رواية قاع الشياطين الفصل السادس والستون 66 - بقلم اسماء ديمير

.....................☆البارت الستون ☆..................

#قاع_الشياطين(البصر والبصيره)

#بقلم_أسماء_ديمير

يومين واجت ميرال هي وديما والعامله وياهن ..

حظنتني حيل باستني اكثر من ثلاث مرات ، كعدت بصفي تلمست راسي ساكته ، اني مابيه احجي ، هي هم باين عليها تعب جوه عيونها سواد حتى شعرها عبالك ممشطه بس خاله شال عليه ..

اضافرها ممصبغه هدومها فستان عادي ، مو عوايدها هي ام رتابه والاناقه .. ديما راحت تصفط هديتها على الميز ، وعامله واكفه بصف ميرال حجت حمدلله على السلامه ..

هزيت راسي الها .. 

ميرال كاعده يمي وخانسه ، لزمت جف ايدها شبيج ..

اندارت عليه وابتسمت بتعب انتي شلونج ولادتج ان شاء الله جانت سهله ..

هزيت راسي رديت بتعب  ، عمليه ..

-جان اتصلتي عليه يمكن ماكدر اجيج وافيدج بس على الاقل اخلي مصلايه وادعيلج ..

همست وصل دعاىج الله سهل الي وسخرلي ناس بالمستشفى ساعدوني ..

سكتت ، حجيت ليش وجهج تعبان ميرال ..

ماحجت بس همست للعامله ماي ..

ديما تاشرلي متعاركه هيه و رجلها ، وتعض بشفتها الي ..

عقدت حواجبي اشرت ضربها ؟؟!

رفعت جتافها بحركه شمدريني ، اساليها ...

انداريت عليها حجيت ميرال شبيج وجهج خارط ، حتى عيونج ذبلانه ..

ديما نطت :- مدري شجاها هي ورجلها صار فتره مالخ صوتهم نازل لطابق الارضي ، انداريت اباوع على ميرال ماحجت ..

حجيت شبي وياج ، شبي انجلب هذا ..

حجت ديما تستفز ميرال :- صوج اختج هو مو يمها ..

رفعت حواجبي مو راعيه مشاكل هيه بس شوف شنو سوه هو هالخنوسي ..

ردت هو خنوسي اي بس مستحيل يضوجها دكول الها بطلي تبحشين وراه بطلي تسالي على كلشي هو واخو صايرين مليخ والشغل واكف صار فتره وهيه منا تزن ..

ردت ميرال ، ياريت مادخلنه للقصر ، اندارت علي مدمعه حجت ياريت ياتالا ضلينه تحت رحمه ابو يقين ولا هالعيشه ..

ردت ديما كولي الله شبيج غيرجن مامحصل …

حجت ميرال تالا مرتاحه ؟؟!

بجيت كبل لاااا ، هي هم نزلت دموعها حجت ولا اني ، مختنكه حيل داحس صدك احنه ملعونين ، كالتها ايلاف هالبيت ملعوون والله ..

حجيت يمكن هاي جزاتي لان تزوجت من غير ديني موو ..

سكتت ، حجت شنو تسمين ابنج ..

ماعرف ، شفت نانه ميرال قبل فتره ..

رمشت بعيونها داسمع عنهم اخبار بس مامخابره ولا ساله فشلانه بيا وجه اخابر واسال ، بيبر كطع صلتي بكل الناس حبسني مايقبل حتى اطلع من الفله ..

ردت شنوو ملك الخلفوو شكد حقير ..

ردت ماقبل اجي لو ماديما والعامله وبشار تكفلوني واجو وياي ..
ديما حجت يخاف عليج ، انتي ماتعرفين شنو السبب ..

ماحجت بس تجر النفس كوه  ، حاجتني الطفل شنو دينه تالا؟؟

رديت مسلم اكيد ..

همست منو يكول ..

ميرال ترى دانيال اسلم والله نطق الشهاده كبالي ..

رمشت بعيونها وردت برود ، هذا الحجي ماينفع بل واقع تالاا ، اذا اسلم لازم اكو ورقه تثبت اسلامه ، وبعدها تعقدون بالمحكمه على اساس الدين الاسلامي وبعدها تتقدم اوراقكم للمستشفى و بعدها طفل يتسجل ..

لازم اكو شي يثبت اوراق رسميه يعني ، بلعت ريك موفاهمه مو عارفه شلون يعني .. هي هم سكتت تعبانه ..

ثواني وحجيت نعقد مدني موو ...

رفهعت جف اديه لوجها تمسحه جزعانه مني ، اصابعها يرجفن ،  همست كوه ماكو شي اسمه مدني تالا ضحك عليج ، ماكو باي دوله عربيه زواج مدني مرفوض هالحجي اكو بس كم دوله وحده لو اثنين تعترف بالزواج المدني بس هنااا وبالعراق ماكوو انسي ..

المحكمه الاحوال الشخصيه للمسلمين فقط ، ماكو شيخ او محكمه تقبل بهذا زواجكم ..

زواجج من الاصل باطل دنجت وسكتت وجها كلب اصفر عرفت بلشت صحتها تتخربط ، هيه بيا حال واني داحاجيها بالله ..

هسه تنجلط وتموت بسببي ، ضلت يمي للمغرب ، قبل لاتطلع خلت بيدي علبتين ، فتحت وحده منهم تراجي واسواره ، والعلبه ثانيه ..

ميداليه صغيره ليره ذهب و ياها عين زركه ، ابتسمت ،  طلعن رجعهن بشار .. 

ذبيت العلب يم راسي ،

ايام مرت دانيال يجي يسبح و ياكل ويرجع ركض للمستشفى ، كلام طويل مابينه ، يادوب شلونج خما موجوعه ، يتاكد اخذت دواي وبعدها يرجع ركض للطفل …

سمعت امه جوه صاحت اله ابو ماركس .. وكفت اني لزمت الميز استند عليه ..

درت وجهي عليه حجيت شنو سميت الطفل ..

رفع راسي يلبس بالحذاء حجه ماركس ..

رفعت حواجبي واني هناا شنو ماخذت راي ..

ليش ماكلتي شنو الاسم الي تردي،  لو الج نيه جان كلتي ،  طفل بلا اسم صار فوك الاسبوعين بالمستشفى ، جان لازم اتصرف بلحظتها ..

شنو هالاسم ، هو مسلم مسمي اسم مسيحي ليش ..

رفع حواجبه منو كال مسلم ..

نترت بي بسرعه ، مو حظرتك اسلمت لو نسيت ..

ماكو شي يثبت اسلامي تالا كبري عقلج ، 

مو نطقت الشهاده مو امنت بمحمد بعد شنوو ..

هاي مستشفى تريد اوراق ما تعترف بهل سووالف مالتج و مال اختج ..

عطت بي حيل لزمت بطني موجوعه ، همست بالم ، باع دكلك الاسم يتغيرر غصب عنك والله ويتحول اسمه لعمر وشغله ثانيه سالفه اسلامك هاي تتحول رسمي وبورقه رسميه و تكمل العقد لا ومحمد اخذ الطفل وارجع لاختي افتهمت ..

وين ترجعين وكف لحيله مخصر ووين ترجعين هاا ...

نترت لاختي افتهمت ..

دشوف شلون ترجعين ، اذا لكيتي باب مفتوح حتى بيبرس يشمرج شمره الجلاب ابني ماقبل يتبهذل اذا عاجبج بهذله ولي لوحدج اما ابني لااا ..

جر محفظته موبايله وطلع عطت وراه دانيااال موو وياك تعاال دحجي ماخلصت …

مارد نزل وعافني حنيت ظهري متوجعه ، كوه كمت اجر النفس ، مشيت اتصل  على ميرال احجيلها بالكت تكدر تتصرف هي ..

دكيت عليها ينطيني مشغول .. عقدت حواجبي ليش،؟؟
دكيت مره ثانيه هم مشغول وينكطع .. عزاا بس لا رجلها حاظرني الحيوان ..

كعدت على الطبله لازمه بطني ، لزمت راسي دايخه حيل ، المن التجى يااربي المن اروح ياباب ادك ..

فتحت الجهاز و لاح عندي رقم ساري .. 

دنجت ابجي من تذكرت هالسافل النذل الحقير بلا اخلاق الي ضيع حبي اله بسبب غدير و نزواته جلب لو يمي الا اهفه بنعال على وجه ..

لو ماشي وياي عدل موجان هسه هو ابو الطفل ، بس كلب .. 

رفعت راسي مسحت دموعي ، دكيت عليه كبل بلا تردد ..

شوي ورد اني شهكه بصدري مجلبه حجه الو تاالا؟؟

نترت وجع ، اريد نانه انطينيهاها  .

رد خبال اي والله حلمانه بينه شنوو ..

لا ضل تلغي نانه ووين اريدها ..

ولج عبالي زواج يكسر خشمج ويربيج بس نفسج انتي انتي ماتغيرتي بعدج اخلاق سزز ..

بجيت كبل مهضومه ، اريد نانه ساري ..

سكت ثواني حجه شبيج بس لا هالنكس وياج هاا شبيج ..

امك وين محتاجتها ..

اني بالكليه ، امي بالشغل وينج تردين اجيج شبيج غير اعرف ..

صار عندي طفل ..

سكت ..

الوو ساري ابني بالمستشفى و هذا نذل دانيال ميقبل يكتب على ديانته مسلم سماه ماركس ..

همس لايالنذل وانتي هم حقيره عاط باني كله منج شنو متوقعه يعني منااا غبيه انتي غبييه ..

سكت ابجي ..

حجه وين انتي ..

بالبيت ..

والطفل وذاك النعال ..

بالمستشفى ..

عقدتي محكمه هم كولي لااا دانعل والديج ..

همست ابجي لااا ماعقدت ..

يابنت ال سكت ولج ابوج شكد انسان طاهر انتي ليش هيج عوجه وطايحه الحظ ..

شسووي ..

حيري بروحج رعنه دودتي عليه ..

همست ابجي ديضربني ..

سكت ما عاط بذني بعد …

كملت كلامي ديعذبني ضربني اليوم بالواير ، خله جسمي يزورك .. ويكلي اخذ طفل واحرمج منه  ..تقبل ..مسحت خشمي و اذاني تفتر داحس صدك لااا...

اسمعه يجر النفس و يغلط ويدردم دنعل ابوكم لابوو حركت كلبي هالنذله ..

ابتسمت ... كملت كلامي ، مماكله صار يومين هاملني نوب جبت عمليه بطني مفتوحه محد ياخذني للدكتوره داشوف الخيط …

رد وين بيتكم انتو ..

ابتسمت ، عدلت كعدتي ومسحت دموعي .. همست لااخاف تتعاركون وياذيكم دانيال ..

ولج العنوووان وين لاتخليني افشر ولج انتي دمرتيني والله دمرتي امي دمرتي اختج انتي شلون نيززك ماوراج بس الحطام  والعياذو بالله ..

همست ساري اخاف ياذيكم والله ..

دنطيني العنوان هسه والله كريم دشوف شلون يحجي ..

رديت دكف دقيقه انته انطيني العنوان اني اجيكم …

رد بفهاوه شلون تجين مو مسويه عمليه ..

ميخالف اخذ تكسي واجي مال انتو تجون مااستفاد شي ، 

سكت ثواني ، حجه انتي جنج جنيه مينخاف عليج ،  .. سده بوجهي شوي ، وكفت امسح بوجهي لازمه جهاز اجر النفس كوه ، اجاني العنوان .برساله .

جريت نفس مرتاحه .. اني الك دانيال والله تضحك علي شنوو ، استفردت بيه لو عبالك تمرضت معناها صرت جوه اديك ..

ميرال …

إنْ تحزني فالحزنُ رغم عيوبه
 يغدو عليكِ مميّزًا وجميلًا.

حسيت باصابع تبعد الكذله على وجهي ، درت وجهي ونطيته ظهري ، عرفت صاحب هالايد منو ..

تحرك جسمه وطخ صدره بظهري ، مد ايده من جوه زندي و حظني خله حنجه على جتفي ..

اني لو الدنيا ميرال ..

ماحجيت ..

الى متى نضل هيج مكضيها زعل ..

رمشت بعيوني ساكته ، لا اني مرتاحه ولا هو ، لا هو يقبل يبعد عن بيئته و وياخذني نعيش بعيد ولا اني متحمله حياته ..

همست لا تنطيني ظهرج ، انتي بالذات لا تنطيني ظهرج ،…

مارديت عليه ..

دارني عليه كوه و لزم جتفي حيل ، 

حجه وجهج لا ديري عني ، انتي سكنتي كلبي وروحي ، واني مسكني بين اضلوعج ، اشر على صدري باصبعه هناا مسكني و داري اني …

مااقبل انطرد من داري ميرال ، اشتريتج بروحي و عمري مااقبل تفلتين من ايدي الا اذا خسرت عمري و روحي .. 

دمعت نتر احجي لا تعاقبيني بسكوت .

همست مايفيد الحجي وياك ..

حجينه قبل ليش مجاي تتجاوزين وتعيشين عادي وياي ..

ماحجيت ..

محتاجج ..

اني تعبانه بيبر الله يخليك ..

قاطعني وتجاهل دموعي ، ابو عزت ابنه الصغير اليوم حفله العقد مالته لازم نروح نبارك ..
.

سكتت ..

ترحين وياي ، الحفله عائليه ولازم تكون ويانه عوائلنه ، 

نترت بي  . شعليه اني اخذ خالتك واخوك ..

لزم ايدي حيل ، روحتنه كعائله ، معناها حسن نيه ، وانتي عائلتي ، كلبي يوجعني عليه ..

اعرف بي مضايق ديحاول والله ، انش شاهده ديحاول بس مجاي يكدر ماكو درب امان يسلكه ويخلص نفسه ..

خايفه اخسره خايفه فد يوم يجيبولي خبره اموت من بعده والله . 

كمل كلامه    خربت علاقتي بالكل ضل بس ابو عزت سند الي اذا خسرته معناها اوكع و الجمل اذا وكع تكثر سجاجينه ، مابقه بس هو ضلع احتمي بي من ابو ثروت والحجي ابو طارق اوكفي وياي ، اذا ما حس ابو عزت احنه طالبين خاطره ممكن يسحب مساندته النه ..

دفعته وخرته عني ، كعدت عدل ، درت وجهي ضايجه حجيت انحصرت لدرجه كمت تطلب مني اني العميه افيدك ..

كام لحيله و حظني من جتفي انتي اهلي ميرال شوكت الاهل يوكفون ويه احبابهم هاا ..

همست شوكت ..

شنو ..

العقد شووكت وين ..

سكت ثواني حجه بابتسامه ، عرفت مراح تكولين لاا ، باسني حيل ، دفعته عني حجه الج الصافي عود اني انطيج خبر قبل بوقت ..

عافني وكام بسرعه اني رجعت لفراشي مددت ، مديت ايدي جوه المخده بطريفه عفويه ، حسيت شي قاسي جوه المخده ..

مديت ايدي اكثر تلمسته .. جريته .. من ملمسه عرفته مسدس ..

رجعته جوه المخده ، درت ظهري نمت على مخده الثانيه .. هاي صار فتره المسدس جوه راسه لو بصفه على الميز ميفاركه ابد ..
مجاي يامن باحد.، ديحس بيهم ديحس بالكل ديخونه ..

فتره قصيره وجاب الي فستان وحذاء من اختياره ، ديمه مكيجتني ولبست ، عرفت العقد بمزرعه ، 

واصلا عنوان المزرعه ماقبلو ينطو الهم لازم واحد من زلم ابو عزت هو يجي ياخذهم بنفسه ، ماخذين احتياطهم ومأمنين نفسهم زين ..

طلعنه من الفله اسمع غزل تحجي شفتي اخذها الها ماخذج..

ردت ام زياد حتى لو طلب مني اروح وياه ماراح اقبل ، دنشوف طلعه هاي شلون راح تكون نهايتها اذا ماصارت سوده فلا اسمي فردوس  .. 

ماهتميت الهن انتظرت سياره اتصف بالكراج ، صفت و فتح الي الباب ستار ، ركبت ، شوي واجه بيبر حجه لستار ها مادزولك العنوان ..

رد لاا عدي يكوال انتظروني يم فلكه ال***** هنا ننتظر واحد من زلمهم هو ياخذنه للمزرعه …

ركبنه السياره و ستار ساق ، مشت سياره همست لبيبر عدي راح يجي ويانه ..

رد اي هو ومرته مو كتلج لازم نبين حسن نيتنه و نبين احنه دنتصرف وياه على اساس طيب وعائلي مو شغل ومصلحه ميرال ابتسمي بس واحجي باسلوبج المعتاد الي تخلين مقابل ينعجب بثقافتج ، اذا سالوج عن اصلج سولفي عن ابوج و عمامج و شنو اصلهم وشنو شغلهم بالصياغه ..

بداعت اهلج لا تغندبين  .. اذا غندبتي اعرفي بوقتها احنه نسحلنه كلنه ويطلعونه بالجلاليق ..

درت وجهي ، هذا مطلعني وياه اكسسوار او الاصح يتباها بيه وباصلي ، هزيت راسي ، خرب بحظي اي والله ، راد يكحلها عماها ، هاي بدل ما يطمني ليش هو اني ادبر هيج شغلات هو معتمد عليه ، بالله شلون اتصرف واني شوف مااشوف ..

دعيت ربي ماجفص بشي .. فتره وكفت السياره ، حجه ستار ذيج سياره عدي مو ، رد بيبر رمش اله بالاضويه دنشوف ، رمشو اله بالسياره ، وذاك دك هورن ..

حجه اي هو خلي ننتظر ، حجه ستار سياره زلم ابو عزت ها بيبرس شوف ..

ثواني وسمعت سياره دكت الهم هورن وتحرك .. حجه بيبر امشي وراها ، تحركن السياره ، مد ايده لزم جف ايدي انداريت عليه همست وين جاي تطمس بينه بيبر ..

رد همس قريب من اذني ، لخاطرج والله ، لو ماانتي ما اضطر التجى للخطر و اخلي ايدي بيدهم حتى امن على نفسي و عليج ، لو وحدي جان وكفت بوجه حتى ابو عزت وماخفت مثل ماسويت قبل .. بس هسه اخاف اي واعترف لان عندي شي اخسره انتي ..

رمشت بهدوء بعيوني نظره اسف عليه وعلى حالي ماعرف وين راح تصفه بينه الدنيا بعد اني وياه ..

وصلنه وكفت السيارات ، نزلت لازمني بيبر من جف ايدي ، حجيت وضعي مو مال حفلات ومجاملات تعرف ..

ضحك ورد … انتي طير السلام لا تستهين بنفسج ابد ..

ابتسمت مستهزئه ، صوت الموسيقى و مغني ، مشينه شوي و سمعت صوت نافورات ماي قويه و اصوات ناس تحجي وتضحك …

حجه اكعدي هناا ، رديت وين ، حجه الميز المخصص النه هذا اكعدي ، كعدت سمعت صوت عدي سلم على بيبر ، طلع صوت مرته تسلم .

حجت ميرال شلونج ..

ابتسمت هلا ام بحر اشلونج ..

بخير يعمري دنجت باستني كعدت بصفي صوت ابنها بحر يدردم ، عدي حجه هااا ..

رد بيبر مو وكتها هسه خلي نشوفه و اذا اختلينه بي نحاول نشمر الحجايه ونشوف رده فعله ..

رد عدي واخوك عواد ضامنه ..

رد ماضامن ايدي اليمنه اني ، الكل ماعدهم كلمه ..

هاا هيج الحجي بيبرس ..

لاتزعل بس المواقف والظروف تغيرر واخوي مو مثل قبل ، 

مخلي بالك يفتن عليك يم ابو ثروت وينطيهم خبر بجيتنه لهنا ..

هي خربت ويه ابو ثروت ويه الحجي ابو طارق بعد ماينفع لاصلح ولا مصلحه ، سكت شوي وحجه املنه الوحيد حاليا الي واكف كبالك يضحك ويضيف بخطاره ، لو النه لو علينه ..

حجه عدي اني جهزته للمشروع اذا شافه هو وعجبه ..

رد بيبرس قاطعه راح يعجبه متاكد ماكو هيج شي بالمنطقه هذا شي جديد ، ماعلي اي شبهات لا اعلام مسلط عليه ولا داخليه ولا شي ، مجرد مايوافق ثاني يوم اكعد اخططه اني يبقه تنفيذ نتفق عليه بعد ما نتفق على الارباح ..

مرت عدي ساكته ، همست الها جبتي مو بالخير عليج ..

ردت اي جبت ولد سميته فيصل ..

ابتسمت بالخير عليج اعذريني ماسويت وياج الواجب ..

ردت لا معذوره يعمري سمعت من عدي صابتج نكسه صحيه قبل فتره ..

ابتسمت الها اي بالضبط ، حجيت ماجبتي وياج الطفل ..

ردت لا والله هو اصلا عنده تحسس بالتنفس وخفت عليه بقيته يم عمتي ام عدي بس بحر لا جلب ويانه ..

هزيت راسي الله يحفظهم الج ..

حجت وانتي ماكو شي بالدرب ..

هزيت راسي لاأ الله ماكتب بعد ..

همست يصير انوشاءلله بس يريد وقت ..

سكتت ، عافونه هم وراحو ضلينه بس احنه واكف يمنه ستار يتافف ، فتره بين معازيم واصواتهم وتقديم الضيافه ..

صاح عدي بستار ، شوي واجه بيبرس حجه يله نسلم ..

لزم جف ايدي و كفني مشينه حجه امشي ماكو شي كبالج بس ثيل ..

اسمع مرت عدي سلمت ، وحجت الف مبروك شايفين كل خير ،  بيبرس حجه حجي هاي زوجتي ميرال ..

اسمع كلمت اهاااا ايد اندمت على جف ايدي جرتها و لزمتها ، شلونج بنتي ..

ابتسمت بحرج بخير اشكرك .. مبروك يجعلها زواجه الدهر ..

تعبتي نفسج ، نتر بيبر  بضحكه :-  ليش جايبها ولك لهنا ومتعبها وياك ..

رد يضحك بيبرس ماكدر بالاها عيوني الي اشوف بيهم ..

رد الحجي وهي منو عيونها ..

رد اني اكيد .. لزم جتفي بيبر ها حبيبي ..

ابتسمت اني ، ميحتاج الها سؤال اكيد .. حاجيته تشرفت بمعرفتك حجي ..

رد تعرفيني اني منو ..

بلعت ريك سمعت عنك بيبر دائما يجيب طاريك بخير ، ومواقفك سباقه تحجي عن كرمك و حسن تعاملك ..

حجه زين صيتى عالي بالطيب ..

رد عدي يضحك ، مايرادلها شهاده حجي ابونا انته ..

درت وجهي عنهم واختفت ابتسامتي المزيفه ، الحجي صوته خشن من يحجي عبالك صوته مطبك ، مايحجي عدل مثلنه كلامه ممفهوم ..

هي هاي لغه الكبار كلها الغاز و يحجون بلهجه بس هم يفهموها ، اما احنه الي حالنه حال هالاناس مانعرفها ..  

اسمع صوت بيبر ، نبره اول مره اطلع عليها نبره كياده مخيفه ، وصوت ضحكه قويه هذا مو هوو ليش هيج يتصرف ..

اسمع صوت اوراق و الحجي ابو عزت ضحك  ويردد ممتاز ممتاز .. جيد جدا ..

عرفت الطعم الي طال عليه بيبر انشمر ضل بس الصيده ..  انتظرت كلماتهم الجايه ..

بس ما فهمتها ، رمشت بعيوني .. خفت لا تساويت وياهم بالذنب خفت ابتسامتي ومجاملتي خلتني وياهم بنفس الخانه ، دعيت من ربي يغفرلي و يعطف عليه وهو يخرجني من الي اني بي ..

وكفو يحجون ، تعبت ورجليه خدرن من الكعب ، حسيت بواحد لزم رجليه مديت اديه لزمت ايد صغيره ..

ابتسمت ، همست بحر هذا انته ..

رد اي تردين ..

ضحكت شنوو ، دنجت لمستواى ، حجه هاج بيده شي  .. فتحت اديه اله ..

خله شي باديه لزمته حبيبات صغيره طريه .. حجه اكليهم طيبات ..

خليت وحده بحلكي طلع كشمش ابتسمت منين جبتهم .. حجت امه بحر ماما تعال هنا …

رد لااا دناكل اني وميرال ..

سالته ، شتاكلون ..

اشرلها .. هذا تردين كمشمش ...

حجت يااا هذا الي اخذته من الثلاجه صدك عود خليته بجيب سترتك وجبته من البيت لهنا  .. تقربت عليه تحجي ..شو اشوف خاف دمرت جيب سترتك ..

وكفت تنظف بي هو يكللها وخرري خليهم اني وميرال نتقاسمهم ..
حجيت اضحك عوفي حاجته عزيزه ، جايبهم من البيت لهنا ..

ردت مثل ابو من يجلب بالشغله بعد هاهيه ..

اختفت ابتسامتي من رد عليها رجلها ، حق تصلين صبح ومسا لان طلع لابو ..

ردت لا يابه فخرر هذا مو انتقاد غير انته عدي الي مامنك اثنين ..

دشيلي طفل شيلي و يله جدامي للسياره بلا حجي ..

كمت لحيلي ضايجه وجهي بهت من اسلوبه الجاف ، كبر حتى مايعرف يجاملها .. 

مديت ايدي لزمت جف ايد بيبر ، دكيت بيبر  و همست اريد اكعد تعبت رجليه  …

رد ثواني ونطلع ، وفعلا شوي و ستاذنو .. طلعنه للكراج ننتظر سيارات ، صفت سياره عدي ، اسمع ابنه بحر يصيح بباااي ميرال ..

ابتسمت وحجيت باي ..

رد تردين كمشمش عندي بعد ..

ضحكت غير مره ان شاءلله انطيناهم ، هسه وكت نومك يله باي ..

صعد هو وامه ويه ابو بسيارتهم ، واحنه صعدنه بالسياره مصدعه راسي هالكبر صاير يطنن ..

ستار صعد وساق حجه بشرر بيبرس ..

رد ان شاءلله خير مساله وقت ، خليت راسي على جتفه اهدء الم راسي .. 

عدي وعائلته كبالنه وسيارتنه وراهم انطلقت ..

بيبر رفع جف ايده خلاه على وجهي يتلمسه ، همست اله حلو بحر مو ..

رد الله يرزقنه مثله ان شاء الله …

همست شوكت ..

ماعرف مساله وقت ..

شوكت ترتاح نفسيتنه و تبرد ارواحنه ..

ارجع واكرر مساله وقت كلشي بهل الدنيا وقت ميرال ، والوقت موبيدنا ، 

غمضت عيوني استرخي ثواني مو اكثر و سمعت فحيط سياره قوي وكانو زلكت الاطارات ...فتحت عيوني فازه بيبر حظني بسرعه وصاح ستار دير باللك ديرباااالك ..

عطت من صار رمي ، رمي فجأءه الرمي خرط علينه صرخت حيل مفجوته سمعت صوت سحب اقسام بنص السياره عطت بيبررر لااا لاا بيبر لااا ..
جلبت بزنده حيل اعيط .. ضغط بجف يده على راسي و نزلني جوه  وصاح بستار افتح الجامه افتح  .

صياح ستار يصيح ولك تلكو عدي تلكوو هو لوحده ، وبيبر يصيح لا تبطي دووس بانزين دوووس وصوت رمي طلق قريب من راسي ..

بيبر صاح ولك لااااا عدي ..  

ثواني هي مو اكثر ماستوعبت ديصير و نام فوكي بيبرس جفه جسمه جفي و عصف انفجار حار على شضايه كزاز ، قوه العصف رفع السياره و كلبها علينه ….

#يتبع ...

راح ترحل بعض الارواح وتغادر علمنا الى عالم محد يعرفه لحد الان ....🕊💔💔💔

وتنقلب الموازين ...

باجر استراحتي ... مااي ريست ، 😪💜

كروب الفيس .. ( كتابات اسماء ديمير )

الانستا ..  asmaa_demer

كروب الفيس  ...  كاتبات وقارئات العراق