رواية كان صديقي الفصل الثالث والأربعون 43 - بقلم Shaqraa

الجزء الثاني والأربعون من كال مروى إني جفلت! شنو هالميانة! رفعت راسي باستغراب وباوعتله. كال: اسمج حلو مثل اسم بنتي. اني ابتسمت كتله: ربي يحفظها. بداخلي يمكن هو يتعامل وياي مثل بنته واني فهمته غلط. يلا من حجه ببنته ارتاحيت شوية قل الخوف. تالي كال: تعالي شوفي هالاوراق شلون مرتبين بيها الاسعار والاسماء بجدول. اريد مثل هالشي تسوين. انطاني الورقة شفتها واخذ ورقة وقلم وكال: خططيلي مثلها. خططتله وكتبت،

كال: تمام اريدها تنزل بالحاسبة. طلع من الكرسي وكعد ع التخم الي بالغرفة موجود وكال: اشتغلي براحتج. وكفت اني يم الحاسبة ونزلت المعلومات وطبعتها بالطابعة الصغيرة يمه. شوفتها اله كال: مضبوط خوش شغل. بس مكتبج مابي حاسبة لان ماخذها ابني يفرمتها. كم يوم ويجيبها وتبلشين بالشغل. كتله: اوكي، لعد اني أترخص. كال: لا اكعدي وين رايحة، لازم اعرف معلومات عنج وهواي استفسارات. رجعت كعدت اني من جهة وهو كاعد بالجهة المقابلة الي ويدخن.

طبعًا طول ماهو متواجد بالمكان جكارته متطفى. حط رجل فوك رجل ويدخن. كال: انت شعجب ممرتبطة؟ جاوبته: ما احب احجي بحياتي الخاصة. كال: ماشي ع راحتج. بس شكد صار متخرجة؟ كتله: السنة الفاتت تخرجت. كال: اي امبين بعدج صغيرة وطبعًا انتِ اصغر موظفة اجت النا. الي جانت قبلج عمرها نص الثلاثين. جانت مطلقة وخفيفة بس خوش بنية هي فطيرة. ما عجبني كلامه عليها مهما يكون جانت تشتغل وياهم وعيب هالشي.

وشلون يكول مطلقة باستهزاء. صح اني ما حجيت ولا يدري بيه متزوجة او مطلقة كلشي ميعرف عني. بس انغثيت من كلامه كتله: شعجب تركت الشغل لعد؟ كال: ارتبطت وزوجها عنده مدرسة اهليه وراحت اشتغلت ويا. بس جان شغلها مضبوط وشاطرة كلش. جنت معتمد عليها بكلشي اسافر واتأخر واني مأمن بيها اكثر من الشباب. لان شاطرة وتهتم بالعمل. صفن وابتسم وباوعلي. كال: جانت شاطرة بكلشيييي. اني دنكت كتله: ربي يوفقها ووكفت.

أترخص منك لازم اخابر البيت اطمنهم لان كالو اتصلي ونسيت. كال: اخذي راحتج بس رجعي حتى نشرب جاي سوا ما شربنا. كتله: لا شكرًا بالعافية ما احب الجاي اني. طلعت ورحت اخابر. جاوبتني امي حبيبتي سالت ع الشغل كتلها ماشي الحال بس طمنيني عن وجد. كالت: نايم بعده ليضل بالج ابنج عاقل وميتعب واني عيني عليه ارتاحي يمه وهم اية متطول بس تخلص امتحان تجي وهو يحبها تلعب ويا. كتلها: ماشي ودربالج ع نفسج وختمته وياها.

طلعت هو لاكاني بيده كوب جاي. كال: يلا اذا خلصتي مكالمة تعالي يمي اخاف يجي ثامر واحتاجج. رجعت يمه وهو يشرب جاي ويصفن ويدخن. شوية فتح موضوع وضل يسولف عن عائلته. وعن بيته وحديقته ما بقى شي. ورا شوية واحنا نسولف اجه ولد شكله كلش حلو ابيض وملامحه جميلة امبين بكدي او اكبر شوي. دخل سلم وباوعلي باستغراب! كله ابوه: اعرفج ع مروة الموظفة الجديدة طبعًا من معارف جودت.

سلم عليه الولد كال: اهلا وسهلًا بيج ست مروة. اني اسحاق ابن الحجي. اعتبريني اخوج وشنو تحتاجين بخصوص الشغل او غيره اني موجود. تشكرت منه وكمت استأذنت وطلعت. حسيته اجه نقذني من ابوه. بقيت بمكتبي جان بي هواي تراب مبهذل الاوراق مطشرة. لميتها ورتبتها وخليتها ع جهة حتى اذا ميردوها اذبها. طلعت كلينكس من جنطتي ومسحت الميز صار نظيف. كعدت العب بالفون وبقيت للساعة بـ ١٢ زين محد صاحلي.

شوية واندك الباب وانفتح اني وكفت بسرعة عدلت نفسي. فات هو كال: ليش تكعدين وحدج تعالي يمي كاعدين اني واسحاق وثامر نسولف. كتله: اي شوية اجي. كال: هلا بيج انتظرج. طلع واني خليت وقت يفوت شوية ورحت لكيته بس هو. كال: راحو للميناء عدهم شغل. جان فاتح التلفزيون وطالع فلم اجنبي اني كعدت وهو رجع يسولف طبعًا عنده قدرة ع السوالف يشد الشخص كلش. بقى يسولف صارت بالوحدة وخابرني هشام كال: ها اجيج؟ كتله: خل اسأل وارجعلك خبر.

سديته وهو سمع كلامي كال: احنا نرجعج ليجي اخوج وهو عنده شغل. اني كمزت بسرعة: لا هو كال جاي اصلًا. كال: ها خلي يجي لعد ما عدنا شي. دزيت مسج لهشام كتله تعال وبس اجه رحت ركض ماريد يلتقي بي اخاف يكله اذا متكدر احنا نوصلها وطبعًا هشام عنده عيد لو هيج سمع. رجعني هشام ويسولف وياي عن الشغل ويمدح بيهم الى ان وصلنا لبيتنا ونزل وياي تغدا عدنا وراح لبيته. دخلت لكيت وجد يباوع كارتون شافني وضل يبوس بيه.

اخذته بحضني وصبت اية غدا واكلنا ويسألوني هي وامي عن الشغل كتلهم زين ماشي حاله. تالي حجيت لاية كالت: اذا حسيتي منه شي مو حلو تركي الشغل لان انتِ تكولين بس انتِ بنية وياهم. والمكان هادئ دومه ومحد يعني صيري حذرة كلش. كتلها: لا اكيد حذرة شتعرفين بيه. مرت كم يوم واني اروح هشام ياخذني ويرجعني وهذا الحجي مضايقاته تزيد. بس بصورة مغلفة وميحسس احد.

والاحظ ابنه نظراته الي ما عرف افسرها. هو ما جان يباوعلي بنظرات مو حلوة ابد. بس ما اعرف احسه مثل اليراقب تصرفاتي. فد يوم رحت للدوام ودخلت لكيت المكتب الجوا فارغ محد بي. اني متعوده اسلم عليه واصعد. بوكتها صعدت لمكتبي وجان باب المدير مفتوح سلمت عليه ورحت لمكتبي. كالعادة من اسلم عليه يسلم بحماس كلش. رحت لمكتبي ورا شوية صاح عليه ورحت. كال: تفضلي استريحي. كعدت كال: ليش ما كلتي انتِ مطلقة؟ اني صفنت لجرأته؟

كتله: حياتي الخاصة معليها بالشغل. وشنو اليضر حالته الاجتماعية بشغلي؟ اذا الها اي ضرر مو مشكلة تكدر تكول حضرتك؟ هو ابتسم وكام من المكتب كعد كدامي ويدخن ليكول قطار. كال: اكيد معليها حالتج الاجتماعية بس مستغرب اكو واحد يفرط بزوجة مثلج؟ شكد اغبياء لان فرطو بيج ثنينهم وما يقدرون النعمة الخسروها! كتله: اشكر تعاطفك استاذ بس هاي حياتي وهذا نصيبي وما احب احجي بهالموضوع. اني أترخص هسه.

عفته وكمت دايخة هذا رايح سائل عني وعارف بيه شلون مصيبة هسه يتمادى هذا! حاولت ما اتصادف ويا وهو هم ما صاحني بقيت متوترة ما صدكت خلص الدوام ورجعت للبيت. بيومها قيس ماخذ وجد عنده وليلى لكيتها عدنا. سلمت وكعدنا تغدينا بس احنا وامي لان اكرم بالشغل. بس اني اكلت قليل وانتبهولي كتلهم تعبانة كلش يمكن باجر اخذ اجازة. امي جانت تريد تروح لعرس بت خالي بس كملت غداها راحت. كعدنا اني والبنات نسولف حجيتلهم كلشي.

ليلى كالت: راقبي حركاته واقل شي عيطي وشردي لو اذاج بشي. وشيلي بجنطتج سكينة صغيرة اني اجيبلج من مصطفى عنده. ضحكت وكتلها: هههههه داخلة حرب ولج شنو؟ كالت: لا عيني الدنيا ما تتأمن. وانتِ مغناطيس مال مشاكل. تجذبين المشكلة لو بالصين هههههه. ناصبه علي وشوية غيرت من مزاجي. كالت: اليوم ابقى يمكم لان مصطفى هو وجماعته اليوم عدهم عزيمة وصديقهم مرته مسافرة وي اهلها. وحيتجمعون ببيته هيج كعدة عزابية.

فرحنا كلش لان صار هواي ما منجمعين. ورا شوية اجه مصطفى وقيس جابو وجد. مصطفى كله: فوت شوية عندي شغلة وي ليلى لا تبقى برا. فات قيس واني ما ردت اطلع. شعور اخفي عن نفسي بس هو واضح وماريد اعترف بي. ورا شوية اجت اية كالت: قيس يسأل عنج عيب كومي يمه ع ما اصبله جاي. ما قبلت اطلع وبالكوة جرتني ولبست عباية ع الجتف واني بيومها لابسة دشداشة قصيرة. احنا من طلع هشام من البيت اخذنا راحتنا باللبس لان قبل نستحي.

المهم لبست العباية ع الجتف و تنسد من كدام تتطبق. ولفيت الشال وطلعت. اول ما فتت هو كام مثل الفز من شوفتي. سلمت عليه وسلم عليه بحرارة ويسال عن كلشي. كعدت وهو كعد ووجد اجه يمي ذب نفسه بحضني. ضل يسولف وياي وكال: شخبار شغلج مرتاحة بي؟ كتله: زين ماشي حاله. كال: دربالج منهم انتبهي لكل معلومة يردوج تطبعيها وكل ورقة تنسخيها. ترى سامع فد شي مو مريح عنهم. كتله: شنو؟ يعني مثل شنو؟ كال: يعني شي يخص التزوير وتلاعب باوراق رسمية.

كتله: لا طبعًا منتبهة كلش واقل شي اشوفه اترك الشغل. كال: اتركي وتعالي اشتغلي يمنا انتِ مشتغلة قبل وتعرفين النظام. كتله: ها لا شغلي زين مرتاحة بي شكرًا. اني مندمجة واسولف واشوفه عينه بالارض. كلت معقولة قيس صاير عاقل لهالدرجة؟ انتبهت رجلي نصها طالعه. واني الغبية لابسة الحجل الي اشتراه الي بالخطوبة ابد ما نزعته. هو شافني انتبهتله جريت العباية ع رجلي. كتله: انت شخبارك شوكت تتزوج؟

ابتسم ابتسامة عريضة حسيته فرحان وهالشي غثني اكثر. كال: بعدها انتظرها تتخرج يلا نتزوج. تعرفين زواج مسؤولية واطفال. واني ماريد اأجل سالفة الطفل بعد العمر يمشي هم يلا الحك اجيب لوجد اخوة. كتله: اي ربي يوفقك بس اكيد حيعوضوك عن وجد. كال: لا محد ياخذ مكانه وجد هذا ابني البكر ولي العهد. مو صح وجد حبيب بابا تعال يمي اشو. اندار عليه وجد: لا اريد نانا ويمد ايده بصدري فشلني. هو من يريد يرضع يكول نانا.

دخلت اية بعد غياب طويل يمكن راحت تجيب الجاي من سريلانكا. كعدت يمنا وتسولف وي قيس والحلو بقيس ميانة وياهم واخواتي يرتاحوله. بقو يسولفون واني ساكته ووجد عافني وراح بحضن قيس. شوية واجه مصطفى يحمحم. كعد وغمزله هو وقيس وصارو حمر ثنينهم وجوههم محتقنة ومصطفى يسولف ويانا اني واية. اني ترخصت وطلعت. رحت لكيت ليلى ماكو شفت الحمام مسدود عرفتها بي. وراي اجت اية وياها وجد كالت: راحو. سالتني: شبيهم ذولة عدهم سالفه؟

كتلها: شمدريني اشو قيس غمزله وهذا صار احمر ويبلع ريك. كتلها: اكلج ليلى وين؟ كالت: ما دري بالحمام يمكن لان شفته مسدود واسمع صوت الماي. ههههههههههههه الا اخبلها اليوووم. كامت اية تكمز ووجد ع ضحكتها وكمزتها يكمز وياها. راحت فلشت الباب ع ليلى وفتح الباب ليلى لافه شعرها بالخاولي واية نصبت عليها نصبة. كالت: هاااا انوب ابيتنا يا منحرفييييين هااا تدزونه يم قيس حتى تشتغلون من ورانا ههههههه.

وخبلت ليلى وليلى تضرب بيها بالخاولي وكع من شعرها تكلها فكيني عابت هههه من عينج صار عندي وجع. كتلها: ولج ليلى شبيكم تخبلتو لو داخلين عليكم؟ كالت: شوف منو يحجي بابا متعرفين الخبال من يجي للضابط ههه بس لا تخافين قفلت الباب. كتلها: لج هو زوجج كاعد وذاك يغمزله وحابسين ضحكتهم كوة! كالت: اي بعد قيس ما تعبر عليه هالسوالف. حيخبل مرته باجر من يتزوج. اني سويت نفسي ما سمعت. او حتى لو سمعت شنو اريد مثلًا؟ واذا انغثيت شعليه؟

خلاص ماكو شعور مختلف اني اتخيل اكيد. بقينا للمغرب صلينا وكعدنا نسوي عشا ليلى كالت: لو تدرون شنو مشتهية اكلة. كنالها: ادللي اليعجبج. كالت: محروك اصبعه وكون حااار فلفل. كمنا اني واية وهي يمنا بس احسها لونها مخطوف. سالتها: ليلى شبيج؟ كالت: لا خيه بس صار الم من مساع واحسه جاي يزيد. كتلها: يعني ولادة؟ كالت: ما اعرف ولج اه كوة مصبرة نفسيييي. فورتلها هيل وشربت. ورا نص ساعة وعاطت ليلى. عرفتها عدها ولادة.

احتارينا بس احنا البنات. خابرت اكرم ميجاوب. هو اجه من الشغل وطلع وماكو ما ادري وين راح. خابرت ع مصطفى وكتله: ليلى عدها ولادة. خطيه انخبص كال: جاي بسرعة. حضرولها اغراض حتى لو من اغراض وجد واني جاي. تذكرت اني ملابس وجد مالت الأربعين كلها عندي جبتها وياي ببيت اهلي. راحت اية طلعت حضينه وكماط وكم لبسه صغيرة. وليلى تفتر وتبجي. الى ان اندك الباب مصطفى اجه. فتحتله ودخل هو وقيس ينتظره بالسيارة.

حضرت الاغراض واخذتها وي مصطفى وصعدها ورا وكعد يمها. خلوني بموقف مو وقته كلش. كعدت يم قيس بالكدام. واشوفه مخبوص ويانا وبسرعة مشى ويسابق السيارات. قبل لا نوصل بشوية عاطت ليلى حيل. والظاهر طك ماي الراس. وبقت تعيط وتصيح حيطلع الطفل. للحكاية بقية. بقلم شقراء (قمر كانون)