رواية كان صديقي الفصل السادس والأربعون 46 - بقلم Shaqraa

بقى رأسه يصب دم، وأنا لازمة الفيل بيدي وأبكي: دخيلك يارب، أنا شسويت؟ هو عافني راح ياخذ كلينكس يخليه على الدم، ويمشي بدوخة ويتوعد ويهدد. غافلته وركضت لمكتبي، جريت الجنطة وطلعت، لاكاني وإيده على رأسه. لزمني ويعت بي، وأنا أدفع بي وضربته بالجنطة بنفس المكان المجروح. هد إيدي وداخ، شفته رجع لزم بالشباك، جان مفتوح ونزلت أركض. جنت لابسة فستان رصاصي بس تلطخ دم من عنده، وإيدي هم كلها دم.

ما عرفت شلون فتحت الباب وطلعت أركض للشارع، جانت المنطقة كلش هادئة، المعروف عن المناطق الراقية الهدوء ومحد يطلع. ضليت أتلفت ما شفت أحد، ركضت بين البيوت حتى أبتعد، أخاف يلحكني. لأن هذا بزونه بسبع أرواح، وإذا لحكني هسه يخلص عليَّ حتى لا أفضحه. كعدت يم بيت جان حلو وجبير وبابه بي درجات، كعدت واحتاريت شسوي وشتصرف. إذا أرجع وتشوفني أمي بهالمنظر تموت، لأن مريضة وتعبانة.

طلعت فوني ردت أخابر قيس بس ترددت، ما ردت يشفق عليَّ، لأن هو مو بحالي ولا أهمه بعد. خابرت على مصطفى، دك هواي آخر شي جاوب. حاجيته وأنا أبكي: مصطفى عفية ألحكلي. جاوبني بصوت مفزوع: شبيج مروة؟ وين أنت؟ جاوبته وأنا أشهك من البجي: عفية تعال، هذا الحجي تحرش بيَّ وضربته وشردت، أنا بالجزائر مشيت عن الشركة وهسه بين البيوت. دقايق وأنا نايم، اطلعي على الشارع العام لتبقين بين البيوت فاهمة؟ أي أي يلا تعال.

وأبكي ونص الكلام ما يفهمه مني. كمت ومشيت لحد ما وصلت للشارع العام، والسيارات تدك هورنات والناس مستغربة من منظري. حسيت نفسي بدأ يضيق وما أكدر أتنفس، بقيت أدعي ياربي ساعدني لا أوقع هنا وأموت، منو يبقى لابني؟ ياربي صح أنا غبية وأدخل نفسي بالمشاكل، بس ساعدني ولتخليني أموت هنا. بقيت أفرك بصدري وأدعي وأبكي. شوي شوي حسيت النفس رجع والألم بصدري خف. جان اكو على الشارع محلات، اكو محل مال ستائر طلع منه ولد واجه تقرب يمي. أنا

مسحت دموعي وخزرته وكتله: شتريد وخر منا. تقرب مني كال: أختي حاجيني خيرج، أحد متعرضلج، لتخافين بس قصدي أساعدج. ما أريد مساعدة، وخر منا معليك بيَّ. أشهك وأحاجي حابسة الدمعة كوة. أختي بس ابتعدي من الشارع، تعالي كعدي بصف المحل، ما أكولج جوا لأن أكيد ما تقبلين. بس هذا شارع عام وجاي تشوفين السيارات والناس شلون تباوع. أحمي نفسج وتعالي بس أنطيج ماي غسلي وجهج وأخابرلج أهلج، وإذا تريدين أوديج الهم بيدي.

باوعتله حسيت كلامه صحيح وتطمنت، ميكدر يسويلي شي الشارع بي ناس. مشيت يم المحل مالته ووكفت، دخل جابلي بطل ماي وكرسي كال استريحي. أنطاني كلينكس، شربت ماي وغسلت ومسحت وجهي وهو واكف مسافة مني. كال: تريدين أخبر أهلج لو أوديج للمستشفى؟ كتله: لا رحم الله والديك خوية ما تقصر، أنا خابرت أخوي وهسه هو جاي. زين أنا باقي هنا لحد ما يجي حتى لا أحد يتعرضلج. مشكور ربي يستر عليك.

بقى الولد واكف مسافة مني وأنا قاعدة وأفرك إيدي حسيتها تشنجت. ورا شوية خابرني مصطفى كال: وينج وين واكفة؟ كتله: على الشارع اكو محل ستائر هيج اسمه. كال: أي عرفته جايلج. شوية وشفت مصطفى وكف السيارة، الظاهر جان بالدوام لأن بالبدلة جاي. ونزل وياه قيس واجو باتجاهي. شفت قيس وياه دنكت، ما ردت أشوف نظراته شنو أكيد شماتة. الولد واكف شافهم اجو باتجاهي وكف كدامهم كلهم: خير؟ أنا كمت من وراه كتله: هذا أخوي مشكور كفيت ووفيت.

كت لمصطفى الولد ساعدني ووكفني هنا، عاد مصطفى وقيس تشكروا منه وسلموا عليه وأنا صعدت بالسيارة. اجو صعدوا وقيس وجهه أحمر دم ودمارات ركبته طافرة، اندار عليَّ أنا جنت قاعدة ورا، كال بعصبية: شنو هالدم هذا؟ شسوالج هالـ... ابن... احجي تقربلج؟ اعتدى عليج؟ أنا زدت بجي وأباوعله شلون مقهور، انقهرت أكثر لأن ضيعت هالحب والحرص من إيدي. هو عباله مثل ما مفكر، جر إيدي كال: فهميني مروة فدوة لعينج خل نفهم. باوعتله ومسحت دموعي كتله:

لااا ما خليته يقربلي، ضربته براسه وهذا الدم من راسه أنا ما تأذيت. أباوع قيس ابتسم ومسح وجهه: أي عفية عليج سبعة عاشت إيدج. لا تبجين كافي، شوفي عيونج انفخت ورموشج ذبلت من البجي. وهذا حسابه يمي إلا أدفعه الثمن غالي. طبعًا جان مصطفى بس يسمع ما تدخل طول ما قيس يحجي. تالي كال: مروة راح آخذج لبيتنا، ما أكدر أوديج لبيتكم بهالوضع، يشوفوج بالمنطقة يسألون قصة. وأمج مريضة ليصير بيها شي لو شافتك. كتله: مثل ما تشوف كيفك.

بقيت ساكتة وقيس ومصطفى ساكتين. وصلت لبيت ليلى، دخلني مصطفى للباب وراح بسرعة. اجت ليلى تركض شافتني عاطت: صخاااام شبيج ولج! كتلها: فدوة جيبيلي ماي أشرب، لتخافين ما بيَّ شي أنا كلشي ما بيَّ هسه أحجيلج. راحت تركض جابتلي ماي، غسلت وجهي وشربت، وهي تفتر عليَّ وتكلي: شنو هالدم؟ منين هذا شبيج ولج فهميني؟ فتحت حجابي ومديت رجليه، وحجيتلها الصار كله. بقت صافنة عليَّ، تالي كالت:

الحمد لله قدر ولطف، المهم ما بيج شي، أكيد هسه يأدبوه مصطفى وقيس. جانت مخنوكة بعبرتها، ما تحملت بقت تبجي وحضنتني. بقت تمسح براسي. كالت: ولج شبي حظج أغبر، المشاكل تركص وراج ركض ليييششش؟ لأن فطيرة وما عندج قلب وفقيرة، أيييي الدنيا تركض على الفقير. حضنتها حيل كتلها: قدر وصار. المهم هسه ما بيَّ شي. بس خايفة لتصير مشكلة بسببي لو يتأذون الولد، بالي يمهم. لا تخافين عليهم هذا شغلهم، معليج خل يأدبوا لهذا الشايب العايب.

خطية كامت جابتلي ملابس وكلتلي فوتي سبحي. فتت سبحت وطلعت لكيتها محضرة أكل، كتلها ما أشتهي. كالت: أكلي وجهج أصفر لتتخربطين. أكلت شوية وهي يمي. كتلها: بلا خابري مصطفى شنو صار خل نعرف؟ خابرته ما جاوب. كالت: أكيد ملتهي، من يفرغ يخابرني. بقيت قاعدة وهي ابنها كعد وجابته يمي ترضعه، وأنا صافنة بوضعي، تجيبني الدنيا منا وتوديني منا. شتريد مني أكثر بعد! صح أنا غلط وصح ظلمت قيس، معقولة حوبته هاي؟ معقولة دعوات أم قيس لحكتني؟

دعت عليَّ كون ما ترتاحين ولا تشوفين السعادة. دعوة أم قلبها محروك على ابنها. فعلًا ما شفت السعادة ولا ارتاحيت يوم. ولو يرجع بيَّ الزمن ما أفرط بقيس على كص ركبتي، بس للأسف راح الراح وماكو شي بالراح. حاجتني ليلى: شبيج صافنة ومحتارة؟ هونيها وتهون. باوعت لليلى ونزلت دمعتي. كالت: كافي ولج شكد تبجين، خرب يومج نافورة مايج ما يخلص. أدري تبجين على قيس مو على الحادث، ترى حافظتج وأعرفج. باوعتلها ومسحت دموعي.

ما يفيد البجي، راح قيس بعد ما يريدني. ضحكت كالت: عندي خبر يطلعج من هالمود كله شنو رأيج؟ دخيلج فدوة ياريت، مو أكلني الهم والحزن. سمعت خبر قيس متخارب ويا خطيبته ويمكن يفضون الخطوبة. هي كالت هيج أنا كمزت عليها وابنها صافن بوجهي يكول تخبلت خالتي. كعدت كدامها: احجييي بالتفصيل، أبوس إيدج عفية حبوبة بس فهميني شنو متعاركين وشوكت؟ أي متعاركين قبل كم يوم، وكال مصطفى يريد يتركها على الأكثر.

أويلي يا ليلو لو تركها ولج، أذبح ذبيحة وأوزعها وأنطي الناس كلها بس أنت أحرمج منها. لا يا ناقصة ليش؟ لأن ما وكفتي وياي ولا ساعدتيني أرجعه. بقت تضحك عليَّ وتسولف وياي. للساعة بالوحدة اجه مصطفى، أنا خجلانة أحجي ويا بعد اللي صار. بس هو دز عليَّ راد يحاجيني. طلعت كعدت يمهم بالصالة، كال مصطفى: الحمد لله على السلامة مروة، خو ما بيج شي؟ لا مشكور أبو جواد عذبتك وياي اعذرني.

أختي أنت عيب هالحجي، شوفي أنا خابرت خالتي وكتلها مريت لمروة لأن عندي شغل قريب من مكان شغلها ورجعت وياي لبيتنا. أي كالت ليلى حجتلي. أي وبالنسبة لهذا الناقص غيرة، حاليًا بالمركز بس يحتاجون أقوالج بالمحكمة. باجر أنا آخذج ونروح الصبح، لازم ياخذ جزاءه وما يعيدها. عزااا يعني أروح أشهد أنا عليه؟ أي تشهدين عليه ياخذ حقه قانونًا وعشائريًا. لااا دخيلك مصطفى، تعرف إخواني إذا صارت عشاير ما يرحموني. يعني تسكتين عنه؟

أي كافي القانون يعاقبه، عفية كلشي يسوون حتى يخلصون مني. أخاف يزوجوني وقيس ياخذ وجد أنا ما أكدر بدونه. بقيت أبجي وأحجي، هو تنهد كال: رح أخليها بس بالقانون وأنا أتكفل الشغلة. لا تخافين من شي، محد يكدر يغصبج على شي أوكي؟ وهسه غسلي وجهج وارتاحي، ماكو شي يخوف. حتى تتغدين ويانا. كمت غسلت ورحت ويا ليلى حضرنا الغدا وتغدينا، ورحت بالغرفة الثانية تمددت رأسي صاير طبل. فتحت الفون لكيت آية حارقة الفون حرك اتصالات ومسجات.

حجيتلها ونزلت سب بيَّ وبي وتكلي فاهية كنالج من الأول. ولطشت بقيس تكلي خايف عليج خطية معناها بعده يريدج. أنت غبية لو مسويها نفسج دايخة حتى يسندج وتتقربين منه. ومزقتني تمزيق، آية محد يسلم من لسانها. كتلها انطيني وجد أحاجي قلبي يمه. حاجيته وكلامه مزج ما ينفهم، كتله بالليل أجي. ختمته وياهم وشوية وغفيت لأن تعبانة والبجي صدع رأسي. كعدت على صوت أذان المغرب، كمت طلعت لكيت ليلى تحط للبلبل أكل. رحت صليت وخلصت، كالت:

بدلي حتى يودينا مصطفى للبيت. بدلت وشوية واجه مصطفى ودانا لبيتنا. أمي شافتني بقت تحقق وياي ما مقتنعة بالكلام اللي كلناه، بس ما أكدر أقهرها ما ناقصها تعب. وجد اجالي يركض حضني فديت عمره. بقت يمنا ليلى لحد الساعة ١٢ أخذها مصطفى وراحوا. كعدنا أنا وآية نحجي بالحادث وأحجيلها شلون خاف قيس عليَّ، وهي تداهرني. خلص اليوم ويوم ثاني أخذني مصطفى للمحكمة. أنا خابرت هشام كتله ما أروح اليوم ما عندي شغل.

أول ما وصلت شفت الحجي كدامي، رأسه مشدود وعينه مورمة مبين ماكل ضرب. ما باوع بوجهي مدنك. بعدين دخلت لغرفة بيها واحد لابس قاط ويمّه واحد يكتب الأقوال. سألني عن الحادث بالضبط وحجيتله. أنا أحجي واللي يمه يكتب. خلصت وأخذني مصطفى رجعني للبيت. أمي عبالها أنا رحت للدوام وراجعة من وكت ما سألت. للعصر خابرني رقم، جاوبت طلع إسحاق. بالبداية اعتذرلي عن سراه أبوه. عجيب هالولد أخلاقه عكس أخلاق أبوه فرق شاسع. بس راد مني أتنازل. كتله:

معليَّ الشغلة بيد رجل أختي هو نقيب وهو تكفل الشغلة واعتبروها اعتداء على عائلة رجل أمن. ما حصل مني نتيجة سد الفون. يوم ثاني خابرت هشام كتله بطلت ما أروح، ضل يعيط ويرزل بيَّ تالي كال طبج طوب، وسد الفون. كت لأمي ما ارتاحيت للشغل بي تزوير وكذا قنعتها. مرت كم يوم هدوء. تحدد موعد محكمة ثاني لازم أروح باجر. جنت نايمة العصر وسمعت صوت أمين يعيط. فزيت مرعوبة عليَّ، دفر الباب الغرفة ويصيح:

اليوم أكتلج وأخلص من همج ولج عاااار، تاليتنا ندخل محاكم وقضية شررررف. اجه عليَّ وخنكني بإيديه الاثنين. ردت أخلص نفسي ما كدرت، حسيت روحي بدت تغيب، إلى أن... اسودت الدنيا.