رواية كان صديقي الفصل الثاني عشر 12 - بقلم Shaqraa

لا يا ربي شنو بشر هذا؟ من كل عقله يتصرف لو مخه انضرب؟ كتبت له: للاسف جنت احترمك، بس طلعت مو رجال لا انت ولا صاحبك. جاوب: اطلع صدق مو رجال إذا ما أخذتج وغصبًا عنج. عشم إبليس بالجنة لو تموت ما أقبل بيك. ههه، تقبلين يا روحي تقبلين، لو تردين أمين وهشام يشوفون أختهم بحضني وشفتها بشفتي. ودز لي صور من جان وياي بالمكتب، وحدة حاضني ووحدة يبوسني! صخام هذا شلون هيج؟ يعني مخلي كاميرا بالمكتب، عز العزاك الله ياخذك يا حقير.

لك نذل انت بلا كرامة بلا إحساس؟ شلون تقبل بوحدة مغصوبة عليك شلون؟ مدام أحبها يكفيني هالشي، والمغصوبة يجي يوم وترضع. عفته ما جاوبته لأن ما أعرف شجاوبه، يعني لا تفيد رزالة ولا يفيد كلام، واعرف الكلام ما له فايدة وي هالشخص. ضليت أفكر أكلني القلق لحد ما نمت. ورا كم ساعة كعدتني آية: مروة قومي ولج، يمته جاية يمته نايمة. أوف بيش الساعة؟ بـ 1 بالليل آنسة، كعدت مساع ما كعدتي. ها يلا هسه أقوم.

قومي نسوي أكل لأمي وليلى رح يوصلون، خيه ممتغدين ولا متعشين. يالله روحي جاية وراج بس أصلي. قمت غسلت وصليت ورحت للمطبخ لقيت آية تشوي باذنجان، سألتها: شنو حتسوين وياه؟ بعد حميسة أسوي ونقلي بتيتة، وطلعي خيار وطماطة. خطية أكيد يوصلون تعبانين يأكلون وينامون. أوكي لعد. طلعت بتيتة أقشرها، هي اندارت علي تحاجيني: مريو شخبار الشـ... ما كملت كلامها من شافت دمعة تنزل من عيني. اجت لي كعدت يمي. شبيج ولج؟ حسيتج مو طبيعية شبيج؟

باعي عيونج مورمة ووجهج مخطوف شبيج؟ تعبانة آية، تعبانة. لا عيني اكو شي جبير انتِ ما تبكين على أي شي. خل أسد الباب وأحجيلي شكو؟ راحت سدت الباب واجت كعدت قدامي بالأرض. وقامت بسرعة: خل أجيب الخيار والطماطة أثرم وأسمع حتى نخلص بسرعة. جابته واجت كعدت لازمة الخيارة وتحاجيني: أحجي ولج بطيتي قلبي، فضيها. باوعت لها ومسحت دمعتي: لج قيس النذل ما راح أخلص منه، لج يقول هالشهر نتزوج. شنو؟ ليش انتِ ما تعرفين ترديه يولي ياكل تبن؟

لا حبيبتي أختج حتأكل تبن. ليش يعني؟ حجيت لها الصار وكتلها مو بعيد اليغدر صديقه ياذيني. بقت صافنة ما تعرف شتحجي. كملنا الأكل وخلصنا رحنا كعدنا بالغرفة، وحدة صافنة بوجه الثانية. شوية واجت أمي وليلى. حضنت أمي حيل وبقيت أبكي. هي حست بي شي بس اني كتلها مشتاقت لج وبكيت. ليلى حست علي سالتني كتلها بعدين نحكي. تالي نامت أمي وحجيت لليلى بس جان رأيها مختلف كالت: مروة ترى انتِ كارهته بلا سبب. يعني شنو ذنبه إذا حبج؟

مو مهم حبيبة صديقه أو غريبة وما يعرفج، بس هذا الرجال من يحب يفقد. وهو رايدج من أول مرة شافج، معناها مشاعره تغلبت عليه. وكذلك جراح لو حبج صدق ما تركج، وصراحة اني أشوف قيس أولى من جراح. لأن اسمه دافع عن حبه ووثق بيج رغم جنتي علاقة بصديقه وما فكر شنو صار بينكم وما همه. اقبلي بي وابدي من جديد. ههه شبيج ليلى أشوف صرتي بجانبه؟ لا مو جانبه بس وجهة نظري هاي وفكري عدل. عافتني وراحت نامت، بقيت قاعدة للستة الصبح نمت.

يصادف جمعة همزين. بقيت نايمة كعدوني وي أذان الظهر. قمت متكسرة ما بي أكوم وحرارتي عالية. حلقي مطكك حرارة بي. أكلت كوة ومالي خلق. ورا الغدا أجه أمين وكعد يسولف. ويسأل شكد راتبج وما تصرفين وما تبذرين. هه لو يدري رح أبطل يجوز يطردني من البيت. صارت هيج ساعة بـ 4 واحنا قاعدين كلنا واندق الباب. قام هشام واجه قال لأمي: يمه نسوان بالباب يردوج. يا يمه غير تدخلهم أكيد زباين.

قامت أمي شوية ورجعت علينا: قوموا فوتوا للغرفة قوموا نسوان يريدن يفوتن. احنا صار مطافرنا بفلس، شكلنا عبالك جايين علينا كبسة. كعدنا بغرفتنا. دخلتهم أمي واجت. آية يوم جيبي عصير وتعالي، مروة مريضة ما بيها، استعجلي زين. ماشي يمه. ماكو عصير راح هشام بالكوة جاب، لو انحرج من أمين ما يطلع. ساعة يقول معزلين ساعة صبوا جاي. المهم جاب واجه. قامت

آية تريد تحضر واجت أمي: مروة خطابة عليج قومي حضري نفسج بسرعة وجيبي العصير انتِ مو آية. ابن أبو الشركة داز أهله يخطبوج إله. للحكاية بقية بقلم شقراء (قمر كانون)