رواية قاع الشياطين الفصل السابع والستون 67 - بقلم اسماء ديمير

...............☆البارت الواحد والستون  ☆............

#قاع_الشياطين(البصر والبصيره)

#بقلم_أسماء_ديمير

بيبر صاح ولك لااااا عدي ..  

ثواني هي مو اكثر ماستوعبت ديصير و نام فوكي بيبرس جفه جسمه جفي و عصف انفجار حار على شضايه كزاز ، العصف رفع السياره و كلبها علينه ….

صرخت حيل مرعوبه ، يمااااا .. ولك بيبررر…
جسمي برغم مغطى بجسم بيبر بس احس اعضامي انطحنت جواه  ..

انكلبت السياره بالاربع كلبات ، تكسرت كمت كوه انتفس ، ادين بيبر حاظنتنتي حيل و خال راسي بصدره ..

صوت الوشه عالي و الحروره ودخان ، احس دخلت للرئه ، صوت فحيط سيارات ثواني و صار هدوء مرعب ...

رفع نفسه عني وحجه كو يجر النفس ميرال ..

مارديت مابيه انطق ..

تلمس وجهي بجف اديه .. اديه رطبات ، يجرن ماعرف شبي ، سياره انكلبت على جه ماعرف ياجهه بس كعدتنه مو عدله ، ظهىي يوجعني ،  كانو مكلوبين على صفحه السياره ، باب السياره صاير جواي ، 

رفع راسي بيبر يهمس ميرال واعيه هااا تسمعيني ..

ونيت بالم قطر عليه شي ، ريحه زفره ريحه دم ..

رفعت اديه تلمست بيبر رطب جسمه رطب و اديه رطبه بجيت كبل بيبر دم ..

مابيج شي يكلبي مابيج شي ..

نزل اديه يتلمس بجسمي ، رفعت جف ايدي لزمت وجه غركان دم .. فايض فياض ..

همس هو ستار ستار .. ماكو صوت ..

حجيت هاا ..

رد نوب صاح ستااار …

حجه خليج بمكانج لاتتحركين كزاز .. تحرك هو وصاح اااخ .. لزمته حيل لاتكوم لاتطلع لايرجعون علينه لاتطلع يكتلووك ..

بجيت لازمته حيل باثنين اديه.

-ااااش لاتخافين اهدائي بس ، تحرك وابتعد صوت الكزاز صوت التاير مال السياره الي بعده يفتر ، تحرك كوه وابتعد عني صاح ستااار مو ويااك كوووم لك شبيك ..

هزه صاح ستااار بعد اخوووك كوم ولك ..

، عيوني تفتر بريبه ، ريحه شعواط ، بانزين ريحه تكتل ، بيبر بعده يصيح ستاار ؛ فجاءه صوته تغير ، صارت بحه بي وبجه .. صوت بجي .؟!!!

. صاح بي ولك ستااار هااا ستار شجاك ..

حجيت ارجف شبي هااا ليش مايرد .. صوت البجي عله وصاح ولك ستار موووياك موداحاجيك هي حيوووان رد لك …

فتحت عيوني ، بجبت عزاااا عزااااا مات مااات .. 

بجى عله و ضل يصيح ستاااار ، كام يجر بي ويصيح ستاااار ..
سمعت صوت باب انفتحت و هو رفع المسدس صاحو هاا احنه زلم الحجي شكووو شصار ،  سمعنه رمي ولحكناكم ..

نزل السلاح وكعد يبجي مكابل ستار ..

حاجو استاذ بيبرس انطينه ايدك دنطاعك منا الوضع خطر يله بالعجل ..

ماحجه هو بس صوت البجي مالته خليت اديه على حلكي ، اكتم صوتي ، كرررو عليه الكلام ، استاذ بيبرس بيك شي ، شتريد ونتصرف كول ..

كام هو وصوت الكزاز يطافر طلع من السياره ..

مد ايده وصاح بيه كومي ميرال انطيني ايدج ..

بلعت ريك ماكدر اكوم ، عيوني تفتر على جهه ستار ، صاح بيه ميررررال كوومي ...

مديت ايدي ولزمت جف ايده كله دم ..

حجه خلي رجلج بجه اليمنا واصعدي ، خليت رجلي جواي شي قاسي وصعدت تلكاني هو رفعني من خصري ..

تلكوني شباب نزلوني من السياره ..
كعدت بنص الشارع على الرصيف ، اكو شي ماكدرت استوعبه هو حلم لو حقيقه هذا ، اكيد حلم ماكو هيج شي ، حلم هسه اكعد اني هواي اكوبس مو جديده عليه ..

همست بيبر ستار شبي .. 

ماحجه بس اسمع صوت بجي ، حجه شوفو عدي سياره عدي ..

صوت ركض اقدام على الشارع ، صوت صياح قوي وبجي ..

خليت اديه على حلكي ابجي ، لميت راسي بين اديه ابجي ، وصوت عياط مرت عدي تصرخ مفزوعه ..

جسمي كزبر ، وعدي يصيح يالللله لا يااااللله …

شلون الدنيا افترت وكعت على صفحتي دايخه ، ريحه بانزين ريحه شي محترك ريحه الدم تكتل ، جانت ريحه مقرفه ريحه مووت ..

الموت جان اله ريحه بذيج اليله ، كل انسان عنده ايام ولحظات وذكريات ماتنسي اني جانت هاي وحده من ذكريات الي انطبعت بذاكرتي بتفاصيلها و بكلامها و باحداثها و بعطرها ..

حتى ريحه اتذكرها مانسيتها ريحه البارود المخلوط ويه الدم ، ريحه الدخان ، ريحه الارواحه طاهره الغادرت الدنيا ..

بذيج اليله غادرت ثلاث ارواح بدون استاذان بدون ماتنطي اي خبر او تلميح برحيلها الابدي ..

يمكن الله يحبني او اجل موتي لاجل غير معلوم ..

بس كل الي اذكره بذيج اليله صوت بجي وجع وعياط بيبر و عدي الي ماتوقعت فد يوم اسمعه ..

صوت بجيهم مفجوعين مخترعين مدهوشين ، ماجنت اتوقع هاي الكلوب القاسيه ممكن تكون رجيجه وتتالم مثلنه ..

دخلنه لمستشفى بين رضوض وبين كسور وبين جروح .. كل هذا يزول ..

الا الثلاثه الغادرو ماراح يزول وجعهم .. ستار انكتل بساعتها جايته طلقنه بركبته كتبت نهايه حياته الفرهه وضحكه الحلوه ..

ابن عدي هو ابحظن ابو جايته صليه خارطته اربعه طلقات ، الاربع طلقات جانت مستهدفه عدي بس من سوء حظه للطفل ، جسمه الترف صار درع هو تلكه طلقات عن ابو ٠ .. طلقه وحده صابت عدي بجتفه ..

مرته طلقتين بس ما سلمتها بساعتها طلعوها من سياره واعيه و تصيح و تصرخ باسم ابنها ، ماما بحرر يروحي  شبيك .. خطيته بركبت ياعدي ابنه راح ..

ابنه رااح ...

وصلنه للمستشفى خمس ساعات بغرفه العمليات و ماقاومت بعد ..

اعلنو رحيلها الساعه ب٥ الفجر ساعه ب٥ بعدد ساعات بقائها بغرفه العمليات ..

كاعده على السديه فاتحه عيوني ما نطقت حرف ، مصدومه من الصار ، اصوات اقدام كثيره وحجي هواي ، و كلام ماله داعي مايرجع الراحو ..

وناس تهدد و ناس تتوعد ، و ناس تحجي وتكول لبيبر حقهم مايروح احنه وياك والي اندك بيك اندك بينه ..

فز جسمي على عياط عدي يصيح بالم ، الم الي بصوته تغلغل بكل جسمي لدرجه حتى عظامي وجعني ..

لميت اديه لصدري ، صياح بشار و بجيه و عيط بوجع على اخوو ، احس صراخه طالع من اعماق كلبه  ، غمضت عيوني ، عدي يصح لا بابا ليش بابا ليش كون بيه يابابا …

دنجت ابجي منهاره ماتحمل بعد اني ماتحمل يااربي ، بشار يعيط على اخوو وتؤم روحه ، صميت اذاني احجب اصواتهم ..

المهم بيه داحس الالم بيه اني كلبي ديوجعني ، التمو ناس اشكال بالمستشفى ، بس اصوات الوجع وحده ..

يمكن جنت مصدومه او يمكن طكت جنون صابتني ، بس كل رده فعل الي بدرت مني ابجي وبعدين اصفن ، صفنت هوواي حاولت استوعب الي جانو قبل ساعات يحجون سكتو للابد ..

حاولت اتقبل الطفل الي خله بيده حبه كشمش انتهت حياته بدون سبب ..

جذب مانكدر نتقبل والله ، اجه دانيال اخذني ورجعني للبيت تركت وراي المستشفى مليانه جثث وموتى واصوات بشر يتنفسون بس ارواحهم ماتت ..

ام تبجي على بنتها و حفيدها الراحو .. 

واخ انفجع بتؤم روحه ويدك على راسه مامتقبل موته ،

المستشفى انملت ناس و اهل و صراخ ، جان يوم اسود بي فاجعه مرعبه ، امشي واتعثر ودانيال كل شوي رافعنه و يشهك صوت شهكه مالته وجعت كلبي ، شكد اكرهه بس من سمعت صوت بجيهم انقهرت عليهم ولحد هاي الحظه ذكرى اصوات بجيهم اندفنت بروحي ..

رغم مابيه اي شي مجرد خدوش بسبب الكزاز مع هذا حسيت اني بس جسم وروحي ماتت ، الالم فضيع بكل جزء بيه ..

حتى كلبي يوجعني ، تلكتني ديما تبجي حظنتني ما حظنتها جامده ماعندي اي رده فعل ، جرتني تبجي تكلي صدك ستار مات هااا كولي غيرها عليج الله ..

انداريت على مصدر صوتها همست الها ، مايحجي حاجاه بيبر بس مايحجي ..

ردت مات يعني تاكدو خاف بي روح ..

دنجت راسي وبجيت مات ديمااا ضربه جايه بركبته ذابحته ..

عله صوت بجيها ، حظنتها ابجي مسكين جان ديأسس بيت اله عود جان ناوي يزوج ..

ام زياد مالها صوت ولا غزل اخذتني ديما للغرفه تكلي انزعي كلج دم وجهج هم تعاي ..

دخلت للحمام نزعتني الفستان حجت مابيج شي شنو هالدم تارسج ترس ..

كعدت بالارضيه البانيو و لميت نفسي همست كلهم دم ديما كلهم ..
فتحت الماي فوكي و كفت تفرك براسي وجهي حجت جسمج سليم بس اديج مجرحه و جهج شوي ، طلعتني ولفت عليه برنص ، جسمي يرجف حتى من ادوس بالارض ماحس برجليه ..

لفتني بالبطانيه تشهك حجت اروح نامي .. طلعت وعافتني صوت بجيها طالع لفيت روحي بالبطانيه ابجي ميته قهر ..

اسمع اصوات بره قويه بس ماطلعت جنت منهكه عبالك جزء بيه مات والله شي تبخر وراح ..

جسمي يوجعني ليش مادري عبالك مدعومه و جسمي ممرود جوه مكينه .. وارجف ارجف ، حتى حلكي يرجف ، ماكدرت انام ماكدرت اغمض اصلا من البجي حتى خشمي قفل ، كمت ماكدر انتفس ..

كمت لحيلي لبست ملابسي ، جسمي بعده يرجف ، مادري شنو السبب رجعت لبست فوك ملابسي ملابس ثانيه ، لفيت شعري و طلعت ..

اصوات رجاليه جوه و يحجون .. برز صوت ابو زياد يكللها السيارات صايره منخل مو زين طلعو سلامات والا هم جايين على موتتهم ويردون يقضون عليهم …

-ردت ام زياد و بيبرس ما صابه شي ..

-اسمع يكلها اششش يامره صوتج كاعده بيته وتردين يصيبه شي ، الحياطين الها اذان لاتحجين هيج ، 

-ردت هالمره طلع منها بس وداعت بنتي مره ثانيه مااراح يطلع ..

-نتر ولج اكلي خر* اسكتيييي ناويه على موتنه انتي ..

لزمت الحايط تراجعت ليوره ، رجعت لغرفتي و كعدت بيها ، هذا البيت صدك ملعون كالتها ايلاف هذا بيت الشياطين ..
وين اروح اني هاااا شلون ..

بره بالحديقه صوت زلم غربه ، مابيهم صوت مالوف ، جهازي دك ..

فتحته صوت تالا تبجي ..

حجيت تبجي ميرال شكووو شصار ولج شنو سمعته ..

دنجت خليت اديه على حلكي اكتم البجي ..

-ردت مو ويااج وينج خما بيج شي دانيال ماقبل اجيج وادك عليج من رقمي ماتردين كلبي حيووكف شبيج ..

همست ابجي مات ستار تالاا ماتت مرت عدي وابنه كتلوهم ماتو اليوم ..

-عله صوت بجيها وصيح عزااا العزاااكم عزا العزززاكم ولج شنو ليش ..

-ماعرف تالاا ماتو كلهم ، 

-انتي بيج شي رجلج ..

-مابينه شي اريد اطلع منا تالااا حموت اني هم داشتم ريحه الموت قريبه مني ، احس جايني السره عن قريب طلعيني منا ..

-لا تكولين هيج اني حجيت ويه نانه ، 

-سكتت ، 

-حجت ميرال وياي ..

-همست تالااا انموت والله الموت سهل عدهم ماراح ندبرها وياهم ..

-همست منو يمج .

-وحدي ..

-اسمعيني زين لعد ، اني حاخذ ابني و اروح لنانه اعيش وياها هااا وانتي هم تعاي ..

ابتسمت بالم ، رمشت عيوني وكعت دموعي ، شطلعنه من حظن نانه احنه تالاا ، شنو الي جبرنه وخلانه هيج نتصرف ونشمر نفسنه بحظنهم ..

-بجت هي وحجت ندماانه اني حيل ندمااانه ، 

-طلعه مو سهله تالااا جربت قبلج  لكوني ورجعوني وره ساعتين .. 

-لا اني خططت راح اسويها هالكم يوم يطلع ماركس من الخدج اخذه و اروح لنانه ومناك ارفع عليه قضيه لدانيال نصب واحتيال ؛ وتصديق عقد و اسجل الطفل ..

هزيت راسي اعرف النتيجه شنو بس مابيدي شي ، سديته منها راسي يوجعني ..
ضليت حابسه نفسي بالغرفه ، الحمايه زادت على البيت ، عامله كل ساعه تجفت عليه للغرفه تشوفني مابيه شي وترجع تسد الباب وتطلع ..

ديما كل شوي تدخل الي بالغرفه تسال و تحجي بسالفه ..

دخلت مرحله سكوت مرحله عرفت الحجي مابي نفع ، بيبر اختفه ، من يوم الحادث اختفه بس اسمع اصواتهم جوه متمالخين ..
ديما دخلت يمي حجت هااا شبي رجلج ..

مارديت ..

حجت عدي متخبل فاقد عقله راح يسبب بموتنه كلنه ..

دنجت راسي على ركبي ، حجت اني لازم ارجع لاهلي واخذ ابني وياي موو احسن ..

ما رديت ..

-حجت راح نموت هيج تخيلي يدخلون علينه كلنه يصفونه محد يسال علينه والله محد يحاسبهم على سوايتهم ..

مثل موتت مرت عدي و ابنه ، بس لااا ذولا وراهم عدي مايسكت ، راح يصير الدم للركب والله …

رفعت راسي من حظني رديت مات ابنه ومرته بيوم واحد شنو ذنبهم ، احنه شنو ذنبنه بينهم ..

سكتت ، حجيت منو السبب ليش شنو الي يخليهم يكتلوهم هيج ..

ماتعرفين منو ، هم اعدائهم هواي ، تاهت عليهم ، بلعت ريك ساكته  ..

حجت ام زياد ورجلها مشتمتين تدرين لو لااا ، عواد اخذ غزل وطلعو سهرو بره صار يومين ، مشمتين بي ..

سكتت مدمعه .. ابنه صغير خطيه شكد كلبه طيب و كريم ..

ردت يومهم هذا ..

-انداريت عليها لاااا مو هيج ، الحياه مو هيج ، هم السبب عدي لو بيبرس هم السبب هاي نتيجه اعمالهم .. بجيت يمكن حوبه ايلااف حوبه الناس ضيعوهم بال خلت جف ايدها على حلكي كبل  ،صمته ، حجت ديرباااالج دربااالج ميرال تحجين هيج كبال رجلج اسكتي اسكتتتتتي وبس  .

ابتعدت عنها ورجعت دموعي تجري ، حجت ستار سوله فاتحتين ، وحده يم اهله وثانيه بقاعه ، بس ماعتقد راح نروح احنه ..

اصلا البيت كله حمايه وحرس ، ممنوع نطلع مو عاد نروح نادي الواجب ، سكتت شوي وردت ام زياد راحت الهم ..

ضليت خانسه ، راحت هي واني ضليت على حالتي ، باليل سمعت صوت يكله هلا استاذ بيبرس اطبك السياره لو ابقيها تحتاجها ..

ماطلع صوته ..

كمت لحيلي ردت انزل اله صار فتره ما داخل للغرفه منهزم مني ..

انتظرت بالغرفه مااجه ، انتظرت وانتظرت ومابين ..

كعدت وسكتت ، ثاني يوم دخلت عامله للغرفه حجت الاستاذ بيبرس يكول جهزي نفسج ..

رفعت راسي ليش ..

ماعرفش ..

كمت طلعت من الغرفه ، حجيت وياها وينه ..

بره ..

طلعت اشوفه سمعت صوته بالمكتب جوه ، وكفت قريب الباب ريحه دخان قويه و صوته يحجي ويه دانيال يكله جهزو سيارات و انقلوهم لمنطقه ال***

سكت .. حجه روح  اني ادز عليك .  فات من يمي دانيال همست وحدك ..

تعاي ..

وين هالمره رايحين ..

مكان امن …

شكد يطول هالامان وبعدها انصير مثل .. قاطعني لمي جنطه وحده راح ترحين انتي وام زياد و غزل لهناك …

همست ديماا ..

رد راح تروح لاهلها ، 

دمعت عيوني ..

رد كمل كلامه حتى ام زياد و غزل هم كم يوم بين مايجهزون جوازاتهم يطلعون لبنان نضل بس اني وانتي بالبيت …

ماحجيت وياه بعد عفته و رجعت للغرفه العامله جهزت الجنط .. 

كضيتها اني بس ابجي مقهوره ، دخلت ديما حظتنتي ، بوستني ..
حجت حرتاح واخيرا ..

ادعيلي ديماا ..

الله يسهل عليج ويحفظج من كل شر …

ابتسمت باسف ، بست ابنها ، حجت ميرال نصيحتي الاخيره كل ماعشتي بجهل كل ما عشتي بامان .  مثلي صيري عميه و طرشه وخرسه ، لاتحجين شي السكوت افضل منقذ بهل حاله ..

الى متى حنجن ..

الى ان يفرجها ربج …

باستني وحظتنتي حيل ، ودعتها بالدموع ، صاحو الها ، اجه اخوج …

سكتت ماعندي شي الها ، شالت ابنها وطلعت ، اخوها اخذها ، من هاي الحظه افترقنه ، جانت اخر مره اشوفها ، ماجنت اتصور ممكن الوداع يكون هيج سهل وبسيط  ..

كلشي بهل حياه يصدم ، او يمكن احنه متصورين شكل والحياه شكل ثاني …

مثل الموت رغم ما وصل الي كم مره وبيني وبينه شعره ، مع هذا جنت استخف بي واكول لا بعيد ..

واجاني فجاءه بيوم حادث رجعني لعقلي ورشدي ، 

لو فراق ايلاف جانت تهدد بوداع اخير وابدي و استخفينه بي ، تالي من صدك رحلت عن الدنيا كلها بيوم وليله .. 

حتى ديما ماجنت اعرف حشوفها لو لاا بعد ، مع هذا جانت ذكيه حافظت على حياتها وحياه ابنها وطلعت من هالبيت سلامات ..

راحت للمكان جانت دوم تتمنى تروحله وترجع اله ، بيت اهلهاا ...

او الاصح اهاها سعو يرجعوها يمهم و بيلر هم شاف وجودها ماله داعي مجرد عاله عليه ، يم اهلها امن الها ،

هو يريد يامن على منو ومنو ، بلش يخفف بينه الي يحاول يسفره والي دزه للشمال والي والي ماعرف .
..

ماعرف شنو يفكر او جاي يخطط او شنو باله ،

اني هم شغل بالي رحيل ديماا و بقائي لوحدي بهل عايله  ..

مع هذا جان عندي امل التقي بيها بعد شهر او شهرين ، بس ماجنت اتصور تكون نهايات بهل بشاعه  .

بس جانت بهل بشاعه للاسف ..  نقلونه احنه لبيت ثاني جان بنص مدينه مو مزرعه ..

البيت طابق ارضي فقط ، بس واسع ، من البيوت القديمه ..

كانو انبنى بالتسعينات من بوبه الخشب و صالته الواسعه وغرف النوم الكبيره و شبابيك الحديد ، تصميم البيت وحديقه ..

غرفتي كبال غرفه ام زياد ، و غزل صايره بركن ، بيبر سوه صاله مكتب يكعد بي ، 

عرفت ام زياد دجهز جوازاتها دسافر ، هدوووء هدوووء ، الهدوءيخووف لان ماوراه بس الكوارث ..

غزل سكوتها مشيتها ويه ام زياد تثير الريبه والرعب ، العامله بذيالي تمشي متفاركني ابد ..

بيبر يوم يجي للبيت يوم لااا ، سمعت يكولون ملتهي بعدي الي انجن على ابنه ويدور كتاله بس ماعرفو منو ..

الغريب محد يعرف احنه وين وشلون رحنه ، محد يعرف ، بيبر نفسه مايعرف درب وشارع ابو عزت و جماعته هم الي اخذونه .

شلون بس طلعنه منهم اندلو المكان والزمان المناسب واستفردو بينه ، ابو عزت بعدو عن الشبهات لان جانت حفله زواج ابنه مستحيل يخاطر بمعازيمه وخطاره وعايلته لخاطر بيبرس لو عدي ..

اصلا هم يشتغلون عنده ويردون خاطره شنو الي يدفعه يخلص منهم ..

اما ثروت و ابو طارق هذول مايعرفون بسالفه روحتنه شلون اندلو مكان ..

ضلت هيج ، احس بي ضايع و خايف ممامن باي بشر ، حتى يمي مايجي ، يفكرر يفكرر ..

تالاا …

طلع ماركس من المستشفى بعد شهر ونص ، شهر ونص تعافيت بيهم وكمت على حيلي والخياط كدرت افتحه ، الي يزعج الطفل متعود على حليب قواطي و متعلم على ام دانيال ..

جابو للبيت ، ام دانيال خالته بحظنها ، من بعيد وكفت اباوع علي ، وابو يركض يجهز بكاروكه و حليبه و يرتب بالمخده كانو عارف الدرس ويعرف شلون يربي الطفل عنده خبره ..

امه لافه الطفل بملف خايفه عليه يادوب طالع شوي شعره ، اجت اخت دانيال وخرت الغطى عن راسه تشوفه فضول …

مديت راسي اشوفه اني هم بس خايفه اتقرب منه ، رفعت حواجبي واني اشوف هالكأئن ، انصدمت لثوواني ..

معقوله اني خلفت هذا الشي ، يعني طلع مني ، وتكون بداخلي سبحااان الله ..

الله يشهد مو لان ابني ، بس ايه من الجمال ماشفت طفل بجماله ابد ، كانو ملاك من السماا قطعه من الغيم ..

العيون خضررر خضر حيل يملعن عبالك دعبل لو زمرد اخضر ، والوجه ابيض الخدود ورديه والحلك بكد الكرزه احمر ..

عيونه تفتر علينه ، دمعت عيوني يررربي شهل طفل هذا ، 

شالته ام دانيال واخذته كبل للغرفه حتى ماكالو الي تعاي شيلي لو اخذي زين هو مو ابني ..

هااا ، زين خلي اشوفه ، ركضت وراها صحت عمه جيبي للطفل اني اخذه ..

ردت بخوف لا لااا لايتمرض يمه توه طلعناه من المستشفى يرادله رعايه خاصه وانتي متعرفين ..

-ساعديني عود مديت ايدي اريد اخذه ..

دفعني دانيال بهدوء ورد لاا وخري خلي عند امي هي تعرف اله انتي مو مريضه مابيج حيل اتركي ..

ابتعدت رجعت اديه ليوره فشلاته همست مابيه شي طبت ..

-نتر لاااا بعدج طفل مناعه ماعنده شنو انتي ..

عقدت حواجبي وجهي بهت ، شنوو ؟؟ شقصدك يعني طفل يضل يم امك .

-اي مدامه صغير اي ، انتي انشغلي بروحج طفل يرادله رعايه خاصه ، لايصير بي شي ..

-ليش يصير بي شي قابل شكوو عود خلي تساعدني طفل مكانه بغرفتي …

حجه ويه امه وتجاهلني اخذي يمه يمج وديربالج نفس ماوصه الدكتور لا تخلطين بين الادويه ..
.حجت اي و اخذته وراحت للغرفتها اني على وكفتي  مدهوشه ..

توه يصعد نترت بي  تعااال شنو طفل يضل يم امك ؟؟
رد بعدم مبالاه اي ..

-لليييش اني امه شنو بكيفك  ..

-انتي مو مريضه نسيتي لوو لااا تردين تعدي ..

-عطت مريضه شنوو شبيه ..

-مرضج الهربس معدي خاانم جايز من طفل تعدي بالله ..

-شهكت متفاجئه اعدددي من كل عقلك تحجي انته ..

-اي اشاقه وياج قابل ..

-داتعالج و المرض توقف وبعدين هذا اجه منك انته صاحب فايروس لازم اخاف عليك منك مو مني اني  .. اني امه ..

-وكف متخصر انتي اخطر عليه يابه انتي ولاده طبيعي ماجيبوج لان خافو تنقلين اله المرض ، جيبوج عمليه عاد تبوسي وتحظني وترضعي من كل عقلج مستحيل ..

-شنو تحرمني من ابني دانيال ..

-اذا يحمي هالشي اي اسويها ..

وكفت متصنمه مدمعه صدك تحجي ..

اي ورب الطفل شنو ذنبه ..

اني شنو ذنبي ابني يربي بعيد عني ..

-كبال عينج هو مو يم غرب بس لااقربين عليه يرحم اهلج تشيلين خطيته ..

جسمي نحل من صدمه كعدت على تخم مصدومه ، جاي اسوي بيه انتي دانيال ..

ممسوي شي لاتكلبيها درامى اكلج .. عافني وصعد .. دنجت اني مدهوشه ياربي صدك يحجون ابني هذا ؟؟!

صدك سواها ، اخذت امه الطفل  وكعدت هي ترعاه وداري اني بس اسمع صوته وابجي ..

ماعندي ذيج الحنيه صح اعترف ، بس ايبقى شي ملكي واني تعبت بي وتاذيت يله جبته للدنيا واخذو مني نوب حتى مايقبلون احظنه لو ابوسه ..

من اشوف  خياط العمليه وتشوه الي سببته لبطني اموت قهر نوب كله هذا بلا فايده ، طفل اخذو مني ..

اخت دانيال تشيل طفل واني لاا ، عرفو اني مريضه الكل عرف ، ماقصر هو حاجي للكل ومحذرهم مالزمه حسيت بيه مرض خطير وهيج نافرين مني ..

نفسيا دمرني ، الطفل يبجي شوي ويسكت امه لدانيال دوم شايلته وتراعي تخاف عليه حيل ، دانيال يرجع من شغل كبل لغرفه امه يكعد ويكابله ..

نادرا مايصعد لغرفه يادوب يسبح ويلبس وينزل عليه ، بردت علاقتي بي حيل ، 

زاد الموضوع سوء من عرفت مكمل اوراق ماركس على مزاجه ومزور الاوراق والعقد ، مسويهن كلهن بس شلون كله تزوير اني لا باصمه لا موقعه ، والعقد على الدين المسيحي بكيفه كلشي بكيفه ...

تعاركت وتمالخت بس ماستفاديت شي ..

نوب الحادث الي صار و موتت ستار كلبت الموازين كلاب ، ماجنت متصوره او متخيله ممكن يصير هيج ..

هو قبل صبحه وياه ستار الروح بروح ، مايتفتركون ، كلنه انصدمنه هو جانت صدمته غير ، بيوم جابو خبر الحادث ..

طلع يبجي ويركض للمستشفى ، من رجع جان جنازه وجهه مزرك من القهر ، كل شوي يرد على راسه ،

لاحظت عليه صار اعنف غلط يغلط فشار ، عرك وصياح سلاحه بحزامه طول اليوم طبيعي يغيب عن البيت ايام كلش عادي …

دمرني حيل ، خفت على اختي خفت على نفسي كلبي محترك على ابني كلهن انجمعن ..

احاجي اشكي اله همي يعيط بيه و يضل يفشر يخليني اندم حاجيته لو فكيت حلكي وياه ..

صح قبل نتعارك هو عصبي بس مو هيج احس خلص انفجر ، خاصه بليل يكعد بالحديقه يشرب و يبجي ، لو ينام بالطرمه ، انقهر عليه .. نوبات اكول يومه لستار ليش هيج ديتصرف مثل جاهل ، مره طلعت اله كلت اواسي او اكله كاافي دمرت جسمك وصحتك بهل سم ..

بس وصلت يمه رفع اصبعه دايخ وهمس ااااش لا تحجين شي ..

سكتت .. باوعت علي مقهوره .. دنج يبجي و ياشر اشتاقيت اله الكلب ، موته صارت سهله ، جان لازم اني اروح اسوق السياره بس بسببج وبسبب ابنج  مارحت هو راح بمكاني ...

درت وجهي عرفت راح يفرها عليه نوب بعدني دافكر و شمر عليه البطل جان جابه بوجهي لو مادايخ ماصوب زين .. عاط كله منج كحبببببببببب* منننج انتي صاحبي ررراح ..

ابتعدت عنه خايفه نوب كاملي واجه يركض عليه عفته و ركضت ادخل ،  وسمعت صوت ربده وراي التفتت لكيته واكع على وجه يكمل بجي ..

ميرال …

فتحت باب غرفتي بعد مده طويله من الحبسه ، هنا مو مثل الفله ، هنا البيت اصغر وملموم ..

مجرد مافتحت الباب اكو مرر صغير  بي منفذين واحد للمنور واحد للصاله ، مشيت بي يطل على صاله داخليه ..

سمعت غزل تحجي ويه عواد ، مو كلت اسجل الشقه باسمج هااا شوكت لعد مو وعدتني ماضل شي ونسافر لبنان وتكول ماكدر مادامنه هنا استعجل بسالفه ..

رد عليها هو يلوك .. ماعرف شنو دياكل ، مو هسسه ..

رديت ليوره اريد ارجع وكفت من سمعت نترت بي ، حظل هيج طوول عمري هااا حظل هيييج الفلوس بيد اخوك ومرته واني وانته فكرر انجدي شغله جداوه ..

روح شوفها للعميه شنو باسمها وشنو خال الها واني صار شكد من تزوجتك وخلفت الك خلك شقه ماقبل تسجلها الي ..

سدي الموضوع كلت مو هسه ..

شووو الا هسه والله ترى بزعت نطيتك عمري وحياتي وقتي وخلفت الك الولد الصاحي شتريد بعد انته شنو قدمت الي بس وجع الراس والخطر على الاقل شقه ضمان الي ..

نتر بيها وصاح ضمان الج من شنوو بت الكلب انتي بت ملاهي ليش تخليني اخرطهن الج واذكرج باصلج ..

صاحت بي والله عاااد اصلي اشرف من اصلك اعترف اني بت ملاهي بس انته شنوو حراميه وتجار مخد** لا تستشرف عليه عوواد هي شقه تسجلها وخلص ..

مو جن صوتج عليان عليه بت نعال وصايره تتكوين ..

عواد من الاخر الشقه تتسجل الي قبل لا نسافر البنان ترى والله .. دتحجي واسمع صوت راشدي وهي عاطت ..

رجعت ليوره كبل خايفه صاح بيها اي بالله ااااي شووو احجي ..

صرخت بي دووووخر انعل ابوك لابووو.. ام زياد الخكيني حيموووتني هالعار ..

لزمت صدري يماااا اسم الله ، صوت وكعه على الطبه و طتشر كزاز ، وام زياد صاحت هاااا يمعووود شبيك ..

وذيج تصرخ عاااار بيك خير اكدر لاخوك الي شفط كل فلوسك وخلاك مجدي ، رووح عليه مو كادر عليه ..

ام زياد ردت كاافي لج كاافي شجاج ..

-بت نعال لفيتج من شارع حق تبوسين رجليه طول اليوم ، سفراتج لبنان وتركيا هو انتي شايفه ..

-غصب عنك والله اذا مو انته غيرك .. عاطت يماااا و صوت شي تطشر .. ام زياد صاحت عزااا العزززاك دميت البنت عزااا ..

رجعت بسرعه لغرفتي و ذيج بعدها تصرخ ترد عليه والله وداعت ابني مااسكتلك ولك شنوو انته مالك صاحب صدديق ، هاااا مالك امان ابد ام زياد ترد وووجع صووتج راح تسمعج العميه انجبي ..

-عاطت مااسكت والله ماااسكت ، صوت سحب اقسام وام زياد عاطت لاااا ولك يماااا ولك لاا ..

-داكتلها لهل سااقطه طلع صوووتج موو بت شوارع صوجي اني ماشمرتج وره سنه مو زين بقيتج على ذمتي ..

-اي عااار ابو نسووان .. 

-صاح داكتلج خلاااص ومحمد وادفنج شوو منو يطلع وراج ..

-صاحت بي ، والله اذا صار بيه بكد شعرك الا اضيعك عبالك مااعرفك لو مامنه بيك ، سوالفك كلها اطلعها اذا طخيتني لا عيوووني اني غزززل غزززل على سم رمححح عظمي كووي و لحمي مررر بعده مانولد الي يلوي ذراعي و يضحك عليه ..

اذا بالك سنه وتخلص مني لو دوس عليه خليها براسك سوالفك كلها ومكسراته اني حاجيتها لناس ثقه ، ومطيتهم دليل اذا صاحبني هيييج عثره فجاءه ، تلكه فضايحك وسوالفك مال الدفن كلها عند الشرطه وعند عدددي تذكر عدددي لو لااا ..

وكفت بالباب اني جامده .. صوت العامله حجت هووو في اي ياهانم..

لزمتها من ايدها ارجف جريتها للغرفه وسديت الباب بهدوء ضلو بره هم مالخ .. يمااا منج ياغزل يماااا ..

طلعت مو هينه ابد والله سحلته سحل اكلته بالسانها خرسته حتى ام زياد ماكدرت تحاجيها ، كعدت تعير بيهم وتهدد على شنو شلازمه عليهم ..

عدي شعلي بسالفه هو اصلا بيا حال .. 

رجعت للغرفه اكل بضافري ، اكو شي غلط لا هو اصلا كلشي غلط بهل عايله بس ممترابط ..

اكو حلقات مفقوده يااربي شنو هي ، شبيها غزل تكوت فجأءه وطلع صوتها وهي جانت تخاف منه خوف الحيه وماتفك حلكها وياه ابد ..

ام زياد الي السانها السان دلاله خرستها غزل بتهديدها .. شرطه شنو لعب جهال هي لو ادري بيها فايده جان اني رحت ولجات الهم ..

رمشت بعيوني ليش انتي وغزل بينجن مقارنه ، هاي بنت شارع توديج للشط وترجعج عطشاانه ..

عركها بالساعات وماسكتت تالي حطها عواد ودكها دكه بس اسمع صراخها وشتمها عليه وتصيح لافضحححك والله الا اخلي كتلتك تصير على ايدي عاااار جبااااان ..

كتلها وعافها وطلع ، صوت ام زياد تصيح عليها خلي تفض سالفه واني اخلي يسجل باسمج الشقه انجبي واسكتي حجايه زايده حتى انتي وابنج ترحون برجلين ..

هي كلها ايام ونترك العراق فلا استغبين على اخر وكت ، عبالج بس عواد يدفع ثمن ، لاعيوووني انتي وابنج اول الناس ترحون بيها تصير وحده بوحده …

جسمي كزبر خليت راسي على الباب ، اسمع ، همست عامله هي بتول ااي ..

خليت كصتي على الباب يماا ارجف حتى رجليه يرجفن ..

غزل ردت والله ثم والله بس هالفتره وبعدها اطلعلكم وجهي الثاني لهنااا وبس بعد ماسكت الكم ..

رجعت كعدت على الكرسي اديه ورجليه يرجفن ..

ياللهي ياللهي كووون الي بالي مو هوو اي ياارب اي اني ماسمعت زين شنو بكيفي احلل اني ..

اي اني خيالي واسع ، اني داسيى الفهم هواي لان كارهتهم ..

بجيت يااارب ، التفتت على العامله وحلكي يرجف همست الها تعاي وينج ..

تقربت عليه . نعم ..

شنو سمعتي هااا الي سمعتي كرري الي مره ثانيه بالحرف الواحد كرري يله كرري ..

حجت اتكلم عن اي ..

-ولج انعل اهلج ترى ، الي حجو بره كله سمعتي احجي الي داتااكد سمعته صح ..

مسمعتش حاكه ياهانم ..

فتحت عيوني ، شنو انتي تستهبلين ، ولج لاتخليني اكوم امرعدج …

هو في اااي ياهانم مااالك  ..

خنست غمضت عيوني ، خبيت راسي بين اديه اطلعي بره يالنذله حتى انتي هو انتو مو بشر حيوانات وحووش اطلعي بره …

طلعت ودردم عليه :-  دي ست مكنونه والهي …

ضليت بالغرفه احوووم وافترر ،  ماطول لليل ورجع بيبر سمعت حرس بره يحاجو .. صوت ماله ابد ..

 ، توقعت يتاخر بس اليوم رجع المغرب ..

ضل بالحديقه يشرب نركيله اسمع صوتها بره ، ماطلعت اله ، هو هاملني صار فتره ، حتى ملابسه ياخذها ويطلع من اني اكون نايمه ،  واني هم كاره وضعنه ..

مددت بالفراش خليت راسي على مخده عطره ماكو بيها ، معناها مانايم هنا ابد ، دمعت عيوني وين صفه بيه الحال وين وصلت ليا مرحله من برود علاقتنه …

ماجنت متصوره يهملني هيج ، تاخر بالحديقه حيل ، مشتاقه احجي وياه واسولف اريد افضفض اريد احجي عن الاشياء البراسي حمووت .

تفكر نخلني نخل  .. ، كملت لحيلي ومشيت اطلع اله ..

فتحت الباب وطلعت البيت هدوووء ، تمشيت على كيف ، وصلت لباب صاله .. لاح عندي صوت النركيله ..

لزمت عتبه الباب متردده اطلع اله ، كلت اكوله سمعته واحجيله عن شكوكي الي بداخلي ليش اسكت تذكر كلام ديما اسكتي ميرال عيشي بسكوت ..

بس اني شيسكتني ماكدر ، 

واذا كلت اله شراح يسوي يعني ؟؟!

شنو الي يتخذه ..

توه افتح باب صاله سمعت صوت شخطه رجل ، وكفت التفتت وراي فازه ..

صوت بيبر بره حجه عوواد ..

رد علي عواد :- شااارب و دك براسي مابيه احجي خليها على الصبح ..

يمكن مايصبح صبح يااخوي تعال  ..

وكفت عرفت هذا عواد ، حاجه هااا ..

تعال يمي ..

بيبرس تعبان..

رد عليه وتنهد مو بكدي تعاال ..

راح عليه يشخط برجليه كوه ، سكت ..

حجه بيبرس يسأب ، ليش ؟؟!

رد عواد شنوو ؟؟!

رد عليه لييش بعتني وبت عزوتي …

#يتبع ....

نطينه غش على الفيس  يوم الجمعه  ترى ، و جان الغش حصري صراحه لاهل الفيس ، لان تفاعلهم حلو ..

وسبب من ام عبدالله هم ، دوم تتوسط الهم 😅

بارت طووووويل هم .. هذا لعيونكم انتو جماعه وتباد والله ، وهم كلت انشره من وكت حتى ليش تكولين  تفرقين بينه احنه متابعين وقراء ، دلالي للكل  ..

كروب الفيس .. ( كتابات اسماء ديمير )

الانستا ..  asmaa_demer

كروب الفيس  ...  كاتبات وقارئات العراق