رواية قاع الشياطين الفصل السابع والسبعون 77 - بقلم اسماء ديمير

الجزء الثاني ( البارت الثاني )

قاع الشياطين ..

بقلم اسماء ديمير

صوتي بح من العياط ، كرم نام بحظني من البجي ، سمعت صوت سيارة وراي دك هورن التفتت ، صوت تالاا تعيط عزااا عزااا ولج شكوو .  نزلت تركض اجت باتجاهي هي و حمد..

اشر الها ما بيه احجي ..

صاحت شبيج ولج شكوو ياايمه شبي كرم شالته من حظني تتفحص بي وحمد خايف حجه شبيج ميرال كومي ، ادي ترجف خايف .. كومني من الارض شاف اديه وركبي دم .. لزمهن دم ..ولج شبيج هاي،شنو الدم ..

لزمتني تالا تبجي ولج شكوو شبيج شصاير هااا التفتت بنتج وين هيف وين …

من جابت اسمها بجيت بقهر همست ضاعت ضاعت …

طبت على صدرها عزااا العزااج شنو ضاعت صخام بنتج وين ولج ..

نزلت راسي ضاعت ماكوو …

عاطت وطلعت تركض شايله كرم  اتجهت للبيت تعيط .. حمد جرني شنو ضاعت تعااي تعاال دنفتهم ..

رجعوني للبيت مشي ابجي وتالا تعيط ادور عليها ، ولج هيييف .. هيوووفاااا خاله وينج …

بنت نعال وووينج ، لاتهبطينا .. البت وين ميرااال تصخمتي ضيعتيهااا …

دخلوني للحديقه وهم دخلو يدورون عليها بالبيت ، رجعت على تالا تصيح وووين شصار شلون غبتي عنها ..

همست صوتي مبحوح دخلت حتى اجيب بايسكل ابنج ثواني ماطولت رجعت مالكيتها ..

وين جانت هي هناا بالبيت بالصاله وين .. ضربت على افخاذها بعصبيه شلون غفلتني عنها …

بلعت ريك كوه بلعومي يابس ، اشرت هنا بالحديقه ما غفلت والله وداعت عزيزه كلبي ماغفلت ثواني دخلت وطلعت ماكو   ..

رجعت للبيت مخبوصه ، تصيح باسمها ادور حجه حمد دوري بالخزانات مال ماي فوك سطح جوه جرابي .. راح هو جوه يدور بالبيت …

من مالكوها بالبيت ، خابرو خالتي ام ايفان اجت هي وجنتها وجهالها  ، يدورون وياهم ، ماخلو مكان ما دورو كلبو البيت كلاب حتى بالكاونتر دور ، جوه تخم ، بالزرع بالحديقه بالسطح جوه درج بالحمامات  ..

خالتي تكول جاهل بهل عمر يختل من اهله لو ينام بزاوية بالبيت بختله ويغفل عنهم وتالي يكعد من حاله ويرجع ..

دموعي ماوكفت احس عيوني تحجرت ، صدري ورم صار حجر ، كل ما افكر بنتي ماكو انجنن ، والله اجه كلبي يوكف نبضاتي صارت حاده على ثانيه يوكف كلبي ..

للمغرب هي ماكوو ماتحملت بعد ضليت اعيط اريد اطلع للشارع ادورها .. ابن خالتي ايفان دك على شرطه .. سيروان وهبه اجو من خابرتهم تالا …

هبه كالت نوب المنطقه زراعيه ماكو كامرات ولابيوت قريبه منكم حتى نعرف اذا شافوها او كامراتهم صورتها …

غطيت راسي بديه ابجي ياايمه سوده عليه. بنيتي ضيعتها ..

حجه سيروان يهمس خاف اخذها ابوها ..

شهكت تالا هاااااا ولج ميرال خاف ابوها اخذها ..

رفعت راسي ممصدكه مستحيل مستحيل يسويها مايحرك كلبي بيها جان كلي اذا راد ياخذها يكلي وياخذها بالقوه مو يخطفها …

نترت بيه تالا .. ولج كلب ابن كلب حرامي مجرم شنو مستحيل يسويهاا حرامي،يبوك كلشي مايبوك بنته ..

هزيت راسي مايسويها لو يريد ياخذها غصب عني كبال عيني مو يخطفها …

حجت هبه .. هو مايندلكم ولايندل البيت لاتظلمين بخته تالا …

حجت تالا بعصبه .. صعبه عليه عبالج شيطاان والله شيطان بعينه كلشي يعرف ، ويعرف رقمها صعبت عليه ان يندلنه يراقب اي واحد بيكم ويندلنه شنو صعبه قابل على واحد مثله …

حجت خالتي اشتكو عليه ماما لاسكتين ..

اجه ايفان حجه اكو اثر اطارات سياره على الترابي باين جانت واكفه قريب البيت وبعدها تحركت .. البيش مركه يكول مانكدر نسويله شي ماكو كامرات او اي شي …

كمت لحيلي ابجي طلعت للطرمه اعيط اني ادورها اني الكاها ، طلعت للشارع ركضو وراي يرجعوني للبيت ، تالا مجلبه وتصيح والقران عد ابوها نكس هو اخذها نشتكي عليه …

هبه تكول عيونج صارن فص مال دم صار عندج نزف يمكن اوكفي دمرتي العمليه .. رجعوني كوه اني ادفع بيهن ماكدرت الهن ، شربوني مسكن ، وشدو عيوني كوه بشاش ، راسي،شلون الطبل هبه جابت الي حبايه وجع راس شربت اثنين …

كمت لحيلي ادور بغرفتي خاف جوه جربايه نايمه لو بالكنتور خاتله هي مامسويتها كبل بس كلشي يصير .. لحد ما دخت وكعت بالارض مغمي علية …

فاقده بس والله افكر بيها ، كلبي ممرود مره حتى نفس كوه اجره اون باسمها وذكراها ، مادري شكد نمت شكد فقدت بس لكيت المغذي بيدي ..

نايمه يومين يومين كاامله الي نطتوهم الي هبه جانت الحبوب منومه مو مسكن ، نازل ضغطي بسبب دوا شكلو الي مغذي ينزلة ..

كعدت مكسره عضامي تصل ، صوت تالا يمي همست هيف …

لزمت ايدي شلونج ..

بنتي ؟؟؟

جرت نفس دكومي والله كريم …

مالكيتوها مووو …

موبايلج دك ثلاث مرات اكيد هو كومي حاجي بالكت يرجعها …

بيبر ..

اي دك من رقم غريب ، من ارد مايحجي يعرفني تالا من صوتي ،  يسده بوجهي  كبل ، من يدك جاوبي ، وكوليله يرجعها ،

هزيت راسي مايقنع اخذها ديحرك كلبي …

حجت هبه .. كوليله مريضه انتي وضغطج صاعد وعيونج نزفت ، حاولي تكسبي بالكت يقنع او يعترف هو خطفها دنسجل صوته حتى نشتكي علي بالمحكمه هذا اثبات عليه ..

جيبي موبايلي ، دكت على نفس الرقم طلع مغلق .. مرتين دكيت مغلق ..

ثالثه، رابعة ،الخامسة الى وصلتها لل١٩ مره مارد ..

فتحن شاش عيوني وخلولي قطره و رجعو دهنوها الي ، ورجعن لفنها حتى لاتنزف او تتلف العين البجي ..

شسوي بالنظر واني جنت مشتهية شوفتها ماكوو ، صدري ورم بشكل مخيف ، برغم اني قليل ارضعها بس ورم صدري ، ماي دافي وحاولت افرغه موت احمر الم يموت ..

ابجي واعصر بي ، يادوب شوي فرغته ، اكل مااكل روحي لعبانه ، حمد وخالتي ام ايفان يمنه هي وهبه ، رجل خالتي يكول ماعنده اي دليل عليه كلشي منكدر نسوي ..

طلعت من الحمام لازمه صدري ، صاير بي دغاليص ، ذبيت ستيان ولبست رياضي ، صفنت شوي شتاكل هسه شنو شربت ، ماتاكل من ايد احد بس،مني ، ماتشرب اي حليب هيه متعوده على بطانيتها ، على العابها وممتها كزاز ام الغطى الاخضر .. سندت نفسي على ميز ابجي رحمتك يالهي رحمتك تدري هيا اغلى شي عندي ليش تحرمني منها ..

يارب لاتختبرني بنتي لان حفشل بهل اختبار ، مااقاوم ولااصبر ، مالي طاقه بهل الاختبار ..

مرت يوم و يومين وكلشي ماكوو .. تخبلت رسمي ..

تذكرت رقمه جان دزلي مره رساله منه .. رحت للموبايل ، بصف الموبايل اكو صوره الها تالا سوتها الها بعيد ميلادها الاول .. خليتها برواز ..طخت ايدي بالبرواز .. ياااوجع كلبي ويالوعتي يابنيتي ..   جريته موبايل وطاقتي صفر والله .. ، فتحته عن طريق نظام صوتي ، دكيت مره واثنين وثالثه رد ..

بس سمعت صوته نزل شكو غل بكلبي عليه ، حجه ها ام هيف …

بجيت مقهورة …

حجه افااا منو وياج ..

رجعها بيبر لا تاذي كلبي بيها حرام عليك ..

شنو هي ..

هيف بيبر رجعها تعرف داموت اني لو لاا ، ضغطي صاعد على ساعه انجلط عندي جلطه قبل لاتستغرب اذا متت بسبب افعالك ..

نتر بخوف .. شكوو. شبيج البنت شبيها ..

عطت بي ، البنت مو خطفتها رجعها  داكلك ، رجع البنت متعوده عليه م.. قاطعني بعصبيه وعياط شرجع ولج مماخذها خبله انتي ووين البنيه شلون ضاعت منج …

بجيت لاتسوي هيج بيبر لاتنكر  ..

ولج مماخذها وحق الله البنت وين ، شوكت ضاعت احجي فهميني ، اريد احجي فززتني تالا من جرت جهاز من اذني وعاطت بي ، ابن نعال انعل ابوك لابو الخلفك يانكس ، رجع البنيه ترى اشتكينى عليك والله لانجرجرك بالمحاكم يامجرم وصلت بيك المواصيل تخطف الجهال شسوي بيها تربيها على وصخك ودنائتك ..

بجيت اني كعدت بالارض مهدود حيلي همست يكول ماعندي يكول ماعندي لعد وين …

وتالا ترد وتغلط تالي سده بوجها .. عاطت الحيوان سده النذل والله الا افضحه النذل عاطت بيه حجه شكالج ..

همست يكول ماعندي ..

نترت جذااااب النذل هذاا المجرم قااتل جذاب …

بلعت ريك ، ماعنده جان حجه ..

قابل ينطي لزمه على نفسه ، خالتي حجت على كيفج يما سويتي غلط جان بكلبه رحمه هسه راحت بسبب كلامج ..

هبه ردت جان حجيتو وياه بسياسه بالكت ينطق ويعترف دنلزم عليه لزمه ..

بجيت اني كال ماعندي والله شبيكم ..

.عاطت بيه تالا بجزع ولج وصدكتي عنده والله عنده منو غيره يردها مثلا .. لو ناس خاطفتها غربه ويردون فديه جان اتصلوو ..

حجيت .. والرقم الغريب دك وينه ..

سكتت ..

هبه حجت.. معقوله ناس غرب خطفوها يردون فديه ..

خالتي حجت كافي ادعو ترجع بالسلامه رجل خالتج وشرطه جاي يدورون ، ماكو شي يروح ويضيع هنا بدهوك ..

درت وجهي ابجي ، طلعن من يمي يحجن ، خالتي تكول ادعو من ربجن عند ابوها ، على الاقل عند احد يخاف عليها مو يم غريب يمكن تنباع يمكن تتهرب.  ..

خليت راسي بين اديه مرعوبه يااايما يااهيف يحظج يااميرال تاليتها تروح بنتج تهريب لو تنباع ..

زين اتصل على بيبر يدور عليها .. اي خلي اتوسل اله يساعدني اكيد يلكاها هي هم بنته .. كمت على حيلي بسرعة بكل الاحوال ان جانت عنده او عند غيرة لازم يرجعها الي اني امها اولى بيها وهي بنته مو معقوله يقبل تروح من عدنا حتى لو بينه خلاف .. ركضت لتالا ..

تاالا تالا انطيني موبايل ..

نترت شسوين بي ..

انطينيا كلت ..

غير افتهم ..

جيبي عاد .. حجت هبه انطي الها خاف احد يدك ..

هو لان خاف احد يدك خلي عندي هاي اعصابها تلفت ..

عطت جيبي داااكول ..

شمرته  على صدري دهاااج يالفاهية .. دكيت على اخر رقم ، مارد .. مرتين وثلاثه مارد..

حجت مو كتلج عنده لو صدك ماعنده جان كلب دنيا ، بس مطمأن وباله مرتاح حرك كلبج وراح يذلج بيها ويجوز يشرط عليج  يرجعها بشرط ترجعين اله …

بلعت ريك سندت نفسي على الحايط ، كلبي يدك حيل عبالك نبضات ادك براسي ..

كل دكه تسطر البال ،  كعدت بالغرفة بعيد عنهن ، ابجي ممصدكه نوب اسكت اكول ترجع ، من اذكر شنو اكلت شنو شربت ارجع ابجي بنتي واعرفها حال الضيم حالها هسه ..

ليش اخذها ماخاف الله بيه ، ماكال الي سويته مو قليل اعوفها عاد ترتاح شوي من الهم ، شلون عنده هيج كلب شلون هنت عليه …

من يسمع صوتها تبجي وتشهك ماينكسر كلبه .. دنجت اشهك وابجي مقهورره مقهووره حيل ، ياعمري ياماما من تبجي هواي محد يمها تضل تردد ممه مما …

كلبي ممرود حسبي الله عليك حسبي الله عليك  كون ماشفت راحه يابيبر كون ماضوك طعم الراحه ولا النوم الهني على هالدكه وعلى هالوجع الكلب وحركه الدم الي اني بيها ..

والله غفيت بمكاني بالارض ، جو جان ربيع ، بس بدهوك بارد ، جسمي جمد بس روحي ناار نار من داخل ، كلت ماكو غير اشتكي عليه بس يصبح الصبح ، ارفع عليه قضيه خطف ..

ردت بس يصبح الصبح ، كعدت ب١٢ باليل افتر بالبيت روحي لايبه صدري يجري حليب من اشوفه هيج اتخبل اكيد جوعانه ميته جوع اعرف… اوكف على سنك اغسل بي وابجي ، افرغ منه شوي واشهك سوده عليه يايمه …

خالتي تبان يمنه صار ايام ، هبه رجعت لبيتها ، هن نايمات بصاله وكرم يمهن ..

فليت شاش من عيوني ، تعبت منه ،  اجت عيوني بس نزلت شاش على الصورة الي بالبرواز .. جريتها يااكبد امح وقطعه من روحهة اذا مو روحي كلها .. طلعت من هدنيا بس بيج تالى هم اخسرج ..

لزمت صوره وطلعت للحديقة ، اجر نفس ، ماكو نفس وراحه بعيد عن بنتي ، ضيعتها هي بس هالطفلة وضيعتها من هاي الله مانطاني خلفه لان جايفه عوبة مادبرها ..

كعدت بالكاع صوره بحظني لزمت الثيل بارد حيل ورطب ، هدومي تنكعت من جوه بسبب ندى بالثيل ، الله لايضوكها لاحد ..

ما اتمنه هالشعور وهالام لعدوي والله تحس نفسك دتموت على بطيئ نفس ماتكدر تتنفس الدنيا تسود بوجهك شكد جنت مشوقه ومتحمسه اشوف ..

هسه الصوره عنده واضحه واشوف زين بس ذرن فرح ماكو بكلبي بالعكس اموت ميت موته من اشوف فراشها فارغ والبيت مابي صوتها ولاخطواتها. ..

كل يوم ثاولتني ثول بس اركض وراها ماحس بالنهار بسببها يادوب اخلص طلباتها واحتياجاتها ، هسه النهار شطوله هو واليل ، البيت هادئ حتى كرم خانس ماله حس …

البيت ممل مابي روح مابي عياط وصراخها وتفالها وعصبيتها ، بردت حيل جمدت بسبب الجو رجعت جبت بطانيتها وبطانيتي وطلعت بره ، كعدت على كراسي خوص خاليهن بالحديقه ، لفيت نفسي بطانيتي وحظنت بطانيتها بيها عطرها جوز الهند صورتها على صدري مافاركتني  ..

مرسوم علي البطانيتها غزاله ورديه ، حظنتها ابجي ، استودعتج يم الي خلقج يارويحتي امج ثوله وضيعتج من اديه بس عهد علي لارجعج لو اعرف افر محاكم العراق كلها الا اطلعج من عيونه لهل ظالم. ..

اعذريني مو خوش اب ابوج ، ظلمتج ماختاريت الج اب زين ، ظالم مايخاف الله ، ياحوينه دموعي وخوفي عليك يابيبر ، ياحوينه سنيني ضاعت واني انتظرك تنعدل ..

غفيت بمكاني اتحسب عليه ، ومتحسفة على ايامي وياة ، ماعرف شكد غفيت بس حسيت على احد طخ وجهي ، وانسحب البرواز من حظني ..

فزيت فزه شهكتي وكفت نفسي لثواني ، فتحت عيوني احد كبالي من قربه حتى وجهه ممبين ..

توه مفتحه صورته مغوشه .. رجعت نفسي ليورة مخترعه لميت البطانيه على جسمي رفعت راسي علية ..

ليش نايمه بهل برد ..

ارتفع صدري من اتنفس سريع …

هااا … لازم صورة بيده  يباوعلي ..

بلعت ريك مانطقت حرف ، من صدمه ، هوو ورب الكعبه هووو بطوله وبعرضه بصوته بكبريائه هووو بس لابس كاسكيتة ولاف لفاف على ركبته ونص وجهه..

عيوني علية مانزلت ، دنيا جانت فجر ، شمس ماطالعه بس اكو خط برتقالي ينذر ان قريب تطلع …

سأل .. اكو كامرات بالبيت ..

طلع صوتي كوه بخوف .. هيف عندك ؟؟؟

رفع حواجبه حرك اديه كبال وجهي .. شوفيني مو ..

دمعت ريت ماشفتك والله بنتي عندك ليش بس كلي ليش .. قاطعني وداعت عيونج اشر عليهن .. ماعندي مو غبي اني اخذ الطفله عندي واني وضعي مو تمام حاليا واخليها بخطر مو لهل درجه ياميرال تظنين بيه سوء ..

كعد كنبص كبالي  ، دنج راسة على صورة تلمس الصورة بهدوء  مبتسم ، صافن عليها ، ثواني حجه ..كالو جميلة بنتك بس ماتوقعتها هالكد ، حتى اجمل منج ..

دمعت عيوني .. همست احلف مماخذها ..

رفع نظره عليه .. رفع اصبعه .. شكد اذيتيني بس مافكرت بيوم اذيج لو اقهرج بيها ..

غدريتيني انتي وذاك الي سميته  صديقي وعزوتي ، بس مافكرت بيوم اقهرج مو عاد اخذ بنتي وابهذلها وياي بعيد عن امها ، بس سمعت ركبت سيارة مافكرت اني ممنوع عليه اطلع من البيت لان بعدني مطلوب ولافكرت اكو خطر على حياتي  …

بجيت دنجت ابجي .. لعد ووين راحت منو اخذها ..

عدكم كامرات بالبيت …

هزيت راسي ..ابجي لاااا ..

جر نفس ، شوكت اختفت …

قبل اربعه ايام العصر والله ماغبت عنها غير ثواني دخلت اجيب شغله من البيت وعفتها تلعب هنا .. اشرت اله تلعب هي وكرم ، طلعت مالكيتها بس باب السياج مفتوحه وحذاىها منزوع بجيت من تذكرت حذائها ..

تك حذاء لكيت .. دورت عليها ماكوو ركضت بكل مكان ماكوو خابرنا الشرطه كالو اكو اثر اطار سيارة بس ماكو محد يعرف شنو هالسيارة …

صفنت شوي  انداريت عليه صافن على سياج ساكت يسمع كلامي ..  عاقد حواجبه .. من اكول هيف بس جبيرة محد يصدك نفس الوجه نفس العيون والحواجب خصل من شعره طالعه من جوه كاسكيته لونهن اسود …

حجيت احد يكرهك اخذها ؟؟؟

اندار عليه باوع بوجهي صافن وساكت ، رفعت حواجبي مووو اكيد بسببك ..

رمش بهدوء بجزع كام لحيله ورجع ليورة ، حبقى كم يوم بدهوك دشوف شنو سالفه ..

كمت بسرعة ، اذا احد يكرهك اخذها معناها ياذيها ..

ادعي مايصيبها شي اذا صابها شي اول ناس احاسبها انتي دار ظهره ومشه بسرعه بدون ما ينتظر رد مني ،  الصوره اخذها وياه ..

صحت وراه صورتها اريدها …  وكف منطيني ظهرة ، دنج راسه على صوره الي بيده ..حجه حتى صورتها استخسرتيها علية ، ويه الكل كريمه بس وياي بخلتي ..

ضليت بمكاني جامده ، مانطقت كمل مشي وصوره عنده ،  جزء مني ارتاح لان اكو احد حيدور عليها من صدك انسان جدي ويهمه الموضوع ، اديه تطول كلشي هو ماينظم عليه شي حليكاها ..

بس جزء الثاني مرعوبه وره ميلكاها شراح يصير حياخذها بحجه ماعرفتي تحافضين عليها راح يستخدمها وره ضغط ضدي وياذيني ، صدك كلامه لو كذب ..

ماعندي ذره امل غيرة مابقى باب ادكه غير بابه ، الوقت ديمر والبنت ماكو المن الجئ يعني ، يبقى ابوها وافرض يدور وياي خاصه هو عنده معارف هواي يعرف شلون يطلع الانسان من جوه الكاع ..

لحد ما صبح صبح اني على كعدتي ماتحركت ، صار سنين او اكثر مشايفته ، ماكو حنين بصدري اله ، بعدني للاسف اصدكه من يحجي مااعرف ليش ..

جزء مني يصدكه ةجزء حذر ويخاف ، دخلت للبيت بعد ماتكسرت من كعده الكرسي ، البيت هدوء محد كاعد ، دخلت لغرفتي عيني على فراشها وملابسها بسلة ، كلبي ممرود والله ميت الف فكره بالي تجي ، ميته لو عايشه ماكله لو جوعانه ..

كعدت على جربايتي كبال كاروها ابجي ، رحمتك يارب بكلبي رحمتك بيه واني يتيماا ، لاتوجع كلبي بطفلتي ، لزمت لعبتها امسح عليها ..

دللول ياهيف يايمه دللول،

دللول ياوحيده كلبي دللول ..

دللول يانظر عيني للي ماتهنيت بي دللول ..

دللول عدوج بعيد وساكن الجول دللول  ..

غفيت بمكاني وودمعتي يبست على خدي ، من كثر البجي هدب عيوني ورم يمكن العمليه التهبت بس اخر همي ، انام واكعد من حالي ..

فقدان وعي ماعرف هروب من الالم والوجع والقهر .. كعدتني هبه كالت صار هواي نايمه ميرال كعدي اشربي دوه على الاقل ..

جنت مصخنه حيل كعدت جسمي منعنع ، عبالك ممرود ، شربت كلاص حليب واخذت دوه عيوني و خافض حرارية .. رفعت عيوني جهاز يم راسي ، همست الها هم احد دك عليه ..

لا ..

همست اجه بيبر هنا ..

شهكت هاااا كولي والله ..

هزيت راسي كال حدور عليها ..

تاكدتي مو عنده ..

شنو حيستفاد اذا اخذها هي هم بنته مو معقوله يحرمها من امها وهي بهل عمر هبه ..

كعدت يمي وسكتت ، شوي وحجت شوكت اجه ماشفناه ..

الفجر ..

شنو كلج ..

ماحجينه هواي …

ماعاتبج ما لامج على شي …

الغلط راكبه من راسه لحد رجله ، اذا اكو احد اله حق يعاتب او يلوم فهو اني ..

شلون شكله ..

شدخل شكله ..

ابتسمت مو شفتي ، ماحن كلبج من شفتي ملامحه ..

كلبي يم بنتي مو عندي حتى احن اله ..

يشبه بنتج يكولون ..

اي هواي حتى طبعهم يشابه …

شلون اندل البيت ..

مايصعب عليه شي هذا ماشوفيني سكتت على جيته وستعانيت بي بالكت يلكاها اليوم …

اذا رجعها شيصير ..

دخل ترجع وكلشي يهون لاجل عيونها ..

اذا شرط عليج ترجعين اله ترجعين ..

زحت نظري عنها،  سكتت ضايجه  .. حجت مو قصدي بس داستبق الاحداث ..

رمشت بعيوني ساكته ، الله كريم لكل حدث حكمه من ربنا ..

للمغرب ماكو خبر .. دكيت عليه مارد قافل جهاز .. لليل دكيت هم. ماكو يطلع مغلق ، تلوعت تلوع والله حتى تقيأت دم ، صحتي تدهورت حيل صخونه على وجع راس على تقيا …

اكل مااكل بس اشرب عصير صدري فرغته مره وحده حتى الحليب احس جف بصدري .. خالتي ام ايفان تروح وتجي يمنا ..

مددت بصاله انتظر رحمه ربي .. هبه جابت الجهاز الي حجت دك دك .. هو اكيدهو …

رديت متلهفه الوو..

اجاني صوت بجيها ، شهكت يماااا هيف يمامااا يعيوني ياامي ..

صوت بجيها يوجع الكلب والله يمرده مرد ، سبحان الخالق الام تعرف طفلها من بجيه جوعان شبعان متضايق متعور ، بجيها مال وحده متاذيه وتصبح امااااا ..

ياعيوني ماما شبيج يعمري .. الوووو الووو رجعلي بنتي بروح غواليك شنو تريد انطي بس رجعها فدوه لرجليك ..

لازم جهاز وابجي واتوسل هبه يمي تبجي لازمه جتفي وتالا تكول كوليه شيريد انت منووو ..

حجيت منو انت هااا بنتي ليش اخذتها ..

سد جهاز .. يماا سد جهاز لو لوع كلبي عطت كل حيل فقدت حيلي وصبري بعد .. ديلعب باعصابي بنتي دتبجي مدري شبيها ديضربها ماعرف مجوعها ماعرف بردانه ..

كعدت بالكاع اعيط واضرب براسي هبه نايمه على اديه وكرم يصرخ خايف تالا تبجي رجعت تتصل على الرقم ماكو رد …

مره واثنين لحد ماغلقه ..

صوتي بح والله من العياط والبجي ، خشمي نزف دم لان ضربت وجهي من القهر ، دكت تالا على بيبر تصيح . انت الخابرت موو تحرك بدمهااا انت جاي تلوعنها عليهاا ، ياظالم ماتخاف الله تبجي البنيه وتخلي امعا تسمع صوتها وتتخبل .. تعاركت هي وياه نوب تمالخوو ...

حجه لاتردن على اي اتصال دستفزوكم لاتردن يريدون يتلاعبون بينا …

عطت بي منووو ولك منوووو بنتك تبجي وتعيط متاذيه منوو هذول شلون كلبك بارد هيج ..

عاط بجهاز شسووي يعني شبيدي جاي ادور لا تخبصيني ولتردين على اي رقم افتهمتي .. وسده وراح ..

مايفتهم ولا راح يحس ليش هو وين شايفها ويعرفها بس الاسم اب ، مايحس بناري محد ضايع ابنه غيري ، هسه الكاه كاعد بملهى لو بمطعم وناسيناا جوز حتى نسى سالفه البنيه …

كلت اروح للشرطه واقدم الرقم ، بس ساعه ١١ ونص باليل تقريبا يا شرطه هسه ..

كعدت انتظر يصبح الصبح ، كرم نام بحظن تاالا بالارض ، اخذته لفراشه ورجعت يمي تهون عليه ومره تدعى على بيبر ..

كمت افرغ صدري ، احسه ينفجر من الالم .. مابي حليب بس يوجعني مووت .. دخلت للحمام اغسله بماي دافي مورم مدغص ، مابي حليب بس شوي ، نشفته وطلعت الزم بالحايط دايخه ..

اسمع تالا تحاجي هبه ناوي يخبلها بيبر ، يعرف شكد متعلقه بنتها دينتقم منها بهل طريقه..

تتوقعين هو ، ترى يحب اختج باين علية مستحيل يسويها  …

ماكو غيره والله ماتعرفي ماشفتي شلون مثل حية يلدغ ويضم راسه ، كتل اخو ،الي من دمه ولحمه ، فوكاها كربس براسه كل شغلهم الاعوج ، حتى يطلع منها هو ، بربج هذا يرحم بميرال الي شهدت عليه بالمحكمه و وكفت ضده ويه خالته ورجل خالته ..

.. بس ميرال مالها شغل هم بينهم ناس ذبحت ناس ، بسبب الطمع ، انتن كلتن هيج ، ..

هو صح ناس ذبحت ناس ، بس هي هم جان الها ايد جابت حجي ودت حجي وفتن بين هذا وذاك ، وبيبر مو غشيم اول وتالي يعرف منو باعه ومنو نطى اسرارة ، عدي بنفسه حجه بيوم المحكمه وكال خابرتني وكالت الي كتل مرتك وابنك عواد وبيبر طمطم سالفة اله ..

فزت هبه عزااا العزاااجن اي والله ،

ردت اي والله غير صارت مذبحه قبل كم سنه الله حبنا وطلعنه منها والا جان رحنا بالرجلين ، بيبر مانسى عبالج ينسى هو اخو ماسامحه وقتله لان غدر بي عاد ميرال .. لايبجيها دم تعرفيني بي ..

هو بجها دم شبقى بيها ، دشوفي حالها حال الضيم ..

شبيدي عليها ، سبحان الله مامكتوب النه راحه ابد رجعنه لنقطه الصفر ..

سندت ظهري على الحايط ، نوب كمت مامن ، حتى بيبير خفت منه .. واذا ابوها منو يكول يحبها ويخاف عليها ، عمره سنه ونص ماسال عليها ولاحتى حاول يشوفها ، برغم يكدر كلشي يسوي ، بس ماتقرب الها ماعنده محنه عليها  .. رجعت للمطبخ كعدت هناك ، ماظل غير بس اعتمد على نفسي وادور لوحدي ..

جريت جهاز ورجعت للرقم دكو اخر مره منه رجعت دكيت ماكو جواب ، بحثت عن الرقم بمواقع تواصل ، محرك البحث بالكاشف الخط مابي اي اسم ..

اجت هبه حجت ماتنامين ..

رديت لاا ..

ادعي وصلي ميرال بالكت ربج يفرجها ويرجعها الج ..

دمعت دنجت راسي ، اني هم مقصرة هواي بالصلاه من ولدت هيف لحد هسه حتى عباده مثل الاوادم ما متعبده ..

هزيت راسي اي ، رحت اسبح واصلي ، عفتهن هنه يلمن بصاله يردن ينامن ..

طلعت من الحمام .. حجت تالا تردين شي راح انام تعبت ، هزيت راسي تصبحين على خير   …

دخلت الغرفه هي وراي مرتبكه .جرت نفس ضايجه ، شوي وحجت خايفه .. لازعلين مني ميرال من اعصب من قهري ترى ، بنتج مثل بنتي ، بس فهاوتج وكلبج الطيب يوترني مااحس بامان من اشوفج هيج،  فكره ان نرجع جوه اديهم مره ثانيه تخرعني ، اذا صارت الهم سلطه علينه مره ثانيه محد يخلصنه منهم ..

احنه ماصدكنا طلعنه وصارت النا حياة بعيد عنهم ، حياة مابيها مشاكل ولا قتل ولا اجبار على شي ،

فرشت مصلايتي مارديت عليها .. وكفت البس حجاب الصلاه. ..

ميرال لاتامنين بي والله يغدر بيج ، المثله ماينسى الاذى يحقد مثل مااحقد على خالته ورجلها ..

بلعت ريك مدمعه  ما جاوبتها .. رفعت اديه الله واكبر ..جتفت اديه ونزلت دموعي ،

بِسۡمِ ٱللَّهِ ٱلرَّحۡمَٰنِ ٱلرَّحِيمِ (1)
ٱلۡحَمۡدُ لِلَّهِ رَبِّ ٱلۡعَٰلَمِينَ (2)
ٱلرَّحۡمَٰنِ ٱلرَّحِيمِ (3)
مَٰلِكِ يَوۡمِ ٱلدِّينِ (4)
إِيَّاكَ نَعۡبُدُ وَإِيَّاكَ نَسۡتَعِينُ (5)

رجفت شفتي واني اكولها لهل اية رددتها مرتين وايأك نستعين ، بجيت ماكدرت اكملها .. مسحت وجهي ومدموعي وكملت ..

ٱهۡدِنَا ٱلصِّرَٰطَ ٱلۡمُسۡتَقِيمَ (6)
صِرَٰطَ ٱلَّذِينَ أَنۡعَمۡتَ
عَلَيۡهِمۡ غَيۡرِ ٱلۡمَغۡضُوبِ عَلَيۡهِمۡ
وَلَا ٱلضَّآلِّينَ …

امين …

كمت صلاتي وكأنها اخر صلاة الي ، بجيت بيها بكد بجي على فراك بنتي , وكانو احد فتح صدري ويشلع وينزع الحزن والقهر نزع ، روحي انسلخت ، صخنت صايرة اصخن بسرعه .. وجهي نار ، وعيوني يحركني جمر عبالك ..

فرشت بالارض ونمت على مصلاية ، خليت اديه جوه راسي وغمضت انام ، ماريد افكر تعبت من التفكير ..

ماغفيت بس غمضت عيوني والله جان هذا الحلم بالتفصيل .. بشر كصير وبشع بشع حيل ، صعد على راسي ويضحك ، اريد بس ارفع راسي منه مااكدر ، ابجي واصيح ماكو ماكام ولاتحرك عود كاعد على راسي واديه اثنينهم مجلبه بشعري مثبت نفسة ، ويضحك ضحكه يخوف ..

انكتم نفسي ضليت ارفس ، فزيت فزه ، وكانو احد كلب عليه سطل ماي بارد .. كعدت افر براسي ابجي قل اعوذو برب الفلق .. سلام قولا من رب الرحيم ..

ماكو احد  درت وجهي يمنى اعوذو بالله منك ، ضليت اشهك وابجي.. اعوذو بالله منك ..

ماكدرت انام ضليت افرك بصدري ، سندت نفسي على الجربايه وضليت بالكاع اقرا معوذات ، جهازي يضوي ..

جريته بسرعه رساله من رقم غريب ،،

تردين بنتج ؟؟

فتحت عيوني ..

دكيت كبل على نفس الخط .. دك مارد ..

دز على الوتساب .. بنتج مثلج عنيده ..

اديه ترجف اريد الزم جهاز ماكدر دكيت مارد ..

حجه لادكين البنت نايمه لاتكعد وتعرفها من تبجي ماتسكت ..

خليت اديه على حلكي ابجي كتمت الصرخه بدايه ، دنجت على موبايل اريد اشيله مااكدر انشليت والله كلبي دكاته الف ..

لزمته تك ايده اريد اكتب مااكدر ..

اجت صوره .. ماتفتح .. ثواني وفتحت يااايمه رويحتي ، يااايمه عيون امها وكلبها  ، نايمه على بطنها ،  ولابسه ملابس ولادي ، شورت وفالينه ، والهاية بحلكها … طكيت بجي من شفتها …ضعفانه الله يشهد باين ضعف عليها ..

يادوبي كتبت .. ليش …

رد .. ليش شنو ؟؟

الاملاء عندي صار صفر بسبب الخوف والارتباك ، عيوني عمت من البجي حتى شاشه ماواضحه بس جنت اكتب واحاول ماردت يسده اريد بس فرصه دافتهم ..

ليش اخذت هالطفلة عندك ثار وياي لو ويه ابوها طفله شنو ذنبها ..…

ثاري وياكم اثنينكم .

منو انت …

الموت …

سكتت ابجي اخترعت من الكلمه ، ماكدرت اكتب حرف بعد ..

رسل .. باين ماترديها ترى ماجاي تاكل ، وبطنها سهال ، راح. يصير عدها جفاف ..

ضليت اشهك يارب رحمتك .

شتريد شنو تطلبه فلوس عندي والله انطيك اضعاف الي تطلبه بس رجعها ابوس رجليكم ، والله احولك المبلغ تطلبه والي تريده على اي حساب من باجر  ..

منو كلج رايد مقابلها فلوس ..

شتريد ..

روحكم …

منو انت ..

تسوين اي شي علمود ترجعيها سالمه الج …

كول ..

سكت ماكتب شي …

كتبت بعد مافاض صبري .. احجي شتريد ..

ابوها وين ..

صفنت خايفة ، حتى دموعي جمدت بمكانها مانزلت  ، رديت ارجف اكتب الكلمه كوه ونصها اخطاء املائيه وارجع امسحها ..

بدعوك …

مارد …

اقصد بدهوك ..

شيسوي ..

سكتت ..

ماراح يلكاها صار الها اليوم الخامس عندي ، جاي ارتب الها فد ترتيب اخفيها عن الوجود الله يشهد .. تنسين حتى شكلها  ..

شتريد .. بس كول طفله مالها ذنب بشي ، اذا عندك ثار وياي ويه ابوها اخذه منه …

شكد جوه ايدج فلوس ..

جريت نفس براحه .. شكد تريد ادبرلك ..

شكدعندج …

جوه ايدي مو مبلغ جبير ،  اني بس مستعده اسحب الك المبلغ الي تريده باجر من صبح ..

حظري اوراقج ومستمسكات ..

حجيت بتلعثم … اوراق ش شن شنو يعني بالضبط ..

اوراق تسمحلج تسحبين فلوس من اي بنك ، وباجر من صبح تطلعين لعنوان انطي الج ، تطلعين بطرك روحج ماوياج اي بشر .. اسمعي ام هيف كلمتي ماتتنثى ورب العزه ..

فرصتج هاي  بس احس لعبتي بذيلج تنسبن بنتج بعد ،

رديت لا لاااا والله لاا محد يعرف بس كول العنوان …

العنوان اني ادزه باجر من احس بيج صادقه تطلعين من البيت وترحين لل…… توكفين هناك لحد ماانطيج عنوان المكتب تسحبين منه فلوسج ..

حجيت وهيف ..

اني اقرر شوكت تستلميها .. رحمت الطفله ماريد ادخلها بثاري ، بس وداعت اغلى ماعندي امحيها للطفلة اذا عرفت جاي تتذاكين وياي ماينلعب علي ترى ..

حاظر صار والله .. بس صورها الي بداعت كل غالي عندك داشوفها ..

لاا صوره هواي عليج اصلا .. وقفل الجهاز بعدها .. دكيت راسلت ماكو رد …

كمت لحيلي الوب نااار وشرار بيه المن احجي المن اكول ، هااا اروح احجي الهبه .. لاااا .. زين بيبر ..

دنجت لازمه راسي حموووت ياربي راسي حينفجر ، المن احجي و اشكي المن اسال واستعين ..

طلعت بره مثل الخبله اريد اغسل راسي بماي من براد ، جريت سراحيه من براد الثلاجه ، خليت راسي بالسنك وصليتها فوكاه شهكت شهكه  اختنكت بيها ..

صوت مشي سريع  كانو احد طفر .. فززت تالا من نوم .. حجت  مخترعه شبيج ..

خاله راسي بسنك وانكع بي بالماي بارد …

مارديت غاصه بالبجي والحركه …

ميراااال جاي اسوين اجت بسرعه عليه جرتني ولج دنيا بارده من كل عقلج…

جرتني حيل كعدتني على الكرسي بالقوة ..اخذت منشفه من فوك باب المطبخ تنشف بيه عصبيه وتنتر ..

..فززتيني يمعوده صايره بيه خوغه من اي طكه بالبيت ..  مارديت بس ابجي ..

ميرال ترى مو زين عيونج انتهن والله خربتي بام العمليه ، دكااافي بجي يرجعها هااا جم ساعه ويصبح صبح ونروح لمديرية لمركز شرطه اي صخام يساعدناا عيونج ودموعج مترجعها .. اذا عميتي ياهو يعينج يااختي ..

مارديت ضلت تنشف بشعري حيل معصبه ..  

انعل ابو الدنيا لابو الي يريدها عساة بحركه كلبنا وازود الي ديسوي هيج بينا ، شبيج موته نفسج ترى بلشت افقد اعصابي ميرال لخاطر الله شبيج ..حظنتنتي تبجي شبيج لاسوين هيج …دخاف اني مجاي انام من الخوف احس على ساعه يصير بينه شي لو احد يدخل علينه يقتلنا لو ابني هم ينخطف ويحركون كلبي. ..

خليت راسي بحظنها ابجي .. ضلينا بالمطبخه لحد مابردنا وجسمنا ثلج .. رجعت اني للغرفه بحجه نعست وهيه راحت تنام يم ابنها ..

ضليت كاعده ما غمضت عيوني ، ماعندي غير بس اطاوع الي راسلني واسكت ، رحت فتحت الكنتور ماعندي هواي فلوس جوه ايدي  .. طلعت جنطه مال سفر صغيره تلبس بالظهر خليت بيها اوراقي والفلوس ، ماعندي اي نيه أحجي لااحد ..

متاكده محد يفيدني تالا مستحيل طاوعني ، هبه راح تكول لابوها وتخرب سالفه وينكطع اخر خيط ممكن يوصلني لبنتي …

بيبر احسه مو جدي مااتصل بيه ولاطمني ولا اكو اي خبر منه عافني هيج. عايشه واتكلب على جمر ..

بس شفت الجو بلش يصحى لبست ملابسي ولفيت شعري خليت فوكاه شال … ساعه تقريبا ب٦ ونص .. شلت جهازي خليه بالجنطه وطلعت .. سديت باب غرفتي بهدوء وطلعت من البيت بسرعه ..

طلعت بشارع يصفر ماكو اي حركه منطقه زراعيه لازم تمشي. … مشكله مااندل ولا اعرف وين اروح وين اجي ..
لفيت جاكيتي زين ادفي نفسي ومشيت جو بي بروده وهوا ، بالربع ساعه امشي ، ماكو احد ولا بشر ..

خفت نوب اتيهه ، ضليت امشي واتلفت ماطالعه لوحدي اني داىما اعتمد على احد هالمره بروحي امشي ..

خلصت شارع الفرعي وصعدت على شارع العام ، اكو سيارات بس قليل كلش وتمر بسرعه حيل حتى ماتوكف ولا تبطئ ..

مرت تريله طيرتني الا شوي والله نزلت على الترابي امشي .. سمعت صوت هورن وراي التفتت مخترعه .. سياره حمرة  حمل .. شايله حشيش مااعرف ثيل ليورة ..

وكفت بصفي تراجعت ليوره خايفه ، باوعت اله برغم رجال شايب لاف شماغ على راسه مدري شحجه ، هزيت راسي بستفهام وخوف شنووو ..

كرر كلامه ويأشر بيده لكدام .. التفتت على المكان الي ياشر عليها .. هااا مدافتهمك …

نزل من سيارة اني رجعت مترتين ليورة مخترعه ..اعيط والله وخرررر …

اشر لا لا رفع اديه لسما .. بعدين اشر تكعدين هنا على الكشن ونمشي …

عقدت حواجبي خايفه حجيت وين توديني …

رفع جتافه مادري اشر علي ماعرف شنو كال ..

بلعت ريك ..  تاخذني لمركز المدينة ..

حجه .. تمام .. كل الي افتهمته تمام .. هزيت راسي كررت  تمام ..

صعدت وياه واني خايفه ولامه نفسي ، توه سد الباب التفت علي يضحك يطمني ولان ولا سن بحلكه للشايب ، ، من هاي ما افتهمت اي كلمه منه .. درت وجهي مقهوره على نفسي وعلى هالمسكين شغل سيارة .. توه حركها و تجيني صحيه صخله مدري معزه ماعرف بس هي وحده من الاثنين عطت عيطه ولزكت بالباب حيل …

مدت راسها عليها وتصيح بوجهي هي واذاناتها مدندلات منا ومنا ، وخرررري عني …حاطها بالكشن الورة نوب ،

رجعها الرجال بيد ويسوق بيد وضحك .. وياشر لاتخافين ، خليت جنطه باتجاهها حتى لاتعضني اباوع الها برعب اني شصعدني لو ماشيه مو اشرفلي ، ريحه سياره يكرم الله .. فضلات مال حيوانات ..

خال دجاجتين وصخله و طلي زغير وره ، هذا يمشي ويعبي بسيارته شنوو وشافني وخلاني وياهن .. جهازي دك بيدي .. رفعته تالا .. بلعت ريك ورفضته …

رجعت دكته ، جاوبت مرتبكه هاا …

عاطت بخوف ولج وينج  هاا ..

دد اا هذا دداتمشى …

ميرااال لاجذبين وين انتي …

مالج شغل عنده شغله داكملها …

ولج وينج شنو هالشغله ويه منو طالعه وين تندلين انتي ، عبالي بيج شي اخترعت من مالكيتج وينج …

والله اكمل شغله وارجع ..

شنو هي دكولي طمنيني كلبي راح يوكف ، جاي اسوين وراي …

بلعت ريك اخلص وارجع لاتلحين علي باي ..  سديته خايفه كلبي يدك .. دكت مره ثانيه ماجاوبت …

دكت دكت دكت لحد ماملت تالي خليته صامت .. 

شايب نوب وكف على صفحه نزل راح ركض وره الزرع استغربت يااربي وين عافني وشرد هذااا …

الصخله مدت راسها مره ثانيه عليه ماتحركت ضليت مبحلكه بوجها مخروعه هي صافنه بوجهي ، بلعت ريك خفت والله تعضني اني ناقصه ، سمعت و صوت التفتت اني التفتت وياها على الواهس رجال شايب رجع ركض يعدل بجامته ماعرف صرواله بس لابس بجامها جنها كونيه ..

صعد ورجع ابتسم ، درت وجهي جهازي دك توه انطي رفض عبالي تالا رفعته ، جانت رساله بيها عنوان ، فهيت عليها هاي وين صايرة باله .. دمعت عيوني شلون اروح هاا .. جان عنوان مكان ماعرف لاهو شارع لا هو مكتب ..

درت على الشايب وخليت شاشه الموبايل بوجهه اشوفه الرساله اشترت اروح هناك اني ..

هز راسه تمام .. ابتسمت من جذب دمعتي بطرف عيوني بس لازمتها ، مديت ايدي اعدل جنطتي وطخيت بشي طري  بصف الكشن .. دنجت دشوفه والله بالاول ماعرفته شنو اول مره اشوفة  رفعت ايدي وشميته  ولان يطلع  فضلات الحيوانات .. غاص اصبعي بيها .. جنت اريد حجه علمود انزلهن لهل دمعتين ..

طكيت بجي ، رجال فزز التفت علي مستغرب ويصيح بالكردي رفعت ايدي بوجهه كلها فضلات الحيوانات ..

والله صدك انقهرت طكيت بجي اصيح وووويع  ، وصخله مدت راسها علية مخترعه .. ضلت تمعي  وياي ، مدري شسوي ودجاجه هاجت وبلشت اطفر ريشها ترسنا ، والسيارة بلشت تركص بينا يمنا يسرى ..

ورجال انخبص ضل يعيط هسس هسسس خبصني بالهس واني اديه كلها خ…. مال صخله ..

مديت ايدي نص وجهه وخرا عني .. لزم جف ايدي معصب مسحه بجامته وصاح هسسس عينه عليه وعلى الخبصه صارت بسيارة مطافر مال دجاج وصخله ،  وعين على طريق مالت السيارة وطك بيها شي …

وكفت …

صاح لا اله الا الله …

حجيت مو تعرف عربي ماتحجي لعد ..

التفت علي معصب نزل مزنبر مايتحاجه والله خفت منه ، الاكراد بطبيعتهم طيبين حيل بشكل ، وجوهم لونها وردي اقل عصبيه بنكلبون حمر …

هذا انكلب احمر وعيونه هم انصبغن يماااا ، جن راح يشمرني بشارع ويعوفني ، كلت انجب واتحمل لحد ماوصل ، كعد يذب عليها ماي ويبرد بيها بعدين صعد معصب صاح هسسسسس …

التفت عليه مزنبر  بلعت ريك جمدت  وصد على حيواناته ليوره هم خنسن ..

ردت اعتذر بس خفت بعدين اني شعلي ، هنه حيواناته خبلات اكو احد ينكس بنص سيارة صوجه ممعلمهن الادب والله يالله ..

جتفت اديه وسكتت ..

وره نص ساعه من طريق .. تغيرت الاحوال  رغما عني ، دجاجه كاعده بحظني، وصخله ماده راسها وتعلس بسير الجنطه مالتي ، واني ساكته ومتحمله ..

مسويه نفسي تمثال ، هو غضب ربي هذا اعرف ، اختبار منه ادري  ..

ربي لا تحملني ما لاطاقه لي به ، كلهن التمن عاد ، صعبه ترى ، الدجاجه حاصت وصاحت بيييق ..

نزلت نظري عليها ،  بيق ياعين امج بيق ..  لحد ما وصلت واشرلي على مكان كلي هذا هو .. جريت نفس .. ابتسمت بوجهه اريد اوخر دجاجه داطلع اله فلوس اشر لا لاااا ولزم صدره  .. ابتسمت رحم الله والديك ..

شلت دجاجه لان بايضه على جنطه .. خلف الله عليج مابضتي الا اهنااا شايب شافها صاح الله الله واكبر ماشاء الله ..

ابتسمت مو معجزه هي واني مادري فوك زرابهن علي نوب باضت .. اشرت اله اخذهن شال البيضه ودجاجه ..

فتحت الباب اريد انزل جنطه جلبت التفتت صخله مجلبه بسيرها وتعلس بي …

هدييي خيه عوفيني بضيمي ..  ماتهد مجلبه تعلج بي .  جريته حيل ما تنجر .. يمعووده بالله عليج هديهاا اوراقي وموبايلي بيهاا مااعزها عليج بس محتاجتها .. وهي مجلبه نوب سنونها صفر ونصهن مكسرات لعبت روحي دهديهاااا ..

جريتها حيل منها وهدتها وهي جره وكع سن من حلكها انشلع مدري انكسر … شهكت  هااااااا ..

شايب مدنج على دجاجه يمسد الها .. همزين ماشاف صخلته شصار بيها .. سديت الباب وركضت شارده ..

وكفت كبال العمارة مكتوب عليها العنوان ، ادخل لو شنو ، دخلت لان عيادات مال اطباء ,  شسوي هسه .. دك جهازي رساله ..

فتحته  .. كاتب .. اكعدي قريب سندانه الورد داتاكد محد لاحكج ..

عقدت حواجبي شنووو شمدري اني وصلت ..

التفتت يمنى يسرى ماكو شارع فارغ اصلا .. توه صبح بعده دوام مابلش ..

كعدت وين ماكال وجنطه بحظني ، انتظرت بالساعه سااعه تقريبا كامله لحد مادخت ، لاعشى لا ريوك كلشي ماكو كلاص ماي ماخاله بحلكي …

دنجت دايخه بلشت اغفى دك هورن خرعني .. رفعت راسي سيارة سوده مضلله ..  دك جهازي رساله ..

فتحتها … اركبي ..

بلعت ريك دخيلك ياللهي ..

كمت لحيلي وجنطتي خالتها يم صدري ، وين اصعد فلوس ماجايبتها .. شسوي .. دك هورن حيل فززني .. ركضت بساع لحد سيارة فتحتها ، وصعدت كبل ، اكو قاطع بين سايق وبين الكشن الورة .. حجيت ماسحبت فلوس بعدني مااندل مكتب لو بنك انت هم مانطيتني مجال داحجي وشخطت السيارة حيل تحركت .. 

داحاجيك ماجايبه فلوس. والله ، زين بنتي شلونها ، دتاكل .. هااا دتشرب ، ترى ماتلبس حفاظات عاديه تتحسس منهم ، شنو الحليب دتنطي الها ، ماكو رد الحايط يرد هو ماكوو ..

سكتت وسلمت امري لله .. وكفت سياره على شارع ترابي ونزل شخص .. ماشفته لابس نظارات و قبعه التفت علي وفتح باب سياره بسرعه ، لميت جسمي خايفه من صوته عرفته ..جيبي جنطه بسرعه ..

فهيت بوجهه ..

عاط جيبيها داكول .. جنطه لامتها على صدري احتمي بيها .. همست متفاجئه عدي  …

جرها حيل وجر جهازي منها ركعه بالارض حيل وضل يكسر بي برجله .. نزلت دموعي عطت يالنذل عدددددي ..

عاط وجع صوتج لج …

ياحيوووان يالحقير .. التفتت دافتح الباب البصفي دانزل وانهزم ..انجريت من شعري من ورة .. وتخلت قطعه قماش على وجهي ، رفست  برجليه الكشن واهامش بيدي اريد افتح الباب .. لحد ماعمت عيوني اديه خدرن .. وفقدت الوعي ..

يتبع ……..

عدجن واسطه طبعا ماصارت ابد ، ام عبدالله من زمان تراعي مشاعر المتابعين بس متراعي مشاعري 😅
 

التصحيح اخذ مني ساعه ونص والله ، مكملته ترى من ال٩ ..