تطلكوو مصيرهم يرجعون ..

سكت عدي يباوعلي ، بلعت ريك هزيت راسي ، ضل مجلب بيه ماهدني ..

التفتت على بشار هسه بس انطيني مجال احجي وياه ..

لااا اصعدي بالعجل يله ..

مد ايده يجرني وخرت عنه .. كتلك احجي وياه واصعد لاتعاند هو يعاند ، ماراح تنحل .. مانريد مشاكل ..

باوع لعدي معصب ، دقيقه بس ميرال ، دقيقه حتى بعدها اكول اني ماجنت ناوي على الشر ، هم جابو لنفسهم ..

وصعد بسرعه ضايج .. اشر بيده  .الشباب رجعو للسياره ..

ابتعدت كم خطوه عن السياره وعدي مجلب بيدي ..

همست …مايعرف موو ..

بلع ريك شنوو ..

بيبر مايعرف ..انت عاقد عليه ..

سكت شوي دار وجهه ..

ليش ؟؟

ابساطه لان ماخطفتج وعقدت عليج داغيضه لو اقهره ، تزوجتج لان احبج ، التفت عليه والله مايحبج بكدي ، تزوجتج احافظ عليج ويوم صرتي باسمي حفظتج من كلشي من الشارع من الناس من نفسج ومن طليقج هم ، الرجال مايستخدم مرتة اداه حرب ، بعدتج عن حربي وياه من يوم الي دخلتي بيتي وصرتي مرتي ،

ماحفظتني من نفسك لعد ؟؟؟

ماكدرت ، هاي ماكدرت اسويها ..

هزيت راسي مدمعه ، كوه حجيتها ... مااريد اضل يمك عدي رايحه ..

سكت ثواني عين عليه وعين على بشار ، دمعت عيونه .. وين يم بيبر ؟؟ بصفته شنوو رايحه اله اني رجلج ..

ممرتاحه يمك والله ، عجزت اتقبلك .. درت ظهري دامشي ..

لحكني ولزمني فرصه وحده ميرال .. فكري بنتج ..

ذاك ابوها واني مااكدر والله .. دفعته و اتجهت للسيارة فتحت باب السيارة وصعدت ، قبل لا اسد الباب لزمها ، واكف مدنج ماباوع بوجهي ، مد ايده بجيبه طلع ظرف ..

حجه اوراقج مد ايده خلاهم بصفي ، اوراقج كلهن ..

دنجت على الظرف ..  رفع نظره علية حاول يستعطفني ، ما رفعت نظري بوجهه ..

كعدت بمكاني لاتحركت ولا نطقت ، بس دمعتي تجري ، ماكدرت والله ماكدرت لااحبه ولا تقبلة ، ماتقبلته ..

ماتعرف الوحده شنو هالشعور غير الي مجربة.  ماتكدرين تعيشين وياه ، موافقتي ان اضل معناها انجبر طول عمري امثل دور الزوجه، زوجه تعيسة ، تعيش جسد بلا روح ، حياة روتينية ، حياة ممله هشه على ساعه تنهدم ، حياة بائسه  ، واني ماانفع ابد لهل دور ماكو شي يجبرني على هالشي ..

لخاطر منو وعلمود منوو ، الحياة مره وحده نعيشها ، هاي حياتنا مو حياتهم ليش اهدرها علمود عدي لو بيبر ،

عدي حتى لو حبني اني مااحبيته ، شنو يفيدني حبه واني مو سعيدة وياه ،

مشت بينا السيارة ، بشار كاعد بالصدر ، التفت علينه.   حاجاني متغيرة هواي ميرال ..

مارديت نزلت هيف من حظني كعدتها بصفي ، اعدل بملابسها وبشعرها  ..

حجه حنروح للمزرعه ..

مانطقت ..

ماتردين تعرفين وين صايرة ..

هم ماجاوبت، مدنجه على هيف الهي بيها وساكته  …

ملتفت عليه ويحجي .. ليش هيج صايرة ميرال ماجنتي هيج ..

رفعت نظري علية ، خليت عيني بعيونه ، لان جنت ماعرفكم على حقيقتكم ،

الي صار مرت عليه سنين ، بعدين انتي سمعتي من عدي بس ماسمعتي من عدنا ..

شكد ماتمر ايام واسنين الحقيقه وحده ماتتغير ، سواء سمعت منكم او من عدي ، شكد ماتنكرون هم الي صار الكم بي ايد ..

جر نفس ضايج دار وجه ليكدام وسكت ، همس ضايج بيبر هم تغير ترى ، مو عبالج بيبر الي عفتي ، الافضل الج ماطبكين ويه عدي ضد بيبر ترى تخسرين ..

خسرت من يوم شفتكم ..

التفت عليه معصب ، نتر حيل بيه مااخسرتي شيييي ، ماخسرتي روح عزيزه عليج ..

عطت وامي وابوياا منو قتلهم تنكر موووو الك عين تنكرر .

مالنا شغل بيهم الصار قبل سنوات طويلة ، جان حادث ، مالي قصد بي القتل ..

رجعت ظهري ليورة اجر نفس معصبة ، ماتو الله يرحمهم ، كلنا خسرنا ، انت اخوك واني اهلي وعدي مرته وابنه ،

قبل لااكمل قاطعني وبيبر اخوو وخالته واغلب عايلته حتى انتي خسرج ، وهسه صحته هم ، ميرال من معزتي للج دانصحج لاتوكفين بوجهه هسه ، تجنبي ، فقد هواي والانسان من يغضب يتصرف تصرفات ويتخذ قرارات ممكن يتندم عليها بعدين ، تجنبي لحد مايرجع مثل قبل ..

ماعندي شي وياه ولا هو عنده شي وياي ، الي بينا انتهه من زمان وخلص ،

غلطانه ، الي بصفج بنته اذا قرر ياخذها لا انتي ولا غيرج يكدر ياخذها التفت عليه رافع حاجبه ، مايحتاج اسولفلج عن بيبر موو تعرفي انتي ، حياطين السجن ماكدرت عليه ، ارجع واكررها الج نصيحه اخ تجنبي شكد ماتكدرين هالفترة ..

ماراح اسولفله على الصار توه ، سيرة عدي سديها من يمج كوليله جنت يم اخته ، وبقاني يمها ماوصل ليمنا ..

اذا ترديهم يذابحون بكيفج سولفيله على الي صار وياج كله ، عن نفسي ماحجيت غير بس ميرال عند عدي.  بس مو وياه بنفس البيت ، وانتي حتكولين جنت يم اخته وفضت راحت ..

سالفة عدي و بيبر لازم تنسد ، الامور اصلا مااطمن ، لانفتح اكثر من جبهه بنفس الوقت  ..

غمضت عيوني سااعه السوده شيسدها هاي متكلي ، والله لو تدري يابشار ..

خفت حتى انطق او اكول اي. اول وتالي راح يعرفون ، لو عدي يخابر بيبر ويكله لو بيبر حيعرف واذا عرف والله يقتلني خلاص ..

يطلع قهره بيه ، اني شعلي بالله ..

درت وجهي على الجامه ساكته مارديت شتجنب اذا هي الكوارث وراي وراي ، منين اتلكاها بالله اطلع من خبل اوكع بالثاني ، مشت بينا السياره ساعات مو ساعه ، حتى غفيت بمكاني ومادري ، كم مره نزلت للشارع اريد اتقيئ ،، درب موت احمر صار ..

غفيت شوي دايخه ، لمن وصلنا كعدني بشار ..

سحب هيف مني سحب وشالها حجه وجهج اصفر ولج بيج حيل تشيلين ثكل انتي ..

مشيت وراه .. نزلنه بالكراج ، جانت فله من الديكور وشكل البيت والحديقه عرفت احنه بالشمال بس بيا محافظه مادري ، جان اكو تلال و جبال مقابيلها ..

دخلنا للبيت هو قبلي دخل ، حجه غرفتج هناا جوه ، مشيت وياه توه دخلنا البيت ، طلعت النا مره جبيرة بالعمر ..

عمرها بالستينات او اكثر ، بيضه على حمار لابسه فوطه نيلية وثوب كشمير اسود ومورد بورد نيلي. ..

من شافتنه ابتسمت ، مدت اديها وبيها السبحه حجت ياهلااا نور البيت يما ياااهلا ..

وكفت وره بشار اباوع عليها بستغراب … حجه بشار يضحك .. ماشبتهتي عليها … ماتشبه احد تعرفي ..

سكتت ماحجيت بس اباوعليها مستغربه .. حجه هاي ام بيبر …

نترت هي بي ..  ام فرات ولك فراات اسمه فرات …

بلعت ريك كملت السبحه ياربي كملت …

اخذت هيف منه تبوس بيها وهيف عاطت مستغربه ، تقدمت بسرعه اخذتها منها حجت عوفيها يمي تتعود ..

هزيت راسي لااا ، باوعت لبشار .. حجه ماسلمين سلمي شبيج ..

انداريت عليه شلونج خاله ..

ابتسمت باوعتلي من فوك ليجوة ، هزت راسها هلاا يماا تعاي  .. ارتاحي وجهج مخطوف لونه ..

وكفت خايفه اتحرك .. حجت بصوت عالي ، يله يماا شبيج تصنمتي . 

مشيت وراها متردده ، التفتت اباوع لبشار خايفه اشر روحي ماتاكلج ترى روحي .. عمتج هاي بعد ماكو احن من العمه على الجنه ..

نزلت وحده من فوك لابسه تراك وردي  شاده الشعر اسود ذيل حصان ، وكفت مستغربه من شافتنا ..

اشرت الحجيه علينه .. مرت اخوج فرات وبنته ..

ابتسمت البنيه يااعمري ، تقدمت بسرعه تحظني .. ماحظنتها ابد ضليت جامده ، اصلا شايله هيف بادية بيش احظنها …

رادت تاخذ هيف رجعت ليوره همست تستغرب عوفيها ..

حجت تضحك والله شكد مشوقين نتعرف عليج يااعمري ماما شوفي الطفله تشبه فرات كلش اوووي يعمري شوو بس اشيلها شوي عليج الله .. مدت ايدها تبعد شعر هيف عن وجها دشوفها ..

هزيت راسي تستغرب كتلج ..

وكفت وملامحها تغيرت باوعت لامها ، امها حجت هاي غرفه فرات اذا تردين ترتاحين ، اوصي بشار يجيب سرير للطفله بس مااخليها يمكم بنفس الغرفه انتي وفرات حبقيها يمي احسن  ..

ليش ..

البيت جبير متروس غرف ، ليش تبقى يمكم ، البنت ام تراك الوردي حجت نسويلها غرفه خاصه حتى تتعلم تستقل لوحدها ،

لاااهيف تضل وياي بغرفه لوحدنا اني وياها ..

التفتت البنت على امها وجها باهت ، الام بلعت ريك وجهه تغير دارت وجهاا ، حجت نورس حظرليها غرفه الخطار بين مااخلي بشار يجهز للطفله احتياجاتها ..

دارت ظهرها ومشت ضايجه ، باوعتلي بنت اشرت اخر شي صايرة غرفه الخطار هناك ..

باوعت للمكان ومشيت شايله هيف .. التفتت عليها واكفه مجتفه اديها وجها مكلوب ..

لا هم حبوني ولا اني حبيتهم .. وصلت للغرفه وفتحت الباب دخلت ، غرفه جبيرة ماثثه هم ، ذبيت هيف على الفراش وكعدت بصفها ..

جنت تعبانه حيل ، وبكد تعبي خوفي هم ، مدتت اريح جسمي تكسر من السيارة .. هيف مانعسانه شبعت نوم بالسيارة ،

اجذب اذا اكول ماخايفه.  خايفه وشايله هم ، اذا عرف شراح يسوي .. حيعصب اكيد ..

بس ليش ؟؟؟!  شعلي هوو ، ماله حق على كولت عدي ، باي حق يعصب ..

لا شلون ، حيكول ضحكت عليه ، من جهه تكول بنتي انخطفت ومن جهه تزوجت الي خطف اابنيه ..

ماراح يصدك حتى لو حجيت اله ، وحتى لو صدكني مو راح تكوم الدنيا وماتكعد .. لو يكتل عدي لو عدي يكتله بالحالتين خسرانه اني ..

لزمت راسي ااااخ ياراسي اااخ ياقهري شسوي يااربي ..

بالي تالا ، بيمن افكر بالله اشيل هم منو هسه ، والله من يتلمن عليك مشتتات البال الا يهدن الحيل ..

اندكت الباب وانفتحت كبل حتى بدون مااكول اتفضل .  رفعت راسي ، طلعت هاي ام تراك وردي نورس . حجت سويت الكم اكل تاكلون اكيد جوعانين البنت وجها اصفر انطينياها اوكلها .. تقدمت عليها .. هيف طكتها ركضه عليه مخترعه ..

شلتها خليتها بحظني ، وكفت هي بمكانها ، اني وجهي جامد المشكله مااعرف اجامل ، ضلت تباوعلي واني هم مانطقت اباوع عليها ..

جرت نفس جزعانه حجت شبيج ..

مابيه ..

اخوي هواي حجه عنج بس ممبين عليج مثل ماوصفج ..

رفعت حواجبي ، لاتستلميني انتي الثانية اخلص من ام محمد تستلميني انتي ..

عقدت حواجبها ام محمد منوو …

حمات… سكتتت … شسويتي اكل ..

ابتسمت عدنا مشاوي جابهم بشار توه ..

مااكل مشاوي ..

ليش ماعايزه رجيم انتي ترى ..

معدتي ماتتحمل ..

عدنا شوربه خضار مال  امي  ، ماتاكل شي بي دهون وثكيل على المعده ..

كمت لحيلي ، اطلع وياها ، حجت يرادلج ملابس انتي والطفله ، خما تضلن بهذول ..

همست اي ..

نروح للسواك اني وانتي ..

وكفت بمكاني باوعت عليها يقبلون نطلع للسوك اني وياج

ابتسمت اي ليش،لااا قابل سجن هو ..

منو ويانه ..

بشار …

اتغير وجهي  .. الله كريم ..

دخلت للمطبخ ، بي ميز ، جريت الكرسي وكعدت ، الحجيه كاعده مقابيلي بيدها السبحه تسبح من كعدت رفعت راسها عليه تتفحصني ..

جنت بملابس البيت ، مستورة ، شعري ظفيرة شامرتها ليورة. .

دارت وجها عني هزت راسها ، ماتنطي شبه لام زياد ابد مستحيل تشبه عواد ، حتى ماتشبه بيبر ..

بنتها خلت الاكل كبالنا ، كعدت تاكل ، وكلت هيف ، نوب اكل اني ..

شوي و كملت ردت اكوم .. حجت اكعدي يماا دحاجيج ..

رجعت لمكاني ، التفتت على بنتها ، روحي ويه بشار جيبي الي تحتاجه مرت اخوج لاتخلين شي ، لاتقصرين ابد .. البنت عافت اكلها حجت بس خلي احظر القائمه حتى ماانسه شي ..  وراحت بسرعه للغرفه ...

اندارت عليه تباوعلي ، شوي وحجت الحجيه ، هو مو هناا ..

وضعه الصحي مو زين ، وحتى نفسيته … مااقبل احد ياثر علية حتى لو انتي ..

داحجي قاطعتني ، وجودج خير ترى ، خاصه بنته موجوده ، باوعت لهيف ، نكدر نصلح الي صار ، ماكو شي ميصلح ، اعرف علاقتج بي مو شي ، بس المره لخاطر اطفالها تتحمل كلشي ..

قاطعتها ، لعد ليش ماتحملتي الوحده لاجل اولادج ام عواد  ، ماتزوجتي عمهم للاولاد .. فتحت عيونها بسرعه مصدومه ..

هزيت راسي الها ،  حجية من الاخر ممكن انجبر ممكن اسكت ، ممكن اضل بمكان فترة لان القفص انقفلت ابوابة ، بس شما صار تاليتي طير بس ينفتح الي الباب اطير ..

وجودي هناا اذا انجبرت عليه اضل بس ثقي يوم الي تجيني فرصه مافوتها ،

حجت .. فهمتيني غلط امي ..

لا حجيه فهمتج صح ، بس انتي مافهمتيني ، اني طليقه ابنج ، من اول مادخلت وانتي زارعه فكرة ان اني مرته ،مادامني مرته لازم اكعد اصلح الخراب الي بحياة ابنج .. الي اساسه من الطفولة ولحد هسه ..

اني ،اشرت على نفسي اني ؟؟، كلكم تحملوني المسؤليه اصلاح حياة  ناس غيري ، الي اني مالي،اي ايد بخرابها ، كلمن يصلح اخطاءه ويكفر عن ذنوبه ..

الي بيه كاافيني  عندي من المشاكل والكوارث تكفيني ، حايرة اصلا شلون اصلح حياتي وشلون اواجهه مصايب الي راح تجيني بعد فترة ،،، اخر همي ابنج و نفسيته ..

شفت منه بما فيه الكفاية من ظلم من اذيه ومن خوف ، 

ليش اجيتي لعد ..

ماراح اطول حجية ، وداعتج مااطول ، كمت لحيلي ارجع للغرفة ..

حجت صوجي سعيت لرجعتج اله ..

التفتت عليها ، اي والله حجيه صوجج .. عفتها وكملت دربي للغرفه .. عبالها تاكلني مثل ماسوت ام زياد قبلها ..

عرفتجن وعرفت طينتجن حيايه من جوه تبن ، رجعت للغرفه وسديتها ،  ضليت بالغرفه فترة وبعدها مليت و هيف تنحست تبجي طلعتها للحديقه ،

راح من بالي الظرف الي نطانيا عدي ،

توجهت لبرة اكضي للوكت ، مو مال احبس نفسي بالغرفة لو اكابل الحجية ، جانت تجنن الحديقه حتى بيها مسبح ، اكو كراسي مقابيلة ،  نورس رجعت هيه والغراض ، شايلهن وياها بشار ..

اشترت تضحك تعاي شوفي شنو جبت ..

اخذت هيف وتوجهت عليها ، خلتهم بالمطبخ تحجي هاي العلاكه ملابسج .. هذول مال البيت وهذول والمممم وضحكت تغمزلي .

وهاي لهل امورة ، خلت العلاكه كبالي .. جبت الي اعرفه اذا عاجزج شي كوليلي داجيبه هم ..

بقه بس السرير مفصخ بالكارتون اخلي شباب يشدو بالغرفه ..

وكرسي الاكل هسه اشده اني ، ضلت تحجي وتسولف الي واطلع بالحاجات وتشوفني ، ردت اكول الها ماله داعي هالكد وجودي هنا مؤقت بس حجيت هواي اليوم وكرهتهن بيه بما فيه الكفايه فلتزمت الصمت ، ماحبيت افتح على نفسي جبهه حرب اني الطرف الاضعف وياي بنتي ..

جربت ام زياد قبل واعرف شنو نفستهم .. بالاول يتمسكونون بعدها يركبون عليك ،

لمن رجعت للغرفه تذكرت الظرف الي نطانيا عدي ، رحت اشوف صدك اوراقي بي ..

فتحته لكيت صدك خال الي اوراقي كلهن ،  وياهن عقد الزواج وفتحته صورتي وصورته ..

صورتي منين جابها ، صورة قديمه اخذتها قبل سنوات من قدمت على معهد الفنون .. فرغت الظرف وكع موبايل ، بس الموبايل مقفول ، فتحته وخليته صامت ..

بي ارقام اثنين .. تالا ورقمه هو هم مسيفه ..

داك مرتين ، مادكيت علية عفته .. نمت بالغرفه المخصصه النا ..

جانت جبيرة ونظيفه ، مريحه هم خاصه بعد ما شدو سرير هيف ، نمت نومه عميقه على كد التعب والالم ..

وهيف وياي ، صبحت صبح ، فزيت من مكاني ، استغربت الفراش والغرفه لحد ماستوعبت اني وين ، درت وجهي اشوف هيف ..

السرير فارغ .. كمزت من فراشي بسرعه مخترعه ، بكمزتي لزمني دمار بطني ، دنجت لازمه بطني اااه ياايمه ..

وكفت لحيلي وطلعت بره الغرفه ، اسمع صوتهم بره ، دخلت للصاله لكيت الحجيه كاعده تتريك وياها هيف بالارض ياكلن ..

ماسلمت ضليت واكفه انتبهت علية الحجيه ..

حجت صباح الخير يماا ..

همست صباح النور ..

تعاي تريكي توه نورس خلت الصينيه .

ليش متبعه نفسج ماخذه هيف هي متعوده عليه تتريك وياي بعد ماغيرلها واغسل الها ..

لا يما قابل مانعرف للجهال بعدين ماشاء الله البنيه فرهه ماتستغرب ..

اجت نورس جايبه قوري الجاي ، حجت تتريكين ترى امي ماتعرف تاكل الا بالكاع . نادرا ماتاكل على ميز برغم دكتور المفاصل شكد حذرها بس متاخذ بالحجي ..

ماحجيت ، رجعت للغرفه اغير ملابسي ، واغسل وجهي ، خلصت ورجعت عليهن ، كعدت على صفحه ..

سالت نورس ..ماتتريكين ..

لا معدتي ماتتحمل اشرب عصير ..

كامت لحيلها اسويلج …

لااا اكعدي اني اسوي بس مو هسه مااشتهي ..

رجعت كعدت بكيفج ، ملامحها حلوه نورس ، ناعمه بشعر اسود ، حجت الحجيه هالكم يوم يطلع فرات من المستشفى ،

رديت .. الله يسهل ..

رفعت نظرها عليه وهي توكل بهيف وتخلي بحلكها ، هم يريد يشوف بنته ..

هو كال ..

بلا ميكول ليش هو اكو اغلى من الضنا ..ضلت تباوعلي ..

ابتسمت اكيد ماكوو ، خلي يشوفها ..

حخلي بشار ياخذها للمستشفى اليوم اله ..

بنتي وين مااروح وياي حجيه ، قابل ادزها ويه بشار لوحدها وعمرها سنتين بس ..

عمتها وياها شكو عليها ..

هم مايصير،حجيه ماامن عليها بعدين هيف نحسة من تبجي ماتسكت ..

سكتت ودنجت تاكل ، كمت لحيلي اسوي لنفسي اكل ، سويت عصير وكعدت بالمطبخ اشربه لوحدي . اشوف من الشباك الحراسات ، تمشيت وكفت بالباب ..

رجعتلي ذكريات الي فاتت ، حديقه ، سياج ، حراسات ، خنكه خنكه ، بس هالمره الوحدي لا اختي ولا ساري ولا امه ..

رمشت بعيوني حسيت على صوت نورس ، تحجي ، مالتفتت ، رجعت للغرفه احظر ملابسي خاف نروح للمستشفى ، شفت موبايل يضوي ..

رحت عليه رفعته عدي ..

مارديت ..لزمته وغيرت اسمه ، سويته ام محمد …

دك وفتحته ..

مانطق بالاول ..

حجيت اني هاا عدي ..

جر نفس وينج يمعوده ضل بالي ..

مادري خالته صامت شتريد ..

اطمن شريد يعني ..

مابينه شي ..

هيف اشلونها ..

زينه ..

ماستفقدتني …

لااا ..

جلبة .. مارديت عليه ، مشتاقلها مشتاق لصوتها بالبيت .. وين انتو ..

بيت ..

اعرف قابل بالشارع .. بس وين ..

شدراني ..

هااا .

اي .

ويامن كاعدين ..

ويه ام واخته لبيبر ..

عند اهله ودااج ..

اي ..

معناها بالشمال انتو ..

اي ..

ليش تكولين مادري لعد من اسالج. ..

ماجنت متاكده ..

لاجذبين علي ميرال ماتسوة ترى ..

سكتت ..

هو وين ..

بيبر ؟؟

اي ..

بالمستشفى بعده ..

شراح اسوين ..

مادري ..

رتبي وضعج واخذي بنتج واطلعي من يمهم قبل مايرجع للبيت ويفرض نفسه عليج ..

مايفرض نفسه ،

ليش يعني ، ماتعرفي انتي ..

اعرفه ..

سكت شوي بعدها حجه ضايج ، بالي يمكم حيل مامطمن ابد ..

من اي ناحية ..

من كلشي ، بيبر اذا طلع من المستشفى وكلتي اريد اروح ماراح يخليج ، واذا اصريتي ممكن يكلج روحي بس بنتي تضل هناا ، انخطفت مره ممكن تصبر مره الثانية ، راح ياخذ الموضوع حجه عليج ..

سكتت خايفه ..

كتلج لاترحين ويه بشار عاندتي ..

لا اضل يمك وبيبر بعد مايلكانه بس الله يعلم شيسوي بينا ..
ام محمد زعلانه تدرين ..

اعتذر لي منها ..

سكت شوي وحجه شنو كالت دكتورة من رحتي كشفتي ..

سكتت ،

هاا ..

تحليلك عند المضمد كله جذب بجذب .. مامستغربة منك سوالفك هاي ..

سكت ..

شستفاديت من هالمعمعه كلها ، بهذلتني واذيتني على فاضي ماحصلت شي عدي ،

على الاقل حاولت ، سويت كل الي اكدر علية ميرال ، ماضليتي بنفسي ..

شراح يخلصني من بيبر ..

هالكد خايفة منه ..

لان اعرفه من يحقد ، الي يكتل اخو ماتوكف بعينه طليقته او بنته ..

كتلج ضلي وياي لا ترحين ..

وبعدها اضل منهزمه طول عمري ، اشرد من شنوو من ذنب اني ماسويته ، بعدين اني يرادلي واحد يحميني منك شلون احتمي بيك ..

سكت شوي وحجه ، الاسف مايفيد ، بس اني موجود والله مااعوفج ، قاطعته ضايك خلكي .. روح عدي مالي خلك روح ..

خليج على تواصل مو تسدي للجهاز لو رساله اطمنيني هم كافيه ..

يصير خير ..

سديت الجهاز منه ، ضليت شوي بالغرفة ، افكر اخابر تاالا .. دكيت عليها ماترد ..

استغربت مادكت عليه ابد ، زين ادك على منو وتسال ، زين بشار شلون اجاني .. غير هم كالوله ، ماعرفت ادك عليه وتسأله عليه ..

من زمان ابو حمد علاقته زينه بشار ، اكيد عرفت كلشي من حمد .. مايضم عليها هذا ..

راسي صار هالكبر من تفكير .. طلعت برة الغرفة  ، رحت ادور على هيف حتى اغير الها خاف انروح للمستشفى ، مالكيتها طلعت للحديقه نورس بره واكفه يم المسبح ..

سالتها. هيف وين ..

اخذتها امي هي وبشار ..

وين ..

لابوها يشوفها ..

جمدت بمكاني ضايجه .. مو كلتلكم تستغرب ..

اشرت باديها بعدم مبالاه .. ماعليها شي يمعوده لاتكبرين الموضوع امي راحت بنفسها توديها لابوها بالكت نفسيته تتحسن ..

جتفت اديه وضليت واكفه ضايجه ، حجت اكعدي ليش واكفه ترى امي تعرف تتعامل ويه جهال ..

درت وجهي .. شوي وجريت الكرسي كعدت يمها ..  حجت ماناويه تضلين هنا موو ..

التفتت عليها ، ابتسمت بوجهي ..

بلعت ريك ..  طليقه اخوج اني ماعندي اي سبب يبقيني هنا ..

و الطفلة ..

شبيها ..

امن عليها يم ابوها ..

منو يكول ..

مو انخطفت هي يمج ؟؟

ليش عيشه بيبر سليمه والبيئه سليمه ، وبعدين احنه ميصير بينه هيج لو ما مشاكل بيبر، وعداواته ويه العالم  ..

ترى فرات تغير ..

عليكم تغير .. بالنسبه الي هو هو ماتغير ..

لا والله تغير ماجنه نتوقع فد يوم يراضي امي بعد هالسنين ويرجع لحظنها ، ويرجع ليمنا بيت واحد ، ماجان هيج جان قاسي ومن يزعل يحقد هسه تغير ، حتى امي تكول ، احس بكلبه رحمه مو مثل قبل ..

اي كتلج عليكم تغير مو علية ، من يوم الي شفته هو هو ،
حاجاتج لسه محتفظ بيهم ..

التفتت عليها ..

ابتسمت بوجهي ، غرفته فوك ، خال بيها غراضج ماقبل احد يدخلها ، ورجع لبغداد يدور عليج  ، بس ماجان يكدر يتحرك بحرية منا اسمه معمم بالسيطرات والمنافذ ومنا القانون والقضايا ومنا شغله .. قاطعتها .. ادري ..

شتدرين ..

اعرف وضعه .. الله يحفظه ويكفي الشر ، درت وجهي ، مااعرف ممرتاحه ابد ، الكل يبرر الكل يدافع عن نفسه ، الكل عنده منو يوكف وياه ويحمد بي و يطمطمله .. الا اني مشاكلي مصايبي اني لازم اوكفها لازم اكعد ابرر للناس واعتذر وافهم ..

رغم مشاكلي وجع راسي منهم ماردت شي غير بس ارتاح واعيش بسلام اني وبنتي ..

بعدنا نحجي سمعت صوت سيارات ، التفتنه اثنينة على الباب الخارجية ، فتحها الحارس ، كلبي قبضني ..

ماكدرت ادير وجهي ضليت جامده ، دخلن السيارات للكراج ، نزلت الحجيه من وحده منهم وبيدها هيف ..

كامت نورس تركض ، وتضحك اجه اجه الحمدلله على سلامته ..واتجهت عليهم بسرعه ..

شلون المربوطه بالكرسي مااكدرت اتحرك ولا اكوم ، بشار فتح الباب الوره وياه شخص مدو اديهم لداخل السيارة ،

بلعت ريك جف حتى حلكي ، نزل رجل وحده من السيارة ، بانت بس مو طبيعيه .. بيها سياج حديد ..

مغروس بيها حديد ماعرف محاوطها ، نزلو كوه ساندي ، امه توجهت عليه تكللهم على كيف لا تعورو ، نزلوله الكرسي يردو يكعد عليه رفع ايده اشر لااا امشي ..

نطو العكازه يسند نفسه عليها ، وبشار محاوطه خاف يوكع واخته بصفه ..

امه مدري شكالت اله واندار على جهتي ، المشكله اني مااكدر اكوم من الخوف والارتباك ، ماكمت ضليت على كعدتي ، واكف صافن باتجاهي بعدها دار وجهه يدخل للبيت …

#يتبع .........

شنو توقعاتكم بالله ..