رواية قاع الشياطين الفصل السابع والثمانون 87 - بقلم اسماء ديمير

#البارت الحادي عشر

#قاع_الشياطين

#قلم_اسماء_ديمير

شنو من رجال الي يخلي مرته بيت طليقها  ..

وجهي شلون لفحته نار حارة .. اني جبانه اكتشفت بعز ازمتي اني جبانه ويرادلي عون بهيج مواقف ، اني مو كدها ابد ، ماانطقت ضليت خانسه انبلع الساني …

مسح شعره بجف ايده بهدوء ، عينه علية ، لا اراديا دمعت اريد ابجي ..

نوب حامل ، ابتسم بستهزاء .. وتتوحمين بيتي بنص اهلي ..

هم ماحجيت كصتي عركت ونفسي كامت تلعب اريد اتقيئ ،..

شنو جنتي تتوقعين هااا ، تزوجي وتاخذين بنتي وتعيشون هيج عادي . ..

همست تزوجني غصب والله. .

ضحك حبلتي هم غصب ..

والله .. قاطعني .. تدرين مرت عواد الاولى ديما من عرفت بيها حامل من شخص ثاني شنو سويت بيها ..

لو الي جان مصاحبها شنو صار علية ..

حجيت بهدوء من الخوف .. بيبر .. انت تعرفني مااطيق عدي ، والله وداعت هيف اخذها وحتى من اخذها ماجنت اعرف هوو ، ودليل دكيت عليك اعاتبك عبالي انت ، دك عليه رقم غريب راد فديه وجنت ناويه اسحبهم اله من اي فرع بنك ورحت وهناك خطفني والله ..

مداكذب انت تعرفني ، رفع ايده اسكتي ..

بيبر اسمع مني مو بس من الي يشتغلون عندك هم الي حق ادافع عن نفسي ..

ماسمعتي مني بذاك اليوم .. كام لحيله كوه ولزم العكازه ..
وكفت وضعك غير ، بعدين اني مااذيتك ، بيوم اذيتني ابتعدت عنك ماسويت الك شي ..

التفت عليه انت ماذيتيني ؟؟؟ منو الي شهد ضدي بالمحكمه ؟؟ مو انتي ؟؟ منو الي .. و سكت …

باوعلي بخيبه منو الي خابر عدي وكال اله على سوايه عواد ، منو الفتن ونافق والخان وخرب الدنيا ..مو انتي ..

وجهي فهه ، بلعت ريك .. هم كتلك على نيه ام زياد ورجلها  ، هم خفت عليك وماردت تتاذه او يصيبك شي ..

بعديش ، بعد مابعت كل الدنيا علمودج ..

بجيت  .. مابعت شي ، ضحكت عليه بس ، جنت رايده منك شغله وحده بس اشرت باصبعي شغله وحده تعوف شغلك ونسافر بس ماقبلت خليتني جوه الادين ورطتني وياك دخلتني لقعر اني مو كده ، كم مره وصلت للموت بسببك ..

محد جان يكدر يوصلج مدامج جوه عيوني بس انتي جنتي لو تنهزمين لو تتامرلين عليه ..

ماتاامرت والله ..الصار من حركه كلبي من عرفت بسالفه اهلي …

جذاااابه ، حالج حالهم ، بس تنحصرين تلدغين ، مالج امان ، غدرتي بيه الي اني ماجنت ناوي اغدر بيج ، ولج كتلت اخوي لاجلج ضحيت بصاحبي لاجلج ..

عطت بي .. مو لخاطري ، اخوك قاتل وجان ناوي يقتلك وانته خلصت عليه قبل  لايقتلك ، وصاحبك هو من يومه خاين وغدار وصحبه غش بس انت جنت مو عارف وغشيم عنه ..

ما تلاحظين خسرتهم كلهم بنفس اليوم الي حجيتي بي ، لو ماحاجيه ما جان صار الي صار ..

لاتحملني مسؤليه افعالك واخطاءك ، حاولت اصلحك مانصلحت ولحد هسه مستمر انت ..

الطفل حتنزلي ، وبنتي حاخذها ، بعدها اشمرج باقرب كراج تولين لاختج .. تحرك يريد يمشي ،

عطت ابجي فرااات ، ماابقى احد مااجرمت بحقه ضلت بس هيف ..

التفت عليه بنتي الي ، ومرجعج للمكان الي طلعتج منه ، اما عدي الي فضلتي عليه هذا حلكاه لو يبقى اخر يوم بعمري هم الكاه ..

تقدمت عليه ابجي ، طول عمري بنت خير وعزز ماطلعتني من مكان غلط لو عيب ، اما عدي انت اعرف بي ، انت بشحمك ولحمك مااكدرت عليه تريدني اني ، الي صحتي ونظري على كدي اكدر عليه من يوم يومي اكرهه واحذرك منه ومااخذت بكلامي وهاي النتيجه لاتحملني الغلط .. الغلط منكم مو مني ..

هز راسه بعدم مبالاه .. الطفل هم راح تسقطي هنااا اشر ..

فتحت عيوني شنووو ..

اي عبالج اخلي بذره عدي بيج ، لاااا حينزل وراح اوصله عود مرتك طرحتهااا لحد مايطلع من مكانه ونتحاسب ..

لزمت بطني ابجي بيبر والله اموت صحتي مو شي والله ..

اشر للمره الواكفه بعيد اجت ..

رجعت ليورة بيبرر والله اموت داكلك مااتحمل اجهاض ، لو اتحمل جان اني اجهضته قبل لاتكول  ..

اجت عليه تريد تلزمني عطت حيل مخترعه ..

بيبر داحاجيك … تخبلك ناوي تكتلني .. ولك بيبر ..

جرتني واني ماريد امشي اعيط هو واكف يباوعلي جرتني من البلكونه للصاله .. وكعت بالارض اصرخ ولك مجرممم ناوي تيتم بنتك. .

منوو ماضل ما اذيته وماكتلته شتوقع من واحد كتل اخووو مايكتل طليقته .. عدي انت مااكدرت عليه شلون الك عين تلومني لان مااكدرت على خداعه وحيلته ..

جرتني حيل من زندي ، ملختني ، من حلات روحي  دنجت عظيتها حيل وكمت اريد اركض ، جلبت بيه من ياختني خنكتني نوب …

وكعت بالارض دايخه .

عطت حجيه وينج …  نوووس .. اتلفتت ماكو احد

بجيت منهاره بشااااار .. ، رفعت نظري عليه يباوعلي ساكت ماتحرك ، ساند نفسه على العكازه  يشاهد المنظر برود ، وجه جامد ، مسحت خشمي ابجي كالها عدي ماصدكته ..

هزيت راسي كالها والله .. دنجت ابجي منهارة .. كال مايحبج بكدي ،

رفعت عيوني عليه ، دموعي تجري ، الفرق بينكم هو من يحب يحمي الي يحبه ، ماياذي ويسكت ويسامح ويتحمل  ..

عكسك انت ، ماحبيتني خنكتني و خاطرت بيه واذيتني ، وبنتي اعرف نفس المصير ، هم راح اسوي بيها هيج ،هم تشمرها بنص الخطر .. لان انت ماراح تتغير بس للاسوء ..

عدي حبني وحماني وضمني حتى منك ، وحتى هيف رغم ما هي بنتك مااذاها ولا حرك كلبك بيها بالعكس تعلق بيها وخاف عليها اكثر منك ..

خاف على مشاعرها وعلى مستقبلها اكثر منك ، ومن شاف ما مني فايده وماكو امل اقبل بي نطاني الحرية ، واختاريتك .. اي لان غبيه اختاريتك عليه ..

اجت هاي لزمتني من جتفي رجعت ابجي ، رفعتني من الارض مابيه حتى احجي او اقاومها سكنت ، منهارة ..

اشر الها عوفيها .. وخرت عني ، باوعت عليه اشهك .. حجه ..الطفل حينزل ، وعدي راح تجيبي الي انتي بيدج ، حتى يضوك الغدر منج مثل مااضكته اني هم ..

هزيت راسي لااا ،

هز راسه  ..  ااااي ،

اجيبلك عدي بس تنطيني هيف اخذها واطلع مناا ..

هز راسه بهدوء وبستفزاز ..  لااا ،

بلعت ريك ساكته ، ماراح يخاطر عدي ويجي ..

انتي راح تقنعي .. حتجيبي ..

غمضت عيوني ، دنجت راسي دايخه من الخوف ، اجيبه الك .. بس …

باوعت لهاي المره واكفه وجها جامد تباوع علينا ..

التفتت عليه ، اخلي يجي لهنا للشمال ، بس بنتي اخذها واروح منا ..

هز راسه لاااا بنتي عندي تتربيه ، تحت عيوني ، بس ممكن نتفاوض على الي بطنج .. عدي و الي بطنج سوه  ..

حتى حلكي يبس من البجي وعيوني اذتني لزمت بطني .. بيبر الطفل اصلا مامكتوب اله يعيش ، وعدي يعرف لذلك عافني اروح ، لان ضعيف واني صحتي مو شي ..

اي اني داخلصج منه اخفف عنج الحمل ..

انت ناوي تقتلني مو تخلصني من الطفل .. ناوي تيتم هيف من هيه طفله تضلمهاا ليش ..

البنيه ماانطيها الج نجوم السما اقرب الج ،

جريت نفس رجعت شعري بيورة ، درت وجهي على جهه البلكونه ، شنو احصله اني .. هزيت راسي بياس شنوو اطلع خسرانه ، ؟؟ من كلشي اطلع ايدي فراغه لا …

لو احنه لو هم ..

انتو منووو ..

بنتج وبيتج يرجع يفتح ابوابه ،

فتحت حلكي اريد احجي ، سكتت لزمت كصتي صخنت. ، صار عندي لعبان نفس قوي ، بلعت ريكي ..، ثواني ونطقت … شنو الي يضمن الي بنتي تضل عندي ماتفرقها عني اذا جبتلك عدي  ..

مااغدر اني ..

التفتت عليه ،  انزله بس مو هنااا ، حنزله بتركياا ، واذا ماعندك ثقه بيه دز امك او بشار او اي شخص وياي لتركيااا ..

سكت ثواني يباوعلي ..

لاتباوعلي هيج ، عندي جلطه ومشكله بالقلب انت تعرف اقل بنج ممكن اموت ، بالاضافه معدتي منهاره ماراح تتحمل اي بنج او ادويه اسأل بشار ، الدكتور نصحني اتعالج لان معدتي تلفانه .. مااراح اخاطر هنا ،

اذا جبرتني انزله هنا معناها اعرف انت تريد تموتني ، بس تريدني اموت بخطا طبي ،حتى مايوكع لوم عليك ويكولون الك قتلتها ، عبالك هيف اذا كبرت تسامحك ، لو حاولت تضم عليها هم حتعرفة، حبل الكذب قصير ومصيرها تعرف الحقيقة ، هيف اذا كبرت تصير نسخه منك تحقد ماتسامح لو حتى مرت سنوات ويمكن تتبرء منك .. 

سكت يباوعلي ، وجهه جامد .. حاولت اتالمك اعصابي ..

همس .. وعدي ..

دمعت عيوني ، رجف حلكي واني اكولها ، بيوم الي اسافر وبنتي وياي اعتبر عدي اجه ليمك وبرجليه …

سكت صافن بوجهي ..

بجيت.. احسه ما قانع .. شنووو … شتريد بعد ، شتريد اكثر من هيج ،

جنت ناوي اكثر ، مااقبل بالقليل ، بس لاجل بنتي بس والله ، لاجلها راح اقبل ، تتربى بحظنج بس تحت جناحي وكبال عيوني وبنص اهلي  وبنص حراساتي ..

دار وجه ومشه عافني ويه هذه جنها غساله موتى ، وجهه الجني الحقيرة ، التفتت اباوعلها بحقد ، جرت عيونها بنذاله جر .. عافتني توجهت للمطبخ ، اندار عليه اخر مره هو قبل لا يطلع من الصاله ..

باوعت عليه بحقد ..

ابتسم ، حجه مبتسم. . مثل ماتوقعت ، تغيرتي ، مو بس شكلج تغير حتى اسلوبج  بالتفاوض تغير ، عافني وطلع …

كعدت بالارض منهاره ، يكرم الله حتى انحصرت اريد اروح للحمام وماكدرت ، رجليه ماتعيني ابد ، اديه ترجف حلكي يابس حتى عيوني غوشت ..

ساعه كاعده بمكاني ماتحركت ، صوت سيارة برة ، وصوت نورس تصحك ..

اني على كعدتي .. دخلت شافتني بالارض ، رفعت راسي عليها ، شايله هيف من شافتني كاعده بالارض ذبت هيف واجت تركض عليه ..

عزااا شبيج ، من شفتها كبل انفجرت ابجي ..

بااا شكوو وكعتي يااايمه .. ماماا تعاااي ..

حظنتني تكومني ، جلبت بيها حتى اكوم ، كوه رفعتني من الارض ، صاحت شبيج هاااا وكعتي شنو .

مارديت عليها مقهورة حيل .. رفعت راسي ابجي ..

دحجي شبيج جسمج حار مصخنه ..

وين جنتوو وين رحتو ليش البيت فارغ ..

يمعوده طلعنا هيف ابوها كال اخذوها تغير جوه بالمنتزه انتي وامي ، هيف جواي لازمه فخذي ..

شلتها وحظنتها ..

عوفيها يمعوده لاتوكع منج شوفي نفسج , عبالك مريضه تعاي نروح للمستشفى مو احسن ..

هزيت راسي لااا شلتها امشي اديه ترجف مامسيطره ..

اخذتها مني ، لاتوكع البنيه شبيج …تعااي جرتني بنك ايد تاخذني للغرفه ..

كوه مشيت بس وصلت للحمام كتلها اريد ادخل الحمام .. دخلت وعفتها برة ..

كعدت بالكاع ، عبالك ضغطي نزل ، دنيا تفتر بيه ، ضليت بالحمام دراري لونه على حمار صاير ..

غسلت وطلعت ، مددت بالفراش اشرت الها انطيني هيف ..

خلتها بصفي حظنتها وهمست طفي الضوه اريد انام ..مو احسن لو ناخذج لدكتور او للمستشفى على الاقل ..

اريد انام طفي الضوه ..

هزت راسه ضايجه همست .... عنيده ..

طلعت .. حظنت ربيع صدري ونور عيوني ورويحتي من الدنيا ، حتى ريحتها دوة الي ، بستها من ركبتها بجيت حيل خايفه عليها ..

اغلب الاوقات نركض وره رزق ونعمه ، الله ماقسمها النه لسبب بي حكمه ، بس احنه البشر عقلنا مايفهمها مايستوعبها ، خلق ربي و حكمته وتدبيرة شي عظيم ، شي ماممككن يصوره او يتحمله عقلنا البسيط ..

خلق من الذره الى الكواكب والمجرات ، احنه البشر ماعرفنا نخلق خلية مثل ربنا سبحانه وتعالى عجزنا نوصل لذره من ابداعه ..

بنفس الوقت عجزنا نفهم توزيع الارزاق ، بجيت وانقهرت ودعيت حتى بس احصل هيف ، متت لمن حملت بيها ولمن حبلت ولدت وكبرت اكتشفت ربي مانطاها الي بذاك الوقت لسبب معين ..

لو ما هيف مااكدر عليه بيبر ولا حتى عدي ، الامنيه والحلم الي جنت اكعد على المصلايه ساعات ادعي ربي يرزقني اياه طلع سبب حزني وتعاستي وبؤسي وخوفي ..

مو كل الارزاق في،صالحنا ، الصحه رزق ، والمال رزق ، والاولاد رزق ، والاهل الصالحين رزق ، ومحبة الناس رزق ، والامان رزق ، والعلم رزق ،شغلك وعملك رزق ، وجهك البشوش المحبوب رزق ،ايمانك رزق ، دينك رزق ، توفيقك رزق ، نظرك رزق ، ظميرك رزق ، كلشي بهل دنيا رزق ..

اذا جنت متمني لنوع معين من الرزق بس ماحصلته من ربنا اعرف مالك بي صالح ، وربك حرمك منه الا لسبب يخاف عليك او ناوي يعوضك بغيرة احسن منه …

نمت واني حاظنه رزقي ونعمتي ، ثاني يوم الصبح لكيت تالا دازتلي رقم لينا الجديد .. جان عندي سم كارت قديم عدي خاله بالظرف ويه اوراقي طلعته خليته بالجهاز ، فتحت حسابي القديم على الفيس بوك وراسلتها ..

ماردت .. وره ربع ساعه دكيت عليها …

اسالها على مستشفى زين ..

سديته منها ورجعت خابرت تالا ، حجيت وياها ، حسافر ، لايضل بالج اذا مادكيت ..

ماشي ..

تالا ..

هاا ..

انتي بعد جبيرة ومزوجه كوني كد هالمسؤليه لان اني مسؤليتي هدت حيلي خيه مابيه حيل بعد .

شبيج ..

كل الخير بيه بس حبيت انصحج .

ضحكت وياي حمد لاتخافين عليه ، والله حتى اهله يحبوني شو عايشين بخيري وبيت بالحلم مايحصلون مثله شيردون بعد ..

لاتمنينهم تالا .. صيريلهم بنت يصيرولج اهل ،تصيرلهم جنه يصيرون الج عيال ترى ..

لا وحق الله ابد شو حتى المسواك مني اني ، اكلهم شربهم علي ..

منين الج ..

حمد لزم محلات بابا ترى ونقسم الربح بالنص نص الج بالبنك ونص الثاني الي ،

تالا لتتبذرين يجي يوم تعوزيهم ..

وهسه وكتها ميرال ، ليش اقصر على نفسي ، بعدين حمد يشتغل بالمحلات واله راتب احسن ماالعمال ديبوكون بالمحلات ، بعد ما بيبر شال ايده من المحلات العمال تجروء حتى يمدون اديهم  على البضاعه ..

روحي شوفي الحساباات وسجلات حمد تخبل هو وابو من شافو الاستغلال ، خلي هم يلزموهن اصلا هم امينين وانت تعرفيهم شكد على كد حالهم لو تنطيهم نص راتب هم يشكروج .. اني كتله يبطل ثلاث عمال وهو وابو يلزموهن وياخذون هم رواتب ، بدل العمال الي جانو يبوكون بينا ..

راجعي السجلات والحسابات بنفسج تالاا الحرص واجب ..

الله كريم ادزهم الج تردين ..

مو هسه .. بعدين ..

شوكت ..

من اخابرج لتتغيرين رقمج هذا ابد ..

ماشي .  سديته منها ، طكيت صورة لهيف وهي نايمه ..

رسلتها لعدي وقفلت الجهاز ..

دخلت مره ثانيه للحمام اغسل وجهي ، جسمي نار مصخنه .. طلعت بره الغرفه ادور على بشار .. سالت نورس كالت طالع تردين شي ..

دواي خلص عبالي يجيبي نفسه ..

ادزلج واحد من الحرس يجيبه ..

لا مموجود بس من الصيدليه الي كبال الدكتور بشار يندلها ..

طلع من زمان ، شوي يرجع واني ادزه عليج ..

توجهت للمطبخ اسوي اكل لهيف قبل لاتكعد ..

حجت بيبر كال دزولي عليها ..

التفتت عليها اي ..

توجهت كبل للمطبخ طلعت نشا داسوي حلاوه الها .. اول شي سويت عصير طبيعي ، وبيض سلك اثنين الي والها ، واخر شي توجهت للنشا ..

طلعته وتوه اخلي بجدريه صغيرة ، شلته بالخاشوكه وكع من ايدي على الكاونتر ، ترس االميز ..

ابتعدت مسح وجهي طفر علية ..  دخل بشار يضحك هاا ولج جنج من هذول الشمامين خشمج كله طحين ..

رخت ملامح وجهي صفنت على النشا .. هذا نشا ..

هلاوووو وين رحتي ..

رفعت عيوني عليه هذا نشا مو طحين ..

مديت اديه انظف الصار ، دخلت نورس حجت هاا تجيبه ..

باوعلها شنو ..

دوة مال ميرال خلصان حتى اوصيك هم تجيبلي مرهم مال حروق من الصيدلية بدربك ..

خليت النشا على النار وكفت احرك بي صافنه وبالي مشغول حاجوني ماسمعت صاحو اثنينهم ميرااال ..

التفتت هااا ..

وين بالج يااابه هسه اروح لو وره الريوك شنو القصه ..

بكيفك مامستعجله عليه …

كملت الريوك واخذته للغرفه .. كعدت هيف غسلت الها وخليتها تتريك .. كملت ولميت الغرفه نظفتها وبدلت لهيف وطلعتها يم نورس ..

حاجيت نورس بيبر وين …

رفعت حواجبي ابتسمت .. فوك بغرفته …

عفتها وصعدت اله ..

الطابق الفوك مايشبه الارضي يختلف ، اوسع ، بي صاله رياضه وكبالهم غرفه جببره .. عرفتها مالته ..

توجهت عليها دكيت الباب ، حجه ادخل ..

فتحتها  .. جنت واكفه بمكاني مادخلت ، اندار عليه جان كاعد على الكرسي ، ديرفع بالدمبل ، باديه ، من شافني كمل ودنج راسه ..

تردين شي ..

شوكت ..

رفع نظره عليه ، شوكت يجي هو ..

يجي بنفس الساعه الي اكوله عليها ..

ابتسم تك خد …هالكد متاكده منه يذب نفسه بالنار لخاطرج ..

بيبر دانزف حاليا ، دشوف وجهي لو لااا ، وضعي مايتحمل تاجيل على ساعه اسقط ، وصحتي بالنازل ، مو بس اني اخسر كلنا نطلع فارغين الادين ..

باجر يجهز جوازج وجواز البنت ، انتظري اكمل الاجرائات مالته ، امي و نورس وبشار راح يرحون وياج ..

سكتت ابالع بريكي ..

رفع حواجبه لاتحاولين تلعبين اي لعبه ميرال ، افرمج والله ، راحمج لخاطر هيف ،

يالعبه بيبر انتو الي لعبتو بيه ، لاتهدد ميحتاج لان اني بالنص واكثر الي متاذيين ..

ترحين لتركيا وتنزلين الطفل وتستقرون بانقرة انتي واهلي وفترة يلحكم بسام اخوي ، واني بس اكمل الي بيدي اجي هيج صفت الحسابات موو ..

تترك العراق ..

هز راسه اي ، اريد اربي بنتي وارجع الم عايلتي  ..

ابتسمت ، تكدر ..

رمش بعيوني .. اي ..

درت وجهي على الصاله الحديد صافنه ..

همس ادخلي للغرفه. ..

انداريت علية مدمعه .. حتقتله ؟؟؟

بيناتنا مالج شغل ..

مزوجني ..

ماتحتاجين طلاك…ابتسم .. يمكن راح تصيري ارمله شدراج ، لذلك داكلج نزلي للطفل حتى ينسى ذكره ولا تحملين نفسج المسؤليه والذنب كل ماشوفين الطفل ، تحيرين بس بهيف وتكرسين حياتج لخاطرها ..

هزيت راسي اي ،

تعاي ادخلي ..

هيف جوه ..

اهلي يمها …

دخلت الغرفه متردده ، وكفت اباوع علية ، جان كاعد بيده الدمبل ، ذبه على صفحه .. يباوعلي .. ماحجيت ولا نطقت ، حاولت اشغل نظري بشي بعيد عنه حتى مااخلي عيوني بعيونه .. اجاني صوته ..

شلون عشتي ؟؟

هاا ..

شلون كدرتي تتخطيني وتتخطين حياته سوة ..

اخذت ثواني صمت ،عضيت على شفتي مرتبكه ، درت عيوني عنه ، ماتخطيت بس الله سبحانه وتعالى رزقنا بالصبر ..

مراح نرجع مثل قبل. 

ادري ..

مامن بيج بعد ..

ابتسمت بالم .. باوعت عليه ، ردت اكله شوف منو يحجي عن الثقه .. بس المشكله احنه خسرنا الثقه الي بينا ..

انتي هم ماتثقين بيه بعد ؟؟

هزيت راسي الثقه راحت من سنوات ، بس حمشي وياك لخاطر هيف ، مانسى جنت يوم من الايام زوجي وداريتني ماقصرت علية ، ماراح تقصر ويه بنتك وخاصه بعد ماراح تثبت صدق نيتك وتبعدها عن العراق ، وتخليها بحظني ..

هيف ماتحبني ..

تتعلم عليك ، الطفل يحب الي الشخص الي يدلله.

البيت الي بانقرة جبير راح اسويلها مدينه العاب بي ، حشتري الها حيوانات هم ، الاطفال يحبون الالعاب والحيوانات ، ابتسم راح اربيها بعيد عن التوتر والخوف الي عشنه بي اني وياج ..

رمشت بعيوني مايده كلامه ..  

جريت نفس حنزل ،

هز راسه روحي ..

عفته وطلعت ، نزلت الدرج امه كاعده شافتني نزلت من فوك ابتسمت ، رجعتلها الابتسامه ،

ماطولنا ، وكملت الجوزات والاجرائات ، دز علية رحت اله ..

لكيته كاعد بالحديقه ويمه هيف تلعب بالحصان الخشب ..

هز راسه سفركم تحدد ، باوعت اله هااا ..

جهزي نفسج على ساعه اكولج طيارتكم بعد ساعه ،

بلعت ريك منو يروح وياي ..

بعدين تعرفين ..

وين ننزل باي مطار ، حتى اعرف شاخذ وياي ملابس واحتياجات ..

لا لتتاخذين شي ثكيل ، هناك تشترون وتجهزون ،

سكتت ، حيرني وعافني بحيرة ومتاهه .. حجه شوكت ..

باوعت بوجه مفهية ،

خابرتي ؟؟؟ ضبطتي الوضع رفع حواجبه ، لو مو كد حجايتج انتي ..

وجهي تغير وضجت ، لاكدها ، كولي شوكت نسافر بالضبط وبيومها يجيك..

هز راسه الاربعاء ساعه ب٨ باليل طيارتكم ..

باجر ؟؟؟

هز راسه .. اي ، مد ايده وخله الورقه على الميز جيبي لهل العنوان  …  

سكتت ، دنجت بالارض اباوع لهيف .. تقدمت جريت الورقة ، فتحتها جان مكتوب بيها عنوان .. ماعرفه ولا اندلة ، مكتوب ساحه لتوقيف السيارات …

عقدت حواجبي ..  همست خلص باجر ..

عفته امشي .. صاح وراي ميرال ..

التفتت عليه ..

امي و نورس وبشار من راح يروح وياج مادازهم هيج على الفاضي بس اعرف ماراح يجي اخلي ياخذون البنت ويكملون دربهم لانقرة، وانتي يتركوج بمكانج ، هنا تخسرين اخر فرصه الج ، واطلع اني منها ، وظميري مرتاح وعندي سبب مقنع اقدمه لبنتي باجر عكبة ..

هزيت وراسي خايفه اي ..

عفته ومشيت اجهز جنطتي ، توجهت للغرفه دمعتي على طرف رمشي ، بس دخلت الغرفه بجيت مهضومه ..

طلعت الجنطه بلشت اسفط الي اريده ، كلبي ماذيني ودموعي تحرك عيوني ، امسح بيهن وينزلن غيرهن ،

دنجت راسي ابجي حيل ، يارب رحمتك واسعه اشملني اني وبنتي بيها ، ماناخذ مجال ياارب ،

اشملنا بيها يارحمن يا الرحيم ، مو انت اقرب النا من حبل الوريد ، مو انت عند ظن عبدك بك ..

ماعندي احد غيرك ،محد يحس ببه غيرك.  محد سندي وظهري غيرك ، لاتكسرلي كلبي وظهري بنتي …

سويت ثلاث جنط ، جنطه جبيرة بيها ملابسي اني وياها ، وجنطتين صغار وحده العابها وممتها و اكلات بسكت و كاكاو و كرزات ، والجنطه الثانية بطانيه صغيرة وهم العاب و احتياجاتها ..

بعدها الشهكه بصدري ، لزمت جهاز ، غيرت الخط ودخلت الخط الي اشتراه عدي ..  ودكيت علية  .. ثواني وانفتح الخط ، همس اشهك عدي ..

ياايابه .. بعد عيني  ..وين رحتي ليش كطعتي ولج ..

بجيت عديي ..

شبيج يااابه هااا تبجين ؟؟ شبيج ..

بيبر عرف مزوجين ..

سكت ..

شاف العقد ..

سكت ..

وياي ..

شكال ..

عصب كلب الدنيا ، مد ايده علية ، دنجت ابجي .. ماحسبت هيج راح يسوي ..

هيف ؟؟

اخذتها امه مني ، كال حخلي اهلي يربوها ..

شراح اسووين .. اجيج .

لااا ..

مسحت دموعي .. عدي ..

هاا ..

اني خسرت كلشي ، خسرت حتى صحتي ،واختي راحت تزوجت ، املاك بابا لازمهم حمد ، كلشي ضاع من عندي ..

ليش واني وين رحت ، ماخسرتيني ، اني موجود ، والله مايضيع شي اني موجود وياج ، ليش رحتي ميرال مو كتلج ماراح تحصلين شي منه ،

بعدك تريدني ؟؟؟

ليش لااا بعدج على ذمتي ميرال ..

وهيف ..

تعاي والله يشهد اشلعها من عيونه ..

حياخذوها ويسافرون ..

بعد احسن محاكم برة مو مثل هنا هناك اضبط ، بس اعرفيلي حيسافرون لاي دولة وشوكت ..

قاطعته اني حامل عدي ..

سكت فجاءة ..

الي جنت ناوي تحقق عدي ..

سكت ..

شهر ونص تقريبا من جنت بالمستشفى عرفت بالموضوع كله ..

ليش ماكلتي بساعتها ..

ماجنت راح تخليني اروح ..

رحتي شحصلتي ..

واجهت خوفي ، الي جنت خايفة واجهته ماهربت ..

خسرتي بنتج ..

و حامل وكسبت زوج حيثبت ان هو صدك سند ويرجعها الي ، موو ..

عهد عليه هيف الج ، مااخلي اي احد ياخذها ..

حترك البيت لعد ..

وين ترحين ..

ماعرف شتكول انت ..

لاترجعين لبغداد ولا الخوالج ابتعدي عن الي يعرفوج ، حتى لاتاجرين شقه باسمج ، لازم تختفين وتضيعين محد يندلج لحد مااجيج ..

سكتت ..

بيتنا ..

شنو ..

بيتنا بدهوك ، محد حيفكر بي وهم قريبه من هيف ..

تندلين ترحين اله من مكان الي انتي بي ..

اجر تكسي ..

ماترهم لازم ترحين باصات افضل ، اول يوم ترحين لفندق وتحجزين ، باليل تطلعين ماتباتين بالفندق ، خاف احد يراقبج بي ، باليل مايحس ،  تاخذين تكسي ، وترحين لمحطه الباصات الي بالمحافظه الي انتي بيها واركبي واول ماتنزلين لدهوك اركبي هم باص لاقرب منطقه لبيتكم مناك اخذي تكسي ..

افتهمتي ..

داحاول ..

بس تطلعين خليج وياي على اتصال واني اكلج شنو تسوين اول باول ..

ماشي ..

خايفه ؟ لاتخافين هسه حطلع وانتظرج انتي وابني هناك ..

وين ..

بالبيت ..

وين انته ..

قريب منج حيل ..

وين انته ..

باربيل ..

شسوي ..

ادور عليج ..

ابتسمت ، راح نرتاح موو ، تعبت اني ..

شغير رايج ..

مامنه فايدة تغير للاسوء ماباوعلي بنظره غير الخاينه والي تزوجت عدوه ، اني هم ماعندي ثقه بي خايفه من العيشه وياه ..

يعرف بيج حامل ..

لااا لذلك خايفه مااريد اضل ، يموتني غير ..

اندكت الباب .. حجيت الباب تندك باي .. سديته ..

انفتحت نورس جايبه هيف ، خلتها بالارض ، حجت تعبت من اللعب ، حتى ملابسها نكعتهم بالماي ، غيريلها لاتتمرض .. ابتسمت بوجها بتوتر ..

طلعت ، اخذت هيف بحظني ابوس بيها حاظنتها ،،

، غيرت ملابسها بملابس نظيفه وناشفة .. اخذتها و رحت للمطبخ اطلع نشا شوي بكاسه ..

شافته نورس حجت شنو هذا ..

ابتسمت ماسك للوجه ..

قله منتجات وماسكات طبيه ..

ضميتهم بالجنطه مابيه اطلعهم بعد ، وجهي احسه نار اريده يبرد عفتها ورجعت للغرفه ..

قسمت النشا بكياس صغار حجمهم كد ثلاث اصابع ، وخليتهن بالجنط صغار مالات هيف ..

ثاني يوم هم انخبصو يجهزون للسفر ، اني توتر باين بوجهي ، هيف من كثر اللعب البارحه يم المسبح كعدت الصبح منشوله ..

هي منا عدها سنونها الطواحن جاي يطلعن ،متاذيه حيل ، شلتها افتر بيها وهي تتنعوص ،

وجهي نار من الخوف والخرعه وهم بالبيت ديجهزون ويحظرون محد بحالي ،

ابوها بالحديقه كاعد يشرب جكاير ، اخذت زاويه وكعدت ،اسكت بيها ..

من الوجع والالم صخنت ، اخذتها للغرفه عندي شراب ادول نطته الها ، عندي احتياط هو وتحاميل ،

شربتها وشلتها اهز بيها لحد مانامت ، رجعتها لفراشها ، اخذت الادويه ضميتهم بوحده من الجنط الصغار ،

صفنت عليها هي نايمه ، وجه احمر من الصخونه ، فاتحه اديها ورجليها ومسلهمه ونايمه ..

راسي يوجعني ، فتحت القراصه افرك بفروه راسي ، من كثر الخوف والتوتر ، ناسه حتى الم المعده العندي ..

دافرك بشعري نزلت اديه ، نص شعري واكع باديه نوب خصل كل وحده هالكبر ..

لميته لشعري خاف جنت ناويه امشطه بطلت ، هملت نفسي وجسمي وصحتي بشكل ، صح نظيفه بس مو مثل كبل ..

قبل حتى لو عميه ومريضه بس عندي هوس بملابسي وشعري وكون شعر مرتب ومضفور او مشط زين ..

الملابس كوه الوانهم متناسق ومرتبه ومكويه ، هسه وين ..

مرمرني زماني والله حتى صلاه مداصلي ،  العصر بلشت امه واخته يجهزن ، بشار راح يشتري احتيجاتهم وصيته على كمادات طبيه لهيف ماعندي ومسكن الالم ..

اني شلون كاعده على جمر بس احوص ممرتاحه ، للمغرب نفسي كامت تكلب ، تقيأت الماي شربته ، نار تفور بمعدتي وهاجت علية ..

كل شوي اشوف هيف حرارتها نزلت الحمدلله ، ساعه ال٦ ونص ، كل مايمر الوقت احس جسديا انهار مو بس نفسيا ..دخلت للحمام سبحت وتجهزت ، ظفري ماتبقى من شعري المنتف التعبان ، لبست بنطرون وقميص طويل ، رفعت نظري بالمراية ، ماعرفت نفسي ، هي هاي ميرال الي كتلتي نفسج تشوفيها ، هي هاي المظاهر الي جان عندج فضول تشوفين شلون صارت ..

لزمت بشرتي صفرة ، ذره حيويه نضارة ماكوو ،

شفتي مفطرة من الخوف قله الاكل بس عصاير اشرب ، عظام صدري بانت ..

التفكير والهم ياكل الانسان والله اكل ، عيوني دمعت سويها لاتخافين ، صيري مثلهم واغلبيهم ، اذا ماتردين تخسرين بنتج اللعب وياهم هل العبة وفوزي بيها ..

اذا خسرتي راح يضيع كلشي منج وتخسرين الجبهتين ، اذا كدرتي تواجهين  راح تحصلين نفسج وبنتج ..

دموعي لا اراديا نزلت من التفكير ، احس نفسي وحيده ،اشتاقيت الك بابا حبيبي ، ماما يروحي ماحصلت من قوتج للاسف انسانه ضعيفه اني ، جنت محتاجه حظن ، احظن احد احتمي بي واشكيله ، بجيت لحد ماتعبت ، غسلت وطلعت بسرعه …

دكيت على عدي ..رد كبل ..

همست صوتي مبحوح ..

اني طالعه ..

وين ..

مادري بس تركت البيت ،بجيت حيل .. اخذوها وياهم ..

واني بالشارع ..

ياا شارع شنو اسمه ..

مااعرف مااعرف ..

سكتت ابجي ، حجه روحي لاقرب شي يمج محل ، رجال ، مره طفل ، اي شي ، واسألي انتي باي مكان ، او وين تحصلين باصات ..

همست اي ..

همس حرجعها الج وداعت بحر ، تعاي ونكعد نتفاهم ..

ضليت اشهك ماحجيت .. ، سديته بوجه كبل .. دك مارديت ، خليته صامت وضميته بالجيب بنطروني ،  مسحت دموعي ، عدلت وجهي ،وطلعت اكعد هيف من النوم ..

دنجت اشيلها من سريرها ، حظرت ملابسها ، خليتها على جربايه اغير الها.. دخلت الحجيه حجت بعدج …

مطيتها ظهري ماانداريت عليها .. لا حجيه خلصت بس اغير الهيف ..

يله السيارات شغلوهن ..

كملت وانداريت البس شي فوك القميص .. حجت .. ليش البجي  الي سوينه صح مراح تندمين امي ..

ماحاجيته وجهي باين عليه البجي والخوف اصلا ، شلت هيف وشلت  وحده من الجنط الصغيره  ..

صاحت نورس تجر جنطه جبيره ..

حجت نورس وهاي هم ..

هزيت راسي اي ..

طلعت بره الغرفة ، البيت مخبوص بينا ، هو واكف بصف الباب ينتظرنا نطلع ..

تقربت منه همست ، تلكاه بيتنا ..

وين ..

بدهوك ، هناك ينتظرني ،

تغيرت ملامحه .. همست راح يشك لو كتله تعال للموقف ، كتله راح ارجع لبيتنا بدهوك وكال انتظرج ، جريت المحادثات شوفتهن اله ..

لزم ايدي حيل ضاغط على عضلات وجهه ، غمض عيونه وسكت .. هز راسه خير ان شاء الله .. بيتكم بيتكم ..
خلو الجنط بالسياره ، سفطهن بشار ، هو واكف بالباب يودع امه ، امه بجت وحجت حلفتك باعز ماعندك عجل بسرعه والحكنه لاتخلي بالي يمك ولاتخليني اندم عفتك وحدك  ..ترى ارجع الك اذا تاخرت ..

لايضل بالج حجيه كم يوم ويمكم ان شاء الله ، باس نورس من راسها وحظنها .. سلم على بشار وتحاظنوا ..

اني واكفه على صفحه شايله هيف باين الهم على وجهي ، اجاني صوت الحجيه فززني انطي البنت لابوها يسلم عليها ..

تقربت عليه باسها وهي بحظني ، توه امشي جلب بذراعي ، انداريت عليه وجهي اصفر  ..

ابتسم بهدوء … ، توصلين بالسلامه ام هيف …

بلعت ريك .. ابتسمت من جذب .. عفته وصعدت بسرعه بالسياره ..

صعدو هم وتحركت السيارة ، انداريت علية اخر مره واكف بطوله وبيده العكازة ، بصفه واحد من الحرس .. يباووعلي وجهه جامد ..

خالي من اي تعبير ، بيبر وجهه بي هيبه ورهبه ، مو مثل عدي وسيم الوجهه مبتسم ، بشوش ..

بيبر نادرا مايضحك او ينكت ، دوم وجهه جامد ، درت ظهري وكعدت عدل ، خليت هيف بحظني ، الحجيه عينها علية ،حجت يلحكنا ان شالله لايضل بالج ..

ام بنته وبنته وامه واخته سافرو شعنده بالعراق بعد . اصلا هو مطلوب وممرتاح ، بتركيا امن عليه ويكدر يشتغل يتحرك بكيفه ،

هزيت راسي الله كريم ..

نص ساعه وصرنا بالمطار ، دزيت رساله لعدي حتوجهه لبيتنا بدهوك ، شحن ماعندي خايفه جهاز يقفل ، انتظرني هناك ..

دز رساله صعدتي ؟؟؟ ليش مااجرتي غرفه بفندق ..

خااايفه عدي ، ومعدتي اذتني ، متاكده محد لاحكني ،

خلص تعاي انتظرج هناك حتحرك هسه ..

سديته . من وصلنا للمطار  نزلنا ونزلو الجنط ، جان اكو شباب ويه بشار، ساعدو بالجنط ، وحده من الجنط خليتها عد نورس كتلها هذول حاجات هيف تححتاجهم بالطيارة حفاظات وممات وغيرها خليها وياج لاذبيها ويه بقيه جنط ..

الحجيه اخذت هيف مني ، عرفت هو موصيها ، سكتت ونطيتها الها ،

كعدنا بصاله الانتظار بالنص ساعه ،، اقل الربع ساعه وبدا النداء ،  راسلني عدي مارديت .. وين صرتي ..

انت ووين اني قريبه ..

ماباقي شي واوصل .. حنتظرج بغرفتج ..

كلبي مردني حيل ، تقرب مني بشار ها كناري ..

رفعت عيوني علية .. حجه شنو الاخبار ..

رفعت المحادثه شوفتها اله ، ابتسم مايحتاج فاتحين موبايلج عدنا .. رفع جهازه ماعرف شنو يكتب .. وجهي اصفر ، حتى كمت مااكدر اوكف على طولي ..

حتكتلوو ..

بينهم بعد مالنا شغل ..

، تكرر النداء مال طيارتنا ..دموعي وكعت ، خوف على توتر ، ندم ، وحيرة ، ضايعه ماكو درب بي خير ..

مد ايده بشار الجهاز ..

باوعت علية .. شنوو ..

الجهاز جيبي ..سحبه من ايدي ، وحجه اختاريتي بيبر خلص ، امشي وياه لاتتمردين وتعاندين مثل العاده ميرال عيشي هل حياه بحلوها ومرها. مو كل الحياه حلوه وسعيدة ، كل مانكبر ونعرف الدنيا مو دار سعاده وفرح ، مو طفله انتي بعد وتردين دلال و نسه ، 

دنج على الجهاز داس بي بادية الاثنين ، صار نصين وشمره بقارب حاويه ..

حجيت ليييش ..

نشتري جديد بس نوصل يله امشي جرني من ايدي ..

كمت وياه وعيني على الجهاز حجيت رقم تالااا سيم كارت مالتي كل شي ..

ماتحتاجهم بعد يله بسرعه ..امه صعدت هي ونورس ، بيدي وحده من الجنط الصغار ، نطيتها لبشار ونترت هاك شيل هاي ..

ماتشيليها انتي ..

مااكدر حاخذ هيف من الحجية .. تقدمت للتفتيش ، اخذو جوازاتنا ، جنت متوترة حيل ، كملنا وصعدنا الطيارة ، اخذت هيف من الحجيه وكعدت ..

جانت نورس بصفي ، وبشار و الحجيه بالكراسي الكبالنا ..
كالو اربطو الاحزمه ، ربطناهم ، معدتي هاجت علية ، طارت الطيارة بينا .. حجت نورس تحتاجين شي من الجنطه ..

التفتت عليها .. لااا ..

همست شبيج وجهج اصفر احس مارايده السفر…

ممرتاحه بس ..

بنتج وياج ، وتركيا حلوة ترى ، شوفني بشار صور للبيت الي راح نسكنه والله يخبل ، كلش مرتب واسع ، يوميه نظل اني وياج نطلع ونفتر ونروح منتزهات ومنتجعات ،

ابتسمت بخوف .. اهز راسي ..

انطيني الجنطه .. نطتها الي ، طلعت منه كيس النشا ، التفتت على نورس ، صاحيه .. هيف تنحست من الطيارة ، حاولت اسيطر عليها ، بس ردت اخلي الكيس بجيب السترة مال نورس ماكدرت ..

هي كاعده و هيف تتنحس .. بلشت تبجي اضطريت ارجع الكيس لمكانه واحير ببها ..

حجت نورس .. شبيها …

تضوج من الطيارة وصوت وضغط ..

انطينياها ..

لااا .. رفعتها باديه الهيها ، فتحت الجنطه انطيها حلويات ، فتحت الها قطعه كاكو . يله ثبتت ..

لوخت ادية منها ، خليتها بحظن نورس كتلها اغسل واجي ..

كمت .. بشار شافني حجه وين ..

اغسل واجي عفته ورحت …لكيت wc مشغول ..

درت وجهي يورة ، صايرين هم ورايه بس مايشوفوني .. درت وجهي على المضيفه موجوده بمكانها المخصص الها .. تقربت منها ، مرحبا ..

ياهلا تفضلي اساعدج بشي ..

ابتسمت شكد ونوصل ..

تقريبا ساعه ونص .. ليش محتاجه شي ..

درت وجهي اشوف خما احد وراي .. بلعت ريك باعي ماعرف شكول بس اني مسافرة ويه بنتي طفله ، ومسافرين ويه اقاربنا ..

بس .. سكتت مرتبكه ..

شكو .. جانت كاعده وكامت من كرسيها ..

مااعرف احس هذا الشاب الي جاي ويه اقاربنا مو راحه ، شو شفته خله كيس ابيض بجنطه بنتي ، وخايف ومرتبك من التفتيش ..

دمعت اريد ابجي ، صراحه خايفه لايكون شي ، واتورط بسببه ، خايفه على نفسي وعلى بنتي منه ..

حجت هو وينه ..

كاعد بالمقاعد الامامنه ..

شيصيرون منج ..

مو كرايبي ، بس هو يصير قريب حماتي ،

شنو بالكيس ماعرفتي ..

لا بس شاكه بشي يارب اطلع غلطانه ..

حبوب هو لو شنوو ..

صراحه مااعرف ممتاكده بس غلى الاغلب شي مثل باودر خاله بكيس صغير، هالكبرة كعدت امثللها حجمه ..

صفنت هيه على صفحه ، شعجب مابين بالتفتيش ..

رفعت جتفي مااعرف ، شفته عنده وعند حماتي مادري ..

قصدج وياه هي ، .

ماادري ،اصلا ندمت سافرت وياهم بس اني لوحدي مااعرف مااندل وكالو احنه مسافرين تعاي ويانه ، قبلت وندمت من شفت عدهم هيج شغلات نوب طلعوهن من جنطهم خلوهن بجنطه بنتي الطفله …

هزت راسها خلص عوفي سالفه عليه هسه انطي علم للامن ..

همست بخوف لا لاا ، مااريد تخترع بنتي ، مو هنا عفيه ..
لا تخافين مو هنا الامن ، الامن بالبوابه . بمطار انقرة هم يتصرفون وياه ..

ابتسمت شكرا جزيلا ..

لا عادي حبيبتي ، اني كل ربع ساعه امر اشوفج اطمن عليج ..

تشكرت منها وابتعدت عنها متوترة .. عفتها  توجهت للwc دخلت غسلت وجهي وادية طلعت ..

رجعت لمكاني ، بشار يباوع بوجهي من فتت بصفه ، كعدت بصف نورس حجت تاخرتي ..

جان مشغول انتظرت ، كعدت بمكاني اخذت هيف منها ، اجت المضيفه جايبه وجبه اكل ..

نفسها الحجيت وياها ، باوعتلي مبتسمه اطمني ، ابتسمت بوجها .. اندارت تباوع لبشار بضوجه ، شمرت الوجبه شمر علية ،باوعت لنورس تباوعلها بحقد ،جرت عيونها جر ومشت مزعوجه .

نطتنا الوجبه وراحت ، حجت نورس وجع شفتيها شهل الاشكال تعبانه ..

ماحجيت ، بس ضليت خانسة ، احاول الهي هيف لاتهيج عليه شيسكتها بعد ، هي اصلا مريضه منشوله وبيها طكه صخونه .. تقريبا ساعه وربع هيج وكالو اربطو الاحزمه راح تنزل الطيارة ..

طلعت كيس الصغير ، من نزلت الطيارة حجت نورس انطيني هيف ، باوعت الها مدمعه ..

حجت يله بس على ماانطلع من المطار ، تقربت انطبها الها سويت نفسي وكعت عليها ، حشكت الكيس بجيب سترتها ..

حجت اااه مردتيني .. هيف بجت كبل من الوكعه ..رفعتني الحجيه من عليها ..

دخت شبيج والله دايخه ، ابتعدت عنها وجهي اصفررر والله باهت من الخوف ، قبل لا نطلع من الطيارة التفتت على المضيفه اشرت باديها الي اطمني  كلشي تمام ..

طلعنا من ممر الطيارة حتى ندخل المطار ، دخلنا مطار انقرة ، نورس شايله هيف ، اني شايله جنطه الصغيرة والثانيه عد بشار ،ورانا الحجيه ..

وصلنا لختم جوازات ، بعدنا ماستلمنا جنط الكبار ، الحجيه ختمت الجواز وراها اني ، ختمت ،  ، اخرنا نورس بيدها هيف  و بشار جلبو بي مااخلو يختم .. كالوله دقيقه اكو خلل بس انطينا دقيقه ..

وكفنه بعيد عنه هو بعده واكف ، تقربوا منه اثنين من الامن مال المطار ، اني عيوني على هيف ،  اكو حاجز بينهم وبينا .. جرو الجنطه الي بيده ، وفتحها يفتشون بيها ، اني لا اراديا رجعت ليورة ، طشرو الغراض الي بيها وبشار ينتر شكووو ..

شنو القصه شنو هاي .. جره واحد يرجعه ليورة ، لكو الجيس بجيب الصغير ، اني بجيت كبل ..

تقربت على الحاجز ، حاجو بالتركي ، بلشو يصيحون عليه وياشرون على الكيس. .

عقد حواجبه  حجه بستغراب .. شمدريني ،

صاحو بي وياشرون معصبين ..و جرو اثنينهم ، .. نتر دوخرر شدراني باوعلي متفاجئ ..

وجهي خرط اني .. حجه جنطه بنتها  هاي اشر عليه ..

تقربت من نورس جريت هيف منها خطف .. صحت بخوف ، مااعرف انته خليت شي ، مااعرف لاتذبها عليه ..
فتح عيونه جذااابه ولج شسويتي ..

الحجيه صاحت شكوو يماا شكوو .. نورس همست شنو هااي هااا شديصير ، بشار شكوو شبيهم ..

جرونا الامن كلنا لغرفه على صفحه ، جلبت بهيف كل قوتي ، بجيت حيل مخترعه ، واكول ماعرفهم هم اخذو جنط مني ماعرف شنو خلو بيهن ، وياي طفله عفيه لاتخوفوها ..

نوب هيف تبجي واني ابجي .. جابو مترجمه ترجم النا . 

بشار تخبل ، نوب سمع كلامي انهار ضل يصيح ، يريد بس يلزمني يصيح لج حقيرررة مالج جارة ابد …

الحجيه مافتهمت شنو السالفه بعد ..

بس بسبب كلامي ، ثلاثتهم يردون يكطعوني ، بشار وجهه انطعن احمر ، ويصيح نوب من يصيح وصار عصبي جلبو بي وكلبجوه ..

نورس ضلت تغلط عليه وتهد ، بشار يكللهم خاله الي مخدرات ورطتنا النذله، والججيه تدعي علية ، شافوهم شلون اعصاب ومنهارين وحيل متوترين نوب جلبو بيهم وفصلوهم عني بحاجز ..   وهيف اني وياها كضيناها نبجي مانحجي ..

فتشونا كلنا حتى هيف فتشو ملابسها ، لكو الكيس الثاني بجيب نورس جروها ويه بشار ، الحجيه تخربطت من شافت كلبشو نورس ،

نورس ضلت تعيط خايفة ، تكول مو الي والله مو الي شنو هذااا ، ولج شسويتي ميراااال …

همست ابجي خايفة .. شعلي اني شعلي …

حجيت بنتي خافت ابوس اديكم شوفو اوراقي نظاميه كلها وياي طفل خلوني اطلع منا ..

مارضو .. كتلهم اريد جهاز على الاقل اخابر صديقه الي  ..

نطوني موبايل خابرت لينا ، ابجي كتلها بالمطار اني ، سولفت الها مختصر .. كالت زين اني ربع ساعه يمج انتظري ..

حجيت شسويتي انتي ..

دزيتله الرساله لي كلتي عليها قبل ساعتين تقريبا ..

فاتحين موبايلي عدهم ..

بالضبط نفس ماتوقعنا ، حاولي تكملين الي بديتي بين مااوصلج حجيب وياي رجل اختي المحامي ..

اي عفيه جيبي واني اتكفل باتعابه .. سديته منها ..

نطيته للمترجمه ..

حجت شنو يقربون الج ..

باوعت عليها وراها واحد بالامن يسجل كلامي بورقه ..

همست اقارب بنتي ، يصيرون ام واخت طليقي ..

مطلقه ..

اي نعم ..

عندي عمليه هناا ، عندي ضرر بالمعده وجيت اسوي عملية ، مااكدرت اجي لوحدي ، فهمه كالو نجي وياج اصلا ماسمحولي اسافر لوحدي وياي البنت ، فضطرين اجي وياهم ..

حسب ماوصلنا كلام المضيفه كالت انتي خبرتي عنهم ..

اي نعم ..

ليش ..

مااعرف حسيت بيهم مو طبيعين بالمطار باربيل متوترين خايفين من التفتيش ، رادو الجنط مالات بنتي ، شفت عند نورس شي بجيبها خلاني انرعب مالكيت غير اكول للمضيفه ماكدرت اسكت ..

هزت راسها المترجمه وكعدت تحجي بالتركي لرجل الامن ..

كالت على مايتم فحص العينه يله نكدر نطلعكم .

نطلعكم شنو اني مالي شغل بيهم ..

نشوف هسه .. ضلينه كلمن بغرفه هيف نامت سوده عليه ، جان الوقت ليل ، حتى اني غفيت ماادري بنفسي بمكاني ..

وراها بوقت طويل انفتحت الباب فزيت ، كالو اجه احد عليج .. طلعت  لينا ورجل اختها ، المحامي ، كعدو يتفاهمون ويه الادارة ، شوفوهم تقاريري الطبيه ، ان اني مريضه وسبق واجيت هنا تعالجت وسجل سيئ ماعندي فوكاها وياي طفله ..

هم متكفلين بيه ، كونهم مقيمين  ، كدرو ياخذون جنطتي بعد ماتفتشن زين ، وطلعت وياهم ، بشار و نورس والحجيه ماشفتهم بعد ..

طلعنا بسرعه من المطار ، التفتت على لينا ابجي حظنتها ، حجت خلص خلصتي منن  ..

راسلتي ..

اي وحياه الله شوبيك ..

رد عليج ..

رسل مين انتي وارسل اكتر من مرة بس ماجاوبت  ، وافلت الموبايل ..

هزيت راسي الي علية سويته ، طلعنا من المطار وتوجهنا كبل لبيتها باسطنبول ..

الوقت بين انقرة واسنطبول ٥ ساعات . هلكت اني وهيف ،جسمي تكسر اكل مماكله نوم مانايمه .

من عدا الهبطه والخوف ، فتحت لينا الجهاز كالت كتير دأء عليي شو اعمل. 

مديت ايدي ، اخذت الجهاز ، صدك كومه حتى رسايل ، منو انتي ، شبيها ميرال ، شنو كالت الج ….. ووو…

كومه ،لحد اخر ساعه مراسل عرفت ماراح هناك لحكت عليه ..جان ماكدر يرسلهن الي …

، ذبيت الجهاز بصفي ماراسلته ، بس ذبيته دك .. نفسه هو ، ما رديت ..سويته صامت ..

حظنت هيف ونمت بالمقعد الوره ، لحد ماوصلنا كعدتني لينا ، كعدت واكفين بحي توه صبح وناس بلشت تطلع لدوامها ومدارسها ..

نزلت ، ساكنين بعمارة ، صعدنا لطابق الثاني ، رجل اختها واختها ساكنين طابق الاول ، هي واطفالها ..

اخذتني لشقتها ، سوت النا ريوك ، ماجان الي نفس اخلي لكمه بحلكي ، هيف صخونتها زادت .. اني هم وضعي تدهور ، يادوب شربت عصير واخذت دواي ، نزلت لينا تجيب دوه لهيف .. ربع ساعه ورجعت جايبه الها شربتها .. كالت عاي غرفه ابني تكدرون تنامون بيها ..حظنت هيف ونمت ..

رغم تعب والالم ، والمرض ماكدرت اغط بالنوم ، بس احوص ، متت من التفكير ، نمت شوي وكعدت ماكدرت ، مديت ايدي اطمن على هيف ، حرارتها نزلت ..

نايمه بعمق ، غطيتها وطلعت برة الغرفة ، لينا عدها اربع اطفال ، اعمارهم متفاوته ، بيهم مراهق وبيهم طفل ..
شافتني ابتسمت ، يسعد صباحوو كيفك هلأ شغلتي بالي عليكي …

هزيت راسي زينه ..

وضعك مانو تمام لازمك مشفى بتعرفي ..

هزيت راسي ..اي …

بكرا بنروح انا وانتي لنكشف عليكي وعلى الجنين ..

جريت كرسي كعدت ، ضلتي هنا مو تمام لازم ابتعد عنج مااريد اسويلج مشاكل ..

شو هالحكي شو مجنونه انتي ، مالك طلعه من هوون افهمتي …

هزيت راسي لا صدك احجي راح يدورون عليج راح يلكونه والله اعرفهم لازم ابتعد منا ، ساعدني الله يخليج ..

انطري سوي شوفي حالك بنتك مريضه وانتي كمان ، اصبري شوي ..

لزمت راسي بادية الاثنين ، راح يدور علية ماراح يعوفني ، رفعت نظري دموعي نزلت ، حيلكاني ، هالمره ماراح يرحمني والله ، خلص اخر ذره حب واحترام خسرتها وياه ، ماراح يسكت ..

ماراح يلأكي بنووب مانو زكي ادك ، ماحدا ادر عليكي ، شغلي مخك شوي ، ارتاحي كم يوم وخلينا نفكر كيف نساعدك لتشدي حالك وتؤمي على اجريكي …

راح يسال على رجل اختج ويعرف مكانه ..

راح ياخد منو ؤقت هالحكي ، بين مابيدور عليكي بتكوني اجرتي شي محل وأعدتي في ..

سكتت خايفه ..

راح ساعدك وحياة الله ..

عدي هم بعد مااعرف اني حامل حيدور عليه ، ااااخ ياايمه لزمت راسي اون ..

هي تركياا فياا انون مانا سايبه هاي فيها شرطه ومحاكم مابيأدو يعملولك شي ، وانا كمان ماني تاركتك ماشي خليكي اؤيه …

العصر رحنا للمستشفى ، جانت صدك صحتي متاذيه ، الجنين حالته ضعيفه بشكل ، هيف شوي احسن وهذا الي برد كلبي صحتها زينه الحمدلله .

رجعنا للشقه وايدي على كلبي خايفه وميته رعب بس الي امطمني احنه باسطنبول بعيده عن انقرة بس هم مامطمنه ابد …

ثاني يوم راحت لينا لشغلها ، ضليت اني وابنها عمره ست سنوات واولادها البقيه بالمدارس ،

عدها اخت بالطابق الارضي اجت يمي شوي من شافتني مو اجتماعيه وقليله الكلام عافتني وراحت ..

من رجعت لينا طلبت منها لابتوب ،اريد ادور على شقق او بيت لااجار مارد اضل هنا واثكل عليج ..

شو عم تحكي عنجد بزعل عليكي والله ..

ابتسمت مااقصرتي بس كاافي. اريد اعتمد على نفسي ..

على شو بدك تعيشي هي تركيا بدها مصاري ..

اسحب فلوس من حسابي البنكي عندي خير من الله ..

مابتخافي يعرفو مكانك من بطاتك تبع البنك ..

ماراح اضل بنفس المكان ، اسحب وبعدها اجر بغير مدينه ..

هزت جتفها مابادر اجبرك تاتعيشي عندي ..

كعدت بالساعات على الابتوب ادور على عقارات للاجار او شقق بس مو باسطنبول .. مالكيت ضليت يومين ادور يله حصلت …

لكيت اخر شي بيت بسيط واجاره مناسب ، والي عجبني بي اثاث .. طابق ارضي . وقريب من سوك كلت بالكت اكدر اشتغل بي او ادور على شغل الهي روحي ..

لينا مارضت بي ولا اقتنعت لان بعيد عنها   بس سكتت ماكدرت تضغط عليه اكثر ..

ضليت يمها قريب اسبوع ، رجل اختها دفعت اله اتعابه بعد ماسحب الي الفلوس من حسابي .. نطاهم الي …

اخذتني لينا بنفسها لهاتاي ، جان البيت بهاتاي ، قريبه من الحدود السورية ، الحلو بيها هواي بيها عرب و سوررين ولغتهم عربيه وتركيه ..

كعدت بي ، عيب البيت بي رطوبه ، وشوي تعبان ، الطابق الارضي بتركيا مايراد ابد ، شمس ماتوصله ورطب نوبات يعفن ..

وفعلا لكيت عفن بزوايا ماتوصلها الشمس ، ماكدرت اغير المكان لان اصلا جنت دافعه اجار لست اشهر ليكدام خفت مااكدر ادفع اجار بعدين فدفعت ليكدام ..

ماختلطت بالجوارين شي قليل ، جانت اكو عايله اردنيه ياااربي مااطيبهم ..

ابنهم جان يدرس بتركيا ، واكو عاىله تركيا بس يحجون عربي ، يخبلون والله ..

اطيب ناس شفتهم بهاتاي لان اغلبهم عرب ويحبون العرب ، تجرأت مره افتح جهازي من بعد اسابيع بتركيا ، كلت شما صار شنو مااكالوا رجعه للعراق ماارجع ..

مالي شي بعد بالعراق ، اما تالا فختتارت طريقها الخاص وخلص ، اني هم مااكدر احير بيها وبطفالي ..

دكيت عليها ماردت ، دزيت رساله الها شلونج اني ميرال طمنيني عنج …

وقفلت الجهاز ..

ماردت عليه غير ثاني يوم ، جانت سامعه بالصار ، وخايفه هم بس كالت محد اجانه ودك الباب هدوء وخايفه من هذا الهدوء ..

اسفه تالا بس ماجان بيدي غير هالحل ..

هاهيه ميرال ، سويتي الي كدرتي عليه وهاي حياتج الله يوفقج ..

سكتت ..

هم يجي يوم ونشاوف ..

ان شاء الله ..

بجت خايفه عليج ، اني عندي رجلي وبيتي ومرتاحه بس انتي ..

عندي ربي ماينساني ..

صحتج ..

اتعالج مستمره بكورس علاج ..

وهيف ..

زينه كبرانه هواي عيد ميلادها فات ماكدرت اسوي الها بسبب التعب والمرض ..

ديربالج على نفسج طمنيني عنج ميرال ..

كل فتره اراسلج ، نطيتها حسابي بالفيس ، اراسلج هناك لاتنطي لاحد ولانكولين تتواصل وياي ابد ، لخاطرج انتي ورجلج ..

ماشي ..

سديته منها ،

ضليت على هالوضع ، خانسه مااتواصل مااطلع على احد ، الفلوس بدت تقل ، وكمت احس بالعوز ، مااكدر اسحب اخاف من البطاقه ، دخلت شهر ال٦ ، حاولت الكه شغل ماكوو ..

وياي طفله صعب الكه ..

اخر شي لكيت محل هداية اغلف الهدايه وباقات الورود ، صح مو شي راتب بس هم يسد حاجه ، استفاديت ان تعلمت اللغه ، جانت اللغه عندي صفر ،تقويت بهل كم شهر …

دكيت على تالا اطمن مااترد ..

ضل بالي بس حاولت اصبر نفسي والهي روحي ، وره ثلاث ايام رجعت دكيت هم محد رد .. باليل دكت عليه ..

فتحته جان صوتها مبحوح ، ومطبك ..

تالاا شبيج ولج ضل بالي متت خوف ..

بجت .. ابو حمد ماات ..

سكتت مصدومه ..

هااا ..

سوينا حادث قبل اسبوع اني ويااه هو مات ، ضلت تبجي ماكدرت تحجي ، مات ..

خنست .. دموعي نزلت لاحول ولاقوه الا بالله …توفه ابو حمد الرجال الطيب ب٢٠١٩.. جانت توها مضاهرات مبلشه والوضع بالعراق مضطرب ..

الشغل مال الصياغه وكف او انشل ، وحمد من الحزن على ابو ماكدر يشتغل بعد ، قررنا انبيع الي تبقى من البضاعه وناجر المحلات ، وقفنا مسيرة صياغه الذهب، الي ورثها بابا من ابو …

حزنت وانقهرت بس خلص ماكو شي يضل على حاله ، رجل خالتي ابو هبه هو الي استلم الموضوع وصفه الشغل والحسابات وحتى قسم الورث بيني وبينها ، البيت اخذته هي ، والمحلات صارو الي ، جان عد بابا بيت بالدورة متروك ، بعنا وقسمنا حقه ، ضلت عندي الشقه باربيل الي سجلها الي بيبر ..

كلت هاي ابيعها واخذ بيت بيها بس مو هنا ..

دخلت السابع وثكل عليه الحمل ، والصحه هم بالنازل نوب مااكدر اتعالج بسبب الحمل ، كثره الادويه تاثر على الجنين ..

ب٢٠١٩ شهر ال١١ جنت بالمحل وهيف وياي ، تنطي ورد واني اخلي واغلفه .. نزل ماي من بين رجليه فجأءه بدون اي سابق انذار … ولدت الطفل .. الطفل الي كوه كلبي من شفته  .. بعده توه سبعه اشهر ...

بجيت ايام اذا مو اسابيع ملخت حتى شعري من عرفت مصاب بمتلازمه داون .. متلازمه الحب والحنان ..

خفت عليه ، راح يعاني ، راح يتعرض للتنمر ، بجيت لحد ماجفت دموعي .. لينا والجوارين وحتى صاحب المحل ماعافوني ، نفسيا تدمرت ، ايام واني نايمه .. ولينا هي تراجع للمستشفى تشوفه لان جان وضعه صحي تعبان ..

ضل بالمستشفى ثلاث اسابيع ، لحد ماكمت على حيكلي وكرهت ضعفي وانانيتي ، هذا ابني هذا قطعه مني اني مسؤله عنه وعن حمايته من الناس والمجتمع. 

تسجل باسم ابوو ، سميته رياان ..

ريان كلبي وعروكه ، يابعد نظري والله ، ريان نسخه مني عيون خضر واشكر ..

من صرت مسؤله عن اطفال اثنين شديت حيلي وتقويت حيل ، بس كمل ريان شهرين ونص قررت اترك هاتاي واروح لمدينه ثانيه كلت افتح مشروع واشتري بيت لان الاجار دمرني .. والبيت جنت بي مرضني لان رطب وبي عفن خفت لا نتسمم بس جنت صابره لان مابيدي شي وخاصه اني دافعه اجاره مقدما ..

وكلت رجل خالتي ورسلت اله الوكاله حتى يبيع الشقه الي باربيل .. شهر وجابت سعر زين .. بعتها وتحولت الفلوس لتركيا ..

ضليت اسابيع ادور على بيت او شقه ، هالمره عندي خبرة واعرف شنو اريد وشنو احتاج ، وعندي شروط ومواصفات اريدها ..

لكيت اخر شي شقه ،  الشقه جانت بمنطقه سياحية ، بيها شغل وحركه يعني وبسهوله اكدر اشتغل ، طابق ثالث ، ومساحتها ١٥٠ ،تخبل حيل حلوه .. وكامله بناء نظيف ومرتب …

تبعد عن اسطنبول ساعتين وهالشي فرحني ..

اشتريتها ولميت حاجاتي انتقل ، ودعت جواريني الي وكفو وياي بحملي ولادتي ، الناس الطيبه والحنونه الي عطفو عليه بلا سبب وبلا مقابل ..

ضلت ارقامهم عندي واتواصل وياهم كل فترة ..

انتقات وسجلت هيف بروضى اخفف عني الحمل ، بعد فترة راسلوني من العراق رافع عليه قضيه ، حظانه مع الخطف استاذ بيبر ..

ابتسمت عرفت حربي مانتهت بعد بس اني الها ، وكلت رجل خالتي هو ضل يتابعها ..

وره شهرين عرفت رافعين عليه قضيه هنا هم بس رافعها مو بيبر رافعتها نورس اخته .. هم قضيه حضانه ..

لمن استقريت بالمدينه الجديده ، بلشت سالفة كارونا ، ومنا سالفه القضيه مال الحظانه توترت حيل وقلقت ، ساعدتني لينا ونصحتني برجل اختها هو يلزمها وافقت ..

اصلا مااعرف احد غيرة ..

بلشت التكاليف مال الاجرائات تجر، اذا اضل هيج افلس ، منا مصاريفي مصاريف العلاج وروضه هيف ماكدر ،،

كلت اشتغل دورت هواي يله لكيت شغل يناسبني ، جان معمل مال خياطه  اشتغلت بي بقسم التصميم ..

جنت اصمم ملابس تجاريه والمسؤل اذا وافق عليه المعمل يخيطهم .. راتب هم مو شي بس يسد حاجتي ..

طولت القضايا لا يوم ولايوميين ، وازمه كارونا اثرت بشغلي ، صار عمر ريان ست اشهر ، وكعدت بالبيت بسبب كارونا ، اضطريت اشتغل موديل ، اصور الاكسسوارات او الملابس للمحلات بدون مااطلع وجهي ، فقط جسمي .. او اديه ..

جان دخلها هم زين صح مو قوي بس مشى اموري مامديت ايدي ولا شكيت لااحد الله شاهد عليه. .

لينا تجي كل شهرين زياره هي وجهالها ، تالا حايرة بمصايبها هم ، حملت واجهضت ، وراها ساري ابن ام ساري خطب اخت حمد جان عنده علاقه بيها مادري شعجب …

رجعت تدرس تالا بعد مااجهضت ،  طولت سالفه الحضانه الي بتركيا سنه وكسبت الحضانه ، اما الي بالعراق لاا ، اعتبر خاطفه هيف ..

تخففت اجرائات الازمه مال كارونا وقررت افتح مشروعي الخاص  لان اشتغل وارجع ليورة والراتب مو شي صارت عندي خبرة بمجال الملابس ..

قررت اصمم الملابس واتعامل ويه معمل يخيطهم ، بعد ماينطوني عينه منهم اصورهن  ، وراها ارسلهم للمحلات او المولات الي حابه تاخذ هالموديلات ..

صممت اول شي تيشيرتات ، وخيطولي عينه ورسلتهم لمحلات .. ماجان الطلب عليهن قوي ..

خسرت بحدود الالف دولار ..

رجعت اشتغل على المشروع وادرس السوك والمجال مال المعامل ، صار عمر ريان سنة ، الحمدلله صحته زينه بس يبقى وضعه حرج ويقلقني ..

صحتي الحمدلله تحسنت مع العلاج ، هيف فلذة كبدي ورفيقه معاناتي ،،صار عمرها ب٢٠٢٠ اربع سنوات اميرة بجمالها وكاحتها وشعرها وملامحها ..

خطرت بالي فكره اصمم ملابس اطفال ، هيف هي الموديل .. هم مااطلع وجها .. فتحت صفات على مواقع تواصل وروجت لبضاعتي وتصاميمي ..

صمتت ملابس الها ولريان ، وخيطوهن وكملن صورتهن ، نزلتهم على صفحاتي ، ورسلتهن لبعض المحلات وطلبو كميه منهم ، مشن باقل من اسبوع ..

طلبو عدد .. تخيطن وجهزت الطلبيه ونرسلت ..تكرر الطلب الحمدلله مرتين بدل المره .. وصممت غيرهن وهم تكرر الطلب وزاد ..

جانت اكو طلبات تجي عن طريق الحسابات ...

ماكمت الحك ..قررت بعدها اتعاقد ويه معمل يخيط كل تصاميمي ، تعاقدت وراسلت هبه بنت خالتي جان عدها محل قبل باربيل .. كتلها اريد زباين او محلات تشتري بضاعتي وشوفتها المنتج .. ساعدتني بوقتها .

جان الشغل ممتاز الحمدلله بالنسبه الي جيدجدا .. لان رغم ماصار الي سنه ونص بهل مجال مع هذا كدرت اكون نفسي صح شي بسيط بس هم كدرت اشتغل واسوي مشروع ..

دخل كان مكفيني ، ياعدني شغلي ادفع تكاليف القضايا والاجرائات ...

ماجانت مبالغ هينه لان طولت هواي ، وقضايا مو قضية وحده ، والفلوس الي باببنك مصيرها تخلص ، مااكدر اكلها واكعد ،

وره سنتين ضبط يله ربحت القضيه مال هيف والحضانه صارت الي ،

جنت الصبح اودي هيف للحضانه ، واخذ ريان اتوجهه لشغلي ، وره مااخلص العصر ارجع اخذ هيف ..

بيوم لكيتها عاظه طفل ومزركه ايده ..

لزمت كلبي خايفه من المشاكل ، فشلان وخجلانه ، رحت ادور على اهله للطفل حتى اعتذر ..

دخلت للاداره جان الطفل يبجي ، من شفته خنست مو صغير والله يطلع بكد هيف مرتين ..

شلون كدرت عليه اصلا اطول منها ...

رغم ما لازمتها من ايدها وهي تريد تهد عليه تملخه ..

جريتها كوه .. حجت المديرة كالت صار اكثر من مره تضرب هالطفل ليش ماتعلميها ضرب ممنوع ..

همست اعتذر هي تعرف ومعلمتها بس غلطت ميخالف احجي وياها مره ثانيه ..

الطفل باوع وراي وبجى حيل وياشر على هيف ..

انداريت اشوف .. طلع رجال وراي ..

تقدم على الطفل حظنه .. يسكت بي ، وجهي احمر من الخجل كوه حجيت اعتذر مراح يتكرر الموضوع ..

ابتسم ورمش بعيونه بهدوء ..

همست لهيف اعتذري منه بسرعه ..

مااا كالي الغبيه هو الغبي ..

نترت عيييب اعتذري يله ..

جتفت اديها ماترضه …

رفعت نظري فشلانه لكيتهم يباوعولي ..

همست اعتذر نيابتا عنها ..

حجه رجال ماصار شي ، بنتج مامبينه رقيقه مثلج ، بنتج قويه ..

ابتسمت خجلانه دنجت شلت ريان .. اعتذرت مره ثانيه وعدتهم مايتكرر الموضوع واني متاكده حيتكرر وراح تنفصل هم ..

بطريق الرجعه وكفت سيارة طلع هو الرجال وهذا الطفل المعضوض عرض عليه يوصلني ورفضت بادب ..

تكررت شوفتي اله ،كل يوم عند الروضه ، ماجنت اشوفه لس هسه لااا هواي بلشت اشوفه.. بلشنا نحجي من نوكف وننظر الاطفال يطلعون من روضه هيج ٥ دقايق مو اكثر ..  

عرفت يشتغل مهندس معماري .. عنده مكتب ، جنسيته بين اليوناني وتركي ، والطفل يصير ابن اخو وهو يتيم هو الي مربي ..

عطفت عليه حيل .. خليت بينا حدود خايفه من العلاقات وارتباطي بالناس ،مكتفيه بجهالي وبحياتي ..

الحمدلله مااكدر ازيد همي او مسؤليتي ،اصلا اكتشفت اني فاشله بالتعامل ويه الناس ..

همي وهم شغلي زايد عليه ..جنت اتجنبه او احيانا ابتعد بس هو باين مصر حيل ..

الي يحاول يسأل على بيبر او عدي مااعرف ، الي اعرف عدي مابي شي لان تواصل ويه تالا يريد رقمي او اي خيط يوصله الي بس تالا ردت تراسلنا على. الفيس وكل شهر مره .. وكل مره حساب شكل ماتثبت على حساب ..

بيبر حاول يوصل الي عن طريق خوالي ورجل خالتي المحامي رد عليه مااندلها الي بيني وبينها بس وكاله وبريد الكتروني ..

وفعلا اني محد يندلني لهاي الحظه محد يعرف باي مدينه عايشه غير ليناا ، ماارجعت للعراق من سنوات ، تالا ماشايفتها من سنوات ..

عسى سجي يوم واشوفها ، بس مااكدر اخاطر ، هي شافت واختارت حياتها ماصار عدها طفل بعد كرم ربي يكتب الها طفل يفرح كلب حمد واهله ..

اخت حمد تزوجت ساري وانتقلت لغير محافظه ،،
اني سكنت بيتي والتهيت بشغلي يوم ماشيه ويوم يوكف بسبب السوك وتقلباته ..

سجلت ريان بمعهد خاص باطفال متلازمه دوان ، احاول اساعده حتى مايواجه مشاكل بحياته .. حنين عطووف مبتسم ، ربي يجعل ايامه هناا وسعاده مثل وجهه ..

اختصرت بقصتي هوواي ، وحذفت هواي ، ماردت اعذب كلبكم ولا اعذب كلبي بالذكرى ..

مااحب احد يوصلني ولا يعرفني ، سامعين الي يكول بعيده وسعيده .. هي هاي اني ..

اما البقيه فخار يكسر بعضه اخر همي ، جهالي عندي بالدنيااا ابيع دنياا لاجلهم ،

ادعولي بالراحه والسلام ويبعد عني الشر …

……………………………..

تمت ٢٤.. ٧.. ٢٠٢٣. …

وخلصتتتتتتتت اخ يااتعبي والم كتفي وعيوني وظهري .. انتظرونا بروايه جديده …

اختصرت بيها اي نعم .. قللت الاحداث اي نعم .. لان هاي روايه شوي حساسه واني اصلا كووه اتفقت وياها على عشر بارتات .. مااريد اطولها اكثر ..

اعذروني على الاخطاء ترى بدون تعديل والله ..