رواية كان صديقي الفصل السادس عشر 16 - بقلم Shaqraa

فتحت عيوني متعجبة. كال: ترى شفت البنية من أخذته مو غبي اني، وأصلاً اني جانت نيتي أحبلج. عبالك بس أخذج معناها ضمنتِج؟ لا هالشي مقابل كرهج الي ميجيب نتيجة، لازم أتبع أسلوب أقوى. صكيت أسناني بقوة، قلت له: بلا كرامة أنت، بلا كرامة! ونزلت بسرعة وطقيت الباب حيل. رحت مباشرة للحمام مالت الكلية. سويت الاختبار، بس بثواني النتيجة بينت!

أباوع خطين واضحات. رحت أقرأ بالتعليمات أريد أغالط نفسي. أرجع أباوع للخطوط، ما أريد أصدق. يعني هسه اني حامل! ومنو أبو الطفل؟ قيس! قيس يصير أبو أطفالي! شلون راح أعاشره وأتحمله؟ اني ما أطيقه، ما أريده. بس بعد ماكو فايدة من الكلام. الفاس وكع بالراس.

ذبيت الاختبار بسلة المهملات وطلعت. بس ما أريد أداوم أو أشوف أحد أبداً، مالي خلق. طلعت برا الكلية. هواي سيارات صافة كدامها، والطلاب تجي وتدخل بسرعة لأن جو بارد. بقيت أمشي وما أدري وين أريد أروح. أفكر بالطفل الي يجي شنو ذنبه، أمه وأبوه هيج ممفاهمين شلون حيتربى. يمكن الي يسمعني يستغرب يكول المفروض أخاف قيس يتركني وانفضح أو يغدر بيه. بس اني أعرف قيس ما يسويها أبداً. أعرف ما يتركني. ماكو مفر من قيس. أباوع اني وين؟

اوف واصلة لنهاية الجامعة ومامنتبهة. بقيت محتارة ما أريد أرجع للبيت ولا أريد أداوم. أحسن شي أروح للشركة وأبقى بالمكتب أرتاح وحدي. بقيت واقفة، ردت تكسي، شوية وأجه وصعدت. وصلني للشركة فتت. سلمت ع وائل وفتت للمكتب، سديت الباب وتمددت ع القنفة. غمضت عيوني لأن أحس تعبانة من كلشي. لحظات وانفتح الباب بس بقيت مغمضة، لأن أعرف قيس هو فات. تقرب مني لزم كتفي ندهني بس صوته ضايج مو نفسها نبرته المعتادة. قال: مروة حاجيني شوي.

جاوبته واني مغمضة: شتريد؟ قال: بيج شي؟ تحتاجين أخذج مستشفى لو للبيت ترتاحين؟ قلت: لا بس متضايقة وأريد أبقى لوحدي شوي. قال: قبل لا تبقين لوحدج، شلون ترجعين تكسي؟ ليش ماخابرتي واني أجيج؟ قلت: بعد ما كدرت أنتظر، لأن مشيت هواي ولكيت نفسي بعيدة عن الكلية يعني يم السيطرة وهنا ما أكدر أبقى واقفة. قال: وشلون تمشين؟ ما تخافين ع الطفل؟

بعدج بالبداية والمشي مو زين للحامل. وهاي آخر مرة تطلعين لوحدج لو تاخذين تكسي. أنتِ ضامنة الناس ونفسياتها الضعيفة؟ خليها أبالج لو شيصير خابريني واني أجيج. وإذا بالدوام اني أدز لك أحد، مفهوم؟ خلص كلامه، قلت له: اكو أوامر ثانية؟ قال: مو أوامر هاي يا عمري، بس أخاف عليج اني ولمصلحتج أحجي. وأنتِ حامل هسه تحتاجين عناية. قلت: وشنو الي أكدلك اني حامل؟

قال: ضوجتج هسه وشرودج أكدلي هالشي، بس عادي هي هرمونات الحمل تسوي كآبة. أحاول أغيرلج جو وأخفف عنج حياتي. وتابع: ترى مبينة حامل أنتِ لأن صدرج صاير مدبدب هواية. فتحت عيني بوجهه: أنت شنو؟ ما تكلي؟ حتى من أتنفس تعرف ليش أتنفس وشلون، اعتقني كافي... ابتسملي وباسني براسي. قال: أبقي ارتاحي، راح أدز لج ريوك. طلع وسد الباب، اني صافنة عليه. ليش هيج لازق بيه ما يحس؟

لا، وحافظ كل تفصيلة بيه ومنتبه عليها. واني لحد الآن ما باوعت بوجهه عدل. ورا شوية اندق الباب، عدلت نفسي قلت: تفضل. فات الولد أبو الكافتريا جايب علاكة. حطها ع الميز كال: أستاذ قيس دزها. تشكرته وكتله: حطها يمك.

اني فعلاً جوعانة بس أبد مالي خلق آكل. ولو خطية الطفل يحتاج. فتحت العلاكة لكيت بيتزا وماعون مقبلات وبطلين عصير برتقال. أكلت البيتزا، انفتحت شهيتي أكلت منها هواي. ومقبلات هم أكلتهم. فتحت العصير بس شميت ريحته لعبت نفسي عفته. كملت أكل وكمت حميت القهوة. حضرت كوبي واجه قيس فتح الباب ركض عليه. قال: يمعودة شجاي تسويين؟ ما يصير تشربين قهوة مو زين ع الطفل. صفنت بوجهه هذا شمدري بهالمعلومات؟

قلت: أكلك شسالفة معلوماتك مالت وحدة مخلفة خمسة؟ باوعلي مبتسم. قال: لا، اني خلفت وحدة وشيبت قلبي مو بعد خمسة. بنيتي أنتِ. بس حبي من نويت أحبلج كعدت أبحث وأشوف ولكيت هالمعلومات من ضمنها. اشربي نسكافيه قليل ما يأثر، هسه أجيب لج. راح جابلي نسكافيه وطلع. شربتها وكعدت صافنة ودايخة ومتوترة، إحساس معقد كلش. بقيت لنص الدوام وكتله: تعبانة وصلني للبيت. رجعني ونمت كبل، الظاهر حملي يحب نوم لأن صايرة بس أنام.

خلص الأسبوع واجه يوم زواجي. هه هم أعتبره زواج. متزوجة واني حامل! لا كلش حلو زواجي أصلاً مهيب. بالأول جنت ما مهتمة بالتفاصيل بس من تذكرت جراح حيوفني ردت أقهره. طلبت من الماكييرا تخلي شعري نازل لأن جراح جان يعبد شعري. وقيس هم كلش يحبه دائماً يكلي: شعرج أشوفه أنسى همي.

سوتلي تسريحة بس كلش نازكة والطرحة لبس طويلة ثبتتها عليه طلع فد شي مميز. ومكياج برزت عيوني ورموشي حيل وخليت عدسات أزرق. وحمرة وردية يعني شغل مرتب وجذاب. البدلة جابها صديق قيس بس فعلاً تحفة قليل بحقها هالكلمة. ضخمة ضخمة إلى درجة. تترس المكان بضخامتها. بس شكلها يجنن يعني كل الشافها انبهر منها وصفن عليها.

منفوشة هواي من جوا ومن فوك ردان طويلة بس عبارة عن كيبور والنقشة مالته فراشات وحدة لاصقة بالثانية. والصدر شلون وسط الفراشة مخصر ومن النص مثل المنكمش. والي كامشة ألماسة حمرة بحيث منظرها ع صدري خله الناس كلها تحط عينها هنا. خرب يومك قيس ع هالدكة.

من دخلت، الحضور كلهم صافنين مدري ع قيس مدري عليه. قيس من شافني ضل يحوس جنه دجاجة تريد تبيض ع كولة أمي. بس ضاج من العدسات يكول أحب عيونج أكثر. كعدت وطلع قيس شوية ودخلوا جراح وياسمين. اني لبست بوليرا وبيها شال ملتصق بيها، هي وي البدلة مسويها. أباوع شلون يمشي وياها ولا كأنها مرته أبد. وهي ناعمة خطية وغرقانة بالبدلة. صارت عينه عليه. مثل النايم ويذبون بوجهه ماي بارد هيج ردة فعله. أجوا كعدوا وهو يهز برجله. شوية وطلع واجت أمه بوستني وسلمت عليه. وسلمت ع أهلي.

وبدت المراسيم ودخل قيس، رقصنا وقطعنا الكيك وأخذنا صور وراح. وراها فات جراح وهم نفس الشي وي كل تصرف عينه عليه. خلصوا وياسمين أشرتلي من بعيد تريد تحاجيني. كمت اني رحتلها وجراح كام سلم عليه وباركلي. قال: شلونج مروة؟ انشالله بخير. قلت: بخييير شكراً. قال: ألف مبروك وانشالله تكومين بالسلامة. جاوبته: شك... صفنت شنو أكوم بسلامة! عافني مشى، كعدت يم ياسمين مسطورة. معناها جراح يدري اني حامل!

يعني قيس حاجيله معناها علاقتهم تمام وكلشي يحجون ومحد أكل الطعم عيري. كعدت يم ياسمين خايفة وترجف. قالت: شكو شبيج هالكد خايفة؟ قلت: مروة جراح اني خايفة كلللش جراح عصبي وما يتفاهم. قالت: هسه شمدريج عصبي؟ وبعدين أنتِ مو عليج الشهرية؟ قلت: لااا، كَلولي شربي حبوب وراحت. وخايفة كلش منه. قالت: يمعودة عادي أصلاً ما يأذي مثل ما يكولون، صدكيني بسيطة. قلت: أه هيج تكولين؟ زين شعرفج؟

قالت: صديقاتي يسولفن يكولن ما تحسين بس لا تقاومي وخليه براحته. قلت: ماشي ما أحجي شي أخليه براحته. أباوعلها طفلة وترجف ومحتارة بزمانها وأمها حامل بطنها لخشمها وملتهية تسولف وي الناس وعايفتها.

بعدها صارت الزفة وودنا نفس الفندق. أول ما سدينا الباب قيس حضني من ظهري. ما أصدك عبالك. ضل يتغزل غزل يذوب الحجر بس اني ما حرك بيه شعرة. كعدني وجابلي الأكل يمي. أكلت شوي. وكمت غسلت وردت بس أنزع البدلة لأن ثكيلة. طلعت ثوب طويل وربع ردن أسود. شافه قيس اعترض. ويريد ألبس سيت النوم الي عاجبه وجايبه ع ذوقه. مصدق نفسه عريس كلش. بس كلت مدام يسولف لجراح إلا ألبسه أريد أحرك قلبه.

اني لبست السيت وقيس ثار. ضل ما يشوف طريقة ما يعرف منين يلزمني. ويتفنن بالحركات والتصرفات واني دمية بإيده. أبداً ما حسيت بشي. أحجي وي نفسي ليش يموتون نفسهم ع الزواج وع العلاقة الحميمة شكد بطرانين. أصلاً مالها طعم وبس ودي تخلص. أما قيس مثل الي التقى بحبيبة من بعد سنين طويلة. باسني من كصتي لحد أصابع رجلي. بكل مكان وبكل شبر بقى أثر.

تقربلي بكل إحساس واندماج كأنه مخدر. ومن خلص تمدد يمي ويتغزل ويلعب بشعري. ويرجع يتقرب مرة ثانية ونفس الحماس والرغبة. أما اني أكتفي بس بالصمت ودموع تنزل بلا ما يشوفها حتى لا يكول ذلني. طبعاً خلص وتمدد يغنيلي ويبوس بأصابعي. **يا صايغين الذهب حبيت أدللها** **شوفولي خاتم حلو يستاهل أصبعها** **مو بس حبيبة عمر تستاهل عيوني** ويلحن بيها هو صوته حلو. شوية وكام يريد يتقرب وهم يبوس ومعنا صوت الباب يندك.

غلط وكام ضايج: هسه وكتكم. لبس الروب مالته وفتح الباب. سمعت صوت جراح. قال: ها قيس ولو أزعجكم هسه بس إذا تكدر مروة تروح يم ياسمين. قال قيس: أي هسه أشوفها سلامات خومابيها شي؟ قال جراح: لا ما بيها. قال قيس: ماشي نلبس ونجي. قال جراح: ولو جيتك كلش طايح حظها ضيعت علي ضربة جزاء ههه. قال قيس: آسف لعد. أجاني قيس كال: شوفيها خطية هاي صغيرة.

فتت سبحت بسرعة وطلعت رحنا ودق قيس الباب. طلع جراح ورا شوية فتح الباب بس مبين لبسه مبهذل يعني ع سريع. كله قيس: تعال لغرفتنا وخليهم وحدهم. طلع جراح واني فتت لكيت ياسمين بزاوية الغرفة متكورة وتبجي. تقربت منها أباوع جسمها مشخط وراسها منكوش وحلكها وخشمها كلهن دم. بس تقربتلها شبكتني وضلت تبجي. قالت: ولج طلع يحب وحدة غيييييري!