رواية قاع الشياطين الفصل التاسع والستون 69 - بقلم اسماء ديمير

................☆البارت الثالث والستون ☆..........

#قاع_الشياطين(البصر والبصيره)

#بقلم_أسماء_ديمير

نزلت نظرها ، باوعت لملابسي ..

وجهي خرط حجيت امتمت خايفه ،  عفيه الله يخليج ،، ردت بسرعه هي تفرك بعيونها نعسانه :- ردي بسرعه لاامي تكعد .

دمعت عيوني ، عفيه حبابه لاتحجين فدوه لا طلعين صوت ..

وكفت عاقده حواجبها حجت ، مو دانيال اتفق وياج تعوفي للطفل ..

رديت اتوسل بيها ، بس اشيله مشتاقه اله فدوه الج ..

اثاوبت ردت :- امي تعصب اذا عرفت ..

ماراح تعرف والله مدامها نايمه شدراها ، باعي اني بس اشيله هناا مروح بعيد .. بالمطبخ اكعد بس اشيله حبابه ..

فركت عيونها مطفيه هي ، حجت بسرعه ردي لاتصحه امي لو هو يبجي ويصحيها وتحس عليه ماكو بسريره  ، هزيت راسي اي اااي روحي نامي ارتاحي  ..

نطتني ظهرها ترجع للغرفه ، وجهي بهت يمااا كلبي يمااا ،  شوي واندارت عليه حجت تسال عود ليش لابسه صايه خبله انتي ..

ضحكت بخوف جنت توه سابحه وبردانه شسووي .. 

ابتسمت تصبحين على خير ..

ابتسمت وانتي من اهله دنجت راسي على ماركس اتهرب منها .. رجعت هي واني رفعت راسي مهبووطه يماااا يااربي الطف ياااربي الطف …

طلعت بسرعه للحديقه اتلفت وراي ، شلت الغراض قريب من الباب لبستهم بجتفي هو نايم خانس ..

فتحت باب الخارجيه بخوف وطلعت بس سديتها وراي بهدوء طكيتا مشيه بس بسرعه كل شوي اتعثر ..

لو اتلفت واشهك من الخوف ..

الشارع مضوي شوي ،  بس  ليل غالب .. هنددددس هنددس ظلمه تخووف ..

الشارع من الشوارع الراقيه باليل اكو حركه بس قليله مع هذا تخوف الدنيا تخوف حيل اصلا ، طلعاتي اني محدوده ماطلع بهيج وكت يمااا ..

كلشي غريب حتى احس الهوه غير ويخوف نوب وياي طفل مشيت بسرعه واتلفت ، جنطه بجتفي وباليد الثانيه شايله بيها ماركس ..

تجاوزت شارعنه اريد اولي بس ووين ..

مافكرت باحد ماعندي ثقه باحد .

اجه بالي ساري ، ماكو غير ساري يرحمني بهل اليل ..

طلعت حيل وبسرعه لشارع العام .. دكيت عليه مايرد ..

مره واثنين يله رد يثاوب وصوته مطبك .

رد منو .

ولك نعال هاي اني ..

وسم تالا شبيج ماتستحين تتحارشين بيه بهل اليل .

ساري اني طلعت من البيت وحدي بشارع الحكني حباب ..
جان صوته مطبك من حجيت هيج انعدل حجه شنووو وينج ..

بشارع اني تعال وياي الطفل ..

ليييش طلعتي ليش،هسه خبله انتي بهل اليل ..

شسووي مالكيت فرصه بس هسه شسوي تعاالي ..

وووينج انتي خرب بيج بهل اليل انعل لشتج غبيه وينج ..

على شارع العام بمنطقه ال*****

جايج بس ابتعدي عن شارع لاضلين واكفه لا يتحرشون بيهج ولد الحرام ابتعدي عن شارع اكعدي بزاويه بظلمه بصخام عزاا بوجهج ، انتظريني جايج انعل ابوج لابو جلبه ..

سده بوجهي اني صدك اخذت مكان صاير بركن بصف محل اظلم وكعدت خانسه خايفه ، سيارات تفوت بس قليل كلش واغلبعا سيارات خصوصي بيها شباب ، 

بلشت انعس واتعب ، انتظرت  بالنص ساعه الله رحمني ماركس ماكعد ولا حس رحمه الله بذاك اليوم شملتني الحمدلله ..

اتصل عليه كال اني على شارع وين انتي شو ماكوو .

كمت لحيلي طلعت من زاويه المظلمه ..وخرت من يم المحل ، اشوفه وين ، التفتت حجه هااي انته ذيج ..

وينك ..

التفتت .. رد على اليسره كبالج .. درت وجهي شفته واكف بصف سياره اجه ركض عليه بسرعه .  عبر الشارع تقرب يلهث حجه هااا ولج ثوله ..

ابتسمت شلونك .

وجع امشي وكتها جرني من زندي و مشه بيه بسرعه عبرني الشارع ،  السياره خصوصي مو تكسي  ..

فتح الباب الوره وصعدني اني والجنطه وسد الباب .. صعد هو بسرعه متوتر ساق السياره ..

خليت ماركس بحظني زين حظنته خايفه عليه .  هاا يروح المامااا كانو حس كلبك مووو امنت حيل وارتاحين لان بحظني يعمرري ..

فدوه لعمره والله مانسيت هاليوم ابد ، شكد نحس هو وينتعوص بيدهم بس بذاك اليوم والله العظين مااا نطق ولا تنحس ابد ..

نااام نومه طوويله وهادى حيل رغم شلته وركضت بي رغم طسات رغم صوت السيارت بس ماحس ..

لو يم ام دانيال جان من صوت نفس كعد يبجي ضايج .

نايم وهادى حيل .. رفعت نظري مبتسمه ، شفت ساري عيونه عليه يباوعلي بالجامه ..

اختفت ابتسامي ..

حجه متغيره ولج كبرانه .

مارديت دنجت راسي على ماركس ..

وصرتي ام  والله وكت ..

هم وكت ، خلاك تسوق سياره وانته بايسكل ماعندك ابو حلك ..

ضحك ….

ابتسمت تذكرت عركاتنه سوه ، حجه رجلج وين ..

طالع ..

وين ..

مادري ..

شلون ماتدرين اكو مره ماتعرف رجلها وين وله شلون مره انتي ..

سكتت ..

بعدين حجيت.. سيارتك ؟؟!

لاا مال صاحبي اخذتها واجيت ..

نانه تدري انته جاي عليه وااني جايه وياك ..

لا عفتهم نايمين ، صبح تكعد وتشوفج ..

جريت نفس خايفه ، وصلنه لمنطقتهم جانت منطقه شعبيه ، وكف بصف عماره نزلت ، حجه اصعدي طابق الثالث ثاني شقه على ايدج اليمنه الجنطه عوفيها اصف السياره والحكج بيها ..

صعدت وهو وراي صعد .. جانت العماره جبيره بس قديمه ، الشقه يسموها قفليه ، وكفت هو اجه يفتح الباب ..

فتح الباب ودخلت ، جريت نفس ريحه نانه و حنيتها واكلها ..

ابتسمت مغمضه براحه .

حجه جوعانه ..

رديت لا بس نعساته ..

نامي بغرفتي واني حمدد هنا اخذي راحتج .

التفتت عليه مبتسمه ما اريد ازحم عليك ..

ولي يله لاصيرين مؤدبه ممتعود عليج هيج ولي ..

ابتسمت اخذت الجنطه اشرلي ذيج الغرفه اخذي راحتج .

عفته وتوجهت للغرفه فتحتها ودخلت ، شغلي االضوه هو وعافني طلع .. سديت الباب ، التفتت على الغرفه .. غرفه شاب اعزب بسيطه ..

سرير ابو النفر حديد مكتب خشب بصف الشباك وكرسي بلاستك و كنتور خشب ابو البابين ، امرايه جبيره بصفه ، وبصفعا تعلامه ملابس معلك عليها منشفه و تراك البيت .

مشيت خليت ماركس على الجربايه اديه ماتت من شيلته نايم ماصحه ..

خليت جنطه على ميز الخشب و طلعت حليب و الممه كلت اسويله حليب لايكعد يبجي ويفضحني بهل اليل ..

ذبيت الصايه هلى صفحه ، شلت الحليب وممه فتحت الباب ، درت وجهي ادور عليه هو رفع راسه من سمع الباب انفتحت جان مدد على التخم ..

حجه هااا صفن بيه ثواني نزل عيونه على ملابسي بلع ريك هز راسه تردين شي ..

اي اريد ماي فاير داغسل ممه واسوي حليب لماركس ..

فهه بوجهي شنوو ..

اريد ماي حار ..

اشر على المطبخ دايخ اي هناك روحي .. توجهت للمطبخ التفتت عليه بعده صافن عليه ، رفعت حواجبي مستغربه شبي هذااا خبال ..

دخلت للمطبخ كلشي ماندل .. ضليت افر براسي فتحت الكاونتر ادور غلايه شي ..

دخل وراي هو متوتر مدنج راسه اشر ذيج غلايه كهربايه بس دوسي دكمه تحمي الماي ..

هاا وينها شغلها الي وابتعد وكف بصف الحايط ..

وكفت انتظرها تحمه خليت ممه والحليب على صفحه .. درت وجهي عنه ثولني ورجعت با عت باتجأها ..

لكيته مجتف اديه يباوعلي ..

مابدر مني اي رده فعل .. ابتسم بوجهي كبرانه تالا ..

رفعت حواجبي قابل اضل صغيره ..

جنج بنت العشرينات ولا كانو١٦ سنه ..

هزيت راسي اي …

وعقلانه هم اسلوبج متعدل ..

مو بالله ..

اي ..

وانته ماتعدلت لعد ؟؟!

فهه بوجهي هااا ..

ماعرف احسك بعدك ساري النسونجي ماتغيرت ابتسمت ، سكت شوي مصدوم .

الماي غله التفتت طفيت الغلايه و غسلت ممه خليت شوي ماي و كاسرته بماي فلتر خليت الحليب وخضيتها حيل انداريت عليه عيونه على اديه من تخض الممه ..

ابتسمت كلمات صداها بداخلي ، وحق هو الله ماتغيرت ياسااري بعدك ذاك الوليد الي يدور الباسات داخليه وره ال١٢ باليل ..

جريت نفسي وعفته وراي ، مالتفتت عليه بعد ، دخلت وسديت الباب ، شما صار شنو كان ..

تبقه البنت مستضعفه و مستهدفه ، شنو ماكان وضعها ، شربته الممه هو نايم .. خليته و نمت بصفه خفت عليه حيل .. خليت مخده بينه خفت لا امرده ..

نمت مرتاحه مافكرت بعواقب سوايتي ابد ماعرف ليش،يمكن كوات عين او غباء او لاني ام و كدرت احصل ابني وهذا كل الي جنت اتمناه وهسه اخذته ..

او يمكن شغله الوحيده كلبي اطمان الها ماانبني ظميري ابد ، لان ماسويتها لخاطري لخاطر ابني هم .. خليت راسي بهدوء وبرود مو هامني شي ، حسيت بامان لان رجعت للحظن القديم ، كل الي خايفه منه هو بس لا امرد ماركس ..

ضليت جامده بمكاني ، ابتسمت واني مغمضه من تذكرت اني بفراش ساري ، والله وكت ياساري ..

بوكت شدتي الكاك يمي و تلبي نداىي ، نمت و عفت تفكير ..

ماعرف شكد غفيت ، كانو وهم ماعرف حقيقه بس صوت طفل يبجي ..

كلبت على جهتي الثانيه مو مهتمه ، صوت مستمر بصوت مزعج و صوت عيطه فززتني كمت لحيلي وانداريت مخترعه و اوكع على صفحتي اني والغطى من الجربايه بالارض ..

رفهت شعري داشوف مامفتهمه شكو .. صوت نانه تصيح يماااا يمااا منو هاي ..

ساري حجه هاااي شسمه يمااا انطي مجال ..

يبووووو ياسااري مزوووج ياايمه مزوج هذا ابنك .

رفعت شعري و كفت مخترعه هي اندارت عليه و كفت مدهوشه ..
بلعت ريك مخترعه وجفلانه .. رفعت حواجبها مانطقت اندارت على ماركس الي يبجي .. اشرت ابنج ..

هزيت راسي اي ..

طبت على صدرها وعاطت يبووو نهبت البت ياسارري راح امووت حتمووتني هو مجلب بيها ويكلها انطي مجال دفهمج يمااا صدك تحجين فضحتينه .

دفعته تعيط كعدت بالارض تبجي يبو يالفضيحه ناهب البت هي توه والده يااااكلبج ياحليمه حيموتج هالولد راح يخلص عليج ..

هو وكف مخصر ضايج ، فاقد الامل منها اندار عليه اني مانطقت حرف مصدومه و جفله بعدها بدمي نتر ماتحجين ..

همست نانه اني عفت بيتي ودزيت عليه ..

رفعت نظرها علي هاااا علييش عفتي رجلج ..

شلت الطفل اسكت بي درت وجهي عليها مقهوره همست ديضربني واخذ الطفل مني ..

سكتت شوي وحجت ليش ما رحتي لاختج ..

مادري هي وين الي اعرفه تركو الفله بس وين مادري حتى موبايلها ماترد عليه ..

لزمت خدها و فهت بوجهي ياايمه وين راحت اخيتج ولج ، كامت لحيلها وينهااا مارجلها نطاج خبر ..

سكتت ماردت احجيلها صار هي من هاي وهاي كل شوي تكب بوجهنه شيخلصنه من السانها بس رفعت الها جتفي حجيت مادري ..

صفنت بوجهي خايفه وحايره ، حجت دجيبي للطفل طك من البجي اخذته و راحت تسويله ممه ..

انداريت على ساري و جه جامد يباوعلي فر ايده مو عاجبه عافنه وطلع ..

ضليت اني وياها .. انظاره علي حجت شناويه علي تالا ..

هااا ..

شنو بالج يما من عفتي بيت رجلج واجيتي هناا يدري انتي طلعتي يعرف انتي وين لو تصرفتي من راسج ..

كتلج يضربني نانه والله حتى شوفي اظفري شلعه من مكانه نوب جان مخطط ياخذ طفل ويبعدو عني شسوي اني انتظر ياخذ كلشي مني ويشمرني بشارع كلت اتغده بي قبل لا يتعشى بيه ..

باوعتلي باسف هزت راسها ، شكد اختج حجت شكد كنالج من اوله جان باين هالدانيال ما وراه خير ، اصلا هالزواج فاشل وامبين شنو بس انتي عندتي ..

غلطت نانه سبحان الي ميغلط ..

وهسه ..

مادري بس ماعندي غيركم والله لو عندي باب ثاني جان دكيته ، بس مالكيت غير بابكم مفتوح ..

هزت راسها يايمه احنه على كدحالنه ماصدكت كعدت بشقه ملك وارتاحيت وابني يدرس ويشتغل تعبت من مرمطه مابيه حيل مشاكل ترى ..

سكتت خجلانه منها ماعندي جواب ..

اخذت ماركس و مشت خلتني بحدي بالغرفه ..

فكرت بكلامها صدك وين اروح ، اني هم ضلتي هنا غلط ، بس وين اولي ، وياي جاهل نوب ميرال ماكو ماعرف عنها شي المن اروح واسال ..

اذا لكاني دانيال يطين عيشتي والله اول شي يسوي ياخذ ماركس ويفرفحني عليه ، حرت نوب وشلت هم ..

وين الكاج ياميرال و اختل بحظنج بس هي الي تبرد كلبي لو جانت موجوده وشما اسوي تضل وياي متتخله عني ، حسبي الله على  الي فرقنه ..

طلعت يمهم ، الطفل ساكت مدد على تخم  ، و اسامه مكابله يضحك حجت شلونك اسامه .

حجه بعدم مبالاه هلااا .. عيونه على طفل فرحان بي لازم جف ايده ويناغيله ..

نانه التفتت علي حجت مبتسمه ابنج حلوو عين الله تحرسه ..

ابتسمت اي ياريت تطلع اخلاقه حلوه مثله ..

اهم شي اخلاق ، احنه بوكت اجفت بي الاخلاق للاسف اندارت تباوع لابنها ساري .. هو جان رده ، رفع الها تك حاجب ضايج يباوع علينه ..

ابتسمت اني ودنجت راسي مشيت اوكف وياها على مطبخ .. 

مر اليوم بسلام جهازي غلقته ، نزلت نانه تجيب حليب و حفاظات للطفل ..

عرفت دتشتغل بمحل حلويات داخله ، و ساري بين الكليه وبين شغل العصر يرجع ب٩ باليل ..

اسامه هالسنه يتسجل ، فرحان بروحه ..

فتحت البلكونه صغيره اطل على الشارع ، عدهم زرعات طلعت رشيتهم ..

شفت ساري اجه يمشي تعبان ملابسه وصخه من الشغل ، بس جاي من وكعت شعجب .. بيده علاكه صعد ، شوي ودك الجرس ..

راح اسامه يفتح اله ، دخل دنج ينزع حذاىه ، سلم ودخل حجه امي وين ..

راحت تجيب حليب للطفل ..

اني جبت ماعرف هو هذا او لاا بس يشبه الي خليتي منه البارحه وهاي ممه جديده و كم قطعه ملابس ..

ابتسمت شكرا ليش تعبت نفسك ..

اعتبريها هديه ولادتج مدامنه اهل ..

اخذتهم منه اديه وصخه مال شغل فيتر ، ملابسه هم ، حجيت ادخل اسبح بين ماجهز الك الاكل ..

خليت الحليب على الميز هو والغراض البقيه و مشيت احظر اله الاكل …

اسامه كاعد بصف ماركس يحاجي عبالك جبير مو طفل حيل فرخان بي ..

خليت الاكل على النار و حظرت المواعين شوي وطلع ساري من الحمام يمشط بشعره .. شاف الباب مال بلكونه مفتوحه والبرده تطاير ..

بلكونه صايره بالمطبخ .. حجه هاي تشتغلين وفاتحه البلكوزه ..

انداريت عليه ابتسمت مو سكيت زرعات توه و خليت الشقه تتهوى .. توجه يسدها توه لزم اليده وكف صافن ..

اندار عليه و حجه رجلج هنا ..

جان بيدي صحن وكع من ايدي حجيت بخوف شنوو ..

طلع هو بسرعه للبلكونه يشوف دنج راسه حجه هذا سيارته .. تقدمت بسرعه مد ايده باتجاهي صاح لااا لا لايشوفج شجابه هذا ..

لزما كلبي اكيد جاي ادور عليه .. حجه نزل من سياره وجايب وياه جماعه  ..

اني كبل بجيت راح ياخذ الطغل مني ركضت على ماركس شلته حظنته ..

دخل وراي حجه صعد خرب باهله صعد اكيد يندل الشقه بس شلون عرفها ، توجه كبل  سد باب الشقه بسركيها  و حجه ادخلي للغرفه بسرعه .. تزه انوجه للغرفه اندكت باب الشقه حيل .  بجيت بخوف كبل ..

اشر ااااش اششش اسكتي ، اريد اروح للغرفه جرني حجه لاا لااا ،  ركضي للبلكونه اوكفي لاتدخلين للغرفه ، اكيد راح يدخل للشقه يفتشها للبلكونه كبل و سيطري على صوت ابنج  دفعني باتجاه بلكونه ..

شلت وركضت للبلكونه فتحتها و كعدت بصف الزرعات و خليت ماركس بحظني وخليت ممه بحلكه لفيته زين لا يطلع صوت ..

انتر ساري باسامه لم غراض تالا واشمرهم جوه جربايه بالعجل .. 

باب الشقه اندكت حيل و ضلت ادك و ساري صااح شكوو فتحها حيل صاح شبيكم ..

صوت دانيال صاح وينهاااا انعل ابوك وينها .. صاح ساري شكوو شبيك منو انته ..

صاح بي دانيال وخرر لك قشمر تضحك علي تالااا الكح* ويبين وين اخذت الطفل ..

صاح بي ساري وووين وين دااخل اطلع بره شنو هي تيهه تتهجم على الناس ببيوتها ..

-مررتي وووين ابني وووين ، صوت ساري صاح و صوت ضرب .. اسامه عاط يبجي بخوف ..

بجيت اني مرعوبه ضميت راسي بحظن ماركس خايفه ، صوت دانيال يعيط وينهااااا ابني وووين ؛ نرى اعرف يمكم ووين تؤزح يعنني ..

شوي و عله الصوت بزايد وناس غربه تدخلو من الشقق البقيه و نانه دخلت تعيط يبوووو ابني موتو ابني ..

صوت تكسير و ربد جمدت بمكاني مرعوبه حتى ما عندي جرئه امد راسي واشوف كلت بس يلكاني يموتني والله ، يحرك كلبي على ماركس ..

حجه دانيال شنووو هذااا هذا حليب طفل حليب ابني شلون تكول ماكوو مموجوده ..

صوت بشار يرد يكله البنت وووين فضها سااري لا تطلعنه عن طورنه ..
وساري يرد ومحمد اذا ماطلعتو منا مااسكت واخليها تصير دماايه انته وياااه اطلعوو بره وروح دور مرتك بغير مكان لو بيك خير ورجال ماتشرد مرتك منه ..

-ابن كلب حليب ابني هناااا شجاابه عدكم ..

نانه ردت تعيط شنوو بس ابنك يشرب حليب .. اسامه ييجي يكله اني اشرب حليب اني هذا مالتي ..

نانه كلبتها عليهم عياط وصياح تتهجمون عليه موو ياناس يااعالم يتكون علينه واحنه ناس فقره يبووو حيموتون ابني دخلو علينه للشقه تهجمو علينه ..

دانيال مجلب بساري خانكه يعيط وينهااا داكلك وينهااا .. والعالم جرته تصيح اطلع عمي اطلع هيب عليك .. الناس صار شكد هنا ماشفنه عليهم شي ش ايدين منهم ..

رزح دور مرتك بعيد عنهم صار شكد هنا ماشفنه يمهم بنت او طفل روحو منا لانتصل بالسرطه ..

كوم يادانيال و اعفط الهم عفطه و جر سلاحك واسحب اقسام وصاح بيهم ، ورب اخرطكم كلكم لا تتهددون ولكم حيوانات اني دوله ابني اريد مرتي وابننننني لا تفروها علي انته وياااه …

ساري رد ماكووو شوف بعينك داكلك ماااكو شوف وين راحت وين انته هججتها ..

-ابن نعااال كله منك انته ، اكيد تعرررف ولك هي ماتعرف احد غيركم هنااا متاكد تعرفون وين ..

بشار جره يكله بعددين عودوين تولي مرجعها الك .

-صاح بي ولك ابني عدهااا ابني عدها داكللكم وووين ولت اكيد هم يعرفون وووين كولولي وووين راحت  مرررتي ولكم..

طلعو جر و صياح ، انسدت الباب حيل ونانه تحجي وتصيح وتغلط وساري يرد كاافي يمااا فضيها ماعايز لصوتج ترى ..

-كلب تردعلييي قليل نررربيه حيوووان خاي سوالفك شجابت الك بس المصايب ..

-دشووفي شلونه وجه وجه الشيطاان هو هذا هم ينعااش،وياه ..

-ولك يماا مو كدهم احنه شفته شلون داخل هو سلاحه بحيل صدر و خانك بنص بيتنه هذول مايخافون لا من الله ولا من عباده الا انفجع بيك يله ترتاح ارحمني ياامي ارحمني …

طلعت اني من بين زرعات امشي بخوف ميته رعب ابجي ..

-اندارت عليه تلهث عليه اشرت الي يمااا بلا زعل تدرين شكد احبج بس ولدي اعزز ماطلعت من هالدنيا بس بيهم ، لازعلين بس شوفيلج مكان تكعدين بي غير هناا الله يرضى عليج .

صاح ساري يماااا ..

-وجعاا يالحيوووان وجعاااا انته اكبر نذل وساقط ليش تتصرف بكيفك هااا من جبتها ليش ماكلتي ليش تصرفت بكيفك هاااا هاي نتايج افعااالك بس المصااايب رجلها يمااا رجلهااا ..

-ديضربها شنو ابقيها عنده هو ديعنفهاا ..

-انته منووو ابوها اخوهاااا ابن عمها انته غررريب عنها ليش تضل حيوان ..

-ربيت وياها هذا يكفي حتى لو غريبه ترديم تستنجد بيه واسكت واغلس شنو قليل غيره اني شايفتني ..

-ابو الغيره تنجب وتسكت وتالا مالها ضله هنااا هاي اني كلت حجايتي ومحمد ياساري اكلب دنيا عليك ياساري انجب واسكت الزمك الباب ترى البنت تروح لاختها ..

-رد هي اختها وين ..

-ماعرف ادورها عود اني  . بس تالاا ضلتها هنا وراها مشاكل واني ماصدكت شوي ارتاحيت و خف الحمل عليه مابيه حيل بعد مشاكل ومسؤليه وحمل تزوجن و انسترن ببوت بعد مالنه شغل هاهيه سوينه العلينه ..

واكفه ودموعي تكت واشهك ، مانطقت بحرف ماكدرت بعد الكلام كله اختفه من جه حقها وكلامها كله صدك شنو يجبرها تتحمل وجودي هناا قابل منو اني شنو اقرب الها كفت وفت ويانه قابل ناكلها بعد .. 

ابنها هم راح تصيره مشاكل بسببي شنو جابرها تتحمل المشاكل لخاطري هي هم تعبت منه ومن كوارثنه سحبت روحي ودخلت للغرفه اشهك ميته بجي حظنت ماركس ابجي مهضومه حيل ..

هو بعده يتعارك وياها مو راضي قررت خلص اولي لخوالي بس شلون اروح منو يوديني وخاف يلحكني دانيال والله مايعوفني سليمه ..

بس ماعندي حل ثاني .. فتحت جهاز لكيت كم هاىل من الاتصالات من دانيال ورسائل ماتجرات افتح وحده اعرف اغلبهم تهديد وغلط و فشار ..

توجهت كبل لرقم ميرال دكيت عليه دكيت ماكو رد ..

رسلت الها رساله صوتيه على امل تشوفها .  خيتي ميرال ووينج كلبي يمج وين صفت دنيا بيج .. باعي اني عفت البيت .. بيت دانيال اقصد اخذت ابني وطلعت ناويه اروح يم خوالي ..

بس ماعرف .. سكتت شوي وحجيت اني ضايعه ميرال محتاجتج وينج .. بجيت مقهوره .. ميرال ندماانه والله ندماانه ياريت سمعت كلامج وماطلعت من جوه جناحج تبهذلت ميرال تبهذلت ونذليت ، ادعيلي اذا سمعتي بصمتي ادعيلي دعوه من دعواتج بالكت تستجاب ..

سديت بصمه و طكيت بجي كلبي ممرود حيل ..

ضعت بدنيا لا اهل ولا حبيب ولا اخت ولا اخ ، ولا من شخص يخاف الله بيه ..

ياريت لوحدي وياي قطعه لحم طريه خايفه عليه لايتمرض مني على ساعه ..

وربي حتى بوس مابوسه يادوب اغير اله واعتني بي وبس مالزمه هواي اخاف عليه من نفسي ، شسوي يااربي شسووي .. 

التفت عليه نايم وخال ايده بحلكه نزلت دموعي كلبي يرجف من القهر ، انفتحت الباب ودخل شخص رفعت راسي ..

لان ساري ..

وكف ضايج يباوعلي همس لاضوجين من امي تعرفين كلبها انتي ..

هزيت راسي مسحت دموعي حقهاا ، مالومها ابد ..

امي خايفه ترى ، امي مو مثل كبل تالاا امي تعبت حيل تريد ترتاح مابيها حيل شغل ومرمطه وخدمه بالبيوت تريد ترتاح ..

دمعت عيوني اعرف اعرف والله ، همست كوه كاتمه غصه عاذرتها اني هم ام واعرف الضنى غالي مالومها ابد ماقصرتو الله يشهد ..

انداريت عليه اروح لخوالي شتكول ..

دنج راسه وجه احمر .  رد يعز عليه والله تفاركينه بس هنا هم الشقه مو امنه عليج ..

جارتك …

انطيني مجال شوي افكر بالكت الكالج مكان قريب علينه وهم امن عليج وعلى ابنج سالفه خوالج اجليها شدراج مايلحكج هناك ..

جريت نفس مختنكه تعبانه عافني وطلع ..

ضليت بالغرفه لوحدي هو بره صوتهم اختفه ، سمعت باب الشقه انفتح و انسد .. اشوي و انفتحت باب الغرفه علينه .. رفعت راسي لتن نانه ..

عرفت شنو تريد .

حجيت كبل لاتنطق :- نانه ماضل هناا والله ، لاتخافين اني هم ماريد اذيتكم ، لو اعرف ارجع لدانيال ماضل هناا بس اصبري علي شوي بالكت ميرال ترد عليه ..

تقربت عليه تمشي كوه تعرج .. بان عليها الكبر وتعب بسبب الشغل ..

كعدت بصفي رفعت اديها ادخل خصلات الشيب بالحجاب وتضمهم زين .. جرت نفس تعبانه ..

حجت ربيتج وانتي بكد هذاا اشرت على ماركس ..

لحمه حمره يمااا ، امج موظفة وتلعب نفسها من تشطف وتنظيف و توكل ، واني كلها سويته لاتعاجزت ولا لعبت نفسي ، ام الي تربي ياعيوني مو تحبل وتجيب ..

ربيتج انتي واختج حالجن من حال ولدي ، وداريتجن بماي عيوني وحتى اعز من ولدي وانتي تعرفين هالشي افضلجن على اولادي خلفتهم اني ..

بس يايمه شوفي بعينج رفعت جف ايدها الخشن ولونه اصفر اثر الشغل ..

يايمه ماضل حيل بعد ، حليمه مو مثل قبل ، كلبها تعب وجسمها ثكل ، تريد منو يعينها مو هي تعين العالم ..

كلشي بهل دنيا يجي يوم ويطلع من الخدمه الا اني باين حضل طول عمري شكيانه و كلبي تعبان ..

تزوجتن بارادتجن برغم اثنينجن ماجنت راضيه عنهم ، انتي ولا اختج ..

حبيتن واخذتن تردنهم ماشرتني ولا حجيتن وسكتت ودعيت الله يسعدجن ، لاحنه طشار واذيه من عيال ميرال وكلنه ميخالف راعين لكمتنه ..

انطردنه وتبهذلنه وكلنه ميخالف ، ذلونه بعدها وانطردت كم مره باب الفله و كلت يالله تهون ، تزوجتي واني مادري وكلت ميخالف قسمه ،  بعدين من عفتجن انتن وحياتجن والتفتت لولدي ودنيا بلشت تضحك الي واستقر اني وياهم ..

وهذا دخل كليه صيدله و الشقه ملك تجيج مصايب مره ثانيه تريد تهدملج كلشي شسوين بوكتها هااا ..

دنجت راسي مقهوره ..

حجت قصرت وياجن يمااا ..

هزيت راسي لااا ..

داريت الامانه عدل لو لااا ..

هزيت راسي اي والله ..

لعد يايمه مو حقي ارتاح والم جهالي جوه حناجي عاد ..

هزيت راسي خجلانه :- حقج نانه حقج ..

اني هم ماعوفج اذا مامن عليج احسن شي ترحين لاختج لو لخوالج ..

هزيت راسي الله كريم ..

عافتني وكامت لحيلها تمشي كوه تعبانه  ..

ساري مو هنا ، اني طلعت غسلت وجهي ، البيت هدوء ساعه ب٩ باليل …

راسي يوجعني من البجي …

رجعت للغرفه كعدت شوي صافنه عيوني على جهاز الي يضوي ، مكتوب دانيال يتصل بك ..

ما هتميت عفته دك ، قررت خلص اروخ لخوالي ، شلت موبايلي دكيت على هبه بنت خالتي ..

ماردت ..

عفتها شوي نص ساعه وكررت الاتصال .. ردت بصوت عااي كانو بشارع ..

حجيت وينج مو بالبيت..

لا والله طالعه بحفله بمطعم اني و زوجي شلونج ..

تمام خالتي شلونها ..

بخير حبيبي شلونج ميرال شخباركم ..

عبالي اسويلكم زياره مشتاقله الكم ..

يااهلا بيج تنورينه شوكت ماتجين ..

انتي وين ..

بسليمانيه ..

اني اريد اروح لاربيل باجر اذا امكن بس منو يتلكاني ..

تجين وحدج شنوو ..

باعي هبه سالفه ابينه عليج الله ..

دقيقه اوكفي ، صوت عالي يمها خف حجت شكوو شصاير داحس مو على بعضج خما اكو شي ميرال بيها شي ..

تعاركت ويه رجلي وعفت البيت وياي ابني ميرال ماتدري ماكدر اروح يمها ، اريد اجي يمكم ..

هلاا بيج بس رجلج .

رجلي مايدري وماريد يصير عنده خبر اني يمكم الله يخليج من اجي اني احجيلج عود بس ساعديني ..

باعي اني بسليمانيه هسه بس راح اتصل على سروان  يتلكاج بالكراج بس انطيني الوقت تجين بي حتى يتلكاج هناك ..

خوش تمام ..

سديته منها مرتاحه اكو امل يعني يالله .. 

للفجر و ساري مارجع حتى نانه تفتر بالصاله بالها يمه تالي تعبت ودخلت للغرفه وسدتها ..

اني لميت غراض ماركس ولبست صايتي توجهت اطلع ..

جانت عندي نيه اودعهم اودع نانه ، وحظنها حيل واشم عطرها ..

اشهم عطر الحنينه اخر مره ، بس مابيه حيل دموع وبجي وجع كلب ، كل الي كدرت اسوي كتبت بورقه اخذتها من مكتب ساري وكتبت عليها الله يشهد ماقصرتوو الله يجازيكم خير ..

خليتها على الميز هي والقلم ، شلت الجنطه و فتحت الباب اطلع ساعه جانت بالسته الصبح ..

لفيت ماركس زين ونزلت درج بهدوء خايفه اتلفت .

طلعت للشارع مشيت بسرعه اريد تكسي ..

امشي واتلفت خايفه ..

كلت اخذ تكسي للكراج ومن الكراج اركب سياره لاربيل ، ممناك يتلكاني سيروان ..

وكفت على صفحه انتظر تكسي صوت فززني تالااااا …

#يتبع ….

اكو بنوتات اثنين يتوقعن و يحللن بالمنشورات . الفيس .. ماشاء الله عليهم تحليلهم يجنن .. اسمهم ..دنيا و ياسمين ..

وتحليل النفسي لتالا صحيح الي حللته دنيا .. واضافه الى مرض تالا .. ايضا تحليلها صحيح و بحثها صحيح ..

مختصر الكلام .. مرض تالا معدي جنسيا وعن طريق العاب والدم والبوس واني وضحت هالشي و شرحت عن المرض واسبابه وكيف ينتقل بس باين الاغلب ما منتبه .. لذلك نزلتو على تالا البارحه نزله موحلوه 🙂💔

كروب الفيس .. ( كتابات اسماء ديمير )

الانستا ..  asmaa_demer

كروب الفيس  ...  كاتبات وقارئات العراق