رواية قاع الشياطين الفصل السادس والسبعون 76 - بقلم اسماء ديمير

الجزء الثاني(البارت الاول )

.. قاع الشياطين ..

.. اسماء ديمير ..

يله تنام يله تنام

وأهديلك طير الحمام

روح ياحمام لاتصدك

اغنيلو حتى ينام ..

بلعت ريك تعبت من كثر الاغاني ماترضى تنام .. همهمت  معترضة من جوه الهايه الي ساده حلكها .. هممممم .. عود بعد …

تثاوبت وتعبت مع هذا كملت .. حجيت تعبت ياعيوني انتي .. همهمت اااام … 

دللول  دللول  يابنيتي  دللول

ياعبة ياعنبر هسه تعيش وتكبر ..

ديللول ديللول عدوج عليل وساكن الجول …

ديللول ياهيف ياانظر عيني ديللول ، ديللول ياا فرحه عمري دللول ،

خليت كصتي على الكاروك نعسانه ، صوت الموسيقى ناصي بعده شغال ، وهي تحوص جنها تعبت هم …

غمضت عيوني من تعب ، وغفيت بمكاني جسمي على جربايتي وراسي بنص كاروكها …

ماحسيت على بس واحد عسني فززني .. فكيت عيني هاا هاا. .

يمعوده اكو واحد هيج ينام وصيحي باجر ركبتي لو ظهري .. شبيج دنامي عدل جنج زرافه خاله راسج بنص كاروك شكو صغيرة جربايتج …

بس عدل ركبتي طكت شاغت روحي يااايمه ..

لزمتها اااخ ، فززتيني ولج تالا …

-دتنامي عدل ياحظي

-بيش ساعه

-بال٢ ونص تقريبا

-ليش كاعده لحد هسه

-افتر اطفي الاضوية شبيج

هزيت راسي ممقتنعه ادري بيها وبسوالفها ويه حمد بس ساكته شوفي هيف متغطيه زين جو بي بروده …

لا متغطيه شكو مطفية سبلت غرفتج حارة ..

لااا لاتتمرض هيف مابيه حيل .. اشرت اطلعي دنام يله ..

غطيت نفسي و نمت طلعت هي تشحط برجلها ، فززتني حتى نومه طارت ، البيت هدوء من بعد ما صعدت درج وراحت لغرفتها ..هدوء مخيف خاصه احنه لوحدنا بالبيت ، مايمنه لا كرايب ولاجار ولا اهل قريب علينه ..

بس الحمدلله دهوك امان مو مثل بقيه المحافظات ، ماكو مشاكل والاكراد معروف عنهم فقره مو راعين مشاكل وكلش لطيفين ، شايله هم هيف ..

وين اخليها ، هل كم يوم سفري ، اخذها وياي لو اتركها عند خالتها .. مأمن بتالا ابد ، تغفل عنها ، مثل ما غفلت عن ابنها وكع من جربايه ونشكت كصته بالحافة اذا صار لهيف شي اموت والله ..

بس شلون اخذها عمليتي اطول ٦ ساعات حسب ماكالو ، وين اخليها بهل ست ساعات ..

خالتي هم صحتها مو شي علاج الكيماوي مأذيها ماتكدر تتحرك .. جريت نفس سهلها يا مسهل عيني عليك يارب ..

درت ظهري على جهه الثانيه ، رفعت اصابعي اتلمس عيوني هم تصير ياميرال وتفرج عنج وتشوفين بعد هالسنوات كلها ..

هيف راح تصير سنه ونص هم يجي هاليوم واكحل عيوني بشوفتها ..الله يشهد راضيه اشوفها بس دقايق راضيه بس المهم تنحفظ صوره الها بذاكرتي مااضل صوره مبهمه وحصرة بكلبي ..

اعرف ملامحها زين خشم صغير مدبدب ، عيون كبار ورموش كثيفه قصيرة ، خدود نازله وحلك ناعم بشفايف صغيرة ..ابتسمت اشتاقيت احضنها واشبعها بوس ..وهي نايمه كمت من كل عقلي اشيلها  كمت لحيلي .. مديت ايدي صفنت شوؤ ..بعدين كلت لاا خطيه نايمه ..

ليش احرمها من نومتها ..

شعرها بي ثخن رغم صغرها شعرها ثخين حيل ، صح كصير بس ثخين .. يكولون لونه اسود وشكلها على ابوها ، 

ابوها !! رخه جسمي من تذكرتة .. ماناسيتة بس تناسيت ذكرة ..

اذاني بحظوره وبغيابة .. بذكرة وبعدمه .. اذاني ومرضني ..

رجعت ظهري على المخده وسندت كعدتي خليت اديه بحظني ، مرت اشهر على. اخر رساله رسلها ، خلاني انهار ، ماصدكت ضمدت جروحي و دست عليها لخاطر بنتي ..

كلت الله ياخذ الحق بعد مايفيد الحجي ولا العتب ، بس ماضنيت يدبر نفسه بهل سرعة .. مؤبد مو قليل والقضايا هواي ، شلون طلع شلون وصل لعنواني وخطي ..

جريت نفس تكدرت وانغثيت ، صعد ضغطي ، ليش دزها من كل عقله عود اروحله ..

مافكر اذا اني غفرت اله او لاا ، مافكر اذا كرهته او لا ..

شلون اصلا اله الجرأءة يطلب مني اروح اله ، اجاني ابو حمد وره الرساله بايام بس ماحجه كال تردين  اوصلج لمكان تردون شي محتاجه شي كوليلي ركبتي سدادة ..

عرفت اله ايد ابو حمد بس يخاف يحجي بوجهي ، دكيت على رجل خالتي وشوفته رساله وكال راح اشوف شنو القصه وادزلج خبر ..

وره اربعه ايام ، كال فريق المحاميين مالته محرك القضيه مره ثانية ومسوين طعن ، بس مامعروف شنو السالفة القضية سريه وحتى شهود مامعروفين ..

همست مو احنه شهود ..

شهادتجن ماتجي ربع من شهودهم .. شهادتج مانوخذ بيها لان ضريرة وتعتبرين من ذوي الاحتياجات الخاصه بابا ، لاتنسين القانون ينص ان شهاده الرجل يعادل شهادة امرأتين ..

وهسه شلون ..

ماعرف حاليا مابيدنا شي الكرة بملعبهم ، احنه مايمنا شي ولا علينا شي ، الا اذا هو تحرك ضدنا بذاك الوقت يوصلنا بلاغ ..

قبضني كلبي بلاغ شنو ليش هو شكو بعد ..

بنتي لاتخافين انتي بامان هنا واني موجود بس خلينا مستعدين لكلشي احتمال يرفع قضيه حظانه ..

ضحكت بخوف حظاانه حظااانه ؟؟؟ شنووو ليش هو منوو وياخذها ؟؟!

ابوها ..

عطت بي من قهري وخوفي .. فززتهم .. لزمتني تالا ميرال ..  ابوهاا شنووو ؟  مجرم قااتل شنو ابوها ليش هو كل اب اب ، شلون اصلا القانون يرضى بهل حجي انطيها لقااتل ..

بجيت قتل جدها وجدتها اذى امها وخالتها ، اذاني بكلشي بكلشي .. بااي حق ..

ماياخذها ماكلت ياخذها بس اله حق بيها ماننكر ..

بجيت ارجف ماانطيها وربي مااانطيها ولا اخلي يشوفها على جثتي الا بنتي خط احمر والله اكتل علمودها لا تختبرني بنتي الله يخليكم بجيت مقهوره فدوه لعينك عموو ساعدني مااريد يوصلها ..

لاحول ولا قوة الا بالله .. اهدأي الموضوع ماصاير بعده ، بس اني داستبق الاحداث حتى لا تنصدمين كلشي جائز ولازم تتحظرين انتي واني موجود الله كريم الا صعب ياخذها هو محكوم والحضانه للام  بكل الاحوال ..

جرتني تالا ، اكعدي بعدها سالفه يالله شبيج ، خالتي ام ايفان حجت ، اذكري ربج شنو عبالج تايهه يرفع قضيه منا وياخذ بنته منااا ..

لا ماما هو واراه بلاوي ، يادوب يخلص نفسه عود يفكر بنته ، كل الي  ديسوي  ديخوفج ..

ماصدكتهم ولا قنعت لان اعرف هو شنو ، قلقت يوم يومين انرعبت شهر شهرين هلكد ما تعبت وسلمت امري لله ، خاصه ان هو بعد مادز  شي ولا اكو خبر عنه هدووء بس هدووء.

خالتي دكت عليه وره فترة تكلي اكو اخبار حلوه ترديها ..

الله وايدج خاله كولي ..

من جنت بتركيا واني بالمستشفى سمعت يحجون عن زراعة قرنية ، سألت عليها تدرين اكو متبرعين يتبرعون بهل سوالف لو لاا ..

سكتت شلون يعني يبترعون .

سالفه طويله اجيج واسولفها الج بس حظريلي ستكان جاي …

ابتسمت تدللي ، اجت خطيه هي صحتها هم انتكست اخر فترة والعلاج ماكام يجيب نتيجه وياها ، تمشي على عكازه صوت العكازه واضح  .. كعدت وخلتني بصفها حجت وداعت امج مامحلفتني انتي ..

اني وصيت ابو سيروان اذا صارلي شي يتبرع جزء من عيني الج ..

ضحكت اسم الله خاله شهل حجي ، اني عيوني انتهن خلاص ..

لاااا شدتحجين الطب اطور جاي اتكولين اساليني اني افترين مستشفيات العالم وشفت بلاوي ناس ميته وربج عن طريق الطب حياها ..

انتي الج نصيب بس يراد صبر كالو اكو قرنية زرع وانتي وحده من عيونج تحتاج زرع قرنيه ..

لاخاله غلطانه متضرره بشبكه عندي نزف واضرر اعصاب ..

انطيني اوراقج هالاسبوع مسافره اني لاسطنبول جاي فريق من اليونان والمانيا لتركيا ، انقدم الهم حالتج والله كريم شبيج كاطعه الامل ..

ماكاطعه بس،صعب ماريد اتأمل على خالي بلاش صارت بيه هواي ، خليني هيج افضل ..

لا ماما والله اكو امل دطلعي وشوفي دنيا وين وصلت حابسه نفسج انتي ، شتعرفين عن الدنيا عبالج الناس مثل قبل لو المستشفيات مثل ايام امج وابوج ..

وين اطلع دشوفين الوضع يساعد ماكو ابد..

دخلي نسوي العمليه وتكومين بصحه وسلامه عهدعليه  ماخلي مكان بنفسج ..

ابتسمت ، همست منو يتبرع ..

سكتت شوي وحجت مالج غرض ..

غير اعرف ،

بفلوسنا نشتريها شبيج الأعضاء دتنباع بيع ..

شلون يعني ..

شمفهمج امي انتي دعوفي سالفه هسه وحظري اوراقج داخذهن وياي وادعي لربج تتيسر سالفه بالكت ربج عاد يفرح كلبج ..

اخذتهم وراحت ماارجعت الا واخبار الحلوه بيدها ، حالتي نسبه نجاحها ٦٠% صح مو عالية النسبة بس بالنسه الي ممتازه اكو امل جببر ..

المتبرع لطفل سوري توفي دماغيا ، واهله ناوين يتبرعون باعضائه ،  شرعا لايجوز تبرع بالاعضاء ..

قانونا يجوز .. شرعا حسب ان الجسم ملك لله وحده هو امانه عند الانسان ، فالانسان ماله حق يتحكم بمصير هالامانه او يفرط. بيها على هواه ..

استغفرالله العظيم دائما وابدا ، اني تجاوزت حكم الشرع وغلست عليه ، اتمنى من رب العالمين يغفر الي هذا الذنب ..

جنت اريد بس اشوف خلص تعبت خاصه بعد ما الفريق الطبي بالمانيا حددو نسبه النجاح واكو امل .. العملية صعبه حيل ..

زرع قرنية بوحده من عيوني وعندي شبكيه مضرره ، ونزف قديم لازم يتعالج ، وزرع عدسه ..

حددو وقت العمليه وباي مستشفى وسعرها ماجان سعر العمليه هين ابد ، سعر،شقه باربيل ..

بس كلت لو نص حصتي من ورثي هم اسويها ، جنت اريد ااشوف ضوه بس تعبت من الظلام  ,مايحس بالظيم غير راعيه ..

الله لايصيب احد باحبابه .. حولت الفلوس وحجزنا شقه قريب من المستشفى بتركيا ، وكلنا ناخذ هبه بنت خالتي تعيني وتعين امها هم بالكت اداري هيف بين ماطلع من غرفه العمليات …

حظرت الي تالا الجنطه ، وجنطه هيف على صفحه ، جنت اكتب ملاحظات لهبه خاف تحتاجهم من اني ماموجوده يمها ،  خليت تالا تحظر ملابس هيف كل فستان وياه البأسة داخلي وتصفطهم سوه .. خلتهم بجيس وحد ..

وجواريبها حسب الوان ملابسها هم بجيس وحد للجواريب …

حفاظات لوحد ، ممات اخذت اربعه .. للحليب للماي للعصير وحده اختياط ، قراصات وطوك ، ادويه احتياط ، عصارات ومراهم مال مشك وحساسيه ..

نترت تالا بزعانه ما كمل جهاز العروس ..

طلعيلي مناشفها هم ..

اكلج ترى هناك اكو مناشف و شامبوات بالشقه وين رايحه رحله لصحراء …

مالاتها كلهن اخذهن اكلج حتى مااحير هناك …

ولج بابا هذا كله وزن وجنط لازم تنشال ادري يحيرون بيج بنتج بجنطج .. البنت عوفيها هناا يمي شراح يصير تبهذلج ..

مالج سغل اني راح اوكع بيها بس حظري كتلج عليه ..

لاحول ولاقوة الا بالله شهل مصيبه يااربي شهل العناد .. ادري الله مااخلق بس بنتج ..

وحيدتي شتردين منهاا ..

كرت عينج هم تكبر وتصير كلبه بنت كلب على ابوها ..

لاسبيها والله ازعل عليج تربيتي هاي. ..

العرك دسادس خيه دم ابوها بيها .. حتى عرامتها عليه يجي يوم وتنكر تعبج مثل مانكر ابوها  .. شهكت تدعي علية .. الي الللللله لايووفقه ولا يهني بحياتة امين ربي صب غضبك عليه صب .. 

كلبي انمرد مرد بدعوتها ، جسمي قشهر كله ، بس ماعدي جرأه اعاتبها او اسكتها ، درت وجهي مغثوثه رحت اطلع شامبوات حتى اخذهم وياي ، كلبي يرجف رجف …

كملت تجهيز الجنط .. بكل مكان كتبت ملاحظه وخليتهم لهبه خاف تستخدم الجنطه  متوتره بس اصب عرك من الخوف من طيارة من المجهول مااعرف ..

اخذت ملابسي حتى ادخل للحمام .. هيف وراي توه تخطي  وادردم برغم عمرها راح يصير،سنه ونص بس ماتمشي احسها ثكيله ..

عكس ابن تالا ماشاء،الله توه ٨ اشهر وكام يلزم الحايط ويمشي … هسه عمره فوك السنتين ، سنتين ونص تقريبا .. تالا تكول بنتج من الشيل منين شايفه الكاع حتى تمشي اذا انتي اول ماتكعد لحد ماتنام هي مشيولة على خصرج .

شلتها وخليتها باب الحمام وفتحته شوي ، حتى اسمع صوتها ماتروح بعيد ..

وكل شوي احاجيها خاف تروح لمكان ، وهي ترد بعياط مامفهوم لو تضرب الباب وتفكه علي وارجع اسده ..

اجه كرم يجرها من يم الباب عود تعاي دنلعب ، كامت تعيط وادردم وتفل ..

سرعت بسحبتي لايتعاركون بعدني دابدل وكبت عيطتهم ، وصوت هبده على راس عاط كرم .. طلعت بسرعه صاحت تالا ياااهل مصيبه يااربي عمي بنتج ااافه شنو هاي عنجرت الولد باللعبة ..

دنجت شلتها وينج عن ابنج وخري منها مو تدرين بيها تضرب ..

بت جلب ليش اضربي فوك مايحبج ويريد يلعب وياج .امداج …

وهاي اترد سززز سززز .. عود ادب سزز ..

ضحكت سديت حلكها عيب والله كله من ايدج تالا علمتي بنت تضرب وتغلط ..

لو مني جان تعلم كرم الغلط والاذيه بس كولي كلمن على اهله ..

ضليت اضحك محترك كلبها على ابنها خطيه .. بنفس اليوم ، طيارتنا ب٨ باليل ، ب٥ العصر اجه رجل خالتي وخالتي وهبه ..

لبست وطلعت هيف بحظني شايلتها .  من شافها رجل حجه بعدج مصره تاخذيها عوفيها بابا هنا هناك تبهذلج ..

لا مااكدر عمو والله .. حجت تالا مو اكول الها معانده تحيرين بمنو انتي هناك ..

مارديت عليهم مامن باحد عليها .. نترت دذبيها ادري شنو شايلتها هي وجنطه ..

ماحجيت حجت تالا هيف تف عليج تعيل بيها وهيف ترد بتفله لو عفطه ..

عيب عيب ماما ، اسد حلكها ..

تالا .. تف عليج وعلى ابوج …

وهيف ترد ابوج ..

عااا عيب داكول ماما تالا وجع لاتعلميها خربتيها والله ..  خالتي ورجلها ماتو ضحك .. دعوفيها طفلة كل جهال اول شي يتعلمون هالسوالف وهالحركات ..

لزمت اديها اشش حبيبي كرم يصيح بباي ، ابتسمت بباي يعمري  ..  كرم شايله همه خاف تغفل عنه تالا .. تالا هم اخذت غراضها وراحت يم خالتي ام ايفان ..

طلعت بينا السيارة للمطار ، اوراقي جاهزه بس كلبي يوجعني خايفه ، هيف مامتعودة على سيارة ولا على طريق ، بس كعدت بالسيارة حست هي بخنكه بلشت تتنعوص ، تريد تتحرك وتكوم توكف ..

خليتها بحظني وراسي على راسها امسد الها اريدها تهدء شلت الهايه نطيتها الها بس تقنع ماكو ..

.خالتي طريق كله تقرا قران هي صحتها للاسف دتتراجع ، وحالتها امر مني. ..

لمن وصلت للمطار طلعت عيوني من الحصرة ، الجنط حاربيهم رجل خالتي ، وهبه لازمتني وهيف شالتها خالتي ، كلنا الاجرائات وصعدنا بالطيارة هيف بحظن خالتي صارت ، واني بصفها وبصفي هبه ورجل خالتي بالمقاعد الكبالنه . بس الطيارة بلشت تصعد والضغط زاد .. كبت علينا هيف نوب لا ترضى تكعد بمكانها ولاترضى تسكت ترافس ..

نوب اريد الزمها داحظنها اني كلبتها بجي وصراخ وتهامش ، شالتها هبه ماترضى تصرخ تعصر بروحها وتصرخ والله كلبي قبضني حيل حتى معدتي اذتني ..

خالتي شربتها ماي نطتها حلويات ويانه بالجنطه ماكو ..اجت المضيفه شافتها حاولت تشيلها ماترضى تردد ابوج تف ابوج وترفس ..

.بجيت اني ياربي شبيج ..

حظنتها نوب همشت باديها وخرمشت خدي وجرت اذني وبيها تراجي شاغت روحي .. لزمتها داحاول اسيطر عليها لزمتها وخرتها من اذني ، توه جريتها رفستني برجليها ، وكعت مني بالممر بين الكراسي
. بنص طيارة طكت بجي فغرت ..

اني وياها بجيت رجل خالتي فز كام من مكانه عليها ، والمضيفه اجت تركض ، تحاول وياها والعالم يحجون

انطوها ماي .. والي يكول خاف شي يوجعها ، وناس تكول شوفو ملابسها خاف بيهن شي يكرصها .. ومره جبيره تصيح خاف مملوخه باين امها فاهيهه من وكعتها الها ..

وحده تكول هي امها يرادلها ام دتبجي ماشوفيها ، غطيت وجهي ابجي ، وهبه ترد شبيج خاله بنت مامتعوده على طيارة وهالاستغربت وخافت انطينياها بابا جيبها ، نوب ماترضى كظتها تعفط علينا وتفل وتصيح ابووك ابوووك  ..

والله مامعلمتها وحتى ماحجي هيج اني خالتي حجت تربيه تالا السافلة شتطلع فضحتنا بنتج .

بلعت ريك من الفشله نوب العالم شالوها حارو بيها نوب نطوها للمره جبيره تشوفها شبيها تصرخ مملوخه مدري ممتونه .. وذيج تصيح الطفلة عظامها رخوه حيل صاحت بيه شنو ماترضعيها ولج امهات هالوكت بس ممه ..

غطيت وجهي باديه ودنجت يااربي دخيلك افرجها عني ارضعها مرات ومرات ممه حسب مزاجها اكول خاف صدري مايشبعها والله نوبات اخلي غصب عنها وتعضني واتحمل ..

حجت وحده ثانيه دشوفيها حتى ماكامت واخذتها كاعده ماتتحرك ضحكت الحجيه وارد مثلنا خيه وين اكو على زمانة احنه ، الضنا بظهرنا ونشتغل بهل البيت يمنى ويسرى ونخدم العيال ا١٥ نفر محد راضي ..

كمت داخذها لزمتني خالتي وين خاله وين اكعدي هسه ادز هبه تاخذها .. كعدت بمكاني لاتوكعين ماكو مجال للمشي  …

ضليت الوب بمكاني اتلفت خايفه عليها ماشوفها وين ولابيد منو …

متت بمكاني احجي خاله وينها هااا وين اخذوها ، ردت هبه بنتج عرمه لازعلين هاج شوفي من ايد لايد شايلها ..

ضليت افرك باديه خايفه جيبوها عفيه انطونيها ..

عوفيها يمعوده مادام سكتت والتهت اذا بجت شيسكتها .. ساعه ونص وهيه عند العالم فرت الطيارة من اول مقصورة لاخرها ماخلت لامضيف لا مضيفه لاشايب لاشاب ، حتى غرفه طيار دخلوها الها …

اني متت بمكاني مدري ابجي مادري اتحسب ، لحد ماكالو اربطو الاحزمه راح ننزل ، يله جابوها ، جانت تلغي وادردم وبيدها بطاقه تعريفية عرفتها من شريط الي بيها والكابسة ..وبالايد الثانية نستله  .. حظنتها حيل ليش هيج يانظر عيوني ورويحتي عذبتيني وبعدج هالكبر لو كبرتي شسوين بيه …

تشوفهن الي عود تكاي مماا شوفي .  نزلت الطيارة ، شلت جنطتي صغيرة داطلع صاحت المضيفه عفوا بس البطاقة مال الطيارة اذا ممكن ..

هاا عفوا ؟؟

- البطاقه الي بيد بنتج مال الطيار اريدها ..

مديت ايدي اريد اسحبها ، حجت المضيفه حظرتج ضريرة؟؟!!

سكتت هزيت راسي اي .. همست وحده بصفها مو كتلج هاا ، سحبتها ابتسمت بفشله تفضلي اسفه ..

هلا حبيبتي شرفتونا …

نزلت يابويااا ساعتين ونص لو عبالك يومين ..على هالبهذلة ..

نزلت رجلين خدرانات ويرجفن ، كبل اخذنا تكسي للشقه وصلنه بحدود ال١١ باليل .. شقه بعيدن عن المستشفى عشر دقايق بس تقريبا ، بالطابق الثاني ، عبارة عن ثلاث غرف نوم ومطبخ وخدمات صالتين ، وبلكونا جبيرة ..

شقه لو ماجره لو ملك لرجل خالتي لان سمعت هبه تكول بابا ماتعلمت من جياتك هنا .. جان كلت للمنظفين ينظفون البلكونه وزجاج زين ..

دخلت لغرفتي ، نومتها ونمت بملابسي .. ثاني يوم الصبح طلعت اني وخالتي ورجلها،  وهبه وهيف ظلو بالشقه ..

بالي يمها دخلت اسوي الفحوصات والاجرائات وبالي يمها ، راح تخبل هبه هسه ، ماتسكت اذا بجت هاي ..

كملنا الفحوصات ب٤ ساعات ، ورجعنا ، لكينا هبه من طفشتها وخبال هيف ماخذتها للحديقه جوه ويه الاطفال مال العمارة دتلعب وياهم حتى لاتبجي ..

شلتها دنصعد شو لاحذاء لا قراصه .. عبالك مو هيف طفل مال شارع .. تك حذاء والشعر كوشه والحفاظه طاكه بول سوده عليه يايماا ..

ابنيتي يمااا تبهذلتي وياي ، دخلتها غسلت الها وبدلت حفاظتها سويت الها اعاده ضبط المصنع .. حايرة بيها ، من يوم الاجت نسيت الدنيا نسيت اقرا كتب نسيت النحت ، بس بيها يادوب الحك عليها ..

خالتي ثاني يوم راحت تكمل علاجها وجلساتها ، ضليت بس اني وهبه .. اخذتنا لسوك قريب ، دخلنا لمجمع واحد ، اخذت الها ملابس شتويه لان جو هنا ابرد من دهوك ، قمصله الي وفستان هودي وبجامته ، لتالا تيشيرات وهودي ولابنها هم ،  شوي ورجعنه ماكدرنا نصيطر لا على هيف ولا على نفسي اني اتعثر كل شوي وهيف تبجي .. اخذنا كم شغله ورجعنا ركض. ..

رجل خالتي خابر ان راح يباتون بالمستشفى لان خالتي تخربطت شلنا همها ، اني هم حايره بروحي ما كدرت اركز وياهم ولا اساعدهم بشي ابد ..

اصلا عاله عليهم ، حايرين ببنا هم خلف الله عليهم ..

هبه تبجي شوي وتسكت شوي تكول شبيدنا لعد صار سنوات تحارب بهل مرض انهكها ماعد عدها قوة تقاوم امي محاربة حاربت سنوات لخاطرنا اجه الوقت احنه نحارب ونوكف وياها ونساعدها ..

اسمعها تحجي وتذكرت امي ، الله يرحمهم برحمته .. امي شخصيتها كلش قوية صح حنينه بس صارمة ، حتى بابا جان يحسب الها الف حساب ،  لازمه البيت بيدها ،

لو جانت موجوده هي وبابا جان ماشلت هم هيف ابد ، لا هم كبرها ولاتعليمها ولا تربيتها ، هم يربوها احسن تربيه ، جريت نفس مخنوكه ..

انا اريد وانت تريد ووالله يفعل مايريد كلشي بيد الله ، ثاني يوم الصبح تقررتي عمليتي ، ب١١ الصبح .. كعدت من ال٦ احظر بنفسي واتعب بهيف حتى تنام ب١١ لحد مااطلع من العملية حتى لاتعبهم ..

سبحت وسبحتها ونظفت غرفتي ، سويت الها اكل بعلب عباره عن فواكك مقطع وبست مملح و قطع كاكو اثنين وكيكه صغيرة ، وترمز الماي وقوطيه الحليب غسلت ممات مالتها وفورت ماي حار نكعت بي الهايه والعضعاضه ..

رضعتها من صدري كلت خاف ماترضعه الممه وراي ، بالعشرة تعبت تريد تنام لان كاعده من السته بس ماخليتها ، ضليت شايلتها افر بيها واحاجيها ، لحد ما صارت طينه ب١٠ ونص لفيتها بطانيتها .. اخذنا جنطنه وطلعنا ..

خليت حاجاتها بجنطتها الخاصه وهبه شالت  جنطتي وعربانه هيف .. وطلعنا للمستشفى .. بالطريق نامت بحظني ، دخلت للمستشفى خليتها بعربانتها وجنتها صغيرة جوه بالعربانه وعلمت عليهم هبه ..

وهاا هاي البطانية تحبها اذا بجت لفيها بيها واكو دب صغير جبه هم ، خلي بحظنها ، …

نترت بيه .. يبووو شكد تلحين دكاافي افتهمت والله ..

مو يضل بالي يمج خاف ماتعرفين الها ..

يابه والله اعرف اعرف قابل علم الذره هي لهايه وممه فضت راحت ..

اذا بدت تحوص كبل هزي العربانه شوي حتى ترجع تنام عبالها بكاروكها ..

افتهمت ياابه شبيج كاافي ..

ماي حار بالترمز ترى كاسري بطل ماي يمج بهذا جيب على اليمنى مو تحركين حلكها …

صار صار ..

لبستني الممرضن ملابس العمليات ، واحاجي هبه ، حجت يبووو ..

تالي سكتت شبيها هاي ماتتحمل حجي خبال .. خلوني بالسديه ، بعد ماربطو بيدي الكانونه .. همست .. باسم هبه ماسمعتني ..

سكتت ، ردت بس،اكللها حفاظتها بدليها بعد ساعتين خاف تتضايق منها بس خفت لاضوج لان لحيت عليها ..

والله ماخايفه من العمليه بكد ماخايفه عليها كلش مرعوبه اعرفها نحسه وتبجي ماتسكت ، لايصير بيها شي من البجي ، اذا بجت منو يسكتها وهبه ماتعرف الها ولا تتحملها مثل تالا روحن ضيكه ..

دخلت واني مامنه نفسي. وبنتي يم رب العالمين ..

خالتي ماشفتها لا هي ولا رجلها لان خالتي من اخذت جرعه متخربطه من البارحه ..

نطوني البنج مابالي لاعمليه ولاخوف بالي كله يم رويحتي ، اريد اخلص واطلع بسرعه الها ..

دكاترة كلهم فوكي ، اسمع اصواتهم المختلفه ولغاتهم مابين تركي والانكليزي واليوناني ..من عدا الممرضين الي يشكلون بيدي الاجهزه وتخطيط القلب وغيرها ، من الهوسه مالتهم والخبصه عرفت العمليه صعبه كلش ، جرو اجهزه قربوهن مني كل جهاز هالكبر ، بلعت ريك ارتاحين شوي من عرفت ماكو ادوات حادة  ..

اول شي يخطر بالنه من نسمع بعمليه هي المقصات والادوات الحاده والملاقط .. بس هنا ماكو بس صوت اجهزه ، وهبه اكدت الي ان العمليه مابيها ضرر وتدخل جراحي قوي ،  نكعو عيوني معقم وغسلو بي وجهي غسل .. لحد ما فقدت بمكاني ، عبالك ثواني وكعدت ،، سوت جهاز براسي يصفر ، وجسمي ثكيل وحركه بصدري قويه ..

راسي ثكييبل وعيوني باردة احسه قالب ثلج .. ونييت مو من الالم بس مابيه احجي بس اوون كلماتي مبعثره ..

ماكو احد يمي ولا صوت بشر بس،صوت الاجهزه تصفر .. حركت راسي يمنى ويسرى همست .. بيبررر …

بلعت ريك جسمي كزبر هيييف ، مامااا .. تالااا وينكم.  

ماكو رد .. رجعت غفيت بمكاني ، ماعرف ،شكد ورجعت وعيت, سمعت صوت قريب مني يحجي بالتركي ، كلشي مافهمت ، مجموعة اشخاص يحجون ضوضاء،.. بس ونيت ردت يعرفون اني كعدت ..

الكلام مستمر نوب لزمو شكلو شي بيدي ،  يحركون بيه بهدوء ، وين يله صحيت ونطقت هبه وين .. هبه اريد هبه وهيف ..

رد علي شخص يحجي اردني ماعرف فلسطيني ..

انا المترجم تبعكم شو بدك ..

المرافقه وياي وينها  هبه قيدار ..

اهااا ثواني بس ..

راح وره ربع ساعه تقريبا رجع ..

شوي وتجي ، كيفك هلأ ..

الحمدلله وينها ليش مو يمي ..

بالحمام شوي وراجعه كيف صحتج شو بتحسي حالك منيحه ..

زينة .  بنتي وين ..

ضحك على مهلك شو طايرين يعني ، عم اسالك عن صحتك دكتور بدو يطمن شو عم تحسي بالم بحكه بعينك بنغزه اي اشي …

ماكو شي ماعندي اي الم ولا احساس بس خدرانه ،

خير ان شاء الله بالنسبة الي على عيونك بكرا بنشيلو ، نسبة نجاح العمليه ممتازه اكتر مما توقعو الدكاترا .

يعني اشوف حاليا او باجر ..

حجه بالتركي واكو يمه يحجون وياه ..ورجع يحجي وياي مو بهل سرعة .. بدك شي يومين ثلاثه واحتمال اسبوع اسبوعين ، وحتى لمن تشوفي شوية ضوو ماراح تشوفي واضح بدك اشي اسبوعين لحتى تحصلي على صورة واضحه نسبيا ..

نسبيا شكد يعني .. وضوح شكد ..

هذا الاشي انتي بتحددي مو دكاترا يااختي ..

صوت العربانه بالغرفه ابتسمت هييف .. حجه مترجم اجت الاميرة الغاضبة جرستنا بالمستشفى ..

ابتسمت اشرت انطينياها ..

لاا مستحيل شو مجنونه انتي ، لاتضربك على عيونك وتروح النا كل تعبنا ..

البنت كأنو نامت ، تركيها نايمه .  

حجيت هبه وينج وكلتيها .. ردت اي حبيبتي اي شلون صرتي هسه …

بلعت ريك زينه الحمدلله .. خالتي شلونها ..

جرت نفس بعدها حالتها موشي فاقده ..

غفيت بمكاني تعبانة ، لثاني يوم يله كعدت ، يوم كامل مالزمت هيف ولا داريته خطية كله بيد هبه ، حتى ثاني يوم للظهر ماشفت هبه كالو عند امها تعبانه .. وهيف وياها كلبي نار عليها والله ناار ، شاكلت شربت بدلت الها ملابسها حفاظاتها شلون نامت باليل .. بجت اكيد ..

ا ثاني يوم فتحو الي الشاش من عيوني ، اني ماعندي لغة للاسف ، هبه تعرف تركي بس ماموجوده و المترجم بغير غرفة ..

ضلو يفلون ويحجون مافتهمت شي ، ضليت مغمضه مافتحت عيوني حاجوني بالتركي وكررو الجملة وما فهمت جنت خايفه حيل مرعوبه ..

تمنيت وياي احد احبه حتى الزم ايده واطمأن لو تكون النظره الاولى اله ..

فتحت عيوني ماكو صوت بس جو اصفر ضبابي .. عقدت حواجبي .. رمشت بهدوء مره واثنين ..

صوره لو رماديه لو صفرة ضبابيه ..دمعت عيوني جسمي قشعر ..حاجوني الدكاترة ما رديت .. برطمت اريد ابجي ..اشرت على عيوني لااا ماكوو شي ..

اجاني صوت هبه تلهث هاا ميرال هااا بشري ..

هزيت راسي ماكو شي هيف وين .. مديت اديه مدمعه اريد ابجي .. دكتور يكول شوي شوي لاتستعجلين شبيج لاتبجين مو زين ترى ..

هييف انطينياها … خلتها على صدري لزمتها وخليت راسي على صدرها وسكتت ..

حجت كلشي ماكو يعني ماشوفين اي شي ..

هزيت راسي كلشي ماكوو ..

تحسرت كولي يالله بعدها العملية توة ترى ..

مارديت بعد اختنكت بس احجي انفجر بالبجي ، ضلو يم راسي يحجون رفعو راسي وثبتو وفتحو عيوني حيل الاثنين  ..

هيف بحظني خلت راسها على صدري ، حسيت شي بارد نزل بعيوني ، وجكات قوية اريد ارمش صاحو بيه ثبتوني ..

صحت ااااخ من الالم.. هيف كعدت تبجي خايفه شالتها هبه تسكتها .. كالت ديشوفون الخيط ميرال لاتتحركين ..

متت من الالم. ووالله اريد ابجي مااكدر احس عيوني يابسة ..

ضليت بس الوب ، ماعرف شنو خلو بيها ورجعو شدوها الي .. لحد ماعافوني ساحت روحي .. مددت كبل دايخه من الالم …

غفيت كبل ناار عيوني نار ، كام الالم يضرب على راسي .. والله احسه مو الي الم فضيع ..

كعدت على صوت هيف تبجي ، فزيت فزه ، فريت راسي يمنى ويسرى مخترعه هييف هييف ..

نطتها الي وحده تحجي تركي .. لزمتها وحظنتها هبه وين ليش عايفتها .. حظنتها وشميتها وهي تبجي وتصيح مماا ممما ..

عمت عيني يايمه جوعانه يروحي جوعانه .. نوب ماعرف شكول لهاي .. اشرت على حلكي ممه لهيف ..

بلكت تفتهم ..نطتها بيدي ..

لزمتها ممه بارده بيها حليب بس بارد ..

اشرت لااا سكتت شكول لهاي بالله ..خليتها بحظني اغنيلها وهاي سوده علي تصيح مما مما.. اشرت الها على حلكي تريد اكل ..

ماكو صوت خرب وين راحت هااي .. كمت من مكاني وشلتها شبيج يااامي شبيج .. طلعت صدري ارضعها منه ماتقبل تضرب بي وتهامش .. دخذي ياامي شبيج ..

جوعانه اعرف يكلبي انتي .. كعدت على حافه سديه واهز بيها اني هم دايخه مابيها اكوم خفت اوكع اني وياها ، لحد ما اجت ممرضه حجت بالتركي ..

نترت ساعه سوده اي والله ابتليت اجيت لهناا البنت حتموت جوع يااربي ..

ردت انتي عربية؟؟

سكتت شوي فدوة لعينج تفتهميني يعني .. بنتي جوعانه اريد الها ممه بماي دافي جنطتها هناا اشرت الها كبالي .. شوفيها اكيد بالعربانه مالتها شوفيها يصيبج اجر فدوه لعينج ..

مافي والله اي شنتايي ..

لزمت راسي دوريها فدوة ..

هلا ازا مالئيتا بروح للكفتيريا لاشتريلها حليب ولا يهمك ..

اي اي الله يخليج ترى داخت من البجي وسكتت والا هي ترى جوعانه حيل اعرفها من بجيتها ..

لكان وين مرافقينك انتي ..

توترت وخفت لان وحدي يااربي .. ماعرف والله هبه جانت هناا ماعرف شو بس هيف مادري .. مادري   ..

راحت هي واني كعدت لوحدي شلون راحت هبه وعافتني خرب اي والله ، مافكرت بيه هاي ..

رجعت البنت وياها جنطت هيف وعربانتها كالت ماخذتها النيرس خالتها بالكومدينو ، هلا باعملا احلى حليب لعيونها ..

هبه وين ..

المرافقه تبعك سالت عليها الو الي اما توفت ..

شهكت شنووو ..

اي والله هاد سمعتوو .. انو اما كمان هون بنفس المشفى ولمن سمعت بخبرها انهارت من العياط المسكينة ..تركت البنت والعربايه والنيرس اهتمو فيهن ..

ضليت متصمنه بمكاني ، جسمي قشعر ضليت افرك بصدري واجر النفس كوه .. حتى بجي مااكدر ابجي ، غصتي بصدري يااوجعها لهل غصه ..

غصه تخنك ، مودعة خاله مودعه بالخير والسلامة مااقصرتي وياي اجرج عند الله ..تعتبر شهيدة ماتت بمرض بالبطن والمبطون يعتبر شهيد …

حاربت السرطان فترة طويله لمده سنوات كافحت ، بس خلص استسلمت لكلشي طاقة وقوة تحمل ، وخالتي اعلنت استسلامها ، انقهرت عليها بيومها قهر والله حتى ريكي صار مرر واكتأبت ..

يومين ماشفت هبه بس النيرس السورية ماقصرت اسمها ليناا لاجئه سوريه ارملة  اجت هنا ب٢٠١٦ هي واطفالها  بعد ماستشهد رجلها بحسكه بقصف النظام الهم ..

بين ماترضع هيف هي كعدت تسولف وياي ، تكول كان رايح لجيب خبز على الفطور ، لمن صار القصف على المنطقة رجع بسرعة لعنا ماكان عارف ان الموت عم ينطرو بنص الطريق مايسمحلو يكمل دربو لعنا سالم .. تسولف وتبجي ..

بس الحمدلله كلو عند الله مابيروح ، صح انزلمنا كتير بهل دنيا بس حقنا بالاخرا موجود مابتنازل عنو شوما صار ، حقي وحق  اولادي ناخذو من بشار عند ربنا  ..

سكتت اسمع الها حجت وانتي وينو لجوزك ..

ابتسمت مطلقة ..

ضحكت باين انو حمار لابل يطلأك ..

ابتسمت بخيبة لا والله اني الحمارة ..

باين بعدك بتحبي ..

جفت ينابيع حبي اله ..بس حمارة لان تزوجته ..

ازاكي كتير ؟؟؟

دنجت راسي مخنوكه ، ردت ولا يهمك ، الحياة ماشيه وعندك بنت لازم ترجعي للحياه مشانها ، الام لمن تجيب اولاد تخلص حياتها وتبلش حياه اولادها ..

هزيت راسي ، اني عندي مناوبة هلأ لازم روح ، از بدك شي احكي لاي نيرس بدي ليناا .. هنن بعيطولي ماشي ..

بنتك هون اريبه منك لاتخافي عليها .. هزيت راسي تمام ..

بعدها بفترة قصيرة اجت هبه صوت مبحوح وتشهك ، حظنتها اهون عليها بجت بجي يمزق نياط  الكلب ، حتى هيف بجت من الخوف .. لحد ماخلصت دموعها وسكتت تون من راسها .. تكول عبالي مثل كل مره تفقد الوعي من قوة. العلاج واصحى وره ساعه ساعتين ..

بس هالمره نومتها طويله لامي  مامنها كعده ..ورجعت تبجي ، تذكرت امي اني خليت راسي بين اديه اذاني ..

التمو عليها الممرضات يواسوها ، تقرر خروجي من المستشفى لعد يومين المغرب ، بس رجعو فحصو عيوني ، وفلو الشاش وفحوصات مردوها لعيوني احس والمح ضوا خفيف مال لايت صغير يخلو بنص عيوني ونغزات قوية ..

تحول الغواش الى حمار وسواد .. بس تركو عيوني بدون شد كالو حتى تجف ماضل رطبه ..

فبطت اسبوع وطلعت من المستشفى للشقة ، اخذت رقم الممرضة السورية لينا ، حتى تجي تشيك على وضعي بالشقة ..

خالتي بلشو بالاجرائات نقل الجثمان للعراق ، يومين وفضو كلشي … قبطنا ١٢ يوم بتركيا ..

شاش اشيلة مرات ومرات اخلي من توجعني عيوني اخلي احسها تهدأ وتهون ومن افتحه واشوف ضوء اكوم اموت والله ..

رجعت اني وهبه للعراق وهيف وضل رجل خالتي  يجي ويه جثمان ..تلكتني تالا وكرم وحمد ..

هبه راحت لبيتهم كبل واني رجعت لبيتي ، عرفت محظرين للعزا ، بس كالو الجثمان يتاخر شوي صاير،غلط بالاوراق بالمطار وراح يتاخر الجثمان ..

تالا بس دخلت البيت صاحت انزعي شاش يله وشوفينا جابت كرم خلته بنص وجهي اعرفج على ابني باااعي يجنن يخبل مووو ..

صح احلى من بنتج بس ميخالف بنتج  اهم شي الاخلاقها والا باينه اخلاقها من هسه  ..

ابد ماجان عندي مزاج للشقه او ضحك ، تعبانه نفسيا وجسديا من سفر .. عفتها ورحت ارتاح … خالتي ام ايفان راحت لبيت خالتي تحظر وياهم العزا  ، سوو عزا النسوان بيت خالتي وعز الزلم بالقاعة ..

راحت تالا ساعه ورجعت تكول دنيا مكلوبه عدهم ، خوالج كلهم هناك توه اشوفهم مااعرف عدنا هالكد خوال وخالت ولد خاله ..

سالو عليج كتلهم مريضه ماتكدر تطلع ماتتحمل الضوء ..

جان بدي اروح ، بس اعرف مادبرها وهيف هم ماتسكت ، كلت وره الاربعين اذا كدرت اروح الهم ..

التهيت بنفسي وبعيوني ولينا اخابرها تعلمني شسوي ، وشلون اخلي القطرات .. من افك شاش اشوف ضوء بس المشكله تكوم توجعني حيل ممتتحمل ضوء ابد ..

تلزمني تالا تخلي القطرات والعصارة ، الم فضيع والله مينوصف ، الراس كله يكوم يصيح عليه بسببهن ..

خابرت لينا اريد فد مسكن الهن ..

مابنصحك والله الافضل يضلو هيك ،

كلش متاذية والله متت حتى صايره اعصاب بسببهم ..

لازم تحسي فيهن از ماحسيتي بالم معناها اعصاب عيونك تلفو ماعد فين فايده لاي اشي ..

والحل ..

كمادات مي بارد مع العلاج الي عطوك اياه ،

سكتت حايرة ..

شو عم تعملي ..

كاعده ماطالعه لمكان ..

بنتك الغضبانه كيفا ..

ابتسمت شالعه كلبي توه تخطي داركض وراها ..

عم تعطيا الفيتامينات الي وصفتن لالك ..

اي اشتريتهم بس رجعت ، احسها حتى صارت حركه اكثر ..

اي هدول مقويات ويسرعو عندا النشاط ، ربي يحفظا لالك ..

يحفظ غواليج لينا من صدك ..

تؤبريني ..

سديته منها ، حبيتها لهل الانسانه حيل لطيفة وطيبه بشكل ، خلص عزا خالتي ورحت وره اسبوعين تقريبا الهم ، اني وخالتي ام ايفان وتالا ، ماطولنه ساعه ونص ورجعنه جهالنه وكحين هم كرم وهم هيف ..

درب كله لابسة النظارات فوك الشاش ماعرف ليش اخاف عليهم حيل .. ذا اطلع. للطرمه البس نظارات ..

وبالبيت اطفي الاضوية كلها لازم ضوء خفيف كلش يله اتحمل ، ماشوف قوي هيج شي باهت ..

اخلي هيف نوبات كبالي واركز بيها اريد المح عيونها لو تفاصيلها ، وهي ماتثبت تحوص تحوص .. فكيت الشاش وره تقريبا ٣ اسابيع ، اشوف غواش ، اكو صورة بس مو هالكد .. امشي واتعثر لازمه الحايط اجه تالا ..اكلج حروح لبيت خالتي خابرت هبه تكول خوالي يسالون عنكم ماتجن ..

انداريت عليها روحي اني مابيه دشوفين وضعي لو لاا بعدين هيف تستغرب اذا بجت شيسكتها ..

دخلي كرم يمج لعد اروح بسرعه واجي ماتاخر ..

وكلي وشربي وغيري حفاظته وعوفي يمي ..

جرت نفس خاب اخذه عليش ابقي يمج..

ترى مابيه حيل تالا ممتعاجزه منه بس مابيه ..

ديله يله نص ساعه اجهزه ، حخابر حمد يي يوصلني هااا .. سكتت مارديت عليها وهي هم مانتظرت رد شمرت الحجايه وطفرت .. مااخاف عليها من حمد .. لان اعرف شنو طينته ..

بس اخاف عليه هو منها ، الولد مسكين وحيد اهله وصحته كوه ماشية ماريده يتاذه هو اصلا ممقصر ويانه يحبه على محبه اهله وقايم بينا يحس كانو ملزم بينا كانو مسوين عليه فضل ويريد يرجعه ..

يشهد الله اكثر من مره سمعته ان انته دتخجلنا بتصرفاتك مانعرف شلون نجازيك ، بس هو يرد اني ماعرف شلون اجازيج ست ميرال ..

وكفتي ويانا بازمه ماوكفها الاخ لاخو ، الي يزرع طيب يحصد طيب ، هاي اقل شي اسوي … اوصلكم للمكان تردو او اسوك الكم .. سهله ماتريد تعب ..

ضل هو بالباب ينتظرها كعدت بالمطبخ اباوع علي شكله ماواضح بس باين طوله لابس ملابس غامقه ، بنطرون وقميص ..

ابتسمت من شميت بي ريحه عطر قوية .. اسمع صوت الكعب مال تالا هو من يمه حك وتوتر من حركته ..

كحه خجل .. حجه هاا جهزتي ..

ردت عليه …اي عيوني ..

جنت مبتسمه اني واختفت ابتسامتي ، تلعثم هو.. يله اني انن  اا انتظرج بره .. 

تريد تطلع نترت وووجع عيونج براسج تالاا تادبي بالحجي ..

نترت… اووي شبيج عيوووني …

بلا عيوني بلا بطيخ خلي عيونج  بنص وجهج وبطلي توزعيها للعالم خلي عندج حياء ..

شنو هذا الحياء ينوكل ينشرب حبيبتي .. شبيج وياي،..

خطيه الولد لا تتصرفين  وياه هيج ..

ضحكت .. الي يسمعج يكول حاصرته على الحايط ههههههاااي …

وطلعت اطك بكعبها ..فكيت عيوني يمااا فلك اي والله .  

عرفت نهايه هل الولد المسكين ماتسعد احد وماترضي احد ، هو ساري المشيطن فرته فر تالا عاد هذا الفقير شيصير بي …

انقهرت علي وشلت همه ..  ..

كمت من مكاني ،جاي من الباب المطبخ ضوء خفيف مريح للعين ، رفعت النظارات الخاصه ،

رمشت بعيوني ، اكو نقط سود تظهرلي بس اكو صورة ماواضحه حيل بس زينه ..

بجت هيف حسيت عليها كعدت من النوم .  ركضت عليها ، شلتها ، غيرت الها ملابسها والحفاظ ، نزلتها اسويلها شي تاكله …

كرم كاعد بالصاله يباوع تلفزيون ، حاجيته كروم حبيبي تعال اشرب عصير.  .

طلعت برتقال من الثلاجه ، وياه موزه كشرتهم وخليتهم بخلاط ..

حظرت كلمن كوبه ، هم جواي واكفين ينتظروني .. ضحكت …

خليت الهم بكوابتهم وطلعتهم للحديقه وياي ، يلعبون شوي بالحديقه .. حديقتنا جبيرة وداير مدايرها سياج ناصي ، ماكو حياطين عاليه بشمال لا سياج يحيط بالبيت ويكون ناصي .. والجو مال دهوك يجننن نسمه هوا بارده وحتى تحسين الجو منعش ماكو شي اسمه صيف او تلوث او تراب  ، جو دومه حلو وطيب ..

يلعبون قريب مني ويضحكون ، اشوفهم بس ملامحهم لاا ، هيف لابسه فستان احمر جوه الباس ابيض ابو تجه .. وحذاء ابيض وكرم فالينه سماىي و برموده نيلي  وحذاء ابيض . 

شايلين كوابتهم كرم يركض بس هيف ثكيله توكف وترجع توكع ، وجعني كلبي بوكتها يمااا كلبي يماا..

رجعت للبيت طلعت الها عربانتها حتى توكف عليها وتدفعها وتمشي .. وكفتها ولزمتها الها ، عدلت شعراتها توه بلشن ينشدت كصار ماينزلمن ناعم .. شديتهم ذيل حصان صغير ..

كرم شاف عدها العربانه عاد يريدها جرها من عدها حيل وبجت هي ..

هيي ابن تالا اكعد ولك عوفها هسه اجيب بايسكلك عوفها عدها لاتوكع .. وخرته عنها ورجعت اجيب اله البايسكل. ..

دخلت للصاله ماكو ، خرب لازم اصعد للغرفة اجيبه ، صعدت كوه ادوره لكيه بصف الباب شلته ونزلته .. طلعت تلكاني هو بالمطبخ ولك جان دست عليك وكعت اني والبايسكل فوكاك ..شلون توكف جوه رجلي ياامي ماشفتك ..

اشرلي اداااا هناك بعيد …

شنوو دوخر دمشي ..

لزم ملابسي من يم  فخذي ادااااا بعييييد وياشر بيده الاااح …

هاااا وخرته بسرعه مخترعه شنو لاااح .. شمرت البايسكل بالمطبخ وركضت لبره الحديقه ..

هيييف ماما هييف .. درت يمناا يسرااا ماكوو مجاي المحها .. ركضت لنص الحديقه افتر وافر براسي يمااااا هيييف ..

انداريت كررررم وينك تعااااال  ولج هيييببيف. …

عطت يمااااااا هيف ، اخترعت حيل ضليت اهبد مثل الخبلة يماماااااا هيييف يماما وينج .. ركضت على جه اليمنى اعيط وابجي ..

ماكو اختفت حتى صوت ماكو الها .. رجعت على جهه اليسرى اعيط باسمها ماترد .. لحد ماعثرت بالعربانه مالتها وكعت على وجهي وايدي انلوت جواي عطت متالمه ..

كرم اخترع وياي يبجي  ، كعدت بالكاع اصرخ ، كمت لحيلي شفت تك حذاء مالتها. تقربت عليه زحف لزمته يمامااااا ولج هيف عيوني انتي وينج …

ماكو صوت رفعت راسي باب السياج مفتوحه على الشارع جمدت بمكاني لا ياااربي ماطلعا اكيد .. الباب شفتحها ياربي ..

ركضت لباب السياج اركض وطلعت للشارع اعيط عليها كرم وياي يبجي ويركض ، ضليت اهبد بشارع وافتر،بي واعيط عليها ، ماكو والله ماكوو اختفت وين راحت  ..

انداريت على كرم غص بالبجي دنجت عليه كوه رفعته ايدي احسها مخلوعة .. شلته وطلعت اركض اكمل صياح وعياط ، نوب عثرا وكعت اني وياه على وجهي بشارع تشردحنه من فوك ليجوة .. اديه راحت وركبي تنزف كرم انضرب على راسة يصرخ .. كعدت بالكاع ابجي مابيه حيل …

حتى رجليه راحن خدرن ، دنجت راسي اصرخ يااااربي مامنتها يمك ربي وين راحت والله مااغبت عنها بس شوي وين مكانها ، كرم حاظني يبجي خايف من صوتي ، ضليت بمكاني اعيط باسمها ، رجليه ماتتحرك منا لهنا احس روحي تكرمت الله يشهد …

جمدت بمكاني بس صوتي عامر يلهج باسمها هيييييف  ..

................................

البارت طويل اكثر من ٥ الاف كلمة يعني يعادل بارتين الا  ، بارت بالاسبوع ويوم سبت تنزيل غير هيج مااكدر فدوة لعيونكم .💜💜💜💜.