رواية قاع الشياطين الفصل الثاني والعشرون 22 - بقلم اسماء ديمير

................☆البارت التاسع عشر  ☆...............

#قاع_الشياطين(البصر والبصيره)

#بقلم_أسماء_ديمير

 
ضحكت . تكدر تتهور ..

بعدج متعرفين فرات ..

هاا ..

اقصد بيبرس ..

جريت نفس لزمته زين محتميه بظله و هيبته ، خالته تقدمت علينه تحجي مستعجله ، حجت مو وكت الحجي لاحكين على المهامس بينكم ، الخطار موجودين منتظريكم ..

جرتنه اثنينه ، طلعنه بره بالحديقه المكان ناصبين بي الحفله و الفرقه الموسيقيه و مطرب و سماعات العاليه ..

كعدت اني  بمكان المخصص الي ، احس المكان بي هواي ناس هوواي من الاصوات والضوضاء ، شكد اكره الضوضاء ماتخليني افتهم شي ابد ، 

لزمت راسي باديه اريد افرزت حتى صوت بيبرس اختلط وياهم ، رغم مالازم ايدي هو و جتفه طاخ بيه بس ماعرف شنو موجود كبالي ..

منو هذا الي يضحك ، من ديركص و يدبج قريب مني ، اديه رجفت ، واحد صاح بيبرس وجره يكله ولك عررسك اليوم شنو راح تكعد مثل العروس كووم ..

فوك ماخليتنه نسويله حفله وداعيه للعزوبيه ، كووم .. جروه جر وابتعد وفلت ايدي خليتها بحظني كارصه ، جسمي كزبر لميت نفسي ، اصوات كلاصات العصير مدري شرب ، الشوك مواعين الكزاز ..

صوت بجي اطفال ، صوت ضحكه ايلاف و تكله شغلنه اهوازي  اهوازي .. دهوووز شبيكم ..

مديت اصابعي على عيوني ياارب نظره لو نظره اتنعم بشوفه ، يارب اكرمني بهل نعمه ، ماكو شي بعيد عنك ، قل له كن فيكون …

امنيتي وطلبي منك مايضر عبد ، فليش ماتحققه الي ، شخص مد ايده على جتفي فززني ، لان تالا حجت اني هناا ميرال شبيج ..

راسي دياذيني ..

من ديجي عادي اكللهم ينصوو ..

لا عيب عوفيهم ، لزمتها شنو الصاير ..

ضحكت وتقربت تهمس يم اذني ، ديركصوت جوبي ، و رجلج وياهم ..

بعد ..

و نسوانهم العينتين بالنص يهزن بلا مستحه ، ابتسمت اني ، منو جاي  ..

خوالي كلهم ، بس كاعدين بأدب واتكيت بس اهل العريس لا اخلاق يووك ..

-هههه ، لا صدك ..

-اي والله ، هاي ايلاف لابسه مشلح نص صدرها طالع اصلا راح يطلع ، وطفر عليهم ، و مرت عواد هم مو مقصره فتحه واصله فوك الركبه ..

خالتهم عود هاي الجبيره لابسه هاشمي شفاف ، وجواه لابسه صلوخ ، رفعت حواجبي اني مبتسمه اي ..

واكو نسوان ماعرفهم بس دقيقه دشوف ، هذا اخو ديما الضابط و ياهم و ياه مرته وجهاله كاعدين على نفس الميز  ..

- اي ..

صديق بيبرس ابو كذله و ياه رجال جبير و مره هم على نفس الميز ، اعتقد عوايل الي يشتغلون ويه بيبرس كلهم هنا ، 

نانه وين ..

ادور على ساري مدري وين اختفه من الصبح شوفي بيا زاويه خاتل يتماصص .

-خاف ديشتغل مثل عادته لو يدرس بعيد عن هوسه ..

-سكتت جرت النفس حجت ماتعرفي انتي ، الجلب جلبي واعرفه ..

-هاي شنو ولج جلب شنو عيب عليج ..

-ضربتني على جتفي تضحك اكول حيري بروحج عروستنه ، اليوم يوومج افرحي ساري شنو جايبه بالج لهذا المطي حتى ماكلج مبروك ..

-صدك ماكلي مبروك ليش ..

-بنت ابو حمد مو بس نسته الاخلاق نسته حتى الاصول و العشره الحلوه ..

درت وجهي ، مسكين ساري ، عايش بنص بيت اغلبه نسوان ، ماعنده رفيق يشكيله او يحجيله ، صح علاقتي بي حلوه بس ابقه بنت يستحي يحجي الي كلشي يحس بي ..

دعيت الله يبرد كلبه و يحسن حاله ، طولت الحفله ساعات لحد مادخت كلشي وبلش راسي يصل عليه ممتعوده علي هيج اجواء عكسهم همه ، 

وصوت المطرب يصدك .. احلى تحيه للغالين ، احلى تحيه للحظور..

تحيه من عريسنه لجاين ضيوف من الشمال ، تحيه من عريسنه الحلوو لابو طارق و الحجي و الاهل ..

تحيه للزعيم ، تحيه من الباشا عدي للحجي ، تحيه حب و سلام واحترام .  علي يااااابه حيل حيل ....

عفست وجهي مزعوجه من الصوت ، اجه بيبر يسالني شبيج ..

-همست راسي بيبر بعد ماتحمل خلي المطرب يوكف غنى ، صدعت والله ..

-صاح بشاار كاافي صبو العشه ..

لزمني و كومني ، كعدني على الميز تقرب من اذني همس تتعشين ..

-رديت لاا ..

-ليش مااشتهين اجيبلج شي ..

-لا والله بس اشرب ماي ، خله كلاص ماي بيدي اشرب والله احس عيوني راح تطلع من راسي الالم فضيع ..

نوب همه هم ماسكتو حجي حجي ماسكتو ابد ، لو ضحك و صوت ركع الخواشيك بالموعين ، كلام خالته براسي ..

الدقيقه صارت دهر عندي ، رغم الفرح بي الالم مضاعف ؛ تقرب شخص من عندي وكف وراي ..

حجه عروستنه مبروك ..

التفتت على مصدر صوت لان صوت عدي ، الله يبارك بيك ..

-شبيج احسج مو زينه ..

-دايخه شوي ... لزمت الميز تعبانه  ..

قرب الكلاص من جف ايدي وحجه عصير اشربي ، اذا ضليتي بلا اكل ممكن تفقدين الوعي ، اشربي سكريات حتة تكدرين تقاومين ..

لزمت الكلاص واخذته منه ، هو ضرب على جتف بيبرس و صاح مبرووك صاحبي مبروووك الثالثه كون ثابته ..

-بيبر رد ، ثابته لان دخلت كلبي ..

تركنه و مشه بلا رد ، حجه بيبر اشربي شوي لان باين سكرج هبط ..

-شربت شوي ، نزلت الكلاص حجيت شوكت تخلص الحلفه ..

-رد ليش ..

-ماعرف بس تعبت ..

سكت ثواني حجه تكرهين الصوت العالي ..

-لا اكره الضوضاء لان افقد تركيز بسببها ، ماعرف الحوليه شنوو ..

-شوي و افضها الج تمام ..

هزيت راسي تمام ، كملت شرب العصير ، كام بيبر وحاجه خالته كللها يله البنت تعبت ، 

حجت اخذها واصعد اني اتصرف ويه معازيم واقوم بالواجب ..

مد ايده وجرني بس وكفت دخت لزمت الكرسي ..

-حجه اسم الله شبيج ..

ابتسمت دايخه ، حظن خصري قربني منه ، حجه عود الناس جايه تريد تتعرف عليج ويشوفون زوجتي ..

بس يله مابينه حيل توكعين عليهم  ، مشه وياي ، توه خطينه و شباب صاحو زفوو زفووو ..

هرجوني هرج هو يحجي ولد كلب بنت دايخه مو وكتكم ..

دخلنه للفله وطردهم ما خلاهم يدخلون ليجوه ، يزفونه ،

  مشه بيه كبل ، ثواني نمشي احس راسي راح يوكع توقعت نصعد الدرج لان غرفته فوك  ..

بس ماكو شو كملنه مشي وحتى صوت المطرب انخفض ، حجيت وين رايحين ، رد عليه دقيقه ، فتح الباب و حجه انزلي اكو بايه انزليها .

نزلت ، صاح السياره جاهزه موو..

رد اي مشغلها الك ، 

همست وين ..

رد اخطفج من الدنيا كلها طالعين لدهوك كبل ، 

صدك تحجي  ..

اي والله …

و حاجاتي ..

موجوده بالسياره جهزت كلشي ، صعدت وياه بالصدر ، و انطلقت بينه السياره اني ماتحملت ، غفيت كبل ، شكد حاولت اقاوم ماكدرت ..

لمن وصلنه و كعدني يله يحاجيني ، يله حبيبي وصلنه للشقه ..

ماصحيت بس اسمع صوته ، راسي يفتر عبالك بالعه منوم ، حجه حبيبي اصحي ..

ماكدرت افتح عيوني ، رد شلون يعني اشيلج مد ايده جواي ، و شالني وطلعني من السياره ..

لميت نفسي بحظنه ، طمست راسي بسترته ،  و الله دخت دووخه ماصايره قبل ،  احس راسي ثكل الجبال يريد يوكع بالارض ، دخلنه المصعد و طلعنه مدري كم طابق ، وكف مقابل الباب ، همست نزلني ، نزلني وكف وراي ساندني من خصري ، مد ايده من وراي ، فتح الباب و دخلت ، اطوطح ..

-حجه شبيج نازل ضغطج وجهج اصفر ..

-همست مادري بس مجاي اكدر اوكف جسمي نحلان وخدارن ..

مشاني كبل للغرفه النوم حجه نامي ارتاحي لا تفقدين الوعي بيوم عرسج ، ويسموج العروس الفاقده ..

ابتسمت ، بس ذبيت الحذاء بهدوء و نمت بملابسي ومكياجي ..

ما حسيت بعد بالدنيا شنوو ، احس جسمي خفيف بس راسي ثكيل ، نحلانه حيل ..

ماحسيت غير بس على صوت بيبر يحجي يم اذني : حبيبي ميراا ..

فتحت عيوني : هممم ..

-صح النوم حبيبي شبيج نمتي مثل الميت ..

ضحكت ضليت على نومتي مطيته ظهري :- بعدني نعسانه ..

مد ايدي على خصري ، لا عليج الله كولي غيرها ..

حجيت بتعب ، تعبان جسمي ..

شمر الغطا عني ، خلي يولن تضحكين عليه .

-لا والله صدك احجي ..

-دكومي غسلي وصحصي واكلي لكمه مماكله انتي من البارحه ..

كمت لحيلي ابتعدت عنه هو كعد وراي لزم جتفي ، مديت اديه على ملابسي شو هذني ستن؟؟!

ماذكر البارحه نزعت اني لو غيرت عقدت حواجبي بيبر منو لبسني ذني ..

هو مد اديه من وره و حظني وصدره على ظهري ، حجه اني غير ماشفتي نفسج عبالك فاقده الوعي استخطيتج ..

سكتت ..

-همس مرتي ترى عادي مابيها شي ..

-مديت ايدي على ثوب نوم الستن لابسه ستيا* بعدني ..

ابتسمت ، اكو مناطق محرمه همزين ماواصلها جان صدك اخترعت ، توه اكوم جرني عليه حجه بعدج دايخه ..

-رديت جوعانه ..

-ممم اني هم جوعان ..

-كوم ناكل ..

-هو هم حاكل اني بس مو تخترعين ..

-عزاا ليش جرني يرجعني على الفراش ، عاااا ، لا مو هيج خلي نتفق ..

شنتفق يابه عرسااان عرساان الله واكبر ، ضحكت نمت على ظهري خليت اديه كبال جسمي احجي ..

بشويش بشوويش لا عيط والله افضحك ..

هو هم هيج راح نسوي فضيحه بالعماره  ، مد ايده يدغدغني ضحكت حيل بيبرررر، اعيط وربي لا هيج صدك تحجي ..

عيطي اصلا شقه محد يسمع ، بالشقه والضحك نزعني ثوبي الستن ، وشمره ، مد ايده تلمس بطني بنعومه ..

اخذ السالفه ضحك واني هم ماخفت صدقا مو لان جريئه بس حسيته لطيف وياي ، ماتصرف بانانيه ولا اهتم بشهوته لاا ..

من جنت الزم ايده امنعه يتوقف كبل ويحجي هاا بيج شي ، ارد لا متوتره بس اكول انته مطفي الضوه ..

- ليش يفرق عندج ..

ابتسمت لاا ، بس اخجل من فكره انو اكو شخص ديتفرج على جسمي بالضوه ..

-تمام ، كام لحيله و رجع وره ثواني ضحكت اني ، ضليت على وضعي نايمه على ظهري ، ماتحركت حجه شبيج ..

-ماطفيت الضوه ترى اني ضريره بس مو طرشه ..

-بربج عوفي الضوه ميرال واعتبري طفيته ..

هزيت راسي ، ذب نفسه فوكي مردني ، حظني حيل ، جسم غريب ، غريب حيل ، صاحب عضلات ، اول مره بحياتي انحظن هيج و بجسم خالي من الملابس عاري ..

قشعر بدني بكلماته ، جانت شفايفج بالنسبه الي معجزه وتحققت المعجزه اليوم ..

ابتعدت عنه مبتسمت اخذت ثواني هدوء استوعب حروف الي نطقها ..

تلمس خصله من شعري ساكت جرها لشفايفه باسها ، حجه ماكو حسن من بعد حسنج ينذكر ميرال ..

انتي عالم مختلف بملامحج بشكل بطبع و هدوئج ..

مديت اصابعي على وجهه تلمسته هادئه بس صدري يصعد و ينزل ، همست بيبر ....

نظر عيونه ..

اني حبوسك وانته حظني تمام ..

تمام ..

اي بنت بالغه ، و تحب هذا شخص راح تحس بالنشوه غصب عنها مجرد مايلمسها ، اشياء شكد ماتتخيلها مارح تكدر توصل لذره من احساسها بالواقع ، امان ، حنيه ، عاطفه ، جنون من المشاعر ..

تصرفات او كلام ماجنت تضن ممكن يطلع منك ، بس يظهر بهيج مواقف ، ولمن يكشف نهار و تتذكر تخجل شلون وصلت لهل مرحله من جنون العاطفي ..

جان راقي ، حذر ، والاهم ذكي …

ذكي لدرجه كدر يخليني اني اطلب منه و التجى الحظنه ، اني ماكدر اهد ايده ، اني اضل كارصه بحظنه بالساعات ، ايده تغلغلت بشعري و بمساج هادئ يخليني ارتخي و اغمض واضيع وياه بعالم هو خلقه الي وصوره ..

عالم هو يملكه دخلني اله بيده ، لو من يكعد يهمس اله بشغلات اول مره بحياتي اسمعها واجربها ، 

بالضبط مثل الطفل توه يزحف ، حتى ماعنده قدره على مشي ، وفجاءه تنطي جناح و تكله طيرر ، طير واستكشف ..

طرت اني وياه و استكشفت ، طلع اكو جوانب بالحب ماعرفها ، اكو عواطف ماتطلع الا ويه تحبه ، صوت مايطلع الا وياه المحب ، حتى نفس وياه يتغير ..

اربعه ايام بالشقه ماحسينه بيهم ، اتصل بنانه اطمنها و ناكل دلفري و باقي نكظي بالغرفه ..

وره الاربعه ايام يله طلعنه ، افترينه بدهوك شوي ، هو ياخذ صور و الكامره معلكه حبلها بمعصمه  ..

اغلب الاماكن رحنه الها بيها ماي ، واكعد اني وانزل رجليه ، يدنج يكفلي البنطرون ويرفع نفسه يعدل شعري لو ملابسي ..
لازم ايدي خايف عليه من العثره ، حبيته بزايد عشقت تفاصيله حتى حركات اديه من يدخل للشقه كمت احسبها و انتبه عليها ...

ينام وراي ويكعد قبلي قليل النوم كثير التركيز نبه حيل ، شكد اني عندي احساس قوي ماكدرت اغلبه باحساسي ..

يكلي الي بداخلج يظهر بوجهج ماينخفي ، شفافه ميرال مينخاف منج بس ينخاف عليج ..

بس كدرت احس على شغله بي مره انحصرت اريد اروح للحمام ..

فزيت عليه هو يحلم ويردد اسم بشفايفه ، الاسم مامفهوم بس كانو بنت يكللها لا لا سويها ..

حواء حور هيج شي ، كعدت عدل استمع اله ، همست لااا تتاذين لاا .

مديت ايدي اكعده ، عسيتها بيبر حبيبي ..

عسيته مره لخ وجرني حيل مخترع ..

حجه شكووو شبيج لزم جف ايدي ..

اسم الله الرحمن حبيبي حلمان جنت شبيك ..

جر نفس وبلع ريك شنو شكلت حلمان شنوو ..

مافتهمت شنو حجيت بس جنت حلمان ...

اي .. تعاي نامي جرني .. همست بس اروح للحمام دقيقه ، كمت من يمه رحت للحمام وبالي حلمه وكابوسه ، رجعت ليمه بعده كاعد ..

مد ايده حظني جسمه عركان ، همست الي شبيك كلبي ..

مابيه كابوس عادي ..

سكتت ، رد.حجه شكلت اني شنو حجيت ..

مافتهمت بس جنت ضايج مدري خايف هيج شي ..

اعوذو بالله من الشيطان الرجيم ..

سكتت ونمت بحظنه ، فتره مرت حلوه حيل ، اخذني نتعشى بمطعم ، رجعنه للشقه تعبانين ، همس الي ميرال ..

رديت هاا ..

عندج شي باسمج ..

ابتسمت شلون يعني ..

اقصد املاك ..

هزيت راسي اي انته هههه..

ههههه لاصدك سابت ماكو شي باسمج بالطابو ..

سال هم ليش تسال ..

اريد اسجل الشقه هاي باسمج ..

وكفت على حيلي ليش ..

ماعرف شي باسمج من عندي ، كلشي يصير على الاقل عندج شقه او ملك قريب على خوالج ..

شنو قابل يصير انته موجود وانته اكبر ملك الحمدلله ،

ميخالف ، هذا حقج شقه مو شي غالي على الاقل تكون الج ، ماستلمتي شي بيدج بزواجنه ، بس اريد تبصمين الي هنا ..

وين ..

على ورقه حتى تتحول باسمج .. جر ايدي و ضغط على العلبه حبر و بصم الي بالورقه ، حجه بالعافيه اعتبريها هديه زواج ..

ابتسمت ممحتاجه ترى ..

اعرف بنت خير بس متزوجه من ابن خير هاي حقج ..

مرت فتره طويله ماحسبت ، جنت ضايعه بجمال ايامي ، الهدايه الي شتراها الي ، لو الكلاده بيها اسمه ، لو لاسواره ، لو ساعه ابل الناطقه وبيها جهاز تعقب ربطها بموبايله ، لو لو ..

حسيت هالانسان انخلق لسعادتي وبس ، مرت ابايام ورجعنه ..

بالدرب حجه عبالي نطلع خارج العراق بس ماصارت لا جوازج ماطلع ، صراحه اخاف ازوره و لان ملزمه بالمطار انتي وللبدله مالتج وتنحبسين ههههه بتهمه تزوير ..

-يا تريد تورطني ويصيحولي المتهمه العروس  …

-فتره انشالله واحاول اطلعلج بواحد نظامي ..

-انشالله ..

رجعت بيومها لبغداد ، جانو خوالي راجعين لاربيل ، صعدت لغرفتي كبل ارتاح ، نام يمي شوي ، ودك عليه عدي ،  وطلع للشغل ، 

راح هو واني ضليت مدده بمكاني ، وراه بدقايق ،  دخلت عليه خالته ، بس دكت الباب ودخلت مانتظرت اكول تفضل ، كمت لحيلي اغطي نفسي بالغطى مستحيه منها بطرك ملابس النوم ..

كبل حجت ، اكو خطار جااين باليل جهزي نفسج اذا تردين ادزلج ديما لو ايلاف يساعدونج ..

همست تمام  .. 

مشت تطلع بعدين حجت اكول ميرال ؟؟!

همست هاا …

سكتت ، بعدين ، حجت سلامتج بس مثل ماوصيتج جهزي نفسج ..

عافتني وطلعت ، رفعت حواجبي مستغربه ، شلت جهازي دكيت على نانه ، خطيه دقايق و اجت عليه ، طلعت الي ملابس و جهزت الي الحمام و اليفه و الغسول ، وحتى ملابسي ، 

دخلت سبحت وكملت، هيه بالغرفه تنتظرني ..

دخلت ديما وحجت تردين مساعده دتني ام زياد…

-ابتسمت خاف اسوي زحمه ..

-لا حبي  رحمه ..

-نانه حجت اروح اذا هيج ..

عافتنه وطلعت ، جنت لافه برنص عليه و شعري مرطب ، حجت شنو تلبسين ..

-منو جاي كعدت على الفراش ، 

جرت نفس حجت ، اهلي ،  بابا جاي يبارك لبيبرس و اهل عدي جاين هم ، و اصدقاء بالشغل وعوائلهم ..

-اكو فستان نيلي طويل طلعي اسوي عليج زحمه ..

-لا فدوه ازعل عليج ترى ، خليت اديه بحظني ..

-حجت ملابس داخليه تلبسين ..

-اي اكو لون بيج بالجرار جوه خالتهم نانه شوي ..

-بيا جرار ..

-صفنت ااا كالت على اليمنه اشرت بيدي شوفي ..

-حجت لا هاي جواريب ، اسمع تفتح بالجرارت ، حجت هاا هذا الجرار الخامس على ايدج اليمنه موجودات بي ..

-هزيت راسي تمام .. 

-طلعتهم خلتهم بصفي ، شلتهم ادخل للحمام ..

-حجت ميرال سؤال لو استحي اخاف تضايقين ..

-ابتسمت اسالي …

-شلون مدبره نفسج هيج …

رمشت بهدوء ، ربج هو الي مدبرني مو اني ، الله صخر الي ناس صارو الي نظر للعيون ..

-صدر منها نبره حزن غريبه ، اقصد شلون خليتي يحبج …

-عقدت حواجبي وكفت عدل ، رديت :- لامست شي بداخله محد وصله ولا كدر يلمسه ..

-ردت بسرعه شنو هوو وشلون …

-هزيت راسي ماعرف ، ماعايشه حياتج اني حتى اعلمج ، بس كل الي اعرفه اكو شغلات بداخل كل انسان محد يعرفها ، محد شافها ولا حس بيها ، بس اذا وصليتها انتي و كدرتي تلمسيها راح تملكين صاحبها …

-نفس مامكلتي بيبرس ..

-جرت نفس ساكته ، نطيتها ظهري ومشيت للحمام ، دخلت وسديت الباب ، عفت وراي انسانه محطمه من الداخل تحاول تلم شتات حياتها بس ماتكدر ..

او الاصح هو شتات حتى لو كدرت تجمعه راح يضل مشوه ، مستحيل يرجع جميل مثل قبل ، تاسفت على حالها ، لبست ملابسي و طلعت اعدل بالفستان من وره ..

-حجيت ديما انتي هنا ..

-ماكو صوت  .

عرفت غادرت ، ضل اكو دكم وره ماكدرت اوصلهم ، وكفت على ميز امشط مديت ايدي لكيت شسوار خالته على صفحه بس دست دكمه اشتغل …

وكفت انشف بشعري ، نشفته ، دنجت افتح جرار ادور على الكاويه داكوي شعري ، فتحت اخر جرار لكيتها ، مديت ايدي على واير السشوار تتبعت الواير لخد ما وصلت للنقطه ..

، ملصته وخليت بدايه واير الكاويه بحذر خفت لا انتل نوب …

شغلتها وتركتها تحمى وكفت اتعطر ، شوي و جريت املس بشعري ، انفتحت الباب ودخل بيبر حجه ميراا خلصتي ..

- لا حبيبي ، داسوي شعري بعدني ..

-مو كتلهم يدزولج ايلاف لو ديما يساعدوج ..

-ديما جانت هنا ماقصرت خطيه اعتقد ابنها كعد وانشغلت ..

تقرب لا تحتركين جيبي ، جره من ايدي يسوي شعري حجه هذا شلون يسوو..

ضحكت ، اخذ خصله صغيره و خليها بين الكاويه وجر الكاويه …

وجعني حيل لان مايعرف بس سوا  ، حجيت عدلته لو طالعه جني خبله ..

تلمسه باديه بهدوء يعدله :-لا والله عدل حلو ، ذب الكاويه وحظني من وره ، همست اله بعد المكياج..

دارني عليه حجه اني موجود ..

ابتسمت ، جر عود من صدك قلم حمره وحجه اوكفي ..

-هاي شنو ..

-داخلي الج حمره اثبتي ، ثبتت حجه شو رخي حلكج لا اخذلي مص* منه ..

-ههههه لا هيج احنه راح ننحرف …

-ورانه عشه بعد العشه نفعل مايحلو لنا ، لزم فكي بيده و كعد يخليلي حمره ، وكف شوي حجه مممم حتى ام صالون مومثلي ..

-يالون خليت بالله ..

-وردي فاتح ..

جيد خما ملغمط عليك الله ..

-لا والله رسمته على رسم شفتج واجه عدل ..

-دخلي مسكاره بدربك مادام طلعت شاطر بهل سالفه ، جرني عود يخليلي واني ثابته ماتحركت خفت لا يبط عيوني ، رجع شعري ليوره يرتبه الي و مشطه للمره الاخيره ..

جاب الي الحذاء دنج يلبسه الي ..

-مديت ايدي اعرف اتركه حبيبي ..

-وخري ميرا دفع ايدي لبسه الي ، بست جف ايده ، ربي يحفظك الي انشالله ..

نزلت وياه ليجوه ، جانت كعده نسوان بالصاله الداخليه و الزلم بصاله الخارجيه قريبه من مكتب بيبرس ، كانت اغلب  مواضيعهن اني مو شاطره بيهن ..

سالوني عن اصلي وفصلي تحصيلي دراسي وجنت ارد عادي ، وانطويت على نفسي ، ايلاف مو هالكد وياي بس ديما انسانه لطيفه ، كعدت بصفي تحجي عن ابنها ..

جنت استمع ، وجوز تقربت مني لان لكت بيه الانسانه الي تستمع لمعاناتها بدون ملل ، اني اريد واحد يحجي و يفهمني الي حواليه ويرسملي صوره ..

وهيه محتاجه من يستمع الها ويشاركها الكلام ، و تشكي اله من عواد و من مرض ابنها ..

انقهرت عليه حيل ، حجت مشتهيه جكاره تدرين ..

-ابتسمت تشربين جكاير ديما ..

-سكتت تقربت من اذني اي من زمان ، تدرين نوبات اكول خطيه ابني بركبتي لان جنت ماهتم بصحتي واشرب جكاير من عدا الشرب ….

فتحت عيوني تشربين شنو  ..

-ضحكت وسكي ..

-عليج الله ..

-يكرم الله ، بس بطلت من سنه تقريبا ، لان امير يريد ام واعيه ..

-صفنت بكلامها ، تقربت يمها و حجيت عرفيني عنج ديما ، شنو سالفتج انتي ..

-ضحكت لا خليج هيج جوز اذا عرفتي بعد ماتتشرفين تعرفيني  ..

-لا حشه شهل حجي ، 

-يجي يوم ونكعد كعده حموات ونسولف ، 

-الله كريم ، الخطار تضيفو ، واني كمت للمطبخ اشوف نانه، لزمت عصا ومشيت ، دخلت حجيت السلام عليكم ..

ردت وسن وعليكم السلام ست ، ابتسمت ؛ بلا ست ام حمد صيحيلي باسمي او العميه على كولتج ..

سكتت ، ضحكت اشاقه وياج مو ضوجين …

-حجيت نانه وين …

-ردت كالت  اسامه مصخن شوي وراحت تشوفه ، هاا ، عفتها وطلعت كبل للملحق …

مشيت على الطريق الحصو ، صحت ناانه ..

كررت ناانه ، طلعت الي تالا حجت ها شجابج ..

-اشوفكم شنو  ..

-جرتني تعاي ، حجيت شبي اسامه كالو مريض ..

-مصخن اي شوي …

-دخلت للبيت حجت وينهم ..

-حجت بالغرفه ..

دخلت عليهم ، شبي اسامه ولك شبيك اني اكول شعجب مااجه عليه ، حجت نانه اذا طول اليوم منكع بالماي مال نافوره والحوض شلون مايصخن ، تقرب على صوتهم تلمسته صدك مصخن  نايم بفراشي ..

-ها ولك شو استحليت فراشي ..

ماحجي خطيه، كتلها تودي للطبيب ، ردت لا مابي شي شربته خافض حراره ادول ، باجر يصحه انشالله ..

كعدت يمهم شوي و فقدت ساري كالو ديقره فوك السطح ، كمت ارجع عيب خطار موجودين ..

رجعتني تالا وراحت للملحق واني كملت دربي، دخلت المطبخ مابي صوت فارغ ، دامشي وعثرت برجل شخص ..

همست اسم الله التفتت منو ؟؟!

مد ايده على وره ظهري على كفاي ابتعدت كبل ضايجه منو هنا ، ماكو اي صوت بس النفس ، مد ايده يتلمس ركبتي وعظمه صدري ،  صحت وخررر .

لزكت بالكاونتر ، نوب انحصرت بالزاويه حجيت منوو اكول لبيبرس والله ، وخر ايدك ..

تقرب عليه خطف ، صم حلكي ريحته تكتل كتل من الشرب قرف قرف والله ، صرخت صرخه مكتومه لزم صدري ، دفعته مايندفع ، صوت طبه رجل و كلام ام زياد بره دفعني حيل و طلع بسرعه ..

لزمت ركبتي افرك بيها لا اراديا نزلت دموعي وبجيت مرعوبه  ، مديت ايدي ادور على العصا وكعت بالارض دنجت اريد اشيلها ..

صوت طبه رجل ، وصوت كعب مال حذاء كلاسيكي ،  لزمت طرف العصا و كمت لحيلي ، بسرعه وجهت العصا كبال جسمي حجيت وربي اضرب وربي وخرر عني حيووان …

وكف ماتحرك ، حجيت اعيط وافضحك والله …

حجه شبيج تخبلتي ، رمشت بهدوءصوت عدي …

جسمي يرجف ، اديه تهتز ولازمه عصا حيل وموجهتا على مصدر الصوت ، حجيت ماتخجل دايس بيت و تتحرش بنسوانه ..

ضحك بهدوء لا جنيتي انتي ياهو هذا الي يتحرش ولج…

بجيت كبل عيب عليك والله ، وربي الا اكول لبيبر عبالك اسكت .داحجي و تقدم عليه بسرعه جر العصا و دفعني يااهو يتحرش هي غبيه ، شايفتني ولج..

-صفنت ثواني عطر ، اي عطر هذا خال عطر ، ذاك ريحته قرف ،

حتى طول مو هيج ، ذاك كانو اطول بشوي بس هذا لاا ..

مديت ايدي ادفعه وخرر والله لزمني واحد وخرر..

-ابتعد عني ، ياهو هذا لزمج شوكت ..

-تووه تووه شنو تريد تقنعني مو انته ..

-خايف منج مثلا لو ردت اتحرش ..

بلعت ريك مدمعه ، حسيت بي قريب ، ركزت على حاسه الشم مابي ريحه شرب ، ريحته عطر و ريحه نركيله ..

عقدت حواجبي ودرت وجهي اريد اخذ العصا..

-حجه بضحكه كم مره متحرشين بيج بالله ..

مارديت ..

-حجه اذا اسلوبج الدفاعي هذا فابشرج هالمره تحرش مره ثانيه يغتصبج .. بهت و جهي ومشت بعيوني بخوف …

تقرب مني بهدوء ، دافعي عن نفسج ، بس مو بالعصاا و لا تضربين برجلج ، 

دافعي عن نفسج بصراخ كبل و بمد ايده على شعري رجفت ابتعدت ، جر شي من شعري ، لزم معصمي حجه افتحي ايدج ..

فتحتها بهدوء، ماعندي ثقه بي ، ثواني وخله بيدي مثل السيم ، حجه هاي ماشه شوفيها مال شعر …

تكدرين تسببين اله عاهه مستديه بيها اذا خليتيها بنص عينه ، وهم تنطيج وقت تكدرين تستغلي وتنهزمين منه ..

وكفتج هاي و تهديدج انو تصيحين لو تكولين بيبرس هذا تصرف غلط وجاي تسمحين للمتحرش يشبع شوو ويطمع بيج بعد  ..

سكتت ابالع بريكي ، لزمت الماشه ، وجهته بوجه ..

، ابتعد بسرعه و حجه موتخليها بعيني يمعوده ، خير تعمل شرا تلقى و الله يالله نسوان مالجن امان ..

عافني وطلع يدردم .. 

ضليت واكفه جامده بمكاني ، جريت عصا و مشيت اصعد فوك ، اديه ترجف ولازمه الماشه بيدي حيل …

صعدت فتحت الباب و دخلت كبل ، مددت بفراشي ، خانسه ، كلت بس يجي بيبر اكوله اكو واحد تحرش بيه …

بس منو هذا ، تذكرت ريحته لعبت نفسي ، كمت لحيلي اكوم اغسل ، تمشيت للحمام ، دخلت مديت ايدي لزمت المغسله شغلت البوري ومديت راسي اغسل وجهي ، جريت صابون سائل ، غسل وجهي حيل ، سمعت صوت الباب انفتح ..

رفهت راسي فازه ، حجيت بييبرر..

حجه حبي ، وينج ..

جريت نفس بالحمام تعال ، وكفت ، اجه حجه شبيج ليش صعدتي ..

-قدملي منشفه حجه شبيج وجهج اصفر ..

-بلعت ريك اشرت اله مدمعه مقهوره ، اكو واحد لزمني بطريقه تلعب نفس ..

رد مستغرب ، شنو ؟؟؟!

درت وجهي ماعرف اوصف اله ، حجه كولي،شنو دافتهم ..

برطمت مقهوره .. تقدم عليه لزمني منو عرفتي ..

-لا ماحجه بس ريحته تكتل ، والله بيبر ممتوهمه ..

-مصدكج ماعرفتي ..

-لا ..

-جان شارب ..

-اي …

اخذ ثواني سكت كانو صفن ، همس .. تمام ، اني اتصرف شسوالج ..

-لزمني ..  سكتت خجلانه ، 

- رد اكسر ايده والله ، باس راسي حجه ضلي هنا لا تنزلين شوي واجي ..

عافني و طلع ، سحبت هدومي من التعلاكه و غيرتهم ، توجهت لفراشي اتمدد ، توه خليت راسي على مخده ، اسمع صوت صياح جوه و ربد ..

كمت لحيلي،بسرعه ، اسمع صوت بيبر يصيح ، يا ستار ياربي ، وعيطه خالته لبيبر ام زياد تصيح لا ولك اخوووك يماا شبيك ياااعوفه ولك …

تصيح ، عدي جره يمااا جره راح يموته ، صوت بشار و ستار يصيحوك هاا يمعود شجاك ، سكران ياول فاقد …

جسمي كزبر رجعت ليوره ياا عزاا ، انضربت بالجربايه برجلي دنجت افرك بركبتي ، جريت نفس كوه متوتره ..

كعدت انتظره يصعد يماا دخيلك ياربي ، جهازي دك ..

درت وجهي اسمع صوت وين ، تقدمت ادوره  خليته على ميز الجربايه اني اخر شي ، مديت ايدي ادوره ..

طخيت بي وكع مني ، استغفرالله ياربي و ينك ..

دنجت ادوره بالارض نوب ، لزمته وكف اتصال ، دك نوب بيدي فتحته كبل ..

اجاني صوت نانه حجت ميرال يماا ..

حجيت هاا ..

-شكو يما شصاير يمج خما بيج شي ..

-لا بس شنو بالحديقه شكوو ..

-وين انتي لعد ..

-فوك بالغرفه شكوو …

-هاا هذا رجلج ديضرب باخوو دماه عزاا عبالي انتي جوه خفت عليج ..

سكتت ارجف ، حجت ماكو شي لاتخافين فضت سالفه بس ليش تعاركو شكو ..

-همست مادري بالغرفه اني مادري ..

-جرت نفس ديربالج يايمه ديربالج …

سديت منها وكعدت انتظر ، شوي و اجاني صوت كانو دخلو جوه ..

خالته تحجي ورجل خالته يكلوله مو تعرف بي مايدري بنفسه شبيك . على شنو ضربته غير نعرف ، اذا غلط عليك اول مره يعني ، 

مايحجي هو ، عافهم اسمع صوت طبات رجله على الدرج ..

صاح مااشوفه الصبح هناا خلي يشوفلك شقه و ينكلع يطلع مناا …

فتح الباب اني فزيت كمت لحيلي ، دخل يلهث و يجر نفس كوه ، حجيت بيبر …

مارد عليه توجه للحمام كبل ، لحكته بسرعه ، وكفت باب الحمام ، حجيت شبيك ..

مارد بس ينافخ و يدردم ، تقربت عليه احاجي شبيك حبيبي ..

لزمت ايدي تلمست رطوبه بيده رطوبه لزجه عفست وجهي ، ابتعدت عنه كبل ، حجه مدي ايدج ..

شغل الماي وجر ايدي يغسل الي حجيت دم مو دم ..

وغف بالصابون و دنج يفرك اديه ، حجيت دميت اخوك ..

ماحجه …

-بلعت ريك اخوك مد ايده عليه موو ..

مارد ساكت بس،يفرك باديه حيل ، مره واثنين ، همست دميت اخوك ..

رد برود ،  احسن ماكسر ايده ، ترى سكران عباله ديما  الا هو ميسوي هيج ، ضل مستمر يفرك باديه لحد ما توجعت همست ايدي ايدي بيبر ..

وكف فجأءه ، ماريدج تتلوثين بالدم ميرال ، خليج طاهره ..

ابتعدت عنه هو ساكت بس احس بي دينزع ملابسه ، وشغل دوش ، حجه تجين ، 

هزيت راسي لاا ، سندت ظهري على الحايط ...

جر نفس : زعلانه مني 

 هزيت راسي :  لاا بس تعبانه ..

: الماي دافي يرخي الاعصاب ، ابتسمت ، طفر عليه رشه ماي ، ضحكت ، مديت ايدي اله ، 

جرني عليه حجه بانيو ديربالج ، رفعت رجلي ودخلت بي ، فتح دكم القميص ستن ، وكفت مبتسمه ، باسني من عضمه كتفي ..

غمضت عيوني دفعته ودخلت جوه ماي دوش ، نزل ماي دافي على راسي ، ذبيت اهدومي البقيه بهدوء ساكته ، رفعت اديه امسح وجهي ، وارجع شعري ليوره ،  التفتت عليه هو مالها صوت بس نفس طالع ..

همست بيبر وينك ،..

رد بهدوء يمج ، تقدمت عليه ، لزمت صدره ، مد ايدي على ركبته و نزلت اصابعه تتحسس جسمي ، مد ايده ثانيه وجرني عليه ، 

هدوءه بهدوء الماي النازل ، احترافه  لمساته بحتراف انسياب الماي على اجسامنه ، اعرف الي بداخله غير عن الظاهر، لمساته الي تعرف وين تروح وشلون تاثر بالمقابل ..

اني بالنسبه الي طفله دتتعلم ، بس تتعلم بشغف  …

دقايق مرت من الجنون ، جنون بشر يشوف و طمع بالجمال ، و شغف شخص ضرير ديتعلم شغلات جديده و حاب يكتشفها ، ومستسلم ومامن …

انتهت الحرب سلميه ، بفوز الطرفين ، مدده وياه بنص البانيو ، والماي بلش يبرد و الوغف مال صابون خف ،،

مديت رجلي فوك رجله اتحسس خشونه شعر رجله ، ابتسمت ، حجه نكوم ..

-رديت لاا بس زيد الماي بعد ..

-تاليتنه نغفى بالبانيو يلكونه غركانين الصبح..

-ضحكت ، تعرف اني ماعرف اسبح ..

-لا وين اكو انا اشهد اشطر منج بالسبح ماكو ..

-هههه لا جد احجي ماعرف اسبح اذا خليتني بمسبح ..

-اعلمج ..

-تعرف .

-هاا صدك تحجين طفولتي كلها كضيتها بالشط اسبح شتا وصيف من عمر الخمس سنوات ..

-عليك الله ..

-والله ، 

-هنيالك ، اهلي جانو مايخلونه احنه ..

-انتي الي هنيالج عندج اهل يخافون عليج احنه ديحونه واحنه جهال ، ماسالو علينه ، 

-عود ليش ..

فوك ال٢٥ نفر بالبيت اصلا اذا مات واحد بينه مايحسون بغيابه ، النسوان ملتهيات بالغيره والعرك ، و زلم شرب وملاهي . 

-سكتت صافنه على نبره الحسره الي بصوته  ، بعدها حجيت ..  شلون عشت بيبر ..

مد ايده على شعري همس يم اذني منو كلج اني عايش ، اني من شفتج عشت بس ، والباقي ماجنت عايش ، 

سكتت ، حجه بردت ولج يله ..

كمت لحيلي ، مد ايده جوه ظهري ، حجيت بيبرر ..

عيونه ، حجيت دنطيني البرنص جسمي ديقطر ماي ، لبسه الي و طلعت قبله ، وكفت انشف شعري ، ربع ساعه و نمنه ، نمت حاظنته مرتاحه ..

مرتاح نفسيا وجسديا ، مرتاحه لا اكو شخص مقدس وجودي يمه ، شخص ماحسسني باعاقتي ابد ، بالعكس يشوفها شي حلو ،

احس بي باليل يفزز جسمه يختض و فجاءه يسكن ويندار يحظني و يهدء ،

كلت كلنه نحلم هو ديتعب خطيه ، اخلي راسي بركبته وانام ، الصبح كعدت مالكيته ، غيرت ملابسي ونزلت ، ادور عليه ، سالت وسن عليه ردت طلع للشغل بس كالي خلي دك عليه من تكعد ..

مشيت ادك عليه ، رد عليه ماحبيت اكعدج حبيبي ، العصر ارجع ماتاخر ..

اوك دير بالك على نفسك ..

تريكت و مشيت لنانه ، تالا و ساري بالدوام و اسامه يلعب بالصاله ، كعدت يمها شويه ، ومشيت رجعت للفله .

وسن بالمطبخ ويمها ام زياد ، سلمت و دخلت ناويه اصعد فوك لغرفتي ..

صعدت اسمع صوت عواد بالطابق الثاني ، مديت ايدي كبل على الماشه الي بشعري جريتها ، 

بلعت ريك ، اقترب صوته هو يخابر ماعرف شنو بس اسمع يكله ديله ساعه ويمك…

توه اصعد اخر بايه حسته بوجهي لان العصا طخت بحذاء نزلت بايه ليوره  حجيت شو بلا زحمه ..

جر عصاتي من ايدي حيل و حجه توزين اخوي عليه موو ..

جريت نفس كوه خايفه ،  ابتعد بلا زحمه ..

دفعني من جتفي حيل مو وياج يالعميه ، دمعت عيوني ابتعد عفيه  ..

لزمني من كتفي حيل و ضغط بيده شسووين اذا ماوخرت ..

لزمت الماشه ضغطت عليها حيل ، رد مو ويااج طالع الج السان ، طخ صدره بوجهي ، رجعت بايه ثانيه ، عتني بقوه عليه ، اني رفعت الماشه وغرستها حيل وين اجت مادري ..

بس اسمعه صاح ياكحب*  و نطاني دفره برجله اجت ترس بطني ، رجعت ليوره ماكدرت اسيطر ولا الزم المحجر ،

وكعت من الدرج من اول بايه لاخرها عطت  ..

تدحرجت اني والعصا ، الضربه مال الدحرجه اجته ترس على جتفي و حوض و راسي ..

#يتبع ...

البارت طووووويل ..

هديه على تاخير ، داتعب وربي بنات ماحب الشكوه بس اتمنى تقدرون ، هواي بنوتات قدرو فدوه لعمركم يروحي ..

لان همه هم راعيات بيوت واطفال وشغل فحسو بيه ،

اني هم تقديرا لطافتكم و روحكم الحلوه .. هم ماقصر تعرفوني ، انزل انشالله برمضان بس على استطاعتي ..

صفحه الفيس ( كتابات اسماء ديمير )

الانستا .. asmaa_ demer