رواية قاع الشياطين الفصل الثامن والأربعون 48 - بقلم اسماء ديمير

...............☆البارت الثالث والاربعون ☆..............

#قاع_الشياطين(البصر والبصيره)

لااا لهنا حدج شبيج ولج .

اووو بيبر كتلك مفاجئه متأمن بيه يعني .. 

غمض ريته ماغمض المسكين ….

حجت غمضت .. رد اي اي ..

احلف .. رد والله شبيج غمضت ..

تمام ، مشت اطلع بقيه الغراض ، هو سمعها تكركع فزع فتح عيونه بخوف ، وكف كعد لحيله ، سند جسمه باديه ، فتح عيونه من شاف كريمات و شغلات تخوف ..

رفع حواجبه بدهشه شاربه هاي ، انعل اهلج ياديما بالله كريم باجر لانعل والديج شسوت بيها …

حجت بحماس مغمض موو ..

هز ايده عوج حلكه ، اي مغمض عيووني اي ..

بيبر بداعتي لا تتحرك لو ما تحس ماشي وعدني .  هز راسه هو عارف على شنو ناويه هالبزون ، شكد اطولين بسالفه ميرال من الاخر ..

ياسالفه ..

الي براسج ..

مفتح موو بيبر ..

لعد تردين تستغلين برأتي ولج رجال عفيف اني شهل حركات .

وكفت بعصبيه بيبر جذاب وعدتني ماتفتح ..

غير سمعتج تكركعين كلت الا اذا طلعت ساطور راح اطبرني بي هالخبله بهل ليل ..

وكفت ضايجه جتفت اديها ..

حجه بضحكه يله استعجلي عندج ساعه ونص وراي شغل رجع مدد يضحك مستسلم ..

ضحكت ماتتحرك موو .

لا وداعت عيونج ..

احيانا تتفاجئ بالمقابل ، شكد ماكنت تعرفه هم لازم يصدمك بمواقف ،

او مثل طفل بالضبط ، احنه نربي و نعلمه مع هذا عنده مواقف تخلينه نصفن ونضحك متفاجئين من كلامه او فعله …

او على كولت اهلنا الحجاره ماتعجبك تفشخك ، 

المهم ميرال جانت تثبت للمقابل هيه عميه عيون بس موعميه كلب ولا عقل ، عقلها وكلبها وزنهم كلهم ..

كلبها تحمل تالا ، كلبها حب بيبرس رغم اغلاطه وخطايا ..

عقلها خلاها تحافظ على نفسها وماتغلط رغم ماعايشه بنص  بؤره وخطايا ، عقلها حماها من هواي نفسيات ، 

او يمكن ربنا هو الستار و الحافظ ..

استغلت تعاطفه و تساهله وياها ، واستخدمتهم اخر شي نامت بصفه دكات كلبها سريعه كانو تريد تخرج من صدرها ..

غمضت عيونها دايخه ، دارت على بيبر مبتسمه ، مالك صوت ..

اول مره اتعرض لاغت*** بحياتي  .

ضحكت ، شي جديد ..

انعل ابو جديد ، بعد توبه اطاوعج .. فكي ايدي اكول ..

لا اشرب عصير ويله ..

دفكيني حترك ابو ديما واخوها وعشيرتها كلهم ..

هههه كامت جابت عصير وحجت دشرب بلل ريكك ، شرب وحجه فكيني ..

كمت عود افكه ، صفنت هاي شلون تنفتح بيبر ..

فز شنو يالله ميرال فكيني لخاطر الله شلون شديتيها اذا متعرفين تفكيها ...

صفنت شوي هااا شدها اسهل من فكها ..

انعل يومج ميرال فكيني ولج لو بسنونج ..

مديت اديه وكعدت اتعارك ويه العقده ، ضحكت بفطاره ههههههه مجاي تنفك هههههه ..

عاط ينعل ابو الي يطاوعج ولج حاولي ياامره يافضيحتي واني مربوط ...

ههههه اوكف انطي صبر دنجت افكها بسنوني هههههه بيبر عصت والله هههههه ...

كام لحيله يحاول هو يفكها نتر ولج ساعديني اريد الزمه نوب تيهت كعدت اضحك هو عصبي نوب من هستريا ضحك ماكدرت اساعده كعدت بالارض هو عصبي يغلط ..

شلون يعني اضل بهل حاله صدك تحجين رجال شطولني شعرضني مثل ثور مربوط ...

ههههههه ..

وجع كومي لج .. زين المن تصيحين يفكني اشتعلو اهلج ياافشلتي والله هم جوه ينتظروني انزل واني هنا مجلب بجربايه شيكولون عليه ...

فحطت بالارض كمت عليه همست عوفها شوي وارجع احاول وياها وعد ..

ولج ..

دكاافي بيبر شبيك ..  شوي بس انام بحظنك عود افكك وروح ..

ولج تاخرت عليهم ، هاج جهاز جاي يدك افتحي درد عليهم على الاقل ..

ماردت شربته عصير مددت بحظنه تنام تردد شووي بس شووي ..

دقايق مو اكثر وطفئ الحبيب وثكلت نومته رفعت راسي من ثكل راسه عرفته نام ..

حركت ايده ثكيله ابتسمت ، كمت من يمه دخلت اغسل ، طلعت لابسه ملابس محتشمه ، شلت الصينيه فواكه ونزلت بيهم ..

نزلت مبتسمه وعلى وجهي علامات نصر ، تلكتني ام زياد نترت رجلج وين مو جاي ندك عليه ..

خلت الصينيه على ميز مطبخ وردت ليش شكوو .

شنو شكوو مو عنده شغل ..

حجه بشار صيحي ميرال تاخرنه ترى ..

همست مبتسمه بيبر نام كبل لاينام كال كوليلهم يرحون بحدهم خلي عدي يحير بسالفه ..

دفعته ام زياد شنوو ..

لزمت ايدها نزلتها ، هذا الي كاله والله عندج اشكال باجر عودحاجي لو خابري بالكت يرد عليج ..

عفتها و مشيت اصعد عواد وراي يكللها عصت عليج العميه ام زياد تلكيلها حل لو اني اتصرف ..

عاطت صووج اخوووك كله من اخوووك دشوف شسوه هسه عافنه ناطرين وانطمر يمهااا ..

حجه اني اروح ..

ردت رووح ، وصباح ربااح اني الهم بسيطه ،

عدي اخر واحد طلع صوته حجه بهدوء :- ماله روحه .عواد سالفته منتهيه ، الشغل الي ايدي بي ماقبل عواد ويانه يدخل اني احلها لوحدي ..

كام لحيله وصاح بشباب يله امشونه..

عوادنتر مو بكيفك بمكان اخوي رايح .

اندار عليه اخوك نفسه ممرحب بوجودك ويانه لاتحشر نفسك بشي مالك بي لاناقه ولا جمل ..

مو على كيفك مشه يريد يصعد سياره .

صاح عدي والله اذا شفتك بنفس المكان الي متفقين عليه الا اخلي طلقه براسك واكتلك ، اصعد لاخوك حاجي غير هيج مااعندي مادامني اني موجود انته تضل طول عمرك منبوذ ..

عاط وهجم على عدي يضربه نطى كله ورجعه ليوره صاحت بيهم ام زيااد كاافي شبيكم ..

تعاركو بينهم ، سبحان الله كيدهم في نحرهم ، بينهم ممتعاشرين ، مددت بصف رجلها و بالها دنيا ماشيه وياها ..

مادرت الدنيا ماشيه باتجاه غلط ، ممكن تدفع حياتها ثمن ، صبح الصبح ، ماصار اي شي من متوقعه مخطط اله بيبر ..

شحنه واصله بس عدي عواد متضاربين ، و داخلين وسطاء يحلون السالفه وكل هذا يسالون مهندس وين يردون نايم يم مرته ..

كعد صبح مثل الخبل فاز لان شمس عاليه ، وهاي نايمه بصفه ، دار وجه على ساعه جداريه فك عيونه مخترع ، اديه مفتوحه هاي شوكت فتحتهم..

ركض بسرعه يلبس و يطلع ، نزل ركض صاح ام زياد .

طلعت اله مجتفه و عصبيه ..

حجه مشو الشباب البارحه ..

اخوك راح ، رووح تلكاهم يم ابو عزت ناس مدميه ناس وحظرتك نايم ، ترى مرتك بلشت تاثر عليك وعلينه هم كااافي شنو القصه بيبرس مو كانو طلعت السالفه من ماعونها ، من شوكت انته هيج ضارب شغل عرض الحايط مامهتم ..

مو قبل شغلك اهم شي عندك شتغير ، اذا ضليت هيج معناها راح يضيع تعب السنين سابقه كله ..

عافها وركض للسياره يشوف ، لمن وصل لبيت الحجي ، دك على بشار كله كللهم اجه بيبر  ، رد ذاك بضوجه صدك تحجي وين جنت هجمو الامه عليك ..

سده ساكت يبالع بريكه ...وكف سيارته كبال االباب الخارجيه باوع بالمرايه يعدل ملابسه و وشعره ، مد ايده على سلاحه يتاكد منه ، فتحت الباب خارجيه سلايد .

وكف حارس ياشر لبيبرس شرفت استاذ  ..

هز راسه و حرك السياره لكبال الفله ، دقيقتين و صف سياره كبال نافوره جبيره ، صايره بواجه الفله .. من الفلل القديمه الي انبنت بالثمانينات واستولو عليها الجماعه بعد ٢٠٠٣.

الحرس مالين الحديقه ، بلع ريك استر يارب ..

مسح ركبته و نزل ، توجه للفله كبل ، صاح بي عزت ، التفت ..

-تقرب عليه  وكف مقابل بيبر ، اشره براسه خيرر الاخبار مطعمن ..

سكت بيبر دار وجهه يظم توتره .. تقرب الحارس حجه عزت شايل سلاح مو سلمه قبل لاتدخل ..

رفع نظره بيبر مو راضي ، جر نفس عزت اندار على حارس حجه عوفه روح ،

وكف عزت كبال بيبر ، لازم سبحته يفر بيها حجه ، وين المشكله بالضبط يالمهندس .. 

-رد ماكو مشكله تصير شغلات صغيره نتلافاها ..

عوج حلكه عزت مامقتنع ، لا اكو تغير يالمهندس شغلك مو مثل قبل حتى انضباطك مو مثل قبل ، ومشاكل الصغيره تكبر و من تكبر يطلع الها صوت ..

رفع راسه بيبر يباوع بوجه عزت ..

تقرب عزت من وجه بيبر وحجه بهدوء ، الوالد ماعاجبه الوضع وخاصه وضعك .. دك على جتفه ، نعرفك من يومك شاطر ابويا ماسماك المهندس بس لان يعرفك من تخطط تضبط الشغله وطلعها توب بس هم لاحظنه اخر فتره بلشت تخربط شنو القصه من الاخر حتى نعينك عليها..

بلع ريك ، هز ماكو شي كتلك احل السالفه ..

-عدي هم ماعاجبه وضعك ترى ..

-شنو كال ..

-مو مهم الي يكوله ، دنشوف ونراقب احنه ، عيونه بكل مكان بيبر تعرفنه موو .. عيونه توصل لحد غرفه نومك  ..

تغيرت ملامح وجه ،، رد هذا الحجي تكوله لصبيان عزت مو الي ، هالحجي راح يضل يدك براسي ماانساه وعليه اثار سلبيه ..

-لا يمعود شبييييك بس اذكرك كلت خاف ناسي . 

-مشكلتي مانسه عزت ، هز راسه ، عافه ودخل للفله لحكه و حجه داحجي بجانبك ترى تعرف شكد احبك ..

-دفع ايده وكمل دربه لعند الحجي .. 

لكه بشار واكف باب القاعه مجتف اديه لصدره وضايج ، رفع حواجبه يحذره ..

رمش بهدوء يعني اعرف ، دخل لكاهم مجتمعين على طاوله جبيره ، عواد واكف وجه مدمه ، عدي حاجبه مضروب والحال مايعجب ابد ،

حجه الحجي اكعد .. جر كرسي وكعد.، 

جانت الطاوله مو مثل طاولاتنه ، نستخدمها للاكل ، طاولات كبار غير ..

ماينوكل عليها زاد ونعمه ، طاولاتنه ينوكل عليها وتحل عليها البركه والخير وبعدها محبه وحنيه وعمران بيوت ..

اما طاولات الكبار ، نفاق ودجل واذيه وسرقه و ظلم للضعيف ، طاولاتهم رغم كبرها بس صغيره على فقير وتخنكه ، رغم كبرها بس مابيها خير و عمران ، رغم كبرها بس بخيله وستخصر الخير للناس  ..

كعداتهم تقسم خير الملايين على اشخاص بعدد الاصابع ..

 كعدات تاكل حق ملايين وتخلي بحلك ماتعب بيهن  ..

كعدات تمص تعب و صحه الفقير و تغذي بيهن كم شخص مايستحق الحياه اصلا ..

بس ليش ؟؟!

شنو سبب ليش،ماكو عداله ، السبب الرئيسي هيه الحرب ، الحرب ماينتج عنها غير بس دمار وظلم واكل حق فقير ، الي يستغلها بعض بالتجاره ، وبيع منتجاتهم سواء غذاء او سلاح او علاج او ممنوعات .. 

وغياب مخافه الله ، واختفاء رجال دين الحقيقين ، الي يرشدك لطريق الصح و يحصنك من غلط وبيع نفس والظمير .. 

وجهل الناس ، الي يعم بعد كل كارثه تجي تلكه ناس رجعت ميت سنه ليوره ، ويرجعون على تفكير بدائي ورجعي ، هنا هو نطه لعقله اجازه مفتوحه وكام يدور على قائد او رئيس او رجل دين يتبعه حتى يحس بالامان ..

ضنن منه انو هالقائد او رجل دين افهم منه ، يضن هو افهم منه بس لان حظرته ماشغل عقله مافكر ، و بعدها تخلق كوارث يبلش يامن بشغلات ومبادى تكفيريه او اجراميه بحسب فهمه هيه صح ..

وفلان مايغلط وهو افهم وعنده علم اكثر مني  هذا هو صح .. الى ان يدفع حياته ثمن لمبدء هو مو مبدئه ممستفاد  منه شي اصلا ....

هاي سياسه الكبار ، اخلق حرب ، اقتل رجال دين حقيقين ، اقتل العلماء والمفكرين ، اقتل حظاره ثقافه ، اقتل العلم ..

بعدها يصفه بس مساكين ، ارضه صافيه ، تبث بيها الخبث والافكار دمويه و صرف منتجاتك سامه من سلاح او مخدرات او افكار كراهيه والطائفيه ..

نتج عنها اموال طائله لساسه وكبار ، ودمار للشعب …

طلع بيبرس من يمهم راسه يوجعه ، جتفه مثقل ، عدي فات منه يمه خطف بعصبيه ، ومشه لسياره بلا كلام ..

عواد تقرب من بيبر ينتر ، اكلك عدي شوفله حل كاافي وصلت حدها عندي  ..

مارد عليه بيبر ..

جر بيبر ونتر مووووياااك كااافي عدي الكاله صرفه لا اني اتصرف اخرب دنيا بوكتها  ..

-عواد ادفنك والله خلص اسكت مو هنا نحجي جره و صعدو سياراتهم …

رجعو للبيت و ضعهم متوتر ، عبالي زعلان مني ، بس سمعت متعاركين بينهم ، من يومها بيبر تغير لو شارد ذهنه لو ساكت لو بره البيت …

خفت يرجع عليه و يانبني بس الحق ينكال ماعاتبني حتى ، يرجع للغرفه يحظني و يسكت ماينطق ، همست شكوو ..

اششش لاتحجين ..

احسك تعبان ..

عقلي مرهق ..

شبيك ..

كلشي بيه ميرال دنيا احسها كلها داخل مخي تفتر وتسوى فوضى ..

شغلك بي خلل ، عندك منافس مضوجك او عدو بالشغل ..

اني بيه الخلل ، نفسي هيه عدوه نفسي ..

خليت ايدي على راسه امسد عليه واقره ايات ، حجه ماينفع  اني وياي ماينفع شي ..

لزمت كلبه ، روحك نظيفه بيبر حتى لو تصرفاتك غلط  ..

عليج الله ..

ابتسمت والله احنه العميان بيبر نشوف روح البشر وانته روحك طيبه ، سامع بجمال الروح موو ..

كلها تحجي بيها ، بس محد شايفها احنه نشوفها و نحس بيها ، بسته من كصته ، ارتاح انطي لنفسك وكت ارتاح بي بطل تفكر ..

سكت ونام بحظني خانس  .. 

فتره و عواد كب على بيبر بالصاله ، سمعت داخل واحد ويه عواد يدير مطعم و يصرف بضاعه بي ، هالشخص جاي من طرف عدي ..

عواد يصيح تريد تخننكني مووو تريد تضيقون عليه انته وعدددي ليش تاخذ بكلامه ليش تكله هااهيه واني لعد شنوو شغلي ..

رد حالك من حال عباس ، هو هم ثقه و عدي من دخله وياك لان يثق بي شيل حمل عنك يعني ..

ماكو هيج حجي بيبرس ، هذا مو كلامك الاول من طلعتني من شغل الشحنات و استلمت المطعم كلت انته تتصرف وانته تتحكم وسكتت ، كلت ميخالف ، بس توصل حتى مطعم يدز واحد يراقبني بي ماارضه والله ..

-عواد الولد يكعد على صفحه وانته الامر ناهي تجفه شر ياخوي اركد شوي انته هم ماناوي على خير اعرفك ..

-مادامه ماجايز مني ماجوز منه والله اندمه اعرفه عواد منو طلع من صاله وركع الباب وراح حيل …

اني خنست بمكاني ، ديما حجت شلون ماشوف عواد كم شهر ويكعدو بالبيت ويانه مثل المره لاشغله ولا مشغله ..

رفعت راسي ليش ..

مو جاي اشوفي مثل ثور هايج بلا عقل عباله بالعرك يثبت نفسه طاح حظه ..

ام زياد مارضت شلون هيج وليش تثبق بعدي هالكد ليش تنطي مجال على حساب اخوك ..

رد لو ماعدي جان ركابنه قبل كم يوم طارت ام زياد عواد مفشلنه بكل مكان ، اسرارنه كلها بحلك ثروت شلون يكول ماعرف ، بس جماعه واصلهم حجي عواد عنده اتصال بيهم بس اخوي مايحجي ينكر ..

-ردت جوز ديحفرون جواكم ..

لاا اني من زمان ادري ومغلس اكول اخوي بس وصلت سالفه للجماعه وهذول شغلهم خط احمر اي غلط صغير يحملو علينه و يلومونه ، ماكو مجال للغلط ام زياد عواد مجاي يفتهم ، الحل البسيط اخلي،عيون وياه بالمطعم دشوف شنو باله هذا ..

ضلو هيج عرك بينهم يومين لحد ماجابو الي اسمه عباس ودخلو بالمطعم ، جبر على عواد ، 

ام زياد رادت تهدء الوضع بينهم عزمت ايلاف ورجلها طارق ، و عدي مرته واهله ..

ونصبت كعده بالحديقه ، اني ضليت بغرفه ديما كاعدات ..

جانت ام زياد حايره بايلاف و بحملها و بالخطار وراها تركض غزل مالها شغل بينه ، طلعنه بس تعشينه وياهم…

بيبر احس بي شارد حتى كلامه مو هالكد صوت عدي ماسمعه بس صوت مرته وابنه ، كعدت بصفه ، خله ايده على رجليه ..

ابتسمت شلونك ..

صوتي شيكول ..

سكتت صفنت ، بعدين ابتسمت تسهر وياي ..

ناويه تنطيني منوم هم ولج ..

ضحكت بهدوء جنت رايده راحتك ..

راحتي بحظنج تعرفين ..

جريت نفس مبتسمه كلبي يرفرف ، شحلو كلامه ، تعشينه واجت كادي و وسن شالو النعمه ..

كمت اغسل ، اسمع ام زياد تكول لوسن نعمه ضميها بالبرادات كلها ..

و حظري نركيله و العصاير النه ، وكفت اشرب ماي استمع عمدا ..

طلعت من المطبخ التفتت لجهه وسن حجيت نعمه نظيفه اخذيها لبيتج ،  وكت العشه خما ترجعين هم تركبين الهم ، و نركيله خلي كادي تسويها .   

ردت ماله داعي غدير هسه سوت لاخواتها  ..

اخذيها ام حمد اذا على ام زياد اني اكولها اني كتلها ، ارجعي لبيتج  ارتاحي سمعت حمد مو زين ..

جرت نفس ساكته ، وسن ماعرف ليش،ماتحبني برغم ماعندي اذيه والله ، كتلها ابنج شلونه ..

باجر وراه غسل كليه معناها اليوم مينام اليل من الالم ..

هزيت راسي الله يعينه ويشفي ، كادي وين راحت ..

صعدت فوك تكول عدكم ملابس وصخه تنزلها ..

عفتها وصعدت اصيح كادي تخلي عشه لتالا و تساعد ام حمد ، قبل لا اوصل غرفتي اسمعها تحجي عبالي ويه تالا ..

وكفت تكله لا استاز لا ..

عقدت حواجبي هذا منو يمها تحجي وياه معقوله عواد ..

وكفت ساكته ..

ردت لا استاز موجود عدي وياه مدام تبعو ، ماكدرت ادخل مكتبو ..

لا استاز يقفل مكتبو ومدام ميرال ماتعرف  .. 

صحت تالاا …

سكتت كادي ، مشيت باتجاه غرفه تالا وكفت كادي ..

طلعت تحجي نعم مدام ..

وين كنتي ..

بالغرفه مدام كلين ذا باث روم ..

عقدت حواجبي ويامن جنتي تحجين ..

ما تكلمت مدام عم غني .. 

انزلي ساعدي وسن ، فتحت باب غرفه تالا ودخلت ، حجيت تالا ماكو رد ..

حجت كادي سليب مدام النور مظلم كمان . 

رجعت طلعت ، خلصي شغل بالغرفه وانزلي ، عفتها ونزلت ، رجعت كعدت يم بيبر صوت ضحكهم و سوالفهم ..

التفتت على بيبر همست كادي منين جبتها من مكتب  …

رد ام زياد جابتها ليش شبيها ضوجتج اغيرها ..

هزيت راسي لا ، درت وجهي ضايجه ..

همس شبيها ..

ماعرف ماشايفه عليها شي ، 

تمام ، اذا لاحظتي شي كولي الي اتصرف واجيب غيرها ..

صوت بشار حجه تلعبون ورق ..

رد بيبر جيب هنا ..

زاحو الشغلات على ميز و كعدو يرتبوهن بيهن ..

كامت مرت عدي كعدت يمنه همست ام زياد تكللها بالخير عليج سمعت حبله ..

ردت اي صار شهر ..

تكومين بالسلامه ماتعلمين مرت بيبرس شلون حبلتي بالكت يكعد وياها ..

درت وجهي بسرعه اتلافه اافشله ، ديما ردت ترى ذاك اليوم طرحت بعد مو مال حباله مايتحمل جسمها ..

ام زياد ردت عليها قابل جاهل مو زين عليها ، بكدها مخلفه اثنين ..

مارديت عليها تلافيت الحديث وياهن اصلا بالي يم بيبر ، كلامه محدود ويه عدي عبالك زعلانين ..

خلو الورق و زعوو ، رد بيبر شنو الجايزه ربح ..

رد بشار هو انته عايز وادور جوائز ..

رد :- اي شي بلا هدف بلا ربح ماله طعم .. 

عدي حجه :- الي يربح  ينفذ طلبه ..

ب-شار كال اني اريد الف دولار ..

-ستار رد تنقلوني من شغل مخزن للمطعم يم دانيال ..

حجه بيبر وانته عدي ، سكت عدي ثواني وكله تعرف طلبي قبل لااكوله ..

سكت بيبر حجه وزع بشار ..

حاجاه عدي موافق لو  لاا .

رد بيبر فوز بالاول بعدين احجي ..

ضحك نشوف .. 

خليت راسي على جتفه استمع الهم ولعبهم ، دقايق ودخل عواد بصوته واغانيه الواصله مدري زين ، جابه دانيال يسحل بروحه .

شاف نوب عدي كاعد صاح عليه من بعيد هااا سااق* شوو هنا ، 

ماحاجه عدي بس رفع نظره على بيبر ، اشر بيبر لدانيال ودي لغرفته حجه ويه غزل كومي على رجلج .

ذاك ضل يصيح مادخل عوفووني ، تعال ولك عدي شعندك هنااا ..

سحله دانيال كوه واخذو ليجوه ، كبر دومه مفشلنه نوب كبال ام بحر هاي حالته ، 

كملو لعب وربح بيبر ، اسمع ضحكته يكللهم ، هااا طلباتكم خلوها بعز** 

ضحكت اني بيبرر مو كاعدات احنه ..

هاا اسف ليديز اسف .. 

حظن جتفي ، حجه وياكم .. طلبي اني باجر اكوله مو اليوم .

رد بشار غير نعرفه ..

جججج ..

مرت فتره و رجع سافر بيبر اسبوع ، لمن رجع سألني على كادي شلونها ..

رديت زينه  حتى خدمتها زينه ماتتعاجز وتفتهم بسرعه تاخذ بالشغل ، بس قبل يومين ام زياد اذتها بالشغل حيل .. نوب ماخلتها تدخل للفله وره ال١١ باليل منعتها ..

 حجه صيحيلها وانطيها ١٠٠ دولار و اجازه سبوع ..

ليش ؟؟!

سوي كتلج عليه ، شال الفلوس خلاهن بيدي .. 

جريت جهازي دكيت عليها ، دقايق و صعدت حجت نعم مدام ..

رديت اخذي اجازه اسبوع كادي و هاج هذني . 

ردت ليش مدام …

ابتسمت اجازه واستراحه كم يوم ..

اخذت الفلوس و حجت لا مدام استي هير انا ، احب شغل هنا كثير …

رديت لاا ارتاحي كم يوم ، 

سكتت ..

حجه بيبر معتازه شي بعد  .. كادي اسمج مو ..

ردت نعم سر ..

وين اشتغلتي قبل لاتجين هنا ..
 
عند فاملي سر ..

هز راسه خوش روحي اخذي راحتج ، يوم الاحد جاي ادزلج بشار يجيبج ..

ردت انا اجي سر شكرا ..

طلعت ضل هو واكف مخصر ، حجيت شكوو ليش خليتها تروح معتمده عليها اني ..

-رد جذابه جانت تشتغل بفندق قبل ، و صاحب الفندق اعرفه ، سكت ثواني ، حجه شفتيها تدخل الغرفه وراج ..

طول اليوم هيه بالغرفه تنظف بس .. سكتت .

حجه شنوو ..

مره سمعتها بالغرفه مالتنه تحجي عن مكتب ماعرف شنو ، تكول ماكدرت ادخل مكتب ..

صفن شوي وحجه هاي مشغليها جاسوسه علينه .

ابتسمت وين اكوو هيج شي .. 

رد بهدوء :- اي دليل ١٠٠ دولار مافرقت عدها ، شي عادي حتى ماكالت شكرا بس من ذكرتي الها اجازه اسبوع علقت وكالت ليش واريد اضل ، هاي مستلمه حق تعبها اضعاف وال١٠٠ دولار عدها لاشي ، 

- رمشت لو منطين ال١٠٠ دولار لوسن مو اشرف النه ..

سكت، حجيت مو جابتها ام زياد لعد .. رد اي من مكتب متاكد اني بس قبل لاتجي للمكتب وين اشتغلت مادورت وراها ، قبل كم يوم لاحظت تصرف عليها يله شكيت بيها ..

حتطردها ..

الله كريم ، 

منو وراها يعني ..

لاتشغلين بالج بالموضوع ، همس تطلعين تتعشين ..

وين ..

بمطعمنه جايبين شيف جديد ..

ابتسمت مطعمكم الي بي ملهي ..

جرني كومني ، ملهى يشتغل باليل احنه رايحين المغرب ..

ربح الملهى تصرفه علينه مو ..

شغل العقار قوي ترى خير من الله ..

جريت نفس ؛ حجه لا تعيدين السالفه ميرال كتلج ماكرر ماحب اكرر ..

شنو تعشيني ..

نروح و نشوف المنيو …

ابتسمت ، طلعت المغرب و بشار يسوق ، حجيت بشار شلونها عايلتك .

بخير الحمدلله ..

وحمل زوجتك ..

والله يعني تعرفين هرمونات يوم ويص و يوم عيص  ..

ضحكت ، ربي يجعل ايام كلها ويص .. 

ضحك ، رد بيبر كلهن هيج نفس العقليه ..

عسيته بعكسي .

رد بشار والله الطف من زوجتك ماشفت ودليل تسال عني وعن احوالي ، وهيه ماصارها فتره طويله تعرفني ، وانته صار سنين وياك ماسالت شبي هالحيوان هذا من شنو ديعاني ..

رد عليه ، راسي مو فارغ بشار تعرف ..

عاذرك الله يعينك .. 

اني مبتسمه اندار عليه يحجي ، بطلي لطافه لو سمحتي بديتي تشوهين صورتي كبال الناس ..

وكفنه بصف اشار مرور ، مر طفل يحجي كلينس عمو ..

ماحاجاه بيبر ، همست اخذ منه ..

رد ممحتاجه السياره ، ثواني و اجه طفل ثاني يحجي عندك الف عموو ، صاح بي بشار وخر منا عمو لا تندعم ..

رد الف بس الله يخليلك هالحلووه ..

همست اله ، انطي  بيبر طفل واكف ..

رد هذا عنده بجيبه اكثر ماموجود بمحفظه بشار .

ديشتغل ترى بهل حر طفل شجابره لو عنده ..

اكو ناس تشغلهم مجموعات ، يجيبوهم الفجر بسيارات يوزعوهم على المناطق  وره ال١٢ يلموهم ، تدرين يوميه الواحد بيهم اقل شي ٢٥٠ الف ، ابسط مثال شحده اذا اجه طفل غريب هنا يشغل لو يجدي لو ينكتل لو ينخطف ..

كلشي  بيع وشره ميرال لا يغرج البراءه ، ماتفرق عندي الف ترى بس الي يفرق اني اعرف دانفع الي يشغلهم ..

سكتت ممقتنعه ، اول مره اسمع هيج ، الي اعرفه الي يجدي محتاج ، من شوكت صارت سالفه مجادي تجاره ..

دخلنه المطعم ، واجه الوتير وياه شيف يسلم يسال شتحبون ..

كله سمعت تشوي لحم وعندك صلصه خاصه نزلي دنشوفها ..

الحلو شواها كبالنه  ، انته كاعد تنفتح نفسه على ريحه شوي و صلصه ،  صوت موسيقى هادى بالمطعم ..

الجو كلش راقي ، اجه عواد حجه هاا مشرفنه استاذ بيبر ..

رد حبينه نزور و ناكل من مطعمك ..

تزور مطعمي لو تريد تشوف بعينك شلون الشغل ماشي بمطعم حظرتك ..

راح نرجع لنفس نقطه عواد ..

اذا تريدني ابطل عيد وصقل بالموضوع اطرد ذاك نغل جوه الي مكابلني لان بلشت شياطين تطافر كبالي بيبر ..

هدي نفسك وجر كرسي واكعد اكل ويانه بلا خبال عواد ..

بيبر دهيني هيج يوم عن يوم دتقلل مني وصلت المواصل ذاك جوه هو يدخل بالحسابات ..

هذا حق عواد ، عدي شريك يعني اله حق يشوف شكد دخل وشكد طلع ..

ماتثقون بيه ..

اكعد ويانه وسد السالفه عواد ..

مااسكت بيبر والله كااافي اطرده حالا لو اتصرف اني ..

اخذ كم يوم اجازه واخذ غز… عافنه و مشه يغلط مارضه يسمع بقيه الكلام ..

جر نفس حجه فد يوم يكسر ظهري عواد…

اخوك مثل ثور الهايج بيبر لا تزعل على كولت فد يوم يضرب واحد ويسببك كارثه ..

فعلا يحجي عواد واحنه نغلس بس ماعرفنه هالغبي ممكن يسلب روح شخص مسكين ..

والله بعدنا نحجي حتى ماكملنه كلامنه عنه و سمعنه صوت طلقه طلعت و صوت عياط واحد يصيح ..

طفر يسرعه بيبير دفع الكرسي و صاح لاتتحركين ضلي هنا ..

وكفت لزمت ميز اديه ترجف همست بيبر شكوو وينك ..

صوت ركض و عياط ولد وبيبر يصح شسووويت هاااا ، خرب لشتتتك شسووويت …

ذاك يرد شكتلك اني هاااا ماتصرفت اني اتصرف محد يهيني اني محد يقلل مني لا انته ولا عدي مااسمح الكم ..

كمت اريد امشي لزمني الويتر حجه ست لا تتحركين ضلي هنا بلا زحمه ..

همست شكوو ..

رد عواد ضرب شريكه بطلقه ..

همست خما مات .

ماعرف ست الافضل نضل هنا ممسموح النه نصعد فوك ..

جريت الكرسي وكعدت ، همست مااي اريد ماي ..  نطاني كلاص بي ماي اديه ترجف ماعرف الزم الكلاص ..

كوه شربت كمع نصه وكع على ملابسي ، وذبيته على صفحه .. نص ساعه و اصواتهم فوك نوب اجه عدي و كبت العيطه فوك بطابق ثاني ..

عرفت مكتب الاداره و الملهى فوك ، والمطعم والاستعلامات جوه اجه بشار يمي حجه ارجعج ميرال كومي ..

لاا ماروح بيبر وين .

فوك علكت غير كومي ماتنحل بعد كومي الله اليستر ..

جرني و مشيت وياه همست شبي الولد يعيط ..

نقلو للمستشفى طلقه بصدره جتاله باين والله ..

دمعت عيوني ، رفعت ايدي امسح وجهي عرك ، اسم الله ، الله لايكولها ،  منو هذا ليش سوه هيج عواد ليش قابل شغل وغيره تسوي هيج ماتسوه والله ..

تلكي شارب يله سواها هو منا محمل على عدي و انفجر ، غبي طول عمره …

رجعني وضل بيبر ، انتظرته طول اليوم ماكو لل١ هو ماكو  ..

لحد ماغفيت ، حسيت عليه فجر مدد بصفي تعبان ..

همست بيبر ..

رد اااش تعبان اااش ..

انداريت عليه حظنته ونمت ، جسمه حاار نار ، نام بملابسه قميص و بنطرون القماش ..

كعدت الصبح هو بعده نايم ، غسلت ونزلت البيت هدوء ، سالت وسن ..

ردت ام زياد عند ايلاف ، و استاذ عواد مادري والبقيه نايمين ..

تالا راحت للمدرسه ..

مانزلت ماشفتها …

تمام ..

عفتها وصعدت تشوفها دكيت الباب ودخلت ، همست تلاا ..

ماكو صوت تقربت من فراشها تلمسته تالاا موجوده ..

رفعت غطا حجيت تالااا .. ردت بتعب هااا ..

مو عندج مدرسه ليش مارايحه ..

ردت بتعب مالي واهس .. اطلعي وطفي ضوه وراج ..

شهل حجي تالاا شبيج مريضه تلمس وجها خاف مصخنه ..

نترت وخررر يمعوده ماريد اروح نعساانه ..

سهرانه موو البارحه اليل كلها ضليتي سهرانه..

اطلعي وسدي الباب اريد انام يله  .

ابتعدت عنها ضايجه ، عفتها وطلعت ، كلت اكعد بيبر دنتريك .. 

لكيته كاعد ديغسل ..

حجيت تتريك حكول لوسن تجهز الريوك ..

رد لا تريكي لوحدج عندي شغل ..

شصار على سالفه البارحه .. 

ماكو شي انحلت لايضل بالج ..

والولد ..

مابي شي .. 

عواد ..

نتر اخوووي هذا شما يتصرف اخوي ..

همست بخوف اخوك ديسوي كوارث بيبر ..

رد بصوت يرجف نوب قلقني :- ماعندي غيره بالدنيا ماضلي احد من اهلي بس هو شكد مايغلط ماانطي بي احبه قطعه مني شلون تحبين اختج اني هم هذا اخوي  ..

سكتت ، جر نفس مشه يلبس اسمع يفتح بالكنتور ، همس ادري بي غبي ، بس اعرف اخوي تعبان ، نفسيا تعبان ضايع مايعرف شلون يتصرف ماا اتعاون اني ودنيا عليه ماارضه اخوي الجبير هذا ..

اخوك جان كتل واحد البارحه لازم تشوفله دكتور نفسي او تسحب منه السلاح ..

اندار عليه وسكت ، غير و طلع بدون ميحجي ، 

الجهل ترى هم نعمه ، المعرفه زايده هم مرض ، نفس ماجهل مرض المعرفه زايده هم مرض ..

كلشي يزيد عن حده ينكلب ضده مثل مايكولون ، جهلها جان نعمه عليها .. 

طلع من البيت وتوجه لمكتب عدي ، مكتب جبير ، في احد البنايات الحديثه ، 

مكتوب بلافته ضوئيه ماخذه نص واجه البنايه ،( الخبير القانوني عدي ***** اختصاص قانون و جميع القضايه الجنائيه حاصل على شهاده الماجستير من جامعه ***** ).. 

لكه اثنين من جماعتهم باب المكتب ، دخل التفت عليهم ، 

دخل سلم رفع راسه عدي من سمع صوت بيبر ، حجه لسكرتير اطلع و سد الباب وراك….

وكف بيبر هز راسه شنو طلباتك وتلم الموضوع عدي .

ابتسم عدي ، تعرفني اطلب منك فرات ..

عقد حواجبه بيبر مو راضي بهل الاسم .. كام من مكانه عدي تقدم على بيبر ، رفع حواجبه لشوكت يعني تريدني اسكت على افعال اخوك …

فرك كصته بيبر همس عدي تدري انته عواد من شنو يعاني ، الكوابيس مرافقته ، وساكنه دماغه يعني من يعصب لو ينضغط علينخ ينفجر يكتل هو مو داري بنفسه ، هسه من تسأله شسويت يكلك مادري .. 

هذا الحجي ماياكل عندي فرات حالتك مثل حالته عشت الي عاشه هو ، ليش ما صرت مثله ليش انته ضابط نفسك هو لا ، تدري ليش هو عجبه وضع مريض المختل ، لازم تتصرف وياه فرات ..

ابتعد عنه ساكت ، شسويله يعني …

سكت … بعدين حجه تصرف وياه مثل ميتصرف راعي الفرس ..

اندار عليه وحجه شقصدك ..

الفرس من يضيبها جنون شيسوي راعيها ..

طلقه براسها ..

وانته الي عندك ماصابه جنون بس .  لااا بلش يكتل بالعالم بصوره علينه ..

تريدني اكتل اخوي ؟؟!..

قبل مايقتلك هوو 

#يتبع ....

كروب الفيس .. ( كتابات اسماء ديمير )

الانستا ..  asmaa_demer

كروب الفيس  ...  كاتبات وقارئات العراق