رواية قاع الشياطين الفصل التاسع والأربعون 49 - بقلم اسماء ديمير

................☆البارت الرابع والاربعون ☆.............

#قاع_الشياطين(البصر والبصيره)

#بقلم_أسماء_ديمير

تريدني اكتل اخوي ...

احسن ما هو يقتلك ، لا تبعد هيج تصور وهيج احتمال من بالك ابد اخوك تجاوز الحدود حيل ..

رد كرر الجمله مستنكر تريد اكتل اخويه عدي ..

-اخوك عنده قتل شربه مااي البارحه كتل واحد بنص العالم بالمطعم و كبال عينك وماحسب لا لفضيحه ولا لشهود ..

-والحل اقتله موو ..

-عافه وكعد على كرسي ، رجه ظهره واشر ، عندك حل ثاني ..

-انفي خارج المحافظه ابطل اشغله ويانه اسحب منه الدعم ، ادخله مصح عقلي ، بس اكتله هاي بطل تحجيها انته اخويه وصاحبي و سمحت الك تحجيها ، بس مره الثانيه اذا نطقتها نتخارب ..

-اخوك …

قاطعه بنتره اخوووووي انته كلتها اخووووي ، شما يسوي اخووي ..

دفع الكرسي عدي حيل وكام لحيله عصبي ، تصرف و الزمه مادام هيج لعد .. خلص فاض الصبر بيه واني الملم وراه ..

-بفلوسك عدي ممسوي شي زياده ..

-غلطاان سوالف اخوك دلملمها محبتا بيك ولان خايف عليك لا تنجر رجلك ، بس لهنا وكافي و هسه صار عندك علم هاي اخر مره الم السالفه ، بعدها وداعت ابني اسلمه بيدي و لاتكول صحبه وعشره خلص اخوك داس كلشي ..

سكت بيبرس وهز راسه ، هاهيه ، الولد شنو كتبتو  بشهاده الوفاه مالته ..

-اشر اله بعدم مبالاه رصاصه طايشه .. 

-واهله ..

ناس فقره تكفلنه بيهم وبجهاله وفضت ..

فرك وجهه ، دار ظهره يطلع صاح عدي ...  فرات ..

اندار عليه ضايج ، حجه عدي ، ماعندي اخوه وانته صرت اخوي بيبرس ، بس لمن توصل للركبه ضرب على ركبته اتبره من اخوي تعرفني انته ، اليد الي تاذيني اكطعها ، صلتي بيك اذا ودتني لدرب الموت اكطع هالصله ..

ابتسم بيبرس منتظر يكمل كلامه ، سكت عدي يراقب صاحبه ..

هز راسه بيبر ، نبرتك غريبه عدي اول مره اسمعها ، ابتسم بس،لا عبالك شفتني صار فتره رخيت عبالك ينلعب علي لو انغلب ..

- حجه يتلافه الزعل :- لا حشاك مارخيت ، بس مرتك ماثر عليك وكلنه حسينه ، نفس ماعندك مره عايله واخ تحبهم وتدفع روحك لخاطرهم .. اني هم عندي عايله ومرتي حامل واي خطر او احس بخطر تلكاني بوضع الهجوم مو دفاع بس ..

تغيرت ملامح بيبرس و صفن بوجه عدي ، ثواني وطلع ، ما حجه ماصدر منه رد ، 

مجرد ماركب السياره دك على بشار ، كله كول للمحاسب يسويلي جرد بكلشي بس بدون ميعرف عدي ، وحظرلي تذكرتين ذهاب بدون عوده لبنان ..

سد الاتصال ودك على ام زياد ، ردت هاا …

حجه :- كادي ..

-شبيها اخذت اجازه اليوم ، تكول مرتك مطيتها ..

-انهي خدمتها ، 

ميرال …

رجع بيبر و دز على غزل ، استغربت فعله وكفت مجتفه اديه بصفه مستغربه شريد من هاي .. وكف هو ينزع ساعته ، دكت الباب ودخلت ، حجت بستغراب دزيت عليه ..

حجه برود ، شكد صار على حملج …

ردت تقريبا اربعه اشهر ..

- سمعت عندج عايله منو يصرف عليهم .

- سكتت .

-حجه انتي موو ، اعتبري مصروفهم واصل بس اريد منج شغله ..

-حجت مرتبكه شنو ..

-باجر الصبح سياره تاخذج انتي وعواد كبل للمطار مجهز الكم شقه بلبنان تضلون هناك لحد ماتجيبين رجعه للعراق بدون ما اني ادز عليكم ممنوع ..

حجت وعواد .. دتكمل قاطعها يجي واكله اما سالفه اقناعه هاي شغلتج ولا تكولين ماكدر ، مايصعب عليج شي غززوله حجه بستهزاء ، اما اذا عاجبتج الكعده هناا ماجبرج تسافرين بس خلي بالج عواد طردته من الشغل و شقه الي عنده هنا انقفلت ماله دخل بيها بعد ، تصفين بشارع انتي وياه .. اعرفج ذكيه تعيشين بالخارج بشقه فارهه و مصروف واصل الج ولاهلج لو اضلين هنا مشرده محد مرحب بيكم ومابيدكم فلس ..

سكتت ..

-حجه يله اطلعي ..

-ردت عواد ماراح يقبل ..

-مجاي اخذ اذنكم اني ، قررت وخلص ..

-سكتت ، 

-رد ، ردت ابين الكم مميزات جاي اقدمها حتى لاتكولون بيبرس ظالم .. يله اطلعي ..

عافتهم وطلعت ، همست اخوك عصبي اذا سمع راح اطلعه بره العراق جبر ممكن يتخبل ..

-على شنو دزيت عليها هاي راح تقنعه ، لان مستفاده ..

-ليش جاي تبعده لعواد .

-اذا ضل هنا نهايته مكتول ، ماعندي استعداد اخسر اخوي ، 

ابتسمت رغم اذيته هو اكبر منك هيج تخاف عليه ..

سكت .. تقدمت عليه لزمت جتفه جسمه حار خله ايده على خصري يحظني ماعندك اخوه غيره ..

-جان عدنا حوراء  وراحت لرحمه الله ..

-الله يرحمها ..

-سكت ثواني وحجه عندي من سحر بس ماعترف بيهم ..

-سحر منو ؟!

-الي خلفتني اني وعواد وحوراء ..

-رفعت حواجبي مستغربه ، امك عايشه ؟؟!

-باسني يسكتني ، دفعته بهدوء امك عايشه وعندك اخوه منها ؟؟؟!  وينهم ..

-مادري تعاي اكلج ..

-قاطعته دفعته اريد افتهم ..  شلون ماتدري ليش اكو شي ماتدري انته عنه وينهم ليش مااعرفهم ليش ماكلت ..

-ماعترف بيهم كلتج تعاي داكلج ام ساري دتشتغل حاليا ..

-سكتت .. حجيت وين تشتغل ..

-محل معجنات ،  ابنها يشتغل عند فيتر العصر بعد دوامه ..

-بهت وجهي ليش راتب مو جاري الهم معقوله مايكفي ..

-مجاي تاخذه ..

-ليش ..

-بشار كال ونسيت اكلج ..

-جريت نفس وابتعدت عنه ، مره جبيره بيبر مو حمل شغل والله هاي ،

-راح اوصي صاحب المحل عليها ماكدر اقدم الها غير هيج  ..

سكتت مدمعه ، كعدت على جربايه ساكته ، شلها بهل تعب على شنو فضلت شلعان كلب علينه وعلى مساعدتها النه ..

-مره صاحبه عزه نفس وكرامه ، حجيت :-وخالتك هانتها اكثر من مره وطردتها ..

-راح اشارك بالنص ويه ابو محل المعجنات حتى تصير ام ساري تملك نص شكلتي ..

-يصير ..

-نخليها تصير ..

-شلون ..

-شعليج بس اذا سالتج كوليلها ردت استثمر فلوسي و اشتريت نص  ..

-ابتسمت ماشي ، 

رجعت كادي سالت شعجب رجعتي ...

ام زياد ردت  عليه :- عواد هو ومرته على سفر واريد تساعدهم بلم غراضهم غزل مريضه متكدر وحدها ..

ماحجيت ، تقربت مني ديما حجت خير شو البيت هوسه ..

رجلج وضرتج على سفر ابدي خيه ..

هاي شلون ..

بيبر كال مالهم رجعه لحد مااني اكول ..

صدك ..

اي والله ..

ياا ضليت بلا رجال هسه من صدك ..

هو شوكت صار رجلج حتى هسه تبقين بلا رجال ..

ميخالف اسمه رجال ، هسه حتى الاسم طار مني شكد كصتي فكر اني وماعندي حظ بالزلم ..

همست يوسف ماسامعه شي عنه ..

منين اسمع ذاك اليوم راسلت اختي وسالتها عليه كالت محد يعرف عنه شي ..

معقوله خاف من بيبر ورجلج وشرد ..

ماعرف ، بس الاحسن اله يشرد والا اذا لزمو بس ربج يخلصه …

عرف عواد بسالفه سفر بس ماحجه جن غزل سوت شغلها زين ، اخذتهم السياره كبل للمطار بشار خابر بيبر كله صعدتهم الطياره بيدي مناك الجماعه يتلكو …

ةشغل زاد و بيبر كثر غياباته يوم اكدر اقنعه يضل ويخلي عدي يروح بمكانه و عشره لاا ، مجرد ماتغمض عيوني الكاه ماكو يمي ، عايفني ورايح ، يرجع المغرب تعبان مايحجي ..

مره من مرات حظنته قبل لايطلع حسيت بسلاح بحزامه ..

همست شنو لازمه السلاح ..

تلمس شعري أمن اكثر ..

هم شحنه …

لا اجتماع …

ماقتنعت ، همست ربح الذهب اكثر لو ربح الشحنات ..

ضحك لاتحاولين ميرال ، ماريد اكرر كافي تعبت من الحجي ..

- الذهب مربح والله تعال نشتغل بي واساعدك اني ..

-مو شغله مربح شغله اذا تركت شغلي .. شغل نفسه ماراح يتركني كافي تعيدين  و تصقلين بلشت اضوج من نكج  ولحج متكرر ..

ابتعدت عنه جلب بيه ، خله شفايفه على كصتي ، يبوسها بهدوء مره واثنين ، حظنته و سكتت .  

راح ساعه ب١٠ باليل ، و فضيت لوحدي ، اجت كادي حجت اروح سليب مدام ..

جريت نفس ، روحي ، طلعت من الغرفه اروح اكعد بالحديقه ، تلكتني تالا على درج ادردم لوحدها ، ماعرف  شايله شي يطكطك بيدها ..

همست تالا ..

ردت شكوو ..

جاي تتعشين ..

اي ..

تجين بره بالحديقه وياي على الواهس ..

مالي خلك اريد اتعشى وادرس وانخمد…

عافتني ومشت ، لحكتها لغرفتها ، دخلت وراها ، همست ، شلونج  .

زينه ..

شو مالج حس صار فتره ..

شتردين ميرال ..

تلمست الميز ، لزمت الكرسي جريته وكعدت يمها شبيج ضايجه ..

هامج يعني ..

ليش مايهمني ، مو مثل قبل نكعد ونسولف ولا تسالين عليه شغيرج ..

حجت مهضومه :- تعبانه …

من شنوو ..

من كلشي ..

سكتت ثواني حجيت مشتاقه لنانه مو ..

بجت كبل اي ولساري هم ..

مو طلعو بسببج ..

غلطت والله ..

غلطج جبير مو بس جذبتي لاا اتهمتي تهمه باطله . توه تحجي قاطعتها .. 

عبالج ماعرف الي حجيتي جذب بس المشكله ماعندي دليل عليج ، بس احساسي يكول جذابه وعمري احساسي ما خاب ، المشكله حتى لو عندي شي عليج مااجراء احجي لان اختي انتي ، ضلت بكلبي ادك .. اعرفج غلطانه و سكتت ، 

عافتنه نانه شارده بولدها و بسمعتهم ، مالومها هم مشتاقه الها بس بعدها عنه احسن الها ، ما قصرت ويانه مره دارتنه اكثر من اهلنه بس جزاتها شنو ، تهمه كاذبه على ابنها ، وحتى اني شكيت بي خطيه ..

وفضيحه بنص العالم ، بعدها عنه احسن الها ؛ كافي صار فوك ال١٥ سنه تربي و تكبر بينه ، 

سكتت تبجي تكول والله ندمت ..

انتي مو هيج اعرفج شنو ، منو ديعلمج تتصرفين بهل عدوانيه..

محد بس انتو متحبوني ماتحسون بيه ولا واحد يهتم بيه كلمن لاهي بروحه وبحياته ..

ليش شلون محد متهم بيج شتردين بعد ..

ماراح تعرفون ابد مو الا اني اكول حق انتو تحسون شنو اريد مو كلشي ينحجي ميرال ..

سكتت مو فاهمه عليها ، حجيت تردين نروح نشوف نانه ..

حجت رحت وطردني ساري ..

فكيت عيوني هاي شوكت رحتي ..

ذاك اليوم ..

شلون رحتي ، منو وداج ..

رحت لوحدي قابل صغيره اني كاافي تتصرفين وياي هيج ميرال تطلعين وطبين محد سالج بس من اطلع اني توكفيلي ..

جريت نفس جزعانه ، كمت لحيلي ، لزمت راسها ، اذا تردين ترحين لمكان كولي الي اخلي بشار يوصلج اخاف عليج من العبريه لو تكسي الدنيا مو امان .

- لاتخافين اوديج للشط وارجعج عطشانه ..

ابتسمت ، رمشت بعيوني ، عفتها وطلعت بس سديت الباب اختفت ابتسامتي ، كلبي ينقبض من اكعد وياها ، احس دتحجي حجي كبار والله ولا مبادئها ولا افكارها ..

تتصرف لوحدها صايره بلا خوف ولا اذن ، لا نوب الحجايه تردها عشره و تستهين بيه ..

نزلت بهدوء ضايجه ام زياد بصاله تخابر ، مو عوايدها كل مره لو طالعه لو بغرفتها ، اسمع تحجي ويه ايلاف تكللها اذا ضل نزف منا للصبح روحي للمستشفى …

توجهت للمطبخ ، فارغ اكيد راحو ينامون بس اني جافاني النوم ، من هم تالا و بيبر ..

فتحت الباب لفحني هوى بارد ، غمضت عيوني اتنفس براحه ، مشيت و ياي عصاتي تضرب  بالارض ، توجهت للكراسي بره قريب النافوره .. 

تذكرت ملابس بيبر يرادلهم كوي نسيت اكول لكادي ،

سمعت صوت واحد يكح وراي .. التفتت ، صوت ابو حمد ، جن ديشرب جكاير ويكح ، بيش الساعه هسه ، 

كمت لحيلي توجهت على صوته شعجب كاعد لحد هسه ، اعرف ينامون من وكت هو مرته ، همست بهدوء خفت لا افززه .. ابو حمد ..

ماسمع ..

عليت صوتي شوي... ابو حمد ..

حجه مفزوع هاا هاا عمي اجه عليه هاا عمي شبيج ..

ابتسمت مابيه عمو سمعتك تكح وكلت اسال عسى ماشر ..

لا عمي سلامتج محتاجه شي ..

لا والله ..

عليش طالعه بهل اليل لعد يبه ..

بيش ساعه ..

ب١٢ باليل بنتي ..

هزيت راسي شعجب سهران عمو اعرفك تنام من وكت .. 

سكت يجر نفس من جكاير ، 

ادخن ابو حمد ..

اي والله بس من اضوج ، 

ابتسمت جن ام حمد مزودتها وياك ..

ضحك لو على وسن رضايه الله ،  مد ايده تعاي اكعدي عمي شكو واكفه ، كعدت على البلوكات ، حجيت ابنك تعبان ..

اي والله باجر وراه غسل كليه وهاي ماجاي ينام يبجي منها كلبي يوجعني عليه ماتحملت عفته وطلعت ..

كل شكد تغسلون كليته ..

كل ٦٠ يوم ثلاثين مره يغسلوها ، يعني بين يوم ويوم تنغسل وهاي شوفه عينج نطلع من الفجر للعصر يله يلوحنه السره و هيج مكضينها وكله يهون بس الالم الي بلشته مايهود لو يموت احسن اله ..

دنجت راسي مدمعه كلامه وبحه الحزن الي بصوته تاذي ، كعد يستغفر الله و يكول ابتلاء من ربنا يمكن امتحان و يمكن ديمحي ذنوبه بهل بلاء ..

بلعت ريك ، سبحان الله الي خلق وصور ، كليه الانسان الطبيعي تغسل نفسها ثلاثين مره باليوم .. ثلاثييين مره باليوم ..

بدون مانحس ولا نشعر بالالم ، شوف عظمه الله سبحانه وتعالى و جمال خلقه ..

ثلاثين مره باليوم  و بكليه حجمها اقل من جف الايد .. مقارنه بالمره وحده كل يومين مصحوبه بالام فضيع و جهاز الي يغسل يطلع طوله وعرضه مترتين بمتره …

عظمه الله سبحانه وتعالى تقشعر البدن ...

درت وجهي عليه :- ماكو متبرع يتبرع اله ..

-حتى لو اكو بنتي عمليته بالدفاتر حتى مو بالملايين ، واحنه الي عدنا دناخذ بي علاج اله وعيشه اخواته ..

-همست بخجل اخلي بيبر يتكفل عمليه ..

-رد بسرعه لا لاا خلفه عليه مامقصر ويانه هو رحم الله والديه ..

-مايكول ابو حمد بيبر يحب يساعد ..

-لا بنتي ماقصرتو اشكرج لاتعيديها ابد ، الي كاتبه ربج يصير ..

سكتت خجلانه حجه ادخلي جوه وياي دنضيفج استكان جاي  .

-ابتسمت اسوي زحمه ..

-لاعمي رحمه ..

-منو يسوي انته ..

-لا البنيات كاعدات علمود اخوهن يعينن امهن عليه ..

سندني وكفني مشيت وراه هو كبالي يدليني بيتهم جوه قريب البستان ، وره الاسطبل يصير مريت من يم الحصن ، هادئات حيل ..

صار شكد ماجايه هنا ولا شايفه الحيوانات ، التهيت بهل الحياه ، برغم شكد احب الهدوء بس الهدوء ودعني و عافني بنص الفوضى ..

دخل وصاح وسن شوفي منو جاينه اليوم زياره ..

حجت منو بهل اليل …

رد ميرال ..

بنااتها يحجن ياا ماما هاي  الي ماتشوف مرت المهندس ..

ابتسمت السلام عليكم ..

ردت هلا تفضلي محتاجه شي ..

لا بس ابو حمد عزمني على جاي ..

-تعال تفضلي تعاي ،  جرني ابو حمد وكعدت بالارض على دوشك اسفنج خله مخده بصفي ..

ضليت مبتسمه ، حجت بنت تردين جاي لو شربت ..

همست بكيفج ..

عدنا شربت ابو جياسه تريدين برتقال لو مشمش .. 

رمشت بعيوني .. مشمش ، راحت تركض تسوي ، كعدت وحده بصفي وارتاجت على مخده حجت وياي ، ماتشوفين كلش انتي ؟؟!

بلعت ريك ابتسمت بريبه ، لا اشوف بكلبي ..

شلون يعني .. 

من صوتها باين صغيره طفله ، حجيت الله سبحانه وتعالى ياخذ شي و ينطي شي ، اخذ نظري و انطاني احساس و بصيره ..

شلون يعني ..

ضحكت بهدوء ، هاي شلون افهمها ، شوي وحجت :- توجعج ؟؟..

شنو ..

عيونج ..

نوبات  ..

ماتبجين من توجعج .

تقربت اختها و صاخت وخرري بتول ، هاج تشربين لو اشربج بيدي ..

لا ادبر نفسي مديت ايدي اخذت الكلاص منها حجت هاي كليجه هم ..

هزيت راسي اشكرج ، اسمع صوت وسن كامت على ابنها صاح يماا الحكيني ، ..

كامن وره امهن وضلت هاي بتول كاعده بصفي  ..

حجيت شبي ديتوجع اخوج ..

اي يوميه هيج ، مايخلينه انام ..

الله يشفي ، 

لو عدنا فلوس جان سوينه اله عمليه بس ماعدنا فلوس ، بابا يكول يرادله فلوس بكد الغرفه ..

هسه اخلي بيبر يدفع فلوس عمليته ويصير احسن ..

بيبر  منو المهندس قصدج الي نشتغل عنده احنه ..

اي زوجي ..

-امي وبابا يكولون فلوسكم حرام ..

بهت وجهي ، والله جن واحد رشكني بماي ثلج ..  بلعت ريك ذبيت الكلاص من ايدي على صفحه ، 

شكد عمرج بتول ..

١١ سنه …

جريت نفس ، شلون يعني فلوسنه حرام .

ماعرف ماما كالت نداين من المهندس بس بابا كال لاا ، فلوسهم نصها حرام ..

ابتسمت بخيبه ، حكيت كصتي متوتره ، حجيت تعاي ساعديني ارجع فدوه ..

كمت لحيلي و هيه لزمت ايدي ، طلعت بدون مااكللهم ، هم التهو بابنهم جوه و اني طلعت ..

وصلتني للنافوره ورجعت تركض لبيتهم ، وكفت بنص الحديقه كلبي يرجف ، سندت نفسي على العصا ، المشكله اعرف كلامها صح بس مابيدي حيله شسوي يعني ..

اتعارك وياه لو اضربه لو اهج  لو شنوو ، مابيدي شي غير احجي وياه بسياسه واقنعه ..

اعرف هذا شي مابي نتيجه ، توجهت لكادي اكللها باجر عود تعاي من وكت اكوي الملابس ، خفت لا تنطرد باجر و يضلن منو يسويهن  ، 

ماعرف حتى ساعه عبرت ال١٢ لو لاا نامت لو بعد مادري ..

وصلت قريب الحديقه و لاحت ذكريات نانه و ساري ، لو اسامه كل ماوصل اهنا يجي ركض يلزم ايدي يساعدني حتى ادخل ..

وكفت قريب الباب ادكها ، اسمع كادي تحجي بس ويه منوو ..

وكفت همست كاادي ، ماردت بس تحجي و تسولف بالانكليزي ..

دكيت الباب كاادي كاعده ..

اجت تحجي هااا مداام يسس مدام ..

فتحت الباب ، يس مدام ، ابتسمت دخلت شوي ، ريحه الملحق متغيره ..

انمحت ريحه نانه و ريحه طبخها ، جريت نفس ، حجيت خما صحيتج من نومج ..

لا مدام انا كول ماي فاملي .. 

تتصلين على اهلج بهل اليل ..

يس مدام اختي صغيره تطمن علي ..

ابتسمت ، باعي عندي ملابس بسله مغسولات تكويهم ، و عندي ملابس داخل الكنتور يرادلهم كوي ، 

حجت تمام تفضلي مدام ادخلي ..

هزيت راسي لا رايحه ، بس،ردت اسالج اكو شي باقي من غراض نانه هنا ، دخلت باتجاه المطبخ و غرفه ، التفتت عليها هاا باقي شي  ..

نانه منو ..

ام ساري كانت قبلج هناا ضال شي من غراضها ..

اي دونت نو مدام ، 

هزيت راسي تمام ، توجهت اطلع سمعت صوت بره بالحديقه ، و ريحه غريبه ، وكفت قريب الباب حتى اطلع ، صاحت كادي فززتني .. ام زياد ..

التفتت عليها شنوو … بس نطيت ظهري للباب ، اجتني دفعه قويه وكعتني على كادي تمددت بنص  المحلق على ظهري ، وكادي بصفي تصيح ..

صوت الباب الحديد مال ملحق انربدت و ريحه عطاب عبالك ..

كمن لحيلي شكوو كادي شكوو ..

فااير مدااام فاااير ..

شنوو كمت لحيلي اتلمس على عصاا ادور عليها شنووو، ريحه عبالك حريق لو نار شي اشتعل وكادي تصرخ فاااير مدام ام زيااد فااير ..

كمت لحيلي اريد اندل ماكوو تيهت نوب العصا وكعت ماعرف وين كمت لحيلي ريحه دخان قوويه و عيوني تسعر نار ، اختنكت دنجت اكح ..

كمت بسرعه اريد الزم حايط مجرد مالتفتت انربدت باب الحمام وكعت على صفحتي اجت حديده مال عتبه الباب على حوضي وكعت ابجي ..

ولج كااادي ، وينج مديت ايدي كاادي ، ماتسمع بس تعيط بالانكليزي .. هييييلب فاااير ..

اريد افتهم ولج كاادي شنوو شنو هالنار ..

 المكان شلون عبالك حمام بخاري اختنكت لا اكدر اجر النفس وعيوني تخر دمع كمت اكح اريد اتنفس ماكو من عدا الحروره تلفح بالجسم ..

دخلت للحمام زحف وشغلت الدوش اريد اصحي عيوني نار صارو عطت ولج كاااادي ولج تعاااي وينج ..

صرخت صرخه هيه لبدت بزاويه الحمام اعيط ولج تالااااا ..

نااانه ولكم وينكمم شكووو ..

كمت لحيلي منكعه ماي و لازمه صفحتي طلعت بره الحمام شوي و اسمع عياط تالا تصيح ميرررال ..

وينج ولج ميرال ..

بجيت خايفه تالااا ولج تالاا الملحق احترك مووو ..

تالا تصيح ماتسمعني و كادي صراخها عالي لحد ماخنست جفلت صحت كاادي وينج ، ماكدرت ابتعد رجعت للحمام من شفت حروره علت ماكدر بعد اوكف اختنكت كلش من دخان ..

صحت تالاااا ، ولج وينكم الحكووني ..

تالا تعيط ميرال هاي انتي ولج بالملحق انتي ؟؟!

تحركت شوي و لفحتنه حروره قويه لدرجه شعري حسته شاط رجعت ليوره اعيط عثرت بشي ، و كعدت بالارض تلمست لان رجل هااي ..

كاادي هااي انتي ، هزيتها كاادي ولج كوومي ، جريتها حيل اريد اخذها للحمام مااكدر ..

عطت كاااادي ولج اكعدددي …

صوت ديما و تالا يعيطون ، بشار ابو حمد هووسه بره ، بس مافتهم شنو عطت حيل ، تالا لحكيني ..

عاطت تبجي مخترعه ، ميرال تعااي هنااا للغرفه من شبباك الغرفه ولج وييينج راح اكسره تعااي تعيط وتبجي ، عطت ولج انحصرت بالحمام ماكدر اطلع ، 

رجع صوت تالا تصرخ :- ولك بشااار الحك راح تمووت الحكوولها ،

جريت كادي ماتنجر هزيتها ماترد بجيت كادي شبيج ، خليت راسي بين اديه ماكدر اتنفس ودخت كلش ..
صياحهم بره ممفهوم و صوت عالي ، عيوني غمضتها احسهم جمر ، اريد اكوم حتى ارجع للحمام ماكدر كوه اجر النفس ، 

زحفت للحمام ، وصلت للبوري اهامش ادور شلون افتحه ، شغلت الماي كوه  ، كمت سندت نفسي على حايط ، جريت اي شي من التعلاكه ملابس ماعرف منشفه سديت الباب وخليتهم جوه الباب كعدت بالارضه وسكتت ..

كلت اموت اعدل الله كاتبه يصير ، كادي ماعرف شبيها ، صوت تالا واصلني تصرخ ميررال لاتعوفيني ولج تعااي هنا بالغرفه ووينج ميرال ردييي ..

#يتبع ....

سؤال ليش عود من اسوي النشر يومي يقل تفاعل 🙂 من اسوي بين يوم ويوم لو كل ثلاث ايام بارت تفاعل يلهب عود ليش هاااا ..

راح اضطر والله ارجع لبين يوم يوم ، لان جاي اشوف نفسي جاي اتعب بس مجاي اخذ حق تعبي وياكم ..

كروب الفيس .. ( كتابات اسماء ديمير )

الانستا ..  asmaa_demer

كروب الفيس  ...  كاتبات وقارئات العراق

جاوبو بمكاني فدوه .. داشوف فهمكم بالقصه شكد ..

شو جن حبيتو عدي اكثر من بيبر 🤔

شوكت كلت ولج 😳

راح تجلطني يمااااا منجن