رواية قاع الشياطين الفصل السبعون 70 - بقلم اسماء ديمير

...............☆البارت الرابع والستون  ☆.............

#قاع_الشياطين(البصر والبصيره)

#بقلم_أسماء_ديمير ..

كلت اخذ تكسي للكراج ومن الكراج اركب سياره لاربيل ، مناك يتلكاني سيروان ..

وكفت على صفحه انتظر تكسي صوت فززني تالااااا …

التفتت لازمه كلبي ، لان ساري اجه يركض باتجاهي يلهث حجه بنتر وين موليه ولج هااا ..

هزيت راسي مااضل هنا بعد كافي الي صار الكم ، اروح لخوالي احسن .

صاح وجع ثوله بهل وكت غبيه انتي ، 

دمعت عيوني كاافي الله يخليك ، لاشوفني واكفه على رجليه بس قسم بالله حيلي انهد وياي طفل ودانيال لاحكني اذا لزمني والله يموتني شايله حمل وهم اكثر من سنين عمري عوفني اولي وادعيلي اوصل بسلامه …

سكت مدمع دنج راسه ، دار وجه حاير ، حجه اوصلج اني ..

رديت بسرعه لاااا ارجع لامك ساري كافي شفتو بسببي اني هم ماقصرت بيكم اذيتكم هواي ..

انجبي ولج تربينه سوه احنه امشي يله دوصلج ..

نترت لاااا والله مااقبل اخذ تكسي و اروح لوحدي ارجع يابن الناس ماقصرت .

جرني من زندي امشي داكول ، امن عليج ويله ، ضلتج يمنه هم مو امنه يجي يوم ويجفت علينه رجلج هو وجماعته ويسحلج من عدنا يم خوالج افضل على الاقل هناك بالشمال اكو قانون وشرطه توكف بوجه ..

اخذ تكسي ، وصعدنه درب كله يحجي براسي ، اصعدج بسياره تاخذج لاربيل ومن اربيل تاخذين تكسي او يجي واحد من خوالج يتلكاج ولاتامنين باحد ..

جنطتج بجتفج ممنوه تنزعيها ابنج بحظنج تربطي ربط بيج كون مو تصيرين ثوله ولان جنطه مبيوكه منج والطفل مخطوف افتهمتي خليج نبيه ..

وصلنه للكراج وصعدني بالسياره كوستر طالعه لاربيل ، كعدني بصف الشباك ، خله جنطه مالتي بصف الشباك وكلي اسندي ايدج عليها ، و الطفل خلاه بحظني وربط الكماط مالته بيدي حجه حتى اذا انجر الطفل منج تنجر ايدج وتحسين ، اني بس اهز راسي اااي نتر يحذرني رافع اصبعه :- لاتحجين ويه احد ، ولا تنطين و تجيبين بالحجي ..ولا تخلين احد ينتبه عليج خرسه طرشه ماشي لاتامنين باحد هم ..

موبايلج يمج كل شوي ادك عليج اني هنه كم ساعه اكضيهن وتوصلين ان شاء الله سباعيه انتي مينخاف عليج ..

ابتسمت مقهوره ..

ضحك هااا ولج شبيج ..

خلي بالك من امك ..

بعيوني حليمه شعندي غيرها وانتي خلي بالج من ابن اختي يله باسني من راسي ونزل ..

درت وجهي عنه ابجي ، هالمره صدك وحيده يااتالاا ، هالمره صدك صفيتي بلا معيل ..

وكف بالشارع من  جهه الشباك صاح بسلامه ..

هزيت راسي امسح بدموعي ، قبطت السياره هو بعده واكف ، خال اديه بجيوبه يراقب ، الناس صعدت و اشتغلت السياره ..

واني عيوني على ساري ، شكد افترت بيه الدنيا ورجعتني على ساري بس ابد ماصار من نصيبي دومه واكف وياي مثل الاخ ..

حتى ماحس عنده مشاعر اتجاهي عبالك يشفق عليه بس يله نصيب كلشي بهل دنيا نصيب واني رضيت بنصيبي شلون نصيب عاد اعوج امداني اي والله ..
تحركت السياره وفزيت من صفنتي ..

التفتت على ساري اشرلي مع سلامه مبتسم .. رديتله الابتسامه من جذب …

مشت السياره و طلعت من الكراج واني كلبي يفرفح عبالك مدري شعفت هناا وراي ..

كلبي يم ميرال اخيتي ، بس شبيدي عليها الله يشهد مابيدي شي ، رجلها ماينجرع احقر من دانيال ..

التفتت على جهتي ثانيه لكيت شاب كاعد بصفي هذا شجابه هنااا هاا ، مدنج ولابسه نظرات طبيه ولازم كتاب بيه يقره و ساكت نوب مسلوع جنه كصبه سعف ..

شو ماستاذن قبل لايكعد بصفي شنو هي تيهه ، توه احجي وانتر بي بعدين تذكرت شبيج وجع سياره الخلفج هيج و بكيفج تحددين اكيد كاعد بكروته وبفلوسه وماجر المقعد ..

بالربع ساعه اني صافنه عليه هو ماتحرك عبالك جامد او عايش بعالم ثاني لازم الكتاب وصافن بي و عايش وياه ولا حس عليه ولا ابد .

ماركس حاص بيدي دنجت عليه اشوفه لكيته مفتح عيونه .. يروح امك يعمري يروحلك دانيال فدوه ..

دانيال وامه واخته وبنت خالته وعشيرته يرحون فدوه لببي مالتك ، شوو هذا ابتسم جن يفتهم ..

ضحكت يعمري ابو عيون حلوه ، جنهم كزاز والله يجننون ..

يااسم الله مايحسد المال غير اهله ، عين الله تحرسك يماا ، اكول ماركس ماما ترى انته مسلم بس ابوك الجلب دك دكه ناقصه ..

منا وجاي انته اسمك كرم بس خلي استقر والله الا اسجلك على دين الاسلامي انا اله لابوك جلب ماوفه بوعده وياي …

التفتت على الولد الي بصفي مو يمي اصلا عزاا هذا بس لا ميت او متحنط بس مفتح عيونه ..

اووي شعليه اني .. حاص كرم عرفت جاع سوده عليه ، مديت اديه اطلع اله ممه وقوطيه الحليب ..

ماكدرت خليت قوطيه على بطن ماركس ، و الممه بيدي و ضلت الحافظه مال ماي وين اخليها شلون الزمها وبيد الثانيه لازمه ماركس ..

بلعت ريك وهذا بلش يبجي نوب راح يخلي العالم تنتبه عليه ..

توه افتح قوطيه مال الحليب كوه تعاركت ويه القبع كوه .. بلش يبجي بصوت ماركس همست دقيقيه امي دقيقه ..

رفعت نظري هذا البصفي يباوعلي عاقد حواجبه جن ازعجناااه لانشتاين زمانه والله يالله ..

درت وجهي بعدم مبالاه احاول ويه الممه دافتحها ، سطرني هذا ماركس موت نفسه ..

انداريت على الولد بعده يباوعلي نترت شكوو …

ماحجه ..

خليت قوطيه على صفحه داحاول ويه ممه ..

انداريت عليه نترت بضوجه :- صدك ماااكو انسانيه ، هو استغرب رفع حواجبه .

حجيت مو تشوف طفل يبجي واني مجاي ادبرها لاناديه مشغولات اثنينهم ليش ماتعرض مساعدتك ..

رمش بعيونه متفاجئ جر للممه مني صافن عليه مستغرب فتحها وخلاها بيدي حجيت الحليب ..

-خلي مكيالتين حليب بالممه ..

فتح حلكه صافن  هااا ..

هزيت راسي اااي طفل انفج ياابيويااا شبيك ..

خله الحليب نطيته ماي دافي حجيت رقم ٢ ورجه زين ..

خلهم وكعد يرج ويباوع بوجهي خايف مادري شبي ، نطاها الي خليتها بحلك ماركس ابتسمت بوجع من سكت ماركس همست شكرا ..

مارد عليه دنج يقره بالكتابه جن ديقره لغز الحياه السعيده  ، رجعت القوطيه وعلبه ماي للجنطه ، نوب جعت اني ياربي ، ماجبت وياي شي ، درب يمكن ست ساعات ..

خليت راسي خفت لا انام ويصير شي ، لو انباك ، ماركس شرب ممه وغفه ..

الولد بصفي سد الكتاب وطلع بسكت مالح ، وعلبه عصير ..اغلب الي بالسياره اسمع صوتهم ياكلون ..

بلعت ريك دار عليه لكاني اباوع عليه  ابتسم ، رخت ملامح وجهي ، درت وجهي ، ثواني مو اكثر قدم الي نستله حجه تفضلي ..

مارديت ..

حجه ست تفضلي ..

همست ماريد ..

رجعها لجنطته وسكت وكمل اكل بطني تقرقر وجع فضحتني ، غمضت عيوني احاول اضيع الوقت ..
متت جوع والله درب طويل نوب كلاص ماي ماجبت وياي شلون فاتته لااثول ساري شلون ماشترالي ماحسب للدرب ..

انداريت على الولد حجيت نستله بعدها عندك ..

رفع نظره وابتسم اي ..

ليش ماتنطينياها ..

مو قدمتها الج رفضتي ..

ليش مالحيت عليه ..

رفع حواجبه مبتسم  مد ايده طلعه تفضلي ..

جريتها منه ، انداريت عليه افتحها مو تك ايد اني ..

فتحها ورجع نطانيها .. اريد اخليها بحلكي هو عيونه عليه باله شلون هاي .. دار وجه عني ينطيني مجال حتى اكل ..

درت وجهي عنه ابتسمت ، ملامحه موغريبه كانو مالوفه ، مدري هو وجه ودود و حسيت هيج ، بس باين عربي مو كردي    

كعدت اكل بيها اجاني صوته ليش مسافره انتي واخوج لوحدكم ..

درت وجهي عليه ، منو كلك لوحدنا ..

حجه بصوت هادى ، هادى حيل هم .. ما وياج احد دار وجه يتلفت لوحدج كاعده يعني ..

منو كلك اخوي هذا ..

خمنت ..

تخمينك غلط ابو عوينات هذا ابني .

شو هذا ضحك ودنج ، بهت وجهي يااا ، اندار عليه الله يحفظه الج ، حجيت ترى من صدك احجي والله اني امه ..

فك عيونه هز راسه مدنج .. 

حسيته ممصدك ..

ضلت عيوني عليه ، اندار لكاني صافنه بوجه بعدني وضايجه ، تقرب مني همس ديربالج تحجين لاحد بسياره هذا الحجي هسه عبالهم مهزومه وابنج ابن حرام …

بهت وجهي من الخوف ، حجيت اضحك بريبه و خايفه الزك بسالفه :- وعبرت عليك عود هذا ابني خرب بعقلك ههههههه ترى اخوي صغير هذا ..

ماهتم فتح الكتابه و رجع يقره تجاهل كلامي …

همست امي ماتت بالولاده ومحد ضل بس اني واخوي ورايحه هسه لخوالي نعيش يمهم ..

رفع نظره عليه .. ابوج وين شلون امن يدزج انتي وطفل لوحدكم ..

ابويا هم مات ..

باوعلي ممصدكني .. حلفت والله احجي صدك اني يتيمه الام والاب..

هز راسه وجر نفس الله يرحمهم ..

حجه شسمج ..

ابتسمت تالااا وانت ..

حمد ..

عقدت حواجبي ، عاشت الاسامي مزوج حمد..

حجه مفهي هااا ..

اقصد شعندك رايح للشمال ..

ادرس هناك اقسام ..

هزيت راسي ، درت وجهي للشباك كظه درب وياي سوالف ، هيج اطراف كلام ، شسوي احسن مانام كلت ادرش وياه شوي ، ماحجينه هواي هيج .بس عرفت اسمه حمد ..

ابو يشتغل فلاح بمزرعه وعنده تكسي هم ..وامه ربه بيت وعنده اخوات يدرسن اخته جبيره كليه طب اسنان ،

وساكنين بمنطقه زراعيه بيت من طابق واحد ، عنده خوال بسيديه و عمامه بوحده من محافظات القريبه ، 

هو يعرف يحجي كردي ، مواليد برج الاسد ، يحب يقره هواي ، وهذا ضعفه مو سوء تغذيه مثل ما انتي ضنيت لاا طلع مريض خطيه ..
من سالته شنو مرضك ماحجه بس ابتسم ولازم كتاب .. خمنت مرضه هوس بالكتب مو اكثر ..

، دكت الجهاز ، خالته صامت بس حسيت عليه يرج ..

رفعته لان هبه ..

رديت هااا ..

حجت وين انتي ..

بالسياره جايتكم ..

ولج لاتجين رجلج اجه علينه هجم المنطقه تخبل كلش شبي هذا ..

بلعت ريك لزمت كلبي كولي والله شجابه ..

حجت شدراني بس يغلط و يجاوز نوب تكامش هو وسيروان تمالخو بنص شارع يريد يدخل للبيت يفتشه كوه تالي بابا خابر االشرطه عليه ..

كلبي قبضني ، حجيت وهسه ..

شدراني رجلج عبالك عصابات اجه وياه جماعته هدو للبيت شنو البلد ساايب ماله رداد الكلب هذا ..

دمعت عيوني ياارب دخيلك وين اولي هسه .. حجيت شسوي هسه ..

ردت لاتجين ترى اكو سياره باب ييتنه  امي توه خابرتني زحجت الي ، ماتحركت هو اخذو شرطه بس ضلت سياره غريبه كبال بيتنه واكفه ..

غمضت عيوني ، وين اولي هبه فدوه اني وياي الطفل ..

ردت وهي تستغفر باعي اشوفلج خالتي وداد عايشه على اطراف اربيل اذا موجود ابنها ايفان  حتى هم بتلكوج افتهمتي ..

اي فدوه لعينج ..

سديته منها وجهي خرط من الخوف ياربي وين انهزم من هذا بلا اسود وكع عليه ، راح يضل لاحكني ، اجاني صوت حمد هاا تالا شبيج ..

انداريت عليه مدمعه مابيه ..

درت وجهي على شباك كوه لازمه دموعي مابجي ، بعد شوي وندخل اربيل وتوكف سياره ولازم ننزل وين اولي اني منو يجي يتلكاني هو اني وين اندل اصلا ونوب لهجه كرديه ..

دكت عليه هبه وره نص ساعه ، رديت متلهفه هااا بشري ..

ردت ابنها لخالتي وداد  مو هنا بس باعي اخذي تكسي وحدزلج العنوان كبل انطي لابو تكسي هو ياخذج لبيتهم ..

حجيت ابجي شلون امن هبه شلوون اخاف اني وياي ماركس فدوه لعينج دبريني ..

والقران جان اجيت اني بنفسي اخذج بس كلتلج اني مو باربيل و اهلي ميكدرون لان السياره صافه باب بيتنه خاف ديراقبونه ..

بيت خالتي على الاطراف امن الج محد يندله اصلا بس اخذي تكسي وشوفي العنوان الي دزيته الج برساله هسه و يذبج باب البيت لتتخافين ..

سديته منها الغصه بلعومي اريد اعيط ةاصرخ من قهري …
 
بعدها وصلنه وصفت السياره وبالكراج وبلشت الناس تنزل ..

اني لزمت كلبي ارجف .. شلت ماركس ، ونزلت ، اجاني صوت حمد تالاا ..

التفتت بخوف مدمعه هااا ..

جنطه مالتج وين بالج شبيج ..

باوعت بوجه ضايجه وميته خوف .. هزيت راسي ماكوو اخذت جنطه خليتها بجتفي ..

لفيت ماركس زين جو الشمال بارد عكس وسط العراق ..

اخذت زاويه وكعدت على الرصيف ابجي بهدوء يارب رحمتك والله خايفه ..

نوب كراج هوسه وناس رايحه راده وفوضى شلون امن اني بهذول وياي جاهل اعتمد عليه احد لو خطفني مثلا اضل بذاك الوكت اترحم على ايام دانيال ..

تفاجأت حمد بوجهي حجه شبيج تردين مساعده ..

بجيت بضعف حجه شنو القصه احجي تيهتي شنوو ..

هزيت راسي لااا ..

شبيج لعد ..

محد راح يجي ياخذني ..

ليش ..

رفعت راسي اشهك ، بالله هذا شراح اكله هو من هاي وهاي شاك بيه اجذب ونص كلامي ممصدكه ..

حجه شبيج احجي اكدر اساعدج بشي ..

رديت بيت خالتي احترك وابن خالتي جان على اساس يجي ياخذني احترك ونقلو للمستشفى ومحد هسه بحالي حايرين بمصيبتهم .

رفع حواجبه هاااا ..

اي ، حالته خطره هممم ..

هز راسه لاحول ولا قوه الا بالله ، هسه شلون ..

ماعرف بس لازم اروح لخالتي ثانيه واني ماندلها بس اعرف العنوان ..

وين العنوان جيبي دشوفه ..

فتحت جهازي اشوفه اله …

ابتسم هذا العنوان قريب من الأقسام مالتي يله امشي اوصلج اني ..

هاااا ..

اي والله تعاي اني اوصلج ..

بس اني ماامن بيك ..

خلف الله عليج شفتي علي يابنت الناس ..

سكتت ..

ترى الشمال امان يابه شراح اسولج قابل ..

انته تدفع الكروه ..

ميخالف اني ادفع الكروه ..

ابتسمت دشيل جنطتي يرحم اهلك لان ثكيله ..

ماتردين اشيلج هم ، ابتسمت ، شلت ماركس ومشيت وياه ..  اجر تكسي هو و نطا العنوان دك جهازي ساري ..

رفعته صاح باذني مو ادك عليج وين جنتي .

شبيك دناجر تكسي والتهيت ..

رد بستغراب دتاجرون تاكسي؟؟ منو انتو ؟؟!!

اي مو سيروان  صار عنده ظرف ماكدر يجينيني ..

وين موليه انتي هسه منو هذول الي تاجرون تكسي ..

حجيت مبتسمه متبشره بالخير :- غير اني وحمد..

شنووو؟؟!! ، عاط يبوو منو حمد هذا ولج نعاال تالا ماتبطلين عنفصه انتي ولج منو حمد وياج طفل تادبي رعنه لاصيرين ملطلطه ..

اووو شبيك واحد تعرفت عليه بالسياره خوش ولد ، هو راح يوديني لخالتي شجاك ..

شهك مو كتلج لا تحجين ويه احد ولج شوصيتج اااني شلون تامنين .. صاح حمد تالاا يله ..

سديته بوجه ساري و صعدت بالتكسي وياه هو صعد بالصدر ..

تقريبا نص ساعه و وصلنه منطقه جانت منطقه شبه ريفيه بيوتها قليله بس عباره عن جبال و خضار..

السايق ، طبك كبال باب حجه بالكردي ويه حمد ..

حجه حمد وياي هذا بيت خالتج ..

نزلت اني ونزلي جنطتي .. همست مكشور يابن الناس ماقصرت ..
واجبي هذا الناس لبعضها الله يوفقج ويستر عليج ..

هزيت راسي الله يوفقك دكيت الباب ، وطلعت الي خالتي باستني وتحظن بيه .. انداريت عليه ، لكيته بعده واكف قريب السياره ..

اشرلي و حجه ديربالج على نفسج وعلى ابنج ..

بهت وجهي .. ضليت مركزه بوجه .. ابتسم رفع ايده سلم وركب سياره ومشه ..

دخلتني خالتتي تسال شنو سالفتي ويه رجلي و شبيج انتي وياه دكت عليه خالتج ام سيروان سولف الي شصاير خير .

خالتي وداد ، ماعدها بس،ولد وبنت .. بنت مزوجه بتركيا ..

وابنها مزوج وعنده جهال ثلاثه ، يشتغل بتريله ، بين تركيا و الشمال .. دخلت للبيت احجي الها ماجذبت زعت الاول وتالي ..

ماخليت شي بكلبي عليه لا هو ولا رجل ميرال ..

صح جذبت شوي بس شسوي من حركه كلبي ..

اخذت الطفل مني و كعدت تسمعني ، فريت راسي و همست جنتج وين لعد خاله .. ردت عد اهلها راحت البارحه ..

هزيت راسي زين احجي براحتي يعني ..

هزت راسها اي كومي غسلي وارتاحي هم جسمج هسه تكسر من طول الدرب ..

كمت اغسل و اكل لكمه ، هي حارت بماركس غسلت اله وبدلته ونطته ممه .. لكيتها صابه مركه وتمن الي كعدت اكل ..

سالتني على ميرال واذا سامعه عنها شي ..

رديت لااا صار فتره انكطعت اخبارها عني ..

هزت راسها مقهوره انتن كطعتن عنه وجنتن ماتتواصلن ويانه ..

درت وجهي خفت احجي وتزعل هو منو لازم يسال على منو ، هو بعد وفاه امي وابويا ضعنه بهل دنيا محد سال علينه ، واني وميرال هم ماعتمدنا على احد كلنه احنه ندبر نفسنه ..

شدرانه الدنيا مو بيضه مثل كلوبنه ، اني اخذني روج الطيش و الحيونه ..

وميرال مسكينه شبيدها امواج الدنيا ماقصرت بيها تكوم تكوم و ترد تهبدها بروجه تغركها بالزايد ..

خليت بالي بس امن على ابني هنا ارجع اشوف ميرال وين وادورها لو اعرف اروح لدانيال اتوسل اله ..

لفيت راسي ونمت من تعب السفر ، ماعرف شكد غفيت بس حسيت على عيطه خالتي كمت فازه من فراشي مخترغه ..

ركضت على مصدر الصوت هابطه .. بس فتحت باب الغرفه شفته كبالي ..

شفته شايل ماركس و عيونه دم يباوعلي ينافخ ..

كلبي رجف ركضت عليه بسرعه اعيط جييييبه جيييبه ابني مااانطي والله بعدني توه وصلت قريب منه رفع رجله ونطاني دفره شمرني الارض دنجت لازمه بطني ابجي ااااابني ماتاخذه والله داانيال اكتل روحي والله ..

خالتي مجلبه بي تعيط وتضرب  .

جرها واحد ماعرف منو يدفع بيها هو رفع اصبعه يهدد اخر مره تشوووفي والعذره اذا مابجيتج ددددم ولج اني تركضيني وراج محافظااات اني ..

كمت لحيلي لازمه بطني احاول اخذه منه نمت على ايده لحاظنه طفل و عضيتها اريده يهده ..

وخالتي شالت مكناسه تضرب بالي جااين وياه وتعيط ماعرف شنو تحجي بس كانو بالكردي ..

صراخنه وعركنه وماهد الطفل طلع هو و الي وياه دفعونه ماخلونه نلزمه ، عطت بي ولك دانياااال لاتحرم طفل من امه خاااف ربك يالظااالم دااانياااال …

اكو بنت اجت تركض و ياها اطفال و تصيح بالكردي ردت عليها خالتها وتاشر على دانيال .. بنت شالت حجاره من الارض و تشمر على دانيال ..

عطت بيها ، انعل ابوج طفل بيده ولج لا تموتوووو ..  حاولت ااخذ الطفل من دانيال ماكدرت .. جايب وياه سيارتين تاهو سود ، اخذو وركبو سيارات وطلعو …

ضليت اني كاعده بشارع اعيط و ادك على وجهي خالتي كغدت بصفي تبجي حاظنانتي ..

و اكفه بنت تحجي ويه خالتي عربي مكسر ..

شالتني شيل ودخلني جوه خشمي طك دم جن ضغطي صعد ..

ركضت لجهازي ادك عليه اتوسل بي ، شمرت الغراض بالجنطه ادور موبايلي لكيته دكيت عليه اتوسل ..

فدووه دانيال رجعه للطفل ..

رد والعذره تحلمين بعد تحلمين . عطت بي دانيال والله اشتكي عليك عبالك مالحكك واخذه اشهركم راح اشتكي ..

انتي مره وسويها هاي اذا لكيتي للطفل راح اتوي لاخلي شوفته حسره عليج ولج اني تلعبين عليه اني مووو ، بس،صبرج عليه اذا سمعتي حسه بعد اليوم عاتبيني …

سد جهاز بوجهي ..  كعدت بالارض ملخت نفسي اني سببب اني صوووج هاي جزاتي افعالي وطيشي يااما ميرال حذرت يااما حجت ونصحت هااي نتيجه طيشي ورعونيتي ..

يااارب ضنااي ابني يااارب خسرت اهلي واختي  .. بس ابني للييش …

جابلي ماي يغسلن الي وجهي واديه ، دم فيض ملابسي ماحسيت على نفسي .. دنجت لازمه راسي اون وين اولي المن اشكي ياهو يساعدني ، لا اختي ولا ابني يارب هووواي هوواي يااارب ضيعتهم من اديه اثنينهم ..

رفعت راسي اشهك وخالتي تتوسل اسكت تكلي ربج رحيم لا تياسين ..

اجت عيني على ورقه بالارض مطشره ويه غراضي واكعات من جنطه ..

استغربت اكو ورقه بجنطتي ، جريتها اشوفها فتحتها .. لان رقم ومكتوب جواه حمد ..

عقدت حواجبي حمد منو  ؟؟!

بلعت ريك بس لا هذاا ؟؟  رفعت راسي خاله خاااله… ردت هاا ..

اشرت بخوف هذا اذا اشتكينه هنااا يلحكون شرطه يلزمو قبل لايطلع من شمال هااا ..

جنتها ردت اي جوز ..

انداريت عليها .  هااا صدك ..

اشرت يله نروح للبيشمركه يله .. ركضت وياها اشرت ملابسج ..

خالتي نطتني شال اخلي على جتفي و طلعت ويه جنتها اركض ، لزمت جهازي متردد ادك على حمد بس بعدين كلت مادك هو شعلي هااا شعلي يساعدنا قابل هو منوو و التجى اله ..

رحنه للمركز و كعدت جنه خالتي تحجي لشرطي و تسوالف اله هو يهز راسي اني لزمتني رجفه الهبطه الي اكلتها نحلت جسمي كله ..

اخذتني ورجعه وكالو عود نرجعلكم خبر انتظرو ، يوم يومين و ماكو خبر ، الله يشهد وره رجعتنه بساعتين عرفت ماكو نتيجه ترضي لان رجلي الكلب واعرفه ..

فص ملح وذاب ، رجعتي لهناك هم ماتفيد طفل مو عند امه وحتى لو عدها ماكدر اعارك واخذه و ساري وامه ماكدر ارجع عدهم و ميرال ماعرف وين ارضها ..

تهت مثل تيهه طفل بديار غربه …

 #يتبع …..

النشر يومي و ملتزمه بموعد وياكم وحتى نوبات انشر من وكت لخاطركم ، و نادرا ماخذ استراحه .. فيعني عادي اذا كان البارت قصير هاي قدرتي ،

كروب الفيس .. ( كتابات اسماء ديمير )

الانستا ..  asmaa_demer

كروب الفيس  ...  كاتبات وقارئات العراق