رواية قاع الشياطين الفصل الثامن والخمسون 58 - بقلم اسماء ديمير

...............☆البارت الثاني والخمسون ☆.............

#قاع_الشياطين(البصر والبصيره)

#بقلم_أسماء_ديمير

فداك الفلووس بس خلي تشيل السالفه من راسها واعتبر الكليه نصيبك ..

سديته منه امسح بدموعي مبتسمه يااارب كون صدك ياارب ،

.. قاطع شرودي صوت العامله تحجي ياست هانم ياست هانم ..

انداريت عليها هااا ..

الموبايل بيرن عليكي ...

مديت ايدي اخذه .. منو ..

ردت ساري ..

فتحته حجيت الوو ، رد عليه مفزوع ميرال اختج راحت ويه دانيال دكي عليها بسرعه ..

شنوو ؟؟ شلون ..

-توه جانت وياي كلت اخذها لعند امي هي تقنعها واذا ماقبلت احصرها عدنا ، بس الكلب باين جان مراقبها ماعرف احد داك عليه و كايل اله ، الحاصل مو وكت ححي اخذها يعقد عليها سمعت باذني يكول الها هيج ..

-طبيت على صدري عزاا العزاك ساااري شوكت صار هيج من اخذها ..

-تووه توه والله ماصار عشر دقايق ددكي عليها لحكي .. سديته بوجه كبل ولزمت جهاز اطلع رقمها مايطلع اديه ترجف وكع جهاز مني عطت بقله صبر ااااخ وينك ..

عامله شالته وخلته بيدي صحت طلعي رقم تالاا طلعي ..

اخذت اطلعه واني ضليت اكمز وعض بيدي ، نطته الي و رفعته لاذني يدك يدك ماكو ..

انكطع ورجعت دكست وهم يدك يدك وماكو جوواب لحد ما دخت من الشوطه ..

لزمت راسي اعيط حجت في اااي ياهانم ..

دوووخري انعل اهلج وووخري دفعتها حيل ونزلت ركض درجتين وعثرت جيت اوكع جلبت بالمحجر ..

طلعت مثل الخبله اهبد واركض ادور ابو حمد اخلي ياخذني ..

انربدت بالباب نوب بالحايط والعامله وراي تجرني و تكلي من هينا يهااانم من هيناا ..

وكفت بالحديقه ارجف و دايخه وين ياخذوني ليش اني اعرف ووين اخذها ولوو ..

شلت جهاز دكيت على بيبر .. بس فتحه صحت باذنه بيبرر ومحمد والي خلك السما والارض اكلبها للدنياا اختي وووين ..

رد شبيج ..

اختي وووين اخذها هالنذل و راح يعقد عليها شنوو تايههه ماوراها اهل ادري ماكو احد يرده هذاا مستكوووي .

-اهدأي شبيج منين اخذهاا منو اخذها ..

-جريت نفس بيبر تريد تجنني موو زلمتك الي يشتغل عندك منوو غيره ليش تعصبي ..

عاط بذاني لاصييحين انطي مجااال شوكت اخذها ..

-صار ربع ساعه دك عليه وخلي يردها هسه لا والله لااشوفه شي ماشافه ..

-شسووين يعني اختج راضيه ميررال شبيج ..

-رفعت اديه لوجهي انهاريت ، وكعدت ابجي .. ضليت اشهك .

-اسمعه يحجي ميرال اختج السبب شسوين يعني تربطيهاا ، ماحجيت ، همست اختي الصغيره ...

حجه ثواني بس واردلج خبر .. رديت عليه بيبر فدوه لعينك ..

-رد بس انطيني دقيقه ، سده واني كعدت بالارض رجليه بعد ماتحملني لزمتهم افرك بيهم ، ياايمه ياتالا على حركان الدم شسووين بيه بعد، راح انجلط بسببج كولي بعد شسووي هااا مرمرتي والله ..

اجه بشار حجه ها ميرال رفعت راسي على صوته ، مسحت دموعي حجيت مقهوره مو طلب مساعدتك ليش هيج شفت شسوه النذل اخذها من وراي وراح يضحك عليها و يعقد عليها ..

-حجه يحبها والله .. همست عمر الحب ماجان هيج الحب مو اذيه بشار ..

اجاني صوت عدي ، مادام تعرفين هيج الحب ليش مشيتي بدربه هااا ..

كمت لحيلي اعدل بملابسي و اضم بشعري ، هزيت راسي حسبي الله عليكم انتو السبب ..

-رد حذرتج وهاي نتيجه كتلج من الاول ماصدكتي ،

-دك بيبر ورفعت جهاز .. حجه بكنيسه ال**** حاليا هم. كتله راح اروح الهم بيبر ..

-رد ماحد يروح كلها عدها شغل و هسه عقد عليها صاح بشار اني اخذها ..

عدي رد لاا محتاجك اني مو كتلك وصلي الغراض للبيت ..

جريت نفس انحصرت بينهم رد بشار لا اخذها و بعدين اودي الغراض بدربي ..

جرني،بشار بسرعه من ايدي وحجه يله بسرعه ..

مشيت وياه ركض ، حاجيت بيبر رايحه اني ، صعدت باليساره و طلع بينه كبل للكنيسه ...

ضليت اردد ضحك عليها والله ضحك عليها ..

بشار رد عليه هو يسوق :- اختج تضحك على عشيره ميرال ..

-ليش تحجون هيج والله طفله هي ..

رد خاف احجي وتزعلين ..

سكتت مدمعه ..

حجه كضتها وياه طلعات وطبات ودخلات و علاقه ماريد اطعن بيهابس شفناها شوف عين اختج مو مثلج ابد ،

درت وجهي ابجي مقهوره وكلبي ممرود ، تمنيت كون وحدي واكعد والطم زين و املخ روحي واعيط اطلع الغصه الي بصدري ، فاضحتنه يااتالاا فااضحتنه ..

هاي تاليا كلهم سكاره و شرابين وراعين مشاكل يحجون بيج و يطعنون ، هااي تاليها خليتي مثلهم يجيب سيرتج ..

كلبي يوجعني شلون جمره بين قفصي الصدري ..

اضلعي،ضااقت عليه خنكتني ، دك موبايلي رفعت ساري ..

حجه بلهفه . هااا لكيتيها ..

همست بتعب ، نطوني العنوان رايحه الها ..

انطينيا دالحكج .. نطيته الها وسديته اديه خدرانات جسمي نحل من القهر .. و صلنه عبالك مو نص ساعه عبالك سنه .

دخلنه للكنيسه ، والباب ماخلونه ندخل عاط بيهم بشار ودفع الشباب البره ، ودخل وجرني وراه ، دخلنه للقاعه صوت القداس ماعرف شنو ، و الاب ديلقي خطاب ..

وكفت جامده اني ، بشار بصفي يلهث .. همست وينها ..

جر نفس،ساكت .. وينهاا بشار ..

الله لايشوفج هالشوفه ميرال ..

بجيت بهدوء ، حجه مسوي كتب كتاب هناا وعلى الدين المسيحي ، خرب بس لا حولت دينها هاي الثوله ...

اختج باين راضيه ذيج لابسه واكفه كباله مبتسمه فوكاها لابسه حتى بدله عرس ..

ضغطت على جف ايدي حيل ابجي بهدوء ، همست عقد موو ..

رد اي ديباركولهم .. العالم ..

غمضت عيوني ونزلت دموعي على وجهي ، حجيت ماقصرت اني وياهاا ماضلمتهاا هيه ظلمت نفسها مو ؟؟!

اي والله محد سوه الي سويتي ميرال ،

هزيت راسي امي وابويا ماراح يعاتبوني بعد مو ماراح يجوني بالحلم زعلانيين عليها ..

مبريه الذمه والله ، سويتي الي عليج ،..

انفجرت ابجي بصوت ماكدرت الزم نفسي ، رفعت اديه لوجهي ابجي وبشار لزم جتفي يحجي كول الله ميرال شصار قابل طبه مرض هي اختارت ...

ماحجيت ضليت ابجي كلبي محروك والله عبالك ضاعت مني طول العمر هو يحجي وياي واني ماسمع بس كلبي نار ..

اجاني صوتها ميرال ..

رفعت راسي على مصدر صوتها ..

حجت شجاابج هناا ..

وكفت اشهك ، تقدمت علي شجاابج ..

لزمت ايدي دفعتها ابجي بهدوء ، ارجعي لرجلج هاهيه انتي ختاريتي ..

لاسوين هيج انتي تزوجتي واني هم حقي ..

هزيت راسي تعبت من الشرح تالاا تعبت . حجه هو الكلب دانيال ، بدل ماتباركيها وتفرحين الها ..

انداريت على صوته ، الا اندمك والله بس صبرك علي ..

حجه بسرعه شفتي شفتي وجهج اختج الثاني شفتي ماتتمنالج الخير .

حجت شبيج ميرال وياه .. ليش ماتفرحين الي ، عطت بيها لان ضحك عللييج ولج حرررام حرااام ..

نترت صوووتج لا تفضحينه بنص الكنيسه ، حرام شنوو الي،يسمعج احنه السلام طول اليوم لازمين مصلايه والقراان .. هم هم يامنو بالله بس مايصلون مثلنه شصاار يعني ..

رد هو لو متدينه صدك جان تطلكت من بيبر بياع المخد*** شهكت تالاا و اني هجمت عليه املخه ..

عطت بي نذذل ليش انته منوو مو تشتغل عنده جرني بشار و تلازم وياه والعالم تدخلت ..

عاطت بينه تالا اطلعي بررره اطلعي ماريدج جاي تخربين عليه فرحتي كااافي شكد مسموومه ..

ضليت واكفه ابجي وارجف اديه توجعني لان ضرب دانيال ، والوت ..

جرني بشار يغلط يكلي عوفيها للنكسه هاي اصلا هي مثله تلوكله ، شتتوقعين من وحده حتى ماتعترف بدينها ..

جرني واني مستمره ابجي واذاك يزن براسها شفتي حتى ماكالت مبروك اختج فوك مااناانيه نوب منافقه عليها حلال وعلينه حررام ..

انداريت عليها اخر مره . حجيت بفعلتج هاي خسرتيني لان فضلتي عليه وعلى دينج وعلى اهلج تدرين لو لااا ..

-حجت روحي ميرال من زمان اني مالي حصه بكل هذول هسه عرفتي ...

برطنت ابجي عفتها ومشيت ، جسمي منها بشار لازمني لا واكع ..

رفعت راسي على صوت بيبر ميرال ..

و صوت طبات حذائه القاسيه .. حجه هااا حظن جتفي شبيج تبجين شصار قابل .. هي اخذت القرار بنفسها و هي هم تتحمل النتيجه .. هاي هي الحياه ..

دنجت راسي مدموعي مستمره تنزل ، همس يم اذني تردين ادخل ارمي عليهم و اجرها غصب ..

-رفعت راسي ليش ماسويتها قبل هااا شنو جنت منتظر ..

-لان شنو الي راح احصله بعدين وره مااخلي دانيال يتركها وفركشت علاقتهم ..

-اختي ترجعلي ماضيع بيد هالنذل ..

-باسني من خدي ومسح دموعي تقرب يم اذني اختج ضيعت نفسها من زماان ميرال اختي جوز حتى مو عذراء ،

فكيت عيوني مدهوشه .. مسح على خدي ، ماراح نحصل شي خلي تزوج و تنستر و خلص الي عليج نصحتي وهاهيه ..

جرني وياه واني مبنجه ماكدر حتى اتحرك ..

فتح باب السياره و صعدت مانطقت بحرف ، ساري صاح ميررال ميررال ..

بيبر حجه هذا ساري شجابه هنااا ..

وكف ساري يلهث قريب سباره حجه هااا اختج وين ..

بيبر رد راحت لحال سبيلها توكل انته ارجع لامك يله ..

صعد و شغل السياره واني خانسه كلمه بعد مانطقت ، الصدمه سطرت راسي ، ساري ضل على وكفته وسياره تحركت انطلقت تبتعد عن الكنيسه ..

ساري اندار لكه بشار واكف مخصر ..

اشره شصار ..

رد تزوجت الكحب* بدون رضه اختها نوب عقدت بكنيسه ..

رد ساري ماكو هيج حجي ، شنو هي تيهه شلون عقدت ..

والله عقدت تلكي واحد عرف لو صاحبه و دبرله سالفه على مزاجهم ...

ضرب جف بجف ساري متحسف ، بشار حجه من كبوور تلفك مادامك هيج محترك عليها احطها و اغتصب* والقانون يزوجها الك ..

اندار ساري فاك حلكه رد شبيك بابا ميت عليها اني،قابل كلعه تكلعها هيه هاي مو شاذي والعياذو بالله .. بس زعلان على اختها شاطت ..

هز راسه بشار اي والله مسكينه ميرال ، بس يله كلها كم يوم وترجع تالا مكسوره وطايح حظها ..

ليش هيج تكول ..

ليش عبالك هذا دانيال تكظه مره ، هذا طركاه مال الله ، بس يله كلشي بالعشره يبين و يتوضح ..

عافه وراح صعد سياره صاح على ساري اوصلك ..

رد لاا ارجع بحدي مشكور ..

اخذت زاويه وكعد على صفحه ، يراقب باب الكنيسه ، شوي و طلعو الناس شايلين سلات الورد .. و اجت سياره الزفه مزينه بالورد سياره وحده بس ..

وكفو بنات صغار شايلات سله ينتظرنهم يطلعون .. طلعت هيه بفستان ابيض بسيط و كلوشه ناعمه ..

لابسه التور لابيض على وجها ، ملامحها ممبينه ، زعلانه فرحاانه ، تضحك تبجي ممبين ..

و دانيال حاظن ايدها ، يضحك فرحان .صفكولهم و كعدو يكولولهم كولات بغداديه قديمه و يركصوت كبالهم الناس ،

فركت وجهي مفور رفع جهاز و فتحت الكامره و ضغطت تسجيل فديوو ..

مشت هي وياه باتجاه السياره و بنات الصغار يشمرت عليها ورد وناس تمشر على طريق حتى دوس عليه ..

فتح الباب الها و صعدت ..

هو وكف ياشر الهم سلم وصعد بالصدر يسووق ..

وكفت لحيلي مقهور ، سديت التسجيل وخليت الجهاز بجيبي ، شغل سياره و مشو فاتت من يمي سيارتها ..

رفعت راسي عليها ثواني مو اكثر لمحتهاا بس مااضن شافتني ، تطشرت الناس المعزومه .. و فضت السالفه ..

بدايه النهار جنتي تالا العزباء و نهايه النهار تالا متزوجه يااا شكد الدنيا سريعه و ظالمه ..

يبو الوكت شكد يمر بسرعه ومنحس بي ابد ..

رجعت للبيت تعبان مخذول ليش شنو هالخنكه عندي ماعرف بس مقهوور قهر ماعرف مصدره ..

احسها ضاعت مني مو حبيبه .. لاا بس صديقه و اخت ..

رجعت للبيت ماحجيت ولا فكيت حلكي ، مابيه حيل اسولف بالسالفه بس كلت يومين واكول لامي تزوجت وخلص مانطيها تفاصيل ..

ميرال ...

"ويخبرني الشّروق بكلِّ فجرٍ
‏بأنّ الله لا يُبقي الظّلاما

‏وأنّ الهمّ يعقبهُ انفراجٌ
‏فلا تأبه لهمّك بل تعامى!"

حظن جسمي يردد هو احنه ماحصلنه من اخوانه بس الاذيه ، اتركيها تتعذب لوحدها حتى تعرف قيمتج ، اتركيها تنمرد زين بالدنيا حتى ترجع بنفسها حظنج ماتغادر بعد ..

رمشت بهدوء خانسه ماكدر احجي ..

كمل كلامه ، شكد ما نقدم الهم شكد مانضحى بحياتنه لاجل عيونهم لازم يخذلونه ، تعلمي الدرس ميرال من اول مره لاضلين توكعين بنفس الحفره كل مره ...

انصحي مره و علمي مره و ثالثه اتركي هو يشوف نفسه ..

همست ماتركت اخوك لعد اخوك سوه بلاوي شو ماهديته يتحمل النتيجه مثل السالفه صارن بالمطعم مثلا ..

سكت ثواني ورد ، اخذ جزاته عواد يكفي راح يصبر سنه اني طارده من العراق و بعيد علينه و عايش على تفاليس وجيبه فارغ ...

ابتسمت مستهزه ،

رد ترى عواد جان خوش انسان بس مووت حوراء غيره ، حركت نفسها ، هو شالها باديه مفحمه ، من عدا الضرب و عيشه الشوارع خلته يتخبل ..

ماابري اني واكلج هو انسان صالح ، بس هو انسان بالاخر يتاثر بالماضي ، ماكدر يتخطاه ،

-رديت وتالا هم ، هم تغيرت بسبب موت اهلي ..تالا بعدها باول خطوات نحو الهاويه ..

-سعيتي حتى تنقذيها وماجت وياج شسوين الها بعد . جر راسي خلاه على زنده وحظني حيل ..

غمضت عيوني احاول انام ، بس كلبي ماكدر يغفى ولا ينام ..

كلبي ضل يمهاا ، اكلت لو شربت ، شسوالها هسه ، قهرها اذانه ديوزها عليه ويكرها بيه ..

غراضها هم نستهم مااخذتهم ضلو جزء هناا مانقلتهم اله زين منو يعلمها على ذيج سالفه خطيه منو يوجها ..

بعدين تذكرت بيبر و كلمته جوز مو عذراء مستحيل ماصدك..

ماسويها هي هاي شمفهمها بهل سالفه طفله ، عمرنا ماجانت عدنا علاقات ، ولا سوالف حب ، اني من نت تعلمت هي منو يعلمها ، معقوله تعرف لو هم من نت ، او ذاك النكس يعلمها ...

بيبر ضغط على راسي .. وهمس كاافي نامي ارتاحي ولج شبيج ادردمين ..

همست كلبي يمها ..

ضحك بهدوء تلكيها هيه صاعده عليه يكرم الله ههههه ..

رفعت اديه وضربته جذب والله لاجذب حرام عليك ..

غير ماتعرفين اختج هااي فلفل بابا فلفل ،

عقدت حواجبي ضايجه حيل ، حجه اشاقه شبيج ، بس مدامها تحبه ويحبها ماعليهم شي ، فكري بنفسج وبيه وخلص ..

غمضت عيوني انام وادعيلها بكلبي بالراحه و السعاده و الصحه والعافيه ..

ومغفره وعفو ربي الها المجابه ، طول العمر ...

كعدت الصبح بيبر طلع للشغل ، دخلت ديما عليه حجت كاعده موو ..

همست اي توه ..

تعاي انزلي تريكي وياي اني وايلاف ..

ماريد تعباته ..

اووو كوم نسوان بالبيت كلمن كاعده بغرفتها ولازمتها دك حزن دطلعن من الكهوف عايشات بيها وتعاي نكعد نسولف ونذم بالعالم مثل نسوان شبيجن .

ابتسمت بتعب ، تقربت علي تكلي ياله يله ..

بس البس تراك ..

طلعت ملابسي وهي طلعت حجت راح اصيح ايلاف واكول الهم حظرونه الريوك بالصاله ..

غسلت وبدلت و نزلت للصاله صوت امير يلعب وصوت العامله تحجي تكول الهن محتاكه حااكه ياهانم ..

ردت ايلاف بس الحليب فوري زين ..

جرتني ديما وكعدت . صبن الريوك ناكل ..

حجيت ام زياد وين ..

ردت ديما تضحك الرقاصه و عواد راجعين من السفر كم يوم عود ماعرف ، هسه على وصول لان طلعت صار ساعتين ..

رديت اني فتره .راجعين لو زياره ...

حجت ديما ماعرف بس العرفته ام زياد رايحه تستقبلهم من المطار ..

همست بخيبه بيبر يعرف مو ..

اكيد عنده علم قابل يرجع بكيفه

سكتت ضايجه ..

حجه ديما ويه ايلاف اكلي عدل ايلاف خطيه طفل هذا ميت جوع هسه وانتي جسمج جلد وعظم شلون يتغذا ..

ردت مالي نفس اكل ، لو يوكع ارحم الي هم والله ..

همست اسم الله بيش طالبه نفسج..

قاطعتنه صوت طبه كعب و ضحكه المستفزه . عوجت حلكي اني عرفت صاحبتها ..

ردت ديما لااا هلا احسبو البيت انكلب نادي ليلي ..

حجت ايلاف عوذه هاي شلابسه بنطرون ستريج وفوكاه سترابلس اووع . نوب كرشها شكبره مال الولاده .

تقربت هي وكعبها و صوت طفل بيدها يناغي ابتسمت اني على صوته ..

حجت هلاووو شلونجن ولجن اووي شبي وجهجن شنجن ارامل .

ردت ديما الله لاصبحج عووذه شهل صباح هذا ..

حجت اوو ديما ولا شفتج هاي شبيج عيوني جن جلدج يحكج مشتاقه لدك مال عواد حقج صار فوك السبع اشهر ماشايفته ..

ردت ايلاف اصعدي لغرفتج ارتاحي هالحجي ماله داعي ..

-اوو ايلاف خيه شصاير بيج صايره تخزين اعرف المره من تزوج تحلو الا انتي شجاج صايره بس بطن و الوجه مملوط اوو اعتن بنفسجن شووي ..

حجيت وياهاا طفلج اكيد تعبان من السفر روحي اخذي ديرتاح ..

صاحت يااا ولج ميرال لسه ماحبلتي خيه طلعت مو بس عيونج اكسباير حتى رحمج شنوو .

فكيت عيوني ردت ديماا وخرن شوو وخرن دكووم انعل ابوها لهل رقاصه ..

صاحت اوووي متووحشه اووي عافتنه و ركضت اطك بكعبها ..

اني لزمت بطني مغثوثه من حجايتها حجت ايلاف مقهوره :- صدك صايره العب نفس موو ..

ديما حجت هاي طلع من شسماتها وتخلي بحلكها دخل تولي اول شي تروح تشوف كرشها جنها حامل ست اشهر ..

همست معقوله اني ماخلف بنات ..

ردت ايلاف شسوين بي يمعوده بس،ضيم ،

حجت ديما بت الكلب غثتنه كلنه ماصار الها عشر دقايق من اجت ..

ردت ايلاف اهججها والله اخلي امي تمسحها عن وجه الارض ..

-حجيت كلامها مثل سم ..

-ردت عليه ايلاف :- اي والله معقوله اني هيج صايره بحيث انتبهت عليه ..

-ديما حجت انتي صح ضعفانه شوي بس عادي ..

-بس طالع الي هالات سود جوه عيوني و عظام صدري بايه كلها ديما ..

-من الحمل جوز ..

هزت راسها ماعتقد ، بس،صار فتره مماخذه دوه مالتي و هيج جسمي متخبل نوب يوجعني ةراسي ياذيني ..

-يادوه هذا اخلي بشار يجيبه الج ..

-ماعرف جان طارق ينطي الي من اعصب وانهار ، وبعدها جسمي،يهدء ويرخى ونام ..

-حجت ديما هاااا يادوه هذا منوم شنوو ..

-لا مهدءيكول طارق ..

-همست اني :- شنو اعراض الي تصير بيج من ماتاخذي ..

-شوف عينج اتخبل مو شفتي صار كم مره جسمي نهار واضل اعيط واملخ بنفسي واعصب ماسيطر على روحي ..

-لزمت كلبي همست بخوف الحبايه شنو مكتوب على شريطها ..

-ردت مابيها شريط بخط خاليها ..

-ردت ديما بفزع هااااا ولج خاف سكتت ..

-حجت ايلاف شنوو ..

-بلعت ريك اني ارجف ، حجيت شنو جاي تاخذي هسه وجسمج ارتاح عليه ..

-حجت امي جاي تنطي دوه كالت هذا مسكن ..

-ردت ديما شوو جيبي دشووفه ..

-مابيه اصعد والله ..

-حجيت شلون لون الحبه الي تنطيها الج امج ..

-وردي ليش شكوو خوفتني ترى ..

رديت خاف شي مو زين ايلاف وانتي كاعده تبلعين بي ..

لا يمعوده والله داكلج حتى جسمي يرتاح و يرخى عليها ..

ديما خنست .. حجيت ديما شو سكتي ..

ماحجت ، كالت اكوم انوم امير يله .. ايلاف كامت وراها واني ضليت كاعده ...

خفت من شكوكي لحظات بعدين كلت اكيد امها تعرف وحجت الها معقوله ماعرفت بنتها شنو تشرب جوز صدك دوه قابل احنه دكتورات ونعرف بالادويه شنو اعرضها ..

مر اليوم ممل و كئيب ، صعدت فوك ودخلت لغرفه تالا عطرها تارس الغرفه سوده عليه ، نص غراضها هنا مالحكت ادزهم لرجلها نذل .. حسبي الله عليه ..

مشيت وكفت على درج صحت على العامله ، تجي ترتب غرفتها و تخلي غراضها بجنط خاف تجي تاخذهم على الاقل يكونن مرتبات الها ..

صدري يوجعني والله حيل لان اعرف مالها احد غيري ، محد يسال علينه احنه منو النه ..

شو عمامي سكنو باوربا و نسونه و خوالي عايشين بشمال مطشرين وهم كملن حاير بروحه ..

اني وهي هم مو اجتماعيات و مارحنه و صلنه الهم هواي ، تربينه هيج اني و تالا ، مانعرف نختلط ، تزوج قبل فتره سيدار ابن خالتي مارحنه بس دكينه باركنه جوز من هاي هم سحبو نفسهم منه ..

يله هي دنيا غريبه اصلا ، العامله كعدت ترتب بالغرفه و تنظف اني سمعت ساعه اذنت الظهر ..

مشيت اتوضى واصلي ، دخلت للحمام توضيت و تنشفت لبست البشت و فرشت المصلايه و كعدت اصلي ..

خلصت و كعدت بالارض على مصلايه لازمه سبحه ..

راحه نفسيه و جسديه بس الله يعلم بيها ، استرخاء و برود داخل ابروح ، و رضاء عن النفس ..

معقوله يعرفون هاي راحه و مايصلون ؟؟

ليش حبيبي مايصلي و يهتدي و الله اذا صله و مشه على درب رضاء الله مايخطي خطوه بالرذيه ابد وحتى شغله يهووفه للابد ..

زين ياميرال ليش ماتحاولين وياه بعد ..

جسمي كزبر جريت نفس هذا مو تالا يميرال هذا بيبر ، اذا تالا تتهدد هذا بعيطه وحده يجفلج ..

هذا الي لوه ذراع عواد و خالته سويه وكدر عليهم اتتي شنوو ..

سكتت شوي كلت افوت اله من درب العيني واغاتي ..

عوجت حلكي على اساس راح يجي موو ، تدلعتي و تمايعتي و ربطتي ادين مافاد .. ثاني يوم رجع للشغل عادي ..

هذا عفريت على كولت العامله المصريه عفرريته .. قطع تفكيري فتحت الباب جفت ..

رفهت راسي صوت امير .. حجيت هااا ديما شبيج ..

دخلت تلهث وكعدت كبالي حجت بخوف ميرال حسيتي بالي حسيت بي اني ..

شنو .

اكول ميرال جنتي تلكفيها هي طايره شبيج صرتي انتي والمطي سوه ..

خلفه عليج .. توه مخلصه صلاه ماريد ارد عليج واطير حسناتي ..

لا عليج الله احجي صدك الي حجته ايلاف مو طبيعي تكول حبوب ..

جوز دوه ديما ليش نحجي بشي مانعرفه ..

هاااا يعني عرفتي الاقصده موو ...

قابل شاربات اني وياج قبل حبوب دنعرف هاي مخدرا* لو لاا جوز دوه صدك مهدء ..

ميرال الدوه مالتها يشبه الي ياخذه عواد تدرين لو لاا شفته بعيوني ...

عواد مريض ترى ديما بيبر كالي الحجي بينه هو كال عواد مريض بسبب موتت حوراء هو من يومها مخبل لان تجي بالاحلام .. وياخذ ادويه جوز نفسها ..

سكتت شوي وحجت وداعت امير علاج ايلاف مو طبيعي وهسه تشوفين والدليل .. اول ايام مثل خبله تعيط و تملخ بروحها وتخربط بالحجي و هسه صار فتره هادئه و ساكته شنو سبب ..

قابل هدايه من ربج غير كالت امي نطتني دوه ويله هدءجسمي شنو هالدوه هااا ..

جوز مهدء ديما قابل امها تريد اذيتها هاي ام ..

قابل هي كل ام ام ياعيني ، لو صدك ام زياد حنينه على بتها ماتخليها تتزوج جبر من طارق بس لخاطر تتسجل باسمها مهر فله بالمنصور ..

فتحت عيوني فله شنوو ..

اي مهرها جان فله خيه .. ام زياد بنت فكر ومن تالي شبعت ، تموت على الفلس مستعده تبيع بتها لخاطر الميه .. ماعلينه ، ترى شكل ايلاف دليل على انو بيها شي مو طبيعير..

سكتت شوي وحجيت امبين شكلها مال وحده تتعاطه يعني ...

حجت اي والله ولج هاي غزل الثوله انتبهت عليها فكيف احنه ...

بلعت ريك هاي ام زياد جااي اسووي جاي تلعب حسبي الله عليها اذا صدك ادري شنو متخاف الله ظالمه ..

سكتت ديما حايره ..

حجيت تكدرين تجيبن الي حبايه من حبوبها بالله ..

شسوبن بيها .

اسال داتاكد حتى اذا صدك نتصرف خطيه نوب حامل ..

حجت بخوف المن تسالين ..

بيبر ..

شهكت يمااااا لاا ولج عزاا ترتدين يموتنه يماا لا لا عيني لااا..

مايحجي شراح يسوي قابل ..

وياج ميسوي،شي اني لادخليني فدوه لعينج ماريد ايتم ابني ..

ابتسمت شبيج ديما هذا بيبر مو عواد .. بعدين مراج اسال بيبر حسال بشار ..

سكتت .

سمعتيني ديما لاتخافين ماجيب اسمج بس،دبريلي وحده ..

حجت ترجف ميرال اذا رجلج لو ام زياد شمو خبر و داعت امير يذبحونه على قبله انتي ماتعرفيهم ..

رمشت بهدوء دنجت راسي لازمه سبحه ادور بخرزها بهدوء همست لا اعرفهم واعرفهم احسن معرفه بس اني صابره و الصبر جاي من الله ..

كلبي صابر عليهم و ساكت ليش مااعرف يمكن الله ياخذ الحق و الله هو صاحب العدل لذلك مطمئه وساكته اني مؤمنه وصابره ..

اعرفهم ديما ام زياد راحت تحركني ما هز منها رمش وماخافت الله بيه ماكالت يتيمه فوكاها الله ابتلاها بالعمى .. لو من ماتت كادي وراحت لدار حقها ماا انبها ظميرها ولا اتعضت ..

لو بيبر ياكل و ينام هو بذمته تدمير مستقبل كوم شباب ، و هدمان بيوت كامله و تشتيت عوائل بسبب الممنوعات ...

ادري ديما ادري بكلشي ، بس ماعندي قوه انو اغير شي ، حاولت بس ...

بس حااولت مره وحده وصلوني للموت لدرجه شوهو جسمي ..

لو اختي ضاعت مني عبالج ماادي هم وره السالفه ، بيبر بأشاره منه يكدر يفني دانيال واهله بس ماسواها ..

بعد عني كل الي احبهم حتى يستضعفي و يكدر يسيطر عليه ..

بعد ام ساري هي وابنها واجه دور على تالا الي هيه هم غلطت وسهله عليه الموضوع ..

جريت نفس مدمعه دنجت راسي على حظني ، همست بس صاابره ومسلمه كلشي بيد الله اني وكعت نفسي بهل قاع استاهل مابيدي شي غير بس سكوت و اعيش حالي حالجن ساكته وعايشه ...

اكو ايه تكول ،، بسم الله الرحمن الرحيم .. (ولا تحسبن الله غافلا عما يعمل الظالمون إنما يؤخرهم ليوم تشخص فيه الأبصار)

............

#يتبع ....

كروب الفيس .. ( كتابات اسماء ديمير )

الانستا .. asmaa_demer

كروب الفيس ... كاتبات وقارئات العراق