رواية قاع الشياطين الفصل السادس والخمسون 56 - بقلم اسماء ديمير

.....................☆البارت الخمسون ☆...............

#قاع_الشياطين(البصر والبصيره)

#بقلم_أسماء_ديمير

جرتني من ايدي وحجت وزني نفسج هسه و اعرفي غلاتج غير هالشي ماراح يكدر يثبت حبه بس بهل طريقه .. 

عافتني و مشت صاح وراها شتردين منها مو شفتي حياتج خلي تشوف حياتها هي هم .

اندارت عليه ، شفتي هاي وحده من سلبياته ، شوفي فرق بيني و بينه هو ، اولا ميحترم ثانيا ماعنده شي اسمه عيب و اصول و لازم البنت يكونون اهلها راضين اضافه الى انو ماتحترم الكاعدين ولا احترمج .. محسسنه مسوي فضل علينه وداخل يطلبج مثل الناس ..

غلطان اخي ممسوي فضل ، بتنه مو لحم رخيص ولا علمنها و ربيناها بلاش حتى تنشمر الك بلاش عجبك اهلا و سهلا انته والي وياك ماعجبك الله ومحمد و علي و يسووووع وياك …

لهنا وانتهه النقاش ..

عافتنه و صعدت بعصبيه ضايجه انداريت عليه وجهه احمر دم يرجف واكف فاك عيونه ... نتر بيه احجي ..

فزيت همست مادري مادري ..  امه كامت لحيلها وياها الزلم الجايين بيبرس كعد يضحك بهدوء مدنج ..

عدي خال جف ايده على خده صافن عليها ..

عفتهم ولحكتها خايفه من نظرات دانيال ، ضلو هم وراي طلع صوتهم ناس تعاتب وناس زعلانه ..

لكيته واكفه فوك بالطابق الثاني ساكنه لازم جفوف اديها تتنفس بقوه ، وكفت كبالها حجيت وهسه ..

ردت الكره بملعبه بعد ، سوه الي طلبناه خير ما سووه  اتركي تالا تنازلنه هواي احنه اله ..

تنازلت اني وكفت مقابل هيج انسان لئيم وكعت اتفاوض وياه بهدوء ، لاجلج حتى ما اخسرج واضلين تحت جناحي و كبالي مافقد اختي الوحيده  ،

الا ترى هو لا من مستواج ولا من مقامج لا من دينج ، كل هذا كوم و شربه و عربدته وقله ادبه كوم شكد راح يتعبج وياه ..

تغاضيت هواي اني هوواي فوتت شغلات لخاطر عيونج ، لهنا وبس يجي دوره هو يتنازل و يتغاضي ويضحي  ..

كلشي ولا الحرام تالا ، زواجج منه حرام الا اذا نطق الشهاده ..

-خاف يعوفني اهله مراح يقبلون ..

-تحبي ؟؟!

-يحبني هو هواي ..

-زين تردين تعيشين وياه طول العمر ..

-اكيد ..

معناها تصرين على هالشرط ، انو يأسلم تعرفين يوم القيامه المسلمه والمسلم يكونون بالجنه سوه اذا الله كتبها الهم ..

تردين تدخلين الجنه لوحدج  لو هو وياج ، 

-سكتت دنجت راسي ، ماعندي جواب و هي حجيها وكلامها يفوق عقلي باضعاف ..

جرت نفس حجت الدنيا كصيره تالاا لاتفكرين بس بالدنيا ياعمري ، ورانه حساب و كتاب ، والله حرم هالشي تعترضين لو تعاندين رب العباد ..

هو احنه نتحدى البشر ماكدرنه عليه ، فكيف اذا تحدينا رب البشر شعبالج تتوفقين لو تنسعدين بحياتج .. 

-واذا ماوافق ..

-ولا يووافق طبه مرض ، يجيج تاج راسه انتي اميره وتستحقين امير هذا شنو ..

درت وجهي مغثوثه ، عافتني و مشت ماحجت بعد احسها بزعت واني هم بزعت ، دخلت لغرفتي اشمر الي لابسته ، البقعه الي جوه صرتي تحكني حيل تاذيني ..

جبت بطل ماي بارد اغسلها ماعرف شنو هاي ياربي جاي يوجعني نوب ..

موبايلي يدك رفعته دانيال ترددت اجاوب بالاول بس كلت ارد جوز حن او وافق فتحت الخط عاط باذني شفتي اختج الكح** شسوووت هاااا شفتي شلون تتشرط علي فوكاها العميه ..

-صحت كااافي ماقبل .

-اسمعي لج باااجر تجين نعقد وخلللص انتو مو وجه احترام ، واحد يدخل بيتكم ويطلب منكم مثل العالم ..

سديت جهاز كبل بوجهه بدون مارد عليه . شكد حيووان شبي تخبل هذا وصار السانه فالتون وياي .. 

دخلت غسلت وبدلت بجامه ، و مشيت فتحت الابتوب التهي شوي ..

اجت عيوني على كروبات القديمه جنت طول اليوم اكظي وكتي عليها ، يبوو شكد جنت تافهه ياربي ، اجت بالي صديقاتي و فاء و رنا ..

الي ابتعدو عني و ماعرف ليش ، طلعت من الكروبات و مشيت افتح الصور ، لاحت صوره اسامه شايل كتاكيت جابهم بشار لميرال بذيج الايام ..

ميرال كاعده وبحظنها كارتونه و يمها اسامه شايل كتكوت يضحك و سنونه امبينه ..

تبتسمت بحزن مقهوره ، وين وصلنااا وين دنياا اخذتنه ، بيا محطه راح نووكف و ين ترسي سفنه منعرف .

من بنات صايغ مدللات لملحق الى وحده تزوجت و ثانيه ناويه الزواج بمسيحي ..

نانه ضيعها الوكت هي و حبيبي كلبي الصادق ..

حبي الصادق الي كلبي ينبض باسمه مو حاسس ، 

اعرف بي هو مو بخير وشغل الفيتر تعبه هو هالسنه وزاري بس نويت خلص ساري صفحه ونطوت .. خاف قبل جنت قريبه منه بفضل امنيه هسه حتى امنيه ماتت بعيونه وبكلبه ..

انسي  وعيشي حياتج ويه هذا ، هو يحبني متاكده بس عنده مساوئ هواي ؛ منو ماعنده مساوئ كلنه بينه اخطاء ضلت عليه ليش هو اني ملاك مثلا ، سوالفي ماتسولف ابد تفشل..

سديت الابتوب مغثوثه دمعه بطرف عيوني ، جهازي يضووي و مستمر يضووي ويضووي ، فتحته دانيال يدز بهل رسائل مارديت كلت خلي يفكر ويوزن كلامه ويله  ..

ثاني يوم اجه للفله لوحده صعدت الي وسن حجت دانيال يريدج ..

طلعت اشوفه ، ميرال واكفه قريب الدرج ، كانو عدها علم بجيته قبلي ، همست قرارج بيدج ، اي شي تتخذي انتي تتحملي مو اني الي عليج وجهتج و بريت ذمتي ..

سكتت شوي تعبانه ماكدر ارد ، دارت ظهرها ونزلت قبلي كعدت بصاله ضايجه ..

طلعت لكيته واكف بنص الحديقه ، و مخصر منطيني ظهره ، درت وجهي اجر النفس ابو حمد واكف على صفحه يرش بالزرع وعيونه علينه ، بنته صغيره بصفه واكفه تشلع بالورد..

اتجهت عليه ارجع بشعري ليوره ، كحيت بهدوء اندار عليه بسرعه ..

جان عاقد حواجبه ضايج من شافني ابتسم ورخت ملامحه ..

همس ضل بالي ليش متردين عليه ..

دمعت درت وجهي عنه ، همس يكلبي اسف جنت منهار اختج عرفت شلون تشتغل صح وتخرب الخطوبه ..

انداريت عليه اختي تريد مصلحتي ..

اشر على نفسه بستغراب ، لعد واني ؟؟

انته تحبني ، 

سكت شوي وحجه ، تعرفين عدنا الي يزوج مسلمه شنو عقابه ، سكتت مدمعه ..

عقابه الموت او ينبذو طول العمر من دينه و اهله و ناسه ، مع هذا اجيتج اني وجبت اهلي وبعد ما ضغطت عليهم وقنعتهم ودكيت الباب الي اختاريتي بنفسج ماكتلج لااا ..

ليش ؟! لان بساطه حبيتج ،  تستاهل عيونج اسعالها لالف سنه ، بس اتجازه بالشين ، هاي ما ارضها ، اول مره تتكنسل الخطوبه بدون سبب واتفشل اني واهلي  ، والثانيه توكف اختج تتشرط اغير ديني والله ماننطي لمسيح بيااا حق هذا ..

-حق الله دانيال حق الله يكول هيج ..

-ضحك وقاطعني مستهزء ، عليج الله مقتنعه تالاااا هذا موكلامج حبيبي انته منفتحه اكثر شلج بعقليه اختج الرجعيه المعقده ..

-بس الاسلام يكول .. قاطعني لزم ايدي حبيبي اسمعي ..

جرني كعدني على طرف النافوره وكف مقابلي يكمل كلامه هو مستمر لازم جف ايدي ، اسلام شنوو؟؟

شنو اختلف عنكم اني ، هم امن بالله سبحانه وتعالى ، امن بالانبياء ، بس صلاه مااصلي ..

هو الاسلام شنو مو صلاه وصوم صح ..

-هزيت راسي .. وزكاه ... و قاطعني مره ثاني ..

-عفييييه زين هذني كلهن يسووين المسلم .. ابسط مثال بيبر مسلم شفتي فد يوم لازم مصلايه لو صايم لو ديسبح هاا احجي ضميرج ..

صفنت شووي وشرد ذهني عنه ، همس بهدوء احجي ضميرج مو رجلها مسلم مسوي الي يسوو المسلمين هوو ..

-رديت بخجل لااا ..

-لعد خلص شتريد مني لاحكتني تريدني أادي هذول كلهم وهي رجلها المسلم الي هنه واجبه ممأديهن ..

-جريت نفس فشلانه ..صير مسلم بس ..

-وشلون اصير مسلم ..

كول لا الله الا الله وان محمد رسول الله ، انطق الشهاده ..

-اذا كلتهن تززوجيني يعني ..

-انته تحبني ؟؟

-الا اموت عليج ورب محمد وعيسى سووه ..

-نزلت دموعي وضحكت بنفس الوقت ، جرني وكفني مقابيله حجه :- حالتي الماديه زينه وبيتنه ملك ومعيش امي واختي تردين تصيرين نفر ثالث وياهم بركبتي اعيشج اميره بالي اكدر عليه ماتكدرين براحتج بعد الي عليه سويته سعيت برجليه واديه حتى اوصلج ..

-كولها .. 

- الشهاده ؟؟!

هزيت راسي بخوف :- اي ..

ا-بتسم رفع اصبعه اشهد ان لا الله الا الله ان محمد عبده ورسوله .. ضحكت اني وبعدها انفجرت ابجي  ، 

-حظنته حيل ابجي فرحاانه سويتها علمودي مووو لان تحبني وعندي اهميه بكلبك .

-همس اي ورب المسيح .

-دانيال صرت مسلم تووه ،،

-اي عمي ورب محمد .. 

حظنته حيل درت وجهي خليته على جتفه ابو حمد هز راسه مستنكر دار وجه يدردم مو عاجبه المنظر ، فززني صوت ميرال .. تالااا..

ابتعدت عنه ، لزم جف ايدي هو ، اندار عليها بضوجه ..

هي وكفت بوجه جرت نفس :- شقررت حظرتك ..

-نزوج باجر اني وياها بعرس بسيط ..

-بيا جامع او امام تعلن اسلامك ..

-تشتغلين داعيه حظرتج ليش ماتخلين رجلج يهتدى و ينصلح وبعدين حيري بالعالم ..

-ماكو زواج بلا مااشوف ورقه دخولك للاسلام دانيال ..

شكد جنت اشوفج انسانه طيبه و بسيطه بس تبين الي العكس فعلا من عاشر قوم اصبح مثلهم كمتي تعرفين الحيله  والمكيده تعلمتي موو ..

رخت ملامحها ، وجها بهت ثواني سكتت رمشت بهدوء حجت الساكت عن الحق شيطان اخرس دانيال ، النبي محمد صلى الله عليه وسلم ، يكول ..

من رأى منكم منكراً فليغيره بيده، فإن لم يستطع فبلسانه، فإن لم يستطع فبقلبه، وذلك أضعف الإيمان ..

شفت شي غلط حاولت جاهده اغيره ، سواء انته او رجلي ، المهم ابرء نفسي امام الرب الي انته واني انامن بي ..

لا تعتقد اذا اعتنقت الاسلام هالشي يقلل منك او ينتقص منك غلطان ، دينا يوجب المراءه اطيع زوجها بما يرضي الله ، يوجب المره برضاء زوجها واسعاده..

كذلك انته هم عليك واجباتك ، دينا دين اصلاح وهدايه و سلام .

اذا اعتنقت السلام ياهنيالك لان جنت بدين وصرت بدين ، عكسنه احنه ما عرفنا غير دين واحد ..

حق تكون فرحان راح تعرف دينين بدل الدين الواحد ..

سكت هو صافن بوجها ، درت وجهي اراقب رده فعله ، رد نزوج بالاعظميه باجر العصر …

سالته ..ورقه اسلامك ، 

صبح اروح للامام اعلن اسلامي هاهيه ..

ابتسمت براحه وردت برود ، الزواج بعد اسبوع ، بنت عدها تحظيرات بدله و مكياج وغيرها ومن عدا المعازيم الي لازم يحظرون ..

غمض عيونه بقله صبر ضغط على جف ايدي حيل واندار عليه بزعان ..

رفعت جتفي شسوووي ..

هد ايدي ورد يصير خير ..

عافني و مشه بعصبيه و يهف ، ميرال ردت براحه .. شكرا يااارب ..

رفعت حواجبي ، اندارت عليه حجت دكي على خوالي كولي الهم موعد الزواج ..

راح يجون ..

اكيد وام ساري هم ..

بهت وجههي ، دنجت راسي حجت شنو صوت الماي .. رديت بتعب ابو حمد ديرش الزرعات قريب الملحق .  

عافتني و مشت باتجاه ابو حمد ، رجعت اني اجر بنفسي وبالي ساري شنو راح يكون رده فعله اذا عرف حتزوج  ، مامعقوله يزعل موو اصلا عادي عنده هوو..

مرت يومين مو اكثر ، دانيال دك حظري امورج  هاليومين ونعقد محكمه ..

رديت و ال…. سكتت بعدين حجيت ميرال كملت السالفه ذيج ..

حظري امورج هسه و سالفه ميرال مكظيه ..

همست تمام .. طلعت اخبر ميرال مالكيتها بالغرفه .  سالت عامله كالت بره بالحديقه ..

ميرال ..  

بعض الناس تشوفك طيب و بعضهم سيئ ، مو لان عاشو وياك تجارب و عرفوك على حقيقتك لاا .. احيانا يكون بسبب الكلام الي يطلع عليك ..

مثل وسن الي كرهتني بلا سبب بعدين عرفت البسبب هو كلام ام زياد ، الي مستمره تنبش وراي و تشهر بيه ، 

لو ايلاف الي،تنظرلي بعين صغيره ، لان عبالها جايه من الشارع لو جايه من بيئه شعبيه ولفيت يمهم بلا اهل وتزوجت بيبر الي،هو اعلى مني مقام ..

سمعت صوت ركض وسن طلعت من المطبخ و صوت بتها تبجبير تصيح يوووم حمد وكع مديتحرك الحكي .  وتركض وراها تحجيلها وكفت على حيلي مفزوعه اسم الله الرحمن دخيلك ياللهي اشافي لهل الطفل المسكين ..

طلعت للحديقه حاولت الحكهم بس ماكدرت وكفت اسمع بس صوت ابو حمد يصيح حظررري حظرري بين مااشغل سياره استعجلي يااامره ..

وكفت قريب الكراج صحت عليه عموو خير بيكم شي ..

لا عمي حمد وكع حمد وكع بس،ضل يردد بهل جمله وكع غشياان ادعيله عموو ادعيله ..

بهت وجهي دمعت ،  ياا عيني ، الله يساعدكم و يعينكم ، 

اسمع ركض بناته وسن تصيح شيله ويانه لا يووكع شيله .. بجيت من يمي من الهبطه ، خطيه والله انمرد كلبي عليهم ..

بناته يبجن امهن وابوهن طلعو بسياره و ضلن هنه يبجن ، سالت غدير شبي اخوج ليش هيج ..

ردت تبجي مااخذو البارحه للغسل مالاحهم السره تاخروو ..

اخذت اخواتها وجرتهن يبجن سوه ، لزمت صدري افرك بي ماتحمل اسمع البجي من يمي اتاذه ..

صعدت لغرفتي كبل ، تلكتني تالا حجت دانيال دك ..

جنت بحاله ماتسمحلي اسمع اصلا رديت اي كملت دربي ..

حجت كلي زواجنه قريب حظري نفسج هاليومين ..

يصير خير تالا الله يسهل ، 

مشيت لغرفتي ، حجت شوو ممهتمه شنوو غيرتي رايج .

بطلي مني تالاااا ، تعبانه خيه ، الي تردي و صي عليه هبه من تجي تجيبه والي تردي ضروري كولي لبشار ،،

عفتها ودخلت لغرفتي بسرعه ، دكيت على بيبر ..

حجه ها حبيبي جاي بالدرب اني ..

همست اريد ١٥ الف دولار اسحبهم الي من البنك ..

شسوين بيهم ..

اريدهم .

لتالاا ..

لا ، سكتت ، هو رد اسحبي من ااخزنه  ، عود اني اسحب من بنك بعدين اذا صارلي مجال هسه ماكدر اروح لان راجع للبيت ..

تمام ..  همس ميرال ..

هاا ..

بيج شي ، شسوين بيهم ..

صدقه …

صدقه ؟؟! ١٥ الف دولار ولج ..

جنت ناذر بيبر على سلامتي من الحريق بالملحق بس،ماوفيته هسه فضيت لازم اوفي ليش،هواي  .

لا لاا هاهيه عاشت ايدج زين اتسوين ، حق اني اخطي هيج خطوه بس فاتتني والله ، 

ابتسمت زين ..

سديته من توجهت سحبت فلوس الي اعرفه اني كل شده هنه ١٠ الاف دولار متيبه بلاستيك  وخليتهم على صفحه بس خفت لا يكون مو كاملات ..

مشيت صحت لتالا تحسبهم .. كعدت كبالي تحسب ، كعدت مقابيلها على الفراش ، حجت لا هذول زياده الف اصلا ..

همست احسبيهم مره ثانيه عفيه .. 

حسبتهم كالت تمام والله ..

خليهم بهذا الظرف ..

حجت شسوين بيهم مالات منو هذول …

مال بيبر كال حظريهم حطيهم يله وخليهم على الميز هنا ، 

حجت وبنبرتها شك :- بيبر كلتي ،؟؟! قابل يكلج الج شنو ااقصصه ..

-اوو تالااا …

سحبتهم من ايدها و خليتهم بظرف بنفسي ، توقفت ثواني حجيت بسؤال شنو هاي بيدج متعوره ..

-شنوو ..

-جريت ايدها توه لزمتها ، هااي تلمست بشرتهاا كانو حساسيه او حبوب او شي ملتهب ..

-هاي شنوو ..

-ردت حساسيه صايره عندي ، خاصه مناطق الحساسه .

فكيت عيوني هااااا هاي شنوو من شوكت .

صار فتره قصيره بس،ديحكني حيل حتى عبالك صخنت عليه .. 

مديت ايدي خليت اصابعي اتحسس، شنو خاله لجسمج دهن لو كريم وتحسست بشرتج ولج ..

ماعرف بس حيل ديحكني ، 

هواي شنو ..

جانن كم وحده هسه لا ينحسبن تقريبا ..

رفعت حواجبي،خايفه ماعرف شنو ، منا لباجر اذا ضليتي،هيج نروح للمضمد واذا ماعرف شنو نروح لاخصائي غير تحجين تكولين يوجعج ..

-شوي بس يحك  استحيت احجي .

-تستحين مني ثوله ، لازم يتعالج وراج زواج ، سكتت ضايجه وعاقده حواجبي ، كامت هيه واني ضليت على كعدتي ، 

لحد ماسمعت صوت بيبر اجه ، كمت خليت الظرف على الميز و نزلت اشوفه اسمع صوته هو وستار يحجون بصاله يكله دز عليه دشوفه وخلي يجبهم هنا الادوات ..

نزلت حجيت ..بيبر ..

حبيبي تعاي هنا نزلت على صوته ، لزمني من يدي جرني عليه حظنته حيل ، حجيت شسوي ..

-وصيت يجيبون الي و شام شاطر ..

-شنوو ..

-شخص يوشم الجسم ..

-ناوي توشم جسمك رفعت راسي عليه مستنكره .

-لاتدخلين عليه من باب الحرام ميرال فدوه ، الايد الي حتركت اريد اوشمها ..

-ذراعك كلها ..

-اي من الجتف لحد جف الايد ، 

-هوواي هيج ..

-الحرك مشوه الايد ميرال منظرها يضايقني الوشم يخفف منضرها على الاقل  ..

دنجت راسي ماعرف شنو اكله ، همست خاف يوجعك وياذيك ..

-لا ايده خفيفه هذا  ..

-شنو راح توشم بالله ..

-ماحددت شنو الرسمه يجي واشوف والا اني طلعت الي فكره بشوفه وجهج الحلو بس انتظر يجي و نشوف ..

-تعرف احيانا الوشم يسبب امراض مثل الايدز ..

-اي ..

-و مؤلم حيل ..

-اي ..

-و يعتبر تشوه لبشره الجسم ..

-مممم ..

و يمنع الوضوء ..

-مممم .

-بيبير؟؟!

-هههههه بطلي سوالفج حفظتهم لاتحاولين مقرر من زمان اكول تعاي اسويلج وشم صغير على خدج .

دفعته دبعد عني لا اجيبك بعضه اني ابعد ..

اسويلج وشم عنون باصبعج هااا واني هم حتى نصير كبل مثالي ..

-مااا يوجع ..

-ماتحبين الوجع شنو ..

-لاا ..

-عليش تزوجتيني لعد .

-اختفت ابتسامتي من وجهي اخذت ثواني و همست  .. ليش حشوف وياك وجع اكثر بيبر ؟؟!

-اطلبي ماي عيوني انطي الج بس الانسان مايضمن نفسه ..

-تزوجتك لان احبك بسااطه ، لان لمسه ايدك جانت دافيه ، حبيتك لان قدمت الي برغم اني مانطيتك شي بالمقابل ، لا واجبات لا قمت بمسؤلياتي ولا حتى اهتميت بغرفتي و بملابسك  اني بس الاسم زوجه عكسك انته سويت كلشي ، وقمت بكلشي ماطلبت شي بالمقابل ..

هذا سبب بيبر لا تستهين بنفسك ابد .. حظن راسي حيل لصدره مردني احبببببج احبببج ياانجمه بسما صافيه ..

صاحو عليه تعال اجه الولد ..

ترك حظني و مشه جلبت بايده اخر مره سكتت رد اكله فكر ، او احاول وياه مره ثانيه ..

ماكدرت باس جف ايدي ورد :- بطلي ميرال هالطبع يلوكلج تصيرين استاذه جامعيه على هالاسلوب محاولاتج بالاقناع المقابل دائما بوجهه نظرج و قناعاتج ومبادئج ..

تركته يروح مانطقت بعد ، داحاول دائما ابعده عن قناعاته ماكدرت ..

من حبي اله سكتت قسم بالله حبي اله سواني هيج ، سكتت عن شغلات ماتخيلت اسكت عنها بس هذا عيب الحب ، مثل ما يعيشك حياه حلوه ويه تحبه و مشاعر ماتنوصف بنفس الوقت يعيشك الم وحسره ، وغصه اذا انحرف عن درب الصح..

حبيبي من يومه دربه مو صح بس،سعيت وياه ، حشاه لله يخيبني ، تذكرت كلامه مره اول ما تعرفت عليه وعرض الزواج و سالته ليش،اني ..

رد حلمت اني الاعمى مو انتي واني جنت مضيع الدرب ولزمتني ايدج واخذتني للمسار الصح ..

طبع هالكلام براسي لليوم ، كلت اسعى بيبر نظيف من الداخل اعرف ، حتى لو محد يصدك مو مهم المهم اني اعرفه شنو اني نمت بحظنه تالي اليل ، اني الي تدللت على ايده اني الي راعاني باشد ازماتي و مرضي ..

اعرف داخله شنوو ، نويت ابقه وياه حتى لو دربه عثره ..

كعدت بصاله اسمع كلامهم ، يكله امزج الي هالصورتين سوه ، رد عليه الولد ..

مايخلص اليوم هذا اقل شي يومين لان بي تفاصيل هواي ..

عليه تمام ..

صوت الجهاز اشتغل و بلشت ينقش الرسم الي اختاره هو ، 

اجه بالي الايه من سوره النساء .. (ولآمرنهم فليغيرن خلق الله ). 

دنجت راسي مكتأبه ، يارب هدايتك ورحمتك لكلبي ، داتاذه اني ليش،ماعرف هيج من لاشي كلبي يوجعني اني ماشيه جواك عدل ..

اعرف رجلي شنوو بس مابيدي عليه شي داحاول وياه ، يمكن لو احجي وياهم بالايات وسور والاحاديث يضحكون عليه ويكولون عليه معقده لو تدعي الدين لو بيها خير صدك جان غيرت رجلها ..

احجي بالدين ابيت ماسمعت بي فد يوم صوت قران ..

صعبه ...

سكتت و طال السكوت ، و كل سكووت وراه اذيه ، تذكرت فلوس ابو حمد ، صحت للعامله اسالها اجه ابو حمد ردت اي من ساعه تقريبا ..

صعدت لغرفتي جبت الظرف و مشيت الهم ، صحت للعامله توصلني وترجع ..

وصلت لباب بيتهم و صحت السلام عليكم ..

لزمت عتبه الباب و بيد الثانيه الظرف ..
 صوت بنتهم الصغيره حجت تعااي لزمتني دخلني ، صوت غدير حجت وياي :- هاا تردوني هناك بالمطبخ هسه اجي ..

رديت لاااا تعاي ابتسمت اجيتكم زياره اخوج شلونه ..

زين جوه بالغرفه امي وابويا يمه تدخللين ؟؟!

اي . مشت وراها اني و طفله لازمتني توديني دخلت للغرفه لفحتني ريحه طيبه ..

ريحه فراش جديد و دفو طالع من غرفه و ياها ريحه معقمات ، وادويه .. سلمت وردو السلام ..

حجه ابو حمد نور البيت بنتي هلاا بيج ..

شلونك عمي حمد شلونها صحته ..

ردبتعب يتنهد يم الله ، استودعناه عند الله .

ابتسمت ونعم بالله ماتضيع ودائعه ان شاءلله ، استحيت بالاول افتح الموضوع ، خجلت وخفت اخليهم بموقف مو حلو بس كلت نيتي طيبه اني ان شاءلله مايخجلوني ..

مديت الظرف وخليتهم بالارض خليت جفوفي بحظني و همست هذول هديه او اعتبرهم جنت ناذره وفيت نذري ..

راد حجي قاطعته عموو بداعت جهالك لاتخجلني هذول فلوسي فلوس ابوياا اني بنت خير وعايشه بفلوس اهلي مو فلوس بيبر يعني ، اخذهم عمو وعالج ابنك بيهم ..

سمعت صوت بجي جفلت سكتت ، الظرف انجر و اسمع خرخشه كانو انفتح ، وصوت شهكه ..

حجت وسن يااااا هذول كلهم النه ..

رد ابو حمد ضايج لا عمي ماتوقعتها منج ليش وانا عمج طالب اني منكم لو انتي وسن طلبتي هااا انتي حجيتي ..

حجيت اني... لا والله ، هاي اني نذرت بس اكوم بالسلامه ادفع فلوس ، مالكيت احسن منكم و يستحق اكثر منكم ، مو يكولون الاقربون اولى بالمعروف ..

ماجاي اتصدق عموو حتى لو صدقه الله سبحانه وتعالى فرض علينه الصدقه ليش الزعل ، بس كل مافي الموضوع اني نذرت ولازم اوفي نذري ..

سكتو ماحجو ، حجيت اخذهن عمو الفلوس وصخ دنيا اشتري بيهم صحه ابنك ليش متعلعل هالطفل شنو ذنبه ، 

ردت وسن تبجي والله مااعرف بيش اجاززيج يايمه الف رحمه على البطن جابتج يابنت الاطهار ..

ابتسمت اقرو الفاتحه لاهلي بس هاهيه كمت لحيلي ابو حمد ماطلع صوته ابد بس صوت وسن وبناتها يبجن ..

حجيت وياه ، عمو وداعت صحتي هذول حلال هذول من حسابي بالبنك مال اهلي فاصرفهم وكلبك مرتاح  …

عفتهم وطلعت وياي بنتهم صغيره تكلي امي ليش تبجي شسويتي الهم هيه كوه سكتت وانتي بجيتيها ..

تلمست راسها مارديت عليها ،  وصلت لباب بيتهم طلعت ..

حجت وين الفله ..

ردت اوصلج .. جرتني اني وياها امشي ساكته وهي مستمره تحجي ، دخلت تلكاني تالا ردت ووين جنتي ..

بره .. دفعتها بهدوء و دخلت ..

حجت شسوين عند ابو حمد هاا..

مارديت ، كلشي يصير من صدقه او مساعده بيني وبين ربي ماله داعي اعلن عنه سكتت ماكلتلها..

حجت وصاحت مارديت دخلت لغرفتي …

ثاني يوم بس طلع بيبر للشغل هي جفتت للغرفه عصبيه ..

نترت ال١٥ الف دولار وووين ..

وكفت الم بالميز واعدل بي همست شنوو ، صاحت بيه حيل فززتني الفلوس دسحبين بيهن وين تصرفيييهن ، 

ابتسمت شبيج تالااا شكووو ، هي وراي صاحت الفلوس الي سحبتيهم من البنك البارحه من فلووس اهلي ووين ..

يافلوس ..

ترى دانيال سامع رجلج هو يحجي وياج وتكليله ،اسحب الي فلوس ، شنو راح تصفرين الحساب موو اطشرين بالفلوس بكيفج انتي ماوراج احد مو ورثه اني حالي حالج علي اي اساس،تسحبين هالكد بدون علمي مو فلوسي هنه هم .. 

دانيال كالج ..

عاطت مالج شغل بخر** مالج شغل المهم هو الفلوس وين صرفتيهم عباله هو تنطيهن الي تفاجى من كتله لاا..

نووب اجذبين عينك عينك تكليلي مال بيبر ، شنوو انتي شكد طمااعه يااربي ، ناويه تفلسينه يعني ناويه تصرفين كللشي ..

اني ساكته وهي انهدت بيه دخلت ديما تكللها شبيج صوتج طالع تادبي،شنو انتي منن بنت ..

ردت عليها انجبي انتي واطلعي،بره حيري بابنج المعووق ..

شهكت ديماا اني رفعت حوواجبي منصدمه ، حجيت بصوت :- تالااا ؟؟!

-وجععع لا سوين نفسج ملاااك كل مره ادافعج و تسووين مكسووره جديده تفشليني كبال دانيال و اسكت واسكتتت شنو انتي شكد انانيه ، بس تفكرين بنفسج كاعده اجهز اني بتفاليس هااا كوه داركع جهازي وانتي بيوم تشمرين فوك العشر ملايين شنوو انتي متكليلي ..

لزمت الميز استندت عليه هي تصيح و ديما ترد انتي بلا تربيه فعلااا والله فلا عندج اخلااق شنو من نفس شايله و ذيج ترد اطلعي برره اني واختي انتي شكووو امشي بره ..

صاحت بيها ديما :- خاب انجبي داخله غرفه الخلفج وتطرديني ، انتي لاشايفه كتل لا اهانه ولهيج مشعشعه داخل اطبنج زين وادبج ..

-طززززز بيج مو فشرتي تلزمين شعره مني ، صاحت ذيج شووو تعالي داكضي بيج التوبه ، طلع صوتهن و تكامشن بنص الغرفه بس اسمع ربد وعياط ،

مشيت بحذر خايفه ، اهمس كاافي بناتتت شبيكم لزمتهم لكيتهن متكامشات ..من الشعر ، وعياطهن طالع ..

العامله صعدت اصيح فيي أي فييي اييي ، عيب كده ياست هانم عيب والاهي ..

لزمت تالا اجرها من وره واصيح كاافي لج كاافي ،  اجتني دفعه و كعتني على و جهي ترس على حافه الجربايه ..  

#يتبع ...

بنات تسالون عن الكروب ، الادمن ماتوافق على الحساب المغلق حتى تظمن ان الكروب نساء فقط .. حاليا ابعثو طلب انظمام وان شاء الله يتم موافقه ..

دنزل غش على الصفحه والكروب ترى على شكل فديوات  ..

البارحه نوهت انو ماكو بارت استراحتي .. تفاجأت بعدين بالتعليقات وين البارت ؟؟ ليش تاخرتي ؟؟ 😳

انتو شنو مجرد ماتشوفون يتبع .. ما بعدها خلص تغمضون عيونكم على الي بعدها هاا😒 اقراو الملاحظات وره اليتبع ...بلا زحمه حتى مايصير لغط ...

راح تجيبن اجلي انتن وراي جهال اني ..

كروب الفيس .. ( كتابات اسماء ديمير )

الانستا ..  asmaa_demer

كروب الفيس  ...  كاتبات وقارئات العراق