رواية قاع الشياطين الفصل السادس 6 - بقلم اسماء ديمير

.....................☆البارت الخامس ☆..................

#قاع_الشياطين(البصر والبصيره)

#بقلم_أسماء_ديمير

تريد تاخذ علي هاي الجاهل ابو يقين …

كولي يالله وافتهمي السالفه زين ..

-ياسالفه وانته تريد تحط وحده فوكي بكد جهالك جان استحيت على نفسك اي والله ..

-اووو شلون بهل عقل جنه عقل مطي ، انطي مجال دفهمج  .

-احجي ياافهيم زماانك لطش جفصه الي جفصتها ..

-افرك.حلكج اني اجفص ولج ..

-حشه بس فهمني شنو تعقد عليها ،وبياا صفه منو يرضه يزوجها الك اصلا ..

-الجبيره تنشمر بالشماعيه و تنسي وتموت ومحد يدري عنها،  تضل الصغيره هاي السان ، يرادلها كسر ظهر مايسيطر عليها ، الا اذا عقدت عليها وخليتها جوه رجليج خدامه ، و اكو عقد ينطيني سلطه عليها والقانون و عشاير متحاسبني هيج ..

سكتت هيه ..

خليت ايدي على كلبي ، عصرني جريت نفس كوه ارجف ، احس حنجي يرجف ..

-حجت وشلون تعقد عليها مو لازم ولي امرها ..

-امي ولي امرها ماعدهن احد هنه ،جبيره تعتبر غير صاحبه للاهليه ، والصغيره قاصر وامي ولي امرها وصيه عليها مجرد ماعقد عليها اصير اني صاحب الانه و لج ام يقين والله امشيج على ذهب غير ماتعرفين ثروتهن شكد هذني  .

-سكتت بعدين حجت ابوو يقين والله اكتلك خلاص اذا ناوي تلعب بذيلك ، تعرفني كلش زين احركك وانته نايم ..

- شلعب يابنت الناس لو عندي غير نيه وياج مااجي واكلج بالسالفه ، وبالي جاي اخططه ازوجها و خليج.جدام  امر الواقع بس انتي مرتي وام جهالي هذني شنوو ..

-سالفه تخوف والله منو كال امك تقبل بهل حجي ..

-منو كلج امي اصلا راح تعرف بهل حجي ..

-شلون هاي ..

-خليها عليه الج الصافي ..

لزمت الحايط ارجف ، مشيت بسرعه دخلت للغرفه وكعدت بالارض ارجف ..

-تالا حجت شبيج هااا برادانه خلت فوكي بطاانيه ..

-لزمت اديها وينج تعااي هنا يمي ..

تقربت لزمت جسمها وحظنته .. حجت شبيج هاا ياهو وياج ليش ترجفين ..

-همست بخوف حلكي يرجف تتتالاا تالاا

تدرريين هذاا تدررين ..

-شبيج بردانه ، هاااا ضغطج نزل ولج شنو ..

-حظنتها حيل تااالا يردون يشمروني بالمستشفى مال مجانين ..

-رفعت راسها من حظني شنووو ..

-بجيت حيشمروني بمستشفى المجانين ولج ، توه سمعتهم يخططون يشمروني بالمستشفى وزوجوج لابو يقين ، 

-شهكت هااااا ..

والله ، بجيت خليت راسي على رجليه ، من صدك عجزت و ضاعت الحلول من راسي ، همست الها شنسوي تالا عدج حل ..

-سكتت هيه منصدمه ..

-خاف متوهمه ..

-شتوهم تالا شبيج داكلج سمعتهم ..

-انخابر نانه و نخليها تساعدنا ننهزم منا لو تشتكي عليهم بمركز للشرطه ..

-مو كتلج جهاز عطل ..

-نبوك.جهاز ابو يقين ..

- اذا تكدرين ..

-اجرب ليش لاا ..

نمت وخليتها بحظني ودعيت من الله مينسانه بعطفه و برحمته ، ثاني يوم حاولنه من صدك انبوكه و ماكدرنه ضامه بجيبه لو بالصاله على شحن و كل جهاله كاعدين ماكو فرصه ..

مرت فتره و كل مايمر وقت اني اذبل اكثر من خوف لاصدك فديوم يدخلون عليه فجأءه الممرضين يسحلوني من يم تالا واضيع من صدك هناك ..

من عدا الاحلام اشوف ممرضين يدخلون و يجروني من رجليه و يطلعوني بره الغرفه و يصعدوني للسياره الاسعاف كوه و ابطل اشوف تالا و يضيعون كل احبابي عني ..

لحد ما فد يوم اني بالمطبخ اغسل مواعين ، و اجت تالا تركض عليه مستعجله، حجت احسبي لل١٠ و عيطي و صرخي وخلي الكل ينجمع عليج .

-شنوو ..

-نفذي الكتلج علي ..

-شسوي يعني لزمت ايدها مو فااهمه ..

-عيطي يبوووو وحش ، مدري جريدي دخل بملابسي و اصرخي حيل و كمزي افتهمتي من هذني الافلام  ..

هسه يله حبلش ..

صمت حلكي خرب لاااا ولج احسبي للعشره و يله ..

اوك ، صوت ركضه رجلين .. 

ثواني وكتلها يله احسب ، ماكو صوت .. تااالا وين وليتي خيه؟؟!  ، تااالا يله  احسب ، واحد اثنين ... ١٢٣٤٥٦٧٨٩١٠

وباعلاا صوتي ، لج يمااااااااااا الحكيني يبووووو وحش يماا وحش ، يمااامااا حموووت حيووووان جبير هالكببببر هجم عليه ..

ثواني مو خواي اكمز واعيط ووحش هجم عليه ، صار الركض ماله والي عليه ،  و يصيحون شكوو وينه ولج شبيج و الحجيه تركض تتلمس بيه وتصيح شكوو شبيج

تنزع بيه و تتالمس بجسمي تصيح شبيج يماا شكرصج ولج ..

واني استمريت حمووون ياايمه وحش ..

الحجيه كومي و نزعيني القميص مال تراك وتخليني بطرك التيشرت داخلي و اني ادفع بيها لا لاااا برجلي برجلي يمااا ..

جرت البجامه و عطت وخررر لاااا بشعري صعد بشعري ، وهيه ام يقين التمن علي ولج شنوو فاره زنبور عضج  صخاام شكوو ..

وابو يقين يرد نزعوها نزعها خاف دخل جوه نزعوها ..

ام يقين نترت انته شجاابك هنااا وخرر دنشوف شبيها تخبلت هااي ..

اني ادفع باديهن و اعيط حموووت عضني الوحش هالكبر ..

صاحت ام يقين بيه فززتني ، ولج ياااوحش هي عميه و ين تشوفين انتي شلون شفتي ..

فجأه سكتت و تذكرت الجفصه جفتصها ..

حجت هاا يالعياره ياا وحش هذا ..

لزمت الحجيه و سويت نفسي خرب فوكاها ، موتت نفسي نمت على الحجيه نومه الميت خفت لااوكع بالارض و ادمي راسي نوب من صدك اموت ..

غمضت عيوني و سرسحت روحي واون حمووت يايمه حمووت ..

الحجيه تضرب وامي يقين تشمر علي ماي خنكني و الحجيه سوت عندي ارتجاج بدماغ من الراشديات ..

كل هذا و تالا الحيوانه صاحبه الفكره ماكوو ..

ويووون شرفت الاخت تصيح يمااا اختي مااتتت لازم نوديها للمستشفى حتموووت صعد ضغطها ..

دفعتها ام يقين كلشي ماعليها عرج ميطكها شيلنها وين شيلنها دناخذها للغرفه شلون بلوه ابليت يررربي شوفلك صرفه عاد ابو يقين تره طك كلبي .

صاحت مو  احجي وياك يارجال وين صفنت وين عينك .

صااح هاا هاا وياااج ويااج ..

صاحت لبسنها القميص مدلعه شنوو نووب خلي تتصلخ فرد نوب بس هاي ضلت ..

هو يكللها لا لا عوفيها تختنك مو تشوفيها فاقده عوفيها ..

صاحت بي بجززع ، امشي اطلع ابو يقين شووف شغلك يله لا تتعطل يمنااا ..

دخلني للغرفه و اني شبه ميته ، غطوني و كعدو يمي ، يحجون ..

ساعه الحجيه تكول خاف شافت جني ، وام يقين تكول لاا حجيه جن البت انجنت لازم ناخذها للشماعيه ..

و بناتها يكوللها لايمه هذا جريذي كنالج علي بس انتي ماصدكتي جوز هجم عليها صدك ..

وتالا خانسه خلت راسي بحظنها و كعدت سااكته ماتحجي ..

سطرو راسي سطر واني مليت من تمثيل ، نوب نعست من كثر مامغمضه ..

شوي وكامن من يمي من صار هدوء و همست تاللااا ..

ردت هاا ولج كاعده ..

منو يمج ….

ردت تضحك ماكو ولج عبالي صدك نمتي ..

كمت لحيلي اشتعل غاليج ولج شورطيني نوب ثبتت على روحي من صدك خبله و يراد.اروح لمستشفى ..

ضحكت والله اني من سمعت عياطج اخترعت عبالي صدك بيج شي ..

ضحكت شلوني عليج الله ، عود اكول وحش وحش هالكببر و ردت ام يقين شلون شفتي سويت نفسي خربت ..

تالا خربت من ضحك خاله راسها بحظني و تضحك بكتم ..

ضحكت والله لو ضاله بعد شوي جان سويت روحي بيه صرع وكعدت اربش بس الحجيه مانطتني مجال تولتني راشديات ..

نوب اريد اسكت وتالا تريد تبطل ضحك ماتكدر ، خربنه ضحك ، على موقفي ، وتمثيل مالتي ..

حجت تالا دزيت رساله لام ساري و كتلها الحكينه نانه حال ضيم حالنه عند ابو يقين حق العشره مال اهلي وياج سويلنه معروف انقذينه ..

سكتت اني مدمعه ، شلون راح تندلنه هيه ..

الي يسال ميتوهه ميرال تسال و تندلنه ..

جريت نفس ساكته ..

مرت فتره وام ساري مامنها خبر ولا اي فعل ، وصلت مرحله كلت من صدك نستنه لو ساري بي شي والمره جزعت بعد من مسؤليتنه ..

دخلت ام يقين تصيح على تالا اروح للسوك كومي وياي ..

رديت اني شسوي تروح وياج ام يقين ..

-مو وياج الحجي ويه اختج كوومي لج يله عاد اريد احد يشيل عني الغراض خلي بيج فايده مو اكل ونوم .

ردت تالا والله ماكووم عدج ولد اثنين وثلاث بنات اخذيهم احد.كلج اني حمال اشتغل عدج .

-مو اصيحلج ابو يقين يدبغ جلدج ..

سكتت تالا ..

-نترت بيها كوومي لج ..

-رديت عوفيها اني اكوم وياج .

-هم عايزه اخذ وياي عاله شنو ماخذتج خمره ..

-مو تردين حمال وياج اروح اني عوفيها ..

كمت بسرعه ، حجت شكوو ماخذتج ماتفيديني ..

-عمي والله اني اشيل الغراض عوفيها هيه كلاص الماي ماتعرف تشيله ..

واضل اسحل بيج بنص شارع و سوك ..

-لا بس انطيني عصاتي واني اعرف امشي ادبر روحي بصوت و الحس ..

طلعت وعافتنه كمت ورها البس ، دورت على عصاتي ماكوو ..

حاجيت تالا عصاتي وين ..

-من كل عقاج تردين تطلعين وياها و تشيلين عنها ..

نتجفه شر ترى اذا كعدنه نخلي راسنه براسها تسود عيشتنه جوز حتى الاكل تكطعه سايريها والله كريم ..

- وتعوفيني وحدي هنا ..

-قابل اخليج تطلعين وياها الله واعلم وين تاخذج شسوي بيج ، ابقي هنا يم الحجيه و قفلي الباب بين مارجع ..

طلعت ادردم ادور على عصاتي ماكو اختفت وكفت بصف الباب اسمع بيها تحجي و تصيح و ين عصاا ميرال ..

رد يقين بضحك شمرتها على الطيور بالسطح و انكسرت ..

رفعت حواجبي مصدوومه يااا ..

ردت علي تالا وجع انشالله مالكيت غير عصا ميرال مو جانت بالغرفه منو نطاكيها ..

اوو هيه عصاا شنو ، مو جاي تاكلن بلاش ..

سكتت و تالا جن انصدمت حتى جاهل تعلم من اهله يعيرنه ، جرت نفس تالا وحجت والله اكطعك تعاالي ام يقين شوفي خلفتج تعاااي شوفي اذيتهم ..

تقدمت عليها اتملس و احجي وينج تعااي انطيني ايدج امشي للغرفه بلا مشاكل خلي تولي

-لا لا خلي تجي تشوف خلفتها العكره مكيفه بيهم والسانهم زفر ..

-دفعتها كاافي امشي ..  

-ام يقين صاحت شوو تعاي شبيج ولج طالع حسج ..
رديت ام يقين ترضيها عصاتي كاسريها شلون امشي شلون اكدر ادبر نفسي من دونها ..

-زعلانات وطالعه صوتجن على العصا عمي اني اجيبلج عصاا شنو هيه بس يله البسي برجلج دنمشي ..

دفعت تالا للغرفه و حجيت بداعت اهلي لاطلعين لحد مارجع و قفلي الباب ماريد مشاكل ..

دخلت معصبيه و ضايجه ، وكفت باب صاله اتلمس برجلي حذائي ماكوو ..

دنجت مديت اديه على الارض كل مره عصا ادليني ، هم ماكو بس شحاطات و نعل مالت البنات .

حجت ام يقين فضيها ، رديت حذائي وين ..

دلبسي هل موجود..

صغار ام يقين اريد حذائي ..

ياا مو نكطع ..

جربت نفس وكمت جزعانه شكطعه جديد نرى ..

مو فاطمه لبسته و راحلج فدوه ..

سكتت مو راضيه و تعبت نفسيا تعبت ماكدر اناقش بعد ..

حجت هااج دلبسي هاي ودفعت شي يم رجليه ..

لبست كوه لان تطلع شحاطه وطركتها قاسيه و نوب كعب رجلي من وره طالع كثر ماصغيره ..

لبستها وسكتت ، توه نطلع واني لزمت الباب حجت ياا يا اوكفي عصا ..

انداريت على صوتها هاا ..

راحت تركض ورجعت و فتحت ايدي و نطتني بيدي عصا من خشب تلمستها اسطوانيه ، مديت ايداي اكتشفها شنو هاي مو عصا هاي خاصه ..

ردت هذا الموجود يله دبري نفسج ..

حجيت هاي مال ماسحه ام يقين صدك تحجين ..

يبوو على عيارتج شنو نقصها عن عصاتج قديمه هيه تتلمسين بيها الكاعد يله تاخرنه مشت و جلبت بعباتها اني تمشي سريع تهفي خلتني اركض ركض وراها ..

من عدا شارع والنكر جفصت بيها و رجلي راحت بالخيسه ..

كل شوي واعثر وتصيح عماا شبيج انثولتي ..

بالنص ساعه نمشي راحت رجليه والله حتى كرشت رجليه اذني ، لمن وصلنه للسوك يااايمه ..

دوووخه بحيت ماميز الصوت من نفس من البشر من اي شي ، كله صوت بالمكبرات السوك شعبي وناس مدافع ..

و الاصوات عاليه  وجهال نسوان ، مافتهمت ..

وكل شوي فازه على ضربه جتف لو دفعه ونتره ، انطي مجاال خيه مجااال الدرب بس الج ..

لو مكبرات صوت ، لو سمممج سممممج كيلو ب٣ ..

لو رماااان عرااقي رمااان عراقيي …

تعال يااولد …

دخت وكفت بنص الدرب مسطوره بحياتي ما داخله هيج بيئه و هيج مجتمع …

ام يقين تمشي وتجر بيه بهذلتني ..

وكفت مابيه همس بتعب دايخه ، ام يقين رااسي راسي راح ينفجر ..

اضربج بجمع والله امشي لج شبيج تموعتي ..

دمعت اريد ابجي ، عيوني انتي والله ماكدر ..

اجتنه ضربه واحد ديمر هزتني هز شوي واوكع ، جرتني حيل ودفعتني نترت دمشي جدامي من خرب لشتج ، مشت كوه اتعثر  ..

اهبد ، و اجفص بنكره خيسه ، تالي لوت رجلي واوكع بنص السوك و العالم كتل و انمرد جواهم عطت يمااااا ، لج ام يقين ..

يماامااا ، مديت اديها على الارض دلحك نفسي و اكوم  ويجي شخص يجفص فوك جف ايدي  روحي شااغت ، متت ، ام يقين اعيط وابجي عليها ماكوو ..

و ناس تصيح اسم الله اسم الله بابا شبيج دنجو يلزموني واني دفعتهم ابجي خاايفه من الاصوات و ناس ماعرفها ..

عطت ام يقين وينج .. 

لزمني شخص من جتفي و حجه ميررال هاي اني ..

رفعت راسي صوت اعرفه ،

صحت ناانه ناانه انتي موو مديت ايدي ، لزمت ايدي و حظنتنتي ، يماا ميرال بعد عيني ..

بجيت يااايمه ريحه نانه و الله ، لج نانه نانه شوفيني شحالي  ..

دباعي شلوني ، بنص سوك وجوه رجلين نانه هذا حالي ..

بجت و حظنت راسي عمت عين الوكت يايمه عمت عين الكرابه و الطمع دكوومي كوومي ..

ليش عفتيني ليش ماسالتي عليه هنت عليج ..

ياايمه مو وكت عتب تعاي دشوفج ليش ضعفاانه ..

اخذيني وياج مارجع وياها لام يقين بهذلونه وذلونه والله شوفي حتى شوو طفي رفعت شعري اشوفها ضربه .. اكللها شوفي شوفي ضربني هنا ابو يقين على وجهي حتى عيوني نزفت ..

-سرطان كون بيده النذل النكس ، جابلنه الشرطه وسحلني اني وساري من البيت بذاك اليل  ..

-منو ابو يقين ..

-اي يايمه شعمل بحالنه هالنذل ، اتهمته احنه مستولين على البيت عنوه و جبر ، و ماكلين حالالج بهذلنه بمراكز الشرطه ..

داحجي وانجر من وره حيل وجلبت بيه نانه و صاحت و مرررض لايدج كون ياظالمه بيش طالبتها فوك مرضها انته عليها ..

وذيج تصيح شعليج لج انتي غريبه شدخلك حيري بنفسج لاخلي ابو يقين يعرف يتصرف وياج ..

جلبت بنانه حيل اخذيني وياج نانه بداعت اهلي وذيج الايام ماريد اروح وياهم اخذيني ..

ردت نانه غصب والله عنهم تجين وياي شننوو بكيفهم شنو خاطفين بنات انتو نوب متوليهن كتل وخدمه خافو الله يتامه ذني ..

اكولج ماالج دخل حيري بروحج لا خلي ابو يقين يتوج والله يله لج انتي يله جرتني حيل خنكتني ونانه نطتها دفعه عني وتعركن بنص سوك ..

ماعرف اسوي شي بس اعيط واهامش باديه  اصبح عووفيها كلبه عووفيها ، ويجيني صوت سااري وخري بت الكلب عن امي ، عبالج تستفردون بيهن انتي ولج حراااميه طماااعه استغلالين و ذيج تعيط يبوووو باكووني يبووو تحرش بيه يبووو خطفوو بتي ..

فكيت عيوني يااايمه منج ومن فتوكج  ..

جرتني نانه تلهث وتغلط تحرشنه بيج موو بووواكه يالظلام يالطمااعين يالمفتريين ..

وساري يهدد ولي لا انطيج بدفره امددج هنااا مشغلتها خدامه عندج وهيه ضريره الله يلعنكم من نفس ..

و ذيج شهترنه شهيره باكو فلوسي نوب تكول تحرشو بيه نووب خطفو بتي و السوك التم و شرطه الي  باب سوك اجتني و ساري يحجي من جهه و نانه تعيط وتغلط مم جهه ..

نوب الشرطه جلبت ياخذونه للمركز كووه العالم واهل محلات فضوها اني حظنت نانه كلت والله لو تموتني ماهدها ، غركان و جلب بكشايه ..

حاظنتها حيل و احجي اخذيني وياج و امشي نجيب تالا ، تالا لوحدها هناك ..

جرتني نانه و تحجي دخل نطلع من السوك و الهوسه الله كريم ..

ساري رد مو هسه نجيبها لان لوحدنا لازم ويانه اقل شي سياره شرطه حتى ينطوها النه بلا عرك وضرب ..

-رديت والله يموتها كتل هسه لوحدها خطيه ..

-رد ساري هيه هاي هم ينخاف عليها جنها اخت ابليس ..

-ساري والله ضربها ابو يقين موتها ، حتى مريضه هيه صتر فتره ،  ترى هذا واحد ميخاف الله ..

سكتو صافنين ، حجت نانه دمشي نروح للبيت والله كريم نفكر شلون نجيبها ..

رديت بيتنه مو ؟!.

يابيت ؟!..

بيت بابا غير .. 

لايمه مو كتلج نذل ابو يقين اشتكه علينه وطلعنه منه وقفل البيت بحجه انو البيت مو مالتنه واحنه كاعدين بي قفله حتى منكدر ندخل اله ..

-ايااا نذل هو يكلنه ام ساري عافتكم ملت منكم و من مسؤليتكم ..

-مرض كون بالسانه جذااب ، والله جذاب جاب النه الشرطه و سحلنه من البيت نوب ساري جان مكسر مابي حتى يمشي طلعني من البيت بنص اليل ، اني اجر بساري بكرسي متحرك الظالم ..

-وين رايحين هسه ..

لبيت اختي كاعده يمها مؤقتا لبين مالكه بيت اجره ..

سكتت وصدك اخذوني لبيت اختها ، طلعت كاعده بطابق الثاني بغرفه صغيره ، صعدت فوك صوت اسامه ، فتحت الباب ساري كله شوف منو هاي ..

عاط من شافني ركض حظني ، يعممري مشتاقتلك يروحي شلته ابوس بي حاظني حيل ..

شووفي ضلت سيارتي باليت هناك .

بيتنه ؟؟!

اي كل العابي ..

اجيبهم الك الله كريم ..

حاظني يشكيلي على  العابه ضلت هناك ..

سكتت راسي يوجعني ، همس ساري يصير خير .. لزم ايدي مانعوفكم والله ،  ابتسمت ..

بنفس اليوم ام ساري ، حاجت اختها ورجل اختها ،تسالهم شنو  نسوي ،

كاالها خلي اختها الجبيره تشتكي ، هيه مو بالغه هيه مسؤله عن اختها الصغيره ، و تسويها شكوه على اساس ، عمليه خطف وتاخذ دوريه و تجيبها غصب عنهم ..

ماكدرنه نروح بنفس اليوم لان دوام خلص ولازم شكوه و مركز الصبح ..

لثاني يوم اني اتكرضم ، ميت الف فكره براسي ، كعدت وحجيت لساري عن سالفه كلها ، و عن الي سمعته على لسان ابو يقين ..

يجر نفس كوه هو ، حجيت تعبان ..

-لا صدري ياذيني ..

-وين صوابك ..

-قفص صدري متاذي كدمات و راسي شوي ..

-ابتسمت فدوه البطل مالتنه انته ..

-يابطل ولج هذا وتالي باكو البيت و سحلوجن سحل ورعبوجن ..

-المهم حاولت و غيرتك مانطتك تسكت وتتفرج  ..

سكت ، 

-حجيت دوامنه راح علينه ..

ادري رحت للمعهد مالتج ولمدرسه ذيج دبشه وعرفت ممداومات صار هواي ..

ماخلانه النذل نداوم بحجه السياره عطلانه و اذا عندج صلحيها انتي و اوصلجن ..

-جذاب صار يومين ارقب بيته عرج ميطمه لا هو ولاسيارته بس امبين ناوي على سياره جديده وراد يطلعها براسج ..

-ذلنه الحقير حتى على لكمه ..

-امبين من وجهه شنوو  …

-دزينالكم رساله ماوصلت ..

-لا وصلت بس ماتفيدنه بشي بس صار عدنا علم ، و ناكل بروحنه من القهر امي شالت همج اكثر شي  ..

الصبح اخذنه رجل خالته لساري مشكور خطيه ، وصلنه للمركز بسيارته و دخل ويانه و حجه ويه ضابط و يكله شوف حالتها انته البنيه يعني مو حمل بهذله ولا تمرمط بالمحاكم ..

تريد اختها الصغيره واكو عالم مجلبين بيها على طمع يعني لاعدهم وصايه ولا ورقه قاضي ولا شي مجرد ورقه ضغط يردون فلوس و من ورث ابوهن ..

بنفس اليوم طلعت ويانه مفرزه ، سياره شرطه وبيها ثلاث اشخاص واني ونانه وساري وراهم بسياره رجل خالته ..

وصلنه منطقه ، ساري يندل البيت ، لان مراقب ابو يقين ، نزلو هم ، دخلو للبيت واني ماقبلو انزل بس اسمع عياط و صراخ خاله ابويا و ام يقين ..

خترعت خفت على تالا لا بيها شي نزلت من سياره وكفت بصف الباب لازمتها خفت لاندعم بدراجه لو اتيهه ..

واكفه و اتكرضم واكل بروحي ..

طلع صوت العياط بره بالشارع دمعت اريد ابجي كلبي اجه يوكف يااارب سترك  ..

وصوت تالاا تصيح انعل ابوكم ولد الكلب حرااميه بكتوونه الله ياخذكم و نانه تصيح يااعره يااااا طمااعين ..

تالا و نانه نفس طينه فضحنهم بشارع و ذيج ام يقين تغلط واسمع صوت ركعه الباب حيل وصوت خف عرفت سدت الباب ..

و صوت تالا ترجف وتصيح الفكررريه اهل ريحه جخممه ...

ضربت على خدي عززاا ولج عيب ، ام ساري ترد اهل عين ضيكه طماااعين عسه خطيتهن مرض انشالله بلشتكم ..

ياايمه انفضحو فضيحه بيت ابو يقين تسوه راسهم ، تالا  تحجي تقدمت عليه تلهث  ، هاا كلبه ميرال شلون تعوفيني قندره …

ضحكت ماعفتج ولج مو اجيت هياتني ..

بعديش طاح  حظج دفعتني وصعدت ، يااااا فوكاها تلمست اصعد مديت ايدها وجرتني تساعدني ..

كعدت يمها و صعدت ام ساري و ساري ويانه معصبين ..

حجيت غراضنه ولج جبيتيهم ..

-اكول ماتسكين انتي بطرانه هو اني ماخلواني اطلع حبسوني بالغرفه و يكولون للشرطه بت شردت لو مااعيط واصيح جان صدكو شرطه ..

-صدك عود شكد حقراء ..

-والله ، تلكين ام يقين ام عين فارغه دفنت غراضه بالحديقه من كثر ما عينها فارغه ..

-شلون راح ندبر نفسه ولج ودوامنه ..

-يادوام انتي ثانيه الي يسمعج جاي ندرس طب ومقهورات على اادوام ..

-شبيج وياي انته تنتنرين بيه و اذا معهد واذا انتي متوسطه لازم نترك دراستنه مثلا ونهملها ..

-على نفسي بعد ماادرس شفادتني دراسه مثلا ..

-من كل عقلج ..

-اي والله ..

-ياااا ولج نانه دتسمعين ..

-مو وكتها يمه بالسياره احنه ..

سكتت عصبيه وانافخ وذيج ادردم نتر بيها ساري اسكتي لاشمرج من سياره شبيج ولج ..

وتالي سكتت ..

وصلنه لبيت خاله ساري وصعدنه فوك ، تلكانه اسامه يصيح هلاا هلاا بجيتهن ..

ردت تالا شوو دوخر وخرر لك كرهت جهال بسبب ولد ابو يقين ..

فشلته خطيه ، رديت ولج مو متلكيج خطيه ..

ماحجت عافتنه و مشت ، حجه كبر جلبه ..

ضحكت ، الغرفه ضيكه بس والله ناس دره مال الله ، من صوتهم تعرف معدنهم شنوو ، البيت دافي و الكرم امبين و تعاطفهم ويانه شكد حلو ،

حتى حمام كلولي ادخلي دنسبحج واستحيت ، دخلت وياي تالا ، سبحنه وطلعنه ..

على العشه رغم البساطه بس الطعم والعافيه الي بي ترد روح ، طماطه و بتيته فنكر ، من ايد نانه تسوه دنيا والله ..

الغرفه شوي بيها رطوبه حسيت من خليت ظهري على حايط استند ، تذب بحرث كانو الجص ماعرف شنو ، بس هاي غرفه ولا بيت ابو يقين كله عفن ..

باليل نمنه بحظن نانه ، تالا جرت اسامه من رجليه من حظن نانه و شمرته على ساري و مددت بمكانه ..

هو ضل يعيط يغلط جللبه وخرري ، امي هااي مو امج .

و ساري يدردم هاا بلشت رحمه الله ، مخلفتهم انتي  مادري ..

امه ضحكت عليه نزول عليكم تغارون ، تعالو نامو فوكي تعالو ..

ماحجه ساري بس اسامه ترسنه تفال و ضرب بالمخده  ، كامت عليه تالا تكتله ، اني غطيت راسي خفت لا انمرد لو تجيني ضربه مو متعلمه اني ،

مالي اي طرف بالحرب مع هذا اكون اول متضررين بالقتال ..

حجت نانه تفض النزاع تعالو نامو يم راسي ..

ردت ساري ، لاخاف انسوي زحمه ..

دتعاال ولك  ..

نمنه بيومها بررراحه رراحه ناسيتها ، غمضت مطمئنه وسعيده والغرفه داافيه وعطر نانه الي يحسسك انته حاظن طير ..

لثاني يوم كعدت ، بطني توجعني ، رفعت راسي تذكرت خاف دوره عزاا ،  مالكيت نانه طالعه ، بس ساري كاعد .

-حجيت ساري ..

-هاا ..

-وينك ..

-على ايدج اليمنه ..

التفتت عليه ، كاعد مو ..

-داقره بدروسي الفاتت اي تردين شي ..

-لا نانه وين مالها حس ..

-طلعت للشغل ..

بهت وجهي ، ياشغل ، ليش نانه دتشتغل ..

-مو تعرفيها ماتكدر اتضل بلا شغل ..

عقدت حواجبي وكعدت بفراشي ماكمت ، حجيت بهمس شنو محتاجين فلوس ..

رد يضحك دنيا تمشي بلا فلوس ميرال مو ناكل و نشرب لعد ، مو جاي اسمعج لا والله فلس واحد مناخذ منجن انتن منه وبينه وامي شغلها زين و الحمدلله عايشين ..

دمعت عيوني ودرت وجهي ماردت يلمح دموعي ، شوي وحجيت دتشغل عامله عد الناس مو ..

اي ثلاث ساعات باليوم رحمه ترى تنظف و تركب وترجع ..

مردني كلبي عليها والله ماهانت عليه اديهاا تتعب ، هيه ماتنظف مامتعوده مو شغلها هذا ..

رجعت من الشغل واني عيوني هالكبر كوه لازمه دمعه ماتوكع ..

تالا كعدت تشتغل وتحجي وياها بس اني خنست ، صوت لهثه التعب باين على صوتها خطيه ، ام ساري من هذني الامهات عراقيات ترفات مربربه و كصيره و حنننننيه حيل والله ..

حجت مااكلتن موو عليش ماكلتن يمه مو وصيت ساري لا تانني ..

تالا حجت ما اشتهينه و كلت من تجين اسوي طماطه و بيض ..

-حجت وياي ميرال يمه شييج ..

-مابيه ، اجه اسامه خله راسه بحظني يكله سويلي مكعبات هذني  ..

- هااا هيج صارت ..

ماحجيت ضليت منعززله ، افكر شنو قابل اضل جوه الادين اني ، لو اتوسل من ناس عطف و يتحملون مسؤليتي ..

-كلتلها ام ساري ..

-كولي يما ..

-شوفيلي محامي ..

-شسوين بي ..

اريد انطي توكيل يشوف سالفه فلوسنه ، ومحل صياغه وين تروح ارباحه ، و شلون اكدر اسحب من البنك فلوس واتصرف بيهن ..

-ليش يمه محااجه فلوس ..

-اريد اسوي العمليه ..

-من صدك تحجين ياعمليه مو كالو ممنوع .

رد ساري من كل عقلج نسبه نجاح العمليه ٣٠ بالميه بس ناويه اضيعين النظر ،  ترى تعمين طول عمرج ..

-شفايده نظر بعدين وهسه اني بامس الحاجه اله ..

-مو وياج هسه احنه مقصرين وياج ..

-كافي تعبت ذابه حملي عليكم اريد اشيل نفسي ..

-شايله نفسج وشايله اختج هم يمااا شبيج لا دمرين عيونج يرحم موتاج ..

ماقنعت ضليت معانده اسوي العمليه حتى لو اشوف بس خيال هم ارحم من العدم ..

ام ساري استمرت تشتغل و تجي تعبانه تون من رجليها لو اديها ، ساري بين مدرسته الاعدادي و بين علاجاته وجع جسمه .

وتالا كظيتها وياها عرك على المدرسه ماترضه ادوم امتحنو  وهيه لااا عانت متريد ..

بجيت و صيحت وعصبت وهيه و لاكانو حتى ام ساري رزلتها بس ماكدرت عليها ساري كال تريد تصير فاشله عوفيها خلي فاشله ..

مو فااشله لك ..

-ولج دراسه هيج اسهل منجز بالحياه واول عقبه يتجازها الشخص و طالب وانتي مادبرتيها شلون راح تنجحين بالحياه بعدين ..

-دراسه مو مقياس افضل الاشخاص و الناجحين بحياتهم و منهم الاثرياء ، طلعو من المدارس وماكملو دراسه تضيعه وقت وفلوس وبس  .

-ذولاك عدهم على الاقل مشاريع استثماريه و اختراعات و افكار انتي شعدج مطي ومدد براسج شعدج  كولي ..

-انجب اكول ..

-عليمن انجب ، شو تعاي و نطها ضربه و هيه ردتها له وتكامشوو و كبت العيطه ..

اسامه يكول لساري اجيب الك نعال تضربها ، خلي تولي شمرها من شباك ..

واني خليت اديه على راسي ماكدر اتحمل بعد عيوني ناار احسهن ضوه احمر بيهن عبالك نزف عندي وحركه مو طبيعيه …

#يتبع ..

صفحه الفيس ( كتابات اسماء ديمير )

صفحه الانستا  asmaa_demer