رواية قاع الشياطين الفصل السابع والخمسون 57 - بقلم اسماء ديمير

...............☆البارت الواحد والخمسون ☆............

#قاع_الشياطين(البصر والبصيره)

#بقلم_أسماء_ديمير

العامله صعدت تصيح فيي أي فييي اييي ، عيب كده ياست هانم عيب والهي ..

لزمت تالا اجرها من وره واصيح كاافي لج كاافي ،  اجتني دفعه و كعتني على و جهي ترس على حافه الجربايه ..  

اجت على راسي همست اشتعلوو صفاجن اي والله لزمت كصتي توجعني ، كمت لحيلي مابيه الهن وهنه نوب تمددن بالارض تمالخن ..

كعدت على صفحه الهث واصيح كاافي ولجن كاافي ، دخلت ام زياد و ايلاف هو يفكهنهن ، تالا صوتها وصل لسابع جار خفت لا نوب ضربنها كلهن ..

تدخلت بينهم احمي واجرها من عدهن مالكيتها ، عوذه مو نسوان تكول افات غددي ..

نوب ماعرف ياهي بينهم ، بس صايره كومه بالارض وناس نايمه فوك ناس ، اني لزمت اول وحده صاعده عليهن كلهن ، هذا الكدرت عليه واجه بيدي شسوي ، اكو كوشه شعر يم ايدي وصوت تالا تعيط ..

همست يماا اختي مردتنهااا جواجن يماااا ، جريت الشعر حيل داوخره عنها ، كلت حتى او ديما شسوي موتن اختي ، حاولت  اجر تالاا و الكها على مصدر الصوت ، 

اجتني دفعه من جتفي وصيحه بوجهي كلبه حتى انتي كلبببه .

فكيت عيوني لان تطلع تالا ، عاطت تضرب بيه ولج شكد حقيره انتي ، همست ولج اووكفي تالااا ولج كاافي ..

ردت الله يلعنج من اخت ، وشكد حقيييييره ان شاء الله تموتين .. دفعتني حيل تعيط وابجي .. طلعت و عافتنه ركعت الباب حيل  ، الله يشهد كلنه انكتله منهاا ، وهي عود اصغرنه ، حتى اني اكلت كم كفخه العامله تحجي .. يابنت الجنيه .. 

موش بنت خالص ، دي عفريه والاهي .  

ديما تشهك و تتحلف وداعت ابني مااسكت الها الا اخذ،حقي ولج شنو من طينه اختي...

وام زياد ترد كبوور تلفجن ااخ منك يابيبرس شلفيت عليه من زبايل . وايلاف ترد كوووتلتنه كوولنه يمااا مو بنت وحوووش .. 

مارديت  عليهن جنت مقهوره عليها حيل ، همست ولج تالا تعااي عبالي موو انتي ردت اخلصج عود ..

صاحت من بعيد هيه بغرفتها ، والله الا ازوج دانيال باجر على عنادج واحرك كلبج ، نذله انانيهه ..

لزمت صدري ياايمه ولج تالااا ، ام زياد حجت بربو* عمي ام الفوواين هاي ..

انداريت عليها واني كلبي منا مجمر على اختي ، و هاي تغلط علينه علني ، رديت ام زياد محد بربو* غيرج اطلعي بره ..

اسمع صوت عزاااااا يااا عزااا شلون تكولين هيج ..

نترت برره كلجن بره الله ياخذجن دمرتن الي شغل وتخطيط مال اشهر راح تتزوج هالنذل بدون رضااتي اطلعن برره ..

اسمع بس،يحجن ووجع ، شووف حقيره شووف .. 

كعدت بالارض مهدود حيلي و هنه طلعن يحجن زعلانات وام زياد تغلط ، حجت العامله عايزه حاكه ياهانم ..

اشرت روحي .. مابيه حتى احجي ، لميت ركبي لصدري تعبانه ، شلون وياج تالا مرمرتيني ياخيه لو مخلفه عشره هم مايتعبوني،بكدج لا والله ..

كمت اروح اشوفها اسمع صوت بجيها ، وكفت كبال باب غرفتها خفت احجي و تنهار نوب بوجهي ..

رجعت خايبه شسوي الها بعد ، اجه بيبر و كانو سامع بسالفه ، جنت كاعده افرك برجليه خدرانه ..

دخل و همس شلونج ..

رديت زينه ..

سكت شوي وحجه شصاير ..

ليش ماكلولك ماشاء الله عصافيرك اهواي ..

سكت .. دنجت اكمل فرك برجلي الدنيا طافره من عيوني ..

حجه كايله لخالتي بريو* ...

بلعت ريك فشلانه ، ماحجيت ، حجه لاتحترميها خاله الي بس على الاقل احترمي عمرها .. اعرفج انسانه واعيه مو حلو يطلع منج هيج لفض صح ..

نترت بي ، هي الي بلشت دخلت لغرفتي تتجاوز و تغلط عليه وعلى اختي  علني اسكتلها مثلا الاخلاق ماتنفع ويه الناس الي ماتحترم شسووي يعني .. 

-اختج شوكت تفض سالفتها ..

-ليش احسك تريدها بس تطلع منا وتروح ..

-اختيارها هذا محد جابرها واختج مو مثلج طبعها مايعجبني ، شنو ضلتها بعد كملت امورها هو هم زفتهم ياريت تكون بسرعه دنخلص ..

-اذا مايجيب الي ورقه من اي مسجد يعلن بي اسلامه مارضه ..

-اختج مراح تنتظرج توافقين باين اخذت قرارها و كملت كلشي ..

-وكفت شلون يعني شنو بكيفها .

-دزت خبر لدانيال باجر ياخذها ..

-فكيت عيوني شلووون شنووو على مزاجهم هيه .. توجهت اطلع من الغرفه لزمني ...

- ميرااال سويتي الي عليج خللص خلي تولي كاافي تركيها اخلصي من وجع للراس ومسؤليتها كفيتي وفيتي وياها..

نكتت ايده  حيل نترت انته تعرف موو الك علم منو كلك ..

-صووتج نصي دانيال دك ينطيني خبر ، واني كتله سوي الي يعجبكم ..

-عطت ليييش ليييش شنو بكيفه هوو..

-بكيف اختج اجبرها يعني اجبرها ..

-اي ..

-ماكو هيج حجي هذا زواج ميرال اختيار ..

-فكيت عيوني ورجعت ليوره ضحكت لاااا شوف منو يحجي اختيار كالي ، من شوكت انته تامن بالاختيار مو دائما تقرر الصح وبس ..

منو الزوج ايلاف مو انته برغم مو اختيارهاا منو الزوج عوااد مو انته هم ..

-قاطعني اني غير عنج اني اعرف البشر شنوو ..

-سكتت ثواني رديت واني هم اعرف اختي ..

-رد ماتعرفيها مثلي لو تعرفيها مثلي جان انتي سعيتي بالزواج قبلي ..

-شلون يعني  .

ماحجه ، اسمعه يفتح بالكنتور صحت شنوو قصدك شمسوويه تااالا ..

-ميرال ريحي بالج خللص حيري بس بنفسج اختج شافت حيااتها الى متى اضلين شايله هم الكل ، عوفيهم كلمن يحير بروحه ..

سكتت مدمعه اردد بكلمه اختي صغيره هااي اختي الصغيره طفله بعدها ..

-همس انتي طفله تفرج هاي فرر ..

دخل للحمام وشغل دوش واني كعدت مهدود حيلي ، ماكدرت الها اي اعترف ..

ابد ماكدرت احويها لو اسيطر عليهاا ، شفت كلام الين ماجاب نتيجه ، كلت اتبع طريق الثاني ، انتظرت بيبر يروح للمطعم و اني مشيت لبشار ، والله راح تخليني اتبع طرق اكرها شسوي ..

لكيته واكف يم ابو حمد ..

صحت عليه اجه ليمي ..

هاا كناري شلونج ..

ابتسمت شلوني شتشوف ..

وجهج ذبلان مريضه شي   .

تعبانه بشار وجيت اطلبك كون متردني ..

عيوني الج امري ..

ابتسمت مايامر عليك ضالم بس بالاول كلي ماكملت شقتك ..

كملت ضلت رتوش ، 

خوش هديتك توصلك ان شاء الله هالكم يوم ماناسيتك بس التهيت بتالا تعبنتي حيل ..

-اختج ؟؟! لازعلين بس اختج ماتشبهج ابد حتى اخلاقها ..

-دنجت راسي فشلانه رديت طفله ترة هي ..

-ماعرف بعد بس الي اعرفه ماتنجرع ..

-كوه نطقتها وكوه طلعت من بلعومي ، شمسويه هي   ..

سكت ..

-حجيت تريد تزوج دانيال باجر بدون رضاتي بدون مادانيال ينفذ الشرط ، سكتت شوي غصيت بالكلام اريد ابجي من قهري ..

-حجه عوفيها طبعا مرض ، لا من دينها ولا من تقاليدنا وعاداتنه خلي تتلوع بعشرته ..

-بجيت .. اختي هااي !

-ضل يتأفف شسوين قابل تحبسيها ماتكدرين عدها علاقه بي ، وتحبه ماراح تسكت اختج عنيده وكم مره نبها بيبرس بس ماتخاف خلي تتزوج اخلصي من همها  ..

-ماحجيت ضليت امسح بدموعها ممروده روحي ..

-كناري ؟؟

-رديت هاا ..

-انتي نصحتيها بعد شسوين الها ..

-اني ماكدر اسوي الها شي ، بس انته تكدر لذلك اجيتك ..

-اني ..

-اي .. ساعدتني الله يخليك ..

-اذا اكدر انطيج عيوني ..

-سالمه عيونك بشار ، بس .. سكتت خفت احجي بالاول .. حجه كولي ميرال ..

-مو اختك اني صح ؟؟! 

-واعز انشالله ، امري ..

-انته تعرف دانيال وتعرف كل سوالفه وسوابقه ، اعرفه مو نظيف وانته هم تعرف بس الفرق بينه اني ماعندي دليل وانته عندك ، انته تكدر تجيب عليه لزمه ..

-تردين افتن عليه لو اغدر بي كنارري،؟؟!

-درت وجهي خجلانه ، لااا بس تبين حقيقته الها ..

-حالفين احنه ماواحد يغدر بالثاني كناري ، وتلازمنه بعهد تردين انكت بالعهد خوويه ؟؟!

-جريت نفس ارجف عيوني مدمعه ، جارتك بشارر الكالي حل …

-مالها حل يااخوي قسمتهم هااي قدرهم هيج …

-ماكو قسمه وقدر ينبني على باطل وشي حرام غلط هالتفكير بشار  ..

-اعذريني ياخوي والله ..

-بجيت بهدوء خايب ظني ، هزيت راسي هاهيه ، مشكور ..

-لازعلين عليج الله بس والله الي طلبي صعب مايسوي زلمه ..

-هاهيه بشار ماقصرت ..

نطيته ظهري ومشيت ، مقهوره ، رجعت صعدت فوك توجهت لغرفتها كلت اتوسل بيها بالكت تحن وتنسى السالفه دكيت الباب ماردت مره واثنين تالي عاطت بيه ولييي ماريد اشووفج ..

عفتها ورجعت لغرفتي ابجي ، دخلت عليه ديما تحجي شصار يمعووده والله لو منج اشمر وراها سبع حجارات ادري مو اخت عبالك عدووه ، محد اذاج بكدهاا شلج بوجع الكلب خلي توولي على شنو مجلبه بالاذيه باديج ..

ماحجيت محد يفتهم اختي ياااناس اختتتي ، 

حجت وحجت مارديت تالي،بزعت وطلعت من عندي ..

ضليت راسي ببن اديه اجر النفس كووه ، ودكات كلبي سريعه ، 

محتاجه اهلي واحبابي كون يمي بس منو بيهم ، مشكلتنه احنه البشر نلتهي بالدنياا ، ومانحس غير بس ابتعدنه عن الي انحبهم ، وكطعنه طوول اشهر واحيانا سنوات ..

هذا شي غلط ، او الاصح كارثي هسه اني وكعت بشده منو الي ، ام ساري صار فوك شهر ماداكه ولا ساله عليها لو ساري لو خوالي منوو ..

كلها كطعت عنهم وحتى هم مالوم احد ، كلها التهت بحياتها ..

كلت ضل باب واحد ادكه ، بالكت ينفتح ..

جريت الجهاز ودكيت على الرقم ..

ثواني ورد صوت تعبان الوو ..

همست سارري ….

وين الناس النحبها والتحبنه
محتاجينهم لكن زمنه القاسي غربنه
وبقينه نخاف من الريح صرنه أوراق ذبلانه
والورد إلي يفرح الناس حزين  ومبدل ألوانه

تالااا .. 

حزنك المن؟ 
ابتسم للدنياا تلكااها عله زندك طيره شكره 
سنينك تخبل حرام تصير صحره 

خفت لاصدك عمري يروح و ايامي تذبل اورودها ، زاد الهم بالحساسيه الي هاجت عليه وترست بعض مناطق بجسمي تحك بشكل مؤذي ..

كلت بالكت من اسبح بماي بارد تخف لو جوز تغير جوو ، بس ماكو ، 

خليت بالي هم جوز حاله نفسيه وتعب هالفتره ، حبست روحي بالغرفه اجتي ميرال ، خايفه منها اخاف من تاثيرها ..

شكد ما دانيال اله تأثير هي الها اضعافه ، كلامها مثل السحر يجرك جرر ضحكت عليه والله ، ام السان معسول مينخاف عليها ابد ..

ماتوقعت تتعامل وياي هيج ، تخرب فرحتي فوكاها وراي تسحب فلوس و تبذر بكيفها جذاابه ..

دك جهازي من بين افكاري .  درت وجهي جريت جهاز رقم غريب ..

فتحته الوو ..

سكت ماكو رد ..

رديت الوو  ..

-شلونج تالا ، الصوت كزبر جسمي ، رمشت بهدوء خانسه ..

حبيت اسال عليكم ، اختفيتن ليش ضل بالي اقصد امي ضال بالها ..

ساري شجاب رقمي عندك ..

امي كلبها عليجن واسامه مشتاق الكم ليش كطعتن عنه ..

سكتت ثواني ، حجيت التهينه ..

شنو هالشي المهم خلاكم تلتهون عنه ..

سكتت شوي بعدين حجيت :- داكه عليكم ميرال مو  ..

رد بهدوء ، لا صار فتره ماسامع صوتها ، اني خابرتج كلت بالكت احصل وحده بيكم داطمن ، عبالي بيجن شي ..

-حتزوج اني باجر ..

-ضحك مستهزء .. المسيحي مو..

-رديت نانه شلونها ..

-تالا مشتاقلج ترى ..

برطمت اريد ابجي ، حجه بسرعه مشتاق لعركاتنه حتى لغلطج ، حياتي فارغه من تالا و من امنيه ، ارجعي ..

دموعي نزلت وين ارجع ..

-الي ، انتي تحبينه و متعلقه بينه واحنه هم ، انتي ماتحبي لدانيال ولا ابد ، بس محتاجته محتاجه تملين الفراغ الي صار بحياتج ، 

دنجت راسي امسح بدموعي مايفيد الحجي بعد خلص فات الاوان ساري ..

-ماافات شي والله بعدنه باول طريق تالاا، ضحك اعرفج متمرده كنسلي العرس اتسويها انتي سباعيه امشي وره احساسج و ارجعي النه ..

-اني مو تالا قبل ساري تغيرت ..

-اعرف  ، اني اكثر النااس اعرفج ، حافظج كلج ، مامشتاقه الي عليج الله ..

-شنو تغير ساري وخلاك ترجع وادك عليه شمعنه هسه ..

-كلبي حسني تالا ، ماريد اضيعج اذا تزوجتي راح تنكطع علاقتي بيج للابد لاسوين هيج حتى ماتخسرينه كلنه ..

-ضحكت بهدوء مستهزءه كلبك كتلي ؟!.

-اي كلبي تعرفين انتي شكد حبيت امنيه وتعلقت بيها انصدمت بيج ذيج فتره لدرجه حقدت …

- انتهحبيت الدنيا كلها ساري ، الا تاالا ماحبيتها حبيت غدير حبيت امنيه حتى ميرال الا اني ..

-قاطعني ميرال شنو ..

-ضحكت بس لاعبالك ماعرف شبيك سااري انته مفضوح من يومك ، وحجيت بالسانك لامنيه ، مايفيد الحجي بعد كتلك فات الاوان ..

-كلشي بيدج تالا مافات شي اني موجود داعرض عليج نرجع نحسن علاقتنه ورانه عمر طويل بعدنه صغار حتى ندرس سوه و نتخرج و نبني حياتنه ..

-ندرس كتلي اني مالي واهس بدراسه بعد بس هالسنه وابطل ..

-لاتحجين هيج اني طلعت معدل بالسبعين وضاعت كليه احلامي مع هذا بعدني متمسك بالدراسه لاصرين كسوله …

-ابتسمت مقهوره :- ضاعت عليك كليه الصيدله ؟؟!

-انتي هم ضعتي مني ..

-تصبح على خير ساري ..

فز صوته :-تالا دقيقه انتظري ..

هاا ..

-باجر عرسج موو العصر اكيد ..

-اي ..

-زين اني اريد اشوفج على الاقل لو اخر مره ..

-ماكدر بعد ماعندي وقت ..

-لو خمس دقايق تالا تستخصريهم علي ..

سكتت ..

اصبح  ب١٠ انطيني العنوان اشوفج شوي وخلص حتى يكون وداع ..

همست ماشي .. سديته منه وخليت اديه على راسي ، 

شرجعك هسه متكلي هو هذا هم وكتها يااسااري ، خليت راسي على مخده دك جهازي دانيال مالي واهس ارد ابد .

دز رساله ردي صار ساعه ادك ويامن جنتي مشغوله هاااا ..

مارديت درت ظهري للموبايل و ضلت افكر بساري ، صبح الصبح كمت حتى البس داروح اشوفه ، طلعت ملابس بسيطه .. جان كلبي يدك صار فتره طويله ماشايفته .. جربت تيشيرت من على ميز وتيشيرت جر شي وياه ، وكعت تحفيه بالارض ..

لبست  ورفعت راسي اشوف شوكع .. غمضت عيوني بضوجه من شفت البزون الي جابها الي دانيال ..

دنجت اشيلها من رفعتها مقسومه نصين من يم راس ، عقدت حواجبي مستغربه شنو هاي ..

لزمته اشوفه شي طالع من راس البزون ، عبالك جعاز اسود .. جريتها مايطلع عاصي جوه ..

لفيت بزون عيونها تلمع ، شنو هاي حاولت اجر جهاز ماطلع ضربتها بالميز حيل و انفتح راسها كله ، جريت وفتحته طلعت الجهاز .. لزمته بيدي مربع وبي مثل عدسه .. ركزت بي كاامره ؟؟؟!
اي والله كامره ..

كعدت على جربايه لزمت راسي اااااخ منك يادانيال ااااخ  ، ذبيتهم على صفحه الحجي ميفيد بعد اعاتبه لو اعاركه هم راح يكلي خفت عليج لو اغار ويدخلي بهل درب  ، واني اكول صوري و افعالي شمدري بيهن ..

طلع ابن كلب خالي كامره بغرفتي ، شلت البزون وكامره ذبيتهم بالزباله ..

كملت لبس و طلعت اشوفه لساري  ..

تلكاني بشار وجه مكلوب حجه وين ..

طالعه اجيب شغلات محتاجتها لليوم ليش..

حجه اختج مريضه بسببج ..

اكول مالك شغل وخر عني بالله يله .. بعدت عنه و مشيت اطلع ..

اسمعه ورااي يحجي شكد حقيره الله ياخذج .. 

مشيت على اعصابي ، اخذت تكسي ومشيت للمكان ..

وصلت ونزلت ، درت وجهي اشوفه وين ، ضليت افر براسي شفته كاعد بعيد ، لابس بياديه هاي المشد ..

باين متاذي ، كلبي وجعني عليه ، نزلت تيشيرت مالتي ، مشيت باتجاهه هو صافن على الجهه الثانيه ..

شلونك ساري ؟؟

اندار عليه بسرعه و كام وكف ، تالااا شلونج ..

ابتسمت زينه بس انته باين مو زين ليش ضعفاان شبيها ايدك نزلت نظري عليها ..

ابتسم اي وكعت عليه السياره و اني جواها و ملخت ذراعي .. لزمت كلبي مردني يااا اسم الله خما بيك شي ..

صار شهر هسه احسن الحمدلله ..

رفعت عيوني عليه شنو متاكل لو تاكل بالدين وهيج ضعفان ..

ضعفني فراكم .. 

ابتسمت من جذب . حجه تعاي اكعدي ..

كعدت بصفه ، سالته على نانه واسامه ورد بكلمه زينين مشتاقيلكم بس ..

حجه مافكرتي ..

بشنو ..

انتو تكنسلين الزواج ..

ليش شنو السبب ..

مو من دينج تالا ، ولا بعمرج وبعدج صغيره ليش العجله …

درت وجهي باوعت لكدام ، رديت ماعندي شي شنو ، اذا على الدين هو نطق الشهاده وخلص قابل اريده يصلي ويصوم اني نفسي مسلمه مااصلي واصوم ..

هذا مو سبب كافي ..

بنظركم اني بنظري كاافي انو هو يحبني وخلص ويريد مصلحتي ويفكر بيه عكسكم انتو .

زين اخر قرار يعني ..

اي ..

جر نفس بقوه انتي تجبرين الواحد يفقد عقله تالا ..

شلون يعني ..

امي مشتاقتلج تعاي وياي انسوويلها مفاجئه شتكولين جايب سياره الاسطا مالتي ، 

ماالحك لازم ارجع احظر نفسي كمت وكفت ..

وكف كبالي متوتر :- حجه شوي بس ربع ساعه ماخرج ..

ضليت واكفه وحايره ، حجه راح تفرح امي هواي اصلا حتزعل اذا ماكلتي الها بنفسج راح تزوجين اذا سمعت من غيرج راح تنقهر ، حقها عليج ترحين وتكولين الها بنفسج ..

ماشي .. بس لازم ارجع بسرعه ..

ضحك فرحان :- خووش ، 

مشينه للسياره  فتحها وصعدت ، توه اسد الباب و تنفتح الباب حيل واانجر منها خترعت ..

عطت يمااا ساري صااح هدهااا لك .. رفعت راسي لان دانيال وراها ستار فكيت عيوني حجيت شجاابك ..

رفع ايدي وضربني على وجهي ، صاح شجاابني مووو شجابني ؟؟!

لزمت وجهي ابجي شكوو شبيك .

مو ادك عليج هاا ماتردين مغلسه حظرتج .. وهسه دايحه ويه هذا قنددر* 

ساري لزمه من جتفه عته يريد يفكني منه نطاا دفره رده ليوره جره ستار ويصيح عليه وخرر  لك وخرر.

صحت بيهم وخرو عنه شبيكم شنو القصه رايحه اشوف نانه شبيكم هدو .. ستار مجتف ساري و دانيال لازمني بيد ويضربه بيد .

عطت حيل ودفعته عني وكفت بوجهي لدانيال صحت كااافي شبيك تخبلت شنو القصه ، وكف كبالي يلهث مد ايده وره ظهره وجر السلاح صاح شوو باله ضلي داكتلج هنا خلأص مثل جلب ..

فكيت عيوني منصدمه عيوني هلى السلاح ، ستار حجه نزله دانيال بشارع احنه اكو ناس .. نزله..

ساري وراي يحجي لا اضرب بالله اذا رجال اضرب ..

وكفت كباله همست شبيك دانيال رايحه بس اشوف نانه والله ..

عاط بيه :- ليش من ادك ماتردددين هاااا غيرتي رأيج مووو ناويه تنهزمين وتعوفين العرس العروس مثلج بهيج وكت بالصالون مو تفتررر غيرو رأيج موو كدرو يلوفون عقلج ..

ساري كله ::- شلون تاخذ وحده اهلها مو راضين ..

-طززز بيكم بابا انتوو شنووو مادام اني ردتها حتى لو هي مموافقه اخذها ومريم العذره …

-صفنت بوجه ارجف همست نزله حبيبي لا يتاذه احد وخلي نرجع يله بطلت ماروح لنانه والله ..

-غصب عنج ضم السلاح وراه ظهره  وجرني من ايدي حيل سحل وراه ، يمشي بسرعه واني اركض واتعثر ، انداريت اخر شي على ساري دفع ستار عنه يباوعلي ، كملت ركض هو يعت بيه ، صعدني بالسياره و صعد …

همست وين ..

للكنيسه ..

فكيت حلكي هااا لييش ..

اندار عليه ينافخ ورب اضربج ضربه اسكطج بيها ماسمع حرف ..

خليت اديه على حلكي خاايفه ، درت وجهي ابجي هو شخط سياره حيل ، لميت نفسي ابجي خايفه شلون وضع ، بيش دخلت روحي شبي تخبل علي ..

ضل يحجي و يدردم …

ادك ماترد كووووا* اني كوووا* هناااا مو رجال ، مغلسه عليه يومين وراها اديح ،  المثلج مكضيتها مخابرات ويه خطيبها و طلعات الا انتي من وره خشمج كله من وره خشمج خااانم بنت سلطان حظرتج هاي بعدها اولها و تلعبين عليه شلون تاليتهاا …

هاا عدتج اختج موو زرعت سمها بيج ززين …

ضليت ساكته ابجي همست جنت ناويه احظر روحي وره ال١٢ والله ام صالون هي تجي للبيت ..

ماحجه بس اسمع دك يخابر يكله حظرلي شهود … اي اي .. لا روح قبلي بكنيسه ال****** ..

همست بخوف شرط ميرال دانيال ..

ماحجه ..

مو احاجيك ..

ماسمع نفسج تالااا نفسج مااسمعه ..

حقي شنو بكيفك ..

اندار عليه صرخ بوجها خرعني ، كااافي لج كح ….

لزمت بالباب مدهوشه ، زين فستان دانيال ..

اندار عليه عين على الشارع وعين عليج ، ورب اكتلج خلاص اسكتي شكد تلغييين اسكتتتي ..

جتفت اديه ابجي مقهوره …

وكفنه كبال الكنيسه شفت ثلاث سيارات واكفات قبلنه ، نزل وحجه انزلي ، بجيت كبل دانيال عفيه الله عليك لا هيج ..

-انزلي كلت فتح الباب و جرني من ايدي .

نزلت لاسوي هيج لا تخليها ذكره بشعه الله يخليك ..

دخلنه الكنيسه مادخلنه لقاعه قداس ، اخذني بالمرر جوه ، حجيت ووين ..

-فايت اعترف بذنب انجبي انتي ..

-ليش تغلط ..

-مرمرتي كلبي تالاااا لوعتيني وربج وربي تلوعت انتي هالكبرج وبيج بلاا اذا كبرتي شسوين بيه ..

سكتت خانسه فتح باب ودفعني بيها فتحت عيوني من شفت امه واكفه واخته صغيره من شافوني ابتسموو، بلعت ريك درت وجهي اجت عيوني على كرسي و خالين عليه فستان ابيض ..

حجه دبري نفسج بي .. التفتت عليه امسح بدموعي ..

ابتسم حجه هذا مال اختي مالحكت تلبسه وسافرت صار نصيبج ، و مكياجج وشعري انتي دبري يله نص ساعه بس الج تجهزين …

جريت نفس مختنكه امه حجت يله ياامي يله بسرعه ..

دار ظهره يمشي التفت عليه ..

ضليت واكفه اباوعله ضايعه ، جن جاهل ومضيع درب اهله .. همس مشتريج بالغالي اني .. 

درت وجهي على الفستان تلمسته ، بسيط بتور و صدره مطرز بتطريز ناعم ورود ..

رفعت عيوني عليه مدمعه خايفه ، و كلبي يدك حيل ..

ميرال ..  

واكفه بالبلكوونه انتظر اشاره امل ، الهوى طيب وصوت العصافير والبط  جوه بالحديقه ،

البرده التطاير كل شوي بسبب الهوى و تضرب بظهري ، رجعت راسي ليوره تعبانه ..

افكر باتصالي بساري قبل مده حجيب نتيجه لاااا ..

 طلع ساري رد بصوت تعبان الوو ..

همست بخجل ، شلونك ساري .. 

ميراال ؟؟

ابتسمت اي ، شلونك ماعرفت رقمي شنو ..

جنت نايم ماشفت الاسم ..

جنك تعبان خيرك ..

اي والله طلعت نتائج ومعدلي مو شي ..

صدك عود ..

اي والله ..

شعجب انته شاطر شجاك ..

شغل ومالحك اقره و بالامتحاناات ونوب وكعت عليه السياره و تلفت اعصاب ايدي و ضليت هيج  .

ياااا هاي شوكت ..

صار فوك شهر ونص ..

اعذرني ما سالت بس والله تعبانه اني هم ..

باين على صوتج شكوو محتاجه شي ..

تالا حتتزووج ..

ضحك المسيحي  ..

بهت وجهي تعرفه موو تعرف بالسالفه ..

من زمان عدها علاقه بي ، بس،جنت اضل وكت وتخلص ماعرف اختج غبيه لهل درجه ..

فدوه لعينك سااري طالبك اقنعها تغير رأيها ..

اختج حقيره ميرال لازعلين ماعندي اي استعداد اساعدها لو اتقرب منها كل الي اني بي هي سببه خلي تولي .. قربها مني بس اذيه ..

بداعتي ساري ، والله كلبي احسه على دقيقه يوكف من القهر ، شطت شووطه ، توكف بوجهي وتتجاوز عليه و تكلي بعنادج  . ماكدرت اكمل غصيت بالبجي ، مقهوره حيل و احس نفسي عديمه حيله ..

همست اكمل كلامي من بين دموعي كوه احجي غصه خانكتني ، ساري محد يحس بيه كلها تكلي خلي تولي كلها واكفه وياهم ضدي ..

ساري داموت والله اريد احد يفهم شنو احجي وليش اني معارضه قابل اكرها اختي هاي بس صغيره على الزواج وفوكاها مسيحي يعني حرام هو شراب طول اليوم يشرب ماعرف شافت بي ..

رد  يجر النفس كوه مهموم .. هسه شنو صار ..

باجر عقدهم دانيال منطي خبر لبيبر ..

رجلج شنو موقفه ..

يكول ماكدر اجبرها هم مثل موقفهم مامايدني مو مثل الاول .

اختج عاله على الكل ميرال لازعلين لو احنه بمكانهم هم نسعى بزواج دنخلص منها ، اختج خطيره بلا ذمه وظمير ..

سكتت ابجي مابيدي شي ..

رد ترديها تبطل زواج لو تردين شنو ..

جريت نفس وكفت امسح بدموعي سااري …

كولي ميرال ..

الي يدفع الك اقساط كليتك  ، ويدخلك كليه احلامك ، و يتكفل بالقسط لحد ماتتخرج تجازي لو لاا ..

سكت ثواني ..

ساري محد يكدرلها غيرك انته تعرفها ادخل الها من اي باب باب محبه لو صداقه او تعارك وياها اي،شي برووح ابووك ساعدني ..

اذا مارضت شلون ..

جريت نفس خلص اذا مافاد بعد سويت الي عليه وحاولت ، والله حاولت اصلحها واداريها اكثر من بيبر ، اهتميت بيها اكثر مما اهتميت بزوجي ، صبيت كل اهتمامي وعاطفتي الها ، حتى ماتهنيت بزواجي بسبب مصايبها عليه ..

رد دزيلي رقمها دشوف ، 

شسوي ..

ددزي دشوف هالحيوانه مالها رداد ..

ضحكت الله ينطيك صحه والعافيه اي والله ..

ضحك وينطي قسط الكليه ..

فداك الفلووس بس خلي تشيل السالفه من راسها واعتبر الكليه نصيبك ..

سديته منه امسح بدموعي مبتسمه يااارب كون صدك ياارب ، 

#يتبع ...

هااا ولج هاي اشوكت  😳

وشكلي واني اشوف هيج تعليقات

.............................................

كروب الفيس .. ( كتابات اسماء ديمير )

الانستا ..  asmaa_demer

كروب الفيس  ...  كاتبات وقارئات العراق