رواية قاع الشياطين الفصل السابع 7 - بقلم اسماء ديمير

.....................☆البارت السادس ☆..................

#قاع_الشياطين(البصر والبصيره)

#بقلم_أسماء_ديمير

لزمت راسي باديه ، الالم فضيع ، نوب صوتهم عالي و نانه تصيح ولك ولج عيب فضحتونه منا العالم ..

و ذيج تصيح خنكني حموووت و خر حيوان ..

رد عليها ، ياهو حيوان لج هي نعال ماتنجرعين شنو انتي ..

بس اسمع صوت الهبد و الخنيك و صوت مكتوم و نانه بينهم تصيح ، و طلع صوت تالا فضحتنه جلب يالنذل عاار ..

واسامه يتفل يكله هاك اضربها بهذا هاك ..

كمت لحيلي ولج النااس سمعونه من انعل صفحتج انفضحنه بهل صوت ..

تالا .. عاار تضربني كدراك على بنيه براسك خير جان من دخلو حراميه ماسحلوك سحله جلب ..

مدري شمر عليها و عاطت يمااااااا ..

صعدو رجل خالته لساري و مرته يركضون على صوت ، عبالهم احتركنه مدري تصخمنه ..

شكوو شكوو شبيكم شصار ، نانه من نبره صوتها حسيتها فشلت خطيه وتتعذر و تكللهم جهال بينهم و تالا ترد مووجااهل بس ابنج نذل يضرب بيه مسويني مكفخه  .

و ذاك يرد السانج لا اجي اسحكه برجلي ..

رجل خالته جره ونزله ليمهم و نانه زعلت ، تالا بعدها دردم جريتها حيل كاعدين عدها وعد ابنها و متكفله باكلنه و شربنه غير تحترمين نفسج عاد..

-مو شفتي للعار تولاني كفخات شنو تايهه اله الله يرحم ايام قبل جان شحده امي تمسح بي الارض ..

-ايام امج وابوج انتي كلتيها هسه مرجعنه لابو يقين ترى تردين نرجع لابو يقين ومرته ومكفختهم ..

سكتت مو عاجبها ..

-حجيت لو راده للمدرسه و ملتهيه بدراسه ودوام ماجان صارت هالمشاكل على الاقل بيدج شي تلتهين بي ..

-ماريدها اكرهه شفادت دراسه متخرجين حتى تفيدني اني ..

-بابا لو عايش ميرضه على كلامج هذا جان شبع قهر على اسلوبج و طريقه تفكيرج ..

جرت نفس مقهوره عود سنه تجي اصلا امتحنو نص سنه مالحك ..

ساري لليل ماصعد ، بس اسامه كل شوي يجي يتحرش بتالا يصيح ام دوده ..

هي شكو شي يمها تشمره عليه ، نانه زعلت راحت تالا ترضيها ، شوي و اسمع ضحكهن ، و يداهرن دخل ساري و سكتت تالا ،

سكتت بس عيونها اعرفها ماتسكت اكيد لو تخزره لو تعيب علي ..

هو يدردم عمه لهل العيون ، صبح مشت نانه للشغل و ساري للدوام  ، ضليت بس اني و تالا واسامه نزل جوه يم جهال ..

اخذتني ونزلنه للطرمه جوه ، سلمت على موجودين كرايب نانه ..

ناس هادئين و من اهل الله مثل نانه ، كالو تعالن اشرب جاي و كليجه ..

استيحت اروح جرتني تالا كعدنه ..

حجت اخت نانه اسمها ام عبد ، بنات الاستاذ اركان انتن مو الف رحمه عليه شلون رجال جان ..

تالا حجت لا تحطين شكر هواي ماحبه ..

اسمع بس صوت الخوط مال استكان جاي وو صوت نزله الجاي بنص الاستكان وريحه هيل ..

حاجوني تسمعين موو ..

ابتسمت اي خاله اسمع ..

مديت ايدي و هيه خطيه تهفي و تنفخ بجاي تريد تحطه بحلكي ضحكت انطي بيدي خاله اعرف اشرب لوحدي ..

-ياعيني يااحوينه هالعيون جن عيون المها مايشوفن والله ..

دنجت راسي اختفت ابتسامتي ..

-حجت من الولاده ماتشوفين ..

-لاخاله اني ضريره مو عميه ..

-هاا ..

ابتسمت اي ..

ثواني وحجت وحده بستغراب شنو يعني ضريره مو نفسها يعني عميه ماشوف ، جريت نفس بهدوء ، اجمع كلمات البعثروها اثر كلمه عميه ، مو تقليل من العميان لا والله ، بس جهل الناس بحالتك تقهرك  ..

يمكن هيه حجت من باب الطيبه وزله ماتقصد ، بس ابد ابد مو حلوه تذكر الشخص المقابل بمعاناته ، حتى لو كان متعايش وياها و راضي بحكم ربه ..

بس صعبه انته تكولها وذاك يكولها و هو بينه وبين نفسه يكولها تضل تنام وتكعد معاناتك وياه ، ياريت لو عالم تبطل تدخل و تبطل فضول و يعوفون الواحد بحاله هو و عاهته او حزنه بسلام ..

رديت  بهدوء بعد ما شي بداخلي انمرد .. ضرير يعني الي جان يشوف قبل بس فقد نظره اثر حادث .

اما الاعمى هو الي يولد مايشوف اصلا ، يسمو اعمى لان ماعنده اي فكره عن الاشياء ،

احنه ضريرين لان جنه نشوف قبل فنعرف شكل سياره شلونه ، نعرف الالوان ، شايفين السما شايفين شكل اهلنه ، شايفين الشوارع والاشجار ، حتى نكدر نحلم و نحلم بصور واشكال الناس مثلكم. .

اما الاعمى لا .. ماعنده اي صوره مايعرف حتى شنو الالوان ، لان ماشايفها ،  فقد احساس و تصوير الي الناس تصوره الها توصفله شكل ،

بس اسمع كلمه هاااا .. يمكن فهمن ويمكن لاا ، سكتت دنجت اشرب جاي ..

ابتسمت حجيت جاي لونه اسود  او جوزي و الاستكان يصير كزاز شفاف موو ..

حجن بحماس اي اي .. هزيت راسي اي اني مو عميه ..

كملنه اكل يمهن وكمنه للحديقه ، بس طلعت لفحني الهوى البارد الحلو ، نسمه مريحه ..

كعدت بالشمس من حروره عرفت شمس طالعه ، جسمي يضرب بي دفوو ..

رفعت راسي للسما مفتحه عيوني ، اشوف بس لون قااتم لون  نيلي لو احمر ، 

رمشت مره واثنين نفس الشي لون قااتم حيل هو وسواد نفس شي ..

ابتسمت ، قبل ماشوف شي عدم هسه اكو لمحه لون على الاقل حجيت تالااا ..

ردت هاا …

وين اتجاه شمس دليني ..

ليش ..

جن بديت اشوف ..

-ضحكت يااا ..

-ضحكت اي يمكن ..

-سكتت ..

-حجت تتمنين تشوفين موو ..

-ماكو واحد.ميتمنى يشوف الدنيا والخضار واشكال البشر ، لو عايشه بجنه و بدون نظر هم ماتراد ، على بالي اشوفج شلون صرتي و شلوت تغيري لو نانه لو ساري على بالي اشوف شكلي ولون عيوني تحجون بيهن ..

-حظنت جتفي حيل لو علي انطيج عيوني ..

-انتي عيوني تالا دليني على شمس ..

-لزمت ايدي وجهتاا كالت هااي بمستوى ايدج ..

-درت وجهي ورفعت عيوني ، تالا اشوف لون قاتم ..

-انتي مو عميه ميرال اكيد لازم تشوفين لون ..

-ادري ههه بس تأملت شوي شبيج كولي اي ثول ..

-ضحكت الله كريم كلها كم سنه و نسوي العمليه بالمانيا و ترجعين تشوفين ..

-حتى لو سويتها نظر مراح يرجع غير بس ٣٠% بالميه على منو نضحك ..

-مو احسن من ماكو ، على الاقل تعتمدين على نفسج ..

-مو بالله احسن من ماكوو ، ؟؟!

ضليت مكابله شمس ورافعه راسي اشوف الون ، عبالك شي عظيم ..

مليت من العدم ،والفراغ ..  اريد اشوف لون حتى لو كئيب ..

دخلت للبيت بعد مااجت نانه  ، اضايقت حيل احجي صراحه اختنكت ..

متعوده اعيش هيج بلا نشاط بلا فعاليات بلا طين ونحت ،  بلا دوام بلاصديقات ، بلا متنزهات بس اخجل احجي و اعبر عن تذمري ..

هدومنه قليله ناخذ من بنات خالته لساري و ماكالن لا ، لو تالا لبست من ساري تراك هو تخبل ..

لحد ماحاجيت ام ساري كوم نمشي لبيتنه حتى لو نكسر القفل و نجيب حاجاتنه ..

 مارضت كالت اني اشتريلجن ليش نكسر القفاله حرامات ، 

مليت من كعده عكس تالا الي عجبتها كعده بلا دراسه و اجبات ، كتلها عاجبني ارجع انحت واشتغل بطين ..

-ردت اخلي نانه تشتريلج طين ..

-المواد غاليه ماريد اكسر ظهرها بيهج سوالف ..

سكتت عافتني وراحت ، شوي و اجتني وبيدها علاكه تخرخش حجت جبتلج طين ..

-طين ؟؟! من وين ولج الفلوس ، 

-دتعاي شوفي ، لزمت ايدي و جرت العلاكه و خلت ايدي بنصها ولان طين صدك ..

مديت تلمس بي ضحكت من شفته طين حديقه ، لا نوب بي نسبه من الرمل ، يااا منين جبتي ..

-من الحديقه جوه مايفيدج ..

-تعرفين كلش زين مايفيد هذا ، شلون انحته و اشكل الجسم وهو بي رمل يتبحرث ..

-اووو دبري نفسج يمعوده احسن من ماكو .

-ضحكت جاهل كبالج تضحكين عليه ولج تكليلي تلهي هذا موجود ..

-عاد اذا ماتردي جيبي درجعه اصلا اخذته من جوه زرعه هسه تموت ، اصلا مالت الزرعه على صفحتها من اخذته  ..

-توه تجره جلبت بي امداج دجيبي داتلها بي ..

مديت ايدي اسوي شكل كعدت اعجن بي ، تالا جيبيلي خاشوكه على الاقل دانحت بيها بيش انحت ..

-انحتي بحظج ..

-شهل منيه الكشره مالتج ..

كامت جابتلي واجت ، شمرتها بحظني ، ساعات واني خالتهم بحظني و اسوي ، ولا فلحت بيهن ، اكمل شكل البطه ومن اصل لراسها يوكع بحظني ينكسر مايثبت ..

لحد مامليت وصحتها تعاي ولج ماريد بطلت كرهت حتى نحت بعد هالطينه هاي منين جابتها متكليلي كلها رمل ..

نترت مو كلت مال الحديقه اجت تمشي اتقدمت باتجاهي هاي شنوو تارسه الكاع ..

هم لازم انظف ، 

-وحده بوحده مثل ماجنت بيت ابو يقين اغسل مواعين ..

-اوو بيت فكر الله يلعنهم شغلونه خدامات ..

ضحكت …

كامت تكنس و تنظف واني كمت اروح اغسل اديه ، دخلت الحمام رطب بحيث صبغ مكفع ، خطيه باين حالتهم مو شي ، حتى بوري ماي واحد بارد وثاني حار ماكو خلاط ، بس نظيفين يشهد الله ، و طيبين حيل  ..

نانه تجي تعبانه خطيه ، تلهث من عدا صوت طكه ركبها من تكعد وتكوم و صيح يالله ..

جنت اسمع واحس واكل بروحي ، الي يقهر عدنا خير بس ماكدر اسحب فلس منهم ، محد يعترف بيه ، وحتى لو اعترفو بينه راح ينصبون علينه منو يخاف الله بهل وكت ..

خفت لا اضيع كلشي نوب وصدك نكعد على حديده ، وهم ناس متخاف الله بالجذب محد اجه وسال و كال يابه حلالجن هذاا وحقكم ...

لحد ما ابو عبد كاللها لمانه عندي صاحبي يشتغل بيت وكلي ماتجي انته ومرتك تشتغلون وياي بس اني رفضت بسبب الاولاد و دراستهم ، اذا تردين روحي اشتغلي بي ..

ردت ، اذا شغل زين ليش لا الله وايدك ابو عبد ..

صاح لساري يسولف الهم اني و تالا كاعدات بالباب نسمع ..

كالها حجالي ابو حمد  صديقي بايام الجيش عن شغله يشتغل حدقجي و يشتغل ينظف بستان و الاسطبل ، وكال ابو البيت يريد و حده تنظف و تطبخ ، واحد يساعدني بالبستان ، تعال انته ومرتك وخوش راتب و ينطوك الملحق اذا تريد لان محد ساكن بي ..

سكتت نانه حجت ليش ماتروح تشتغل بي يابو عبد.يفيدك ..

والله ماكدر مو تشوفين كوم عيال وكوم مسؤليه صعب اشيل واكعد بمكان ماعرفه همه مدارس يرادلهم خطوط ولازم انقلهم لمدرسه ثانيه ، تكسي مكفيتني والحمدلله ..

-نانه حجت هاا ساري يماا شتكول ..

حجه ، اذا مثل بيت الاستاذ اركان و ناس اوادم ليش لاا ، 

حجت دشوفه الي فدوه لعينك وين هالبيت و شكد ينطون و الله كريم ..

كامت هيه وساري ، و وابو عبد  كالها ام ساري اذا عبالج متعاجز من كعدتج هنا ، الله يشهد لاا ، انتي مثل اختي ، بس ردتج ترتاحين داشوفج متاذيه وماجاي ينطوج حقج لذلك كتلج بسالفه ..

-مشكور ابو عبد دومك خايف الله وماتقصر ..

دخلت للغرفه تسولف هيه و ساري ، كالت على الاقل شوي بيت اكبر مو غرفه و هم قريب عليجن كبال عيوني انتن  ، 

حجيت ام ساري ، خاله بالج من تشتغلين هناك احنه نجي وياج؟؟!

-ليش يما ناويات ماتجن وياي اذا صارت السالفه و اشتغلت هناك ..

-لا نانه مو هيج  بس لاتخلين بالج نضل وياج طول العمر ..

-الله كريم يما منا لبقيه العمر بس هسه انتن وياي واضلن وياي ..

-مرجعنه لعمي لهولندا نانه ، لازم نتواصل وياه ماريد نصير ثقل عليج ، على شنو نتعبج ويانه اكثر و احنه الحمدلله عدنا خير حق احنه ننطيج راتب حق تعبج ويانه ، مو انتي تصرفين علينه ، بس خلي افتح بيتنه احاول اتواصل ويه عمي عن طريق الايميل ..بعدني احجي وحجت تالا اني ماريد اروح لعمي ..

-شلون يعني ماتردين ، وين تولين لعد رجلج على رجلي اول وتالي احنه نراح نسافر و نستقر يمه الله يعلم جوز هسه جاي يدور علينه ..

نترت ، من كل عقاج تردين ترحين هناك ، مانعرف احد ومانعرف طينه عمي شنوو ،شفتي ابو يقين ومرته شسوو بينه ، لو ما نانه تخلصنه الله يعلم بحالنه

اذا ولينه يم عمج و طلع انكس من ابو يقين شسوين بذاك الوكت ، هااا نوب لاعدنا للغه لاعدنا كرايب هناك نامن بيهم ..

-تردين تضلين هناا بركبه نانه طول العمر ولج ..

-بركبه نانه ولا واحد ماعرفه،  هيه كالت ممتعاجزه منكم ، نسحب فلوسنه و ندفع الها راتب و ترجع تشتغل يمنه مثل قبل ..

-ردت نانه مو سالفه فلوس الله يشهد ، وانتي ميرال مستنكفه عيشتي يما .. صوتها انهضم ، وكملت ليش بيش قصرت وياج ..

-مو هيج ام ساري تدرين اني ماكدر استغني عنج ..

-شو صرت ام ساري ماكو نانه هاا يمه تغيرتي ..

-اذكري الله نانه شبيج تردين حجه دتبجين،  والله من اشوفج تجرين النفس كوه اموت قهر بليناج بينه و بمسؤليتنه ..

-لا بليتوني ولا شي ، هذا واجبي بيدي ربيتجن وكبرتجن صرتن مثل بناتي من تالي وكت تردني اتعب منج ومن مسؤليتجن ..

سكتت انحصرت بزاويه بعد ، لاكدرت احجي وتزعل بزايد ومنا تالا قافله ، احسها تمردت عليه ..

منا دراسه تركتها ومنا مجاي تسمع كلامي و تفرض رايها ، شعدنا هنا بعد مرجعنه لاهلنا و عمامنه الي سكنو الخارج من اسنين اول و تالي لازم نعيش يمهم او همه يسحبونه ..

اخذت سالفه ايام ابو عبد سال و مشه للبيت يشوف ، رجع سولف ، يكللها البيت صاير بمنطقه ال**** على نهر دجله هو فله مو بيت ، 

ام ساري ردت كبل يردو تنظيف ..

ضحك وياج مره هم وسن ، مرته لابو عبد ، تشتغل صارلها اربع سنوات عدهم يعني اكو مساعده مو لوحدج تلزمي هم بعد يقسمون شغل بينجن اني ماعرف ..

والملحق غرفه و صاله ، هيه صاله ومطبخ ، وخدمات ، وبي حديقه صغيره ، وراتب خير من الله اذا ساري يشتغل عدهم يعتبر هم موظف و ينطو راتب ..

-ردت شنو شغله ..

حدقجي ويه صديقي  ابو حمد ..امن عليكم والله واريح وبيت االكم بلا اجار ..

-كالت نتوكل على الله لعد ..

-رديت اني ام ساري غراضنه ..

-يغراض ..

-الي ضلن بيت ابو يقين هوياتنه مستمسكاتنه حتى جوازاتنه هم هناك  ..

-مو شفتي شلون نكرو عدهم وجدام شرطه يايمه ..

-انضل بلا اوراق يعني ، شمدريني مايسوون ببهن شي ورانه ماستغلوهن بالتزوير  ..

سكتت ام ساري رد ابو عبد طبعا هم خلو المستمسكات عدهم حتى متتحركن ولاتسون اي شي قانونيا و تتصرفن باملاكجن ..

حجيت : -هو تفكيرهم تفكير يهود الحقراء ، زين غراضنه الي بيتنه ملابسنه اجهزتنه الايباد نانه فدوه وافقي ..

ردت ، خما نكسر قفاله البيت يمه والله حرامات ..

رد ابو عبد اذا على قفلاله نكسرهم و اني اشدلهن جديد يابه ، البنات هم يردن لبسهن حاجاتهن ..

كالت لعد على باجر اذا الله سهل ..

بعدها راح ابو عبد و ساري ونانه و تالا يجيب غراضنه من البيت ، كتلهن شنو احتاج وراحو ..

ضليت بحدي ، تاخرو بالاربع ساعات ، لحد مارجعو محملين جنط بس اسمع صوت جروخ الجنط تجر و أطب بالارض ..

-حجت تالا جبت ممتلكاتنه كلها هههه ..

مليت من بجايم ساري الخايس ..

صاح .. ياخايسه يااوصخه ..

انج،،،،، رادت تكمل و سكتت ، اني ابتسمت ها راد يبدي ربد و العرك انشالله ..

فضوها على خير وسلامات واثنينهم سكتو ..

جنطنه على سفطتهن مافتحوهن كالو باجر نروح ، ثاني يوم الصبح كعدنه من السبعه تالا و نانه نظفوا الغرفه و وعدلنها اني كعدت على صفحه اسمع صوت الكنس و حجبهن ..

كالت نسلمها الهم نظيفه مثل مانطوها النه نظيفه جزاء الاحسان بالاحسان ..

طلعنه من يمهم بحظنه و سلام حار و دعوات من كلوب طيبه ..

كلوب برغم فقر حالها بس غنيه النفس والطيبه ، ماعدهم مشاكل ماعدهم خبث ماعدهم منيه ..

عكس بيت ابو يقين حسبي للله عليهم كسرونه والله ، وهم من لحمنه والله مفضل عليهم مو فقره فلوس ..

بس جانو فقره اخلاق و صله رحم و رحمه ،

اخذنه ابو عبد بنفسه حتى يامن ، مشت بينه سياره ساعه و ربع ، اسمع ساعتي كل ساعه يطلع صوت متكلم الصوتي يكول الوقت ، ومنتبه عليها ..

وتالا بصفي كاعده بصف شباك تسوالف الي وتوصفلي ، حجت اللللله ، همست شنو مبتسمه ..

 بقره ولج  ، لونها بيضه وبيها بس بقعتين سود براسها وحده على عينها وثانيه على حلكها ، 

-صدك حلوه ..

-تجنن جنها حامل خطيه اي والله حامل حتى صدرها شكبره ..

-ضحكت نانه .. حجت ولج تااالاا ..

ردت تالا ، دنسولف نانه انطي مجال ، باعي دتاكل بالعشب و يمها رجلها ..

-عقدت حواجبي منو هذا ؟؟!

-اقصد ثور موو رجلها يسمو ثور لونه اسود و يخوف جنه ساري ..

-ساري بالصدر و صفك اديه شلون انزل افرك حلكها لهاي الحيوانه ..

-ههههه يشبهك صدك .

بنص سياره و اندار نطاها ضربه و هيه تكامشت وياه وكبت عيطه ، اني دفنت وجهي بنانه خاف تجيني ضربه على عيوني .. واسامه جلب بشعر تالا عبالك يريد فرصه يهمشها ..

و ابو عبد يصيح راح اسوي حادث يمعودين كولو يالله خرب ولك سااري عمي عيب جوز من بنت وهاي تصيح شعرررري يالثوور شعري كطعته ..

-هو يرد العووبه ثوله ..

فكوتهم نانه كوه ، اندارت على اسامه وحجت انته يالنذل يمك بكرباك اني كل عركه تدخلت ويه اخوك عليه نطته دفعه شمرته بحظن نانه هو يغلط كلبه اخووي هذا كلبه ..

جلبت بيها اني احجي بعد شنو تشوفين وجوزي من الولد ..

-بطلت مااحجي ..

-بروح اهلي احجي ..

دارت وجها عني تاافف ، اكو اشجار رد ساري بساتين يا الحوله بساتين اوصفي عدل ..

-اني احجيلج ميرال يابه ولامنيه اختج الحوله ..

ردت تالا ، ضوجه ، يالحول ..

حجه بساتين على دجله هذني سامعه بيهن ، رديت اي ، 

حجه اي بساتين من نخل و رارنج و برتقال ولالنكي و ، اهلها مسيجيها حتى لحد يتعده عليها ، ولاتدخل الها حشاج الهوايش مثل اختج و تاكل المحاصيل ..

ضحكت اني و نترت تالا بيه ، وجع من حجيت اني مارضيتي  ، بس من ذمني ضحكتي صدك نذله انتي ..

رد ساري بالله انزل امرعدج احترمي ، انتي لاتحترمين اخت ولا واحد اكبر منج ، شكد دماغ سزز هو بس كمل و هاي دارت وجها و اسمعها تهمس و تفشر ..

سكتت مغثوثه اني ، تالا فلتت من ايدي حيل صعب اسيطر عليها واني بهل حاله من زمان محد يكدرلها بس امي تضربها و تادبها صح الضرب مو وسيله بس هيه متخاف ..

بس من امي لان تعرف راح تستعمل وياها ضرب و العقاب ، والا اني لو نانه لو بابا ابد ..

تتهنتر علينه ..

انغثيت حيل بوقتها واني ترزلني اختي صغيره كبال الكل ، مو طبيعي ارادد لو اغلط اشوفها جبيره ..

رد ساري ميرالوو ويانه مو ..

همست اي ..

دخلنه شارع الفله ترى ، يبعد عن شارع العام تقريبا ربع ساعه مشي و خمس دقايق سياره ..

ابتسمت اي ..

ضحك وكل شوي عابره حشاج نعجه تكطع طريقنه ، اعتقد الفله بيها حظيره مال حيوانات ..

-لان اسمع صوت صهيل من حصن ..

-بربك ساري تحجي صدك ..

-ضحك والله ، الله يحبج اذا بيها حيوانات تتونسين عليهن ..

ردت ام ساري حدنه للحديقه مخصصه للملحق يما مانريد مشاكل جاين ناكل رزق مو ندخل بيوتهم وحدايقهم ..

-خليج اجابيه يماا بلا نكد يرحم اهلج جنج ذيج المره ..

ردت تالا بصياح ، شفتوو شفتو ديتحرش بيه هوو ..

السياره بدت تخف سرعتها عرفت وصلنه واصوات فكت الباب الخارجيه و رجال يحجي هلا بابو عبد هلاااا نورت ، و صوت سحب لجروخ الباب ، وفتح سركي باصوات عاليه ..

وكفت سياره و نزل ابو عبد يسلم ويه رجال ابو حمد ورجال دنج راسه يسلم على ام ساري عباله ام عبد ..

رد ابو عبد يضحك يكله لاا بمثابه اختي تصير ، اخت المره ، و هيه راح تشتغل هنا بمكاني ..

رد ابو حمد لاااا كول غيرها يمعود ..

-اي والله ليش يابه مايصير ..

مو هيج والله ياخويه بس مسؤليه و استاذ عواد وام زياد راد من جهتي وعلى مسؤليتي ..

-وهيه هم هيج ابو حمد دبرها يرحم اهلك ، تعرفني اني شنو وام ساري امانتي يعني لا تخاف مره امبينه وعدها خبره هم ..

-الله كريم يله تفضلو تفضلو دشوفكم الملحق ..

نزلو ونانه ساعدتني انزل ، جلبت بيدها ، تحجي ديربالج نكره ، هاي حجاره يما لاتعثرين ..

مشينه اكثر من ١٠٠ خطوه  عن الباب الخارجيه ، لحد مابطلت حساب ، بسبب صوت العصافير شتتني ، لو صوت ماي قوي همست صوت نافوره نانه ..

- اي نافوره يمه بنص الحديقه ..

-صوت احصنه و بط موو لو وز هذا الاصوات قويه بس بعيده ..

ردت نانه عليه ، ضحكت كلبج يلعب عبن سمعتي صون حيوانات ..

-ابتسمت عليج الله شعدهم هنا ..

-ضحكت يكرم الله عدهم حتى دجاج و بط هههه ..

-بوكيلي وحده نانه دالعب عليها ..

-ياا ولج تونه اجينه ..

مشيت وياها فاكه عيوني متفاجئه بهل الجنه الله ذبني بيها ، ومتحمسه ، اذاني مفتوحه مثل رادارات ..

لحد ماوصلنه للملحق ، دخلنه بي ..

ابوحمد حجه و يردد ابو عبد انته صاحبي واخوي و المره ام ساري مو اختي حظرتج .

-ردا اي عيوني اي ..

-انتي هم اختي مدامج من طرف ابو عبد يعني مابينه زعل اختي ، و الحجايه الي اكولها تاخذيها بنصيحه مو من باب الرزاله ..

-لاخويه على بختك سدك امن احجي الي يعجبك ..

-خوش حجي ، لعد هنه كم شغله احفظيهم وحفظي اولادج هالتعليمات ، حدج للحديقه مال ملحق ام ساري ، ممنوع توصلين للحديقه الجبيره لان ابو بيت رجال صاحب شغل و يجون عده جماعته مايقبل احد يطلع ويفتر بكيفه ..

و شغله الثانيه شغلج انتي مطبخ ، تركيت غده و عشه يبلش طبخ الغده ب١١ كون ب١ الاكل جاهز و مطفى جواه ..

و العشه ب٧ مكمل ومطفى جوه ، اما عدد الاشخاص ياكلون حسب الخطار والاشخاص الي يجون ..

تسالين مرتي وسن و تكلج شكد تطبخين و شنو تطبخين و مسواك احتياجات ماراح تحتاجين لان اني وسن كل اسبوع نسوي قائمه و نسوك ..

هاهيه ام سااري و صلت لو بعد اعيد .

ردت باصرار ، هاهيه خويه توكل ترى مشتغله بيوت قبل واعرف ..

- ام ساري خوويه كون امينه و صم وبكم  ..

-توكل بالله خويه و عد حسن ضنك انشالله ..

-بارك الله بيج اودعناكم يابه .

ابو عبد كال اني هم اتوكل تحتاجين شي خويه بعد…

ردت ام ساري عليه ، مشكور وماقصرت .سلم وطلع ، قبل لايطلع ويه ابو حمد كال رقمي عدكم شتحتاجون بس دكو علي ..

ودعنه وطلع هالرجال الكريم ابو صوت البشوش الحنين ، 

اني و ساري كعدنه على صفحه و نانه خطيه كعدت تفرغ بالغراض ، البيت من عطره مبين نظيف مغسول حتى ارضيته كاشي بارده نظيفه ..

جان بوقتها شهر ال٢ ، حجيت ساري .

رد :-كولي جاي تحوصين اعرفج ..

-كوم دليني على البيت وحفظني خطواته عليك الله ..

مد ايده وجرني دكومي ، و كفني باب الببيت حجه هاي باب الدخول لزمتها حديد ، همست اي ..

اول خطوه تصيرين بنص الصاله ، بيها شباك على ايدج اليمنه جرني للشباك ، حجه هو يكمل وصف ، اكو تخم من قنفات اثلاثه مصفوفه بصف الحايط 

، مشيت احسب خطوات ست خطوات و صلت الشباك طخيت بالقنفات ، كال هنه ثلاث قنفات اثين بصف بعضهن وثالثه يم شباك يعني من تكعدين عليها يصير شباك بظهرج  ..

و تلفزيون معلك بالحايط ومقابل القنفتين ، اكو طبله جواه ، .. 

هزيت راسي ، تلزمين هذا حايط و طلعين من الصاله مقابيلج مطبخ صغير ، هذا ممنوع توصلي لان خنكه ، يمكن عرضه مترتين ب٣ ..

تعاي على ايدج اليسره من صاله تكرمين التواليت ، والحمام ، و بعد الحمام اكو غرفه ، جرني الها ..

دخلت لزمت الباب ، بابها خشب، رد الغرفه صغيره بس تكفيج انتي وامي و الهايشه ..

ضحكت ..

-وانته وين تروح ..

-بالصاله المهم بعيد عن اختج ..

تالا مالها صوت ، حجيت وينها شو ماكوو ماردت عليك ..

دفتح بالجنط و ملتهبه ، طلعني للحديقه و كفت بالباب حديقه كال صاله ، حجه الجهتين حديقه على ايدج ايمنه و اليسره ..

حديقه بثيل ، و محددين حديقه النه ببلوكات وعليهن سنادين زرع ، 

ماسحتها شكد ..

عرضها على عرض البيت بس بعدها عن حايط دقيقه داحسب عافني ..

واسمعه يحسب واحد  اثنين ثلاث ،   حجه ثلاث خطوات كبار برجليه احسبيهن برجليج ..

ضحكت تسعه خطوات يعني .. 

بالضبط ، راح اجيلج بلوكات تكعدين عليهن اذا تردين ..

تمام ..

ضليت طول اليوم مثل الهبله افتر واحسب خطوات البيت مابي اثاث هواي ، جان اثاثه بسيط تركي ..

وهذا احسن هيج حتى لا اتعثر بي ، نانه خطيه وخرت الغراض الي على صفحه حتى مشيتي تصير باريحيه من اريد اروح للحمام بس الزم حايط واوصل ..

تالي ثاني يوم بلشت نانه شغل ، ساري طلع الصبح للدوام وصله ابو حمد بسياره للشارع عام وساري كمل لوحده ..

نانه مشت تشتغل ، اني كعدت بالحديقه كلبي يفرفح على صوت البط اريد بس الكف وحده داخذها ، والله بس حبيت الزمها مو قصد امد ايدي ..

رجعت للبيت تالاا ..

هاا ..

اكو هنا حيوان قريب جيبي الي ..

شكال ابو حمد مو كال ممنوع ..

درت وجهي اتلعثم  ، رديت لاا ولج يعني قريب من يجي لحديقتنه دخلي يمنه نشوفه ..

قصدج اخطفه ..

سكتت ..

حجت هااا قصدج اخمطه ..

همست بزعل لاا ، بس نشوفه هاهيه ماريده ..

رجعت لمكاني اسمع صوت البط يعيط و دجاج ، دمعت عيوني والله انقهرت ماهانت علي روحي ، 

اجت تالا وكفت بصفي هيييي اكول ..

دايره وجهي ليكدام ونترت تادبي شنو هييي ..

تردين دجاجه لو لاا؟؟ ..

سكتت ..

اكو وحده كبالنه دتفتر لونها ذهبي تلج من نظافه ، بس الزمها واجيبها شكلتي ..

من الاخر شنو مطلوب شنو المقابل ..

ماتحجين ويه ساري اسبوع ..

خاب اخلي ساري يجيبها الي ولا منيتج وقله احترامج ..

طبج مرض لعد عافتني ومشت .

لا اراديا بجيت ياحقيره ، 

اجت نانه شافتني كاعده كالت يله يمه الشمس مو زين عليج كومي ، دخلت ليجوه ..

رجع ساري حجيت اله ، كال عوفيهن هنه يجن للخديقه والزميهن ..

عيب من عالم اذا شافونه ، سكتت ، اخذت اسامه على صفحه كتله جيب الي وحده منهن وانطيك فلوس رد عليه لا اخاف ..

بهت وجهي ، دولي مابيكم فايده انتوو ..

نانه تكول شغل حلو وخفيف مابي تعب ، ثاني هم طلعت و كلبي يحووص ، والله يجن ليمنه البطات ودجاجات اسمعهم بنكرن بالحصو كعدت وكابلتهن بس مشكله ماكدر الزمهن ماعرف وين هنه بالضبط لان مطشرات ..

ضليت هيج راسي يفتر بفوضى و بحماس اريد بس كون الكف وحده ..

مشيت بحديقتنه روحه جيه ماكو ولا وحده معناها هنه مداخلات حديقتنه اصلا ، والا جان حسن علي ونهزمن ، 

ساري اجه من دوام وشافني افتر حجه كبالج بالضبط تسمعيهن ..

-ضحكت اي جيبلي وحده ..

-ضحك امي تنتفنه ترى عوفيهن خطيه ..

سكت ، دخل هو وااني ضليت ..

ضليت هيج فتره و نستي هنه ، ونستي الوحيده ، اصواتهن عركهن بره و صياحن ، لو صوت الخيل اسامه جوه رجليه يلعب مايعوفني يخاف لا اتيه ..

كلش حلو شعور من انته كاعد بمكان دافي شمس مدفيتك و ريحه الزرع والاوكسجين محاوطك ..

صوت الحيوانات جنها انغام موسيقيه ، عاجبني الزم وحده واحظنها من الدجاجات ..

لو بطه لا خاف تعضني اني راضيه بدجاجه ميخالف ..

فد يوم ساري بدوام و تالا جوه داكلب بالموبايل و اني بره انتظر نانه تجي ، تجرات و خطيت بره الحديقه خطوتين مو اكثر ..

سمعت صوتهن للدجاجات ينكرن بالصبه ، ابتسمت تقدمت بهدوء عليهن وكعدت مكنبصه اريدهن يامنن ..

هنه يفترن يمي واطخ وحده بظهري والابتسامه الشريره تشك الوجهي هالكبر ..

شوي وافترت وطخت برجلي و الزمها خطف هيه خترعت وتعيت بققق بيييييق ..

اني روح مابعدج روح خفت من رجلها الديج شمرت عصاتي ، و اشيلها واركض للبيت بعدني توه ركضت وعثر واوكع اني وياها على وجهي ..

و هيه تعيط بق بييييق ببببقققق انمردت جواي …

وترافس وكعت من ايدي و ضليت اهبد عليها لزمتها فجأءه ، وضغطت على راسها حتى لا تعيط ، كمت و شلتها لصدري و دخلت الهث واضحك صحت تااالااا ..

صااحت هاا ..

شلت وركضت بتعثر باتجاه الغرفه ، واضحك مثل الهبله بكتهااا بكتهاااا للدجاجه خليتها جدامي اشوفها الهاا بكتهاااا ولج ..

سكتت هيه ..

ههههه شلوني سويتها من دونج لوحدي ..

همست هااا شنو هذا البيدج ..

دجاجه غير ؟؟!

ولج هاي فختايه مدري ديك رومي ..

هااا ؟!! هديت راسها داسمع صوتها و تعيط بوجهي خرعتني شمرتها على تالا وعاطت  ...

#يتبع ...

صفحه الفيس ( كتابات اسماء ديمير)

الانستا .. asmas_demer

يتم نشر ستوريات او فديوات تابعه للقصه ..

اما نشر هو بين يوم ويوم والبارت طوله اربعه الاف كلمه فعذرونه ..