رواية كان صديقي الفصل السابع عشر 17 - بقلم Shaqraa

الجزء السادس عشر شفت ياسمين تبكي وتضرب بخدودها: يحب غيري مروة، ما يريدني... حضنتها وأباوع لها، ملابسها مملخة وجسمها مشخط وحلقها مورم، كسرت خاطري، شكد حقدت على جراح. هديتها وبقيت أحاجيها: فهميني شنو صار، بس اهدي وفهميني ليش هيج ضاربج؟ شصار بينكم؟ تناشغ وتحجي، ما أقدر أفهم منها شي أبد. عفتها وكمت فتحت الثلاجة أريد أطلع ماي، شفت بطلين مشروب؟!

أخذت بطل ماي وكلينكس. مسحت حلقها وشربتها ماي وهي ترجف وتبكي. جبت الغطا ولفيتها بيه، وأكو هيتر بالغرفة فتحته. كعدت يمها، شفتها شوية هدت بس بعدها تبكي: ياسه عيوني باوعيلي، هدي نفسج واحجي، أنا أسمعج وأساعدج. وإذا تريدين أبقى يمج للصبح أبقى، تدللين. باوعتلي ولزمت إيدي بتوسل: وديني لأهلي عفيه أبوس إيدج، وديني أريد أبوي... لا لا أهلج شنو عيب هالحجي، ياسه إنتِ صرتي مرة متزوجة. مكانج يم رجلج شلون تعوفي بيوم عرسج.

بس رجلي ما يريدني. كلشي ينحل، وإذا ما يريدج تعوفيه وترحين. تعرفين الناس شتكول عليج؟ يكولون شاف عليها شي ورجعها. ومحد يصدق بيج بريئة، حتى أهلج ممكن يصيرون ضدج. هسه عوفي البكي وهاي أنا يمج ونشوف حل لمشكلتكم. مسحت دموعها وبستها بكصتها، سكتت وابتسمتلي بعيون دامعة: باعي، هو من زفونا ودخلنا للغرفة أنا أبكي وأرجف. شافني هيج كال: شبيج قالبتها عزا؟

ترى ما زافيج لأسد حتى هيج ذابحة نفسج. وأصلاً ما راح أتقربلج، روحي بدلي ونامي وارتاحي. بس أنا ما صدقت، قلت جاي يضحك عليه حتى أقبل. شفته جاب شرب، حاجيتيه: شنو حتشرب بيوم عرسنا؟ ليش هيج؟ إيه أشرب، ما يخصج، كافي روحي نامي لا تدوخيني. زين عوفه وافتحلي السحاب أبدل.

قام فتحه وأنا رحت بدلت، طلعت لقيته يفرك بعيونه، مبين باكي. وبإيده البطل بعده ما مفتوح. أجت كعدت، هو فتح البطل أخذ منه شربة. أنا قلت له لا تشرب، يقولون اللي يسكر ما يحس بنفسه شيسوي، أخاف تشرب وتأذيني. كااااافي شكد تهذين من أنعل أصلج لا أبو أهلج كااااافي... ظل يسب ويحجي كلام عيب، حتى ما أعرفه شنو بس مبين فُشار. أجيت وضربت البطل من إيده وكع. ومع وكعة البطل ضربني راشدي بس افتريت فر من قوته، وكعت على حافة الطبلة.

أجه جرني وشبعني سب وضرب. اكو كيبل شاحنة مال فون أخذه من الميز. وظل يضرب بكل جسمي وأنا لابسة بس هذا. قصدها على السيت الأبيض. كانت لابسة ثوب بيه تعاليك وقصير كلش لحد الفخذ، يعني جسمها كله طالع لهذا متأثرة بالضرب خطية. قالت: يضرب ويصيح "ما أريدج، مكانج مو يمي، المفروض هي بحضني هسه مو إنتِ". وقتها عرفت يحب وحدة، حلّفته: بداعتها إذا تحبها صدك عوفني، راح أموووت... وقتها عافني وقام يفرك بوجهه ويستغفر. كال:

راح أصيح مروة يمج. قلت له: إيه عفيه صيحها. بس من طلع ورجع متخبل. فتح الباب، باوعت له: لعد وين مروة؟ ظل يسب بيج وجرني للجرباية. خفت أكثر وأعيط به: عفيه لا تسويلي شي. لزم وجهي حيل وكال: أنا ما ناوي آخذج بس بعنادها إلا آخذج. لج أنا محترك حرك وهي ناااايمة جواااااه! لج ما كفاها عافتني وراحت له باااعتني! حبلت منه قبل لا يخطبها وهسه نايمه بحضنه! كانت بوسة ما تخليني أبوسها بالوقت اللي تطلع وياه وتنام وياه!

أكرهها أكرهها وأعشقها، أريددددها تعرفين شنووووووو؟ ما أعرف شنو مسويتله حبيبته، خاينته يمكن وطلع حركته كلها بيه. قلت له: هسه شتريد أسويلك بس لا تأذيني عفيه، أخذني قابلة بس لا تضرب. باوعلي كال: شوفي، خلي حلقج يم أذني وهمسيلي: "جرحي مشتاقتلك أريدك أنا ميما مالتك". بقيت أهمس له هيج وهو غمض عيونه وأنا أهمس له، حسيت صار هادئ وباس رقبتي. أنا ميتة بدمي بس أخاف أرفض ويضربني. إلى أن أخذني وعطت قوي. حسيته مثل اللي فز من

صفنته ولطمني على حلقي حيل: طااح حظج شبييييييج! قام وشمرني بالأرض. جاب البطل ويريد يشرب وإنتوا أجيتوا. يعني هو إذا يحب غيري ليش تزوجني؟! الله ياخذج يا ميما مدري شسمج ويدمر حياتج مثل ما دمرتيني! أباوع لها وفاتحة حلقي. مدري على الكلام اللي قالته "محبلني قبل الخطوبة وأنا عايفته ورايحة لقيس! ليش جراح هيج يكول ويذب السبب بيه؟؟ لو أصفن على دعواتها عليه ويمكن تصيبني. لأن طفلة ومظلومة وتأذت وانهانت بسببي.

حاجيتها وبقيت أقنع بيها "هو أكيد فترة وينساها. بس إنتِ صيري شاطرة وطيعي ولا تجاوبي من يعصب. وهو شوي شوي ينسى وأكيد راح يحبج، إنتِ حلوة وصغيرة". قومتها للحمام، ملابسها بيها دم، فوتتها للحمام. فتحتلها البخار وقلت لها "اسبحي هسه ترتاحين. وإذا عندج كريم حتى أخلي لجسمج". قالت "ما جايبة وحتى ملابس بس هاي اللي علي، ما جبت بس مالت الطلعة". أوكي أروح لغرفتنا أجيب لج ملابس وكريم وأجي. وراح أخلي جراح يم قيس ما يجي هنا اطمني.

رحت لغرفتنا، دقيت الباب وفتحته. لقيت جراح متمدد على الجرباية مالتنا وأنا ملابس بالأرض، يبووو يا فشلتي! باوعلي، يمكن نظرة تمني، ما أعرف هيج حسيتها. سألته: قيس وين؟ فات للحمام يسبح. آها. عفته ورحت أخذت الثوب الأسود أنطيه لياسمين. أجيت أطلع كال: آسفين لأن زعجناج وقطعنا عليج أحلى ليلة بحياتج. درت عليه رافعة حاجبي، هذا شنو يستهزأ. ما صار شي عادي. باوعلي ومبتسم صفح: إيه طبعًا عادي إذا هو شابع بيج ومحبلج.

فتحت عيني متعجبة، هذا ليش هيج يحجي مو تركني بإرادته؟؟ قلت له: جراح ارحم ياسمين خطية طفلة ترى. طلعت وسديت الباب بسرعة. رحت للغرفة مالتهم لقيتها بعدها ما طالعة. دقيت الباب أتطمن عليها خطية. قالت "هسه أطلع مخلصة". لميت الأغراض وعدلت الفراش وكعدت مصفنة على اللي صار، ما أقدر أجمع كلش. وكلام جراح يدق براسي. طلعت ياسمين، أنطيتها ثوبي، لبسته يخط بالأرض طويل وعريض. ظلت تضحك على نفسها! وهي توها ماكلة طن ضرب. شكد فطيرة بريئة.

أجت كعدت يمي وتسولف شلون خاطبها جراح. تصير بنت جندي صديقه وتكول كلشي صار بأقل من أسبوع وفجأة. بالبداية ما موافقة بس أمها مقنعتها. رغم حالتهم زينة وما مجبورين يزوجوها. بس بعد عقليات جاهلة. رغم أهلها بعدهم شباب ومعاصرين الأحداث اللي تصير من وراء هيج زيجات. يا ما خيانة أو انتحار أو قتل أو هروب أووو... لأن البنت بهيج عمر عقليتها رخوة. ومزاجها متقلب ومتطلب، تحتاج تدلل وواحد يحتويها. مو تنضرب لو تتزوج.

المهم مشى وهي تسولف، باوعتلها غفت. دلت غطاها، ودزيت لجراح مسج: أنتظرك بغرفتكم عندي كلام وياك.

يمكن ثواني وانفتح الباب. أنا طلعت كعدت بالصالة أو ممر يصير قبل الغرفة، لأن هيج غرف العرسان عدهم. غرفة وبيها ملحق أو صالة صغيرة. دخل جراح، أنا كاعدة ولازمة بطني لأن لزمني مغص كلش زعجني. بس فات شلت إيدي بسرعة، ما أردت يشوفني. بس طلع شايفني. قمت وكفت، باوعلي بنظرة تأمل. مثل اللي جان مسجون بغرفة ظلمة ومن يطلع يخلون كدامه مراية. هيج وكف يتأمل بشكلي. كال: استريحي. كعد كدامي، أول شي سأل: ليش لازمة ببطنج؟

مريضة لو الحمل متعبج؟ لا هيج مغص خفيف يجي ويروح. إيه دربالج على نفسج لا تكثرون على كولة رجلج بالجزاءات، لأن مو زين على الطفل. جراح ما يلوكلك هالأسلوب، عوفك منه واسمعني. إييه صح ما يلوكلي ما تتقبليه. يعجبج تسمعيه بس من قيس. المهم أحجي شبيج؟ أنا ما بيه شي بس ياسمين هي اللي بيها. ليش هيج معذبها وضاربها والسبب شنو أناااا؟ أنا السبب! تعرف من حركة قلبها تدعي عليه. شنووو تدعي عليج ليش بلا؟

لأن أنا سبب عذابها، إنتَ ضربتها بسببي. وجبرتها وعاشرتها بسببي. ظل يدخن وينفخ الدخان لفوق وهو كاعد صفح. باوعلي بنظرات مو حلوة وهو يتفحص من فوق لجوا: لا ما نمت وياها أنا. نمت وياج إنتِ. غمضت عيوني سرحت وأشوفج إنتِ بحضني لأن ما أشتهيها أنا. بس من طلعلي قيس وعطرج بيه شميته صعدت رغبتي. صفنت عليه بنظرات استهزاء: للأسف صاير همك كله الشهوة وبس. قمت وكفت بسرعة وقلت له:

ولووو همك الشهوة من قبل بس أنا غبية. ومن شفت ماكو وياي أمل بتقضية رغباتك ذبيتني لصاحبك. أجيت أمشي، سحبني من إيدي. صارت عيني بعينه نزلتها. مو احترام له بس عبرتي خانقتني، ما أريد أضعف وأبين دموعي. عوفني جراح هد إيديييي. دفعني على القنفة وصار فوقي. لزم إيديه اثنينهم وتقرب مني كلش. رفعي عينج بعيني شنو خايفة لو خجلانة؟ أنا أرافس جواه بس ما أقدر أخلص نفسي. أحس مثبت إيدي بمسامير من قوته.

جراااح اتركني حرام عليك أنا مرة متزوجة. ولا تكعد مرتك وتشوفنا بهيج وضع كااافي. إمممم متزوووووجة!!!! خوش يعني وفية لزوجج!! حلوووو. لعد ليش ما جنتي وفية وياي؟؟؟ ليشششش؟ لو بعتي براسي شرف ووي قيس سلمتي نفسج؟ إنتَ شتخربط شبيييك؟ سكران كلامك كله بايخ وماله صحة. أخرببببط مووووو!!!! دفعني حيل على القنفة، تأذى ظهري عطت: وخررر ظهررري أذيتني حرام عليك لا يتأذى ابني... خاااايفة عليه!!!! خايفة على النغل ماااالتج؟؟؟؟؟

كاااافي جراااح كااافي ما خنتك أنا ما خنتك وابني ابن حلال ابن حلاااااال. أنا مرته من حبلت مو بالحرااام مرته. أنا أحبك وعمري ما حبيت قيس ولا حسيت بيه. قيس انجبرت بيه وبس. آها تحبيني ثبتيلي لعد... عوفني كلشي انتهى بعد مو حلالك أنا. طز بالحلال ما أعوفج. تقرب حط شفته بشفتي، سديت حلقي حيل ورفسته بهاللحظة انفتح الباب، أباوع قيس!!! بقلم شقراء (قمر كانون)