رواية قاع الشياطين الفصل السابع عشر 17 - بقلم اسماء ديمير

...............☆البارت الخامس عشر  ☆..............

#قاع_الشياطين(البصر والبصيره)

#بقلم_أسماء_ديمير

حجيت سمعني صوتك .

بعدها الاصابع وصاحبها سكن ماتحرك  ، ساكت .

بلعت ريك ، اترقب الحركه ،او النفس ،  ايده ضلت تتحرك بطئ وبحذر ، نزل ايده على جف ايدي ، يتلمسه بهدوء ..

رفعت ايدي بسرعه ولزمت اصبعه ، لابس محبس ،  همست مو بيبر موو ؟؟ 

تقرب مني صوت نفس ، رجفت ميلت راسي ابتعد  ، سمعت صوت نانه ودكتوره يحجن سوه  ، بعد ايدي بهدوء عن اصبعه ، وابتعد ، حجيت منو انته ..

صوت خطواته مشت وابتعدت بسرعه تحركت وانسدت الباب .

ثواني ودخلت نانه ، حجت ميرال يماا صاحيه همست اي ..

-ياا سلامات يماا مابيج غير  العافيه ..

-سكتت اجت باستني سالتها منو بره ..

-استاذ بيبرس جاي يرتب اوراقج دنقلج لاربيل يكول هو افضل الج هناك ..

-منو بعد ..

-منو ..

-منو موجود وياكم ..

-عواد وبشار ..

-بس ..

-اي يما خير رايده احد .

-هزيت راسي لاا شنو الصار ..

-ماكو شي نزف بسيط ،مايعرفون شنو السبب بالضبط لذلك قررنه ننقلج لاربيل افضل هناك المستشفى مالتها الدكاتره كلهم المان و اتراك ..

جريت نفس ساكته ، شوي واجه بيبير ابتسمت من سمعت صوته ..

- لزم جف ايدي حيل حجه شبيج شتحسين ..

- خايفه بس ..

-من شنو خايفه واني وياج ..

-خايفه من مجهول بيبر ..

-راح ارسم الج المستقبل كبالج ، وايدي بيدج ماهدج والله ..

لزمت جف ايده حيل ، ابتسمت يمكن انته عوض الله عن نظري ..

-نظرج يرجع واذا مارجع اني اصيرلج نظر وداعت اهلي ..

تلمست ايده ، خايفه ، شبكت اصابعي بجف ايده ، رمشت من حسيت بيها فارغه مابيها محبس ، ايده دافيه حيل ، نزل راسه يبوس بجف ايدي .. ضحكت اني ..  بيبر ؟؟.

-عيونه ..

-ضروري نعقد ..

- انتي تعرضين الزواج عليه شهل دلال ..

- ابتسمت مو تكول نروح لاربيل ، 

- اي ..

-لازم تتزوجني لعد ، مالكيت احد من خوالي ..

-لا لكيت خالتج وعندج بعد اقارب بسليمانيه بس مالكيت عنوانهم بالضبط ، 

-خوش واريد عرس ..

-يجرالج تردين مهر هم ..

-اكيد بنت صايغ ماتريد مهر شلون هاي ..

دنج يبوس باصابعي اطلعي منا ، وتدللي بس خلي ترجع صحتج و كلشي سهل ..

جريت نفس شنو بيها عيوني .

-سهله ميرال ..

-شنو بيها …

رفع راسه باس عيوني من وره الشاش ، همست ليش مستغل الوضع و كاعد تبوس ..

-ههههههه حتى انتي بهل وضع صاحيتلي شبيج دعوفيني ..

-ليش تغير السالفه ، شنو سبب النزف معقوله ماطاب الجرح صارله فوك ال١٢ سنه ..

-نروح لاربيل ودكاتره اجانب اضبط هذول حجيهم كله خريط و مابي امل ..

-سكتت ، ، رد تطلعين اليوم لو تردين باجر ..

-اطلع افضل مليت وعفت الكتاكيت وراي ..

-حجه اصيح ام ساري تساعدج ، لو اني .. هزيت راسي لا ام ساري احسن ..

عدل كعدتي وطلع يصيحها ، دخلت هيه محظره الي غراضي ، وكعدت تبدل الي ، غيرت و سندتني اطلع.

وره ماخلصت دخل هو ، كملو الاجرائات وطلعنه ، جان لازم ايدي ، ويمشي وياي ، درجه قربه يطخ جتفه بيه ، يمكن اكو من يراوده سؤال بصفته شنو؟؟! 

 او ليش هيج يسوي ..

حبه الها او اعجابه بيها مو كافي !! 

اني هم عن نفسي جنت اسال نفسي ، اني ليش هيج مستسلمه اله و منطيته مجال ، يعني كلامه ولطافته و احسانه الي لهل درجه اثر عليه ، طلبه لزواج مني يخليني اسمح اله يتكفل بيه و بحياتي هيج بهل سهوله ..

ماعرف شنو سبب بس اضن الحب و الدفو الي حسيت بي بقربه خلاني امن ، خلاني اميل لجانب ارتاح عليه ،

هو هم شنو استفاد مني شو شاف مني اصلا ، معقوله تفكيري جذبه لو شكلي ، شكلي الي ماعرف هل يستحق هالحب ودلال لو الله سخره الي وخلص ..

رجعنه للبيت وعيوني ملفوفه ما انفتح الشاش لان ممنوع اي حروره او ضوه قوي ..

دخلت للمحلق و تمددت ارتاح ..

اجت ديما وياها ابنها يتحمدولي بالسلامه ، و راها بشار ، اما البقيه لا ، يمكن مايحبوني او الاصح ممهتمين لان مايعرفوني اني هم ماجنت عاتبه عليهم ..

ثاني يوم من الصبح اندكت الباب ، جنت بوقتها توه سابحه و تالا جاي تساعدني البس ، سمعت صوت ستار يكللها بيبرس دز عليكم ويكول خلي يستعجلون لا نتاخر ..

ردت عليه يله يله دقايق وجايين ..

سدت الباب وركضت علينه تحجي يله خفو اديكم ..

خلصت اني ، شالت نانه جنط ونطتهم لستار ، ضلت نانه توصي بساري و تالا مو تتعاركون و تفضحونه كبال العالم ، والله بس ارجع واسمع متعاركين لاكلب دنيا عليكم اثنينكم ..

ضبو نفسكم بين مانرجع مانتاخر اني وصيت عليكم ابو حمد ، و صيت ست ديما تمر عليكم ..

ومن ادك تردون عليه و انته ساري مو تكضيها دايحه لنص اليل ، جرتني وطلعنه ..

تلكانه صوت خاله بيبرس توصلون بالسلامه ، هزيت راسي اشكرج ، حجت ماكدرت البارحه اجي رجليه جانن يوجعني ..

جرني بيبر من ايدي حجه يله تاخرنه صوته جان ضايج ..

صاح بستار سياااره يله ..

فتح باب سياره و صعدني قبلهم ، و يمي نانه ،  هو رجع ماعرف شبي ..

اسمع صوته جوه بالبيت عصبي يحجي ويه خالته ورجلها ، ويكللها كولي لعواد لا يتصرف بكيفه بس اخلص عندي واجي،  اني افض السالفه ، شغل شهر لايهدمه الي باليله لا اكلبها للدنيا عليه .

وهيه ترد اني احاول احاجي و اقنعه بين ماترجع انته تصرف وياه  ..

همست نانه ..

ردت هاا ، سمعت صوت نفس بالسياره بالصدر ..

سكتت ماححيت عرف اكو سايق ، 

من صعد بيبر بالصدر ، سمعت صوت باب انسدت حيل حجه جايبه الجوازات وياج ميرال ..

رديت الجوازات ماحصلتهم ويه الاوراق الي جبتهم الي ..

جر نفس ضايج ، حجه صوت ستار شلون نصعد لطياره بلا جواز  . ..

اسمعه يجر بالنفس كوه ، حجه نطلع بسياره سالفه الطياره ماتفيد ، عود من نوصل للسيطره اني ادبرها ..

انفتحت الباب الخارجيه للفله ، انطلقت السياره ، درب كله جهازه ما وكف اتصالات ، يحجي كلمتين ويسده ..

و اغلب وقته ينتر ضايج ؛ وكل شوي يرجع معصب على عواد ..

افتهمت عواد ساحب فلوس من الشركه ، ومشارك ثروت من وره بيبر ، هو متخبل عليهم ..

سياره دكت بيه بالساعات نعست ونمت بحظن نانه  ، مادري شلون و صلنه بس من كعدتني نانه تكلي وصلنه يما يله ..

رديت وصلنه ..

اي يما يله جرتني من ايدي حجت ديربالج لان جنتي نايمع دايخه ممتوازنه ، نزلت وياها حجيت وين احنه ..

باربيل يمه كبال الفندق .

صوت بيبر ضعيف كانو بعيد ..

صاح الها ام ساري ادخلو احنه نجيب الجنط …

دخلنه و كعدنه بالرسبشن  .. ننتظر ، لمن اجو همه كملو اوراقنه ، سالت نانه شلون دخلنه السيطره ..

ردت نزل استاذ بيبرس و حجه وياهم و دخلونه عادي ، اجه هو حجه اصعدو ارتاحو فوك و الاكل يوصل الكم وهاي مفاتيح غرفكم والغراض يصعدها الموظف ..

اني عندي شغل اخلصه ،  تردون شي ..

ردت نانه لا يمه رحم الله والديك ..  

كمت لحيلي حجه شلونج خما تحسين نفسج مو زينه ، رديت لا الحمدلله زينه ، حجه ، ستار راح يبقه هنا يمكم ، اي شي تحتاجو دكو عليه اني ادزه عليكم ..

صعدنه لغرفتنه و موظف صعد الغراض دخلت سبحت و رجعت كملت نومتي ماكعدت الا المغرب ..

جسمي منعنع ، اكلت شوي ، وكعدت اسمع كتب صوته ، نانه حجت استاذ بيبرس سال عليج كتله نايمه حجه من تكعد كوليلي حتى نروح لدكتور خاص بالعيون باليل ..

لان حاجز هو صار كم يوم ..

هزيت راسي اي ..

طلعنه من الفندق ساعه سبعه المغرب للدكتور ، لمن دخلنه اله ساعه بثمانيه ، شوفو فحوصاتي القديمه والجديده ماعترف بيها ..

كال تفحصون هسه جديد ..

اامشكله ماكو وقت ، سوينه فحوصات نصها و ثاني يوم البقيه يله كملناهم ، بالتسع فحوصات ، حتى للدماغ ، الحلو بيبر عده صبر وخلك  مايضوج ، وشغله تركض بيده ماشالله عليه ..

نبره صوته ماعجبتني احسه ضايج بس ما سالت ماحبيت اتدخل من اولها ، دخلت للدكتور اشوفه الفحوصات ، كعدت واديه بحظني متوتره ، بيبر بصفي لازم اديه ..

الدكتور اخذ وقت يشوف الفحص ويقراهم ، شكد صعبه هالحظه يالهي ..

قسم بالله تموتك على بطيى ، اصعب من يوم استلام شهاده السادس اضعاااااف اضعاااف ، هاي صحه يااناس ،

هاي شغله لا تنشره ولا تنباع ، هاي اذا راحت ماترجع ..

كلشي يهون بالدنيا اذا راح الا الصحه ، احمدو ربكم واشكرو الف مره لاتكولون ليش الله خالقني او ليش الله مانطلني كذا وكذا ..

لا انطاك الصحه والعافيه وهاي بالدنياا كلها ماتتعوض ..

الله نطاني اهل و نطاني مال ونطاني شخص يحبني بس اخذ صحتي ، والله ماحس بالعوض ابد احس نفسي ارق من زجاج ، لان ماكدر احمي نفسي ولا ادبر نفسي ناس هيه قايمه بيه ..

قاطع تفكيري كلام الدكتور ، رد النزف هذا ماراح يتوقف اذا ضل هيج ..

يرجع عليج كل ماصعد ضغطج وكل ماضوجين او من تفركين عيونج لازم يكون هناك تدخل جراحي يقطع التلف و يوقفه للابد .

رديت خايفه اذا تدخلت جراحيا معناها افقد الامل انو يرجعلي الي النظر ..

جر نفس حجه بهدوء تردين الحقيقه لو الجذب و الزيف بنتي ..

سكتت بالاول خايفه من الاجابته ممكن تقتل الامل الي بداخلي حجه بيبر كول دكتور ، ضغط على جف ايدي ، همس اني هنااا اني عيونج والله  ..

كمل دكتور اسمعي بنتي اني ماخذ الدكتوراه من المانيا وعندي بحوث بالسويد و برطانيا و حائز على جوائز والحمدلله الفضل الله ، ماكو دكتور عيون ممكن يعلى عليه بالعراق ، فانطيها الج من الاخر ..

الي يكلج يرجع نظرج جذاب ..

بعده ممكمل اني برطمت و بجيت بهدوء ، حجه لا لااا بعدنه يالله ، ليش البجي

نانه حظنت راسي تكله شهل حجي دكتور فدوه لعينك ، ابوها والله وداها لاحسن دكاتره و جانو ينطونه امل و يكلوله سفرها لالمانيا واكو دكتور يسويها الها ..

حجه بهدوء : بنتي التدخل الحراجي ميرجع عيونج ، من شوكت التدخل الجراحي يرجع الروح لشي ميت ، بعده يحجي و اني احس كلبي راح ينفجر ..

لزمت صدري ياذيني ، كمل كلامه بمصداقيه، تدخل الجراحي لداخل العين معناها موت الاورده الدقيقه ، هذا وريد مثل الشعره تدخل جراحي يتلفه..

بس احنه مضطرين نسويلج العمليه حتى نوقف النزف لان ممكن ياثر على دماغ اذا ضل ..

حجيت بحه بجي ، يعني ماكو امل كلش ..

حجه بيبر ، اي شي دكتور حتى لو تبرع بالعين ،

سكت ثواني وحجه فحوصاتج مو كامله ، كمليها وبعدها ادزها لبرفسور الي درسني بالمانيا واخلي هو يحدد ..

طلعت من يمه جثه هامده ، حتى صوت مالي ، نوب بجي ماكدر ابجي براحتي ، بسبب الضماد ..

بيبر لازم ايدي وحجه عادي مو انتي تكولين عادي عندج ليش زعلتي اني نظرج والله ، اني وياج بكل مكان ، اجيب الج الي يساعدج بحياتج ، ليش مقهوره ، عندي استعداد اخذج لاوربا اكو ناس تتبرع بعيونها ..

ماحجيت جنت مدمره من داخل جان عندي امل والله ، جان عندي امل ارجع اشوف الوان اشوف و جهه الي احبهم ..

حاجاني مو وياج ردي ..

حجيت كوه جانت امنيتي اشوف وجهك حبيت ارجع اشوف بس حتى اشوف ملامح وجهك ، ضغط على جف ايدي حيل لاتحجين هيج لا اقلع عيوني وانطيهم الج والله ..

ابتسمت ، حظن راسي لصدره حجت نانه يله يما جرتني وياها و فلتت ايدي منه ..

رجعت للفندق ياسه ، دكينه نشوف ساري و تالا ..

محد يرد ..

رد اسامه و فتح كامره يصيح يماا تعارك ساري و تالا بس اسمع صياحهم وعياط تالا تسب بساري و اتفل عليه ..

كعدت على صفحه راسي ياذيني و نانه ابتلشت وياهم تصيح لا ولك لا شعرها لا يتكطع و لج تالا لا تدفرين يما عيب ..

ضليت هيج ساعه تصيح و تحاول و هم ولا كانو واسامه موجه عليهم الكامره ويضحك ، يكللها اجت غدير هنا و تالا تفلت عليها و جرتها من شعرها ...

ساعه هم مالاه ، الا اجاهم صوت واحد اعتقد بشار صاح بيهم ، ..

سدته نانه تون من راسها ، حجت ماينعافون هذول لوحدهم لا والله شله زعاطيط …

بعدها بيوم اجه اخذنه بيبر ، نزلنه لكيناه ينتظرنا بالسياره ، جنت اضن راح نروح للدكتور هم و اسوي فحوصات بس استغربت من طبكت السياره ، وحجت نانه بيت منو هذا يما ..

جان يسوق اندار علينه حجه بيت خالتها لميرال ، يله ننزل ..

فتح الباب من جهتي و ساعدني انزل ، همست ليش مانطيتني خبر ..

غير مفاجأءه ..

ابتسمت بيت خالتي بيداء مو ، ملابسي مو ملائمه ..

اي هيه ، وملابسج حلوه مرتبه ، تعاي يله ، قفل السياره و مشينه دك الجرس هو ، اني اديه عركن ..

اني اعرفهم خالاتي و خوالي بس جنه ننجمع بس بالمناسبات ، حتى بالفاتحه ما كدرت احجي وياهم على نفراد جانت حالتي ماتسمح ، 

فتحت الباب جريت نفس ، حجه ام سيدار هنا ..

رد صوت شاب اي نعم منو تفضل ..

حجه جااين عليها ماكو تفضل نبقه واكفين بره ..

لا لا العفو تفضلو ..

فتح الباب ودخلنه ، دخلنه كبل للصاله ، كعدت و بصفي نانه ومن جهتي الثانيه بيبر ..

ثواني ورجع الولد وياه صوت مره ..

كالت السلام عليكم سكتت بعدين حجت ميرالل يماا ..

كمت لحيلي ابتسمت شلونج خاله ..

يااعيون خاله وين رحتن ياعيني وين ضعتن متكللي وين ..

تقدمت تحظني وتبوس بيه بجت وتعتب وين رحتن ليش اختفيتن اجيت لبيتكم لكيته مقفول و نوب سالت بيت ابو يقين عليكم كال عافن اابيت وراحن ..

كلبت دنيا والله ..

عايشين خاله الحمدلله ..

اندارت تعتب وتحجي على ام ساري تكللها وين اخذتي البنات وبهذلتيهم هاا ليش ماتواصلتي ويانه واحنه اجينه اخذناهم يماا صار اشهر همه متبهذلات الله يعلم بحالجن ..

رديت مو منها سبب اني فضلت ابتعد خاله ، جربت واحد من كرايب واذاني اني واختي ماامن باحد غير بام ساري لا زعلين ، بس انتو هم على كد الفاتحه و محد سال علينه ولا دور علينه ..

-دكعدي دنسولف ،

سكت حجت ياا منو الي وياكم ..

ردت نانه عليها زلمتها انشالله هذا ..

ردت يااا تزوجتي ..

ابتسمت انخطبت ..

- ياااا وانخطبتي ياعيوني ، كون امج تجي وتشوووف يااا تعاي شووفي ياخيه الي جنتي شايله همها انخطبت بالخير ياروحي بالخير ..

سكتت مبتسمه من جذب ، كغدت تحجي و تكلي ، و الله وداعت امج طلع عندي ذاك المرض و حارو بيه الولد توقعت اخواتي واخواني هم راح يتكفلون بيكم ..

بس من سالتهم كالو كرابتهم الي بغداد ماقبلو ناخذهم ، نوب مرت عليكم خالتج ام هبه و مطردها كرايب ابوج ، و كاللها البنات شردو خبلها عليكم ، 

من ذاك اليوم احنه ماخلينه ، ضلت تحجي بالساعه على سوايه ابو يقين النذل ، حجبت الها مختصر وماحجيت تفاصيل لان تفشل ..

خابرت خالاتي وخوالي و حجت الهم ، وكالتهم بنت دينا ، اجتي ليمي ومابيها شي وجايه تتعالج هنا وترجع ..

ضلينه يمهم تغدينه ورجعنه ..

ضليت فتره باربيل و وصلت تقاريري من المانيا و تحددت عمليتي ،

من حسن حظي على كولت الدكتور انو اكو فريق طبي اوربي جاي لاربيل لمده اسبوعين يجري عمليات الصعبه و يرجع بعد هالفتره ..

جنت من ضمن هالاشخاص المحظوظين ، و تحدد يوم عمليتي ، اتفقو انو يعالجون التلف و يحاولون ينهون سالفه النزف نهائي ، اما النظر فهاي عند الله احنه مانكدر نحي شي هو ميت ..

صح كطعو الامل كلش ، و موتو ذره الامل جانت بداخلي بس حمدت الله و شكرته ..

الله راد هيج غير اله بيها حكمه اني شنو بعد ، عبد جاهل لا افقه شي ،

من ارجع من مراجعات اغطي راسي بحجه التعب وماحب الضوه بس جنت انطي نفسي مساحه افرغ بيها قهري ، وابجي شكد ماريد ، شي بداخلي ياذيني مامتقبل فكره العمى طول العمر ، جنت قبل اكول الله كريم  يجي يوم ، حتى هذا اليوم الي انتظرته سنوات ام خلص راح .

صح تعودت على العدم والظلام الفارغ ..

بس اشتاقيت ، احلم اشوف ملامح للي احبهم شلون صارت ..

تالا ….

طولت ميرال و سفريتها فتره ، بهل فتره ماعندي شي غير ساري ابو نسوان ..

الي حتى اني بالفيس زحف عليه ، ماجنت اعرفه هيج ملطلط والله جان خوش ولد ، بس من بيبرس عرض زواج على ميرال هو انكلب جلب مال نسوان ..

اما غدير لقائتهم كلها وره الاسطبل يتلاكون ، حجه اسامه وفتن عليه بس هدده ما يفك حلكه كبالي ..

لحد مانفجرت بوجه وعيرته و تمالخت وياه ؛ كوه فاككنه بشار وياه شخص ثاني اسمعه يكله دانيال ..

بعدت عن ساري اعدل بشعري الي سواه كفشه ..

همست جلب الحيوان ، انداريت عليهم عيونهم عليه ، نزلت نظري وين ديباوعون طلع فاليتني من يم صدر شوي مسروده رفعتها و رفعت حواجبي دارو وجهم اثنينهم برءأه عبالك ملائكه ..

سفله كلكم نفس الخيسه ، طلعو من يمنه واني مشيت للغرفه معصبه ، باليل كعدت اراسل ساري دشوف شبي شوصله لهل حاله ..

صح يجاوز وياي بالحجي بس اني اغلس ، سالته هم حبيت  .

مره اي ..

يعني ماتحب حاليا ابد..

اي احبج للج ..

بلا جذب وجاوب ..

سكت ماحجه ..

مو صديقتك اني وصار اشهر سوه ، يعني فضفض ..

ماحب حاليا لا ..

هاا ..

اي والله ..

مداخل علاقه يعني ..

انتي صديقتي موو ..

اي ..

يعني احجي بدون مزعلين ..

لا مازعل وعد ..

عندي علاقات ماجذب بس مو حب ..

لعد المن تحب ..

حبيت مره بس هيه ماشافتني و راحت لحال سبيلها و اني هم كلت اشوف الي تلائمني ..

ليش ماشافتك ليش ماعترفت الها ..

اكبر مني ، و صعب حيل ..

ليش ..

اووو سدي الموضوع راحت البنت وخلص الله يسعدها ..

يعني بطلت تحبها ..

لا احبها وحيل هم ، حبها مزروع بكلبي بس ماكدر اسوي شي ، فرصتي وياها مستحيله ..

تدري بيك تحبها ..

ماعتقد ، هيه ذكيه حيل ، بس ماعتقد شكت بيه لان اني دائما احاول اضبط نفسي يمها ..

ماجربت تصارحها ..

اخاف اخسرها هيه تعتبرني اخوها الصغير ، تخيلي صورتي كبالها واني اكللها احبج راح تتشوه اكيد ماراح اتحمل تكرهني ،

لهل درجه تحبها ..

انسانه نقييه ماعتقد اكو مثل كلبها ..

سكتت اني نزلت دموعي غصب عني ، كمل كلامه و يوصف بيها وبرقتها ، سديت جهاز كعدت ابجي ، انقهرت حيل كلبي انمرد مرد ، مشيت فتحت فيس وكروبات ودخلت لشغلات اصلا حرام يدخلها الشخص البالغ مو عاد اني بنت ال١٤ سنه ..

اعترف جان جزء من تدمير حياتي هو النت وعدم الرقابه و الحب و المراهقه ..

استمريت وياه لساري فتره ، يمكن حقدا عليه اريد اوجعه ، او اريد اعرف شنو بداخله بعد وكمت اكتشف هالانسان شنو ، الي بالحقيقه شخص متزن عاقل ، مجتهد بدروسه وطيب ..

و بالنت انسان قليل ادب ، كلامه جريئ و صاحب علاقات ، و عنده دروب تخوف ، حاول اكثر من مره يجرني وياه بعلاقات بس جنت ارفض ..

مو ثكل لا والله ، بس اخاف ، خوف من شنو ماعرف يمكن لان ممجربه ..

مره كالي خلص انتي ولد لان لاسامع صوتج ولا شايف شكلج ، ماترضين باي شي من هذني لاتفتحين كامره لا دزين فويز لا شي معناها انتي صدك ولد ..

كتبت اسمه على ايدي و دزيت الها ، حجيت اني بنت والله بس اخجل واخاف من اهلي هم ..

شاف صوره و سكت ثواني ودزلي اكتبي على فخذ* هم داتاكد ..

صفنت هاي شنو ؟!!

كتبت لاااا عييييب …

رد روحي والله انتي ولد ..

يبووو ، جريت القلم و خطيت اسمه على فخذي وبصفه قلب و دزيتها اله ،، شاف صوره و ماكو اي رد ..

كمت بسرعه اشوفع وينه ، مديت راسي ، ماكو بصاله ، فريت راسي كاعد بالمطبخ ، مرجع راسه على حايط ومغمض يااا بس لا فقد الولد ..

شوي ونزل راسه يباوع بالشاشه .. ابتسمت اني ، اجتني رساله ، اني وياج مو اصدقاء مو اخذيلي صوره لرجليج ..

رديت اصدقاء احنه مو حبيبين ..

كتب بسرعه تردين نصير حبيبين ..

شنو هيه لعب غير مشاعر ..

اني عندي مشاعر اتجاهج من زمان بس خايف اكولج..

تضحك علي انته لو شنو ..

لا والله ..

وعلاقاتك السابقه والحاليه ..

شبيهم ..

اني مارضه تخليني ويه قائمه العلاقات اني لو اتصير الي وحدي لو مالازم ..

سكت شوي دزلي فويز ، باعي يابنت الناس الله يشهد اكولها الج من الاخر عندي علاقات بكل مكان بس لا وحده حجيت وياها الي بكلبي شنو ، غيرج ، ارتاحيت الج ، فساعديني انتي و حببيني بيج ..

يعني انته متحبني ..

ماجذب عليج لاا بس تعلقت بيج ..

سكتت ، درت وجهي اشوفه ، هو يفرك بوجهه متوتر ينتظر ردي ، ياافلك طرك ياساري هذا بس فخذ واحد كلب حالك ، لو تشوفني كلني شسوي ..

صفنت بعدين مو اني كباله كلني ، طول اليوم ليش مانتبه عليه الحيوان هذا الاحول ..

مارديت عليه قفلت الجهاز وسكتت كلت خلي احمي بعد ، 

دكيت على نانه اشوف وين صارو حجت الي على خالاتي ، وكالت باجر عمليتها لاختج ، خايفين عليها حيل ، حجيت اكو امل يرجع شي من نظرها ..

حجت والله يايمه هم كالو تدخل جراحي راح يصير بس على كد توقيف نزف اوربط بعض الاورده غير هسج مايكدرون …

سكتت و سديته منها ، اجاني اسامه جوعان حجيت روح لساري يسويلك اكل ..

حجه ساري طلع بره ، كمت اسويله لفه فتحت شباك مطبخ اشوف ذاك وين وله ..

شفته بره يم بشار يسولف ، 

كمت سويت بتيته سلك على العشه ، وحظرت مقبلات ، اكو كبه نانه مسويتها وضامتها النه ..

ب٨ كمت سويت العشه ، هو دخل للبيت كبل للحمام يغسل ، حسيت نفسي ام البيت ، والله يالله اني حرت بالبيت كله هاي تاليتي ، صح وسن تجيب النه اكل لان خالته لبيبرس توصيها ادز النه لان تعرف لوحدنا بس تنظيف عليه شنو هذا قليل قابل و اسامه هم مسؤليته براسي .

كعد يتعشى و خال الجهاز على رجله ينتظر رد ، ياكل وعينه على شاشه مترقب ، اني واسامه نسولف هو باله ولا يمنه …

خلصنه عشه و شلت نعمه هو اخذ جهاز و طلع بره يفتر نوب شال جهاز يدك ..

ركضت لموبايلي افتح المازنجر شفته كالب دنيا برسائل والاتصالات كاتب زعلتي ..

خلص انسي الي كتلج علي وتعاي نرد اصدقاء ..

لا سوين وياي هيج ، والله ارتاحيت الج ، 

زين كولي الي اسمج الحقيقي وروحي بعد لاتردين ..

جنت اقره و مبتسمه .. 

دك و قفلت الجهاز بسرعه ، عفته هيج متلذذه بعذابه وحيرته بيه ، باليل فرشت اله ولاسامه بالصاله واني دخلت الغرفه و سديتها ..

فتحت الجهاز ورديت ليش تلح .

رد وره ثواني ، كبري عقلج ماسويت الج شي يزعلج ..

لاسويت ترديني حالي حال البقيه تضحك عليه بس للمتعه ..

لا والله انتي صديقتي قبل كلشي وتعرفين الي بداخلي شنوو ، بس حبيت اطور علاقتنه واذا ماتردين بكيفج ..

كتبت دزلي صورتك ..

ثواني و اجتني صوره هو مدد نايم بالفراش و شعره مخربط ، كتب على طبيعتي حتى اثبتلج اني ماحب التزيف حتى بلا ماامشط شعري ..

ابتسمت يمااا منك ابو الدرب يماا …

كتب بروح غواليج دزيلي صوره منج ..

لا ..

بش شوي ..

شلون يعني ..

اي شي منج حتى لو صوتج ..

ابد لاتحلم افتح وياك كامره او ادزلك فويز عندي ثقه اهلي قبل كلشي ..

زين نص وجهج ..

درت وجهي و طكيت لنفسي صوره طالع بس شعري و جزء من فاليتني السوده مال النوم ربع ردن …

دزيتها وكتب بس هاي لاتحاول اكثر ..

دز راح اخبيها بحظني وانام .. مارديت ، كتب اسمج شنوو ..

رديت بكيفك ..

راح اسميج امنيه لان امنيتي اشوفج وجه بوجهه ..

ذبيج الجهاز وقفلته بلا رد ، ابتسمت بستهزاء ، استهزأت بالواقع و بحظي ، الاسود الي خلاه بالحقيقه ما يعبرني و بالنت يكتل نفسه عليه …

شنو سر الي بالنت الي يخلي البشر بي يصير مثل جوهره شي نادر و مرغوب وبالحقيقه هو محد معبره واصلا نكره ..

على كولت ميرال ، النت خداع وساحه غير عادله وتظلم ، العالم الدكتور و الاستاذ و اصحاب الفكر والاختراعات مظلومين ومحد معبرهم و مشاهداتهم ماتسوه ، بينما تافه الفاشل الي ماعنده مبادى ولا افكار كلها تابعه و ترغب بي لان خدعهم بمظهره الخارجي و بصوره و بكلامه وبس ..

اما بالحقيقه هو نكره لاشي بالواقع  .. لااا شي بالواقع بس نت رفعه !!!

عجبتني لعبه ويه ساري ، والله من حبي اله بديت بيها ، حبيته و حبيت كلامه وياي بالنت حسيت نفسي انثى حيه عايشه تتنفس اكو هدف بحياتها عكس الواقع ..

بالواقع ، حتى من يكعد كبالي مايرفع راسه بوجهي كله مدنج على جهاز ينتظر امنيه شوكت تراسله..

مايعرف عن امنيه شي ، كل الي يعرفه عن امنيه الي انعجب بيها بس انو هيه صاحبه شعر بني ، و بيضه وبس  …

لا احلامها شنو لا طموحها شنو ، عاىلتها شنو ، تربيتها اخوانها اخواتها ، البيئه العايشه بيها او مجتمعها ، عدها ماضي ، شنو افكارها ، ابد مو مهم ..

وصلت بي عنده استعداد يحجي وياي حتى هو بالحمام ، تجرات ادزله بصمات بس بصوت ناااصي و هادئ حيل ، 

كلبي يرجف لايعرفني ، دزيتها ولزمت راسي ندمانه ، شوي و دز بعد ماسمعها والله صوتج نغمه نغمه تعرفين شنووو نغمه ..

ضحكت بهدوء ، دزيت بصمه ثانيه يعني شنو عجبك ..

رد بصمه ليش تحجين بهدوء كوه داسمع صوتج  .

اخاف من اخويه لايسمعني ..

عندج اخوان ..

اي ..

ماعندج غرفه لوحدج ..

لا ماعدنا ..

زين ديربالج بس من تدخلين حمام حاجيني فويز غير هيج لا راسليني مراسله بس ، ماريد يصيبج اذى بسببي ..

تمام ..

احبج امنيه ..

دمعت عيوني ، كلبي يرجف حيل ، سديته بلا رد وشمرت الجهاز وجهي نار ، بسرعه اتجهت للحمام اغسل ..

فتحت باب الغرفه خطف ، مانتبهت وانردمت بي عاط بيه وجع عميه شبيج ، شهل ثول …

دفعته ودخلت للحمام بدون ماحجي كبل فتحت الدوش على راسي ناااار راسي نااار ..

اديه ترجف وكلبي احسه راح يطلع من مكانه .. 

سديت الماي وطلعت لفيت راسي بالمنشفه ، درت وجهي اشوفه وين ، لكيته كاعد بالحديقه بره مشيت للغرفه صاافنه ..

ماكو اي صوت بس هدوووء ..

صافنه يحبني ، يحب منوو ، ليش هو اني منوو ، مو نفسي تالااا ، ليش ماحب تالا بالحقيقه …

مشطت شعري و غيرت ملابسي ، اتجهت عليه ، همست بهدوء سااري ..

مانتبه عليه ..

صحت حيل سااري ..

هو فز وشمر جهاز من ايده رد ووجع فززتيني ..

هميت بهدوء احاول وياه بلكت كلبه يلين .. مو جاي احاجيك وين بالك ..

نتر شعليج ..

رديت بهدوء جوعان تريد تاكل شي ..

ماريد سم بس ولي شال جهاز من الارض ينظف بي وضايج ، يدردم ،

صحت بي حيل ووووجع موو صوجك مو مال احترام انته ..

اندار عليه وجه مكلوب عفس وجه ، يااابه صوتج شكد مززعج يامحمد ولج ططوه انتي طوووه عوووذه ،

وكفت وجهي باهت اشرت على نفسي اني صوتي مزعج اااني ...

غير ماسامعه صوتج ، دكول ططوه تفتر على راس الواحد ،

درت وجهي مصدوومه اني صوتي مززعج اني ؟!!

رديت خايبه حيل ، يااهي ام صوت نغمه لعد ..
ياااا صدك عووود .. حتى ماباوعلي والله متجاهلني بالكامل ..

دمعتي تلجع بعيوني ماترضه تنزل كرهت روحي حيل ، كرهت تالاااا كلش ، تمنيت امنيه هي الحقيقيه ..

اهتميت بي بالكت عسى ولعل يحس ، اكله هدومه لبسه كلشي كلت بالكت ، بس ابد والله كاني دخاان او عدم مالي وجود ..

التهيت باسامه و بساري ، ميرال سوت العمليه وجانت ناجحه بشكل كامل الحمدلله ، كدرو يعالجون الضرر الي بداخل العين ، ميرال تكول نتائج مرضيه الحمدلله ..

حتى الالم عندي خف ، ماكو اي صداع ..

جان اكو ضغط على بعض الاورده و شرايين و حاليا شالو ، وراها بكم يوم نايمين احنه وفزينه على صوت عرك بيت بيبرس ..

طلع ساري واني وراه ، اسامه ضل نايم ..

توجهنه للحديقه لان عواد اخو بيبرس سكران وبطله بيده و يغني ويعيط شبي مادري ..

و رجل خالته يريد يشيله من الارض مايرضه ، مرته فاتحه الشباك من فوك تباوع وشايله ابنها تبجي …

نزلت نظري على هذا جنه بغل ، تكابلو عليه بشار ودانيال ورجل خالته هو يصيح مايرضه ..

دفعهم وخر عنهم مد ايده على ظهره وجر السلاح  يماا .. عطت وختلت وره ساري

#يتبع ...

صفحه الفيس ( كتابات اسماء ديمير )

الانستا .. asmaa_demer

ترقبو صفحتين لان يتم نشر فديوات تخص القصه ومستقبلها هناك ..

التفاعل مايسوي واهس ابددد والله .. حاولو تنشرون القصه بالكروبات همتكم بنوتات ..