رواية قاع الشياطين الفصل السادس والثمانون 86 - بقلم اسماء ديمير

#الجزء_الثاني_البارت_العاشر

#قاع_الشياطين

#بقلم_اسماء_ديمير

امه مدري شكالت اله واندار على جهتي ، المشكله اني مااكدر اكوم من الخوف والارتباك ، ماكمت ضليت على كعدتي ، واكف صافن باتجاهي بعدها دار وجهه يدخل للبيت …

كمل مشي للبيت وهم وياه ، درت وجهي على الحديقة مدمعة ، لازمه البجية كوة .. اجذب اذا اكول ماكو لهفه ماكو حنين ، الي بينا مو قليل مو شوية ،

حبيته حيل وتعلقت بي ، وعندي بنت منه ، بس الي صار اخر شي دمر كلشي ، حتى لو هذا الشي اله قيمة بس اذا تكسر راح يشوه مايرجع مثل قبل ..

يضل حلو بنظرك بس يخسر قيمته ، مانسيت ايامي وياه الحلوة والمره ، بس هم يضل بيبر مو الي تخيلتك ..

ضليت بمكاني ، حياكلوني والله ، ياكلوني لحم ويذبوتي عظم ، اني اصلا بينهم ولا شي ، اعرفهم وجربتهم قبل ..

اذا ما سبقتهم بخطوه يدوسون علية ، يادوب اتلاحك النفسي ، مو مال اوكف بالنص ، اتنحى عنهم وعن ثاراتهم وحقدهم وخليهم ناس تاكل ناس ..

هم ماعدهم شي يخسرو غير بس حياتهم ومستخصرين حياتهم ودليل هذا بيبر جان بينه وبين الموت شعره غير يكعد غير يجوز والله مايجوز ولاينعدل وحتى عدي الموت يركض وراه وهم مايبطل الشغله تمشي بدمهم ..

اني عندي طفله واختي ومنا حامل ، ابد مو مال اخسر شي ، هو شعندي غيرهم اصلا داخسر ..

ضليت هواي بالحديقه افكر ، صفنت على ماي المسبح ، صوت هيف وراي التفتت عليها ..

اجت تمشي عليه ، انداريت عليها ابتسمت ، مديت اديه تعاي هنا ..

شايله بيدها لعبه مثل الفرارة الهوائيه ، مغيرين ملابسها بثوب وردي ،

اجت تلعب يمي وتركض وبيدها الفرارة ، شعرها صاير بي طول ، واصل لجتفها وثخين ..

ابتسمت يراد اكصلها غرة ، شعرها من كدام عماها ،  ضليت صافنه عليها ، بالله هاي اراهن عليها واخاطر بيها ..

ليش هو منو تعب وربى غيري ، منو الحبل وتعذب ونوب ولدت وربيتها كوه واني عمية ، بدم عيني ربيتها ، باي حق يجون يهددوني بيها ..

بعدين اذا بيبر حجه باي حق يحجي ، بلعت ريك ، حتى لو بنتا اني امها احن عليها منه ، الصار غصب عني واصلا لو ماعداوته ويه عدي مايصير وياي هيج خلي يلوم نفسه ..

اي .. ليش خايفة منه ، منو صاحب الحق اني لو هوو..

اني لازم اعاتبه والومه ..

جاب الي الاذيه واني باخر العراق ، عشت لوحدي بارض الله الواسعه بس داخلص منهم ، هم ماخلصت ..

اذا يريد ياخذ حقه ويريد يلوم احد يلوم عدي ، انعل ابو صفحه عدي ، يشتعلون سوه المهم اني واطفالي ..

كلمن يتحمل ذنوبه واخطأءه ..

فززني صوت بشار ، متونسة ..

التفتت علية هاا ..

اشر على هيف متونسه على هالجوو ..

همست اي .. درت وجهي عنه .. تقرب مني وكف بصفي ..

شلونج ..

شتكول انت ..

زينه وعال العال ..

رفعت راسي ونظري عليه ..ماعاجبني كلامه ..

ابتسم ..

والله راحه هناا و امان هم ، والجو حلوو حتى اني مرتاح ..

لعد مرتك وين .. ابتسمت اتشمت ..

ماعرفتج خبيثه ميرال ..

اختفت ابتسامتي .. درت وجهي عنه ..

سكت شوي وحجه متحسر ، طلكت من سنه تقريبا ..

مارديت ،

همس ضايج ..راحت الاحلام ، وسهر اليالي الجميلة ، والطرب ..

ضليت على نفس سكوتي ..

ماراح تكوليلي شي ، على الاقل كولي الله يعوضك ..

الله يعوضها هي بالاحسن منك ان شاء الله ..

افاااا وهاي اني الي اعزج وتوه احمد بيج واطمطم الج يم بيبر هاي جزاتي ..

لا طمطم ماخايفه ، ماسويت شي غلط ..

متاكده ..

باوعت عليه وجهي راخي ..

ابتسمت اني هم حاكلها اذا عرف جذبت ولخاطرج جذبت لان اعزج واعرف كلبج شنو فلاتخليني اكلب عليج واخرط الاكو والماكوو ..

وجهي اصفر ، بلعت ريك شتكول يعني ..

يعنيييي ، ابتسم يستفزني ..

كمت لحيلي عصبية ، نترت هيييف تعاي هنا ماما ، اشرتلها تعاي ماترضى دتلعب قريب المسبح بالفرارة مالتها .

حجه ميرال ..

باوعتله مخنزره ..

ياول لاصيرين مجلوبة شجاج جنتي اليفه …

بشار تجفى شري شجاك عليه الي بيه كافيني ..

شمسويلج قابل ولج لو ماااني طابك وياج وخايف عليج ..

ليش تهددني فوك ظيمي ،

مامهددج قسم بالله لو مااحبج مثل اختي مااسعى واجيبج هناا ، بس كالي حمد وجاب خبرج ، طفرت كبل عليج عبالك احد من اهلي ، لو اريد  اخليج بالمستشفى عند عدي يلعب بيج وتالي يشمرج وبعدها يلكاج بيبر عبالج يرحم بيج ، لايرحم بيج ولا بعدي ، ونرجع لنقطه الصفر محد يخسر غيرج وغير بيبر ، عدي ماعنده شي يخسره .. الا انتي وبيبر عندكم بنت بالوسط ، تدمر ..

وكفت مدمعه رجعت شعري ليوره وجهي احسه نار ، حجه جيتج هنا برجليج برضاتج نقطه تتسجل لصالحج ..

كتله اجت بارادتها لان ماتريد عدي هو جان مهددها بنتها ، وضلت يم اخته مجبورة تخاف ياخذها منها ، لحد ماكدرت تتصل على حمد وتستنجد بي واني حاجيتها كالت تعال الي اخذني .. ترى كتله هي مامنه بينا اكثر من عدي خايفه وحدها ماعدها سند واستكوى عليها ، هسه هي بحمايتنا ..

تقرب مني اسمعي مني ميرال والله ماتخسرين ،

ماعندي ثقه بيك بشار من الاخر ..

نتر شمسووويلج ولج حقيرة ..

انجب الك عين وتجذب بشار ..

ولج هذا اني بشار كنارري .. ابو الوكفات ..

ابو الوكفات بس منافق هم وتجذب شلون اثق بيك ، ولائك وحبك لبيبر مو الي  ..

شخسرانه انتي جربي وشوفي ..

شجرب ولك ..

كولي خطفني ومن صارت عندي فرصه استنجدت بيك بيبر حبيبي ماعندي غيرك ، سوي نفسج دايخه واوكعي بحظنه  ..

رفعت حاجبي شايف بيبر زوج وتمر عليه هيج ..

ضحك … بعد انتي مره هو حاليا اسكطت رجله يعني سكط تموعي عليه بالكت ربج يفرجها عليج ويقبل بيج والا انتي حاليا ماتعتبرين مره بسبب وضعج ، باوعلي عافس وجهه .. مع الاسف جنتي تشكين شك  ..

قسم بالله بشار اجيبك بضربه ترى مريضه امراض الدنيا كلها بيه والله ..

لاتحلفين امبين عليج مواته مو بس مريضه ..

لاتقهرني ولك ..

دنسولف وسمعنه صوت طشار ماي ، التفتنه اثنينه وعطت يمااااا ، هيف شامره نفسها بالماي بالمسبح وبس شعرها طايف  .. ركضنه اثنينه اني اعيط وهو يصيح ول ول راحت البنت …

شمر روحه وراها  يطلعها واني وكفت اعيط على حافه المسبح ماده ايدي ايريد الزمها ، جرها من جتفها وطلعها تعيط مخترعه سوده عليه وتفرفح خايفه ، نطاها الي ..

رفعتها من جتفها ورجعت ليورة ابجي يمااا يماا حبيبه ، شوداااج شلون تنزلين هنااا ،

ضلت تشهك وتبجي مختنكه ، طبيت على ظهرها ،  وجها احمر طلع هو من الماي حجه شبيها هاا شو اشوف ..

نورس اجت تركض من جوه البيت .. صاحت شكوو هاا وكعت عزاااا .. اخذها بشار مني يفرك بظهرها وصدرها حجه مابيها شي لحكنا عليها .. من الهبطه ضليت كاعده بالكاع ارجف ، كوه نطقت .. شبيها شفتها زركه  .

مابيها شي يمعوده انت الثانية . همزين جنه قريبين عليها ..

نورس كالت شوو انطينياها ، دشوفها ، ضلو يتفحصون بيها وهي تبجي مخترعه ، اني لزمني الم بطني ومعدتي هاجت عليه ، كمت لحيلها لازمه بطني ، مديت اديه كوه ..

اخذتها حظنتها ، نار معدتي عبالك من الخوف ، تمشيت كوه واخذتها جوه للبيت هم وراي يحجون مابيها شي بس خترعت لاتخوفيها بالزايد تصير عادي ..

المهم مرت سلامات يمعوده ..

الحجيه تلكتنه، شافت وجهي خارط من الخوف ، باوعت لهيف بحظني ..  هاا هاي شبيها ..

ردت نورس وكعت بالمسبح ..

يااا عزااه العزااجن وين جنتن عنها ..

رد بشار كبالنه حجيه نطت ورة اللعبه مالها ،  عادي كل جهال تسوي هيج خاصه المسبح مكشوف لازم يتغطى منا وجاي ..

اخذتها بسرعه للغرفه ابدللها ملابسها وانشفها ، سوده بوجهي اي والله انرعبت  نوب فرفحت روحها من شهكت الماي ، انشف بيها وابوس يااايمه يااعيوني ، جان غركتي ولج شوداج للماي هااا ..

سكتت تشهك والعيون هالكبر حمر من البجي ، اجت نورس حجت هاا خما بيها شي ..

همست لااا ..

ردت بشار راح يسوي للمسبح سياج لو يغطو مو مال يضل هيج خاف تغفلنا فد يوم وماندري بيها ..

مارديت عليها ..

حجت ابوها يريدها ..

انداريت عليها ،

حجت بغرفته فوك اذا تردين اني اوديها اله ..

هزيت راسي بس خلي اكمل لبسها ، لبستها ومشطت شعرها ونطيتها الها ، اخذتها راحت ، رحت اشرب اي دوه معدتي نار واستعرت ، ضليت ادور بالثلاجه بالصيدليه بالكاونتر ماكو ..

حجت الحجيه هاا يمه تردين شي ..

معدتي اذتني ..

هواي تشكين من معدتج انتي ..

جدار المعده عندي تعبان ، تقربت مني فتحت الكاونتر طلعت باكيت صغير كالت هذا جيس واحد اخبطي بكلاص ماي واشربي يهدء المعده اني اخذ،منه وصفه الي الطبيب ..
اخذته منها ورحت اسوي حجت اليوم يجي بسام وعهود ورجلها تطلعين تسلمين عليهم موو ..

التفتت عليها منو ..

ابني الصغير بسام ، وعهود بنتي الجبيره اصغر من فرات مزوجه ، هيجون اليوم ..

هلا بيهم ..

سكتت شوي واني اتجهت اكمل الشراب مالتي .. حجت ماشفتي …

رفعت راسي منوو ..

فرات ؟؟ واكفه واحسها متردده تحجي ، بنتي بس .. قاطعتها  . حجية ..

سكتت ..

دنجت راسي اخوط بالكلاص ، اتحمد له بالسلامه بس ماصار عندي وقت ، سهله هاي ،

ترى تعبان فرات والله ..

ادري حجيه الله يعينه ..

ما الله يهديج ..

الهدايه من الله حجيه انتي كلتيها ، اذا الله كاتبها ..

سكتت .. دارت وجها وراحت ..كعدت اشرب بالدوه ، ماكدرت اشوفه او تعمدت اتجنبه ، جنت خايفه ، خايفه من العتاب من الوم من الكره من الحقد من تحميل الذنب ،

احس نفسي مو جاهزه ، مو كد المواجهة والتبرير ودفاع عن النفس ،

خابرت تالا ، مرتين ويله ردت ، عاتبتها لان رغم ماادك ماترد ، وجن بالها مو يمي ..

ولاعبالك اختج واني كل لحظه افكر بيج وبالي كله عليج ..

مطمنه عليج والله شبيج اكلتيني ..

شلون مطمنه بالله ، واني،صار اشهر ماشايفتج ..

ليش مااعرفج ادبرين نفسج ، بعدين بشار خابر حمد و طمنه عليج ..

حمد شجابه على بشار ..

عدهم تواصل صح مايلتقون بس هم يتواصلون سوه ، هم اني اريد اسمع اخبار دانيال من فتره لفتره حتى اطمن هو بعيد عني ..

وين انتي ..

شعليج بيه انتي وين ..

عند اهل بيبر ..

كال حمد رجع امه واخواته لحظنه على اساس ،

اي ..

شعجب مو جان متبري منها لان تزوجت ..

انتي شعليج تالاا حيري بنفسج كرم شلونه ، شلون دبرتيها وياه ..

زين والله صاير هالكبر مخدخد ، من الاكل مال ام حمد …فجاءة .. سكتت ..

رفعت حاجبي ام حمد شنوو ..

كبل نكرت .. اني كلت ام حمد ؟؟؟!!!

تالا شمصخمه الله يااخذج ، ام حمد شنوو مشغله المره عدج خدامه يالنذله ..

لا والله يمعوده ششغل ليش هيه نكدرلها تكول عتوي مو مره ..

ولج شجلبها عليج ..

ضحكت ..

تالااااا ولطم كولي عزاا جبتيها يمج لدهوك ..

لا حبيبتي اني رحت الهم ..

يماااا ، لزمت صدري ولج حنجلط يماااا وين انتي تالاا ..

بغداد ..

كعدت لحيلي ، احس تكرمت ، اااخ يااضيمي ياااهمي ويااقهري ، شوداج تالاااا ..

اووووو لاتكلبيها علي منااحه اكلج وحدي ضليت شسوي يعني هاااا ، اكابل الحياطين لو اكابل خالتج شسووي وياي جااهل ماعندي احد من بعد الله غيرج وانتي رحتي برجليج لعدي النذل شسوووي ..

يااارجليه ولج غيررر سكت .. اااخ يماا بطني كلمت توجعني لزمت معدتي ..

ميرال لخاطر الله ترى مو جاهل اني بلغت سن الرشد كاافي بطلي مني جاهل كبالج ..

كرم وين وديتي ..

عندي وين اودي قابل غير يمي ..

شسوين بغداد عند منو كاعده ..

سكتت ..

تالاااا ، دمعت عيوني من القهر ، انطيهن الي كلهن تالا لاتقطرين عليه بالحجي  ، كلبي حيوكف من الخوف شمسويه كوولي ، شصخمتي ، شوداج لبغداد اني ماصدمت  طلعنه واسسنه بيت بدهوك ينعل بليسج اي والله ..

كاافي ميرااال كااافي شهل ملحه مالتج شفادنا البيت بدهوك هااا ، حماااج حافظ على بنتج ريح بالج لاااا وجودنا بدهوك وعدمه نفس الشي ، اني بغداد مرتاحه والله كلش مرتاحه ..

يم منو كاعده غير افتهم شلون مامنه على نفسج ويااج طفل ..

بيت اهلي ..

سكتت شوي وهمست مفهيه ياابيت ..

بيتنا اشبيج كم بيت عدنا بغداد ..

شكعدج بي لوحدج يالخبله ماتخافين ماتعلمتي من الصار قبل كم سنه ،ولج يدخلون يكتلوج خلاص انتي وابنج. ومحد يعرف عنج شي ..

مو وحدي وياي حمد واهله هم جبتهم وضحكت ..

هي كالت هيج واني طكيت بجي ، ماكدرت حتى احجي بعد ..

اسمعها تهمس لاحول ولاقوه الا بالله شهل مناحه نوب ، ترد تحجي تكول هاي ميرال ..

لايمعود دتبجي لان سمعت رجعت لبغداد ، شدرااني ، دحجي وياها فهمهاا ..

اجاني صوت حمد الووو ميرال ..

ماكدرت انطق مسحت دموعي .. حجة الووو ..

ها حمد ..

شبيج يمعوده ضحك .. على شنو تبجين حق تالا تبجي عليج ..

ليش رجعتها لبغداد نوب لبيتنا كلها تندلها هسه رجعها لدهوك فدوه حمد  ..

شسوي بدهوك ميرال ، منو عدها هناك وهي لوحدها وياها طفل ..

ليش هي منو عدها بغداد حتى تضل ، كللها ترجع بسرعه وتعوف البيت ..

اسمعه يكللها ماكتيلها هااا ..

سكتت شوي اتصنت عليهم .. وهي ترد مانطتي مجال غير اكلتني ..

حجيت شتكلي بعدد شصخمتي تالاااا الله ياخذج كووولي ..

تزوجت حمد .. وانسد الجهاز بوجهي كبل .. شهكت اني .. فكيت عيوني ، نزلت نظري على الموبايل مصدومه ..

رجعت رفعته بسرعه اخابر مره ثانيه ماترد دكيت دكيت ماردت .. عطت من حركه دمي وشمرت الجهاز حيل على الفراش .. عصرت اديه حيل انعل بليسج اي والله على هالدكه انعل لشتج تتالاااااا ..

اكلت روحي اكل والله قهرتني قهرتنيييي ، موتتني قهر ، اااخ تالااااا عفتج كم شهر بس بس،كم شهررر ، خربتي كلشي لا نوب مزوجه ااااه ياايمه.   نوب حمد ..

شجابج عليه وعلى اهله ، ليش يااربي ليش،هيج ديصير ويااي هاااا اني عايزه ، منين اتلكاها ياباب اسد ، منين ما اسدتها تنفتح من جهه ثانية ..

جهه نار و قهر ، لزمت راسي صخنت فااخ راسي والله ، يومين واني مسمومه ، نار بمعدتي من القهر والي كتلني ماترد عليه ماهامهااا مامهتمه ، تحجي برود ومااخايفه مامحسبه مامفكره ماخاله بالها اذا دانيال طلع من السجن شنو حيسووي اكو واحد يرجع برجليه لنار ..

نوب ماخذه حمد وياها المسكين مورطته هو واهله ، يعني هم مو مال واحد يحتمي بيهم مال واحد يحميهم ،

كعدت بالحمام اتقيى ، والله احس سم بمعدتي يحركني جمر يسعر بيه ، طلعت من الحمام اغسل بوجهي ومختنكه من الالم ، فززتني الحجيه طلعت بوجهي ..

حجت هاا يمه شبيج ..

لزمت معدتي ، القرحه كتلتني داموت من الالم ..

سكتت ، رحت اشرب ماي بارد دابردها وهي وراي ..

حجت اخلي بشار ياخذج لدكتور العصر ؟؟

همست لااا هسه تهدء من يمهاا .

وجهج اصفر يماا على شنو العصر مري للدكتور ينطيج مسكن او علاج مو حاله تضلين هيج ..

هزيت راسي اي بس اريد اخلص ماريد احجي متت من الالم ، جان اكو خطار يجون ويرحون ، مااعرف ولا احد بيهم اغلبهم عوائل بس الحق ينكال ..

شكلهم عوائل محترمه وياهم اطفال واحيانا ناس كبار بالعمر كانو اقارب او معارف ، جنت ادخل للغرفة مااطلع لحد مايرحون ..

بس نورس تاخذ هيف يمهم شوي وترجعها الي ، هيف اخذت على العايله كلها ، بطبيعتها تتعلم على الي يدللها ، بس باول مره تخاف وتستغرب ،

واكو طبيب وممرضه كل يوم العصر يجون يشوفوا ، اديه يحتاج الها علاج فيزيائي ، فجان يتعالج بالبيت ..

بعدها بايام ، رحت صدك للدكتور ، حجزلي بشار وراح وياي ، عندي جدار المعده تعبان بشكل ، قرحه ونوب قالون هم ، اخذت كوم ادوية ،

بطريق الرجعه وكف بشار يم محل ايسكريم ، اخذل اله والي ، اني بالسيارة انتظره .

اجه وجابهن وياه ، مد ايده نطاني وحده ، وصعد ، حجه من اليوم تخلين بالج على صحتج مو حاله هاي كل فترة دكتور لو مستشفى اني مو فاضي الج ..

ابتسمت مارديت علية ..

يسال عليج. ..

انداريت عليه منوو ..

تعرفين اقصد منوو ..

بيبر ؟؟؟ مستحيل درت وجهي اعرفه جذاب ..

لا صدك احجي ..

والله جذاب لاتحاول ابد وياي لان اعرف بيبر شنوو ..

ترى هو الي طالع من الموت مو انتي ، هو الي حاليا تك رجل وسكط لازم على الاقل تتحمديله بالسلامه لان ملفيج بيته ..

شلون صلف انت ولك ملفيني بيته مو بيتك ..

انتي صدك ماتعرفين بالاصول ..

غميته بيدي .. خليت الاصول الك ..

شمنتظره ..

رخت ملامح وجهي التفتت علية ، منتظرة الفرصه ..

اي فرصة ..

الي كل مرة الله سبحانه وتعالى يدزها الي ..

عقد حواجبه خايف ، عدل كعدتة زين .  شناويه ولج ..

ماناوية شي لاتباوعلي هيج ، ليش هو اني شيطلع مني مثلا ..

اعرف شيطلع منج لذلك خايف ..

والله على كد حالي ، اريد بنتي تعيش احسن من عيشتي ..

بنتج شكو عليها ، اصلا مرتاحه بيت اهلها وبامن وبحظن امها وابوهاا ..

عليك الله مستعد تراهن هالامان وراحه ايطول ، انته تضمن الي هذا الوضع يطول ،

سكت ..

هااا احجي ..

محد ضامن عمره ولا ايامه ميرال ، تردين تضمنيهن انتي ليش وحد من الناس وتفكيرين لبعدين ..

لان انت مو اب ولا عندك طفل ، اني ام افكر لبنتي ، باجر عكبه اذا كبرت اول الناس تلومني اني ، مثل مااحنه دنلوم اهلنا على احداث صارت ويانه هسه ..

دار وجهه عني ضايج ،  ذب الايسكريم وشغل السيارة ..

حجيت دكلها حرام تشمرها ..

شوو اسكتي ، انسدت نفسي ..وين تردين انولي هسه ..

للبيت وين يعني ..

لا كلت خاف اكو مكان بالج حابه ترحين اله محد يمنعج..

رفعت تك حاجب بشار شهل حجي شبيك ،

المعنى محد حابسج عنده ولاجابرج  ، اي مكان تردي اني حاظر اوصلج ، تردين اخذج لاختج ..

سكتت ثواني مصدومه ، هذا مو كلامك .

اي لعد ليش داكلج والمح الج بس انتي ثوله ..

رخت ملامحي من الخوف شنو كلك هااا كول ..

منوو ..

بشار لاتلعب باعصابي ..

كال وديها وين ماتريد ..

هيف ؟؟

بيت ابوها شعليج منها ..

هاا بشار راح تلزموها عدكم موو ..

محد يجبرج ميرال والله على راحتج ، بس البنت هم ابوها اله حق يقرر وين تكون ،  انتي امها نعم بس هو هم ابوها واله حق يكون اله رأي بيها وبحياتها وبتربيتها  ، خاصه بعد ماجانت عندج وانخطفت ، من واجبه يحميها ، ويم ابوها امن عليها وافضل ، لو انتي ماتعترفين بيبر ابوها ..

سكتت مخترعة ، ماعرف شجاوبه ..

شنو جنتي تتوقعين لعد ..

جنت متوقعه اصلا ، بس .. سكتت …

بس شنوو …

رجعني للبيت وطول الطريق ساكت ، معدتي تحركني بس ارجع اشرب الدوة ، نزلت هو طبك السيارة بالكراج ، شفت هيف هي ونورس بالحديقه دلعبون بالبايسكلات ..

ابتسمت دخلت جوه ، اخذت بطل ماي من المطبخ حتى اخذ دواي ،  توجهت لغرفتي ، لكيت الباب مردوده مامسدوده ، دفعتها ودخلت ..

وكفت بمكاني متجمده ،

داير ظهرة ، وبيده العكارز ، مدنج على شي بيده ، اجاني مغص كتم انفاسي والله ، اريد احجي ماكدرت ..

لزمت بطني اذتني ، عصرت عيوني اقاوم الالم ، فتحت عيوني بهدوء ، صوت عكازته رفعت عيوني ..

ماباوع بوجهي ، مدري شنو ظم بجيبه ، عيونه اتجهت على ايدي الخالتها على بطني سكت وسكن ماتحرك ..

بلعت ريك كوه همست الحمدلله على السلامه ..

مارد ولا رفع عيونه بوجهي حتى مارمش ، تحرك بطئ اجه يمشي ، وبيده العكازه كوه ساندته ، وحده من رجلية كتله من الحديد ، او البلاتين غارسين بيها من الفخذ للقدم ..ضليت واكفه بمكاني ماتحركت ،

فات من يمي وتجاوزني ،وكف فجاءة ماتحرك اني مانداريت ماتجرأت ، حتى مالتفتت ، النفس عندي انكتم ، عضيت على شفتي خايفة ، فتح الباب وطلع ..

غمضت عيوني وجريت النفس ، يايمه حتى دخت ، مشيت رجليه خدرانه من الخوف كعدت على الفراش ،شيسووي هنااا ..

هااا شنزله اصلا الي اعرفه مايكدر ينزل ، الا احد يساعده ، بس ليش هنااا  شيسوي بالغرفة ،

درت وجهي على الغرفه هي هي مابيها شي متغير ،لزمت راسي خايفه ، ليش ماحجه هااا سكوته يخوفني ..

غيرت ملابسي وشربت دواي واني افكر بي شغلني والله نوب رعبني فوك رعبي ، منتظره منه لي فعل او كلام حتى اعرف اتصرف بس هو مثل الي ديشتغلني على البارد والبطيئ ،

يريد اني احجي لو اتصرف ، فعلا جان هذا هو اسلوبه ، ناوي يطبخ الطبخه على نار هاديه ، مثل المتحلف بية ،

كعدت بالغرفه بالساعات ، شكد اضل هنا يعني ، من شنو خايفه ياخذ هيف ؟؟؟ مااخلي ارفع علية قضيه حضانه ..

واذا اخذها واختفه بيش تفيدني قضيه الحضانه اني ، بين مااركض بالمحاكم ومن محكمه لمحكمه هو ماخذها وطافر لاي دوله ، وخاصه القانون العراقي يخول الرجل ان يسافر بالطفل بدون موافقه امه ..

اكوله تزوجت عدي ، واخلي يتلاطش هو وياه .. لااا  شراح يسوي ، ياذيني الي ويحرك كلبي عدي ماكو غيرها ..

اذا عرف حامل والله صدك يشمرني بالشارع وياخذ هيف ، زين بس اكله عقد عليه وجبرني بين مايحير بعدي ، اني الكالي حل واطلع منا بسرعه ..

يااارب والله تاهت علي ، غمضت عيوني صدعت من الالم ،

جان العقد موجود ويه الاوراق بالكنتور، خالتهم بين الملابس ، طلعته .. طبكته وخليته باول جرار بميز هيف ، جرار الي بي ممات و قواطي الحليب …

اول وتالي حيعرف ، اشمر الكره بملعبة ..

على العشى ماطلعت ضليت بالغرفة ، عدي جان يدك علية ماارد ..

رسل رساله .. رديي

مارديت دكيت على تالا ماشالته النذله …

رجع راسل دحاجيج ولج .

راسلت .. شكوو ..

جاي اتصل ليش،ماتردين ،

مااكدر ..

ليش منو يمج ..

شعليك عدي ..

ولطم رجلج ترى مو زين مني ساكت ولابس كرون على هالوضع ..

ضحكت .. اذا رجال تعاال ..

انجبي رجال غصب عنج وعن الخلفج ، بس اني عاقل مو ارعن واخلي العاطفه تحكمني واروح بالرجلين ..

بهاي صدكت ..

دزيلي صوره لبنتي ..

نايمه شعليك منها ..

جذابه ولج ماتنام هيه بهل وكت طكيلي،صوره الها واسكتي مشتاق اشوفها …

ماكو بالغرفه عند عمتها دتلعب ..

ناسيه العابها هنااا ماجبتهم الج ..

عدها العاب هنا ..

سكت .. اني هم سكتت ماكتبت شي .. شوي وكتب ماحجيتو شنو قررتي ..

ماكو شي الوضع هادئ ..

السكوت ماقبل العاصفه خليها بالج ..

اعرف لذلك خايفه ..

من شنوو ..

من كل شي ..

ليش ماضليتي وياي ..

وياك جنت ماامن على نفسي واني بالغرفه  لو بالحمام عدي ..

شمسوي الج ..

شكد صلف انت وعينك كوية ..

لان حبيتج استاهل ديصير بيه والله ..

ماطالبه منك .

الحب ماينطلب الحب ينطي بدون مقابل يالغبيه ..

لاتكول غبية ..

مشتاقلج ميرال ، وحق الله ، لاعبالج هينه على الرجال مرته كاعدة بيت عدوه ، مرته وبنته هم حتى لو زواجنه ماصار اشهر بس الحب يزرع الغيرة مو زواج ، واني من سنين زرعتج بكلبي .. داحترك بس لان خايف عليج ساكت ، ما اريد النار تلوحج ، اريد العداوة تصير بيني وبينه وتطلعين منها انتي وهيف لذلك سااكت ..

ماكدرت ارد على كلامه ، اعجز عن الرد اصلا ،

قفلت الجهاز بلا ماارد عليه بااي كلمه ، دخلت فجاءة نورس ، ذبيت الجهاز من ايدي ، جابتلي هيف نايمه ..

كمت اخذتها منها ، حجت ماعبالي عندج موبايل ..

لا عندي ..

عندج رقم ..

همست اي ..

انطينياه لعد ..

هزيت راسي اي ..

ويامن جنتي تحجين .. خليت هيف بسريرها وغلست على سؤالها ، حجت ويه اختج ..غطيت هيف همست اي ..

سمعت عندج وحده بس،ساكنه بغداد .. ايديه جمدت عن الحركه ..

شدراج انتي ..

بشار يكول رجل اختج صديق بشار ..

وجهي خرط ، بلعت ريك حمد قصدج مو ..

اي هههه ليش اكو غيرة ..

هزيت راسي درت وجهي عنها ..

شعجب ماتجي تزورج اختج ..

ملتهيه بابنها ..

ضلت تحجي يمي ،ما وتوقفت عن الكلام .. واختي عهود هم ماتزورنا هواي بسبب الزواج والمسؤلية …

التفتت عليها واخوج ..

سكتت شوي ، كالت بسام ..

اي ماتجيبون طارية ..

لا ليش اجه ماشفتي انتي ؟؟؟

لا شفتهم بس ماصارت فرصه اتعرف عليهم ..

عنده شغل بالبصرة يشتغل بالمواني ومرتاح هناك ..

وانتي والحجية ..

شبينا ..

شعجب سكنتو الشمال ..

ويه فرات غير , علاقتنا ماجانت تمام تعرفين انتي ، ضلت سنوات هيج حتى شكله لفرات مانعرفه ، بس شايفي بالصور القديمه من جان اصغير ، امي تكول اخوكم الجبير بس عمره مازارنا ، ولا سأل علينا ، ولا اتصل اصلا ، حتى من مات بابا …

لحد قبل فترة سنه ونص تقريبا حندخل السنتين اجه ودك الباب ..

هيج فجاءة  جايب وياه العشى ، وبات عدنا هم ،امي بوقتها صعد ضغطها من الفرح وتخربطت خطية ماصدكت عيونها ، يومين هيه فارشه اله فراش وتنومه بصفها ممصدكه ، بسام بوقتها غار حيل ، بس عرف ان  فرات هو الحبيب الاولي ، ماكو مقارنه هذا الابن البكر الكاطع عنها ..

دنجت راسها متحسفة ، شكد ضاعت سنوات واحنه بعيدين عنه ، ماتسوى الزعل والكطع هذا بس بعد صارت ، الانسان نوبات يتخذ قرارات يندم عليها لسنين ..

المهم رجعتو لبعضكم وامج لمتكم جوه جناحه ..

رفعت نظرها مبتسمه اي ، اي والله هذا المهم ، لذلك اني افكر اكول ميرال هم يجي يوم وترجع لفرات ، مو غريبه ولا بعيده ،

رمشت بعيوني ساكته ،

مو بالله ..

هزيت راسي علاقتي بيبر مو مثل علاقتكم بي ، انتو يربطكم الدم ،

وانتي بنتج هيف اشرت عليها شوفيها شلون نايمه بسلام بيت ابوها وعند امها فكري بيها ..

مارديت عليها بس ضلت عيوني على هيف ماتحركت ..

طولت عليج اعذريني وانتي مريضه تصبيحين على خير …
اخذت نفسها وطلعت ..

نمت بالغرفة وهم بالي ، كلهم ، من عدي لبيبر ، لتالا وزواجها واختيارها لطريقها ..

هي اختارت محد خيرها ، واصلا مو صغيرة خلص كبرت وصارت ام ، بعد هي تتولى نفسها ،

رفعت الجهاز دزيت الها رساله دزيلي رقم لينا ..

لينا الممرضه السورية الي تعرفت عليها بتركيا ..

جنت فاقدتها حيل ومحتاجه احد احاجي وافضفض اله وبعيد عني هم مايعرف شي عن زواجي ..

.  ثاني يوم الصبح ، حاجيت نورس واني واكفه بالمطبخ ..

فدوه لعينج جيبي حليب هيف من الجرار بين مااحمي الماي. 

تعمدت ادز نورس تجيب الي الممه والحليب من الجرار مال هيف ..

ما كالت لا راحت تجيبهم ..

كعدت هيف كرسيها الخاص وبلشت اجهز الريوك الي ، دقايق واجت ، حجت هاج ..

التفتت عليها مدنجه بس وجها كالب احمر ومخطوف لونه ..

مديت ايدي اخذته منها ، درت ظهري ماحاجيتها بس تاكدت من البالي ، ضلت واكفه ماتحركت ..

كملت الحليب وخليته بيد هيف رفعت نظري عليها ، واكفه مرتبكه وتفرك باديها ، باوعت عليه ، كتلها تردين اسويلج ريوك وباي ..

هزت راسها لااا بدون ماتحجي ، عافتني وطلعت بسرعه ..

جريت نفس وكفت عدل ، لازم يعرف ، خلي اني ابديها احسن ما هم يبدوها .. درت وجهي اكمل ريوك ، اسوي ونفسي لعبانه من ريحه الزيت والبيض ، كوه كملتها ورحت للحمام اتقيئ ..

بالنص ساعه بالحمام روحي طلعت ، حتى خشمي نقفل ، كعدت بالارض الحمام ارجف ، معدتي منتهيه بشكل الله لايشوفها لاحد ..

ولايضوك هالالم لااحد موت احمر والله ، شايف النار من تشب بجسمك مو تريد بس اطفيها ، هاي النار بالمعده ماتكدر اطفيها تسعر بيك تخليك تربش ..

ضليت بالكاع ارجف ، من ارتاحيت يله كمت من الارض ، سندت نفسي على الحايط وكفت فتحت الماي اغسل وجهي وركبتي ..

فتحت الباب وطلعت تلكتني الحجية ، شلون شايطه ترجف ..

وكفت بوجهي ساكته ، اني اصلا دايخه من معدتي ، نزلت نظرها على بطني رفعت عيونها عليه ..

ماحاجيتها عفتها ومشيت ،  للعصرر مدده بالغرفة اندكت الباب ، حجيت اتفضل ماكو رد ..

جانت هيف عند الحجيه عبالي رجعوها الي ، تكرر الدك ..

كمت لحيلي افتح الباب فتحتها ، وجهي خاراط من دوخه .. شفت مره غريبه واكفه .. باوعتلي من فوك ليجوه …

عقدت حواجبي  .. حجت .. انتي ميرال ..

هزيت راسي اي مستغربه .. جانت ضخمه بشكل والله ، راس هالكبر ، الادين هالعرض الوحده ، خفت من شكلها ، من هذني السمر الطوال .. همست بخوف .. منو انتي. 

تعاي استاذ بيبرر يريدج ..

وكفت جامده مابيه اتحرك ...منو انتي ..

عافتني ومشت كبالي، بس جتفها عبالك عرضه متر جثيثه بشكل ، ترددت بالاول خرعتني والله لحكتها امشي واتعثر ..

وكفت بالصاله هي كبالي اشرتلي على البلكونه المطله على الحديقه هناك ..

التفتت بيبر كاعد على كرسي ومنطينا ظهره ..

نوب انداريت عليها لازمه بطني بلعت ريك ، واكفه ماتتحرك بس تباوعلي ..

تمشيت اله بهدوء وكل اشوي التفت عليها خايفه منها ، وصلت ليمه وكفت ..

حجه اكعدي ..

كعدت على الكرسي البصفه .. عيني عليها ، درت وجهي عليه لكيته يباوعلي ..

ساكت مايحجي ..

خاف جان بيه قطره دم هم راحت اختفت ، نزل عيونه على بطني ، بلعت ريك خايفة ..

شنو من رجال  هذا الي يخلي مرته بيت طليقها  ..

وجهي شلون لفحته نار حارة .. اني جبانه اكتشفت بعز ازمتي اني جبانه ويرادلي عون بهيج مواقف ، اني مو كدها ابد ، ماانطقت ضليت خانسه انبلع الساني …

مسح شعره بجف ايده بهدوء ، عينه علية ، لا اراديا دمعت اريد ابجي ..

نوب حامل ، ابتسم بستهزاء .. وتتوحمين بيتي بنص اهلي ..

يتبع ......................................

باليل اذا لحكت تعديل .. انزل البارت الثاني والاخيرررررر ..

بنات امانه ادعو لاخوية الوسط رجلة متاذيه من الحادث ، الله يكومه بالسلامه ويدفع عنهم الاذية ..