رواية كان صديقي الفصل الثالث عشر 13 - بقلم Shaqraa

يمه، متشوفين حالي وين أطلع للناس هيج؟ شبيج يا حلاة وهج، تخبلين بس غسلي وجهج وبدلي. كال أمين: روحي حجية هسه تجي وراج. اندار عليه وأشوفه متحمس. كومي بسرعة رتبي نفسج عيب خو ما تبقيهم ينتظروج يلا عفية بويه يلاااا. رحت للغرفة واجو البنات وياي، وحدة تمشطلي وحدة تطلعلي ملابس. كملت ولبست فستان أبيض ومنقط بأسود جابته أمي من الزيارة أمس. شلت شعري بقراصة صغيرة وطلعت.

أول ما فتت باوعتلي أمه مثل اللي يتفرج ع فيلم عرض أول حتى رمشة ما رمشت. سلمت وكعدت، عرفت اللي وياها أخته ومرت أخوه. ظلت تمدح بقيس وهو شافني بالشركة وانعجب بيه وبأخلاقي. بس حسيتها ع أعصابها كاعدة وأخته نفس الشي. كلتلهم أمي نردلكم خبر. ورا ما طلعوا أمين لزم أمي وكعد يحقق. حجتله عنهم كال: ذوله ميتعوضون ناس خيرة والولد شاريها وحالته زينة. فوتيلج يومين وخابريهم كليلهم وافقنا. كلتله أمي يصير خير مانستعجل لازم نشوف رأي مروة.

مروة أكيد توافق وين تلكى هيج واحد شركة ووظيفة حكومية من كلشي حاويها. للمغرب راح أمين وأمي حاجتني كتلها: كيفكم يمه انتو أعرف بمصلحتي. ما كثرت حجي لأن أعرف أقبل النتيجة وحدة ما تتغير. يوم ثاني ما رحت للدوام وراسلني قيس: ليش شاردة من الدوام لازم أكتبلج عقوبة. بس مو هسه من تصيرن يمي أعرف أعاقبج. لبسته ما جاوبت. صار الأحد وداومت بالجامعة خلصت دوامي ورجعت للبيت ما رحت للشركة. برجعتي شفت سيارة أمين بالباب.

دخلت لكيته ياكل بالمطبخ. سلمت عليهم كال: هلا بالعروس شلونج... هههه؟ عروس وشلونج لا هذا محشش يمكن؟ احنا ردينا خبر للجماعة وباجر يجون يتفقون ع المهر وغيره حضري نفسج وشدي الهمة. أي صار. جاوبته بكل برود ورحت. حالياً دماغي فاصل، ما أعرف شنو اللي يصير وشنو حيصير. فعلاً دماغي فصل. سألني ما رحتي للشغل شعجب؟ تعبانة أحس فلاونزا بجسمي. انطوني إجازة. ههه أي بعد رح تصيرين منهم وبيهم ويدللوج. أباوعله منطلق وفرحااان وصاير لطيف!

عبالك ملبسته العار ويريد يخلص مني. مرت الأيام بسرعة وكلشي ع عجل صار. إلى أن أجه يوم المهر. الكل متحضر وفرحان وممصدك. كلها مستغربة شلون مروة بت أم الطرشي تتزوج هيج واحد! فلوس وحال ومال ولحد هسه مشايفي وهيج حاسديني. أجو أهله والدنيا انخبصت ليكول يمشون ع زجاج كد ما يمشون بتعالي وهدوء. من شافوهم زاد العجب أكثر! أمه لابسة قفطان أزرق ومسويه تسريحة وميك آب كامل. بحيث من يشوفها ويعرفها أمه ينصدم.

وهي حلوة إلى درجة لأن هي أصلاً بنت عم أبو يعني أمه وأبوه أولاد عم لذلك جميلين ثنينهم ويتشابهون. أهلنا عافوني وصفنوا ع أهله وذهبهم ولبسهم وجمالهم. وطبعاً محد لاحظ أمه لابسة أزرق نفس فستاني. جان طويل مخصر وبي ذيل من ورا طويل من ظهره كله مفتوح وفيونكة بنهاية الظهر. ومن كدام قصة سداسية ومن النص مفتوح أغلب الصدر يبين. جان مرتب وكشخة كلش. وتسريحة ناعمة مو فخمة ومكياج العيون طوخ كلش بارزات صارن وأني رمشي ثخين صار أحلى.

وحمرة خفيفة يعني طلعت عروسة مميزة حسب ما كالولي. شوية وكالوا رح يعقدون الكم حضروني وأجه السيد عقدلنا وخلصنا. كالوا البنات لبسوا حجابهم لأن حيدخل العريس هه. والصدمة من دخل أشوف الناس صدك وقف على رأسهم الطير! من شدة تركيزهم بي. أمه تهلهل وأخته وياها وهو يمشي بكل ثقة والنسوان كلها لو تنطيهم برتقال وسجين لا مو يكصون أيدهم لا أعتقد يكصون حتى روسهم. أجه كعد يمي وابتسامته شاركة حلقه. المشكلة وجهه مو مكروه ميبين بي الحقد.

جان لابس قاط حبري وقميص أبيض وربطة مخططة. باوعلي من فوك لجوا تفحصني. عض شفته وكال: شنو ولج قالب زبدة أنت مصبوبة صب! منين أبدي والمن أباوع للشفة لل... قاطعته أمه تضحك: قيس فضحتنا جنك مشايف. هاك لبسها الذهب وحتى تقطعون الكيك. لبسني الذهب وقطعنا الكيك وكعد يمي لاطش. أمه تطرد بي وهو ميقبل. كلها شوية وأصرفكم وأني أبقى. هو طلع والنسوان صارن يطنن مثل النحل. لج منين جبتي منين حصلتي. وحدة تكول استحي أباوعله!

وحدة تكول جنه مهند. وآية وليلى وأمي صارن تنانين. يقرن وينفخن ع العالم. مرت هشام ما تحملت بعد. عود سوتها شقى كالتلي: صدك أحسدج عليه هذا منين جبتي جنه موطا!!!! صفنت بوجهه! لعد وأخوي مو حبيتي وأخذتي عشتوا وأنت أكبر منه! أشو ما حسدتج وكتلج أحسدج! هم سويتها ضحك بس ارتاحيت من جاوبتها. عجيب متزوجة وعينها ع رجال ثاني أف شنو من بشر! ظلوا شي تركص شي تاكل إلى أن راحوا وكفت الناس وبقى هو. أني كاعدة ويمي آية تحشش عليه عود تضحكني.

أجه أمين باركلي وباسني ههه لا صايرة غالية أني. كال: روحي يم خطيبج كعدي. أني رايح أجيب عشا وأجي! كلت بقلبي يااابه هيج الفلوس الها مفعول؟ أشو شهرين وثلاثة ما توصل للبيت وتشوفنا شمحتاجين. داومت مدرسة وخلصتها ودخلت كلية ما باركتلي حتى! ولا كلفت نفسك وكلت هاي عشرة آلاف. هسه رايح تجيب عشا ومن جيبك؟ مع الأسف بعد ماكو خوة ولا اكو حنية. المهم رحت يم قيس دخلت وخليت الباب مفتوح. بس دخلت كام. ويباوع بنظرات وكحة.

صار وراي سد الباب وكال: أويييلي لج شنو من جسم هذا. من ورا يكططططع... مد إيده يتحسس ظهري وحاضني حيل من ورا مربطني. وخرررر عوفني أخجل شوية أنت ببيتنا. آخ يابه لو يجي جدج هسه ما أعوفج ويبوس بركبتي ويتلمس بظهري. بس أبد ما حسيت بإثارة أو رغبة كل شعوري جان قرف ما أعرف شنو أوصفه. بس البنية من تصير بيد رجال ويداعبها تحس برغبة بشي. أني ما حسيت هالشعور معقولة فعلاً. لهالدرجة أني باردة!

مرة جراح يكلي أنت باردة شما ألمحلج ما تحسين. حتى بالكافتيريا من حاجاج الولد ما اهتميتي! معقولة بلا إحساس أني. لهذا عافني جراح؟ ايي يمكن يمكن هالسبب عافني لأجله. بس أني والله مو باردة بس قليلة خبرة. بدأ يتجرأ بلمساته ويقرب جسمه ع جسمي. جنت أتمنى بوقتها أحد يدخل بلكي يشوفون حقيقته ويخلصوني منه. هيج جنت أتمنى. جان قيس فاقد أحسه مثل الجوعان وانطو صينية بيها أصناف الأكل. آخر شي دفعني ويعيط انطيني كلينكس بسررعة.

أني اخترعت هذا شبي شلت الباكيت كله وشمرته عليه. شفته نزع عزاااا هذا شبي يبووو شكد ما يستحي. بقيت دايرة وأرجف إلى أن صاح عليه. تعالي بحضني فديت هالطول. لا تبقين ناطيتني ظهرج كلساع ترى أتهور مو تكولين. التفتت عليه بخزرة. شكد عديم أخلاق مو أنت ببيتنا احترم أهلي شوية. جاوب بكل هدوء: أهلج ع راسي بس أنت ما أرحمج. ترى ما ناسي كلمة مو رجال بس مخليها لوقتها. أي وأعيدها عليك مووو... اندك الباب دخل أمين.

وأني بعدني واكفة بعيد عنه وهو كاعد مسرسح وحزامه مفتوح. بس فتح أمين الباب هو نزل قميصه. كال: حنصي العشا تفضل ويانه قيس. ليش تزاحمون نفسكم يمعود. لا بعد أنت منه وبينا يلا مراوي ترى صبوا. أي يللا جايين. طلع أمين وهو عدل نفسه وطلعنا. كعد يم أهلي ومسوي نفسه حمل وديع. يسولف ويتشاقى وهم طايرين بي طير. خلصنا وسلم عليهم وكال: من رخصتج خالة والولد. باجر الصبح آخذ مروة نعقد محكمة. وتتغدى يمنا بالبيت.

كلوله بعد هي حلالك وأمرها بيدك ومن ما تريد أخذها ولا تترخص. ابتسم وغمزلي وراح. رحت سبحت ورحت للغرفة راسي مصدعة كلش مالي خلق الهوا. اجت ليلى تسولف وياي: بعد هو صار خطيبج وزواجكم قريب حاولي تتأقلمين وياه. مبين يحبج هواي والمثل يكول أخذي اليحبج لا تاخذين التحبي. يصير خير ليلى يصير خير. خصمت الموضوع لأن مالي خلق أحجي الدنيا مسودة بوجهي. نمت لأن ضايجة وتعبانة اليوم هواي تعبت. ما حسيت إلا كعدتني أمي:

كومي عروستنا الساعة بـ 8 هم يلا تلحكين هسه يجي قيس. أي أي كاعدة ماما هسه أكوم. كمت أحس جسمي ثكيل من الكآبة والضوجة. سبحت وبدلت كالت أمي تعاي تريقي توسلت بيه. كتلها ما أشتهي كلش. شربت بس قهوة. خابرت البنات ياخذولي إجازة بالدوام. سديت الخط وخابرتني آية. ها حبي شلونج. شلوني يمعودة روحي طالعة. صبري مراوي كلشي مقدر ومكتوب وأنت مؤمنة. لا تضمين بقلبج مو زين عليج. تدرين شوفت صوركم لصديقاتي زين ما أكلت الفون.

يكولن هذا مو بشر كيكة. هه يلا الناس تحسدني عليه وأني مو طايقته. أي محد يعلم بحال أحد خليج قوية ولا تشمتين الناس بيج. أنت ذكية ومو متعرفين تتصرفين. يمكن يطلع قفيص خوش ولد ويعوضج. قفيص شنو ههههههههه خرب يومج. اييي فديت هالضحكة يروحلج فدوة قفيص وأمه الصاكة وأخته المكروهة ومرت أخوه الصاكة. مو عائلة تكول بقلاوة من الخاصكي. هههه دروحي أنت هم. ههه يلا عمري ديربالج ع نفسج. أوكي باي.

رحت للغرفة رتبت شالي واجت أمي كالت أجه قيس. طلعت سلمت عليه من ورا خاطري. طلعنا. أول ما صعدت لزم إيدي. جريتها ما عافها. ظل طول الطريق لازم بيها ويبوس. بس ما حجه شي. وصلنا للمحكمة كمل كلشي دخلنا ع القاضي. ما أعرف شنو جان ودي. يمكن ردت أرفض وأكول ما أقبل الزواج. لو مسويتها شنو جان صار؟ اللي يصير راحتي. الشي الصح اللازم أسويه. أحسن من زواج بالإجبار. حتى يعتبر حرام لأن ما راضية أني. جاوبته نعم وخلصنا وطلعنا.

جانت ساعة عشرة ونص. وصلنا للبيت. بيتهم كلش واسع بس مو نازك. فوتني للصالة جبيييرة كلش. بيها قنفات ماروني وبيج. ومن جهة ثانية ميز صاج باذنجاني جبير وكراسي. حسيت المكان خالي من لمسة أنثوية. أو لمسة أناقة. أعتقد ذوله كلهم ما عندهم ذوق. شوية وأجه جاب عصير وماي وكيك. شربت بس بطل الماي لأن مكبوس جنت خايفة حاطلي شي بالعصير. لذلك شربت بس ماي. خليت البطل وسألته: لعد وأهلك وين؟ محد بالبيت بس أني وأنت زوجتي العزيزة.

طفرت بسرعة وكفت شنووو؟ ليييش وينهم؟ هه بالدوام يعني وينهم مثلا؟ هسه شلج بيهم أني عندج كافي. يابه درووووح. ركضت أريد أفتح الباب قافلة. أففف شلون ما انتبهت أني من قفله. رحت طلعت من الباب الثاني يطلع ع البيت. أجه وراي لزم إيدي لواها ورا ظهري. ماكو مفر حبيبتي أنت قافل الأبواب كلها. تعرفين ليش؟ حتى أشوفج اليوم منوووو مو رجااااال.