رواية قاع الشياطين الفصل الثاني والثلاثون 32 - بقلم اسماء ديمير

...............☆البارت السابع والعشرون ☆...........

#قاع_الشياطين(البصر والبصيره)

#بقلم_أسماء_ديمير

و

كان يأوي إلى قلبي ويسكنه،
وكان يحمل في أضلاعهِ داري..

ميرال ..

غاب اسبوع ، اسبوع بحاله ، سبعه ايام و ست ليالي ، حسيت بفراغ بوحده فضيعه ، نوب لوحدي ويه ديما ..

لا تالا لا نانه ولا ساري ، ولاصوت اسامه ، اخذت نفسي ومشيت الهم بين مايرجع .

لحد مانفجرت بي ، رجع بنفس اليوم ، و ياه ( يكرم القارئ) كلب ، وكانو يكول اسف ..

كان نوع الكلب الي مدرب و اليف ، بسرعه ياخذ على صاحبه ، الحلو نظيف يعرف منين يشرب ومنين يروح للحمام ..

يتجه للحديقه كبل لو يوكف كبال الباب الزجاجيه يشخط بيها معناها اريد اطلع ..

تونست عليه ، جنت قبل مكابله ديما وسوالفها تزعجني بس من ملل اضطر اكابلها هسه لا شايله عظم البلاستك واركض اشمره هو يجيبه ..

لبست عدسات وكعدت كابلته اشوفه ابيض مدنفش يخبل ، تلمسته ، نوب لابس عقد لونه وردي ..

ثولني صفنت بوجهه ، تعال صدك هو انته ذكر لو نثيه حتى اذا ذكر مانزع كبالك عيب ..

من رجع بيبر سالته ذكر لو نثبه ..

رد ليش …

يااا قابل اغير كباله ..

ضحك ترى حيوان هذا عادي ..

معناها ذكر مو ..

قابل اجيبلج نثيه ووتتسربت بشارع ادور ذكر جم يوم تلكيها حبلانه عليه وتعال بيبرس حير بالجلبه وجهالها صدك عود..

خطيه يريد ونس ..

- ميرال كولي غيرها لخاطر ربج ، تفضحنه اذا نثيه اتضل طول اليوم مفلكحه رجليها وتنبح .. لا ماكو هيج حجي بس هذا وخلص ...

درت وجهي على صوتها يااا صدك ، اجه باليل ونمت بحظن الحبيب ، و اجه تكوم فوكانه ..

بيبر اعرفه كوه لازم نفسه بحيث من تصعد عليه يكتم نفس مايتنفس تلعب روحه  ..

تقرب على صدره عاط غددددي وخري خرب وخري هو شعر مالته .

-دفعه حيل و عاط الجلب صحت بيبر ..

-طلعي بره ياامره شهل قرف يريد يلحس وجهي ..

-ملقح ترى ..

-ياول بس لاتخلي يلحس وجهج واجي اني منا الاغم اكمل عليج تمطك..

-ضحكت لااا ، بس لادفعه حيل خطيه ..

-انا الخطيه وخري هذا مكاني وفراشي يجي حيوان يشاركني بي ماقبل طلعي لاطرده بالحديقه والله ..

شلت و طلعته بره بالصاله هو عنده جوه درج بيته الخاص ، بس مايبات بي .

سديت الباب وضل ينبح يريد يدخل انقهرت عليه ويكرم الله ، رجعت يمه مغثوثه خطيه بيبر  .

-اني خطيه لو جلب لاتخليني اندم اشتريته  ..

سكتت ، ثاني يوم كعدت من الصبح كبل توجهت عليه اشوفه لان نايم بالباب ، ينتظرني همست ودنجت علي هييي حبيبي شبيك ..

يون ضايج يون و يدنج براسه مو مثل كل مره متحمس من يشوفني ..

تعال يروحي شلته ، ومشيت للمطبخ ..

خليت اله الاكل مالته بماعون و خليتهم على صفحه ياكل ..

دخل بيبر لكاني اسويله ريوك ..

-هي هيي يالله ، صار شكد مزوجين مايوم جبتيلي كلاص ماي وهذا كاعده اله من الصبح تسويله ريوك والله جن حظك يالجلب احلى من حظي ..

-ضحكت حسدت جلب بيبر ..

-مدللته يابه ..

-دكعد اسويلك ريوك يله لاضوج ..

-فدوه لايدج اي يله شوفيه ابداعاتج ..

درت وجهي مشيت للثلاجه عدنا البان طلعتهم فرغتهم بمواعين صغار ، و مديت ايدي على الباب مال ثلاجه لكيت مربا ..

هم لزمت خاشوكه و فرغت منها شوي بكاسه ..

خليت القوري على نار و مديت ايدي على كاونتر فوك ، تلمست علب  ، فتحتهم وحده وحده شميتهم لحد مالكيت علبه الجاي ، وحطيت جاي ، 

حظرت كلاصات و الصمون هو ساكت ..

حجيت شنو نمت ..

-لا داكلب بجهاز دبرتي ريوك لا صارلج ساعه ترى ..

-جريت نفس تحمل ياعيني ، صبيت جاي و خليت شكر و خليت صمون كباله و صحن جبت والمربا ..

-كعدت مقابيله ، ابتسمت الف عافيه حبي ..

-سكت هو ..

-حجيت اكل يروحي ، كح شوي حجه هاا اي تمام بس اوكفي دقيقه  ..

مدري شال من الميز سمعت صوت ، مديت ايدي اكل صحن جبن و المربا ماكو يااا وين اخذتهم ..

حجه دقيقه .. دقايق مدي شطكطك ، ورجعهم كبالي ، حجه بيهم ذره بثل مال جاي ..

مديت ايدي اغمس واكل ، خلص و شال المواعين خلاهم على سنك ..

حجه رايح للشغل جوز اتاخر وره ال١٢ اي شي تردي اتصلي عليه لو على واحد من الولد سيفت ارقامهم عندج ..

تمام ..

راح بدل وطلع واني مشيت ارتب بالغرفه ، توجهت البس عدسات ، فتحتهم كوه مروه يله دخلت اليمنه ..

اما يسره لا الحمدلله ماتعبتني ، اسمع صوت امير يبجي عرفت كعدت ديما ..

غيرت ملابسي وطلعت ، لكيتها تحجي و عصبيه .

حجيت شبيج ..

تعاي الله جابج لزمي داحمي الماي اله واسويله ممه ، شلته كووه ثكيل ، هو خطيه جن متوجع ..

منا نوب مريض ، حجت وهيه عصبيه ، هذا ياهوو شامر ماعون الزبد بالسنك ، رفعت حواجبي شدراني ..

-حجت ياااا هذا يازمال مفرغ المرهم مال الطفح جلدي بالماعون ..

-ضحكت اني يااا صدك عود ..

-ردت ماكو غيره الارعن عواد من يسكر كلشي يسوي والله اتوقع منه كعد ياكل بيهم باليل عباله اكل ..

-وانتو شكو خالين مرهم  بالثلاجه ..

-غير مكان بارد هو يريد مكان بارد وين نخلي …

-مسكين هالعواد  اذا صدك ماكل منه ..

-عمي هذا مو عواد هذا كوووا* كووا* 

ههههه ، كملت ممه لابنها واخذته تنومه ، شوي ورجعت خلت ريوك ، كتلها اني ماكله ماريد .

بيبر مارجع على الغده بس عواد رجع ، جلب يخوط ويلوط بالبيت ماخذ راحته ساحته لوحده ، 

مره كاعدين دنسولف اني وديما و جلب يركض جوه رجلينه يلعب لوحده بطوبه الصوف ، اجه الكوا* على كولت ديما ..

 عثر بي و هفه دفره ، بس اسمع عيطه الجلب متألم ..

كمت لحيلي خايفه، صحت شبي رد ياقندره فالت هالحيوان بالبيت شنو مفتحين حديقه حيوانات احنه ..

-رديت حيوان شبيك وياه خطيه ..

وخري من جوه رجليه لا امرده الج والله هذا عايزني انا ، فوك علتها علينه ، وكفت جامده اخاف اجادله لايضرب كلشي اتوقع منه ردت ديما دوخر عنه حرام عليك ..

نطا دفره و دفعه عليه دنجت اني اتلمس بالارض اريد اشيله ، لمحت بياض و صوته خانس ، مديت ايدي وشلته ..

صعد لغرفته يحجي ويغلط مايستحي ولا يخلي خاطر لاحد ، 

من اجه بيبر ماحجيت سكتت ، خفت احجي وتصير مشكله بسببي وهم ياذيني ،  من يومها الجلب يخاف مجرد مايسمع صوت عواد ينهزم ..

ضل تقريبا يومين يتاخر وره ال١٢ ؛ اساله يكول شغل ..

حتى عواد هم ، شلون اعرف شغل مضطرب وماماشي على مزاجهم ..

من عواد من يصير عصبي ويكضيها بس عرك لو يضرب ديما لو يتعارك ويه شباب ستار لو بشار ..

يمشي ويعارك ذبان وجهه ينكلب ثور البايسون علينه ، على كولت ديما مو عواد كوا* هذا …

بيبر مايبين عليه يبقى هادى بس يبين على صوته التعب والوجع ..

اول يوم ماحجيت وياه عفته على راحته ، ينام بحظني بس احس بي مفتح عيونه ، من عدا فزات جسمه باليل ، امد اصابعي على رموشه اتاكد نايم يطلع مفتحهم يضل يرمش ..

يرد فد يوم تفكسين عيوني بهل حركه انتي اساليني نايم لو لا ، ترى ارد عليج الله وكيلج ، رجال رايد عيوني اني يفيدني ترى اثنينه مانشوف ترى صعبه ..

-هههه ، عبالي نايم ماحب اسوي صوت ازعجك ..

-شلي بالنوم وضوه الكمر كبالي .. حظنت راسه لصدري انفاسه دافيه لفحت ركبتي  ونمت ، 

فتره وبلش الوضع يسوء ، يطلعون الصبح يرجعون باليل و اغلبهم ضايج ..

فد يوم وكفت انزع العدسات لان عيوني بشلت تحركني وصار فوك ست ساعات لابستهم ..

انفتحت الباب ودخل هو ، من صوت حذاءه عرفته..

-حبيبي …

-ها هاي اني ..صوته مضطرب و حزنان ، 

وكفت اديه جنت دانزع بالعدسه ذبيتها بهدوء و كفت ، درت عليه بيبر شبيك ..

رد تعبان شوي ، حجاه بحه زعل و بهدوء مفرط بي نبره من الملل و يأس .. 

عقدت حواجبي ، جر نفس ذب نفسه على شالوزي بالغرفه بتعب ، حجيت شبيك زعلان ..

-شدراج ميرال حبيبج ضايج ..

-ابتسمت ، رمشت بهدوء ، يمكن زعل الوجوه تكدر تخفي عني ، بس زعل الي بالصوت ماراح تكدر ..

-تعبان لايضل بالج ..

-الحزن طاغي على تضاريس صوتك بيبر ..

-تافف ،  يجر نفس بتعب ..تعاي هناا بحظني ..

مشيت كعدت بحظنه جسمه حار ، حجيت مصخن شنو ..

-رد لاا ..

-شميت بي ريحه غريبه شنو هالريحه ..

-نركيله ..

-عقدت حواجبي ماعرف شنو بس غريبه ، كانو فعلا دخان …

-عرفت بعدها عنده سفر وشغل بالخارج ، خارج القطر ، حجه كم يوم وارجع ، ماتاخر ..

-ليش ماتاخذني وياك ..

جوازج ماجاهز ، و صراحه اخاف ازوره لان اذا انلكف بالمطار نتعرض لمسائله قانونيه ماريد ادخل بهيج معمعه وياي انتي هم ..

سكتت ضايجه ، تقرب حظن خدودي كم يوم وارجع ماتاخر وافتح وياج كام طول اليوم شكلتي ..

-خلي يروح عواد بمكانك ..

-مستحيل ماقبل يدمرلي شغلي هذا مايتحمل حجايه ومتسرع حيل …

سكتت تمام ..

وراها بكم يوم .. وكف يحظر جنطته ، ياست انو يغير رايه وياخذني ، دنجت شلت الجلب من الارض وردت اطلع ، 

حجه وراي ميرال خالتي راح تجي هنا هيه ورجلها بين مارجع تمام ..

هزيت راسي .. مشيت طلعت للحديقه ذبيت جلب بالارض لزمت الحبل مالته هو جرني للكراسي ، اسمع صوت شباب بالحديقه سولفون ، تقرب مني بشار حجه شلونج كناري ..

-زينه وانته ..

-بخير ..

سالته :- شبي بيبر ضايج ..

شغل الزلم  دومه متعب ، النسوان الحلوه شلها بي و تسال ..

-شكد مكار انته يااخي الله يعين مرتك عليك ..

-ضحك ، حلو جلب مالتج ، بس ليش يعرج خطيه واكعه عليه انتي وماردته ..

-ابتسمت لا هذا عواد مره ضربه دفره ..

-ضربه الله كون حتى الحيوان ماخلص منه ..

هزيت راسي شسويله ، هو راح يروح ويه بيبر لو يضل -هنا ..

-ماعتقد يروح لان لازم واحد يبقه هنا يلزم شغل ورانه خما كلهم يسافرون ..

-منو يسافر غير بيبر ..

-عدي و دانيال و ستار ..

- وانت شوكت عرسك ..

-من تحن عليه مره واهلها ينتضرون تتخرج ويله ..

-الله يسعدكم يارب ..

-اشكرج .. هاج علج تردين ..

-مديت ايدي اخذته منه ،  كعدت الوك بي ، صاح واحد على بشار ركزت بالصوت عدي يكله تعال هنا رايدك ..

عن اذنج يابه ، ابتسمت الله وياك .. كعدت لوحدي ، اسمع بيبر يحجي وياهم يكله خلي جنط بالصندوك ، وكملي الاوراق حتى العصر نطلع ، لكت بالعلج بهدوء مركزه باصواتهم ..

تقرب عليه واحد ، صوت بيبر يكلي تتعشين بره لو يم  ام زياد نروح ..

بكيفك …

وكف قريب مني نروح يم ام زياد هاا شكلتي .. ردبت اعلج اوك …

مد اصبعه على شفتي تلمسها و حجه شنو بحلج ..

رديت بابتسامه علج ..

مد اصبعه داخل حلكي ديفتحه ، فتحت حلكي وبان العلج ..

مد اصبعه و شاله وخلاه بحلكه .ضل يمطك بي .

عفست وجهي ياااا .. ضحك بس لا تلعب نفسج ..

لا بس استغربت ..

لا تستغربين جرني لحظنه يتلمس ضهري بجف ايده ..

خليت راسي على جتفه شكد اطول ..

ليش تفكرين ، بطلي تفكير ، جاهل اني ..

اشتاقلك ..

لاتخلين حياتج تحيط بس بيه ، شوفيلج شي غيري فكري بي واهتمي لامره ، لخاطرج احجي احب من تهتمين بيه و تشتاقين الي بس اني هم احبج واريد مصلحتج لا تخلين حياتج دور حواليني تردين اجيبلج شي  ، او تحبين تمارسين هوايه كولي تردين اسجلج بجم بكيفج  ..

سكتت درت وجهي عنه ، ماعندي اي طاقه مثل قبل ولا حيويه ، صدك صرت باهته بعد وفاه بابا ، جنت احب النحت وطين وطلعه وطبه هسه لا بس بيبر وبس …

هذا جان غلط غلط فضيع ، حياتي صارت بس اله ، يمكن لو سوت لنفسي شي بذاك الوكت جان كدرت انقذ نفسي ، لو محققه هدف جان كدرت اعيش لخاطره ، بس شمدريني ، شدراني الحيط الي استند عليه ، و كرست وقتي وتفكيري وطاقتي ، حيدمرني بيوم من الايام و يفقدني حتى عقلي ...

تعشينه يم خالته بيومها عرضت عليه اكعد يمهم بين ما يرجع بس رفضت ، اصلا مارتاح .. هم بيناتهم مشاحنات حاليا بسبب ايلاف ورفضها للزواج …

رجعت للفله هو ثاني يوم العصر سافر ، هو سافر منا انجن عواد علينه منا تخبل رسمي الارعن ..

كضها سكر للصبح نوب كل شوي هاجم على ديما يركع بابها افتحي اريد انام وياج ..

ساده باب غرفتي اني ومجفيه شره بس صوته واصل ليمي الله يعينها عليه والله حتى جلب خليته يمي حاظنته هو يرجف خايف من صوت عواد ..

حتى الحيوان خرعه شلون بحال امير هو جاهل ، كل ركعه يركع الباب تكول ثور ، وهيه ترد راح اخابر ذيااب كاافي عاد جننت الولد روح شوفلك وحده من كحا** تكضي اليل وياها ..

هو يرد ، انتي كحب* موجوده ليش اذب فلوس على شنو كاعد اصرف عليج لج قندره ..

هذا الحال باليل يوميه من بيبر مموجود لو موجود الا يخلس ويطلع يبات بره يديح ، وبالنهار ماعرف وين يختفي ..

سبحان كانو شيطان بس باليل يطلع و بالنهار يركد وين ماعرف ..

اجتني ديما حجت اريد اسوك كم شغله تخلين امير يمج بي مااكضيها ..

شكد اطولين ..

ساعه بالزايد ، باعي حظر الج مميه و ماي دافي يمج وحليت واني مغيرتله الحفاضه يعني نظيف مايبجي وشربته دواه مرتاح ، ماراح يضوجج بس راقبي من يبلش يتنحس انطي الملهيه واذا ماسكت انطي ممه تمام ..

واذا بجه ..

مايبجي بس اذا صارت دكي عليه حتى استعجل ..

دروحي بسرعه لا يضوج ، طلعت و بقته يمي ..

خليته على جربايه فعلا ساكت ، شغلت كتاب صوتي وكعدت اسمع كل شوي امد ايدي على رجليه اشوفه خما بي شي ساكت بس يناغي ..

الجلب يمي اسمع صوت تشخط مالته و كلباته بالارض يلعب ، مر وقت فوك ساعه والخانم ماشرفت ، الساعه الصوتيه تحجي ..

قريت كتاب و خواطر ، وذيج ماكو ، طلعت من الوحده الظهر وهسه با٣ ، 

يااا ..

شلت الطفل كلت اطلع بالصاله انتظرها ، شلته و سحبت عصا وطلعت ، وراي جلب يركض جواي لاتوكعني يمعوود ..

دفعته برجلي ابعده ، كعدت بالصاله انتظرها وماكو لاساعه ولا ساعتين ، امير بلشت يتنحس ، خليته على التخم و حاوطته بالكوشات ..

رحت للغرفه جبت اله الممه ، نطيتها اله ،  هو خطيه ماكو اي حركه بس يضوج نوبات يبجي ..

الك الله انته مسكين .. جريت جهاز دكيت عليها خاف سوت حادث هاي ، ردت عليه تضحك ها ميرال خما بجه ..

رديت بستغراب وين انتي ..

-هاا هسه اجي امير خما بي شي ..

-لاابس بلش يضوج نطيته ممه تعاي يله صار فوك الاربع ساعات ترى منتبه  لو لا ..

-هسه جايه مسافه الدرب ، 

سديته منها وحرت بامير ، خطيه ماله حس تقربت عليه لزمته ذب ممه كانو نام ، شلته نايم كلش ، اخذته لغرفتي نومته بالفراش وغطيته ..

تاخرت فوك ساعه دكيت عليه كالت اجيت ، رديت توه كلتي مسافه درب ..

اجيت والله جيت .بس خما امير يبجي .

رديت لا نام ،  ردت خوش لعد بااي ، هاي الحجايه كالتها وغطت من الواحده للسته العصر الهانم يله شرفت اجت تغني و شراعها عالي بعلو سما ..

جنت ضايجه ضووجه ، بس اخاف احجي وتزعل لو انتر ونتعارك ، باين على وجهي عدم الرضى ، احسها تضحك على لو تستغفلني ..

كعدت رجل على رجل وين جنتي ديما صدك تحجين فوك الخمس ساعات و اني ابتلشت بالطفل ..

-مو ساكت ماحجه لو بجه ..

-مابجه لا ..

-مو اكول نطيته مهدى معناها يشتغل زين ..

-فتحت عيوني نطيتي طفل مهدء ياظالمه نفس ، صدك تحجين ..

- ااااي خفت يبجي و تحيرين بي ..

-وين وليتي شنو هالطلعه المهمه الي خلتج تنطين الطفل مهدء حتى تكظيها ..

-كعدت بصفي تضحك ، جنت ويه قاسم ..

-شهكت يااا ديماا ..

-هههه والله بس،شنو من طلعه من العمر والله ، 

لزمت كلبي ارجف :- وعواد ولج لايشوفج يرعطج نصين ماتوبين انتي مو ذاك اليوم اجيتي تموتين بيده ..

-اوو عواد نايم يم الساقط* مالته قاسم جابلي صوره ، مايجي منا لليل ، ويجي يبغج بابي ويولي ..

-وين رحتو لو شايفكم احد ..

-لا جنه بيته محد يندله ..

-بيت منو يمعزايه ..

بيت قاسم  اووو لا تبلشين عليه بمحاظرتج اريد اعيش بس هو لعد عايش ... ابتعدت عني وشالت ابنها حجت تعبتج وياي يكلبي مانسه فضلج ابد ..

طلعت وعافتني بصدمتي ، حتى جسمي كزبر ، لزمت راسي وين وداهم الشيطان هذول لاي مرحله وصلت هاي ..

ماتجرات افتح وياها موضوع قاسم وخفت لا بيبر يعرف وهم يكلي انتي مو تعرفين ، بس ضليت لازمه كلبي لا فد يوم يجفت عواد عليها يكتلها خلاص ..

عبالك اني مسويه الجريمه مو هيه ، اتكبب من اسم عواد وصوته عسكها هيه وكانو تعودت على الكتل  ، استغلت فتره غياب بيبر ،  وسفر مايعرف شيصير مايصير هنا ..

وعواد مايلفي بالنهار ، تذب ابنها يمي وتروح اني ماكدر اكول لا ...

اضل بس ابالع بريكي تاكلني اكل بالسانها ، صح يبين عليه الزعل و عدم القبول بس تبوسني وتكلي ادعيلي اعيش حياتي مثل الناس ،  انتي اكثر وحده تحسين بيه وشفتي شنو عايشه لاصفين وياهم علي ..

ارد هذا غلط واذا انلزمتي محد يخلصج بس ربج ..

ماخذت بالحجي ابد ، شكد حجيت شكد نصحت شكد حذرت بس للاسف ماخذت بالحجي تالي اندفع ثمن هالاغلاط غالي وغالي حييل …

ثمن انحفر بذاكرتته لحد هسه …

اكثر من اسبوع غاب بيبر ؛ سالت شوكت ترجع يرد حسب جوز باجر وجوز اسبوع جاي حسب ..

تسالني ديما شوكت يجي ارد ماعرف ماحدد بس باين يتاخر، ابو حمد ومرته هم مستلمين التنظيف و مسواك و حتى نوبات طبخ يوصلنه من ام زياد جاهز ..

هيه دايره البيت هنا رغم ما ساكنه فله ذيج ، حتى رواتب الحرس هيه مسؤله عنها ، رجلها يجي بس يشرف و ينطيها خبر ، تحسه رجل كرسي مو رجال طول بعرض ..

ام الانه هيه ، الحجايتها تجي بعد حجايه بيبر ماتنكسر ، الكل يعرف بهل شي و يخاف منها وخاصه بغياب بيبر ، محد يكول الها لاا لان ينكسر ظهره ماترحم بي ابد .. بنتها مارحمت عاد بهذول مساكين عايشين على رواتب تنطيها الهم  ..

فد يوم راحت ديما و غطت هم ، اعرفها راحت اله بس من سالتها وين حلفت طالعه تشوف صديقه الها ، 

سكتت ، خليت الطفل يمي بالغرفه ومددت يمه ، الجلب بره بصاله يلعب اسمع صوت نبح مالته .

دقايق من طلعتها سمعت صوت سياره صفت بره ..

كمت بسرعه عبالي رجعت ، حجت ديما هاي انتي ..

طلعت فتحت باب الغرفه ، حجيت ديما ، صوت كحه ..

ركزت بيها جن عواد ، هذا شجاب ..

رجعت للغرفه ركض و كفت بيها ، دخل يشحط برجله ويغني ، كبل قفلت الباب ورجعت ليوره خفت منه نوب وحدي هنا ..

تذكرت ديما صخام ديما نوب مموجوده اذا عرف شيسوي ..

التفتت على امير اذا بجه انفضح والله توصل السالفه لبيبر و هيه تنحط و تنضرب ..

رجعت كعدت يم امير اكل بروحي …

جلب بره ينبح و هذا يغلط على منو مادري ، وكف بصاله يصيح ياخر* وينج تعاي لمي جلبج ..

ماطلعت ضليت افرك باصابعي ..

ثواني ونهفت الباب دفره فززني طفل كعد مخترع يعيط من صوته خايف . .

صاح مو وياج يالعميييه ..

خليت اديه على اذني انركعت الباب مره ثانيه و امير يصرخ ، مديت اديه رفعته من جربايه اسكته ..

حجه ديمااا كولي لهل عميه تسكت حيوانها اريد انام …

ماطلعت اي صوت هو انجن بس اسمع ركع بالبوب وجلب ينبح مايسكت ...

ثواني مو اكثر من الصوت العالي ، الجلب عاط وفجاءه خنس …

ذبيت امير الي يصرخ و وكفت يم الباب ، اخاف افتح الباب ويدخل عليه ، عواد بعده يغلط ، ثواني مو اكثر و اختفه صوته ..

امير طرشني بجيه ..

اتجهت للموبايل دكت على ديما ماترد ..

انحصرت حصره كعدت ابجي خايفه صحت على جلب ماكو صوت ، عواد صوته ماكو ..

فتحت الباب مديت راسي هدوء بره بس امير يبجي ، عفته  وتوجهت لبره اجيب جلب وارجع بسرعه ..

طلعت اتعثر ماده اديه اهامش ، طخت رجلي بشي ، نزلت اديه ودنجت ..

دشوفه هو لزمت شعره ضحكت وينك خرب مرعوب موو ، حتى اني انرعبت منه خرب بليسه ..

داشيله ماكو حركه ..

هزيت هي يحلو ، ماكو يطوطح بيده ..

تلمسه شبيك مديه ايدي لان رطوبه من يم راسه ..

شبيك هاا شبيج تلمسته ومخترعه شنو هاي شبيك رفعت اصابعي لخشمي ريحه زفره فكيت عيوني ياااا يما ..

شبيك هزيت شبيك .. ماكو حركه عطت يماااا ، شبيك اكعد ..

امير بعده يبجي ، شلت وكمت ابجي ديماا ولج وين رحتي ، نوب لوحدي ، طلعت كبل للحديقه ، عثرت  بعتبه الباب زجاجيه وكعت اني وجلب على وجهي ..

دم والله فياض صرت كبني رطوبه ..

عطت مخترعه يماااا يااربي دخيلك ، شلته كوه حاظنته لصدري ، وتوجهت على الحديقه اريد الحرس يجون لان فلت الوضع من ايدي ..

حتى نسيت الباب باي اتجاه كعدت بالحديقه ابجي وصراخ امير جوه واضح يوصلني  ، هذا جلب مايرضه يكعد احس فضت رطوبه منها  لزمت راسه ينكت دم والله ..

رفعت اديه مقابل عيوني حمر ، هزيت اكعد الله يخليك شبيك …

صوت اجاني ميرررال شبيج . شنو هالدم ...

#يتبع ....

وره رمضان ان شاء الله يرجع النشر مثل قبل ..