رواية قاع الشياطين الفصل الثاني والستون 62 - بقلم اسماء ديمير

............☆البارت السادس والخمسون  ☆............

#قاع_الشياطين(البصر والبصيره)

#بقلم_أسماء_ديمير

توجهت للكنتور كبل فتحته لميت الي كم غرض ، و حظرت صايتي على صفحه ..

نزلت كبل لوسن حجيت وياها .. كالت ساعه بال٤ الفجر تجهزي .. 

دخلت العامله فززتني حجيت سويلي عصير وسن ، عفتها و مشيت لغرفه ديما ..

اسمع خطوات وراي عرفتها العامله .. دكيت باب غرفه ديما ودخلت ..

لكيتها تحجي ويه امها ، همست الها سمحو الج تتصلين بيهم ..

ردت كلمن حاير بروحه قابل يلتفتون عليه وعلى مخابراتي ..

كعدت بصفها ديما ، 

ردت هاا ..

ماغيرتي رأيج بالطلعه منا ..

اوو سدي سالفه ميرال ، انتي مأمنه مايلوحج عقاب لذلك متجرأه زياده ..

درت وجهي ساكته كطعت الامل منها كلش ، ردت خلي نعيش هيج والي كاتبه الله يصير اني ماعندي شي اخسره بهل دنيا بس ابني اما عمري فضاع وضاع خلص .

-على كولت يوسف عمرج راح يضيع ويه عواد وصدك بكلامه ..

-انداريت يوسف منوو ..

-ضحكت نسيتي يوسف منو ..

- اهاا بس لا جنتي عندج علاقه بي ..

-اي ..

-وين صار ..

-شدراني الله يذكره بالخير وين ماكاعد طفر هي طفره وحقه مالومه ، الله يعلم شصار عليه ..

-عقدت حواجبي تتوقعين اذوو ..

-هذا شي منتهين منه ..

-جسمي قشر وكلبي رجف ، اخذتني ذكره لذاك اليوم المشؤم الي دخل عواد لغرفه ديما وضربها ، لو صوت عياطها ..

شكد مر وقت بس كل ماذكر جسمي يقشر ، شكد عندي ذكريات سيئه بهل بيت ..

تحس مالهم جبير يردوهم من الظلم وعن اذيت نسوان هالبيت ..

عباره عن حطب احنه ، ملاذهم باليل و حطب بالنهار يدفون عليه جماد كلوبهم ..

بوستها وبوست ابنها وحظنتها حيل ..

جلبت بيدي حيل .. حجت لازم نويتي ميرال ..

هزيت راسي مدمعه ماكدر اعيش مثلج ديماا ولا راح اقبل اصير مثل ايلاف انسانه للخلفه والفراش للزوجها  ولا مثل غزل تتقبل رجلها بعيوبه و تعيش وخلص ..

ضليت واستمريت وياه لان جنت متأمله ممكن انقذه من غركه بس الي اكتشفته داغرك وياه اني بدون نتيجه ترضيني ، النفس هم الها حق عليه ..

راح انقذ نفسي ..

جرتني تحاول تقنعني ، ماراح تكدرين تطلعين .. واذا طلعتي منا وين ترحين راح يلكاج ماتعرفيهم هذول يحفرون بالصخر …

ابتسمت خاله عيني بعين الي خلقني مايفشلني ، نويت وخلص ..

فلتت ايدي منها و مشيت . ..

حجت وراي ماريد اخسرج ميرال فكري فدوه ..

فتحت الباب وطلعت ، سديتها وراي ، سندت نفسي عليها مهدود حيلي احس حتى حموضه صعدت على بلاعيمي من توتر ..

صعدت لغرفتي اخذت شغلات بسيطه على كد جنطه الصغيره ، وجهازي وكم فلس و خلص ، كعدت انتظر شوكت ادك ب٤ الفجر ..

دك جهازي بيبر ..

بالاول ترددت ارد خفت لايعرف من نبره صوتي الي بيه ، لزمت جهاز ماكدرت افتحه واكول الوو ..

بلعت ريك خايفه لا يعرف لا يحس ..

دك مره ثانيه ورديت ..

وين جنتي ..

مدده نايمه ..

سكت ..

شلون الوضع يمك ..

للاسوء ..

جريت نفس شنو جابرك ؟! هم اكو احد جابرك ؟؟!

جر نفس،ضايج ، اخذ ثواني صمت ، ورد .. الوحيد بيكم اني مجبور على هالعيشه ..

دمعت عيوني ،حجه :- لا يقسى كلبج عليه ميرال ، ماذيتج اني ابد ، ولاعمري فكرت اذيج انتي القطعه الصافيه والبيضه الوحيده بحياتي … 

نزلت جهاز من اذنبي بجيت بسكوت ماردت يسمع الي بيه ، انسد الجهاز من يمه ، لميت رجليه لصدري و سكتت ابجي ..

مالي حل ثاني والله حاولت وياك هواي ، حخسر نفسي هم راح يلوحني طشار منكم ، الساكت عن الحق شيطان اخرس واني وصلت لنهايه درب ماعندي قوه بعد اتحمل واصبر ..

تالا …

عالجت و عالجت ونتيجه وحده ماختفه ، صح توقف عن الانتشار بس االام هو هو ، والحكه تخليك عنده استعداد تزلغه ويطلع دم ..

حالتي مو مثل دانيال لاا جسمي ترف ماتحمل الفايروس بس هو لاا ..

بقعتين وعالجهم وقفو حتى ماياذو ولا اثرو عليه ، نوب مايقبل نستخدم حمايه بحجه اريد طفل ، 

كمت مره اوكع بالارض من الالام ماتحمل لو اكعد ابجي مرات يحظني يهديني ومرات يعصب لان دتكرر الحاله ..

لحد ما بلشت عليه اعراض ثانيه خلتني مانام اليل ، لو دوخه لو لعبان نفس لو ادرار كل شوي ..

فزيت بنص اليل ، كمت اروح للحمام ، هو كعد لحيله مخترع لزمني شبيج .

لزمت بطني للحمام هسه اجي ..

كمت هو وراي ، بس دخلت كعدت بالارض اتقيئ لزمت الكاشي بارد ياايمه نار جسمي نارر..

لا مرض هيج شعوره ولا صخونه ولا حساسيه ، الشعور مقرف ماينحمل من الالم ..

كل صفحه بيه تصيح من الوجع ، كمت اموت نوب اتقيئ نوب اريد ادخل للحمام ابول ، نوب جسمي يحكني ..

دفعته اطلع بي بره لزمتي يساعدني عطت بي ابجي وخرر لخاطر الله وخرر عني ..

طلع وسديت الباب حيل وراه ، انداريت داروح للتواليت وادنج واتقيى على ملابسي ، شفت وضعي هيج اجت عيوني تطلع ..

من كثر مالعبت نفسي ، نزعت ملابسي كبل و فتحت دوش اريد اهود الالم حساسيه دنجت اتقي ، متت والله تمنيت الموت ولا هالزواجه الكشره ماشفت بيها خير ابد ..

كعدت بالارض على الكاشي بارد اهود بروحي ، ساحت عيوني حتى بطلت اشوف بيهم ..

كمت لحيلي صحت اريد ملابس نظيفه ، ماكو صوت جن راح للغرفه ، كعدت لوحدي اشهك وابجي ، تعاي ينانه شوفيني شلون صار حالي ، 

ولا توقعت اصير عاجزه لهل درجه و تلم عليه الامراض والعلل ، بس سبحان الله الانسان على ساعه يوكع ..

غسلت لروحي شلون ماجان و فتحت الباب صحت بي مره ثانيه .. 

ماكو رد ، بجيت ولك دانيال وينك ..

ماكوو صوت ..

اجت اخته من جوه حجت هااا ..

رديت :- دانيال وين شوفي بالغرفه كوليليه تالا تريد ملابس ..

ردت دانيال طلع ..

وين طلع ماشاف حالتي تعاي جيبي ملابس حبابه ..

امها من جوه صاحت هاا تالا تردين شي ..

لا خاله بس اريد ملابس ..

اي هسه روحي جيبي الها ماما بسرعه..  حاجتني شعدج بالحمام بلا ملابس شنو نسيتيهم بهل ليل ..

توصخو خاله توصخوو لزمت باب الحمام ، حانيه ظهري من الالم مابيه اوكف ..

راحت جابت الي واجت ، لبست وطلعت امشي كوه ..

لازمي بطني واسحل بروحي ، حاجتني امه من جوه ، على كيفكم ماما قابل يوميه لو كل شوي هيه ماطايرين ترى مو زين على صحتج هاي شوفي شلون كوه تمشين ..

درت وجهي عليها وجهي نار من الحروره و دنيا طافره من عيوني هزت راسها ضايجه عافتني و راحت .

دخلت سانده نفسي على حايط ماكدر امشي بعد ناار نار استعرت بيه والله نوب هذا مدري وين راح ..

تمدت على فراش ابجي ، الله يعينج يميرال ، اثاري احنه من دون بعض منسوه شي ، نمت بمكاني او الاصح اغمي عليه ، 

حالتي للاسوء ابد ما تحسنت وصرت اعنف ، اصيح وانتر و ابجي نوبات اعيط بدانيال لو اضربه ..

فقدت عقلي من الالم نوب زاد الامر التقيئ كل ساعه اتقيى ، ماعرف شبيه ..

امه شافتني وكفت حجت خاف حامل ياماما ..

رد دانيال ماصار شهر ونص شبسرعه ..

شعرفك جوز من اول يوم كولشي يصير …

مانتبهت ماجنت مهتمه بكد ماجنت حايره بروحي بالمي ..

راجعت دكتوره داوقف تقيى على الاقل حجت خاف حامل .. 

رفعت نظري عليها فدوه حامل مو حامل خلصوني من وجعي حمووت راح انتحر والله داخلص من الوجع الي اني بي ، 

حجت روحي سوي تحليل دم دنعرف شلون نتصرف ويه وضعج روحي ..

اخذوني كود هو وامه سانديني ، والله مشيتي جن وحده عمرها خمسين سنه الظهر محني كوه امشي من الالم ، راسي يفتر بيه ..

اخذو مني الدم و رجعت راسي ليوره اريح نفسي غمشت تعبانه ، يااندمي والله ياااندمي على هالزواجه يااربي شهل عقاب ياللهي عقااب ميتحمله بشر ابد ..

طلع تحليل و بالنسبه الهم بشاره .. تحليل موجب يعني حامل ..

اني شلون نار وشبت بيه ، درت وجهي ابجي ، اااخ لوبيه حيل جان عطت ملخت نفسي طلعت اركض راجعه لحظن نانه لو ميرال ..

بس ماكو حيل منين اجيب الحيل ..

شالوني شيل واني ابجي بهدوء ، دخلت للدكتوره من شافت جلدي وخاصه منطقه الحساسه عفست وجها حجت هاي شبيج ..

حجيت الهربس كبل ابتعدت عني و باوعتلي بريبه ..  شكد صار عليج هالحاله ..

شهرين لو ثلاثه ماذكر بالضبط ..

ممنوع تحكيها امي ليش هيج مدمايه دتنشر هيج غلط ..

سكتت شكللها دانيال من يجلب بيه وتعاي قومي بواجبج سكتت الحال ماينحجي ..

ردت زوجج يبتعد عنج افضل ، لاينعدي اصلا جوز انعده منج بعد هالمنظر هذا ..

همست هو حامل للفايروس اصلا ..

دنجت على الورقه عافسه وجها وضايجه عصبيه حجت ممنوع جنس جنس شنووو ممنوع ديصير احتكاك ياكله هيج راح يدمرج بهل طريقه ، حتى حملج جوز ميطول بعدج صغيره يالله منين اجاج ..

سكتت ..

حجت شكد عمرج .. امج ووين عنج ..

عمري ١٥ امي ميته ..

ضربت على اديها بعصبيه جهللل .. الجهللل ياربي نهش الامه الجهل ، اسمعي امي اعتبريني امج واخذي بنصيحتي ..

حنطيج محلول تغسلين جسمج يوميه بي صبح وباليل هذا يبرد الحكه لا تحكيين شنوو ؟؟! لاتحكيين ابد ..

والحبوب هاي تاخذيها ثلاث مرات تساعد متناعتج على القضاء او الحد منه ، والادويه بقيه عباره عن مقويات مال حمل ..

ونصيحه ثانيه رجااال ماكوو ابتعدي عنه لحد ماجسمج تقوى مناعته و يكدر يسيطر على المرض ..

وبعد ماتولدين ديربالج تحبلين ولج انتي جررريمه والله جرريمه كاارثه وين الدين وين الاهل وين الذمه وظمير  ، من طفله متزوجه وحامل ولا فوكاها مريضه بالهربس ، 

صارت عصبيه نار ، كتبت الي العلاج و مدت الورقه بنتر حجت منو زوجج انتي؟؟

سكتت دنجت راسي ..

-عمامج لو خوالج تردين اساعدج اكو منظمات ممكن يعني تسويلج شي .

اخذت الورقه وكمت لحيلي بهدوء منحيه الظهر اجر بروحي جر ، 

مارديت عليها ماعندي جواب جوابي ماراح يسعدها ولايسعدني ابد ، صاحت وراي تكلي :- عود انتي حامل صار شهر خاف تردين تعرفين ..

التفتت عليها ..

هزت راسها هاي انتي وحده من ملايين القاصرات الي خسرو احلامهم و تدمرو قبل زواج واثناء زواج وبعد زواج هزت راسها ودنجت متحسفه ..

ضلت بالي ادك الجمله ، 

الجمله استمرت وياي اسنين مو بس بلحظتها لااا اسنين ( تدمرت قبل زواج واثناء الزواج وبعد زواج )

بالمختصر حجت حياتي بمختصر هاي جمله ..

جنت ادور على النجاه بهل زواج ، بس مالكيت نجاتي بالزواج لااا لكيت استمرار لمسيره تدمير الذات والمستقبل ..

استمرار من التشتت الي انهزمت منه ..

طلعت من يمها وتلكاني دانيال وامه خليت الورقه بيده ومشيت ماحجيت وياه ..

مشيت كبلهم وهم وراي يسالون هاا بشري ..

مشيت لعند السياره وركبت وهم وراي راحو للصيدليه وجابو اكل من مطعم وصعدو فرحانين نوب يضحكون .

رجعت للبيت تعبانه ردت حظن واحد من الاحباب اشكيله همي وجعي بس مالكيت ..

كالعاده وحيده ….

ياكثر الاقارب بس وحيده ..

ياكثر المال بس وحيده ..

صعدت نمت بغرفتي مثل الجثه ، وره ماكدرت دكيت على ميرال ماردت ، هي هم تغيرت بعد وفاه ايلاف ..

قبل تشجعني على رجوع لحظنها هسه لااا تكلي ارجعي لخوالي اعرف هيه تعبانه ومابيها بعد تتحمل مسؤليتي حقها ..

ردت اكللها عود حتصيرين خاله ، اعرفها كلبها طيب تفرح ماتزعل .. بس ماردت ..

ذبيت جهاز على صفحه  دموعي وكعت على صفحه ..

ايام مرت ، مو ايام والله ..

الدقايق تمر على الوجعان موت احمر ، مر الوقت عذاب عبالك عايشه بجهنم ، عذاب مستمر ..

وصلت بيه اعض باديه ، شعور ماينحمل ، افتح دوش واكعد جواه اريد اهود الحكه مايهود الالم ..

اتمدد دقايق يجي دانيال يريد حقه صار فتره تاركته وحايره بروحي ..

حجت ماكدر داتالم وخر ..

بس شوي ورب ماذيج .

بجيت وعطت وخرر مداتحمل داكلك شبيك .

عاط بوجهي صار فوك عشر ايام تالا شبيج شغيرج ..

مداتحمل الحساسه دتاذيني والله مداجذب ..

مو مثلج اني مدانعوص مثلج كارهتني شنوو قرفانه مني شو حتى شرب تاركه صار اشهر علمودج ..

داكلك .اتالم حتى دكتوره منعت هالشي ..

ماتفتهم هاي شنو تمنع على اي اساس شفهمها هاي الغبيه .. 

جرني عليه وسكتت لثواني ورديت عطت ابجي دفعته ماوخر ، عطت نوب انعل ابووك وخرر حمووت والله ..

ضربني على وجهي وسكتت وخر عني صاح شبيج ولج ..
..

انعل ابوكم لابو زواج لابو الي اليريدكم ، بسببك كل الي اني بي بسببك تمرضت من وراك الله لايوفقك ..

انجبي اني شعلي جابرج تنامين جواي ولج ..

فتحت عيوني كعدت علي حيلي اغطي بنفسي ، جابرني موو اي انته جبرتني شعرفني شنو بيك اني هاا شعرفني من عديتني وخليتني اتمنى الموت ..

انجبي اكول لا جبرتج ولا شي من كاعج انتي فلفلتي صرتي الي مايا خليفه ، داز عليج كبل الزواج وحدتجن تفتح بنت ليل ومن تزوج تجيف و تستشرف وتكعد تتنعوص براسنه ..

فكيت حلكي مصدومه ، هااا اني اجيف دانيال شنو شايفني حتى تكول عليه استشرف ..

عاط بيه لعد لاتمنعيني شنوو بيه تمنعيني عنج شنوو دافعلج نوه اني مو زحفت زحووف حتى حصلتج ..

كعدت على حيلي مهدوده وتعبانه ، انصدمت بي ، همست مريضه تعرف شنو مريضه ماقدرت الي بيه ، ماتحملت كم يوم بس ..

ياكم يوم تالا من تزوجتج شفت كم يوم بس وياج حلوو والبعدها اعذار واتالم وبجي ونوح وكابه ، يااكم يوم ترى اني سااكت ومتحمل مااشكي ولا داضوجج بالحجي ..

كام لحيله نكت الفراش حيل و جر ملابسه يلبس عصبي وجه احمر ..

نتر هااي ابسيط شي ملابسي الوصخه غاسلتها لاااا ..

اكلي تسوين  ، تركبين لااا ، اني كله اجيبه جاهز من المطاعم …

كوي ملابس كاوويه لااا خلفه على امي ، تزوجت وهم ماخلصت مني ومن واجباتي  ، نومتي مطلعتها سم وزهر عليه ، وتكعدين تبجين جوواي مغتصبج ياابه اني ومادري ، لو جيبج  هنا خطيفه ومادري دكااافي عاد ..

انعل ابو اليمشي بالحلال مو اني ادري بحظي كل مامشيت عدل الرب يغضب علي ..

لبس شلون ماجان وطلع وركع الباب وراه خلاني ابجي منهاره ومصدومه من الي طلع منه فجأه ..

كمت لحيلي سندت نفسي على الفراش ، نزلت رجليه بالارض وعطت من الالم بمنطقه اسفل صره ، لزمتها ابجي واون ..

مشيت كوه لفيت جرجف عليه وطلعت للحمام ..

امه واكفه جوه شافتني ..

حجت هااا شبيكم ..

مارديت عليها دخلت للحمام وذبيت جرجف ، شفت عليه شي احمر ..

شلته قطرات دم خفيفه .

تلمستها رطبه رفعت اصابعي لوجهي اي والله دم خفيف رطب بعده ، دنجت راسي اشوف جسمي ، لونه صاير احمر والبقع لونها طاغي عليه حمار .

فتحت الماي وكعدت عالعاده على كاشي ابرد جسمي ..

غسلت وطلعت اسحل بروحي والجرجف لافته زين ، دخلت لبست و نمت ، انفتحت الباب عليه عبالي هو ..

طلعت امه حجت شبيكم امي شصاير وياكم ..

رجعت راسي على مخده همست مابينه شي ..

شبي عصبي صار فتره هو هادئ وعايش عادي وياج وكلت ابني انصلح شجاه وعصب هيج ورجع لسهرات اليل ..

رفعت راسي شنوو وين رايح هوو ..

اكيد طلع يسهر هو مايطلع بوقت متاخر الا اذا ناوي يسهر ويه الجماعه ..

رمشت بهدوء ضايجه وتعبانه ..

حجت شنو بيكم بالكت اكدر اساعدكم ..

مريضه خاله مديقدر وضعي هو ابد ..

تقربت عليه وخرت الغطا و كعدت بصفي ، حجت كلنه نمرض بس ماهملنه ازواجنه ياحبيبتي ..

داتالم خاله مابطرانه اني ماكدر جسمي مديعيني على شي دشوفين طول اليوم نايمه بالفراش .. بجيت ترى والله اني مو جاايفه نظيفه واحب اانظافه بس بعد الزواج كلشي تغير عليه ماعرف شبيه ..

حقج حقج مالومج اني ماشوفيني ماطلب منج شي ، مقدره وضعج وتغير البيئه اني يكفيني ابني سعيد وياج يكفي عفتي الدنيا واختاريتي ابني ..

بس،ياماما ترى رجال مثل جاهل ، هسه تكولين شلون .

لمن يشوف كيكه بالثلاجه ، مو راح يريد الكيكه كولها شنو نكوله احنه حتى نسكته ، نرد عليه ونكول مو هسه من ننجمع كلنه يله  ، وهاك هاي المصاصه تلهه بيها بين ماينجمع الكل ..

هو راح يقنع ياخذ المصاصه و يوكف ينتظر ينجمع الكل حتى ياكل الكيكه ..

انتي هم وعدي بالكيكه بس هم انطي مصاصه يتلها بيها ..

صفنت بوجهاا ياكيكه هاي ياامصاصه جاي تحجي باله شلون حافهم اني ، 

صفنت بوجهي وصغرت عيونها جن عرفت اني ماوصلتني فكره بعد ، عوجت حلكها تقربت مني همست مو الا نومه كامله يعني ، ماتعرفين شلون يعني ..

سكتت مثل ثوله اباوع بوجها ..

رفعت حاجبها عليه ، مزوجته عن حب لدانيال وصار ماعرف شكد عدكم علاقه وماعرفتي شلون ترضين رجال بلا علاقه جسديه ..

عليه هااااا .. غمزلتي .. ترى انتي اختيار دانيال يعني مواصفات فول وعاجنج وخابزج عدل  ..

ضربت على جف ايدها على جتفي وعوجت حلكها الي ..

اني مانطقن ، كمت لحيلي ، الشياطين تطافر بوجهي ، و ابليس لازملي عصا وصبوره و يكلي سووي هيج .. بهدوء تاام سندت نفسي على المخده .. ورفعت اصبعي بوجها … اسمعيني ابنج اذا مالزم شسماته عني ،اكطعه اله ويكرم الله مامجبوره ..

مامجبوره ارضي واني عليله ومريضه  ، عود من يصير بيه شي يشمرني ويجيب ثانيه هم مواصفاتها فول وهم يسكطها مثل ماصار بيه هسه  ..

هااا عود هو من يسكط لو يتكسح واطلب منه حقي عود تعااي بيج خير علمي وكوليله مو الاا نوومه كامله ابني ارضيها بدون نوم موو ..

كومي من يمي خاله كومي ..

كامت لحيلها  مخترعه هااا واني اريد مصلحتج ..

اطلعي خاله ، انتي تردين مصلحه ابنج ، مو مصلحتي و سالفه رجعته للسهرات لان ضايج مني ، راح اشعل غاليه عليها لا يمامااا اني تالااا مو عبالكم مريضه تتكون عليه  وهو الافندي يريد حجه حتى يديح و الله اسكطه اااي شعبالكم لعد .. 

ضربت على خدها فوكاهاا هااي فوك دانصج ..

خلفه عليج قدمي نصايحج لابنج لا والله اطلعه وجهي الثاني ..

طلعت تركض ضايجه مني واصيح يمااا منج يالحربايه بيج بلاا …

رجعت راسي على المخده انعل ابوكم لابووو ، لابو هالقسمه زر** ، 

مااجه صدك لوجه الفجر سمعت صوت السياره بره صفت بشارع ، كمت اشوف من شباك صاله الي بالطابق الثاني ، 

لفيت روب عليه ونزلت بهدوء تعبانه ، فتحت باب صاله ، انفتحت باب الخارجيه على كيف ..

تفاجأت بستار هو سانده ويدخله للبيت ..

رفع راسه ستار .. انصدم من شافني فزز ..

حجه كاعده ..

جتفت اديه لصدري حجيت سكران موو ..

ردت يمتمت اي شووي لاا هو شرب شوي وداخ بسرعه ، تعاي ساعديني ..

مامشيت ضليت على وكفتي مجتفه اديه حجيت سيارته وين ..

رد ضلت هناك مايكدر يسوق كلت اني اجيبه خفت لايسوي حادث ، تقربت منه وهذا صاير طينه وجهه احمر دم ..

يمكن نايم ..

اشرت عوفه هنا على الكرسي الي بره بالحديقه اني اخذه جوه عود ..

حجه ماتكدرين عليه اني اصعده فوك ..

لزمت دانيال ونترت عووفه اني اخذه بس ماكتلي وين جنتوو ..

وكف صفن بوجهي هاااا ..

طرشيت شنوو سهرتكم وين ، 

بلع ريك متمت شدراني اني هو دك عليه بسياره حجه تعال اخذني ومريت اله ..

رفعت اله حاجبي شمر عليه دانيال و مشه بسرعه ، رفعت دانيال كوه ذبيه على الكرسي الي بالحديقه ، 

شغل سيارته وراح ذاك .. وضل هذا نايم و فاك حلكه و قميصه مفتوحه دكمه ريحته عبالك طامس بخيسه لو بنص سمج خايس ..

عفته بره بالحديقه بهل جوو ، والله ماشيلك لو مااخاف الله الا اطلعك بشارع اخلي جهال ادوس عليك الصبح ..

دخلت اكمل نومتي ، لفيت راسي ونمت وعفته بره بالحديقه ، ماعرف بيش ساعه بس اسمع صوته هو امه بره يصيحون هو يصح ليش ممدخليني جوووووه ضاركه عليه العصافير  و امه تصيح شدرراني شوكت اجييت ماحسيت عليك من دخلت  ..

غطيت راسي و نمت ، وين حسيت عليه دخل للغرفه يدردم ويحجي مارفعت راسي عليه ابد ..

عفته ، عباله من مريضه يكدرلي مايدري انعل والديه والله ، 

ميرال .. 

لمن صارت ساعه ب٣ الفجر كمت لحيلي اجر بالنفس كوه مختنكه ، كمت شربت مسكن ، اهدي الم الي براسي وعيوني ..

توضيت  ولبست مشمر الصلاه كعدت على المصلايه ، اريد اندل طريق الصالح والي مابي تانيب ظمير ولا عذاب الي ولغيري ..

ماريد اظلم احد ولا اريد انظلم ، لزمت سبحه و كعدت اصلي ، ركعتين ، ودكت ساعه بال٤ ..

رفعت راسي شبسرعه مر الوقت توه جان مايمشي واكف ..

لميت المصلايه و اخذت وياي بس السبحه لفيتها على معصمي ، خليت الشال على راسي و لبست صايه سوده فوك ملابسي ..

جريت الجنطه وكفت انتظر ، دقايق ودكت باب غرفتي بهدوء ..

فتحتها مرتبكه ابالع بريكي ..

حجت وسن تمتمت هاا هاا جاهزه ..

هزيت راسي اي ..

حجت على كيف على كيف امشي ذبي الحذاء افضل حتى مايطلع صوت ..

نزعته و شالته هيه وجرتني وياها ، مشيت وراها على طارف اصابعي نزلت درج وهيه تتعوذ وتقره معوذات وتتشاهد ..

نزلت من طابق الفوك للارضي و طلعتني كبل للمنور و الخارجي ..

سمعت صاحت بهمس ابو حمد وينك .

حجه بهدوء خايف هاا هاا اجت ..

هياتها ..

رد هاا عمي اخر قرار نويتي ..

هزيت راسي اي ..

توكلي لعد يله ، صوت باب انفتح و حجه يله بله بالعجل   ...

هست يالله ، صعدت بحذر اتلمس طارف الصندوك السياره ، خليت رجل وحده بصندوك رد صعدت الثانيه مددت مثل الطفل وبحظني جنطتي حجه وياي هاا عمي مرتاحه لو مضايقتج الغراض الوراج ..
همست هاهيه عمو هاهيه ..

حجه نتوكل عليك ياكريم يفتاح يااستار استرنه بسترك وعفوك ورحمتك ، اجت وسن تركض عليه حجت الي يسالني اكول طلع يجيب الغراض من وكت علمود نلحك نودي حمد للدكتور نتاكد من نجاح عمليته هاا  .

رد اي ، حجت استودعكم بالله ..

تقربت تحاجيني ، يماا ميرال سامحيني خاف فد يوم اذيتج بحجايه ماجنت اعرف الكلوب شني بذاك الوكت ..

اني مدده بنص الصندوك استمع الهم اشرت الها بهدوء خاني الحجي وطارت الحروف اشرت الها مع السلامه ..

سد الباب الصندوك فوكي حجت دير بالك ابو حمد على نفسك ..

ركب السياره اني الظلمه هي هيه بس الي فرق الاوكسجين كانو قل ، وريحه الغراض والبانزين قويه ممتعوده عليها ..

و ارضيه الصندوك قويه شوي على جسمي الترف ..

ما بالي لا اهل ولا احد بس هو بالي ، يمكن فعلتي راح تاذي بس هذا الي شفته صح بعد ..

ياوجعي وحسرتي عليك والله ..

خلگ بعيد اليحبك يعتنيك
الماله واهس بيگ لٱ تركض ورا

لميت جنطتي لصدري ساكته ، وغمضت عيوني اضيع بذكرياتي وياه ..

مشت بينه السياره ، و صوت الحارس يكول لابو حمد مغبش اليوم ..

رد عليه والله موعد الدكتور مال حمد ساعه ب٧ يادوب الحك اجهز احتياجات البيت واتسوك وارجع اخذ المره وحمد للطبيب ..

رد عليه الحارس الله وياك …

مشت السياره تكمل دربها بهدوء مر دقايق وداست سياره بانزين بسرعه تعجل مشي ...

مر  وقت ، وكل طسه تفزز روحي خايفه لا يجفت علينه وفجأه يفتح الصندوك عليه من فوك ، كل وكفه للسياره اكول كطعو الطريق على ابو حمد وعرفو بالي سويته ..

لحد مامر وقت طوويل ، والسياره لزمت بريك وكفت نهائي ، فتحت عيوني خايفه و اذاني تترقب لاي صوت ..

اصوات غريبه ، انفتح الصندوك و غمضت عيوني بقوه و صوت ابو حمد يكلي عمو ميرال ..

فتحت عيوني هااا وصلنه ..

اي يابه كومي مادام الشارع فارغ ..

كعدت لحيلي مدلي ايده لزمني لزمته وكمت لحيلي ، 

نزلت بهدوء خايفه ، ابو حمد اديه ترجف رد ها عمي امري بعد ..

همست هاهيه عمو توكل ..

متاكده عمي خاف غلطانه ..

توكل عمو توكل وصلت اني ... 

#يتبع ...

ميرال وين رايحه المن ناويه تتجهه ؟؟؟

كروب الفيس .. ( كتابات اسماء ديمير )

الانستا ..  asmaa_demer

كروب الفيس  ...  كاتبات وقارئات العراق

دعواتكم لبنوتي الصغيره من دخل الصيف لسه هيه ماشافت عافيه سوده عليه ..

والجبيره تحسس بجسمها ماعرف شنو الديصير رغم العنايه والنظافه والله حتى ممطلعتهم ماخليهم يختلطون ، هاي جهالي مناعتهم صفر لو كل جهال هيج