رواية قاع الشياطين الفصل الثامن 8 - بقلم اسماء ديمير

.....................☆البارت السابع ☆..................

#قاع_الشياطين(البصر والبصيره)

#بقلم_أسماء_ديمير

هديتها وطفرت على تالا ، اني اعيط الزمها الزميها ..

و تالا تصيح ياا ولج لا تنكرني ..

و هذا دجاجه مدري شنو صوتها غريب تسوي قرقرر قررر..

و تركض ، وتالا تريد تلزمها فضحتنه اني امشي و اتبهبد بالحياطين ، عطت روحي ماريدج والله روحي خرب اطلعي مناا .. صاحت تالا لااااااااا …

-وكفت هاا ولج ؟؟!!

ردت طاح حظج ميرال زربت بنص الصاله هاي ..

-فكيت حلكي يييع ..

-وجع و الله مانظفه انتي تنظفي ..

-دلزميها لو طلعيها يمعوده بطلت ماريدها ..

بس اسمع الربد و تالا تصيح يبوو طلعي بت كلب ابتلينه جبناج ، اسامه دخل يركض ،

شافها صاح اصيح امي ..

صحنا لاااا ، وصوت الباب انربد حيل ، حجت تالا تلهث هاي سوالفج ميرال شفتي من دوني انتي ولا شي هاك شوفي جبتينه نسر مدري شنو ..

جان اكلنه نوب سواها بنص صاله هالكبر ، دجيب ماسحه وصله ونظفي انتي ..

اني ساكته خايب ظني ، عود صدك مو دجاجه ؟!!!

كعدت على صفحه مارضه انظف اجت هيه و نترت كومي امسحي ..

مارديت .. اسامه رد اني انظف ..

انجب انته ، مو احجي ويااج لا تغلسين كومي نظفي لازمه وصله و السطل وتنتر بيه .. ماحجيت سويت نفسي كلش ..

-حجت ترى انتي عميه مو طرشه لاسوين هيج كومي امسحي ..

هم مارديت ..

-شكد حقيره هم بيج اذيه انتي جرت ماسحه تمسح ..

تالا …. 

كاعده على صفحه و مجتفيه اديها لصدرها بزعل؛ اني نزلت للارض امسح قذاره الحيوان صاحب ريش لا هو ديج لا هو دجاجه لا هو طير وربي طار علينه ، جان اكلني .. 

رفعت عيوني عليها ، كاعده على صفحه واني انظف الفوضى مالتها ، نترت حتى بعد متتصرفين لوحدج من دوني ..

عوجت حلكها ، نظفت وكمت ، مشيت اغسل ، رحت يمها بصاله حجت افتحي لباب داطلع بالحديقه .

-نترت ماكو مافتح والله ..

-حجت كافي بعد ماسويها افتحي الباب ..

-لا والله ماتتامنين انتي ، 

بقيتها بالصاله وتوجهت للشباك افتح برده اشوف الحديقه ، انتظر الحقير يجي ..

صار فوك الاسبوع ميحجي وياي مغلس عليه ، عود زعلان ، اليوم اتحارش بي بالكت يرجع يحاجيني ..

ربع ساعه ولمحته اجه من الحديقه و ببده الكتب مالته و كف شوي يم ابو حمد يحجي وياه ..

اني و كفت قريب الباب شايله و صله المسح انتظر يجي سمعت صوته قريب الباب بس دخل شمرت الوصله و صحت يمعووود دانظف ..

رجع ليوره مخترع يالنظيفه نظافتج تطلع ظهاري ، 

-والله عاد حسب الوصخ الي موجود بالبيت ..

-امرد راسج بالحذاء والله تادبي ..

- اكول لا تغلط لك ..

-ردت ميرال اوووو يالنهار الاسود شلون يعني ، حجه ماتسمعيها شتكول .. ردت هيه صاحت .. تالااا ..

-رفعت تك حاجب شبيك انته ، بس تسمع بيه حجي و تغلط والله عيب عليك ..

-قصدج اني وصخ ..

-ماكلت هيج بس جانت الارضيه بيها وصخ شنو ابطل مانظفها ..

-كولي من الاول مالا داعي تجفص بالحجي ..

-حعبرها الك هالمره ..

-لا لاتعبريها شو ردي الكطعج هنا منو يفزعلج .

-سكتت مخنزره ساكته ..

دخل هو حذائه يبدل اني عيوني وراه ، 

على الغده صبت نانه و كعدت مقابيله ، دنجت اصب لميرال و اخلي الاكل مقابيلها ، نطيتها خاشوكه و خليت صحن جوه ايدها ..

هو ساكت ، حتى ميباوعلي ، حجت ميرال تساله على دوامه ..

هو يرد الها و يسولف وياها عادي ، شكد يحبها ، حتى من يحجي وياها صوته هادئ و يباوع لوجها مبتسم ، رغم فرق العمر بينهم ..

هو يطلع عمره ١٦ سنه و هيه ١٩ مع هذا احسه يرغب الها اكثر مني ويحبها هواي ..

نابذني كلش ، اكل وعيوني عليهم ، ديضحك و مد ايده يوخر كذلتها عن حلكها لان راحت ويه الاكل ، طبيت الماعون حيل على الميز ..

اندارو عليه و صاح و جع ، شبيج ..

-سم الي يسمك ، يمك اني داكل شعليك انته ..

-و شبيج ويه صحن بيج عوق ماتلزمي زين ..

-زلك من ايدي لا تتجاوز ومن اهينك اطلع مو خوش ادميه بعدني داحجي و كباله كلاص ماي و شمره عليه ..

توه امد ايده ارد ضربه الزمتني ميرال صاحت ، ها هااا يمعودين نعمه ..

كما لحيلي عصبيه ماشوفين حيونته سمملي الاكل ..

-ردت ميرال ليش تتجاوزين تالا ملاحظه نفسج لو لاا ..

-مرض انتي لا تدخلين ، لا تدخليييين حيري بروحج دوم دافعيله مو عادله ابد وحقاانيه حقيره ..

-فكت عيونها على وسعهن ..

-كاملي هو كلت والله امالخه ماسكت اذا طخني  ..

-امه لزمته حجت دجووز منها شجااك وياها ..

-داربيها لهاي بلا تربيه ..

-متربيه احسن منك ، انته بلشت ..

ميرال  كامت لحيلها ترجف دفعت صحن و مشت صاحت نانه وراها يما تعاي اكلي مالج شغل بيها مو تعرفيها انتي ..

ماحجت ، كملت دربها بتعثر لحكها ساري يسندها دفعت ايده بهدوء و مشت للغرفه .. 

-اندار عليه شكد حقيره انتي احقر بشر شفته بحياتي والله ..

ضليت كازه على سنوني اريد ايجي عفتهم و مشيت اطلع بره ، نانه تحجي وترزل بي شلون يقهرني ، هو يرد هاي نتيجه دلال زايد خلق منها بنت بلا اخلاق و لا تربيه مو هاي اختها شنو فرقها عن اختها بس هاي مالاكيه الي يدكها دكه زينه ..

طلعت بره كعدت على بلوكات خالهم الها عينتين ، حتى تندل و تكعد عليهم متروح بعيد ..

لو مسفط الها حصو صغار بالارض حتى من ادوس عليه تعرف هيه على طريق صحيح ..

و ثيل معناه هو منطقه محظوره ممنوع تجاوزها لو تروح عليه لان مال حديقه الجبيره  ..

دمعت عيوني دوم هيه مميزه والها الاولويه ، دائما ميرال محط اهتمام ..

خاصه هو يهتم بيها ، حتى بيوم الي دخلو للبيت يردون يبوكو توجهه كبل لغرفتها يخاف عليها ، 

حبست دمعتي مابجي ومابين اله  ضعفي ، تعبت مشيت ادخل ، لكيتهم بصاله هو وامه كملت دربي للغرفه ، بس دخلت لكيت ميرال كاعده على الفراش و العيون هالكبر من البجي حمر ..

سكتت وكفت جسمي نحل ، تقدمت لفراشي قريب منها بعدم مبالاه ..

هيه رفعت راسها تريد تعرف منو ، صفنت شوي ماخذ منها غير ثواني ، و عرفتني من مشيتي لو تنفسي ، التفتت باتجاهي ، ميرال ذكيه ..

يمكن هو هذا الي خلاها مميزه عني ، تستعمل حواسها كلهن صوت ريحه عطر والاحساس والمس بطريقه محترفه ..

ثواني بس عرفت اني و باي اتجاه واكفه ، عقدت حواجبها وحجت بقهر ليش محترميني ..

مارديت عليها مشيت بهدوء اضيع عليها مكاني ،.

ترى اعرف انتي هناا اشرت باتجاهي ، هياتج داسمع صوت نفسج ، الي تسوي غلط و تكرهين مقابل بيج ..

رديت بنتر ، مو حقانيين انتو ..

-افرضي احنه مو خوش اوادم ، ليش تتجاوزين ، شوي و انهضمت بجت ..

-تغلطين عليه ، صار كم مره تهيني و تفشليني ، كم مره واسكت الج ، ماكدر ارد عليج مو لان ماعندي جواب لا بس ماتفاجئه بالحاله الي وصلتي الها انتي ، لو بحياه بابا  وماما ماتتجرأين ترفعين صوتج علي مو عاد تغلطين و تهيني ..

كعدت على على فراشي بدون رد ..

كملت كلامها وتمسح بدموعها  ،الي تنزل غيرهم ، متغيره حيل ، تمردتي و طلعتي غلج عليه احسج مو انتي ، منا مدرسه عفتيها منا تفرضين رايج علي منا تتجاوزين وتتكامشين ويه ساري ..

ماهامج احد ، هاي بعدج عمرج ١٣ وهيج لو بلغتي سن رشد شتعملين بيه وبنفسج … قبل لا تكمل حجيت حياتي وحره بيها ..نفس ماعندج حياه اني هم الي حياه وراي ..

-رايج غلط بلغلط ومن احجي وادخل اني و اردج من خوفي عليج ، 

-منو كال انتي تفهمين اكثر مني،  انتي دربج ماتعرفي وين ..

-برطمت و اباوع لشفايفها يرجفن ، بلعت ريك تلزم الغصه ، حجت ، لا عبالج من اطولين السانج او من تلفضين بكلمات غير اخلاقيه عود فرضتي نفسج ..

ابد لا تتصورين هيج ، الصوت العالي بس للضعيف ، الغلط و تجاوز بس لقليل حيله و بصيره ، 

هزت راسها ياسفي والله ياسفي على الحال الي وصلتي اله ، 

مددت تنطيني ظهرها ، حجيت وياها ، عود عبالج انتي افهم مني ، لا والله بس اكبر مني بالعمر ، اما حب ساري الج ونانه شفقه يعني خاف على بالج ..

ليش تغشمين نفسج حتى امي وابويا ، سكتت تذكرتهم تذكرت معاملتهم وتفرقتهم بيني وبيها ..

رديت و كملت بغل اطلع الي بكلبي الي ضميته من سنين ..

على شنو يفضلوج علي احسن مني انتي بشنو ،  واذا متشوفين شنو يعني ، اذا تمرضنه اثنينه يعوفوني على نانه و ينامون يمج ..

اذا كلت مشتهيه فلان او عاجبني اروح لمكان فلان بعدج ممكمله الكاهم بسياره ، و جاريج يسولج تردي ، بينما لو حجيت اني ، كبل ردو اختج تعبانه اختج مضايقه لا عود بعدين ..

منو الاولى اني لو انتي ، اني مو صغيره يعني الاولويه الي ، حق اني مدلله ، ابسط مثال المدرسه عمرهم ما اجو اليه و سالو عليه ؟ دوم نانه تجي و تسال ، اما انتي ياخذوج بيدهم ويردوج بيدهم ، 

من سجلوج بالمعهد اسبوع كامل بابا يداوم وياج ويدليج على الغرف وقاعات ، اسبوع كامل هو مكابلج وكاعد والاسبوع الوراه امي .. لحد ماتاكدو انتي دبرتي نفسج و كونتي علاقات وراح تكدرين تكملين يله بطلو يدخلون للمعهد وياج ..

ولج ابسط شي مسرحيه الي شاركت بيها و توسلت بيهم يحظرون  ماحظرو بحجه اختج عدها مراجعه ، يعني مراجعه ماتتاجل عادي يفوتون هيج حدث مهم بالنسبه الي ، و اهم شي مراجعتج ..

هيه ماترد بس جسمها يهزت و صامه حلكها ، تبجي ، مسحت كصتي الي عركت ، حبست دمعتي مابجي ، ماتو الله يرحمهم بعد ..

لخاطر هيج اني مارضه اسافر لهولندا يم عمج اني محد يحبني غير نانه ، محد يحس بيه غيرها ، تردين تسلبيني حتى نانه كاافي انانيه ميرال ..

ماحجيت بس طلعت صوت شهكتها سكتت ماردت احجي بعد ..

ماكره اختي لا والله ، احبها وانقهر عليها ، بس صوجهم لاهلي ، زرعو بينه تفرقه ، ياولي اذا ضوجتها ياويلي اذا اخذت حاجاتها ، ياويلي اذا ضربتها بالغلط ..

ميرال عدهم شلون جوهره ثمينه بالهدايه هيه الاول ، الحفلات حتى بسفر من جنه نطلع لبنان لو تركيا كرسيها بين ماما وبابا يكون ، واني لو وره لو بصفهم ..

مدتت انام راسي اذاني ، ضل بالي يمها ، نوب مالها صوت حتى شهكتها اختفت ، كمت على كيف اشوفها ، وجها احمر حيل ، ودموعها تارسه خدوها …

صدري اذاني حيل انتابني شي من تانيب الظمير ، شلت الغط خليته عليها وخرت ..

اراقب بيها ..

شعرها بني فاتح منسدل بنعومه ، من الجربايه شوي ويطخ الارض ، تمددت اباوع للسكف ..

لثاني يوم هيه زعلانه ماتحجي وياي ، حتى كلامها ويه ساري قليل ، عيونها باين عليهن زعل ..

شعرها منثور على ظهرها كل مره اني اظفره لو نانه ، نانه بسبب شغلها هملتها واني زعلانه عليه ..

تحاول ادبر نفسها لوحدها حتى من اطلع ملابس اضل ساعه واكفه كبال كنتور تكلب و تتلمس بيهن دتعرف شنو هذا ، 

واكفه مجتفه اديه اراقب بيها ، لحد ماتاكد دبرت نفسها يله ابتعد عنها ، همست الها دوره بعد يومين تجي دبري نفسج ..

ماردت عليه لبست جاكيت خفيف فوك فستانها الصوفي وجواه ستريج و مشت تطلع بره ، مديت راسي اشوفها ..

طلعت وكعدت بره على البلوكات ، شوي وسمعت نانه تحاجبها ..

ميرال ضايجه ، تعاي اكعدي هنا قريب علي ..

جرتها و كعدتها قريب من مطبخ بصف الحايط ..

مطبخ الفله يبعد عن ملحق مالتنه تقريبا عشرين متر ، كعدت لامه رجليها و تتشمس ورافعه راسها للشمس ..

ميرال بيضه ، بملامح طفوليه ، لونها صافي وناعم يمكن لان عمرها ماخلت شي على وجها ، حتى شعرها طوله واحد لان ابد ممسويه بي قصات معينه ..

بس غرتها هيه تتعمد تكصها حتى تحس بالهوى من يلفح وجها ، دنجت تتلمس بالثيل و نزل شعرها على جتفها ، للارض ..

شوي وطلعت نانه جايبه الها لفه وخلتها بيدها تكللها اكلي ..

طلعت بره اني ضايجه اشوف ..

الحدقجي ابو حمد ديشتغل بالمكينه كص الثيل ، وياه الحارس يلم ويخلي بكونيه ، شفت شخصين عقدت حواجبي من شفتهم نسخه من بعض ..

نفس البس ونفس شكل وطول ..

خليت جف ايدي على وجهي احجب شمس داشوف زين ..

عبالك توم والله ابتسمت ، ياا توم هذول والله ، التفتو باتجاهي شافوني واكفه ..

واحد ابتسم بوجهي اني اختفت الابتسامه و سلهمت عزاا ، ضرب اخو وياشر براسه عليه ..

اندار عليه ثاني مدري شكاله هذا الي ابتسملي ، نطا ضربه وجره ويحجي عصبي ماعجبه كلامه عود ..

يا نزوول عود شكد حلوين مشابهين  ..

توجهو للفله واني دخلت ، اكمل تصفح على الايباد ، مكنكه على الفله و مكظيتها افلام ومسلسلات رومنسيه ..

ميرال …. 

شايله لفه الجبن اكل بيها ، حسيت على صوت قريب و اصوات اقدام ، وكفت عن الاكل ، ضليت جامده بمكاني ، و الاصوات تتكرر وصوت ضحك ..

يكله هاا بشار شكلت ..

لا ستار انسه السالفه مابينه حيل و جع راس  ..

درت وجهي على مصدر الصوت قريب مطبخ ، 

اسمع نانه تحجي تكله يمه بشار دقايق و اخلص صب بس انتظرني ..

حجه اساعدج حجيه ، 

-ماتقصر يمه بس انقلوهن بره ، لو تردون جوه تاكلون ..

-خلي جوه افضل ، لان عدي بالدرب جاي ، و هم حسبي حسابج اكل مال ١٢ نفر ..

-خير انشالله ..

اصوات كلامهم توصل ليمي اني خاله اذني ، صار هنا فتره بس ماسمعت صوت احد غير بس ابو حمد ..

حسيت شي نزل فوك راسي ..

رفعت ايدي على شعري ، تكرر هالشعور شي طفيف خفيف ديوكع على شعري ..

رفعت راسي شمس تضرب بوجهي ..

اكو شي ناعم على شعري لزمته اتلمسه .

دائري وناعم رفعته على خشمي شميت عطر ورد ..

عضيت منها طعم ورد بي طم مروره ، تكررت سالفه كمت من مكاني ومديت ايدي انتظر يوكع على ايدي .

بيها طكه هوى ، ابتسمت معناها اكو شجره ورد هنا ..

ماكو شي ، انتظرت ورقات مال ورد دتوكع بس ليش ، هذا ورد وين اكو شجره ورد هالعلو هذا .

عقدت حواجبي رافعه راسي ، خاف اكو سندانه بالبلكونه فوك ، بس ليش الورد مفرط بعده اخضر مو يابس حتى نكول يبس وكع ، وكعت وحده على خدي ضحكت وخرتها اتلمسها ناعمه ..

دنجت راسي، اخذت لفتي و مشيت باتجاه الملحق امشي على درب الحصو ، هو طريق روحه ورجعه هذا ..

مرت فتره اطلع ، ويه نانه ، هيه تدخل تشتغل واني اكعد قريب مطبخ اسمع الها ..

الي تشتغل ويه نانه اسمها وسن ، نبره صوتها ممريحه ابد ماتعجبني محلو اسلوبها ويه نانه عبالك ام البيت هيه ..

هي حالها حال نانه ، برغم زوجها ابو حمد خوش انسان ، نوبات يجيبلي برتقاله من يشوفني كاعده ، يوكف يكص ثيل واني اكابله هو لو ينطيني برتقاله لو لالنكيه ..

سالته عن حيوانات الي عدهم هنا ، كال هاي مزرعه من ايام صدام ، يسموها مزرعه لو حظيره مال حصن ، و اشتراها استاذ عواد واخو المهندس  قبل ست سنوات وكعدو هنا بعيد عن مدينه هوستها ..

و احنه جينه نشتغل هنا ، 

سالته ، عندك اطفال ابو حمد ..

رد نو يشتغل ، اي خير من الله ..

ابتسمت شكد ..

خمسه  ، اربع بنات و لد واحد

ماشالله  ، ربي يحفظهم الك ، عيشتهم تريد ..

-اي و الله يابنتي تريد ، بنات كل ماكبرو كل ماثكل مصروفهم و الولد الله يعافيج سكط ..

رفعت حواجبي متفاجئه سكتت ، بلعت ريك شبي ..

-كلياته بنتي تعبانه بعيد عنج ..

-جريت نفس ماعلي غير العافيه ، 

-يعافيج الله كمل شغل و ، اني اذني يمه ، اسامه  تقرب مني يكلي كشرليلي البرتقاله ..

كعدت اكشرها اله باصابعي ، نطيتها اله ، رفعت اديه ابعد شعري عن وجهي ،  اجت نانه كملت شغل و اخذتني ورجعنه للملحق  ..

فد يوم ، المغرب دنسوي عشه ، اني وتالا رغم ماحجي وياها ، بس واكفه اكشر بتيته  وهيه تقطع و تكلي ، ونانه تشتغل بالفله تسوي عشه الهم ..

و طلع صوت  ، وصوت صياح زلم و عركه و ثواني وثارت طلقه خرعتني عطت و دنجت راسي للارض ..

تالا طفت نار و جرتني نكعد بالارض ، الاصوات علت ..

حجيت شنو هالصوت طلقه موو ممتوهمه ..

-ردت تالا بخوف اي طلقه والله ، كامت تشوف جريتي وين لا طلعين لايصبر شي ..

دفعت ايدي و حجت نانه هناك  خاف اكو شي خاف طباخ طك ولج ..

كمت وياها بخوف ، هيه ركضت للفله بس اني ما تقدمت اخاف ، بس صوت رجالي قوي حيل و ناس تتراكض لزمت كلبي دخيلك يااربي ..

وكفت افرك باديه بريبه ، شوي و اجت نانه و ياها تالا يحجن ويمشن بسرعه ، 

وكفت كلبي يدك  ، سالت ، نانه بيج شي ..

-لا يمه لاا مابيه ادخلن ادخلن بسرعه ..

جلبت بيدها ، شنو هالصوت ، سمعنه طلقه ..

اي هذا استاذ عواد يماا خبل رمه على مرته اجه يكتلها خلاص ..

كعدت كلبي يرجف اسم الله شنو ماتت ..

لا اسم الله ، ماجت بيها اخو اخذ السلاح منه ، و دخل مرت اخو للغرفه سدها عليها ، تخبل رسمي هذا بلا عقل يما بت جان ماتت كله هذا بس لان كالت اله و ين جنت بايت البارحه ..

رمشت بهدوء ، شنو السلاح لعب جهال ويرمي عليها لو ميته ماوراها اهل ياخذون حقها  لو صار بيها شي شنو هالاستهتار ..

ردت بخوف ، شعلينه يمه احنه هنا نكل رزقنه شعلينه بمشاكلهم العائليه ..

ضليت ضايجه وخايفه هم و هيه كملت سوالف ويه تالا تكوللها بنت دره مال الله ؛ نوب عدهم طفل عمره سنه ، لو تشوفين السانها ينكط عسل ..

بس هو هذا خبل يوميه اسمع صياحها و عركها وياه هو بلا مخافه الله ، لو يضربها لو يسحلها هالمره رمه عليها جان ماتت لو مااخو متلاحك اله و ساحب مسدس منه ..

-لزمت كلبي نانه لليضربج فد يوم ..

-لا ماشوفه اني مايدخل للمطبخ هو ...

مشت فتره و راحت سالفه و نسيناها ، تقدمت الايام ، اني و تالا تصالحنه ، اني كلبي مينطيني اقسي عليها و هيه هم كلبها طيب بس عقلها محجر ..

رغم زعلانه وياها هيه تحظر ملابسي و شامبو مالاتي بالحمام تحطه جوه ايدي حتى لاضل ادور عليه ، وكلاص ماي يم راسي حتى لاكوم باليل اهبد على ماي ..

كلبها طيب بس طبع قاسي ، او تتصنع ، 

فد يوم مشيت شوي بعيد عن ملحق ، يمكن جراءه او فضول للاكتشاف او ملل ، اعرف طريق هو الحصو ، ابتعدت كم متر و طخت رجليه باغصان و زرعات ، مديت ايدي ، لان ورد واوراق ، ابتسمت ، بي شوك بس كسرت غصن و شلعت ورده ..

هالمره الحمدلله ، بدون اضرار جسديه ، ضحكت بفرح لان سويتها بدون ماصيح تالا ، تلمستها الورده ناعمه ، رفعتها لخشمي اشمها ..

بلا عطر هاي ، متاكده ورده بس مابيها عطر بس شكلها مبين حلو مفتحه و جبيره ..

مشيت كعدت ، صوت البط ، ودجاجات ، احسها قطعه من الجنه من جمالها ، الهوى نظيف لو اصوات طبيعه تحسيك بالحياه ..

رفعت راسي اتحسس دفو شمس ،  لزمت غصن مال ورده العب بي و صافنه باتجاه الشمس ، المح وميض قاتم نيلي لو احمر ، و متونسه  ..

حسيت على دوسه رجال قويه مبين ثكيله التفتت باتجاها بسرعه ..

نانه ؟؟!

ماكو صوت ، عقدت حواجبي اركز زين صوت منتظم ، اي نفس اكو صوت نفس ، حجيت ساري ؟؟!

ماكو رد كمت لحيلي بسرعه التفتت على صفحتي ، خاف حيوان لا مستحيل شلون ماسمعت صوته و حسيت علي ..

صوت دوسه على الارض تكررت و صوت ثيل جوه .يخرخش .

همست منوو هنا ..

هبت نسمه هوى و كفخني ريحه عطر غريبه عطر رجالي قوي ، بسرعه رجعت ليوره و خليت اديه جدامي ..

منو هنا ؟!

طلع صوت بارد بحه مريبه ، انتي شسوين هنااا ؟؟!

بلعت ريك ، منو انته ..

شسوين هنا جاي اسالج ..

سكتت ، بعدين حجيت انتظر نانه ..

انتي بنتها .. 

رديت لا اقصد اي ..

بنتها اي لو لاا ؟؟!

هي ربتني ، انته منوو اسفه تقدمت هنا بس .. سكتت ..

رديت نوب كملت  اسفه بعد مااوصل ..

درت ظهري دارجع للبيت و اديه جدامي خاف اوكع ، حجه اكو شغله تخصني عندج ..

التفتت علي وجهي باهت شنو ..

ماخذه شي مو الج ردي ، ماعلمتج امج ماتاخذين شي مو الج ..

وجهي خرط حتى دخت من خوف ششش شممسوويه هااا ..

ضحك بهدوء ردي الشامي الي اخذتي ..

رديت بسرعه رجعته والله .. رجعته صدك احجي ..

شلون اصدكج وانتي حراميه ..

سكتت وجهي يريد يطك من فشله ، ضلت عيوني تفتر بخوف ..

تحبين الحيوانات …

ماعرفت ارد ، توترت ، حجي جاوبي ؟؟

احب ملمسهم و اصواتهم ..

من تكرر صوت دوسه على الارض فزيت ، رجعت ليوره ، ضلت عيوني تفتر بخوف ، انحجب عني دفو شمس وريحه العطر قوت ، صوت قريب مني حيل اعرف ..

 عقدت حواجبي بخوف صوت دوسات على الارض تقوت ، عرفته صار مقابيلي ، نفس كوه اجره من توتري ..

فزيت على صوته قريب مني ، حجه انتي ماتشوفين كلش مو ..

ماحجيت ..

حسيت على طخه جف ايدي بكذلتي تلوح يمنه يسره ، رديت ليوره بسرعه ، عثرت توه اوكع جلب بزندي يثبتني ، 

تردين ادزلج بعد ..

ابتعدت عنه بهدوء شنو ..

حيوانات ..

هزيت راسي لا ، نطيته ظهري و كملت مشي بحذر ..

وصلت للملحق ، انداريت عليه ، قبل لا ادخل حجيت ترى اني مو حراميه والله و الرومي رجعته لان جان مزعج ودمر البيت  ..

ضحك بهدوء ،  خاطفته و جابرته يعيش يممج وتردي يكيف غير هو حياته و بيئته ويه جماعته ..

ماحجيت عفته ودخلت ، كلبي يرجف هسه يكول لنانه هسه يكول لابو البيت يمااا ..

كرصت بالصاله بلا صوت ، خفت احجي و تزعل نانه ..

من رجعت نانه حجت كبل ميرال طالعه بره موو واصله للحديقه الخارجيه ..

رديت بخوف هاا مادري ماحسيت ..

لا توصلين هناك يمه شايفتج و سن و حاجيها لابو حمد و اجه كلي الرجال مابينه حيل حجي الله يستر عليج ..

هزيت راسي هاهيه ، بعد مااتجاوز البلوكات ..

ماحجت بعد ، اني التهيت بيومها اسمع كتب صوتيه وروايات ، غفيت و سماعات باذني حسيت على تالا كامت ، رفعت راسي حجيت تالا؟؟

ردت نامي رايحه للتواليت ..

رجعت كملت نومتي ..

ثاني يوم اخذتني نانه و كعدتني بصف المطبخ ، اسامه وياي ، راح يركض وره دجاجه ..

نانه كل شوي تمد راسها تكلي هاا خما ضجتي ارد لاا روحي كملي شغلج كاعده ماعندي شي ..

لازميه بيدي التلفون و مشغله كتاب صوتي ، روايه قصيره ،  انطون تشيخوف ، جابلي اسامه ورق مال زرع ماعرف شنو بس الورقه بكد جف الايد .

-حجيت لا شلع حرامات .

-لا اكو هووواي هوواي بكد الدنيا ..

-ابتسمت ، هذا شنو الورق منين جبته ..

-رد هاي زرعه صاعده على حايط وحايط صاير كله اخضر ..

-تسلق قصدك موو متسلق على حايط .

اي .. 

سمعت صوت جلب بس جلب اليف  مو مال حراسه صوت لطيف ..

درت وجهي ادور على مصدره ، كمت وكفت داشوف وين ..

ماكو .. اسامه حجه يدليني  هذا لا بعضج ميرال ..

تقرب مني يله ميزت الاتجاه انداريت عليه ، مديت ايدي ابتسمت ، اسامه فجأءه لزم فستاني وكف وراي ،

اجاني صوت ثاني ، حجه تردي ..

اختفت ابتسامي ، رمشت بعيوني …

سأل ، تحبين خيل ؟؟

سكتت ثواني ، هزيت راسي لاا ..

- مشكله الي بداخلج يضهر على ملامح وجهج ، فيبين دتكذبين ترى ..

-همست تشغل هنا انته ..

-رد اي ، تحبين تشوفين الخيل او لاا .

-ابو بيت مانع انو نتجاوز الحديقه الخارجيه ..

-ماراح يحجي منو كلج هالحجي ..

-ابو حمد ..

سكت ، كمل بعدين اكو ست خيول بالاسطبل ، عربيه اصيله ، ابتسمت اني اتخيل شكلهم ..

-تعاي و ياي ترى فرصه متتعوض ..

ترددت امشي وياه ..

#يتبع ...

ناخذ اجازه منكم كم يوم بسبب سفري لخارج محافظتي ، والي يسال ليش النشر بين يوم ويوم ..

بسبب قله تفاعل مجرد ماتصعد القصه يصير النشر مثل قبل ، ويكون اكو بارتات هديه هم مثل ماعودتكم ..

الصفحه على الفيس ( كتابات اسماء ديمير ) دينشر عليها ستوريات وفديوات تجنن تابعه للقصه واحداثها ..

والانستا ، asmaa_demer